Author: ធឿន មករា

សាលារាជធានីភ្នំពេញប្រកាសថានៅថ្ងៃឈប់សម្រាកខាងមុខនេះ ការប្រមូលសំរាមមិនបានល្អដូចថ្ងៃធម្មតាទេ
នៅសល់មិនដល់មួយសប្តាហ៍ទៀតទេ កម្ពុជាយើងនឹងដល់ថ្ងៃដែលរាជរដ្ឋាភិបាលប្រកាសឱ្យឈប់សម្រាកសងថ្ងៃបុណ្យចូលឆ្នាំថ្មីនៅទូទាំងប្រទេស។
សាលារាជធានីភ្នំពេញ បានប្រកាសថាថ្ងៃទី 17 ទី18 ទី19 ទី20 និងទី21 ខែសីហាឆ្នាំ 2020 ជាថ្ងៃដែលរាជរដ្ឋាភិបាលអនុញ្ញាតឱ្យមន្ត្រីរាជការ និយោជិត កម្មករ ឈប់សម្រាកដើម្បីសងបុណ្យចូលឆ្នាំថ្មីប្រពៃណីជាតិខ្មែរ ស្របតាមអនុក្រឹត្យលេខ 101 អនក.បក ចុះថ្ងៃទី 15 ខែកក្កដា ឆ្នាំ2020។
នៅក្នុងអំឡុងពេលឈប់សម្រាកកាលបរិច្ឆេទខាងលើនេះ ការផ្តល់សេវាសម្អាត ប្រមូល និងដឹកជញ្ជូនសំរាមនៅក្នុងរាជធានីភ្នំពេញ នឹងមិនបានល្អដូចថ្ងៃធម្មតាទេ ព្រោះកម្មកររបស់ក្រុមហ៊ុន ស៊ិនទ្រី នឹងអវត្តមានមួយចំនួន។ ហេតុនេះដើម្បីថែរក្សា សោភ័ណភាព អនាម័យបរិស្ថាន នៅរាជធានីភ្នំពេញ រដ្ឋបាលរាជធានីភ្នំពេញបានអំពាវនាវឱ្យប្រជាជលពលរដ្ឋម្ចាស់លំនៅដ្ឋានក្នុងរាជធានីភ្នំពេញទាំងអស់ កុំបញ្ចេញសំរាមមកដាក់លើដងផ្លូវសាធារណៈ ដោយត្រូវរក្សាទុកដាក់សំរាមរបស់ខ្លួនឱ្យបានត្រឹមត្រូវនៅក្នុងទីតាំងរៀងៗខ្លួនជាបណ្តោះអាសន្នសិន៕
August 12, 2020
អ្នកជំនាញថា ដៃគូអាជីវកម្មល្អមានលក្ខណៈសម្បតិ្ត 9យ៉ាង
ការជ្រើសរើសដៃគូសហការ ជារឿងសំខាន់ខ្លាំងណាស់សម្រាប់អាជីវកម្មនីមួយៗ ព្រោះប្រសិនបើជ្រើសរើសដៃគូសហការមិនល្អទេនោះ យើងនឹងទទួលរនូវផលប៉ះពាល់ជាច្រើនដែលអាចឈានរហូតដល់ធ្វើឱ្យអាជីវកម្មទាំងមូលត្រូវបិទទ្វាថែមទៀតផង។
ជានិច្ចកាល គេសង្កេតឃើញហើយថា ម្ចាស់អាជីវកម្មជាច្រើនបានរអ៊ូរទាំ និងបារម្ភពីការជ្រើសរើសដៃគូអាជីវកម្មខុសជាដើម។ នៅថ្ងៃនេះ អ្នកជំនាញហិរញ្ញវត្ថុ លោក ង៉ែត ជូ បានលើកឡើងថាដែគូអាជីកម្មល្អមានលក្ខណៈសម្បត្តិសំខាន់ៗចំនួន9យ៉ាង។
លោកថា ប្រសិនបើអ្នកជាដៃគូអាជីវកម្ម ចូរព្យាយាមបំពេញនូវចំណុចខ្វះខាតនានា។ អ្នកគួរតែជាបុគ្គលពូកែដោះស្រាយបញ្ហាចៀសវាងនាំបញ្ហាឱ្យដៃគូអាជីកម្មដោះស្រាយ។ លោកបានរៀបរាប់ថា លក្ខណៈសម្បត្តិសំខាន់ៗទាំង9ចំណុចនោះគឺ៖
1. មានចំណង់ (Passion)
2. មានចក្ខុវិស័យរួម (Same vision)
3. មានបណ្តាញអាជីវកម្ម (Business networks)
4. មានបទពិសោធន៍អាជីវកម្ម (Experience)
5. មានប្រឌិតញាណ ឬការច្នៃប្រឌិត (Creativity)
6. មានភាពខ្លាំងផ្នែកហិរញ្ញវត្ថុ (Financial strength)
7. ហ៊ានទទួលយកហានិភ័យ (Comfort with risk)
8. ជាអ្នកពូកែសំរេចចិត្ត និងដោះស្រាយបញ្ហាបានល្អ (Good decision maker and problem solver)
9. មានភាពទៀងត្រង់ និងដែលអាចទុកចិត្តបាន (Honest and trustworthy)៕
August 12, 2020
លីប្រា ផ្តល់សេវាកម្មសន្តិសុខជាកញ្ចប់ (integrated security system) រវាងមនុស្ស និងបច្ចេកវិទ្យាដំបូងគេបំផុតនៅកម្ពុជា
ក្រុមហ៊ុនលីប្រា ដែលជាក្រុមហ៊ុនសន្តិសុខឈានមុខគេទទួលស្គាល់ដោយ ISO នៅកម្ពុជា និងជាក្រុមហ៊ុនតែងផ្តល់សេវាកម្ម Integrated Security System តែមួយគត់នៅកម្ពុជា កាលពីដើមខែសីហា ឆ្នាំ2020 នេះបានសហការជាមួយក្រុមហ៊ុន OAPCL ក្នុងការទិញសិទ្ធចែកចាយផ្តាច់មុខ ឧបករណ៍ប្រព័ន្ធសុវត្ថិភាពម៉ាក AJAX មកក្នុងទីផ្សារកម្ពុជា។
លោក ហេង ម៉េងហូ អគ្គនាយកក្រុមហ៊ុនសន្តិសុខលីប្រា បានលើកឡើងថាក្រុមហ៊ុនលីប្រាជាក្រុមហ៊ុនដែលផ្តល់សេវាកម្ម Integrated Security System តែមួយគត់នៅកម្ពុជា ដែលមានន័យថាក្រុមហ៊ុនផ្តល់សេវាកម្មជាកញ្ចប់ដោយការធ្វើការរួមគ្នាសន្តិសុខ (Manned Security) ដោយមានការគាំទ្រពីប្រព័ន្ធបច្ចេកវិទ្យាដើម្បីការពារសុវត្ថិភាពឱ្យកាន់តែសុក្រិត្យ។
បច្ចុប្បន្ននេះសេដ្ឋកិច្ចកម្ពុជាបានរីកចម្រើនយ៉ាងឆាប់រហ័សដែលធ្វើឱ្យមានការអភិវឌ្ឍជាអគារខ្ពស់ៗ វីឡា ខុនដូ និងលំនៅដ្ឋានបែបទាន់សម័យជាច្រើនដែលទាមទារឱ្យមានការរៀបចំនូវប្រព័ន្ធសុវត្ថិភាពដោយយកចិត្តទុកដាក់បំផុត។ ដើម្បីឆ្លើយតបជាមួយនឹងការវិវឌ្ឍន៍នៃបរិបទជីវិតរស់នៅបែបទាន់សម័យ និងទំនើបរបស់ប្រជាជននេះ ក្រុមហ៊ុន លីប្រា និងក្រុមហ៊ុន AOPCL បានសហការគ្នានាំយកឧបករណ៍សុវត្ថិភាពម៉ាក AJAX ដើម្បីការពារលំនៅដ្ឋាន និងទ្រព្យសម្បត្តិដ៏មានតម្លៃរបស់យើងគ្រប់គ្នា។
ឧបករណ៍ម៉ាក AJAX ជាឧបករណ៍ប្រព័ន្ធសុវត្ថិភាពដែលប្រើបច្ចេកវិទ្យាចុងក្រោយបំផុត ដោយរួមបញ្ចូលគ្នារវាងប្រព័ន្ធសុវត្ថិភាពឥតខ្សែ (Professional Wireless Security System) និងការចនាឧបករណ៍ប្រកបដោយសោភណ្ឌភាពដែលសាកសមជាមួយភាពស៊ីវិល័យ និងទំនើបទាន់សម័យស្របតាមលំនៅដ្ឋាន ការិយាល័យ និងហាងទំនើបៗរបស់អតិថិជនគ្រប់រូប។ លក្ខណៈពិសេសរបស់ឧបករណ៍នេះ គឺវាមានភាពងាយស្រួលក្នុងការតម្លើង និងមានកម្រិតថ្ម (Battery) ដែលអាចប្រតិបត្តិការរហូតដល់រយៈពេល7ឆ្នាំ។
កិច្ចសហការដ៏មានសារៈសំខាន់នៅថ្ងៃនេះ ផ្តោតសំខាន់លើការចែកចាយនូវឧបករណ៍ និងសេវាកម្មប្រព័ន្ធសុវត្ថិភាព (Home Security) ដោយប្រើប្រាស់ប្រព័ន្ធសុវត្ថិភាពអត់ខ្សែ (Professional Wireless Security System) រួមបញ្ចូលគ្នាជាមួយសេវាកម្មដំណោះស្រាយសុវត្ថិភាព24h/7សប្ដាហ៍ និងការគ្រប់គ្រងប្រព័ន្ធសុវត្ថិភាពពីបន្ទប់ត្រួតពិនិត្យសុវត្ថិភាព 24h/7សប្ដាហ៍ (CMS & VMS) របស់ក្រុមហ៊ុន លីប្រា។
គួរបញ្ជាក់ផងដែរថា ក្រុមហ៊ុនលីប្រា ជាក្រុមហ៊ុនសន្តិសុខឈានមុខគេទទួលស្គាល់ដោយ ISO នៅកម្ពុជា ដែលមានផ្តល់សេវាកម្មការពារសុវត្ថិភាពប្រកបដោយគុណភាពខ្ពស់ជាច្រើនដូចជា សេវាកម្មសន្តិសុខ (Manned Security) បន្ទប់ត្រួតពិនិត្យសុវត្ថិភាព24h/7សប្ដាហ៍(CMS & VMS 24h/7w) ប្រព័ន្ធការពារអគ្គីភ័យ(Fire and Smoke Protect) ឧបករណ៏ផ្ដល់ដំណឹង(Fire Alarm) ឧបករណ៍ប្រឆាំងការពារចោរលូចចោរគាស់(IDS Protect) ឧបករណ៍ការពារកុំឱ្យមានទឹកនៅទីកន្លែងស្ងួត(Leak Protect) និងឧបករណ៍ និងប្រព័ន្ធការពារសុវត្ថិភាពជាច្រើនទៀត ដែលមានគុណភាពខ្ពស់ក្នុងការការពារសុវត្ថិភាព ជូនប្រជាជន ក្រុមហ៊ុន និងស្ថាប័ននានា ប្រកបដោយសុវត្ថិភាព ក៏ដូចជាទំនុកចិត្តខ្ពស់បំផុត៕

August 12, 2020
ចង់ឲ្យគូស្នេហ៍ស្តាប់ តើគួរធ្វើយ៉ាងម៉េចទៅ?
សុភាពនារីទាំងឡាយធ្លាប់នឹកឆ្ងល់ខ្លះទេថា ពេលយើងចង់និយាយអ្វីមួយជាមួយគូស្នេហ៍ តែហេតុម៉េចបានជាគេហាក់ដូចជាមិនសូវចង់ស្តាប់រឿងដែលយើងចង់និយាយនោះ ឬធ្វើឬកជាតាំងចិត្តស្តាប់ តែការពិតវិញ គេបែរជាលួចនឹកទៅរឿងឯណាផ្សេងទៅវិញ រហូតធ្វើឲ្យនារីជាច្រើនមានអារម្មណ៍ធុញទ្រាន់រអាចំពោះទង្វើបែបនេះរបស់គូស្នេហ៍ ឬស្វាមី ជាខ្លាំង ។ បើអ្នកណាដែលកំពុងធ្លាក់ក្នុងស្ថានការណ៍បែបនេះ សូមកុំអាលឆេវឆាវ ចូរនាំគ្នាមកមើលគន្លឹះល្អៗក្នុងការនិយាយឲ្យពួកគាត់តាំងចិត្តស្តាប់វិញម្តងប្រសើរជាង ។
1 . និយាយចំៗ ត្រង់ៗ
មូលហេតុមួយដែលធ្វើឲ្យបុរសៗមិនសូវចូលចិត្តស្តាប់នារីៗនិយាយនោះ ព្រោះនារីៗច្រើនតែនិយាយកាច់កុងហូរហែបូបាច់ច្រើនពេក ឬអ្នកខ្លះទៀតនិយាយត្រឡប់ត្រឡឹនរហូតមិនដឹងថាចង់និយាយអំពីស្អីក៏មានដែរ ដូច្នេះបើអ្នកមានអ្វីនៅក្នុងចិត្ត គួរតែនិយាយចេញមកឲ្យត្រង់ៗ ឬនិយាយចូលសាច់រឿងតែម្តងទៅ ។
2 . និយាយតែរឿងដែលគេចាប់អារម្មណ៍
នារីភាគច្រើន ៗចូលចិត្តនិយាយតែរឿងរបស់ខ្លួនឯង ឬមិនទេក៏និយាយតែរឿងដែលខ្លួនឯងចាប់អារម្មណ៍ដូចជា រឿងតារា ម៉ូដខោអាវ និងរឿងតុបតែងខ្លួន ដែលរឿងពួកនេះ បុរសៗមិនសូវជាយល់ប៉ុន្មានទេ ខ្លាំងណាស់ក៏បានត្រឹមតែអង្គុយងក់ក្បាលតាមសំដីរបស់អ្នកប៉ុណ្ណោះ ដូច្នេះអ្នកគួរតែបបួលគេនិយាយក្នុងរឿងដែលគេជំនាញ និងចាប់អារម្មណ៍ខ្លះដូចជារឿង តិចណូឡូជី ឡាន ហ្គេម បាល់ទាត់ – ល – ហើយនារីណាដែលអាចនិយាយជជែកក្នុងរឿងទាំងអស់នេះបាន គឺជានារីដែលមើលទៅមានមន្តស្នេហ៍ និងគួរឲ្យជជែកលេងជាមួយខ្លាំងណាស់ ។
3 . និយាយឲ្យត្រូវពេលត្រូវវេលា
ជួនកាលដែលបុរសមិនស្តាប់នូវអ្វីដែលអ្នកនិយាយនោះ មិនមែនមកពីគេមិនចាប់អារម្មណ៍នោះទេ អាចដោយសារតែពេលនោះគេកំពុងតែមានរឿងពិបាកចិត្ត ឬស្ថិតនៅក្នុងអារម្មណ៍ដែលចង់នៅស្ងាត់ៗតែម្នាក់ឯង ដូច្នេះបើអ្នកត្រូវការពិភាក្សា និងជជែកជាមួយគេបែបច្បាស់លាស់នោះ អ្នកគួរតែចេះជ្រើសរើសរកពេលណាដែលគេស្ថិតក្នុងអារម្មណ៍ធម្មតាទើបជាការប្រសើរជាង ព្រោះវាជាពេលដែលគេព្រមទទួល និងតាំងចិត្តស្តាប់អ្នកខ្លាំងបំផុត ។
4 . អធិប្បាយពីហេតុផល
ក្នុងករណីយដែលគេមិនចាប់អារម្មណ៍ ឬមិនព្រមទទួលស្តាប់នូវអ្វីដែលអ្នកនិយាយ អ្នកគួរតែអធិប្បាយ ឬសម្តែងពីអារម្មណ៍របស់អ្នកចេញទៅថា ពេលនេះអ្នកកំពុងតែមានអារម្មណ៍ ឬកំពុងតែគិតពីអ្វី ដូចជា មានអារម្មណ៍កង្វល់សោកស្តាយ ឬព្រួយបារម្ភអំពីគេខ្លាំងប៉ុនណា ហើយសឹមនិយាយចូលសាច់រឿង ដើម្បីឲ្យគេបានយល់ពីអារម្មណ៍ និងបើកចិត្តទទួលស្តាប់ពាក្យសំដីរបស់អ្នកកាន់តែខ្លាំងឡើង ។
5 . អរគុណដែលគេព្រមទទួលស្តាប់
មើលទៅវាអាចដូចជារឿងចម្លែកបន្តិចហើយដែលត្រូវអរគុណគូស្នេហ៍ ឬស្វាមី បន្ទាប់ពីគេព្រមទទួលស្តាប់រឿងរ៉ាវរបស់អ្នកនោះ តែនៅក្នុងការពិតវិញ រឿងតូចតាចកំប៉ិកកំប៉ុកបែបនេះអាចជួយឲ្យគេមានអារម្មណ៍ល្អ និងថែមទាំងជាការសម្តែងឲ្យគេបានដឹងដែរថា គេមិនមែនត្រឹមតែជាកន្លែងសំរាប់ទម្លាយអារម្មណ៍របស់អ្នកប៉ុណ្ណោះទេ តែគេជាមនុស្សដ៏សំខាន់ម្នាក់របស់អ្នកដែលចាំផ្តល់នូវពាក្យណែនាំ និងជាអ្នកដែលចាំផ្តល់នូវកម្លាំងចិត្តដល់អ្នកជានិច្ច ។
សូមសាកល្បងនាំវិធីខាងលើនេះទៅអនុវត្តសាក-លមើល ធានាថា ចាប់ពីពេលនេះទៅ ជីវិតគូរបស់អ្នកនឹងប្រកបទៅដោយការយល់ចិត្តយល់ថ្លើមគ្នា រស់នៅដោយភាពជឿជាក់លើគ្នាទៅវិញទៅមក និងមិនអាចអត់គ្នាបានប្រកបដោយសុភមង្គលមិនខាន៕
August 12, 2020
ឆ្នាំមុន ក្រុមហ៊ុនបង្កើត TikTok រកប្រាក់ចំណូលបាន $17ពាន់លាន
ក្រុមហ៊ុនមេ ByteDance ដែលបង្កើតកម្មវិធី TikTok អាចរកប្រាក់ចំណូលបាន 17ពាន់លានដុល្លារ កាលពីឆ្នាំ2019 កន្លងទៅ។ ពោលគឺ វាបានការកើនឡើងជាង 2ដង ធៀបនឹងឆ្នាំ2018 ដែលរកបានតែប្រមាណជា 7.4ពាន់លានដុល្លារប៉ុណ្ណោះ។ នេះបើយោងតាមរបាយការណ៍របស់ Bloomberg។
សម្រាប់ក្រុមហ៊ុនមេ ByteDance ការរកបានប្រាក់ចំណូលដ៏ច្រើនមហាសាលនេះ គឺច្រើនជាងក្រុមហ៊ុនបច្ចេកវិទ្យាធំៗនៅតំបន់ Silicon Valley របស់អាមេរិកទៅទៀត ដូចជា Twitter រកប្រាក់ចំណេញបាន 1.47ពាន់លានដុល្លារ និង Snapchat ឆ្នាំមុនមិនអាចរកប្រាក់ចំណេញបានឡើយ មានតែខាតបង់ទៅវិញ។ ប្រជាប្រិយភាពរបស់ TikTok មានសម្ទុះកើនឡើងខ្លាំង ដែលការណ៍នេះ គឺជាការគំរាមកំហែងដល់ក្រុមហ៊ុនបណ្ដាញសង្គមអាមេរិកធំៗ ដូចជា Facebook និង Twitter ជាដើម។
ការផ្ទុះជំងឺកូវីដ-19 បានធ្វើឱ្យអ្នកប្រើប្រាស់ TikTok កើនរឹតតែខ្លាំងឡើង ដែលមលដល់ពេលនេះ មានអ្នកប្រើលើសពី 2ពាន់លាននាក់ទៅហើយ៕
August 12, 2020
Foxconn ត្រៀមផលិត iPhone 12 និងកំពុងរើសបុគ្គលិក ជាមួយប្រាក់លើកទឹកចិត្តជាង $1ពាន់
ក្រុមហ៊ុន Foxconn គឺជាដៃគូផលិតដ៏ធំមួយរបស់ Apple មានមូលដ្ឋាននៅក្នុងប្រទេសចិន បានចាប់ផ្ដើមធ្វើការជ្រើសរើសបុគ្គលិក ដើម្បីជួយដល់ការដំឡើង iPhone 12 ។ លក្ខខណ្ឌដ៏គួរឱ្យភ្ញាក់ផ្អើលនោះគឺ បើអ្នកដាក់ពាក្យជាប់ក្នុងការជ្រើសរើស នឹងមានផ្ដល់ជូនប្រាក់រង្វាន់លើកទឹកចិត្ត រហូតដល់ជិត 1,300ដុល្លារ។
រោងចក្រ Foxconn គឺត្រូវការកម្លាំងមនុស្សច្រើន ពេលដែល iPhone ជំនាន់ថ្មីចាប់ផ្ដើមការផលិតទ្រង់ទ្រាយធំ។ គេរំពឹងថា នៅក្នុងឆ្នាំនេះ Apple នឹងប្រកាសចេញ iPhone ថ្មីរហូតដល់ 4ម៉ូដែល ដែលមាន 2ប្រភេទ អេក្រង់ទំហំ 6.1អ៊ីញ។ 1ប្រភេទអេក្រង់ 5.4អ៊ីញ និង 1ទៀតអេក្រង់ 6.7អ៊ីញ។
ជារឿយៗ ស្មាតហ្វូន iPhone ថ្មី តែងតែចាប់ផ្ដើមបញ្ចេញលក់នៅចុងខែកញ្ញា ប៉ុន្តែកាលពីពេលថ្មីៗនេះ Apple បានឱ្យតម្រុយថា ការបញ្ចេញលក់ iPhone នាឆ្នាំនេះ នឹងយឺតជាសព្វដងប្រមាណជា 2ទៅ 3សប្ដាហ៍៕
August 12, 2020
ចំណេះដឹងល្អៗថ្មី 100 មុខសម្រាប់ស្រ្តីមេផ្ទះ (តពីលេខមុន)
66 . វិធីកម្ចាត់ស្នាមប្រឡាក់នៅលើកម្រាលតុឱ្យស្អាតឡើងវិញគឺ ចូររោយអំបិលនៅលើស្នាមប្រឡាក់ទាំងនោះ រួចស្រោចពីលើដោយទឹកក្តៅ ហើយយកទៅដាក់ត្រាំនៅក្នុងទឹកដោះគោឆៅដាំនៅលើភ្លើងតិចៗ រួចហើយសឹមនាំយកទៅបោកគក់សម្អាតត្រង់ស្នាមប្រឡាក់នោះ។
67 . វិធីសម្អាតវាំងននផ្លាស្ទិក គួរបោកគក់សម្អាតដោយទឹកដែលលាយសាប៊ូតិចៗ ឬទឹកសាប៊ូលាយទឹកក្តៅឧណ្ហៗ រួចហើយយកទៅដាក់សំដឹលហាលឱ្យត្រូវខ្យល់ល្អជាងហាលឱ្យត្រូវថ្ងៃ ព្រោះវាមិនធ្វើឱ្យវាំងនននោះស្លេកពណ៌។
68 . វិធីសម្អាតកញ្ចក់ឆ្លុះមុខឱ្យភ្លឺថ្លាឡើងវិញនោះគឺ យកថ្នាំដុសធ្មេញមកច្របាច់ដាក់លើកញ្ចក់ ហើយរកក្រណាត់ជ្រលក់ទឹកមកជូតខាត់ថ្នាំដុសធ្មេញដែលច្របាច់ទុកនៅលើកញ្ចក់នោះដោយត្រូវខាត់ឱ្យសព្វលើកញ្ចក់ រួចហើយយកក្រណាត់ស្ងួតជូតម្តងទៀត កញ្ចក់ឆ្លុះមុខដែលស្រអាប់មើលមិនច្បាស់នោះ នឹងភ្លឺថ្លាឡើងវិញភ្លាមតែម្តង។
69 . វិធីសម្អាតស្នាមប្រេងដែលស្រក់ប្រឡាក់នៅលើកម្រាលស៊ីម៉ង់ត៍ឱ្យស្អាតដូចដើមវិញនោះគឺ រកកម្ទេចផេះដែលនៅក្នុងចង្រ្កានធ្យូងមករោយនៅលើស្នាមប្រឡាក់ប្រេងលើកម្រាលស៊ីម៉ង់ត៍នោះឱ្យសព្វ ទុកចោលមួយសន្ទុះ រួចសឹមលាងចេញដោយទឹកឱ្យស្អាត ព្រោះកម្ទេចផេះនឹងបឺតស្នាមប្រេងទាំងនោះចេញទាល់តែអស់។
70 . វិធីសម្អាតស្នាមប្រឡាក់ខ្មៅដៃ ឬស្នាមខ្មៅដៃពណ៌នៅលើក្រដាសបិទជញ្ជាំងវ៉លផេភើរ៍គឺ ចូរប្រើប្រដាប់ផ្លុំសក់មកផ្លុំដោយប្រើខ្យល់ក្តៅដាក់ត្រង់ស្នាមប្រឡាក់នោះ ហើយរកក្រណាត់កូតុងជ្រលក់ទឹកសាប៊ូ ពូតឱ្យនៅសើមតិចៗយកមកជូតដុសត្រង់ស្នាមប្រឡាក់នោះ ស្នាមប្រឡាក់ខ្មៅដៃពណ៌ទាំងនោះនឹងរលាយបាត់អស់មិនខាន។
(នៅមានត)
August 12, 2020
ឱ្យកូនរៀនគូរគំនូរ មានប្រយោជន៍ចំពោះកូនយ៉ាងណាខ្លះ?
ឪពុកម្តាយក្នុងសង្គមកម្ពុជាយើងមិនសូវជាមើលឃើញពីប្រយោជន៍នៃការបង្ហាត់កូន ឬឱ្យកូនរៀនចេះគូរូបគំនូរប៉ុន្មានឡើយ ដែលការពិតទៅការបង្ហាត់ ឬឱ្យកូនរៀនគូររូប ចេះផាត់ពណ៌ ឬឆ្លាក់រូបផ្សេងៗនោះមានប្រយោជន៍ចំពោះក្មេងខ្លាំងណាស់លើផ្នែកការគិតនឹកស្រមៃ អារម្មណ៍កម្សាន្ត និងការចេះសង្កេតមើលទៀតផង។ ថ្ងៃនេះ ឡារ៉ែនសូមលើកយកពីគុណប្រយោជន៍ល្អៗនៃការបង្ហាត់ និងការឱ្យកូនរៀនគូររូប មកជម្រាបជូនមិត្តអ្នកអានដែលជាអាណាព្យាបាល ឬឪពុកម្តាយដូចខាងក្រោម។
1 . ធ្វើឱ្យកូនក្លាយជាក្មេងហ៊ានគិត ហ៊ាននឹកស្រមៃ
វ័យកុមារជាវ័យដែលពេញហូរហៀរទៅដោយការគិតស្រមៃ។ ការចេះគូររូប និងផាត់ពណ៌នឹងជួយឱ្យកុមារបានហ្វឹកហាត់ការប្រើការគិតស្រមៃយ៉ាងឥស្សរៈ ដែលនឹងហុចផលធ្វើឱ្យកុមារក្លាយជាមនុស្សហ៊ានគិត ហ៊ានចាប់ផ្តើមនូវអ្វីថ្មីៗ ធ្វើឱ្យក្មេងបានសម្តែងចេញនូវអ្វីដែលគេបានគិត និងមានអារម្មណ៍ដឹង ជាពិសេសនៅលើក្មេងតូចនៅអាចទំនាក់ទំនងខាងតួអក្សរបានល្អ ដែលនឹងធ្វើឱ្យក្មេងស្រឡាញ់ការធ្វើការងារ និងមានក្តីមោទនភាពលើខ្លួនឯង។
2 . ជួយឱ្យចេះហ្វឹកហាត់សមាធិ(ចេះផ្ចង់អារម្មណ៍)
នៅពេលការច្នៃបង្កើតការងារគូររូបគំនូរនីមួយៗរបស់កុមារចប់អស់ហើយ កុមារនឹងមានអារម្មណ៍ដឹងពីក្តីមោទនភាពចំពោះស្នាដៃរបស់គេខ្លាំងណាស់ ធ្វើឱ្យគេមានអារម្មណ៍ក្លៀវក្លាស្វាហាប់ក្នុងការសាងស្នាដៃថ្មីជាបន្តទៀត ជួយហ្វឹកហាត់ភាពប្រណីត និងសមាធិ ព្រោះក្នុងខណៈដែលក្មេងព្យាយាមគ្រប់គ្រងដៃខ្លួនឯងឱ្យអាចគូររូប ផាត់ពណ៌ ឬច្នៃប្រឌិតវត្ថុអ្វីមួយបានសម្រេចនោះ ពិតជាត្រូវប្រើការតាំងចិត្ត និងសមាធិខ្លាំងណាស់។
3 . ធ្វើឱ្យកុមារមានផ្លូវចិត្តដែលល្អ និងស្រស់ស្រាយ
ការព្យាយាម និងការប្រើសមាធិដែលម៉ឺងម៉ាត់នឹងនរតាមភាពដឹងក្តីរបស់កុមារក្នុងវ័យនីមួយៗ ធ្វើឱ្យកុមារក្លាយជាមនុស្សមានភាពជាសិល្បៈ មានភាពលម្អិត និងទន់ភ្លន់ក្នុងផ្លូវចិត្ត ធ្វើឱ្យដឹងពីគុណតម្លៃនៃធម្មជាតិ សិល្បៈ វត្ថុសម្ភារ ឬរូបបែបនៃការគិតផ្សេងៗ ធ្វើឱ្យមានជីវិត និងផ្លូវចិត្តដែលល្អស្រស់ស្រាយ។ ជួយធ្វើឱ្យកុមារស្គាល់ពីការធ្វើការរួមគ្នា ចេះសម្របសម្រួលខ្លួន និងសម្រួលគំនិតឱ្យចូលគ្នា ទទួលស្គាល់គ្នាទៅវិញទៅមក ដែលជាគ្រឹះរបស់ការរស់នៅរួមគ្នាយ៉ាងមានសាមគ្គី និងមានប្រជាធិបតេយ្យក្នុងសង្គមទៀតផង៕
August 12, 2020
កម្មវិធី TikTok ប្រើភាពចន្លោះប្រហោងរបស់ប្រព័ន្ធប្រតិបត្តិការ Android ដើម្បីទាញយក MAC address
កម្មវិធី TikTok ដែលជាកម្មវិធីកំពុងតែមានភាពចម្រូងចម្រាសមួយចំនួននៅក្នុងបណ្ដាប្រទេសធំៗដូចជា ប្រទេសឥណ្ឌា និង សហរដ្ឋអាមេរិក ទាក់ទងនឹងការព្រួយបារម្ភក្នុងការគ្រប់គ្រងទិន្នន័យរបស់អ្នកប្រើប្រាស់ ដែលត្រូវបានគេរកឃើញមានបញ្ហាមួយចំនួនទៀត។ បន្ថែមលើក្តីបារម្ភខាងលើ ថ្មីៗនេះគេបានរកឃើញថា កម្មវិធី TikTok បានប្រើភាពចន្លោះប្រហោងនៅក្នុងប្រព័ន្ធប្រតិបត្តិការ Android ដើម្បីទាញយក MAC address របស់អ្នកប្រើប្រាស់ នេះបើតាមការផ្សព្វផ្សាយរបស់សារពត៌មាន The Wall Street Journal។ សម្រាប់លោកអ្នកដែលពុំទាន់ស្គាល់ថាអ្វីទៅជា MAC address នោះ វាគឺជាលេខសម្គាល់ (អាសយដ្ឋាន) របស់ ឧបករណ៍ network ដើម្បីប្រើប្រាស់ ក្នុងការទំនាក់ទំនងគ្នា។
ទោះបីក្រុមហ៊ុន Google បានព្យាយាមបិទមិនឱ្យអ្នកអភិវឌ្ឍន៍កម្មវិធី ឬជនទីបីអាចទាញយក MAC address បានតាំងពីឆ្នាំ២០១៥ ហើយក៏ដោយ ក៏ក្រុមហ៊ុន ByteDance ដែលជាក្រុមហ៊ុនបង្កើតកម្មវិធី TikTok បានប្រើភាពចន្លោះប្រហោងដើម្បីទាញយក និងរក្សាទុក MAC address របស់អ្នកប្រើប្រាស់នៅពេលដែលពួកគេដំឡើងកម្មវិធីលើកដំបូង ដោយមិនទាំងមានការអនុញ្ញាតពីអ្នកប្រើប្រាស់បានថែមទៀតផង។ សម្រាប់អ្នកអភិវឌ្ឍន៍កម្មវិធី MAC address គឺមានតម្លៃបំផុតសម្រាប់ពួកគេ ដើម្បីតាមដានការប្រើប្រាស់ទូរសព្ទ សម្រាប់ការផ្សព្វផ្សាយពាណិជ្ជកម្ម។
ក្រុមអ្នកស្រាវជ្រាវក៏បានបញ្ជាក់ផងដែរថា អ្វីដែលអស្ចារ្យនោះគឺក្រុមហ៊ុន ByteDance បានព្យាយាមប្រើប្រាស់វិធីម្យ៉ាង ដោយបន្ថែមកម្រិត encryption ដើម្បីលាក់ពីការទាញយកទិន្នន័យរបស់ពួកគេ។ បើតាមការប៉ាន់ស្មានរបស់អ្នកស្រាវជ្រាវឃើញថា ក្រុមហ៊ុន ByteDance បានរំលោភក្នុងការទាញយក MAC address អស់រយៈពេលយ៉ាងតិចបំផុត ១៥ខែ ហើយពួកគេទើបតែបានបញ្ឈប់ការរំលោភបំពាននេះនៅពេលធ្វើបច្ចុប្បន្នភាពកម្មវិធី TikTok នៅថ្ងៃទី១៨ ខែវិច្ឆិកា ឆ្នាំកន្លងទៅ៕
ប្រភព៖ នាយកដ្ឋានប្រឆាំងបទល្មើសបច្ចេកវិទ្យា
August 12, 2020
ឱ្យលឿនឡើង!! ការថែមជូនកាដូដ៏អស្ចារ្យពីការកម្ម៉ង់ទុកមុនសម្រាប់ Samsung Galaxy Note 20 | Note 20 Ultra ជិតអស់ពីស្តុកហើយ!
(ភ្នំពេញ) ថ្ងៃទី ១២ ខែសីហា ឆ្នាំ២០២០៖ ពិតជាអស្ចារ្យ និងមិនគួរឲ្យជឿមែន រយះពេលត្រឹមតែមួយសប្តាហ៍សោះមហាអំណាចស្មាតហ្វូប៊ិកដែលល្អឥតខ្ចោះ…ល្អឯកមានតែមួយគ្មានពីរក្នុងពិភពលោក Samsung Galaxy Note 20 និង Galaxy Note 20 Ultra ទទួលបានការកម្ម៉ង់ទុកមុន(Pre-Order) យ៉ាងច្រើនសន្ធឹកសន្ធាប់លើសលុបដែលអាចនឹងធ្វើឲ្យអស់ស្តុកមុនពេលកំណត់។
ដូច្នេះសម្រាប់អតិថិជនដែលពុំទាន់បានធ្វើការកម្ម៉ង់ទិញទុកមុន…សូមប្រញាប់រួសរាន់ឡើង…ព្រោះការថែមជូននេះជិតផុតកំណត់ហើយ! បើបំណាច់នឹងប្រាថ្នាចង់ធ្វើជាម្ចាស់ និងចង់ទទួលបានបទពិសោធន៍ដ៏ភ្ញាក់ផ្អើលមុនគេទៅហើយ…សូមកុំនៅបង្អង់យូរទៀតអី…!
* បញ្ជាក់៖ រាល់អតិថិជនទាំងអស់ដែលធ្វើការកម្ម៉ង់ទិញទុកមុនចាប់ពីថ្ងៃនេះរហូតដល់ថ្ងៃទី ១៤ ខែសីហា ឆ្នាំ ២០២០…នឹងទទួលបានជាមួយនឹងការថែមជូនដ៏អស្ចារ្យយ៉ាងច្រើនសន្ធឹសន្ធាប់ដូចជា៖
* កម្ម៉ង់ទិញទុកមុន Galaxy Note 20 Ultra ៖
– តម្លៃ៖ $1,199 (256GB), $1,299 (512GB)
– ពណ៌៖ Mystic Black (ខ្មៅ), Mystic White (ស), Mystic Bronze (សំរឹទ្ធ)
– ថែមជូនកាសឥតខ្សែ Galaxy Buds Live
– បញ្ចុះតម្លៃ 50% ពេលប្តូរអេក្រង់ថ្មី (រយៈពេល 1 ឆ្នាំចាប់គិតពីថ្ងៃជាវ)!
– ស៊ីមស្មាតលេខពិសេសតម្លៃ 129 ដុល្លារ ជាមួយគម្រោងស្មាតចំនួន 52 សប្តាហ៍!
* កម្ម៉ង់ទិញទុកមុន Galaxy Note 20 ថែមជូន៖
– តម្លៃ៖ $949 (256GB)
– ពណ៌៖ Mystic Green (បៃតង), Mystic Gray (ប្រផះ), Mystic Bronze(សំរឹទ្ធ)
– ថែមជូនកាសឥតខ្សែ Galaxy Buds+
– បញ្ចុះតម្លៃ 50% ពេលប្តូរអេក្រង់ថ្មី (រយៈពេល 1 ឆ្នាំចាប់គិតពីថ្ងៃជាវ)!
– ស៊ីមស្មាតលេខពិសេសតម្លៃ 129 ដុល្លារ ជាមួយគម្រោងស្មាតចំនួន 52 សប្តាហ៍!
* សម្រាប់អតិថិជនដែលបានធ្វើការកម្ម៉ង់ទិញរួចហើយអាចអញ្ជើញមកទទួលយកទូរស័ព្ទក្នុងក្តីស្រមៃរបស់ខ្លួនបានចាប់ពីថ្ងៃទី ១៨ ដល់២៤ ខែសីហា ឆ្នាំ ២០២០ ខាងមុខនេះបាននៅតាមហាង ឬដេប៉ូចែចាយផលិតផល សាមសុង ដែលខ្លួនបានធ្វើការការកម្ម៉ង់!
តោះ…នៅអល់អែកធ្វើអីទៀតទៅ? ប្រញាប់អញ្ជើញទៅហាងដែលមានស្លាកសញ្ញា (Pre-order) ឬហាងដែលនៅជិតលោកអ្នកបំផុតឥឡូវនេះភ្លាមទៅ។
* លក្ខខណ្ឌផ្សេងៗត្រូវបានអនុវត្ត

August 12, 2020