ពេជ្រ តារាវុទ្ធ - La Reine Media

McGregor ស្ថិតក្រោមការស៊ើបអង្កេតលើករណីបំពានផ្លូវភេទ

តារាឆ្នើមក្បាច់គុនចម្រុះ Conor McGregor កំពុងតែស្ថិតក្រោមការស៊ើបអង្កេតក្នុងប្រទេសកំណើតរបស់គេគឺ អៀរឡង់ លើការចោទប្រកាន់ទាក់ទងនឹងករណីបំពានផ្លូវភេទ។ នេះបើយោងទៅតាមការចេញផ្សាយរបស់កាសែត New York Times កាលពីថ្ងៃអង្គារ។

ព័ត៌មាននេះ ដែលកាសែត New York Times បានបង្ហើបពីប្រភពសុំមិនបញ្ចេញឈ្មោះម្នាក់ ក្នុងរយៈពេល1ថ្ងៃ ក្រោយពីតារាឆ្នើមរបស់អង្គភាពរៀបចំការប្រកួតក្បាច់គុណចម្រុះ Ultimate Fighting Championship រូបនេះ បានសរសេរនៅលើបណ្តាញសង្គម Twitter ថា រូបគេបានសម្រេចចិត្តចូលនិវត្តន៍ពីអាជីពរបស់គេក្នុងសង្វៀនដាក់ទ្រុង។
McGregor បានសរសេរថា៖ «ហេ អ្នកទាំងអស់គ្នា សូមស្តាប់សេចក្តីប្រកាសភ្លាមៗក្នុងពេលនេះ ដោយខ្ញុំបានសម្រេចចិត្តក្នុងការចូលនិវត្តន៍ពីកីឡាក្បាច់គុណចម្រុះជាផ្លូវការនៅថ្ងៃនេះ»។

កាសែត New York Times បានបញ្ជាក់ថា Conor McGregor មិនត្រូវបានចោទប្រកាន់ពីបទឧក្រិដ្ឋឡើយ ហើយថា ការស៊ើបអង្កេតកំពុងតែបន្ត ដែលមិនមែនមានន័យថាគាត់មានកំហុសលើករណីឧក្រិដ្ឋកម្មនោះទេ។ ប៉ុន្តែកាសែតដដែលបានចេញផ្សាយថា រូបគេត្រូវបានចោទសួរដោយអាជ្ញាធរកាលពីខែមករា ក្រោយពីស្ត្រីម្នាក់បានចោទប្រកាន់ថា រូបគេបានបំពានផ្លូវភេទកាលពីខែធ្នូ។ បើយោងទៅតាម New York Times ស្ត្រីដែលបានចោទប្រកាន់នោះ បានបញ្ជាក់ថា ករណីបំពានផ្លូវភេទបានកើតឡើងនៅសណ្ឋាគារ Beacon ដែលពេលនោះ McGregor ចូលទៅក្នុងនាមជាភ្ញៀវ៕

March 27, 2019

ដំណឹងល្អ! ស្ពានជ្រោយចង្វារចាស់ នឹងសម្ពោធឱ្យប្រើប្រាស់នៅថ្ងៃទី03 មេសាខាងមុខនេះហើយ

ស្ពានមិត្តភាពកម្ពុជា-ជប៉ុន ឬប្រជាជនគ្រប់គ្នាហៅថាជាស្ពានជ្រោយចង្វារចាស់ នឹងបើកឱ្យដំណើរការចាប់ពីថ្ងៃទី 03 ខែមេសា ឆ្នាំ2019 ខាងមុខ។

ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានបញ្ជាក់ថា នៅថ្ងៃទី 03 ខែមេសា ឆ្នាំ2019 ជាកាលបរិច្ឆេទ បើកដំណើរការឡើងវិញនូវស្ពានមិត្តភាពកម្ពុជា-ជប៉ុន (ជ្រោយចង្វាទី1) ក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី ននៃព្រះរាជាណាចក្រកម្ពុជា។ ការស្តារទ្បើងវិញស្ពានជ្រោយចង្វាចាស់ គឺជាការឆ្លើយតបទៅនឹងសំណើសុំបន្ទាន់របស់រាជរដ្ឋាភិបាលកម្ពុជា ទៅកាន់រដ្ឋាភិបាលជប៉ុន ព្រោះ ស្ពាននេះមានសភាពទ្រុឌទ្រោមខ្លាំង និងមិនមានសុវត្ថិភាពសម្រាប់ការដឹកជញ្ជូនសាធារណៈឆ្លងកាត់ទន្លេ។

ឯកឧត្តមបានបន្តទៀតថា ស្ពាននេះមានប្រវែង971មែត្រ ទទឹង13ម៉ែត្រ ស្ថិតនៅតាមបណ្តោយផ្លូវជាតិលេខ6Aក្នុងភូមិសាស្ត្រទឹកដីរាជធានីភ្នំពេញ ត្រូវបានសាងសង់ និងសម្ភោធឱ្យប្រើប្រាស់ក្នុងឆ្នាំ1963 ក្រោមហិរញ្ញប្បទានឥត សំណងរបស់ប្រទេសជប៉ុន។ ស្ពាននេះត្រូវបានខូចខាតដោយសង្គ្រាមស៊ីវិលនៅកម្ពុជា និងត្រូវបានសាងសង់ឡើងវិញនៅឆ្នាំ1992 ដោយប្រទេសជប៉ុន ហើយត្រូវបានប្តូរឈ្មោះទៅជាស្ពានមិត្តភាពកម្ពុជា-ជប៉ុន ដោយព្រះមហាវិរក្សត្រសម្ដេចព្រះបាទព្រះបរមរតនកោដ្ឋ នរោត្ដម សីហនុ។ ដោយសារស្ពាននេះមានអាយុកាលដ៏ចំណាស់ ហើយស្របពេលកំណើនសេដ្ឋកិច្ច និងលំហូរចរាចរណ៍កើនឡើងជាលំដាប់ មិត្តភាពកម្ពុជា-ជប៉ុនតម្រូវឱ្យមានការជួសជុលឡើងវិញជាបន្ទាន់ ដោយចំណាយថវិកាអស់ប្រមាណ 30លានដុល្លារអាមេរិក ក្រោមជំនួយហិរញ្ញប្បទានឥតសំណងរបស់រដ្ឋាភិបាលជប៉ុន ដែលបានចាប់ផ្តើមបើកការដ្ឋានសាងសង់នៅថ្ងៃទី15ខែកញ្ញា ឆ្នាំ2017 និងគម្រោងបញ្ចប់នៅថ្ងៃទី14 ខែមិថុនា ឆ្នាំ2019។
គិតរហូតមកដល់ពេលនេះ ការងារស្តារ និងជួសជុលស្ពាននេះឡើងវិញសម្រេចបាន 100ភាគរយហើយ និងគ្រោងបើកឱ្យដំណើរការនៅ 03 ខែមេសា ឆ្នាំ2019 ដើម្បីសម្រួលដល់ការឆ្លងកាត់របស់ប្រជាជននៅឱកាសបុណ្យចូលឆ្នាំខ្មែរ៕

March 27, 2019

ស្ងាត់ៗXiaomi បង្ហាញបច្ចេកវិទ្យាថ្មីឈ្មោះ Super Charge Turbo សាក17នាទីបាន 100%

បច្ចុប្បន្នបច្ចេកវិទ្យា SuperVOOC របស់ក្រុមហ៊ុន Oppo ត្រូវបានរាប់បញ្ចូលថាអាចសាកថ្មស្មាតហ្វូនបានរហ័សបំផុតជាមួយកម្លាំង 10V/5A ប៉ុន្តែថ្មីៗនេះក៏ត្រូវបានក្រុមហ៊ុនគូប្រជែងក្នុងស្រុក Xiaomi បង្ហាញនូវបច្ចេកវិទ្យាថ្មីមួយឈ្មោះ Super Charge Turbo ដើម្បីធ្វើការប្រកួតប្រជែងក្នុងទីផ្សារស្មាតហ្វូន។

តាមការផ្សាយរបស់គេហទំព័រ Weibo បានបញ្ជាក់ថាបច្ចេកវិទ្យានោះប្រើប្រាស់ដុំសាកកម្លាំង 100វ៉ាត់ ប្រភេទ 20V/5A យកឈ្នះលើដុំសាកកម្លាំង 50វ៉ាត់របស់ Oppoបាន។

តាមការធ្វើតេស្តប្រៀបធៀបដោយផ្ទាល់ Xiaomi ប្រើពេលត្រឹម 17នាទី ប៉ុណ្ណោះដើម្បីសាកឡើងពី ០ ដល់ 100ភាគរយ ខណៈក្នុងថេរវេលាដដែលដុំសាក Oppo អាចបញ្ចូលថ្មត្រឹមតែ 65ភាគរយប៉ុណ្ណោះ។

បច្ចេកវិទ្យា Super Charge Turbo ធ្វើបានរហ័សជាង ទាំងជាមួយការសាកល្បងលើស្មាតហ្វូនមានថាមពលថ្ម 4,000mAh ខណៈ SuperVOOC ដំណើរការតេស្តលើឧបករណ៍មានថ្ម 3,700mAh។ ជាងនេះបើយើងធៀបនឹង Super Charge របស់ Huawei កម្លាំង 55វ៉ាត់ លើ Mate X ទាមទារថេរវេលាដល់ទៅ 35នាទីឯណោះ៕

សូមទស្សនាវីដេអូខាងក្រោម៖

March 26, 2019

Samsung ចេញទូរស័ព្ទ A70 មួយទៀតតម្លៃសមរម្យ កាមេរ៉ាមុខទំហំ 32MP

ក្រុមហ៊ុន Samsung បានបន្តចេញផ្សាយនូវត្រកូល A មួយម៉ូឌែលទៀត គឺ Galaxy A70 ដែលមានការវិវដ្ដអេក្រង់កាន់តែធំរហូតដល់ 6.7អ៊ីញ ប្រភេទ Super AMOLED ជារចនាប័ទ្មអេក្រង់ Infinity-U បង្កប់កាមេរ៉ាមុខទំហំ 32MP។

កាមេរ៉ា 3 គ្រាប់ខាងក្រោយដោយមួយទំហំ 32MP មាន Aperture f/1.7 ខណៈគ្រាប់ទីពីរមានទំហំ 8MP ប្រភេទ Ultra-Wide Angle (123 ដឺក្រេ) និងគ្រាប់ទីបីប្រភេទ Depth Sensor ទំហំ 5MP។ ទូរស័ព្ទដៃប្រភេទនេះមានមុខងារប្រព័ន្ធសុវត្ថិភាពពីរ រួមមានជម្រើសស្កេនខ្ចៅដៃលើអេក្រង់ ឬស្កេនមុខដោះសោ។

A70 មានថាមពលថ្មធំដល់ 4,500mAh គាំទ្រមុខងារសាកថ្មរហ័សកម្លាំង 25 វ៉ាត់ ដែលធំជាងត្រកូល Galaxy ដទៃៗទៀត ពោលដូចជា Galaxy S10 5G ត្រឹម 18វ៉ាត់តែប៉ុណ្ណោះ។ ប៉ុន្តែទូរស័ព្ទកម្រិតមធ្យម អត់មានគាំទ្រប្រព័ន្ធសាកថ្មឥតខ្សែ Wireless Charging ឡើយ។

ស្ថិតក្នុងជម្រើស RAM 6GB ឬ 8GB អមដោយអង្គផ្ទុក (memory) ក្នុងម៉ាស៊ីនទំហំ 12GB អាចបន្ថែម microSD Card ដល់ទំហំ 512GB នៅអមនឹងប្រអប់ស៊ីមកាតចំនួនពីរ។

អេក្រង់ 6.7 អ៊ីញអាចមើលទៅធំពេក ប៉ុន្តែក្រុមហ៊ុន Samsung បានរចនាតួខ្លួនជារាងទ្រវែងដែលមានបណ្តោយ 76.7 មីលីម៉ែត្រ ពោលគឺកាន់ពេញដៃសមល្មម ឬអាចប្រើប្រាស់មុខងារដៃម្ខាង One Handed Navigation ក៏បាន។

ទូរស័ព្ទដៃ Samsung A70 មាន 4 ពណ៌គឺ Coral, Blue, Black និង White ប៉ុន្តែចំពោះតម្លៃ និងការចេញលក់លម្អិត ខាងក្រុមហ៊ុនសុំលាក់សិន ដោយអាចនឹងបញ្ជាក់បន្ថែមនាថ្ងៃទី10 មេសាខាងមុខ៕

March 26, 2019

Sterling អំពាវនាវឱ្យព្យួរកីឡដ្ឋាន ក្រោយមានការរើសអើង ក្នុងពេលអង់គ្លេស ផ្តួល ម៉ុងតេណេហ្គ្រោ

ខ្សែប្រយុទ្ធ Raheem Sterling ជឿជាក់ថា សហព័ន្ធកីឡាបាល់ទាត់ទ្វីបអឺរ៉ុបហៅកាត់ថា UEFA គួរតែដាក់ទណ្ឌកម្ម លើការច្រៀងចម្រៀងបែបរើសអើង ទៅកាន់កីឡាកររបស់ក្រុមជម្រើសជាតិអង់គ្លេស ក្នុងពេលក្រុមខ្លួនបានយកឈ្នះក្នុងលទ្ធផល 5-1 កាលពីថ្ងៃចន្ទ លើក្រុមជម្រើសជាតិម៉ុងតេណេហ្គ្រោ ក្នុងទីក្រុង Podgorica តាមរយៈការបិទកីឡដ្ឋាននៅទីក្រុង Podgorica។

តារាឆ្នើមរបស់ក្លិប Manchester City រូបនេះបានអបអរការរកបានគ្រាប់បាល់ទី5 របស់គេតាមរយៈការយកដៃបាំងត្រចៀករបស់គេ ឆ្ពោះទៅកាន់អ្នកគាំទ្រម្ចាស់ផ្ទះ នៅរាត្រីមួយដែលនៅពេលនោះការដណ្តើមបានជ័យជម្នះមួយផ្សេងទៀតក្នុងយុទ្ធនាការជម្រុះ Euro ឆ្នាំ2020 របស់ក្រុមអង់គ្លេស ត្រូវបានបាំងបិទដោយការរើសអើង។
Sterling បានប្រាប់ទូរទស្សន៍ Sky Sports ថា៖ «ខ្ញុំគ្រាន់តែចង់បង្ហាញឱ្យពួកគេឃើញថា អ្នកត្រូវការលទ្ធផលល្អប្រសើរជាងនេះ ក្នុងការធ្វើឱ្យយើងខកចិត្ត និងបញ្ឈប់យើង។ ពេលនេះឆ្នាំ2019ហើយ ខ្ញុំនៅតែរក្សាការនិយាយបែបនេះ។ វាជារឿងអាម៉ាស់មួយក្នុងការឃើញសកម្មភាពបែបនេះបន្តកើតឡើង ហើយយើងត្រឹមតែអាចដឹងពីស្ថានភាពនេះ»។
ស្របពេលជាមួយគ្នានេះ Gareth Southgate អ្នកចាត់ការទូទៅរបស់ក្រុមជម្រើសជាតិអង់គ្លេស បាននិយាយថា លោកបានឮការស្រែកច្រៀងការរើសអើងជាតិសាសន៍ ដោយមានបំណងទៅលើ Danny Rose។ លោក Southgate បានឱ្យដឹងថា៖ «ខ្ញុំពិតជាបានឮពីការរើសអើងទៅលើ Danny Rose នៅពេលដែលរូបគេបានរងពិន័យកាតលឿងក្នុងពេលជិតបញ្ចប់ការប្រកួត។ វាពិតជាគ្មានការសង្ស័យក្នុងចិត្តខ្ញុំឡើយដែលបញ្ហានោះបានកើតឡើង។ យើងនឹងធ្វើឱ្យប្រាកដថា បញ្ហានោះនឹងត្រូវរាយការណ៍ទៅកាន់ UEFA ដោយសារតែវាមិនអាចទទួលយកបានឡើយ»។ បច្ចុប្បន្ន ក្រុមជម្រើសជាតិអង់គ្លេស បានឈរយ៉ាងរឹងមាំនៅលើកំពូលតារាងនៃពូល A ដោយមាន6ពិន្ទុ និងគ្រាប់បាល់ស៊ុតបញ្ចូលទី10គ្រាប់ ពីការប្រកួតបើកឆាក2លើកដំបូងរបស់ពួកគេ៕

March 26, 2019

ព័ត៌មានច្បាស់ការ ស្អែកនេះផ្លូវល្បឿនលឿនភ្នំពេញ-ព្រះសីហនុ នឹងបើកការដ្ឋានសាងសង់ជាផ្លូវការហើយ

ក្រោយពេលឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានពិនិត្យទីតាំងត្រៀមរៀបចំសម្ពោធបើកការដ្ឋានផ្លូវល្បឿនលឿន ភ្នំពេញ-ព្រះសីហនុ ក្រសួងបានប្រកាសថានឹងបើកការដ្ឋានសាងសង់នៅថ្ងៃទី 22 ខែមីនា ឆ្នាំ 2019 ខាងមុខនេះ។

ទីតាំងនៃពិធីសម្ពោធដែលមានការចូលរួមពីសម្តេចតេជោ ហ៊ុន សែន នាយករដ្ឋមន្ត្រី គឺស្ថិតនៅឃុំវល្លិ៍ស ស្រុកសំរោងទង ខេត្តកំពង់ស្ពឺ ចន្លោះគីឡូម៉ែត្រលេខ 39 ផ្លូវជាតិលេខ4។

បើតាមការបញ្ជាក់ពីមន្ត្រីជំនាញបានឱ្យដឹងថា ផ្លូវល្បឿនលឿនភ្នំពេញ-ព្រះសីហនុ មានប្រវែង 190.36គីឡូម៉ែត្រ ចំណាយថវិកាអស់ប្រមាណ 1900លានដុល្លារ ដែលសាងសង់ដោយក្រុមហ៊ុនចិន ក្រោមរូបភាពវិនិយោគសាងសង់-ធ្វើអាជីវកម្ម-ផ្ទេរ (BOT)។ គម្រោងផ្លូវល្បឿនលឿននេះនឹងត្រូវ ឆ្លងកាត់ រាជធានី ខេត្តចំនួន4 គឺមាន រាជធានីភ្នំពេញ ខេត្តកណ្តាល ខេត្តកំពង់ស្ពឺ និង ខេត្តព្រះសីហនុ ក្នុងនោះគឺឆ្លងកាត់ 6ស្រុក 1ខណ្ឌ 2ក្រុង 31ឃុំ/សង្កាត់ និង 110ភូមិ។ ផ្លូវល្បឿនលឿននេះ ក្រាលបេតុងកៅស៊ូ AC មានប្រវែងសរុបជាង 190គីឡូម៉ែត្រ (គិតរួមទាំងស្ពាន និងលូទាំងអស់) ហើយមានទទឹងសរុប 24.5 ក្នុងនោះមានគន្លងផ្លូវរថយន្ត (2×3.75ម៉ែត្រ) សងខាង ជាយផ្លូវកៅស៊ូ2 (2×2.5ម៉ែត្រ) សម្រាប់ម៉ូតូ ជាយផ្លូវដីក្រហម 2(2×0.75) សម្រាប់ថ្មើរជើង និងសួននៅអ័ក្សកណ្តាលទ្រូងផ្លូវ 3ម៉ែត្រ ព្រមទាំងមានស្ពាន 89កន្លែង។ នៅលើផ្លូវល្បឿនលឿននេះ មានកន្លែងឈប់សម្រាកចំនួន4កន្លែង និង ស្ថានីយប្រេងឥន្ធនៈ 3កន្លែង ហើយក៏មានរបងអមសងខាងផ្លូវនោះដើម្បីការពារសត្វពាហនៈឆ្លងកាត់ផងដែរ ៕

March 21, 2019

កូនខ្មែរកុំឱ្យចាញ់បរទេស! ត្រៀមឡានទៅខេត្តសៀមរាបមើលព្រះអាទិត្យរះចំកណ្តាលកំពូលអង្គរវត្តនៅថ្ងៃទី21ខាងមុខនេះ

ជាមោទនភាពមួយដែលយើងបានរស់នៅក្នុងប្រទេសដែលមានប្រាសាទអង្គរវត្ត ជាសំណង់ស្ថាបត្យកម្មបុរាណល្អបំផុតលើពិភពលោកចេញដោយ Trip Advisor កាលពីឆ្នាំ 2018 ហើយសំណង់ដ៏អស្ចារ្យនេះក៏ជាសំណង់ប្រកបដោយភាពអាថ៌កំបាំង និងចំណុចពិសេសជាច្រើន។

ជារៀងរាល់ឆ្នាំ នៅ ខែមីនា និងខែកញ្ញា ប្រជាជននៅលើពិភពលោកតែងតែសម្រុកមកប្រទេសកម្ពុជាដើម្បីបានឃើញនូវទស្សនីយភាពអស្ចារ្យដែលព្រះអាទិត្យរះចំកណ្តាលកំពូលប្រាសាទអង្គរវត្ត ដែលបានកសាងតាំងពីរាប់ពាន់ឆ្នាំមុន។ ក្នុងនោះប្រជាជនខ្មែរមិនតិចទេ ដែលបានចូលរួមឃើញទស្សនីយភាពដ៏អស្ចារ្យនេះ ខណៈពេលដែលប្រជាជនខ្មែរកូនចៅអ្នកកសាងអង្គរវត្តជាច្រើនទៀតមិនទាន់បានឃើញផ្ទាល់ផ្នែកម្តងនៅឡើយ។

នៅពេលថ្មីៗនេះអ្នកនាំពាក្យអាជ្ញាធរអប្សរាលោក ឡុង កុសល បានបញ្ជាក់ថា ចាប់ពីម៉ោង 5:50នាទីព្រឹកដល់ម៉ោង 7ព្រឹក នៅថ្ងៃទី 21 ខែមីនា ឆ្នាំ2019 នេះបើយោងតាមការសិក្សាស្រាវជ្រាវរបស់មជ្ឈមណ្ឌលស្រាវជ្រាវ និងតម្កល់ឯកសារអង្គរនៃអាជ្ញាធរអប្សរាបានឱ្យដឹងថា ព្រះអាទិត្យនឹងរះចំកណ្តាលប្រាសាទអង្គរវត្ត។ បាតុភូតនេះគេហៅថា សមរាត្រី (equinox) គឺជាពេលវេលាដែលថ្ងៃ និងយប់មានរយៈពេលស្ទើរតែស្មើគ្នា។ ក្រៅពីខែនេះខែខ្លះមានរយៈពេលថ្ងៃវែងជាងយប់ ហើយខ្លះទៀតមានរយៈពេលយប់វែងជាថ្ងៃ។ ចំពោះប្រាសាទអង្គរវត្តវិញ នៅពេលដែលពេលថ្ងៃ និងយប់មានរយៈពេលស្មើគ្នាព្រះអាទិត្យនឹងរះចំកំពូលកណ្តាលនៃប្រាសាទអង្គរវត្តតែម្តង។

លោក កុសល បានបន្ថែមទៀតថា ជារៀងរាល់ឆ្នាំព្រឹត្តិការណ៍សមរាត្រីនេះ តែងតែកើតមាន2ដងក្នុងមួយឆ្នាំគឺនៅរដូវប្រាំង(Vernal Equinox) កើតឡើងនៅខែមីនា និងរដូវវស្សា (Autumnal Equinox) កើតឡើងនៅខែកញ្ញា។ លោកបានបញ្ជាក់ថាផងដែរថា ប្រាសាទអង្គរវត្តគឺជាស្ថាបត្យកម្មដែលបានសាងសង់ឡើងដោយបានសិក្សាគន់គូរយ៉ាងល្អិតល្អន់ របស់អ្នកប្រាជ្ញបណ្ឌិតសម័យអង្គររួមផ្សំគ្នារវាងទ្រឹះស្តីគណិតសាស្រ្ត វិស្វកម្ម និងតារាសាស្រ្ត៕

March 19, 2019

ដើមខែក្រោយ ថ្លៃប្រមូលសំរាមនៅរាជធានីភ្នំពេញនឹងឡើងថ្លៃ ក្នុងនោះផ្ទះល្វែងក្នុងបុរីត្រូវបង់ 10,900រៀលក្នុង 1ខែ

រដ្ឋបាលរាជធានីភ្នំពេញ បានចេញសេចក្តីជូនដំណឹងថ្មីមួយស្តីពីកម្រៃសេវាថ្មីនៃការគ្រប់គ្រងសំរាម និងកាកសំណល់រឹងក្នុងទីប្រជុំជននៅរាជធានីភ្នំពេញ ដែលចុះហត្ថលេខាដោយឯកឧត្តមអភិបាលរាជធានីកាលពីថ្ងៃទី26 ខែកុម្ភៈ ឆ្នាំ2019។

នៅក្នុងសេចក្តីប្រកាសនេះបានបញ្ចាក់ថា ចាប់ពីថ្ងៃទី1 ខែមេសា ឆ្នាំ2019 ខាងមុខនេះតទៅ មានការកំណត់តម្លៃសេវាគ្រប់គ្រងសំរាម និងកាកសំណល់រឹងនៅក្នុងទីក្រុងភ្នំពេញតាមតារាងថ្មី ដែលក្នុងនោះសម្រាប់លំនៅឋានធម្មតា ផ្ទះល្វែងជាន់ផ្ទាល់ដី ក្នុង1ខែត្រូវបង់ប្រាក់ចំនួន 9,000រៀល ហើយចំពោះលំនៅឋានក្នុងបុរី ឬទីក្រុងរណបជាប្រភេទផ្ទះល្វែងត្រូវបង់ 10,900រៀល ចំណែកឯផ្ទះវីឡាភ្លោះត្រូវបង់ 25,000រៀលក្នុង 1ខែ។ ក្រៅពីនេះសាលារាជធានីក៏បានបង្ហាញតម្លៃសម្រាប់ម្ចាស់ទីតាំងផ្សេងទៀត ដូចជាប្រភេទផ្ទះជួលឱ្យកម្មករ ផ្ទះអាជីវកម្ម អាហារដ្ឋាន និងសណ្ឋាគារ ជាដើមដែលសុទ្ធតែមានការដំឡើងថ្លៃខ្ពស់ជាងតម្លៃចាស់ទាំងអស់។

បើតាមការប្រកាសរបស់សាលារាជធានីភ្នំពេញបានបញ្ជាក់ថា ការកំណត់តម្លៃថ្មីនេះ គឺព្រោះតែកំណើនផ្ទៃដី កំណើនសេដ្ឋកិច្ច និងកំណើនប្រជាពលរដ្ឋក្នុងរាជធានីភ្នំពេញ ដែលធ្វើឱ្យបរិមាណសំរាមក៏មានការកើនឡើងយ៉ាងខ្លាំង ដែលជាបញ្ហាប្រឈមចំពោះមុខមួយសម្រាប់រដ្ឋបាលរាជធានីភ្នំពេញដែលត្រូវធ្វើការគ្រប់គ្រងឱ្យបានត្រឹមត្រូវ ដោយក្នុងនោះតម្រូវឱ្យមានការពង្រីកបន្ថែមទៀតនូវការផ្តល់សេវាសម្អាត ប្រមូល ដឹកជញ្ជូន និងទុកដាក់ឱ្យបានល្អ។
ការប្រកាសពីការកំណត់តារាងថ្មីនេះគឺផ្អែកតាមប្រកាសអន្តរក្រសួង ក្រសួងបរិស្ថាន ក្រសួងសេដ្ឋកិច្ច និងហិរញ្ញវត្ថុ និងក្រសួងមហាផ្ទៃ លេខ195 ប្រកប.ស្ថ ចុះថ្ងៃទី6 ខែមិថុនា ឆ្នាំ2018 ស្តីពីការកំណត់កម្រៃអតិបរមានៃសេវាគ្រប់គ្រងសំរាម សំណល់រឹងទីប្រជុំជន៕

March 18, 2019

ជ្រើសរើសជំនាញខុស មិនត្រឹមតែផ្តល់ហានិភ័យដល់ខ្លួនឯងប៉ុណ្ណោះទេ តែអាចជះឥទ្ធិពលអវិជ្ជមានដល់សង្គមទៀតផង

ថ្វីដ្បិតតែការជ្រើសរើសអាជីពការងារជាផ្នែកមួយនៃជីវិតឯកជនរបស់មនុស្សម្នាក់ៗក៏ដោយ តែវាក៏អាចជះផលអវិជ្ជមានដល់សង្គមបានដែរ ព្រោះមនុស្សជាកោសិកាសំខាន់មិនអាចខ្វះបានរបស់សង្គមជាតិ។

លោក តែ ឡាយ ប្រធាននាយកដ្ឋានអប់រំនៃក្រុមហ៊ុន វេសឡាញ អេឌ្យូខេសិន គ្រុប បានលើកឡើងថា ការជ្រើសរើសជំនាញសិក្សាមានសារៈសំខាន់ខ្លាំងណាស់សម្រាប់យុវវ័យ និងសង្គម ព្រោះប្រសិនបើយើងជ្រើសរើសជំនាញមិនបានត្រឹមត្រូវនោះ យើងនឹងមិនអាចអភិវឌ្ឍសមត្ថភាពវិជ្ជាជីវៈបានល្អនោះទេ។ កត្តាទាំងអស់នេះ ធ្វើឱ្យនិស្សិតទាំងអស់នោះចេញពីសាលាមក មិនអាចបង្កើតផលិតភាពការងារបានល្អនៅក្នុងទីផ្សារការងារនោះទេ ដែលធ្វើឱ្យយើងត្រូវបាត់បង់ឱកាសក្នុងការប្រកួតប្រជែងជាមួយធនធានមនុស្សនៃប្រទេសក្នុងតំបន់ ជាពិសេសគឺក្នុងសតវត្សរ៍ទី21 ដែលពោរពេញដោយការប្រកួតប្រជែងខ្លាំងនេះ។

លោក តែ ឡាយ បានមានប្រសាសន៍ថា៖ «យុវជនបច្ចុប្បន្នមានសំណាងជាងយុវជនកាលពីមុន ដែលមិនមានវគ្គតម្រង់ទិសការងារ ឬណែនាំឱ្យជ្រើសរើសជំនាញសិក្សាត្រឹមត្រូវនោះទេ ដែលធ្វើឱ្យពួកគេប្រឈមនឹងបញ្ហាច្រើន»។

អ្នកអប់រំខាងលើបានលើកឡើងផងដែរថា ទោះជាយ៉ាងនេះក្តី ក៏យុវជនចាំបាច់ត្រូវការយកចិត្តទុកដាក់លើការស្វែងយល់ពីព័ត៌មានជាមូលដ្ឋានឱ្យបានច្បាស់លាស់ដើម្បីសម្រេចចិត្តត្រឹមត្រូវក្នុងការជ្រើសរើសអាជីពការងារ ព្រោះមនុស្សយើងម្នាក់ៗកើតមកមានឱកាសជោគជ័យតែ 50% ប៉ុណ្ណោះពីទេពកោសល្យផ្ទាល់ខ្លួន ក្រៅពីនេះ 50% ទៀត គឺកើតចេញពីការបណ្តុះបណ្តាលក្នុងសាលារៀន គ្រួសារ និងសង្គម។ ហេតុនេះហើយទើបសាលារៀនវេសឡាញន៍បានរៀបចំកម្មវិធីតម្រង់ទិសអាជីពការងារ ដើម្បីជួយសិស្សឱ្យបានយល់ពីវិធីសាស្រ្តក្នុងការជ្រើសរើសជំនាញ សំដៅធ្វើយ៉ាងណាឱ្យពួកគេជ្រើសរើសជំនាញត្រូវសម្រាប់សិក្សា។ ការជ្រើសរើសជំនាញត្រូវ ធ្វើឱ្យសិស្សចំណេញពេលវេលាច្រើនសម្រាប់ការអភិវឌ្ឍទាំងអាជីពការងារ ក៏ដូចជាអាជីវកម្មដែលពួកគេនឹងចាប់យកនៅថ្ងៃអនាគត។

ទន្ទឹមនឹងនេះដែរ លោក អាំង ភារៈ ប្រធានមជ្ឈមណ្ឌលការងាររាជធានីភ្នំពេញ នៃទីភ្នាក់ងារជាតិ និងមុខរបររបស់ក្រសួងការងារ និងបណ្តុះបណ្ដាលវិជ្ជាជីវៈ បានលើកឡើងថា មនុស្សម្នាក់ៗពេលខ្លះត្រូវចំណាយពេលវេលាច្រើនណាស់ដើម្បីស្វែងរកខ្លួនឯងឱ្យឃើញ។ មានមនុស្សខ្លះនៅប្រទេសអភិវឌ្ឍន៍ដូចជាជប៉ុនជាដើម ទាល់តែអាយុជាង 40ឆ្នាំហើយទើបរកខ្លួនឯងឃើញ និងងាកមកចាប់អាជីពដែលខ្លួនស្រឡាញ់វិញ។ ហេតុនេះការស្វែងយល់ពីជំនាញសំខាន់ខ្លាំងណាស់ក្នុងការរស់នៅ បើជ្រើសរើសខុស អនាគតនឹងមានបញ្ហា តែបើជ្រើសរើសត្រូវយើងនឹងក្លាយជាអ្នកជំនាញដ៏ខ្លាំងសម្រាប់សង្គម។
លោក អាំង ភារៈ បាននិយាយថា៖ «ដើម្បីស្គាល់ខ្លួនឯងឱ្យច្បាស់ យើងអាចសាកល្បងដោយវិធីជាច្រើន ដូចជាការធ្វើតេស្តសាកល្បងតាមកម្រងសំណួរដែលបង្កើតឡើងដោយទីភ្នាក់ងារជាតិមុខរបរ និងការងារ ការសាកល្បងធ្វើតេស្តតាមបណ្តាញបច្ចេកវិទ្យា ឬការសង្កេតឱ្យបានល្អិតល្អន់ពីខ្លួនឯងដើម្បីយល់កាន់តែច្បាស់ថា យើងជាមនុស្សបែបណា និងស្រឡាញ់អ្វីខ្លះ? មុនពេលចាប់យកអាជីពការងារណាមួយ»៕

March 15, 2019

សូមប្រុងប្រយ័ត្ន! ក្រសួងប្រកាសថា អាកាសធាតុនឹងឡើងដល់ 40-42អង្សាC ហើយមានរន្ទះ និងខ្យល់កន្ត្រាក់នៅខែក្រោយ

ក្រសួងធនធានទឹក និងឧតុនិយមបានចេញសេចក្តីជូនដំណឹងនាពេលថ្មីៗនេះថា អាកាសធាតុក្នុងខែមេសា និងខែឧសភាខាងមុខនេះនឹងឡើងដល់ 40-42អង្សារសេ ពិសេសនៅតំបន់ទំនាបកណ្តាល ភាគពាយ័ព្យ និងតំបន់ខ្ពស់រាបភាគខាងជើង។

ក្រសួងធនធានធានទឹក បានបញ្ជាក់ថា យោងតាមការព្យាករឧតុនិយមអន្តរជាតិ តំបន់ និងឧតុនិយមកម្ពុជាយើងផ្ទាល់ និងបន្ទាប់ពីបានសង្កេតតាមដានលើស្ថានភាពសីតុណ្ហភាព នៅលើផ្ទៃសមុទ្រប៉ាស៊ីហ្វិកខាងលិច មហាសមុទ្រឥណ្ឌា និងកម្រិតសីតុណ្ហភាពនៅលើសមុទ្រចិនខាងត្បូង រួចមក ឃើញថា បញ្ហាដែលកម្ពុជានឹងជួបប្រទះគឺ បាតុភូត EI Nino នៅតែបន្តមានឥទ្ធិពលគ្របដណ្តប់លើផ្នែកជាច្រើននៃពិភពលោក និងតំបន់។ ចំពោះនៅកម្ពុជាយើង នៅក្នុងរដូវប្រាំង និងដើមរដូវវស្សាឆ្នាំ2019 នេះ នឹងបន្តឥទ្ធិពលបាតុភូត EI Nino នេះក្នុងកម្រិត 60% និង 40% ទៀត និងទទួលរងឥទ្ធិពលពីបាតុភូតអន្តរកាល។

បញ្ហាមួយផ្សេងទៀតដែលកម្ពុជានឹងជួបប្រទះគឺ រដូវប្រាំងនឹងបន្តអូសបន្លាយដល់ពាក់កណ្តាលខែឧសភា ដែលធ្វើឱ្យសីតុណ្ហភាពអតិបរមាមធ្យមមានកម្ពស់ខ្ពស់ជាងមធ្យម និងខ្ពស់ជាងឆ្នាំ2018។ ក្នុងក្របខ័ណ្ឌទូទាំងប្រទេស សីតុណ្ហភាពអតិបរមាមធ្យមក្នុងរង្វង់ប្រមាណ 36-38អង្សាសេ តែនៅក្នុងខែមេសា និងខែឧសភា ធាតុអាកាសនឹងមានសភាពក្តៅហួតហែងខ្លាំង ហើយនៅពេលខ្លះសីតុណ្ហភាពអតិបរមានឹងឡើងដល់ 40-42អង្សាសេ ពិសេសតំបន់ទំនាបកណ្តាលភាគពាយព្យ និងតំបន់ខ្ពង់រាបភាគខាងជើង។ ចំពោះភ្លៀងកក់ខែវិញ អាចមានតិច តែអាចមានបាតុភូតផ្គររន្ទះ និងខ្យល់កន្ត្រាក់កើតមានច្រើននៅក្នុងខែមេសា និងខែឧសភា។

ដោយមូលហេតុនេះហើយទើបក្រសួងស្ថាប័ន និងភាគីពាក់ព័ន្ធត្រូវចូលរួមថែរក្សាទឹកទុកសម្រាប់ប្រើប្រាស់ក្នុងជីវភាពប្រចាំថ្ងៃ និងសូមអំពាវនាវដល់សាធារណជន សូមបង្កើនការយកចិត្តទុកដាក់ខ្ពស់ចំពោះបាតុភូតរន្ទះ និងខ្យល់កន្ត្រាក់។

March 15, 2019

Author: ពេជ្រ តារាវុទ្ធ