ពេជ្រ តារាវុទ្ធ - La Reine Media

ប្រឡងបាក់ឌុបឆ្នាំនេះ គ្មានអ្នកសង្កេតការណ៍ទេ តែការរឹតបន្តឹងច្បាប់នៅតែតឹងតែង

នៅឆ្នាំនេះ មិនខុសពីឆ្នាំមុនៗទេ ក្រសួងអប់រំ យុវជន និងកីឡា នៅតែយកចិត្តទុកដាក់ខ្លាំងលើការកម្រិតវិន័យសិស្សឱ្យបានល្អលើការប្រឡងមធ្យមសិក្សាទុតិយភូមិ។ ស្ទើរគ្រប់នីតិវិធីគ្មានការផ្លាស់ប្តូរទេ គ្រាន់តែឆ្នាំនេះខុសពីឆ្នាំមុនបន្តិច ត្រង់គ្មានអ្នកសង្កេតការណ៍ពីខាងក្រៅប៉ុណ្ណោះ។

ឯកឧត្តម ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថ្លែងប្រាប់បណ្តាញសារព័ត៌មានក្នុងស្រុកថា ការប្រឡងមធ្យមសិក្សាទុតិយភូមិនៅឆ្នាំថ្មីនេះនឹងគ្មានអ្នកសង្កេតការណ៍ស្ម័គ្រចិត្តពីអង្គភាពប្រឆាំងអំពើពុករលួយដូចឆ្នាំមុនៗទេ តែទោះជាយ៉ាងណាក៏ដោយ ក៏ការប្រឡងនៅតែប្រកាន់ច្បាប់តឹងរ៉ឹងដដែល។

ជំនួសឱ្យអ្នកសង្កេតការណ៍ពីអង្គភាពប្រឆាំងអំពើពុករលួយដូចឆ្នាំមុនៗ នៅឆ្នាំនេះក្រសួងអប់រំបានដាក់មន្ត្រីអប់រំជាជំនួយការអប្បមាទ និងអប្បមាទបន្ថែម ដើម្បីឱ្យគាត់ត្រួតពិនិត្យមើល និងតាមដានលើការគ្រប់គ្រងរបស់មន្ត្រីអនុរក្សនៅក្នុងបន្ទប់នីមួយៗ។ ចំពោះមន្ត្រីណាដែលត្រូវបានរកឃើញថាមានភាពមិនប្រក្រតី នោះក្រសួងអប់រំនឹងធ្វើការប្តឹងទៅកាន់អង្គភាពប្រឆាំងអំពើពុករលួយដើម្បីចាត់វិធានការតាមច្បាប់ ដើម្បីឱ្យដំណើរនៃការប្រឡងប្រព្រឹត្តទៅយ៉ាងមានតម្លាភាព យុត្តិធម៌ និងស្របតាមច្បាប់អាចទទួលយកបាន៕

July 16, 2019

សមាធិរឮកដឹងសតិជាវិធីសាស្ត្រអប់រំដ៏សំខាន់ក្នុងការ អភិវឌ្ឍការសិក្សា និងស្មារតីរបស់កុមារ និងយុវជន

សមាធិជាផ្នែកយ៉ាងសំខាន់ក្នុងការអប់រំដែលនៅតាមបណ្តាប្រទេសជាច្រើនបានដាក់បញ្ចូលទៅក្នុងប្រព័ន្ធអប់រំដើម្បីជួយឱ្យសិស្សអាចអភិវឌ្ឍសមត្ថភាពបានល្អទាំងចំណេះដឹង និងអារម្មណ៍ព្រោះបច្ចុប្បន្ននេះក្រៅពីការអប់រំឱ្យមនុស្សមានចំណេះជំនាញច្បាស់លាស់ហើយ ពិភពលោកក៏រកឃើញផងដែរថា មនុស្សត្រូវការសុភមង្គល និងភាពស្ងប់សុខទើបអាចរស់នៅបានកាន់តែប្រសើរ។

លោក តែ ឡាយប្រធាននាយកដ្ឋានអប់រំនៃក្រុមហ៊ុន វេសឡាញ អេឌ្យូខេសិន គ្រុប បានលើកឡើងថា យើងដឹងហើយថាក្នុងការអភិវឌ្ឍបុគ្គលម្នាក់ៗឱ្យក្លាយជាមនុស្សពេញលេញយើងត្រូវការកម្មវិធីសិក្សាល្អៗដែលក្នុងនោះបើតាមក្រសួងអប់រំរបស់យើង គឺផ្តោតសំខាន់លើវិជ្ជាសម្បទាបំណិនសម្បទា និងចរិតសម្បទា។ ហេតុនេះកម្មវិធីបណ្តុះបណ្តាលផ្នែកផ្លូវចិត្ត (Mindfulness In School Program-MISP) ដែលយើងដាក់បញ្ចូលទៅក្នុងការសិក្សា គឺស្របទៅនឹងការបណ្តុះបណ្តាលផ្នែកបំណិនសម្បទាដើម្បីអភិវឌ្ឍកុមារឱ្យក្លាយជាមនុស្សដែលមានសុខភាពផ្នែកផ្លូវចិត្តល្អ។ ជាក់ស្តែងដូចយើងបានឃើញហើយថា យុវជនសម័យបច្ចុប្បន្ននេះបានរីកលូតលាស់ក្នុងពិភពលោកដែលពោរពេញដោយបច្ចេកវិទ្យាដែលពេលខ្លះគាត់ត្រូវប្រឈមនឹងបញ្ហាជាច្រើនដែលទាមទារឱ្យមានការយកចិត្តទុកដាក់លើបញ្ហាសុខភាពទាំងផ្លូវកាយ និងផ្លូវចិត្ត។ កម្មវិធីដែលយើងរៀបចំឡើងនេះមានគោលបំណងសំខាន់ក្នុងការជួយសិស្សានុសិស្សឱ្យគ្រប់គ្រងអារម្មណ៍បានល្អមានការផ្ចង់អារម្មណ៍ (focus) និងកាត់បន្ថយភាពតានតឹងបានកាន់តែប្រសើរតាមរយៈការធ្វើសមាធិ។

លោក តែ ឡាយ បានមានប្រសាសន៍ថា៖ “ កម្មវិធីអប់រំផ្លូវចិត្តនេះនឹងធ្វើឱ្យបញ្ញាស្មារតីរបស់សិស្សអាចអភិវឌ្ឍបានកាន់តែល្អ ហើយនៅពេលសុខភាពផ្លូវចិត្ត ឬបញ្ញាស្មារតីល្អនោះពួកគេក៏អាចទទួលយកការអប់រំបានល្អផងដែរ។ ម្យ៉ាងវិញកម្មវិធីនេះក៏អាចជួយដល់ការបង្រៀន និងអាណាព្យាបាលផងដែរ ព្រោះនៅពេលសិស្សមានការផ្តោតអារម្មណ៍ និងមានវិន័យល្អ លោកគ្រូអ្នកគ្រូក៏មានភាពងាយស្រួលក្នុងការបង្រៀនចំណែកឯអាណាព្យាបាលក៏ងាយស្រួលក្នុងការគ្រប់គ្រងកូនទៅតាមនោះដែរ”។

បើតាមអ្នកជំនាញផ្នែកអប់រំខាងលើបានលើកឡើងថា ជាធម្មតាកូនក្មេងមិនសូវផ្ចង់អារម្មណ៍បានយូរ
ទេ គេតែងតែមានអារម្មណ៍រវើរវាយ គិតច្រើនរឿងក្នុងពេលតែមួយដែលពេលខ្លះធ្វើឱ្យភ្លេចបាត់នូវអ្វីដែលគ្រូកំពុងបង្រៀននៅក្នុងថ្នាក់ទៀតផង ហេតុនេះហើយទើបយើងផ្តល់កម្មវិធីសមាធិដល់ពួកគាត់មុនពេលចាប់ផ្តើមរៀនដើម្បីឱ្យគាត់ប្រមូលអារម្មណ៍បានល្អ។ ចំពោះមនុស្សធំក៏ដូចគ្នាដែរពេលខ្លះក៏មានការលំបាកក្នុងការប្រមូលអារម្មណ៍ផងដែរ។ ជាឧទាហរណ៍ថ្ងៃសៅរ៍ អាទិត្យគាត់មានការជួបជុំសប្បាយ ហេតុនេះមកដល់ថ្ងៃចន្ទវិញ អារម្មណ៍របស់គាត់នៅតែចងចាំការសប្បាយនោះខ្លាំងពេកក៏អាចប៉ះពាល់ដល់ការងារ ឬការសិក្សាដែរ ហេតុនេះការធ្វើសមាធិអាចធ្វើឱ្យអារម្មណ៍ស្ងប់ល្អហើយងាកមកផ្តោតអារម្មណ៍ធ្វើរឿងថ្មីបានយ៉ាងប្រសើរ។

អ្នកស្រី អ៊ុក សូនីតា នាយិការងនាយកដ្ឋានអប់រំទទួលបន្ទុកម្មវិធីមត្តេយ្យ និងភាសាអង់គ្លេសសម្រាប់កុមាររបស់ក្រុមហ៊ុន វេសឡាញ អេឌ្យូខេសិន គ្រុប បើនិយាយពីសុខភាពផ្លូវចិត្តថាសាលារបស់យើងមានកម្មវិធីមួយរួចទៅហើយលើសកម្មភាពប្រឹក្សាផ្លូវចិត្តនេះ យើងមានអ្នកប្រឹក្សាយោបល់ផ្នែកផ្លូវចិត្តសម្រាប់ប្រឹក្សាជាមួយសិស្សពាក់ព័ន្ធនឹងការសិក្សានិងការប្រឈមនានាជាដើម។ ទន្ទឹមនឹងនេះ យើងក៏បានដាក់បញ្ចូលផងដែរនូវកម្មវិធីថ្មីមួយដែលមានឈ្មោះថាកម្មវីធីសមាធិរឮកដឹងសតិ(Mindful In School Program) នេះឡើង ដោយយើងបានស្រាវជ្រាវឃើញថា វាមានសារៈសំខាន់ណាស់ក្នុងជំរុញឱ្យសិស្សមានអារម្មណ៍ស្ងប់ល្អជាងមុន មានទំនាក់ទំនងល្អជាមួយអ្នកទៃ និងកាត់បន្ថយភាពតានតឹងបានល្អជាងមុន។ ដូចយើងដឹងហើយថាកុមារគាត់មិនដឹងទេថា អ្វីទៅជាភាពតានតឹង អ្វីជាអារម្មណ៍ធុញថប់ ឬការធ្លាក់ទឹកចិត្ត (depression) តែគាត់អាចបញ្ចេញមកបានតាមរយៈការគំហក ការស្រែក ឬការវាយតប់ជាដើម។ ហេតុនេះការឱ្យគាត់ធ្វើសមាធិ គឺជាវិធីល្អមួយក្នុងការដោះស្រាយបញ្ហាផ្លូវចិត្តទាំងអស់នេះសម្រាប់គ្រប់វ័យ។
លោកស្រី អ៊ុក សូនីតា បាននិយាយថា៖ “កម្មវីធីនេះយើងដាក់បញ្ចូលសម្រាប់កុមារគ្រប់វ័យគឺចាប់ពីអាយុ 3ឆ្នាំរហូតដល់ 18ឆ្នាំ ដោយក្នុងនោះយើងផ្តល់នូវតិចនិក ឬសកម្មភាពជាច្រើនដើម្បីបណ្តុះបណ្តាលពួកគាត់ ដូចជាការឱ្យគាត់អង្គុយតាំងសមាធិ ហើយតាមដានដង្ហើមចេញចូល ការបង្រៀនពីវិធីធ្វើសមាធិដើរ ការបង្រៀនធ្វើសមាធិដោយការប៉ះរាងកាយ ដោយការដាក់ដៃខ្វែងគ្នាធ្វើជាសកម្មភាពមេអំបៅហើរតិចៗដើម្បីសមាធិ ការទះដៃតិចៗសម្រាប់ការធ្វើសមាធិ និងការបង្រៀនពីការធ្វើសមាធិដោយការសម្រាករាងកាយ។ សកម្មភាពនេះយើងឱ្យគាត់នៅក្នុងបន្ទប់មួយដែលមានពន្លឺមិនភ្លឺខ្លាំងពេក ហើយឱ្យគាត់សម្រាកពិចារណាពីរឿងល្អៗ និងរីករាយដើម្បីឱ្យគាត់មានសមាធិ និងសម្រាកបានស្រួល”។

លោកស្រី សូនីតា បានបន្ថែមទៀតថា តាមការស្រាវជ្រាវ និងសង្កេតមើលជាក់ស្តែងយើងឃើញថាកុមារដែលទទួលបានការធ្វើសមាធិល្អ ឬអប់រំផ្លូវចិត្តល្អភាគច្រើនគាត់មានភាពអត់ធ្មត់និងចាស់ទុំជាងក្មេងធម្មតា។ ចំណែកឯការផ្ចង់អារម្មណ៍ និងការទំនាក់ទំនងរបស់គាត់ជាមួយមិត្តភក្តិ និងអាណាព្យាបាលក៏ល្អជាងមុនដែរដែលធ្វើឱ្យអាណាព្យាបាលកាន់តែមានភាពជិតស្និទ្ធជាមួយកូនៗខ្លាំងជាងមុន។ លោកស្រីបានផ្តល់ក្តីរំពឹងថា ស្ថាប័នទាំងអស់ ទាំងរដ្ឋ និងឯកជនគួរតែយកចិត្តទុកដាក់ឱ្យបានកាន់តែខ្លាំងលើការអប់រំសុខភាពផ្លូវចិត្តដើម្បីជំរុញឱ្យសិស្សានុសិស្សមានគុណភាពនៃការរស់នៅកាន់តែប្រសើរ និងលើកកម្ពស់ភាពស្ងប់សុខក្នុងសង្គម។ ដូចយើងបានឃើញហើយថា បច្ចុប្បន្ននេះមានបញ្ហាសង្គមជាច្រើនបានកើតឡើងដោយក្នុងនោះយើងឃើញថាបញ្ហាចរាចរណ៍ក៏ជាបញ្ហាប្រឈមមួយដែរ។ ពេលមានបញ្ហាចរាចរណ៍ម្តងៗយើងឃើញថាមានមនុស្សស្រែកដាក់គ្នា ផ្ទុះកំហឹងខ្លាំងៗ ហើយពេលខ្លះស្ទើរតែស្រែកជេរគ្នាពីក្នុងយានយន្តទៀតផងដែលបញ្ហានេះកើតឡើងមកពីការគ្រប់គ្រងផ្លូវចិត្តមិនបានល្អ ហេតុនេះប្រសិនបើកុមារ ឬធនធានមនុស្សរបស់យើងបានទទួលការអប់រំផ្លូវចិត្តល្អ អនាគតទៅសង្គមនឹងអាចមានភាពល្អប្រសើរទៅតាមនោះដែរ៕

July 10, 2019

ចាប់ពីពេលនេះទៅ រថយន្តក្រុងសាធារណៈអាចទទួលព័ត៌មានបានយ៉ាងងាយតាមរយៈ Apps

ថ្មីៗនេះរដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus)រាជធានីភ្នំពេញ បានចេញសេចក្តីជូនដំណឹងឱ្យប្រជាជនចូលរួមប្រើប្រាស់មធ្យោបាយសាធារណៈដើម្បីកាត់បន្ថយការកកស្ទះចរាចរណ៍ គ្រោះថ្នាក់ចរាចរណ៍ និងការបំពុលបរិស្ថាន។
ដើម្បីសម្រួលដល់ប្រជាជនដែលចង់ជិះរថយន្តក្រុងសាធារណៈឱ្យកាន់តែងាយស្រួល រដ្ឋាករស្វយ័តដឹកជញ្ជូនសាធារណៈរថយន្តក្រុងបានបង្កើតកម្មវិធី Apps City Bus ដោយកែសម្រួលតាមសំណូមពរជាច្រើនលើចំណុចមួយចំនួនដូចជា បណ្តាញព័ត៌មានខ្សែរត់លើរថយន្តដែលកំពុងរត់ ពេលជ្រើសរើសខ្សែណាមួយ បង្ហាញតែខ្សែរថយន្តរត់លើខ្សែនោះតែប៉ុណ្ណោះ និងបង្ហាញព័ត៌មានខ្សែផងដែរនៅពេលចុចលើចំណតធ្វើឱ្យកម្មវិធីដើរបានរលូនជាងមុន។
ដើម្បីទាញយក និងដំឡើងកម្មវិធី City Bus ដោយឥតគិតថ្លៃ សូមចូលទៅកាន់តំណខាងក្រោម

សម្រាប់ IOS ៖ https://apps.apple.com/kh/app/city-bus-official/id1447942721?fbclid=IwAR2N6_icXPl_cRSYGegwCo2hDjbPDNxrEJ_s38zSdEfvxqbSZq38Wtyk1Js

សម្រាប់ Play Store៖ https://play.google.com/store/apps/details?id=com.camitss.phumiapp&fbclid=IwAR3RRjzoV6OWZNMnzJ23PGf42-CEsTcT4ViXfPFZ9z5FhrzIacy9VM8k-eQ

June 27, 2019

ពាណិជ្ជកម្មកម្ពុជា និងបារាំងបានកើនឡើង 9.26%

យោងតាមរបាយការណ៍ថ្មីមួយពីក្រសួងពាណិជ្ជកម្ម បានឱ្យដឹងថា ទំហំពាណិជ្ជកម្មទ្វេភាគីរវាងកម្ពុជានិងបារាំងបានកើនឡើង 9.26% ក្នុងឆ្នាំ 2018 ដោយការនាំចេញរបស់កម្ពុជាទៅបារាំងមានតម្លៃដែលមានតម្លៃលើស 1,2 ពាន់លានដុល្លារធ្វើឱ្យបារាំងក្លាយជាទីផ្សារនាំចេញធំជាងគេទីបីរបស់កម្ពុជានៅសហភាពអឺរ៉ុប។

ឯកឧត្តមមន្ត្រីក្រសួងពាណិជ្ជកម្មបានមានប្រសាសន៍ថា ពាណិជ្ជកម្មរវាងប្រទេសកម្ពុជា-បារាំង បន្តកើនឡើងជារៀងរាល់ឆ្នាំដោយសារលទ្ធផល នៃទំនាក់ទំនងល្អរបស់រដ្ឋាភិបាល។ក្រៅពីនោះផងដែរ លោករដ្ឋមន្ត្រី ក៏បានរំលឹកអំពីទំនាក់ទំនង ជាប្រវត្តិសាស្ត្ររវាងកម្ពុជា និងបារាំង ក៏ដូចជាព្រឹត្តិការណ៍ ជាប្រវត្តិសាស្ត្រមួយផ្សេងទៀត គឺការចុះបញ្ជីស្រាសាំប៉ាញ ជាផលិតផលកំណត់ភូមិសាស្ត្រនៅកម្ពុជា។

ឯកឧត្តមប៉ានសូរសក្តិរដ្ឋមន្ត្រីក្រសួងពាណិជ្ជកម្មបានមានប្រសាសន៍ថា៖«ទំហំពាណិជ្ជកម្មសរុបរវាងកម្ពុជា និងបារាំង បានឈានទៅដល់ចំនួន 1,26 លានដុល្លារអាមេរិក នៅឆ្នាំ2018 ស្មើនឹងកំណើនចំនួន9.2% ពីឆ្នាំ2017 ដោយ 91% នៃទំហំពាណិជ្ជកម្មនេះ គឺជាការនាំចេញពីកម្ពុជា ទៅប្រទេសបារាំង»។

ឯកឧត្តមបានមានប្រសាសន៍បន្តថា៖«កម្ពុជាមានគោលនយោបាយវិនិយោគបើកទូលាយ និងគោលនយោបាយអនុគ្រោះជាច្រើន ប្រកបដោយការបើកចំហ ហើយឥឡូវនេះរដ្ឋាភិបាលកំពុងធ្វើកំណែទម្រង់ជាច្រើនដើម្បីកែលម្អបរិយាកាសអាជីវកម្មបន្ថែមទៀតស្របតាមគោលនយោបាយអភិវឌ្ឍន៍ឧស្សា ហកម្ម 2015-2025»។

លោកឡុងកែម វិចិត្រអ្នកនាំពាក្យក្រសួងពាណិជ្ជកម្មបានមានប្រសាសន៍ថា៖«ប្រទេសបារាំងគឺជាប្រទេសនាំចូលទំនិញធំបំផុតលំដាប់ទី3 នៅអឺរ៉ុបដូច្នេះហើយវាគឺជាទីផ្សារដ៏សំខាន់មួយ។ការនាំចេញដ៏សំខាន់របស់ប្រទេសកម្ពុជា ទៅកាន់ប្រទេសបារាំង គឺសម្លៀកបំពាក់ ស្បែកជើង និងស្រូវ។ប្រទេស កម្ពុជាភាគច្រើននាំចូលថ្នាំពេទ្យ ស្រា គ្រឿងម៉ាស៊ីននិងគ្រឿងចក្រពីប្រទេសបារាំង»។

លោកឡុងកែម វិចិត្របាឱ្យដឹងថា៖«បច្ចុប្បន្នរដ្ឋាភិបាល កំពុងសម្លឹងមើលការទាក់ទាញវិនិយោ គិនបារាំងបន្ថែមទៀត ចូលក្នុងវិស័យសេវាកម្ម និងផលិតកម្ម។ បដិសណ្ឋារកិច្ចទេសចរណ៍ សេវាកម្ម ផលិតកម្ម និងសេវាហិរញ្ញវត្ថុរបស់យើង ក្នុងចំណោមវិស័យជាច្រើនទៀត គឺជាវិស័យដែលទាក់ទាញបំផុត សម្រាប់វិនិយោគិនបារាំង»។

សូមបញ្ជាក់ថាបារាំងគឺជាទីផ្សារនាំចេញធំជាងគេទី 9 របស់កម្ពុជានិងជាអ្នកផ្គត់ផ្គង់ធំបំផុតទី 18 នៅកម្ពុជា។ ម្យ៉ាងវិញទៀតប្រទេសកម្ពុជាគឺជាទីផ្សារនាំចេញធំបំផុតទី 112 របស់ប្រទេសបារាំងនិងជាអ្នកផ្គត់ផ្គង់ធំបំផុតទី 55 របស់ប្រទេសបារាំង៕

June 11, 2019

ផុតខែក្តៅភ្លាម ក្រសួងសុខាភិបាលប្រកាសឱ្យត្រៀមទប់ទល់បញ្ហាទឹកជំនន់

ប៉ុន្មានម៉ោងមុននេះ ក្រសួងសុខាភិបាលបានចេញសេចក្តីណែនាំថ្មីមួយស្តីពីការត្រៀម និងទប់ទល់នៅពេលមានគ្រោះទឹកជំនន់ ដើម្បីឱ្យមន្ត្រីរបស់ខ្លួនត្រៀមលក្ខណៈទុកជាមុនចំពោះគ្រោះមហន្តរាយធម្មជាតិដែលកើតឡើងដោយសារទឹកជំនន់។

ប៉ុន្មានឆ្នាំចុងក្រោយនេះ ដោយសារតែបញ្ហាអាកាសធាតុប្រែប្រួល កម្ពុជាបានទទួលរងនូវបញ្ហាអាកាសធាតុមិនល្អជាច្រើន ដោយឆ្នាំមុន នៅរដូវវស្សាមានបញ្ហាទឹកជំនន់នៅក្នុងតំបន់ជាច្រើនដែលធ្វើឱ្យប៉ះពាល់ដល់ការរស់នៅរបស់ប្រជាជន និងការធ្វើកសិកម្មទៀតផង។ សម្រាប់ឆ្នាំនេះ ដោយសារតែឥទ្ធិពលអាកាសធាតុ El Nino នារដូវប្រាំងថ្មីៗនេះ បានធ្វើឱ្យអាកាសធាតុក្តៅខ្លាំងដែលនាំឱ្យមានផលប៉ះពាល់យ៉ាងច្រើនដល់ប្រជាពលរដ្ឋ ហើយចូលមកដល់ដើមរដូវវស្សានេះប្រជាជន និងអាជ្ញាធរកំពុងព្រួយបារម្ភ និងយកចិត្តទុកដាក់ត្រៀមជាមុនសម្រាប់គ្រោះទឹកជំនន់ដែលអាចនឹងកើតឡើង។

ក្រសួងសុខាភិបាលបានបញ្ជាក់ថា ការប្រែប្រួលអាកាសធាតុ ធ្វើឱ្យមានការផ្លាស់ប្តូររដូវកាល និងបង្កឱ្យកើតមានជាញឹកញាប់នូវគ្រោះធម្មជាតិ រលកកម្តៅ ផ្គររន្ទះ ខ្យល់កន្ត្រាក់ និងគ្រោះរាំងស្ងួត ដែលគ្រោះមហន្តរាយទាំងនេះបង្កនូវផលប៉ះពាល់ ខូចខាតដល់ហេដ្ឋារចនាសម្ព័ន្ធ ទ្រព្យសម្បត្តិ លំនៅឋាន ប៉ះពាល់សុខភាព និងស្លាប់បាត់បង់អាយុជីវិតប្រជាជន។ ដូច្នេះដើម្បីកាត់បន្ថយជាអតិបរមានូវផលប៉ះពាល់ដល់សុខភាព អាយុជីវិតជនរងគ្រោះ និងមូលដ្ឋានសុខាភិបាលពីគ្រោះធម្មជាតិ ពិសេសគ្រោះទឹកជំនន់ដែលអាចកើតមាននាពេលខាងមុខ រដ្ឋមន្ត្រីក្រសួងសុខាភិបាល សូមអំពាវនាវឱ្យប្រជាពលរដ្ឋទាំងអស់ចូលរួមអនុវត្តតាមសេចក្តីណែនាំសំខាន់ៗមួយចំនួន។

នៅក្នុងសេចក្តីណែនាំនោះ ក្រសួងសុខាភិបាលបានបញ្ជាក់ថា ប្រជាជនត្រូវតាមដានស្ថានភាពទឹកជំនន់ ត្រៀមទីទួលសុវត្ថិភាព និងស្បៀងអាហារឱ្យបានល្អមុនពេលទឹកជំនន់មកដល់។ ម្យ៉ាងវិញទៀតគួរធ្វើរបងព័ទ្ធជុំវិញស្រះ ឬកន្លែងដែលមានទឹកជ្រៅ ត្រូវថែរក្សាបរិស្ថានឱ្យស្អាត និងសាងសង់បង្គន់ឱ្យប្រសើរ បើទាបត្រូវធ្វើឱ្យខ្ពស់ការពារទឹកជំនន់។
នៅពេលមានទឹកជំនន់ ត្រូវប្រុងប្រយ័ត្នចំពោះបញ្ហាគ្រោះថ្នាក់ដែលកើតឡើងពីការប្រើប្រាស់អគ្គិសនី បញ្ហាអគារស្នាក់នៅ និងបញ្ហាសុខភាពជាដើម។ ក្រៅពីនេះ ក្រសួងក៏បានណែនាំឱ្យប្រុងប្រយ័ត្នចំពោះសត្វពិស រួមទាំងបញ្ហារបបអាហារបង្ការកុំឱ្យមានបញ្ហាសុខភាពកើតឡើង៕

June 4, 2019

កម្មវិធីមគ្គុទ្ទេសក៍អាជីព និងការប្រឹក្សាយោបល់អាជីពសម្រាប់សិស្សមធ្យមសិក្សាបានចាប់ផ្តើមជាផ្លូវការហើយ

នៅកម្ពុជាបញ្ហាកង្វះការប្រឹក្សាអាជីព ជាបញ្ហាចម្បងមួយដែលនាំឱ្យមានភាពមិនស៊ីគ្នារវាងទីផ្សារការងារ និងចំនួនធនធានមនុស្សដែលចេញពីគ្រឹះស្ថានសិក្សា ព្រោះសិស្សនិស្សិតជាច្រើនចាប់យកអាជីពតាមគ្នា តាមសង្គម តាមអាណាព្យាបាល ឬតាមអារម្មណ៍មិនច្បាស់លាស់ ដែលធ្វើឱ្យពួកគេប្រមូលផ្តុំគ្នាតែលើអាជីពមួយចំនួនតូច។

ថ្មីៗនេះក្រសួងអប់រំ យុវជន និងកីឡា សហការជាមួយទីភ្នាក់ងារផ្ដល់សេវាការងារសាធារណៈនៃប្រទេសស៊ុយអែដ អង្គការជំនួយព្រះវិហារនៃប្រទេសហ្វាំងឡង់ និងទីភ្នាក់ងារជាតិមុខរបរ និងការងារនៃក្រសួងការងារ និងបណ្ដុះបណ្ដាលវិជ្ជាជីវៈ បានរៀបចំពិធីសម្ពោធដាក់ឱ្យអនុវត្តជាផ្លូវការគម្រោង ”មគ្គុទ្ទេសក៍អាជីព និងការផ្ដល់ប្រឹក្សាសម្រាប់មធ្យមសិក្សា-ស្ពានចម្លងឆ្ពោះទៅកាន់ពិភពការងារ” ដើម្បីជួយសិស្សមធ្យមសិក្សានៅកម្ពុជាឱ្យទទួលបានមូលដ្ឋានគ្រឹះព័ត៌មានគ្រប់គ្រាន់សម្រាប់ការជ្រើសរើសអាជីពប្រចាំជីវិត។

គម្រោងដ៏មានសារៈសំខាន់នេះមានរយៈពេល 3ឆ្នាំ ចាប់ពីឆ្នាំ2019 ដល់ឆ្នាំ2022 ដែលក្នុងនោះគម្រោងនេះនឹងជួយដល់សង្គមតាមរយៈការពង្រីកកម្មវិធីមគ្គុទ្ទេសក៍អាជីព និងការផ្តល់ប្រឹក្សានៅសាលាមធ្យមសិក្សាគោលដៅ។ ក្រៅពីនេះគម្រោងនេះនឹងជួយឱ្យមានការរៀបចំបង្កើតគោលនយោបាយអាជីព ដែលជាផ្នែកមួយដ៏សំខាន់ក្នុងការគាំទ្រដល់ការអនុវត្តកម្មវិធីមគ្គុទ្ទេសក៍អាជីព និងការផ្តល់ប្រឹក្សាឱ្យទទួលបានជោគជ័យ និងមានប្រសិទ្ធភាពខ្ពស់។

ចំណុចសំខាន់មួយផ្សេងទៀតគឺ កម្មវិធីនេះនឹងរៀបចំបង្កើតមជ្ឈមណ្ឌលការងារចល័តចំនួន2 ដើម្បីជំរុញឱ្យមានការផ្សព្វផ្សាយពីសេវាការងារ និងព័ត៌មានទីផ្សារការងាររបស់ទីភ្នាក់ងារជាតិមុខរបរនិងការងារ ទៅដល់សាលាមធ្យមសិក្សាគោលដៅ ដែលជាផ្នែកជួយឱ្យសិស្សានុសិស្សអាចទទួលបានព័ត៌មានអំពីអាជីពបានកាន់តែទូលំទូលាយ ងាយស្រួលក្នុងការសម្រេចចិត្តចាប់យកអាជីពមួយជាក់លាក់ក្នុងជីវិតនាពេលអនាគត៕

June 4, 2019

ក្រសួងអប់រំចុះ MoU ជាមួយសាកលវិទ្យាល័យកូរ៉េលើការកែលម្អបរិស្ថានសិក្សា និងអភិវឌ្ឍធនធានមនុស្ស

ក្រសួងអប់រំ យុវជន និងកីឡា ថ្មីៗនេះបានចុះអនុស្សរណៈនៃការយោគយល់គ្នាជាមួយសាកលវិទ្យាល័យ Korea Soongsil Cyber (KCU) នៃសាធារណរដ្ឋកូរ៉េ លើគម្រោង «កែលម្អបរិស្ថានសិក្សា និងអភិវឌ្ឍធនធានមនុស្ស។

កិច្ចព្រមព្រៀងដ៏សំខាន់នេះនឹងជួយដល់ការអប់រំនៅកម្ពុជាចំនួន 10ចំណុច ដូចជាទី1 គឺព្រមព្រៀងបង្កើតស្ទូឌីយោសម្រាប់ការសិក្សាតាមប្រព័ន្ធអេឡិចត្រូនិកដើម្បីធ្វើជាមជ្ឈមណ្ឌលក្នុងការផលិតមាតិកាអប់រំ។ ទី2 បង្កើតកម្មវិធីផ្លាស់ប្តូរមន្ត្រីអប់រំដើម្បីសិក្សាស្វែងយល់ពីជំនាញបន្ថែម។ ចំណុចទី3 គឺបង្កើតកិច្ចសហការលើគម្រោងស្រាវជ្រាវ។ ទី4 ជំរុញការអភិវឌ្ឍការបង្រៀន និងរៀនឱ្យកាន់តែប្រសើរឡើង។ ទី5 ផ្តល់ការបណ្តុះបណ្តាលដល់មន្ត្រីពាក់ព័ន្ធនៅកម្ពុជា។ ទី6 រៀបចំសិន្និសីទ និងសិក្ខាសាលាដល់ភាគីពាក់ព័ន្ធ។ ទី7 ការផ្លាស់ប្តូរព័ត៌មានសិក្សា និងសម្ភារសិក្សា។ ទី8 ជំរុញឱ្យមានកិច្ចសហប្រតិបត្តិការគ្នាទៅវិញទៅមក។ ទី9 អភិវឌ្ឍមាតិកាសិក្សាតាមប្រព័ន្ធអេឡិចត្រូនិក និងទី10 គឺបង្កើតវេទិកាសិក្សា (platform) តាមប្រព័ន្ធអេឡិចត្រូនិក។

កិច្ចព្រមព្រៀងនេះ ត្រូវបានចុះហត្ថលេខាដោយឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា និងបណ្ឌិត Chung Moosung សាកលវិទ្យាធិការនៃសាកលវិទ្យាល័យ Korea Soonsil Cyber (KCU)៕

June 3, 2019

កុំឱ្យខាតបង់ពេលវេលា គួរស្គាល់កំណាត់ផ្លូវដែលអាជ្ញាធរនឹងបិទរយៈពេល 70ថ្ងៃចាប់ពីពេលនេះតទៅ

ដោយសារតែភ្លៀងចាប់ផ្តើមធ្លាក់ខ្លាំងនៅរាជធានីភ្នំពេញ សាលារាជធានីភ្នំពេញបានរៀបចំប្រព័ន្ធលូថ្មី នៅតាមតំបន់មួយចំនួនដើម្បីបញ្ចៀសការលិចលង់រយៈពេលវែង។

ថ្មីៗនេះសាលារាជធានីភ្នំពេញបានចេញសេចក្តីជូនដំណឹងហាមមិនឱ្យប្រជាជនធ្វើដំណើរឆ្លងកាត់ស្ពានសឡា តាមបណ្តោយផ្លូវលេខ 5C ចាប់ពីផ្លូវលេខ271 ដល់ស្ថានីយប្រេងឥន្ធនៈតេលា ស្ថិតនៅក្នុងព្រំប្រទល់ខណ្ឌសែនសុខ និងខណ្ឌមានជ័យ ដើម្បីរៀបចំប្រព័ន្ធលូថ្មីដែលមានសភាពចាស់ទ្រុឌទ្រោម និងមានទំហំតូចដែលធ្វើឱ្យស្ទះផ្លូវទឹកប្រឡាយស្ទឹងមានជ័យ។ រដ្ឋបាលរាជធានីភ្នំពេញ នឹងចាប់ផ្តើមបិទមិនឱ្យរថយន្តចេញចូលរយៈពេល 70ថ្ងៃ ហើយនឹងចាប់ផ្តើមបើកឡើងវិញក្រោយពេលការដ្ឋានសាងសង់រួចរាល់។

ប្រព័ន្ធលូថ្មីនេះមានប្រអប់មេកាត់ទទឹងផ្លូវលេខ 5C ទំហំមុខកាត់ 2.5ម៉ែត្រ x 2.5ម៉ែត្រ ចំនួន 3ជួរ ភ្ជាប់ពីប្រឡាយស្ទឹងមានជ័យ ដើម្បីរំដោះទឹកចេញពីតំបន់ខាងកើត និងខាងត្បូងអាកាសយានដ្ឋានអន្តរជាតិភ្នំពេញ ជាពិសេសតំបន់ផ្លូវ 2004 ផ្លូវសឡា ផ្លូវណត់ប្រ៊ិត និងផ្លូវឌួងងៀប៕

May 29, 2019

លែងលំបាករត់ចុះឡើងហើយ! ក្រសួងរៀបចំកន្លែងផ្ទេរកម្មសិទ្ធិ និងបង់ពន្ធប្រថាប់ត្រាយានយន្តនៅកន្លែងតែមួយ

ការរៀបចំឯកសារទិញយានយន្ត ជារឿងលំបាកមួយដែលប្រជាជនភាគច្រើនសុទ្ធតែជួបប្រទះ ព្រោះត្រូវរត់ចុះឡើងទៅស្ថាប័នច្រើនទម្រាំនឹងប្រមូលបានឯកសារគ្រប់ ហើយបំពេញតាមលក្ខខណ្ឌច្បាប់ពេញលក្ខណៈ។

ថ្មីៗនេះ ក្រសួងសាធារណការ និងដឹកជញ្ជូន រួមជាមួយនឹងអគ្គនាយកដ្ឋានពន្ធដារបានជួបពិភាក្សាពីនីតិវិធីរួម ក្នុងការផ្ទេរកម្មសិទ្ធិយានយន្ត និងបង់ពន្ធប្រថាប់ត្រា។

ជាលទ្ធផលនៃកិច្ចប្រជុំកាលពីថ្ងៃទី 27 ម្សិលមិញនេះ បានសម្រេចលើការឯកភាពធ្វើនីតិវិធីរួមផ្ទេរសិទ្ធិយានយន្ត និងបង់ពន្ធប្រថាប់ត្រានៅកន្លែងតែមួយ។ គោលដៅសំខាន់នៃការរៀបចំនីតិវិធីបែបនេះ គឺដើម្បីបង្កភាពងាយស្រួលដល់ប្រជាជន និងចំណាយពេលវេលាតិច តែទទួលបានប្រសិទ្ធភាពខ្ពស់។ ភាគីទាំង2 សង្ឃឹមថា លំហូរចរន្តធ្វើដំណើរការតាមប្រព័ន្ធស្វ័យប្រវត្តិកម្មក្នុងការអនុវត្តនីតិវិធីនៃការផ្ទេរសកម្មសិទ្ធិយានយន្ត និងបង់ពន្ធប្រថាប់ត្រានេះនឹងដំណើរការយ៉ាងរលូន ហើយជួយចូលរួមដល់ការពង្រឹងការគ្រប់គ្រងយានយន្ត និងទិន្នន័យសន្តិសុខជាតិបានកាន់តែល្អទៀតផង៕

May 28, 2019

ប្រាក់ឧបត្ថម្ភស្រ្តីមានផ្ទៃពោះក្រីក្រ និងកូនអាយុក្រោម 2ឆ្នាំ នឹងចាប់ផ្តើមអនុវត្តនៅដើមខែក្រោយនេះ

ស្ត្រីមានផ្ទៃពោះដែលមានប័ណ្ណសមធម៌ ឬប័ណ្ណអាទិភាព នឹងទទួលបានការឧបត្ថម្ភចំពោះខ្លួនគាត់ផ្ទាល់ និងកូនតូចអាយុក្រោម 2ឆ្នាំ ចាប់ពីថ្ងៃទី1 ខែមិថុនា ឆ្នាំ2019 នេះតទៅ។ នេះបើយោងតាមប្រកាសអន្តរក្រសួង ស្តីពីការអនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកូនក្រោមអាយុ 2ឆ្នាំ នៃគ្រួសារដែលមានប័ណ្ណសមធម៌ ឬប័ណ្ណអាទិភាព រវាងក្រសួងសេដ្ឋកិច្ច និងហិរញ្ញវត្ថុ និងក្រសួងសុខាភិបាល។

គោលបំណងសំខាន់នៃការបង្កើតកម្មវិធីឧបត្ថម្ភសាច់ប្រាក់នេះ គឺធ្វើឡើងក្នុងគោលបំណងលើកកម្ពស់សុខុមាលភាពមាតា និងទារក និងចូលរួមចំណែកដោះស្រាយបញ្ហាកង្វះអាហារូបត្ថម្ភរបស់កុមារតូចៗក្នុងគ្រួសារក្រីក្រ ចាប់តាំងពីនៅក្នុងផ្ទៃរហូតដល់អាយុ 2ឆ្នាំ ដើម្បីជំរុញការលូតលាស់ទាំងកាយសម្បទា និងបញ្ញាស្មារតី។

តាមការបញ្ជាក់នៅក្នុងប្រកាសអន្តរក្រសួងនេះបានបង្ហាញថា ប្រាក់ឧបត្ថម្ភដែលត្រូវផ្តល់ជូននៅពេលស្ត្រីមានផ្ទៃពោះ ដែលមកទទួលសេវានៅមូលដ្ឋានសុខាភិបាលសាធារណៈជាដំណាក់កាលមានដូចជា៖
ដំណាក់កាលទី1៖ ផ្តល់ប្រាក់ឧបត្ថម្ភចំណួន 40,000រៀល(បួនម៉ឺន)ក្នុង 1ដងសម្រាប់ការមកទទួលសេវាពិនិត្យផ្ទៃពោះដែលផ្តល់ជាអតិបរមាចំនួន 4ដង មុនពេលសម្រាលកូន។

ដំណាក់កាលទី2៖ ផ្តល់ការឧបត្ថម្ភចំនួន 200,000រៀល(ម្ភៃម៉ឺន) តែម្តងគត់នៅពេលសម្រាលកូន។
ដំណាក់កាលទី3៖ ផ្តល់ការឧបត្ថម្ភចំនួន 40,000រៀល(បួនម៉ឺន)ក្នុង 1ដង ហើយដែលនឹងផ្តល់ជូនអតិបរមាចំនួន 10ដង។ ក្នុងនោះ 3ដង នៅពេលមកទទួលសេវាពិនិត្យសុខភាព ក្រោយពេលសម្រាលកូន និង 7ដងនៅពេលយកកូនមកទទួលថ្នាំបង្ការរហូតដល់កូនអាយុ 2ឆ្នាំ។

ចំពោះករណីដែលកូននោះត្រូវរលូត ការផ្តល់ប្រាក់ឧបត្ថម្ភនឹងផ្តល់ជូនក្នុងលក្ខខណ្ឌដូចជា៖
ទី1៖ ផ្តល់ប្រាក់ 40,000រៀល(បួនម៉ឺន)តែ 1ដងគត់ ក្នុងករណីគភ៌អាយុក្រោម 12សប្តាហ៍។
ទី2៖ ផ្តល់ប្រាក់ 40,000រៀល(បួនម៉ឺន)ក្នុង 1ដង ដែលផ្តល់អតិបរមាចំនួន 2ដង ក្នុងករណីគភ៌អាយុចាប់ពី 12សប្តាហ៍ ដល់24សប្តាហ៍។

ក្នុងករណីកូនស្លាប់ក្នុងពេលសម្រាល ឬក្រោយពេលសម្រាល ប្រាក់ឧបត្ថម្ភនេះត្រូវបន្តផ្តល់ជូនដូចជា៖
ទី1៖ ចំនួន 200,000រៀល(ម្ភៃម៉ឺន) នៅពេលសម្រាល។
ទី2៖ ចំនួន 40,000រៀល(បួនម៉ឺន)ក្នុង 1ដង ដែលផ្តល់ជាអតិបរមាចំនួន 3ដង នៅពេលមកទទួលសេវាពិនិត្យសុខភាពក្រោយពេលសម្រាលកូន។

ក្នុងករណីម្តាយស្លាប់នៅពេលសម្រាល ប្រាក់ឧបត្ថម្ភនេះត្រូវផ្តល់ជូនអាណាព្យាបាលស្របច្បាប់ ឬអ្នកដែលមានសិទ្ធិស្របច្បាប់ ឬអ្នកដែលនាំកូនមកទទួលសេវា ដូចខាងក្រោម៖
ទី1៖ 200,000រៀល(ម្ភៃម៉ឺន)សម្រាប់ការសម្រាល។
ទី2៖ 40,000រៀល(បួនម៉ឺន)ក្នុង 1ដង ដែលផ្តល់ជូនជាអតិបរមា 10ដងនៅពេលយកកូនមកទទួលសេវាថែទាំសុខភាពរហូតដល់កូនអាយុ 2ឆ្នាំ៕

May 27, 2019

Author: ពេជ្រ តារាវុទ្ធ