Author: ធឿន មករា

កម្ពុជា-ជប៉ុន ដោះស្រាយបញ្ហាប្រឈមក្នុងវិស័យពាណិជ្ជកម្ម និងរិះរកវិធីឆ្លើយតបតាមសំណើររបស់អ្នកវិនិយោគ
ជប៉ុន និងកម្ពុជា ជាប្រទេសដែលមានទំនាក់ទំនងគ្នាជាយូរណាស់មកហើយ ដោយក្នុងនោះក្រុមហ៊ុនជប៉ុនជាច្រើនក៏បានដាក់វិនិយោគនៅកម្ពុជា ដើម្បីរកស៊ី និងភ្ជាប់ទំនាក់ទំនងល្អរវាងប្រជាជន និងប្រជាជន។
បើតាមការបញ្ជាក់របស់ក្រុមប្រឹក្សាវិនិយោគកម្ពុជា គិតត្រឹមដំណាច់ខែកក្កដា ឆ្នាំ2020 នេះ ជប៉ុនវិនិយោគនៅកម្ពុជាមានទំហំទឹកប្រាក់ 2.8ពាន់លានដុល្លារអាមេរិក។
ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជាបានវាយតម្លៃខ្ពស់ ចំពោះសកម្មភាពវិនិយោគរបស់អ្នកវិនិយោគជប៉ុនទាំងអស់ ជាពិសេសការវិនិយោគក្នុងវិស័យកម្មន្តសាលមិនមែនវាយនភណ្ឌ ដែលបាននិងកំពុងដើរតួនាទីយ៉ាងសំខាន់ ក្នុងការចូលរួមចំណែកដល់ការធ្វើពិពិធកម្មមូលដ្ឋានសេដ្ឋកិច្ចកម្ពុជា និងការអភិវឌ្ឍធនធានមនុស្ស ស្របតាម គោលនយោបាយអភិវឌ្ឍន៍ វិស័យឧស្សាហកម្មកម្ពុជា ឆ្នាំ2015-2025 ដែលមានចក្ខុវិស័យកែប្រែរចនាសម្ព័ន្ធ ឧស្សាហកម្មកម្ពុជាពីឧស្សាហកម្មអតិពលកម្ម ទៅជាឧស្សាហកម្មផ្អែកលើជំនាញ ឱ្យបានត្រឹមឆ្នាំ2025។
ដើម្បីជំរុញឱ្យទំនាក់ទំនង និងការវិនិយោគរវាងកម្ពុជា-ជប៉ុន មានលក្ខណៈកាន់តែប្រសើរ កម្ពុជា និងជប៉ុន បានលើកយកបញ្ហាមួយចំនួនដើម្បីពិភាក្សាដូចជា បញ្ហាតម្លៃអគ្គិសនីនៅកម្ពុជា បញ្ហាកាតព្វកិច្ចសារពើពន្ធ បញ្ហាបទបញ្ញត្តិពាក់ព័ន្ធនឹងការនាំចូលរថយន្ត បញ្ហាវឌ្ឍនភាពនៃការត្រៀមបើកច្រកទ្វាព្រំដែនអន្តរជាតិស្ទឹងបត់នៅក្រុងប៉ោយប៉ែត និងការសម្រួលនិតិវិធីបញ្ចេញទំនិញពីគយ។
ក្នុងនោះដែរ ភាគីកម្ពុជាក៏បានបង្ហាញក្តីសង្ឃឹមថា ក្រុមហ៊ុនអាកាសចរ ANA នឹងចាប់ផ្តើមការហោះហើរផ្ទាល់ រវាងប្រទេសជប៉ុន និងកម្ពុជាឡើងវិញនាពេលឆាប់ៗខាងមុខ ដែលនឹងជួយជំរុញឱ្យទំហំពាណិជ្ជកម្ម និងវិនិយោគរវាងប្រទេសទាំងពីរមានការកើនឡើង៕
September 4, 2020
ការអប់រំកូនដោយមិនស្រែកគំហក នឹងធ្វើឱ្យកូនក្លាយជាមនុស្សល្អ និងស្ដាប់បង្គាប់
ធ្លាប់នឿយហត់ដែរឬទេ នៅពេលដែលកូនធ្វើឱ្យយើងខឹងមួម៉ៅ? ដូច្នេះសូមអាណាព្យាបាលទាំងឡាយបែរមកសាកល្បងមើលពីគន្លឹះល្អៗក្នុងការអប់រំកូនដោយមិនចាំបាច់ស្រែកគំហកដាក់កូន ឬខឹងមួម៉ៅវិញប្រសើរជាង។
អ្នកគ្រូ Leah Koenig គ្រូបង្វឹកការចិញ្ចឹមមើលថែទាំក្មេងតូចបានប្រាប់ថា រឿងដំបូងគេដែលយើងគួរធ្វើគឺ គិតជាមុនសិនថា តើរឿងដែលអ្នកចង់បាននោះគឺអ្វី? បើអ្នកខឹងក្រេវក្រោធ និងដាក់ទោសកូនភ្លាមៗតែម្ដងនោះ អាចនឹងធ្វើឱ្យកើតផលអាក្រក់ច្រើនជាងផលល្អដល់រូបអ្នកខ្លួនឯង តែបើសិនមនុស្សជាឪពុកម្ដាយអាចរម្ងាប់អារម្មណ៍ខឹងសម្បាបាន ហើយគិតរកវិធីកែបញ្ហាយ៉ាងចម្រើនវិញនោះ ពីការដាក់ទោសដែលអាក្រក់ៗ អាចនឹងក្លាយជារឿងល្អៗដែលបានអប់រំប្រដៅកូន និងថែមទាំងទទួលបានលទ្ធផលល្អហួសពីការនឹកគិតទៀតផង។
អប់រំកូនងាយៗឱ្យបានលទ្ធផលល្អដោយការឱប!
បងប្អូនឈ្លោះគ្នា ឪពុកម្ដាយធ្វើយ៉ាងណាល្អ?
បើលោកអ្នកឃើញថា កូនៗកំពុងតែវាយតប់គ្នា ចូរប្រញាប់បំបែកកូនៗចេញពីគ្នា។ ប្រាប់កូនថា ចូរទៅឈរនៅឱ្យឆ្ងាយពីគ្នា ដើម្បីឱ្យស្ងប់សតិអារម្មណ៍ បន្ទាប់ពីនោះ ចាប់ទាំងពីរនាក់ឱ្យបែរមុខរកគ្នា ហើយប្ដូរពាក្យសូមទោសគ្នាទៅវិញទៅមក ដូចជា ៈ
– ឱ្យបង(ឬអូន)សូមទោសសម្រាប់…(រឿងដែលធ្វើខុស)។
– បង(ឬអូន) ធ្វើឡើងដោយសារតែ…(អធិប្បាយថា ហេតុម៉េចបានធ្វើ) និង
– ចាប់ពីពេលនេះទៅ បង(ឬអូន)នឹង…(និយាយពីអ្វីដែលខ្លួនគួរធ្វើ)
លុះកូននិយាយចប់ ចូរឱ្យកូនឱបគ្នា។ ពេលនោះពួកគេអាចនឹងមានអារម្មណ៍ប្លែកៗក្នុងពេលដំបូងៗ តែនៅពេលៗវេលាកន្លងទៅ ក៏នឹងអស់សំណើចឃឹកៗ ហើយអ្វីគ្រប់យ៉ាងក៏នឹងត្រឡប់មកប្រក្រតីឡើងវិញ។ គឺជាវិធីងាយៗក្នុងការជួយបង្រ្កាបបងប្អូនដែលឈ្លោះគ្នាឱ្យត្រឡប់មកស្រឡាញ់គ្នាដូចដើមវិញ។
ចាប់ផ្ដើមប្រដៅ! (មិនមែនចាប់ផ្ដើមវាយទេណា៎!)
មុននឹងភ្លេចខ្លួនលើកដៃវាយកូនពេញមួយទំហឹងនោះ មនុស្សជាឪពុកម្ដាយគួរចេះហាមចិត្តខ្លួនឯង មិនវាយកូនដោយដៃ ឬដោយរំពាត់នោះទេ តែចូរជ្រើសរើសយកការអធិប្បាយពន្យល់ឱ្យកូនយល់។ មិនមែនជាការហាមកូនទេ ព្រោះថា រឹតតែហាមដូចរឹតតែពន្យុះ កូនរឹតតែធ្វើ ឪពុកម្ដាយរឹតតែខឹងឡើង ក្លាយទៅជា កូនខ្វះភាពជឿជាក់លើខ្លួនឯង និងថែមទាំងប៉ះពាល់ដល់សម្ព័ន្ធភាពឪពុកម្ដាយកូននាំឱ្យកើតស្នាមប្រេះឆាទៀតផង។
តិចឱ្យប៉ូលិសចាប់! ឌឺពេក តិចឱ្យពេទ្យចាក់ថ្នាំ!
ឪពុកម្ដាយជាច្រើនចូលចិត្តប្រើពាក្យសម្ដីទាំងនេះ ដែលក្រៅតែពីសាងនូវក្ដីភ័យខ្លាចដល់ក្មេងៗហើយ វាថែមទាំងមិនអាចជួយអ្វីបានសោះឡើយ។ ដូច្នេះជំនួសឱ្យការកុហកឱ្យខ្លាច ឬសម្លុតកូន ចូរសាកល្បងសម្ដែងតាមតួនាទីវិញ ដូចជា នៅពេលកូនធ្វើខុស ក៏សរសេរក្រដាសដែលមានបញ្ជាក់ពីកំហុសរបស់កូន ប្រាប់ពីលទ្ធផលដែលកូននឹងទទួលបាន អធិប្បាយឱ្យស្ដាប់ថា ការធ្វើខុស ជាមនុស្សមិនល្អ មានការដាក់ទោសតាមច្បាប់យ៉ាងណា ឬកូននឹងត្រូវជួបនឹងអ្វីខ្លះនៅពេលធ្វើខុសជាដើម។
ឱ្យកូនជូតសម្អាត ឬរៀបចំឡើងវិញ ពេលធ្វើអ្វីមួយកខ្វក់ ឬមិនរៀបរយ
កូនប្រុសរបស់អ្នកសរសេរអត្ថបទនេះ(អ្នកគ្រូ ឆវី)អាយុ 5 ឆ្នាំ ចូលទៅលេងក្នុងទូដាក់ខោអាវរបស់នាង ហើយភ្លាមនោះ សំពត់អាវខាងលើក៏ធ្លាក់ចុះមករាយប៉ាយអស់រលីង។ ស្មេរប៊ិះតែនឹងចូលទៅរៀបចំបត់ខោអាវ និងសម្អាតទូនោះវិញទៅហើយ តែក៏នឹកឃើញឡើងថា ហេតុអីមិនឱ្យកូនប្រុសកំពូលរពឹសរបស់ខ្លួនធ្វើទៅ?!។
ធ្វើបែបនោះ កូនប្រុសរបស់នាងក៏បានរៀនយល់ដឹងពីការរៀបចំបត់ខោអាវយ៉ាងត្រឹមត្រូវ និងអ្វីដែលសំខាន់ជាងនោះទៅទៀតនោះគឺ គេរៀនបានយល់ដឹងថា តើវានឿយហត់ប៉ុនណាក្នុងការរៀបចំទុកដាក់ឡើងវិញនូវអ្វីដែលគេបានធ្វើឱ្យរាយប៉ាយនោះ។ ទីបំផុតកូនប្រុសរបស់នាងក៏រៀបចំទុកដាក់ឡើងវិញយ៉ាងស្អាតបាត និងថែមទាំងបាននិយាយអរគុណម្ដាយដែលបានធ្វើឱ្យគេមានអារម្មណ៍ថា ខ្លួនគេប្រៀបដូចជាមនុស្សធំម្នាក់ទៀតផង។
ល្មមបញ្ឈប់ហើយ សម្រាប់ការដាក់ទោសបែបដាក់គុកនោះ!
ជំនួសឱ្យការបញ្ជាឱ្យកូនទៅឈរស្ងៀមនៅត្រង់ជ្រុងណាមួយនៅក្នុងបន្ទប់ ព្រមទាំងឱ្យគិតឡើងវិញថា បានធ្វើអ្វីខុសនោះហេតុអីមិនប្រគល់ភារកិច្ចអ្វីមួយឱ្យកូនធ្វើវិញ? អាចនឹងឱ្យធ្វើកិច្ចការផ្ទះ ធ្វើលំហាត់ ហាត់សរសេរអក្សផ្ចង់ ឬអានសៀវភៅជាដើម ដែលក្រៅពីនឹងធ្វើឱ្យកូនមានអារម្មណ៍ត្រជាក់ឡើងហើយ នៅជួយឱ្យគេផ្ចង់ស្មារតីលើការធ្វើរឿងល្អៗឱ្យសម្រេចច្រើនឡើងទៀតផង។
វិធីអប់រំកូនដោយមិនស្រែកគំហកដាក់ គឺជារឿងដែលល្អ ព្រោះកូននឹងមិនខូចចិត្ត តែក៏កុំភ្លេចអប់រំប្រៀនប្រដៅកូនដោយវិធីផ្សេងៗទៀតផង ដើម្បីឱ្យកូនធំធាត់ឡើងក្លាយជាមនុស្សល្អ និងស្ដាប់បង្គាប់ឪពុកម្ដាយ៕
September 4, 2020
ឆ្នាំ2019 កម្ពុជានាំទំនិញទៅអាមេរិកជាង 5ពាន់លានដុល្លារ
ក្នុងចំណោមទីផ្សារនាំចេញសំខាន់ៗរបស់កម្ពុជាទៅកាន់តំបន់នានាលើពិភពលោក អាមេរិក ជាទីផ្សារធំមួយដែលទទួលទិញផលិតផលរបស់កម្ពុជា ដែលក្នុងនោះក៏មានក្រុមហ៊ុនអាមេរិកជាច្រើនបានបោះទុនវិនិយោគសម្រាប់ធ្វើការផលិត និងនាំចេញផងដែរ។
លោក Patrick Murphy ឯកអគ្គរដ្ឋទូតអាមេរិកប្រចាំនៅកម្ពុជា បានលើកឡើងថា សហរដ្ឋអាមេរិក ជាទីផ្សារនាំចេញធំជាងគេមួយក្នុងចំណោមទីផ្សារសំខាន់ៗរបស់កម្ពុជា។ នៅឆ្នាំ2019 កម្ពុជាបាននាំផលិតផលចេញទៅអាមេរិកក្នុងតម្លៃប្រមាណ 5.36ពាន់លានដុល្លារអាមេរិក។ លោកថាទំនាក់ទំនងសេដ្ឋកិច្ចនៃសហរដ្ឋអាមេរិក និងកម្ពុជាកំពុងមានកំណើនជាវិជ្ជមាន ដោយក្នុងនោះផលិតផល និងអ្នកវិនិយោគថ្មីៗរបស់អាមេរិកបានចូលមកក្នុងទីផ្សារកម្ពុជាក៏បានកើនឡើងផងដែរជារៀងរាល់ឆ្នាំ។
លោក Patrick Murphy បាននិយាយថា៖ «ក្រុមហ៊ុនអាមេរិក កំពុងនាំមកនូវការវិនិយោគប្រកបដោយតម្លាភាព និងគុណភាពជាមួយនឹងបច្ចេកវិទ្យាលំដាប់ថ្នាក់ពិភពលោក។ បន្ថែមពីលើនេះ ក្រុមហ៊ុនទាំងអស់នោះក៏បានបង្កើតកម្មវិធីបណ្តុះបណ្តាលស្តង់ដាការងារ និងបង្កើតបរិយាកាសបរិស្ថានខ្ពស់ ដើម្បីជំរុញឱ្យមានកំណើនសេដ្ឋកិច្ចផងដែរ»។
លោក Patrick Murphy បានបន្ថែមទៀតថា សហរដ្ឋអាមេរិកផ្តល់ឱ្យកម្ពុជានូវការអនុគ្រោះផ្នែកពាណិជ្ជកម្ម នៅក្រោមកម្មវិធីនៃប្រព័ន្ធអនុគ្រោះទូទៅ (GSP) ដែលជាការធ្វើឲ្យកម្ពុជា អាចនាំចេញទៅកាន់សហរដ្ឋអាមេរិក ដោយមិនបង់ពន្ធគយនូវទំនិញ ចំនួនជាង5,000មុខ៕

September 4, 2020
“បែកគ្នាមួយរយៈ”…អាចមិនមែនអាក្រក់ដូចការគិតឡើយ
ការដែលគូស្នេហ៍មួយគូសម្រេចចិត្តថា នឹងឃ្លាតគ្នាមួយរយៈនោះវាបង្ហាញថា ច្បាស់ជាមានបញ្ហាអ្វីម្យ៉ាងរ៉ាំរ៉ៃមកយូរគួរសមរហូតដល់នាំឆ្ពោះមករកដំណើរផ្លូវកែបញ្ហាតាមរបៀបនេះមិនខាន។
ខ្ញុំខ្លួនឯងក៏ធ្លាប់ជួបអំឡុងពេល “បែកគ្នាមួយរយៈ” នៅក្នុងជីវិតដែរ តែខ្ញុំទទួលយកវាបាន និងសម្លឹងឃើញថា វាជារឿងមួយដែលគូស្នេហ៍ទាំងអស់គួរតែត្រូវជួបយ៉ាងតិច 1 ដង ព្រោះវានឹងមានប្រយោជន៍ក្នុងរយៈពេលវែង និងប្រហែលជាជួយឆ្លើយនឹងសំណួរជាច្រើនដល់សម្ព័ន្ធភាពស្នេហារបស់អ្នកបានទៀតផង។
ពីបទពិសោធផ្ទាល់ដែលខ្ញុំបានជួបប្រទះមក នៅពេលយើងបានសាកល្បងរស់នៅដោយមិនមានរូបគេ សម្រេចចិត្តធ្វើអ្វីមួយដោយមិនមានរូបគេ ទៅណាមកណាដោយមិនមានរូបគេ យើងនឹងបានសិក្សាពីខ្លួនឯងថា តើយើងទទួលយកសភាពបែបហ្នឹងបានទេ? ហើយវានឹងធ្វើឱ្យយើងទទួលបានចម្លើយថា “ការពិតទៅ តើយើងនៅត្រូវការរូបគេនៅក្នុងជីវិតដែឬទេ?”។
ក្រៅពីនេះ នៅពេលអ្នកទាំងពីររស់នៅឆ្ងាយពីគ្នាហើយ ក៏អាចនឹងបានជួបស្គាល់នឹងមនុស្សម្នាផ្សេងៗ ជួបមនុស្សថ្មីៗដែលដើរចូលមកក្នុងជីវិត និងមានអ្នកខ្លះអាចនឹងនឹកបារម្ភថា គូស្នេហ៍របស់ខ្លួនអាចនឹងមានអ្នកណាចូលមកទំនាក់ទំនង ចូលមកសុំស្គាល់ក៏មានដែរ។
តែចំពោះរូបខ្ញុំ ខ្ញុំមិនដែលនឹកខ្លាចរឿងនោះឡើយ មិនមែនដោយសារភាពជឿជាក់លើខ្លួនឯងនោះទេ តែខ្ញុំមើលឃើញថា វាជាបទសាកល្បងដ៏ល្អមួយដែលយើងនឹងបានដឹងថា តើយើងស័ក្តិសមជាមួយគេឬទេ? តើយើងល្អគ្រប់គ្រាន់សម្រាប់គេឬទេ?។ បើយើងនៅមិនទាន់ល្អគ្រប់គ្រាន់ គេក៏ប្រហែលទៅមានអ្នកថ្មី វាជាសិទ្ធិរបស់គេ យើងប្រហែលជាទៅបញ្ជា ឬបង្ខំគេមិនបានទេ ព្រោះមនុស្សម្នាក់ៗតែងតែស្វែងរកអ្វីដែលល្អបំផុតសម្រាប់ខ្លួនឯងជានិច្ច។
ដូចគ្នានឹងខ្លួនអ្នកដែរ បើមានឱកាសជួបអ្នកថ្មីខណៈដែលស្ថិតក្នុងអំឡុងពេល “បែកគ្នាមួយរយៈ” នេះ អ្នកក៏គួរប្រើឱកាសនេះពិចារណាមើលឱ្យច្បាស់លាស់ថា តើអ្នកត្រៀមជាស្រេចក្នុងការបោះស្នេហ៍ចាស់ចោលដើម្បីចាប់ផ្ដើមជាថ្មីដែរឬទេ? ឬអ្នកនៅតែត្រូវការត្រឡប់ទៅរកមនុស្សដដែលរបស់អ្នកវិញ?។
សម្រាប់រូបខ្ញុំវិញ “ការបែកគ្នាមួយរយៈ” ក៏សំខាន់មិនចាញ់ពេលដែលរស់នៅជាមួយគ្នាដែរ ព្រោះខ្ញុំជឿថា យើងនឹងបានដឹងថា តើអ្វីសំខាន់ អ្វីមិនសំខាន់នៅពេលបានសាកល្បងរស់នៅតែម្នាក់ឯងមួយរយៈមក៕
អ្នកគ្រូ ឆវី
September 4, 2020
ទីបំផុត ឪពុក Messi យល់ព្រមជាមួយ Barcelona ហើយ
ក្រោយពីត្រឡប់មកដល់អេស្ប៉ាញវិញភ្លាម កាលពីថ្ងៃទី2 ខែកញ្ញា ឆ្នាំ2020 លោក Jorge Messi ដែលជាឪពុករបស់កីឡាករ Lionel Messi បានផ្តល់បទសម្ភាសបន្តិចថា៖ «វាជារឿងដ៏លំបាកបំផុត ដែល Messi នឹងបន្តនៅក្លិបនេះ»។
ទោះជាបែបនេះក្តី ក៏ប៉ុន្តែពាក្យទាំងនេះ គឺវាគ្រាន់តែជាសម្ដី មុនពេលចូលតុចរចារតែប៉ុណ្ណោះ។ ក្រោយពីបានចូលចរចាអស់រយៈពេល 1ម៉ោងកន្លះនៅថ្ងៃទី3 ខែកញ្ញា ឆ្នាំ2020 រួចមក ស្រាប់តែលោកបានប្តូរចិត្តវិញ ដោយបាននិយាយថា លោកពិតជាពេញចិត្តនូវអ្វីដែលក្លិបផ្តល់ឱ្យ Messi ជាខ្លាំង។ លោកមិនទាន់អាចនិយាយថាយ៉ាងណាបានឡើយ អំពីជោគជតារបស់ Messi ព្រោះលោកត្រូវទៅបញ្ចុះបញ្ចូលកូនប្រុសជាមុនសិន។
គួរឱ្យដឹងដែរថា Barcelona បានបង្ហើបកាលពីមុនជំនួបចរចានេះថា ក្លិបនឹងផ្តល់កុងត្រារយៈពេល 2ឆ្នាំបន្ថែមទៀតដល់ Messi ដែលនឹងមានអត្ថប្រយោជន៍ជាច្រើនដល់ Messi មិនឱ្យគេខកចិត្តឡើយ៕

September 4, 2020
Higuaín អាចនឹងទៅលេងឱ្យក្លិបរបស់ Zidane នៅអាមេរិក
បើយោងតាមលោក Nicolas អ្នកចាត់ការក្លិប Juventus បាននិយាយថា កីឡាករខ្សែប្រយុទ្ធ Gonzalo Gerardo Higuaín វ័យ 32ឆ្នាំ នឹងមិនបន្តលេងឱ្យក្លិបរបស់លោកទៀតទេ។
ទោះជាក្លិប Juventus ក៏លែងត្រូវការរូបគេដែរក៏ដោយ ក៏ប៉ុន្តែកីឡាកររូបនេះ ត្រូវបានគេដឹងថា ជាកម្លាំងថ្មីមួយ ដែលអាចច្នៃឱ្យក្លាយជាគ្រាប់ពេជ្រសម្រាប់ក្លិបផ្សេងៗទៀតបាន។ ក្នុងនោះដែរ មានរបាយការណ៍ចេញមកថា មានក្លិបជាច្រើន កំពុងតែរៀបចំធ្វើកុងត្រា ដើម្បីយក Gonzalo Gerardo Higuaín ទៅលេងជាមួយ ក្នុងនោះមានក្លិបមកពីលីកកំពូលៗ របស់ប្រទេសល្បីៗជាច្រើន ដូចជា Ligue1 (បារាំង), Premier League (អង់គ្លេស), La Liga (អេស្ប៉ាញ), China Super League (ចិន) និងលីកកំពូលអាមេរិកទៀតផង។
គួរជម្រាបដែរថា ក្លិប Inter Miami ស្ថិតក្នុងលីកកំពូលអាមេរិក ដែលជាក្លិបរបស់អ្នកចាត់ការ Real Madrid លោក Zidane កំពុងតែខិតជិតដល់ការចុះកុងត្រាផ្ទេរយកខ្សែប្រយុទ្ធ Gonzalo Higuain ហើយ ក្រោយពីមានការពិភាក្សាគ្នារវាងភាគីទាំង2 រួចមក៕

September 4, 2020
តើត្រូវញ៉ាំយ៉ាងណាឱ្យ “ថ្លើម” រឹងប៉ឹង?
មិត្តអ្នកអានដឹងឬទេថា “ថ្លើម” ជាអវយវៈមួយក្នុងរាងកាយដែលត្រូវបានបំផ្លាញខ្លាំងបំផុត។ តាមរយៈការរស់នៅដែលមិនសូវជាសមរម្យរបស់មនុស្សយើង ទើបធ្វើឱ្យអត្រាផ្នែកនៃការកើតជំងឺដែលពាក់ព័ន្ធនឹងថ្លើមកើនឡើងខ្ពស់ជារឿយៗ ទាំងជំងឺក្រិនថ្លើម ខ្លាញ់រុំថ្លើម មហារីកថ្លើម ជាពិសេសជំងឺខ្លាញ់រុំថ្លើមតែងជួបប្រទះច្រើនបំផុតនៅលើប្រជាជនក្នុងភូមិភាគអាស៊ីអាគ្នេយ៍កាន់តែច្រើនឡើងជារឿយៗរៀងរាល់ឆ្នាំ។ មូលហេតុមួយ គឺបណ្ដាលមកពីការញ៉ាំភេសជ្ជៈដែលមានជាតិអាល់កុល ដែលអាចធ្វើឱ្យកើតការរលាក ហើយអាចនាំឆ្ពោះទៅរកជំងឺក្រិនថ្លើម ឬថ្លើមធ្វើការខុសប្រក្រតី ដែលបើមិនប្រញាប់ចូលទៅទទួលការព្យាបាលទេនោះ អាចមានផលប៉ះពាល់ដល់ជីវិតបាន។
អាហារបំផ្លាញថ្លើម ដែលគួរចៀសវាង
ចម្បងៗមុនគេគឺ អាល់កុល អាហារជ្រក់ត្រាំដែលនឹងមានសារធាតុក្នុងក្រុមណៃត្រេត និងផ្សេងៗទៀតដែលបង្កគ្រោះថ្នាក់ដល់ថ្លើម រួមទាំងអាហារស្ទើរឆៅ ស្ទើរឆ្អិន ដូចជាប្រហុក សាច់ត្រីឆៅ ជាដើម ដែលសុទ្ធតែជាមូលហេតុរបស់ជំងឺសត្វល្អិតនៅក្នុងថ្លើម ដែលអាចនាំឆ្ពោះទៅរកការកើតរោគមហារីកថ្លើម និងរលាកថ្លើមបានដូចគ្នាទាំងអស់។
ក្រៅពីនេះនៅមានអាហារដែលមានជាតិខ្លាញ់ខ្ពស់ អាហារខ្លាញ់ៗ អាហារចៀនបំពង ដែលនឹងធ្វើឱ្យកើតការប្រមូលសន្សំរបស់ជាតិខ្លាញ់ រួមទាំងអាហារដែលមានការប្រឡាក់ប្រឡូសមេរោគផ្សិត ដូចជា Aflatoxin ជាមេរោគផ្សិតនៅក្នុងសណ្ដែកដែលនឹងធ្វើឱ្យកើតមហារីកថ្លើមបាន។
អាហារបំប៉នថ្លើម ដែលយើងគួរទទួលទាន
អាហារដែលយើងគួរទទួលទានគឺ អង្ករសំរូប ព្រោះនៅក្នុងអង្ករសំរូបនឹងមានសារធាតុអាហារច្រើនជាងអង្ករសធម្មតា ជាពិសេសកាកសរសៃអាហារ អាស៊ីតហ្វូលិក វីតាមិនផ្សេងៗ ដូចជា Gamma, Orissanol (សារធាតុប្រឆាំងអនុមូលឥស្សរៈពីគ្រាប់ធញ្ញជាតិ) វីតាមីនE រួមទាំងសារធាតុ Gaba ដែលសុទ្ធជាសារធាតុដែលមានប្រយោជន៍ដល់រាងកាយទាំងអស់។
ក្រៅពីនេះថែមទាំងគួរទទួលទានរុក្ខជាតិបន្លែផ្លែឈើ ដូចជាស្ពៃក្ដោប មើមការ៉ុត ផ្លែឪឡឹក ទំពាំងបារាំង-ល- ព្រោះបន្លែ និងផ្លែឈើនឹងមានសារធាតុប្រឆាំងអនុមូលឥស្សរៈខ្ពស់ ជួយកាត់បន្ថយការរលាកដែលអាចបណ្ដាលមកពីបំផ្លាញរបស់អនុមូលឥស្សរៈ និងនៅមានកាកសរសៃអាហារច្រើនដែលជួយកាត់បន្ថយការកើតជាតិពុលចំពោះថ្លើមបាន។
ញ៉ាំថ្លើមសត្វ ជួយបំប៉នថ្លើមមនុស្សឬ?
ថ្លើមជាប្រភពប្រមូលសន្សំរបស់វីតាមីន A និងមានសារធាតុដែកទៀតផង។ សារធាតុទាំងនេះមានប្រយោជន៍ចំពោះរាងកាយស្រាប់ទៅហើយ តែថ្លើមក៏មានកូឡេស្តេរ៉ូលខ្ពស់ដែរ ដូច្នេះការញ៉ាំថ្លើមសត្វដើម្បីសង្ឃឹមលទ្ធផលក្នុងការបំប៉នថ្លើមមនុស្សយើងជាប់ជាប្រចាំនោះ អាចមានផលមិនល្អក្នុងរឿងជាតិខ្លាញ់ដែលនឹងវិលចូលមកក្នុងរាងកាយ ឬចូលទៅរុំថ្លើមវិញ ដូច្នេះត្រូវទទួលទានយ៉ាងប្រយ័ត្នប្រយែង។
ញ៉ាំភេសជ្ជៈផ្អែមៗ គឺព្យាបាលថ្លើមឬ?
អ្នកដែលកើតរោគថ្លើម មានន័យថា ការធ្វើការងាររបស់ថ្លើមនឹងខុសប្រក្រតី ធ្វើឱ្យថ្លើមមិនអាចប្រមូលរក្សាជាតិគ្លុយខូស(ជាតិស្ករ)ទុក និងនាំយកទៅរំលាយឱ្យក្លាយជាកម្លាំងថាមពលបានទេ ទើបធ្វើឱ្យអ្នកមានជំងឺថ្លើមអាចកើតអាការទន់ល្វើយគ្មានកម្លាំង និងចង់តែទទួលទានអាហារផ្អែមៗ ដូច្នេះនៅពេលទទួលទានអាហារផ្អែមៗចូលទៅ ក៏នឹងមានអារម្មណ៍ថាធូរស្រាលឡើង តែគ្រាន់តែជាអាការល្អប្រសើរឡើងបណ្ដោះអាសន្នប៉ុណ្ណោះ មិនមែនជាការព្យាបាលដែលត្រឹមត្រូវនោះទេ។ ក្រៅពីនេះការទទួលទានភេសជ្ជៈផ្អែមៗជាប្រចាំ អាចធ្វើឱ្យកើតជំងឺទឹកនោមផ្អែមតាមក្រោយ ឬជំងឺផ្សេងៗជាច្រើនទៀតផង៕
September 4, 2020
ចង់ឱ្យកូនងើបពីព្រឹកទៅរៀនទាន់ពេល មិនមែនជារឿងពិបាកទេ
កូនអ៊ើយក្រោកឡើង ដល់ម៉ោងទៅរៀនហើយណា៎!។ យើងដឹងថា រៀងរាល់ពេលព្រឹក អ្នកម្ដាយនឹងនឿយហត់ខ្លាំងណាស់ទាំងចិត្តទាំងកាយបើកូនមិនព្រមក្រោកពីគេងដើម្បីត្រៀមខ្លួនទៅសាលាទេនោះ។ បើកូនរបស់អ្នកចូលចិត្តភ្ញាក់យឺតពេល ពិបាកក្នុងការដាស់ឱ្យភ្ញាក់ទៅរៀននោះ សូមនាំគ្នាមកអត្ថបទខាងក្រោមនេះវិញប្រសើរជាងថា តើវិធីធ្វើឱ្យកូនក្រោកពីគេងនៅពេលព្រឹកទាន់ពេល ត្រូវធ្វើយ៉ាងណាខ្លះ?។
តិចនិកជំរុញឱ្យកូនភ្ញាក់ពីគេងនៅពេលព្រឹកបានយ៉ាងងាយស្រួល ចាប់ផ្ដើមពីពេលយប់ ៈ
– ឱ្យកូនចូលគេងក្នុងម៉ោងពេលប្រហាក់ប្រហែលគ្នារៀងរាល់យប់។ កូនអ្នកនឹងងាយស្រួលភ្ញាក់ បើពួកគេបានគេងលក់យ៉ាងគ្រប់គ្រាន់។ ការធ្វើបែបនេះ មិនត្រឹមតែនឹងធ្វើឱ្យការភ្ញាក់ពីគេងនៅពេលព្រឹកដំណើរការបានយ៉ាងងាយស្រួលនោះទេ តែកូននៅមានអារម្មណ៍ថា បានគេងយ៉ាងឆ្អែតទៀតផង។ ក្រៅពីនេះ ការបានគេងលក់យ៉ាងគ្រប់គ្រាន់ នឹងធ្វើឱ្យខួរក្បាលរបស់គេភ្លឺថ្លាស្រឡះ និងគិតរឿងផ្សេងៗបានល្អ មានថាមពលក្នុងការរៀន និងអាចមានសមាធិជាមួយនឹងអ្វីដែលគេកំពុងធ្វើទៀតផង។ តែការដែលអ្នកឱ្យកូនក្រចូលគេង ឬឱ្យចូលគេងពេលយប់ជ្រៅនាយប់ថ្ងៃសុក្រ-សៅរ៍នោះ នឹងធ្វើឱ្យកូនគេងមិនងាយភ្ញាក់ ហើយនឹងក្លាយជាទម្លាប់ឱ្យកូនភ្ញាក់យឺតពេល នាថ្ងៃទៅរៀនមួយថ្ងៃទៀត។
– ត្រៀមខោអាវទាំងរបស់អ្នក និងកូនសម្រាប់ថ្ងៃស្អែកទុកពីយប់ជាស្រេច។ ការធ្វើបែបនេះនឹងជួយកាត់បន្ថយពេលវេលានៅពេលព្រឹក ហើយជួយឱ្យអ្នកបានដឹងជាមុនទៀតផងថា អាវដាច់ឡេវ ឬស្រោមជើងនៅហាលមិនទាន់ស្ងួត ជាដើម។ រឿងកំប៉ិកកំប៉ុកតូចតាចបែបនេះនឹងធ្វើឱ្យអ្នកមានពេលចាកចេញពីផ្ទះបានលឿនទៀតផង។
– ត្រៀមកាបូបទៅរៀនឱ្យរួចជាស្រេចសម្រាប់ព្រឹកស្អែក។ ប្រហែលជាល្អ និងកាត់បន្ថយភាពមួម៉ៅតានតឹងបានមិនតិចទេ បើអ្នកបានត្រៀមកាបូបដែលត្រូវប្រើនៅថ្ងៃបន្ទាប់ឱ្យរួចជាស្រេចនោះ ដូច្នេះអ្នកគួរឱ្យកូនត្រៀមរៀបចំកាតាបទៅរៀនរបស់គេឱ្យរួចជាស្រេច យកសៀវភៅកិច្ចការផ្ទះដែលគេធ្វើរួចហើយដាក់ចូលកាតាបដើម្បីត្រៀមខ្លួនទៅសាលានាពេលព្រឹកស្អែក។
គោលការណ៍ងាយៗត្រឹមតែមិនប៉ុន្មានចំណុចទាំងនេះអាចផ្លាស់ប្ដូរកូនរបស់អ្នកឱ្យចេះធ្វើជាមនុស្សដែលមានវិន័យ ចូលគេង និងភ្ញាក់ទៀងម៉ោងបានល្អមិនខាន។ ចូរសាកល្បងធ្វើតាមហ្នឹងទៅមើល៍…៕
September 4, 2020
ចំណុចខ្លាំងអស្ចារ្យដែលនឹកស្មានមិនដល់នៅលើ Galaxy Note 20 | Galaxy Note 20 Ultra ជាមួយនឹងកម្មវិធីប្រូម៉ូសិនដ៏ភ្ញាក់ផ្អើលបំផុតមិនធ្លាប់មាន…!!
(ភ្នំពេញ) ថ្ងៃទី ០៤ ខែកញ្ញា ឆ្នាំ២០២០៖ កាន់តែពិសេស…!! រាល់ការទិញ Samsung Galaxy Note 20 ឬ Galaxy Note 20 Ultra ចាប់ពីថ្ងៃទី ០១ ខែកញ្ញា ឆ្នាំ២០២០ ដល់ថ្ងៃទី ៣០ ខែកញ្ញា ឆ្នាំ ២០២០ អតិថិជនទាំងអស់នឹងទទួលបានការថែមជូនគូប៉ុងចាក់ប្រេងឥន្ធៈតម្លៃ ៥០ ដុល្លារ ភ្លាម…!!
និយាយទៅគឺគ្មានអ្វីដែលត្រូវច្រឡំនោះទេ…ក្រឡេកឃើញតែមួយភ្លែតក៏ដឹង និងស្គាល់យ៉ាងច្បាស់ថាជាមហាអំណាចស្មាតហ្វូនប៊ិក Samsung Galaxy Note 20 និង Galaxy Note 20 Ultra ដែរ! ព្រោះ ទាំងកាមេរ៉ា…ស៊ុមព័ទ្ធជុំវិញ…ពណ៌…កញ្ចក់ស្រោបមុខក្រោយ និងអេក្រង់ លើកនេះត្រូវបានរចនាឡើងយ៉ាងយកចិត្តទុកដាក់បំផុតដោយផ្តោតទៅលើការផ្តល់ជូននូវការកម្សាន្តឥតដែនកំណត់…ជម្រុញដល់ការសម្រេចការងារកាន់តែច្រើនដោយភាពច្នៃប្រឌិតខ្ពស់ និងវៃឆ្លាតបំផុត (The Power to Work and Play)…!
ឥឡូវនេះក្រុមហ៊ុន សាមសុង នឹងធ្វើការបង្ហាញជូននូវចំណុចខ្លាំងបំផុតដែលទាក់អារម្មណ៍ស្អំបេះដូងអ្នកនិយមប្រើប្រាស់ស៊េរី Note ទាំងអស់…ដែលផ្តល់នូវភាពអស្ចារ្យសម្រាប់ការងារ និងការកម្សាន្តជាមួយនឹងលក្ខណៈពិសេសដូចជា៖
* ភាពអស្ចារ្យសម្រាប់ការងារជាមួយកម្មវិធី Samsung Note (The Power to Work)
ជាមួយនឹងកម្មវិធី Samsung Note ដែលមាននៅលើ Galaxy Note 20 /Note 20 Ultra ពិតជាផ្តល់ឲ្យលោកអ្នកនូវភាពងាយស្រួលសម្រាប់ការងារប្រចាំថ្ងៃ។
– ប៊ិកវេទមន្ត S-Pen ៖ ត្រូវបានរចនា និងអភិវឌ្ឍឡើងកាន់តែប្រសើរ និងវៃឆ្លាតជាងមុន…កាន់តែស្និទ្ធជាងមុន…កាន់តែរអិលរលូនជាងមុន និងកាន់តែមានអារម្មណ៍ដូចកាន់ប៊ិកសរសេរពិតៗតែម្តង!
– Microsoft PPT Conversion (PDF, PPT, WORD…) ៖ លោកអ្នកអាចធ្វើការបំលែង ឬ Save file ជាប្រភេទ PDF, Power Point ឬ Microsoft Word ដែល file ទាំងអស់នេះគឺសុទ្ធតែ file ដែលលោអ្នកត្រូវការប្រើសម្រាប់ការងារប្រចាំថ្ងៃ និងការសិក្សាស្រាវជ្រាវផ្សេងៗបានយ៉ាងងាយស្រួលបំផុត!ហើយអ្វីដែលកាន់តែពិសេសនោះគឺលោកអ្នកក៏អាចសរសេរបន្ថែម ឬក៏លុបនៅលើ PDF File បានផងដែរ!
-Audio Bookmark៖ធ្វើឲ្យការកត់ត្រារបស់លោកអ្នកកាន់តែប្រសើរជាងមុនដោយគ្រាន់តែជ្រើសរើសមុខងារថតសំឡេងនៅពេលដែលអ្នកកំពុងសរសេរ។
– Link to Windows៖ លោកអ្នកក៏អាចធ្វើការភ្ជាប់កម្មវិធីក្នុងទូរស័ព្ទដៃ (Mobile Apps) ទៅកាន់កុំព្យូទ័របានយ៉ាងងាយស្រួល និងរហ័សបំផុត!
– Auto Straighten ៖ ជាមួយនឹងបច្ចេកវិទ្យា AI នឹងធ្វើការតម្រង់…កែតម្រូវ អ្វីដែលលោកអ្នកបានធ្វើការកត់ចំណាំនោះឱ្យមានភាពស្អាត…ត្រង់…មានរបៀបរៀបរយ…និងងាយស្រួលអានជាងមុន!!
* ភាពអស្ចារ្យសម្រាប់ការកម្សាន្តឥតដែនកំណត់ (The Power to Play)
– ជាមួយនឹងបច្ចេកវិទ្យា Studio Quality Sound Recording លោកអ្នកអាចភ្ជាប់ Galaxy Bud Live តាម Bluetooth ធ្វើជា Mic ដើម្បីថតសំឡេងពីចម្ងាយបានយ៉ាងច្បាស់ និងរលូនទៀតផង…! អ្នកអាជីពសុំខ្មាស!
– លោកអ្នកអាចថតវីដេអូ ឬ Vlog បានដូចអ្នកអាជីពជាមួយនឹង Pro Video Mode ក្នុងកម្រិត 8K 24fps (UHD 7680 X 4320) ជាមួយនឹង Natural motion blur ដោយផ្តល់នូវគុណភាពរូបភាពច្បាស់ខ្លាំង…ប្លែក និងទាក់ទាញជាទីបំផុត!!
– អ្វីដែលកាន់តែពិសេសអស្ចារ្យដែលមានតែមួយគ្មានពីរនោះគឺ វីដេអូ កម្រិត 8K អាច snap ចាប់យកឈុតណាមួយក្នុងវីដេអូដែលអ្នកពេញចិត្ត ឬចង់បាន ហើយបំលែងទៅជារូបភាពក្នុងកម្រិត 33 MP បានថែមទៀតផង!
* មានបំពាក់ស៊ីមអេឡិចត្រូនិច (e-Sim)
– មានជម្រើសច្រើនសម្រាប់អ្នកប្រើប្រាស់! លោកអ្នកអាចប្រើ Nano SIM Card ទាំង 2 ក៏បាន ឬប្រើ Nano SIM 1 + e-SIM ដោយអាចឱ្យយើងបន្ថែមមេម៉ូរីបានផងដែរ)! ដូច្នេះមិនចាំបាច់ចំណាយពេលកាត់ SIM និងញាត់ SIM ចេញចូលច្រើនដែលនាំឱ្យខាតពេល ឬគួរឱ្យធុញទ្រាន់នោះទេ!
អ្វីដែលលើកមកបង្ហាញខាងលើនេះគឺគ្រាន់តែចំណុចពិសេសខ្លះៗមួយចំនួនប៉ុណ្ណោះ…! ហើយក៏អាចសន្មតបានថាលោកអ្នកជាប់ចិត្តលង់ស្រឡាញ់ និងចង់ប្រើបាត់ទៅហើយ…! ក្រុមហ៊ុន សាមសុង នឹងធ្វើការលើកយកចំណុចពិសេសអស្ចារ្យបន្ថែមទៀតមកបង្ហាញនៅពេលក្រោយទៀត…តែបើទ្រាំមិនបានទេ…ប្រញាប់ទៅជាវដើម្បីទទួលយកបទពិសោធន៍ផ្ទាល់ភ្លាមទៅណា៎ទាន់មានប្រូម៉ូសិន…!!
Samsung Galaxy Note 20 | Galaxy Note 20 Ultra ស្តែងចេញពីភាពអស្ចារ្យសម្រាប់ការងារ…និងកាន់តែអស្ចារ្យបំផុតសម្រាប់ការកម្សាន្ត…!!
សម្រាប់ព័ត៌មានបន្ថែមលោកអ្នកអាចអញ្ជើញទៅប៉ះផ្ទាល់ ឬធ្វើការសាកសួរនៅតាមហាងដេប៉ូចែកចាយផលិតផល សាមសុង ទាំងអស់ដែលនៅជិតលោកអ្នកបំផុតទូទាំងប្រទេស ឬក៏ធ្វើការទំនាក់ទំនងសេវាបម្រើអតិថិជនតាមរយៈលេខទូរស័ព្ទឥតគិតថ្លៃ៖ 1800-203232!

September 4, 2020
5 កន្លែងទេសចរណ៍បែប Fasion ស័ក្តិសមសម្រាប់ការថតរូប ក្នុងប្រទេស សាំងហ្កាពួ
បើនឹកដល់ប្រទេសដែលអាចទៅដើរលេងកម្សាន្តបានគ្រប់រដូវកាលនោះ ប្រហែលជាគេចមិនផុតពីប្រទេសសាំងហ្កាពួឡើយ ព្រោះសាំងហ្កាពួ ជាប្រទេសមួយដែលមានភាពសម្បូរបែបខាងផ្នែកវប្បធម៌ និងស្ថាបត្យកម្ម ធ្វើឱ្យកើតមានភាពខុសប្លែកពីគ្នាច្រើនជាងប្រទេសដទៃទៀត។ ថ្ងៃនេះ ទំព័រឡារ៉ែនដំណើរកម្សាន្តនឹងនាំមិត្តអ្នកអានទៅដើរលេងកម្សាន្តនៅក្នុងប្រទេសសាំងហ្កាពួក្នុងបែបដែលមិត្តអ្នកអានមិនដែលធ្លាប់ស្គាល់ ហើយអ្នកណាដែលនិយមចូលចិត្តថតរូបស្អាតៗបែបហ្វាស្សិន ស្អាតៗ ឡូយៗមិនដូចគេទុកស៊ែរនៅក្នុងបណ្ដាញសង្គមនានា ក៏សូមតាមមកទស្សនាទាំងអស់គ្នា…។
1 . តំបន់ “ Little India“

ទីប្រជុំជនតូចមួយក្នុងប្រទេសសាំងហ្កាពួ តែពោរពេញទៅដោយភាពចម្រុះពណ៌ ស្អាតស្រស់ស្រាយរបស់អគារផ្ទះសំបែង និងមន្តស្នេហ៍នៃសិល្បៈរបស់ប្រទេសឥណ្ឌា ធ្វើឱ្យមិត្តអ្នកអានអាចបញ្ចេញស្ទីលថតរូបបែបឡូយៗ និងថតបានគ្រប់ជ្រុង គ្រប់ទីកន្លែង ដែលទោះជាថតបែបណាក៏សុទ្ធតែស្អាតទាំងអស់។
2 . សារមន្ទីរសិល្បៈ និងវិទ្យាសាស្រ្ត Art Science Museum

ស្ថិតនៅក្នុងអគារដែលមានរូបបែបស្ថាបត្យកម្មដែលមិនធម្មតា រហូតបានទទួលរង្វាន់ផ្នែកខាងការច្នៃប្រឌិតម៉ូដ និងការតុបតែជាច្រើន ស្ថិតនៅលើឆ្នេរ ម៉ារីណា ( Marina Bay) សាំងហ្កាពួ។ ឡារ៉ែនសូមខ្សឹបប្រាប់ទៅចុះថា ទីនេះគឺជាទីកន្លែងទេសចរណ៍ដែលត្រូវតែទៅថតរូបបែបសិល្បៈ និងសេពសោយជាមួយនឹងសិល្បៈ និងវិទ្យាសាស្រ្តដែលលាយផ្សំចូលគ្នាបានយ៉ាងសមសួន និងល្អប្រណីត ជាពិសេសក្នុងហ្សូន Cristal Universe។ ពិតជាគួរឱ្យចង់ទៅសាកល្បងមែន។
3 . Garden by The Bay

ទីកន្លែងមួយទៀតដែលត្រូវតែទៅឱ្យបានក្រៅពីសួនច្បារសត្វតោបាញ់ទឹក( Merlion)សាំងហ្កាពួ ដែលអ្នកណាៗក៏ចំហមាត់ចង់ថតរូបដែរនោះគឺ Garden by The Bay ជាទីកន្លែងដ៏ប្រណីតមួយសម្រាប់អ្នកណាដែលចង់ផ្ដិតយករូបភាពស្អាតៗ តែឡារ៉ែនសូមណែនាំឱ្យទៅទីនោះនៅពេលព្រលប់ៗវិញ ព្រោះនៅពេលនោះផ្ទៃមេឃមានពណ៌ប្រផេះ ស៊ីគ្នាជាមួយពណ៌ចម្រុះរបស់អំពូលភ្លើងធ្វើឱ្យរូបភាពដែលថតចេញមកស្រស់ស្អាតយ៉ាងចម្លែក និងបង្កប់ទៅដោយភាពអាថ៌កំបាំងនៃទីកន្លែងមួយនេះ។
4 . Clarke Quay

សម្រាប់អ្នកដែលចូលចិត្តជប់លៀង ផារធី ត្រូវតែមកបញ្ចប់ដំណើរកម្សាន្តក្នុងមួយថ្ងៃៗនៅទីកន្លែងនេះ។ ហាយឡាយរបស់ទីនេះក៏គឺ មានភាពចម្រុះពណ៌របស់ភ្លើងដែលឆ្លុះស្រមោលជាមួយនឹងផ្ទៃទឹក ដែលមានទាំងហាងសម្រាប់អង្គុយបែបសប្បាយៗសម្រាប់ក្រុមអ្នកដែលចង់អង្គុយជជែកគ្នា និងទស្សនាបរិយាកាសជុំវិញ តែអ្នកណាដែលចូលចិត្តរាំរែក ក៏មានរង្គសាល និងផាប់ដ៏សែនជក់ចិត្តសម្រាប់ឱ្យរាំបញ្ចេញចលនាបានដូចគ្នា។
5 . Dream Cruises កប៉ាលទេសចរណ៍កំពូលទំនើប

ចំណែកអ្នកដែលធ្លាប់ទៅដើរលេងកម្សាន្តនៅប្រទេសសាំងហ្កាពួម្ដងហើយម្ដងទៀតឡើងធុញហើយនោះ កប៉ាល់ទេសចរណ៍មួយគ្រឿងនេះក៏ជាជម្រើសថ្មីមួយទៀតដែលនឹងធ្វើឱ្យលោកអ្នកបានជួបផ្ទាល់ជាមួយនឹងបទពិសោធថ្មី បានសម្រាកបែបសប្បាយៗ ជាមួយក្រុមគ្រួសារ ឬគូស្នេហ៍។ នៅលើនោះមានកន្លែងកម្សាន្តដ៏ច្រើនឱ្យជ្រើសរើស តែដែលគួរឱ្យរីករាយបំផុតនោះគឺ មានអាងហែលទឹកនៅលើកប៉ាលដែលពេលបានឃើញហើយ ច្បាស់ជាត្រូវស្រែកថា វ៉ាវ! ខ្លាំងៗមិនខាន និងនៅមានកន្លែងសប្បាយៗសម្រាប់ថតរូបស្អាតៗនៅលើកប៉ាល ជាពិសេសក្នុងអំឡុងពេលល្ងាចៗដែលព្រះអាទិត្យកំពុងអស្តង្គតដ៏សែនរ៉ូមែនទិកបំផុតទៀតផង៕
September 4, 2020