Author: សឿន សំណាង

ម៉ាស់ចំនួនជាង 1លានសន្លឹក ត្រូវបានចែកជូនអ្នកដំណើរនៅប៉ោយប៉ែត និងសៀមរាប ខណៈក្រសួងសុខាភិបាលអំពាវនាវកុំឱ្យដំឡើងថ្លៃម៉ាស់
ដើម្បីរួមចំណែកក្នុងការទប់ស្កាត់ការឆ្លងរាលដាលនៃមេរោគរលាតសួត Wuhan (corona) នៅព្រឹកថ្ងៃទី27 ខែមករានេះ សមត្ថកិច្ចនៅច្រកទ្វារអន្តរជាតិក្រុងប៉ោយប៉ែត បានចុះចែកម៉ាស់ជូនពលរដ្ឋ និងអ្នកទេសចរណ៍ដែលឆ្លងកាត់ច្រកអន្តរជាតិមួយនេះ។
សកម្មភាពចែកម៉ាស់ការពារដោយមិនគិតថ្លៃនេះ ត្រូវបានធ្វើឡើងនៅតាមទីតាំងសំខាន់ៗចំនួន3 គឺច្រកស្ពានព្រំដែនខ្មែរ-ថៃ(អូរជ្រៅ) ទីតាំងក្បែរការិយាល័យបំពេញបែបបទចេញក្រៅប្រទេស និងទីតាំងក្បែរការិយាល័យបំពេញបែបបទចូលប្រទេស។
ប្រភពព័ត៌មានបានឱ្យដឹងថា ម៉ាស់ចំនួន1លានសន្លឹកនេះ គឺជាការឧបត្ថម្ភរបស់អាជិវករលក់ដូរនៅក្នុងផ្សាររោងក្លឿ អាជីវករក្រុងប៉ោយប៉ែត រួមនឹងសប្បុរសជនមួយភាគធំនៅប៉ោយប៉ែត ខេត្តបន្ទាយមានជ័យ។
ការចុះចែកម៉ាស់នៅពេលព្រឹកនេះ ត្រូវបានដឹកនាំដោយអភិបាលនៃគណៈអភិបាលក្រុងប៉ោយប៉ែត លោក គាត ហ៊ុល និងឧត្តមសេនីយ៍ត្រី អ៊ី ចំរើន នាយប៉ុស្តិ៍នគរបាលអន្តោប្រវេសន៍ច្រកព្រំដែនអន្តរជាតិប៉ោយប៉ែត រួមនឹងកងកម្លាំងនគរបាលមួយចំនួនធំផងដែរ។ ការចុះចែកម៉ាស់បែបនេះ នឹងត្រូវធ្វើឡើងជាបន្តបន្ទាប់ទៀត ចាប់ពីពេលនេះរហូតដល់ស្ថានការណ៍នៃជំងឺរលាកសួត Wuhan មានការប្រសើរឡើងវិញ។
ទន្ទឹមនឹងដំណឹងល្អខាងលើ នៅឯខេត្តសៀមរាបឯណោះវិញ ក៏មានសកម្មភាពចុះចែកម៉ាស់ដោយមិនគិតថ្លៃផងដែរ។ សកម្មភាពនេះត្រូវបានធ្វើឡើងដោយសមាគម មគ្គុទ្ទេសក៍ទេសចរណ៍ភាសាចិន-កម្ពុជា។
ប្រធានសមាគម មគ្គុទ្ទេសក៍ទេសចរណ៍ភាសាចិន-កម្ពុជា លោក ទៀ គីឡេង បានឱ្យដឹងកាលពីរសៀលថ្ងៃទី26 មករាម្សិលមិញថា លោកនឹងចាប់ផ្តើមចុះចែកម៉ាស់ចំនួន 1ម៉ឺនសន្លឹក ទៅតាមគោលដៅ 4សំខាន់ៗក្នុងរមណីយដ្ឋានអង្គរ ដូចជានៅព្រលានយន្តហោះអន្តរជាតិ អតីតកន្លែងពិនិត្យសំបុត្រចាស់នៅផ្លូវហ្សាលដឺហ្គោល កន្លែងពិនិត្យសំបុត្រនៅមុខប្រាសាទអង្គរវត្ត និងកន្លែងពិនិត្យសំបុត្រផ្លូវ 60ម៉ែត្រ ផ្លូវកែងឆ្ពោះទៅប្រាសាទក្រវាន់។ តាមការបញ្ជាក់ពីលោកប្រធានសមាគម បានឱ្យដឹងទៀតថា ការចុះចែកម៉ាស់ការពារដល់ទេសចរជាតិ និងអន្តរជាតិបានចាប់ផ្តើមតាំងពីរសៀលថ្ងៃទី26 រហូតដល់អស់ម៉ាស់តែម្ដង។
ទន្ទឹមនឹងព័ត៌មានដ៏គួរឱ្យត្រេកអរខាងលើ ក៏មានដំណឹងមិនសូវល្អប៉ុន្មានដែរទាក់ទិននឹងការចំណាយម៉ាស់ការពារនេះ ដោយនៅក្នុងបណ្ដាញសង្គមជាច្រើននាពេលថ្មីៗនេះ គេឃើញមានការចែករំលែកពីគណនីមួយទៅគណនីមួយ អំពីតម្លៃម៉ាស់ស្ទើរគ្រប់តំបន់។
ជាក់ស្ដែងមានគណនីហ្វេសប៊ុកមួយឈ្មោះ 丽儿 បានផូស្តរៀបរាប់ពីការឆ្លៀតឱកាសកេងប្រវ័ញ្ច និងដំឡើងថ្លៃម៉ាសនេះ ដោយគណនីមួយនេះបានបញ្ជាក់ថា ម៉ាស់កាពារ មុននេះថ្លៃតែ 2.5ដុល្លារប៉ុណ្ណោះក្នុង 1ប្រអប់ដែលមាន 50ម៉ាស់ ប៉ុន្តែពេលនេះគេលក់តម្លៃ ដល់ទៅ 6ដុល្លារក្នុង 1ប្រអប់។
គួរឱ្យដឹងផងដែរថា តម្លៃម៉ាស់របស់ពេទ្យធម្មតា គ្រប់ពណ៌ ទាំងពណ៌ផ្ទៃមេឃ ខ្មៅ និងផ្កាឈូក 1ប្រអប់តម្លៃត្រឹមតែ 2.5ដុល្លារប៉ុណ្ណោះ ឯការលក់រាយវិញគឺ 2តម្លៃ 500រៀល ចំណែកឯម៉ាស់ប្រភេទការពារ N95 និង 3M វិញតម្លៃត្រឹមតែ 1$ ទៅ 2$ ប៉ុណ្ណោះ ប៉ុន្តែបច្ចុប្បន្ន តម្លៃនេះត្រូវបានគេគុណឡើងទ្វេដងជាបន្តបន្ទាប់។
ដោយឡែក ថ្មីៗនេះ ក្រសួងសុខាភិបាលបានអំពាវនាវដល់អ្នកដែលលក់ម៉ាស់ការពារ (mask)ទាំងអស់នៅក្នុង ព្រះរាជាណាចក្រកម្ពុជា សូមចូលរួមទប់ស្កាត់ការចម្លងវីរុស កូរ៉ូណាថ្មី (2019-nCoV) ដោយសូមកុំដំឡើងថ្លៃ ម៉ាស់ ដោយទុកលទ្ធភាពឱ្យបងប្អូនប្រជាពលរដ្ឋយើង ដែលមានតម្រូវការប្រើម៉ាស់ អាចទិញប្រើប្រាស់បាន ដើម្បីចូលរួម ការពារសុខភាពផ្ទាល់ខ្លួនពីការចម្លងជំងឺដ៏គួរឱ្យភ័យខ្លាចនេះ៕
January 27, 2020
ការកើនឡើងនៃករណីឆ្លងមេរោគ corona ត្រូវបានប្រកាសបន្ថែមជាបន្តបន្ទាប់
ក្រុងហុងកុង និងម៉ាកាវ ប្រទេសសិង្ហបុរី ម៉ាឡេស៊ី អាមេរិក ជប៉ុន សុទ្ធតែបានទទួលស្គាល់ថា ប្រទេសពួកគេមានករណីឆ្លងមេរោគរលាកសួត nCoV ប្រភេទថ្មីនេះកើនឡើង។
ក្រុងហុងកុងទើបតែបានបញ្ជាក់ថា មានអ្នកឆ្លងមេរោគរលាកសួត corona (nCoV)នេះ ចំនួន 6ករណីបន្ថែមទៀត។ អគ្គនាយកផ្នែកគុណភាព និងសុវត្ថិភាព នៃអគ្គនាយកដ្ឋានមន្ទីរពេទ្យក្រុងហុងកុង លោក Chung Kin-lai បានឱ្យដឹងបែបនេះនៅក្នុងសន្និសីទកាសែតមួយនៅថ្ងៃនេះ។
អ្នកជំងឺខាងលើ សុទ្ធតែធ្លាប់បានធ្វើដំណើរទៅកាន់ទីក្រុង Wuhan នៃខេត្ត Hebei ជាកន្លែងដែលមានការផ្ទុះការឆ្លងមេរោគរលាកសួត corona ដំបូងគេ។
ក្រុងហុងកុងកំពុងពិចារណាក្នុងការបិទច្រកព្រំដែនរវាងចិនដីគោក និងក្រុងហុងកុង។ ប៉ុន្តែ មានការរិះគន់ថា បើមានការបិទច្រកនេះមែន វាហាក់ដូចជាជ្រុលហួសពេក។
ក្នុងថ្ងៃនេះដែរ ក្រុងម៉ាកាវ ក៏បានប្រកាសថា មានអ្នកឆ្លងមេរោគរលាកសួត Wuhan កើនឡើងចំនួន 3ករណីទៀតហើយ ដែលធ្វើឱ្យចំនួនអ្នកឆ្លងរោគនេះនៅពេលនេះកើនឡើងដល់ 5ករណី។
ប្រទេសសិង្ហបុរី និងម៉ាឡេស៊ី ក៏បានទទួលស្គាល់ដែរថា មានករណីឆ្លងមេរោគរលាកសួត ដែលមកដល់ពេលនេះជាករណីទី5 ហើយ។ រដ្ឋមន្ត្រីក្រសួងសុខាភិបាលប្រទេសសិង្ហបុរីបានឱ្យដឹងថា អ្នកជំងឺនេះ គឺជាពលរដ្ឋចិន អាយុ 36ឆ្នាំ បានមកពីក្រុង Wuhan ជាមួយក្រុមគ្រួសារកាលពីថ្ងៃទី22 មករា និងស្នាក់នៅក្នុងសណ្ឋាគារមួយលើកោះ Sentosa។
ចំណែកប្រទេសម៉ាឡេស៊ីវិញ បានបញ្ជាក់អំពីចំនួនអ្នកឆ្លងមេរោគ coronaថ្មី ជាករណីទី4 ក្រោយការប្រកាសលើកដំបូងតែប៉ុន្មានម៉ោងប៉ុណ្ណោះ។ រដ្ឋមន្ត្រីក្រសួងសុខាភិបាល Noor Hisham Abdullah បានថ្លែងថា អ្នកជំងឺថ្មីនេះ គឺជាបុរសវ័យ 40ឆ្នាំ មកពីទីក្រុង Wuhan។
សហរដ្ឋអាមេរិកថ្ងៃនេះ ក៏បានប្រកាសដែរថា ប្រទេសនេះមានករណីឆ្លងមេរោគ nCoV (corona) ទី3 ដែរ។ អ្នកជំងឺនេះ បានធ្វើដំណើរពីក្រុង Wuhan ទៅកាន់រដ្ឋ California។ ចំណែក 2ករណីមុននេះ គឺបានកើតឡើងនៅ Washington និង Illinois។
ដងផ្លូវមួយនៃក្រុង Wuhan
ជប៉ុនក៏បានឱ្យដឹងដែរថា រាជាណាចក្រនេះក៏មានអ្នកឆ្លងមេរោគដ៏កាចសាហាវនេះជាករណីទី4 ដែរ នេះបើតាមសេចក្ដីរាយការណ៍របស់ទូរទស្សន៍ NHK ។ អ្នកជំងឺជាពលរដ្ឋម្នាក់មកពីក្រុង Wuhan អាយុ 40ឆ្នាំ មកដល់ជប៉ុន កាលពីថ្ងៃទី22មករា។ បច្ចុប្បន្ន អ្នកជំងឺនេះ កំពុងសម្រាកព្យាបាលក្នុងខេត្រ Aichi។
មកទល់ពេលនេះ មានប្រទេសជាច្រើនផ្សេងទៀត ក៏មានករណីឆ្លងមេរោគនេះ ដូចជា អូស្ត្រាលី 4ករណី បារាំង 3ករណី ប៉ាគីស្ថាន 1ករណី និងប្រទេសថៃ មាន 7ករណី។ល៕
ប្រភព៖ សារព័ត៌មានបរទេស
January 26, 2020
ចិនប្រើថ្នាំព្យាបាលអេដស៍ ព្យាបាលជំងឺរលាកសួតថ្មី Wuhan
គណៈកម្មាធិការសុខាភិបាលក្រុងប៉េកាំង បានឱ្យដឹងថា មន្ទីរពេទ្យចំនួន3 ផ្សេងគ្នា កំពុងប្រើថ្នាំព្យាបាលជំងឺអេដស៍ដើម្បីទប់ទល់ជំងឺរលាកសួតថ្មី nCoV (corona)។
ព័ត៌មានខាងលើនេះ ត្រូវបានគេចុះផ្សាយឱ្យដឹងនៅថ្ងៃទី26 ខែមករានេះ។ នេះគឺជាផ្នែកមួយនៃកិច្ចខិតខំរបស់ក្រុមមន្ត្រីសុខាភិបាលចិនក្នុងយុទ្ធនាការប្រយុទ្ធប្រឆាំងនឹងអាសន្នរោគ nCoV (ជាមេរោគបង្កឱ្យរលាកសួតថ្មី corona)។
វេជ្ជបណ្ឌិតកំពុងព្យាបាលអ្នកជំងឺរលាកសួតថ្មីដែលបង្កឡើងដោយមេរោគ nCoV
យោងតាមសេចក្ដីប្រកាសរបស់គណៈកម្មាធិការវេជ្ជសាស្ត្រក្រុងប៉េកាំង ប្រភេទថ្នាំដែលកំពុងប្រើប្រាស់មានឈ្មោះថា Lopinavir និង Ritonavir នេះ ត្រូវបានគេពិសោធឃើញថា មានប្រសិទ្ធភាពក្នុងការព្យាបាលប្រឆាំងនឹងមេរោគដ៏មហាប្រល័យ corona នេះ។
មន្ទីរពេទ្យទាំង3 ដែលទទួលបញ្ជាឱ្យពិសោធថ្នាំអេដស៍ទៅលើអ្នកជំងឺរលាកសួតថ្មីនេះ រួមមាន មន្ទីរពេទ្យ Beijing Ditan មន្ទីរពេទ្យ Beijing You’an និងមជ្ឈមណ្ឌលវេជ្ជសាស្ត្រលេខ5 នៃមន្ទីរពេទ្យពហុព្យាបាលយោធានៃប្រទេសចិន។
ប្រភពព័ត៌មានបានឱ្យដឹងថា លទ្ធផលនៃការប្រើប្រាស់ថ្នាំ Lopinavir រួមជាមួយនឹងថ្នាំ Ritonavir មកទល់នឹងពេលនេះ គឺមានប្រសិទ្ធភាពច្រើន។
សូមរំឭកថា កាលពីថ្ងៃទី25 មករា(ម្សិលមិញ) លោកវេជ្ជបណ្ឌិត Liang Wudong អាយុ 62ឆ្នាំ ដែលជាអ្នកព្យាបាលអ្នកជំងឺរលាកសួត wuhan បានស្លាប់បាត់បង់ជីវិត(ដោយសារឆ្លងមេរោគដ៏សាហាវនេះ)។ ទីភ្នាក់ងារសារព័ត៌មានចិននានា បានចេញផ្សាយថា លោក Liang Wudong គឺជាវេជ្ជបណ្ឌិតសំខាន់ជាងគេ ដែលចំណាយពេលច្រើននៅក្បែរ និងព្យាបាលអ្នកជំងឺរលាកសួតដោយមេរោគ nCoV នៅមន្ទីរពេទ្យ Hubei Xinhua ចាប់តាំងពីអាសន្នរោគនេះបានផ្ទុះឡើង៕
ប្រភព៖ សារព័ត៌មានបរទេស
January 26, 2020
វៀតណាមបញ្ជូនអ្នកដំណើរ 10នាក់ទៅកាន់មន្ទីរពេទ្យ ដោយសង្ស័យថាបានឆ្លងមេរោគរលាកសួតថ្មី wuhan
មន្ទីរពេទ្យ Da Nang នៃប្រទេសវៀតណាម បានរកឃើញ និងបានដាក់អ្នកដំណើរចំនួន 10នាក់ឱ្យនៅដាច់ដោយឡែក ក្នុងនាយកដ្ឋានវេជ្ជសាស្ត្រត្រូពិក ដើម្បីរង់ចាំលទ្ធផលនៃការធ្វើតេស្តរកមេរោគរលាកសួត Wuhan។
កាលពីព្រឹកមិញ (26 មករា) អគ្គនាយករងនៃមន្ទីរពេទ្យ Da Nang លោក Nguyen Thanh Trung បានឱ្យដឹងថា ក្នុងចំណោមមនុស្សទាំង10នាក់ដែលត្រូវដាក់ឱ្យនៅដាច់ដោយឡែកទាំងនោះ គឺមានជនជាតិចិន 6នាក់ ជនជាតិឆែកម្នាក់ និងជនជាតិវៀតណាម 3នាក់។
វេជ្ជបណ្ឌិតវៀតណាមម្នាក់បានឱ្យដឹងថា ក្នុងចំណោមជនជាតិចិនទាំងនោះ មិនមានអ្នកណាម្នាក់មកពីក្រុង Wuhan ទេ។
យោងតាមរបាយការណ៍ដំបូងពីអាជ្ញាធរ មានមនុស្សប្រហែល 15នាក់ ត្រូវបានគេដាក់ឱ្យនៅដាច់ដោយឡែកក្នុងមន្ទីរពេទ្យ Da Nang ប្រទេសវៀតណាម។ មនុស្សមួយចំនួនទៀត ត្រូវបានអនុញ្ញាតឱ្យចេញពីមន្ទីរពេទ្យ បន្ទាប់ពីមានលទ្ធផលបញ្ជាក់ថា មិនមានផ្ទុកមេរោគរលាកសួត corona ។
លោក Nguyen Thanh Trung បានឱ្យដឹងថា អ្នកដំណើរខាងលើទាំងអស់ត្រូវបានគេរកឃើញថា មានអាការក្ដៅខ្លួនខ្លាំង ពិសេសគឺអ្នកទេសចរជនជាតិចិន។ ក្រៅពីនេះ គឺជាបុគ្គលិកសណ្ឋាគារ រីហ្សត និងបុគ្គលិកនៅព្រលានយន្តហោះដែលធ្លាប់បាននៅក្បែរអ្នកទេសចរចិន។
លោក Nguyen Tien Hong អនុប្រធានមន្ទីរសុខាភិបាលក្រុង Da Nang ក៏បានឱ្យដឹងដែរថា កាលពីថ្ងៃទី25 កន្លងទៅ អ្នកទេសចរម្នាក់មកពីខេត្ត Hunan ប្រទេសចិន ត្រូវបានបញ្ជូនទៅកាន់មន្ទីរពេទ្យភ្លាមៗ បន្ទាប់ពីបានពិនិត្យឃើញថា មានកម្ដៅខ្លួនឡើងដល់ 38,8អង្សាសេ។
បច្ចុប្បន្ន ក្រុង Da Nang មិនទាន់មានករណីឆ្លងមេរោគរលាកសួតថ្មី Corona nCoV នៅឡើយ ប៉ុន្តែ ប៉ុន្មានថ្ងៃមុន អាជ្ញាធរក្រុង Da Nang ក៏ធ្លាប់បានរកឃើញភ្ញៀវទេសចរ 2នាក់ដែលមានកម្ដៅខ្លួនខ្ពស់ ទើបបញ្ជូនទៅកាន់មន្ទីរពេទ្យ ប៉ុន្តែ សំណាងល្អ ពួកគេមិនបានឆ្លងមេរោគដ៏សាហាវនេះទេ៕
ប្រភព៖ សារព័ត៌មានបរទេស
January 26, 2020
ចំនួនអ្នកស្លាប់ដោយសារមេរោគ corona កើនដល់ 56នាក់ ខណៈអ្នកឆ្លងមេរោគនេះកើនដល់…
ប្រទេសចិនបានទទួលស្គាល់ថា ជនរងគ្រោះជិត 2,000ករណីបានឆ្លងមេរោគរលាកសួត Wuhan គិតមកដល់យប់ថ្ងៃទី25 មករា ដែលក្នុងនោះអ្នកស្លាប់បានកើនដល់ 56នាក់ហើយ។
ទូរទស្សន៍ចិន CCTV នៅថ្ងៃនេះ បានផ្សាយថា ជនរងគ្រោះដែលបានឆ្លងមេរោគ corona បានកើនដល់ 1,975ករណី។ ក្នុងចំណោមអ្នកស្លាប់ថ្មីៗបំផុតនៅប្រទេសចិន គឺមាន 13ករណីកើតឡើងនៅខេត្ត Hebei ដែលជាតំបន់ឆ្លងមេរោគនេះមុនគេ និង 1ករណីទៀតនៅក្រុង Shanghai។
មកដល់ពេលនេះ ក្រុង Wuhan និងក្រុងជាច្រើនទៀតក្នុងខេត្ត Hebei នៃប្រទេសចិន ត្រូវអាជ្ញាធរបិទការចេញ-ចូលទាំងស្រុង ហើយការដើរហើរនៅទីនោះត្រូវបានរឹតបន្តឹង និងមានការប្រុងប្រយ័ត្នខ្ពស់។
ក្រៅពីចិន ដែលជាប្រទេសរងគ្រោះដំបូងគេ បច្ចុប្បន្ន មេរោគនេះបានឆ្លងទៅដល់ប្រទេស និងកោះចំនួន 12ផ្សេងទៀត រួមមានប្រទេសថៃ អូស្ត្រាលី បារាំង ជប៉ុន ម៉ាឡេស៊ី សិង្ហបុរី កោះតៃវ៉ាន់ អាមេរិក វៀតណាម កូរ៉េខាងត្បូង និងប្រទេសនេប៉ាល ហើយថ្មីៗនេះ ប្រទេសកាណាដាក៏បានប្រកាសថា មានករណីឆ្លងមេរោគ corona នេះជាករណីទី1 ដែរ ដែលជនរងគ្រោះជាពលរដ្ឋទើបត្រឡប់មកពីទីក្រុង Wuhan ប្រទេសចិន។
អាជ្ញាធរទីក្រុង Toronto ប្រទេសកាណាដា បានឱ្យដឹងថា អ្នកដែលបានឆ្លងមេរោគនេះកំពុងមានស្ថានភាពធម្មតា និងបានបញ្ជូនទៅកាន់មន្ទីរពេទ្យ។ Toronto គឺជាទីក្រុងធំជាងគេនៅប្រទេសកាណាដា ដែលមានទីតាំងនៅក្បែរព្រំដែនជាមួយសហរដ្ឋអាមេរិក។
សូមរំឭកថា រោគសញ្ញានៃជម្ងឺរលាកសួតដែលបង្កដោយមេរោគ corona នេះ រួមមានដូចជា ក្ដៅខ្លួនខ្លាំង ពិបាកដកដង្ហើម និងក្អក។ បច្ចុប្បន្ន គេមិនទាន់បង្កើតបានថ្នាំ ឬវ៉ាក់សាំងណាមួយសម្រាប់ទប់ទល់នឹងមេរោគនេះនៅឡើយទេ ប៉ុន្តែ ក្រុមអ្នកវិទ្យាសាស្ត្រនៃបណ្ដាប្រទេសក្នុងលោក កំពុងដុតដៃដុតជើងក្នុងការរកវិធីប្រឆាំងនឹងជំងឺដ៏គ្រោះថ្នាក់នេះ៕
ប្រភព៖ សារព័ត៌មានបរទេស
January 26, 2020
1400 នាក់បានស្លាប់ និងផ្ទុកមេរោគរលាកសួតថ្មី Corona បើគិតមកដល់ពេលនេះ
ប្រភពព័ត៌មានបរទេសនានាបានចុះផ្សាយជាបន្តបន្ទាប់ថា ចំនួនករណីស្លាប់ និងករណីកំពុងផ្ទុកអាសន្នរោគ Wuhan (Corona) នេះ បានកើនឡើងដល់ជិត 1400 ករណី បើគិតមកទល់នឹងម៉ោង22យប់នេះ។
បណ្ដាប្រទេសដែលកំពុងរងការឆ្លងរាលដាលនៃមេរោគដ៏ប្រល័យ Corona ដែលបង្កឱ្យរលាកផ្លូវដង្ហើម និងបាត់បង់ជីវិតជាបន្តបន្ទាប់ រួមមាន៖
1.ប្រទេសចិន។ 2.ប្រទេសថៃ។ 3.ប្រទេសអូស្ត្រាលី។ 4.ប្រទេសបារាំង។ 5.ប្រទេសជប៉ុន។ 6.ប្រទេសម៉ាឡេស៊ី។
7.ប្រទេសសិង្ហបុរី។ 8.កោះតៃវ៉ាន់។ 9.អាមេរិក។ 10.ប្រទេសវៀតណាម។ 11.ប្រទេសកូរ៉េខាងត្បូង។ 12.ប្រទេសនេប៉ាល
January 25, 2020
វ៉ាក់សាំងការពារមេរោគរលាកសួត Wuhan នឹងមានក្នុងអំឡុង3ខែទៀត
វ៉ាក់សាំងការពារមេរោគ 2019-nCoV ដែលជាមេរោគបង្កឱ្យមានជម្ងឺរលាកសួតថ្មីនៅតំបន់ Wuhan ប្រទេសចិន អាចនឹងត្រូវគេបង្កើតឡើងរួចរាល់ និងចាប់ផ្ដើមពិសោធនៅលើមនុស្សក្នុងអំឡុងពេលប្រហែល3ខែទៀត។
ក្រុមអ្នកវិទ្យាសាស្ដ្រនៃមន្ទីរវេជ្ជសាស្ដ្រជាតិសហរដ្ឋអាមរិក ជួបគ្នាក្នុងសប្ដាហ៍នេះដើម្បីពិភាក្សា និងធ្វើការជាមួយគ្នាជាបន្ទាន់។ ដោយការកំណត់អត្តសញ្ញាណលំដាប់ហ្សែន និងកូដហ្សែន អ្នកវិទ្យាសាស្ត្រអាចចាប់ផ្ដើមដំណើរការបង្កើតវ៉ាក់សាំងដោយមិនបាច់មានមេរោគគំរូ។
3ខែ គឺជារយៈពេលដែលលឿនបំផុតសម្រាប់បង្កើតថ្នាំវ៉ាក់សាំងមួយប្រភេទ ដែលធ្លាប់ត្រូវបានពិសោធនៅលើមនុស្ស។ កាលពីឆ្នាំ2003 ក្រុមអ្នកវិទ្យាសាស្ត្រអាមេរិក ត្រូវចំណាយពេលដល់ទៅ20ខែ ទើបអាចបង្កើតបានវ៉ាក់សាំងមួយប្រភេទដែលទប់ទល់នឹងអាសន្នរោគផ្លូវដង្ហើម SARS។
ទន្ទឹមនឹងអាមេរិក អ្នកវិទ្យាសាស្ត្រឯករាជជាច្រើនក្នុងពិភពលោកក៏បានរៀបគម្រោងពិសោធវ៉ាក់សាំងថ្មី និងចាត់វិធានការនានាដើម្បីទប់ទល់នឹងមេរោគថ្មី nCoV (corona)។ ដោយការសិក្សាស្រាវជ្រាវពីជ្រុងផ្សេងៗគ្នា បណ្ដាភ្នាក់ងារប្រតិកម្មនឹងអាសន្នរោគ និងសុខភាពទូទាំងពិភពលោក សង្ឃឹមថា យ៉ាងហោចណាស់ក៏នឹងមានរូបមន្តព្យាបាលមួយដែលអាចយកមកប្រើប្រាស់ជាផ្លូវការនៅក្នុងអំឡុងប៉ុន្មានខែខាងមុខនេះ។
បច្ចុប្បន្ន មន្ទីរប្រតិកម្ម និងជម្ងឺឆ្លងជាតិនៃមន្ទីរវេជ្ជសាស្ត្រចិន កំពុងរួមសហការណ៍យ៉ាងជិតស្និទ្ធជាមួយក្រុមហ៊ុនបច្ចេកវិទ្យាជីវសាស្ត្រ Moderna របស់អាមេរិក ដើម្បីបង្កើតថ្នាំវ៉ាក់សាំងដែលយោងទៅលើអាស៊ីត ribonucleic (ARN) ដែលជាម៉ូលេគុល polyme មានតួនាទីច្រើនក្នុងផ្នែកជីវសាស្ត្រ ក្នុងការបង្កើតកូដ អានកូដ សម្រួល និងបង្ហាញហ្សែន។
ក្រុមអ្នកវិទ្យាសាស្ត្រនៃសកលវិទ្យាល័យ Queensland នៃប្រទេសអូស្ត្រាលី ក៏កំពុងពិសោធថ្នាំវ៉ាក់សាំងមួយប្រភេទដែលអាចប្រើនៅលើរាងកាយមនុស្សក្រោមរូបភាពម៉ូលេគុល។ នេះគឺជាដំណើរការជាមូលដ្ឋានដើម្បីឱ្យរាងកាយមនុស្សអាចទប់ទល់នឹងមេរោគឆ្លងពីសត្វ។
ជាងនេះ Novavax ដែលជាក្រុមហ៊ុនមានស្នាដៃក្នុងការបង្កើតវ៉ាក់សាំងប្រឆាំងជម្ងឺ MERS ក៏កំពុងពិសោធ ដើម្បីបង្កើតថ្នាំវ៉ាក់សាំងការពារមេរោគរលាកសួតថ្មីនេះដែរ។
សកម្មភាពពិសោធន៍ និងបង្កើតថ្នាំវ៉ាក់សាំង បានក្លាយជារឿងបន្ទាន់នាបច្ចុប្បន្ន ខណៈដែលចំនួនអ្នកសា្លប់ដោយសារមេរោគរលាកសួត Wuhan បានកើនឡើងដល់ 41នាក់គិតមកដល់ថ្ងៃនេះ ចំណែកចំនួនអ្នកឆ្លងមេរោគនេះក៏កើនដល់ជាង 1000 នាក់។
ជម្ងឺរលាកសួតដែលបង្កឡើងដោយមេរោគ corona នេះ បានឆ្លងរាលដាលពីប្រទេសចិន ទៅកាន់បណ្ដាប្រទេសជាច្រើនក្នុងពិភពលោក ក្នុងនោះវាក៏បានឆ្លងទៅដល់អាមេរិក និងឥណ្ឌាផងដែរ៕
ប្រភព៖ សារព័ត៌មានបរទេស
January 25, 2020
មន្ទីរពិសោធន៍នៅ Wuhan ត្រូវគេសង្ស័យថា បាន “រំដោះ” មេរោគ Corona
មន្ទីរពិសោធន៍ជីវសាស្ត្រនៅតំបន់ Wuhan ដែលមានចម្ងាយពីផ្សារគ្រឿងសមុទ្រ Huanan 32 គីឡូម៉ែត្រ កំពុងត្រូវអ្នកវិទ្យាសាស្ត្រសង្ស័យថា បានធ្វើឱ្យរួច 2019-nCoV (ឈ្មោះក្នុងបញ្ជីផ្លូវការនៃមេរោគរលាកសួត Wuhan ឬ corona) ដែលជាមេរោគបង្កជម្ងឺរលាកសួតដែលកំំពុងរាតត្បាតពិភពលោក។
អាសន្នរោគរលាកសួតថ្មីដែលបង្កឡើងដោយមេរោគ nCoV ជាលើកដំបូងនៅក្រុង Wuhan ដែលគេសង្ស័យថា អាចបណ្ដាលមកពីសត្វគ្មានម្ចាស់នៅក្នុងផ្សារលក់គ្រឿងសមុទ្រ Huanan។ ក្រៅពីប្រទេសចិន ជម្ងឺនេះក៏បានរាលដាលឆ្លងទៅដល់បណ្ដាប្រទេសក្នុងពិភពលោក ក្នុងនោះមានប្រទេសថៃ ជប៉ុន កូរ៉េខាងត្បូង អាមេរិក សិង្ហបុរី នេប៉ាល បារាំង អូស្ត្រាលី ម៉ាឡេស៊ី និងវៀតណាម។
យ៉ាងនេះក្ដី អ្នកវិទ្យាសាស្ត្រមួយចំនួនគិតថា មេរោគដ៏មហាប្រល័យនេះអាចរួចចេញពីបន្ទប់ពិសោធន៍ដែលដាក់នៅក្នុងមន្ទីរសុវត្ថិភាពជីវសាស្ត្រជាតិ Wuhan (WNBL) ដែលត្រូវបានបង្កើតឡើងកាលពីឆ្នាំ2015។ លោក Tim Trevan អ្នកវិទ្យាសាស្ត្រសុវត្ថិភាពជីវសាស្ត្រ បានឱ្យដឹងថា មេរោគ SARS ក៏ធ្លាប់បានរួចចេញពីបន្ទប់ពិសោធន៍រោគឆ្លងនៅក្រុងប៉េកាំងផងដែរ។ អ្នកវិទ្យាសាស្ត្ររូបនេះបានសម្ដែងការព្រួយបារម្ភនៅពេលមេរោគរលាកសួតបន្តឆ្លងរាលដាល ហើយលោកក៏បានសង្ស័យថា មន្ទីរពិសោធន៍ខាងលើអាចមានការធ្វេសប្រហែស ធ្វើឱ្យមេរោគរួចចេញមកក្រៅ។
គួរបញ្ជាក់ថា មន្ទីរពិសោធន៍សុវត្ថិភាពជីវសាស្ត្រជាតិ Wuhan (WNBL) បានដាក់ឱ្យប្រើប្រាស់កាលពីឆ្នាំ 2017 ដើម្បីពិសោធលើមេរោគគ្រោះថ្នាក់បំផុតក្នុងលោក ដូចជា SARS និង Ebola ជាដើម។ មន្ទីរពិសោធន៍នេះគឺជាផ្នែកមួយនៃកិច្ចសហប្រតិបត្តិការណ៍រវាងចិន និងបារាំង ដើម្បីទប់ស្កាត់ និងគ្រប់គ្រងមេរោគដែលគ្រោះថ្នាក់បំផុតក្នុងលោក។
តាមសេចក្ដីរាយការណ៍នានាបញ្ជាក់ថា WNBL នេះ គឺជាមន្ទីរពិសោធន៍មួយដែលមានសុវត្ថិភាពបំផុតក្នុងពិភពលោក។
នៅព្រឹកថ្ងៃទី 25 នេះ អាជ្ញាធរខេត្រ Hubei នៃប្រទេសចិនបានបញ្ជាក់ថា មាន15ករណីបន្ថែមទៀតដែលស្លាប់ដោយសារមេរោគរលាកសួតនេះ ខណៈដែលនៅលើពិភពលោក មានអ្នកឆ្លងមេរោគនេះជាង1000នាក់។ មកដល់ពេលនេះ ចំនួនអ្នកស្លាប់ដោយមេរោគនេះ កើនដល់ 41ករណី។
ប្រទេសចិនបានបិទទ្វារមួយផ្នែកនៃមហាកំផែង និងតំបន់ល្បីៗមួយចំនួនទៀតនៅក្រុងប៉េកាំង រួមនិងទីក្រុងជាច្រើនផ្សេងទៀតដើម្បីគ្រប់គ្រងស្ថានការណ៍ ក្នងនោះ ទីក្រុងចំនួន13 ក្នុងខេត្រ Hubei ត្រូវបានដាក់បម្រាមគោចរទាំងស្រុង៕
ប្រភព៖ សារព័ត៌មានបរទេស
January 25, 2020
តើម៉ាស់បិទមុខអាចការពារមេរោគរលាកសួត Wuhan បានដែរ ឬអត់?
អាជ្ញាធរតំបន់ Wuhan បានចេញបញ្ជាឱ្យពលរដ្ឋទាំងអស់ពាក់ម៉ាស់ពេទ្យ នៅពេលចេញទៅទីសាធារណៈ ប៉ុន្តែ មនុស្សជាច្រើនបានសង្ស័យថា វាមិនអាចការពារមេរោគរលាកសួត 2019-nCoV (បច្ចុប្បន្នមេរោគ corona នេះត្រូវបានគេកត់ត្រាជាផ្លូវការក្រោមឈ្មោះ 2019-nCoV) ព្រោះវាមានសភាពស្ដើងពេក។
យ៉ាងនេះក្ដី អ្នកជំនាញផ្នែករោគឆ្លងបានឱ្យដឹងថា របាំងមុខ (ម៉ាស់) ប្រភេទសម្រាប់ពេទ្យ ដែលប្រើម្ដងចោល វាមានតម្លៃទាប អាចបាំងច្រមុះ មាត់ ហើយអាចកាត់បន្ថយហានិភ័យនៃការឆ្លងមេរោគ បើសិនប្រើប្រាស់ត្រូវតាមរបៀប និងជាប់ជាប្រចាំ។
បច្ចុប្បន្ន គេមិនទាន់ដឹងច្បាស់អំពីកម្រិតនៃប្រសិទ្ធភាពរបស់ម៉ាស់ប្រភេទនេះ នៅពេលប្រើខាងក្រៅមន្ទីរពេទ្យ។ ក្នុងការពិសោធកន្លងមក អ្នកជំនាញគ្រាន់តែបានផ្ដោតទៅលើតែប្រសិទ្ធភាពនៃម៉ាស់ពេទ្យ ប្រើក្នុងបរិស្ថានរបស់គ្រូពេទ្យប៉ុណ្ណោះ។
យោងតាមអ្នកស្រី Julie Vaishampayan ប្រធានគណកម្មការវេជ្ជសាស្ត្រសាធារណៈ និងសមាគមជម្ងឺឆ្លងអាមេរិក ម៉ាស់ពេទ្យត្រូវបានគេចាត់ទុកដូចជា “ខ្សែការពារចុងក្រោយបង្អស់”។
អ្នកស្រីបណ្ឌិតខាងលើប្រាប់ថា៖ ជាក់ស្ដែង ការលាងដៃឱ្យស្អាតបាត និងជៀសវាងការប៉ះពាល់អ្នកជម្ងឺ គឺវាសំខាន់ជាងម៉ាស់ ព្រោះថា ម៉ាស់ធម្មតា មានចន្លោះប្រហោងនៅជុំវិញមាត់ ដូច្នេះ មេរោគនៅតែអាចឆ្លងចូលទៅក្នុងផ្លូវដង្ហើមតាមរយៈចន្លោះប្រហោងនោះ។
វេជ្ជបណ្ឌិត Amesh Adalja អ្នកឯកទេសផ្នែកជម្ងឺឆ្លងនៃមជ្ឈមណ្ឌលវេជ្ជសាស្ត្រ John Hopkins សហរដ្ឋអាមេរិក ឱ្យដឹងថា ចំពោះម៉ាស់សម្រាប់ពេទ្យវះកាត់វិញ វាអាចទប់ស្កាត់គ្រាប់ល្អិតនៃជាតិរាវដែលខ្ទាតចេញពីផ្លូវដង្ហើមនៅពេលអ្នកជម្ងឺកណ្ដាស់ ឬក្អក មិនឱ្យជ្រៀតចូលទៅក្នុងមាត់ ឬច្រមុះអ្នកប្រើប្រាស់។ មេរោគរលាកសួត 2019-nCoV វាអាចឆ្លងពីមនុស្សម្នាក់ទៅមនុស្សម្នាក់ តាមរយៈគ្រាប់ល្អិតនៃជាតិរាវប៉ុណ្ណោះ។
ការសិក្សាស្រាវជ្រាវអំពីអាសន្នរោគ SARS ក្នុងឆ្នាំ2013 បានបង្ហាញថា ការប្រើប្រាស់ម៉ាស់ពេទ្យ ឬម៉ាស់ការពារសារធាតុពុល សុទ្ធតែអាចកាត់បន្ថយការឆ្លងរោគចំពោះបុគ្គលិកពេទ្យបានដល់ទៅ 85%។
បញ្ហាប្រសិទ្ធភាពនៃម៉ាស់ បច្ចុប្បន្នគេអាចទុកចិត្តបានច្រើន ប៉ុន្តែក្រុមអ្នកជំនាញផ្នែករោគឆ្លង មានការព្រួយបារម្ភអំពីការប្រើប្រាស់ម៉ាស់ខុសបច្ចេកទេស បែបនេះក៏អាចបង្កហានិភ័យនៃការឆ្លងមេរោគផងដែរ៕
ប្រភព៖ សារព័ត៌មានបរទេស
January 25, 2020
គូស្នេហ៍ថ្មីរបស់ម្ចាស់ Amazon ជាប់សង្ស័យថា មានចំណែកក្នុងការលក់សារឆ្លើយឆ្លងស្នេហាជាមួយ Bezos ទៅឱ្យកាសែតក្នុងតម្លៃ…
Lauren Sanchez ដែលជាគូស្នេហ៍ថ្មីរបស់ CEO នៃក្រុមហ៊ុន Amazon លោក Jeff Bezos បានផ្ញើសារដែលខ្លួនបានឆ្លើយឆ្លងជាមួយមហាសេដ្ឋីរូបនេះ ទៅឱ្យបងប្រុសរបស់ខ្លួន មុនពេលវាត្រូវបានលក់ទៅឱ្យសារព័ត៌មាន National Inquirer ជាបន្ត។
សារឆ្លើយឆ្លងដែលត្រូវនាង Lauren Sanchez ផ្ញើទៅឱ្យបងប្រុសរបស់នាងគឺលោក Michael គឺជាឯកសារមួយដែលត្រូវបានគេបញ្ជូនឡើងទៅកាន់រដ្ឋអាជ្ញាសហរដ្ឋដើម្បីធ្វើការស៊ើបអង្កេតករណីចោទប្រកាន់ក្រុមហ៊ុន Amercan Media ជាម្ចាស់កាសែត National Enquirer ដែលថា ក្រុមហ៊ុននេះបានស្វែងរកវិធីជំរិតយកប្រាក់ពីមហាសេដ្ឋី Jeff Bezos។
ភ័ស្តុតាងដែលក្រុមរដ្ឋអាជ្ញាសហរដ្ឋទទួលបាន រួមមាន សារសាសងគ្នាដែលម្ចាស់ Amazon ផ្ញើទៅកាន់នាង Lauren Sanchez កាលពីថ្ងៃទី10 ឧសភា ឆ្នាំ2018 ហើយក្រោយមកវាបានធ្លាក់ទៅដល់ដៃលោក Michael Sanchez(បងប្រុសរបស់នាង Lauren Sanchez )។ កាសែត National Enquirer បានចុះផ្សាយនូវខ្លឹមសារនៃសារខាងលើ កាលពីខែមករា 2019 ក្នុងអត្ថបទមួយសរសេរអំពីករណីម្ចាស់ Amazon មានទំនាក់ទំនងស្នេហាលួចលាក់ជាមួយនាង Lauren Sanchez។
សារព័ត៌មាន Wall Street Journal ប្រមូលបានសារទាំងនោះ ក៏ដូចជាភ័ស្ដុតាងទាក់ទិននឹងលោក Michael Sanchez ដែលទទួលបានប្រាក់ 200,000ដុល្លារ ពីកាសែត National Enquirer ទៅតាមកិច្ចសន្យាដែលបានធ្វើឡើងតាំងពីឆ្នាំ2018។ ក្រុមហ៊ុន American Media ក៏ធ្លាប់បានប្រកាសថា Michael Sanchez គឺជាប្រភពព័ត៌មានរបស់ National Enquirer។
Sanchez និង Bezos នៅ Mumbai នៃប្រទេសឥណ្ឌា កាលពីថ្ងៃទី16 មករា 2020
លោក Michael Sanchez ដែលជាបងប្រុសរបស់នាង Lauren Sanchezនិយាយថា ខ្លួនទទួលបានសារ និងរូបថតដោយស្របច្បាប់។
រដ្ឋអាជ្ញាសហរដ្ឋ មិនទាន់បានធ្វើការចោទប្រកាន់ទៅលើ Michael Sanchez, Lauren Sanchez ឬអ្នកពាក់ព័ន្ធណាម្នាក់នៅឡើយ។
ការដែល Bezos មានទំនាក់ទំនងស្នេហាលួចលាក់ជាមួយនាង Lauren Sanchez ត្រូវគេរិះគន់ជាខ្លាំង ខណៈលោក និងប្រពន្ធរបស់លោក នាង MacKenzie Bezos លែងលះគ្នា ក្រោយការរួមរស់ជាមួយគ្នា 25ឆ្នាំ។
Lauren Wendy Sanchez គឺជាអ្នកយកព័ត៌មាន អ្នកសម្ដែង ម្ចាស់ផលិតកម្ម អ្នកបើកយន្តហោះ និងអ្នកជំនួញជនជាតិអាមេរិក
លោក Bezos ដែលជាអ្នកមានបំផុតម្នាក់ក្នុងពិភពលោក បានបង្ហាញខ្លួនជាមួយនាង Sanchez ជាលើកដំបូងក្នុងព្រឹត្តិការណ៍មួយកាលពីថ្ងៃទី16 មករាកន្លងទៅ នៅ Mumbai (អតីតក្រុង Bombay) នៃប្រទេសឥណ្ឌា៕
ប្រភព៖ សារព័ត៌មានបរទេស
January 25, 2020