ធឿន មករា - La Reine Media

Google បញ្ចេញមុខងារ Verified Calls កំណត់លេខជនខិលខូច ខល ឬប្រើលេខបោក ក្រៅប្រទេស

ជាធម្មតា លេខទំនាក់ទំនងតែងតែស្ថិតក្នុងបញ្ចី Contact លើទូរស័ព្ទរបស់អ្នក ជួនកាលអ្នកក៏បាន Sync (ចម្លង) វាដាក់លើ Google Contact លើ Cloud ជាដើម។ ហេតុនេះ ប្រសិនបើមាននរណាខលមក អ្នកប្រាកដជាដឹងមិនខាន ប៉ុន្តែ អ្វីដែលមិនអាចគ្រប់គ្រងបាន យូរៗម្ដងខក្រៅប្រទេស គ្មានប្រភពច្បាស់ និងជាវិធីបោកបញ្ឆោតច្រើនករណី និងច្រើនរូបភាពមកហើយ។

ថ្មីៗនេះ Googleបានអាប់ដែតបន្ថែមលើ Android សម្រាប់ពង្រឹងសុវត្ថិភាពដល់អ្នកប្រើប្រាស់ ដោយបញ្ចេញមុខងារ Verified Calls by Google ដែលមាននាទី ក្នុងការបង្ខំឱ្យខលចូល ត្រូវតែបង្ហាញឈ្មោះ ឬ Logo ឬហេតុផលជាសញ្ញានានា ដើម្បីជួយដល់ការកំណត់ដឹងប្រភពថា ជាការបោកបញ្ឆោត ឬក៏មិនមែន?

Google ក៏បានបញ្ជាក់បន្ថែមទៀតថា បើសិន លេខទូរស័ព្ទអ្នក ជាកម្មសិទ្ធិក្រុមហ៊ុនត្រឹមត្រូវ អាចស្នើទៅ Google បាន ដើម្បីដាក់សញ្ញាសម្គាល់នានា ជាអត្តសញ្ញាណក្រុមហ៊ុននោះ។ លើសពីនេះ Google ក៏អះអាងថា រាល់ព័ត៌មានលេខទូរស័ព្ទនោះ ក្រុមហ៊ុនយក្សមួយនេះនឹងមិនរក្សាទុក ឬលក់ឱ្យភាគីទី3 ណាឡើយ។

តែបច្ចុប្បន្ន ប្រព័ន្ធខាងលើ នៅមិនទាន់មានការប្រើប្រាស់ទូលំទូលាយនៅឡើយ ដោយសារតែអ្នកប្រើឧបករណ៍ iOS និង Android App ជាច្រើនមិនដំណើរការរលូនជាមួយនឹង Google’s Phone app ដូចនេះ វាមិនទាន់អាចធានាបាន 100%ទេ៕

September 11, 2020

ក្រសួងអប់រំ និង UNESCO-ICHEI សហការគ្នាធ្វើកំណែទម្រង់ការអប់រំបែបឌីជីថលនៅថ្នាក់ឧត្តមសិក្សា

ក្រសួងអប់រំ យុវជន និងកីឡា បានសហការគ្នាជាមួយនឹងមជ្ឈមណ្ឌលអន្តរជាតិUNISCO ដើម្បីភាពច្នៃប្រឌិតការអប់រំកម្រិតឧត្តមសិក្សានៅទីក្រុង Shenzhen (UNESCO-ICHEI) ធ្វើកំណែទម្រង់ការអប់រំបែបឌីជីថរលនៅកម្រិតឧត្តមសិក្សានៅកម្ពុជា។

ភាគីទាំងពីរបានរៀបព្រមព្រៀងគ្នាក្នុងការរួមគ្នា លើកកម្ពស់ការធ្វើកំណែទម្រង់ការបង្រៀន និងរៀនតាមបែបឌីជីថលក្នុងប្រទេសកម្ពុជា និង ចែករំលែកព័ត៌មាន និងបទពិសោធន៍ ដើម្បីបម្រើផលប្រយោជន៍គ្នាទៅវិញទៅមក។ បន្ថែមពីលើនេះ ស្ថាប័នទាំងពីរក៏ធ្វើសកម្មភាព ចែករំលែកធនធាន និងបណ្ដាញ ដើម្បីបម្រើដល់គោលដៅអប់រំ ដាក់ចេញកម្មវិធីពង្រឹងសមត្ថភាព និងផ្តល់អ្នកជំនាញពិគ្រោះយោបល់លើគម្រោងនានាផងដែរ។ ក្នុងនោះដែរក៏មានការអនុវត្តនូវកិច្ចការស្រាវជ្រាវដែលបានចែករំលែកគ្នា ធ្វើការគាំទ្រដល់គោលការណ៍ណែនាំ ឬគោលនយោបាយស្ដីពីការសិក្សាតាមបែបឌីជីថល រៀបចំកម្មវិធីសន្និសីទ និងសិក្ខាសាលាផ្សេងៗ និងអនុវត្តគម្រោងរួមគ្នាដែលទាក់ទងនឹងការអប់រំកម្រិតឧត្តមសិក្សានៅកម្ពុជា។

អ្វីដែលកាន់តែវិជ្ជមានទៅទៀតនោះ UNESCO-ICHEI គ្រោងនឹងបង្កើតវិទ្យាស្ថានអន្តរជាតិនៃការអប់រំតាមបណ្ដាញអ៊ីនធឺណិត ហៅកាត់ថា IIOE ដែលសហការភាពជាដៃគូ ជាមួយគ្រឹះស្ថានឧត្តមសិក្សាយ៉ាងហោចណាស់10 ក្នុងព្រះរាជាណាចក្រកម្ពុជា តាមរយៈក្រសួងអប់រំ យុវជន និងកីឡា ព្រមទាំងសហការជាមួយក្រុមហ៊ុនបច្ចេកវិទ្យាក្នុងស្រុកដើម្បីកសាងវេទិកា MOOC ដែលត្រូវបានប្រើប្រាស់កម្រិតថ្នាក់ជាតិ៕

September 11, 2020

ចង់រីកចកម្រើន គួរនាំគ្នាគិតឱ្យជ្រៅ និងវែងឆ្ងាយ

ការគិតជាផ្នែកយ៉ាងសំខាន់ក្នុងការសម្រេចដល់លទ្ធផលប្រចាំថ្ងៃរបស់មនុស្ស និងសង្គម ព្រោះផ្នត់គំនិតជាចំណុចចាប់ផ្តើមយ៉ាងសំខាន់នៃគ្រប់សកម្មភាពទាំងអស់។

លោក ង៉ែត ជូ អ្នកជំនាញហិរញ្ញវត្ថុ បានលើកឡើងថា ពាក្យខ្មែរយើងថា “មានមិនដែលបីត ក្រមិនដែលបីជាតិ។ ពាក្យថាក្រមិនដែលបីជាតិ គឺជាការល្អ គឺជាការគិតបែបវិជ្ជមាន។ បើឱពុកម្តាយយើងក្រ យើងគួរខិតខំធ្វើឱ្យជីវភាពរបស់យើងមានភាពប្រសើរ។ បើជីវភាពរបស់យើងប្រសើរ យើងត្រូវតំរង់ទឹសឱ្យកូនចៅជំនាន់ក្រោយមានជីវភាពកាន់តែប្រសើរឡើងថែមទៀត។ ដោយឡែកពាក្យថាមានមិនដែលបីត គឺជាភាពអវិជ្ជមានដែលយើងរាល់គ្នាត្រូវគិតឱ្យបានជ្រៅ គិតឱ្យបានទូលំទូលាយ និងគិតឱ្យបានវែងឆ្ងាយ។ គឺធ្វើយ៉ាងណាបើមានគឺមានឱ្យលើសពីបីត។

តើត្រូវធ្វើដូចម្តេចទើបមានឱ្យលើសពីបីត ហើយបើក្រកុំឱ្យលើសបីជាតិបាន? ចំលើយគឺស្ថិតនៅត្រង់ការគិត និងការប្រតិបត្តិរបស់មនុស្សហ្នឹងឯង។ នៅសហរដ្ឋអាមេរិក ពេលជួបវិបត្តិមានក្រុមហ៊ុនជាច្រើនកាត់បន្ថយចំណាយតាមរយៈការបញ្ឈប់បុគ្គលិកដើម្បីធានាបន្តរក្សាប្រាក់ចំណេញ។ ប្រការនេះធ្វើឱ្យមានមនុស្សជាច្រើនអត់ការងារធ្វើ បាត់បង់ចំណូល និងរុញច្រានឱ្យសេដ្ឋកិច្ចអាមេរិកធ្លាក់កាន់តែជ្រៅក្នុងវិបត្តិ។ ដោយឡែកនៅពេលជួបវិបត្តិ ក្រុមហ៊ុនជាច្រើននៅប្រទេសជប៉ុនមិនបញ្ឈប់ការងារបុគ្គលិកទេព្រោះបេសកកម្មរបស់ក្រុមហ៊ុនគឺសំដៅសំរេចបានគោលដៅក្នុងផែនការរយៈពេលវែងរហូតដល់100ឆ្នាំទៅ200ឆ្នាំឯណោះ។ ពួកគេគិតជ្រៅណាស់ គេមិនគិតថាការខាតបង់រយៈពេលខ្លីគឺជាបញ្ហាធំដុំនោះទេ។ ការមិនបញ្ឈប់បុគ្គលិកក្នុងគ្រាមានវិបត្តិ គឺបន្តឱ្យបុគ្គលិកមានចំណូលធម្មតា និងចាយវាយដើម្បីជួយកាត់បន្ថយការធ្លាក់ចុះក្នុងវិបត្តិសេដ្ឋកិច្ចធ្ងន់ធ្ង។

ដោយឡែកនៅកម្ពុជាយើងវិញ សំបូរណាស់អ្នករកស៊ីចង់មានបានក្នុងរយៈពេលខ្លី។ ចង់មានលុយហើយមិនខ្វល់ពីចំណេះ។ ចង់មានទ្រព្យច្រើនទុកចែកកូនៗដោយមិនបានបំរុងឬស បំរុងចរិត និងសមត្ថភាពរបស់ពួកគេឱ្យបានរឹងមាំ។ ការណ៍នេះហើយអាចជាបច្ច័យដែលធ្វើឱ្យមានមិនដែលបីត។ ដូច្នេះយើងគប្បីនាំគ្នាគិត និងនាំគ្នាធ្វើ សំដៅពង្រឹង និងពង្រីកការរីកចម្រើនឱ្យបានច្រើនជំនាន់។ បើនៅប្រទេសជប៉ុនគេគិតនិងធ្វើផែនការ100ឆ្នាំ ទៅ 200ឆ្នាំ យើងគប្បីនាំគ្នាគិត និងធ្វើផែនការយ៉ាងហោចណាស់ឱ្យបាន10ឆ្នាំទៅ20ឆ្នាំខាងមុខដែរ៕

September 11, 2020

ធនាគារអភិវឌ្ឍអាស៊ីផ្តល់កម្ចី 127.8លានដុល្លាអាមេរិកដើម្បីពង្រីកបណ្តាញបញ្ជូនថាមពលអគ្គិសនី

ធនាគារអភិវឌ្ឍន៍អាស៊ី (ADB) បានសម្រេចផ្តល់ប្រាក់កម្ចី127.8 លានដុល្លារដើម្បីគាំទ្រដល់ការកសាងបណ្តាញបញ្ជូន និងអនុស្ថានីយអគ្គិសនីនៅកម្ពុជា។ គម្រោងនេះនឹងជួយឱ្យរាជធានីភ្នំពេញ រួមទាំងខេត្ត3ផ្សេងទៀត ទទួលបានការផ្គត់ផ្គង់អគ្គិសនីប្រកបដោយស្ថេរភាព។

បើតាម ADB គម្រោងកម្ចីនេះ ក៏នឹងសាកល្បងប្រព័ន្ធផ្ទុកថាមពល ដើរដោយអាគុយ ខ្នាតធំដំបូងបង្អស់ នៅក្នុងប្រទេសកម្ពុជាដោយប្រើថវិកាចំនួន 6.7 លានដុល្លារ។ ក្នុងចំនួន 6.7លានដុល្លារនោះមាន 4.7 លានដុល្លារ ជាថវិកាពីមូលនិធិអាកាសធាតុជាយុទ្ធសាស្ត្រ (Strategic Climate Fund)នៃការពង្រីកការអនុវត្ត កម្មវិធីថាមពល កកើតឡើងវិញនៅក្នុងប្រទេសដែលមានចំណូលទាប និង2លានដុល្លារពីមូលនិធិថាមពលស្អាត(Clean Energy Fund) នៃគម្រោងដៃគូហិរញ្ញប្បទានសម្រាប់ថាមពលស្អាត (Clean Energy Financing Partnership Facility)។ មូលនិធិទាំងពីរត្រូវបានគ្រប់គ្រងដោយធនាគារអភិវឌ្ឍន៍អាស៊ី។

លោកស្រី Sunniya Durrani-Jamal នាយិកាប្រចាំប្រទេសកម្ពុជា របស់ធនាគារអភិវឌ្ឍន៍អាស៊ី បានបញ្ជាក់ថាឡើងថា គម្រោងបង្កើនប្រព័ន្ធបញ្ជូនចរន្ត រួមជាមួយជំនួយជាបន្ត របស់ធនាគារអភិវឌ្ឍន៍ អាស៊ីដល់ប្រទេសកម្ពុជាក្នុងការរៀបចំផែនការបណ្តាញថាមពល បង្ហាញថាការផ្គត់ផ្គង់ថាមពលគ្រប់គ្រាន់អាចទុកចិត្តបាន និងមាននិរន្តរភាពបរិស្ថាន អាចត្រូវបានផ្តល់ជូន ក្នុងតម្លៃសមរម្យ ដើម្បីគាំទ្រដល់ ការអភិវឌ្ឍប្រកបដោយសមធម៌។ ប្រព័ន្ធផ្ទុកថាមពលដោយអាគុយ នឹងបង្ហាញពីរបៀប ដែលការអភិវឌ្ឍ ខ្នាតធំនៃការអនុវត្ត បច្ចេកវិទ្យាច្នៃប្រឌិតថ្មី អាចត្រូវបានប្រើ ដើម្បីដំណើរការបណ្តាញអគ្គិសនី ក្នុង ប្រទេសកម្ពុជានាពេលអនាគត និង ដើម្បីបង្កើតថាមពលកកើតឡើងវិញបន្ថែមទៀត។

គម្រោងនេះនឹងជួយដល់ អគ្គិសនីកម្ពុជា (EDC) ដែលស្ថាប័នអគ្គិសនីជាតិ របស់ប្រទេសកម្ពុជា ដើម្បីពង្រឹងហេដ្ឋារចនាសម្ព័ន្ធបញ្ជូនចរន្ត តាមរយៈការផ្តល់ហិរញ្ញប្បទាន ដល់ការសាងសង់បណ្តាញ បញ្ជូន 115-230 គីឡូវ៉ាត់ ចំនួន 4 និងអនុស្ថានីយអគ្គិសនីចំនួន 10 នៅរាជធានីភ្នំពេញ ខេត្តកំពង់ ឆ្នាំង កំពង់ចាម និងតាកែវ។

គម្រោងផ្ទុកថាមពលដោយអាគុយ សាកល្បង ដែលមានទីតាំងស្ថិតនៅក្បែរឧទ្យានថាមពលព្រះអាទិត្យមានកម្លាំង 100 មេហ្គាវ៉ាត់ ដែលគាំទ្រដោយ ADB នឹងរួមបញ្ចូល នូវការបណ្តុះបណ្តាល បច្ចេកទេសផងដែរ។ រាជរដ្ឋាភិបាលគ្រោង នឹងបង្កើនសមត្ថភាពផលិតចរន្តអគ្គិសនី ថាមពលព្រះអាទិត្យ ដល់ 415 មេហ្គាវ៉ាត់នៅឆ្នាំ 2022 ពោលគឺកើនឡើងពី 155 មេហ្គាវ៉ាត់ក្នុងឆ្នាំ 2019 ។ ប្រព័ន្ធផ្ទុកថាមពលដោយអាគុយ ដែលគាំទ្រដោយគម្រោងនេះ មានសមត្ថភាពសន្សំថាមពលអគ្គិសនី 16 មេហ្គាវ៉ាត់ម៉ោង និងផ្តល់លទ្ធភាពដើម្បីជួយរួមបញ្ចូល ថាមពលកកើតឡើងវិញ ការបន្ថយការកកស្ទះ ការបញ្ជូនចរន្ត និងធ្វើតុល្យាការនៃការផ្គត់ផ្គង់និងតម្រូវការផងដែរ។

លោកស្រី Daniela Schmidt អ្នកឯកទេសផ្នែកថាមពលអគ្គិសនីរបស់ ADB បានលើកឡើងថា គម្រោង តាមរយៈ ការផ្តល់ហិរញ្ញប្បទាន និង ការកសាងហេដ្ឋារចនាសម្ព័ន្ធបញ្ជូនចន្តចាំបាច់ សម្រាប់ ការផ្គត់ផ្គង់អគ្គិសនី ប្រកបដោយនិរន្តរភាព នឹងជម្រុញផលិតភាពសេដ្ឋកិច្ចរបស់កម្ពុជា សមត្ថភាព ប្រកួតប្រជែង និងការធ្វើពិពិធកម្មនានា បង្កើតការងារ និងគាំទ្រដល់ការងើបឡើងវិញ របស់ប្រទេស ពីវិបត្តិនៃការរាតត្បាតនៃ COVID-19។ គម្រោងនេះនឹងបង្កើតការងារដោយផ្ទាល់ចំនួន 1300 នៅក្នុង វិស័យសំណង់ ជាមួយនឹងការផ្តល់ជាប្រយោជន៍ ក្នុងការបង្កើនប្រាក់ចំណូលក្នុងគ្រួសារ។ វាក៏នឹងគាំទ្រ ដល់កិច្ចខិតខំប្រឹងប្រែងរបស់អគ្គិសនីកម្ពុជា(EDC) ក្នុងការលើកកម្ពស់បរិយាប័ន្ន និងសមភាពយេនឌ័រ នៅកន្លែងធ្វើការនិងលើកទឹកចិត្តឱ្យមានការចូលរួមរបស់ស្ត្រីនៅក្នុងវិស័យថាមពល៕

September 11, 2020

សម្ព័ន្ធផលិតរថយន្តវៀតណាម VinFast ខាតបង់អស់ $ 284លាន ត្រឹម 6ខែ ដើមឆ្នាំ2020

VinGroup ដែលជាក្រុមហ៊ុនសម្ព័ន្ធផលិតរថយន្តយីហោ VinFast ធំជាងគេរបស់ វៀតណាម បានបង្ហាញតួលេខនៃការខាតបង់ ក្នុងរយៈពេល 6ខែ ដើមឆ្នាំ2020 អស់ប្រមាណជា 284លានដុល្លារអាមេរិក(6.6ទ្រីលានដុង)។

លោក Pham Nhat Vuong ជានាយកប្រតិបត្តិក្រុមហ៊ុនផលិតរថយន្តដ៏ធំនេះ បានលើកឡើងថា “យើងខាតបង់ លើសការសន្និដ្ឋានទុកលើទីផ្សារ (ទាំងការផលិតស្មាតហ្វូន Vsmart និងរថយន្ត VinFast)។

បើធៀបគ្នា កាលពីឆមាស1 ឆ្នាំ2019 កន្លងទៅ VinGroup ទទួលបាន 6.5ទ្រីលានដុង លើទីផ្សារផលិតរថយន្ត កង់អគ្គិសនី និងស្មាតហ្វូន។ ដោយឡែក ឆមាស1 ឆ្នាំ2020 សម្ព័ន្ធផលិតកម្មមួយនេះ បានរងការខាតបង់ខ្លាំងមែនទែន ដោយសារតែការផ្ទុះឡើងនៃវីរុសកូវីដ-19។

បច្ចុប្បន្ន VinFast ផលិតបានរថយន្តប្រណីតដាក់លក់លើទីផ្សារ ដូចជារថយន្តប្រភេទ SUV លក់បានជាង 5,100គ្រឿង ក្នុងត្រីមាសទី1 ឆ្នាំនេះ និងជាប់លំដាប់ទី5 នៃម៉ាករថយន្តប្រណីតទាំងអស់នៅវៀតណាម ដែលគេពេញនិយម៕

September 11, 2020

ក្រុមឌីហ្សាញ និងវិស្វករ Apple កំពុងត្រៀមផលិតម៉ាស់ពិសេស ចែកឱ្យបុគ្គលិក

ក្រុមហ៊ុន Apple គ្រោងនឹងផលិតម៉ាស់ 2ប្រភេទ ជាពិសេសគឺ Apple FaceMask និង Apple ClearMask ដែលរួមគ្នាឌីហ្សាញដោយក្រុម Industrial Design និងក្រុមវិស្វករប្រចាំនៅ Apple ការិយាល័យកណ្ដាលនៅអាមេរិក។

ការផលិតម៉ាស់ពិសេស សម្រាប់ចែកជូនបុគ្គលិកទូទៅ ទាំងក្នុងហាង Apple Store និងក្នុង Office ដើម្បីបង្ការការឆ្លងវីរុសកូវីដ-19។ ម៉ាស់ Apple មានការឌីហ្សាញជា 3ស្រទាប់ ដែលមានមុខងារទប់សារធាតុតូចៗមិនឱ្យចេញទៅក្រៅ និងចូលមកក្នុងបាន ដូចម៉ាស់កំណាត់ដទៃទៀតដែរ តែម៉ាស់នេះអាចបោកសម្អាតដោយទឹក និងប្រើឡើងវិញបានរហូតដល់ 5ដង។

Apple បានប្រាប់ដល់ Bloomberg ថា ខ្លួនបានធ្វើការសិក្សាស្រាវជ្រាវ និងសាកល្បងដោយប្រុងប្រយ័ត្នបំផុត ដើម្បីស្វែងរកវត្ថុធាតុដើមសមរម្យ សម្រាប់ចម្រោះខ្យល់ ដែលមិនប៉ះពាល់ដល់ចង្វាក់ផ្គត់ផ្គង់គ្រឿងបរិក្ខារពេទ្យ។

គួរជម្រាបជូនដែរថា ក្រុមហ៊ុន Apple បានងាកមកផលិតម៉ាស់នេះតាំងពីខែមេសា 2020ម្ល៉េះ។ លោក Time Cook នាយកប្រតិបត្តិ Apple ក៏ធ្លាប់បានបរិច្ចាគម៉ាស់ច្រើនជាង ២០លានម៉ាស់ដែរ អំឡុងពេលផ្ទុះមេរោគកូវីដ-19 ភ្លាមៗ ជូនដល់បុគ្គលិកសុខាភិបាលទូទាំងអាមេរិក ព្រមទាំងផលិតម៉ាស់ ជាគ្រឿងបរិក្ខារពេទ្យជូនពួកគេផងដែរ៕

September 11, 2020

បុរីចេនឡា បើកសម្ពោធគម្រោងទី10 ជាមួយនឹងការបញ្ចុះតម្លៃ 10% ភ្លាមៗជូនអតិថិជន

នាថ្ងៃសុក្រ ទី11 ខែកញ្ញា ឆ្នាំ2020 បុរីចេនឡាបានប្រារព្ធពិធីសម្ពោធជាផ្លូវការ នូវគម្រោងដីឡូត៍ទី10 របស់ខ្លួន ដែលមានទីតាំងស្ថិតនៅភូមិពីងពង់ ឃុំដំណាក់រាំង ស្រុកឧដុង្គ ខេត្តកំពង់ស្ពឺ។

គម្រោងនេះ ស្ថិតនៅលើផ្ទៃដី 4ហិកតា ដែលជាកិច្ចសហការជាមួយដៃគូវិនិយោគមកពីប្រទេសចិន ដែលនឹងសង់រោងចក្រចំនួន2 នៅលើផ្ទៃដីគម្រោងនេះផងដែរ រួមមានរោងចក្របោះពុម្ព និងរោងចក្រកាត់ដេរ ព្រមទាំងផ្សារចំនួន 2កន្លែងទៀត។ គម្រោងទី 10នេះ មានដាក់លក់ដីឡូតិ៍ចំនួន 99ឡូត៍ ដែលមានទីតាំងស្ថិតនៅតំបន់ប្រកបដោយសក្ដានុពលភាព និងចម្ងាយត្រឹមតែ 900ម៉ែត្រប៉ុណ្ណោះ ពីផ្លូវជាតិលេខ51 ចូលតាមខ្លោងទ្វារវត្តមហាព្រហ្ម ស្ថិតលើគម្រោងផ្លូវរដ្ឋ 30ម៉ែត្រ។ ក្រៅពីនេះ ទីតាំងគម្រោងស្ថិតនៅក្បែរគម្រោងសណ្ឋាគារ និងរីសត និងរោងចក្រសូឡាជប៉ុន ឈ្មោះ Hawwai។

ដើម្បីអបអរសាទរការសម្ពោធគម្រោងទី 10នេះ ក្រុមហ៊ុនមានផ្ដល់ជូននូវការបញ្ចុះតម្លៃពិសេស 10% ភ្លាមៗចំពោះការបង់ផ្ដាច់។ ពិសេសជាងនេះទៀត ចំពោះដី 10ឡូត៍ដំបូង អតិថិជនអាចធ្វើការជ្រើសរើសជម្រើសបង់ប្រាក់រំលស់ត្រឹមតែ 150$ប៉ុណ្ណោះ ក្នុង 1ខែ (តម្លៃធម្មតា 200$ ក្នុង 1ខែ)។

ឆ្លៀតក្នុងឱកាសនៃការបើកគម្រោងថ្មីទី 10នេះ លោក ង៉ោ ប៉េងទី ស្ថាបនិក និងអគ្គនាយកនៃបុរីចេនឡា បានបង្ហាញពីការយល់ឃើញវិជ្ជមាន ចំពោះសន្ទស្សន៍នៃទីផ្សារអចលនទ្រព្យក្នុងប្រទេសកម្ពុជានាពេលបច្ចុប្បន្ន និងយល់ឃើញថា ទីតាំងគម្រោងទី 10នេះ គឹពោរពេញទៅដោយសក្ដានុពលភាពសម្រាប់វិស័យជំនួញ រោងចក្រ ការប្រកបអាជីវកម្ម និងមានអំណោយផលល្អចំពោះហេដ្ឋារចនាសម្ព័ន្ធ នៅជុំវិញគម្រោងសម្រាប់ការដឹកជញ្ជូនទំនិញ។ លោកមានប្រសាសន៍ថា នេះជាឱកាសដ៏កម្រមានដែលអតិថិជនគួរចាប់យក ដើម្បីជាការសន្សំទ្រព្យ និងការវិនិយោគបានផលចំណេញទៅថ្ងៃមុខ។ ម្យ៉ាងវិញទៀត ក្រុមហ៊ុនក៏បានជួយសម្រួលដល់អតិថិជន ដោយបានផ្ដល់ជម្រើសបង់រំលស់ដោយគ្មានការប្រាក់ ដើម្បីផ្ដល់ឱកាសដល់ប្រជាជនខ្មែរ ដែលមានដើមទុនតិចតួច អាចក្លាយជាម្ចាស់កម្មសិទ្ធិលើដីឡូត៍គម្រោងទី 10នេះផងដែរ។

សម្រាប់ព័ត៌មានលម្អិត អំពីទីតាំងគម្រោង សូមពិនិត្យមើលផែនទីដែលមានភ្ជាប់ជូនដូចរូបខាងក្រោម។

ដើម្បីកុំឱ្យឱកាសប្រូម៉ូសិនដ៏ពិសេសនេះកន្លងផុតទៅ ចំពោះលោកអ្នកដែលមានចំណាប់អារម្មណ៍ សូមអញ្ជើញទំនាក់ទំនងមកកាន់ការិយាល័យលក់របស់បុរីចេនឡា តាមរយៈលេខទូរស័ព្ទ089 729 988 / 069 869 993៕

September 11, 2020

ម៉ាស៊ីនត្រជាក់ Samsung 360 Cassette ល្អស័ក្តិសមជាទីបំផុតសម្រាប់អគារពាណិជ្ជកម្មការិយាល័យក្រុមហ៊ុនធំ…ហាង…និងផ្សារទំនើបគ្រប់ប្រភេទ…!!

(ភ្នំពេញ) ថ្ងៃទី ១១ ខែកញ្ញា ឆ្នាំ ២០២០៖ យើងសង្កេតឃើញថាតាំងពីដីវាល…សំណង់តូចៗរហូតក្លាយជាតំបន់ និងទីក្រុងពាណិជ្ជកម្មដែលពោរពេញដោយអាគារខ្ពស់ៗធំស្កឹមស្កៃ …ហាងអាហារ…ហាងកាហ្វេ…និងផ្សារទំនើបលំដាប់អន្តរជាតិជាច្រើនកំពុងបង្ហាញខ្លួនបន្តបន្ទាប់ដូចផ្សិត…!

ទាំងអស់នេះហើយបានធ្វើឱ្យតម្រូវការនៃម៉ាស៊ីនត្រជាក់ម៉ូឌែល Samsung 360 Cassette មានការគាំទ្រខ្លាំងព្រោះ Samsung 360 Cassette អាចធ្វើឱ្យបរិយាកាស និងផ្នែកខាងក្នុងនៃអាគាររបស់លោកអ្នកទាំងអស់កាន់តែមានភាពស្រស់ស្រាយ…ស្រស់ស្អាត…មានផាសុកភាព និងមើលទៅកាន់តែល្អឥតខ្ចោះ (កាន់តែព្រីមៀម) ជាមួយនឹងចំណុចពិសេស និងបច្ចេកវិទ្យាទំនើបអស្ចារ្យដូចជា៖

* សោភ័ណភាព៖

លោកអ្នកអាចជ្រើសរើស Samsung 360 Cassette តាមតម្រូវការដែលអ្នកចង់បានមិនថាពណ៌ខ្មៅ ឬពណ៌ស! បន្ទះ Panels មានរាងមូល និងជ្រុងដែលសមស្របទៅតាមទីកន្លែងរបស់លោកអ្នកទោះបីជា ពិដាន…ឈើ…បេតុង…ផ្ទាំងរូបភាព…ថ្នាំពណ៌ប្រភេទផ្សេងៗដែលធ្វើឱ្យបន្ទប់ទាំងមូលមានភាពកាន់តែទាន់សម័យ និងទាក់ទាញបំផុត…!!

* ប្រសិទ្ធភាព៖

– បញ្ចេញខ្យល់ត្រជាក់ល្អឥតខ្ចោះ…ត្រជាក់លឿន…មានផាសុកភាពដោយកាត់បន្ថយខ្យល់ស្ងួតមកប៉ះដោយផ្ទាល់!

– សន្សំសំចៃថាមពល

– គ្មានសំឡេងរំខាន

– បរិមាណខ្យល់ត្រជាក់បញ្ចេញបាន 100% អាចបាញ់ខ្យល់ត្រជាក់សាយភាយបានសព្វគ្រប់ទីកន្លែងបានល្អ!

– អាចបើកប្រើជាប់បានពេញមួយថ្ងៃដោយគ្មានបញ្ហា

* ការច្នៃប្រឌិត

– ការបង្ហាញភ្លើង LED ដែលធ្វើឱ្យលោកអ្នកដឹងពីការកំណត់នូវលំហូរខ្យល់យ៉ាងងាយស្រួលដែលមានការកំណត់បីរួមបញ្ចូលទាំងខ្យល់ផ្តេក និងខ្យល់ត្រង់

ម៉ាស៊ីនត្រជាក់ម៉ាក Samsung 360 Cassette ជាជម្រើសដ៏ល្អបំផុតសម្រាប់អាជីវកម្មដ៏ជោគជ័យរបស់លោកអ្នក! បើទិញម៉ាស៊ីនត្រជាក់ 360 Cassette ត្រូវទិញផលិតផល សាមសុង ដែលនាំចូលផ្លូវការ! ព្រោះលោកអ្នកនឹងទទួលបានការជួសជុលរយៈពេល ១ ឆ្នាំឥតគិតថ្លៃ (គ្រឿងបន្លាស់ និងសេវាកម្ម) និងទទួលបានផលិតផលដែលមានគុណភាពល្អស្របតាមស្តង់ដារអន្តរជាតិជាមួយនឹងប្រូម៉ូសិនពិសេសៗផងដែរ!!

សម្រាប់ព័ត៌មានបន្ថែមលោកអ្នកអាចអញ្ជើញមកកាន់ហាងទំនើប សាមសុង ដែលនៅជិតបំផុតដោយផ្ទាល់ ឬក៏អាចធ្វើការទំនាក់ទំនងមកកាន់សេវាបម្រើអតិថិជនដោយឥតគិតថ្លៃតាមរយៈលេខទូរស័ព្ទ៖ 1800 203 232 !

September 11, 2020

រដូវកាលភ្ជុំនេះ មន្ត្រីជំនាញចាប់អាហារផ្ទុកសារធាតុគីមី និងទំនិញខូចគុណភាពក្នុងសាដក

រដូវកាលបុណ្យភ្ជុំបិណ្ឌនេះ ជាពេលវេលាយ៉ាងសំខាន់មួយដែលប្រជាជនខ្មែរយើងស្ទើរទូទាំងប្រទេសរួមគ្នាធ្វើបុណ្យដាក់ទានទៅតាមប្រពៃណី ទំនៀមទម្លាប់ សាសនា។ នៅក្នុងពិធីដ៏សំខាន់នេះជាពេលដ៏រីករាយសម្រាប់មនុស្សគ្រប់គ្នា តែអ្វីដែលគួរឱ្យព្រួយបារម្ភនោះគឺការចែកទានរបស់យើងទាំងអស់គ្នា អាចនឹងក្លាយជាការចែកចាយផលិតផលខូចគុណភាព និងអាហាគីមីទៅវិញ។

មួយរយៈពេលចុងក្រោយនេះ មន្ត្រីជំនាញនៃសាខាការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៅគ្រប់ខេត្តទាំងអស់បានចុះឆែកឆេនៅតាមទីតាំងលក់ដូរសំខាន់ៗជាច្រើននៅទូទាំងប្រទេស។ ជាលទ្ធផលមន្ត្រីជំនាញនៅខេត្តស្វាយរៀងបានរកឃើញពពុះសណ្តែកផ្ទុកសារធាតុគីមី 5គីឡូក្រាម និងទំនិញហួសកាលបរិច្ឆេទមួយចំនួននៅថ្ងៃនេះ។ ងាកទៅខេត្តស្ទឹងត្រែងឯណោះវិញ ក៏បានរកឃើញផងដែរនូវផលិតផលមួយចំនួនដែលហួសកាលបច្ឆេទនៅក្នុងកញ្ចប់ទេយ្យវត្ថុសម្រាប់ប្រគេនព្រះសង្ឃ។ ស្របពេលជាមួយគ្នានេះដែរ មន្ត្រីជំនាញនៅខេត្តមួយចំនួនទៀតក៏បានរកឃើញដូចគ្នានូវបញ្ហានេះ ដែលវាជាបញ្ហាមួយគួរយកចិត្តទុកដាក់ទាំងអស់គ្នា។

ជាសំណាងល្អ មន្ត្រីរបស់យើងបានដកហូត អប់រំ និងកម្ទេចចោលនូវអាហារខូចគុណភាពទាំងអស់នោះនៅទីតាំងដែលគាត់ចាប់បាន។ តែទោះជាយ៉ាងនេះក្តី យើងទាំងអស់គ្នាក៏គួរប្រុងប្រយ័ត្នផងដែរចំពោះការទិញស្លាដក ឬផលិតផលមួយចំនួនសម្រាប់ប្រគេនព្រះសង្ឃ ជៀសវាងទិញចំផលិតផលខូចគុណភាពដែលអាចប៉ះពាល់ដល់ព្រះសង្ឃ និងអ្នកទទួលយកទានទាំងអស់នោះបន្ត ព្រោះក្រោយបុណ្យភ្ជុំព្រះសង្ឃភាគច្រើនបានយកសម្ភារៈទាំងអស់នោះបរិច្ចាគទៅឱ្យសហគមន៍៕

September 10, 2020

ប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌ កាត់ដេរនិងផលិតស្បែកជើង នឹងឡើងដល់192ដុល្លារនៅឆ្នាំក្រោយ

ក្រសួងការងារ និងបណ្តុះបណ្តាលវិជ្ជាជីវៈ បានប្រកាសថា ប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌ កាត់ដេរនិងផលិតស្បែកជើងត្រូវបានឯកភាពរួមគ្នាកំណត់យកចំនួន 192ដុល្លារអាមេរិកសម្រាប់ឆ្នាំ2021នេះ។

ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ មានលើកឡើងថា ដំបូងឡើយក្រុមប្រឹក្សាជាតិប្រាក់ឈ្នួលអប្បបរមាបានស្នើតួលេខចំនួន 190 ដុល្លារអាម៉េរិក ដើម្បីធ្វើការពិនិត្យសម្រេចលើប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើង សម្រាប់ឆ្នាំ2021។ ក្រោយមក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេចបន្ថែមទឹកប្រាក់ចំនួន 2ដុល្លារអាម៉េរិក បន្ថែមដែលធ្វើឱ្យចំនួនប្រាក់ឈ្នួលអប្បបរមារបស់បងប្អូនកម្មករនិយោជិតផ្នែកវាយនភណ្ឌ កាត់ដេរ និង ផលិតស្បែកជើង ត្រូវនឹងចំនួន 192ដុល្លារអាម៉េរិកក្នុងមួយខែ។ ចំនួន192ដុល្លារនេះជាចំនួន ប្រាក់ខែអប្បបរមាសម្រាប់កម្មករនិយោជិតពេញសិទ្ធិ ចំណែកឯចំពោះកម្មករនិយោជិតសាកល្បង យើងបានកំណត់យកចំនួន 187ដុល្លារអាម៉េរិក ក្នុងមួយខែ។

ឯកឧត្តមបានបន្ថែមទៀតថា ចំណែកឯប្រាក់អត្ថប្រយោជន៍ផ្សេងទៀត ដែលកម្មករនិយោជិតធ្លាប់ទទួលបានកន្លងមក ត្រូវបានរក្សាទុកនៅដដែល មានដូចជា ប្រាក់សោហ៊ុយធ្វើដំណើរ និងស្នាក់នៅចំនួន 7ដុល្លារអាម៉េរិក ក្នុងមួយខែ, ប្រាក់រង្វាន់ធ្វើការទៀងទាត់ចំនួន 10ដុល្លារអាម៉េរិក ក្នុងមួយខែ, ប្រាក់ថ្លៃបាយសម្រាប់ការធ្វើការងារបន្ថែមម៉ោងដោយស្ម័គ្រចិត្តចំនួន 2,000រៀល ក្នុងមួយថ្ងៃ ឬការទទួលបានបាយមួយពេលដោយឥតគិតថ្លៃ, និងប្រាក់រង្វាន់អតីតភាពការងារចំនួនពី 2ដុល្លារអាម៉េរិក ដល់ 11ដុល្លារអាម៉េរិក ក្នុងមួយខែ សម្រាប់កម្មករនិយោជិតដែលបានធ្វើការចាប់ពីឆ្នាំទី2 ដល់ឆ្នាំទី11។ ដូច្នេះជាមធ្យមកម្មករនិយោជិតម្នាក់ៗនឹងទទួលបានប្រាក់បៀវត្សយ៉ាងតិចចំនួនពី 209ដុល្លារអាម៉េរិក ដល់220ដុល្លារអាម៉េរិក ក្នុងមួយខែ៕

September 10, 2020

Author: ធឿន មករា