ពេជ្រ តារាវុទ្ធ - La Reine Media

ក្រសួងវប្បធម៌៖ យុវជនខ្មែរគួរស្វែងយល់ពីខ្លួនឯងឱ្យច្បាស់ កុំឱ្យថ្ងៃទី14 កុម្ភៈ ប៉ះពាល់ដល់អត្ថិភាពជាប្រជាជាតិថ្លៃថ្នូរ

ក្រសួងវប្បធម៌ និងវិចិត្រសិល្បៈ បានចេញសេចក្តីអំពាវនាវថ្មីមួយនៅថ្ងៃទី11 ខែកុម្ភៈនេះ ដើម្បីទប់ស្កាត់ផលប៉ះពាល់អវិជ្ជមានចំពោះវប្បធម៌ប្រពៃណីជាតិ ដែលកើតឡើងដោយការយល់ខុសរបស់ប្រជាជន ជាពិសេសយុវវ័យ។
នៅក្នុងសេចក្តីអំពាវនាវនេះ ក្រសួងបានបញ្ជាក់ថា ថ្ងៃទី14 កុម្ភៈ ដែលមនុស្សមួយចំនួន ជាពិសេសគ្រិស្តសាសនិកជនបានកំណត់ថា ជាទិវានៃក្តីស្រឡាញ់ ជិតឈានចូលមកដល់ហើយ។ បច្ចុប្បន្ន ទិវានេះបាន និងកំពុងជ្រៀតចូលមកក្នុងសង្គមកម្ពុជា ជាពិសេសស្រទាប់យុវជន បណ្តាលឱ្យមនុស្សមួយចំនួនបានទទួលយក និងប្រើប្រាស់ដោយភាពភ័ន្តច្រឡំ នាំឱ្យមានផលប៉ះពាល់ដល់វប្បធម៌ទំនៀមទម្លាប់ប្រពៃណីជាតិទៀតផង។

ក្នុងបរិការណ៍នេះ ប្រជាជនជាពិសេសយុវជនកម្ពុជា ត្រូវសិក្សាស្វែងយល់ឱ្យស៊ីជម្រៅចំពោះវប្បធម៌ ប្រពៃណី ដែលជាមរតកដ៏ថ្លៃថ្លារបស់ដូនតាយើង ព្រមទាំងត្រូវសិក្សាស្វែងយល់ឱ្យគ្រប់ជ្រុងជ្រោយពីខ្លឹមសារ និងឥទ្ធិពលនៃវប្បធម៌ ទំនៀមទម្លាប់ពីខាងក្រៅ ដើម្បីបន្ស៊ីចូលទៅក្នុងឥរិយាបថ និងបរិបទនៃសង្គមរបស់ខ្លួន ក្នុងគោលដៅរក្សាឱ្យបាននូវអត្ថិភាពជាប្រជាជាតិថ្លៃថ្នូរមួយដែលមានវ័យចំណាស់រាប់ពាន់ឆ្នាំមកហើយនៅទ្វីបអាស៊ីនេះ។

ទិវានៃក្តីស្រឡាញ់នៅកម្ពុជា គួរតែជាឱកាសក្នុងការចែកចាយ និងធានាក្តីស្រឡាញ់ប្រកបដោយភាពទូលំទូលាយ និងសន្តានចិត្តស្មោះស ចំពោះមនុស្សដែលនៅជុំវិញខ្លួនមានជាអាទិ៍៖ ក្រុមគ្រួសារ ឪពុកម្តាយ ប្តីប្រពន្ធ កូនចៅ និងចំពោះអ្នកនៅក្នុងសង្គមជាមួយគ្នាដូចជា ជនពិការ កុមារកំព្រា និងអ្នកដែលខ្សត់ខ្សោយជាងខ្លួន ជាដើម ក្រោមរូបភាព ការជួបជុំពិភាក្សាគ្នា ឬទទួលទានអាហាររូមគ្នាដោយក្តីសោមនស្សរីករាយ ការសរសេរលិខិតជូនពរ ការជូនអំណោយផ្សេងៗ ដើម្បីបញ្ជាក់ពីភាពកត្តញ្ញូតាធម៌ ពីក្តីស្រឡាញ់ និងការយកចិត្តទុកដាក់របស់ខ្លួនចំពោះអ្នកមានគុណបុព្វការីជនចំពោះមនុស្សដែលខ្លួនស្រឡាញ់ និងចំពោះសង្គមជាតិ។

ក្នុងឱកាសនេះ ក្រសួងវប្បធម៌ និងវិចិត្រសិល្បៈ សូមអំពាវនាវដល់មាតា បិតា អាណាព្យាបាល សមត្ថកិច្ចពាក់ព័ន្ធគ្រប់លំដាប់ថ្នាក់ ជាពិសេសយុវជន សូមចូលរួមផ្សព្វផ្សាយ អប់រំ ពន្យល់ណែនាំ ក្រើនរំឭកដល់បងប្អូន កូន ចៅ ក្នុងគោលដៅប្រើប្រាស់ទិវានេះ ឱ្យស្របតាមគន្លងប្រពៃណីដ៏ត្រកាលរបស់ខ្មែរដើម្បីកិត្តិយស និងសេចក្តីថ្លៃថ្នូររបស់ខ្លួន របស់ក្រុមគ្រួសារ ជាពិសេសដើម្បីរួមចំណែកលើកកម្ពស់កិត្យានុភាពនៃសង្គមជាតិ៕

February 11, 2019

ធនាគារអេស៊ីលីដា បោះជំហានកាន់តែលឿនក្នុងការបម្រើអតិថិជននៅគ្រប់ទីកន្លែងក្នុងពិភពលោក

ធនាគារអេស៊ីលីដា ភីអិលស៊ី ជាធនាគារដែលកំពុងមានប្រតិបត្តិការល្អ និងមានភាពទូលំទូលាយក្នុងការផ្តល់សេវាកម្មធនាគារដល់អតិថិជនទាំងក្នុងប្រទេស និងនៅតាមបណ្តាប្រទេសនានាលើពិភពលោក តាមរយៈការបង្កើនកិច្ចសហការជាមួយធនាគារ និងស្ថាប័នអន្តរជាតិដៃគូធំៗជាច្រើន។

នៅថ្ងៃទី5 ខែកុម្ភៈ ឆ្នាំ2019 នេះ ធនាគារអេស៊ីលីដា ភីអិលស៊ី និងក្រុមហ៊ុន JCB International Co., Ltd. (JCBI) ជាក្រុមហ៊ុនបុត្រសម្ព័ន្ធ JCB Co., Ltd. បានប្រកាសជាសាធារណៈស្តីពីពិធីដាក់ឱ្យប្រើប្រាស់ជាផ្លូវការនូវបណ្ណឥណពន្ធ អេស៊ីលីដា JCB នៅប្រទេសកម្ពុជា។ បណ្ណឥណពន្ធ អេស៊ីលីដា JCB នេះផ្តល់ជូនអតិថិជននូវមុខងារ ឌីជីថល ជាច្រើនដែលអាចឱ្យអតិថិជនមានជម្រើសក្នុងការទូទាត់ប្រាក់ដុល្លារ និងប្រាក់រៀល អាស្រ័យលើប្រភេទប័ណ្ណ និងជាប័ណ្ណដែលមានប្រព័ន្ធការពារខ្ពស់ចំពោះសុវត្ថិភាពហិរញ្ញវត្ថុសម្រាប់អតិថិជនទាំងអស់។
អតិថិជនដែលជាម្ចាស់បណ្ណឥណពន្ធ អេស៊ីលីដា JCB មិនត្រឹមតែអាចប្រើប្រាស់នៅតាមបណ្ដាញភ្នាក់ងារទូទាត់ JCB ប្រមាណ 30លានទីតាំងទូទាំងសកលលោកនោះទេ ថែមទាំងអាចធ្វើប្រតិបត្តិការដែល JCB ផ្តល់សិទ្ធិ និងការបញ្ចុះតម្លៃនៅតាមភោជនីយដ្ឋាន និងបណ្ដាហាងទំនិញនានា នៅក្នុងសកលលោកទៀតផង។

លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា ធនាគារ អេស៊ីលីដា ភីអិលស៊ី មានសេចក្តីសោមនស្សរីករាយដែលក្រុមហ៊ុន JCBI លំដាប់ពិភពលោកផ្នែកសេវាកម្មទូទាត់មានគុណភាពខ្ពស់លំដាប់អន្តរជាតិ មានទីតាំងនៅប្រទេសជប៉ុនបានជ្រើសរើសយកធនាគារ អេស៊ីលីដា ភីអិលស៊ី ជាដៃគូយុទ្ធសាស្រ្តក្នុងការធ្វើសហប្រត្តិបត្តិការបម្រើសេវាកម្មទូទាត់។ តាមរយៈកិច្ចព្រមព្រៀងនេះ អតិថិជន ឬសមាជិកប័ណ្ណ និងភ្នាក់ងារទូទាត់របស់ធនាគារ អេស៊ីលីដា ភីអ៊ិលស៊ី និង JCBI អាចពង្រីកប្រតិបត្តិការទូទាត់ជាសកលនៅតាមបណ្តាញធនាគារ អេស៊ីលីដា និងJCBI ជាង 30លានទីតាំង និងទីតាំងសម្រាប់ការធ្វើប្រតិបត្តិការដកប្រាក់បុរេប្រទានជាង 1លានកន្លែងនៅក្នុងសកលលោក។

លោកបណ្ឌិត អ៊ិន ចាន់នី បានមានប្រសាសន៍ថា៖ «ចំណុចសំខាន់នៃកិច្ចព្រមព្រៀងនេះគឺសមាជិកប័ណ្ណអេធីអឹមរបស់ធនាគារ អេស៊ីលីដា ភីអិលស៊ី អាចទទួលបានប័ណ្ណសហនិមិត្តសញ្ញារវាង ធនាគារ អេស៊ីលីដា ភីអិលស៊ី និង JCBI តាមរយៈការស្នើសុំ។ ម្យ៉ាងវិញទៀត ប័ណ្ណនេះមិនត្រឹមតែជួយសម្រួលដល់ការធ្វើប្រតិបត្តិការទូទាត់នៅក្នុង និងក្រៅប្រទេសប៉ុណ្ណោះទេ ថែមទាំងសម្រួលដល់សមាជិកប័ណ្ណ និងភ្នាក់ងារទូទាត់ របស់ធនាគារ អេស៊ីលីដា ភីអិលស៊ី និង JCBI ក្នុងការធ្វើប្រតិបត្តិការទូទាត់យ៉ាងសម្បូរបែប ធ្វើប្រតិបត្តិការទូទាត់លើសកលលោកនៅគ្រប់ទីកន្លែង និងគ្រប់ពេលវេលា តាមតម្រូវការ»។

លោកបណ្ឌិត អ៊ិន ចាន់នី បានលើកឡើងផងដែរថា ធនាគារ អេស៊ីលីដា ភីអិលស៊ី បានសហការជាមួយបណ្តាដៃគូសំខាន់ៗជាច្រើនរួចមកហើយ ហើយដៃគូដែលយើងបានប្រកាសសហការគ្នានេះគឺមានលក្ខណពិសេសត្រង់គាត់មានសមាជិកច្រើនរហូតដល់ជាង 30លានទីតាំងលើពិភពលោក។ ម្យ៉ាងវិញទៀតដូចយើងបានដឹងហើយថា JCBI គឺជាស្ថាប័នមកពីប្រទេសជប៉ុន ដែលផលិតផលជប៉ុន គឺតែងតែភ្ជាប់ជាមួយនឹងកេរ្តិ៍ឈ្មោះ គុណភាព និងភាពដែលអាចជឿជាក់បាន។

លោក គីមីហ៊ីសា អ៊ីម៉ាដា អគ្គនាយក និងជាប្រធាននាយកប្រតិបត្តិរបស់ JCBI បានមានប្រសាសន៍ថា៖ «ក្រុមហ៊ុន JCB International Co., Ltd. (JCBI) មានសេចក្តីសោមនស្សរីករាយ ដែលធនាគារអេស៊ីលីដា ភីអិលស៊ី ជាធនាគារឈានមុខធំបំផុតក្នុងប្រទេសកម្ពុជាបានក្លាយជាដៃគូពាណិជ្ជកម្មជាមួយ JCB ក្នុងការបម្រើសេវាបណ្ណឥណ្ណពន្ធដល់អតិថិជនរបស់ស្ថាប័នទាំង2 និងសាធារណជនទូទាំងពិភពលោក។ ខ្ញុំជឿជាក់ថា ភាពជាដៃគូដ៏ល្អនេះ នឹងផ្តល់ឱកាសជាច្រើនបន្ថែមទៀតដល់ធនាគារ អេស៊ីលីដា ភីអិលស៊ី និង JCBI ក្នុងការពង្រីកពាណិជ្ជកម្មក្នុងប្រទេសកម្ពុជា ដែលនេះជាការបង្ហាញពីសក្តានុពលខ្ពស់នាថ្ងៃអនាគត ខណៈសេដ្ឋកិច្ចកំពុងបោះជំហានលូតលាស់យ៉ាងរលូន»។

គួរបញ្ជាក់ផងដែរថា ធនាគារ អេស៊ីលីដា ភីអិលស៊ី មានទ្រព្យសកម្មសរុបចំនួនជាង 5.7ពាន់លានដុល្លារអាមេរិក សមតុល្យឥណទានសរុបចំនួន 3.63ពាន់លានដុល្លារអាមេរិក និងប្រាក់បញ្ញើសន្សំសរុបចំនួន 3.84ពាន់លានដុល្លារអាមេរិក និងមានអតិថិជនប្រមាណជាង 2.5លាននាក់ គិតត្រឹមដំណាច់ខែធ្នូ ឆ្នាំ2018 នេះ។ ចំណែកឯក្រុមហ៊ុន JCB ជាក្រុមហ៊ុនដែលមានយីហោសេវាកម្មទូទាត់លំដាប់ពិភពលោក និងជាអ្នកចេញ និងទទួលបណ្ណឥណទាន ឈានមុខគេនៅក្នុងប្រទេសជប៉ុនដែលមានប្រតិបត្តិការចាប់តាំងពីឆ្នាំ1961 មកម្ល៉េះ៕

February 6, 2019

ថោង ខុន៖ យើងមានផែនការមេ ៤ចំណុច ទុកត្រៀមសម្រាប់ស៊ីហ្គេម ឆ្នាំ២០២៣

ខណៈដែលព្រឹត្តិការណ៍ប្រកួតកីឡាស៊ីហ្គេម ឆ្នាំ២០២៣ ដែលកម្ពុជា ទទួលបានសិទ្ធិធ្វើជាម្ចាស់ផ្ទះ ក្នុងរយៈ ពេល៧ឆ្នាំទៀតនោះ លោក ថោង ខុន ប្រធាន គណៈកម្មាធិកាជាតិអូឡាំពិកកម្ពុជា (NOCC) បានដាក់គោល ដៅ៤ចំណុចធំៗដើម្បីត្រៀមទាំងអត្ត ពលិក ប្រជាពលរដ្ឋ និង ប្រទេសកម្ពុជាទាំងមូល មានសក្ដានុពលខ្លាំង មុនស៊ីហ្គេមចូលមកដល់។

លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធាន NOCC បានពន្យល់ថា យើងមានពេល ៧ ឆ្នាំ ក្នុងការត្រៀមធ្វើជាម្ចាស់ផ្ទះស៊ីហ្គេម ឆ្នាំ ២០២៣ ហើយចំណុចសំខាន់នៃផែនការមេ គឺទី ១ ក្នុងនាមជាម្ចាស់ផ្ទះ យើងត្រូវកំណត់ជ្រើសយកប្រភេទកីឡាឲ្យបានយ៉ាងតិច ២២ ប្រភេទ ក្នុងនោះកំណត់យកកីឡាវប្បធម៌ប្រពៃណី មានសក្តានុពលរបស់ម្ចាស់ផ្ទះ ប្រភេទកីឡាលេងក្នុងតំបន់ និងក្នុងទ្វីប ព្រមទាំងកីឡាក្នុងអូឡាំពិកផងដែរ។

លោក ថោង ខុន បន្តថា ចំណែកទី ២ យើងត្រូវរៀបចំរចនាសម្ព័ន្ធ ទីលានប្រកួត ក្នុងនោះកីឡាហែលទឹក និងអត្តពលកម្ម មានអាទិភាពមុនគេ ហើយប្រភេទកីឡាក្នុងសាល ឬក្រៅសាល មានគ្រប់ស្តង់ដារកម្រិតអន្តរជាតិ។ រីឯទី ៣ សម្ភារសម្រាប់ហ្វឹកហាត់ និងបម្រើការប្រកួត ក្នុងនោះមានកីឡាជំនាញកម្រិតខ្ពស់ ហើយទី ៤ យើងត្រូវបណ្តុះបណ្តាលធនធានមនុស្ស មានគ្រូបង្វឹក អត្តពលិក មន្ត្រីដឹកនាំកីឡា ចៅក្រមអាជ្ញាកណ្តាល ព្រមទាំងបង្កើតឲ្យមានព្រឹត្តិការណ៍កីឡាជាតិ (National Games) ២ ឆ្នាំឲ្យបានម្តងគឺពីឆ្នាំ ២០១៦ ដល់ ២០២២។

លោកបន្ថែមថា៖ ផែនការមេក្នុងដំណើរឆ្ពោះទៅធ្វើជាម្ចាស់ផ្ទះការប្រកួតស៊ីហ្គេម លើកទី ៣២ ឆ្នាំ ២០២៣ ត្រូវបានរាជរដ្ឋាភិបាលកម្ពុជា អនុម័តរួចរាល់តាំងពីថ្ងៃទី ៦ ខែឧសភា ឆ្នាំ ២០១៦ មកម្លេះដោយក្នុងនោះលោករដ្ឋមន្ត្រីក្រសួងការពារជាតិ ជាប្រធាន ហើយក្រសួងអប់រំ យុវជន និងកីឡា,រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងសាលារាជធានីភ្នំពេញជាអនុប្រធាន ដោយមានគណៈកម្មាធិការជាតិអូឡាំពិកកម្ពុជា (NOCC) ជាអនុប្រធានអចិន្រ្ដៃយ៍។

យោងតាមអារម្ភកថារបស់សម្ដេចនាយករដ្ឋមន្ត្រីហ៊ុនសែន ក្នុងផែនការមេឆ្ពោះធ្វើជាម្ចាស់ផ្ទះ ស៊ីហ្គេម ឆ្នាំ ២០២៣ នេះ បានសរសេរថា ផែនការកីឡានេះជាមោទនភាពជាតិ ជាឧត្តមភាពជាតិ និងជាចំណីអាហារបំប៉នថាមពលរាងកាយ និងជាចំណីអារម្មណ៍ញាប់ញ័រ ដែលមិនអាចខ្វះបានក្នុងជីវិតប្រចាំថ្ងៃរបស់មនុស្សម្នាក់។

សម្ដេចនាយករដ្ឋមន្ត្រី ហ៊ុន សែន បានបន្តថា ព្រឹត្តិការណ៍ផែនការមេឆ្ពោះទៅស៊ីហ្គេម លើក ៣២ នៅកម្ពុជានេះ គឺជាព្រឹត្តិការណ៍ប្រវត្តិសាស្ត្ររបស់កម្ពុជា ក្នុងការលើកពីកេរ្តិ៍ឈ្មោះ និងកម្លាំងថាមពល ដែលត្រូវបង្ហាញពិភពលោកឲ្យឃើញពីវប្បធម៌ទេសចរណ៍ សេដ្ឋកិច្ចនៅក្នុងសង្គមខ្មែរដ៏រុងរឿងថ្កើងថ្កានបន្ថែមទៀត ហើយលោក បានបន្ថែមនូវពាក្យស្លោកសម្រាប់ស៊ីហ្គេម ឆ្នាំ ២០២៣ នេះថា៖ «គ្មានអ្វីប្រសើរជាងកីឡា គ្មានអ្វីថ្លៃថ្លាជាងកិត្តិយស គ្មានអ្វីខ្ពង់ខ្ពស់ជាងជាតិរុងរឿងថ្កុំថ្កើងនោះឡើយ»៕

April 27, 2017

Real ផ្តួល Deportivo ខណៈ Barcelona បញ្ជូន Osasuna ឲ្យទៅលេងក្នុងក្របខ័ណ្ឌទី២

James Rodriguez បានបញ្ហាពីភាពអស្ចារ្យក្នុងពេលចូលជំនួសកន្លែងរបស់ខ្សែប្រយុទ្ធ Cristiano Ronaldo ខណៈដែលគ្រាប់បាល់ស៊ុតបញ្ចូលទី២គ្រាប់បាល់របស់គេ បានជួយឲ្យក្រុម Real Madrid បំបាក់ក្រុម Deportivo La Coruna យ៉ាងចាស់ក្នុងលទ្ធផល ៦-២ កាលពីថ្ងៃពុធ។

ខ្សែបម្រើប្រយុទ្ធអន្តរជាតិកូឡុំប៊ីរូបនេះ បានរកគ្រាប់បាល់បើកឆាករបស់គេនៅនាទី ទី១៤ មុននឹងរកគ្រាប់បាល់ទី២នៅនាទី ទី៦៦ ខណៈដែលគ្រាប់បាល់ស៊ុតបញ្ចូលទីពីសំណាក់កីឡាករ Alvaro Morata, Lucas Vazquez, Isco និង Casemiro រក្សាមានពិន្ទុស្មើជាមួយនឹងក្រុម Barcelona នៅលើកំពូលតារាងនៃក្របខ័ណ្ឌ La Liga។ ក្រុមម្ចាស់ផ្ទះបានវាយ២គ្រាប់វិញតាមរយៈកីឡាករ Florin Andone និង Joselu នៅក្នុងតង់នីមួយៗ ប៉ុន្តែ មិនបានបង្កើតឲ្យមានការប្រែប្រួលឡើយ។ ក្រុម Barcelona និង Real Madrid កំពុងតែមាន៧៨ពិន្ទុស្មើគ្នា ប៉ុន្តែ Barca នាំមុខដោយសារតែមានកំណត់ត្រាល្អប្រសើរជាងពីការជួបគ្នារវាងក្រុមទាំងពីរ។

ស្របពេលជាមួយគ្នានេះ ក្រុម ខ្សែប្រយុទ្ធ Lionel Messi បានស៊ុតបាល់បញ្ចូលទី២គ្រាប់ ដើម្បីជួយឲ្យក្រុមខ្លួនកត់ត្រាជ័យជម្នះយ៉ាងកក់ក្តៅក្នុងលទ្ធផល ៧-១ និងដើម្បីធ្វើឲ្យក្រុម Osasuna ត្រូវកាត់ចេញពីក្របខ័ណ្ឌកំពូល។ លោក Zinedine Zidane គ្រូបង្វឹករបស់ក្រុម Real Madrid បានផ្លាស់ប្តូរកីឡាករ៩នាក់ទៅលើក្រុមដែលបានរងបរាជ័យក្នុងលទ្ធផល ៣-២ កាលពីថ្ងៃអាទិត្យ ក្រោមស្នាដៃក្រុម Barca ដែលបានធ្វើឲ្យការប្រជែងពាន La Liga កាន់តែមានលក្ខណៈបើកចំហរ។ Ronaldo, Karim Benzema និងខ្សែប្រយុទ្ធមានរបួស Gareth Bale សុទ្ធសឹងអវត្តមានពីក្រុម Real ក្នុងការប្រកួតលីកជាលើកទី៣ជាប់ៗគ្នា ប៉ុន្តែ ការអវត្តមានរបស់ពួកគេ មិនបានជះឥទ្ធិពលអាក្រក់ដល់លទ្ធផលឡើយ៕

ទស្សនាវីដេអូ Highlights ការប្រកួតរវាង Deportivo La Coruna vs Real Madrid 2-6 – All Goals

ទស្សនាវីដេអូ Highlights ការប្រកួតរវាង FC Barcelona 7-1 Osasuna | All Goals

ប្រភពពី៖ Mirror

April 27, 2017

PSG បំបាក់ Monaco ចាស់ដៃ ដើម្បីទៅវគ្គផ្តាច់ព្រ័ត្រនៃ French Cup

ខ្សែប្រយុទ្ធ Edinson Cavani បានអបអរការបន្តកុងត្រាថ្មីរបស់គេជាមួយនឹងការរកគ្រាប់បាល់បញ្ចូលទីលើកទី៤៥របស់គេនៅរដូវកាលនេះ ខណៈដែលក្រុមម្ចាស់ការពារតំណែងជើងឯក Paris Saint-Germain បានបំបាក់ក្រុមគ្មានបទពិសោធ Monaco យ៉ាងចាស់ដៃក្នុងលទ្ធផល ៥-០ ដើម្បីឈានទៅជួបក្រុម Angers ក្នុងវគ្គផ្តាច់ព្រ័ត្រនៃពាន French Cup នៅខែក្រោយ។

ខ្សែបម្រើប្រយុទ្ធ Julian Draxler បានជួយឲ្យ PSG មានគ្រាប់បាល់នាំមុខនៅនាទី ទី២៦ នាកីឡដ្ឋាន Parc des Princes ហើយ Cavani ដែលទើបតែបានបន្តកុងត្រាថ្មីរហូតដល់ឆ្នាំ២០២០កាលពីថ្ងៃអង្គារនោះ បានបន្ថែមការនាំមុខរបស់ក្រុមខ្លួន ខណៈដែលក្រុមរបស់លោក Unai Emery បានគ្រប់គ្រងលើគូប្រកួតរបស់ខ្លួនទាំងស្រុង។ ខ្សែការពារ Safwan Mbae បានធ្វើឲ្យបាល់ចូលទីខ្លួនឯងនៅតង់ទី២ ហើយ Blaise Matuidi បានរកគ្រាប់បាល់ទី៤ នៅមុនពេល Marquinhos បានបំពេញការទទួលជ័យជម្នះយ៉ាងកក់ក្តៅសម្រាប់ក្រុមម្ចាស់ផ្ទះនៅនាទីចុងក្រោយ។

ក្រុម PSG ធ្លាប់បានផ្តួលក្រុម Monaco ៤-១ កាលពីដើមខែនេះ ដើម្បីលើកពាន League Cup ជាលើកទី៤ជាប់ៗគ្នារបស់ពួកគេ និងកំពុងតែប្រមាញ់រកការឈ្នះពាន Ligue 1 ជាលើកទី៣ជាប់ៗគ្នារបស់ពួកគេនៅបារាំង។ ប៉ុន្តែ ទោះបីជាយ៉ាងណា Monaco កំពុងមានពិន្ទុនាំមុខលើក្រុមម្ចាស់ការពារតំណែងជើងឯកមួយនេះ ដោយសារតែមានគ្រាប់បាល់ស៊ុតបញ្ចូលទីបានច្រើនជាង និងនៅសល់មួយប្រកួតក្នុងដៃក្នុងក្របខ័ណ្ឌ Ligue 1 ខណៈដែលក្រុមរបស់លោក Leonardo Jardim ក៏នឹងត្រូវជួបជាមួយនឹងក្រុមសេះបង្កង់ Juventus ក្នុងការប្រកួតជើងទី១ នៃក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ នាសប្តាហ៍ក្រោយ ផងដែរ៕

ទស្សនាវីដេអូ៖

ប្រភពពពី៖ Mirror

April 27, 2017

ព្រឹត្តិការណ៍ Run & Ride សប្បុរសធម៌ដើម្បីកម្ពុជា នឹងចាប់ផ្ដើមនាចុងខែនេះ

នាថ្ងៃទី ២៩ ដល់៣០ ខែមេសា នេះ ក្រុមហ៊ុន ខ្មែរ ប៊ែវើរីជីស នឹងរៀបចំ ព្រឹត្តិការណ៍ជិះកង់ Run & Ride សប្បុរសធម៌ដើម្បីកម្ពុជា ដើម្បីរក ថវិកា ទៅបរិច្ចាគសម្រាប់ការជួយកែលម្អហេដ្ឋារចនាសម្ព័ន្ធសាលារៀនតាមខេត្តដែលខ្វះខាត។

គ្រូបបង្វឹកកីឡាប្រណាំងកង់ជម្រើសជាតិកម្ពុជា លោក អេង លីនបានឱ្យដឹងថា កម្មវិធី Run & Ride នេះនឹងទាក់ទាញចំណាប់អារម្មណ៍មហាជនបានច្រើន ជាពិសេសក្លឹបអ្នកជិះកង់ផ្សេងៗ ព្រោះអ្នកជិះកង់ជាច្រើននឹងមកជួបគ្នាសាកល្បងសមត្ថភាព។ ព្រឹត្តិការណ៍នេះ មិនត្រឹមតែប្រណាំងកង់សប្បាយហើយនោះទេ គឺយើងបានចូលរួមធ្វើការងារសង្គមដ៏ល្អមួយ គឺចូលរួមរៃអង្គាសថវិកា ជួយ ទៅដល់សាលារៀនបាក់បែកខូចខាត ដែលត្រូវការជំនួយពីយើង។

កាលពីខែធ្នូ ឆ្នាំ២០១៦កន្លងទៅ មានព្រឹត្តិការប្រណាំងកង់ «ជិះកង់ដើម្បីកុមារ» នៅខេត្តសៀមរាប ដែលទាក់ទាញអ្នកចូលរួមបានជាច្រើនរយនាក់ ហើយកម្មវិធីនោះក៏ត្រូវបានឧបត្ថម្ភធំដោយក្រុមហ៊ុន ខ្មែរ ប៊ែវើរីជីស នេះផងដែរ។

គួបញ្ជាក់ផងដែរថា កម្មវិធីនេះចែកចេញជាពីរវិញ្ញាសាកីឡា គឺប្រណាំងកង់ចម្ងាយ ១០០គីឡូម៉ែត្រ តាមផ្លូវជាតិលេខ៦A ពីក្រុងភ្នំពេញឆ្ពោះទៅខេត្តកំពង់ចាម នៅថ្ងៃសៅរ៍ ទី២៩ ខែមេសា និងរត់ពាក់កណ្ដាលម៉ារ៉ាតុង ក្នុងទីក្រុងភ្នំពេញ នៅថ្ងៃអាទិត្យ ទី៣០ ខែមេសា។ វិញ្ញាសាទាំងពីរនឹងចេញដំណើរពីមុខសាលមហោស្រពកោះពេជ្រ៕

April 27, 2017

លោក Pochettino៖ Spurs ត្រៀមលក្ខណៈរួចរាល់ក្នុងការប្រយុទ្ធជាមួយ Chelsea

លោក Mauricio Pochettino បានអះអាងថា ការដណ្តើមបានជ័យជម្នះដ៏សំខាន់របស់ក្រុម Tottenham ក្នុងលទ្ធផល ១-០ នៅលើទឹកដីក្រុម Crystal Palace បានបង្ហាញថា ពួកគេត្រៀមលក្ខណៈរួចរាល់ក្នុងការដណ្តើមយកឱកាសភ្លាមៗ ប្រសិនបើក្រុម Chelsea ភ្លាត់ស្នៀតក្នុងការប្រជែងពាន។

ក្រុមរបស់លោក Pochettino បានកាត់បន្ថយគំលាតដេញតាមពីក្រោយក្រុមតោខៀវ Chelsea ឲ្យនៅត្រឹម៤ពិន្ទុ ខណៈនៅសល់៥ប្រកួតទៀត ក្រោយពីគ្រាប់បាល់ស៊ុតបញ្ចូលទីយ៉ាងល្អនៅជិតបញ្ចប់ការប្រកួតរបស់ខ្សែបម្រើ Christian Eriksen បានជួយឲ្យពួកគេដណ្តើមបានជ័យជម្នះដ៏សំខាន់នៅកីឡដ្ឋាន Selhurst Park កាលពីថ្ងៃពុធ។ ក្រុមមាន់ខ្នាយមាស Spurs ហាក់បានជួបការលំបាកក្នុងការបំភ្លេចការខកចិត្តរបស់ពួកគេពីការធ្លាក់ចេញពីយុទ្ធនាការដណ្តើមពាន FA Cup វគ្គពាក់កណ្តាលផ្តាច់ព្រ័ត្រ កាលពីសប្តាហ៍មុន ក្រោមស្នាដៃក្រុម Chelsea ខណៈដែល Tottenham ស្ទើរតែបានខ្ជះខ្ជាយឱកាសក្នុងការរក្សាការដាក់សម្ពាធលើ Chelsea ទៅហើយ នៅមុនពេលធ្វើការស្រោចស្រង់វិញ។ ក្រុម Tottenham ហាក់ដូចជាស្ថិតក្រោមសម្ពាធដូចកាលពីរដូវកាលមុនដែរ ដែលនៅពេលនោះពួកគេបានអនុញ្ញាតឲ្យក្រុម Leicester ឈ្នះពាន ក្រោយពីផ្តល់ការប្រជែងដល់ពួកគេក្នុងរយៈពេលដ៏ខ្លី។

ប៉ុន្តែ លោក Pochettino ជឿជាក់ថា ស្មារតីប្រយុទ្ធដែលក្រុមរបស់លោកបានបង្ហាញដើម្បីផ្តួលក្រុមឡើងទម្រង់លេង Crystal កំពុងតែធ្វើឲ្យពួកគេមានឱកាសជាច្រើនក្នុងការឈ្នះពានជាលើកទី១ បើគិតចាប់តាំងពីឆ្នាំ១៩៦១។ លោក Pochettino បានឲ្យដឹងថា៖ «យើងបានបង្ហាញពីស្មារតីអស្ចារ្យ ក្រោយពីការជួបសប្តាហ៍ដ៏ខកចិត្ត។ វាពិតជាសំខាន់ណាស់ក្នុងការបង្ហាញថា យើងមានការផ្តោតអារម្មណ៍ និងព្យាយាមដើម្បីប្រយុទ្ធ»។ គ្រូបង្វឹករូបនេះបានបន្ថែមទៀតថា៖ «យើងបានបង្ហាញថា យើងបានរៀនជាច្រើនពីការប្រកួតកាលពីរដូវកាលមុន។ នោះពិតជារឿងសំខាន់ណាស់»៕

ទស្សនាវីដេអូ Highlights៖

ប្រភពពី: Worldsoccertalk

April 27, 2017

សហព័ន្ធកីឡាទូកក្តោងកម្ពុជា ធ្វើការហាត់សមអត្តពលិក ត្រៀមខ្លួនចូលរួមស៊ីហ្គេមនៅម៉ាឡេស៊ី

ខណៈដែលព្រឹត្តិការណ៍ប្រកួតកីឡាអាស៊ីអាគ្នេយ៍ លើកទី២៩ (The 29th Sea Game) នៅប្រទេសម៉ាឡេស៊ី នាខែសីហា ដែលនឹងចាប់ផ្ដើមនាពេលឆាប់ៗខាងមុខនេះ សហព័ន្ធកីឡាទូកក្ដោង ជាបេក្ខភាពមួយ ដែលក្រសួងអប់រំយុវជន និង កីឡា និង គណៈកម្មាធិកាជាតិអូឡាំពិកកម្ពុជា បានផ្ដល់សិទ្ធិទៅចូលរួមនោះ បាននឹងកំពុងរៀបគម្រោងប្រជែងយកមេដាយ និងកំពុងធ្វើការហាត់សម នៅឆ្នេរសមុទ្រ ខេត្តកែបជាកន្លែងហ្វឹកហាត់ជាស្ដង់ដាអន្តរជាតិ។

ក្រោមកិច្ចសហប្រតិបត្តិការ និងគាំទ្រគ្នាទៅវិញទៅមក សហព័ន្ធកីឡាទូកក្តោងកម្ពុជា បានសម្រេចជ្រើសរើសយកក្លឹបទូកក្តោងកែប ធ្វើជាមូលដ្ឋានហ្វឹកហាត់មួយ ដើម្បីហ្វឹកហាត់បច្ចេកទេសទូកក្តោង ក្នុងការត្រៀមចូលរួមការប្រកួតកីឡាអាស៊ីអាគ្នេយ៍ លើកទី២៩ (The 29th Sea Game) ដែលនឹងប្រព្រឹត្តនៅប្រទេសម៉ាឡេស៊ី និងធ្វើការហ្វឹកហាត់ ដើម្បីត្រៀមចូលរួមសម្តែងអបអរសាទរ ក្នុងពិធីបុណ្យ សមុទ្រលើកទី៦ ដែលនឹងរៀបចំនៅខេត្តកែប នាពេលខាងមុខនេះ ពិសេសដំណើរឆ្ពោះទៅរកការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ ដែលប្រទេសកម្ពុជានឹងធ្វើជាម្ចាស់ផ្ទះ។

ប្រធានសហព័ន្ធ កីឡាទូកក្តោងកម្ពុជា លោក ថោង រដ្ឋាស័ក បានឱ្យដឹងថា៖ សហព័ន្ធកីឡាទូកក្តោងកម្ពុជា និងក្លឹបទូកក្តោងកែប មានចក្ខុវិស័យរួម គឺណែនាំ តម្រង់ទិស ជំរុញលើកទឹកចិត្តដល់ក្មេងៗ និងយុវជន កម្ពុជា ឱ្យមានចិត្តស្រលាញ់កីឡាទូកក្តោង ដើម្បីប្រមូលផ្តុំកីឡាករទូកក្តោង និងចម្រាញ់យកកីឡាករឆ្នើម ដែលអាចតំណាងឱ្យកម្ពុជា ដើម្បីចូលរួមការប្រកួតក្នុងឆាកជាតិ និងអន្តរជាតិ។

លោកបន្តថា ក្លឹបទូកក្តោងកែប មានទីតាំងស្ថិតនៅក្នុងខេត្តកែប ដែលមានឆ្នេរសមុទ្រមួយដ៏ស្រស់ស្អាត ហើយក្លឹបនេះ មិនត្រឹមតែ ជាកន្លែងបម្រើសេវាកីឡាលើទឹកដ៏សម្បូរបែបនោះទេ វាក៏ជាផលិតផលទេសចរណ៍ថ្មី ដ៏មានសក្តានុពលទាក់ទាញរបស់ Knai Bang Chatt Resort ផងដែរ។

ប្រធានសហព័ន្ធរូបនេះ ជឿជាក់ថា ផ្អែកលើលក្ខណៈអំណោយផលនៃទីតាំង និងភាពសំបូរបែបនៃសេវាកីឡាលើទឹកនេះ ក្លឹបទូកក្តោងកែបនឹងក្លាយជាគោលដៅកីឡាទេសចរណ៍ថ្មីមួយ ដ៏ពេញនិយម ប្រកបដោយភាពទាក់ទាញ សមស្របនិងការប្រសិទ្ធនាម ថាជា «តារារះនៅទិសនិរតី» ដែលបានផ្តល់ឱ្យដោយក្លឹបឆ្នេរសមុទ្រស្អាតបំផុតលើលោក៕

April 27, 2017

រដ្ឋមន្ត្រីក្រសួងអប់រំ ប្រកាសលើកពេលប្រកួតកីឡាសិស្សបឋមសិក្សាជើងឯកទូទាំងប្រទេស

កាលពីល្ងាចម្សិលមិញនេះ ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា បានចេញលិខិតពន្យាពេលការប្រកួតកីឡា សិស្សបឋមសិក្សា ជ្រើសរើសជើងឯក ទូទាំងប្រទេស ឆ្នាំ២០១៦-២០១៧ ដោយមិនទាន់កំណត់ កាលបរិច្ឆេទថ្មីនោះទេ ។

លិខិតសុំលើកពេលប្រកួតនេះ មានដូចខាងក្រោម៖

April 26, 2017

អ្នកប្រដាល់កម្ពុជា-ថៃ ៨រូប នឹងប្រជែងគ្នាដណ្ដើមខែក្រវ៉ាត់ និងលុយ ៥០០០ដុល្លារ នៅចុងសប្ដា៍នេះ

អ្នកប្រដាល់កម្ពុជា ៤រូប និង អ្នកបរដាល់ថៃ ៤រូប នឹងប្រជែងយកពិន្ទុ ក្នុងវគ្គជម្រុះ ដើម្បីបានសិទ្ធទៅប្រកួតនៅវគ្គផ្ដាច់ព្រ័ត្រ នៃព្រឹត្តិកាណ៍ ប្រដាល់ដណ្ដើមខ្សែក្រវាត់ខារ៉ាបាវ ដែលមានទឹកប្រាក់រហូតទៅដល់៥ នូវរជ្ជកាល ថ្មីមួយទៀតដោយធ្វើក្នុង៥០០០ដុល្លារ ក្នុងប្រភេទទម្ងន់ ៦៣,៥០គីឡូក្រាម នាថ្ងៃសៅចុងសប្ដាហ៍នេះ។

អគ្គនាយករងកីឡានៃក្រសួងអប់រំយុវជន និង កីឡាលោក ម៉ិល កាដូ បានចាត់ទុកថា៖ ព្រឹត្តិការណ៍បែបនេះគឺ ជាឱកាសមួយសម្រាប់អ្នកប្រដាល់កម្ពុជាបានដុសខាត់នូវបច្ចេកទេសរបស់ខ្លួនក្នុងខណៈដែលកម្ពុជាបានសម្រេចចិត្តបញ្ជូនអ្នកប្រដាល់គុនខ្មែរទៅ ចូលរួមប្រកួតក្នុង ព្រឹត្តិការណ៍ស៊ីហ្គេមនាឆ្នាំ២០១៧នេះ ។

ប្រធានសហព័ន្ធប្រដាល់គុន ខ្មែរលោកឧត្តមសេនីយ៍ឯកតែម ម៉ឺន បានព្រមានថា៖ ត្រូវតែវ៉ៃឲ្យអស់ ពីសមត្ថ ភាព ព្រោះ ប្រាក់រង្វាន់ ៥០០០ដុល្លារអាចនឹងផ្លាស់ប្ដូរជីវភាពបាន ។ លោកបានធ្វើការកត់សម្គាល់ដែរ ថា កម្ពុជា មានសមត្ថភាពខ្ពស់តែកម្លាំងអន់ជាងគេ ។ លោកសំណូមពរឲ្យអ្នកប្រដាល់ កម្ពុជាខិតខំហ្វឹកហាត់ កម្លាំង បន្ថែមព្រោះបច្ចេកទេសល្អហើយ ។

សម្រាប់កីឡាករ៤ រូបកម្ពុជារួមមាន៖ ង៉ែត្រ រដ្ឋា ក្លិបតាព្រហ្មមានជ័យ រឿង សារ័ត្ន ក្លិបកងពលតូចឆ័ត្រយោង៩១១ រឿម វណ្ណៈ ក្លិបរាជសីហ៍ខេត្តបន្ទាយមានជ័យ និងមាស ច័ន្ទមាន សមាគមនកីឡាក្រសួងការពារជាតិ ចំណែកកីឡាករ៤រូបថៃរួមមាន៖ លូម លេង (Loom Leng) ផ្លាយ ណយ (Phlay Noy) ផេត ឆាយាក ភូមិ (Phet Chhayakphum) និង ប្រា វីដ(Pra Vit) ។

គួបញ្ជាក់ផងដែរថា អ្នកប្រដាល់ថៃទាំង ៤រូបនេះសុទ្ធតែធ្លាប់មកប្រកួត នៅស្រុកខ្មែរហើយតាម រយៈការ ប្រកួត កន្លងមកពួកគេ ហាក់ដូចជាមានសមត្ថភាពលើអ្នកប្រដាល់ខ្មែរ ។ លូម លេងធ្លាប់ទាត់ឌុម កែវដា ក្លិបម្កុដរាជ សីហ៍ ឲ្យសន្លប់ នៅទឹកទី ២ ។ ប្រា វីតធ្លាប់ទាត់រឿម វណ្ណៈឲ្យសន្លប់មុនស្នូរជួងបញ្ចប់ទឹកទី ១ ។ ផ្លាយ ណយ និង ផេត ឆាយាក ភូមិក៏សុទ្ធតែជាអ្នកប្រដាល់ជើងខ្លាំងទាំងអស់ ។

April 26, 2017

Author: ពេជ្រ តារាវុទ្ធ