Author: សឿន សំណាង

ខ្សិកខ្សួលអួលដើម-ក ពេលបានអានសំបុត្ររបស់អ្នកគ្រូពេទ្យចិនម្នាក់ សរសេរទុកឱ្យកូនប្រុស ពេលខ្លួនឯងចូលទៅ “សមរភូមិវូហាន”
“កូនសម្លាញ់ តើកូនធ្លាប់បានឃើញកែវភ្នែករបស់អ្នកជំងឺ និងគ្រួសាររបស់ពួកគេដែលអង្វរសុំឱ្យជួយសង្គ្រោះជីវិតដែរឬទេ? កែវភ្នែកពួកគេដែលសម្លឹងមកម្ដាយ ហាក់ដូចជាផ្ញើសេចក្ដីទុកចិត្ត សេចក្ដីសង្ឃឹម និងការប្រាថ្នាសុំរស់បន្តទៀត”។
ខាងលើនេះ គឺជាការចាប់ផ្ដើមបន្ទាត់ដំបូងនៃសំបុត្រដែលលោកស្រីវេជ្ជបណ្ឌិត Cao Xiaoying អាយុ 56ឆ្នាំ ជាប្រធានមជ្ឈមណ្ឌលព្យាបាលរោគឆ្លងនៃមន្ទីរពេទ្យប្រជាជនលេខ2 ក្នុងខេត្ត Hebei ប្រទេសចិន ដែលសរសេរទុកឱ្យកូនប្រុសរបស់គាត់ មុនពេលឈានជើងចូលក្នុងតំបន់ “សមរភូមិវូហាន” ដើម្បីប្រយុទ្ធប្រឆាំងនឹងមេរោគរលាកសួត Corona។
សំបុត្រនោះបានសរសេរទៀតថា ៖ “ម្ដាយយល់អំពីអាការព្រួយភ័យ និងក្ដីទុក្ខលំបាក ដែលពួកគេទទួលរងពីអាសន្នរោគដ៏អាក្រក់នេះ”។
លោកស្រីវេជ្ជបណ្ឌិត Cao Xiaoying បានចូលនិវត្តន៍នៅមុនរដូវបុណ្យចូលឆ្នាំចិន ប៉ុន្តែ បន្ទាប់ពីអាជ្ញាធរខេត្ត Hunan ប្រកាសអំពីការផ្ទុះឆ្លងរាលដាលនៃមេរោគវីរុស Corona លោកស្រីបានសម្រេចចិត្ត ប្រញាប់ត្រឡប់ទៅកាន់មន្ទីរពេទ្យវិញ ដើម្បីបានរួមដំណើរជាមួយក្រុមគ្រូពេទ្យចំនួន 60នាក់ផ្សេងទៀត ស្ម័គ្រចូលទៅប្រយុទ្ធប្រឆាំងមេរោគវីរុស Corona ដ៏សាហាវនោះ។ ជាមួយនឹងបទពិសោធជាង 30ឆ្នាំក្នុងការប្រឆាំងនឹងបណ្ដាមេរោគឆ្លងទាំងឡាយ លោកស្រីបានទទួលព្យាបាលអ្នកជំងឺរលាកសួតដោយការឆ្លងមេរោគវីរុស Corona ដំបូងនៅជនបទ។
នៅចំពោះមុខការសម្រេចចិត្តនេះ កូនប្រុសរបស់លោកស្រីបានជំទាស់យ៉ាងខ្លាំងក្លា។ កូនប្រុសរបស់លោកស្រីមានគម្រោងនាំមិត្តស្រីរបស់គេមកជម្រាបសួរលោកស្រីក្នុងរដូវចូលឆ្នាំចិនឆ្នាំនេះ។
មុនពេលត្រឡប់ទៅមន្ទីរពេទ្យវិញ លោកស្រីបានរៀបចំអ្វីៗគ្រប់សព្វបែបយ៉ាងរួចរាល់ ដើម្បីឱ្យកូនប្រុសរបស់គាត់ស្វាគមន៍មិត្តស្រីរបស់គេ ព្រមទាំងបានសរសេរសំបុត្រមួយច្បាប់ទុកឱ្យកូនប្រុសរបស់គាត់ ដោយក្ដីសង្ឃឹមថា កូនប្រុសគាត់នឹងយល់អំពីអារម្មណ៍របស់លោកស្រី។
ក្នុងសំបុត្រនោះ លោកស្រីវេជ្ជបណ្ឌិត បានសុំទោសកូនប្រុសរបស់គាត់ ព្រោះមិនទាន់បានបំពេញភារកិច្ចជាម្ដាយដ៏ល្អ ប៉ុន្តែ លោកស្រីបានរំឭកជាច្រើនលើកច្រើនសាថា លោកស្រីពិតជាស្រឡាញ់រូបគេខ្លាំងណាស់។
“កូនប្រុសម្ដាយ ម្ដាយបានសម្រេចជ្រើសរើសមុខរបរជាគ្រូពេទ្យ ដូច្នេះយ៉ាងណាក៏ដោយ យើងមិនអាចនៅជុំគ្នាបានពេញលេញនោះទេ។ ម្ដាយស្រឡាញ់កូន100% ប៉ុន្តែ ពេលវេលារបស់ម្ដាយមិនអាចផ្ដល់ឱ្យកូនបាន 100%ឡើយ។ ម្ដាយដឹងអំពីភាពគ្រោះថ្នាក់នៃអាសន្នរោគដ៏អាក្រក់នេះ ម្ដាយអាចដឹងបានអំពីការឈឺចាប់ និងការរងទុក្ខវេទនាពីមេរោគនេះ។ បំណងរបស់ម្ដាយក្នុងជាតិនេះ គឺការបំបាត់ចោលរាល់បញ្ហាអាក្រក់ទាំងអស់នេះ។ សុំទោសណា៎ កូនប្រុសម្ដាយ ការបែកគ្នាមួយរយៈខ្លីរបស់យើង គឺជាសំឡេងសើចរីករាយរបស់មនុស្សរាប់លាននាក់ដែលគេត្រូវការម្ដាយណា៎កូន។ នេះគឺជាប្រការមួយដែលគ្រូពេទ្យទាំងឡាយត្រូវតែធ្វើ”។
នៅទីបញ្ចប់នៃសំបុត្រ ស្ត្រីម្នាក់នេះបានសរសេរថា ៖ “កូនប្រុស ក្រដាសវាខ្លីពេក ប៉ុន្តែក្ដីស្រឡាញ់ដែលម្ដាយមានចំពោះកូន គឺវែងជាងនេះឆ្ងាយណាស់។ ម្ដាយនឹងស្លៀកឈុតការពារមេរោគជាប់ជានិច្ច កូនកុំបារម្ភ ហើយចូរកូនធ្វើជំនួសម្ដាយ ក្នុងការការពារក្រុមគ្រួសារយើង ណា៎កូនណា៎។ ម្ដាយត្រូវការពារ និងបំពេញកាតព្វកិច្ចរបស់ម្ដាយ។ ពេលអាសន្នរោគអាក្រក់នេះបានថមថយចុះ ម្ដាយសន្យាថា នឹងត្រឡប់ទៅនៅក្បែរកូនឱ្យបានច្រើន តាមដែលអាចធ្វើទៅបាន។ ម្ដាយជឿថា កូននឹងយល់ចំពោះរឿងទាំងអស់នេះ មែនទេកូន?”។
ថ្ងៃទី26 មករា បន្ទាប់ពីសំបុត្រខាងលើត្រូវបានគេបង្ហោះ និងចែករំលែកក្នុងបណ្ដាញសង្គមចិន មានអ្នកលេងអ៊ីនធើណិតជាច្រើន បានបង្ហាញពីអារម្មណ៍របស់ខ្លួនដោយការ Comment។
អ្នកលេងបណ្ដាញសង្គម Weibo ម្នាក់បានបញ្ចេញមតិថា ៖ “នៅក្នុងអំឡុងពេលដែលអាសន្នរោគកំពុងរាតត្បាត សំបុត្ររបស់អ្នកគ្រូពេទ្យ Cao Xiaoying បានធ្វើឱ្យខ្ញុំរំភើប អួលដើម-ក និងពិតជាកោតសរសើរចំពោះស្មារតីជួយអ្នកជំងឺយ៉ាងអស់ពីចិត្តរបស់លោកស្រី”។
អ្នកលេងបណ្ដាញសង្គមម្នាក់ទៀតសរសេរថា ៖ “សង្ឃឹមថា ទេវតាអាវពណ៌សទាំងឡាយ ដែលនៅតំបន់ជួរមុខនឹងបានត្រឡប់មកផ្ទះវិញដោយសុវត្ថិភាព និងបានជួបជុំគ្រួសារ”។
សូមបញ្ជាក់ថា គិតដល់រសៀលថ្ងៃទី31មករានេះ មានអ្នកឆ្លងមេរោគ Corona សរុបជាង 9,800នាក់ ក្នុងនោះមាន 9700នាក់ស្ថិតនៅក្នុងប្រទេសចិន រួមទាំងហុងកុង ម៉ាកាវ និងកោះតៃវ៉ាន់ផងដែរ។ ចំណែកអ្នកស្លាប់ដោយសារមេរោគវីរុស Corona នេះ បានកើនឡើងដល់ 213នាក់ ដែលជនរងគ្រោះទាំងនោះ សុទ្ធតែស្ថិតនៅក្នុងប្រទេសចិន ពិសេសគឺ ក្នុងតំបន់ Wuhan ដែលជាកន្លែង “ចាប់កំណើត” នៃមេរោគវីរុស Corona ដ៏គួរឱ្យភ័យខ្លាចនេះ៕
ប្រភព៖ សារព័ត៌មានបរទេស
January 31, 2020
ស្ដាប់ហើយស្រក់ទឹកភ្នែក បទចម្រៀង “វូហាន” លើកទឹកចិត្តអ្នកក្រុងវូហាន ឱ្យតស៊ូឆ្លងកាត់វិបត្តិទៅជាមួយគ្នាឱ្យបាន…
ខាងក្រោមនេះគឺជាបទចម្រៀងដែលមានទំនងទំនុកភ្លេងបែបយឺតៗ កម្សត់សោកសៅ ត្រូវនឹងបរិយាកាសដ៏សែនស្រងេះស្រងោចរបស់ទីក្រុងវូហានដែលត្រូវបានបិទជិតទាំងស្រុង។
ចំណែកសំឡេងច្រៀង គឺជាការច្រៀងជាពួក និងច្រៀងឆ្លាស់គ្នាប្រុស-ស្រី និងមាន សំឡេង ព្យ៉ាណូបន្ទរតាមរហូត ព្រមទាំងមានសំឡេងរបស់កុមារប្រុស-ស្រីច្រៀងប្រកបជាមួយទៀតផង។
បទចម្រៀងនេះ ជារួម ទាំងទំនុកច្រៀង តន្ត្រី និងរូបភាពដែលបង្ហាញឡើង មើលទៅសែនកម្សត់ស្រងេះស្រងោច នឹកអាណិតទីក្រុងដែលធ្លាប់តែរីកចម្រើនអ៊ូអរ និងប្រជាជនដែលធ្លាប់តែសប្បាយរីករាយ នាំឱ្យទប់ទឹកភ្នែកស្ទើរតែមិនបាន..។
តទៅនេះ គឺទំនុកច្រៀង 1ផ្នែកតូច ដែលក្រុមការងាររបស់គេហទំព័រឡារ៉ែន បានបកប្រែ និងកែសម្រួលយកមកជូនមិត្តអ្នកអានបានដឹងខ្លះៗ។ សង្ឃឹមថា វិបត្តិដែលមនុស្សជាតិ ជាពិសេសអ្នកក្រុងវូហានកំពុងជួបប្រទះនាពេលនេះ នឹងបានធូរស្រាលនាពេលឆាប់ៗនេះ។
វូហាន តស៊ូឡើង!!
-ទីក្រុងខ្ញុំ ពេលនេះឈឺហើយ តែខ្ញុំនៅតែស្រឡាញ់អ្នកជានិច្ច វូហាន…
ខ្យល់បក់ផាយផាត់លើតំបន់ ចៀ តៅ ឆូ ធ្វើឱ្យសត្វកូនអណ្ដើកមាសទទះស្លាប
លើគ្រែឫស្សីនៅមានក្មេងៗគេងសុបិន
-ទីនេះគឺផ្ទះខ្ញុំ ខ្ញុំធំឡើងនៅទីនេះ
ខ្ញុំធ្លាប់ដើរឆ្លងទន្លេ យ៉ង់ហ្ស៊ីកៀងម៉ា
បើកឡានលេងពេលរាត្រី
អ្វីៗជុំវិញខ្លួនខ្ញុំ សប្បាយខ្ញៀវខ្ញា
ពេលយប់ តែងនាំគ្នាចេញទៅរកអីញ៉ាំ តែពេលនេះលែងមានហើយ…
(ពោល ៖ ខ្ញុំ គឺអ្នកស្រុកវូហាន…វូហាន ខ្ញុំស្រឡាញ់អ្នក)
ប្រភព៖ សារព័ត៌មានបរទេស
កំណត់ហេតុអ្នកបកប្រែ៖ ខុសឆ្គងយ៉ាងណា សូមមេត្តាអត់ទោសផង
January 31, 2020
វិធីការពារសុខភាព និងសុវត្ថិភាព ពេលទៅលេងតំបន់ឆ្ងាយៗ ឬទៅទេសចរណ៍ក្រៅប្រទេស
នៅក្នុងស្ថានភាពដែលមេរោគបង្កជំងឺរលាកសួតថ្មី Corona កំពុងរាតត្បាតពិភពលោកនេះ សូមមានការប្រុងប្រយ័ត្ន ឱ្យបានខ្ពស់ ចំពោះ មេរោគឆ្លងផ្សេងៗ មិនថាតែមេរោគ Corona នោះទេ។
Health Direct ដែលជាអង្គការសុខភាពមួយរបស់ប្រទេសអូស្ត្រាលី បានលើកឡើងនូវប្រការមួយចំនួនដែលលោកអ្នកត្រូវតែយកចិត្តទុកដាក់ មុននឹងគិតធ្វើដំណើរទៅលេងតំបន់ឆ្ងាយៗ ឬទៅក្រៅប្រទេស។
អង្គការសុខភាពមួយនេះ បានលើកឡើងថា ការស្វែងយល់អំពីគុណភាពនៃប្រភពទឹកនៅក្នុងតំបន់ដែលអ្នកនឹងទៅលេងនោះ គឺជាការចាំបាច់ ដើម្បីធានាសុវត្ថិភាព និងសុខភាពល្អ។

ប្រភព៖ សារព័ត៌មានបរទេស
January 31, 2020
បុរសអាមេរិកាំងម្នាក់ឆ្លងមេរោគវីរុស corona ទាំងមិនបានទៅប្រទេសចិនសោះ…
មជ្ឈមណ្ឌលគ្រប់គ្រង និងបង្ការរោគអាមេរិក Centers for Disease Control and Prevention (CDC) កាលពីថ្ងៃទី30 មករា បានឱ្យដឹងថា ករណីឆ្លងមេរោគ corona ថ្មីបំផុតនៅប្រទេសនេះ គឺមានជាប់ទាក់ទិននឹងប្ដីប្រពន្ធ 1គូនៅក្រុង Chicago រដ្ឋ Illinois។
បុរសដែលបានឆ្លងមេរោគនេះ មិនដែលធ្លាប់បានទៅប្រទេសចិនម្ដងណាឡើយ ប៉ុន្តែប្រពន្ធរបស់គាត់ត្រូវបានគេរកឃើញថា មានផ្ទុកមេរោគនេះ បន្ទាប់នាងពីត្រឡប់មកពីក្រុង Wuhan នៃប្រទេសចិនដែលជា “សម្បុកមេរោគ” corona។
នេះគឺជាករណីឆ្លងមេរោគវិរុស corona ពីមនុស្សទៅមនុស្សដំបូងគេនៅសហរដ្ឋអាមេរិក និងជាករណីដែលអ្នកចម្លងមិនទាន់បង្ហាញអាការរោគអ្វីទាំងអស់ តែអាចចម្លងទៅអ្នកជិតខាងបាន។ ប៉ុន្តែមន្ត្រីសុខាភិបាលអាមេរិកនៅតែអះអាងថា ចំពោះមុខ ហានិភ័យនៃការឆ្លងមេរោគនេះនៅអាមេរិក គឺនៅទាបនៅឡើយ។
យ៉ាងនេះក្ដី អគ្គនាយកនៃ CDC លោក Robert Redfield បានថ្លែងថា នឹងមានការឆ្លងមេរោគនេះពីមនុស្សទៅមនុស្សជាច្រើនករណីបន្ថែមទៀតនៅអាមេរិក។
បច្ចុប្បន្ន អាមេរិកមានអ្នកផ្ទុកមេរោគវីរុស corona សរុបចំនួន 6នាក់។ ក្រៅពីករណីថ្មីបំផុតដែលឆ្លងពីមនុស្សទៅមនុស្ស គឺមាន 5ករណី ដែលសុទ្ធតែជាអ្នកទើបត្រឡប់មកពីប្រទេសចិនទាំងអស់៕
ប្រភព៖ សារព័ត៌មានបរទេស
January 31, 2020
WHO ប្រកាសអាសន្ន ខណៈអ្នកស្លាប់កើនដល់ 213នាក់ ឯប្រទេសនានា បន្តបិទច្រកព្រំដែន និងជើងហោះហើរទៅ-មកប្រទេសចិន
អង្គការសុខភាពពិភពលោក (WHO) កាលពីប៉ុន្មានម៉ោងមុននេះ (30មករា នៅតំបន់លោកខាងលិច) បានប្រកាសភាពអាសន្នជាផ្លូវការ ចំពោះមេរោគ corona ថ្មីនេះ ខណៈប្រទេសដែលមានអ្នកឆ្លងមេរោគ nCoV (corona) បានកើនដល់ជាង 20ប្រទេស នៅទូទាំងពិភពលោក ជាហេតុធ្វើឱ្យបណ្ដាប្រទេសនៅក្បែរចិន បន្តបិទច្រកព្រមដែន។
ទីភ្នាក់ងារសារព័ត៌មានរុស្ស៊ី TASS កាលពីថ្ងៃទី30 មករា បានឱ្យដឹងថា នាយករដ្ឋមន្ត្រីរុស្ស៊ី លោក Mikhail Mishunstin បានចុះហត្ថលេខាលើបទបញ្ជាបិទច្រកព្រំដែនជាមួយចិន នៅចុងបូព៌ាប្រទេស ដើម្បីទប់ស្កាត់ការឆ្លងរាលដាលនៃមេរោគរលាកសួតថ្មីពីប្រទេសចិន។ ក្រៅពីនេះ TASS ក៏បានឱ្យដឹងទៀតដែរថា រុស្ស៊ីចាប់ផ្ដើមកាត់បន្ថយការធ្វើដំណើរតាមរថភ្លើង រវាងចិន និងរុស្ស៊ី ចាប់ពីថ្ងៃទី31 មករានេះតទៅ។
ខ្សែក្រហមគឺជាបន្ទាត់ព្រមដែនចិន និងរុស្ស៊ី
កន្លងទៅថ្មីៗ ប្រទេសមួយចំនួន ក្នុងនោះមាន ម៉ុងហ្គោលី នេប៉ាល កូរ៉េខាងជើង ក៏បានបិទច្រកព្រំដែនជាមួយប្រទេសចិនដែរ មុនពេលអាសន្នរោគនេះរីករាលដាលខ្លាំង។
ប្រទេសហ្វីលីពីន ទីក្រុងម៉ាកាវ និងប្រទេសកាហ្សាក់ស្ថាន បានផ្អាកផ្ដល់ទិដ្ឋាការដល់ពលរដ្ឋចិន ខណៈដែលក្រុង ហុងកុងក៏បានផ្អាកដំណើរការកប៉ាល់ និងស្រឡាងដែលធ្វើដំណើរទៅ-មករវាងចិនដីគោក និងហុងកុង ព្រមទាំងបានបិទច្រកព្រំដែនមួយចំនួនទៀតផងដែរ។
ជើងហោះហើរអន្តរជាតិជាច្រើនបានប្រកាសផ្អាកដំណើរការហោះហើរទៅ-មកប្រទេសចិន ក្នុងនោះមានដូចជាក្រុមហ៊ុនអាកាសចរណ៍ Air Canada, Air India, American Airlines, British Airways, Cathay Pacific, Delta, United Airlines, Lufthansa និង Lion Air ជាដើម។
អង្គការសុខភាពពិភពលោក (WHO) កាលពីប៉ុន្មានម៉ោងមុននេះ (30មករា នៅតំបន់លោកខាងលិច) បានប្រកាសភាពអាសន្នជាផ្លូវការ ចំពោះមេរោគ corona ថ្មីនេះ។ ប្រការនេះទាមទារឱ្យបណ្ដាប្រទេសក្នុងពិភពលោក ត្រូវបង្កើនវិធានការទប់ស្កាត់ការឆ្លងរាលដាលនៃមេរោគនេះជាលក្ខណៈអន្តរជាតិ។
ប្រធានអង្គការសុខភាពពិភពលោក
យោងតាមគណៈកម្មាធិការជាតិសុខាភិបាលចិន គិតមកដល់ព្រឹកថ្ងៃនេះ (31មករា) ចំនួនអ្នកស្លាប់ដោយសារមេរោគ corona បានកើនដល់ 213នាក់ហើយនៅក្នុងប្រទេសចិន បន្ទាប់ពីខេត្ត Hebei បានប្រកាសថា ខេត្តនេះមានអ្នកស្លាប់បន្ថែម 42នាក់ ឯចំនួនអ្នកដែលបានឆ្លងមេរោគនេះនៅទូទាំងពិភពលោក គឺមាន 9,480 នាក់ ក្នុងនោះចិនដីគោកមានចំនួន 9,356នាក់។
បច្ចុប្បន្ន តាមប្រភពព័ត៌មានមួយចំនួនទៀត បានឱ្យដឹងថា ចំនួនប្រទេសដែលមានអ្នកឆ្លងមេរោគ nCoV (corona) បានកើនដល់ជាង 20ប្រទេសហើយនៅទូទាំងពិភពលោក៕
ប្រភព៖ សារព័ត៌មាន
January 31, 2020
វៀតណាមប្រើកម្លាំងចម្រុះជាង ៥០០នាក់ ឡោមព័ទ្ធចាប់បុរសម្នាក់ ដែលសង្ស័យថាបានសម្លាប់មនុស្ស ៥នាក់
នគរបាលចម្រុះជាង 500នាក់ ដែលមានអាវុធគ្រប់ដៃ មានអាវក្រោះការពារ ត្រូវបានដាក់ពង្រាយ និងឡោមព័ទ្ធចាប់ជនសង្ស័យម្នាក់ដែលមានឈ្មោះ Le Quoc Tuan (ជាមន្ត្រីនគរបាលខណ្ឌ11 នៃក្រុងព្រៃនគរ) ដែលត្រូវបានសង្ស័យថា បានបាញ់សម្លាប់មនុស្សចំនួន 4នាក់ នៅស្រុក Cu Chi ជាយក្រុងហូជីមិញ (Sai Gon/ព្រៃនគរ)។
ព្រឹកព្រលឹមថ្ងៃទី30 មករា អាជ្ញាធរក្រុងហូជីមិញ នាំមុខដោយរថពាសដែក រួមនឹងនគរបាលរាប់រយនាក់ និងសុនខជំនាញហិតក្លិន បានឡោមព័ទ្ធតំបន់ព្រៃកៅស៊ូមួយនៅឃុំ Trung An ជាយក្រុងព្រៃនគរ ជាតំបន់ដែលជនសង្ស័យអាយុ 33ឆ្នាំខាងលើបានលាក់ខ្លួន បន្ទាប់ពីបានបាញ់សម្លាប់មនុស្សចំនួន 4នាក់ ដោយសារមានជម្លោះក្នុងពេលលេងល្បែង នៅក្នុងឃុំ Tan Than Dong ជាយក្រុងព្រៃនគរ កាលពីម្សិលមិញ (29មករា 2020)។
ក្រុមនគរបាលមូលដ្ឋានបានបើកឡាន និងម៉ូតូទៅកាន់តំបន់ដែលជនសង្ស័យកំពុងជ្រកពួន ហើយប្រកាសប្រាប់ឱ្យប្រជាជនទាំងអស់សម្ងំនៅក្នុងផ្ទះដើម្បីការពារសុវត្ថិភាព។
ក្នុងការចុះព័ទ្ធចាប់ជនសង្ស័យនេះ គេឃើញមានវត្តមានរបស់អនុរដ្ឋមន្ត្រីក្រសួងសន្តិសុខសាធារណៈ រួមនឹងមន្ត្រីជាន់ខ្ពស់មួយចំនួនទៀតនៃក្រសួងនេះ។
ពលរដ្ឋនៅតំបន់ក្បែរនោះបាននិយាយថា ពួកគេបានឃើញកងកម្លាំងសមត្ថកិច្ចចម្រុះមានវត្តមាននៅក្បែរផ្ទះពួកគេតាំងតែពីម៉ោង 4:30នាទីទៀបភ្លឺ។
នៅប្រហែលម៉ោងជាង 10ព្រឹក គេឮសូរស្នូរកាំភ្លើងលាន់ឮឡើងជាច្រើនគ្រាប់។ ក្រុមនគរបាលដែលស្លៀកពាក់ស៊ីវិលរាប់រយនាក់ បានដឹកគ្នាដោយម៉ូតូ បើកបរយ៉ាងលឿនចូលទៅក្នុងព្រៃដើម្បីឡោមព័ទ្ធចាប់ជនសង្ស័យ។ ក្រោយមកបន្តិច ទាហានយ៉ាងច្រើនក៏បង្ហាញខ្លួននៅជុំវិញតំបន់ដែលត្រូវឡោមព័ទ្ធ។ នៅពេលងើបមើលទៅលើអាកាស គេឃើញមានកូនយន្តហោះគ្មានមនុស្សបើក (drone) ជាច្រើនគ្រឿង ហោះឆ្វែលស្វែងរកជនសង្ស័យ។
ជនសង្ស័យឈ្មោះ Le Quoc Tuan គឺជាមន្ត្រីនគរបាលម្នាក់ដែលធ្វើការនៅមន្ទីរឃុំឃាំងបណ្ដោះអាសន្ននៃអធិការដ្ឋាននគរបាលសង្កាត់11 ដែលមានឋានន្តរស័ក្តិអនុសេនីយ៍ទោពិសេស(ស័ក្តិ2 ត្រៀមឡើងស័ក្តិ3)។ ជនសង្ស័យនេះមានកូន 2នាក់ និងជាមនុស្សញៀនល្បែងស៊ីសងរយៈពេលច្រើនឆ្នាំមកហើយ។
លទ្ធផលនៃការស្រាវជ្រាវបានបង្ហាញថា នៅថ្ងៃទី29 មករា ឆ្នាំ2020 ជនសង្ស័យ Le Quoc Tuan ជាមួយឈ្មោះ Le Quoc Minh បានទៅដល់វង់ល្បែងក្នុងចម្ការមៀនក្បែរផ្ទះ ដែលមានចម្ងាយពីមជ្ឈមណ្ឌលក្រុងព្រៃនគរប្រហែល 30គីឡូម៉ែត្រ ដើម្បីលេងល្បែង។ ពេលលេងបានមិនយូរប៉ុន្មាន Le Quoc Tuan ក៏មានទំនាស់ជាមួយអ្នកលេងក្នុងវង់ល្បែង ហើយក៏បានស្រែកជេរគេយ៉ាងខ្លាំងៗ ប៉ុន្តែបន្ទាប់មកក៏បានចេញបាត់ទៅ។ មួយសន្ទុះក្រោយមក Le Quoc Tuan បានត្រឡប់មកវិញជាមួយនឹងកាំភ្លើង AK 1ដើម រួចហើយក៏ “ប៉័ងៗៗៗៗៗៗ!!” ស្នូរកាំភ្លើងបានផ្ទុះឡើងយ៉ាងគួរឱ្យភ័យខ្លាច ហើយអ្នកលេងល្បែងក្នុងវង់ទាំងប៉ុន្មាន ក៏បានចែកជើងគ្នារត់បាត់ស្រមោលអស់ នៅសល់តែមនុស្សប្រហែល 4នាក់ ដែលកំពុងដេកដួលលើដីក្នុងថ្លុកឈាម ក្នុងនោះ មានម្នាក់រងរបួសធ្ងន់ និង 3នាក់ទៀតបានស្លាប់ភ្លាមៗនៅនឹងកន្លែងកើតហេតុ។
តាមរយៈកាមេរ៉ាសុវត្ថិភាព បានបង្ហាញថា ជនសង្ស័យ Le Quoc Tuan បានជិះម៉ូតូ ពាក់ម៉ាស់បាំងមុខ និងដាក់កាំភ្លើងនៅពីមុខ ជិះគេចខ្លួនពីកន្លែងកើតហេតុភ្លាមៗដែរ។ លុះដល់ម៉ោង 3 និង 10នាទីរសៀលថ្ងៃដដែល Le Quoc Tuan ដែលកាន់កាំភ្លើងក្នុងដៃ បានភ្ជង់ប្លន់ស្ត្រីម្នាក់យកម៉ូតូ 1គ្រឿងទៅបាត់ទៀត។
ជនសង្ស័យដែលកំពុងត្រូវសមត្ថកិច្ចតាមចាប់ខ្លួន
លុះព្រឹកឡើង គេបានប្រទះឃើញសាកសពបុរសម្នាក់ត្រូវខ្មាន់កាំភ្លើងបាញ់សម្លាប់នៅក្បែរតំបន់ដែលកងកម្លាំងចម្រុះកំពុងឡោមព័ទ្ធនោះ។ ក្រុមនគរបាលបានរកឃើញសម្បកគ្រាប់កាំភ្លើងដូចគ្នានឹងប្រភេទគ្រាប់ដែលជនសង្ស័យ Le Quoc Tuan បានបាញ់សម្លាប់មនុស្សនៅក្នុងវង់ល្បែងដែរ។
មកដល់ពេលនេះសមត្ថកិច្ចចម្រុះជាង 500នាក់នោះ នៅតែកំពុងដុតដៃដុតជើងឡោមព័ទ្ធ និងតាមរកចាប់ខ្លួនជនសង្ស័យរូបនោះនៅឡើយ។
ព័ត៌មានថ្មីៗបន្ថែមទៀត គេហទំព័រឡារ៉ែន នឹងយកមកជម្រាបជូនមិត្តអ្នកអានជាបន្តបន្ទាប់នៅពេលក្រោយទៀត៕
ប្រភព៖ សារព័ត៌មានបរទេស
January 30, 2020
17ឆ្នាំ ពីមេរោគ «Sars» មកដល់ «Corona» វីរុសថ្មីផ្ដាច់ជីវិតមនុស្ស…តើមួយណាសាហាវជាង?
ជាង17ឆ្នាំនៃការឆ្លងរាលដាលពីមេរោគ«Sars»(សារស៍) មកដល់ «Corona» បានក្លាយជាមហាវិបត្តិថ្មី ដែលមានដើមកំណើតមកពីប្រទេស(ចិន)តែមួយ តើមេរោគទាំង2 នេះ មួយណាមានអានុភាពខ្លាំងក្លាជាង? និងតើមនុស្សនៅក្នុងពិភពលោក នឹងត្រូវស្លាប់ប៉ុន្មាននាក់ទៀត?
គ្រប់ 1ខែគត់ដែលរដ្ឋបាលចិនបានរាយការណ៍ទៅអង្គការសុខភាពពិភពលោក(WHO)អំពីការឆ្លងរាលដាលនៃ “មេរោគវីរុសកូរ៉ូណាប្រភេទថ្មី2019” លើកដំបូងកាលពីថ្ងៃទី31 ខែធ្នូ ឆ្នាំ2019។ នៅក្នុងខណៈនោះ មានអ្នកផ្ទុកមេរោគវីរុសកូរ៉ូណារួចទៅហើយ 44នាក់ ហើយមកដល់ថ្ងៃនេះ(30 មករា 2020) ទូទាំងពិភពលោកមានអ្នកឆ្លងវីរុសកូរ៉ូណាកើនឡើង 7,783នាក់ និងស្លាប់ 170នាក់។
តាមរយៈតួលេខនេះ បើប្រៀបធៀបនឹងមេរោគ«Sars» (សារស៍)ដែលកើតឡើងក្នុងអំឡុងឆ្នាំ2002-2003 ដែលមានអ្នកឆ្លងមេរោគនេះជាង 8,000នាក់ និងស្លាប់ 774នាក់ មានន័យថា អ្នកឆ្លងវីរុសកូរ៉ូណាទូទាំងពិភពលោកនាពេលបច្ចុប្បន្ន មានភាគរយខ្ពស់ជាងដល់ទៅ 74.80% នៃអ្នកឆ្លងមេរោគ«Sars» ក្នុងរយៈវេលាត្រឹមតែ 1ខែប៉ុណ្ណោះ។
ខណៈដែលតួលេខឆ្លងមេរោគវីរុសកូរ៉ូណានៅក្នុងប្រទេសចិន នៅថ្ងៃទី30 មករានេះ ក៏ខ្ពស់ឡើងដល់ទៅ 5,974នាក់ទៅហើយដែរ ដោយកើនពីថ្ងៃពុធ ប្រមាណ 1,500នាក់ ឬគិតជាភាគរយ គឺច្រើនជាង 30% ផ្ដួលស្ថិតិ 5,327នាក់របស់មេរោគ«Sars» ស្រេចបាច់បាត់ទៅហើយ និងបើប្រៀបធៀបពីល្បឿននៃការឆ្លងរាលដាលរបស់វីរុសកូរ៉ូណា និង«Sars»វិញ បើយើងមើលពីតួលេខដែលបានបង្ហាញពីខាងដើម ក៏នឹងឃើញថា វីរុសកូរ៉ូណាមានការឆ្លងរាលដាលលឿនរហ័សជាងច្រើនណាស់។ ត្រឹមតែ 29ថ្ងៃ ក៏មានអ្នកឆ្លងមេរោគរួចទៅហើយជាង 3,000នាក់ ខណៈដែល«Sars»ប្រើពេលយ៉ាងហោចណាស់ក៏ 5ខែដែរ ទើបមានអ្នកឆ្លងរោគច្រើនដល់ 3,000នាក់។
តាមរយៈតួលេខដែលបង្ហាញខាងលើនេះ មិត្តអ្នកអានគេហទំព័រឡារ៉ែន ច្បាស់ជាគិតថា វីរុសកូរ៉ូណាប្រហែលជាមានអានុភាពខ្លាំងក្លាជាងមេរោគ«Sars»មិនខាន…តែការគិតនេះ វាបញ្ច្រាស់គ្នានឹងអ្នកវិទ្យាសាស្ត្រ និងអ្នកជំនាញការខាងវេជ្ជសាស្ត្រនៅក្រៅប្រទេសជាច្រើននាក់ ដែលមិនបានគិតដូច្នេះឡើយ ដោយពួកគេមើលឃើញថា អានុភាពនៃភាពខ្លាំងក្លាដែលនឹងអាចសម្លាប់ជីវិតមនុស្សនៅលើពិភពលោករបស់វីរុសកូរ៉ូណា មានតិចជាង «Sars» ព្រោះគ្រាដែល«Sars»ឆ្លងរាលដាលរាតត្បាតខ្លាំងក្លានោះ មានអត្រាការស្លាប់ខ្ពស់ដល់ទៅ 9.6%ឯណោះ។ ផ្ទុយទៅវិញ វីរុសកូរ៉ូណា មានការវាយតម្លៃថា អាចនឹងស្ថិតក្នុងអត្រា 2.2 ទៅ 3%ប៉ុណ្ណោះ។
ត្រឡប់ទៅនិយាយអំពីការឆ្លងរាលដាលដែលលឿនរហ័សវិញ គឺមានការវាយតម្លៃចេញមកថា អ្នកឆ្លងមេរោគវីរុសកូរ៉ូណាត្រឹមតែ 1នាក់ អាចចម្លងទៅបុគ្គលផ្សេងទៀតបាន 2-3នាក់ឯណោះ។
-“វីរុស” រាលដាលឆ្លងប្រទេស
មុនការឆ្លងរាលដាលឆ្លងប្រទេស ប្រហែលជាយើងត្រូវថយត្រឡប់ទៅមើលពីដើមកំណើតនៃវីរុសទាំង2 នេះសិន។ ទាំងកូរ៉ូណា និងសារស៍ សុទ្ធតែចេញមកពីប្រទេសតែមួយជាមួយគ្នា គឺ “ប្រទេសចិន” និងមានប្រភពកំណើតដូចគ្នា គឺចេញពី “ផ្សារលក់អាហារស្រស់” ខុសគ្នាតែត្រង់មិនបានចេញមកពីទីក្រុង និងមណ្ឌលជាមួយគ្នាតែប៉ុណ្ណោះ។ ដោយវីរុសកូរ៉ូណាចេញមកពីទីក្រុងវូហាន មណ្ឌលហ៊ូពេយ ឯសារស៍ ចេញមកពីមណ្ឌលក្វាងទុង។
ពីការដែល “ផ្សារលក់អាហារស្រស់” គឺជាប្រភពកំណើតនៃការឆ្លងរាលដាលរបស់មេរោគកូរ៉ូណា ដែលមានរានលក់សាច់សត្វស្រស់ច្រើនប្រភេទ ទាំងពស់ សំពោច សត្វស្លាប រួមទាំងប្រចៀវផងនោះ បានធ្វើឱ្យរដ្ឋបាលចិនចេញវិធានការតឹងរ៉ឹង ចេញបញ្ជាហាមទូទាំងប្រទេសមិនឱ្យលក់សត្វព្រៃនៅក្នុងផ្សារលក់អាហារស្រស់ ភោជនីយដ្ឋាន និងផ្សារផ្លាតហ្វ៉ម អ៊ី-ខំមើរកស៍(លក់តាមអនឡាញ) រួមទាំងការចេញបញ្ជាបិទទីក្រុង និងផ្អាកការធ្វើគមនាគមន៍ ដឹកជញ្ជូនគ្រប់ប្រព័ន្ធផ្លូវ ដោយសារខ្លាចក្លាយជាប្រភពបណ្ដុះមេរោគ និងធ្វើឱ្យកើតការរាលដាលដែលអាចនឹងធ្ងន់ធ្ងរខ្លាំងឡើងជាងពេលបច្ចុប្បន្ន និងដែលអាចនឹងដូចកាលពីសម័យមេរោគ «សារស៍» ដែលឆ្លងរាលដាលរហូតដល់ទៅ 26ប្រទេសក្នុងរយៈពេលតែ 8ខែ ខណៈដែលវីរុសកូរ៉ូណាកំពុងរាលដាលទៅដល់ 18ប្រទេសក្នុងពិភពលោក(រួមទាំងកម្ពុជាផង)ក្នុងរយៈពេលតែ 1ខែប៉ុណ្ណោះ។
ដោយចំនួនតួលេខប្រទេសដែលបានឆ្លងរាលដាលច្រើនជាងពាក់កណ្ដាលរបស់មេរោគ សារស៍ និងទោះជាមានការទាមទារឱ្យប្រកាស “សភាវគ្រោះថ្នាក់លំដាប់ពិភពលោក” ក្ដី តែអង្គការសុខភាពពិភពលោក(WHO) បែរជាមើលឃើញថា «វាហាក់ដូចជាលឿនពេកក្នុងការប្រកាសបែបនោះ» ទៅវិញ។
សរុបទៅ តើវីរុសកូរ៉ូណា និងសារស៍ ដូចគ្នាដែរឬទេ?
ចម្លើយ មានទាំង “ដូចគ្នា” និង “ខុសគ្នា”
-ចំណុចដែល “ដូចគ្នា” របស់វីរុសកូរ៉ូណា និងសារស៍ គឺ “ប្រភពបង្កើតមេរោគ”
-និងចំណុចដែល “ខុសគ្នា” របស់វីរុសកូរ៉ូណា និងសារស៍ គឺ “ភ្នាក់ងារចម្លងរោគ”
យើងនាំគ្នាទៅមើល ម្ដង 1Step
1-សារស៍ ចាប់ផ្ដើមពីសត្វប្រចៀវ ចូលទៅសត្វសំពោច រួចចូលមកមនុស្ស និងអាចចម្លងពីមនុស្សទៅមនុស្សបាន តាមរយៈកម្ទេច ឬលម្អងស្លេស្ម៍ ការប៉ះពាល់ និងការក្អក ឬកណ្ដាស។
2-វីរុសកូរ៉ូណាប្រភេទ2019 ចាប់ផ្ដើមពីសត្វប្រចៀវ ចូលទៅ “ភ្នាក់ងារចម្លងរោគអាថ៌កំបាំង” រួចចូលមកមនុស្ស និងអាចចម្លងពីមនុស្សទៅមនុស្សបាន តាមរយៈកម្ទេច ឬលម្អងស្លេស្ម៍ ការប៉ះពាល់ និងការក្អក ឬកណ្ដាស់។
ក្រៅពីនេះ រឿងមួយទៀតដែលមេរោគទាំង2 ដូចគ្នា នោះគឺ “គ្មានវ៉ាក់សាំងការពារ”។
យុទ្ធនាការបង្ក្រាបវីរុសកូរ៉ូណា មេរៀនដែលចិនរៀនយល់ដឹងពីមេរោគ សារស៍

ក្នុងអំឡុងដើមឆ្នាំ2003 ដែលមេរោគសារស៍មានការឆ្លងរាលដាលយ៉ាងខ្លាំងក្លានោះ ប្រទេសជាច្រើននាំគ្នាខឹងសម្បា និងគិតថា ផលប៉ះពាល់ដែលពិបាកហួសនឹងទប់ស្កាត់ រហូតរាលដាលឆ្លងទៅ 26ប្រទេស មានអ្នកឆ្លងមេរោគជាង 8,000នាក់ និងស្លាប់ជាង 700នាក់នោះ គឺដោយសារតែចិនមានការលាក់បាំងព័ត៌មានអ្វីម្យ៉ាង ទាំងដែលការឆ្លងរាលដាលបានចាប់ផ្ដើមឡើងក្នុងខែវិច្ឆិកា ឆ្នាំ2002 តែចិនបែរជាទើបតែរាយការណ៍ជាសាធារណៈលើកដំបូងនៅក្នុងខែកុម្ភៈ ឆ្នាំ2003។ ស្ថានការណ៍កើតវិបត្តិខ្លាំង មានអ្នកស្លាប់រហូតដល់ 5នាក់រួចទៅហើយ និងឆ្លងមេរោគជាង 300នាក់ក្នុងមណ្ឌលក្វាងទុង។
កន្លងមក នៅចុងឆ្នាំ2019 ចិនមានការផ្លាស់ប្ដូរ ដោយចាប់ផ្ដើមរាយការណ៍ជាសាធារណៈ និងទៅអង្គការសុខភាពពិភពលោកអំពីស្ថានការណ៍ឆ្លងរាលដាលក្នុងអំឡុងពេលដែលទើបតែមានការចាប់ផ្ដើមឆ្លងរាលដាល ដែលទោះជាកន្លងផុតទៅហើយ 3សប្ដាហ៍ក៏ដោយ តែក៏រាប់ថា លឿនជាងកាលពីគ្រាមុន(កាលពីមេរោគសារស៍រាតត្បាត)។
យ៉ាងណាក៏ដោយ ទោះជាមានភាពលឿនរហ័សជាងមុន ទោះជាមានការត្រៀមវិធានការទប់ទល់ ទាំងការបិទទីក្រុង ការប្រកាសប្រាប់ប្រជាជន កាត់កាត់ផ្ដាច់ផ្លូវគមនាគមន៍ និងដឹកជញ្ជូន និងរាយការណ៍ពីបច្ចុប្បន្នភាពចំពោះអន្តរជាតិហើយក៏ដោយ តែក៏នៅតែមានភាពមិនច្បាស់លាស់ និងគួរឱ្យសង្ស័យសម្រាប់ប្រទេសជាច្រើនថា “ចិនអាចនៅមិនទាន់ស្មោះត្រង់ចំពោះការរាយការណ៍ទាំងអស់នៅឡើយ”។
-មេរោគ2 បង្កគ្រោះថ្នាក់ ចិនជប់មន្ទីរពេទ្យឡើងក្នុងរយៈពេល 6ថ្ងៃ
ថ្ងៃសុក្រ ទី24 មករា ឆ្នាំ2020 ចិនគាស់ “សាស៍ ម៉ូដែល” មកប្រើឡើងវិញម្ដងទៀត ដោយការសាងសង់មន្ទីរពេទ្យពិសេសសម្រាប់ទទួលអ្នកជំងឺមេរោគវីរុសកូរ៉ូណាប្រភេទថ្មី2019 ជាពិសេសតែម្ដង។
ផ្ទៃដីជាង 25,000ម៉ែត្រការ៉េ ត្រូវបានជប់និម្មិតជាមន្ទីរពេទ្យទំហំ 1,000គ្រែអ្នកជំងឺ ដោយមានបែបគំរូដើមតាមមន្ទីរពេទ្យ សៀវ ថាំងសាន ដែលសាងឡើងដើម្បីទប់ទល់ការឆ្លងរាលដាលរបស់មេរោគសារស៍ក្នុងឆ្នាំ2003។
កាលពីសម័យមេរោគសារស៍រាតត្បាត ចិនប្រើកម្មករជាង 4,000នាក់ សាងសង់ទាំងយប់ទាំងថ្ងៃ រហូតមន្ទីរពេទ្យកើតចេញជារូបរាងស្រេចបាច់ក្នុងរយៈពេល 7ថ្ងៃ។ ចំណែកក្នុងគ្រា វីរុសកូរ៉ូណានេះ ក៏ដូចគ្នាដែរ រដ្ឋបាលចិនដាក់កំណត់ ត្រូវសាងសង់ឱ្យហើយស្រេចក្នុងរយៈពេល 6ថ្ងៃ ដោយត្រូវត្រៀមឱ្យរួចជាស្រេចសម្រាប់ការប្រើប្រាស់នៅថ្ងៃទី3 កុម្ភៈ ឆ្នាំ2020។
តាមរយៈស្ថានការណ៍ការឆ្លងរាលដាលនៃ វីរុសកូរ៉ូណាប្រភេទថ្មី2019 ដែលកំពុងតែឆាបឆេះខ្លាំងនាពេលនេះ ទោះជាក្នុងកម្រិតពិភពលោកនៅមិនទាន់មានការប្រកាសថាជា “សភាវវិបត្តិដែលគួរឱ្យភ័យបារម្ភ” ក៏ដោយ និងទោះជាមានអត្រាការស្លាប់ដែលទាបជាងកាលមេរោគសារស៍ក៏ដោយ តែដោយការឆ្លងរាលដាលដែលឆាប់រហ័សបែបនេះ វាអាចនឹងមានភាពអាចទៅរួចដែលថា អ្នកឆ្លងមេរោគនឹងកើនឡើងខ្ពស់ដល់ទៅ 250,000 ឬ 350,000នាក់ ដូចដែលមានការវាយតម្លៃ…។
ហើយចាប់ពីពេលនេះទៅ ប្រហែលជាត្រូវតាមសង្កេតបែបមិនដាក់ភ្នែកហើយថា តើចិនអាចគ្រប់គ្រង “វីរុសកូរ៉ួណាប្រភេថ្មី2019” ឱ្យស្ថិតក្នុងរង្វង់កំណត់ និងបញ្ឈប់ការឆ្លងរាលដាលបានក្នុងអំឡុងពេល 8ខែដូចកាលពី មេរោគសារស៍ បានដែរឬទេ? ព្រោះបើសិនជាយូរជាងនេះ ច្បាស់ជាមានផលប៉ះពាល់ដល់ GDP របស់ចិន និងពិភពលោកយ៉ាងពិតប្រាកដ យ៉ាងតិចបំផុតក៏ប្រហែល 1-2%ដែរ៕
ប្រភព ៖ សារព័ត៌មានបរទេស
January 30, 2020
ចិនព្រមានពីការកើតឡើងនៃ “សម្បុកមេរោគ” រលាកសួត “ទី2” បន្ទាប់ពី Wuhan
អភិបាលខេត្ត Hebei បាននិយាយថា ជំងឺរលាកសួតដែលបង្កឡើងដោយមេរោគ Corona (nCoV) មកដល់ពេលនេះបានធ្វើឱ្យមានភាពវឹកវរជាខ្លាំងក្នុងក្រុង Huanggang (ទីក្រុង 1ទៀត)នៃខេត្តមួយនេះ។
នៅក្នុងកិច្ចប្រជុំកាលពីថ្ងៃទី29 មករាកន្លងទៅ អភិបាលខេត្ត Hebei លោក Wang Xiaodong បានថ្លែងថា យើងមិនអាចបណ្ដោយឱ្យទីក្រុង Huanggang ក្លាយជា “សម្បុកមេរោគ” Wuhan ទី2បានទេ។ លោក Wang Xiaodong ក៏បានស្នើឱ្យបណ្ដាក្រុមហ៊ុនក្នុងខេត្ត Hebei បន្តផ្អាកសកម្មភាពរហូតដល់ក្រោយថ្ងៃទី13 កុម្ភៈ ឆ្នាំ2020។
ទីក្រុង Huanggang មានប្រជាជនសរុប 7.5លាននាក់ ហើយវាគឺជាទីក្រុងដ៏ធំមួយដែរនៅក្បែរទីក្រុង Wuhan។ Huanggang ក៏ជាទីក្រុងមួយក្នុងចំណោមទីក្រុងដែលត្រូវបានដាក់បម្រាមគោចរដើម្បីទប់ស្កាត់ការឆ្លងរាលដាលនៃមេរោគ Corona ដែរ។ ទីក្រុងនេះ មានអ្នកស្លាប់ដោយសារមេរោគរលាកសួត Corona ចំនួន 5នាក់ និងមានអ្នកឆ្លងមេរោគនេះចំនួន 324ករណី គិតមកត្រឹមថ្ងៃទី28 មករា ឈរលំដាប់លេខ2 បន្ទាប់ពីក្រុង Wuhan ដែលជា “ស្រុកកំណើត” របស់មេរោគ Corona។
ប្រភពព័ត៌មានបានឱ្យដឹងថា អ្នកស្លាប់ដោយសារមេរោគ nCoV (Corona) កើនដល់ 170នាក់ និងអ្នកឆ្លងមេរោគនេះក៏កើនដល់ 7,783ករណីនៅទូទាំងពិភពលោក ភាគច្រើន គឺជាប្រជាជននៅក្រុង Wuhan នេះបើគិតមកដល់ថ្ងៃទី30 មករានេះ។
ទិន្នន័យចុងក្រោយបានបង្ហាញថា ចិនដីគោកមានអ្នកឆ្លងមេរោគនេះចំនួន7,678នាក់ ប្រទេសថៃ14នាក់ ជប៉ុន11នាក់ ហុងកុង10នាក់ សិង្ហបុរី10នាក់ កោះតៃវ៉ាន់ 8នាក់ អូស្ត្រាលី 7នាក់ ក្រុងម៉ាកាវ 7នាក់ ម៉ាឡេស៊ី 7នាក់ បារាំង 5នាក់ អាមេរិក 5នាក់ អាល្លឺម៉ង់ 4នាក់ កូរ៉េខាងត្បូង 4នាក់ អេមីរ៉េត អារ៉ាប់រួម 4នាក់ កាណាដា 3នាក់ វៀតណាម 2នាក់ កម្ពុជា 1នាក់ ហ្វាំងឡង់ 1នាក់ នេប៉ាល 1នាក់ ស្រីលង្កា 1នាក់។
ប្រធានាធិបតីចិន លោក ស៊ី ជីនពីង បានថ្លែងនៅក្នុងកិច្ចប្រជុំជាមួយអង្គការសុខភាពពិភពលោក (WHO) កាលពីថ្ងៃទី28កន្លងទៅថា “វីរុស nCoV គឺជាបិសាច ហើយយើងនឹងមិនបណ្ដោយឱ្យពួកវាគេចខ្លួនបានឡើយ។ ចិននឹងបង្កើនកិច្ចសហប្រតិបត្តិការអន្តរជាតិ និងស្វាគមន៍ WHO ដែលចូលរួមបេសកកម្មប្រឆាំងអាសន្នរោគនេះ។ ចិនមានជំនឿចិត្តថា នឹងអាចទប់ស្កាត់វីរុសនេះបាន”។
អ្នកជំនាញជាច្រើនយល់ថា មេរោគប្រភេទថ្មី nCoV នេះ មិនសម្លាប់មនុស្សច្រើនដូចមេរោគ SARS មែន ប៉ុន្តែពួកគេនៅតែព្រមានអំពីការកើនឡើងនៃករណីឆ្លងដ៏លឿនរហ័ស ហើយចំណុចពិសេសជាច្រើនរបស់មេរោគនេះ មិនទាន់ត្រូវបានគេដឹងលម្អិតនៅឡើយ។
ដូចនឹងជំងឺផ្លូវដង្ហើមផ្សេងទៀត មេរោគរលាកសួត Corona នេះ ឆ្លងពីមនុស្សម្នាក់ទៅមនុស្សម្នាក់ តាមរយៈគ្រាប់ល្អិតនៃធាតុរាវនៅពេលកណ្ដាស់ ក្អក ឬការប៉ះពាល់អ្នកជំងឺ។ មេរោគនេះក៏អាចឆ្លងទៅអ្នកដទៃបាន នៅមុនពេលអ្នកជំងឺមិនទាន់មានរោគសញ្ញាដែរ។
WHO បានប្រកាសថា នឹងធ្វើការកោះប្រជុំបន្ទាន់មួយ ដើម្បីដោះស្រាយបញ្ហានៃមេរោគនេះ៕
ប្រភព៖ សារព័ត៌មានបរទេស
January 30, 2020
ក្រសួងទេសចរណ៍ ដាក់ចេញវិធានការឆ្លើយតបនឹងការឆ្លងរាលដាលនៃជំងឺផ្លូវដង្ហើមថ្មី Corona
ក្រសួងទេសចរណ៍របស់កម្ពុជា ថ្មីៗនេះបានចេញសេចក្ដីប្រកាសព័ត៌មានមួយទាក់ទិននឹងវិធានការទប់ស្កាត់មេរោគរលាកសួត Corona។
នៅលើទំព័រ Facebook របស់ខ្លួន ក្រសួងទេសចរណ៍បានសរសេរថា៖ “ទោះជាពិភពលោកកំពុងប្រឈមនឹងជំងឺរលាកផ្លូវដង្ហើមថ្មី ដែលបង្កឡើងដោយវីរុសកូរ៉ូណា (Coronavirus)ក៏ដោយ ប៉ុន្តែកម្ពុជានៅតែជាគោលដៅទេសចរណ៍ដែលមានសុខសុវត្ថិភាពសម្រាប់ភ្ញៀវទេសចរគ្រប់គ្នា ដោយធានាបាននូវការគ្រប់គ្រងបញ្ហាជំងឺថ្មីនេះ ដោយហ្មត់ចត់”។
ក្រសួងទេសចរណ៍បានសរសេរទៀតថា៖ “ទោះជាយ៉ាងនេះក្តី ដើម្បីឆ្លើយតបនឹងស្ថានភាពដែលកំពុងផ្ទុះជំងឺនេះ ក្រសួងទេសចរណ៍បានដាក់ចេញនូវវិធានការមួយចំនួនផងដែរ”។
ឯកឧត្ដម បណ្ឌិត ថោង ខុន រដ្ឋមន្ត្រីក្រសួងទេសចរណ៍ ធ្លាប់បានប្រកាសដោយភាពជឿជាក់ថា កម្ពុជានៅតែជាគោលដៅទេសចរណ៍ដ៏កក់ក្តៅសម្រាប់ភ្ញៀវទេសចរគ្រប់គ្នា ដែលនៅតែមានការការពារសុវត្ថិភាព សន្តិសុខ សណ្តាប់ធ្នាប់ នៅតែត្រៀមទទួលស្វាគមន៍ វត្តមានភ្ញៀវអន្តរជាតិជានិច្ច ពិសេសគឺធានាបានការគ្រប់គ្រងបញ្ហាជំងឺរលាកសួតប្រភេទថ្មី (coronavirus) បានយ៉ាងជឿជាក់បំផុត។
ខាងក្រោមនេះជាសេចក្តីប្រកាសរបស់ក្រសួងទេសចរណ៍ អំពីវិធានការមួយចំនួនដែលឆ្លើយតបនឹងការផ្ទុះជំងឺផ្លូវដង្ហើមថ្មី Corona ៖

ប្រភព៖ ក្រសួងទេសចរណ៍
January 30, 2020
ពលរដ្ឋអាមេរិកនាំគ្នាសម្រុកទៅទិញ “ម៉ាស់” មកស្ដុកទុកប្រើរយៈពេលយូរ
នៅសហរដ្ឋអាមេរិក ប្រជាជនជាច្រើនបាននាំគ្នាទិញម៉ាស់ក្នុងចំនួនច្រើនៗ ដើម្បីទុកប្រើឱ្យបានយូរខែ ព្រោះតែភ័យខ្លាចការឆ្លងរាលដាលនៃមេរោគ corona និងភ័យខ្លាចខ្វះឧបករណ៍ការពារដ៏សំខាន់មួយនេះ។
នៅលើផ្សារអនឡាញ Amazon អ្នកផ្គត់ផ្គង់ធំៗជាច្រើនបានឱ្យដឹងថា ខ្លួនត្រូវរង់ចាំរយៈពេលច្រើនសប្ដាហ៍ទៀតទើបអាចប្រគល់ទំនិញទៅអតិថិជនបាន។ អ្នកជំនាញផ្នែកសុខាភិបាលក៏បានព្រួយបារម្ភអំពីហានិភ័យនៃការខ្វះខាតម៉ាស់នៅក្នុងទីផ្សារដែរ ដែលការណ៍នេះនឹងនាំឱ្យមានមនុស្សកាន់តែច្រើនមានអារម្មណ៍កាន់តែភ័យខ្លាចឡើង ហើយអាចបណ្ដាលឱ្យទំនិញនេះឡើងថ្លៃបានទៀតផង។
ម៉ាស់ត្រូវបានគេចាត់ទុកជាខែលការពារមួយ ដែលអាចជួយកាត់បន្ថយការឆ្លងមេរោគនានានៅតាមទីប្រជុំជន ដូចជា ផ្សារ មន្ទីរពេទ្យ ការិយាល័យ ក្នុងរថយន្តក្រុង ឬភោជនីយដ្ឋាន។ល។
យោងតាមអ្នកជំនាញ ការដែលមនុស្សនាំគ្នាទៅទិញម៉ាស់ច្រើនបែបនេះ គឺមានន័យថា បណ្ដាមន្ទីរពេទ្យ ឬមណ្ឌលសុខភាពក៏កំពុងខ្វះខាតម៉ាស់ដែរ។ ក្រុមគ្រូពេទ្យដែលមានតួនាទីព្យាបាល និងថែទាំអ្នកជំងឺផ្លូវដង្ហើម គឺជាអ្នកដែលត្រូវប្រើប្រាស់ម៉ាស់ច្រើនជាងគេ នេះបើយោងតាមមជ្ឈមណ្ឌលគ្រប់គ្រង និងបង្ការជំងឺអាសន្នរោគអាមេរិក(Centers For Disease Control & Prevention ឬ CDC)។
រដ្ឋមន្ត្រីក្រសួងសុខាភិបាលអាមេរិក
មន្ត្រីម្នាក់នៅ CDC បានឱ្យដឹងថា ពួកគេកំពុងចរចាជាមួយបណ្ដារោងចក្រផលិតម៉ាស់ ដើម្បីធ្វើយ៉ាងណាឱ្យមានម៉ាស់គ្រប់គ្រាន់តាមតម្រូវការ។ ប៉ុន្តែបណ្ឌិត Anita Patel មកពី CDC បាននិយាយថា៖ “យើងខ្ញុំគិតថា អ្នករាល់គ្នា នាំគ្នាទិញម៉ាស់មកទុកប្រើប្រាស់ គឺដោយសារការភ័យខ្លាច មិនមែនដោយសារតម្រូវការជាក់ស្ដែងនោះទេ”។
រដ្ឋមន្ត្រីក្រសួងសុខាភិបាលអាមេរិក (United States Department of Health & Human Services (HHS) លោក Alex M. Azar II បានថ្លែងថា ការស្ដុកទុកម៉ាស់ក្នុងចំនួនច្រើន គឺជាការមិនចាំបាច់សម្រាប់ជនជាតិអាមេរិក ព្រោះថា ហានិភ័យទាក់ទិននឹងមេរោគនេះមិនខ្ពស់ទេ។
ម៉ាស់ គឺជាសម្ភារសុខាភិបាលមួយប្រភេទដែលត្រូវបានស្ដុកទុកក្នុងឃ្លាំងយុទ្ធសាស្ត្ររបស់អាមេរិក ហើយវាត្រូវបានផ្គត់ផ្គង់ទៅឱ្យមន្ទីរពេទ្យរដ្ឋនានានៅទូទាំងប្រទេស។ ប៉ុន្តែអ្នកជំនាញអាមេរិកបច្ចុប្បន្នក៏មិនដឹងដែរថា ម៉ាស់ដែលមាននៅក្នុងឃ្លាំង និងប្រភពផ្គត់ផ្គង់មានចំនួនគ្រប់សម្រាប់តម្រូវការដែរឬក៏អត់នោះទេ បើសិនជាការឆ្លងនៃអាសន្នរោគនេះអូសបន្លាយពេលយូរ។
ប្រភពព័ត៌មានបានឱ្យដឹងថា គិតត្រឹមយប់ថ្ងៃទី 29 មករា 2020 អាមេរិកមានអ្នកឆ្លងមេរោគ corona ចំនួន 5ករណី។
រដ្ឋាភិបាលនៃប្រទេសជាច្រើនក្នុងពិភពលោក កំពុងព្យាយាមនាំពលរដ្ឋរបស់ពួកគេចេញពីតំបន់គ្រោះថ្នាក់ Wuhan នៃប្រទេសចិន ខណៈដែលមានអ្នកស្លាប់ដោយសារមេរោគ corona នេះ កំពុងកើនឡើងជាបន្តបន្ទាប់។
ក្រុមមន្ត្រីចិនបានឱ្យដឹងថា ចំនួនអ្នកស្លាប់ដោយសារឆ្លងមេរោគរលាកសួតថ្មី corona បានកើនដល់ 170នាក់ និងអ្នកកំពុងផ្ទុកមេរោគនេះមានចំនួន 7,711នាក់៕
ប្រភព៖ សារព័ត៌មានបរទេស
January 30, 2020