Author: ធឿន មករា

ឪពុកម្ដាយជាច្រើនចង់ឱ្យកូនមានរូបរាងខ្ពស់ តែគួរចាប់ផ្ដើមយ៉ាងណាស្រួលទៅ? ចង់ឱ្យកូនខ្ពស់ តែឪពុកម្ដាយមិនខ្ពស់ តើត្រូវធ្វើយ៉ាងណា?។

មុនដំបូង យើងនាំគ្នាមកយល់ដឹងជាមុនសិនថា កម្ពស់របស់កូននេះវាអាស្រ័យលើពូជអម្បូរជាបច្ច័យសំខាន់ តែនឹងខ្ពស់បានប៉ុន្មាននោះ មានហ្ស៊ែនជាច្រើនគូដែលនឹងហុចផលជាមួយគ្នា ដូច្នេះ មិនមែនថា បើទាំងឪពុកទាំងម្ដាយទាប កូនច្បាស់ជាមិនខ្ពស់ ហើយក៏មិនមែនថា ទាំងឪពុកទាំងម្ដាយសុទ្ធតែខ្ពស់ នឹងធ្វើឱ្យកូនរបស់អ្នកខ្ពស់ខ្លាំងដូចគ្នានោះទេ!។

ចង់ឱ្យកូនខ្ពស់ ធ្វើយ៉ាងណា?

ដូចដែលបានរៀបរាប់រួចមកហើយថា កម្ពស់របស់កូនអស្រ័យលើពូជអម្បូរ និងហ្ស៊ែនរបស់ឪពុកម្ដាយជាបច្ច័យចម្បង តែក៏មានបច្ច័យបន្ថែមផ្សេងៗទៀតដែលនឹងជួយក្នុងការបង្កើនកម្ពស់របស់កូនបានដែរ ដោយធ្វើតាមវិធីដូចតទៅនេះ ៈ

1 . ញ៉ាំអាហារឱ្យត្រូវ កុំភ្លេចកាល់ស្យូម

ភោជនាហារដែលល្អ មានចំណែកជួយឱ្យកូនលូតកម្ពស់ឡើងបាន លោកឪពុកអ្នកម្ដាយគួរឱ្យកូនបានញ៉ាំអាហារដែលមានប្រយោជន៍ និងចាំបាច់សម្រាប់ក្មេង ទាំងសារធាតុរ៉ែ វីតាមីន កាបូហាយដ្រេត និងខ្លាញ់ និងដែលសំខាន់នោះគឺ កុំភ្លេចញ៉ាំទឹកឱ្យបានគ្រប់គ្រាន់ផង។ ក្រៅពីអាហារដែលមានប្រយោជន៍ និងបានញ៉ាំទឹកគ្រប់គ្រាន់ហើយ ទឹកដោះគោ ឬអាហារដែលមានកាល់ស្យូមខ្ពស់ក៏នឹងធ្វើឱ្យឆ្អឹងរឹងមាំឡើងដែរ ព្រោះកាលស្យូមមានភាពសំខាន់ដល់ការរីកចម្រើនធំធាត់របស់ក្មេងខ្លាំងណាស់ ដោយស្ថាប័នសុខភាពជាតិរបស់សហរដ្ឋអាមេរិកបានផ្ដល់ព័ត៌មានថា កុមារអាយុ 1 – 3 ឆ្នាំ គួរបានទទួលកាល់ស្យូម 700 មីល្លីក្រាមក្នុងមួយថ្ងៃ ចំណែកកុមារអាយុ 4 – 8 ឆ្នាំ គួរបានទទួលកាល់ស្យូម 1,000 មីល្លីក្រាមក្នុងមួយថ្ងៃ និងនៅពេលអាយុ 9 -18 ឆ្នាំ គួរបានទទួលកាល់ស្យូម 1,300 មីល្លីក្រាមក្នុងមួយថ្ងៃ។

2 . គេងឱ្យគ្រប់គ្រាន់ និងទៀងពេល

បើចង់ឱ្យកូនខ្ពស់ ត្រូវព្យាយាមឱ្យកូនគេងលក់បានយ៉ាងគ្រប់គ្រាន់ ព្រោះពេលដែលកំពុងគេងលក់នោះ ជាពេលវេលាដែលអ័រម៉ូនការចម្រើនធំធាត់កំពុងធ្វើការ។ សម្រាប់ក្មេងតូច គួរគេងលក់ឱ្យបាន 10 – 13 ម៉ោងក្នុងមួយយប់ អ្វីដែលសំខាន់គឺ បើចង់ឱ្យកូនខ្ពស់ និងមានសុខភាពល្អ គួរឱ្យកូនចូលគេង និងភ្ញាក់ឱ្យទៀងពេលរៀងរាល់ថ្ងៃផង ទោះជាថ្ងៃឈប់សៅរ៍ – អាទិត្យក៏ដោយ។

3 . ឱ្យកូនហាត់ប្រាណ

បើចង់ឱ្យកូនខ្ពស់ លោកឪពុកអ្នកម្ដាយគួរឱ្យកូនមានពេលវេលាសម្រាប់ហាត់ប្រាណប្រមាណជា 60នាទីក្នុងមួយថ្ងៃផង ព្រោះការហាត់ប្រាណមិនមែនជួយត្រឹមតែរឿកម្ពស់ និងការចម្រើនធំធាត់ប៉ុណ្ណោះទេ តែនៅជួយការពារមិនឱ្យកើតរោគធាត់ចំពោះកូនក្មេងបានទៀតផង ឬបើសិនជាមិនសូវមានពេលវេលាប៉ុន្មាន ក៏បបួលកូនកម្រើកដៃកម្រើកជើងបន្តិចបន្តួចក៏ល្អដែរ ដូចជា បបួលគ្នាទៅដើរលេង ឬដើរទៅទិញទំនិញនៅផ្សារក៏បាន។

ចង់ឱ្យកូនខ្ពស់ ធ្វើយ៉ាងណាស្រួល?

បើរកឃើញថា កូនមានភាពខុសប្រក្រតីរឿងកម្ពស់ ចូរប្រញាប់ទៅរកលោកគ្រូពេទ្យ។ បើសិនកូនរបស់លោកអ្នកមានភាពខុសប្រក្រតីមែនទែន ដូចជា ទាបជាងមធ្យមភាគរបស់កុមារក្នុងវ័យដូចគ្នាច្រើនជ្រុលពេក ឡារ៉ែនសូមណែនាំថា លោកឪពុកអ្នកម្ដាយគួរនាំកូនទៅជួបលោកគ្រូពេទ្យជំនាញប្រសើរជាង ព្រោះរឿងនោះអាចមានន័យពីភាពខុសប្រក្រតីរបស់រាងកាយបាន។

យ៉ាងណាក៏ដោយ អ្វីដែលលោកឪពុកអ្នកម្ដាយគួរយកចិត្តទុកដាក់ និងបង្ហាត់បង្រៀនកូនខ្លាំងបំផុតនោះគឺ ឱ្យគេជឿជាក់លើខ្លួនឯងប្រសើរជាង ទោះជារូបរាងរបស់គេទាប ឬខ្ពស់ក៏ដោយ និងដែលសំខាន់នោះគឺ កុំសង្កត់ធ្ងន់តែលើរឿងកម្ពស់តែម្យ៉ាង គួរសង្កត់ធ្ងន់លើរឿងសុខភាពរឹងមាំផងទើបជាការប្រសើបំផុត៕

ខ្នើយកើយ គឺជាវត្ថុមួយដែលបងៗស្រ្តីមេផ្ទះ និងសមាជិកក្នុងគ្រួសារត្រូវតែប្រើប្រាស់រៀងរាល់ថ្ងៃ និងអ្វីដែលសំខាន់នោះគឺខ្នើយត្រូវប៉ះនឹងផ្ទៃមុខរបស់យើងគ្រប់ពេលដែលយើងគេងសម្រាក ដូច្នេះហើយទើបយើងចាំបាច់ខ្លាំងណាស់ត្រូវតែឧស្សាហ៍បោកគក់សម្អាតឱ្យបានញឹកញាប់ ដើម្បីការពារវត្ថុកខ្វក់ផ្សេងៗទាំងនោះមិនឱ្យមកប៉ះដល់រាងកាយរបស់យើងបាន។ ការបោកសម្អាតខ្នើយកើយ និងខ្នើយគងគឺជារឿងសំខាន់មួយ តែសម្រាប់វិធីការថែទាំក៏មានភាពសំខាន់មិនចាញ់គ្នាប៉ុន្មានដែរ។ ខាងក្រោមនេះគឺជាវិធីបោកសម្អាតខ្នើយតាមបែបផ្សេងដែលបងៗស្រ្តីមេផ្ទះគួរតែយល់ដឹងដើម្បីភាពស្អាតមានអនាម័យ និងសុខភាពល្អរបស់សមាជិកគ្រួសារ និងខ្លួនឯងផ្ទាល់។

– ការបោកសម្អាតខ្នើយថ្មី

សម្រាប់ខ្នើយដែលទើបតែទិញមកថ្មីៗ ចាំបាច់ណាស់ត្រូវតែបោកសម្អាតជាមុនសិន មុននឹងយកមកប្រើ ដោយវិធីការបោកគក់ក៏អាចធ្វើឡើងដោយការប្រើម៉ាស៊ីនបោកគក់បានដែរ។ ដោយមុនដំបូងចូរយកម្សៅសាប៊ូប្រមាណជា 1 កូនពែង លាយជាមួយទឹកថ្នាំដាក់ឱ្យស 1/2កូនពែង និងម្សៅបេកគីងសូដា 1/2កូនពែង ដាក់ត្រាំនៅក្នុងទឹកក្ដៅរយៈពេល 20នាទី រួចហើយសឹមយកទៅដាក់ចូលក្នុងម៉ាស៊ីនបោកគក់ដើម្បីបោកតាមធម្មតា រួចហើយទើបយកទៅដាក់ហាលឱ្យស្ងួត។

– ការបោកសម្អាតខ្នើយធ្វើពីអេប៉ុង

គឺជាខ្នើយដែលមនុស្សជាច្រើនជ្រើសរើសប្រើ តែរឿងដែលសំខាន់នោះគឺ ដោយសារតែវាមិនអាចបោកសម្អាតដោយម៉ាស៊ីនបោកគក់បាន ដូច្នេះហើយទើបត្រូវបោកសម្អាតដោយការដោះស្រោមចេញមកបោកដោយឡែក និងសម្រាប់អេប៉ុងវិញអាចធ្វើការសម្អាតដោយការប្រើម៉ាស៊ីនបូមធូលីចេញ និងបន្ទាប់ពីនោះអាចប្រើផលិតផលកម្ចាត់ស្នាមប្រឡាក់ វែនីស ដើម្បីកម្ចាត់ស្នាមប្រឡាក់ផ្សេងៗ ហើយសឹមលាងចេញដោយទឹកស្អាត និងជូតផ្ដិតដោយកន្សែងពោះគោ រួចហើយទើបយកទៅដាក់ហាលថ្ងៃឱ្យស្ងួត។

– ការបោកសម្អាតខ្នើយដែលប្រឡាក់ញើសឡើងពណ៌លឿង

សម្រាប់ខ្នើយដែលប្រឡាក់ឡើងពណ៌លឿងនេះគឺជារឿងធំណាស់ តែក៏អាចចាត់ការបញ្ហានេះបានយ៉ាងងាយដែរ ដោយការយកខ្នើយនោះទៅដាក់ត្រាំនៅក្នុងទឹកក្ដៅ រួមទាំងដាក់ម្សៅសាប៊ូ 1ពែង ទឹកសាប៊ូលាងចានមួយពែង ម្សៅបូរែកស៍(អាចរកទិញបាននៅក្នុងហាងផ្សារទំនើប)1/2ពែង ត្រាំទុកចោល 30នាទី រួចហើយទើបបោកគក់នឹងដៃតាមធម្មតា ឬដាក់បោកក្នុងម៉ាស៊ីនរហូតដល់ស្នាមលឿងៗទាំងនោះរលាយបាត់អស់។

– ការបោកសម្អាតខ្នើយដែលដុះផ្សិត

ខ្នើយដែលកខ្វក់ឡើ់ងដុះផ្សិត គឺជារឿងធំមួយទៀតដែលចាំបាច់យ៉ាងខ្លាំងត្រូវតែយកចិត្តទុកដាក់ តែក៏អាចធ្វើការបោកសម្អាតបានដោយងាយដែរ ដោយចាប់ផ្ដើមពីការយកខ្នើយនោះមកដាក់ត្រាំនៅក្នុងទឹកក្ដៅ ហើយបន្ថែមទឹកថ្នាំ ហាយដ្រូជេន ភើរ៍អុកសាយដ៍(Hydrogen Peroxide) 1ពែង បន្ទាប់មកដាក់ទឹកសាជូរចូលទៅ 1/2ពែង រួចត្រាំទុកចោល។ បន្ទាប់ពីនោះមកទើបបន្ថែមម្សៅបេកគីងសូដា និងបន្ថែមទឹកសាជូរចូលទៅទៀត រួចហើយសឹមបន្តក់ទឹកប្រេងក្រអូបចូលទៅបន្តិច។ បន្ទាប់ពីកម្ចាត់មេរោគផ្សិតរួចហើយ ទើបយកទៅបោកសម្អាតតាមប្រក្រតី។

ចំណេះដឹងបន្ថែម

បងៗស្រីមេផ្ទះជាច្រើនតែងនឹកឆ្ងល់ថា ក្នុងការបោកសម្អាតក្រណាត់ផ្សេងៗ ហេតុអ្វីចាំបាច់ត្រូវកំណត់សីតុណ្ហភាពទឹក(ទឹកក្ដៅ)? ព្រោះថា ការបោកគក់ខោអាវ ឬក្រណាត់ផ្សេងៗដោយប្រើទឹកដែលមានសីតុណ្ហភាព 40 អង្សានោះគឺ ដោយសារតែទឹកក្ដៅមានប្រសិទ្ធភាពក្នុងការសម្លាប់មេរោគផ្សេងៗ រួមទាំងអាចកម្ចាត់ស្នាមប្រឡាក់ផ្សេងៗបានយ៉ាងល្អ ដែលនឹងធ្វើឱ្យយើងកាន់តែងាយបោកគក់សម្អាតបានកាន់តែស្អាតឡើងហ្នឹងឯង៕

ការអប់រំគឺជារឿងសំខាន់ខ្លាំងណាស់សម្រាប់សង្គមកម្ពុជា ព្រោះយើងជាប្រទេសដែលសំបូរទៅ ដោយប្រជាជនសកម្ម ដែលទាមទារឱ្យមានការបណ្តុះបណ្តាលឱ្យបានល្អដើម្បីបង្កើនផលិតភាពការងារឱ្យ កាន់តែសកម្ម និងមានប្រសិទ្ធភាពខ្ពស់។

ឆ្លើយតបជាមួយនឹងបញ្ហានេះ និងអបអរខួបលើកទី25ឆ្នាំរបស់ខ្លួន ​ក្រុមហ៊ុនភីធីធីខេមបូឌា(PTT Cambodia) ប្រកាសផ្តល់អាហារូបករណ៍​ចំនួន 300 កន្លែងសម្រាប់យុវជនកម្ពុជាចន្លោះអាយុចាប់ពី14ឆ្នាំ ដល់18ឆ្នាំ ដើម្បីសិក្សាវគ្គ “ទម្លាប់ល្អទាំង 7 នៃយុវវ័យឆ្នើម” តាមរយៈប្រព័ន្ធអនឡាញដោយឥតគិតថ្លៃ ដែលនឹងចាប់ផ្តើមនៅថ្ងៃទី1 ខែតុលា ឆ្នាំ2020ខាងមុខនេះ។

​លោក Songpon Thepnumsommanus នាយកគ្រប់គ្រង នៃក្រុមហ៊ុនភីធីធីខេមបូឌា (PTT Cambodia) បានលើកឡើងថា គោលបំណងសំខាន់របស់ក្រុមហ៊ុនដែលនាំទៅដល់ការសម្រេចចិត្ត ក្នុងការផ្តល់អាហាររូបករណ៍ ដល់យុវជនកម្ពុជា គឺដើម្បីគាំទ្រយុវជន និងអាណាព្យាបាលរបស់ពួកគេ ក្នុងអំឡុងពេលនៃការរាតត្បាតមេរោគCovid-19។ យុវជនអាចអភិវឌ្ឍនូវជំនាញរបស់ពួកគេបាន សូម្បីតែក្នុងពេលដែលសាលាមិនទាន់ដំណើរការពេញលេញក៏ដោយ។ ពួកគេអាចសិក្សារៀនសូត្រ តាមមធ្យោបាយសាមញ្ញថ្មីមួយ ដោយការសិក្សាពីចម្ងាយ។ ដូច្នេះហើយ យើងក៏បានដំណើរការគម្រោងកម្មវិធីសិក្សាពីចម្ងាយមួយឈ្មោះថា ” OR Seeding the Future Online Learning” ដោយផ្អែកទៅលើ កម្មវិធីសិក្សាឈ្មោះថា “ទម្លាប់ល្អទាំង 7 របស់យុវវ័យឆ្នើម” ដោយមានការសហការគ្នាជាមួយក្រុមហ៊ុន ហ្វ្រែងគ្លីន ខូវី អេឌ្យូខេសិន កម្ពុជា (Franklin Covey Education Cambodia)។

លោកបានបន្តទៀតថា នៅឆ្នាំ 2020 វាជាខួប 25 ឆ្នាំរបស់ក្រុមហ៊ុន (PTT Cambodia) នៅកម្ពុជាដែល យើងបានធ្វើអាជីវកម្មសម្រាប់ប្រជាជនកម្ពុជា និងចូលរួមវិភាគទានដល់សង្គមកម្ពុជា។ ជាពិសេសគាំទ្រដល់យុវជនជំនាន់ក្រោយ ដែលជាអនាគតដ៏អស្ចារ្យរបស់យើងក្នុងការអភិវឌ្ឍប្រទេសឱ្យមានកំណើនប្រកបដោយចីរភាព។ លើសពីនេះទៅទៀត យើងនឹងបន្តជួយគាំទ្រនិងផ្តល់ឱកាសដល់យុវជនបានសិក្សា និងអនុវត្តជំនាញភាពជាអ្នកដឹកនាំ ដើម្បីភាពជោគជ័យក្នុងជីវិតរបស់ពួកគេ។

ឧកញ៉ា ប៉ិច បូឡែន នាយកប្រតិបត្តិនៃក្រុមហ៊ុន ហ្វ្រែងគ្លីន ខូវី អេឌ្យូខេសិន កម្ពុជា  បានមាន ប្រសាសន៍ថា ​តាមរយៈវគ្គសិក្សានេះយុវជនកម្ពុជារបស់យើងនឹងទទួលបានចំណេះដឹងជាច្រើនសម្រាប់ អភិវឌ្ឍជីវិតរបស់ខ្លួនដូចជា អាចគ្រប់គ្រងខ្លួនឯងបានល្អ មានទំនាក់ទំនង កាន់តែប្រសើរជាមួយ មិត្តភក្តិ និងមានសមត្ថភាពបង្កើតការសម្រេចចិត្តបានកាន់តែប្រសើរ ។

លោកឧកញ៉ាបានបន្ថែមទៀតថា លើសពីនេះទៅទៀត ពួកគេក៏អាច​នឹងមានទំនាក់ទំនងកាន់តែល្អ ជាមួយឪពុកម្តាយ អាចយកឈ្នះលើភាពញៀន​នឹងអ្វីមួយ និងបញ្ហាផ្សេងៗទៀត។ ពួកគេក៏អាចបង្កើន ទំនុកចិត្ត​លើខ្លួនឯង មានភាពរីករាយច្រើនជាងមុនក្នុងជីវិត និងមានតុល្យភាពរវាងការសិក្សា ការងារ មិត្តភក្តិ និងបញ្ហាដទៃទៀត។ យុវជនទាំងអស់ក៏អាចនឹងស្គាល់តម្លៃខ្លួនឯង និងដឹងពីចំណុចអាទិភាពក្នុងជីវិតរបស់គេផងដែរតាមរយៈវគ្គសិក្សាទម្លាប់ទាំង 7 នៃយុវវ័យឆ្នើមនេះ។

សូមជម្រាបថា លោកអ្នកអាចស្វែងយល់ព័ត៌មានបន្ថែម និងចុះឈ្មោះតាមទំព័រហ្វេកប៊ុក https://www.facebook.com/ORSeedingTheFuture/?epa=SEARCH_BOX ចាប់ពីថ្ងៃជូនដំណឹងនេះតទៅ ៕

តើធ្វើម៉េចនឹងដឹងបានថា តើកូននៅក្នុងពោះស្ថិតក្នុងទីតាំងណា? ទីតាំងរបស់កូននៅក្នុងពោះមានភាពសំខាន់យ៉ាងណា? និងតើគួរចាប់ផ្ដើមស្ទាបមើលទីតាំងកូនតូចនៅពេលណា?។ ស្រ្តីជាម្ដាយម្នាក់ៗសុទ្ធតែចង់ដឹងថា តើកូនស្ថិតនៅត្រង់ណាក្នុងពោះរបស់ខ្លួន ព្រោះទីតាំងរបស់កូនតូចនៅក្នុងផ្ទៃ ក៏សំខាន់ខ្លាំងណាស់ដែរ ដូច្នេះយើងនាំគ្នាមកមើលថា តើវិធីស្ទាបក្បាលពោះរកមើលទីតាំងរបស់កូនតូចបែបងាយៗគេធ្វើបែបណាដូចតទៅ។

ទីតាំងរបស់កូនតូចនៅក្នុងពោះសំខាន់យ៉ាងណា?

គ្រូពេទ្យជំនាញខាងសម្រាលកូនជឿថា ទីតាំងដែលទារកបែរក្បាលចុះនោះ ជាទីតាំងដែលស័ក្តិសមបំផុតសម្រាប់ការប្រសូត រឹតតែផ្ទៃមុខរបស់ទារកស្របគ្នាជាមួយនឹងបន្ទាត់ឆ្អឹងកងខ្នងផងនោះរឹតតែប្រសើរទៅទៀត។ ការស្ទាបរកមើលទីតាំងរបស់កូនតូចនៅក្នុងពោះនេះ ជាវិធីមួយទៀតដែលនឹងជួយគ្រូពេទ្យក្នុងការសម្រេចចិត្តជ្រើសរើសវិធីប្រសូតដែលមានសុវត្ថិភាពបំផុត ដោយការរដែលដឹងថា ទារកនៅក្នុងគភ៌ស្ថិតនៅផ្នែកត្រង់ណា ទីតាំងណា គឺជាការជួយឱ្យគ្រូពេទ្យរៀបផែនការប្រសូតបានកាន់តែងាយស្រួលឡើង។

ស្រ្តីមានគភ៌ជាច្រើននាក់ខំហាត់ប្រាណដើម្បីឱ្យងាយស្រួលប្រសូត ដូចជា ខ្ជឹបរន្ធស្បូន និងធ្វើលំហាត់ប្រាណឆ្អឹងត្រគាក ជាដើម តែបើចង់ឱ្យរឹតតែប្រសើរជាងនោះទៀត បើស្រ្តីមានគភ៌បានដឹងពីទីតាំងរបស់កូនតូចក្នុងផ្ទៃខ្លួនផងនោះ វានឹងជាការជួយឱ្យស្រ្តីមានគភ៌ជ្រើសរើសការធ្វើលំហាត់ប្រាណបានត្រឹមត្រូវ និងស័ក្តិសមរឹតតែល្អប្រសើរឡើងទៅទៀត។

គួរចាប់ផ្ដើមស្ទាបរកទីតាំងកូនតូចនៅពេលណា?

ស្រ្តីមានគភ៌អាចចាប់ផ្ដើមស្ទាបពោះរកមើលទីតាំងរបស់កូនបានចាប់តាំងពីអាយុគភ៌បាន 6 ខែឡើងទៅ ដែលក្នុងរយៈពេលនេះកូននៅក្នុងផ្ទៃច្រើនតែស្ថិតនៅទីតាំងដដែល មិនសូវជាកម្រើកប្ដូរទីតាំងទៅណារហូតទាល់តែដល់ថ្ងៃប្រសូត។

មានជាច្រើនដងណាស់ដែលក្នុងអំឡុងពេលប្រសូត ចង្ការបស់ទារកអាចនឹងជាប់បរិវេណរន្ធស្បូន រហូតគ្រូពេទ្យត្រូវព្យាយាមជួយផ្អៀងខ្លួនទារកដើម្បីឱ្យប្រសូតបាន ដូច្នេះ បើសិនជាស្រ្តីជាម្ដាយដឹងជាមុនថា កូនតូចក្នុងពោះស្ថិតក្នុងទីតាំងណា នៅត្រង់ណាក្នុងផ្ទៃ ក៏នឹងអាចជាការជួយការពារ ឬចៀសវាងពីគ្រោះថ្នាក់ចៃដន្យណាមួយដែលអាចកើតឡើងក្នុងអំឡុងពេលប្រសូតបានដែរ។

ការស្ទាបពោះរកទីតាំងរបស់កូនតូច គួរចាប់ផ្ដើមនៅពេលណា?

ការស្ទាបពោះរកទីីតាំងកូនអាចនឹងស្ដាប់មើលទៅហាក់ដូចជារឿងពិបាកបន្តិច តែការពិតវិញ ការស្ទាបក្បាលពោះរកទីតាំងកូននេះមិនបានពិបាកដូចយើងគិតនោះទេ ដោយស្រ្តីមានគភ៌អាចធ្វើតាមវិធីងាយៗដូចតទៅនេះ ៈ

1 . យកប៊ិចមកគូររង្វង់ជុំវិញក្បាលពោះ បន្ទាប់មកបែងចែកជា 4 ចំណែកស្មើៗគ្នា។

2 . ចាប់ផ្ដើមរកក្បាលរបស់ទារកក្នុងគភ៌ដោយការស្ទាបថ្នមៗ បើអ្នកម្ដាយស្ទាបហើយមានអារម្មណ៍ដឹងពីដុំអ្វីម្យ៉ាងមូលៗ ចូរសន្និដ្ឋានទុកមុនចុះថា នោះគឺជាក្បាលរបស់កូនសម្លាញ់ហើយ បន្ទាប់ពីនោះចូរយកប៊ិចគូរជារង្វង់លើកន្លែងទីតាំងក្បាលរបស់កូនទុក។

3 . បន្តមកទៀត ចូរសាកល្បងស្ទាបរកមើលដៃរបស់កូន ដែលបើសិនជាអ្នកម្ដាយស្ទាបហើយមានអារម្មណ៍ថាដូចបានប៉ះខ្សែអ្វីម្យ៉ាងតូចៗ ចូរសន្និដ្ឋានទុកចុះថា នោះគឺជាដៃរបស់កូន ហើយបន្ទាប់ពីនោះចូរយកប៊ិចគូរជារង្វង់កន្លែងទីតាំងដៃរបស់កូនទុក។

4 . ចាប់ផ្ដើមស្ទាបរកបេះដូងរបស់កូនតូច ដែលអាចនឹងពិបាកបន្តិច។ អ្នកម្ដាយជាច្រើនអាចនឹងស្ទាបរកមិនឃើញ ដូច្នេះអាចសាកល្បងឱ្យគ្រូពេទ្យជួយរកមើលឱ្យក៏បាន។

5 . បើសិនជាស្ទាបហើយមានអារម្មណ៍ដឹងពីដុំអ្វីម្យ៉ាងមូលៗ ក្រៅពីសន្និដ្ឋានថា នោះគឺជាក្បាលរបស់កូនតូចហើយ វាក៏អាចទៅរួចដែរថា នោះគឺជាគូទរបស់កូន។ តែទោះជាគូទអាចស្រដៀងនឹងក្បាលរបស់កូនមែន តែអ្នកម្ដាយអាចបែងចែកបាន ដោយសារតែគូទរបស់កូននឹងនៅជិតទីតាំងដែលអ្នកម្ដាយមានអារម្មណ៍ដឹងថា កូនធាក់។

6 . ពេលស្រ្តីមានគភ៌បានដឹងពីទីតាំងរបស់កូនដោយត្រួសៗហើយ សាកល្បងយកតុក្កតាតូចមួយមកដាក់ឱ្យចំទីតាំងដែលមានស្នាមគូរដៅទុកនៅលើក្បាលពោះទាំងនោះ អ្នកម្ដាយក៏នឹងបានឃើញជារូបភាពថា កូនស្ថិតនៅត្រង់ណាក្នុងពោះម្ដាយបានកាន់តែច្បាស់ឡើង៕

Atlético Madrid បានប្រកាស​ជា​ផ្លូវការ​ថា ខ្លួន​បាន​ទិញយក​កីឡាករ​ខ្សែបម្រើ​ស្លាប Yannick Ferreira Carrasco ពី​ក្លិប Dalian Professional មកវិញ ក្នុងតម្លៃ 22.5លាន​ដុល្លារ បន្ទាប់ពី​ឱ្យ​ខ្លួន​បាន​លក់​កីឡាករ​រូបនេះ​ទៅឱ្យ​ក្លិប​របស់​ចិន​ខាងលើ អស់ 1រដូវ​កាល​រួចមក។

ការផ្ទេរ​មក Atlético Madrid វិញ​របស់​កីឡាករ​សញ្ជាតិ​បែលហ្ស៊ិក វ័យ 27ឆ្នាំ​រូបនេះ គឺជា​ការ​ត្រឡប់​មកកាន់​ក្លិប​ចាស់ ដែល​រូបគេ​ធ្លាប់បាន​លេង​ឱ្យ​កាលពី​ពេលមុន។ កីឡាករ​រូបនេះ នៅ​ជាមួយ​ក្លិប​នេះ ចាប់តាំងពី​ឆ្នាំ2015 ដល់2018 លុះដល់​ឆ្នាំ2019 Carrasco ត្រូវបាន Atlético Madrid លក់​ឱ្យទៅ​ក្លិប Dalian Professional របស់​ចិន ក្នុងតម្លៃ 40លាន​អឺរ៉ូ ហើយ​រូបគេ​បានបង្ហាញ​ថ្វី​ជើងបាន​យ៉ាង​ល្អ ដោយ​ប្រកួត​បាន 50លើក និង​រកបាន 24គ្រាប់។

ក្លិប​ដែលមាន​មូលដ្ឋាន​នៅ​រាជធានី​ម៉ា​ឌ្រី​ដ​មួយ​នេះ បាន​បន្តថា Carrasco ជា​កីឡាករ​គន្លឹះ​របស់​ក្លិប ដោយបាន​ជួយ​ឱ្យ​ក្លិប​ឈរ​នៅលើ​លេខ3 ហើយ​ធានាបាន​នូវ​កៅអី UEFA Champions League ទៀតផង៕

កីឡាការិនី​ជប៉ុន​ម្នាក់​ដែលមាន​ឈ្មោះថា Yuki Nagasato បានធ្វើឱ្យ​ពិភពលោក​ភ្ញាក់ផ្អើល​យ៉ាងខ្លាំង ដោយបាន​ចុះ​កុងត្រា​លេង​ឱ្យ​ក្លិប​បាល់ទាត់​បុរស​អាជីព ក្នុង​លក្ខខណ្ឌ​ខ្ចី​ជើង ពី​ក្លិប​លី​ក​កំពូល​នៅ​សហរដ្ឋអាមេរិក Chicago Red Stars។

Nagasato ជា​សមាជិក​ក្រុម​ជម្រើសជាតិ​នារី​ជប៉ុន ដែល​បានឈ្នះ​ពាន World Cup ផ្នែក​នារី​កាលពី​ឆ្នាំ2011 ហើយ​នាង​ក៏បាន​ជួយ​ឱ្យ​ក្រុម​ជម្រើសជាតិ​ជប៉ុន ទទួលបាន​មេដាយប្រាក់​នៅ​ព្រឹត្តិការណ៍​អូឡាំពិក រាជធានី​ឡុ​ន​ដុន កាលពី​ឆ្នាំ2012 ផងដែរ៕

អាការហើមតាមរាងកាយគឺជារឿងដែលប្រទះឃើញជាទូទៅនៅលើស្រ្តីដែលកំពុងតាំងគភ៌ ដោយសារតែដល់ពេលអាយុគភ៌ច្រើនឡើង ទម្ងន់គភ៌ក៏នឹងច្រើនឡើងតាមលំដាប់ដែរ ធ្វើឱ្យជញ្ជាំងសរសៃឈាមផ្សេងៗចាប់ផ្ដើមពង្រីកខ្លួនតាម ធ្វើឱ្យអវយវៈដទៃទៀតចាប់ផ្ដើមពង្រីក(ហើម)ខ្លាំងឡើង តែអាការហើមតាមរាងកាយ ហើមនៅលើជើងយ៉ាងឆាប់រហ័សជ្រុលពេក ក៏អាចជាសញ្ញាគ្រោះថ្នាក់មួយដែលបញ្ជាក់អំពីសភាវគភ៌មានជាតិពុលដែរ។

នៅពេលតាំងគភ៌ហើយ ការហើមនៅលើខ្នងជើង(មិនលើសភ្នែកគោល) នឹងចាប់ផ្ដើមកើតឡើងពេលអាយុគភ៌ច្រើនឡើង។ លក្ខណៈរបស់ស្បែកដែលហើម បើសិនជាចុចមើល នឹងឃើញថា ទ្រុឌចុះទៅ ព្រោះថា ទម្ងន់របស់គភ៌ដែលច្រើនឡើងនឹងមកសង្កត់ពីលើសរសៃឈាមខ្មៅផ្នែកខាងក្រោយដងខ្លួន ធ្វើឱ្យប្រព័ន្ធហូរវិលរបស់ឈាម(ប្រព័ន្ធឈាមរត់)ដំណើរការមិនស្រួល។ ក្រៅពីនោះ អាការហើមនេះ នៅអាចនឹងមានច្រើនឡើងមកដល់ស្មងជើង ឬអាចនឹងហើមពេញទាំងខ្លួនក៏បាន ធ្វើឱ្យមុខមាត់ប្រែប្រួលខុសពីមុន ដោយសារថ្ពាល់ឡើងហើមធំ។

តែអាការហើមដែលខុសប្រក្រតីក៏អាចជាសញ្ញារបស់អាការគភ៌មានជាតិពុលបានដែរ ដូចជា ៈ

1 . កើតអាការហើមឡើងយ៉ាងឆាប់រហ័ស ដូចជា ហើមមុខ ហើមខ្លួន ឬសន្លាក់ម្រាមដៃហើមរហូតដោះចិញ្ចៀនចេញលែងបានយ៉ាងឆាប់រហ័ស។

2 . ទម្ងន់ខ្លួនកើនច្រើនឡើងយ៉ាងឆាប់រហ័ស។

3 . មានអាការបត់ជើងតូចថយចុះ។

4 . ឈឺក្បាលខ្លាំង ឬមានអាការភ្នែកឡើងស្រវាំង ឬមើលឃើញពន្លឺជាចំណុចៗ។

5 . មានអារម្មណ៍ចុកណែននៅម្ដុំចុងដង្ហើម។

បើសិនមានកើតអាការទាំងនេះ ចូរប្រញាប់ទៅជួបគ្រូពេទ្យជំនាញជាបន្ទាន់ ដើម្បីពិនិត្យយ៉ាងល្អិតល្អន់ ព្រោះអាចនឹងកើតសភាវគភ៌មានជាតិពុល៕