ធឿន មករា - La Reine Media

រុស្ស៊ី នៅមិនសុខ ដាក់គម្រោងចង់សង់ស្ថានីយអវកាសផ្ទាល់ខ្លួន

ទីភ្នាក់ងារអវកាសប្រទេសរុស្ស៊ី បានឱ្យដឹងថា រុស្ស៊ីសង្ឃឹមនឹងអាចបង្កើតស្ថានីយអវកាសផ្ទាល់ខ្លួន នៅឆ្នាំ2025។ គម្រោងនេះត្រូវបានគេដឹង បន្ទាប់ពីទីក្រុងម៉ូស្គូ ចង់ដកខ្លួនចេញពីកម្មវិធីស្ថានីយអវកាសអន្តរជាតិ។

ស្ថានីយអវកាសអន្តរជាតិ ISS ត្រូវបានសាងសង់ឡើងម្ដងបន្តិចៗលើលំហអវកាស និងចំណាយពេលអស់រយៈពេលជាង 2ទសវត្សរ៍ ទើបរួចរាល់ដោយជោគជ័យ ក្រោមកិច្ចសហប្រតិបត្តិការលើកដំបូងក្នុងប្រវត្តិសាស្ត្រមនុស្សជាតិ រវាងរុស្ស៊ីខ្លួនឯង, សហរដ្ឋអាមេរិក, ជប៉ុន, បណ្ដាប្រទេសអឺរ៉ុបជាច្រើនដូចជា៖ ស៊ុយអែត, កាណាដា និងអេស្ប៉ាញជាដើម។

លោក Dmitry Rogozin កំពុងកាន់តំណែងជាប្រធានទីភ្នាក់ងារអវកាសរុស្ស៊ី បានឱ្យដឹងថា៖ «ការងារយើងបានចាប់ផ្តើមហើយ លើការអភិវឌ្ឍកំណាត់បន្ទប់ដំបូង វាអាចនឹងត្រូវបញ្ជូនឡើងទៅកាន់ទីអវកាសបាននៅឆ្នាំ2025 ខាងមុខនេះ»

អ្នកទាំងអស់គ្នាច្បាស់ជាបានដឹងរូចមកហើយថា ការសាងសង់ស្ថានីយអវកាស នឹងត្រូវចំណាយទំហំទឹកប្រាក់ដ៏ច្រើនមហាសាល។ គិតមកទល់ពេលនេះ ISS ខាងលើ មានអាយុកាលប្រើប្រាស់ច្រើនឆ្នាំមកហើយ យ៉ាងណាមិញ ទីភ្នាក់ងារអវកាសអឺរ៉ុប បានបញ្ជាក់ថា វាអាចប្រើប្រាស់ដល់ឆ្នាំ2024 និងបន្តយូរឆ្នាំទៀតបាន៕

May 5, 2021

មិនធម្មតាទេ បើបានដឹងពីប្រវត្តិ Frutos កីឡាកររបស់ក្លិប Levante ហើយ

Jorge de Frutos កីឡាករសញ្ជាតិអេស្ប៉ាញ កំពុងតែលេងនៅក្លិប Levante ដែលជាក្លិបមួយនៅលីគកំពូលអេស្ប៉ាញ។ ទោះជាក្លិបមួយនេះ មិនសូវជាខ្លាំងប៉ុន្មានមែន ក៏ប៉ុន្តែខ្សែប្រយុទ្ធរូបនេះ បានទទួលការចាប់អារម្មណ៍យ៉ាងខ្លាំង ក្រោយពីកាសែតអេស្ប៉ាញមួយ បានទម្លាយអំពីជីវប្រវត្តិរបស់គេ។

Jorge de Frutos មានអាយុ 24ឆ្នាំ ទើបតែបានចាប់ផ្តើមលេងបាល់នៅអាយុ 17ឆ្នាំប៉ុណ្ណោះ ដោយលេងឱ្យក្លិប R. Majadahonda ។ លុះចូលដល់វ័យ 19ឆ្នាំ គេបានជួយឱ្យក្រុមរបស់គេឡើងមកកាន់លីគទី2 បានសម្រេចជាលើកដំបូង ដែលនេះហើយជាមូលហេតុដែល Real Madrid យកគេ មកចូលរួមក្រុមក្នុងឆ្នាំ2019 មុននឹងផ្លាស់មកលេងនៅក្លិបបច្ចុប្បន្នកាលពីឆ្នាំ2020 មកទល់នឹងបច្ចុប្បន្ន។

កីឡាករដែលសព្វថ្ងៃមានតម្លៃខ្លួនដល់ទៅ 10លានដុល្លារនេះ ត្រូវបានគេដឹងថា ជាកីឡាករដំបូងរបស់តំបន់ Navares de Enmedio នៃទីក្រុង Segovia ដែលមានលេងនៅ La Liga ។ ក្នុងរដូវកាលនេះ គេបានកំពុងតែឡើងជើងខ្លាំង ដោយជាកីឡាករបញ្ចូនបាល់ឱ្យមិត្តរួមក្រុមបានច្រើនជាងគេ និងជាកីឡាករតែម្នាក់គត់របស់ក្លិបនេះ ដែលបានស៊ុតបញ្ចូលទី 4ព្រឹត្តិការណ៍ផ្សេងៗគ្នា៕

May 3, 2021

Messi ប្តូរចិត្ត នៅបន្តជាមួយនឹង Barcelona

កុងត្រារបស់កីឡាករកំពូល Lionel Messi របស់ក្លិប FC Barcelona នឹងត្រូវផុតនៅចុងរដូវកាលនេះ ដោយកីឡាករសញ្ជាតិអាហ្សង់ទីនរូបនេះ មិនព្រមទទួលយកសំណើ ក្នុងការបន្តកុងត្រានេះជាថ្មីឡើយ កាលពីដើមឆ្នាំ2021 កន្លងទៅ។

មកទល់នឹងពេលនេះ ក្លិប FC Barcelona បានបង្ហើបថា កីឡាករដ៏ល្អមិនធា្លប់មានរបស់ក្លិបរូបនេះ អាចនឹងបន្តកុងត្រាថ្មីបន្តទៀតជាមួយខ្លួន ពីព្រោះខាងភាគីក្លិប បានប្រជុំពិភាក្សា ជាមួយនឹង Messi ផ្ទាល់ជាលក្ខណបឋម ដោយភាគីទាំងសងខាង បានព្រមព្រៀងគ្នាជាមួយនឹងលក្ខខណ្ឌមួយចំនួន ដើម្បីបន្តកុងត្រាថ្មី។

ទោះបីជាមិនទាន់ចេញសេចក្ដីប្រកាសជាផ្លូវការក្តី ក៏ប៉ុន្តែព័ត៏មាននេះ វាល្មមគ្រប់គ្រាន់ក្នុងការបំបាក់ទឹកចិត្តក្លិបធំ3 នៅអឺរ៉ុប ដែលក្នុងនោះមានដូចជា ManCity, PSG និង InterMilan ដែលគ្រោងនឹងដាក់ស្នើតម្លៃពលកម្មដ៏ខ្ពស់មួយ ដើម្បីទាក់យកកីឡាកររូបនេះ៕

May 3, 2021

Lukaku ទទួលសំណើពី Chelsea ក្នុងតម្លៃផ្តាច់កុងត្រា 135លានដុល្លារ

Chelsea នឹងមិនមានប្រៀបឡើយ ក្នុងការនាំចូល Haaland មកកាន់ក្លិបរបស់ខ្លួននារដូវកាលនេះ ដោយសារតែ Manchester City បាននាំមុខមុនរួចទៅហើយ ក្នុងការចរចាយកកីឡាករវ័យក្មេងរូបនេះ។

គ្រូបង្គោលក្លិប Chelsea លោក Thomas Tuchel បានបង្ហាញការចាប់អារម្មណ៍ទៅលើកីឡាករ ខ្សែប្រយុទ្ធមាឌឌាំង Romelu Menama Lukaku របស់ក្លិប InterMilan កំពុងតែទទួលបានការចាប់អារម្មណ៍ខ្លាំងនៅលីគកំពូលអ៊ីតាលី ដោយកំពុងតែកាន់កំណត់ត្រាកីឡាកររកគ្រាប់បាល់បានច្រើនជាងគេនៅអ៊ីតាលី និងកំពុងតែជួយក្លិប ឱ្យឈរនៅកំពូលតារាងទៀតផង។

មកទល់នឹងពេលនេះ ខាងក្លិប Chelsea បានដាក់សំណើទៅកាន់ក្លិប InterMilan ក្នុងតម្លៃផ្តាច់កុងត្រា 135លានដុល្លារ គឺធ្វើយ៉ាងណាមិនឱ្យ កីឡាកររូបនេះ ងាករេទៅក្លិបណាផ្សេងឡើយ ៕

May 3, 2021

មិនគួរឱ្យជឿ! កីឡាករម្នាក់ បង្ហាញខ្លួនមិនដែលខាននៅ La Liga ជិត 6រដូវកាលជាប់ៗគ្នា

Iñaki Williams កីឡាករខ្សែប្រយុទ្ធរបស់ក្លិប Athletic Bilbao កំពុងតែកាន់កំណត់ត្រា ជាកីឡាករដែលបង្ហាញខ្លួនបានច្រើនជាប់ៗគ្នាបំផុត នៅ La Liga ដោយតាមពីក្រោយ Juan Antonio Larrañaga ដែលមានកំណត់ត្រាចំនួន 202លើក។

កីឡាករវ័យ 26ឆ្នាំ សញ្ជាតិអេស្ប៉ាញរូបនេះ បានបង្ហាញខ្លួនជម្រើសដំបូងឱ្យក្លិប រហូតមិនដែលខកខាន 1លើកណាសោះឡើយ ដោយរាប់មក គឺចាប់តាំងពី ជាពីរបួសក្នុងឆ្នាំ2016 មក គឺគេបានបង្ហាញខ្លួននៅ La Liga មិនដែលខាន 1លើកឡើយ។

គួរឱ្យដឹងដែរថា កីឡាករ Iñaki Williams ជាកីឡាករខ្សែប្រយុទ្ធរបស់ក្លិប Athletic Bilbao ដែលសឹងតែមិនអាចខ្វះបានរាល់ការប្រកួត គេត្រូវបានគ្រូបង្វឹក ចាត់ទុកថា ជាគ្រាប់ពេជ្រនៅក្នុងការរកពិន្ទុ ឱ្យក្រុមដែលមិនសូវសម្បូរធនធានមួយនេះ៕

May 3, 2021

វិធីងាយៗ 5យ៉ាង ធ្វើឱ្យសក់ភ្លឺរលោង

មិនថាអ្នកចង់ទុកសក់ ម៉ូដណាក៏ដោយ តែ គុណសម្បត្តិ ដ៏មានថាមពលមួយ ដែលនឹងធ្វើឱ្យសក់ របស់អ្នកមានមន្តស្នេហ៍ គួរឱ្យឈ្លក់វង្វេង ដោយគ្រាន់តែក្រឡេកឃើញភ្លាមនោះ គឺភាពភ្លឺរលោងរបស់សក់។ សក់ដែលភ្លឺរលោងចាំង ដូចជាកញ្ចក់ គឺជាសក់ដែលមានសុខភាពល្អពីកំណើត និងបានទទួលការថែទាំបំប៉ន យ៉ាងទៀងទាត់ និងជាប់ជានិច្ច តែក៏មានវិធីងាយៗ ដែលអាចធ្វើឱ្យអ្នកមានសក់ភ្លឺរលោងបានដូចបំណងដែរ។ បើចង់ដឹង សូមសាកល្បងធ្វើតាមវិធី 5យ៉ាងដូចខាងក្រោមនេះ ៖

1.លាងសម្អាតសក់ដោយទឹកត្រជាក់

ទោះជាស្រឡាញ់ចូលចិត្តការងូតទឹកក្តៅឧណ្ហៗប៉ុនណាក៏ដោយ តែបើសិនជាចង់បានសក់ដែលស្អាតភ្លឺរលោងជាងមុននោះគឺ បន្ទាប់ពីកក់ហើយ ចូរលាងសម្អាតសក់ដោយទឹកត្រជាក់។ ព្រោះទឹកត្រជាក់ នឹងជួយឱ្យសម្បកក្រៅរបស់សរសៃសក់បន្តឹងខ្លួន ធ្វើឱ្យសក់ ចាំងនឹងពន្លឺដែលជះមកប៉ះ និងក្រៅពីវិធីលាងសម្អាតសក់ដោយទឹកត្រជាក់នេះហើយ ការផ្លុំសក់ដោយខ្យល់ត្រជាក់ ជាលើកចុងក្រោយ បន្ទាប់ពីផ្លុំសម្ងួតសក់ហើយនោះ ក៏ជាការជួយធ្វើឱ្យសក់ កាន់តែភ្លឺរលោងជាងមុន បានមួយកម្រិតទៀតដែរ។

2.លាងសក់ដោយទឹកសាជូរ

ក្រៅពីប្រើទឹកត្រជាក់ៗ លាងសក់ហើយ នៅអាចបន្ថែមភាពភ្លឺរលោង ពីលើនោះទៀត តាមរយ:ការប្រើទឹកសាជូរផ្លែប៉ោម(Apple Cider Vinegar) 1ចំណែក លាយជាមួយទឹក 3ចំណែក (1/3) ហើយប្រើទឹកនេះ លាបលាងក្បាល មុន ឬក្រោយពេលកក់សក់ក៏បាន។ ទឹកសាជូរ នឹងជួយសម្រួលកម្រិត pH របស់សរសៃសក់ និងស្បែកក្បាល លាងសារធាតុដែលនៅជាប់សេសសល់លើសរសៃសក់ចេញ ធ្វើឱ្យស្រោមសរសៃសក់ រាបរលោង និងចាំងពន្លឺបានល្អជាងមុន។

3.ការធ្វើ Glossing Treatment ឬការធ្វើឱ្យភ្លឺរលោង

ការធ្វើ គ្លោស៊ីង ធ្រីតមឹនត៍នេះ អាចធ្វើនៅក្នុងហាងសាឡន ឬអ្នកចង់ទិញទឹកថ្នាំ និងឧបករណ៍យកមកធ្វើដោយខ្លួនឯងនៅផ្ទះក៏បាន។ ប្រើពេលវេលាត្រឹមតែប៉ុន្មាននាទីប៉ុណ្ណោះ អ្នកនឹងមានសក់ភ្លឺ រលើបរលោង ស្អាត ទន់មានទម្ងន់ និងជាប់បានយូរជាង 1សប្តាហ៍ទៀតផង។

4.ការលាប ហ៊ែរ៍ សេរ៉ូម (Hair Serum) ក្រោយពេលកក់សក់

បន្ទាប់ពីកក់សក់រួចហើយ ពេលដែលសក់ នៅសើមៗ មិនទាន់ស្ងួតល្អនោះ សាកល្បងលាប “ហ៊ែរ៍ សេរ៉ូម” លើសរសៃសក់ រួចទុកឱ្យសេរ៉ូម បានជ្រាបចូលទៅស្រោបសរសៃសក់ ឱ្យសព្វពេញក្បាល។ បន្ទាប់ពីនោះ ក៏ជូតសក់ឱ្យស្ងួតតាមប្រក្រតី តែលើកនេះហើយ ដែលអ្នកនឹងមានអារម្មណ៍ដឹងថា សក់ឡើងទន់ជាងមុន ងាយស្រួលសិត ដោយគ្រាន់តែបង្អូសក្រាសកាត់ភ្លាម សក់នឹងរាបស្មើ និងភ្លឺរលោង ស្អាតភ្លាមឡើងតែម្តង។

5.បាញ់ស្ព្រៃយ៍ បង្កើនភាពភ្លឺរលោង

បង្កើនភាពភ្លឺរលោង ដល់សរសៃសក់ តាមផ្លូវកាត់ដ៏ខ្លីបំផុត ជាមួយនឹងការប្រើស្ប្រៃយ៍ បង្កើនភាពភ្លឺរលើបរលោង។ បាញ់ បែបប្រោះៗ ពីលើសរសៃសក់ ឱ្យទឹកថ្នាំចូលទៅស្រោបសរសៃសក់ និងចាំងភ្លឺយ៉ាងស្រស់ស្អាត ហើយស្ព្រៃយ៍ខ្លះ ថែមទាំងមានក្លិនក្រអូប បង្កើនមន្តស្នេហ៍កាន់តែខ្លាំងឡើងទៀតផង៕

May 2, 2021

ស្បែកស្អាត ស្រស់ថ្លា ភ្លឺរលោង ក្នុងរយ:ពេល 10នាទី

ក្រមុំៗសម័យឌីជីថលបច្ចុប្បន្ន ដែលជីវិតមានតែភាពរួសរាន់ រូតរះ ការងារក៏ច្រើន រឿងដែលត្រូវធ្វើ ក៏សម្បូរដែរនោះ បានក្លាយជារឿងធម្មតាទៅហើយ។ តែ ពេលបែរមក ឆ្លុះកញ្ចក់ ពឹប! ស្រាប់តែ ភ្ញាក់ខ្លួនព្រើត

«ហ្អា៎?! មុខខ្ញុំ អីក៏អាក្រក់ខ្លាំងម្ល៉េះ?»។ បែរខាងឆ្វេង ងាកខាងស្តាំ ឬមើលចំពីមុខ ឃើញឡើងទ្រោមស្រពោន រហូតយាយៗច្រឡំហៅបង ហើយតើខ្ញុំ ហ៊ឺ!។

អូ៎ៗ កុំភ័យអី នាងក្រមុំទាំងឡាយអ៊ើយ រាល់បញ្ហាទាំងអស់ សុទ្ធតែមានវិធីដោះស្រាយ។ អូខេ! ឥលូវ យើងនាំគ្នាមកមើលពីគន្លឹះល្អៗ ក្នុងការស្តារ និងមើលថែទាំស្បែក ឱ្យត្រឡប់មកស្រស់ ភ្លឺថ្លា រលោងដូចស្បែកដែលទើបកើតថ្មី ក្នុងរយ:ពេលតែ 10នាទីប៉ុណ្ណោះ…ធានាថា ងាយធ្វើ មិនពិបាក និងមិនខាតពេលច្រើនទៀតផង។

បើមានអារម្មណ៍ថា ផ្ទៃមុខឡើងទ្រោម លែងស្រស់ថ្លានោះ សុំកុំភ័យបារម្ភអី ព្យាយាមធ្វើចិត្តឱ្យសប្បាយៗបន្ធូរអារម្មណ៍ (នេះក៏ជាវិធីពន្យារភាពចាស់ ប្រឆាំងនឹងភាពជ្រីវជ្រួញមួយដែរ) ហើយសម្លឹងរកមើល ដើមប្រទាលកន្ទុយក្រពើ ដែលនៅជិតខ្លួនអ្នក…ហ្នឹងហើយ ដែលជាគន្លឹះចម្បង នៃរូបសម្ផស្សកម្រិតកំពូលនោះ…។

តើនៅក្នុងសាច់ របស់ធាងដើមប្រទាលកន្ទុយក្រពើ មានអ្វីពិសេសខ្លះទៅ?

សាច់ថ្លាៗ ដូចចាហួយ នៅក្នុងធាងនៃដើមប្រទាលកន្ទុយក្រពើ មានជាតិទឹក 99.5ភាគរយ ដូច្នេះហើយទើបវាផ្តល់នូវអារម្មណ៍ស្រស់ថ្លា និងសំណើមដល់ស្បែកបានយ៉ាងល្អ ហើយនៅមាន សារធាតុ Polysaccharide, ខ្លៃខូប្រូធីន, វិតាមីន, សារធាតុរ៉ែ, និងអង់ហ្ស៊ីម ដែលជាសារធាតុថែបំប៉ន និងការពារការរលាកដ៏មានប្រសិទ្ធភាព។ សាច់ចាហួយ ក្នុងធាងប្រទាលកន្ទុយក្រពើ អាចជួយបន្ធូរអាការស្បែករលាកដោយសារកម្ដៅថ្ងៃ ផ្តល់នូវសំណើមដល់ស្បែក និងជួយការពារ មិនឱ្យស្បែកឡើងពណ៌ខ្មៅស្រគាំឡើយ និងដែលសំខាន់នោះ គឺវាថែមទាំងជួយបន្តឹងស្បែក បានយ៉ាងមានប្រសិទ្ធភាព ធ្វើឱ្យវាក្លាយជា “ម៉ាស់ បកមុខ” ដ៏ពេញនិយមសម្រាប់នារីៗ ដែលតែងតែលាបសម្អាតផ្ទៃមុខ មុនពេលចេញទៅចូលរួមក្នុងពិធីជប់លៀងនៅពេលរាត្រីទៀតផង។ ក្រៅពីនេះ នារីៗយើងនៅនិយមយកសាច់ក្នុងធាងប្រទាលកន្ទុយក្រពើ មកធ្វើម៉ាស់បកមុខ មុនពេលគេង ដើម្បីបន្ថែមភាពតឹងរលោងផ្តល់ភាពស្រស់ថ្លា ក្មេងជាងវ័យ ដល់ស្បែកមុខទៀតផង ។

វិធីធ្វើ ម៉ាស់បកមុខប្រទាលកន្ទុយក្រពើ

ធ្វើម៉ាស់ បន្តឹងស្បែកមុខបែបងាយៗ ដោយកាត់ធាងប្រទាលកន្ទុយក្រពើមក ហើយឆូតៗតាមបណ្តោយធាងហើយយកទឹកចាហួយ ដែលហូរចេញមកនោះ មកលាបលើផ្ទៃមុខ ដែលបានលាងសម្អាតរួចហើយ…ទុកចោលត្រឹមតែ 10នាទី រួចហើយសឹមលាងចេញដោយទឹកត្រជាក់។ ត្រឹមតែប៉ុណ្ណឹង អ្នកនឹងមានអារម្មណ៍ដឹងថា ស្បែកមុខឡើងស្រស់ថ្លា តឹងរលោង ម៉ដ្ឋខៃ មើលទៅក្មេងជាងវ័យទៀតផង (បើមិនជឿ សាក-លមើល៍ទៅ!)៕

May 2, 2021

វិធីថែបំប៉នស្បែកមុខ ឱ្យស្រស់ថ្លា ដោយផ្លែឪឡឹក

វិធីធ្វើ គឺចិតសាច់ឪឡឹក ជាបន្ទះស្តើងៗ ធំល្មម ដោយជ្រើសយកតែសាច់ក្នុងបំផុត កុំយកសាច់ដែលនៅជាប់នឹងសម្បក ព្រោះសាច់នៅកន្លែងនេះ មានសារជាតិអាស៊ីតច្រើន ហើយរឹង មិនស័ក្តិសមនឹងយកមកប្រើឡើយ ។ ពេលបានបន្ទះសាច់ឪឡឹកស្តើងៗមកហើយ ចូរយកមកដាក់តម្រៀប នៅលើបន្ទះក្រណាត់សស្តើង ដែលត្រៀមទុកមុនស្រេចហើយ បន្ទាប់មក ចូរលើកយកមកបិទ ពីលើផ្ទៃមុខឱ្យសព្វកន្លែង។ ទុកចោលប្រមាណ 10-15នាទី រួចសឹមលាងមុខ ចេញដោយទឹកស្អាត។

លទ្ធផលដែលទទួលបានពីការថែបំប៉នស្បែកមុខ ដោយសាច់ផ្លែឪឡឹកនេះគឺ ភាពត្រជាក់របស់ផ្លែឪឡឹកនឹងជួយបន្ធូរសភាពស្បែក ឱ្យស្រស់ស្រាយឡើង។ សារធាតុពណ៌ក្រហម របស់សាច់ឥឡឹក ដែលហៅថា ឡៃខូពីនដែលមាន អ៊ែនធីអុកស៊ីឌែន នោះ ក្រៅពីជួយក្នុងការថែបំប៉នបេះដូង រួមទាំងការពាររោគមហារីកហើយនោះ នៅអាចបឺតយកចេញ នូវជាតិខ្លាញ់ ដែលមាននៅលើផ្ទៃមុខបានយ៉ាងល្អ និងថែមទាំងសម្បូរទៅដោយប៉ូតាស្យ៉ូម ដែលនឹងជួយគ្រប់គ្រងប្រព័ន្ធការហូរវិលរបស់លោហិត នៅម្តុំផ្ទៃមុខឱ្យមានសភាពប្រក្រតី។ ជួយឱ្យរន្ធរោម មានភាពយឺតយារ ស្រស់បស់ ហើយនៅក្នុងទឹកសាច់ឪឡឹក ក៏មានម៉ូលេគូល របស់ស្ករច្រើនសមល្មម រួមទាំងមានអាស៊ីត អាមីណូ បន្តិចបន្តួច ដែលជួយក្នុងការថែបំប៉នស្បែកបានយ៉ាងល្អទៀតផង៕

May 2, 2021

វិធីជួយឱ្យសក់ឆាប់ដុះវែង តាមបែបធម្មជាតិ

បុរសជាច្រើន ចូលចិត្តតែនារី ដែលមានសក់វែងរំសាយ ហើយសក់វែងនេះ ក៏ជាមន្តស្នេហ៍មួយដែលបញ្ជាក់ពីភាពជាសុភាពនារី របស់ពួកយើងជាស្រីៗដែរ ដូច្នេះបើនារីៗណា ចង់ឱ្យសក់ឆាប់វែង តាមបែបធម្មជាតិនោះ សូមសាកល្បងអនុវត្តតាមវិធីជំរុញ ឱ្យសក់ឆាប់ដុះវែង តាមបែបធម្មជាតិដូចខាងក្រោមនេះ :

-ប្រមូលសារធាតុអាហារ ដែលសំខាន់ចំពោះសរសៃសក់

សារធាតុអាហារ ដែលសំខាន់បំផុតចំពោះការដុះលូតលាស់របស់សរសៃសក់ ច្រើនតែបង្កប់នៅក្នុងអាហារដែលយើងញ៉ាំរាល់ថ្ងៃហ្នឹងឯង ដូច្នេះត្រូវញ៉ាំអាហារណា ដែលសម្បូរដោយ ប្រូតេអ៊ីន ព្រោះវានឹងជួយបង្កើនភាពរឹងមាំដល់សរសៃសក់ទាំងមូល មិនធ្វើឱ្យសក់ផុយស្រួយ ងាយដាច់ជ្រុះឡើយ។ អាហារដែលសម្បូរប្រូតេអ៊ីន មានដូចជា : សណ្តែក សាច់សត្វ យ៉ាអួ និងតៅហ៊ូ ជាដើម ហើយគួរតែទទួលទានបន្ថែមនូវសារធាតុខ្លាញ់ល្អ ដែលមាននៅក្នុងផ្លែប៊័រ និងខ្លាញ់ត្រី ពីសាច់ត្រីសាល់ម៉ុន និងត្រី ម៉ាក់ឃើរេល (ត្រីសាបាក់) ផងដែរ។ ក្រៅពីនេះ អ្នកគួរឱ្យរាងកាយទទួលបាននូវសារធាតុដែក រួមទាំងវីតាមីនC និង B រួមជាមួយផង ព្រោះសារធាតុអាហារទាំងនេះ នឹងជួយឱ្យសក់របស់យើងរឹងមាំ មានសុខភាពល្អ មិនបែកចុង ឬចុះខ្សោយ ឆាប់ដាច់ជ្រុះឡើយ។ អាហារដែលសម្បូរសារធាតុ

អាហារល្អៗទាំងនោះ មានដូចជា សណ្តែក គ្រាប់ធញ្ញជាតិ អង្ករស្រូវសាលី ផ្លែគីវី បន្លែស្លឹកពណ៌បៃតង ម្ទេស ស៊ុតក្រហម និងគ្រំអយស្ទ័រហ្នឹងឯង។

-តម្រឹមសក់ រៀងរាល់ 2ខែម្តង

មនុស្សជាច្រើន មិនហ៊ានកាត់តម្រឹមចុងសរសៃសក់ឡើយ ព្រោះខ្លាចសក់ក្រដុះវែង តែការពិតវិញ បើអ្នកមិនព្រមទៅកាត់តម្រឹមសក់ រៀងរាល់ 5 – 8សប្តាហ៍ម្តងទេនោះ សក់របស់អ្នកនឹងរឹតតែស្ងួត បែកចុងឡើងរៀងរាល់ថ្ងៃ ហើយសក់បែកចុង ដែលមិនត្រូវបានកម្ចាត់ចោលនោះ នឹងកាន់បន្តបែក ដេញឡើងមករកគល់សក់ជារឿយៗ ជាហេតុធ្វើឱ្យសរសៃសក់ មិនបានដុះវែងដូចបំណង និងបញ្ហាមួយទៀត គឺសក់ស្ងួត បែកចុងនេះ ថែមទាំងធ្វើឱ្យសក់របស់អ្នកមើលទៅផុយ ខ្សោយ និងឡើងសំពោង គ្មានទម្ងន់ទៀតផង។

-ធ្វើម៉ាស្សាស្បែកក្បាល ជំរុញចលនាឈាមរត់

តើអ្នកដែលសង្កេតមើលទេថា ពេលដែលយើងទៅកក់សក់នៅហាងធ្វើសក់ ជាងកក់សក់តែងតែធ្វើម៉ាស្សាក្បាលរបស់យើង ខណ:ពេលបំពោកគ្រីមម៉ាស្សាសក់គ្រប់ពេល។ ព្រោះថា ការម៉ាស្សាស្បែកក្បាលនឹងជួយជំរុញចលនាឈាមរត់នៅម្តុំស្បែកក្បាល ដែលហុចផលឱ្យសរសៃសក់មានសុខភាពល្អឡើងតាមនោះដែរ។ ដូច្នេះនៅរៀងរាល់ពេលកក់សក់ ចូរអ្នកយកម្រាមដៃឈ្លីស្បែកក្បាល ដោយដេញចាប់ពីម្តុំកញ្ចឹងក ឡើងរហូតមកដល់គល់សក់ផ្នែកខាងមុខ ប្រមាណជា 2- 3នាទី ក៏គ្រប់គ្រាន់ហើយ។

May 2, 2021

មុខស្អាត តែ ក្លៀកស្អុយ ប្រុសៗថយក្រាក!

តើអ្នកនាងកញ្ញាទាំងឡាយ ដឹងទេថា ក្រៅពីមុខស្អាតៗរបស់យើង ដែលមានសម្រាប់ ឱ្យបុរសៗឈ្លក់វង្វេងហើយនោះ ក្លិនខ្លួនក៏ជារឿងមួយ ដែលសំខាន់មិនចាញ់គ្នាប៉ុន្មានឡើយដែរ ព្រោះបុរសៗសម័យនេះ គេប៉ិនចាំចាប់កំហុសនារីៗដូចពួកយើងខ្លាំងណាស់ តែវាក៏ជារឿងមួយត្រឹមត្រូវដែរ ដែលថា ពួកកំលោះៗ ប្រហែលជាមិនចង់បានសង្សារ ដែលមានក្លិនខ្លួន មិនគួរឱ្យបេតីនោះទេ។

បញ្ហានៃការកើតមានក្លិនខ្លួន ឬក្លឹនក្លៀកនេះ វាបណ្តាលមកពីច្រើនមូលហេតុ តែរឿងដែលនៅកៀកបង្កើយនឹងខ្លួនយើងបំផុតនោះ គឺប្រហែលជារឿង “ញើស” ហើយមើលទៅ ព្រោះថា ញើសនេះវាមានអាហារដែលមេរោគបាក់តេរីត្រូវការ។ ពេលញើសចេញមកភ្លាម បណ្តាមេរោគបាក់តេរីទាំងឡាយ ក៏មករោមស៊ីញើសភ្លែត រួចថែមទាំងរំលាយ ចេញមកជាក្លិនឃ្មឹសៗ សាយភាយឡើង ធ្វើឱ្យនារីៗយើង ខ្មាស់គេទៀតផង។ ធ្ងន់ធ្ងរជាងនោះទៅទៀតគឺ បើញើសចេញមកច្រើន វាថែមទាំងបានបន្សល់ទុកនូវស្នាមប្រឡាក់សើមៗ នៅលើអាវទៀតផង ។

អូខេ! ដឹងតែត្រឹមប៉ុណ្ណឹង វាសែនរន្ធត់ញាប់ញ័រ ណាស់ទៅហើយ…តែ នារីៗទាំងឡាយ កុំអាលភ័យអី យើងមានវិធីរម្ងាប់ញើស និងក្លិនឱ្យបាត់ឈឹង មកជម្រាបជូនដូចតទៅ ៖

-ជ្រើសរើសស្លៀកពាក់ខោអាវណា ដែលទូលាយ ស្រឡះ ស្តើង និងមិនរឹបខ្លួន ណែនជ្រុលពេក ដើម្បីឱ្យខ្យល់ចេញចូលបានងាយស្រួល។

-ងូតទឹក 1ថ្ងៃយ៉ាងតិច 2ដង និងសង្កត់ធ្ងន់លើការដុសសាប៊ូនៅត្រង់ប្រឡោះក្លៀក ឱ្យបានស្អាត។

-កោររោមក្លៀកជាប្រចាំ មិនគួរបណ្តោយឱ្យដុះស្រមេមស្រមាមឡើយ ព្រោះវា គឺជាដើមហេតុនៃភាពសើមអាប់ និងថែមទាំងជាកន្លែងបណ្តុះមេរោគបាក់តេរី ទៀតផង។

-កាត់បន្ថយ ឬតមការញ៉ាំអាហារណា ដែលមានក្លិនឈួលខ្លាំង ដូចជា ខ្ទឹមបារាំង ខ្ទឹមក្រហម ខ្ទឹមស-ល- ព្រោះអាហារទាំងនេះ គឺជាអ្នកជំរុញ ឱ្យក្លិនខ្លួនរបស់អ្នកកើតឡើង។

-កាត់បន្ថយការញ៉ាំភេសជ្ជៈដែលមានជាតិ កាហ្វេអ៊ីន ដូចជា ទឹកតែ កាហ្វេ ទឹកភេសជ្ជៈកំប៉ុង និងស្រាផងដែរ។

-ឈប់ជក់បារី ក្លិនក៏ឈប់តាមមកដែរ។

-ចុងក្រោយ ចូរកុំភ្លេចប្រើ Roll on (ប្រដាប់លាបបំបាត់ក្លិនក្លៀក) ដែលអាចជួយការពារញើស និងក្លិនខ្លួនបានយ៉ាងល្អ។

ចូរមើលថែក្លិនខ្លួនរបស់យើង ឱ្យបានក្រអូប និងស្រស់ថ្លាជានិច្ច ដើម្បីកុំឱ្យកំលោះៗ គេនាំគ្នាបែរខ្នងដាក់ និងយកទៅនិយាយដើមបាន៕

May 2, 2021

Author: ធឿន មករា