Author: ធឿន មករា

រឿងដែលគួរដឹង មុនពិនិត្យសុខភាព តើមានអ្វីខ្លះ?
និយាយពីរឿង ពិនិត្យសុខភាព មនុស្សជាច្រើនប្រហែលជាធ្លាប់ពិនិត្យរួចហើយ អ្នកខ្លះអាចពិនិត្យនៅកន្លែងធ្វើការ ឬពិនិត្យនៅមន្ទីពេទ្យ ។ ទោះជារឿងការពិនិត្យសុខភាពមានមកយូរហើយក៏ដោយ តែនៅមានមនុស្សជាច្រើនទៀតដែលនៅមិនទាន់ហ៊ាន ឬមិនដឹងថាហេតុអីត្រូវទៅពិនិត្យ ពិនិត្យហើយបានអ្វី? ហើយបើចង់ទៅពិនិត្យ តើត្រូវធ្វើយ៉ាងណាខ្លះ? ថ្ងៃនេះ ឡារ៉ែន មានចម្លើយចំពោះរឿងនេះមកជម្រាបជូនមិត្តអ្នកអានបានរៀនយល់ដឹងមុនពេលទៅពិនិត្យសុខភាព។
“ការពិនិត្យសុខភាព” ចែកចេញជា 2 រឿង គឺការស្វែងរកជំងឺដែលបង្កប់នៅក្នុងខ្លួនយើង ដោយដែលយើងនៅមិនទាន់មានចេញអាការខុសប្រក្រតីអ្វី ដែលហៅថា “គ្រោះភ័យលាក់មុខ” ដូចជា ជំងឺទឹកនោមផ្អែម លើសឈាម ខ្លាញ់ក្នុងឈាម មហារីកស្បូន ជាដើម និងមួយទៀតគឺការស្វែងរកទង្វើដែលប្រថុយប្រថាន និងបច្ច័យប្រថុយប្រថានក្នុងការកើតជំងឺផ្សេងៗ ដែលបើសិនជារកឃើញថា មានភាពប្រថុយប្រថាននោះ គ្រូពេទ្យនឹងផ្តល់នូវការណែនាំក្នុងការប្រតិបត្តិខ្លួនយ៉ាងត្រឹមត្រូវ ដើម្បីការពារមិនឱ្យកើតរោគភ័យហ្នឹងឯង។
អីលូវយើងនាំគ្នាមកមើលវិញប្រសើរជាងថា តើ 6 រឿងគួរដឹងមុនពិនិត្យសុខភាពនេះមានអ្វីខ្លះ?
1 . ការពិនិត្យសុខភាពជារឿងសំខាន់ ព្រោះមានជំងឺច្រើនប្រភេទដែលជាគ្រោះភ័យលាក់មុខ ដូច្នេះការពិនិត្យតាំងពីរយៈចាប់ផ្តើមដំបូង បើរកឃើញមាន នឹងធ្វើឱ្យងាយស្រួលព្យាបាល និងមានឱកាសជាសះស្បើយបាន។
2 . ការពិនិត្យសុខភាពកុមារក៏មានភាពសំខាន់ដូចគ្នាដែរ ដោយសង្កត់ធ្ងន់លើការចាក់វ៉ាក់សាំងដើម្បីការពារជំងឺ រួមទាំងមានពិនិត្យមើលការចម្រើនធំធាត់ និងវិវឌ្ឍនាការថា ស័ក្តិសម ឬត្រូវនឹងវ័យដែរឬទេ? ដើម្បីការពារភាពខុសប្រក្រតីផ្សេងៗ និងដែលសំខាន់គឺ ការពិនិត្យសុខភាពតាំងពីក្មេងនឹងធ្វើឱ្យគ្រូពេទ្យបានត្រួតពិនិត្យបច្ច័យប្រថុយប្រថានជ្រៀតជ្រែកផ្សេងៗដែលនឹងកើតចំពោះក្មេង និងធ្វើការព្យាបាលបានទាន់ពេលវេលា។
3 . ការពិនិត្យសុខភាពត្រូវពិនិត្យឱ្យស័ក្តិសមនឹងខ្លួនយើង បើពិនិត្យលើសពីចាំបាច់ នឹងធ្វើឱ្យខាតបង់ប្រាក់ដោយឥតប្រយោជន៍ និងការពិនិត្យមួយចំនួនអាចនឹងនាំទៅរកសភាវជ្រៀតជ្រែកដែលមានគ្រោះថ្នាក់ដល់ជីវិតបាន។
4 .”ពិនិត្យសុខភាពប្រចាំឆ្នាំ” គឺជាពាក្យដែលយល់ខុស ព្រោះការពិនិត្យសុខភាពមិនចាំបាច់ត្រូវពិនិត្យរាល់ឆ្នាំនោះទេ តែជាការពិនិត្យតាមដំណាក់កាល តាមភាពចាំបាច់របស់បុគ្គលម្នាក់ៗ អាស្រ័យលើភេទ អាយុ និងោកាសប្រថុយប្រថានក្នុងការឈឺថ្កាត់ ដូចជា ទឹកនោមផ្អែម ជាតិខ្លាញ់ក្នុងឈាមឡើងខ្ពស់ ជាដើម។
5 . ប្រជាជនច្រើនតែយល់ច្រឡំថា ការពិនិត្យសុខភាព គឺការស្វែងរកជំងឺដោយការពិនិត្យក្នុងបន្ទប់ពិសោធន៍ និងសង្កត់ធ្ងន់លើការព្យបាលអំពីគ្រូពេទ្យ ទើបប្រហែស និងបណ្តែតបណ្តោយការមើលថែទាំសុខភាពរបស់ខ្លួនឯង ដែលការពិតវិញ ការពិនិត្យសុខភាពដែលត្រឹមត្រូវគឺ ផ្តល់ភាពសំខាន់លើការសាកសួរប្រវត្តិដើម្បីស្វែងរកបច្ច័យប្រថុយ ដែលនៅពេលបានដឹងពីបច្ច័យប្រថុយប្រថាននឹងការកើតជំងឺផ្សេងៗហើយនោះ ដំណាក់កាលបន្តទៅទៀត គឺការឱ្យគ្រូពេទ្យពិនិត្យរាងកាយ ដោយនឹងពិនិត្យក្នុងមន្ទីរពិសោធន៍ចំពោះតែអ្វីដែលចាំបាច់ប៉ុណ្ណោះ ដែលពេលខ្លះមិនចាំបាច់ត្រូវពិនិត្យសោះក៏មានដែរ។
6 . យើងអាចពិនិត្យសុខភាពដោយខ្លួនឯងបាន ដោយការពិនិត្យសង្កេតទង្វើ ទម្ងន់ខ្លួន ការវាស់រង្វង់ជុំចង្កេះថា តើស្ថិតក្នុងសភាវដុះក្បាលពោះដែរឬទេ? ដោយវាស់យកចំណុចកណ្តាលត្រង់ផ្ចិត រួចយកប្រវែងដែលបានមកចែកនឹងកម្ពស់ ដោយមនុស្សប្រក្រតីនឹងមានប្រវែងជុំចង្កេះមិនលើសពាក់កណ្តាលរបស់ប្រវែងកម្ពស់ឡើយ បើលើស បញ្ជាក់ថា ការដុះក្បាលពោះរបស់យើងនេះមានភាពប្រថុយប្រថានក្នុងការកើតជំងឺទឹកនោមផ្អែម លើសឈាម និងជំងឺត្បៀតសរសៃឈាមបេះដូង ឬខួរក្បាល។
វិធីការត្រៀមខ្លួនមុនពិនិត្យសុខភាព
1 . គួរគេងសម្រាក និងលក់ឱ្យបានគ្រប់គ្រាន់ យ៉ាងហោចណាស់ 6 ម៉ោងមុនការពិនិត្យសុខភាព ព្រោះ បើសិនជាមិនបានគេង នឹងធ្វើឱ្យលទ្ធផលការពិនិត្យខុសប្រក្រតី ជាពិសេសសម្ពាធឈាម ចង្វាក់បេះដូង សីតុណ្ហភាពរបស់រាងកាយ ដែលអាចធ្វើឱ្យគ្រូពេទ្យមិនអាចវាយតម្លៃបានថា សុខភាពរាងកាយយើងមានភាពខុសប្រក្រតីមែនឬយ៉ាងណាឡើយ។
2 . តមអាហារ និងភេសជ្ជៈ ចៀសវាងអាហារដែលមានជាតិខ្លាញ់ច្រើនយ៉ាងហោចណាស់ 8 – 10 ម៉ោងមុនពិនិត្យ តមស្រា ឬប៊ីយែរយ៉ាងតិច 24 ម៉ោងមុនពិនិត្យសុខភាព ដោយសារតែភេសជ្ជៈដែលមានជាតិអាល់កុលអាចមានផលប៉ះពាល់ដល់ការពិនិត្យមួយចំនួន ដូច្នេះគួរប្រាប់លោកគ្រូពេទ្យឱ្យបានដឹងមុននឹងពិនិត្យក្នុងករណីដែលបានទទួលទាន។
3 . បើសិនមានជំងឺប្រចាំកាយ ឬប្រវត្តិសុខភាពផ្សេងទៀត សូមនាំយកលទ្ធផលរបស់ការពិនិត្យកាលពីពេលនោះទៅជាមួយផង ដើម្បីគ្រូពេទ្យនឹងបានវិនិច្ឆ័យបានត្រឹមត្រូវ។
4 . សម្រាប់ស្រ្តីមិនគួរស្ថិតក្នុងអំឡុងពេលមុន និងក្រោយមានវដ្តរដូវ 7 ថ្ងៃ បើមានវដ្តរដូវប្រចាំខែចូរតមពិនិត្យទឹកមូត្រ ព្រោះឈាមនឹងមានលាយឡំនៅក្នុងទឹកមូត្រ ដែលនឹងមានផលដល់ការបង្ហាញលទ្ធផលការពិនិត្យ។
5 . ការពិនិត្យចម្រាញ់មហារីកសុដន់ដោយអិចស៍រេយ៍សុដន់ ( Mammogram ) ចៀសវាងការពិនិត្យក្នុងអំឡុងមានវដ្តរដូវប្រចាំខែ ដែលសុដន់មានភាពតឹងណែន ដូច្នេះគួរពិនិត្យក្រោយពេលមានប្រចាំខែ។
យើងបានឃើញហើយថា ការពិនិត្យសុខភាពមានភាពសំខាន់ និងមិនបានធ្វើឱ្យយើងខាតពេលវេលាច្រើនដូចដែលយើងគិតនោះទេ តែផ្ទុយទៅវិញវាបែរជាជួយសន្សំសំចៃពេលវេលារបស់យើងទៅវិញទេ ព្រោះការរកឃើញភាពប្រក្រតីតាំងពីរយៈផ្តើមដំបូង ការព្យាបាលឱ្យជាសះស្បើយអាចធ្វើបានយ៉ាងល្អប្រសើរ និងគ្មានពាក្យថា “ហួសពេលហើយ” ទៀតផង៕
August 7, 2020
ប្រទះឃើញ ទៀត គីមហេង ចូលរួមថ្ងៃកំណើត កែវ សុខសិលា តែមិនទាន់បង្ហាញខ្លួនលើទីលាន
ក្រោយពីរងរបួសក្បាលធ្ងន់ធ្ងរ ហើយថែមទាំងបាត់បង់មិត្តស្រី ក្នុងហេតុការណ៍គ្រោះថ្នាក់ចរាចរណ៍ដ៏អាក្រក់មួយ កាលពីខែមិថុនា ឆ្នាំ2020 ផងនោះ កីឡាករ ទៀត គឺមហេង បានបង្ហាញវត្តមានជាលើកដំបូង ក្នុងកម្មវិធីមួយ កាលពីចុងសប្តាហ៍កន្លងទៅ។
ទោះជាបានបង្ហាញទឹកមុខសប្បាយរីករាយក្នុងថ្ងៃនោះក៏ពិតមែន ក៏ប៉ុន្តែកីឡាកររូបនេះ ប្រហែលជាមិនទាន់មានសភាពរាងកាយល្អដូចដើមវិញនៅឡើយ ដោយសារតែមិនទាន់បានបង្ហាញខ្លួននៅក្នុងការហ្វឹកហាត់ ឬការប្រកួតរបស់ក្លិបវិសាខាវិញ នៅឡើយទេ។
គួរបញ្ជាក់ដែរថា កាលពីថ្ងៃសៅរ៏ទី1 ខែសីហា ឆ្នាំ2020 ក្នុងកម្មវិធីខួបកំណើតគម្រប់វ័យ 23ឆ្នាំ របស់កីឡាករអ្នកចាំទីជម្រើសជាតិ កែវ សុខសិលា ដែលធ្វើឡើងនៅឯគេហដ្ឋានផ្ទាល់ខ្លួន ដោយមានការចូលរួមពីសំណាក់មិត្តភក្តិជិតស្និទ្ធ និងកីឡាកររួមអាជីពជាច្រើនរូបផងដែរនោះ ក្នុងនោះគេក៏ប្រទះឃើញវត្តមានរបស់កីឡាករ ទៀត គឹមហេង ក្នុងស្ថានភាពសុខភាពធម្មតាវិញដែរ៕

August 7, 2020
ត្រៀមខ្លួនឱ្យរួចជាស្រេច…បើសិនជាត្រូវរៀបការម្តងទៀត
ការយល់ព្រមបើកបេះដូងឱ្យឱកាសថ្មីៗបានចូលមកក្នុងជីវិតម្តងទៀតមិនមែនជារឿងខាតបង់នោះទេ តែត្រូវគិតពិចារណាត្រិះរិះឱ្យបានហ្មត់ចត់ ដើម្បីកុំអោយការសម្រេចចិត្តលើកនេះទៅប៉ះពាល់ផ្លូវចិត្ត “កូន” (បើសិនមាន)។
– រៀបការម្តងទៀត…ល្អទេ?
ទោះជាការរៀបការម្តងទៀតជាសិទ្ធិដ៏ត្រឹមត្រូវរបស់អ្នកម្តាយក៏ដោយ តែប្រាកដណាស់ រឿងដំបូងគេដែលត្រូវគិតដល់នោះគឺកូន។ ការសម្រេចចិត្តរៀបការម្តងទៀត មិនមែនជារឿងខាតបង់នោះទេ តែសំខាន់បំផុតអ្នកត្រូវអធិប្បាយឱ្យអនាគតស្វាមីថ្មីយល់ដឹងអំពីបន្ទុកភារៈតួនាទីនៃភាពជាម្តាយដែលមានជាប់នឹងខ្លួនឱ្យបានច្បាស់លាស់ថា តើគេអាចទទួលយក និងត្រៀមជាស្រេចក្នុងការស្រឡាញ់ និងអាណិតមេត្តាកូនរបស់អ្នក ដូចដែលគេស្រឡាញ់រូបអ្នកបានដែរឬទេ? បើអ្វីៗគ្រប់យ៉ាង អូខេ អ្នកក៏អាចសម្រេចចិត្តបាន។
– ត្រៀមជាស្រេចចាំទប់ទល់នឹងរឿងរញេរញ៉ៃ
ប្រាកដណាស់ថា បន្ទាប់ពីអ្នកម្តាយសម្រេចចិត្តរៀបការជាលើកទីពីរហើយនោះ មានន័យថា មានមនុស្សម្នាក់ទៀតដែលប្រៀបដូចជាមនុស្សប្លែកមុខម្នាក់ (សម្រាប់កូន) ថែមចូលមកជាផ្នែកមួយក្នុងគ្រួសារ ហើយមនុស្សម្នាក់នេះមើលទៅដូចជាស្និទ្ធស្នាលជាមួយម៉ាក់មែនទែនទៀតផង។ ក្នុងទស្សនៈរបស់កូនអាចនឹងគិតថា ម៉ាក់នឹងស្រឡាញ់បុរសម្នាក់នេះខ្លាំងជាងយើងទេដឹង? ម៉ាក់ច្បាស់ជាឈប់ស្រឡាញ់យើងមិនខាន ឬម៉ាក់លែងជាគ្នាជាមួយប៉ាហើយឬ? ជាដើម។ កុំបណ្តោយឱ្យសំណួរទាំងនេះនៅវិលវល់ដក់ក្នុងចិត្តកូនធ្វើអី អ្នកគួរតែ…ៈ
ប្រាប់ឱ្យកូនយល់ កុំគិតថា កូននៅតូចមិនដឹងរឿងរ៉ាវអ្វីឱ្យសោះ
រកពេលវេលានិយាយជាមួយកូនដោយពាក្យសំដីងាយៗ ខ្លីៗ តែការនឹងអធិប្បាយបែបនេះ អ្នកត្រូវយល់ដឹងពីធម្មជាតិរបស់កូនផងថាយ៉ាងណា ព្រោះក្មេងខ្លះគិតច្រើនជាងមនុស្សធំទៅទៀត ដែលសំខាន់នោះគឺ ការរៀបរាប់ប្រាប់ ឬអធិប្បាយអំពីអ្វីដែលកើតឡើងនៅក្នុងផ្ទះ នឹងជួយឱ្យកូនមិនមានអារម្មណ៍ដាច់ចេញពីរូបអ្នក។
សាងភាពជឿជាក់ក្នុងចិត្តដល់កូន
រឿងសំខាន់គឺ អ្នកម្តាយខ្លួនឯងត្រូវផ្តល់នូវភាពជឿជាក់ក្នុងចិត្តដល់កូនថា អ្នកនៅតែស្រឡាញ់រូបគេដូចមុនដដែល ការមានប៉ាថ្មីមិនអាចផ្លាស់ប្តូរអារម្មណ៍ដែលម៉ាក់មានចំពោះកូនបានទេ សេចក្តីស្រឡាញ់ដែលម៉ាក់ឱ្យដល់កូននៅតែមានរហូតតទៅ។ អ្នកម្តាយអាចនឹងប្រាប់កូនថា កូននៅតែមានរបស់លេងដូចមុនដដែល មានម៉ាក់ជូនទៅ និងទៅទទួលមកវិញនៅឯសាលារៀនដូចមុន តែថ្ងៃខ្លះម៉ាក់អាចនឹងទៅជាមួយបុរសម្នាក់នេះ មានគាត់ចូលមកនៅក្នុងផ្ទះជាមួយយើង និងមានអ្នកញ៉ាំបាយជាមួយយើងថែមម្នាក់ទៀត តែកូននៅតែញ៉ាំបាយជាមួយម៉ាក់ដូចមុនដដែល ជាដើម។
ផ្តល់ពេលវេលាក្នុងការសម្របសម្រួលខ្លួន
នៅពេលដែលអ្នកម្តាយចាប់ផ្តើមស្គាល់អ្នកថ្មី និងរៀបផែនការគិតថា អនាគតអាចនឹងរៀបការ ឬនៅជាមួយគ្នានោះ ក៏អាចនឹងមានការនាំកិច្ចការងារប្រចាំថ្ងៃដែលយើងធ្វើជាមួយកូន និងអ្នកថ្មីមកធ្វើរួមគ្នា តែត្រូវមានតុល្យភាពគ្នាគឺ ត្រូវមានពេលបំបែកគ្នារវាងម្តាយ-កូន ខ្លួនឯង និងអនាគតស្វាមីដោយគ្មានកូន និងកិច្ចការងារដែលនឹងធ្វើរួមគ្នាទាំង 3 នាក់ ជាដើម គឺមិនមែនត្រូវតែធ្វើជាមួយគ្នារហូតគ្រប់ពេលនោះទេ៕
August 7, 2020
គ្រុនផ្តាសាយ និងគ្រុនផ្តាសាយធំ ខុសគ្នាត្រង់ណា និង វិធីមើលថែទាំខ្លួន
អំឡុងពេលនេះចាប់ផ្តើមឈានចូលរដូវរងាហើយ ធាតុអាកាសក៏ប្រែប្រួលទៅតាមរដូវកាល បើរាងកាយយើងសម្របសម្រួលខ្លួនមិនទាន់ អាចនឹងធ្វើឱ្យកើតជំងឺផ្សេងៗបាន ដោយជំងឺដែលជួបប្រទះញឹកញាប់ក្នុងរដូវរងាភាគច្រើនគឺ ជំងឺគ្រុនផ្តាសាយ និងគ្រុនផ្តាសាយធំ ដូច្នេះយើងនាំគ្នាមកត្រៀមរាងកាយឱ្យរួចជាស្រេច ដើម្បីកុំឱ្យឈឺថ្កាត់ទាំងអស់គ្នា។
វេជ្ជបណ្ឌិតជំនាញសាខាអនាម័យបរិស្ថានវិទ្យា បានអធិប្បាយថា ជំងឺគ្រុនផ្តាសាយ និងគ្រុនផ្តាសាយធំ កើតដោយសារមេរោគវីរុស អាចចម្លងគ្នាបានយ៉ាងងាយ មេរោគនឹងចូលទៅក្នុងរាងកាយតាមច្រមុះ មាត់ និងភ្នែក។ មេរោគទាំងនេះស្ថិតនៅក្នុងលម្អងទឹកកំហាក សំបោរ ទឹកមាត់របស់អ្នកជំងឺដែលកណ្តាស ឬក្អកចេញមក។ ក្រៅពីនេះមេរោគនៅអាចជាប់នៅលើភាជនៈ របស់ប្រើប្រាស់ផ្សេងៗដែលមានប្រឡាក់លម្អងទឹកសំបោរ ឬទឹកមាត់របស់អ្នកជំងឺ។ ជំងឺនេះអាចរីករាលដាលយ៉ាងទូលំទូលាយបាននៅក្នុងទីកន្លែងដែលមានមនុស្សរស់នៅរួមគ្នាច្រើន និងគ្មានខ្យល់អាកាសបក់ចេញចូល។
គ្រុនផ្តាសាយ និងគ្រុនផ្តាសាយធំខុសគ្នាត្រង់ណា
អាការសញ្ញារបស់គ្រុនផ្តាសាយនឹងចាប់ផ្តើមដោយការមានគ្រុនក្តៅ ឈឺក្បាល ក្អក កណ្តាស់ ឈឺ-ក អាចមានអាការរងាញាក់ទៀតផង តែសម្រាប់អ្នកដែលកើតជំងឺគ្រុនផ្តាសាយធំវិញ នឹងមានអាការធ្ងន់ធ្ងរជាងគឺ ក្តៅខ្លួនខ្លាំង រងាញាក់ ឈឺក្បាល និងវិលមុខខ្លាំង ឈឺនៅតាមឆ្អឹង និងសាច់ដុំ និងច្រើនតែមានអាការក្អួតចង្អោរគួបផ្សំជាមួយផង។ បើបានសម្រាកយ៉ាងគ្រប់គ្រាន់ និងបានទទួលការរក្សាព្យាបាលយ៉ាងត្រឹមត្រូវ អ្នកជំងឺនឹងជាដាច់ពីជំងឺនេះបានក្នុងរយៈពេល 5 – 7 ថ្ងៃ។
តែអ្នកខ្លះអាចនឹងកើតរោគជ្រៀតជ្រែក ដូចជា រោគហើមសួត រោគរ៉ាំរ៉ៃ ដូចជា ហឺត ជំងឺសួតរ៉ាំរ៉ៃ រោគបេះដូង និងសរសៃឈាម រលាកបំពង់ក រលាកបំពង់ខ្យល់ ដែលអាចមានគ្រោះថ្នាក់ខ្លាំងជាពិសេសក្នុងក្រុមប្រថុយប្រថានដូចជា ស្រ្តីមានគភ៌ ជាដើម៕
August 7, 2020
ស្រ្តីមានគភ៌ក៏អាចហាត់ប្រាណបាន និងកីឡាដែលស័ក្តិសមសម្រាប់ស្រ្តីមានគភ៌
ក្រៅពីការជួយជំរុញឱ្យម្តាយចិញ្ចឹមកូនដៅយទឹកដោះខ្លួនឯងយ៉ាងតិចបំផុត 6 ខែ និងឱ្យកូនបានញ៉ាំទឹកដោះគួបផ្សំជាមួយអាហារតាមវ័យជាបន្តបន្ទាប់ដល់ 2 ឆ្នាំហើយនោះ ក្រុមវេជ្ជបណ្ឌិតជំនាញនៅបានគាំទ្រឱ្យស្រ្តីមានគភ៌មានសុខភាពរឹងប៉ឹងដោយការហាត់ប្រាណក្នុងកម្រិតសមរម្យទៀតផង ដោយបានណែនាំដូចខាងក្រោម។
ស្រ្តីមានគភ៌មិនមែនជាអ្នកជំងឺទេ តែវាជាអំឡុងពេលដែលស្រ្តីគួរមានរាងកាយរឹងប៉ឹងបំផុតក្នុងជីវិត ព្រោះរាងកាយស្រ្តីមានគភ៌ត្រូវមើលថែទាំជីវិតដល់ទៅ 2 ក្នុងពេលតែមួយ និងកំពុងត្រៀមខ្លួនចូលឆ្ពោះទៅរកកម្មវិធីការប្រសូត ដូច្នេះការហាត់ប្រាណនឹងជួយឱ្យសុខភាពរាងកាយរឹងមាំ និងការធ្វើការងាររបស់ប្រព័ន្ធលំហូរវិលរបស់ឈាមឆ្ពោះទៅកាន់ទារកក្នុងគភ៌កាន់តែល្អឡើង បានទទួលសារធាតុអាហារគ្រប់គ្រាន់ និងចម្រើនធំធាត់បានល្អ។ ក្រៅពីនេះ នៅពេលអ្នកម្តាយធ្វើលំហាត់ប្រាណ រាងកាយនឹងបញ្ចេញអ័រម៉ូនអេនដូហ្វ៊ីន ឬអ័រម៉ូននៃសេចក្តីសុខ ធ្វើឱ្យអ្នកម្តាយមានសភាវខាងអារម្មណ៍ល្អ ដែលមានចំណែកធ្វើឱ្យទារករឹងប៉ឹង និងមានអារម្មណ៍ភ្លឺថ្លា។
វេជ្ជបណ្ឌិតជំនាញបានណែនាំបន្ថែមថា ស្រ្តីមានគភ៌ដែលហាត់ប្រាណត្រូវពិចារណាពីសភាវ និងគ្រឹះភាពរឹងមាំរបស់រាងកាយជាមុនសិនថា តើមុនពេលតាំងគភ៌ធ្លាប់ហាត់ប្រាណយ៉ាងជាប់លាប់ដែរឬទេ? ហាត់ប្រាណខ្លាំងក្លាប៉ុនណា? នៅពេលតាំងគភ៌ហើយនៅអាចហាត់ប្រាណជាបន្តបន្ទាប់បានក្នុងរយៈវេលា និងភាពខ្លាំងក្លារបស់ការហាត់ប្រាណដែលស័ក្តិសមចំពោះសភាពរាងកាយ និងសភាវការតាំងគភ៌ក្នុងអំឡុងអាយុគភ៌ផ្សេងៗ រួមទាំងត្រូវឧស្សាហ៍សង្កេតមើលអាការដែលកើតឡើងក្នុងខណៈពេលហាត់ប្រាណ ឬក្រោយពេលហាត់ប្រាណហើយផង ដូចជា បើមានអាការនឿយ ល្វើយ បញ្ជាក់ថា អ្នកហាត់ប្រាណខ្លាំងជ្រុលពេកហើយ និងចំពោះស្រ្តីមានគភ៌ដែលចាប់អារម្មណ៍ការហាត់ប្រាណ តែរាងកាយមានសភាវជ្រៀតជ្រែកពីអាការផ្សេងៗនោះ អាចប្រឹក្សាជាមួយគ្រូពេទ្យជំនាញបាន។
កម្រិតកំណត់ និង ចំណុចគួរប្រយ័ត្នក្នុងការហាត់ប្រាណរបស់ស្រ្តីមានគភ៌
1 . ចាប់ផ្តើមដោយការហាត់ប្រាណបែបស្រាលៗ នៅពេលរាងកាយស៊ាំធ្លាប់ហើយ ទើបអាចបង្កើនកម្រិតភាពលំបាកបាន។
2 . ស្រ្តីមានគភ៌ដែលអាយុគភ៌នៅមិនទាន់ដល់ 3 ខែ មិនគួរហាត់ប្រាណក្នុងកន្លែងដែលធាតុអាកាសក្តៅ និងសើមឡើយ។
3 . ចៀសវាងការត្រាំក្នុងទឹកដេលមានសីតុណ្ហភាពក្តៅឧណ្ហៗខ្លាំងលើសកម្រិត។
4 . ចៀសវាងក្បាច់ដែលពន្យឺតពង្រឹងខ្លួន ក្បាច់ដែលប្រថុយប្រថាននឹងការប៉ះពាល់ជាមួយផ្ទៃ ឬក្បាច់ដែលស្រ្តីមានគភ៌ត្រូវបញ្ចេញកម្លាំងខ្លាំងៗ។
5 . មិនគួរសម្រុកហាត់ប្រាណរហូតរាងកាយមានអារម្មណ័ថា នឿយ ល្វើយឡើយ។
6 . គ្រប់ពេលដែលហាត់ប្រាណគួរញ៉ាំទឹកស្អាត ដើម្បីបំពេញជំនួសញើសដែលបាត់បង់ទៅ។
7 . បើមានអារម្មណ៍ថា ដកដង្ហើមមិនទាន់ ឈឺដើមទ្រូង វិលមុខ រកកលខ្យល់ មានឈាម ឬវត្ថុរាវចេញមកតាមរន្ធស្បូន ឬមានអាការឈឺដោយសារស្បូនបង្រួញខ្លួន (ច្រើនជាង 6 – 8 ដងក្នុង 1 ម៉ោង) គួរឈប់ហាត់ប្រាណភ្លាម និងប្រញាប់ទៅជួបគ្រូពេទ្យជំនាញជាបន្ទាន់ដើម្បីសុវត្ថិភាព។
កីឡាដែល ឡារ៉ែនចង់ណែនាំសម្រាប់ស្រ្តីមានគភ៌
1 . ហែលទឹក – ជួយធ្វើឱ្យមានអារម្មណ៍ធូរស្រាល និងសប្បាយខ្លួន សាច់ដុំគ្រប់ផ្នែករបស់រាងកាយរឹងមាំ។
2 . ការហ្វឹកយ៉ូហ្កា – ជួយឱ្យអាចគ្រប់គ្រងខ្យល់ដង្ហើម សាច់ដុំរឹងមាំធូរស្រាល មានសតិស្មារតី និងសមាធិក្នុងអំឡុងពេលប្រសូត។
3 . អ៊ែរ៉ូប៊ិក ឌែនស៍ ធ្វើចលនារាងកាយ – ជួយធ្វើចលនាសាច់ដុំស្ទើរតែគ្រប់ផ្នែកក្នុងរាងកាយ ធ្វើឱ្យមានអារម្មណ៍ធូរស្រាល។
ទាំងអស់នេះ ស្រ្តីមានគភ៌អាចហាត់ប្រាណបានយ៉ាងជាប់លាប់រៀងរាល់ថ្ងៃ ឬមួយថ្ងៃខានមួយថ្ងៃ យ៉ាងតិចក្នុងម្តងៗ 30 នាទី តាមក្បួនខ្នាតការហាត់ប្រាណរបស់ស្រ្តីមានគភ៌៕
August 7, 2020
វគ្គជម្រុះ World Cup កំពុងតែប្រឈមនឹងការលើកពេលទៀតហើយ
ក្នុងកិច្ចប្រជុំតាមអ៊ិនធើណិត របស់សហព័ន្ធកីឡាបាល់ទាត់ពិភពលោក ឬ FIFA ដោយមានការចូលរួមពីសំណាក់ប្រធាន FIFA លោក Gani Infino ជាមួយនឹងសហព័ន្ធបាល់ទាត់អាស៊ាន (AFF) កាលពីពេលកន្លងទៅនេះ បានបញ្ជាក់ថា តំបន់អាស៊ាន មិនទាន់បានធូរស្បើយនៅឡើយទេពីជំងឺកូវីដ-19។
នៅក្នុងកិច្ចប្រជុំនេះ FIFA បានសួរពីស្ថានភាពរបស់វិស័យបាល់ទាត់នៅក្នុងតំបន់អាស៊ាន និងស្ថានភាពរបស់សមាគមបាល់ទាត់នីមួយៗនៅអាស៊ាន បន្ទាប់ពីជួបប្រទះការឆ្លងរាលដាលនៃវីរុស Covid-19 កន្លងមក ដោយក្នុងនោះ លោកបានដឹងថា តំបន់អាស៊ាន បានទទួលរងផលប៉ះពាល់ពីគ្រប់ទិដ្ឋភាពទាំងអស់ ជាពិសេសបញ្ហាហិរញ្ញវត្ថុ ដោយសារអ្នកគាំទ្រមិនអាចចូលរួមក្នុងការគាំទ្រ ទើបជាមូលហេតុធ្វើឱ្យប្រទេសអាស៊ានទាំងអស់ បានស្នើសុំឱ្យ FIFA ពិចារណាជាបន្ទាន់ក្នុងការពន្យារពេលការប្រកួតនានា។
គួរបញ្ជាក់ដែរថា ការប្រកួតវគ្គជម្រុះ World Cup 2022 ទើបតែដល់ពាក់កណ្តាលផ្លូវទេ ដោយនៅសល់ការប្រកួត ស្ទើរតែពាក់កណ្តាលទៀតឯណោះ ហើយប្រទេសនានាក្នុងតំបន់កំពុងតែបិទព្រំដែន ដែលធ្វើឱ្យពិបាកក្នុងការរៀបចំការប្រកួតដែលនៅសេសសល់ទាំងនោះ៕

August 6, 2020
ថ្លៃហួស! ជម្រើសជាតិកូស្តារីកា 2រូប មកលេងក្នុងលីកកំពូលវៀតណាម មានតម្លៃសរុប 1.3លានដុល្លារ
លីគកំពូលរបស់វៀតណាម រដូវកាល2020 នេះ នឹងនាំយកកីឡាករជម្រើសជាតិកូស្តារីកា 2រូប គឺ Jose Ortiz និង Ariel Rodriguez មកចូលរួមក្នុងក្លិប Ho Chi Minh City FC ដែលជាក្លិបនៅលីកកំពូលវៀតណាម V-League 1។
Jose Ortiz វ័យ 28ឆ្នាំ ជាខ្សែបម្រើមានជំនាញប្រើជើងទាំងសងខាង មានតម្លៃខ្លួន 715,000ដុល្លារ ដោយធ្លាប់បង្ហាញខ្លួនឱ្យក្រុមជម្រើសជាតិរបស់គេ ចំនួន 13ប្រកួត រកបាន 3គ្រាប់ និងផ្ទេរមកពីក្លិបអ្នកមាននៃលីកកំពូលរបស់ប្រទេសកូឡុំប៊ី។
ចំណែក Ariel Rodriguez មានវ័យ 31ឆ្នាំ ជាខ្សែប្រយុទ្ធដែលនាំចូលមកពីក្លិបលីកកំពូលរបស់ថៃ BG Patum ដែលជាក្លិបជើងឯកលីកកំពូលថៃ កាលពីរដូវកាលមុន មានតម្លៃខ្លួន 315,000ដុល្លារ ធ្លាប់បង្ហាញខ្លួនជាច្រើនលើកឱ្យជម្រើសជាតិ និងរកបាន 8គ្រាប់។
គួរបញ្ជាក់ដែរថា កីឡាករទាំង២រូបនេះ ត្រូវបានវៀតណាមដាក់ឱ្យធ្វើចត្តាឡីស័ក រយៈពេល 14ថ្ងៃ មុននឹងបានចូលមកធ្វើតេស្តសុខភាព ហើយក៏បានទទួលជោគជ័យតែម្តង។ ចំពោះការបង្ហាញខ្លួនវិញ លោក Chung Hae-seong ដែលជាគ្រូបង្វឹករបស់ក្លិប Ho Chi Minh City FC បានបញ្ជាក់ថា លោកនឹងដាក់ពួកគេទាំង2 ឱ្យលេងក្នុងពេលឆាប់ៗនេះ បើមិនមានបញ្ហាអ្វី៕

August 6, 2020
សហព័ន្ធកីឡាបាល់ទាត់កម្ពុជា ទទួលបានថរិកាពីFIFA ចំនួន 1.5លានដុល្លារសម្រាប់ស្តារវិបត្តិកូវីដ-19
ជុំវិញកិច្ចប្រជុំ របស់សហព័ន្ធកីឡាបាល់ទាត់អាស៊ីអាគ្នេយ៍ (AFF) ជាមួយនឹងលោក Gianni Infantino ប្រធានសហព័ន្ធកីឡាបាល់ទាត់ពិភពលោក ឬ FIFA ប្រទេសដែលជាសមាជិកអាស៊ានទាំងអស់នឹងទទួលបានថវិកាចំនួន 1.5លានដុល្លារ សម្រាប់ប្រើប្រាស់ក្នុងការស្តារវិស័យបាល់ទាត់របស់ខ្លួនឡើងវិញ ដោយក្នុងនោះ 1លានដុល្លារនឹងផ្តល់ជូនសម្រាប់សកម្មភាពបាល់ទាត់បុរស ហើយកន្លះលានដុល្លារទៀត នឹងផ្ដល់ជូនសម្រាប់បាល់ទាត់នារី។
យោងតាមគេហទំព័រ FIFA.com សហព័ន្ធកីឡាបាល់ទាត់ពិភពលោក បានប្រកាសពីផែនការផ្តល់ជំនួយសង្គ្រោះរបស់ខ្លួន ជុំវិញបញ្ហា COVID-19 ដោយក្រុមប្រឹក្សា បានអនុម័តជាឯកច្ឆន្ទ លើគម្រោងផ្តល់ជំនួយសង្គ្រោះបន្ទាន់របស់ FIFA ដែលបានរៀបចំឡើងដោយរដ្ឋបាលរបស់ FIFA ក្នុងកិច្ចសហប្រតិបត្តិការយ៉ាងជិតស្និទ្ធជាមួយតំណាងសហព័ន្ធ ដោយមាន 3ដំណាក់កាល ហើយផែនការគាំទ្រជាសកលនេះ អាចនឹងត្រូវចំណាយ រហូតដល់ទៅ 1.5ពាន់លានដុល្លារ ដើម្បីជួយដល់សហគមន៍បាល់ទាត់ទាំងមូល៕

August 6, 2020
Felix គ្រោងត្រឡប់មកកម្ពុជា ដើម្បីប្រមូលផ្តុំក្រុមជម្រើសជាតិ នាខែតុលាខាងមុខនេះហើយ
Felix G.Dalmas គ្រូបង្គោល នៃក្រុមបាល់ទាត់ជម្រើសជាតិកម្ពុជា បានបង្ហាញអារម្មណ៍ថា នឹកការប្រកួតរបស់ក្រុមបាល់ទាត់ជម្រើសជាតិកម្ពុជាយ៉ាងខ្លាំង ខណៈដែលលោកកំពុងតែស្នាក់នៅក្នុងប្រទេសជប៉ុន ដើម្បីការពារខ្លួនពីជំងឺកូវីដ-19 ហើយត្រៀមវិលត្រឡប់មកកម្ពុជាវិញក្នុងពេលឆាប់ៗនេះ។
ជុំវិញវិស័យបាល់ទាត់របស់កម្ពុជា លោកបានបន្ថែមថា វាជារឿងល្អដែលកម្ពុជា បានបើកឱ្យមានការប្រកួតក្នុងក្របខ័ណ្ឌលីកឡើងវិញ ជាមួយនឹងការការពារសុវត្ថិភាពបានយ៉ាងល្អ ដោយរក្សាគម្លាតសង្គម ថែមទាំងត្រួតពិនិត្យចំនួន និងសុខភាពក្រុមការងារបាល់ទាត់ទាំងអស់ ដែលនេះជាសញ្ញាល្អមួយសម្រាប់វិស័យបាល់ទាត់របស់កម្ពុជា ក៏ដូចជាផ្តល់ឱកាសដល់កីឡាករទាំងអស់ បានទទួលនូវការប្រកួត ក៏ដូចជាត្រៀមខ្លួនឱ្យបានល្អក្នុងការប្រកួតនាខែតុលាឆាប់ៗខាងមុខនេះ។
គួរដឹងដែរថា លោក Felix G.Dalmas បច្ចុប្បន្នកំពុងស្ថិតនៅក្នុងប្រទេសជប៉ុន ហើយបើគ្មានអ្វីប្រែប្រួលទេនោះ នៅខែតុលា លោកអាចនឹងត្រឡប់មកបន្តដឹកនាំក្រុមបាល់ទាត់ជម្រើសជាតិកម្ពុជា ដើម្បីប្រកួតជម្រុះបាល់ទាត់ពិភពលោក ដែលនៅសេសសល់ជាមួយប្រទេសបារ៉ែន អ៊ីរ៉ង់ និងអ៊ីរ៉ាក់ នៅខែវិច្ឆិកាខាងមុខ៕

August 6, 2020
មហាអំណាចស្មាតហ្វូនប៊ិក Samsung Galaxy Note 20 | Note 20 Ultra បានបង្ហាញខ្លួនជាមួយការកម្ម៉ង់ទុកមុន និងមានកាដូយ៉ាងច្រើនសន្ធឹកសន្ធាប់!
(ភ្នំពេញ) ថ្ងៃទី ០៦ ខែសីហា ឆ្នាំ ២០២០៖ បន្ទាប់ពីមហាព្រឹត្តិការណ៍ដ៏ធំកក្រើកពិភពលោកទាំងមូលរបស់ក្រុមហ៊ុន សាមសុង ដែលបានធ្វើការដាក់បង្ហាញរូងរាងពិតនៃអធិរាជមហាអំណាចស្មាតហ្វូនប៊ិកដែលមានតែមួយគ្មានពីរគឺ Samsung Galaxy Note 20 និង Galaxy Note 20 Ultra នៅលើគេហទំព័រផ្លូវការរបស់ខ្លួនកាលពីថ្ងៃទី ០៥ ខែសីហា ឆ្នាំ ២០២០ នៅម៉ោង 21:00 នាទីយប់ រួចមក ក្រុមហ៊ុនសាខាថៃសាមសុង អេឡិចត្រូនិចប្រចាំព្រះរាជាណាចក្រកម្ពុជាបានធ្វើការអញ្ជើញអ្នកសារព័ត៌មាន និងអ្នកថតរូបអាជីពជាច្រើនរូបដើម្បីជាសាក្សីនៃការដាក់បង្ហាញជាសកលនៃកំពូលមហាព្រឹត្តិការណ៍ជាទីមោទនៈបំផុតនេះ ក៏ដូចជាទទួលយកបទពិសោធន៍ដោយផ្ទាល់នូវរូបរាងពិត, ភាពអស្ចារ្យ, លក្ខណៈពិសេស, តម្លៃលក់ពិតប្រាកដក្នុងទីផ្សារប្រទេសកម្ពុជាយើង ដែលប្រព្រឹត្តទៅនៅអគារ THE BRIDGE Commercial Retail Mall។
ពិតប្រាកដណាស់ Samsung Galaxy Note 20 និង Note 20 Ultra ចេញមកលើកនេះគឺពិតជាមិនធម្មតាឡើយដោយមានការអភិវឌ្ឍន៍កាន់តែទំនើប និងអស្ចារ្យជាងមុនខ្លាំងគួរឱ្យកត់សម្គាល់ដូចជា៖ បន្ថែមកាមេរ៉ាថតច្បាស់ខ្លាំង, អេក្រង់ធំជាងមុន (Refresh Rate), ខ្នងខាងក្រោយរចនាឡើងដោយមានលក្ខណៈជាកញ្ចក់ថ្លា ឆ្លុះចាំង ភ្លឺរលោងស្រស់ស្អាតឡូយជាងមុន (Limited Edition), អមមកជាមួយនឹងប៊ិក(S-Pen) ដែលមានលក្ខណៈវិវត្តន៍លឿនរលូនជាងមុនខ្លាំង(9ms) អាចផ្តល់ឲ្យលោកអ្នកនូវអារម្មណ៍ដូចជាការកាន់ប៊ិកពិត។
បើតាម លោកខ្លូត ពិសិដ្ឋ ប្រធានគ្រប់គ្រងផ្នែកផលិតផលទូរស័ព្ទដៃនៃក្រុមហ៊ុន សាខាថៃ សាមសុង អេឡិចត្រូនិច ប្រចាំព្រះរាជាណាចក្រកម្ពុជាបានមានប្រសាសន៍ថា៖ “យើងពិតជាមានមោទនភាពក្រៃលែងក្នុងការដាក់បង្ហាញក៏ដូចជាអបអរសាទរវត្តមានអធិរាជមហាអំណាចស្មាតហ្វូនប៊ិក Samsung Galaxy Note 20 និង Note 20 Ultra ក្នុងឆ្នាំ ២០២០ នេះ! យើងមានភាពជឿជាក់ និងសង្ឃឹមយ៉ាងច្បាស់ថា Samsung Galaxy Note 20 និង Note 20 Ultra នឹងទទួលបានការគាំទ្រយ៉ាងច្រើនលើសលុបពិតប្រាកដពីសំណាក់អតិថិជនដែលនិយមប្រើប្រាស់ស៊េរី Note និងដឹងច្បាស់ពីភាពអស្ចារ្យរបស់ Galaxy Note!”
អធិរាជមហាអំណាចស្មាតហ្វូបប៊ិក Samsung Galaxy Note 20 និង Note 20 Ultra នឹងដាក់ឱ្យអតិថិជនដែលកំពុងរង់ចាំយ៉ាងអន្ទះសារដ៏ច្រើនលើសលុបទាំងអស់ក្នុងប្រទេសកម្ពុជាធ្វើការកម្ម៉ង់ទិញទុកមុន (Pre-order) នៅ ថ្ងៃទី០៦ ដល់ថ្ងៃទី ១៤ ខែសីហា ២០២០ ជាមួយនឹងការថែមជូនដ៏សម្បើមអស្ចារ្យមិនធ្លាប់មានដូចជា៖
* កម្ម៉ង់ទិញទុកមុន Galaxy Note 20 Ultra ៖
– តម្លៃ៖ $1,199 (256GB), $1,299 (512GB)
– ពណ៌៖ Mystic Black (ខ្មៅ), Mystic White (ស), Mystic Bronze (សំរឹទ្ធ)
– ថែមជូនកាសឥតខ្សែ Galaxy Buds Live
– បញ្ចុះតម្លៃ 50% ពេលប្តូរអេក្រង់ថ្មី (រយៈពេល 1 ឆ្នាំចាប់គិតពីថ្ងៃជាវ)!
– ស៊ីមស្មាតលេខពិសេសតម្លៃ 129 ដុល្លារ ជាមួយគម្រោងស្មាតចំនួន 52 សប្តាហ៍!
* កម្ម៉ង់ទិញទុកមុន Galaxy Note 20 ថែមជូន៖
– តម្លៃ៖ $949 (256GB)
– ពណ៌៖ Mystic Green (បៃតង), Mystic Gray (ប្រផះ), Mystic Bronze(សំរឹទ្ធ)
– ថែមជូនកាសឥតខ្សែ Galaxy Buds+
– បញ្ចុះតម្លៃ 50% ពេលប្តូរអេក្រង់ថ្មី (រយៈពេល 1 ឆ្នាំចាប់គិតពីថ្ងៃជាវ)!
– ស៊ីមស្មាតលេខពិសេសតម្លៃ 129 ដុល្លារ ជាមួយគម្រោងស្មាតចំនួន 52 សប្តាហ៍!
តោះ…នៅចាំអីទៀត? ប្រញាប់អញ្ជើញទៅហាងដែលមានស្លាកសញ្ញា (Pre-order) ឬហាងដែលនៅជិតលោកអ្នកបំផុតឥឡូវនេះភ្លាមទៅ។
* លក្ខខណ្ឌផ្សេងៗត្រូវបានអនុវត្ត
August 6, 2020