បញ្ហ្ាស្លាក់វត្ថុចម្លែកក្នុងបំពង់ខ្យល់ជាបញ្ហាមួយដែលមានភាពសំខាន់ខ្លាំងណាស់ និងអាចបង្កគ្រោះថ្នាក់ដល់ជីវិតបាន។ ច្រើនជួបប្រទះនៅលើកុមារតូចៗអាយុក្រោម 3 ឆ្នាំ ជាវ័យដែលមានភាពចង់ដឹងចង់ឃើញ ចាប់អារម្មណ៍លើអ្វីគ្រប់យ៉ាង ចង់សាកល្បងដោយខ្លួនឯង ទើបច្រើនតែចូលចិត្តយកវត្ថុចម្លែកៗដាក់ចូលទៅក្នុងរន្ធផ្សេងៗរបស់រាងកាយ ជាពិសេសរន្ធប្រព័ន្ធដង្ហើម ដូចជា រន្ធច្រមុះ និងមាត់ គួបផ្សំនឹងធ្មេញថ្គាមដែលនៅមិនទាន់ដុះឡើងគ្រប់ផងនោះ ធ្វើឱ្យមិនអាចទំពារអាហារដុំធំៗឱ្យល្អិតហ្មត់បានឡើយ ទើបអាចកើតការស្លាក់ក្នុងអំឡុងពេលញ៉ាំបាយ ឬពេលកំពុងរត់លេងបាន។
នៅលើមនុស្សធំក៏អាចកើតបញ្ហាស្លាក់បានដូចគ្នាដែរ នៅពេលដែលព្យាយាមធ្វើកិច្ចការងារច្រើនយ៉ាងក្នុងខណៈពេលញ៉ាំបាយ ឬអាហារ ដូចជា និយាយ សើច ជាដើម។ ជួនកាលធ្មេញក្លែងក្លាយដែលដាក់មិនសូវជាប់ណែន ក៏អាចរបូតធ្លាក់ចូលទៅក្នុងផ្លូវដង្ហើម ឬបំពង់ផ្លូវអាហារបានដោយមិនបានតាំងចិត្តដូចគ្នា។
សភាវបន្ទាន់ក្នុងករណីផ្លូវដង្ហើមត្រូវបាំងស្ទះ
នៅពេលមានវត្ថុចម្លែកនៅក្នុងផ្លូវដង្ហើម ជនរងគ្រោះនឹងមានអាការស្លាក់ ក្អកខ្លាំងក្លា និងមានអាការពិបាកដកដង្ហើម តែទាំងអស់នេះអាស្រ័យលើទំហំ រូបរាង និងទីតាំងរបស់វត្ថុចម្លែកនោះដែរ។ វត្ថុចម្លែកទំហំធំច្រើនតែនៅជាប់ក្នុងនោះ និងកើតការបាំងស្ទះក្នុងកម្ពស់ប្រអប់សំឡេង ឬបំពង់ខ្យល់ផ្នែកខាងលើ ធ្វើឱ្យកើតការបាំងស្ទះផ្លូវដង្ហើមយ៉ាងពេញលេញ និងភ្លាមៗតែម្តង។ ជនរងគ្រោះច្រើនតែលើកដៃឱបបំពង់ក និយាយមិនចេញសំឡេង ឆ្លេឆ្លា ដកដង្ហើមមិនចូល បបូរមាត់ឡើងខ្មៅជាំ សភាវនេះហៅថា ជាសភាវអាសន្ន ព្រោះជនរងគ្រោះអាចស្លាប់បានក្នុងរយៈពេលតែមិនប៉ុន្មាននាទីប៉ុណ្ណោះ។
អ្នកជំនាញបានណែនាំឱ្យប្រើវិធីរបស់ Heimlich ជួយជនរងគ្រោះដែលជាមនុស្សធំ ឬក្មេងធំ ចូរធ្វើក្នុងឥរិយាបថអង្គុយ ឬឈរដោយឱ្យជនរងគ្រោះបង្អោនខ្លួនទៅខាងមុខបន្តិច អ្នកជួយសង្រ្គោះឈរនៅពីខាងក្រោយ យកដៃទាំងពីរឱបជនរងគ្រោះឱ្យជាប់ ដោយដាក់ដៃឆ្វេងពីលើដៃស្តាំដែលក្តាប់យ៉ាងណែនដាក់នៅលើចុងដង្ហើម រួចហើយរឹបកណ្តាប់ដៃស្តាំចូលមករកចុងដង្ហើមយ៉ាងខ្លាំង និងឆាប់រហ័ស ដើម្បីឱ្យកើតជាកម្លាំងសម្ពាធរុញទៅក្នុងប្រអប់ពោះច្រានចូលទៅក្នុងប្រអប់ទ្រូងដើម្បីរុញឱ្យវត្ថុចម្លែកនោះឱ្យខ្ទាតចេញពីបំពង់ខ្យល់។ សម្រាប់ក្មេងតូចអាយុទាបជាង 1 ឆ្នាំ អាចប្រើវិធីទះខ្នង ឬយកបាតដៃដាក់លើដើមទ្រូង ហើយយកម្រាមមេដៃទាំងពីរខាងសង្កត់លើបរិវេណក្រោមចុងដង្ហើមរួចសង្កត់ ឬទាញរឹបចូលមកដើម្បីឱ្យខ្យល់ធាក់វត្ថុចម្លែកដែលបាំងស្ទះបំពង់ខ្យល់នោះចេញមក។
ចំណុចត្រូវប្រយ័ត្ន
1 . ឡារ៉ែនមិនណែនាំឱ្យប្រើម្រាមដៃលូកខ្វេះទៅក្នុងបំពង់កក្មេងឡើយ ព្រោះអាចនឹងធ្វើឱ្យវត្ថុចម្លែកនោះរបូតធ្លាក់ជ្រុះទៅបាំងស្ទះបំពង់ខ្យល់កាន់តែខ្លាំងជាងមុនទៅទៀត។
2 . វិធីរបស់ Heimlich ខាងលើគួរប្រើតែក្នុងករណីដែលជនរងគ្រោះមានការបាំងស្ទះបំពង់ខ្យល់ដង្ហើម 100 ភាគរយប៉ុណ្ណោះ និងអ្នកជួយសង្គ្រោះក៏គួរតែមានភាពចំណានល្មមគួរសមដែរ តែបើនៅលើជនរងគ្រោះដែលនៅមានសតិ នៅដកដង្ហើមខ្លួនឯងបាន គួរប្រញាប់នាំទៅមន្ទីពេទ្យប្រសើរជាង។
ដំបូន្មានដើម្បីការពារការស្លាក់វត្ថុចម្លែក
1 . ជ្រើសរើសប្រភេទ និងទំហំខ្នាតរបស់អាហារដែលស័ក្តិសមនឹងកុមារក្នុងវ័យផ្សេងៗ ដើម្បីការពារការស្លាក់អាហារ និងមិនគួរបញ្ចុកអាហារក្មេងក្នុងខណៈដែលក្មេងកំពុងរត់លេងនោះទេ។
2 . ជ្រើសរើសប្រភេទរូបរាង និងទំហំខ្នាតរបស់របស់លេងឱ្យស័ក្តិសមនឹងវ័យរបស់ក្មេង រួមទាំងរៀបចំទុកដាក់វត្ថុរបស់របរដែលអាចបង្កគ្រោះថ្នាក់ឱ្យមានសុវត្ថិភាពផុតពីដៃក្មេង។
3 . សម្រាប់នៅលើមនុស្សធំដែលមានបញ្ហារឿងធ្មេញ ត្រូវប្រឹក្សាជាមួយទន្តពេទ្យដើម្បីរៀបចំរកធ្មេញក្លែងក្លាយដែលស័ក្តិសមនឹងខ្លួន ជ្រើសរើសទទួលទានអាហារដែលមិនចាំបាច់ត្រូវទំពារខ្លាំង ទំហំខ្នាតអាហារដែលស័ក្តិសម និងគួរដោះធ្មេញក្លែងក្លាយចេញមុនពេលចូលគេងផង។
ដំបូន្មានក្នុងករណីដែលកើតការស្លាក់វត្ថុចម្លែកក្នុងបំពង់ខ្យល់ដង្ហើម
1 . ប្រញាប់បញ្ជូនជនរងគ្រោះទៅមន្ទីពេទ្យភ្លាម។
2 . តមញ៉ាំទឹក តមញ៉ាំអាហារភ្លាមតែម្តងនៅពេលកើតមានការស្លាក់។
3 . ក្នុងករណីជាកុមារ ចូរសាកសួរអ្នកដែលស្ថិតក្នុងហេតុការណ៍ថា តើក្មេងកើតការស្លាក់ក្នុងពេលកំពុងធ្វើអ្វី ដូចជា កំពុងញ៉ាំអាហារ លេងរបស់លេង ជាដើម ព្រមទាំងនាំគំរូរបស់អាហារ នំ ឬវត្ថុដែលសង្ស័យថានាំឱ្យស្លាក់នោះទៅមន្ទីពេទ្យជាមួយផងដើម្បីជាប្រយោជន៍ក្នុងការរៀបផែនការព្យាបាលរបស់គ្រូពេទ្យ៕
