Author: ធឿន មករា

រដ្ឋាភិបាលចេញយុទ្ធសាស្ត្រ5ចំណុចដើម្បីអភិវឌ្ឍវិស័យកាត់ដេរ ស្បែកជើង និងកាបូបនៅកម្ពុជារហូតដល់ឆ្នាំ2025
វិស័យកាត់ដេរ ស្បែកជើង និងកាបូបនៅកម្ពុជា ជាផ្នែកយ៉ាងសំខាន់មួយដែលអាចផ្តល់ការងារធ្វើសម្រាប់ប្រជាជនជាច្រើននាក់នៅទូទាំងប្រទេស និងផ្តល់ផលចំណេញជាច្រើនសម្រាប់វិស័យសេដ្ឋកិច្ចកម្ពុជា។
ក្រសួងសេដ្ឋកិច្ច និងហិរញ្ញវត្ថុបានបញ្ជាក់ថា វិស័យកាត់ដេរ ផលិតស្បែកជើង និងកាបូប បានដើរតួយ៉ាងសំខាន់ រួមចំណែកយ៉ាងធំដល់ការអភិវឌ្ឍសេដ្ឋកិច្ចកម្ពុជា តាមរយៈ ការបង្កើតការងារ បង្តើនចំណូលដល់ប្រជាពលរដ្ឋ និងកាត់បន្ថយភាពក្រីក្រ ។ ថ្វីត្បិតវិស័យកាត់ដេរ ផលិតស្បែកជើង និងកាបូបត្រូវបានអភិវឌ្ឍជាបន្តបន្ទាប់ ដោយផ្អែកលើភាពខ្លាំងដែលជាឧត្តមភាពប្រកួតប្រជែងកន្លងមក វិស័យ នេះ នៅជួបនឹងបញ្ហាប្រឈមមួយចំនួន ។
ដើម្បីដោះស្រាយបញ្ហាប្រឈម និងអភិវឌ្ឍវិស័យដ៏សំខាន់នេះ រដ្ឋាភិបាលបានរៀបចំយុទ្ធសាស្ត្រអភិវឌ្ឍន៍វិស័យកាត់ដេរ ផលិតស្បែកជើង និងកាបូបកម្ពុជា 2020-2025 ដោយក្នុងនោះមានយុទ្ធសាស្ត្រសំខាន់ៗចំនួន5ចំណុចគឺ៖
1. បន្តពង្រឹងធនធានមនុស្សដើម្បីបង្កើនផលិតភាព និងបង្កើតគន្លងអាជីពសម្រាប់កម្មករ-និយោជិត
  2. បន្តធ្វើឱ្យប្រសើរឡើងនូវលក្ខខណ្ឌការងារ និងសុខុមាលភាពរបស់កម្មករ-និយោជិត
  3. លើកកម្ពស់ការវិនិយោគក្នុងស្រុក និងអន្តរជាតិដោយផ្តោតលើផលិតផលមានបន្ថែមតម្លៃខ្ពស់
  4. ទាក់ទាញការវិនិយោគនៅក្នុងឧស្សាហកម្មគាំទ្រវិស័យនេះ
  5. ជំរុញការធ្វើពិពិធកម្មទីផ្សារសម្រាប់ការនាំចេញផលិតផលកាត់ដេរ ស្បែកជើង និងកាបូប៕
July 30, 2020
កម្ម៉ង់ទុកមុនស្មាតហ្វូនជំនាន់ចុងក្រោយស៊េរី A ម៉ូឌែលថ្មី Galaxy A01 Core …និងពណ៌ថ្មី Galaxy A51 & Galaxy A71 ឥឡូវនេះនឹងទទួលបានការថែមជូនដ៏សម្បើមអស្ចារ្យជាទីគាប់ចិត្ត…!!
(ភ្នំពេញ) ថ្ងៃទី ៣០ ខែកក្កដា ឆ្នាំ២០២០៖ រីករាយជាមួយកម្មវិធីប្រូម៉ូសិនថែមជូន…ថែមថែមពីក្រុមហ៊ុន សាមសុង ឥឡូវនេះ! ចាប់ពីថ្ងៃទី 28 កក្កដា ឆ្នាំ 2020 រហូតដល់ថ្ងៃទី 01 សីហា ឆ្នាំ 2020 អតិថិជនទាំងអស់គ្រាន់តែធ្វើការកម្ម៉ង់ទុកមុននូវស្មាតហ្វូនស៊េរី A ជំនាន់ចុងក្រោយបំផុតដែលមានតម្លៃតែជាង 80 ដុល្លារ ម៉ូឌែល Galaxy A01 Core ឬ Galaxy A51 ពណ៌ប្រាក់ថ្មី ឬ Galaxy A71 ពណ៌ប្រាក់ថ្មីដែលនឹងមកដល់ក្នុងទីផ្សារព្រះរាជាណាចក្រកម្ពុជាឆាប់ៗខាងមុខនេះនឹងទទួលបានការថែមជូនយ៉ាងច្រើនសន្ធឹកសន្ធាប់មិនធ្លាប់មានដូចជា៖
* Samsung Galaxy A01 Core
– ថែមជូន អាវភ្លៀងគុណភាពខ្ពស់ដ៏ស្រស់ស្អាត 1 ភ្លាម!
– ថែមជូនលេខពិសេស Smart ធំហ្ម៎ង…តម្លៃ 29 ដុល្លារ!
– បញ្ចុះតម្លៃ 50% ពេលប្តូរអេក្រង់ថ្មីក្នុងរយៈពេល 1ឆ្នាំ!
– ផ្តល់ការធានាជូនរយៈពេល 1 ឆ្នាំ ពេញតែម្តង…!!!

* Samsung Galaxy A51
– ថែមជូន កាតាប ដែលមានគុណភាពខ្ពស់ដ៏ស្រស់ស្អាត 1 ភ្លាម!
– ថែមជូន Power Bank ហ្ស៊ីន របស់ សាមសុង ដែលមានសមត្ថភាពខ្លាំ និងសាកថ្មទូរស័ព្ទលឿន 1 គ្រាប់ភ្លាម!
– បញ្ចុះតម្លៃ 50% ពេលប្តូរអេក្រង់ថ្មីក្នុងរយៈពេល 1ឆ្នាំ!
– ថែមជូនលេខពិសេស Smart ធំហ្ម៎ង…តម្លៃ 29 ដុល្លារ!
– ផ្តល់ការធានាជូនរយៈពេល 1 ឆ្នាំ ពេញតែម្តង…!!!

* Samsung Galaxy A71
– ថែមជូន កាតាប ដែលមានគុណភាពខ្ពស់ដ៏ស្រស់ស្អាត 1 ភ្លាមៗ
– ថែមជូន ដបទឹក គុណភាពល្អដ៏ស្រស់ស្អាត 1 ភ្លាម!
– បញ្ចុះតម្លៃ 50% ពេលប្តូរអេក្រង់ថ្មីក្នុងរយៈពេល 1ឆ្នាំ!
– ថែមជូនលេខពិសេស Smart ធំហ្ម៎ង…តម្លៃ 29 ដុល្លារ!
– ផ្តល់ការធានាជូនរយៈពេល 1 ឆ្នាំ ពេញតែម្តង…!!!

វ៉ាវ…វ៉ាវ…! ពិតជាអស្ចារ្យ និងរំភើបអស់ស្ទះ! នៅចាំអីទៀត…? បើស្រឡាញ់ប្រញាប់ទិញភ្លាមទៅ! អាចទិញឱ្យខ្លួនឯង, ទិញជូនក្រុមគ្រួសារ, ឬអាចទិញជូនមនុស្សជាទីស្រឡាញ់ក៏បាន!! បើជ្រុលនឹងទិញហើយ…សូមទិញឱ្យទាន់មានកម្មវិធីប្រូម៉ូសិនតែម្តងទៅបានចំណេញកប់ៗម៉ងណា៎!!
ចង់លេងហ្វេសប៊ុក មើលរឿងម៉ាអេម និងតម្លៃសមរម្យបំផុតនោះសូមកុំភ្លេច Galaxy A01 Core!
ចង់ថតរូបស្អាតដូចតារា សូមជ្រើសរើស Galaxy A51! និងចង់លេងហ្គេមជក់ចិត្តម៉ាស៊ីនរត់លឿនដូចរន្ទះសូមជ្រើសរើសយក Galaxy A71 ចុះពិតជាមិនខកបំណងឡើយ…!! សូមធានា!!
*បញ្ជាក់៖ កម្មវិធីប្រូម៉ូសិនដ៏វិសេសវិសាលនេះគឺសម្រាប់តែការកម្ម៉ង់ទុកមុន និងសម្រាប់តែពណ៌ប្រាក់ចាប់ពីថ្ងៃទី 28 កក្កដា ឆ្នាំ 2020 រហូតដល់ថ្ងៃទី 01 សីហា ឆ្នាំ 2020 តែប៉ុណ្ណោះ!

* លក្ខខណ្ឌផ្សេងៗត្រូវបានអនុវត្ត…!!

July 30, 2020
១០ ចំណុចគួរពិចារណាមុនពេលទិញរថយន្តយកមកប្រើប្រាស់
ក្នុងយុគសម័យថ្មីនេះ មនុស្សភាគច្រើនតែងតែប្រាថ្នាចង់បានរបស់របរប្រើប្រាស់មួយចំនួនដែលមានតម្លៃសមរម្យ និងមានបច្ចេកវិទ្យាទំនើបៗដើម្បីជួយសម្រួលដល់កិច្ចការងារប្រចាំថ្ងៃរបស់ខ្លួន ហើយមធ្យោបាយធ្វើដំណើរគឺជាកត្តាដ៏សំខាន់មួយសម្រាប់ជួយដល់លោកអ្នកអោយឈានទៅដល់គោលដៅ និងសម្រេចនូវគ្រប់ភារៈកិច្ច។ បច្ចុប្បន្ននេះ យើងសង្កេតឃើញថាប្រជាជនខ្មែរមួយចំនួនធំបានងាកមកប្រើប្រាស់នូវរថយន្តថ្មីជាមធ្យោបាយសម្រាប់ធ្វើដំណើរ ហើយមុននឹងសម្រេចចិត្តទិញរថយន្តយកមកប្រើប្រាស់មនុស្សភាគច្រើនមានការគិតគូរ និងពិចារណាលើកត្តាច្រើនយ៉ាងដូចជា៖
- កម្រិតប្រាក់ចំណូល និងចំណាយប្រចាំថ្ងៃ
- គោលបំណង និងតម្រូវការនៃការប្រើប្រាស់ប្រចាំថ្ងៃ ថាតើរថយន្តនេះជិះសម្រាប់ធ្វើការក្នុងក្រុង ចុះខេត្ត ឬដំណើរកំសាន្តផ្សេងៗជាដើម។
- រថយន្តនេះមានកម្ពស់ខ្ពស់ អាចធន់នឹងស្ថានភាពពេលមេឃភ្លៀងបានដែរឬទេ
- បើសិនជាប្រាក់ចំណូលនៅមានកម្រិត តើអាចបង់រំលស់បានដែរឬទេ
- តម្លៃសមរម្យក្នុងទីផ្សារដែលស័ក្តិសមនឹងកម្រិតជីវភាពរបស់ខ្លួន
- សេវាបង់រំលស់ដែលផ្តល់នូវការប្រាក់ និងប្រាក់បង់ដំបូងទាបប្រកបដោយទំនុកចិត្ត
- មានបច្ចេកវិទ្យាទំនើបនិងប្រព័ន្ធសុវត្ថិភាពខ្ពស់
- សេវាទទួលទិញរថយន្តចាស់ផ្លាស់ប្តូរយករថយន្តថ្មី (Trade-In Service)
- គ្រឿងបន្លាស់សម្បូរបែប និងមានតម្លៃធូរថ្លៃ
- សេវាថែទាំផ្សេងៗ និងការធានាជូនពីរោងចក្រ
ដូចនេះយើងសង្កេតឃើញថា មនុស្សសម័យឥឡូវមានការយល់ដឹងច្រើន និងមានការវិភាគថ្លឹងថ្លែងគ្រប់ជ្រុងជ្រោយមុននឹងសម្រេចចិត្តទិញរថយន្តយកទៅប្រើប្រាស់។ បើសិនជាលោកអ្នកគិតដល់រថយន្តដែលអាចធ្វើដំណើរទៅតាមផ្លូវដែលមានឧបសគ្គបាននោះលោកអ្នកនឹងគិតទៅដល់រថយន្តដែលមានកម្ពស់ខ្ពស់ ឬរថយន្ត Pick Upជាដើម។ តែប្រសិនបើអ្នកត្រូវការរថយន្តដែលអាចជិះទៅធ្វើការប្រចាំថ្ងៃក្នុងទីក្រុងដែលចំណាយតិច អាចបត់បែនក្នុងស្ថានភាពផ្លូវស្ទះ ឬចង្អៀត និងអាចបើកបរទៅតាមបណ្តាខេត្តនានានោះ អ្នកនឹងគិតដល់រថយន្តប្រភេទ SUV មុនគេ។
ហើយថ្មីៗនេះយើងសង្កេតឃើញថាមានរថយន្ត SUV ខា្នតតូចមួយប្រភេទដែលកំពុងពេញនិយម និងចរាចរណ៍យ៉ាងច្រើនកុះករនៅលើដងវិថីនានាក្នុងព្រះរាជាណាចក្រកម្ពុជា ហើយរថយន្តនេះមានសមត្ថភាពអាចបើកបរបានគ្រប់ស្ថានភាពផ្លូវមិនចាញ់រថយន្តធុនធំប៉ុន្មាននោះទេ នោះគឺរថយន្ត Ford Ecosport។ រថយន្ត Ford Ecosport នេះមានតម្លៃត្រឹមតែ $29,900 លោកអ្នកបង់មុនត្រឹមតែ $5,980 និងបង់ប្រចាំខែត្រឹមតែ $397 ប៉ុណ្ណោះ នោះលោកអ្នកនឹងអាចក្លាយទៅជាម្ចាស់រថយន្តនេះបានតែម្តង។
ហើយកាន់តែពិសេស រាល់ការទិញរថយន្ត Ford Ecosport អតិថិជននឹងទទួលបានការចាក់ប្រេង 2ឆ្នាំដោយឥតគិតថ្លៃ ឬបញ្ចុះតម្លៃ $1,500 ភា្លម។
រថយន្ត Ford Ecosport មួយនេះ មានសមត្ថភាពអាចបើកបរបានគ្រប់ស្ថានភាពផ្លូវដូចជា ផ្លូវរាបស្មើក្នុងក្រុង ផ្លូវជាតិនានានិងផ្លូវតាមជនបទស្រុកស្រែចម្ការនានាជាដើម ព្រោះរថយន្ត Ford Ecosport មានកម្ពស់ខ្ពស់រហូតដល់ទៅ 209mm ពីដី ដែលអាចអោយរថយន្តនេះបើកបរបានយ៉ាងរលូន ទោះជាស្ថិតក្នុងស្ថានភាពពេលភ្លៀង ផ្លូវរអិល ពេលឡើងទួល ឬខឿនចិញ្ចើមផ្លូវក៏ដោយ។
រថយន្ត Ford Ecosport បានរចនាម៉ូដយ៉ាងល្អប្រណិតខុសប្លែកពីរថយន្តដ៏ទៃដែលស័ក្តិសមជាមួយមនុស្សគ្រប់វ័យ ទាំងសុភាពបុរសនិងសុភាពនារី។ ជាមួយនឹងរូបរាងដ៏ទាក់ទាញរបស់រថយន្តមួយនេះដោយផ្នែកខាងមុខមានរូបរាងទំនើប និងស៊ីវិល័យ ផ្នែកចំហៀងមើលទៅរឹងមាំហាប់ណែន ផ្នែកខាងក្នុងធំទូលាយ បំពាក់ដោយពូកស្បែកប្រណិត ទន់ងាយស្រួលក្នុងការអង្គុយ និងប្រកបដោយផាសុកភាព ផ្នែកខាងក្រោយធំល្មមអាចដាក់ឥវ៉ាន់បានច្រើនរហូតដល់២៥កន្លែង មិនចាញ់រថយន្ត SUV ខ្នាតធំដ៏ទៃទៀតនោះទេ។
ក្រៅពីរូបរាងនិងការឌីហ្សាញដែលបានរៀបរាប់ខាងលើ រថយន្ត Ford Ecosport ក៏បានបំពាក់នូវបច្ចេកវិទ្យា និងប្រព័ន្ធសុវត្ថិភាពឆ្លាតវៃដែលជួយសម្រួលដល់ការបើកបររបស់លោកអ្នកដូចជា សេនសឺជុំវិញរថយន្តចំនួន៨គ្រាប់ កាមេរ៉ាជំនួយក្នុងការចូលចតដែលអាច Zoom បាននិងមានខ្សែគំនូសពណ៍លឿងរ៉េតាមចង្កូត ប្រព័ន្ធចុចបញ្ឆេះរថយន្ត ឬ Smart Key បច្ចេកវិទ្យា SYNC 3 ជំនាន់ថ្មី និងអេក្រង់ Touchscreen 8 អ៊ីញដែលមានភាពរស់រវើក និងងាយស្រួលក្នុងការបញ្ជាដោយសម្លេងសម្រាប់វិទ្យុ តន្ត្រីនិងការកម្សាន្តផ្សេង។ លើសពីនេះទៅទៀត រថយន្តនេះក៏អាចភ្ជាប់ជាមួយនឹង Apple CarPlay ដើម្បីភ្ជាប់ទៅកាន់ផែនទី Google Map សម្រាប់នាំអ្នកទៅដល់គោលដៅផ្សេង។ ចំណែកឯប្រព័ន្ធសុវត្ថិភាពវិញ រថយន្តនេះមានបំពាក់ជាមួយនឹងពោងសុវត្ថិភាពជុំវិញរថយន្តចំនួន៦ ប្រព័ន្ធហ្វ្រាំង ABS ប្រព័ន្ធទប់លំនឹងរថយន្តពេលបើកបរលើផ្លូវកោងឬរអិល និងប្រព័ន្ធទប់លំនឹងពេលឡើងចំណោត។ល។
ចំណុចពិសេសដែលក្រុមហ៊ុនលក់រថយន្តដ៏ទៃមិនមានការផ្តល់ជូននោះគឺ រាល់ការទិញរថយន្ត Ford Ecosport ពីក្រុមហ៊ុនលោកអ្នកនឹងទទួលបានការចូលរួមដំណើរកំសាន្ត Ford Ecosport Family Trip ដែលធ្វើឡើងដោយក្រុមហ៊ុន Ford ផ្ទាល់ហើយការផ្តល់ជូននេះគឺមានសម្រាប់តែអតិថជន Ford Ecosport តែប៉ុណ្ណោះ ដែលដំណើរកំសាន្តនេះខាងក្រុមហ៊ុនធ្លាប់បានរៀបចំរួចមកហើយគឺដំណើតកំសាន្តទៅកាន់ខេត្តបុរីរ៉ាម ដែលជាខេត្តមួយដ៏ល្បីក្នុងប្រទេសថៃ។
លើសពីនេះទៅទៀតលោកអ្នកថែមទាំងអាចចូលរួមដំណើរកំសាន្ត Ford Adventure ដែលប្រារព្ធឡើងជារៀងរាល់ឆ្នាំដោយក្រុមហ៊ុន Ford ដែលវាមិនមែនត្រឹមតែដំណើរកំសាន្តធម្មតាតែប៉ុណ្ណោះទេ តែថែមទាំងមានសកម្មភាពសប្បុរសធម៍ដូចជា ចែកអំណោយដល់គ្រួសារក្រីក្រ ការផ្តល់សម្ភារះជូនក្មេងៗកុមារកំព្រា និងមានកម្មវិធីសប្បាយៗជាច្រើននៅក្នុងដំណើរកំសាន្តមួយនេះ។
July 30, 2020
វិធីបញ្ឈប់និស្ស័យស្រែកគំហកដាក់កូន ដឹងឱ្យហើយមុនកូនតតាំង
ជារឿងធម្មតាទៅហើយ ដែលពេលកូនៗធ្វើអ្វីខុស ឬមិនត្រូវចិត្ត លោកឪពុកអ្នកម្តាយជាច្រើននាក់តែងតែកើតអារម្មណ័មួម៉ៅ ក្តៅក្រហាយ រហូតពេលខ្លះក្លាយជាទម្លាប់និស្ស័យស្រែកគំហកខ្លាំងៗដាក់កូន តែ ឡា រ៉ែនសូមប្រាប់ទៅចុះថា ទង្វើមួយនេះមិនគួរធ្វើឱ្យក្លាយជាទម្លាប់នោះទេ ព្រោះខ្នាតមានអ្នកមកស្រែកឡូឡា ឬនិយាយស្តីច្រងេងច្រងាងខ្លាំងៗដាក់យើងដែលជាមនុស្សធំម៉េចយើងនៅមិនពេញចិត្តផង ចុះទម្រាំកូនៗដែលគ្នានៅមិនទាន់ដឹងអីនោះ។ ប្រាកដណាស់ថា កូនៗយើងក៏មិនចូលចិត្តដែរ ថែមទាំងជាការធ្វើបាបដួងចិត្តដ៏តូចមួយរបស់គេទៀតផង ដូច្នេះបើចង់បញ្ឈប់និស្ស័យនេះ សូមសាកល្បងធ្វើតាម 5 វិធីដែលឡា រ៉ែននាំយកមកជម្រាបជូននេះលមើល…។
1 . រកការងារអ្វីមួយធ្វើដើម្បីឱ្យអារម្មណ័ និងចិត្តត្រជាក់ចុះវិញ
នៅពេលណាដែលកូនសម្លាញ់ធ្វើឱ្យអ្នកមានអារម្មណ៍ខឹងមួម៉ៅ ចូរសាកល្បងតាំងស្មារតី ហើយនឹកដល់ក្តីតាំងចិត្តដែលអ្នកចង់បញ្ឈប់និស្ស័យនេះ បន្ទាប់ពីនោះក៏សាកល្បងរកការងារអ្វីផ្សេងៗធ្វើដើម្បីឱ្យចិត្តត្រជាក់ចុះវិញ រួចសឹមបែរទៅនិយាយជាមួយកូនដោយហេតុផលល្អៗត្រឹមត្រូវ។ សូមសាកល្បងធ្វើបែបហ្នឹងគ្រប់ពេលដែលមានអារម្មណ៍ថាខឹងមួម៉ៅកូន អាចនឹងជួយកាត់បន្ថយ និងបញ្ឈប់និស្ស័យនេះបាន។
2 . ដូរទឹកដមសំឡេងឱ្យស្រាលចុះ
សាកល្បងប្តូរពីការដែលចូលចិត្តតែប្រើសំឡេងមាំៗរឹងៗ ឬខ្លាំងៗស្រែកឡូឡាដាក់កូនតូច មកជាការនិយាយពិភាក្សាគ្នាដោយសំឡេងធម្មតា ស្រទន់គួរឱ្យចង់ស្តាប់វិញប្រសើរជាង។ ឡា រ៉ែនសូមប្រាប់ទៅចុះថា កូនៗនឹងជឿជាក់ និងស្តាប់អ្នកខ្លាំងជាងការដំឡើងសំឡេងដាក់គេទៅទៀត ព្រោះបើនិយាយដោយសំឡេងក្ឌុងក្ឌាំងវ៉ោកវ៉ាក សូមប្រាប់ទៅចុះថា យូរៗទៅកូនអាចនឹងមានអាការតតាំង និងរឹងទទឹង លែងជឿស្តាប់អ្នកតទៅទៀតក៏អាចថាបានដែរ ដល់ថ្ងៃនោះអ្វីៗនឹងអាចលែងកែកុនបានហើយ។
3 . កាត់បន្ថយការនឹកសង្ឃឹមលើកូន
បើអ្នកសង្កេតឃើញថា ខ្លួនឯងចូលចិត្តស្រែកឡូឡាដំឡើងសំឡេងដាក់កូនជាប្រចាំនោះ អាចនឹងមានន័យពីការដែលអ្នកនឹកសង្ឃឹមលើរូបកូនខ្លាំងជ្រុលពេក ដូច្នេះសូមសាកល្បងកាត់បន្ថយក្តីនឹកសង្ឃឹមនោះឱ្យតិចចុះ យល់ដឹងអំពីកូនឱ្យខ្លាំងឡើង ធានាថា និស្ស័យចូលចិត្តដំឡើងសំឡេងដាក់កូននឹងហាត់អស់យ៉ាងបណ្តើរៗដោយឯកឯងមិនខាន។
4 . តាំងស្មារតីមុននឹងនិយាយ
មុននឹងប្រើពាក្យសំដីស្រែកបន្ទោសស្តីថាឱ្យកូនគ្រប់ពេល សូមឱ្យឪពុកម្តាយតាំងសតិឱ្យល្អជាមុនសិន ឬអាចនឹងទន្ទេញឱ្យជាប់ក្នុងចិត្តថា គេគឺកូនរបស់យើង គេគ្រាន់តែជាកូនក្មេង គ្រាន់តែដាស់តឿនសតិខ្លួនឯងកុំឱ្យខឹងមួម៉ៅរហូតលែងដឹងខុសត្រូវតែប៉ុណ្ណោះ។ បើដាស់តឿនខ្លួនឯងបានគ្រប់ពេលបែបនេះ ធានាថានឹងបញ្ឈប់និស្ស័យយ៉ាប់នេះបានជាមិនខាន។
5 . រកមើលកិច្ចការងារធ្វើបន្ធូរអារម្មណ៍
បើលោកឪពុកអ្នកម្តាយលីសែងភាពតានតឹងធុញថប់ច្រើនរឿង រហូតធ្វើឱ្យបាត់បង់សតិស្មារតីមានរឿងអីបន្តិចគិតែស្រែកឡូឡេដាក់កូនញឹកញាប់នោះ សូមប្រាប់ទៅចុះ គួរតែរិះរកវិធីបន្ធូរអារម្មណ៍ធុញថប់តានតឹងទាំងនោះចោលខ្លះទៅ ដូចជា ស្តាប់បទភ្លេង ឬចម្រៀងបែបសប្បាយៗ ឬហាត់ប្រាណខ្លះក៏ល្អដែរ ធានាថា ដល់លែងមានភាពធុញថប់តានតឹងហើយនោះ និស្ស័យភ្លេចខ្លួនស្រែកគំហកដាក់កូន នឹងបាត់អស់ដោយឯកឯង។
បើសិនបញ្ឈប់និស្ស័យមិនល្អនេះតាំងពីដំបូងៗបាន ក្រៅពីនឹងហុចផលល្អដល់ខ្លួនលោកឪពុកអ្នកម្តាយហើយនោះ នៅជួយឱ្យកូនមិនជាប់និស្ស័យច្រងេងច្រងាងនៅពេលធំឡើងទៀតផង។ ល្អបែបនេះ ឪពុកម្តាយដែលមាននិស្ស័យឆាប់ខឹងមួម៉ៅត្រូវតែនាំគ្នាចាប់ផ្តើមហាត់រៀនហើយមើលទៅ៕
July 29, 2020
តើប្រទេសណាខ្លះនឹងធ្វើជាម្ចាស់ផ្ទះស៊ីហ្គេម បន្ទាប់ពីកម្ពុជា?
កាលពីដើមខែកក្កដា ឆ្នាំ2020 សហព័ន្ធកីឡាអាស៊ីអាគ្នេយ៍ (SEAGF) បានបើកការប្រជុំមួយនៅក្នុងទីក្រុងហាណូយ ប្រទេសវៀតណាម ដែលជាទីក្រុងម្ចាស់ផ្ទះស៊ីហ្គេមឆ្នាំក្រោយនេះ(2021) ដើម្បីពិភាក្សាអំពីបេក្ខភាពម្ចាស់ផ្ទះស៊ីហ្គេមជាបន្តបន្ទាប់ចំនួន 5លើកខាងមុខ។
ក្នុងនោះដែរ បន្ទាប់ពីឆ្នាំ2021 ដែលវៀតណាមនឹងធ្វើជាម្ចាស់ផ្ទះហើយនោះ កម្ពុជាបានបង្ហាញពីភាពរួចរាល់សម្រាប់ការធ្វើជាម្ចាស់ផ្ទះនៅឆ្នាំ2023 ហើយប្រទេសចំនួន 3ទៀត បានប្រកាសយល់ព្រមធ្វើជាម្ចាស់ផ្ទះបន្តបន្ទាប់គ្នា បន្ទាប់ពីឆ្នាំ2023 ទៅ ដែលរួមមានខេត្តឈុនប៊ុរី (ថៃ) នឹងធ្វើជាម្ចាស់ផ្ទះនៅឆ្នាំ2025 ទីក្រុងវៀងច័ន្ទប្រទេសឡាវនៅឆ្នាំ2027 និងទីក្រុងបង់ដាស៊ិរិបេកាវ៉ាន់ ប្រទេសប្រ៊ុយណេ នៅឆ្នាំ2029។
គួររំឭកដែរថា កីឡាស៊ីហ្គេម ឬកីឡានៃភូមិភាគអាស៊ីអាគ្នេយ៍នេះ បានប្រារព្ធធ្វើឡើងចំនួន 30លើករួចមកហើយ ដោយគ្រប់ប្រទេសនៃតំបន់អាស៊ានទាំងអស់ សុទ្ទតែធ្លាប់ធ្វើជាម្ចាស់ផ្ទះ លើកលែងតែប្រទេសទីម័រខាងកើត និងកម្ពុជាប៉ុណ្ណោះ តែនៅឆ្នាំ2023 ខាងមុខ កម្ពុជានឹងធ្វើជាម្ចាស់ផ្ទះជាលើកទី1 បន្ទាប់ពីអាក់ខានធ្វើជាម្ចាស់ផ្ទះតាំងពីឆ្នាំ1963 មក៕

July 29, 2020
កាន់តែកៀកថ្ងៃប្រកួត Real Madrid រកឃើញខ្សែប្រយុទ្ធម្នាក់ផ្ទុកកូវីដ-19
Real Madrid ត្រូវប្រកួតតទល់នឹងក្លិប Manchester City ក្នុងពានរង្វាន់ UEFA Champions League វគ្គ 16ក្រុមចុងក្រោយ ជើងទី2 ក្នុងថ្ងៃទី7 ខែសីហា ឆ្នាំ2020 សប្តាហ៍ក្រោយខាងមុខនេះហើយ។
តែអ្វីដែលគួរឱ្យព្រួយបារម្ភនោះគឺ កីឡាករ Mariano Diaz ខ្សែប្រយុទ្ធវ័យក្មេងនៅក្នុងក្លិបនេះ ត្រូវបានរកឃើញថា មាននផ្ទុកមេរោគកូវីដ-19 ដែលអាចនឹងធ្វើឱ្យអាក់ខានមិនបានធ្វើការប្រកួត ព្រោះអាចនឹងត្រូវដាក់កីឡាករដទៃទៀត ឱ្យនៅដាច់ដោយឡែករយៈពេល 14ថ្ងៃ។
ក្រោយពីតេស្ត ឃើញវិជ្ជមានវីរុសកូវីដ-19 កីឡាកររូបនេះត្រូវបានគ្រូបង្វឹកដកចេញពីក្រុមភ្លាមៗ ហើយអនុញ្ញាតឱ្យសម្រាកនៅដាច់ដោយឡែកនៅក្នុងផ្ទះរបស់គេតែឯង រយៈពេល 14ថ្ងៃ ដោយមិនឱ្យប៉ះពាល់ជាមួយនឹងនរណាម្នាក់ជាដាច់ខាត។ នេះបញ្ជាក់ថា កីឡាកររូបនេះនឹងអវត្តមាននៅក្នុងការប្រកួតដ៏ធំ នាពេលខាងមុខឆាប់ៗនេះយ៉ាងពិតប្រាកដ៕
July 29, 2020
អ្នកជំនាញហិរញ្ញវត្ថុបង្ហាញឥរិយាបទហិរញ្ញវត្ថុ3យ៉ាងដែលគ្រប់គ្នាគួរដឹង
ការគ្រប់គ្រងហិរញ្ញវត្ថុ ជាផ្នែកយ៉ាងសំខាន់មួយដែលមនុស្សគ្រប់គ្នាគួរដឹង ព្រោះវាជាផ្នែកយ៉ាងសំខាន់មួយក្នុងការរស់នៅ។ ហេតុនេះមនុស្សគ្រប់គ្នាគួរយល់ដឹងពីឥរិយាបទសំខាន់ៗពាក់ព័ន្ធនឹងផ្នែកនេះ។
លោក ង៉ែត ជូ អ្នកជំនាញហិរញ្ញវត្ថុបានបញ្ជាក់ថា ឥរិយាបទហិរញ្ញវត្ថសំខាន់ៗចំនួន3យ៉ាងដែលយើងគួរដឹងដើម្បីការពារខ្លួនពីវិបត្តិ និងដឹងពីផ្លូវដើម្បីអភិវឌ្ឍជីវិតរស់នៅ។ ឥរិយាបទទី1 គឺឥរិយាបទហិរញ្ញវត្ថុនាំឱ្យយើងចម្រើន។ លោកថាមនុស្សដែលមានឥរិយាបទនេះ គឺជាអ្នកចេះប្រើធនធានដែលខ្លួនមាន ចេះខ្ចី និងចេះកៀរគរទុនពីអ្នកដទៃមកវិនិយោគលើអាជីវកម្ម ឬគម្រោងវិនិយោគនានាដើម្បីទទួលបានផលចំណេញដោយស្មារតីទទួលខុសត្រូវ។ វាជាឥរិយាបទមួយដែលលំបាក តែវាអាចនាំឱ្យមានការរីកចម្រើនទាំងមិត្តភាព បញ្ញា និងទ្រព្យធន។
ឥរិយាបទទី2 គឺឥរិយាបទបែបសុវត្ថិភាព។ ឥរិយាបទនេះ គឺការចេះសន្សំប្រាក់ ចេះទិញផ្ទះ ឬខុនដូបង់រំលស់ជាដើម។ វាជារឿងងាយធ្វើ មានសុវត្ថិភាពខ្ពស់ ដោយមិនងាយជួបប្រទះនឹងហានិភ័យដែលនាំឱ្យខាតបង់ តែក៏មិនសូវនាំឱ្យរីចម្រើនផ្នែកបញ្ញា និងទ្រព្យធននោះទេ។ ភាគច្រើនមនុស្សដែលមានឥរិយាបទនេះ ជាអ្នកដែលមិនក្រខ្លាំង តែក៏មិនអាយគ្រប់ដែរ។
ចំណែកឯឥរិយាបទទី3 គឺឥរិយាបទហិរញ្ញវត្ថុនាំឱ្យអន្តរាយ។ ឥរិយាបទនេះគឺសំដៅដល់ការវាយវាយហ៊ឺហា ឬទិញសម្ភារបង់រំលស់ ដូចជារថយន្ត ម៉ូតូ ឬទូរស័ព្ទដៃជាដើម។ វាជារឿងងាយធ្វើ សប្បាយ ឬរំភើបតែពេលចាយឬទិញរបស់ថ្មីៗ ក្រោយមកជីវិតនឹងស្ថិតក្រោមសម្ពាធនៃទាសភាពផ្នែកហិរញ្ញវត្ថុ។ ជីវិតនឹងជួបប្រទះតែភាពខ្វះខាត៕
July 29, 2020
ថៃប្រកាសអាហារូបករណ៍ 232កន្លែងដល់និស្សិតកម្ពុជាសម្រាប់ឆ្នាំ 2021
ក្រសួងអប់រំ យុវជន និងកីឡា បានប្រកាសថាក្នុងឆ្នាំ2020នេះ ក្រោមគម្រោងព្រះរាជឧបត្ថម្ភដល់ព្រះរាជាណាចក្រកម្ពុជាលើវិស័យអប់រំ របស់ព្រះអង្គម្ចាស់ក្សត្រិយ៍មហាចក្រី សិរិនថន បានផ្តល់អាហារូបករណ៍ចំនួន 232កន្លែងដល់និស្សិតកម្ពុជា។
ក្នុងចំណោមអាហារូបករណ៍ចំនួន 232កន្លែងនេះ មានកម្រិតថ្នាក់បណ្ឌិតចំនួន 14កន្លែង បរិញ្ញាបត្រជាន់ខ្ពស់ចំនួន 84កន្លែង បរិញ្ញាបត្រចំនួន 129កន្លែង និងថ្នាក់បរិញ្ញាបត្ររងចំនួន 5កន្លែង។ អ្នកដែលអាចដាក់ពាក្យបានអាចជាមន្ត្រីរាជការ និស្សិត សិស្សកម្ពុជា ដើម្បីសិក្សានៅតាមគ្រឹះស្ថានចំនួន 35កន្លែងនៅប្រទេសថៃ។
ការទទួលពាក្យនឹងប្រព្រឹត្តទៅចាប់ពីថ្ងៃផ្សាយដំនឹងនេះរហុតដល់ថ្ងៃទី 21 ខែកញ្ញា ឆ្នាំ2020 នៅការិយាល័យអាហារូបករណ៍ និងកម្មសិក្សានៃនាយកដ្ឋានទំនាក់ទំនងវប្បធម៌ និងអាហារូបករណ៍៕

July 29, 2020
រដ្ឋាភិបាលអនុញ្ញាតឱ្យដំណើរការឡើងវិញនូវសកម្មភាពហាត់ប្រាណនៅទីសាធារណៈ និងក្នុងពហុកីឡដ្ឋាន
រាជរដ្ឋាភិបាលកាល តាមរយៈក្រសួងអប់រំ យុវជន និងកីឡា កាលពីពេលថ្មីៗនេះបានប្រកាសអនុញ្ញាតឱ្យដំណើរការឡើងវិញនូវសកម្មភាពហាត់ប្រាណ និងលេងកីឡាតាមទីធ្លាសាធារណៈនៅតាមរាជធានីខេត្ត និងក្នុងបរិវេនពហុកីឡដ្ឋានជាតិអូឡាំពិក។
នៅក្នុងសេចក្តីជូនដំណឹងរបស់ក្រសួងអប់រំ បានបញ្ជាក់ថា ដោយសារបច្ចុប្បន្ននេះ ការទប់ស្កាត់ជំងឺ Covid-19 នៅកម្ពុជាមានភាពល្អប្រសើរ និងអាចគ្រប់គ្រងបាន និងដើម្បីលើកកម្ពស់ការថែទាំសុខភាពផ្លូវកាយ និងផ្លូវចិត្តរបស់បងប្អូនប្រជាពលរដ្ឋតាមរយៈការហាត់ប្រាណ និងការលេងកីឡា ក្រសួងអប់រំ យុវជន និងកីឡា ទទួលបានការអនុញ្ញាតពីសម្តេចនាយករដ្ឋមន្ត្រី ដើម្បីដំណើរការឡើងវិញនូវសកម្មភាពហាត់ប្រាណ និងលេងកីឡា តាមទីធ្លាសាធារណៈនៅតាមរាជធានី ខេត្ត និងក្នុងបរិវេណពហុកីឡដ្ឋានជាតិអូឡាំពិក លើកលែងតែសកម្មភាពហាត់ប្រាណតាមក្លឹបកីឡា ដែលប្រើប្រាស់សម្ភារៈរួមគ្នា។
នៅក្នុងការអនុញ្ញាតឱ្យដំណើរការឡើងវិញនេះ ក្រសួងស្នើឱ្យទីកន្លែងហាត់ប្រាណ និងលេងកីឡាទាំងអស់ត្រូវបន្តគោរពតាមវិធានសុវត្ថិភាពសុខភាពរបស់ក្រសួងសុខាភិបាល និងអង្គការសុខភាពពិភពលោកយ៉ាងម៉ឺងម៉ាត់៕
July 29, 2020
វិធីសាងសេចក្តីសុខឱ្យខ្លួនឯង និងមនុស្សជុំវិញខ្លួន
ពិតប្រាកដណាស់ថា ពេលដែលយើងកើតមកលើពិភពលោកនេះ ម្នាក់ៗសុទ្ធតែស្វែងរកអ្វីដែលហៅថា សេចក្តីសុខ ឬសេចក្តីសប្បាយរីករាយចិត្តទាំងអស់ ព្រោះប្រហែលជាគ្មាននរណាម្នាក់ចូលចិត្តសេចក្តីទុក្ខ ឬសេចក្តីលំបាកចិត្តឡើយ ដូច្នេះសម្រាប់អ្នកណាដែលកំពុងសម្លឹងរកមើលវិធីសាងសេចក្តីសុខឱ្យជីវិតរបស់ខ្លួនឯង និងក្រុមគ្រួសារនោះ ថ្ងៃនេះឡារ៉ែនមានចំណុចណែនាំងាយៗមកជម្រាបជូនដូចតទៅ។
1 . ចេះសម្លឹងមើលអ្នកដទៃក្នុងន័យល្អ មើលពិភពលោកក្នុងន័យស្រស់ស្អាត ៈ គឺជាការហ្វឹកហាត់ខ្លួនឯងបែបងាយៗម្យ៉ាង។ ចម្បងៗនោះគឺ ការដែលយើងសម្លឹងមើលអ្នកដទៃដោយខ្សែភ្នែកនៃសេចក្តីសុខ ប្រាសចាកសេចក្តីក្រោធខឹង ស្អប់ខ្ពើម ឬប្រយ័ត្នប្រយែង ត្រឹមតែប៉ុណ្ណឹងក៏នឹងធ្វើឱ្យជីវិតរបស់យើងហ្នឹងមានសេចក្តីឡើងបានទៅហើយ រួមទាំងការហ្វឹកហាត់ឱ្យខ្លួនឯងហ្នឹងសម្លឹងមើលអ្វីជុំវិញខ្លួនបែបវិជ្ជមាន និងមិនគិតតែពីអវិជ្ជមានជ្រុលហួសហេតុពេក។
2 . ធ្វើបច្ចុប្បន្នឱ្យល្អបំផុត ៈ មានន័យថា ការមានជីវិតរស់នៅជាមួយនឹងបច្ចុប្បន្នយ៉ាងមានសេចក្តីសុខ កុំទៅកង្វល់ពីអតីតកាល ឬអនាគតដែលមិនទាន់មកដល់ ព្រោះយើងមិនអាចកែខៃអ្វីបានឡើយ ដូច្នេះទើបគួរតែមានជីវិតក្នុងថ្ងៃនេះយ៉ាងមានសេចក្តីសុខ និងធ្វើអ្វីគ្រប់យ៉ាងឱ្យល្អបំផុត នោះអនាគតដែលល្អក៏នឹងរត់មករកយើងដោយខ្លួនឯង។
3 . មានសេចក្តីសង្ឃឹម ៈ ប្រាកដណាស់ថា សេចក្តីសង្ឃឹមនេះជាអ្វីមួយដែលចិញ្ចឹមថែផ្លូវចិត្តរបស់មនុស្ស ធ្វើឱ្យកើតក្តីមានះឧស្សាហ៍ព្យាយាម ដូច្នេះទើបយើងចាំបាច់ត្រូវមានសេចក្តីសុខជាប់ជានិច្ច។ ទោះជាមានជីវិតរស់នៅជាមួយសេចក្តីទុក្ខលំបាកប៉ុនណាចូរគិត និងធ្វើគ្រប់យ៉ាងក្នុងថ្ងៃនេះយ៉ាងពេញទំហឹង និងមានសេចក្តីសង្ឃឹមជាប់ជានិច្ច ព្រោះការមានសេចក្តីសង្ឃឹមជាប់ជានិច្ចនេះ ធ្វើឱ្យជីវិតយើងមានសេចក្តីសុខបានដូចគ្នា។
4 . មើលមកខ្លួនឯងថា មានតម្លៃ ៈ ហាមគិតថា ជីវិតរបស់យើងនេះគ្មានតម្លៃសម្រាប់អ្នកណាឱ្យសោះ ព្រោះការពិតទៅ រូបយើងនេះមានតម្លៃជាមួយមនុស្សដែលគេស្រឡាញ់យើងជានិច្ច មិនថាតែឪពុកម្តាយ សាច់ញាតិបងប្អូន ឬមិត្តភ័ក្តិជិតដិត ដូច្នេះនៅពេលកើតមានអារម្មណ៍មិនល្អ ខូចចិត្ត មិនថាតែរឿងអ្វីក៏ដោយ ចូរកុំទៅប្រកាន់ខ្ជាប់ជាមួយវា បណ្តោយឱ្យវាកន្លងផុតទៅ និងគិតជាប់ជានិច្ចថា ជីវិតយើងមានតម្លៃខ្លាំងជាងដែលត្រូវនៅកប់លង់ជាមួយវា។
5 . ស្គាល់នូវការឱ្យ ៈ ការផ្តល់ឱ្យក្នុងទីនេះមិនចាំបាច់ត្រូវតែជាវត្ថុរបស់របរ ឬរបស់មានតម្លៃនោះទេ តែមានន័យពីរបស់ដែលមិនអាចកាត់ថ្លៃបាន ដូចជា ទឹកចិត្ត ជាដើម។ ការមេត្តាអនុគ្រោះចែករំលែកគឺជាវិធីបង្កើនសេចក្តីសុខខាងផ្លូវចិត្តម្យ៉ាង និងចូរយើងគិតជាប់ជានិច្ចថា ការផ្តល់ឱ្យនោះតែងតែនាំរឿងល្អៗត្រឡប់មករកទាំងអ្នកឱ្យ និងអ្នកទទួលជានិច្ច ត្រឹមតែប៉ុណ្ណឹងយើងក៏មានសេចក្តីសុខទៅហើយ។
យើងមើលឃើញថា សេចក្តីសុខគឺជារឿងដែលពាក់ព័ន្ធនឹងអារម្មណ៍នឹកគិតទាំងអស់ ហើយកម្មវិធីការបង្កើនសេចក្តីសុខនេះ មិនចាំបាច់ត្រូវមានបច្ច័យអ្វីមកពាក់ព័ន្ធនាំឱ្យច្របូលច្របល់នោះឡើយ ត្រឹមតែយើងគិតល្អ ធ្វើល្អ មានជីវិតរស់នៅជាមួយបច្ចុប្បន្នឱ្យល្អ និងមានសេចក្តីសង្ឃឹម មានកម្លាំងចិត្តជាប់ជានិច្ច ត្រឹមតែប៉ុណ្ណឹងជីវិតរបស់យើងនឹងមិនស្ថិតនៅឆ្ងាយពីពាក្យថា សេចក្តីសុខបានបាត់ទៅហើយ៕
July 29, 2020