Author: សឿន សំណាង

វូហាន ទីក្រុងរហោដ្ឋាន ស្ងាត់ជ្រងំ និងឈឺចាប់…(តាមរយៈរូបភាព)
ទីក្រុងវូហាន មជ្ឈមណ្ឌលកណ្ដាលនៃការឆ្លងរាលដាលមេរោគវីរុសកូរ៉ូណាប្រភេទថ្មី ត្រូវបានបិទទាំងស្រុងតាំងពីថ្ងៃទី23 មករា ដើម្បីគ្រប់គ្រងការឆ្លងរាលដាលនៃមេរោគ។ វូហាន ជាទីក្រុងខ្នាតធំមួយដែលអាចហៅបានថា ជាមហាទីក្រុង ជាទីប្រជុំជនដ៏ធំបំផុតមួយដែលមានមនុស្សរស់នៅ និងធ្វើដំណើរឆ្លងកាត់ទៅមកក្នុងតំបន់កណ្ដាលទីក្រុងប្រមាណជា 9លាននាក់ ប៉ុន្តែនៅថ្ងៃដែលត្រូវបិទទីក្រុង មនុស្សម្នារាប់លាននាក់បានបាត់អស់រលីងយ៉ាងគួរឱ្យភ្ញាក់ផ្អើល។
ខាងក្រោមនេះ គឺឃ្លីបវីដេអូដែលបង្ហាញពីទីក្រុងរហោដ្ឋាន ក្រោយពីទីក្រុងនេះត្រូវបានបិទទាំងស្រុងកាលពីថ្ងៃទី23 មករា។ ប្រៀបដូចជាឈុតឆាកនៅក្នុងខ្សែភាពយន្តវិទ្យាសាស្ត្រ…ដ៏មិនគួរឱ្យជឿ។
https://www.youtube.com/watch?v=Dtju9crUNQk&feature=emb_logo
ស្ពានអាកាស យេ ចៀ ជុយ តភ្ជាប់ទៅស្ពានអាកាស ឆាង ចៀងទី2 ឆ្ពោះទៅ ស៊ី តុងកៅចៀ និងឆ្ពោះទៅ តុង ហ៊ូតាមឹន។ បើស្ថិតក្នុងស្ថានភាពប្រក្រតី ក្នុងថ្ងៃដែលអាកាសធាតុល្អ រថយន្តដែលបើកមកដើរលេងកម្សាន្តមណ្ឌល តុងហ៊ូ នឹងត្រូវជាប់ស្ទះបន្តកន្ទុយគ្នាវែងអន្លាយ តែពេលនេះមានរថយន្តបើកបរមួយ-ពីរ…។អ្នកយកព័ត៌មានចិន ស្ថាប័ន ហ្គោលបល ថាមស៍ ក្នុងខ្សែបណ្ដាញសារព័ត៌មានប្រជាជនចិន បានចុះទៅដល់ទីតាំងទាំងនោះដើម្បីផ្ដិតយករូបភាពនៅតាមផ្លូវថ្នល់នានាក្នុងទីក្រុងវូហាននាពេលបច្ចុប្បន្ន ដូចជា ផ្លូវ ចៀងហាន់ មណ្ឌលពាណិជ្ជកម្មនៅលើផ្លូវ ឈូ ហ៊ើ អាន់ រង្វង់មូលអនុស្សាវរីយ៍កណ្ដាលទីក្រុង និងទីកន្លែងផ្សេងៗទៀតដែលកាលពីពេលមុន មានមនុស្សម្នាច្រើនកុះករ អ៊ូអរ ប៉ុន្តែបន្ទាប់ពីបិទទីក្រុងមក ក្នុងទីក្រុងស្ទើរតែមិនឃើញមានស្រមោលមនុស្ស។
ក្នុងអំឡុងពេលនេះ មហាទីក្រុងដែលធ្លាប់តែស្រស់ស្អាតសង្ហា ទាន់សម័យដូចវូហាននេះ ឥឡូវបែរជាក្លាយទៅជាទីក្រុងរហោដ្ឋាន និងឈឺចាប់ ប្រៀបដូចក្នុងខ្សែភាពយន្តវិទ្យាសាស្ត្រ…ក្នុងទីក្រុងដ៏ទទេស្អាតនេះ បង្កប់ទៅដោយក្ដីភ័យខ្លាច ទុក្ខសោក ស៊ូទ្រាំ រង់ចាំ និងក្ដីសង្ឃឹម…គ្រប់គ្នាសុទ្ធតែនឹកសង្ឃឹមថា វិបត្តិដែលប្រៀបដូចជាសុបិនអាក្រក់ក្នុងគ្រានេះ នឹងឆ្លងផុតទៅយ៉ាងឆាប់រហ័ស។
ស្ពានអាកាស ចៀ តៅ ខូ មជ្ឈមណ្ឌលកណ្ដាលនៃប្រព័ន្ធគមនាគមន៍ អ៊ូឆាង ជាតំបន់ធុរកិច្ចដែលពោរពេញទៅដោយអគារខ្ពស់ៗ។
បរិវេណផ្លូវ ឈូ ហ៊ើ អាន់ ជាមួយផ្លូវ ចុងពេយ មកប្រសព្វគ្នា បើក្នុងស្ថានភាពប្រក្រតី មានយានយន្តបើកបរទៅ-មកឆ្លងកាត់យ៉ាងកកកុញ តែនៅថ្ងៃបិទទីក្រុង គ្មានមនុស្សធ្វើដំណើរ គ្មានរថយន្តបើកបរឆ្លងកាត់។
ស្ពានធំ សាហ៊ូ ឬចិនហៅថា សាហ៊ូ តាឆៀវ ជាច្រកផ្លូវសំខាន់ដែលភ្ជាប់ផ្លូវ ហាន់ ក្នុង អ៊ូឆាង ឆ្ពោះទៅកាន់ផ្លូវរូងកាត់ភ្នំ ឆាងចៀង ក្នុងក្រុងវូហាន(ផ្លូវរូងកាត់ភ្នំឆ្លង យែងស៊ីកៀវ តែមួយគត់ក្នុងពិភពលោក) តែតាំងពីបិទផ្លូវរូងកាត់ភ្នំនេះនៅថ្ងៃទី25 មករាមក សឹងតែគ្មានរថយន្តបើកទៅ-មក។
ផ្លូវ ហ៊ើ អាន់ ជាផ្លូវមនុស្សដើរ នៅក្នុងមណ្ឌលពាណិជ្ជកម្មដែលអ៊ូអរបំផុតរបស់តំបន់ អ៊ូឆាង ក្នុងទីក្រុងវូហាន។ ក្នុងស្ថានភាពប្រក្រតី មានមនុស្សម្នាចំនួនដ៏ច្រើនមហាសាលដើរទៅ-មកនៅទីនេះ បើក្នុងអំឡុងថ្ងៃឈប់សម្រាកផង មនុស្សម្នានឹងដើរប្រជ្រៀតគ្នាណែនណាន់តាន់តាប់ សឹងតែគ្មានកន្លែងឈរ…។
ផ្លូវតាមបណ្ដោយដងទន្លេសាប តុង ហ៊ូ ដែលល្បីល្បាញថា ជាផ្លូវតាមមាត់ទន្លេដែលស្អាតជាងគេបំផុត។ ជាធម្មតាមានរថយន្ត និងយានជំនិះផ្សេងៗជាច្រើន ទាំងអ្នកទីក្រុងក្នុងចំនួនដ៏ច្រើននាំគ្នាមកដើរកម្សាន្ត បើករថយន្តមកចតស្រូបយកខ្យល់ទន្លេ…។នៅខាងៗ គឺជាមហាវិទ្យាល័យ វូហាន ជាកន្លែងដែលអ្នកទេសចរជាច្រើននាំគ្នាមកថតរូប តែពេលនេះ ក្លាយជាផ្លូវគ្មានមនុស្សដើរ មានតែស្លឹកឈើជ្រុះនៅលើផ្លូវ…។
ស្ពាន ឆាង ចៀងទី2 ជាខ្សែផ្លូវឆ្លងទន្លេ ឆាង ចៀង ដែលចង្អៀតណែនបំផុតរបស់ទីក្រុងវូហាន ខណៈពេលនេះ ពេលរថយន្តឡើងស្ពាន រថយន្តទាំងអស់ត្រូវតែឈប់ អ្នកដំណើរទាំងអស់ត្រូវតែចុះពីរថយន្ត ដើម្បីវាស់សីតុណ្ហភាពរាងកាយ…៕
ប្រភព៖ សារព័ត៌មានបរទេស
February 2, 2020
ទិដ្ឋភាពទូទៅនៃមន្ទីរពេទ្យថ្មីសម្រាប់អ្នកជំងឺ Corona តាំងពីពេលចាប់ផ្ដើមសាងសង់ រហូតដល់ពេលនេះ
សម្ភារវេជ្ជសាស្ត្រ ដូចជា គ្រែ កៅអី ម៉ាស៊ីននានា និងឧបករណ៍គ្រប់ប្រភេទជាច្រើនទៀត ត្រូវបានបំពាក់ក្នុងមន្ទីរពេទ្យ Huoshenshan ត្រៀមខ្លួនសម្រាប់បើកដំណើរការចាប់ពីថ្ងៃស្អែក (3កុម្ភៈ)នេះ។
ទិដ្ឋភាពនៃមន្ទីរពេទ្យ Huoshenshan ទាំងមូល ថតពីលើអាកាស នៅថ្ងៃនេះ (2កុម្ភៈ 2020)។ មន្ទីរពេទ្យនេះ មានទំហំ 2,500ម៉ែត្រក្រឡា និងដាក់បាន 1,000គ្រែ។
សម្ភារវេជ្ជសាស្ត្រទាំងអស់ ត្រូវបានបំពាក់ និងត្រៀមជាស្រេចដើម្បីទទួលបុគ្គលិកពេទ្យ 1,400នាក់ ចូលមកបំពេញការងារ។

ប្រភព៖ សារព័ត៌មានបរទេស
February 2, 2020
រន្ធត់ចិត្ត!! បុគ្គលិកជប៉ុនម្នាក់ “ធ្វើអត្តឃាត” នៅក្នុងមណ្ឌលបង្ខាំងជំងឺ បន្ទាប់ពីជួយប្រជាជនភៀសខ្លួនចេញពី វូហាន…
បុគ្គលិកជនជាតិជប៉ុនម្នាក់ដែលមានតួនាទីមើលថែទាំជនជាតិជប៉ុនដែលភៀសខ្លួនចេញពីការឆ្លងរាលដាលរបស់មេរោគវីរុសកូរ៉ូណាពីទីក្រុងវូហាន បានលោតពីលើអគារធ្វើអត្តឃាតបញ្ចប់ជីវិតខ្លួនឯងនៅក្នុងមជ្ឈមណ្ឌលបង្ខាំងជំងឺ នៅក្នុងខេត្តសៃតាម៉ាក់ ប្រទេសជប៉ុន។
កាលពីថ្ងៃសៅរ៍ ទី1 ខែកុម្ភៈ បុគ្គលិកវ័យ 37ឆ្នាំម្នាក់ ត្រូវបានប្រទះឃើញថា បានស្លាប់បាត់បង់ជីវិត ដោយសារការលោតចុះមកពីលើបន្ទប់ស្នាក់នៅក្នុងបរិវេណស្ថាប័នសុខាភិបាលជាតិសាធារណៈ ក្នុងខេត្តសៃតាម៉ាក់ ជិតទីក្រុងតូក្យូ ជាទីកន្លែងមួយដែលក្រុមជនជាតិជប៉ុនដែលត្រឡប់មកពីទីក្រុងវូហាន ប្រទេសចិនត្រូវបានរដ្ឋបាលជប៉ុនប្រមូលដាក់ឱ្យនៅមួយកន្លែងដើម្បីរង់ចាំតាមដានអាការជំងឺរលាកសួតប្រភេទថ្មី រយៈពេល 14ថ្ងៃ។
បុគ្គលិកដែលបានអត្តឃាតម្នាក់នេះ ត្រូវបានបញ្ជូនមកពីទីស្នាក់ការប៉ូលិសក្រុងតូក្យូឱ្យទៅបំពេញការងារនៅឯទីស្ដីការនាយករដ្ឋមន្ត្រី ដើម្បីមើលការខុសត្រូវលើការជម្លៀសជនជាតិជប៉ុនត្រឡប់មកពីទីក្រុងវូហានដែលជាមជ្ឈមណ្ឌលធំនៃការឆ្លងរាលដាលរបស់មេរោគវីរុសកូរ៉ូណាប្រភេទថ្មី ដោយរូបគេបានចូលទៅស្នាក់នៅក្នុងមណ្ឌលបង្ខាំងការពារជំងឺមួយនេះកាលពីថ្ងៃទី31 មករា ដើម្បីមើលថែទាំជនជាតិជប៉ុនដែលបានជម្លៀសមកដល់។
https://www.youtube.com/watch?time_continue=17&v=0e2eP4gkcfU&feature=emb_logo
ប៉ូលិសសន្និដ្ឋានថា បុគ្គលិកម្នាក់នេះបានធ្វើអត្តឃាត តែដោយសារមិនឃើញមានការសរសេរសំបុត្រផ្ដាំផ្ញើ ឬភ័ស្តុតាងអ្វីផ្សេង ទើបប៉ូលិសត្រូវធ្វើការស៊ើបសួរស្វែងរកមូលហេតុនៃការបញ្ចប់ជីវិតខ្លួនឯងក្នុងគ្រានេះជាបន្ត។
ករណីនេះ បានក្លាយជារឿងជជែកដេញដោលគ្នាយ៉ាងខ្លាំងនៅក្នុងសង្គមជនជាតិជប៉ុននាពេលនេះ ថាតើជាការធ្វើអត្តឃាតមែនឬយ៉ាងណា? តើមានពាក់ព័ន្ធនឹងភារកិច្ចជម្លៀសជនជាតិជប៉ុនគេចពីមេរោគវីរុសកូរ៉ូណាដែរឬទេ? ឬក៏ដោយសារតែមូលហេតុផ្ទាល់ខ្លួនរបស់គេ?
បើមានព័ត៌មានថ្មីបន្ថែមអំពីករណីនេះ គេហទំព័រឡារ៉ែននឹងនាំយកមកជម្រាបជូននៅពេលក្រោយជាបន្តទៀត…៕
ប្រភព៖ សារព័ត៌មានបរទេស
February 2, 2020
មន្ទីរពេទ្យដំបូងសម្រាប់អ្នកជំងឺ Corona នៅ Wuhan ត្រៀមដាក់ឱ្យដំណើរការ
អាជ្ញាធរក្រុង Wuhan ប្រគល់ “មន្ទីរពេទ្យប្រឆាំង Corona” ដំបូងទៅឱ្យពេទ្យយោធានៅថ្ងៃនេះ ដើម្បីរួមចំណែកទប់ទល់អាសន្នរោគរលាកសួតថ្មីនេះ។
គ្រូពេទ្យយោធាចិនចំនួន 1,400នាក់នឹងចូលមកគ្រប់គ្រងមន្ទីរពេទ្យ Huoshenshan ដែលមានដាក់គ្រែចំនួន 1,000ចាប់ដំណើរការពីថ្ងៃទី 3កុម្ភៈខាងមុខ។ មន្ទីរពេទ្យនេះ បានចាប់ផ្ដើមសាងសង់តាំងពីថ្ងៃទី 25មករា ដើម្បីជួយដោះស្រាយបញ្ហាខ្វះមន្ទីរពេទ្យនៅក្រុង Wuhan ដែលជាសម្បុកមេរោគរលាកសួតថ្មី Corona។
មន្ទីរពេទ្យទីពីរមានឈ្មោះថា Leishenshan មានគ្រែចំនួនប្រហែល 1,600 ក៏គ្រោងនឹងបើកដំណើរការនៅក្នុងថ្ងៃទី 5កុម្ភៈខាងមុខ។ ទន្ទឹមនិងនេះក៏មានមន្ទីរពេទ្យមួយផ្សេងទៀតដែលអាចដាក់បាន 600គ្រែ កំពុងត្រូវសាងសង់នៅក្រុង Ezhou នៃខេត្ត Hubei នេះផងដែរ។
អាសន្នរោគរលាកសួតដែលបង្កឡើងដោយវីរូស nCoV (Corona) បានចាប់ផ្ដើមឆ្លងរាតត្បាតពីទីក្រុង Wuhan និងកំពុងរាលដាលទូទាំងពិភពលោក។ មេរោគនេះ បានសម្លាប់មនុស្សយ៉ាងតិច 305នាក់ និង 14,628នាក់ផ្សេងទៀតកំពុងមានផ្ទុកមេរោគនេះ នៅទូទាំងពិភពលោក៕
ប្រភព៖ សារព័ត៌មានបរទេស
February 2, 2020
អាសន្នរោគ Corona មិនទាន់ចប់ផង ចិនត្រូវទទួលផ្ដាសាយបក្សី H5N1 មួយជាន់ទៀត!
ក្រសួងកសិកម្មចិន បានឱ្យដឹងថា ជំងឺផ្តាសាយបក្សី H5N1 បានផ្ទុះឡើងនៅក្នុងកសិដ្ឋានមួយកន្លែងក្នុងខេត្ត ហ៊ូណាន ប្រទេសចិន បណ្ដាលឱ្យមាន់ចំនួន 4,500ក្បាលបានងាប់ នេះបើតាមទីភ្នាក់ងារសារព័ត៌មាន Reuters។
កសិដ្ឋានមួយ ស្ថិតនៅជាយក្រុងសាយាង (Shaoyang) ខេត្តហ៊ូណាន (Hunan) ភាគខាងត្បូងប្រទេសចិន មានចិញ្ចឹមមាន់ចំនួន 7ុ850ក្បាល ហើយពាក់កណ្ដាលបានងាប់ដោយសារឆ្លងមេរោគផ្ដាសាយបក្សី H5N1 នេះបើតាមការឱ្យដឹងពីក្រសួងកសិកម្មកាលពីម្សិលមិញ (1កុម្ភៈ)។ មន្ត្រីមូលដ្ឋានបានចាត់វិធានការចាំបាច់ដើម្បីគ្រប់គ្រងស្ថានការណ៍ ក្នុងនោះបានដុតកម្ទេចមាន់ដែលបានឆ្លងផ្ដាសាយបក្សីចំនួន 17ុ828ក្បាល។
H5N1 គឺជាអម្បូរវីរូសផ្ដាសាយដែលមានសមត្ថភាពឆ្លងរាលដាលខ្ពស់ ក្នុងនោះមានប្រភេទខ្លះអាចឆ្លងពីសត្វមកមនុស្ស។ កាលពីឆ្នាំ 1997 មេរោគនេះ ត្រូវគេរកឃើញថាបានឆ្លងរាលដាលនៅតាមផ្សារលក់មាន់ទារស់មួយចំនួននៅក្រុងហុងកុង បណ្ដាលឱ្យមានមនុស្សសា្លប់ 6នាក់ក្នុងចំណោមអ្នកឆ្លងវីរូស18នាក់។ ឆ្នាំ2014 ពលរដ្ឋកាណាដាម្នាក់បានក្លាយជាអ្នកជំងឺដំបូងគេនៅអាមេរិកខាងជើងដែលបានស្លាប់ដោយសារមេរោគផ្ដាសាយបក្សី H5N1 បន្ទាប់ពីមេរោគនេះបានសម្លាប់មនុស្សជាច្រើននាក់នៅក្នុងបណ្ដាប្រទេសអាស៊ី។
សម្បុកមេរោគផ្ដាសាយបក្សីថ្មីនេះ ត្រូវបានរកឃើញខណៈដែលមេរោគបង្ករលាកសួតថ្មី Corona (nCoV)កំពុងឆ្លងរាលដាលពាសពេញពិភពលោក ដោយចាប់ផ្ដើមពីតំបន់ Wuhan ប្រទេសចិន ហើយបានឆ្លងទៅមនុស្សជាង 14,627នាក់ និងសម្លាប់មនុស្សយ៉ាងតិច 305នាក់នៅទូទាំងពិភពលោក៕
ប្រភព៖ សារព័ត៌មានបរទេស
ករណីស្លាប់ដោយសារមេរោគ Corona ដំបូងបង្អស់នៅខាងក្រៅប្រទេសចិន
February 2, 2020
ករណីស្លាប់ដោយសារមេរោគ Corona ដំបូងបង្អស់នៅខាងក្រៅប្រទេសចិន
អ្នកជំងឺដែលបានឆ្លងមេរោគ Corona ម្នាក់បានស្លាប់នៅឯក្រុងម៉ានីល ប្រទេសហ្វីលីពីន ដែលនេះគឺជាករណីដំបូងបង្អស់ អ្នកស្លាប់ដោយសារជំងឺនេះនៅខាងក្រៅប្រទេសចិន នេះបើយោងតាមអង្គការសុខភាពពិភពលោក។
តំណាងអង្គការសុខភាពពិភពលោកប្រចាំហ្វីលីពីន លោក Rabindra Abeyasinghe បានមានប្រសាសន៍កាលពីព្រឹកមិញថា “អ្នកដែលបានស្លាប់នោះគឺជាជនជាតិចិន មកពីក្រុង Wuhan ដែលជាតំបន់កំណើតនៃវីរុស Corona (nCoV)។ នេះជាករណីស្លាប់ដំបូងបង្អស់នៅក្រៅប្រទេសចិន”។
ជនរងគ្រោះដោយសារអាសន្នរោគ Corona ខាងលើ មានអាយុ 44ឆ្នាំ ស្លាប់នៅក្នុងមន្ទីរពេទ្យមួយនៃក្រុងម៉ានីល។ តាមការសន្និដ្ឋានរបស់មន្ត្រីសុខាភិបាល បុរសនេះប្រហែលបានឆ្លងមេរោគដ៏ប្រល័យនេះកាលពីនៅប្រទេសចិន មុនពេលរួមដំណើរជាមួយស្ត្រីម្នាក់មកកាន់ហ្វីលីពីន។ ស្ដ្រីម្នាក់នេះ ត្រូវបានគេបញ្ជាក់ថាជាអ្នកមានផ្ទុកមេរោគ Corona ដំបូងនៅហ្វីលីពីន។ បច្ចុប្បន្ន ស្ត្រីនេះទទួលការព្យាបាលនៅឯមន្ទីរពេទ្យមួយនៃប្រទេសនេះ។
លោក Rabindra Abeyasinghe បានបន្តថា ៖ “យ៉ាងនេះក្ដី គេត្រូវដឹងថា អ្នកជំងឺមិនមែនជាករណីឆ្លងរោគនៅទីនេះ។ អ្នកជំងឺមកពីតំបន់កណ្ដាលនៃអាសន្នរោគ (Wuhan)”។
ហ្វីលីពីន កាលពីបួនថ្ងៃមុនបានប្រកាសផ្អាកការផ្ដល់ទិដ្ឋាការនៅនឹងកន្លែងថ្មីសម្រាប់ពលរដ្ឋចិន ដើម្បីកាត់បន្ថយចំនួននៃក្រុមអ្នកទេសចរណ៍។ មន្ត្រីនាយកដ្ឋានអន្តោប្រវេសន៍ហ្វីលីពីន បានឱ្យដឹងថា ប្រទេសនេះមិនទាន់បានហាមពលរដ្ឋចិនមកកាន់ប្រទេសនេះនៅឡើយ ប៉ុន្តែពួកគេស្នើឱ្យពលរដ្ឋចិនធ្វើតេសត៍រកមេរោគ nCoV មិននឹងត្រូវបានអនុញ្ញាតឱ្យចូលប្រទេសហ្វីលីពីន។ ចំណែកនាយកដ្ឋានអាកាសចរណ៍ស៊ីវិលហ្វីលីពីន បានផ្អាកការហោះហើរត្រង់ពីក្រុង Wuhan។
ផែនទីបង្ហាញពីវត្តមានរបស់អ្នកបានឆ្លងវីរូសរលាកសួត Corona
អាសន្នរោគរលាកសួតដែលបង្កឡើងដោយវីរូស nCoV (Corona) បានកើនឡើងនៅក្រុង Wuhan តាំងពីថ្ងៃទី 12ធ្នូ ឆ្នាំ2019 ក្រោយមកវាបានរាលដាលដល់ 31ខេត្តក្រុងនៃប្រទេសចិន។ គិតមកត្រឹមថ្ងៃនេះ (2កុម្ភៈ) អ្នកសា្លប់ដោយសារមេរោគនេះ កើនដល់ 304នាក់នៅប្រទេសចិន និងមានអ្នកឆ្លងមេរោគនេះចំនួន 14,451នាក់។ នៅខាងក្រៅប្រទេសចិនវិញ មានប្រទេស និងតំបន់ចំនួន26 ត្រូវគេរាយការណ៍ថា មានអ្នកឆ្លងវីរូសនេះ ក្នុងនោះមានម្នាក់បានបាត់បង់ជីវិត៕
ប្រភព៖ សារព័ត៌មានបរទេស
February 2, 2020
“ម៉ាសពេលនេះសំខាន់ និងមានតម្លៃជាងមាសទៅទៀត!” នេះជាសម្ដីអ្នកស្រុកសៀងហៃប្រទេសចិន
ព្រឹកព្រលឹមម៉ោងប្រហែល6 Yu Husheng ដែលជាវិស្វករចូលនិវត្តន៍មួយរូប បានទៅកាន់ឱសថស្ថានមួយកន្លែងក្នុងខណ្ឌ Xuhui (ក្នុងក្រុងសៀងហៃ ប្រទេសចិន) ដើម្បីទិញម៉ាសទុកប្រើប្រាស់ក្នុងគ្រួសារ។ ពេលទៅដល់ គាត់ឃើញមានមនុស្សម្នាប្រហែលជាង 100នាក់ បានមកតម្រង់ជួរមុនគាត់ទៅទៀត។
លោកអ៊ំវ័យចំណាស់ម្នាក់ បានឱ្យដឹងថា គាត់សុខចិត្តចំណាយពេល និងកម្លាំងកាយដើម្បីស្វែងរក បើទោះត្រូវសម្រាន្តតិចជាងមុនក៏ដោយ។ លោកអ៊ំថ្លែងថា ៖ “ខ្ញុំគិតថា ម៉ាសពេលនេះវាសំខាន់ និងមានតម្លៃជាងមាសទៅទៀត”។
គិតមកដល់ថ្ងៃទី1កុម្ភៈនេះ អាសន្នរោគ Corona បានឆ្លងរាលដាលស្ទើរពេញផ្ទៃប្រទេសចិន បណ្ដាលឱ្យមនុស្សជាង 12,000នាក់បានឆ្លងមេរោគនេះ និង 259នាក់ផ្សេងទៀតបានបាត់បង់ជីវិត។ ដោយសារតែភ័យខ្លាច ពលរដ្ឋចិនដីគោក បានសម្រុកទៅទិញម៉ាសទុកប្រើប្រាស់ក្នុងរយៈពេលយូរអង្វែង។
លោក Yu Husheng បានឱ្យដឹងថា លោកត្រូវការម៉ាសយ៉ាងតិច 30 សម្រាប់គ្រួសាររបស់គាត់ដែលមានសមាជិក 6នាក់។ ប៉ុន្តែ អាជ្ញាធរក្រុងសៀងហៃបានចេញបទបញ្ជា ហាមមិនឱ្យទិញលើសពី10ម៉ាស សម្រាប់មនុស្សម្នាក់ក្នុង1ថ្ងៃ។
ម៉ាស ត្រូវបានកំណត់ឱ្យលក់ក្នុងតម្លៃត្រឹមតែ 0,46 យន់ (ប្រហែល 270 រៀល) ប៉ុណ្ណោះ។ ប៉ុន្តែ នៅក្នុងផ្សារងងឹត ឬតូបទំនិញតាមចិញ្ចើមផ្លូវ អ្នកទិញត្រូវចំណាយប្រាក់ដល់ទៅ 5 យន់ (2,900រៀល) សម្រាប់ម៉ាសមួយ។
បុរសម្នាក់ឈ្មោះ Li Yan អាយុ42ឆ្នាំ ជាបុគ្គលិកក្រុមហ៊ុនផ្សាយពាណិជ្ជកម្មមួយ បាននិយាយថា ៖ “នៅលើ WeChat (បណ្ដាញសង្គមចិន) ពួកគេ (អតិថិជន) សុខចិត្តចំណាយប្រាក់គុណជា 10ដងនៃតម្លៃធម្មតា ដើម្បីទិញម៉ាសចំនួន1។ ប៉ុន្តែ មិត្តភ័ក្តិខ្ញុំគ្មានអ្នកណានៅសល់ម៉ាសដើម្បីលក់នោះដែរ។ រដ្ឋាភិបាល គួរតែស្វែងរកវិធីដើម្បីចែកចាយម៉ាសដល់អ្នករាល់គ្នា”។
បណ្ដាក្រុមហ៊ុន រោងចក្រផលិតសម្ភារវេជ្ជសាស្ត្របានឱ្យដឹងថា ពួកគេបានបង្កើនសង្វាក់ផលិតកម្ម ដើម្បីរត់ប្រណាំងជាមួយនិងតម្រូវការរបស់ប្រជាជន។ ចំណែកអាជ្ញាធរមូលដ្ឋានក៏បាន និងកំពុងជួយផ្គត់ផ្គង់កម្លាំង និងវត្ថុធាតុដើមដល់ការផលិតម៉ាសក្នុងអំឡុងរដូវបុណ្យចូលឆ្នាំចិន។
លោក Li Jia សមាជិកនៃគណកម្មការព័ត៌មានវិទ្យានៃក្រុងសៀងហៃបានប្រាប់ថា បរិមាណទិន្នផលប្រចាំថ្ងៃបានកើនដល់ 1.5លានម៉ាស គឺច្រើនជាង 3ដង បើធៀបនឹងចំនួន 400,000ម៉ាសកាលពីមុនថ្ងៃទី 25មករា ឆ្នាំ2020។ រដ្ឋាភិបាលក៏បានសន្យាជួយដល់បណ្ដាក្រុមហ៊ុន និងរោងចក្រ ក្នុងការធានាដល់សង្វាក់ផលិតកម្មរបស់ពួកគេ ដើម្បីអាចបង្កើនបរិមាណផលិតផល។
លោក Wu Shengrong ប្រធានរោងចក្រផលិតម៉ាស Dangsheng Shanghai ឱ្យដឹងថា កម្មករត្រូវធ្វើការទាំងយប់ទាំងថ្ងៃដើម្បីផលិតឱ្យបានគ្រប់តាមតម្រូវការរបស់ប្រជាជន។ លោក Wu បានបន្ថែមថា ៖ “យើងខ្ញុំមិនដំឡើងថ្លៃដើម្បីបានចំណេញច្រើនពីវិបត្តិសុខភាពនេះឡើយ”។
ក្រុមហ៊ុនរបស់លោក Wu បច្ចុប្បន្នផលិតម៉ាសចំនួន 80,000 ក្នុងមួយថ្ងៃៗ។ តាមគម្រោង ក្នុងរយៈពេល 10 ទៅ 15ថ្ងៃទៀត រោងចក្រ Dangsheng អាចផ្គត់ផ្គង់ 200,000ម៉ាសទៅឱ្យទីផ្សារ បើសិនប្រឹងអស់ពីលទ្ធភាព។
កន្លងមក ក្រុងហុងកុងក៏ធ្លាប់ទទួលរងផលវិបាកស្រដៀងគ្នានេះដែរ។ មនុស្សជាច្រើនបានក្រោកពីព្រលឹម ទៅតម្រង់ជួរគ្នា និងត្រូវរង់ចាំ5ម៉ោងមុនគេបើកហាង ដើម្បីទិញម៉ាស។ អ្នកខ្លះមានការខឹងសម្បាជាខ្លាំង នៅពេលត្រូវត្រឡប់ទៅផ្ទះដោយដៃទទេ។ ហួសហេតុជាងនេះទៀត មានអ្នកខ្លះនាំគ្នាមកបោះតង់នៅមុខហ្វាម៉ាស៊ី 230កន្លែង ដេកមួយយប់ រង់ចាំទិញម៉ាស។
សូមរំឭកថា ប្រទេសចិនកំពុងទទួលរងការរាតត្បាតនៃអាសន្នរោគ Corona ដែលបានផ្ទុះឆ្លងរាលដាលតាំងពីខែធ្នូ ឆ្នាំ2019។ អាសន្នរោគរលាកសួតនេះ បានបណ្ដាលឱ្យមានអ្នកស្លាប់យ៉ាងតិច 259នាក់ និងជាង11,374នាក់ផ្សេងទៀតបានឆ្លងមេរោគនេះនៅទូទាំងពិភពលោក គិតត្រឹមព្រឹកថ្ងៃទី1កុម្ភៈនេះ៕
ប្រភព៖ សារព័ត៌មានបរទេស
February 1, 2020
គួរឱ្យអាសូរអ្នកក្រុង Wuhan! ដួលស្លាប់លើចិញ្ចើមផ្លូវក្បែរហាងទំនិញ ប៉ុន្តែ2ម៉ោងក្រោយទើបមានរថយន្តសង្គ្រោះបន្ទាន់មកដល់ “ព្រោះតែរវល់ពេក”
បុរសវ័យចំណាស់ម្នាក់ មានពាក់ម៉ាស បានដួលស្លាប់នៅលើដងផ្លូវក្នុងក្រុង Wuhan ប្រទេសចិន។ ថ្វីបើរឿងនេះបានកើតឡើងតាំងតែពីថ្ងៃទី30មករា ប៉ុន្តែករណីនេះបានបង្ហាញថា ស្ថានភាពកំពុងវិវដ្ដអាក្រក់ទៅៗនៃអាសន្នរោគ Corona នៅប្រទេសចិន។
រូបថតដែលត្រូវបានថតដោយភ្នាក់ងារសារព័ត៌មាន AFP នៅក្រុង Wuhan បានបង្ហាញថា ជនរងគ្រោះមានអាយុប្រហែល60ឆ្នាំ សក់ស្កូវល្បាយអាចម៍ខ្លា ពាក់ម៉ាស ដេកស្លាប់នៅលើចិញ្ចើមផ្លូវ ខាងមុខហាងទំនិញដែលបានបិទមួយកន្លែង ហើយនៅក្នុងដៃសាកសពនេះ មានថង់ដាក់អីវ៉ាន់ផងដែរ។
គេមិនបានដឹងថា បុរសរងគ្រោះនោះ បានស្លាប់នៅពេលណា ហើយក៏មិនបានដឹងអំពីមូលហេតុដែលនាំឱ្យគាត់ស្លាប់នោះដែរ។ នៅតាមផ្លូវក្នុងក្រុង Wuhan នៃខេត្ត Hebei ប្រទេសចិន ដើមឡើយជាតំបន់ដែលមានមនុស្សម្នាច្រើនកុះករ ប៉ុន្តែ ចាប់តាំងពីត្រូវបានដាក់បម្រាមគោចរដើម្បីការពារការឆ្លងរាលដាលនៃមេរោគ Corona ទីនេះកាន់តែស្ងាត់ទៅៗ។
យ៉ាងនេះក្ដី នៅលើដងផ្លូវ គេក៏នៅតែឃើញមនុស្ស2-3នាក់ ដើរទៅ-មក កាត់កន្លែងកើតហេតុ ប៉ុន្តែពួកគេមិនហ៊ានចូលក្បែរសាកសព ខណៈរង់ចាំសមត្ថកិច្ចមកដល់។
មួយសន្ទុះក្រោយមក មានបុគ្គលិកពេទ្យជាច្រើននាក់ ពាក់ឈុតការពារមេរោគមកដល់ ហើយបានគ្របសំពត់អ្វីមួយពីលើសាកសព។ ក្នុងរយៈពេល2ម៉ោងដែលបានពិនិត្យមើលកន្លែងកើនហេតុ ភ្នាក់ងារសារព័ត៌មាន AFP បានឃើញរថយន្តសង្គ្រោះបន្ទាន់យ៉ាងតិច 15គ្រឿង បើកបរកាត់ទីនេះ ប៉ុន្តែពួកគេមានភារកិច្ចផ្សេង។
ចុងក្រោយ រថយន្តដឹកទំនិញពណ៌សមួយគ្រឿងបានមកដល់ ហើយក៏បានដឹកសាកសពបុរសនោះចេញទៅ។ បុគ្គលិកពេទ្យក៏នាំគ្នាបាញ់ថ្លាំសម្លាប់មេរោគត្រង់កន្លែងកើតហេតុ។
AFP បានទាក់ទងសមត្ថកិច្ចក្នុងតំបន់ ប៉ុន្តែ មិនទាន់ទទួលបានព័ត៌មានអ្វីច្បាស់លាស់ស្ដីអំពីអត្តសញ្ញាណ ក៏ដូចជាមូលហេតុនៃការស្លាប់នេះនៅឡើយ។
ស្ត្រីម្នាក់ដែលនៅក្បែរកន្លែងកើតហេតុ បានប្រាប់ថា គាត់ជឿថា បុរសម្នាក់ដែលបានស្លាប់នោះ ប្រាកដជាដោយសារឆ្លងមេរោគ nCoV (Corona)។ ស្ដ្រីម្នាក់នេះនិយាយទៀតថា ៖ “វាគួរឱ្យខ្លាច! ប៉ុន្មានថ្ងៃនេះមានអ្នកស្លាប់ច្រើនណាស់”។
ទីតាំងកើតហេតុស្ថិតនៅក្បែរមន្ទីរពេទ្យ Wuhan លេខ6 ជាកន្លែងទទួលព្យាបាលអ្នកជំងឺដែលមានអាការនៃជំងឺរលាកសួតថ្មីដែលបង្កឡើងដោយមេរោគ nCoV។
ក្រុង Wuhan កំពុងទទួលរងការរាតត្បាតនៃអាសន្នរោគ Corona ដែលបានផ្ទុះឆ្លងរាលដាលតាំងពីខែធ្នូ ឆ្នាំ2019។ អាសន្នរោគនេះ បានបណ្ដាលឱ្យមានអ្នកស្លាប់យ៉ាងតិច 259នាក់ និងជាង11,374 នាក់បានឆ្លងមេរោគនេះនៅទូទាំងពិភពលោក។ ដោយឡែក ខេត្ត Hubei ដែលមានក្រុង Wuhan ជា “សម្បុកមេរោគ” មានអ្នកស្លាប់ដល់ទៅ 249នាក់ គិតមកដល់ព្រឹកថ្ងៃទី1កុម្ភៈនេះ៕
ប្រភព៖ សារព័ត៌មានបរទេស
February 1, 2020
ក្រុមហ៊ុនអាកាសចរណ៍ចំនួន29 ផ្អាកការហោះហើរទៅ-មកប្រទេសចិន ក្នុងនោះមាន…
ទីភ្នាក់ងារសារព័ត៌មាន Reuters បានរាយការណ៍ថា ក្រុមហ៊ុនអាកាសចរណ៍សរុបចំនួន 29ក្រុមហ៊ុន បានផ្អាក លុបចោល ឬពន្យាពេលជើងហោះហើរទៅ-មកប្រទេសចិន ដោយសារបារម្ភអំពីអាសន្នរោគក្នុងប្រទេសនេះ។
ក្រុមហ៊ុនអាកាសចរណ៍ចំនួន29 ដែលបានផ្អាក ឬប្រកាសផ្អាកការហោះហើរទៅ-មកប្រទេសចិន មានដូចជាក្រុមហ៊ុនរបស់អាមេរិក បារាំង ឥណ្ឌា កាណាដា កូរ៉េខាងត្បូង អង់គ្លេស និងវៀតណាម។
អង្គការសុខភាពពិភពលោក (WHO) កាលពីថ្ងៃទី 30មករាកន្លងទៅ បានប្រកាសអាសន្ននៅទូទាំងពិភពលោកចំពោះអាសន្នរោគនេះ ហើយបានអំពាវនាវឱ្យប្រទេសទាំងអស់ បង្កើនការការពារ និងប្រយុទ្ធប្រឆាំងអាសន្នរោគនេះ។
ឆ្លើយតបទៅនឹងការប្រកាសអាសន្នខាងលើ ក្រុមហ៊ុនអាកាសចរណ៍មួយចំនួនដូចជា Cathay Pacific Airways, Singapore Airlines និង Turkish Airlines បានចេញសេចក្ដីប្រកាសលុបចោលជើងហោះហើរទៅ-មកប្រទេសចិន។ Air Tanzania ក៏បានប្រកាសពន្យាពេលជើងហោះហើរដំបូងក្នុងខែកុម្ភៈទៅកាន់ប្រទេសចិន។ ក្រុមហ៊ុនអាកាសចរណ៍ United Airlines បានឱ្យដឹងថា នឹងលុបចោលជើងហោះហើរចំនួន 332 រវាងទីក្រុងមួយចំនួននៅអាមេរិក និងក្រុងប៉េកាំង សៀងហៃ និងហុងកុងផងដែរ។ ចំណែកក្រុមហ៊ុន Vietnam Airlines ក៏ប្រកាសដែរថា នឹងផ្អាកជើងហោះហើរទៅ-មកក្រុងប៉េកាំង សៀងហៃ ខ្វាងចូវ និងក្រុងសិនជិន ចាប់ពីថ្ងៃទី6កុម្ភៈខាងមុខ និងក្រុងចេងឌូ ចាប់ពីថ្ងៃទី5កុម្ភៈ និងក្រុងម៉ាកាវ ចាប់ផ្ដើមផ្អាកការហោះហើរពីថ្ងៃទី6កុម្ភៈ ឆ្នាំ2020។ ក្រុមហ៊ុនអាកាសចរណ៍មួយផ្សេងទៀតរបស់វៀតណាមគឺ Vietjet ក៏នឹងផ្អាកជើងហោះហើរទាំងអស់របស់ខ្លួន ដែលហោះហើរទៅ-មកប្រទេសចិន ចាប់ពីថ្ងៃទី1កុម្ភៈនេះ។

បណ្ដាក្រុមហ៊ុនអាកាសចរណ៍ដែលផ្អាកការហោះហើរទៅកាន់ប្រទេសចិន រួមមាន ៖
ក្រុមហ៊ុនអាកាសចរណ៍ Air Canada, Air France, Air India, Air Seoul, American Airlines, Austrian Airlines, British Airways, Delta Air Lines, Egyptair, El Al Israel Airlines, Etihad Airways, Finnair, Kenya Airways, Lion Air, LOT, Lufthansa, NordStar, Royal Air Maroc, RwandAir, S7 Airlines, SAS, Scoot, Shanghai Airlines, Swiss, Ural Airlines, Vietjet, Vietnam Airlines, Virgin Atlantic និងក្រុមហ៊ុន Yakutia Airlines។
សូមរំឭកថា អ្នកជំនាញខាងរោគឆ្លងបានឱ្យដឹងថា ហានិភ័យនៃការឆ្លងមេរោគ Corona គឺមានខ្ពស់ណាស់ នៅពេលមនុស្សម្នាក់នៅក្បែរអ្នកជំងឺក្នុងរង្វង់ក្រោម 2ម៉ែត្រ។ កត្តានេះក៏ជាមូលហេតុដែលនាំឱ្យការឆ្លងរាលដាលនៃមេរោគនេះ កើនឡើងដល់ 11,791នាក់ និងអ្នកស្លាប់កើនដល់ 259នាក់ គិតមកត្រឹមព្រឹកនេះ៕
ប្រភព៖ សារព័ត៌មានបរទេស
February 1, 2020
ចំនួនអ្នកស្លាប់ចេះតែកើនឡើង! ហានិភ័យនៃការឆ្លងមេរោគ Corona មានខ្ពស់បំផុត ពេលនៅក្បែរអ្នកជំងឺ ក្នុងរង្វង់ 2ម៉ែត្រ
អ្នកជំនាញខាងរោគឆ្លងបានឱ្យដឹងថា ហានិភ័យនៃការឆ្លងមេរោគរលាកសួត Corona គឺមានខ្ពស់ណាស់ នៅពេលមនុស្សម្នាក់នៅក្បែរអ្នកជំងឺក្នុងរង្វង់ក្រោម 2ម៉ែត្រ។ កត្តានេះក៏ជាមូលហេតុដែលនាំឱ្យការឆ្លងរាលដាលនៃមេរោគនេះ កើនឡើងយ៉ាងឆាប់រហ័ស ពោលគឺអ្នកដែលបានឆ្លងមេរោគនេះកើនដល់ 11,791នាក់ និងអ្នកស្លាប់កើនដល់ 259នាក់ គិតមកត្រឹមព្រឹកនេះ (1មករា)។
នៅក្នុងតារាងបច្ចុប្បន្នភាពប្រចាំថ្ងៃ គណកម្មធិការសុខាភិបាលខេត្ត Hebei ថ្ងៃនេះ បានឱ្យដឹងថា ករណីបាត់បង់ជីវិតបន្ថែមដោយសារមេរោគ Corona (nCoV) មានចំនួន46នាក់ និងអ្នកឆ្លងថ្មីចំនួន 1,347នាក់។
ក្រុង Wuhan នៃខេត្ត Hebei នៅតែស្ថិតនៅលើកកំពូលតារាង ដោយមានអ្នកឆ្លងមេរោគ Corona ថ្មី ដល់ទៅ 576នាក់ និងករណីស្លាប់បន្ថែម 33នាក់។ ជាសរុប ចំនួនអ្នកស្លាប់ដោយសារមេរោគនេះនៅ Wuhan មានចំនួន 192នាក់ គិតមកត្រឹមព្រឹកនេះ។
កាលពីថ្ងៃទី 30 មករាកន្លងទៅ អង្គការសុខភាពពិភពលោក (WHO) បានប្រកាសអាសន្នទូទាំងពិភពលោកចំពោះអាសន្នរោគនេះ។ អាសន្នរោគនេះ បានឆ្លងរាលដាលដល់ 27 ប្រទេស និងតំបន់ក្នុងពិភពលោក។ អេស្ប៉ាញ គឺជាប្រទេសថ្មីមួយទៀតដែលទើបតែរកឃើញករណីឆ្លងមេរោគ Corona ដំបូងបង្អស់របស់ខ្លួន។
សូមបញ្ជាក់ថា ការពិសោធរបស់ក្រុមវេជ្ជសាស្ត្រក្នុងពេលថ្មីៗនេះ បានបង្ហាញថា មេរោគ nCoV ប្រើពេល 5ថ្ងៃ ដើម្បីសំងំក្នុងរាងកាយមនុស្ស ប៉ុន្តែក៏អាចអូសបន្លាយដល់ទៅ 14ថ្ងៃ។ បន្ទាប់មក អ្នកជំងឺនឹងចាប់ផ្ដើមមានអាការគ្រុនក្ដៅ ក្អក និងកណ្ដាស់។
អ្នកជំនាញខាងរោគឆ្លងបានឱ្យដឹងថា ហានិភ័យនៃការឆ្លងគឺមានខ្ពស់បំផុត នៅពេលមនុស្សម្នាក់នៅក្បែរអ្នកជំងឺក្នុងរង្វង់ក្រោម 2ម៉ែត្រ។ អ្នកណាដែលបានស្រូបខ្យល់ ឬប៉ះពាល់ចំកម្ទេចធាតុរាវ ដែលមានមេរោគជាប់នៅលើខោអាវ ឬដៃជើងជាដើម អ្នកនោះនឹងត្រូវឆ្លងមេរោគមិនខាង៕
ប្រភព៖ សារព័ត៌មានបរទេស
February 1, 2020