សឿន សំណាង - La Reine Media

មហន្តរាយលំដាប់ប្រទេស! សូម៉ាលីប្រកាស សភាវគ្រោះអាសន្ន “សត្វកណ្ដូប” វាយលុក!!

រដ្ឋបាលប្រទេសសូម៉ាលី បានធ្វើការប្រកាសស្ថានការណ៍គ្រោះអាសន្នកម្រិតប្រទេស ដោយសារតែការវាយលុក និងរាតត្បាតរបស់កងទ័ពសត្វកណ្ដូបសមុទ្រខ្សាច់ ធ្វើឱ្យខូចខាតផ្ទៃដី និងដំណាំកសិកម្មទូទាំងប្រទេស ចំណែកអង្គការសហប្រជាជាតិកំពុងបង្កើនការជួយសង្គ្រោះ។

ទីភ្នាក់ងារព័ត៌មានអន្តរជាតិបានរាយការណ៍ពីទីក្រុង ម៉ូកាឌិឆូ ប្រទេសសូម៉ាលី កាលពីថ្ងៃទី3 មករា ម្សិលមិញថា ក្រសួងកសិកម្មរបស់ប្រទេសសូម៉ាលី បានចេញសេចក្ដីថ្លែងការណ៍កាលពីថ្ងៃអាទិត្យ ប្រកាសស្ថានការណ៍គ្រោះអាសន្នលំដាប់ប្រទេស ដោយសារតែចំនួនសត្វកណ្ដូបសមុទ្រខ្សាច់នៅក្នុងប្រទេសបាន “កើនឡើងច្រើនយ៉ាងមានគួរឱ្យងឿងឆ្ងល់” រហូតក្លាយជា “គ្រោះភ័យដ៏ធ្ងន់ធ្ងរ” ដល់សុវត្ថិភាពផ្នែកចំណីអាហាររបស់ប្រទេសសូម៉ាលី ដែលស្ថិតក្នុងសភាវវិបត្តិរួចស្រេចទៅហើយកាលពីពេលមុន។

ខណៈដែលរបាយការណ៍របស់អង្គការចំណីអាហារ និងកសិកម្ម(FAO)នៃអង្គការសហប្រជាជាតិ បានបញ្ជាក់ថា ខ្លួនកំពុងតែដំណើរការយ៉ាងប្រញាប់ប្រញាល់ ដើម្បីជួយសង្គ្រោះប្រទេសជាច្រើននៅក្នុងអនុភូមិភាគប៉ែកឦសានរបស់តំបន់អាហ្រ្វិក ដែលមានដូចជា ប្រទេសជិប៊ូឌី អេត្យូពី សូម៉ាលី និងតំបន់ខ្លះរបស់ប្រទេសកេនយ៉ា ដែលកំពុងតែប្រឈមនឹងគ្រោះរាតត្បាតខាងកសិកម្មពីកងទ័ពសត្វកណ្ដូបសមុទ្រខ្សាច់ដ៏ខ្លាំងក្លាបំផុតក្នុងរយៈពេល 25ឆ្នាំ ហើយប្រទេសសូម៉ាលី ក៏ជាប្រទេសដំបូងគេដែលប្រកាសឱ្យស្ថានការណ៍នេះក្លាយជាសភាវអាសន្នកម្រិតប្រទេស។

ទោះជាស្ថានការណ៍របស់សត្វកណ្ដូបសមុទ្រខ្សាច់នៅក្នុងពេលនេះ នៅអាចហៅបានថាកំពុងស្ថិតក្នុង “កម្រិតកើនឡើង” នៅឡើយតាមការវាយតម្លៃរបស់ FAO ក៏ដោយ ក៏ប៉ុន្តែប្រសិនបើស្ថានការណ៍នៅតែយ៉ាងដូច្នេះតទៅទៀតដោយគ្មានវិធានការដោះស្រាយយ៉ាងពិតប្រាកដនោះ ក្នុងរយៈពេលយ៉ាងលឿនបំផុត 1ឆ្នាំទៀត ការវាយលុយរបស់កងទ័ពសត្វកណ្ដូបនៅក្នុងតំបន់អាហ្រ្វិកនេះ នឹងក្លាយជា “គ្រោះវិបត្តិ” មួយដ៏គួរឱ្យបារម្ភបំផុត។ ចាប់តាំងពីឈានចូលសតវត្សរ៍ទី20 មនុស្សលោកបានប្រឈមនឹងការរាតត្បាតរបស់សត្វកណ្ដូបសមុទ្រខ្សាច់នេះរួចមកហើយចំនួន 6ដង លើកចុងក្រោយបំផុត កើតឡើងនៅឆ្នាំ1987 ដល់1988។ ចំណែក “ការកើនឡើងដ៏ធំបំផុត” នៃចំនួនសត្វកណ្ដូបសមុទ្រខ្សាច់នេះ កើតឡើងលើកចុងក្រោយក្នុងអំឡុងឆ្នាំ2003 ដល់2005៕

February 4, 2020

ចំនួនអ្នកស្លាប់ដោយសារវីរុស Corona កើនដល់ 426នាក់

ក្នុងថ្ងៃទី 3កុម្ភៈកន្លងទៅ ខេត្ត Hubei ប្រទេសចិន មានអ្នកស្លាប់ដោយសារបានឆ្លងមេរោគរលាកសួត Coronaបន្ថែមចំនួន 64នាក់ ធ្វើឱ្យចំនួនអ្នកស្លាប់សរុបនៅប្រទេសចិន កើនឡើងដល់ 425នាក់។

ទីភ្នាក់ងារសារព័ត៌មាន Reuters បានរាយការណ៍ថា ចំនួនអ្នកស្លាប់ខាងលើនេះ គឺជាចំនួនដែលខ្ពស់បំផុតមិនធ្លាប់មាន ចាប់តាំងពីមេរោគ Corona បានផ្ទុះឆ្លងរាលដាលកាលពីចុងឆ្នាំមុននៅក្រុង Wuhan ខេត្ត Hubei ប្រទេសចិន ដែលជាសម្បុកមេរោគនេះ។

ក្នុងថ្ងៃទី 3កុម្ភៈដដែល ខេត្ត Hubei មានអ្នកឆ្លងមេរោគនេះចំនួន 2,345 នាក់បន្ថែមទៀត ធ្វើឱ្យចំនួនអ្នកឆ្លងសរុបនៅក្នុងខេត្តឡើងដល់ 13.522នាក់។

ដូច្នេះ គិតត្រឹមព្រឹកនេះ នៅទូទាំងពិភពលោក មានអ្នកស្លាប់ដល់ទៅ 426នាក់ និង 20,202 នាក់ផ្សេងទៀតកំពុងមានផ្ទុកមេរោគនេះ ដែលភាគច្រើនគឺនៅប្រទេសចិន៕

ប្រភព៖ សារព័ត៌មានបរទេស

February 4, 2020

កំហុស 10យ៉ាង ដែលអ្នកជោគជ័យទាំងឡាយមិនដែលសាង

ការមិនសូវសើច អាកប្បកិរិយាអវិជ្ជមាន ឬការមិនហ៊ានបង្ហាញឱ្យគេឃើញនូវសមត្ថភាពរបស់ខ្លួនឯង ជាដើម សុទ្ធតែជាចំណុចដែលអាចរារាំងលោកអ្នក មិនឱ្យទៅដល់តំបន់ជោគជ័យ ឬមិនអាចក្លាយជាអ្នកមានបានទាំងអស់។

ខាងក្រោមនេះ គឺជាយោបល់របស់សេដ្ឋី 10រូបដែលចេញមកពីប្រភពអ្នកក្រ ស្ដីអំពីសកម្មភាពប្រចាំថ្ងៃដែលអាចដឹកនាំឱ្យមនុស្សឈានដល់ភាពជោគជ័យបាន។

មិនហ៊ានបង្ហាញខ្លួន ឬមិនហ៊ានបង្ហាញពីបំណងក្នុងការធ្វើអ្វីមួយ

“មិនបង្ហាញខ្លួន គឺជាកំហុសដែលគេតែងជួបប្រទះរាល់ថ្ងៃ ហើយវាអាចរាំងខ្ទប់លោកអ្នក មិនឱ្យងើបមុខរួច។ ការហ៊ានបង្ហាញខ្លួនម្ដងហើយម្ដងទៀត វាទាមទារឱ្យមានភាពជឿជាក់លើខ្លួនឯង និងការព្យាយាម ប៉ុន្តែវាក៏បង្កើតបានជាវិន័យល្អមួយដែរ។ អ្នកនឹងមិនអាចមានអ្វីៗតាមចិត្តប្រាថ្នាបានទេ បើអ្នកមិនស្វែងរកវិធីដើម្បីចាប់យកវា” នេះ ជាមតិរបស់ Grant Cardone ស្ថាបនិក Capital ដែលជាក្រុមហ៊ុនអចលនទ្រព្យដ៏ធំមួយដែលមានតម្លៃ 750លានដុល្លារអាមេរិក។

ភាពខ្ជិលច្រអូស

អតីតប្រធានក្រុមហ៊ុន Walt Disney លោក Michael Ovitz បាននិយាយថា៖ “អ្នករាល់គ្នាងាយនឹងមានទម្លាប់ខ្ជិលច្រអូសណាស់។ ប៉ុន្តែ ដើម្បីទទួលបានលទ្ធផលល្អ យើងត្រូវតែធ្វើការ។ ខ្ញុំត្រូវបានឪពុកម្ដាយបង្ហាត់បង្រៀនថា ខ្ញុំអាចធ្វើអ្វីៗបានទាំងអស់ ឱ្យតែធ្វើដោយការព្យាយាម និងផ្ដោតទៅលើតែគោលដៅនោះ។ ខ្ញុំអាចនឹងធ្វើការហួសកម្លាំង ប៉ុន្តែនោះ គឺជាអ្វីដែលត្រូវតែធ្វើ”។

អាកប្បកិរិយាអវិជ្ជមាន

“នៅពេលខ្ញុំជ្រើសរើសបុគ្គលិកណាម្នាក់ ឬសហការជាមួយអ្នកជំនួញណាម្នាក់នៅក្នុងកម្មវិធី Shark Tank ខ្ញុំតែងស្វែងរកចំណុចមួយ គឺអាកប្បកិរិយាវិជ្ជមានរបស់គេ។

ខ្ញុំធ្លាប់គិតថា ខ្ញុំអាចផ្លាស់ប្ដូរមនុស្សម្នាក់ដែលមានអាកប្បកិរិយាអវិជ្ជមាន ប៉ុន្តែចុងក្រោយខ្ញុំបានត្រឹមតែបញ្ឈប់គាត់ពីការងារប៉ុណ្ណោះ។ គ្រាន់តែមានមនុស្សអវិជ្ជមានម្នាក់ក្នុងចំណោមក្រុមមនុស្សដែលមានសុភមង្គល 10នាក់ គឺវាអាចទាញទម្លាក់មនុស្សមួយក្រុមនោះបាន។ ផ្ទុយទៅវិញ វាមិនមានអ្វីដែលអាចរារាំងមនុស្សម្នាក់ដែលហ៊ាននិយាយថា៖ “យើងអាចធ្វើបាន” នោះទេ។

ទោះជាស្ថិតក្នុងអំឡុងពេលជួបការលំបាកបំផុត អ្នកត្រូវតែលើកទឹកចិត្តខ្លួនឯង និងរក្សាអាកប្បកិរិយាវិជ្ជមាន បើទោះមានរឿងអ្វីកើតឡើងលើសពីការលំបាកក៏ដោយ។ នេះគឺជាសម្ដីរបស់លោក Barbara Corcoran ស្ថាបនិកក្រុមហ៊ុន Corcoran និងជាវិនិយោគិននៃកម្មវិធី Shark Tank។

ប្រើពេលវេលាច្រើន ដើម្បីធ្វើការសម្រេចចិត្ត

“ច្រើនឆ្នាំមកនេះ ខ្ញុំទទួលបានបទពិសោធមួយ គឺពេលខ្លះ យើងត្រូវការព័ត៌មានត្រឹមតែ 40 ទៅ70% ប៉ុណ្ណោះដើម្បីធ្វើការសម្រេចចិត្ត ព្រោះបើសិនជាត្រូវការភាពប្រាកដប្រជាដ៏ល្អឥតខ្ចោះនោះ យើងអាចនឹងបាត់បង់ឱកាស ដូច្នេះចូរជឿជាក់លើវិចារណញ្ញាណរបស់អ្នក រួចធ្វើការសម្រេចចិត្ត ហើយអនុវត្ត”។

នេះគឺជាមតិរបស់សេដ្ឋី Shaun Rawls ជាស្ថាបនិក និងជាអគ្គនាយកនៃក្រុមហ៊ុន Rawls of Keller Williams ដែលរកបានចំណូលជាង 4ពាន់លានដុល្លាររៀងរាល់ឆ្នាំ។

មិនចេះសើច

ថាមពលនៃការសើច ឬញញឹម កំពុងត្រូវបានគេវាយតម្លៃទាប។ ស្នាមញញឹមមួយដែលប្រកបដោយភាពកក់ក្ដៅ ស្មោះត្រង់ នឹងបង្កើតបាននូវភាពជឿជាក់ភ្លាមៗ នេះគឺជាគ្រឹះនៃការធ្វើជំនួញ។ ការសើច ឬញញឹម វាមិនត្រឹមតែបង្កើនថាមពលវិជ្ជមានទៅ
លើអ្វីដែលអ្នកកំពុងបង្ហាញនោះទេ តែវាក៏ជួយឱ្យអ្នកមើលទៅជាមនុស្សងាយរាប់អាន និងងាយជិតស្និទ្ធ។

ខាងលើនេះជាសម្ដីរបស់លោក Parker ជាស្ថាបនិក និងជា CEO នៃ Holly Parker Team ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនមេ Douglas Elliman ធ្លាប់រកបានចំណូល 8ពាន់លានដុល្លារ។

ចាប់នេះចាប់នោះ មិនឆ្ពោះត្រង់ណា

ចូរជ្រើសយកអ្វីមួយដែលអ្នកស្រឡាញ់ និងពូកែជាងអ្វីៗផ្សេងទៀត…។ មានមនុស្សច្រើនរាប់មិនអស់ដែលមានគំនិតល្អចំនួន 1,000ប្រការ ហើយពួកគេមិនបានចាប់ផ្ដើមធ្វើតាមគំនិតល្អណាមួយសោះ។ ជំនួសមកវិញ ពួកគេបែរជាចូលរួមការងាររបស់អ្នកផ្សេងទៅវិញ។

បើសិនជាអ្នកមិនមែនជាមេធាវី ចូរកុំធ្វើខ្លួនឱ្យដូចជាមេធាវី។ នេះជាសម្ដីរបស់ James Daily ជាសហស្ថាបនិកនៃក្រុមហ៊ុន Daily Law Group។

មិនកត់ត្រារំឭកការងារសំខាន់

Dennis Najjar ជាសហស្ថាបនិកនៃ AccountingDepartment.com (សេវាកម្មគណនីស្រមោលសម្រាប់ក្រុមហ៊ុនតូចៗ) បានឱ្យដឹងថា៖ “ជាអ្នកជំនួញម្នាក់ ខ្ញុំតែងតែទទួលជោគជ័យដោយការអនុវត្តតាមគោលការណ៍មួយគឺ បង្កើតផែនការ និងរៀបចំអ្វីៗដែលខ្ញុំមានគម្រោងនឹងធ្វើ។ អ្នកនឹងមិនមានបញ្ហាទាក់ទិននឹងការចងចាំរាល់កិច្ចការដែលអ្នកត្រូវធ្វើទេ បើសិនអ្នកកត់ត្រាវាទុក”។

ធ្វើតាមអ្នកជោគជ័យ

ការដែលមានគំរូសម្រាប់ឱ្យធ្វើតាម គឺជារឿងមួយល្អ ដើម្បីអាចគេចចេញពីបញ្ហាដែលយើងដឹងថា នឹងកើតឡើង ប៉ុន្តែមានការពិតមួយដែលយើងត្រូវដឹង៖ បើវិធីនេះមានប្រសិទ្ធភាពជាមួយអ្នកផ្សេង វាមិនសំខាន់ទេ តែសំខាន់ គឺវាមានប្រសិទ្ធភាពជាមួយអ្នកដែរ ឬអត់?។ បើអ្នកពាក់អាវ-កវែងរាល់ថ្ងៃ អ្នកក៏នឹងមិនអាចក្លាយជា Steve Jobs បានដែរ…(ព្រោះ Steve Jobs ចូលចិត្តពាក់អាវយឺត-កមូលដៃវែង)។ នេះជាសម្ដីរបស់ Luke Freiler ជាសហស្ថាបនិក និងជា CEO នៃក្រុមហ៊ុន Centercode ដែលជាអ្នកផ្ដល់សេវាផ្ទៀងផ្ទាត់អតិថិជន។

ព្យាយាមគ្រប់គ្រងរាល់បញ្ហា

បើសិនអ្នកចង់ឱ្យខ្លួនឯងទៅដល់គោលដៅ ចូរបោះបង់គំនិតមួយដែលយល់ថា “គ្រប់យ៉ាងស្ថិតក្នុងការគ្រប់គ្រង”។

CEO របស់ក្រុមហ៊ុន Review Home Warranties លោក Alon Rajić បានថ្លែងថា ៖ ជួនកាល អ្នកគ្រាន់តែទទួលយកការពិតនៃស្ថានភាពណាមួយ ហើយសម្រេចចិត្ត រួចបែងចែកពេលវេលាសម្រាប់អ្វីដែលអ្នកអាចបង្កើតបានភាពខុសប្លែកពីគេ នោះអ្នកនឹងជោគជ័យ។

មិនហក់ចូលទៅក្នុងអ្វីដែលអ្នកមិនទាន់ស្គាល់

ការបង្កើតក្រុមហ៊ុនមួយ ឬហាងមួយដោយខ្លួនឯង វាទាមទារការធ្វើការងារនោះឱ្យអស់ពីចិត្ត។ ចូរចាកចេញពីតំបន់សុវត្ថិភាពរបស់អ្នក ហើយចូរកុំខ្លាចនឹងការប្រយុទ្ធជាមួយគូប្រជែងដែលមានកម្លាំងស្មើនឹងអ្នក។ បញ្ហាអាក្រក់បំផុតអាចនឹងកើតឡើង ប៉ុន្តែប្រការនេះ មិនមែនមានន័យថា អ្នកមិនអាចទទួលបានបទពិសោធសោះនោះទេ។ ដូច្នេះ យ៉ាងហោចណាស់ក៏អ្នកទទួលបានបទពិសោធខ្លះៗ ដើម្បីជាមេរៀនសម្រាប់ការរកស៊ីបន្តទៀតដែរ។ នេះគឺជាគំនិតរបស់ James Sixsmith ជាស្ថាបនិក និងជាអគ្គនាយកប្រតិបត្តិនៃក្រុមហ៊ុន Trade Context និងជាសហស្ថាបនិកនៃក្រុមហ៊ុន SpeedUp Trader ផងដែរ៕

ប្រភព៖ សារព័ត៌មានបរទេស

February 3, 2020

ដោយសារតែភ័យខ្លាចឆ្លងមេរោគ Corona មនុស្សម្នានាំគ្នាទប់ស្កាត់អ្នកស្រុក Wuhan ដូចទប់ស្កាត់ ”ខ្មោចឆៅ”

“ខ្ញុំមិនយល់ទាល់តែសោះ។ សូម្បីតែពេលអ្នកស្រុកយើងខ្ញុំជា “ខ្មោចឆៅ” យើងខ្ញុំគ្មានសិទ្ធិនៅក្នុងផ្ទះដើម្បីទប់ស្កាត់ការឆ្លងរាលដាលដែរ មែនទេ? ពេលនេះ ខ្ញុំត្រូវគេដេញចេញ ហើយមិនដឹងថាត្រូវទៅទីណា”។ នេះជាសំនេរខ្លះៗរបស់អ្នកទេសចរណ៍ Wuhan ម្នាក់។

អ្នកប្រើប្រាស់បណ្ដាញសង្គម Weibo របស់ចិន នាង Ludougao បានបង្ហោះសារមួយដ៏គួរឱ្យអាណិត ដោយប្រាប់ថា នាងត្រូវគេដេញពីផ្ទះសំណាក់មួយនៅឯទីក្រុង Changsha នៃខេត្ត Hunan ប្រទេសចិន ព្រោះតែនាងជាអ្នកស្រុក Wuhan។

Ludougao បានចាកចេញពីក្រុង Wuhan នៃខេត្ត Hubei កាលពីថ្ងៃទី20មករា ពោលគឺ 3ថ្ងៃមុនការដាក់បម្រាមគោចរ ព្រោះតែការរាតត្បាតនៃមេរោគរលាកសួតថ្មី Corona (nCoV)។ នៅលើបណ្ដាញសង្គម Weibo នាង Ludougao បានឱ្យដឹងថា អ្នកទេសចរណ៍មកពីក្រុង Wuhan ដូចជារូបនាង ពេលនេះមិនបានទទួលស្វាគមន៍ឱ្យស្នាក់នៅក្នុង ខេត្ត Hunan នេះទេ។

នាង Ludougao សរសេរនៅលើ Weibo កាលពីថ្ងៃទី 26មករាថា ៖ “ខ្ញុំបានត្រឹមតែស្វែងរកជំនួយនៅទីនេះ ព្រោះខ្ញុំបានដើរដល់ផ្លូវទាល់ហើយ”។

Ludougao បានទៅកាន់ស្ថានីយរថភ្លើង ប៉ុន្តែមិនមានរថភ្លើងណាមួយត្រឡប់ទៅកាន់ក្រុង Wuhan សោះឡើយ។ នាងបានទាក់ទងទៅកាន់នគរបាល ហើយត្រូវគេណែនាំឱ្យទៅកាន់ផ្ទះស្នាក់នៅបណ្ដោះអាសន្នសម្រាប់អ្នកគ្មានផ្ទះសម្បែង។ នាងក៏បានទូរស័ព្ទទៅកាន់លេខបន្ទាន់ (Hotline) របស់អភិបាលក្រុង Wuhan ប៉ុន្តែគ្មានប្រយោជន៍។ នាងថែមទាំងបានទាក់ទងទៅកាន់សណ្ឋាគារ និងផ្ទះសំណាក់ជាង 10 កន្លែង ប៉ុន្តែ សុទ្ធតែត្រូវគេបដិសេធ។

Ludougao បានសរសេរថា ៖ “ខ្ញុំមិនយល់ទាល់តែសោះ។ សូម្បីតែពេលអ្នកស្រុកយើងខ្ញុំជា “ខ្មោចឆៅ” យើងខ្ញុំគ្មានសិទ្ធិនៅក្នុងផ្ទះដើម្បីទប់ស្កាត់ការឆ្លងរាលដាលដែរ មែនទេ? ពេលនេះ ខ្ញុំត្រូវគេដេញចេញ ហើយមិនដឹងថាត្រូវទៅទីណា”។

បើទោះជាក្រោយមកត្រូវបានលុបចោល ប៉ុន្តែ សំនេររបស់ Ludougao បានត្រូវគេចែករំលែកពាសពេញបណ្ដាញសង្គម រហូតធ្វើឱ្យអ្នកត្រួតពិនិត្យខ្លឹមសារនៅ Changsha ចាប់អារម្មណ៍ និងបានបញ្ជូនព័ត៌មាននេះទៅកាន់អាជ្ញាធរក្រុង ទើបក្រោយមក Gudougao ត្រូវបានអនុញ្ញាតឱ្យចូលស្នាក់នៅក្នុងសណ្ឋាគារមួយ នៅយប់ថ្ងៃទី 26មករា។

ភ្នាក់ងារសារព័ត៌មាន CNN បានទាក់ទង Ludougao ហើយនាងបានប្រាប់ថា ខ្លួនបានបង្ហោះសារនោះ ហើយក្រោយមក អាជ្ញាធរបានទាក់ទងមកនាង ប៉ុន្តែ Ludougao បានបដិសេធការបញ្ចេញមតិបន្ថែមលើរឿងនេះ។ Ludougao មិនមែនជាមនុស្សតែម្នាក់ដែលបានជួបបញ្ហានេះនោះទេ។ នៅក្នុងខេត្ត Yunnan មានភ្ញៀវទេសចរណ៍មកពីខេត្ត Hubei ជាច្រើនមិនអាចរកបានកន្លែងស្នាក់នៅ ហើយបានទាក់ទងទៅកាន់អាជ្ញាធរមូលដ្ឋានដើម្បីសុំជំនួយ។

មិនត្រឹមតែភ្ញៀវទេសចរណ៍នោះទេដែលត្រូវគេរើសអើង សូម្បីអាជ្ញាធរមូលដ្ឋានមួយចំនួនក៏មានការប្រុងប្រយ័ត្នជាមួយពលរដ្ឋដែលត្រឡប់មកពីក្រុង Wuhan ក្រោយបុណ្យចូលឆ្នាំចិន។ នៅទីក្រុងធំៗមួយចំនួន ដូចជា សៀងហៃ និងក្វាងចូវជាដើម អាជ្ញាធរមូលដ្ឋានក៏ទទួលបានបញ្ជាឱ្យទៅត្រួតពិនិត្យដើម្បីស្វែងរកអ្នកដែលទើបមកពីក្រុង Wuhan រួចរាយការណ៍ទៅថ្នាក់លើ។

Eric Chen អាយុ 33ឆ្នាំ មកពីក្រុង Jingzhou នៃខេត្ត Hubei ដែលបច្ចុប្បន្នរស់នៅ និងធ្វើការក្នុងក្រុង Zhejiang បានឱ្យដឹងថា អ្នកស្រុកនៅទីនេះមានការប្រុងប្រយ័ត្នខ្ពស់ជាមួយនិងពលរដ្ឋមកពី Wuhan។ សូម្បីតែឃើញរថយន្តដែលមានស្លាកលេខ Wuhan ក៏ពួកគេរាយការណ៍ទៅនគរបាលដែរ។

ភូមិស្រុកជាច្រើននៅជនបទ បានបង្កើតក្រុមល្បាតដើម្បីទប់ស្កាត់អ្នកស្រុក Wuhan។ រូបភាពដែលបានបង្ហោះនៅលើបណ្ដាញសង្គមជាច្រើនបង្ហាញថា ផ្លូវជាច្រើនត្រូវបានគេបិទដោយរថយន្តដឹកទំនិញ ត្រាក់ទ័រ ដើមឈើ ឬគាស់ផ្លូវដើម្បីស្កាត់មិនឱ្យមនុស្សចម្លែកចូលភូមិ។ ស្ថានការណ៍បានធ្ងន់ធ្ងររហូតធ្វើឱ្យក្រសួងដឹកជញ្ជូនចិន ត្រូវចេញសេចក្ដីប្រកាស ព្រមានមិនឱ្យប្រជាពលរដ្ឋបិទផ្លូវដោយខុសច្បាប់។

ជាងនេះ មានតំបន់ខ្លះមានអំពើជ្រុលនិយមមួយចំនួនដែលរើសអើងចំពោះពលរដ្ឋមកពីក្រុង Wuhan ដូចជាការបិទទ្វារដោយក្រដាស ឈើ ឬដែក និងមានសរសេរថា ៖ “នេះគឺជាផ្ទះរបស់អ្នកដែលត្រឡប់មកពី Wuhan សូមកុំនៅក្បែរពួកគេ”។

ការរើសអើងដ៏ធ្ងន់ធ្ងរចំពោះអ្នកស្រុក Wuhan បាននាំឱ្យទីភ្នាក់ងារសារព័ត៌មាន People’s Daily ដែលជាអ្នកនាំពាក្យផ្លូវការរបស់បក្សកុម្មុយនិស្តចិន ចាប់អារម្មណ៍។ នៅក្នុងអត្ថបទមួយដែលបង្ហោះនៅលើកម្មវិធីទូរស័ព្ទ កាលពីថ្ងៃទី 27មករា People’s Daily បានទទួលស្គាល់ថា មានសកម្មភាពប្រមាថទៅលើអ្នកស្រុក Wuhan និងខេត្ត Hubei។ កាសែតនេះក៏បានឱ្យដឹងថា អាជ្ញាធរមូលដ្ឋានជាច្រើនបានប្រើប្រាស់វិធានការគ្រប់គ្រង និងទប់ស្កាត់ពលរដ្ឋមកពី Wuhan មិនឱ្យចូលក្នុងតំបន់របស់ពួកគេ ឬស្នាក់នៅក្នុងសណ្ឋាគារក្នុងតំបន់។ អាជ្ញាធរក្រុង Wuhan បានបញ្ជាក់ថា ពលរដ្ឋប្រមាណ 5លាននាក់បានចាកចេញពីក្រុង Wuhan ក្នុងរដូវបុណ្យចូលឆ្នាំចិន នៅមុនពេលអាជ្ញាធរប្រកាសបិទទីក្រុងនេះនៅថ្ងៃទី 23មករា។

ផែនទីទិន្នន័យដែលបង្ហាញពីការកើនឡើងនៃករណីឆ្លង និងស្លាប់ដោយសារមេរោគកូរ៉ូណា

យ៉ាងណាក៏ដោយ មួយរយៈពេលចុងក្រោយនេះ គេក៏ឃើញមានវិធានការមួយចំនួនរបស់រដ្ឋត្រូវបានធ្វើឡើងដើម្បីជួយដល់ពលរដ្ឋមកពីក្រុង Wuhan ក៏ដូចជាខេត្ត Hubei។ កាលពីថ្ងៃទី 26មករា មន្ទីរទេសចរណ៍ និងវប្បធម៌ខេត្ត Yunnan បានស្នើឱ្យអាជ្ញាធរក្រុងទាំងអស់នៅក្នុងខេត្តនេះ រៀបចំសណ្ឋាគារយ៉ាងតិចចំនួនមួយសម្រាប់ភ្ញៀវទេសចរណ៍ដែលមកពីខេត្ត Hubei។

សកម្មភាពរៀបចំសណ្ឋាគារដូចខាងលើនេះក៏ត្រូវបានអាជ្ញាធរខេត្ត និងក្រុងជាច្រើនក្នុងប្រទេសចិន យកមកអនុវត្តតាម។ មន្ទីរទេសចរណ៍ និងវប្បធម៌ក្រុង Wuhan ក៏បានបង្កើត និងប្រកាសបង្ហាញតារាងឈ្មោះសណ្ឋាគារដែលត្រូវបានគេរៀបចំឡើងសម្រាប់ទទួលភ្ញៀវទេសចរណ៍មកពីក្រុង Wuhan ប៉ុន្តែ គេមិនទាន់ដឹងថា មានប្រសិទ្ធភាពកម្រិតណានៅឡើយ៕

ប្រភព៖ សារព័ត៌មានបរទេស

February 3, 2020

តម្លៃមូលបត្រចិនធ្លាក់ចុះជិត 9% ខណៈកំណើនសេដ្ឋកិច្ចអាចធ្លាក់ចុះ 5% ដោយសារឥទ្ធិពលរបស់…

តម្លៃមូលបត្រក្នុងផ្សារហ៊ុនចិនបានដាំក្បាលចុះភ្លាមៗ បន្ទាប់ពីបើកទ្វារឡើងវិញនៅព្រឹកនេះ (3កុម្ភៈ) ក្រោយឈប់សម្រាកក្នុងរដូវបុណ្យចូលឆ្នាំចិន។

នៅក្នុងការជួញដូរដំបូង សន្ទស្សន៍របស់ Shanghai Composite និង Shenzhen Composite សុទ្ធតែបានធ្លាក់ថ្លៃជិត 8,7%។ បច្ចុប្បន្ន ការធ្លាក់តម្លៃនេះគឺនៅត្រឹម 8%។

ការវិវដ្ដនៅក្នុងផ្សារហ៊ុនចិន ត្រូវបានអ្នកវិនិយោគតាមដានយ៉ាងយកចិត្តទុកដាក់ ដោយសារតែប្រទេសនេះ ត្រូវអូសបន្លាយចំនួនថ្ងៃឈប់សម្រាករដូវបុណ្យចូលឆ្នាំ ព្រោះតែអាសន្នរោគរលាកសួតកូរ៉ូណា។ គិតមកដល់ព្រឹកនេះ មេរោគកូរ៉ូណា បានសម្លាប់មនុស្សចំនួន 362នាក់ ក្នុងនោះមានអ្នកស្លាប់361 នៅឯប្រទេសចិន។ ចំនួនករណីឆ្លងមេរោគនេះ ក៏កើនដល់ 17,373នាក់ នៅទូទាំងពិភពលោក។

គណៈកម្មការមូលបត្រចិន កាលពីម្សិលមិញបានប្រកាសនៅលើទំព័រ People Daily ថា ខ្លួនជឿជាក់ថា អាសន្នរោគនេះ គ្រាន់តែបង្កផលប៉ះពាល់ក្នុងរយៈពេលខ្លីប៉ុណ្ណោះ។ ដើម្បីជួយដល់ក្រុមហ៊ុននានា គណៈកម្មការមូលបត្រចិន នឹងអំពាវនាវអ្នកវិនិយោគឱ្យពន្យាកាលបរិច្ឆេទ និងពិចារណាទៅលើការប្រើប្រាស់វិធីនានាដើម្បីកាត់បន្ថយការភ័យខ្លាចនៅក្នុងទីផ្សារ។

ធនាគារជាតិចិន កាលពីម្សិលមិញក៏បានប្រកាសថា នឹងបញ្ចេញប្រាក់ 1,200ពាន់លានយន់ (173ពាន់លានដុល្លារអាមេរិក) ទៅក្នុងទីផ្សារ។ នេះគឺជាវិធីមួយក្នុងចំណោមវិធានការទាំង 30 ដែលចិនបានប្រកាសឱ្យដឹងកាលពីចុងសប្ដាហ៍មុន ក្នុងបំណងពង្រឹងសេដ្ឋកិច្ចឡើងវិញ ខណៈវាកំពុងដាំក្បាលចុះដោយសារឥទ្ធិពលនៃអាសន្នរោគកូរ៉ូណា។

ក្រុមអ្នកសេដ្ឋកិច្ចបានព្យាករណ៍ថា កំណើនសេដ្ឋកិច្ចរបស់ចិន អាចនឹងមានឱនភាពក្រោម 5% ក្នុងត្រីមាសនេះ ខណៈដែលត្រីមាសកន្លង សេដ្ឋកិច្ចចិនបានដាំក្បាលចុះ 6%។ អ្នកសេដ្ឋកិច្ចខ្លះ ថែមទាំងព្យាករណ៍ថា ឱនភាពនេះអាចនឹងនៅតែបន្តក្នុងត្រីមាសទីពីរខាងមុខ៕

ប្រភព៖ សារព័ត៌មានបរទេស

February 3, 2020

សូមប្រយ័ត្នពេលប្រើប្រាស់បង្គន់! មេរោគ Corona អាចឆ្លងតាមរយៈការបន្ទោបង់ ក្នុងពេល…

ការពិសោធថ្មីៗនេះរបស់ក្រុមអ្នកវិទ្យាសាស្ត្រចិនបានបង្ហាញថា ក្រៅពីឆ្លងតាមរយៈការកណ្ដាស់ ឬប៉ះពាល់អ្នកជំងឺ មេរោគកូរ៉ូណា (Corona) ដែលបង្កឱ្យរលាកសួតប្រភេទថ្មីនេះក៏អាចឆ្លងតាមរយៈការប្រើបង្គន់រួមជាមួយអ្នកជំងឺដែលមានផ្ទុកមេរោគកូរ៉ូណាផងដែរ។

មន្ទីរពេទ្យ Renmin នៃសកលវិទ្យាល័យ Wuhan រួមសហការណ៍ជាមួយមន្ទីរវិទ្យាសាស្ត្រចិន បានធ្វើការពិសោធទៅលើអាស៊ីដ nucleic នៃលាមក និងជាលិកាត្រង់រន្ធគូទរបស់អ្នកជំងឺ ហើយលទ្ធផលបានបង្ហាញ វីរូសកូរ៉ូណា (Corona/2019-nCoV) អាចឆ្លងពីលាមក ចូលទៅមនុស្ស នេះបើតាមទីភ្នាក់ងារសារព័ត៌មាន Focus Taiwan ចុះផ្សាយកាលពីថ្ងៃទី 2កុម្ភៈកន្លងទៅ។

លោក Chang Ko ប្រធានផ្នែកគ្រប់គ្រងរោគឆ្លងនៅមន្ទីរពេទ្យ Kaohsiung Municipal Siaogang បានថ្លែងថា លទ្ធផលនៃការពិសោធខាងលើនេះ មិនមានអ្វីគួរឱ្យភ្ញាក់ផ្អើលខ្លាំងនោះទេ ព្រោះថា មុននេះ ក្រុមអ្នកវេជ្ជសាស្ត្រអាមេរិកក៏ធ្លាប់រកឃើញមេរោគ nCoV នៅក្នុងលាមកមនុស្ស។ លោក Chang Ko បន្តថា យោងតាមលទ្ធផលនៃការពិសោធដែលបានចុះផ្សាយនៅលើទស្សនាវដ្ដី New England Journal of Medicine កាលពីថ្ងៃទី 31មករា លាមកគំរូដែលយកពីអ្នកជំងឺកូរ៉ូណាដំបូងគេនៅអាមេរិក បង្ហាញថា មានផ្ទុកវីរូសនេះ។

ការឆ្លងមេរោគតាមរយៈលាមក ធ្វើឱ្យការទប់ស្កាត់អាសន្នរោគនេះ កាន់តែមានការលំបាក នេះបើតាមការអះអាងរបស់ Shih Shin-ru ប្រធានមជ្ឈមណ្ឌលសិក្សាស្រាវជ្រាវជំងឺឆ្លងថ្មី នៅសកលវិទ្យាល័យ Chang Gung។ មន្ត្រីសុខាភិបាលនៅតៃវ៉ាន់ បានរំឭកដល់ពលរដ្ឋឱ្យបិទគម្របពេលចុចបើកទឹកចូលបង្គន់បន្ទាប់ពីបន្ទោបង់រួច និងត្រូវលាងដៃដោយប្រើសាប៊ូឱ្យបានត្រឹមត្រូវដើម្បីកាត់បន្ថយហានិភ័យនៃការឆ្លងវីរូស Corona។

Hwang Kao-pin ប្រធានផ្នែករោគឆ្លងកុមារនៃសកលវិទ្យាល័យវេជ្ជសាស្ត្រចិន បានព្រមានថា វិធីឆ្លងខាងលើនេះ នឹងនាំមកនូវហានិភ័យខ្ពស់ បើសិនក្នុងលាមកមានផ្ទុកមេរោគ ហើយពេលចុចបើកទឹកមិនបានបិទគម្របចានបង្គន់។ វីរូស Corona អាចរស់បានពី 2-3ម៉ោងក្នុងបរិយាកាស និង5ថ្ងៃនៅលើផ្ទៃនៃវត្ថុអ្វីមួយ។

ដើម្បីកាត់បន្ថយឱកាសនៃការឆ្លងមេរោគរលាកសួតថ្មីនេះ យើងត្រូវរំងាប់មេរោគដោយប្រើអាកុល មុនពេលប្រើប្រាស់ និងត្រូវបិទគម្របនៅពេលចុចបើកទឹកចូលបង្គន់។ វេជ្ជបណ្ឌិតខាងលើក៏បានប្រាប់ថា ការលាងដៃនឹងសាប៊ូគឺមានសារសំខាន់ក្នុងការជួយទប់ស្កាត់មេរោគមហាប្រល័យកូរ៉ូណា៕

ប្រភព៖ សារព័ត៌មានបរទេស

រដ្ឋបាលចិន ចេញបញ្ជា សាកសពអ្នកស្លាប់ដោយសារមេរោគវីរុសកូរ៉ូណា ត្រូវតែ “បូជា” ដាច់ខាត

February 3, 2020

វូហានបង្កើនកម្រិតការទប់ស្កាត់ ខណៈអ្នកជំងឺវីរុសកូរ៉ូណាឡើងដល់ជាង 17,300នាក់ ស្លាប់កើនដល់ 362នាក់

រដ្ឋបាលទីក្រុងវូហាន បង្កើនសមត្ថភាពលើការគ្រប់គ្រងការឆ្លងរាលដាលរបស់មេរោគវីរុសកូរ៉ូណា ដោយនឹងបង្ខាំងរាល់មនុស្សណាដែលសង្ស័យថាបានឆ្លងមេរោគ ខណៈដែលចំនួនអ្នកជំងឺដែលបានឆ្លងមេរោគនេះបានកើនឡើងដល់ច្រើនជាង 17,300នាក់។

ទីភ្នាក់ងារសារព័ត៌មាន សៅ ឆាយណា ម៉នីង ផូស្ត បានរាយការណ៍កាលពីព្រឹកមិញ(ថ្ងៃទី3 មករា)ថា ចំនួនអ្នកឆ្លងមេរោគវីរុសកូរ៉ូណាប្រភេទថ្មី2019 រាប់តាំងពីចាប់ផ្ដើមការឆ្លងរាលដាលកាលពីខែធ្នូ ឆ្នាំកន្លងមក បានកើនឡើងទៅជាប្រមាណ 17,387នាក់ហើយទូទាំងពិភពលោក ខណៈដែលអ្នកស្លាប់ក៏កើនឡើងជាបន្តបន្ទាប់មកដល់ចំនួន 362នាក់ ដែលស្ទើរតែទាំងអស់ស្ថិតនៅក្នុងប្រទេសចិន មានតែ 1ករណីប៉ុណ្ណោះនៅក្នុងប្រទេសហ្វីលីពីន។

ចំណែក CNN បានរាយការណ៍ថា អង្គភាពសាធារណៈផ្នែកសុខាភិបាលរបស់មណ្ឌល ហ៊ូពេយ ដែលស្ថិតនៅក្នុងទីក្រុងវូហាន មជ្ឈមណ្ឌលកណ្ដាលនៃការចម្លងមេរោគវីរុសមរណៈនេះ បានបង្ហើបឱ្យដឹងថា រកឃើញអ្នកជំងឺនៅក្នុងមណ្ឌលហ៊ូពេយបន្ថែមទៀត 2,103នាក់ និងមានអ្នកស្លាប់ថែមទៀត 56នាក់ ខណៈនៅមានអ្នកដេកព្យាបាលនៅក្នុងមន្ទីរពេទ្យចំនួន 9,618នាក់ទៀត ដែលក្នុងចំនួននោះមាន 478នាក់ មានអាការធ្ងន់ធ្ងរ។

ខណៈពេលជាមួយគ្នា រដ្ឋបាលទីក្រុងវូហានបានប្រកាសបង្កើនកម្រិតភាពព្យាយាមក្នុងការគ្រប់គ្រងការឆ្លងរាលដាលរបស់វីរុសកូរ៉ូណា ដោយការចេញច្បាប់ដែលមានសុពលភាពភ្លាមៗកាលពីថ្ងៃអាទិត្យ កំណត់ឱ្យនរណាក៏ដោយដែលត្រូវសង្ស័យថាឆ្លងមេរោគ ឬមានទំនាក់ទំនងជិតស្និទ្ធជាមួយអ្នកដែលបានទទួលការអះអាងហើយថាផ្ទុកមេរោគ នឹងត្រូវនាំខ្លួនទៅដាក់ក្នុងទីកន្លែងប្រមូលផ្ដុំភ្លាមៗ មិនថាពួកគេយល់ព្រម ឬមិនយល់ព្រមក៏ដោយ។

ទាំងអស់នេះ រដ្ឋបាលវូហានមិនបានបង្ហើបឱ្យដឹងថា តើពួកគេបានត្រៀមមណ្ឌលប្រមូលផ្ដុំនោះប៉ុន្មានកន្លែងនោះទេ តែបានបញ្ជាក់ថា អ្នកដែលត្រូវបង្ខាំងទាំងនោះ នឹងត្រូវទទួលបានការព្យាបាលដោយមិនចាំបាច់ចំណាយប្រាក់អ្វីទាំងអស់ រួមទាំងថ្លៃអាហារ និងថ្លៃស្នាក់នៅ ដើម្បីប្ដូរនឹងការដែលត្រូវបង្ខាំងរយៈពេលយូរតាមដែលក្រុមគ្រូពេទ្យដែលផ្ដល់ការព្យាបាលយល់ឃើញថាសមល្មម៕

ប្រភព៖ សារព័ត៌មានបរទេស

February 3, 2020

ចំនួនអ្នកស្លាប់ដោយសារមេរោគ Corona កើនដល់ 362នាក់ និងអ្នកឆ្លងកើនដល់…

ចំនួនអ្នកស្លាប់ដោយសារមេរោគកូរ៉ូណា (Corona) បានកើនឡើងដល់ 362នាក់ ក្នុងនោះមាន 361នាក់បានស្លាប់ក្នុងប្រទេសចិន។ ចំណែកចំនួនអ្នកជំងឺដែលបានឆ្លងមេរោគនេះក៏កើនដល់ជាង 17,318នាក់។

គណកម្មធិការសុខាភិបាលខេត្ត Hubei ប្រទេសចិន ថ្ងៃនេះបានប្រកាសឱ្យដឹងថា ចំនួនអ្នកស្លាប់បន្ថែមមាន 56នាក់ និងអ្នកឆ្លងថ្មីបន្ថែមមានចំនួន 2,103នាក់ នៅក្នុងខេត្តនេះ។ កាលពីថ្ងៃទី 2កុម្ភៈកន្លងទៅ ក្រុង Chongqing បានបញ្ជាក់ថា មានករណីស្លាប់បន្ថែមម្នាក់ទៀត ដែលធ្វើឱ្យចំនួនអ្នកស្លាប់នៅក្នុងទីក្រុងនេះ កើនដល់ 362នាក់នៅទូទាំងពិភពលោក។

រីឯគណកម្មធិការសុខាភិបាលកណ្ដាលរបស់ចិន ក៏បានប្រកាសថា ករីណអ្នកឆ្លងមេរោគកូរ៉ូណាថ្មីបន្ថែមនៅទូទាំងប្រទេសមានចំនួន 2,829នាក់។

សូមរំឭកថា អ្នកស្លាប់ដោយសារមេរោគរលាកសួត Corona ដំបូងគេនៅខាងក្រៅប្រទេសចិន គឺមានមួយករណី។ ករណីនេះកើតឡើងនៅប្រទេសហ្វីលីពីន ប៉ុន្តែ អ្នកស្លាប់គឺជាជនជាតិ អាយុ 44ឆ្នាំ មកពីទីក្រុង Wuhan ដែលជាសម្បុកមេរោគកូរ៉ូណា។

គិតមកដល់ពេលនេះ ទូទាំងពិភពលោក មានអ្នកស្លាប់ដោយសារមេរោគខាងលើ កើនឡើងដល់ 362នាក់ និងអ្នកបានឆ្លងកើនដល់ 17,318៕

ប្រភព៖ សារព័ត៌មានបរទេស

February 3, 2020

រដ្ឋបាលចិន ចេញបញ្ជា សាកសពអ្នកស្លាប់ដោយសារមេរោគវីរុសកូរ៉ូណា ត្រូវតែ “បូជា” ដាច់ខាត

រដ្ឋបាលចិន ចេញបញ្ជាឱ្យធ្វើឈាបនកិច្ច(បូជា ឬដុត)សាកសពអ្នកស្លាប់ដោយសារមេរោគវីរុសកូរ៉ូណាប្រភេទថ្មី ក្នុងបរិវេណជិតកន្លែងដែលពួកគេស្លាប់នោះភ្លាមៗ និងហាមធ្វើពិធីតាមប្រពៃណីអ្វីទាំងអស់។

កាលពីថ្ងៃទី2 កុម្ភៈ ម្សិលមិញ ទីភ្នាក់ងារព័ត៌មាន ស៊ិនហួ បានរាយការណ៍ថា ក្រសួងកិច្ចការផ្ទៃក្នុង និងក្រសួងសុវត្ថិភាពសាធារណៈរបស់ចិន បានចេញបទបញ្ជាកំណត់រួមគ្នា ដោយបានបញ្ជាក់ថា សាកសពអ្នកស្លាប់ដោយសារមេរោគវីរុសកូរ៉ូណាប្រភេទថ្មី2019 គួរតែត្រូវឈាបនកិច្ច មិនត្រូវដឹកជញ្ជូនឆ្លងភូមិភាគ ឬមណ្ឌល និងមិនត្រូវរក្សាទុក មិនថាតែដោយវិធីការបញ្ចុះ(កប់) ឬវិធីផ្សេងទៀតឡើយ។

អាជ្ញាធរចិន ប្រើវិធីគ្រប់យ៉ាងដើម្បីទប់ស្កាត់ការឆ្លងរាលដាលនៃវីរូសកូរ៉ូណា

ក្រៅពីនេះ សពត្រូវឆ្លងកាត់ការសម្លាប់មេរោគ និងទុកដាក់នៅក្នុងការុង(ឬបាវ)ដែលត្រូវបិទប្លុមបេយ៉ាងជិតដោយក្រុមមន្ត្រីខាងមន្ទីរពេទ្យ និងមិនត្រូវបានទទួលការអនុញ្ញាតិឱ្យបើកការុងនោះបន្ទាប់ពីបិទប្លុមបេរួចនោះឡើយ។ បទបញ្ជាកំណត់នោះ បានបញ្ជាក់ទៀតថា រោងសម្រាប់ធ្វើពិធីឈាបនកិច្ចនោះ ត្រូវតែបញ្ជូនមន្ត្រីពិសេស និងរថយន្តដឹកជញ្ជូនដោយឡែក ដើម្បីដឹកសាកសពអ្នកស្លាប់ទៅតាមខ្សែផ្លូវដែលបានកំណត់ទុក និងការបូជាត្រូវតែធ្វើឡើងទៅតាមពេលវេលាដែលបានកំណត់ទុកជាដាច់ខាត៕

ប្រភព៖ សារព័ត៌មានបរទេស

February 3, 2020

ដឹងទេ គ្រូពេទ្យអ្នកប្រយុទ្ធនឹងមេរោគកូរ៉ូណា ត្រូវស្លៀកពាក់ខោអាវប៉ុន្មានជាន់?

ក្រុមបុគ្គលិកពេទ្យនៃបណ្ដាញមន្ទីរពេទ្យប៉េកាំងដែលធ្វើដំណើរមកទីក្រុងវូហាន បានប្រើពេលវេលាឈប់សម្រាក ជួយក្រុមការងារគ្រូពេទ្យវូហាន ក្នុងការអភិវឌ្ឍជំនាញផ្នែកការពារ និងត្រៀមខ្លួនឱ្យបានស្រេច ដើម្បីទប់ទល់ដំណាក់កាលចុងក្រោយ មុនចូលទៅសមរភូមិក្នុងឋានៈ “ខ្សែត្រៀមជួរមុខ”។

ឈុត និងឧបករណ៍ការពារមេរោគឆ្លងរាលដាលរបស់គ្រូពេទ្យនៃមន្ទីរពេទ្យព្យាបាលជំងឺពីមេរោគវីរុសកូរ៉ូណា

ដើម្បីឃុំគ្រងការពារក្រុមបុគ្គលិកអ្នកដំណើរការព្យាបាលអ្នកជំងឺ ក្រុមគ្រូពេទ្យចិន បានសិក្សា និងហ្វឹកហាត់ពីវិធីស្លៀកពាក់ និងដោះឈុតការពារយ៉ាងប្រយ័ត្នប្រយែងជាទីបំផុត ដោយចាប់ផ្ដើមតាំងពីការពាក់អាវពេទ្យ(អាវសវែង)ម្ដង 1ជាន់ ពាក់មួក និងម៉ាស់ការពារពីខាងក្នុង រួចហើយទើបពាក់អាវធំឃ្លុំពីខាងក្រៅ និងស្រោមដៃ ដោយជាទូទៅត្រូវពាក់ឈុតការពារនោះយ៉ាងតិចពី 3-4ជាន់។

ក្រៅពីនេះ នៅមានការរៀបចំកន្លែងទុកដាក់ស្បែកជើង និងខោអាវដើម្បីទុកស្លៀកពាក់សម្រាប់តែពេលនៅខាងក្រៅឱ្យមានរបៀបរៀបរយ ទុកដាក់សាប៊ូជែលលាងដៃនៅជិតនឹងមាត់ទ្វារចេញ-ចូល និងការទុកដាក់ស្បែកជើងស្អាត សម្រាប់ពាក់ដើរនៅក្នុងបន្ទប់អ្នកជំងឺក្នុងទីតាំងដែលសមរម្យត្រឹមត្រូវទៀតផង។

ព័ត៌មានបឋម បានបញ្ជាក់ថា ក្រុមគាំទ្រ(បុគ្គលិកពេទ្យមកពីប៉េកាំង)ទាំងនោះប្រកបដោយ បុគ្គលិកពេទ្យចំនួន 136នាក់ មកពីមន្ទីរពេទ្យ 12កន្លែងក្នុងទីក្រុងប៉េកាំង ដូចជាមន្ទីរពេទ្យមិត្តភាពប៉េកាំង មន្ទីរពេទ្យកាំង អាន់ ជឹន មន្ទីរពេទ្យប៉េកាំង សួនអ៊ូ ជាដើម ដោយបុគ្គលិកភាគច្រើន មកពីសាខាវេជ្ជសាស្ត្របំបាត់ និងស្ដារវិបត្តិប្រព័ន្ធផ្លូវដង្ហើម និងការឆ្លងមេរោគ។

ប្រភព៖ សារព័ត៌មានបរទេស

អាសន្នរោគ Corona មិនទាន់ចប់ផង ចិនត្រូវទទួលផ្ដាសាយបក្សី H5N1 មួយជាន់ទៀត!

February 3, 2020

Author: សឿន សំណាង