Author: សឿន សំណាង

ដើម្បីអាចចេញរកស៊ីបានដោយខ្លួនឯង និងបានដោយរលូន អ្នកប្រាកដជាត្រូវបំពេញកិច្ចការងារជាច្រើន ចាប់ពីរូបសម្បត្តិខាងក្រៅ រហូតដល់ចំណេះ ជំនាញ និងបទពិសោធ។ល។

ខាងក្រោមនេះ គឺជាលក្ខខណ្ឌសំខាន់ៗមួយចំនួនដែលអ្នកត្រូវបំពេញ មុននឹងឈានជើងចេញទៅ “រកលុយ”។

1.រូបរាងលក្ខណៈខាងក្រៅ

ក្នុងសង្គម អ្នកណាក៏និយាយដែរថា សម័យបច្ចុប្បន្នគេយកចិត្តទុកដាក់ទៅលើរូបរាងខាងក្រៅ មុននឹងគិតទៅលើអត្តចរិត និងចំណេះដឹង ឬបទពិសោធការងារ។

រូបសម្រស់ខាងក្រៅ មិនថាប្រុស ឬស្រីនោះទេ វាគឺជាចំណុចដំបូងបង្អស់ដែលអ្នកដទៃចាប់អារម្មណ៍មុនគេ។ បើសិនជាអ្នកទុកពុកមាត់វែង សក់វែង ស្លៀកពាក់មិនសមរម្យ ក្លិនខ្លួនមិនល្អ តើមានអ្នកណាគេចាប់អារម្មណ៍? ដូច្នេះ មុននឹងចេញទៅជួបអ្នកណាម្នាក់ ដូចជាទៅសម្ភាសរកការងារធ្វើជាដើម អ្នកត្រូវតែគិតអំពីប្រការខាងលើ ដោយសួរខ្លួនឯងជាមុនថា “រូបរាងខាងក្រៅរបស់ខ្ញុំ សមរម្យ និងគួរឱ្យគេចាប់អារម្មណ៍ហើយ ឬនៅ?

2.ចំណេះ ជំនាញ និងបទពិសោធន៍

ប៉ុន្តែ នៅពេលនិយាយអំពីការរកស៊ី ទន្ទឹមនឹងរូបសម្រស់ អ្នកត្រូវតែមានចំណេះដឹងខ្ពស់ មានជំនាញ និងបទពិសោធច្រើនឆ្នាំក្នុងវិស័យដែលអ្នកចង់រកស៊ី និងមានទុនសមល្មមអាចជាទីទុកចិត្តបាន។ ដើម្បីមានលក្ខណសម្បត្តិដូច្នេះ អ្នកត្រូវតែរៀនសូត្រ ស្រាវជ្រាវ និងធ្វើការឱ្យគេជាមុនសិន។

អ្នកខ្លះចូលធ្វើការឱ្យគេមិនទាន់បានប៉ុន្មានឆ្នាំផង ក៏ប្រញាប់ដកខ្លួនចេញទៅបើកក្រុមហ៊ុនរកស៊ីនឹងគេដែរ ព្រោះតែឃើញគេរកស៊ីបានកាក់កប ដោយមានគំនិតថា “ខ្ញុំក្មេង ខ្ញុំអាចធ្វើបាន”។

វាជាការប្រសើរហើយ បើសិនអ្នកជឿជាក់លើសមត្ថភាពខ្លួនឯង និងមានមហិច្ឆតាចង់ក្លាយជាអ្នកមាន ព្រមទាំងហ៊ានដេញចាប់ក្ដីស្រមៃរបស់ខ្លួន។ ប៉ុន្តែ អ្នកត្រូវដឹងថា ក្នុងរយៈពេល10ឆ្នាំ មានក្រុមហ៊ុនបើកថ្មីដល់ទៅ 70% ឯណោះដែលបរាជ័យ និងប្រកាសក្ស័យធន។

យោងតាមការសិក្សាស្រាវជ្រាវមួយបានបង្ហាញថា 80% នៃក្រុមហ៊ុនបើកថ្មី អាចឆ្លងផុតឆ្នាំដំបូង បន្ទាប់ពីនោះមកស្ថានភាពនៅតែបន្តធ្លាក់ចុះ។ បន្ទាប់ពីដំណើរការបាន 2ឆ្នាំ ស្ថានភាពបែបនោះនឹងនៅសល់ 2/3(ពីរភាគបី) ហើយបន្ទាប់ពី 5ឆ្នាំ គឺនៅសល់ពាក់កណ្ដាល(1.5/3)។ ចូរដឹងថា ក្រុមហ៊ុនបើកថ្មីដែលមានជីវិតដល់ខ្ទង់10ឆ្នាំ គឺមានត្រឹមតែ 30% ប៉ុណ្ណោះ។

3.សួរខ្លួនឯង

ខាងលើនេះ មិនមែនគ្រាន់តែការបំភ័យអ្នកដែលចង់បើកក្រុមហ៊ុនផ្ទាល់ខ្លួនប៉ុណ្ណោះ ប៉ុន្តែ បើអ្នកពិតជាហ៊ានចេញរកស៊ីដោយខ្លួនឯងមែន អ្នកត្រូវតែឆ្លើយនឹងសំណួរមួយចំនួនខាងក្រោមនេះជាមុនសិន ៖     1. តើខ្ញុំមានចំណេះដឹង ឬជំនាញក្នុងវិស័យដែលខ្ញុំចង់រកស៊ីនោះច្បាស់លាស់ហើយឬនៅ?
2. តើខ្ញុំមានបទពិសោធគ្រប់គ្រាន់ហើយឬនៅ?
3. តើខ្ញុំយល់ច្បាស់ឬនៅ ចំពោះវិស័យនានាដែលមានទំនាក់ទំនងជាមួយនិងវិស័យដែលក្រុមហ៊ុនខ្ញុំត្រូវរកស៊ី?
4. វិស័យដែលខ្ញុំនឹងរកស៊ី តើវាអាចរីកចម្រើនដល់កម្រិតណា?
5. ក្នុងទីផ្សារ តើវិស័យនេះមានគូប្រជែងច្រើនប៉ុនណា?
6. តើសហស្ថាបនិករបស់ខ្ញុំ ជាអ្នកណា? និងមានលក្ខណសម្បត្តិបែបណា? (ក្នុងករណីមានភាគហ៊ុន)
7. តើខ្ញុំមានដើមទុនប៉ុន្មាន? តើខ្ញុំអាចទប់ទល់នឹងបរាជ័យបានប៉ុន្មានដង?
8. ខ្ញុំនឹងធ្វើអ្វីបន្ត បើសិនជាខ្ញុំត្រូវក្ស័យធន?
9. តើខ្ញុំបានត្រៀមចិត្តរួចរាល់ឬនៅ បើលទ្ធផលមិនបានដូចបំណង?

ទាំងនេះ គ្រាន់តែជាចំណុចដែលមើលឃើញច្បាស់ៗប៉ុណ្ណោះ តែវានៅមានអ្វីៗជាច្រើនផ្សេងទៀត ដែលអ្នកត្រូវតែស្វែងយល់។

សូមជូនពរឱ្យលោកអ្នក ទទួលបានជោគជ័យក្នុងការរកទទួលទាន!

មកដល់ពេលបច្ចុប្បន្ន ប្រទេសចិនបានដាក់បម្រាមគោចរទៅលើរាល់សកម្មភាពចេញ-ចូលតំបន់ Wuhan ជាកន្លែងដែលមេរោគបង្កជំងឺរលាកសួត corona ដែលបានរកឃើញកាលពីខែមុន ហើយដែលក្រោយមកវាបាននិងកំពុងឆ្លងរាលដាលទៅតំបន់ផ្សេងៗក្នុងពិភពលោក។

ការជួញដូរក្នុងផ្សារមូលបត្រកាលពីថ្ងៃទី23 តម្លៃប្រេងបានធ្លាក់ថ្លៃជាលើកទី3។ តម្លៃមូលបត្រប្រេងនៅអាមេរិកបានធ្លាក់ថ្លៃក្នុងកម្រិតទាបបំផុតរាប់ចាប់ពីចុងខែវិច្ឆិកា ឆ្នាំ2019 ដោយសារមានការព្រួយបារម្ភអំពីកំណើនសេដ្ឋកិច្ច និងតម្រូវការប្រេងនឹងទទួលរងឥទ្ធិពលអាក្រក់ពីបញ្ហាអាសន្នរោគ Wuhan ឬហៅថា មេរោគរលាកសួត corona ដែលកំពុងរីករាលដាលយ៉ាងខ្លាំងក្លានៅក្នុងប្រទេសចិន។

ហានិភ័យទាក់ទិននឹងប្រភពផ្គត់ផ្គង់កើនឡើងខ្លាំង បើទោះជាការផលិតប្រេងរបស់លីប៊ី កំពុងអាក់ខានក៏ដោយ។ បញ្ហានេះក៏បានបង្កការបារម្ភកាន់តែច្រើនឡើងចំពោះអ្នកវិនិយោគដែរ។ បិទទ្វារក្នុងថ្ងៃព្រហស្បតិ៍ម្សិលមិញ តម្លៃប្រេងឆៅសម្រាប់ខែមិនា ឆ្នាំ2020 បានធ្លាក់ថ្លៃ 1.15ដុល្លារ/បារ៉ែល (ប្រហែល2%) ចុះមកនៅ 55.59ដុល្លារ/បារ៉ែល ជាតម្លៃទាបបំផុត បើគិតចាប់ពីថ្ងៃទី29 វិច្ឆិកា2019។ នេះបើយោងតាមការគណនាលើតារាងសន្ទស្សន៍មូលបត្រ Dow Jones Market Data។

តម្លៃប្រេង Brent សម្រាប់ខែមិនា ឆ្នាំ2020 ធ្លាក់ថ្លៃ 1.17ដុល្លារ/បារ៉ែល(ប្រហែល1.9%) មកនៅត្រឹម 62.04ដុល្លារ/បារ៉ែល។ នេះជាតម្លៃទាបបំផុត គិតចាប់ពីថ្ងៃទី3 ធ្នូ ឆ្នាំ2019។

និយាយអំពីបញ្ហាអាសន្នរោគ corona នៅប្រទេសចិនដែលធ្វើឱ្យប៉ះពាល់ដល់តម្លៃប្រេងនេះ បច្ចុប្បន្នចិនបានដាក់បម្រាមគោចរ ហាមមិនឱ្យមានសកម្មភាពចេញ-ចូលក្នុងតំបន់ Wuhan ជាកន្លែងដែលមេរោគរលាកសួត corona កំពុងឆ្លងរាលដាលខ្លាំង។ ប្រទេសសិង្ហបុរី កាលពីម្សិលមិញ (23 មករា 2020) ក៏បានបញ្ជាក់ថា ប្រទេសនេះមានករណីឆ្លងរោគ corona ជាលើកដំបូងផងដែរ។

គិតមកដល់បច្ចុប្បន្ន មេរោគរលាកសួត corona បានសម្លាប់មនុស្សយ៉ាងតិច17នាក់ និងជាង600នាក់ផ្សេងទៀតកំពុងផ្ទុកមេរោគនេះ។ ទីផ្សារហិរញ្ញវត្ថុនៃបណ្ដាប្រទេសធំៗក្នុងលោក កំពុងទទួលរងផលប៉ះពាល់ពីអាសន្នរោគ corona ក្នុងនោះផ្សារមូលបត្រចិន បានដាំក្បាលចុះកាលពីម្សិលមិញ នៅពេលអាសន្នរោគនេះកំពុងគ្រប់គ្រងបរិយាកាសបុណ្យចូលឆ្នាំចិននៅអាស៊ី។

ប្រធានផ្នែកហិរញ្ញវត្ថុនៃមូលនិធិ Velandera Energy លោក Manish Raj បានវាយតម្លៃថា ៖ “មកទល់នឹងពេលនេះ អាសន្នរោគ corona មិនទាន់ធ្វើឱ្យមានការប្រែប្រួលណាមួយទៅលើតម្រូវការប្រេង។ ប៉ុន្តែ នៅពេលអាជ្ញាធរចិនដាក់បម្រាមគោចរក្នុងក្រុងមួយចំនួន រួមទាំងតំបន់ Wuhan និងទីក្រុងចំនួន 2ផ្សេងទៀតនៅក្បែរនោះ។ សកម្មភាពធ្វើដំណើរ ប្រាកដជាថយចុះ ជើងហោះហើរនានានឹងត្រូវលុបចោលខ្លះ ហើយសកម្មភាពសេដ្ឋកិច្ចនៅចិនក៏នឹងត្រូវរួមតូចដែរ៕

ប្រភព៖ សារព័ត៌មានបរទេស

ច្បាប់ដែលហាមអ្នកផឹកស្រាបើកបរយានយន្ត បានបង្កើតឱ្យមានសេវាដឹកអ្នកស្រវឹងទៅផ្ទះនៅក្រុងប៉េកាំង ប្រទេសចិន ជួយឱ្យអ្នកប្រកបរបរនេះរកប្រាក់បានយ៉ាងច្រើនសន្ធឹក។

របរថ្មីនេះត្រូវបានគេគិតថា ជាមុខរបរដែលរកប្រាក់បានច្រើននៅក្នុងទីក្រុងប៉េកាំង ជាមួយនឹងចំណូលជាមធ្យមប្រហែល 1,742ដុល្លារអាមេរិកក្នុង 1ខែៗសម្រាប់អ្នកផ្ដល់សេវាម្នាក់។

ជាមួយនឹងមុខរបរនេះ បុរសម្នាក់មានវ័យ 33ឆ្នាំ លោក Liu Pengfei បានឱ្យដឹងថា មានខែខ្លះគាត់អាចរកបានចំណូលដល់ទៅ 19,000យន់ ប្រហែល 2,740ដុល្លារអាមេរិក ដែលខ្ពស់ជាងទ្វេដងបើធៀបនឹងប្រាក់ខែមធ្យមរបស់អ្នកធ្វើការធម្មតានៅទីក្រុងប៉េកាំងដូចគ្នា។

ការងាររបស់លោក Liu តែងចាប់ផ្ដើមនៅពេលយប់រហូតដល់ពេលទៀបភ្លឺ ជាពេលវេលាដែលក្រុមអ្នកផឹកស៊ីធ្វើដំណើរច្រើនបំផុត។ តម្រូវការលើសេវាកម្មនេះក្នុងអំឡុងពេលខាងលើ កើនឡើងរហូតដល់ 3ដង បើធៀបនឹងពេលថ្ងៃ។
ក្រុមអ្នកផ្ដល់សេវាកម្មដឹកអ្នកស្រវឹងតែងបង្ហាញវត្តមាននៅក្បែរៗហាងផឹកស៊ី ក្លិបកម្សាន្ត ដើម្បីរង់ចាំភ្ញៀវហៅតាមកម្មវិធីទូរស័ព្ទ(App)។

ជាធម្មតា លោក Liu និងមិត្តរួមការងារបានប្រើប្រាស់រថយន្តរបស់ភ្ញៀវដើម្បីជូនពួកគេទៅផ្ទះ។ ប៉ុន្តែ មិនមែនភ្ញៀវទាំងអស់សុទ្ធតែតម្រូវឱ្យជូនទៅផ្ទះភ្លាមនោះទេ ព្រោះបើតាមលោក Liu ក្នុងចំណោមភ្ញៀវ 3នាក់ គឺមានម្នាក់តម្រូវឱ្យគាត់ដឹកទៅកន្លែងផឹកស៊ី ឬកន្លែងកម្សាន្តមួយផ្សេងទៀត មុននឹងឱ្យជូនទៅផ្ទះ។

តម្រូវការលើសេវាកម្មដឹកអ្នកស្រវឹង បានកើនឡើងច្រើននៅពេលយប់ជ្រៅ ជាពិសេស គឺក្រោយពេលដែលអាជ្ញាធរក្រុងប៉េកាំងបានអនុញ្ញាតឱ្យក្លិបរាត្រី ហាងផឹកស៊ី អាចបើកដល់ជិតភ្លឺបាន។ ការអនុញ្ញាតនេះ ត្រូវបានធ្វើឡើងក្នុងគោលបំណងជួយជំរុញកំណើនសេដ្ឋកិច្ចជាតិ។

មកដល់បច្ចុប្បន្ន គេមិនទាន់ដឹងថា ដំណោះស្រាយខាងលើនេះ មានប្រសិទ្ធភាពដល់កម្រិតណានោះទេ ខណៈដែលកំណើនសេដ្ឋកិច្ចបច្ចុប្បន្នរបស់ចិន កំពុងធ្លាក់ចុះទាបបំផុតមិនធ្លាប់មានក្នុងរយៈពេល 30ឆ្នាំមកនេះ។ យ៉ាងនេះក្ដី អ្នកដែលបានទទួលផលប្រយោជន៍ពីច្បាប់ខាងលើមុនគេ គឺក្រុមអ្នកផ្ដល់សេវាកម្មដឹកភ្ញៀវស្រវឹងទៅផ្ទះហ្នឹងឯង។

យោងតាមទិន្នន័យរបស់ក្រុមហ៊ុនគ្រប់គ្រងកម្មវិធីបញ្ជាទិញសេវាកម្មដឹកភ្ញៀវស្រវឹងធំបំផុតនៅប្រទេសចិន បានបង្ហាញថា ការបញ្ជាប្រើសេវាកម្មនេះបានកើនឡើង 20% នៅពាក់កណ្ដាលយប់នៅក្នុងទីក្រុងប៉េកាំង ខណៈដែលទីក្រុងផ្សេងៗទៀត ដូចជា Dongguan, Zhengzhou ជាដើម ចំនួនអ្នកបញ្ជាប្រើសេវាកម្មនេះ កើនរហូតដល់ 50%៕

ប្រភព៖ សារព័ត៌មានបរទេស

មេរោគបង្ករលាកសួតថ្មី Wuhan – 6 ចំណុចដែលអ្នកត្រូវដឹងពីវា ដើម្បីការពារជីវិត
ហាងទំនិញនៅជប៉ុន ដាក់បដា “ហាមជនជាតិចិន” មិនឱ្យចូលទិញ ព្រោះខ្លាច…
អ្នកស្លាប់ដោយសារឆ្លងជម្ងឺរលាកសួត Wuhan កើនជិតទ្វេដង៖ ពលរដ្ឋចិនកំពុងភ័យខ្លាច…

ក្រុមហ៊ុនអភិវឌ្ឍន៍ឡានហោះ SkyDrive មានគម្រោងធ្វើការហោះហើរសាកល្បងជាច្រើនលើកទៀត ដើម្បីធានាឱ្យបានប្រាកដថា ឡានហោះរបស់ខ្លួននឹងមានសុវត្ថិភាព100% មុននឹងដាក់លក់ចាប់ពីឆ្នាំ2023។

ក្រុមហ៊ុន SkyDrive ទើបតែបានប្រកាសថា ក្រុមហ៊ុនបានចាប់ផ្ដើមធ្វើការហោះហើរសាកល្បងនូវឡានហោះកាលពីខែមុន នេះបើតាមការចេញផ្សាយរបស់សារព័ត៌មានជប៉ុន Asahi កាលពីថ្ងៃទី21មករាកន្លងទៅ។

នេះគឺជាលើកទី1 ហើយនៅជប៉ុន ដែលមានការសាកល្បងបើកបរឡានហោះដែលមានមនុស្សជិះនៅខាងក្នុង។ ការហោះហើរសាកល្បងលើកមុនៗ ត្រូវបានគេធ្វើឡើងដោយប្រើប្រព័ន្ធបញ្ជាពីចម្ងាយ និងគ្មានមនុស្សជិះ។

SkyDrive គឺជាក្រុមហ៊ុនបច្ចេកវិទ្យាមួយដែលបង្កើតឡើងកាលពីខែកក្កដា ឆ្នាំ2018 នៅទីក្រុង Tokyo ដោយក្រុមវិស្វករវ័យក្មេងដែលធ្លាប់ធ្វើការឱ្យក្រុមហ៊ុនផលិតរថយន្ត Toyota។ ក្រុមហ៊ុននេះកំពុងតែរៀបចំគម្រោងប្រារព្ធព្រឹត្តិការណ៍ហោះហើរសម្ដែងឱ្យទស្សនិកជនទស្សនានៅក្នុងរដូវក្ដៅឆ្នាំនេះ បន្ទាប់មកនឹងចាប់ផ្ដើមដាក់លក់ចាប់ពីឆ្នាំ2023 ទៅ។

ឡានហោះ SkyDrive នេះមានកម្ពស់ 1.6ម៉ែត្រ បណ្ដោយ និងទទឹងប្រវែង 3.6ម៉ែត្រស្មើគ្នា និងមានកៅអីអង្គុយចំនួន1។ ជ្រុងនីមួយៗនៃឡានហោះនេះមានបំពាក់ស្លាបកង្ហារចំនួន 1គ្រឿង ដែលកង្ហារនេះនឹង​ជួយ​ឱ្យឡានហោះអាចសំកាំងខ្លួននៅលើអាកាសបានយ៉ាងស្រួល។

មកដល់ពេលនេះ SkyDrive មិនទាន់បង្ហើបឱ្យដឹងលម្អិតអំពីការហោះហើរសាកល្បងនេះនៅឡើយទេ ប៉ុន្តែក្រុមហ៊ុននេះបានបញ្ជាក់ថា នឹងធ្វើការហោះហើរសាកល្បងជាច្រើនលើកទៀតដើម្បីធានាសុវត្ថិភាពឱ្យបាន100%។
បច្ចុប្បន្ន ក្រៅពី SkyDrive គេឃើញមានក្រុមហ៊ុនផ្សេងមួយចំនួន ក៏កំពុងយកចិត្តទុកដាក់ទៅលើការអភិវឌ្ឍ​ឡានហោះនេះដែរ ក្នុងនោះក៏មានក្រុមហ៊ុន Airbus និង Uber ផងដែរ។

ឡានហោះត្រូវបានគេរំពឹងថា នឹងជួយកាត់បន្ថយការកកស្ទះចរាចរណ៍ និងជួយសង្គ្រោះមនុស្សក្នុងករណីបន្ទាន់។ ប៉ុន្តែ មុនពេលឡានហោះនេះត្រូវបានគេប្រើប្រាស់ទូលំទូលាយ ពិភពលោកត្រូវតែបង្កើតឱ្យមានស្ដង់ដាសុវត្ថិភាព និងច្បាប់ចរាចរណ៍សម្រាប់ឡានហោះ រួមនឹងប្រព័ន្ធគ្រប់គ្រងពេញលេញមួយដើម្បីបញ្ចៀសគ្រោះថ្នាក់ចរាចរណ៍ផ្លូវអាកាស៕

ប្រភព៖ សារព័ត៌មានបរទេស

អ្នកលក់មាន់ និងទាភាគច្រើន តែងប្រើប្រាស់សារធាតុគីមីជួយដើម្បីងាយស្រួលក្នុងការបោចរោមមាន់-ទា និងប្រើពេលខ្លី ពិសេសនៅក្នុងរដូវបុណ្យទាន ប៉ុន្តែ ការធ្វើបែបនេះ វាប៉ះពាល់ដល់សុខភាពអ្នកទទួលទាន។

ខាងក្រោមនេះ គឺជាវិធីមួយចំនួនដែលនឹងជួយធ្វើឱ្យការបោចរោមមាន់-ទារបស់លោកអ្នក មានភាពងាយស្រួល និងរហ័សទាន់ចិត្ត។

1.ការជ្រើសរើសមាន់

មាន់ដែលលោកអ្នកប្រុងនឹងទិញ ត្រូវតែជាមាន់ដែលមានសុខភាពល្អ មានសាច់ហាប់ណែន រហ័សរហួន ពេលចាប់កាន់វាវានឹងរើបម្រះខ្លាំង ភ្នែកវៃ សម្បុរស្បែករបស់វាក្រហមស្រស់ រោមរលោងល្អ គែរបស់វាមិនណែន និងមិនរឹង ទាំងអស់នេះបញ្ជាក់ថា គឺជាមាន់ដែលមានសុខភាពល្អ។

–ពេលសើយស្រទាប់រោមមើល ឃើញស្បែកមាន់មានសភាពស្ដើង អាចមើលឃើញសាច់ និងស្រមោលសរសៃឈាម ហើយពេលយកដៃទៅច្របាច់ ដងខ្លួនមាន់មានសភាពណែន មានឆ្នូតលឿងនៅត្រង់ទ្រូង និងស្លាប នោះគឺជាមាន់ល្អ។

–គូទមាន់ត្រូវតែក្រហមស្រស់ និងមានចលនារស់រវើក មិនសើម ឬជាប់លាមក។

–ដើម្បីដឹងថា មាន់ត្រូវគេចាក់ទឹកបញ្ចូលដែរឬអត់នោះ លោកអ្នកត្រូវមើលទៅលើផ្នែកខាងក្រោមស្លាបរបស់វា បើសិនមានចំណុចក្រហមច្រើន មានស្បែកប៉ោង និងមានដក់ទឹកក្នុងស្បែក ហើយមានជាំខ្មៅ នោះបង្ហាញថា មាន់នោះត្រូវគេចាក់ទឹកចូលដើម្បីឱ្យធ្ងន់ហើយ។

–ពេលឃើញមាន់មានសភាពដូចតទៅនេះ ចូរកុំទិញឱ្យសោះ ៖ សម្បុរស្លេកស្លាំង ជាំ សំកុក ចេញទឹកមាត់ គែឡើងរឹង ភ្នែកមិនវៃ ទម្លាក់ស្លាប មិនរហ័សរហួន ឱនក្បាល រោមបះខុសធម្មតា ស្គមស្គាំង ជើងត្រជាក់ រន្ធគូទសម្បុរស ឬក្រហមជាំ ឬមានជាប់លាមកជុំវិញ។

2.វិធីបោចមាន់

ត្រូវជ្រលក់ក្នុងទឹកមុនពេលបោច បន្ទាប់ពីបានសម្លាប់មាន់រួចហើយ អ្នកត្រូវជ្រលក់វាចូលទៅក្នុងទឹកត្រជាក់ឱ្យសព្វ រួចលើកចេញមកវិញ។ អ្នកអាចយកទឹកខ្មេះ ឬស្រា-ស មកលាបលើស្បែកវារយៈពេល 10នាទីដើម្បីធ្វើឱ្យរន្ធគល់រោមរបស់វារីកធំ។

បន្ទាប់មក ជ្រលក់មាន់ទៅក្នុងទឹកក្ដៅដែលមានសីតុណ្ហភាពប្រមាណជា 70 ទៅ 80អង្សាសេ(ជិតពុះ)។ អ្នកមិនត្រូវជ្រលក់ក្នុងទឹកក្ដៅយូរពេកទេ ព្រោះវានឹងធ្វើឱ្យស្បែកមាន់ផុយរលួយនៅពេលបោច។

ដើម្បីងាយស្រួលក្នុងការបោចរោមមាន់ ដំបូងអ្នកត្រូវប្រើដៃបោចរោមធំៗឱ្យអស់សិន បន្ទាប់មកប្រើប្រើចន្ទាសចាប់បោចរោមខ្លីៗដែលពិបាកបោចដោយដៃផ្ទាល់។

3.វិធីបំបាត់ក្លិនមិនល្អរបស់មាន់

–កាត់កញ្ចូញមាន់ចោល ព្រោះថា វាមិនល្អសម្រាប់សុខភាពមនុស្សទេ និងមានក្លិនអាក្រក់ផង។ យកអំបិលម៉ដ្ឋមកលាប និងត្រដុសឱ្យសព្វស្បែករបស់មាន់ ហើយយកក្រូចឆ្មារមួយចំណិតមកជូតត្រដុសម្ដងទៀត រួចទើបលាងសម្អាត និងទុកឱ្យស្រស់ទឹក មុនពេលចម្អិន។

–អ្នកក៏អាចយកអំបិល និងមើមខ្ញីដែលដំសំប៉ែតហើយ រួចចាក់ស្រា-សចូល យកទៅលាបលើស្បែកមាន់។ វិធីនេះក៏ជួយកាត់ក្លិនឆ្អាបរបស់វាបានដែរ និងថែមទាំងជួយឱ្យសាច់មាន់មានក្លិនឈ្ងុយឆ្ងាញ់ទៀតផង៕

ប្រភព៖ សារព័ត៌មានបរទេស