Author: ធឿន មករា

សំណួរ – ចម្លើយ ដែលយើងគួរដឹងអំពីសុខភាពមាត់ – ធ្មេញ
មិនថាថ្ងៃមួយណាឡើយ រៀងរាល់ព្រឹកនៃការចាប់ផ្តើមភារកិច្ច រហូតដល់អំឡុងពេលចុងក្រោយមុនពេលចូលគេងសម្រាករឿងសុខភាពក្នុងប្រអប់មាត់ អញ្ចាញ និងធ្មេញនៅតែជារឿងសំខាន់ដែលយើងត្រូវតែយកចិត្តទុកដាក់មើលថែទាំយ៉ាងជាប់ជានិច្ច ដើម្បីការពារទុកជាមុន មុននឹងកើតរោគភ័យផ្សេងៗ។ ខាងក្រោមនេះគឺជាសំណួរ – ចម្លើយដែលយើងគួរតែដឹងអំពីសុខភាពមាត់ – ធ្មេញដែលមានចំណុចខ្លះយើងអាចនៅមិនទាន់ដឹងនៅឡើយ។
– ធ្មេញពីធម្មជាតិរបស់មនុស្សមានប៉ុន្មានឈុត?
ឆ្លើយ ៈ មាន 2 ឈុត គឺ ធ្មេញទឹកដោះ និងធ្មេញពិតប្រាកដ
– ធ្មេញទឹកដោះចាប់ផ្តើមដុះឡើងពេលអាយុប៉ុន្មាន?
ឆ្លើយ ៈ ពេលអាយុ 2 ខួប – 2 ខួបកន្លះ
– ធ្មេញទឹកដោះមានប៉ុន្មានគ្រាប់?
ឆ្លើយ ៈ 20 គ្រាប់
– ហេតុអីទើបត្រូវមើលថែទាំធ្មេញទឹកដោះឱ្យល្អ?
ឆ្លើយ ៈ ព្រោះវាប្រៀបដូចជាធ្មេញនាំអាទិ៍ បើមើលថែទាំបានល្អ ធ្មេញពិតប្រាកដដែលដុះឡើងមកជំនួសនោះនឹងមានភាពល្អឥតខ្ចោះ និងស្ថិតក្នុងសភាពល្អដូចគ្នា
– ធ្មេញពិតប្រាកដមានប៉ុន្មានគ្រាប់?
ឆ្លើយ ៈ 32 គ្រាប់
– ធ្មេញថ្គាម 4 គ្រាប់ចុងក្រោយនឹងចាប់ផ្តើមដុះឡើងពេលណា?
ឆ្លើយ ៈ ពេលអាយុប្រមាណ 18 ឆ្នាំឡើងទៅ
– ធ្មេញពិតប្រាកដនឹងនៅបានយូរប៉ុនណា?
ឆ្លើយ ៈ បើមើលថែទាំល្អ ធ្មេញពិតប្រាកដអាចនៅជាមួយយើងអស់មួយជីវិត
– អ្វីគឺមូលហេតុរបស់ជំងឺធ្មេញ និងអញ្ចាញ?
ឆ្លើយ ៈ កំណកអតិសុខុមប្រាណ
– កំណកអតិសុខុមប្រាណគឺអ្វី?
ឆ្លើយ ៈ កំណកអតិសុខុមប្រាណកើតពីមេរោគ រួមជាមួយស្ករ និងប្រូតេអ៊ីននៅក្នុងស្ករច្រើនតែតោងជាប់ស្អិតនៅលើស្រទាប់ធ្មេញ
– វិធីកម្ចាត់កំណកអតិសុខុមប្រាណដែលល្អបំផុតគឺ…
ឆ្លើយ ៈ ការដុសសម្អាតធ្មេញ គួបផ្សំជាមួយការប្រើខ្សែអំបោះខាត់ធ្មេញ
– បើកម្ចាត់កំណកអតិសុខុមប្រាណមិនអស់ តើនឹងមានលទ្ធផលយ៉ាងណា?
ឆ្លើយ ៈ នឹងកើតការប្រមូលសន្សំ និងក្លាយជាកំណកកំបោរនៅជាប់ណែននឹងធ្មេញ
– វិធីកម្ចាត់កំណកកំបោរដែលល្អបំផុតគឺធ្វើយ៉ាងណា?
ឆ្លើយ ៈ ទៅជួបគ្រូពេទ្យធ្មេញ (ទន្តពេទ្យ) ដើម្បីកោសកំណកកំបោរទាំងនោះចេញ
– តើត្រូវទទួលទានយ៉ាងណាដើម្បីឱ្យសុខភាពធ្មេញល្អ?
ឆ្លើយ ៈ . កាត់បន្ថយចំណីកំប៉ិកកំប៉ុក
. ជ្រើសរើសទទួលទានសណ្តែក និងផ្លែឈើជំនួសម្សៅ និងស្ករក្នុងអាហារពេលទំនេរ
. កាត់បន្ថយបរិមាណ និងភាពញឹកញាប់ក្នុងការទទួលទានអាហារដែលមានស្ករ ទឹកតែ និងកាហ្វេ។
. ដុសសម្អាតធ្មេញគ្រប់ពេលញ៉ាំអាហាររួច
. សារធាតុរ៉ែដែលជួយបង្កើនឆ្អឹង និងធ្មេញមានអ្វីខ្លះ?
ឆ្លើយ ៈ កាល់ស្យូម និងផូស្វ័រ
– អាហារដែលមានកាល់ស្យូមខ្ពស់មានអ្វីខ្លះ?
ឆ្លើយ ៈ ទឹកដោះ ប៊័រ ស៊ុតក្រហម ត្រីតូចៗ បង្គាក្រៀម គ្រាប់ល្ងខ្មៅ បន្លែស្លឹកបៃតង ជាដើម-ល-
– ការញ៉ាំទឹកផ្លែឈើមានផលប៉ះពាល់ដល់ធ្មេញដែរឬទេ?
ឆ្លើយ ៈ ទឹកផ្លែឈើធ្វើឱ្យធ្មេញសឹករឹលបាន ព្រោះក្នុងទឹកផ្លែឈើមានអាស៊ីត ស៊ីទ្រិក អាចរំលាយកាលស្យូមក្នុងស្រទាប់ស្រោបធ្មេញបាន ដូច្នេះពេលញ៉ាំទឹកផ្លែឈើហើយ គួរញ៉ាំទឹកតាមក្រោយ ឬខ្ពុរមាត់គ្រប់ពេល។
(នៅមានត)
August 3, 2020
នាំគ្នាមកដឹង ពីរបៀបនៃការលួចយកលេខសម្ងាត់របស់ Hacker និងការការពារខ្លួន កុំឱ្យគេលួចបាន
អ្នកស្រាវជ្រាវបានរកឃើញវិធីសាស្ត្របោក (phishing) ប្រាស់បែបថ្មី 1ទៀត ដែលមានលទ្ធភាព អាចបោកបញ្ឆោត (trick) អ្នកប្រើប្រាស់ដែលមានបទពិសោធយូរឆ្នាំ ឱ្យចាញ់បញ្ឆោតបានយ៉ាងងាយ និងអាចផ្ដល់លទ្ធភាពឱ្យពួកហេគឃ័រ ចូលទៅកាន់គណនី Facebook របស់អ្នកបានទៀតផង។
បច្ចេកទេសថ្មីនេះ គឺការប្រើប្រាស់មុខងារ “Trusted Contact” លើ Facebook ដែលជាមុខងារថ្មីមួយ សម្រាប់ធ្វើការស្រោចស្រង់គណនី Facebook ដោយការផ្ញើ Secret access code ទៅកាន់មិត្តភក្តិរបស់អ្នក ដើម្បីឱ្យអ្នកទាំងអស់នោះ ជួយអ្នកទទួលយកគណនីហ្វេសប៊ុកមកវិញ ប្រសិនបើអ្នកភ្លេចពាក្យសម្ងាត់ ឬមិនអាចភ្ជាប់ចូលទៅកាន់គណនីរបស់អ្នកបាន។ ខាងក្រោមនេះ គឺជារបៀបនៃការលួចយកលេខសម្ងាត់ របស់ Hacker ។
1. នៅសុខៗ ស្រាប់តែអ្នកបានទទួលសារពីនរណាម្នាក់តាមរយៈ Facebook Messenger ដែលផ្ញើដោយគណនីមិត្តភក្តិរបស់អ្នក។
2. ហេគឃ័រ នឹងស្នើសុំឱ្យអ្នកជួយស្រោចស្រង់គណនីរបស់គេមកវិញ ដោយធ្វើការពន្យល់អ្នកថា អ្នកគឺត្រូវបានដាក់ Trusted Contacts នៅក្នុងហ្វេសប៊ុក ហើយប្រាប់អ្នកទៀតថា អ្នកនឹងទទួលបានលេខកូដ សម្រាប់ជួយស្រោចស្រង់គណនីហ្វេសប៊ុករបស់គេ។
3. បន្ទាប់មក ហេគឃ័រនឹងធ្វើការចុចទៅលើពាក្យ “I forgot my password” នៅលើគណនីរបស់អ្នកផ្ទាល់តែម្ដងដែលធ្វើឱ្យអ្នកទទួលបានលេខកូដ។
4. ដោយដឹងថា មិត្តភ័ក្តិជួបបញ្ហាហើយនោះ ជាទូទៅអ្នកនឹងផ្តល់លេខកូដនោះ ដោយមិនបានគិតគូរបានលិ្អតល្អន់ឡើយ។
5. ដោយប្រើប្រាស់លេខកូដនោះ ហេគឃ័រនឹងធ្វើការលួចយកគណនីរបស់អ្នក និងប្រើប្រាស់វិធីដដែលនេះ ធ្វើបន្តទៅលើមិត្តភក្តិដទៃផ្សេងទៀត ដើម្បីលួចយកលេខសម្ងាត់។
*វិធីសាស្ត្រការពារខ្លួនពីការលួចយកលេខសម្ងាត់ Facebook៖ ដើម្បីការពារខ្លួនអ្នក ខាងក្រោមនេះ គឺជាចំណុចដែលអ្នកគួរប្រកាន់យក៖
1. សូមកុំចាប់អារម្មណ៍សារដែលមានលក្ខណៈបន្ទាន់ ឬប្រញាប់បែប Phishing messages ជាទូទៅ គឺមើលទៅហាក់ដូចជា មកពីមិត្តភក្តិដែលយើងទុកចិត្ត ប៉ុន្តែបើសិនជាសារមានលក្ខណៈប្លែក សូមសួរខ្លួនឯងជាមុនសិនថា តើអ្នកមានដឹងថា ខ្លួនអ្នក ត្រូវបានបញ្ចូលទៅក្នុងបញ្ជី “Trusted Contacts” នៃមិត្តភក្ដិរបស់អ្នកពីមុនមកដែរទេ?
2. សូមធ្វើការផ្ទៀងផ្ទាត់បញ្ជាក់ពីមិត្តភក្តិរបស់អ្នក ដោយទូរស័ព្ទទៅសាកសួរ ឬជួបមុខដោយផ្ទាល់ពីបញ្ហានេះ។
3. សូមធ្វើការសន្សឹមៗ ដោយប្រុងប្រយ័ត្ន ព្រោះការវាយប្រហារមានលក្ខណៈស្មុគស្មាញណាស់។ ជាទូទៅ សូមធ្វើការតាំងចិត្តឱ្យស្ងប់ នៅពេលដែលអ្នកបានទទួលសារ ដែលមើលទៅ វាធ្វើឱ្យអ្នកមានការភ្ញាក់ផ្អើល ខឹងឬភ័យជាដើម។ បញ្ហានេះវានឹងធ្វើឱ្យអ្នកគិតថា អ្នកត្រូវតែប្រញាប់ ដែលវាអាចជះឥទ្ធិពលដល់ការសម្រេចចិត្តរបស់អ្នក។ សូមកុំភ័យ ហើយគិតឱ្យបានច្បាស់ថា តើមានរឿងអ្វីកើតឡើងឱ្យបានពិតប្រាកដ មុនពេលដែលអ្នកធ្វើសកម្មភាពណាមួយ។
4. សូមសិក្សាអំពីដំណើរការនៃមុខងារ “Trusted Contacts” ដែលបង្ហាញនៅខាងក្រោមនេះ៖
មុខងារ Trusted Contacts គឺជាមុខងារមួយដែលប្រើប្រាស់សម្រាប់ធ្វើការស្រោចស្រង់គណនីហ្វេសប៊ុកណាមួយមកវិញ ដោយមានជំនួយពីមិត្តភក្តិរបស់អ្នក។ ដើម្បីដំណើរការនូវមុខងារមួយនេះ អ្នកត្រូវតែជ្រើសរើសយកមិត្តភក្តិនៅក្នុងហ្វេសប៊ុកពី 3នាក់ទៅ 5នាក់ពីក្នុងបញ្ជីមិត្តភក្តិទាំងអស់។ បើសិនជាអ្នកមិនអាចចូលទៅកាន់គណនីហ្វេសប៊ុករបស់អ្នកបាន ដោយប្រការណាមួយនោះ មិត្តភក្តិទាំងអស់នេះអាចធ្វើការបង្កើតនូវលេខកូដសម្ងាត់ចេញពីគណនីហ្វេសប៊ុករបស់ពួកគេ ហើយបញ្ជូនបន្តទៅឱ្យអ្នក ដើម្បីជួយស្រង់យកលេខសម្ងាត់នោះមកវិញ៕
August 3, 2020
វិធីការពារមេរោគ ឆ្លងចូលកុំព្យូទ័រ នៅលើ Windows ដែលអ្នកគួរតែដឹង
ប្រព័ន្ធសុវត្ថិភាពគ្រប់ឧបករណ៍ប្រើប្រាស់ ជាកត្តាចាំបាច់ដែលអ្នករាល់គ្នាត្រូវខ្វាយខ្វល់ជាប្រចាំ ដើម្បីបញ្ចៀសការវាយប្រហារលើប្រព័ន្ធអ៊ីនធឺណិត រហូតឈានដល់ការបាត់បង់ទិន្នន័យ ឬទង្វើគំរាមកំហែងបែបណាមួយ។ ខាងក្រោមនេះ គឺជាចំណុចងាយៗ ដែលអ្នកអាចអនុវត្តបាន ដើម្បីទប់ស្កាត់ការឆ្លង Malware ចូលកុំព្យូទ័រដែលដំណើរការដោយ Windows។
1.ដំឡើង និង Update កម្មវិធីសម្លាប់មេរោគ
ដើម្បីទប់ស្កាត់ Malware កុំឱ្យឆ្លងចូលកុំព្យូទ័រ អ្នកប្រើប្រាស់មានជម្រើសច្រើនក្នុងការដំឡើងកម្មវិធី Anti-virus ប្រភេទណាមួយ ប៉ុន្តែ Microsoft បានផ្តល់ជម្រើសឥតគិតថ្លៃ គឺ Windows Defender Security។ យ៉ាងណាមិញ អ្នកប្រើប្រាស់ក៏ត្រូវតែធ្វើការ Update ជាប្រចាំដែរ ដើម្បីទទួលបានការបន្ថែមមុខងារថ្មី និងពង្រឹងប្រព័ន្ធសុវត្ថិភាពឱ្យកាន់តែខ្ពស់ពីសំណាក់ Developers។
2.Update ជំនាន់ Windows ជាប្រចាំ
Hacker រមែងរុករកមធ្យោបាយថ្មី ក្នុងការបំបែកចន្លោះប្រហោងសុវត្ថិភាពនៃប្រព័ន្ធ Windows នេះជាមូលហេតុដែល Microsoft ព្យាយាមទប់ស្កាត់តាមការបញ្ចេញជំនាន់ Update តូចៗរៀងរាល់ថ្ងៃអង្គារ ក៏ដូចជាការ Update ធំរៀងរាល់ 1 ឬ2ដង ក្នុង 1ឆ្នាំ។ សូមចុចស្វែងរក Windows Update ត្រង់ទីតាំង Start Menu និងបើក Check for updates ដើម្បីដំឡើងជំនាន់ថ្មី។
3.បើកមុខងារ Windows Firewall
មុខងារមានស្រាប់មកពីនាយ Firewall នេះ អាចការពារ PC របស់អ្នកពីការវាយប្រហារតាមប្រព័ន្ធអ៊ីនធឺណិតបាន ដូច្នេះដើម្បីបើកដំណើរការសូមចូលទៅកាន់ Windows Firewall ហើយបើក Turn On ប្រសិនបើឃើញពណ៌បៃតង នោះមានន័យថា ដំណើរការធម្មតា។
4.ប្រើប្រាស់ Browser ជំនាន់ចុងក្រោយបង្អស់
កុំថាតែអ្វីនោះ Browserក៏មានផ្ទុក Bugs ដូចគ្នា ចំណុចនេះហើយអ្នកត្រូវជ្រើសរើសកម្មវិធីណាដែលគួរឱ្យទុកចិត្តបាន។ អាចថា Google Chrome ឬ Firefox ប៉ុន្តែកុំភ្លេចស្វែងរកជំនាន់ថ្មីចុងក្រោយ ព្រោះវាមានមុខងារការពារសុវត្ថិភាពខ្ពស់ ឬបើកមុខងារ Automatically Update បានកាន់តែប្រសើរ។
5.កុំធ្លាក់ក្នុងល្បិចកលឱ្យវាយបញ្ចូល Email
ការសួរឱ្យអ្នកវាយបញ្ចូល Login គណនី Email ចូលទៅកាន់គេហទំព័រណាមួយ ដើម្បីបញ្ជាក់ពីព័ត៌មានផ្ទាល់ខ្លួននោះ សុទ្ធសឹងតែជាល្បិចកលបោកបញ្ឆោតរបស់ Hacker ទាំងអស់។ ចំណុចនេះ Website ដែលមិនប្រាកដប្រជាមួយចំនួន ក៏នឹងត្រូវចាប់បានពី Browser ភ្លាមៗ ប្រសិនណាជាប្រភេទ Spam Link ជាហេតុដែលអ្នកត្រូវអនុវត្តចំណុចទី4 បានល្អិតល្អន់។
6.ប្រើប្រាស់ Windows Malicious Software Removal Tool
ក្រៅពី Windows Defender អ្នកក៏មានជម្រើសសាមញ្ញមួយទៀត មានឈ្មោះ Malicious Software Removal Tool របស់ក្រុមហ៊ុន Microsoft ដូចគ្នា។ ជាកម្មវិធីដែលត្រួតពិនិត្យ និងចាប់បានភ្លាមៗនូវប្រភេទ Malware មួយចំនួន ពោលគឺងាយស្រួលប្រើ ប៉ុន្តែមិនបានពេញលេញដូចកម្មវិធី Anti-virus ធំៗឡើយ៕
August 3, 2020
រឿងដែលអ្នកម្តាយត្រូវដឹង…តើរាងកាយកូនតូចត្រូវការទឹកច្រើនប៉ុនណា?
ក្មេងតូចៗខ្លះបៅទឹកដោះហើយមិនញ៉ាំទឹក ក្មេងខ្លះញ៉ាំទឹកតែបន្តិចបន្តួច មួយថ្ងៃមិនទាំងដល់មួយកែវផង រហូតអ្នកម្តាយអាចនឹកកង្វល់ថា បើបែបហ្នឹង តើកូននឹងបានទទួលជាតិទឹកគ្រប់គ្រាន់ដែរឬទេ?
ទឹក នៅក្នុងទីនេះមានន័យអំពីវត្ថុរាវដែលរាងកាយត្រូវការ ដែលក៏រួមទាំងទឹកដោះ និងទឹកផ្លែឈើផងដែរ។ ក្នុងមួយថ្ងៃៗកូនត្រូវការវត្ថុរាវប្រមាណជា 15 ភាគរយនៃទម្ងន់ខ្លួន ដូចជា កូនតូចមានទម្ងន់ខ្លួន 10 គីឡូក្រាម ដូច្នេះកូននឹងត្រូវការវត្ថុរាវ ៎៎= 0 . 15 X 10 = 1 លិត្រកន្លះ ដូច្នេះស្មើនឹងក្នុង 1 ថ្ងៃកូនគួរបានទទួលទឹកដោះ 960 មីល្លីលិត្រ ទឹកផ្លែឈើ 60 – 120 មីល្លីលិត្រ និងទឹកបរិសុទ្ធ 60 មីល្លីលិត្រ និងចំណែកដែលនៅសល់ កូននឹងបានទទួលអំពីអាហារបន្ថែមក្នុងពេលនីមួយទៀតផង។
ដូច្នេះបើរាប់ទឹកដោះជាចំណែកមួយរបស់ជាតិទឹកដែលរាងកាយកូនត្រូវការហើយនោះ ក៏មិនចាំបាច់ទៅបារម្ភថា កូននឹងបានទទួលជាតិទឹកមិនគ្រប់គ្រាន់នោះទេ តែមូលហេតុដែលពេលឱ្យកូនមឹមទឹកដោះហើយ គួរឱ្យកូនមឹមទឹកផងនោះ គឺជាការបង្ហាត់ឱ្យកូនចេះញ៉ាំទឹកស្អាតបរិសុទ្ធ និងដែលសំខាន់នោះ ជាការលាងសម្អាតកំណកទឹកដោះដែលប្រឡាក់ជាប់នៅក្នុងប្រអប់មាត់ហ្នឹងឯង។
ទឹកស្អាត…ចាប់ផ្តើមនៅពេលណាល្អ?
គួរចាប់ផ្តើមតាំងពីពេលកើតដំបូង ចូរឱ្យមឹមក្រោយពេលបៅទឹកដោះរួច ឬក្នុងអំឡុងពេលបៅទឹកដោះក៏បាន ជាពិសេសក្នុងអំឡុងពេលចាប់ផ្តើមឱ្យអាហារបន្ថែម គួរបញ្ចុកទឹកស្អាតឱ្យកូនញ៉ាំក្នុងអំឡុងពេលបញ្ចុកអាហារផង ដោយចាប់ផ្តើមឱ្យញ៉ាំប្រមាណជា 1 ស្លាបព្រាកាហ្វេជាមុនសិន និងបន្ទាប់ពីញ៉ាំអាហាររួច (និងមុនឱ្យបៅទឹកដោះ) រួចហើយសឹមបង្កើនជាបណ្តើរៗឱ្យបានបរិមាណ 120 – 180 មីល្លីលិត្រក្នុងមួយថ្ងៃ។ អ្វីដែលសំខាន់នោះ គួរឱ្យកូនតូចញ៉ាំទឹកដែលដាំឆ្អិនល្អបំផុត និងគួរប្តូរទឹកញឹកញាប់មុននឹងឱ្យកូនបៅ។ ទឹកដាំឆ្អិនដែលឱ្យកូនបៅគួររក្សាទុកក្នុងទូទឹកកក ព្រោះនឹងជួយបញ្ឈប់ការរីកធំធាត់របស់មេរោគបាក់តេរីបាន តែមិនគួររក្សាទុកលើសពី 1 – 2 ថ្ងៃទេ។
ទឹកផ្លែឈើ…ក៏សំខាន់ប៉ុនៗគ្នាដែរ
ទឹកផ្លែឈើជាចំណែកមួយរបស់ជាតិទឹកដែលចាំបាច់ដល់រាងកាយរបស់កូន គួរចាប់ផ្តើមឱ្យកូនតូចញ៉ាំទឹកផ្លែឈើនៅពេលមានអាយុ 6 – 7 ខែឡើងទៅ។ គួរជ្រើសរើសផ្លែឈើដែលមានរសជាតិស្រាលៗជាមុនសិន ដូចជា ផ្លែប៉ោម ទំពាំងបាយជូរ ល្ហុងទុំ ជាដើម ហើយរឿងភាពស្អាតមានអនាម័យគឺជារឿងសំខាន់ ចូរប្រយ័ត្នថ្នាំសម្លាប់សត្វល្អិតដែលនៅជាប់សេសសល់លើផ្លែឈើនោះឱ្យបានខ្លាំងផង (គួរយកទៅត្រាំទឹកទុកចោលប្រមាណជា 15 – 20 នាទី មុននឹងយកទៅច្របាច់ ឬក្រឡុកឱ្យកូនញ៉ាំ) និងនៅពេលច្របាច់ ឬក្រឡុកហើយភ្លាមៗថ្មីៗ គួរឱ្យកូនញ៉ាំតែម្តង បន្ទាប់ពីនោះចូរឱ្យញ៉ាំទឹកស្អាតតាមក្រោយគ្រប់ពេល ដើម្បីលាងកំណកជាតិស្ករដែលនៅជាប់តាមជើងធ្មេញ និងក្នុងប្រអប់មាត់។
សូមកុំភ្លេចថា បរិមាណរបស់ទឹកផ្លែឈើដែលឱ្យកូនតូចញ៉ាំក្នុងមួយថ្ងៃៗនោះ មិនគួរលើសពី 90 – 120 មីល្លីលិត្រ បើសិនជាច្រើនជាងនោះ នឹងមានផលមិនល្អតាមមក គឺនឹងធ្វើឱ្យកូនតូចបៅទឹកដោះបានតិច ព្រោះទឹកដោះមានគុណប្រយោជន៍ចំពោះរាងកាយរបស់កូនតូចខ្លាំងជាងទឹកផ្លែឈើច្រើនណាស់ និងមិនអាចជំនួសគ្នាបានឡើយ។ មានលោកឪពុកអ្នកម្តាយខ្លះប្រើវិធីដាក់ស្ករ-សទៅក្នុងទឹកសម្រាប់ឱ្យកូនតូចញ៉ាំ ដើម្បីជួយឱ្យកូនញ៉ាំទឹកស្អាតឱ្យបានច្រើនឡើង តែវិធីនេះត្រូវបានហាមដាច់ខាត ព្រោះក្រៅពីនឹងធ្វើឱ្យកូនញៀនជាតិផ្អែមហើយ មេរោគក៏ចូលចិត្តស្ករដូចគ្នាដែរ ធ្វើឱ្យវាមានឱកាសបង្កើនចំនួនច្រើនឡើងយ៉ាងឆាប់រហ័សក្នុងពេលដ៏ខ្លី ។
ពេលឱ្យកូនញ៉ាំទឹកផ្លែឈើ គួរឱ្យញ៉ាំពីកែវ ព្រោះការឱ្យកូនបឺតជញ្ជក់ពីដបទឹកដោះគោនឹងធ្វើឱ្យភាពផ្អែមនៅសេសសល់ក្នុងប្រអប់មាត់ និងជាប់តាមកន្លុកកន្លៀតធ្មេញរបស់កូនរយៈពេលយូរ ធ្វើឱ្យមានឱកាសធ្មេញពុកបានដោយងាយ៕
August 3, 2020
ARU RESSHA រថភ្លើងស្អាតបំផុតក្នុងពិភពលោក
ដូចដែលយើងបានដឹងហើយថា នៅក្នុងប្រទេសជប៉ុនការធ្វើដំណើរត្រូវពឹងលើរថភ្លើងជាចម្បង ដែលប្រព័ន្ធចរាចរណ៍រថភ្លើងនោះទាន់សម័យខ្លាំងណាស់ គ្រប់ដណ្តប់លើការធ្វើដំណើរទាំងក្នុងទីក្រុងធំៗ និងទៅទីរួមខេត្តផ្សេងៗ ក្រៅពីនេះនៅមានអៃឌៀថ្មីៗត្រូវបានដាក់បញ្ចូលមកដើម្បីបន្ថែមចំណាប់អារម្មណ៍លើរថភ្លើងជាច្រើនយ៉ាងទៀតផង ដូចជា រថភ្លើងបែបតុក្កតា និងពេលនេះ JR Kyushu បានបើកបង្ហាញក្បួនរថភ្លើងថ្មីសន្លាងមួយខ្សែគឺ ARU RESSHA (Sweet Train ) ដើម្បីតម្រូវតាមចំណង់ចំណូលចិត្តនារីៗ និងអ្នកចូលចិត្តញ៉ាំបង្អែម។
JR Kyushu ជាក្បួនរថភ្លើងដែលរត់លើខ្សែផ្លូវលើកោះ ឃីវឈូ មានប្រវត្តិដំណើរការមកយូរយារណាស់មកហើយ ឥឡូវនេះបានបង្ហាញ ARU RESSHA ក្បួនរថភ្លើងផ្អែមល្ហែម ( Sweet Train )មួយខ្សែថ្មីទៀត ដែលនឹងនាំយើងជិះទស្សនាទេសភាពស្អាតៗរបស់ធម្មជាតិ សមុទ្រ ព្រៃភ្នំ រហូតពេញមួយខ្សែផ្លូវ ព្រមជាមួយការក្រេបយកភាពឈ្ងុយឆ្ងាញ់របស់បង្អែមដែលចម្អិនឡើងយ៉ាងផ្ចិតផ្ចង់បម្រើឱ្យទទួលទានពេញមួយពេលធ្វើដំណើរ។
ARU RESSHA ឬភាសាអង់គ្លេសហៅថា Sweet Train ឬក្បួនរថភ្លើងផ្អែមល្ហែមនេះបង្ហាញខ្លួនលើកដំបូងក្នុងឆ្នាំ 2015 រត់រវាងទីក្រុង សាសេបូ ទៅដល់ទីរួមខេត្ត ណាង៉ាសាគិ ហើយនៅឆ្នាំ 2017 នេះក៏នឹងបើកផ្លូវមួយខ្សែថ្មីទៀតដែលនឹងធ្វើដំណើររវាងទីក្រុង Oita-Hita ក្នុងខេត្ត អូអ៊ីតៈ ដោយនឹងចាប់ផ្តើមនៅខែមេសា និងរដូវស្លឹកឈើជ្រុះនឹងចាប់ផ្តើមផ្តល់សេវាកម្មរវាង Sasebo – Nagasaki ក្នុងខេត្ត ណាង៉ាសាគិ។
ARU RESSHA ជារថភ្លើងស្ទីលទំនើបបង្កប់ដោយភាពក្លាសស៊ិក តុបតែងដោយពណ៌ខ្មៅ-ក្រហម ច្នៃម៉ូដដោយ “Eiji Mitooka ” ឌីហ្សាញនើរ៍ល្បីឈ្មោះ ដោយបានកម្លាំងជំរុញចិត្តមកពីរថភ្លើងបុរាណសម័យឆ្នាំ 1908 និងចង់ធ្វើឱ្យទៅជា “ក្បួនរថភ្លើងក្នុងក្តីស្រមៃ” ជារថភ្លើងបែបស៊ីប្រេងម៉ាហ្សូ៊ត មិនមែនអគ្គិសនី។
ហាយឡាយល្អបំផុតរបស់ ARU RESSHA រថភ្លើងផ្អែមល្ហែមនេះ គឺ បង្អែមស្ទីលបារាំងសែសដ៏សែនឆ្ងាញ់ ផ្សំតែងដោយវត្ថុធាតុដើមក្នុងតំបន់ពីកោះ ឃីវឈូ ឬតាមរដូវកាល និងចម្អិនដោយថ្វីដៃមេចុងភៅខាងបង្អែមលំដាប់ Michelin Star របស់ជប៉ុនឈ្មោះ “Yoshihiro Narisawa ” ។
តម្លៃសំបុត្រសម្រាប់ជិះកម្សាន្ត និងញ៉ាំបង្អែម ចាប់ផ្តើមពី 20.000 យ៉េន (ប្រមាណជា 150 ដុល្លារ) សម្រាប់ 2 នាក់ និងអាចទិញតាមរយៈតំណាងលក់ ឬក្រុមហ៊ុនទេសចរណ៍តែប៉ុណ្ណោះ៕
August 3, 2020
5 រោគចង្រៃនឹងសួររកមុខ បើមិនញ៉ាំអាហារពេលព្រឹក…
អាហារពេលព្រឹក ជាពេលអាហារដែលមនុស្សជាច្រើនចូលចិត្តព្រងើយកន្តើយជាញឹកញាប់រហូតក្លាយជាទម្លាប់ មិនថាតែប្រញាប់ទៅធ្វើការ ទៅរៀន ឬភ្ញាក់ពីដំណេករាងថ្ងៃជ្រុល បើអ្នកណាដឹងខ្លួនថាស្ថិតនៅក្នុងក្រុមមនុស្សប្រភេទនេះ ឡា រ៉ែន សូមឱ្យអ្នកប្រញាប់ផ្លាស់ប្តូរទង្វើរបស់ខ្លួននេះយ៉ាងប្រញាប់ប្រសើរជាង ព្រោះមានភាពប្រថុយប្រថានក្នុងការកើតរោគចង្រៃបាន ដែលរោគនីមួយៗ សូមប្រាប់ទៅចុះថា សុទ្ធតែគួរឱ្យខ្លាចទាំងអស់។
5 រោគចង្រៃនឹងសួររកមុខ បើមិនញ៉ាំអាហារពេលព្រឹក
1 . រោគធាត់
មនុស្សជាច្រើនអាចនឹងនឹកឆ្ងល់ថា បើមិនញ៉ាំអាហារ វាមានតែស្គម ម៉េចបានធាត់ទៅកើត? ធាត់បានតើ ហើយធាត់ខ្លាំងទៀតផង! ព្រោះបើយើងមិនញ៉ាំអាហារពេលព្រឹក ប្រព័ន្ធដុតបំផ្លាញក្នុងរាងកាយនឹងធ្វើការយឺត ហេវញឹកញាប់ ហើយភាពឃ្លានដែលមិនបានញ៉ាំអីនៅពេលព្រឹកក៏នឹងទៅទម្លាក់លើពេលអាហារដទៃទៀត ធ្វើឱ្យញ៉ាំច្រើនលើសពីតម្រូវការរបស់រាងកាយ ដែលវាបណ្តាលឱ្យធាត់ និងមិនមែនជារឿងប្លែកឡើយ។
2 . រោគទឹកនោមផ្អែម
អាហារពេលព្រឹក ជាអាហារពេលសំខាន់បំផុត ដែលរាងកាយត្រូវការយ៉ាងខ្លាំង ព្រោះរាងកាយត្រូវការថាមពលធ្វើការ ហើយសារធាតុអាហារចូលទៅជំរុញប្រព័ន្ធដុតបំផ្លាញ រួមទាំងអាចកាត់បន្ថយសភាវខុសប្រក្រតីរបស់អ័រម៉ូន អ៊ីនស៊ូលីន ដែលអាចរាប់បានថាជាមូលហេតុនៃការកើតរោគទឹកនោមផ្អែមជាង 40 – 50 % ដូច្នេះមិនមែនចំពោះតែមនុស្សចាស់ប៉ុណ្ណោះទេ តែគ្រប់ភេទគ្រប់វ័យមិនគួរព្រងៀយកន្តើយអាហារពេលព្រឹកជាដាច់ខាត។
3 . រោគអាស៊ីតហូរបញ្រ្ចាស់
ក្រពះអាហាររបស់យើង នៅពេលដល់វេលា វានឹងបញ្ចេញទឹករំលាយចេញមកដើម្បីរំលាយអាហារតាមពេលវេលាប្រក្រតី តែបើយើងបែរជាអត់អាហារពេលព្រឹក ឬមិនព្រមញ៉ាំវិញនោះ ទឹករំលាយទាំងនោះនឹងមិនត្រូវបានប្រើការ និងត្រូវដក់ឃាំងនៅក្នុងរាងកាយរបស់យើង ធ្វើឱ្យបំពង់អាហារ និងសាច់ភ្នាសក្រពះកើតអាការរលាកក្រហាយ រឹតតែយើងបណ្តោយឱ្យពេលវេលាកន្លងផុតទៅយូរខ្លាំងឡើង អាស៊ីតទឹករំលាយទាំងនោះក៏អាចនឹងហូរបញ្រ្ចាស់ពីបំពង់អាហារឡើងមកដល់បំពង់កបាន។
4 . រោគអាល់ហ្សៃមើរ
មិនញ៉ាំបាយព្រឹក ម៉េចបានទៅពាក់ព័ន្ធអីនឹងខួរក្បាល? ព្រោះថាជាតិស្ករនៅក្នុងឈាមជាអាហារដែលសំខាន់សម្រាប់ខួរក្បាលហ្នឹងឯង។ ក្រោយភ្ញាក់ពីដំណេក រាងកាយរបស់យើងមិនបានទទួលសារធាតុអាហារមករយៈពេលយូរជាង 10 – 12 ម៉ោងទៅហើយ បើយើងមិនញ៉ាំអាហារពេលព្រឹកទៀត នឹងធ្វើឱ្យជាតិស្ករក្នុងឈាមយើងធ្លាក់ចុះ ធ្វើឱ្យមានជាតិស្ករទៅចិញ្ចឹមខួរក្បាលតិច ហុចផលឱ្យខួរក្បាលផ្នែកការចងចាំធ្វើការមិនពេញទំហឹង ស្ពឹកស្រពន់ និងចុះខ្សោយ។
5 . រោគបេះដូង និងសរសៃឈាម
ពេលមិនបានញ៉ាំអាហារពេលព្រឹករហូតក្លាយជាទម្លាប់ នឹងធ្វើឱ្យកើតរោគធាត់ ទឹកនោមផ្អែម និងរោគជាច្រើនទៀត ដែលនៅពេលរោគធាត់ និងទឹកនោមផ្អែមមកសួរសុខទុក្ខ បរិមាណកូលេស្តេរ៉ូលក្នុងរាងកាយយើងក៏នឹងឡើងខ្ពស់ នោះនឹងធ្វើឱ្យមានភាពប្រថុយប្រថានក្នុងការកើតជំងឺបេះដូង និងសរសៃឈាមតាមមក មានលទ្ធផលនៃការពិនិត្យស្រាវជ្រាវនៅក្នុងប្រទេស អាមេរិកបានរកឃើញថា អ្នកដែលមិនញ៉ាំអាហារពេលព្រឹកមានឱកាសកើតជំងឺបេះដូង និងសរសៃឈាមច្រើនដល់ទៅ 20 % ឯណោះ។
ឃើញជំងឺនីមួយៗហើយ ប្រហែលជានាំគ្នាភ្ញាក់ផ្អើលមិនតិចទេមើលទៅ ដូច្នេះសូមងាកមកមើលថែទាំសុខភាពរបស់យើងទាំងអស់គ្នាវិញ ដោយចាប់ផ្តើមពីការទទួលទានអាហារពេលព្រឹកនេះឯង និងបើអាចទទួលទានបានគ្រប់ទាំងបីពេល ទទួលទានរបស់ដែលមានប្រយោជន៍ និងហាត់ប្រាណឱ្យបានជាប់ជាប្រចាំផងនោះ អាចលើកដៃលារោគចង្រៃទាំងប៉ុន្មាននោះបានតែម្តង៕
August 3, 2020
វិធីទប់ទល់ជាមួយកូនប៉ឹន-ង
កូនស្រីអាយុ 4 ឆ្នាំមាននិស្ស័យប៉ឹន-ងខ្លាំងណាស់ បើមិនទៅអង្វរទេ នឹងនៅតែ-ងបែបនោះ ហើយទៅពួននៅឯជ្រុងបន្ទប់ ឬអង្គុយផ្អែកនឹងទ្វាររហូតដល់គេងលក់តែម្តងក៏មាន។ ដូច្នេះតើគួរអង្វរកូនយ៉ាងណាមិនឱ្យមាននិស្ស័យមិនល្អនេះ?
ក្មេងវ័យ 4 ឆ្នាំប៉ឹន-ងនេះ ដោយសារតែគេត្រូវការការយកចិត្តទុកដាក់ ក្មេងវ័យនេះ តាមវិវឌ្ឍនាការគេចាប់ផ្តើមត្រូវការភាពទទួលស្គាល់ថាជាមនុស្សពិសេសអំពីមនុស្សជិតដិតក្បែរខ្លួនហើយ ការយល់ដឹងពីហេតុផលនៅមិនទាន់មានច្រើនឡើយ ព្រោះគេនៅប្រកាន់ខ្លួនឯងថាជាចំណុចកណ្តាល ងង៉ក់ ឬឌឺរឹងខ្លះក៏ដើម្បីពិសោធន៍សេចក្តីស្រឡាញ់ថា តើប៉ា និងម៉ាក់ស្រឡាញ់គេប៉ុនណា? ដូច្នេះវិធីងាយៗក្នុងការកែសម្រួលទង្វើរបស់កូនតូចសែន-ងង៉ក់នេះគឺ លោកឪពុក អ្នកម្តាយត្រូវតែធ្វើធម្មតា កុំប្រើអារម្មណ៍ ឬជ្រួលច្របល់នៅពេលនោះ រហូតទាល់តែកូនមានអារម្មណ៍ល្អឡើងវិញ នោះសឹមចូលទៅនិយាយជាមួយ សាកសួរពីមូលហេតុ និងតម្រូវការអាចប្រើពាក្យសំដីក្នុងលក្ខណៈថា “ចង់កូនមហាសែន-ងក៏ម៉ាក់ស្រឡាញ់ ចង់កូនឌឺក៏ម៉ាក់ស្រឡាញ់” និយាយឱ្យកូនជឿជាក់លើក្តីស្រឡាញ់ និងកុំភ្លេចឱបកូនឱ្យបានញឹកញាប់ផង ជាពិសេសពេលដែលកូន-ង មិនគួរនិយាយថា “ម៉ាក់នឹងឈប់ស្រឡាញ់ហើយ” នោះឡើយ ព្រោះនឹងធ្វើឱ្យកូនមានអារម្មណ៍តតាំង។
ក្មេងក្នុងវ័យនេះនឹងព្រមធ្វើតាមពាក្យណែនាំគ្រប់យ៉ាងជាមួយមនុស្សដែលគេជឿទុកចិត្ត និងប្រាកដក្នុងចិត្តថា ស្រឡាញ់រូបគេ។ យល់ថាលោកឪពុក អ្នកម្តាយស្រឡាញ់កូនគ្រប់គ្នា តែសម្រាប់ក្រុមគ្រួសារខ្លះដែលមានកូនច្រើនជាងមួយនាក់នោះ កូនក៏គ្រាន់តែអាចនឹងពិសោធន៍សេចក្តីស្រឡាញ់របស់ឪពុកម្តាយប៉ុណ្ណោះ ដូច្នេះការបង្ហាញសេចក្តីស្រឡាញ់តាមរយៈការឱបរឹត ការពោលពាក្យសរសើសម្រាប់កូនក្នុងវ័យនេះ ប្រាកដជាល្អជាងការប្រើពាក្យសំដី និងនៅពេលកូនច្បាស់ប្រាកដក្នុងចិត្តថា ទោះជាគេសែន-ងង៉ក់ ឬធ្វើខុសក៏ដោយ ម៉ាក់អាចនឹងស្តីបន្ទោសមែន តែម៉ាក់ក៏ស្រឡាញ់ និងអត់ទោសឱ្យជានិច្ច ទង្វើល្អៗក៏នឹងកើតឡើងជាមួយកូនមិនខាន៕
August 3, 2020
ភោជនីយដ្ឋានលំដាប់ថ្នាក់អន្តរជាតិ The Cut Steak House បើកលក់ជាផ្លូវការហើយ!
កាលពីថ្ងៃទី01 ខែសីហា ឆាំ្ន2020 កន្លងទៅនេះ ភោជនីយដ្ឋានលំដាប់ថ្នាក់អន្តរជាតិមួយដែលមានឈ្មោះថា ដឹ ខាត់ (The Cut Steak House) បានរៀបចំកម្មវិធីសម្ពោធបើកដំណើរការលក់ជាផ្លូវការដោយមានការអញ្ជើញចូលរួមពីសំណាក់ភ្ញៀវជាតិ ភ្ញៀវអន្តរជាតិ និងបណ្តាញសារព័ត៌មានជាច្រើននាក់។
ភោជនីយដ្ឋាន The Cut Steak House គឺជាភោជនីយដ្ឋានសាច់អាំងកូនកាត់បែបអឺរ៉ុប (Steak) និងបែបជប៉ុន ដែលត្រូវបានបង្កើតឡើងដោយជនជាតិខ្មែរដែលមានបទពិសោធន៍ និងគំនិតច្នៃប្រឌិតខ្ពស់ខាងវិស័យម្ហូបអាហារ និងភេសជ្ជៈ ព្រមទាំងមានចុងភៅចម្អិនអាហារដែលមានជំនាញឯកទេសច្បាស់លាស់ទទួលបាននូវពានរង្វាន់លំដាប់ថ្នាក់អន្តរជាតិក្នុងការចម្អិនអាហារគ្រប់ប្រភេទតាមបែបអាស៊ី និងបែបអឺរ៉ុប។ ជាពិសេសគឺការចម្អិន Steak សាច់គោដែលផ្តល់នូវបទពិសោធក្នុងការទទួលទានអាហារដែលល្អបំផុត ជាមួយនឹងគ្រឿងផ្សំ និងសាច់គោ ដែលត្រូវបាននាំចូលមកពីបណ្តាប្រទេសល្បីៗនានាដូចជា ប្រទេសអូស្ត្រាលី សហរដ្ឋអាមេរិក និងប្រទេសជប៉ុនជាដើម។
The Cut Steak House គឺជាភោជនីយដ្ឋានលំដាប់ថ្នាក់អន្តរជាតិដែលបានធើ្វការរចនាម៉ូដទំនើបទាន់សម័យ និងបំពាក់ទៅដោយគ្រឿងបរិក្ខាល្អប្រណីត ស្អាតប្លែកភ្នែក ហើយអ្វីដែលកាន់តែពិសេសជាងនេះទៅទៀតនោះគឺ បច្ចេកទេសនៃការចម្អិនម្ហូប និងរសជាតិដែលធ្វើឱ្យគ្រប់គ្នាជក់ចិត្តសរសើរមិនដាច់ពីមាត់ពីគុណភាព និងរសជាតិម្ហូបនៅទីនេះ។ The Cut Steak House មានមុខម្ហូបដែលពោរពេញដោយភាពច្នៃប្រឌិត ជាមួយនឹងវត្ថុធាតុដើមថ្មីៗ ស្រស់ៗ និងគ្រឿងផ្សំដ៏ល្អឥតខ្ចោះដែលមានគុណភាពខ្ពស់សម្រាប់បំពេញគ្រប់តម្រូវការរបស់អតិថិជន។
នៅក្នុងឱកាសបើកសម្ពោធជាផ្លូវការភោជនីយដ្ឋាន The Cut Steak House នេះដែរ លោក ស៊ាន វណ្ណថាន ប្រធានគ្រប់គ្រងទូទៅនៃភោជនីយដ្ឋាន The Cut Steak House បានមានប្រសាសន៍ថា “ភាពច្នៃប្រឌិតនៃរសជាតិអាហារ គុណភាពនៃវត្ថុធាតុដើម និងគ្រឿងផ្សំ សេវាកម្ម និងបទដ្ឋានអនាម័យ គឺជាអ្វីដែលយើងយកចិត្តទុកដាក់បំផុត ដើម្បីផ្តល់នូវអាហារដែលមានស្តង់ដារអន្តរជាតិ និងមានរសជាតិឈ្ងុយឆ្ងាញ់បំផុតជូនដល់អតិថិជន និងដើម្បីក្លាយខ្លួនជាភោជនីយដ្ឋានមួយដែលឈានមុខគេនៅក្នុងព្រះរាជាណាចក្រកម្ពុជានាថ្ងៃអនាគត។
ដោយឡែកមុខម្ហូបពិសេសៗ និងល្បីប្រចាំភោជនីយដ្ឋាន The Cut Steak House មានដូចជា Steak សាច់គោកណ្តាលខ្នងចម្អិនបែបអឺរ៉ុប, Black Angus Tomahawh, សាច់ចំឡកគោ និងថ្លើមក្ងានចៀន ទំពាំងបាយជូរ, Cut Salad, សាច់ខ្នងអាំងបែបជប៉ុន និងឆ្អឹងជំនីចៀមតេរីយ៉ាគិ ជាមួយនឹងទឹកជ្រលក់រសជាតិពិសេស3ប្រភេទផ្សេងគ្នា ដែលធ្វើឱ្យរសជាតិនៃសាច់គោ Steak ទាំងនោះកាន់តែមានរសជាតិឆ្ងាញ់ប្លែកថែមមួយកម្រិតទៀត។
លក្ខណៈពិសេសៗទាំងអស់នេះ គឺមានតែនៅភោជនីយដ្ឋាន The Cut Steak House តែប៉ុណ្ណោះ!
លោក ម៉ៃ វ៉ុង (Mike Wong) ប្រធានគ្រប់គ្រងផ្នែកចម្អិនម្ហូប (មេចុងភៅធំ) និងជាប្រធានគ្រប់គ្រងផ្នែកប្រតិបត្តិការនៃភោជនីយដ្ឋាន The Cut Steak House បានមានប្រសាសន៍ថា “ប្រភេទសាច់គោ និងគ្រឿងផ្សំគ្រប់ប្រភេទដែលយើងប្រើប្រាស់ក្នុងការចម្អិននៅទីនេះ សុទ្ធសឹងតែត្រូវបានសម្រិតសម្រាំងយកប្រភេទដែលមានគុណភាពខ្ពស់ គួបផ្សំនិងគំនិតច្នៃប្រឌិត ព្រមទាំងបច្ចេកទេសចម្អិនដែលផ្តល់នូវបទពិសោធនៃការទទួលទានអាហារមួយកាន់តែប្លែកជាង Steak ដែលចម្អិននៅហាងដទៃទៀត។
សូមបញ្ជាក់ផងដែរថា លោក ម៉ៃ វ៉ុង (Mike Wong) គឺជាចុងភៅឯកទេសដែលធ្លាប់ទទួលបាននូវការបណ្តុះបណ្តាលផ្នែក Steak និងអាហារផ្សេងៗទៀតនៅសហរដ្ឋអាមេរិក និងប្រទេសជប៉ុន មានបទពិសោធចម្អិនអាហារបែបបស្ចិមប្រទេស និងបែបជប៉ុនជាង20ឆ្នាំមកហើយ។
ក្រៅពីនេះ ភោជនីយដ្ឋាន The Cut Steak House ក៏មានអាហារសមុទ្រថ្មីៗដូចជា ស្កាលុប (Scallop) អយស្ទ័រ (Oyster) ត្រីសាលម៉ុន (Salmon) ព្រមទាំងម្ហូបច្នៃប្រឌិតជាច្រើនមុខទៀត។
The Cut Steak House ក៏មានសេវាកម្មរៀបចំអាហារ VIP សម្រាប់ពិធីខួបកំណើត ពិធីជប់លៀងផ្សេងៗ ការទទួលទានអាហារបែបអ្នកជំនួញ និងការជួបជុំក្រុមការងារផងដែរ ដើម្បីបង្កើតនូវបរិយាកាស ពេលវេលា និងអនុស្សាវរីយ៍ដ៏រ៉ូមែនទិកជូនដល់អតិថិជន។
ភោជនីយដ្ឋាន The Cut Steak House មានទីតាំងស្ថិតនៅផ្សារ ខាលែឌែល ម៉ល (Khalandale Mall) តំបន់បឹងកក់ ហើយលោកអ្នកក៏អាចធ្វើការទំនាក់ទំនងតាមរយៈលេខទូរស័ព្ទ 023 883 484 ឬ 096 888 5598 សម្រាប់ការកក់ទុកជាមិន និងសាកសួរព័ត៌មានបន្ថែម៕

August 1, 2020
ចាប់ពីពេលនេះទៅកម្ពុជាមានប្រព័ន្ធបច្ចេកវិទ្យាគ្រប់គ្រងសារ ទីតាំង និងទិន្នន័យ Covid-19 កាន់តែខ្លាំង
ក្រោយពេលជំងឺ Covid-19 រីករាលដាលកាន់តែខ្លាំងក្នុងពិភពលោក បណ្តាប្រទេសនានាបានរៀបចំបច្ចេកវិទ្យា និងវិធីសាស្ត្រជាច្រើនដើម្បីទប់ស្កាត់ និងដោះស្រាយកុំឱ្យមានការឆ្លងនៅក្នុងប្រទេស។ សម្រាប់កម្ពុជាយើងវិញ ថ្មីៗនេះបានដាក់ឱ្យដំណើការប្រព័ន្ធបច្ចេកវិទ្យាថ្មីមួយដើម្បីគ្រប់គ្រងបញ្ហាទាំងអស់នេះ។
ប្រព័ន្ធបច្ចេកវិទ្យាដែលទើបនឹងដាក់ឱ្យដំណើរការនេះមានឈ្មោះថា «ប្រព័ន្ធគ្រប់គ្រងសារ និងទីតាំងសម្រាប់ទទួលព័ត៌មាន និងទិន្នន័យប្រជាពលរដ្ឋអំពីជំងឺ Covid-19»។
ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសនីយ៍ និងទូរគមនាគមន៍ បានបញ្ជាក់ថា ប្រព័ន្ធនេះ មានសារៈសំខាន់ខ្លាំងណាស់ប្រជាជនទូទៅព្រោះប្រព័ន្ធនឹងផ្ញើរសារជាសំឡេងដោយស្វ័យប្រវត្តិទៅកាន់គ្រប់បុគ្គលគោលដៅដែលសង្ស័យថាខ្លួនមានផ្ទុកជំងឺ Covid-19 ដើម្បីតាមដានសុខភាព។ បន្ថែមពីលើនេះ ការប្រើប្រាស់ប្រព័ន្ធបច្ចេកវិទ្យាថ្មីនេះ ក៏អាចបង្ករភាពងាយស្រួលផងដែរដល់អាជ្ញាធរក្នុងការកំណត់អត្តសញ្ញាណប្រជាជនណាដែលសង្ស័យថាមានផ្ទុកជំងឺ Covid-19 និងទទួលបានព័ត៌មាន ក៏ដូចជាទិន្នន័យចាំបាច់មួយចំនួនដើម្បីឈានទៅកំណត់អត្តសញ្ញាណនៃក្រុមបុគ្គលដែលអាចមានហានិភ័យខ្ពស់។
ឯកឧត្តមរដ្ឋមន្ត្រីបានបញ្ជាក់ផងដែរថា ប្រព័ន្ធនេះក៏អាចជួយបញ្ចៀសការកកស្ទះដល់ប្រព័ន្ធ 115 ដែលមានស្រាប់ផងដែរ។ តាមរយៈប្រព័ន្ធនេះយើងសង្ឃឹមថានឹងអាចជួយសម្រួលដល់ការប្រឹងប្រែងរបស់ក្រសួងសុខាភិបាលក្នុងការទប់ស្កាត់រលកទី2៕
July 31, 2020
កម្ពុជា និងចិន ដាក់គោលដៅបង្កើនទំហំពាណិជ្ជកម្មរួមគ្នាឱ្យដល់ 1ម៉ឺនលានដុល្លារនៅឆ្នាំ2021
ចិន ជាដៃគូយ៉ាងសំខាន់មួយផ្នែកសេដ្ឋកិច្ច និងពាណិជ្ជកម្មសម្រាប់ប្រទេសកម្ពុជា ដោយពេលថ្មីៗនេះប្រទេសទាំងពីរកំពុងខិតខំប្រឹងប្រែងរៀបចំឱ្យមានកិច្ចព្រមព្រៀងពាណិជ្ជកម្មសេរីជាមួយគ្នាដើម្បីបង្កើនទំហំពាណិជ្ជកម្មឱ្យកាន់តែទូលាយ។
បន្ថែមពីលើនេះ នៅចុងខែកក្កដានេះ កម្ពុជា-ចិន ក៏បានប្តេជ្ញារួមគ្នាបង្កើនកិច្ចសហការសេដ្ឋកិច្ច និងពាណិជ្ជកម្មទ្វាភាគីឱ្យបាន 1ម៉ឺនលានដុល្លារនៅឆ្នាំ 2021 ដោយព្យាយាមពន្លឿនសកម្មភាពមួយចំនួនដូចជាការចរចារពិធីសារ អានាម័យ និងភូតគាមអនាម័យលើផលិតផលកសិកម្មមួយចំនួនរបស់កម្ពុជាដើម្បីនាំចូលក្នុងទីផ្សារចិន។
ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានលើកឡើងថា កម្ពុជា និងចិនបានក្លាយជាដៃគូយុទ្ធសាស្ត្រ និងកិច្ចសហប្រតិបត្តិការគ្រប់ជ្រុងជ្រោយនៅឆ្នាំ 2013 និងឈានដលការបង្កើតសហគមន៍វាសនារួមនៅឆ្នាំ 2019។ ទំនាក់ទំនងនេះបានផ្តល់ផលប្រយោជន៍យ៉ាងច្រើនដល់ភាគីទាំងសងខាង។ ជាក់ស្តែងយើងបានឃើញហើយថា នៅឆ្នាំ 2018 ប្រទេសទាំង2សម្រេចបាននូវទំហំពាណិជ្ជកម្មជាង 6ពាន់លានដុល្លារ។ ហេតុនេះហើយទើបមកដល់ពេលនេះប្រទេសទាំងពីរខិតខំប្រឹងប្រែងក្នុងការពង្រឹងទំហំពាណិជ្ជកម្មឱ្យដល់ 10ប៊ីលានដុល្លារនាពេលខាងមុខ។
ឯកឧត្តមបានបញ្ជាក់ថា នៅដំណាក់កាលនេះភាគីកម្ពុជាបានស្នើសុំភាគីចិនជួយពន្លឿនការ ចរចាពិធីសារអនាម័យ និងភូតគាមអនាម័យ លើផលិតផលកសិកម្មមួយចំនួនទៀត ដើម្បីឈានទៅចុះហត្ថលេខាសម្រាប់នាំចេញដូចជា ផ្លែមៀន ស្រកានាគ ម្នាស់ ទុរេន ម្រេច គ្រាប់ស្វាយចន្ទី ស្កសរ ដូង និងសំបុកទឹកមាត់ត្រចៀកកាំជាដើម។ កន្លងទៅ កម្ពុជា និងចិន បានចុះពិធីសារអនាម័យ និងភូតគាមអនាម័យជាបន្តបន្ទាប់ ក្នុងការនាំចេញកសិផល ពីកម្ពុជាទៅកាន់ប្រទេសចិន រួមមាន អង្ករ ដំឡូងមី ពោត ចេក និងផ្លែស្វាយរួចមកហើយ៕
July 31, 2020