រដ្ឋមន្ត្រីក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ ជួនណារ៉ុន បានថ្លែងប្រាប់បណ្តាញសារព័ត៌មានក្នុងស្រុកថា នៅថ្ងៃនេះមានបេក្ខជនអវត្តមាននៅទូទាំងប្រទេសប្រមាណ 1,800នាក់ ខណៈម្សិលម៉ិញមានបេក្ខជនអវត្តមានប្រមាណ 1,700នាក់។ 
ទោះជាយ៉ាងនេះក្តី ឯកឧត្តមរដ្ឋមន្ត្រីបានបញ្ចាក់ថា ដំណើរការនៃការប្រឡងទាំងមូលធ្វើទៅបានដោយរលូន ដោយមានកិច្ចសហការល្អរវាងមន្ត្រីអប់រំ ភាគីពាក់ព័ន្ធនានាដូចជាអង្គភាពប្រឆាំងអំពើពុករលួយ សហភាពសហព័ន្ធយុវជនកម្ពុជា និងអាជ្ញាធរដែនដី ដែលអាចធ្វើឱ្យការប្រឡងមានភាពយុត្តិធម៌ តម្លាភាព និងអាចទទួលយកបាន។ ជារួម ដំណើរការនៃការប្រឡងនៅឆ្នាំនេះ ដំណើរការល្អខ្លាំងបើទោះបីជាបេក្ខជនប្រមាណ 59នាក់មានបញ្ហាសុខភាព តែក្រោយពេលព្យាបាលគាត់អាចមកប្រឡងធម្មតាបាន លើកលែងតែបេក្ខជនបីរូបប៉ុណ្ណោះមិនអាចមកប្រឡងវិញបាន៕
Author: ពេជ្រ តារាវុទ្ធ
ថ្ងៃនេះបេក្ខជនអវត្តកើនឡើងប្រមាណ 100នាក់ ខណៈបេក្ខជនជិត60 នាក់មានបញ្ហាសុខភាព
ទៀងមិនឈ្នះទាល់! ទោះដឹងថាប្រឈមនឹងធ្លាក់ ក៏មានសិស្សលួចយកសំណៅឯកសារចូលមណ្ឌលប្រឡងដែរ
ក្រោយកំណែរទម្រង់ប្រព័ន្ធអប់រំ បើទោះបីជាមានការរឹតបន្តឹង និងកំណត់ឱ្យធ្លាក់ចំពោះបេក្ខជនទាំងឡាយណាដែលយកសំណៅឯកសារ ឬឧបករណ៍អេឡិចត្រូនិកយ៉ាងណាក្តី ក៏គេសង្កេតឃើញមានបេក្ខជនមួយចំនួននៅតែឆ្លៀតលួយយកសំណៅឯកសារចូលដដែល។
ទោះជាយ៉ាងនេះក្តី នៅឆ្នាំនេះយើងឃើញថាបេក្ខជនមានការយល់ដឹងច្រើនជាងមុន ព្រោះបើក្រលេកមើលឆ្នាំមុនៗយើងឃើញថាមានអ្នកខ្លះបន្លំខ្លួនចូលប្រឡងជំនួស និងមានភាពមិនប្រក្រតីមួយចំនួនដែលត្រូវបានមន្ត្រីអប់រំឃាត់ខ្លួនបាន ហើយបញ្ចូនឱ្យអាជ្ញាធរចាត់វិធានការតាមច្បាប់។ សម្រាប់ឆ្នាំនេះ មិនសូវមានបញ្ហាធ្ងន់ធ្ងរដូចឆ្នាំមុនៗនោះទេ តែនៅមានបេក្ខជនខ្លះនៅលួចសរសេរមេរៀននៅបាតដៃ និងលួចយកសំណៅឯកសារខ្លះៗចូលក្នុងមណ្ឌលប្រឡង ហើយត្រូវបានមន្ត្រីអប់រំចាប់បាន នេះបើតាមការបញ្ជាក់ពីទំព័របណ្តាញសង្គមរបស់ក្រសួងអប់រំ យុវជន និងកីឡា ពាក់ព័ន្ធនឹងការប្រឡងមធ្យមសិក្សាទុតិយភូមិនៅឆ្នាំ 2019នេះ៕
មិនថាត្រូវប្រឡងក្នុងឡានពេទ្យ ឬរបួសពេញខ្លួន បេក្ខជនឆ្នាំនេះនៅតែតស៊ូមិនបោះបង់
តាមការបង្ហាញពីក្រសួងអប់រំ យុវជន និងកីឡា នៅមុននេះបន្តិច បានឱ្យដឹងថា បេក្ខជនមួយចំនួននៅតាមមណ្ឌលប្រឡងទូទាំងប្រទេសមានបញ្ហាសុខភាព ដោយសារអាការៈវិលមុខ ខ្យល់គរ និងក្អួតជាដើម។
បើទោះជាយ៉ាងនេះក្តី ប្រភពពីមន្ត្រីអប់រំ បានបញ្ចាក់ថាបេក្ខជនខ្លះបានបន្តការប្រឡងឡើងវិញហើយបន្ទាប់ពីមានអាការៈធូរស្រាល ដោយការទទួលបានជំនួយសង្គ្រោះបឋមពីក្រុមគ្រូពេទ្យប្រចាំការនៅតាមមណ្ឌល និងបេក្ខជនម្នា់បានបញ្ចូនមកមន្ទីរពេទ្យ និងបានត្រឡប់ទៅមណ្ឌលប្រឡងវិញដើម្បីបន្តដំណើរសំណេរក្រោយទទួលបានការព្យាបាល។ ខាងក្រោមនេះជារូបភាពមួយចំនួននៃសិស្សប្រឡងមធ្យមសិក្សាទុតិយភូមិថ្ងៃទី 19 ខែសីហា ឆ្នាំ2019 ដែលបានបញ្ចូនទៅមន្ទីរពេទ្យ ប្រឡងក្នុងមណ្ឌលដោយមានគ្រូពេទ្យនៅចាំជួយជាប្រចាំ និងប្រឡងក្នុងឡានពេទ្យជាដើម៖
អាណាព្យាបាលសូមកុំជឿ ឬចាញ់បោកមេខ្យល់រឿងបែកវិញ្ញាសា ព្រោះឆ្នាំនេះមានការរៀបចំហ្មត់ចត់ និងសុវត្ថិភាពខ្ពស់
ជារៀងរាល់ពេលប្រឡងមធ្យមសិក្សាទុតិយភូមិ នៅខាងក្រៅមណ្ឌលប្រឡងគេតែងតែគេមនុស្សជាច្រើនចម្រុះគ្នាឈរ និងអង្គុយត្រៀបត្រា ដែលខ្លះជាអាណាព្យាបាល អ្នកខ្លះជាបងប្អូន និងអ្នកខ្លះទៀតជាមិត្តិភក្តិបេក្ខជនជាដើម។ នៅក្នុងចំណោមនោះ ក៏អាចមានជនឆ្លៀតឱកាសមួយចំនួនដែលដើរបំផុសបំផុលព័ត៌មានក្នុងគោលបំណងកេងចំណេញយកប្រយោជន៍ពីអាណាព្យាបាល ឬសាច់ញាតិទាំងអស់នោះ។
បញ្ហាមួយ ក្នុងចំណោមបញ្ហាដែលអាចកើតមានឡើង គឺការបំផុសព័ត៌មានថាមានបែកធ្លាយវិញ្ញាសា។ កន្លងមកមានក្រុមឆ្លៀតឱកាសមួយចំនួនបានបំផុសបំផុល ផ្សព្វផ្សាយដល់អាណាព្យាបាល ឬសាច់ញាតិបេក្ខជនប្រឡងថាពួកគេមានឯកសារប្រឡងដែលបានបែកធ្លាយ។ ប្រសិនបើអាណាព្យាបាលចង់បាន គេអាចលក់ឱ្យក្នុងតម្លៃថ្លៃ ខណៈប្រភពឯកសារទាំងអស់នោះមិនមែនជាឯកសារប្រឡងពិតប្រាកដនោះទេ។ វាគ្រាន់តែជាក្រដាសឯកសារក្លែងក្លាយ ហើយត្រូវបានគេចម្លងតៗគ្នាតែប៉ុណ្ណោះ។ 
នៅឆ្នាំនេះ ក្រសួងអប់រំ យុវជន និងកីឡា បានបង្ហាញយ៉ាងច្បាស់នៅក្នុងទំព័របណ្តាញសង្គមរបស់ក្រសួងពីនីតិវិធីនៃការវិចខ្ចប់សន្លឹកកិច្ចការ ការដឹកជញ្ជូន និងការបើកហិបវិញ្ញសារ គឺធ្វើឡើងដោយហ្មត់ចត់ ត្រឹមត្រូវ និងច្បាស់លាស់ គ្មានការបែកធ្លាយសន្លឹកវិញ្ញាសារនោះទេ៕
វេសឡាញ ចាប់ដៃជាមួយ KOOMPI បង្កើតក្លិបអ្នកវិទ្យាសាស្រ្តជំរុញការបង្កើតថ្មីឱ្យកាន់តែសម្បូរបែប
ក្នុងសម័យបដិវត្តន៍ឧស្សាហកម្ម 4.0នេះ វិទ្យាសាស្រ្ត និងបច្ចេកវិទ្យា គឺជាច្រកយ៉ាងសំខាន់ដែលអាចជួយយុវជនឱ្យអភិវឌ្ឍខ្លួនសម្រាប់ប្រកួតប្រជែងក្នុងពិភពការងារដែលពោរពេញដោយការប្រកួតប្រជែងខ្ពស់បានយ៉ាងល្អ។ ទន្ទឹមនឹងនេះ វាក៏ជាផ្នែកមួយក្នុងការជួយដល់សង្គមតាមរយៈស្នាដៃនវានុវត្តន៍ថ្មីៗរបស់ប្រជាជនសម្រាប់នាំចេញ ឬបម្រើឱ្យសេចក្តីត្រូវការក្នុងប្រទេសថែមទៀតផង។
ដោយមើលឃើញពីសារៈសំខាន់នៃការបណ្តុះបណ្តាលផ្នែកវិទ្យាសាស្ត្រ ក្រុមហ៊ុន វេសឡាញ អេឌ្យូខេសិន គ្រុប បានចុះអនុស្សរណៈយោគយល់គ្នាជាមួយក្រុមហ៊ុន KOOMPI ដើម្បីបង្កើតក្លិបអ្នកវិទ្យសាស្រ្តវ័យក្មេងសម្រាប់បណ្តុះបណ្តាលសិស្សានុសិស្សឱ្យយល់ដឹងពីការសរសេរកូដ និងកម្មវិធីវិទ្យាសាស្ត្រជាច្រើនផ្សេងទៀតដែលពិភពលោកកំពុងត្រូវការ។
លោក ប៉ិច បូឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប បានលើកឡើងថា វិទ្យសាស្ត្រមានសារៈសំខាន់ខ្លាំងណាស់សម្រាប់សង្គម និងសម្រាប់ការអភិវឌ្ឍប្រទេស ព្រោះប្រសិនបើគិតពីផ្នែកសេដ្ឋកិច្ចយើងអាចដើរក្រោយគេ តែប្រសិនបើគិតពីបច្ចេកវិទ្យាយើងអាចលោតមកស្មើគេបាន ព្រោះយុវជនម្នាក់ៗសុទ្ធតែមានសមត្ថភាព និងលទ្ធភាពប្រើប្រាស់បច្ចេកវិទ្យាបានទាំងអស់។ លោកបន្ថែមថា ការចាប់ដៃគ្នាជាមួយ KOOMPI បង្កើតមជ្ឈមណ្ឌលអ្នកវិទ្យាសាស្រ្តវៃក្មេងនេះឡើង គឺក្នុងគោលបំណងផ្តល់ឱ្យគាត់នូវកន្លែងពហុសិក្សាមួយ (co-learning space) ដើម្បីសិក្សាស្រាវជ្រាវពីការសរសេរកូដ និងវិទ្យាសាស្ត្រផ្សេងៗទៀត។ យើងទាំងអស់គ្នាសុទ្ធតែមើលឃើញហើយថា ក្មេងៗ ឬយុវជនរបស់យើងមានសក្តានុពលឥតព្រំដែន ហេតុនេះការបង្កើតមជ្ឈមណ្ឌលបណ្តុះបណ្តាលវិទ្យាសាស្រ្តនេះ គឺជាការជំរុញឱ្យសក្តានុពលរបស់សិស្សយើងឱ្យកាន់តែខ្លាំង ហើយបង្កើតសមិទ្ធផលវិទ្យាសាស្ត្រថ្មីៗបន្ថែមទៀតដែលឆ្លើយតបជាមួយសេចក្តីត្រូវការក្នុងសង្គម។លោក ប៉ិច បូឡែន បាននិយាយថា៖ «ខ្ញុំជឿជាក់ថា សិស្សរបស់យើងនឹងចាប់អារម្មណ៍កាន់តែខ្លាំងលើផ្នែកវិទ្យាសាស្ត្រ ស្របពេលដែលសង្គមរបស់យើងត្រូវការអ្នកវិទ្យាសាស្ត្រ និងបច្ចេកវិទ្យាដើម្បីបម្រើឱ្យតម្រូវការនានាលើគ្រប់វិស័យទាំងអស់»។
លោក ប៉ិច បូឡែន បានបន្ថែមទៀតថា យើងរំពឹងទុកថា ប៉ុន្មានឆ្នាំក្រោយនឹងមានសមិទ្ធផលវិទ្យាសាស្ត្រថ្មីៗដែលកើតចេញពីការធ្វើការសិក្សាស្រាវជ្រាវរួមគ្នានៃសិស្សរបស់យើង ព្រោះអ្វីដែលសិស្សកំពុងស្រាវជ្រាវ និងអនុវត្តនេះ គឺធ្វើឡើងដោយក្តីស្រឡាញ់ពិតប្រាកដ។ យើងចង់ឃើញយុវជនរបស់យើង ដូចជាយុវជននៅបណ្តាប្រទេសអភិវឌ្ឍន៍ធំៗមួយចំនួន ដែលអាយុប្រមាណ 16-17ឆ្នាំអាចក្លាយជាសហគ្រិនបាន បន្ទាប់ពីរួមគ្នាបង្កើតបានផលិតផលដែលអាចធ្វើអាជីវកម្មបានផង និងផ្តល់ផលប្រយោជន៍សម្រាប់សង្គមផង។ ប្រសិនបើមានការបង្កើតថ្មីបែបនេះមែន វេសឡាញ ក៏ដូចជា KOOMPI អាចនឹងរីករាយក្នុងការវិនិយោគដើម្បីធ្វើឱ្យមានភាពរីកចម្រើនកាន់តែខ្លាំង ហើយក៏ដើម្បីជំរុញលើកទឹកចិត្តឱ្យមានការបង្កើតថ្មីកាន់តែខ្លាំង។
លោក ធុល រិទ្ធី ស្ថាបនិក KOOMPI បានលើកឡើងថា មូលហេតុដែលលោកចាប់អារម្មណ៍សហការជាមួយក្រុមហ៊ុន វេសឡាញ អេឌ្យូខេសិន គ្រុប ព្រោះលោកបានស្គាល់ និងបានដឹងយូរមកហើយថា ក្រុមហ៊ុននេះមានបណ្តាញសាលារៀនដែលមានសិស្សច្រើន ស្របជាមួយនឹងទស្សនវិស័យរបស់លោកដែលចង់ឱ្យសិស្សជាច្រើនមានកុំព្យូទ័រដែលមានចំណេះដឹងច្រើននៅក្នុងនោះ។ ក្នុងកិច្ចសហការនេះ គឺលោកចង់ឱ្យយុវជនជំនាន់ថ្មីរបស់យើងក្លាយជាវិស្វករបច្ចេកវិទ្យា ក្លាយជាអ្នកស្រាវជ្រាវ និងក្លាយជាអ្នកដោះស្រាយបញ្ហាសំខាន់ៗក្នុងសង្គមតាមរយៈវិទ្យាសាស្រ្ត និងបច្ចេកវិទ្យា។
លោក ធុល រិទ្ធី បាននិយាយថា៖ «យើងចង់ឱ្យយុវជនរបស់យើងប្រើប្រាស់បច្ចេកវិទ្យា និងវិទ្យាសាស្រ្តដើម្បីដោះស្រាយបញ្ហានានាដែលអាចកើតមានឡើងនាពេលខាងមុខ។ កន្លងមកពេលមានបញ្ហាម្តងៗ យើងតែងតែពឹងគេពីខាងក្រៅមកជួយ ហើយទម្រាំគេមកដល់យើងត្រូវជួបបញ្ហាធ្ងន់ធ្ងរខ្លាំង ហេតុនេះអនាគតទៅ យើងចង់ឱ្យមានអ្នកជំនាញដែលអាចដោះស្រាយបញ្ហាខ្លួនឯងបាន»។
លោក ធុល រិទ្ធី បានបន្ថែមផងដែរថា តាមរយៈមជ្ឈមណ្ឌលវិទ្យាសាស្រ្តដែលយើងបង្កើតឡើងជាមួយវេសឡាញ នៅថ្ងៃនេះ យើងធ្វើការបណ្តុះបណ្តាលដោយផ្តល់សេរីភាពដល់សិស្សក្នុងការស្រាវជ្រាវ និងសិក្សាពីអ្វីដែលគេចង់សិក្សាដោយខ្លួនឯង។ ការធ្វើបែបនេះនឹងធ្វើឱ្យគេរកឃើញនូវសក្តានុពល និងអ្វីដែលចង់ធ្វើពិតប្រាកដ ដោយក្នុងនោះយើងបានដាក់អ្នកប្រឹក្សាយោបល់ដើម្បីជួយពួកគេឱ្យកាន់តែខ្លាំង ព្រោះពួកគេអាចដោះស្រាយចម្ងល់ និងមានអ្នកជួយដោះស្រាយបញ្ហាប្រកបដោយប្រសិទ្ធភាពខ្ពស់៕
បេក្ខជនអាចប្រឡងដោយស្ងប់ចិត្តបានហើយ ព្រោះរដ្ឋមន្ត្រីថា គ្មានការបូកពិន្ទុខុសទៀតទេ ឆ្នាំនេះ
នៅព្រឹកនេះ ជាព្រឹកដែលបេក្ខជនប្រឡងមធ្យមសិក្សាទុតិយភូមិទាំងអស់នៅទូទាំងប្រទេសកំពុងមមាញឹក ញាប់ដៃញាប់ជើងប្រឡង ស្របពេលដែលមន្ត្រីអប់រំក៏ខិតខំប្រឹងប្រែងគ្រប់លទ្ធភាពដើម្បីទប់ស្កាត់បញ្ហាមិនប្រក្រតី កុំឱ្យកើតមាននៅក្នុងពេលប្រឡង។
នៅព្រឹកមិញនេះ ឯកឧត្តម ហង់ជួន ណារ៉ុន រួមជាមួយភាគីពាក់ព័ន្ធជាច្រើនចូលរួមក្នុងកម្មវិធីកាត់វិញ្ញាសា និងពិនិត្យមើលការប្រឡងមធ្យមសិក្សាទុតិយភូមិ បានលើកឡើងថា នៅឆ្នាំសិក្សា2018-2019នេះ នឹងមិនមានបញ្ហាបច្ចេកទេសកុំព្យូទ័រទៀតទេ ព្រោះក្រសួងអប់រំ យុវជន និងកីឡា បានត្រៀមខ្លួនរួចជាស្រេចដើម្បីបណ្តុះបណ្តាលបុគ្គលិកផ្នែកបូកពិន្ទុ ព្រមទាំងបង្កើតមជ្ឈមណ្ឌលកុំព្យូទ័រដល់ទៅ 2កន្លែងដើម្បីធ្វើការផ្ទៀងផ្ទាត់។ ប្រសិនបើមានមជ្ឈមណ្ឌលណាមួយខុស នោះយើងអាចដឹងបានភ្លាម ហើយធ្វើការផ្ទៀងផ្ទាត់យ៉ាងហ្មត់ចត់មុននឹងចេញលទ្ធផល។ ការធ្វើបែបនេះ ត្រូវបានគេមើលឃើញថា នឹងធ្វើឱ្យបេក្ខជនប្រឡងកាន់តែមានទឹកចិត្ត ទំនុកចិត្ត និងភាពស្វាហាប់ក្នុងការប្រឡង ដោយគ្មានការព្រួយបារម្ភពីបញ្ហាមិនប្រក្រតីណាមួយដែលប៉ះពាល់ដល់ការខិតខំប្រឹងប្រែងរបស់ពួកគេឡើយ៕
Park Café បោះទីតាំងថ្មីក្នុងតំបន់ទួលគោកជាមួយនឹងការរចនាប្លែក និងគុណភាពខ្ពស់
ក្រុមហ៊ុន ផាក កាហ្វេ ហ្វ៊ូដ អេន បេវើរីច បានបើកសម្ពោធជាផ្លូវការ ភោជនីយដ្ឋាន ផាកកាហ្វេ សាខាទួលគោក កាលពីថ្ងៃព្រហស្បតិ៍ ទី8 ខែកក្កដា ឆ្នាំ2019។ ភោជនីយដ្ឋានដែលផ្តោតសំខាន់លើមុខម្ហូបខ្មែរ ដែលគ្មានជាតិប៊ីចេង និងគិតគូរពីសុខភាពខ្ពស់សាខាថ្មីនេះ មានទីតាំងនៅលើផ្លូវលេខ 516 កែផ្លូវលេខ317 ខណ្ឌទួលគោក រាជធានីភ្នំពេញ (អតីតមជ្ឈមណ្ឌលបណ្តុះបណ្តាលធនាគារអេស៊ីលីដា)។
លោក ហេង សេងលី អគ្គនាយកគ្រប់គ្រង ផាកកាហ្វេ បានលើកឡើងថា ភោជនីយដ្ឋានផាកកាហ្វេសាខាទួលគោកនេះ ជាសាខាទី17 ហើយរបស់ផាកកាហ្វេ ដែលទីតាំងថ្មីនេះមានការរចនាបែបប្លែក អំណោយផលល្អសម្រាប់ការពិភាក្សាជំនួញ ឬការងារផ្សេងៗ ពីព្រោះគម្លាតពីតុមួយទៅតុមួយមានចម្ងាយសមរម្យមិនឱ្យអ្នកនៅតុជិតស្តាប់ការសន្ទនាបាននោះឡើយ។ ការរចនានៅក្នុងហាងមានលក្ខណៈបែបខ្មែរបុរាណ និងខ្មែរទំនើបលាយបញ្ចូលគ្នា ដើម្បីផ្តល់ភាពប្លែកដល់អតិថិជនដែលតែងតែនិយមទទួលទានអាហារនៅភោជនីយដ្ឋានផាកកាហ្វេ។ 
លោក ហេង សេងលី បាននិយាយថា៖ «ការកំណត់យកទីតាំងនៅទួលគោក ដោយសារតែទួលគោកជាតំបន់មានសក្តានុពលមួយក្នុងរាជធានីភ្នំពេញ ដែលប្រជាជនមានកម្រិតជីវភាពធូរធារ ហើយអតិថិជននៅតំបន់នេះក៏ជាអតិថិជនគោលដៅមួយរបស់ក្រុមហ៊ុនផងដែរ»។ លោក ហេង សេងលី បានបន្ថែមទៀតថា ក្រៅពីការយកចិត្តទុកដាក់លើអាហារគ្មានជាតិប៊ីចេង ថ្មីៗនេះផាកកាហ្វេក៏បន្ថែមផងដែរនូវការផ្តោតលើទឹកផ្លែឈើស្រស់ដែលជាអាហារដ៏ល្អសម្រាប់សុខភាពរបស់ប្រជាជនគ្រប់រូប ព្រោះវាមានសារធាតុចិញ្ចឹមខ្ពស់ និងជួយកាត់បន្ថយសារធាតុមិនល្អក្នុងរាង្គកាយជាដើម។
គួរបញ្ចាក់ផងដែរថា ផាកកាហ្វេ ជាភោជនីយដ្ឋានដែលបង្កើតឡើងដោយកូនខ្មែរសុទ្ធសាធនៅឆ្នាំ 2004 ដែលផ្តល់ជូននូវអាហារគ្មានប៊ីចេង កាហ្វេឆុងបែបបុរាណខ្មែរ និងភេសជ្ជៈល្អជំនួយសុខភាព។ ក្រុមហ៊ុន ផាក កាហ្វេ ហ្វ៊ូដ អេននបេវើរីច មានចក្ខុវិស័យដើម្បីក្លាយជាភោជនីយដ្ឋានលំដាប់ថ្នាក់លេខ1 នៅក្នុងប្រទេសកម្ពុជា ដែលបម្រើនូវអាហារដ៏សំបូរបែប ដូចជាគុយទាវ កាហ្វេ និងអាហារសម្រន់ផ្សេងៗទៀត ហើយក៏ជាកន្លែងដែលមានភាពរស់រវើក រស់រាយរាក់ទាក់ ផលិតផលមានគុណភាពខ្ពស់ មានអនាម័យ គិតគូរដល់សុខភាប គ្មានជាតិប៊ីចេង រួមផ្សំជាមួយបរិយាកាសល្អឥតខ្ចោះ និងមានសេវាកម្មប្រកបដោយភាពស្ទាត់ជំនាញ៕
សិស្សជាង 200នាក់ទទួលសញ្ញាបត្រ និងបណ្ណសរសើរពីសាលារៀនអន្តរជាតិ ចុង ហ័រ
សាលារៀនអន្តរជាតិ ចុង ហ័រ ដែលជាសាលាមានភាពល្បីល្បាញ និងបទពិសោធយូរឆ្នាំក្នុងការបណ្តុះបណ្តាលដោយផ្តោតសំខាន់លើភាសាចិន ភាសាអង់គ្លេស និងភាសាខ្មែរ បានប្រារព្ធពិធីប្រគល់សញ្ញាបត្រ និងបណ្ណសរសើរដល់សិស្សពូកែប្រមាណជាង 200នាក់នៅព្រឹកថ្ងៃទី8 ខែសីហា ឆ្នាំ2019 នេះ។
លោក ZHU BANGJIANG នាយកសាលាអន្តរជាតិ ចុង ហ័រ បានលើកឡើងថា ថ្ងៃនេះជាថ្ងៃដែលយើងទាំងអស់គ្នាគួរចងចាំ ដោយយើងបានជួបជុំគ្នាដើម្បីអបអរសាទរដល់សិស្សកម្រិតមត្តេយ្យ និងសិស្សបឋមសិក្សាដែលបានទទួលសញ្ញាបត្រ និងបណ្ណសរសើរបន្ទាប់ពីបានបញ្ចប់វគ្គសិក្សា។ យើងទាំងអស់គ្នាមកទីនេះដើម្បីបញ្ជាក់ និងចែករំលែកពីភាពរីកចម្រើនរបស់សិស្សានុសិស្សទាំងអស់គ្នា។
លោក ZHU BANGJIANG បានមានប្រសាសន៍ថា៖ «ថ្ងៃនេះក៏ជាថ្ងៃគម្រប់ខួប 10ឆ្នាំរបស់សាលាអន្តរជាតិ ចុង ហ័រ ផងដែរ។ 10ឆ្នាំដែលឆ្លងកាត់ព្យុះភ្លៀង បានធ្វើឱ្យសាលារីកចម្រើនគ្រប់ផ្នែក។ នៅឆ្នាំនេះ សាលារបស់យើងបានបន្ថែមថ្នាក់អនុវិទ្យាល័យ បន្ទាប់ពីយើងទទួលបានការគាំទ្រពីសំណាក់អាណាព្យាបាល និងសង្គម»។ លោកនាយកសាលាបានបន្ថែមទៀតថា 10ឆ្នាំកន្លងមកនេះ សិស្សរបស់យើងទទួលបានពិន្ទុល្អក្នុងសាលារៀន ហើយក្រោយពេលពួកគេបានបន្តការសិក្សានៅក្រៅប្រទេស ពួកគេនៅតែអាចរក្សាបាននូវកម្រិតពិន្ទុល្អដដែល។ នេះបញ្ជាក់ថា ការសិក្សាភាសាចិននៅក្នុងស្រុក ក៏ទទួលបានផលល្អដូចនៅក្រៅប្រទេសដែរ ដែលនេះជាមោទនភាពមួយសម្រាប់សិស្សរបស់យើង។ លោកនាយកក៏បានលើកឡើងផងដែរថា ការលូតលាស់របស់សិស្ស គឺជាគោលបំណងរបស់អាណាព្យាបាល ហើយលោកសូមថ្លែងអំណរគុណដល់អាណាព្យាបាលគ្រប់រូបដែលតែងតែគាំទ្រ សហការ និងផ្តល់មតិយោបល់ជាមួយសាលាកន្លងមក។ នៅថ្ងៃអនាគត សាលានឹងខិតខំប្រឹងប្រែងអភិវឌ្ឍបន្តទៀតដើម្បីឱ្យសិស្សានុសិស្សមានបរិស្ថានសិក្សាល្អ និងមិនធ្វើឱ្យអាណាព្យាបាលខកបំណងឡើយ។
គួរបញ្ជាក់ផងដែរថា លក្ខណៈពិសេសដែលនាំឱ្យសាលារៀនអន្តរជាតិ ចុង ហ័រ បណ្តុះបណ្តាលសិស្សឆាប់ចេះ និងមានចំណេះផ្នែកភាសាចិនល្អ ដោយសារសាលាជ្រើសរើសគ្រូបង្រៀនដែលជាជនជាតិដើម ជាមួយនឹងបទពិសោធខ្ពស់ទាំងអស់ មិនមែនគ្រូខ្មែរបង្រៀនថ្នាក់ភាសាចិនឡើយ។ ក្រៅពីនេះ សាលារៀនអន្តរជាតិ ចុង ហ័រ ក៏មានបន្ថែមផងដែរនូវវគ្គសំខាន់ៗដើម្បីឱ្យសិស្សអភិវឌ្ឍសមត្ថភាព និងយល់ដឹងពីការរស់នៅកាន់តែល្អ ដោយមានបង្រៀនក្បាច់គុណកុងហ៊្វូ មានបង្រៀនគូរគំនូរ និងតន្ត្រីដល់សិស្សានុសិស្សថែមទៀតផង៕
បេក្ខជនប្រឡងបាក់ឌុប គួរចាប់ផ្តើមងាកមកប្រឡងសាកល្បងតាមរយៈកម្មវិធីរបស់ក្រសួងអប់រំ ដើម្បីហ្វឹកហាត់ស្មារតី
នៅសល់តែប៉ុន្មានថ្ងៃទៀតប៉ុណ្ណោះ ការប្រឡងមធ្យមសិក្សាទុតិយភូមិ នឹងចូលមកដល់ ដែលជាហេតុធ្វើឱ្យបេក្ខជនទាំងអស់ចាំបាច់ត្រូវខិតខំប្រឹងប្រែងរំឭកមេរៀន និងជាពិសេសគឺដំណាក់កាលនៃការប្រឡងសាកល្បងដោយខ្លួនឯង។
កាលពីសម័យមុន ការប្រឡងសាកល្បង ឬអនុវត្តនៅផ្ទះដោយខ្លួនឯង បេក្ខជនភាគច្រើនត្រូវទិញសៀវភៅកម្រងវិញ្ញាសាដើម្បីយកមកសាកល្បងអនុវត្តផ្ទាល់ និងបន្ទាប់មកទើបបើកមើលចម្លើយនៅផ្នែកម្ខាងទៀតនៃសៀវភៅ តែបច្ចុប្បន្ននេះ ដោយសារតែបច្ចេកវិទ្យាកាន់តែទំនើប ក្រសួងអប់រំ យុវជន និងកីឡា បានបង្កើតគេហទំព័រមួយដើម្បីជួយដល់សិស្សឱ្យធ្វើតេស្តសមត្ថភាពបានដោយឥតគិតថ្លៃ។
ដើម្បីចូលទៅធ្វើតេស្តសមត្ថភាពរបស់ខ្លួន សិស្សត្រូវចូលទៅក្នុងតំណភ្ជាប់ http://bacii.moeys.gov.kh ដែលគេហទំព័រនេះអាចផ្តល់ឱ្យសិស្សថ្នាក់ទី12 នូវការវាស់ស្ទង់សមត្ថភាពលើមុខវិជ្ជា គណិតវិទ្យា រូបវិទ្យា គីមីវិទ្យា និងប្រវត្តិវិទ្យា។ លក្ខណៈពិសេសរបស់គេហទំព័រដែលក្រសួងអប់រំ យុវជន និងកីឡា ផ្តល់ឱ្យនេះ គឺអាចដឹងលទ្ធផល និងពិន្ទុភ្លាមៗបន្ទាប់ពីធ្វើតេស្តរួច៕
ជម្រើសល្អសម្រាប់បេក្ខជនប្រឡងបាក់ឌុប! ក្រសួងអប់រំបង្ហាញវីដេអូជំនួយស្មារតីខ្លីៗងាយយល់សម្រាប់សិស្សត្រៀមខ្លួន
ទន្ទឹមនឹងការរឹតបន្តឹងការប្រឡងមធ្យមសិក្សាទុតិយភូមិ ក្រសួងអប់រំ យុវជន និងកីឡា ចាប់ផ្តើមបង្ហាញនូវប្រភពចំណេះដឹងសំខាន់ៗជាច្រើនតាមគ្រប់មធ្យោបាយ ទាំងក្នុងបណ្តាញសង្គម បណ្តាញបច្ចេកវិទ្យាថ្មីៗ និងជាឯកសារបោះពុម្ពផ្សាយជាដើម។
ការធ្វើបែបនេះ ត្រូវបានគេមើលឃើញថា ជាការផ្លាស់ប្តូរពីទម្លាប់នៃការលួចចម្លង និងជួយសិស្សដោយការបន្ធូរបន្ថយ មកជាការជំរុញឱ្យសិស្សខិតខំប្រឹងប្រែងរៀនសូត្រ ដើម្បីទទួលបានជោគជ័យដោយសមត្ថភាពជាក់ស្តែងក្នុងការប្រឡងមធ្យមសិក្សាទុតិយភូមិ។
នៅពេលថ្មីៗនេះ ក្រសួងអប់រំ យុវជន និងកីឡា បានបញ្ចេញវីដេអូអប់រំល្អៗជាច្រើនដែលបង្ហាញពីសកម្មភាពបង្រៀនរបស់គ្រូល្បីៗ ដើម្បីជួយសម្រួលដល់សិស្សានុសិស្សក្នុងការត្រៀមខ្លួនប្រឡងបាក់ឌុប។ នៅក្នុងវីដេអូទាំងអស់នោះ បានបង្ហាញពីការសង្ខេបមេរៀន និងឯកសារលម្អិតមួយចំនួន អមជាមួយរូបភាពដែលធ្វើឱ្យសិស្សងាយយល់ និងជាជំនួយស្មារតីផងដែរសម្រាប់អ្នកដែលមិនទាន់ច្បាស់ពីមេរៀន។ ហេតុនេះសិស្សានុសិស្សដែលកំពុងត្រៀមប្រឡងមធ្យមសិក្សាទុតិយភូមិ អាចចូលទៅក្នុងទំព័រ Facebook ផ្លូវការរបស់ក្រសួងអប់រំ យុវជន និងកីឡា ដើម្បីមើលពីវីដេអូដែលបង្ហាញពីមុខវិជ្ជាសំខាន់ៗទាំងនោះ៕