គិតមកដល់ព្រឹកនេះ (29 មករា 2020) មានអ្នកស្លាប់ដោយសារជំងឺរលាកសួតដែលបង្កឡើងដោយមេរោគ Corona កើនឡើងដល់ 132នាក់ហើយ។
តាមសេចក្ដីរាយការណ៍នៃសារព័ត៌មាន CNBC និង Bloomberg បានឱ្យដឹងថា បច្ចុប្បន្ន ប្រទេសចិនមានអ្នកឆ្លងមេរោគ Corona កើនឡើងដល់ជាង 6,000ករណី ដោយសារព័ត៌មានទាំង2 ខាងលើបានបញ្ជាក់ថា ចំនួននេះរួមទាំងកោះតៃវ៉ាន់ផងដែរ។
សម្រាប់តែក្នុងតំបន់ Hubei (ចិនដីគោក)មួយ ត្រូវបានគេរាយការណ៍ជាផ្លូវការថា មានអ្នកឆ្លងមេរោគនេះចំនួន 3,554ករណី និងស្លាប់ 125ករណី។
ប្រភព៖ សារព័ត៌មានបរទេស
ពេទ្យជនជាតិជប៉ុនដែលស្ថិតនៅក្នុងទីក្រុងវូហាន ប្រទេសចិន បានបង្ហើបឱ្យដឹងថា ចំនួនអ្នកឆ្លងមេ រោគ វីរុសកូរ៉ូណា មានច្រើនជាងក្នុងរបាយការណ៍ទៅទៀត ដោយសារតែភាពយឺតយ៉ាវក្នុងការបង្ហាញព័ត៌មានរបស់រដ្ឋបាលចិន។
ស្ថានីយទូរទស្សន៍ NHK របស់ជប៉ុនបានឆ្លើយឆ្លងតាមទូរស័ព្ទជាមួយគ្រូពេទ្យហ្វឹកហាត់ជនជាតិជប៉ុនម្នាក់ដែលកំពុងស្ថិតនៅក្នុងទីក្រុងវូហាន និងសុំមិនបញ្ចេញឈ្មោះបានរៀបរាប់ថា៖ “មនុស្សម្នានៅទីនោះមិនសូវជាភ្ញាក់ផ្អើលប៉ុន្មានទេក្នុងរយៈដំបូងៗ ខ្ញុំគិតថាគ្មាននរណានឹកស្មានដល់ថា វានឹងឆ្លងរាលដាលឆាប់រហ័សបែបនេះ”។
ពេទ្យហ្វឹកហាត់ជនជាតិជប៉ុនរូបនោះបានប៉ាន់ស្មានថា ចំនួនអ្នកឆ្លងមេរោគ អាចនឹងខ្ពស់ជាងនៅក្នុងរបាយការណ៍ច្រើនណាស់ ដោយលោកបានបញ្ជាក់ថា អំឡុងប្រហែលជាថ្ងៃទី 3មករា រូបលោកបានទទួលដំណឹងថា បុគ្គលិកមន្ទីរពេទ្យអាចនឹងឆ្លងមេរោគនេះ តែសារព័ត៌មានចិនប្រើពេលវេលាច្រើនជាង 2សប្ដាហ៍ ទើបរាយការណ៍ថា បុគ្គលិកពេទ្យទាំងនោះបានឆ្លងមេរោគវីរុសកូរ៉ូណាប្រភេទថ្មី។
អភិបាលក្រុង វូហាន៖ ត្រូវរង់ចាំការអនុម័តសិន ទើបអាចផ្សាយព័ត៌មានបាន
រដ្ឋបាលក្រុងវូហាន ត្រូវរងការរិះគន់យ៉ាងខ្លាំង រឿងការលាក់បាំងព័ត៌មាន រហូតធ្វើឱ្យការឆ្លងរីករាលដាលសាយភាយធ្ងន់ធ្ងរ រហូតពិបាកក្នុងការទប់ស្កាត់ ជាពិសេសក្នុងអំឡុងពេលចូលឆ្នាំចិន ដែលជនជាតិចិនរាប់លាននាក់ធ្វើដំណើរទាំងក្នុងប្រទេស និងក្រៅប្រទេស។
លោក ចូ សៀនវ៉ាង អភិបាលក្រុងវូហាន បានទទួលស្គាល់ថា ការបញ្ចេញព័ត៌មានមានការយឺតយ៉ាវមែន ព្រោះត្រូវទទួលបានការអនុញ្ញាតពីថ្នាក់លើ គឺមណ្ឌលហ៊ូពើយ និងគណៈកម្មការសុខាភិបាលជាតិចិន ជាមុនសិន ទើបអាចបញ្ចេញព័ត៌មានបាន។
លោកអភិបាលក្រុងវូហាន ក៏បានទទួលស្គាល់ដែរថា មុនមានវិធានការបិទទីក្រុងវូហាននេះ មានអ្នកធ្វើដំណើរចេញពីទីក្រុងនេះច្រើនជាង 5លាននាក់។ លោកបានឱ្យដឹងទៀតថា លោកដឹងច្បាស់ពីការមិនពេញចិត្តរបស់ប្រជាជន តែវិធានការផ្សេងៗ ចាំបាច់ត្រូវតែប្រើ ដើម្បីទប់ស្កាត់ និងគ្រប់គ្រង។
អ្នកជំនាញការបង្ហាញថា មិនមានអាការរោគ ក៏ចម្លងមេរោគបានដែរ
អ្នកជំនាញការជនជាតិជប៉ុនបាននិយាយថា ការគ្រប់គ្រងការចម្លងរោគ និងការការពារ ពិបាកនឹងធ្វើបានណាស់សម្រាប់វីរុសកូរ៉ូណាប្រភេទថ្មីនេះ។ ការចម្លងមេរោគអាចកើតឡើងបាន ខណៈដែលអ្នកផ្ទុកមេរោគមិនទាន់បង្ហាញរោគសញ្ញា។
លោកសាស្ត្រាចារ្យ មីតស៊ីអូ ខាកូ នៃមហាវិទ្យាល័យវេជ្ជសាស្ត្រ និងឱសថសាស្ត្រ ថូហូកូ បានរៀបរាប់ថា ចំនួនអ្នកជំងឺនៅក្នុងប្រទេសចិនបានកើនច្រើនឡើងជាបន្តបន្ទាប់ ទោះជាមានការគ្រប់គ្រងការធ្វើដំណើរក្នុងទីក្រុងវូហាន និងកន្លែងផ្សេងៗក្នុងប្រទេសចិនក៏ដោយ។ លោកបានបន្តទៀតថា រដ្ឋបាលចិនមានអារម្មណ៍ដឹងអំពីភាពប្រញាប់ប្រញាល់ខ្លាំងឡើង ដោយសារតែមនុស្សដែលជាភ្នាក់ងារចម្លងមេរោគនេះ អាចនឹងសាយភាយវីរុសនេះបាន ទោះជាក្នុងអំឡុងពេលដែលមិនមានបង្ហាញអាការរោគក៏ដោយ។
វីរុសកូរ៉ូណាប្រភេទថ្មីនេះ ខុសប្លែកពីប្រភេទដែលបង្កឱ្យកើតការសាយភាយរាតត្បាតរបស់ជំងឺខាងប្រព័ន្ធដកដង្ហើមទាន់ហន់ និងធ្ងន់ធ្ងរ ឬសារស៍ និងរោគខាងផ្លូវដង្ហើមមជ្ឈិមបូព៌ា ឬជំងឺមើស ព្រោះថា អ្នកដែលឆ្លងមេរោគវីរុសជំងឺសារស៍ និងមើស នឹងមិនសាយភាយ ឬចម្លងទៅបុគ្គលដទៃឡើយ ខណៈដែលខ្លួនឯងនៅមិនទាន់មានអាការរោគ ដូចជាក្អក ឬហៀរសំបោរ ជាដើមនោះ។
លោកសាស្ត្រចារ្យ ខាកូ បានដាស់តឿនថា អ្នកដែលមានជំងឺរ៉ាំរ៉ៃ អាចនឹងមានអាការធ្ងន់ធ្ងរ បើបានទទួលមេរោគវីរុសកូរ៉ូណាប្រភេទថ្មីនេះ លោកព្រមទាំងបានដាស់តឿនទៀតថា ចូរព្យាយាមចៀសវាងកុំឱ្យបានទទួលវីរុសនេះឱ្យសោះ ទោះជាតិចតួចក៏ដោយ ព្រោះវាជាមេរោគប្រភេទថ្មីដែលមនុស្សមិនធ្លាប់ស្គាល់ និងមិនមានបទពិសោធពីមុនមក៕
ប្រភព៖ សារព័ត៌មានបរទេស
មនុស្សប្រមាណ 5លាននាក់ បានចាកចេញពីតំបន់ Wuhan មុនពេលតំបន់នេះត្រូវបានដាក់បម្រាមគោចរកាលពីថ្ងៃទី23មករា ព្រោះតែការឆ្លងរាលដាលនៃមេរោគរលាកសួតប្រភេទថ្មី Corona។
បច្ចុប្បន្ន មនុស្សប្រមាណជា 9លាននាក់កំពុងស្ថិតនៅក្នុងតំបន់ Wuhan (ដែលជាទីតាំងឆ្លងមេរោគ Corona មុនគេ) នៃខេត្ត Hebei ប្រទេសចិន នេះបើតាមការឱ្យដឹងពីអភិបាលក្រុង លោក Zhou Xianwang។ អភិបាលក្រុងរូបនេះ បានបន្ថែមថា ក្នុងចំណោមអ្នកជំងឺ 2,700នាក់ដែលកំពុងត្រូវបានតាមដាន គឺមានប្រហែល 1,000នាក់អាចនឹងមានផ្ទុកមេរោគ Corona (nCoV)នេះ។
គិតមកដល់ព្រឹកថ្ងៃទី27 មករានេះ តំបន់ Wuhan មានអ្នកជំងឺដល់ទៅ 533នាក់ ត្រូវបានគេបញ្ជាក់ថា មានផ្ទុកជំងឺរលាកសួតថ្មី Corona។ ខេត្ត Hebei នៃប្រទេសចិន មានអ្នកជំងឺរលាកសួតជាងពាក់កណ្ដាលក្នុងចំណោមអ្នកជំងឺជាង 2,700នាក់នៅប្រទេសចិន នេះបើតាមគេហទំព័រ CNBC។
ទីភ្នាក់ងារសារព័ត៌មាន Aljazeera បានឱ្យដឹងដែរថា អាជ្ញាធរចិនបានបិទទ្វារទីក្រុងចំនួនជិត 20 ដើម្បីទប់ស្កាត់ការរីករាលដាលនៃមេរោគកំណាច Corona ដែលបានសម្លាប់មនុស្សយ៉ាងតិច 81នាក់ ក្នុងរយៈពេលតែប៉ុន្មានសប្ដាហ៍ចុងក្រោយនេះ។
ទីភ្នាក់ងារសារព័ត៌មាន Nytimes បានដកស្រង់សម្ដីលោកអភិបាលក្រុង Wuhan លោក Zhou Xianwang ឱ្យដឹងថា មុនការដាក់បម្រាមគោចរ មានមនុស្សចំនួនប្រមាណជា 5លាននាក់បានចាកចេញពីទីក្រុង Wuhan ទៅកាន់តំបន់ផ្សេងៗក្នុងពិភពលោក។
បើតាមគេហទំព័រដែលមានឈ្មោះថា “ថ្មីៗ” បានសរសេរថា លោក ជា អូន អ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិលកម្ពុជា បានឱ្យដឹងថា បច្ចុប្បន្នមានជនជាតិចិនដែលមកពីទីក្រុងវូហានចំនួនជាង 3,000នាក់បានស្នាក់នៅក្នុងប្រទេសកម្ពុជា ដោយពួកគេបានធ្វើដំណើរមកដល់កម្ពុជាតាំងពីថ្ងៃទី23 មករាកន្លងទៅ៕
ប្រភព៖ សារព័ត៌មានបរទេស
“ខ្ញុំមិនចង់ធ្វើការងារនេះទៀតទេ! សូមដេញខ្ញុំចោលទៅ ជូនខ្ញុំទៅផ្ទះ! តើគ្រូពេទ្យដូចពួកខ្ញុំ មិនត្រូវការរស់ទេ មែនទេ?”។ នេះជាសម្ដីរបស់គ្រូពេទ្យម្នាក់ដែលស្ថិតក្នុងការ “ឡោមព័ទ្ធ” របស់មេរោគ Corona និងក្រោមសម្ពាធការងារដ៏គួរឱ្យខ្លាចនៅក្នុងទីក្រុង Wuhan។
កាលពីថ្ងៃទី23 មករា នៅលើបណ្ដាញសង្គម Weibo ដ៏ល្បីល្បាញរបស់ចិន គេឃើញមានវីដេអូឃ្លិបមួយដែលទទួលបានការចាប់អារម្មណ៍យ៉ាងខ្លាំងពីអ្នកលេងអ៊ីនធើណិត។ ក្នុងវីដេអូឃ្លិបនោះ បង្ហាញឱ្យឃើញអំពីកម្រិតដ៏ធ្ងន់ធ្ងរនៃសម្ពាធការងារនៅក្នុងមន្ទីរពេទ្យនានាដែលពោរពេញដោយអ្នកជំងឺរលាកសួតប្រភេទថ្មី ដែលបង្កឡើងដោយមេរោគ Corona (nCoV)។
គិលានុបដ្ឋាយិកាម្នាក់ដែលមានផ្ទៃពោះ 7ខែ នៅតែត្រូវទៅកាន់មន្ទីរពេទ្យ ដើម្បីថែទាំអ្នកជំងឺ ហើយចុងក្រោយគិលានុបដ្ឋាយិកាម្នាក់នេះក៏បានឆ្លងមេរោគ Corona។ ម្ដាយដែលមានវ័យ 70ឆ្នាំរបស់គិលានុបដ្ឋាយិកាម្នាក់នេះក៏ឆ្លងមេរោគ Corona ពីនាងដែរ។
បុគ្គលិកពេទ្យស្ទើរតែទាំងអស់នៅ Wuhan ត្រូវបន្ថែមម៉ោងប្រចាំការក្នុងមន្ទីរពេទ្យ។ ក្នុងអំឡុងពេលប្រចាំការមួយពេលៗ ពួកគេមិនបានផឹកទឹក និងត្រូវស្លៀកខោទឹកនោមជាប់ជានិច្ច ព្រោះតែមិនមានពេលវេលាគ្រប់គ្រាន់សម្រាប់ការបំពេញធុរៈផ្ទាល់ខ្លួននេះ។ គ្រូពេទ្យភាគច្រើនដែលត្រូវប៉ះពាល់សារធាតុសម្លាប់មេរោគច្រើន ធ្វើឱ្យដៃរបស់ពួកគេត្រូវប្ដូរទៅជាពណ៌សស្លេកស្លាំង ហើយស្បែកមុខក៏ត្រូវរលាក ព្រោះពាក់ម៉ាស់ការពារជាតិពុល និងមេរោគក្នុងរយៈពេលយូរជាប់ជានិច្ច។
Helen ធ្វើការនៅតំបន់ដែលមានអ្នកជំងឺដែលគេសង្ស័យថា មានផ្ទុកមេរោគ Corona ក្នុងមន្ទីរពេទ្យស៊ាងហៃ ប្រទេសចិន មានឱកាសហូបមីតែ 1ចានគត់ក្នុងរយៈពេល 1ថ្ងៃដែលនាងប្រចាំការ ហើយនាងក៏មិនបានគេង ឬសម្រាកដែរ ដោយសារតែខ្វះបុគ្គលិក។ ចំណែកប្ដី និងកូនរបស់នាង បានចាកចេញទៅស្រុកកំណើតបាត់ទៅហើយ។
មន្ទីរពេទ្យភាគច្រើនដែលនៅជុំវិញក្រុង Wuhan ត្រូវប្រឈមនឹងភាពតានតឹង និងសម្ពាធការងារដ៏ធ្ងន់ធ្ងរ រួមនឹងហានិភ័យនៃការឆ្លងមេរោគ ព្រមទាំងកង្វះខាតគ្រប់បែបយ៉ាង។ មន្ទីរពេទ្យធំៗ នៅតំបន់នោះ ពោរពេញដោយអ្នកជំងឺ ហើយសម្ភារវេជ្ជសាស្ត្រ ឯគ្រែសម្រាប់អ្នកជំងឺក៏ខ្វះខាត។ ចំណែកបុគ្គលិកពេទ្យវិញ ក៏មិនមានចំនួនច្រើនគ្រប់គ្រាន់ដើម្បីទប់ទល់នឹងការកើនឡើងនៃអ្នកជំងឺ ជាហេតុធ្វើឱ្យពួកគេម្នាក់ៗ ត្រូវបាក់កម្លាំង។ មនុស្សជាច្រើនដែលសង្ស័យថា មានផ្ទុកមេរោគ Corona ប៉ុន្តែត្រូវបានគេបដិសេធមិនទទួលការពិនិត្យ និងព្យាបាល ព្រោះពេទ្យគ្មានកន្លែងសម្រាប់អ្នកជំងឺថ្មី។
គ្រូពេទ្យម្នាក់ឈ្មោះ Xincheng បានឱ្យដឹងថា៖ “ស្ថានភាពនៅទីនេះ ពិតជាគួរឱ្យខ្លាចណាស់។ មន្ទីរពេទ្យធំៗ មានសភាពណែនណាន់តាន់តាប់ មិនអាចទទួលអ្នកជំងឺថ្មីទៀតបានទេ”។
ជាងនេះទៅទៀត បុគ្គលិកពេទ្យជាច្រើនត្រូវបានគេរើសអើងជាទីបំផុត ទាក់ទិននឹងអាហារការហូបចុក និងបញ្ហាផ្សេងៗជាច្រើនទៀត។ ក្រុមហ៊ុនផ្គត់ផ្គង់អាហារជាច្រើន បានបដិសេធការបញ្ជាទិញពីក្រុមគ្រូពេទ្យដែលកំពុងធ្វើការនៅក្នុងបណ្ដាមន្ទីរពេទ្យដែលមានអ្នកជំងឺរលាកសួត ព្រោះតែភ័យខ្លាចឆ្លងមេរោគ Corona។
លើសពីនេះ បើយោងតាមមជ្ឈមណ្ឌលគ្រប់គ្រងរោគឆ្លងនៃប្រទេសចិន បានឱ្យដឹងថា គិតមកត្រឹមថ្ងៃទី25មករា ក្រុមគ្រូពេទ្យយ៉ាងតិច 15នាក់ នៅតំបន់ Wuhan បានឆ្លងមេរោគរលាកសួតប្រភេទថ្មីនេះពីអ្នកជំងឺក្នុងអំឡុងពេលបំពេញការងារ។ ក្នុងនោះ គិលានុបដ្ឋាយិកា 13នាក់ រួមនឹងវេជ្ជបណ្ឌិតម្នាក់បានឆ្លងមេរោគពីអ្នកជំងឺតែម្នាក់គត់ ក្នុងពេលវះកាត់ខួរក្បាល។
គ្រូពេទ្យយ៉ាងតិច 5នាក់ នៅទីក្រុង Huanggang ក្បែរតំបន់ Wuhan ក៏បានឆ្លងមេរោគ Corona នេះដែរ។ វេជ្ជបណ្ឌិត Jiang Jijun បានបាត់បង់ជីវិតក្នុងអំឡុងពេលព្យាបាលអ្នកជំងឺរលាកសួត។ ចំណែកវេជ្ជបណ្ឌិត Liang Wudong អាយុ 62ឆ្នាំ ក៏បានស្លាប់បន្ទាប់ពីបានឆ្លងមេរោគ Corona អស់រយៈពេល 9ថ្ងៃ៕
ប្រភព៖ សារព័ត៌មានបរទេស
អាសន្នរោគ Wuhan (Corona) ប្រទេសចិន កំពុងធ្វើឱ្យមានផលប៉ះពាល់យ៉ាងធ្ងន់ធ្ងរដល់វិស័យឧស្សាហកម្មនៃប្រទេសនេះ។
រដ្ឋាភិបាលចិនថ្មីៗនេះ បានបង្ខំចិត្តប្រកាសដាក់ចេញនូវវិធានការមិនធម្មតាមួយ ដើម្បីជួយទប់ស្កាត់ការរាល ដាលនៃមេរោគរលាកសួតនេះ ដោយហាមមិនឱ្យក្រុមហ៊ុនទាំងឡាយធ្វើសកម្មភាពឡើងវិញនៅមុនថ្ងៃទី22 កុម្ភៈ ឆ្នាំ2020 ដូច្នេះ បុគ្គលិកនៃក្រុមហ៊ុនទាំងអស់នឹងបានឈប់សម្រាកបន្ថែម3ថ្ងៃទៀត ក្រោយពិធីបុណ្យចូលឆ្នាំចិន។
លើសពីនេះ អាជ្ញាធរនៃតំបន់មួយចំនួន ថែមទាំងបានដាក់បទបញ្ជាឱ្យក្រុមហ៊ុនទាំងអស់ ផ្អាកដំណើររហូតដល់ថ្ងៃទី9កុម្ភៈ ឆ្នាំ2020 លើកលែងតែក្រុមហ៊ុនដែលផ្ដល់សេវាកម្មសំខាន់ៗ ដូចជាក្រុមហ៊ុនទឹក ភ្លើង ឬផ្សារទំនើប។
បទបញ្ជាខាងលើ មិនត្រឹមតែប៉ះពាល់ដល់ក្រុមហ៊ុនក្នុងស្រុកនោះទេ តែវាប៉ះពាល់ដល់បណ្ដាក្រុមហ៊ុនបរទេសដែលរកស៊ីជាមួយចិន ពិសេសគឺនៅក្រុងសៀងហៃ។
តំបន់ Suzhou នៃប្រទេសចិន ដែលជាមជ្ឈមណ្ឌលបច្ចេកវិទ្យាដ៏ធំមួយ ស្ថិតនៅភាគពាយព្យនៃក្រុងសៀងហៃ កាលពីថ្ងៃចន្ទកន្លងទៅបានចេញបទបញ្ជា ហាមមិនឱ្យក្រុមហ៊ុនទាំងអស់ ធ្វើសកម្មភាពឡើងវិញនៅមុនថ្ងៃទី8មិនា ឆ្នាំ2020 នេះបើតាមការផ្សាយរបស់ទូរទស្សន៍ជាតិចិន។ នៅតំបន់នេះ មានក្រុមហ៊ុនយ៉ាងតិច 1,500 ក្នុងនោះក៏មានក្រុមហ៊ុនធំៗរបស់ជប៉ុន ដូចជា Panasonic និង Kobe Steel ផងដែរ។
ទន្ទឹមនិងនេះ អាជ្ញាធរនៃតំបន់ផ្សេងៗមួយចំនួនទៀតក៏បានចេញបទបញ្ជាប្រហាក់ប្រហែលគ្នានេះដែរ។ អាជ្ញាធរខេត្ត Shandong និង Shanxi ក៏បានហាមបុគ្គលិកបម្រើការឱ្យក្រុមហ៊ុនទាំងឡាយក្នុងខេត្តទាំងពីរនេះ ត្រឡប់មកធ្វើការវិញ ដោយរង់ចាំបទបញ្ជាថ្មី។
Foxconn ដែលជារោងចក្រផលិតទូរស័ព្ទឆ្លាតវៃក្នុងខេត្ត Shandong បានសម្រេចឱ្យបុគ្គលិកឈប់សម្រាកបន្ថែម3ថ្ងៃពីលើថ្ងៃសម្រាករដូវចូលឆ្នាំចិន ពោលគឺបានសម្រេករហូតដល់ថ្ងៃទី3កុម្ភៈ ឆ្នាំ2020 យូរជាងជិតមួយសប្ដាហ៍ បើធៀបនឹងគម្រោងដំបូង។
ចំណែកនៅឯក្រុង Wuhan វិញ អាជ្ញាធរបានសម្រេចចិត្តដាក់បម្រាមគោចរ ហើយមធ្យោបាយធ្វើដំណើរសាធារណៈភាគច្រើនត្រូវផ្អាកដំណើរការ។ រីឯក្រុមហ៊ុនផលិតរថយន្តនានាវិញ ក៏ត្រូវកែសម្រួលសង្វាក់ផលិតកម្ម ដើម្បីសម្របខ្លួនទៅនឹងបម្រាមគោចរនេះផងដែរ៕
ប្រភព៖ សារព័ត៌មានបរទេស
ក្រុមអ្នកស្រាវជា្រវបានបង្កើតផែនទីមួយដើម្បីបង្ហាញអំពីទិន្នន័យនៃចំនួនករណីឆ្លងមេរោគ Corona និងតំបន់ដែលរងការរាតត្បាតនៃមេរោគនេះ ដោយយោងទៅតាមរបាយការណ៍ពីប្រភពព័ត៌មានគួរជាទីទុកចិត្ត។
ក្រុមមន្ត្រីចិនបានឱ្យដឹងថា ចំនួនអ្នកស្លាប់ដោយសារមេរោគ Corona ដែលមានប្រភពពីតំបន់ Wuhan បានកើនឡើងដល់ 106នាក់ និងចំនួនអ្នកឆ្លងមេរោគនេះក៏កើនដល់ជាង 4500នាក់។ ដោយមើលឃើញភាពចាំបាច់ ក្រុមអ្នកស្រាវជ្រាវមកពីសកលវិទ្យាល័យ Johns Hopkins បាននាំគ្នាបង្កើតផែនទីដើម្បីតាមដានស្ថានការណ៍នៃការវិវដ្ដរបស់មេរោគ និងដើម្បីបង្ហាញអំពីទិន្នន័យនានាទាក់ទិននឹងអាសន្នរោគនេះ ដោយប្រើប្រាស់ទិន្នន័យដែលបានមកពីមជ្ឈមណ្ឌលគ្រប់គ្រង និងទប់ស្កាត់រោគឆ្លងនៃប្រទេសចិន និងបណ្ដាប្រទេសក្នុងពិភពលោក រួមនិងអង្គការសុខភាពពិភពលោក។ល។
នៅពេលមានរបាយការណ៍ថ្មី ផែនទីនេះនឹងធ្វើបច្ចុប្បន្នភាពអំពីចំនួនករណីឆ្លង និងករណីស្លាប់ រួមនិងអ្នកជម្ងឺដែលបានជាសះស្បើយ ទៅតាមពេលវេលាជាក់ស្ដែង (Real Time)។ ចំនុចក្រហមគឺបង្ហាញពីទីកន្លែងដែលមានអ្នកឆ្លងរោគ។ ទំហំនៃចំនុចក្រហម គឺស្មើនឹងចំនួនអ្នកឆ្លងមេរោគ។ នៅពេលចុចទៅលើចំនុចក្រហម វានឹងបង្ហាញព័ត៌មាននៃតំបន់ ពេលវេលានៃការធ្វើបច្ចុប្បន្នភាព និងប្រភពព័ត៌មាន។ នៅផ្នែកខាងលើ ជ្រុងខាងឆ្វេង គឺជាមុខងារពង្រីក និងបង្រួមទីតាំង ដើម្បីងាយស្រួលក្នុងការពិនិត្យមើលទិន្នន័យ។
មកដល់បច្ចុប្បន្ន ចំនួនប្រទេសដែលបានប្រកាសថាបានរកឃើញអ្នកជំងឺរលាកសួត Corona គឺចំនួន16ប្រទេស បូករួមទាំងកោះតៃវ៉ាន់។
នៅប្រទេសចិន យ៉ាងហោចណាស់មានមនុស្សជាង33លាននាក់ រងផលប៉ះពាល់ពីអាសន្នរោគនេះ បន្ទាប់ពីវាបានឆ្លងរាលដាលខ្លាំងនាំឱ្យអាជ្ញាធរចេញបម្រាមគោចរនៅទីក្រុង Wuhan និងបណ្ដាទីក្រុងជាច្រើនផ្សេងទៀតដែលនៅក្បែរៗតំបន់ Wuhan នេះគឺមិនទាន់និយាយដល់ផលប៉ះពាល់ទៅលើប្រជាជននៃបណ្ដាប្រទេសក្នុងពិភពលោក។
ប្រភព៖ ព័ត៌មានបរទេស
ក្នុងរយៈពេល3ថ្ងៃនៃពិធីចូលឆ្នាំចិន ឆ្នាំនេះ (2020) គេបានកត់សម្គាល់ឃើញថា កំណើននៃភ្ញៀវទេសចរដែលបានទៅកម្សាន្ត និងស្នាក់នៅក្នុងខេត្តព្រះសីហនុ មានការកើនឡើងគួរឱ្យកត់សម្គាល់។
កាលពីថ្ងៃទី26 មករា ម្សិលមិញ ប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្តគ្រឹះស្នា បានថ្លែងថា ក្នុងអំឡុងពេល 3ថ្ងៃនៃឱកាសបុណ្យចូលឆ្នាំចិន គឺចាប់ពីថ្ងៃទី24 ដល់ទី26 មករា ភ្ញៀវទេសចរជាតិ និងអន្តរជាតិ ដែលមកសម្រាកកម្សាន្តនៅខេត្តព្រះសីហនុ មានប្រមាណ 87,000នាក់កើនឡើង 24.52% បើប្រៀបធៀបនឹងឆ្នាំ2019 ដែលមានភ្ញៀវត្រឹមតែ 70.480នាក់។ ក្នុងនោះ ភ្ញៀវទេសចរជាតិមានប្រមាណ 74,495នាក់ កើនឡើង 67.17% បើធៀបនឹងឆ្នាំ2019 ដែលមាន 44.560នាក់។
តាមការសន្និដ្ឋានរបស់ភ្ញៀវទេសចរដែលបានទៅកាន់ទីនោះ បានឱ្យដឹងថា ការកើនឡើងនៃភ្ញៀវទេសចរក្នុងស្រុកក្នុងឱកាសបុណ្យចូលឆ្នាំចិនឆ្នាំនេះ អាចដោយសារសកម្មភាពវិជ្ជមាននានាក្នុងតំបន់ បន្ទាប់ពីឯកឧត្តម គួច ចំរើន បានចូលមកដឹកនាំខេត្តព្រះសីហនុ។
ម្យ៉ាងវិញទៀត ការកើនឡើងនៃវត្តមានទេសចរក្នុងស្រុកនៅខេត្តនេះ ក៏អាចជាប់ទាក់ទិននឹងការបិទកាស៊ីណូរាប់សិបកន្លែងនៅក្រុងព្រះសីហនុផងដែរ ព្រោះថា ការបិទកាស៊ីណូនេះ បានធ្វើឱ្យវត្តមានជនជាតិបរទេសថយចុះ ជាពិសេសអ្នករកស៊ី និងបុគ្គលិកជាជនជាតិចិនដែលពួកគេមានប្រាក់ច្រើន ហ៊ានទិញទំនិញ និងសេវាកម្មថ្លៃៗ។
នៅពេលអ្នករកស៊ី និងអ្នកទេសចរជនជាតិចិនវិលត្រឡប់ទៅស្រុកវិញ (បន្ទាប់ពីរាជរដ្ឋភិបាលប្រកាសបិទកាស៊ីណូអនឡាញ) ហាងទំនិញ ភោជនីយដ្ឋាន ផ្ទះសំណាក់ជាដើម ត្រូវបានប្រគល់មកម្ចាស់ដើមដែលជាពលរដ្ឋក្នុងស្រុកវិញ។ ការដែលបងប្អូនជនជាតិចិនភាគច្រើនបានវិលទៅស្រុកវិញបែបនេះ ធ្វើឱ្យម្ចាស់ហាងទំនិញ ភោជនីយដ្ឋាន ឬម្ចាស់ផ្ទះសំណាក់ទាំងនោះ ត្រូវបង្ខំចិត្តបញ្ចុះតម្លៃទំនិញ អាហារ និងសេវាកម្មរបស់ខ្លួនឱ្យស្របទៅនឹងស្ថានភាពជាក់ស្ដែង ពោលគឺ អតិថិជនភាគច្រើនរបស់ពួកគេ ពេលនេះគឺជាភ្ញៀវក្នុងស្រុក មិនមែនអតិថិជនជាជនជាតិចិនដូចមុនទេ នេះបើតាមសម្ដីលោក រតនា ប្រធានផ្សារទំនើបមួយនៅភ្នំពេញ។
ការបញ្ចុះតម្លៃទំនិញ ឬសេវាកម្មដូចខាងលើនេះហើយ ដែលនាំឱ្យភ្ញៀវក្នុងស្រុកមួយចំនួនធំគិតថា ខេត្តជាប់មាត់សមុទ្រមួយនេះ កំពុងវិលត្រឡប់ទៅដូចកាលពីបណ្ដាឆ្នាំមុនៗ ដែលមិនទាន់មានវត្តមានបងប្អូនជនជាតិចិនច្រើន។ ការគិតបែបនេះហើយ ដែលធ្វើឱ្យពួកគេ (ភ្ញៀវជាតិ)សម្រេចចិត្ត វិលមកស្នាក់នៅ និងដើរលេងកម្សាន្តនៅខេត្តនេះឡើងវិញ ព្រោះពួកគាត់គិតថា ទំនិញ ឬសេវាកម្មនានា មានតម្លៃទាបដូចដើម។
កត្តាសំខាន់មួយទៀតដែលភ្ញៀវទេសចរមួយចំនួនគិតថា មានជាប់ទាក់ទិននឹងការកើនឡើងនៃភ្ញៀវក្នុងស្រុកដែរនោះគឺ សន្តិសុខ និងសណ្ដាប់ធ្នាប់។ នៅក្នុងឆ្នាំ2019 នៅលើបណ្ដាញសារព័ត៌មាន និងបណ្ដាញសង្គមជាដើម គេតែងបានឃើញអំពើចោរកម្ម និងឧក្រិដ្ឋកម្មជាច្រើនកើនឡើងនៅខេត្តព្រះសីហនុ ដូចជា អំពើចាប់ជំរិតមនុស្ស អំពើឆក់ប្លន់ អំពើហិង្សាតាមទីសាធារណៈ អំពើឆបោកជាដើម ប៉ុន្តែ មួយរយៈពេលចុងក្រោយនេះ បន្ទាប់ពីមានការបិទកាស៊ីណូ និងការភ្នាល់ល្បែងតាមអ៊ីនធើណិតរាប់សិបកន្លែងមក អំពើខុសច្បាប់ដែលបានរៀបរាប់ខាងលើ បានស្ងប់ស្ងាត់ទៅវិញគួរឱ្យកត់សម្គាល់។ នេះជាកត្តាមួយដែលហាក់ដូចជាការធានាដល់ភ្ញៀវដែលនឹងមកកម្សាន្តខេត្តព្រះសីហនុ។
ជាងនេះទៀត មន្ត្រីអាជ្ញាធរខេត្តព្រះសីហនុម្នាក់បានប្រាប់សារព័ត៌មានក្នុងស្រុកកាលពីពេលថ្មីៗនេះថា ខេត្តព្រះសីហនុនឹងមានភ្ញៀវទេសចរកាន់តែច្រើនមកកម្សាន្ត នៅឆ្នាំ2021 ខាងមុខនេះ បន្ទាប់ពីផ្លូវល្បឿនលឿន និងហេដ្ឋារចនាសម្ព័ន្ធជាច្រើនក្នុងខេត្ត ត្រូវបានសាងសង់រួចរាល់ជាស្ថាពរ៕
ក្រសួងហិរញ្ញវត្ថុចិនបានបញ្ជាក់ថា រហូតមកដល់ម៉ោង 00.00នាទី នៃថ្ងៃទី27 នេះអង្គភាពផ្នែកហិរញ្ញវត្ថុរបស់ប្រទេសនេះបានគាំទ្រថវិកាបន្ថែមហើយ ដោយចំនួនទឹកប្រាក់ 11,200យន់(ប្រមាណ 1,600លានដុល្លារ)សម្រាប់ការចាត់ការរៀបចំរកគ្រឿងឧបករណ៍ ធនធានមនុស្ស និងវិធានការផ្សេងៗទៀតដើម្បីការពារ និងគ្រប់គ្រងជំងឺរលាកសួតដ៏គួរឱ្យខ្លាចនេះឱ្យបាន។
របាយការណ៍បានបន្ថែមថា បន្ទាប់ពីមានការឆ្លងរាលដាលនៃជំងឺរលាកសួតដែលបណ្ដាលមកពីមេរោគវីរុស កូរ៉ូណាប្រភេទថ្មី អង្គភាពផ្នែកហិរញ្ញវត្ថុនៃក្រសួងហិរញ្ញវត្ថុគ្រប់លំដាប់ថ្នាក់បានដំណើរការតាមបញ្ជារបស់គណៈកម្មាធិការមជ្ឈិមនៃបក្សកុម្មុយនិស្តចិន ដើម្បីជំរុញឱ្យទទួលបានការសម្រេចអនុម័តតាមដំណាក់កាលផ្សេងៗរបស់រដ្ឋសភា ក្នុងការធានាលើការរៀបចំថវិកា ដើម្បីមិនឱ្យបញ្ហាខាងផ្នែកហិរញ្ញវត្ថុនេះប៉ះពាល់ដល់ការការពារ និងគ្រប់គ្រងជំងឺឆ្លងមួយនេះ។
ដោយឡែក ចំនួនអ្នកផ្ទុកមេរោគរលាកសួត វូហាន នៅក្នុងប្រទេសចិនកាលពីវេលាម៉ោង 11.15 ថ្ងៃនេះ(27 មករា)ម៉ោងក្នុងប្រទេសកម្ពុជា ស្ថិតក្នុងចំនួន 2,753នាក់ និងស្លាប់បាត់បង់ជីវិតទាំងអស់ 80នាក់ហើយ៕
ប្រភព៖ សារព័ត៌មានបរទេស
ដោយមិនមានពេលទៅបន្ទប់ទឹកដើម្បីបត់ជើងតូច ក្រុមគ្រូពេទ្យនៅទីនោះត្រូវប្រើវិធីដោះទាល់បែបកូនក្មេង ដោយពួកគេបានស្លៀកខោទឹកនោម ព្រោះថា មានអ្នកជំងឺរលាកសួត Wuhan កាន់តែច្រើនបានចូលមកទទួលការព្យាបាលជាបន្តបន្ទាប់។
ការស្លៀកខោទឹកនោមបែបនេះ ក្រុមគ្រូពេទ្យនឹងមិនចាំបាច់ដោះសម្លៀកបំពាក់ការពារមេរោគចេញពីខ្លួននៅពេលបត់ជើងតូច ដែលនេះនឹងជួយសន្សំសំចៃពេលវេលាផង និងជួយបញ្ចៀសការដាច់រហែក ឬត្រូវបាត់សម្លៀកបំពាក់ការពារនោះផង ខណៈដែលមន្ទីរពេទ្យជាច្រើនទៀតកំពុងខ្វះខាតសម្លៀកបំពាក់ការពាររោគឆ្លងបែបនេះសម្រាប់គ្រូពេទ្យ។
ក្រៅពីសម្លៀកបំពាក់ការពារមេរោគឆ្លងរបស់ក្រុមគ្រូពេទ្យហើយ មន្ទីរពេទ្យនានាក៏កំពុងខ្វះខាតប្រភពផ្គត់ផ្គង់សម្ភារវេជ្ជសាស្ដ្រជាច្រើនផងដែរ ដូចជាម៉ាស់សម្រាប់គ្រូពេទ្យ និងវ៉ែនតាការពារមេរោគ ជាដើម។ល។ នេះបើតាមទីភ្នាក់ងារសារព័ត៌មាន Thepaper របស់ចិន។
វេជ្ជបណ្ឌិតម្នាក់នៅមន្ទីរពេទ្យ Wuhan បានបង្ហោះសារមួយនៅលើគេហទំព័រ Weibo ថា ៖ “យើងខ្ញុំដឹងថា សម្លៀកបំពាក់ការពារគីមីដែលយើងកំពុងប្រើនេះ អាចជាឈុតចុងក្រោយដែលទទួលបាន ដូច្នេះយើងខ្ញុំមិនអាចប្រើប្រាស់ខ្ជះខ្ជាយនោះឡើយ”។
ចំនួនអ្នកជំងឺដ៏ច្រើនលើសលុបដែលបានកើនឡើងពី 1ថ្ងៃទៅ 1ថ្ងៃ រួមនឹងការងារដ៏ច្រើនស្អេកស្កះ បានបង្កើតសម្ពាធដ៏ធ្ងន់ធ្ងរដល់ក្រុមគ្រូពេទ្យនៅក្នុងទីក្រុង Wuhan។ គ្រូពេទ្យទាំងនោះ ក៏កំពុងព្រួយបារម្ភជាខ្លាំងចំពោះសុវត្ថិភាពផ្ទាល់ខ្លួនរបស់ពួកគេដែរ។
Candice Qin ជាវេជ្ជបណ្ឌិតម្នាក់មកពីទីក្រុងប៉េកាំង បានបង្ហើបឱ្យដឹងថា មានគ្រូពេទ្យម្នាក់ផ្សេងទៀតបានឆ្លងមេរោគរលាកសួត Wuhan (nCoV) នេះពីអ្នកជំងឺម្នាក់ដែលកំពុងមានសុខភាពចុះខ្សោយខ្លាំង។ បច្ចុប្បន្ន គ្រូពេទ្យម្នាក់នោះកំពុងព្យាយាមនៅដាច់ដោយឡែកពីគេ ហើយបានលាក់បាំងរឿងនេះមិនឱ្យឪពុកម្ដាយដឹង។ គាត់មានអារម្មណ៍ថា “អសមត្ថភាព និងឯកា”។
Candice Qin បាននិយាយថា “យើងខ្ញុំគិតថា នេះជាសម្ពាធដ៏ធ្ងន់មួយ ដែលក្រុមគ្រូពេទ្យនៅតំបន់ Wuhan កំពុងទទួលរង។ យើងខ្ញុំយល់អំពីការព្រួយបារម្ភរបស់អ្នកជំងឺ ប៉ុន្តែយើងត្រូវដឹងថា គ្រូពេទ្យក៏ជាមនុស្សដែរ”៕
ប្រភព៖ សារព័ត៌មានបរទេស
ក្នុងចំណោមអ្នកជំងឺគួរឱ្យសង្ស័យចំនួន 59នាក់ដែលត្រូវអាជ្ញាធរវៀតណាមដាក់ឱ្យនៅដាច់ដោយឡែក (isolated areas) មាន 22នាក់ត្រូវបានគេពិនិត្យឃើញថា មិនមានផ្ទុកមេរោគរលាកសួត Wuhan (corona)។ ចំណែក 35នាក់កំពុងរង់ចាំលទ្ធផលនៃការធ្វើតេស្ត និង 2នាក់ទៀតត្រូវបានរកឃើញថា មានផ្ទុកមេរោគនេះ។
កាលពីល្ងាចថ្ងៃទី26 ម្សិលមិញ ក្រសួងសុខាភិបាលវៀតណាម បានប្រកាសថា ក្នុងចំណោមមនុស្សខាងលើ គឺមានអ្នកជំងឺ 15នាក់នៅតំបន់ភាគខាងជើងនៃប្រទេសវៀតណាម ទើបនឹងត្រឡប់មកពីទីក្រុង Wuhan ប្រទេសចិន រួមមានជនជាតិវៀតណាម 13នាក់ និងជនជាតិចិន 2នាក់។
ក្នុងនោះដែរ មាន 2ករណីនៅមន្ទីរពេទ្យ E (ហាណូយ) កំពុងមានសុខភាពប្រសើរឡើង។ មន្ទីរពេទ្យ National Hospital Of Tropical Diseases មានអ្នកជំងឺ 10នាក់កំពុងរង់ចាំលទ្ធផលនៃការពិនិត្យសុខភាព។
ក្រៅពីនេះ នៅមានករណីជាច្រើននៅមន្ទីរពេទ្យ Vinmec មន្ទីរពេទ្យពហុព្យាបាលខេត្ត Hai Duong និងមន្ទីរពេទ្យខេត្ត Thanh Hoa ជាដើម សុទ្ធតែមានអ្នកជំងឺកំពុងរង់ចាំលទ្ធផលពិនិត្យសុខភាព បន្ទាប់ពីសង្ស័យថា មានផ្ទុកមេរោគរលាកសួត corona (Wuhan)។ នេះបើតាមទីភ្នាក់ងារសារព័ត៌មានវៀតណាម Vnexpress។
ចំណែកនៅភាគខាងត្បូងវិញ ក៏មាន 2ករណីនៅកោះត្រល់ និងជនជាតិចិន 2នាក់ផ្សេងទៀតកំពុងសម្រាកព្យាបាលនៅក្នុងមន្ទីរពេទ្យ Cho Ray ក្នុងក្រុងហូជីមិញ។
រីឯមនុស្ស 39នាក់ មាន 20នាក់ជាបុគ្គលិកនៃមន្ទីរពេទ្យ Cho Ray ធ្លាប់បាននៅក្បែរជនជាតិចិន 2នាក់ខាងលើ និង19នាក់ផ្សេងទៀតធ្លាប់បាននៅក្បែរអ្នកជំងឺ 2នាក់នៅឯកោះត្រល់ ក៏កំពុងត្រូវបានដាក់ឱ្យនៅដាច់ដោយឡែកពីគេដែរ៕
ប្រភព៖ សារព័ត៌មានបរទេស