សម្រាប់ស្រ្តីដែលកំពុងតាំងគភ៌ អាចនឹងត្រូវបន្ថែមការប្រុងប្រយ័ត្នឱ្យកាន់តែខ្លាំងជាងមុនបន្តិចហើយ ព្រោះអាចនឹងកើតមានឧបត្តិហេតុឡើងបានក្នុងអំឡុងពេលមានគភ៌នេះ ដូច្នេះយើងនាំគ្នាមកមើលពី 10 ឧបត្តិហេតុដែលស្រ្តីមានគភ៌ច្រើនតែមិនបានប្រុងប្រយ័ត្ន និងដែលគួរតែបង្កើនការប្រុងប្រយ័ត្នឱ្យកាន់តែខ្លាំងឡើង។
1 . ត្រូវគេដើរបុកខ្លាំងៗនៅក្នុងកន្លែងដែលមានមនុស្សច្រើនកុះករ
នឹងហាមមិនឱ្យស្រ្តីមានគភ៌ដើរទៅណាមកណាសោះ ក៏ប្រហែលជាមិនអាចទៅរួចឡើយ និងជួនកាលក៏អាចនឹងរឹតតែពិបាកទៅទៀតក្នុងការចៀសពីទីប្រជុំជន កន្លែងដែលមានមនុស្សច្រើនកុះករ ដែលអាចនឹងធ្វើឱ្យមានឱកាសដែលស្រ្តីមានគភ៌ត្រូវប៉ះ ឬបុកចំក្បាលពោះខណៈពេលដើរបញ្រ្ចាស់នឹងអ្នកដទៃកាន់តែច្រើនឡើងដែរ។
2 . ធ្លាក់ពីកាំជណ្តើរ ឬក្រឡាច់ស្បែកជើងកែងចោត
ស្រ្តីមានគភ៌ដែលស្រឡាញ់ភាពស្រស់ស្អាតតែងតែមានកង្វល់ថា ខ្លាចនឹងមិនស្អាត រួមទាំងស៊ាំធ្លាប់ និងប្រាកដក្នុងចិត្តថាអាចនៅពាក់បានគ្មានបញ្ហាទៀតផង ទើបនៅតែពាក់ស្បែកជើងកែងចោតដូចធម្មតា ដូច្នេះសូមប្រាប់ថា មួយអំឡុងពេលនេះប្រហែលជាត្រូវផ្អាកមួយរយៈសិនហើយ ព្រោះការពាក់ស្បែកជើងកែងចោត ស្រ្តីមានគភ៌ត្រូវតែខំពង្រឹងជើងទាំងមូល និងក្បាលពោះដើម្បីព្យាយាមទប់លំនឹងខ្លួនឱ្យដើរបានស្រួល ដែលអាការទាំងនេះនឹងក្លាយជាលទ្ធផលធ្វើឱ្យស្រ្តីមានគភ៌ឈឺជើង ឈឺខ្នង ដែលនឹងហុចផលអាក្រក់ដល់សុខភាពកាយ និងដែលសំខាន់កែងស្បែកជើងដែលរាវតូច និងខ្ពស់នោះ ប្រហែលជាមិនអាចទ្រទម្ងន់ខ្លួនដែលកើនឡើងជាបន្តបន្ទាប់របស់ស្រ្តីមានគភ៌បានឡើយ ទើបអាចធ្វើឱ្យស្រ្តីមានគភ៌ក្រឡាច់ជើង និងធ្លាក់លើពីស្បែកជើងកែងចោតរហូតធ្វើឱ្យរងរបួសបាន។
3 . ពោះបោកប៉ះនឹងដៃចង្កូតឡាន
ស្រ្តីមានផ្ទៃពោះដែលបើកឡានដោយខ្លួនឯង ទោះជាមិនកើតមានឧបត្តិហេតុមែន តែក៏អាចពេលខ្លះដែលឡានត្រូវជាន់ហ្វ្រាំងបន្ទាន់ និងខ្លាំង រហូតពោះដែលមានទំហំធំនោះអាចនឹងបោកប៉ះនឹងដៃចង្កូតឡានបាន ដែលទោះជាមិនមានគ្រោះថ្នាក់អ្វីធ្ងន់ធ្ងរមែន តែបើសិនជាបោកប៉ះញឹកញាប់ ឬខ្លាំងៗ ក៏ច្បាស់ជាកើតមានគ្រោះថ្នាក់ដល់ទាំងខ្លួនអ្នកម្តាយ និងកូនក្នុងផ្ទៃមិនខាន។
4 . ជិះម៉ូតូ ឬបើកម៉ូតូ ឡានធ្លាក់ជង្ហុករណ្តៅញឹកញាប់
បើស្រ្តីមានគភ៌ត្រូវជិះម៉ូតូ ឬបើកឡានដោយខ្លួនឯងនោះ ការបើកធ្លាក់ជង្ហុក ឬការបោកប៉ះរញ្ជួយគឺជារឿងដែលពិបាកនឹងចៀសវាងបានណាស់ តែបើបានទទួលរងការបោកប៉ះរញ្ជួយយ៉ាងធ្ងន់ធ្ងរ ដូចជា ធ្លាក់ជង្ហុកជ្រៅៗ និងខ្លាំងៗនោះ ក៏ជាគ្រោះថ្នាក់មិនតិចតួចឡើយ។
5 . ខ្សែក្រវាត់សុវត្ថិភាពរថយន្តរឹតពោះ
បើស្រ្តីមានគភ៌ពាក់ខ្សែក្រវាត់សុវត្ថិភាពមិនបានត្រឹមត្រូវ ក្រៅពីនឹងមិនអាចជួយការពារពីគ្រោះថ្នាក់ដែលកើតឡើងហើយនោះ នៅទទួលរងអាការឈឺចាប់ដែលកើតឡើងបាន និងអាចបណ្តាលឱ្យមានបញ្ហាដល់គភ៌ទៀតផង។
6 . អង្គុយហើយក្រោកឈរឡើងលឿនពេក
អាការធ្វើអ្វីលឿនៗ រហ័សៗនេះ គឺជាឥរិយាបថដែលសន្សំធ្លាប់មកយូរហើយ បើចង់ឱ្យផ្លាស់ប្តូរក្នុងអំឡុង 2 – 3 ខែដំបូងនោះ ប្រហែលជាត្រូវប្រើពេលវេលាបន្តិចហើយ ហើយភាគច្រើនការងើបក្រោកឈររហ័សៗនេះ ច្រើនតែកើតឡើងចំពោះស្រ្តីមានគភ៌ដំបូងៗនេះឯង។
7 . ជំពប់ជើង នឹងកៅអី វត្ថុរបស់របរផ្សេងៗ ជាយសំពត់ ជើងខោ .ល .
ឧបត្តិហេតុដែលច្រើនតែជួបញឹកញាប់នៅក្នុងក្រុមនេះគឺ ដើរបុកតុ បុកកៅអី ទាត់ឡាំងដែលដាក់នៅលើឥដ្ឋ ឬបើស្លៀកខោ ឬសំពត់វែងៗ ស្រ្តីមានគភ៌អាចនឹងទាក់ជើង ឬជំពប់ជើងនឹងជើងខោ ឬជាយសំពត់ខ្លួនឯងហ្នឹងឯង។
8 . រអឹលដួល (ក្នុងបន្ទប់ទឹក ជណ្តើរ)
ដោយទម្ងន់ខ្លួនដែលកើនឡើង បូកជាមួយការធ្វើចលនាដែលមិនសូវជារហ័សរហួនដូចកាលពីមិនទាន់មានគភ៌ ស្រ្តីមានគភ៌អាចនឹងភ្លេចខ្លួនដើរលឿនៗ ឈានជើងទៅយ៉ាងមិនបានប្រយ័ត្ន និងមិនបានមើលផ្លូវ អាចធ្វើឱ្យការប៉ាន់ស្មានរយៈចម្ងាយខុសឆ្គងបាន បើក្នុងអំឡុងពេលដែលមិនបានតាំងគភ៌នោះ ក៏ប្រហែលជាអាចនឹងចាប់កាន់ តោង ឬទប់ខ្លួននឹងអ្វីៗជុំវិញខ្លួនមិនឱ្យដួលបាន តែបើក្នុងពេលមានគភ៌វិញ រឹតតែពោះធំឡើងនៅពេលណា ភាពរហ័សរហួនក៏នឹងថយចុះពេលនោះដែរ ដូច្នេះស្រ្តីមានគភ៌ទាំងឡាយគួរប្រយ័ត្នលើចំណុចនេះឱ្យបានខ្ពស់។
9 . ក្បាលពោះបុកនឹងតុ បុកនឹងទ្វា .ល.
ពីដើមដែលក្បាលពោះធ្លាប់តែរាបសំប៉ែត តែពេលមានគភ៌ដែលពោះកាន់តែធំឡើងក្នុងមួយខែៗ និងដោយភាពដែលមិនទាន់ស៊ាំធ្លាប់ ជាពិសេសស្រ្តីមានគភ៌ថ្មោងថ្មីផងនោះ អាចនឹងធ្វើឱ្យការប៉ានស្មានចម្ងាយពីក្បាលពោះរបស់ខ្លួននឹងវត្ថុផ្សេងៗមានការខុសឆ្គង ទើបធ្វើឱ្យយើងធ្លាប់ឃើញស្រ្តីមានគភ៌ជាច្រើនដើរបុកនេះបុកនោះជាប្រចាំ ដោយសារតែមិនទាន់ស៊ាំធ្លាប់ហ្នឹងឯង។
10 . ភ្លេចខ្លួនលើករបស់ធ្ងន់ៗ លើសកម្លាំង ឬភ្លេចខ្លួនឱនចុះទាំងក្បាលពោះធំ
ច្រើនតែកើតឡើងចំពោះស្រ្តីមានគភ៌ដែលសម្បូរកម្លាំងដែលស៊ាំធ្លាប់ជាមួយទង្វើការលើកនេះលើកនោះដោយខ្លួនឯង តែនៅពេលមានគភ៌ហើយ ស្រ្តីមានគភ៌មិនគួរលើករបស់របរធ្ងន់ៗដោយខ្លួនឯងឡើយ គួរហៅលោកប្តី ឬមិត្តរួមការងារដែលជាមនុស្សប្រុសឱ្យមកជួយវិញទើបប្រសើរជាង ចំណែកការភ្លេចខ្លួនឱនពាក់ស្បែកជើង ឬធ្វើអ្វីមួយភ្លែតៗលឿនៗជ្រុលហួសហេតុពេកនោះ ភាគច្រើនៗកើតចេញពីភាពស៊ាំធ្លាប់កាលពីពេលមិនទាន់មានផ្ទៃពោះ និងច្រឡំធ្វើឡើងដោយស្វ័យប្រវត្តិ៕
