Author: សឿន សំណាង

កូរ៉េខាងត្បូងដាក់ពន្ធនាគារច្រើនឆ្នាំ ចំពោះជនដែលឆ្លៀតឱកាសដំឡើងថ្លៃម៉ាស់
រដ្ឋាភិបាលកូរ៉េខាងត្បូងបានប្រកាសថា ឈ្មួញទាំងឡាយណាដែលឆ្លៀតឱកាសដំឡើងថ្លៃម៉ាស់ និងផលិតផលជួយទប់ស្កាត់វីរុសកូរ៉ូណា នឹងត្រូវផ្ដន្ទាទោសដាក់ពន្ធនាគាររហូតដល់ពី 2ឆ្នាំ។
ក្រសួងសេដ្ឋកិច្ច និងហិរញ្ញវត្ថុកូរ៉េខាងត្បូង បានឱ្យដឹងកាលពីម្សិលម៉្ងៃ (3កុម្ភៈ) ថា តម្រូវការរបស់ពលរដ្ឋបានកើនឡើងច្រើន ធ្វើឱ្យមានសកម្មភាពឆ្លៀតឱកាសដំឡើងតម្លៃម៉ាស់ និងផលិតផលការពារមេរោគនៅប្រទេសនេះ ក៏បានកើនឡើងច្រើនផងដែរ។ ផលិតផលទាំង 2មុខនេះ ត្រូវបានចាត់ចូលក្នុងមុខទំនិញពិសេស។
នៅកូរ៉េខាងត្បូង អ្នកជូញដូរម៉ាសខុសច្បាប់ នឹងត្រូវប្រឈមមុខជាមួយការជាប់ពន្ធនាគាររយៈពេល 2ឆ្នាំ ឬត្រូវពិន័យជាប្រាក់ឡើងដល់ 50លានវ៉ុន (ជាង 42,000ដុល្លារអាមេរិក)។
ចាប់ពីថ្ងៃនេះ (5កុម្ភៈ) តទៅ ឈ្មួញទាំងឡាយណាដែលរក្សាទុកផលិតផលទាំង 2មុខខាងលើ ក្នុងបរិមាណច្រើនជាង1,5ដង បើធៀបនឹងបរិមាណមធ្យមប្រចាំខែរបស់ពួកគេ នឹងត្រូវប្រឈមមុខជាមួយការជាប់ពន្ធនាគាររយៈពេល 2ឆ្នាំ ឬត្រូវពិន័យជាប្រាក់ឡើងដល់ 50លានវ៉ុន (ជាង 42,000ដុល្លារអាមេរិក)។
នៅកន្លែងមួយក្នុងតំបន់ក្បែរព្រំដែនចិន-វៀតណាម ពលរដ្ឋចិននាំគ្នាមកទិញដូរម៉ាសយកទៅលក់បន្តដើម្បីបានចំណេញច្រើន
បទបញ្ញត្តិខាងលើនេះ ត្រូវបានធ្វើឡើងក្នុងស្ថានភាពអាសន្នរោគរលាកសួតពីវីរុសកូរ៉ូណាប្រភេទថ្មី (nCoV) បាន និងកំពុងឆ្លងរាលដាលយ៉ាងឆាប់រហ័ស ចេញពីក្រុង Wuhan ប្រទេសចិនទៅដល់ប្រទេស និងតំបន់ចំនួន 28 ក្នុងពិភពលោក ក្នុងនោះមានកម្ពុជាផងដែរ និងបណ្ដាលឱ្យមានអ្នកស្លាប់ 492នាក់ និងអ្នកឆ្លងមេរោគនេះមានចំនួន 24,469នាក់។
ប្រជាជនកូរ៉េខាងត្បូងមានការព្រួយបារម្ភយ៉ាងខ្លាំង ក្រោយពីប្រទេសនេះបានរកឃើញអ្នកផ្ទុកមេរោគកូរ៉ូណាចំនួន 16នាក់។ ពលរដ្ឋចំនួនជាងកន្លះលាននាក់ បានចុះហត្ថលេខាលើញត្តិមួយផ្ញើទៅកាន់វិមានខៀវ (The Blue House) ស្នើឱ្យរដ្ឋាភិបាលហាមជនជាតិចិនចូលស្រុកជាបណ្ដោះអាសន្ន។ កូរ៉េខាងត្បូងបានជម្លៀសពលរដ្ឋរបស់ខ្លួនចេញពីតំបន់ Wuhan ប្រទេសចិនរួចហើយ និងបានដាក់ពួកគេឱ្យនៅដាច់ដោយឡែក ដើម្បីតាមដានសុខភាព។
ការរត់ពន្ធម៉ាសឆ្លងដែន ត្រូវបានឈ្មួញធ្វើឡើងក្នុងរូបភាពផ្សេងៗគ្នា
ចំណែកឯរដ្ឋាភិបាលចិនវិញ បានប្រកាសថា ប្រទេសនេះកំពុងត្រូវការម៉ាស់ សម្លៀកបំពាក់ការពារ និងវ៉ែនតាការពារមេរោគក្នុងបរិមាណច្រើនជាបន្ទាន់ ដើម្បីទប់ទល់នឹងមេរោគកូរ៉ូណាប្រភេទ nCoV។ ជាការឆ្លើយតបនឹងតម្រូវការខាងលើ ប្រទេសជប៉ុន កូរ៉េខាងត្បូង និងកាហ្សាក់ស្ថាន ជាដើម បានផ្ដល់ជំនួយសម្ភារវេជ្ជសាស្ត្រទៅឱ្យប្រទេសចិនជាបន្តបន្ទាប់ហើយ។
ពាក់ព័ន្ធនឹងបញ្ហាខាងលើនេះដែរ កាលពីថ្ងៃទី 29មករាកន្លងទៅ គណៈកម្មការគ្រប់គ្រងទីផ្សារនៃក្រុងប៉េកាំង បានប្រកាសនៅលើគេហទំព័ររបស់ខ្លួនថា ខ្លួនបានផ្ញើលិខិតពិន័យទៅកាន់ឱសថស្ថាន Beijing Jimin Kangtai Pharmacy ព្រោះតែឱសថស្ថានមួយនេះបានដំឡើងតម្លៃហួសហេតុទៅលើម៉ាស់ប្រភេទ N95។ នេះបើតាមទីភ្នាក់ងារសារព័ត៌មាន Reuters។
ពលរដ្ឋវៀតណាម នាំគ្នាបង្កើតផ្សារមួយកន្លែងនៅក្បែរព្រំដែនវៀតណាម-ចិន ដើម្បីជួញដូរម៉ាស
ទូរទស្សន៍ជាតិរបស់ចិន បានរាយការណ៍ថា ឱសថស្ថាននេះបានដំឡើងថ្លៃម៉ាស់ដែលមានរូបសញ្ញា 3M ឡើងដល់ 850យន់ (121ដុល្លារអាមេរិក)ក្នុង 1ប្រអប់ ខណៈនៅក្នុងទីផ្សារអនឡាញមានតម្លៃតែ 143យន់។ ជាមធ្យម ម៉ាស់នៅតាមឱសថស្ថាននានា 1ប្រអប់មានម៉ាស់ចំនួន 50បន្ទះ។
អ្នករត់ពន្ធម៉ាសឆ្លងដែនទៅចិនម្នាក់ ត្រូវអាជ្ញាធរវៀតណាមចាប់ឃាត់ខ្លួន
ទន្ទឹមនឹងនេះដែរ នៅឯប្រទេសជិតខាងចិន ដូចជាវៀតណាមជាដើម តម្លៃម៉ាស់ និងទឹកសម្អាតមេរោគ ក៏បានឡើងថ្លៃខ្លាំងដែរ ព្រោះថា ឈ្មួញខ្លះបានប្រមូលទិញម៉ាស់ក្នុងស្រុកយកទៅលក់ឱ្យឈ្មួញនៅតាមព្រំដែនជាប់ជាមួយចិន។ ជាក់ស្ដែង កាលពីថ្ងៃទី3កុម្ភៈ អាជ្ញាធរខេត្ត Vinh Phuc នៅវៀតណាមខាងជើងបានឃាត់ខ្លួនឈ្មួញជាច្រើននាក់ ដែលនាំម៉ាស់ពីប្រទេសវៀតណាមទៅកាន់ប្រទេសចិនដោយខុសច្បាប់។ ម៉ាស់ដែលត្រូវបានរឹបអូសក្នុងថ្ងៃនោះ មានចំនួនសរុប 26,100បន្ទះ។ នេះបើតាមសារព័ត៌មាន Thanhnien៕
ប្រភព៖ សារព័ត៌មានបរទេស
February 5, 2020
ជនជាតិតៃវ៉ាន់ 56នាក់បានស្លាប់ ដោយសារមេរោគផ្ដាសាយបក្សី
យ៉ាងហោចណាស់ ក៏មានជនជាតិតៃវ៉ាន់ 56នាក់ដែរ ដែលបានបាត់បង់ជីវិតដោយសារបានឆ្លងមេរោគផ្ដាសាយបក្សី H1N1 ក្នុងរយៈពេល 3ខែកន្លងមកនេះ ប៉ុន្តែមិនទាន់មានអ្នកណាម្នាក់ស្លាប់ដោយសារមេរោគកូរ៉ូណានៅឡើយ។
មន្ត្រីនៃមជ្ឈមណ្ឌលគ្រប់គ្រងគ្រោះអាសន្នរោគតៃវ៉ាន់ (CDC) កាលពីថ្ងៃទី3 កុម្ភៈ បានឱ្យដឹងថា H1N1 ឬហៅថា មេរោគផ្ដាសាយបក្សី គឺជាប្រភេទវីរុសដែលកើតច្រើនក្នុងរដូវត្រជាក់នៅលើកោះតៃវ៉ាន់ រយៈពេល 3ខែចុងក្រោយនេះ។ កំណត់ត្រារបស់ CDC បានបង្ហាញថា មានអ្នកឆ្លងមេរោគផ្ដាសាយបក្សី H1N1 ចំនួន 771នាក់ ដែលមានអាការធ្ងន់ធ្ងរ ចាប់តាំងពីថ្ងៃទី1តុលា ឆ្នាំកន្លង ក្នុងនោះមានអ្នកជំងឺ 56នាក់បានស្លាប់។
CDC ក្នុងសប្ដាហ៍នេះ បានផ្អាកការប្រកាសអំពីចំនួនអ្នកស្លាប់ដោយសារមេរោគផ្ដាសាយបក្សី ប៉ុន្តែសារព័ត៌មានក្នុងស្រុកបានឱ្យដឹងថា យ៉ាងហោចណាស់ក៏មានអ្នកស្លាប់បន្ថែមចំនួន 13នាក់ទៀតដែរ ដែលអ្នកជំងឺទាំងនេះ មានអាយុចាប់ពី 47-97ឆ្នាំ ក្នុងនោះមានទាំងលោកយាយអាយុ 80ឆ្នាំផងដែរ។
វេជ្ជបណ្ឌិត Lin Yung-ching មកពី CDC បានប្រាប់ថា អ្នកដែលបានស្លាប់ ភាគច្រើនដោយសារផលប៉ះពាល់ខ្លាំងទៅលើសួត និងផ្លូវដង្ហើម។ នេះបើតាមការចុះផ្សាយរបស់សារព័ត៌មាន SCMP។
ជំងឺផ្ដាសាយបក្សីតាមរដូវ គឺជាការគំរាមកំហែងដល់កោះតៃវ៉ាន់ ដែលវាធ្ងន់ធ្ងរជាងមេរោគ Corona (nCoV) ដែលកំពុងរាតត្បាតពិភពលោកទៅទៀត ចាប់ពីខែធ្នូ ឆ្នាំ2019 មកនេះ។ កោះតៃវ៉ាន់ បច្ចុប្បន្ន មានអ្នកផ្ទុកមេរោគ nCoV ចំនួន10នាក់ ប៉ុន្តែមិនទាន់មានអ្នកជំងឺណាម្នាក់បានបាត់បង់ជីវិតនៅឡើយ។
ពលរដ្ឋតៃវ៉ាន់ នៅក្រុងតៃប៉ី
គួររំឭកថា កាលពីថ្ងៃទី2កុម្ភៈ ប្រទេសចិនក៏បានប្រកាសអំពីការរកឃើញសម្បុកមេរោគផ្ដាសាយបក្សី H5N1 នៅក្នុងកសិដ្ឋានមួយ នៅក្រុង Shaoyang នៃខេត្ត Hunan ដែលបានធ្វើឱ្យមាន់ 4,500ក្បាលត្រូវងាប់។ H5N1 គឺជាវីរុសផ្ដាសាយបក្សីដែលអាចឆ្លងរាលដាលយ៉ាងឆាប់រហ័ស ក្នុងនោះមានប្រភេទខ្លះអាចឆ្លងមកមនុស្ស។ មន្ត្រីជំនាញនៅ Shaoyang បានប្រើប្រាស់វិធីទប់ស្កាត់មួយចំនួន ក្នុងនោះបានដុតកម្ទេចមាន់ចំនួន 17,828ក្បាលផងដែរ៕
ប្រភព៖ សារព័ត៌មានបរទេស
February 5, 2020
ចំនួនអ្នកស្លាប់ដោយសារមេរោគកូរ៉ូណា កើនដល់ 492នាក់ ខណៈអ្នកជំងឺជាង 2,500នាក់ ស្ថិតក្នុងស្ថានភាពធ្ងន់ធ្ងរ
គិតមកដល់ព្រឹកនេះ (5កុម្ភៈ) ចំនួនអ្នកស្លាប់ដោយសារមេរោគកូរ៉ូណា កើនដល់ 492នាក់ ក្នុងនោះ 490នាក់នៅចិនដីគោក ចំណែកអ្នកដែលកំពុងផ្ទុកមេរោគនេះ កើនឡើងដល់ 24,551នាក់។
គណៈកម្មការសុខាភិបាលខេត្ត Hubei ថ្ងៃនេះ បានបញ្ជាក់ថា មានអ្នកស្លាប់ថ្មីចំនួន 65នាក់ ដែលនេះបានធ្វើឱ្យចំនួនអ្នកស្លាប់សរុបក្នុងខេត្តនេះ ឡើងដល់ 479នាក់។ ខេត្ត Hebei ក៏បានរកឃើញអ្នកជំងឺថ្មីចំនួន 3,156នាក់ផងដែរ ធ្វើឱ្យចំនួនអ្នកមានផ្ទុកមេរោគសរុបដល់ទៅ 16,678នាក់។ ក្នុងចំណោមអ្នកកំពុងមានផ្ទុកមេរោគកូរ៉ូណា មានអ្នកជំងឺជាង 2,500នាក់ កំពុងស្ថិតក្នុងស្ថានភាពធ្ងន់ធ្ងរ និងធ្ងន់ធ្ងរបំផុត។
យោងតាមគណៈកម្មការសុខាភិបាលចិន ចំនួនអ្នកមានផ្ទុកមេរោគរលាកសួតកើនបន្ថែម 3,887 នាក់ ធ្វើឱ្យចំនួនអ្នកឆ្លងសរុបឡើងដល់ 24,324នាក់៕
ប្រភព៖ សារព័ត៌មានបរទេស
February 5, 2020
ចិនលេងមែនទែន! តុលាការជាន់ខ្ពស់មណ្ឌល ហ៊ើយ លង់ចៀង៖ អ្នកដែលមានចេតនាចម្លងមេរោគវីរុស អាចនឹងទទួលទោសដល់ថ្នាក់ប្រហារជីវិត…
រដ្ឋបាលចិនបានចេញបញ្ជាឱ្យប្រើវិធានការជាច្រើនយ៉ាងដើម្បីព្យាយាមទប់ស្កាត់មេរោគវីរុសកូរ៉ូណា(Corona) ដែលកំពុងរាតត្បាតពិភពលោក រួមទាំងការបិទមណ្ឌលហ៊ូពេយភាគកណ្ដាលទាំងស្រុង កន្លែងដែលមេរោគវីរុសបានបង្ហាញខ្លួនលើកដំបូងកាលពីខែធ្នូ និងសូមឱ្យគ្រប់គ្នាដែលធ្លាប់បានទៅទីនោះសម្ងំនៅម្នាក់ឯងរយៈពេល 14ថ្ងៃ។
ចំនួនអ្នកស្លាប់នៅប្រទេសចិនដែលបណ្ដាលមកពីមេរោគវីរុសប្រភេទថ្មីនេះបានកើនឡើងដល់ 425នាក់ និងមានអ្នកឆ្លងមេរោគហើយជាង 20,000នាក់។
បើតាមការរាយការណ៍របស់ទីភ្នាក់ងារព័ត៌មាន ស៊ីនហួ នៅថ្ងៃអង្គារនេះ បានឱ្យដឹងថា អង្គភាពសុវត្ថិភាពសាធារណៈនៅក្នុងមណ្ឌលធៀនជិនភាគខាងជើង បានចាប់ឃាត់ខ្លួនស្ត្រីម្នាក់ពីបទ “មានចេតនាលាក់បាំង” ថា ធ្លាប់ប៉ះពាល់ជិតដិតជាមួយអ្នកមកពីតំបន់ដែលឆ្លងរាលដាលរបស់មេរោគវីរុសកូរ៉ូណា និងរារាំងការព្យាយាមទប់ស្កាត់ការឆ្លងរាលដាលមេរោគ។
ស្ត្រីសែលីវ វ័យ 36ឆ្នាំម្នាក់នេះ បានរារាំងការធ្វើការការពារ និងគ្រប់គ្រងវីរុសតាមរយៈទង្វើរបស់គាត់ ហើយមន្ត្រីនៃអង្គភាពខាងលើ បាននាំខ្លួនស្ត្រីម្នាក់នោះចូលទៅឃុំឃាំងការប្រព្រឹត្ត។
ទីភ្នាក់ងារព័ត៌មានខាងលើ មិនបានរាយការណ៍លម្អិតពាក់ព័ន្ធនឹងអ្វីដែលស្ត្រីម្នាក់នោះបានធ្វើ ឬក៏បានប្រាប់ថា គាត់នឹងបានទទួលឥស្សរភាពវិញដែរឬទេ និងនៅពេលណាឡើយ។
នៅក្នុងតំបន់ខ្លះ រដ្ឋបាលចិនបានគំរាមថា នឹងដាក់ទោសយ៉ាងធ្ងន់ធ្ងរចំពោះអ្នកណាក៏ដោយដែលល្មើសច្បាប់ពាក់ព័ន្ធនឹងការព្យាយាមតស៊ូជាមួយមេរោគវីរុសមរណៈនេះ។
តុលាការជាន់ខ្ពស់នៃមណ្ឌល ហ៊ើយ លង់ចៀង ខាងភាគអាគ្នេយ៍ប្រទេសចិន បានបញ្ជាក់ច្បាស់ថា អ្នកដែលមានចេតនាចម្លងមេរោគវីរុស អាចនឹងទទួលទោសដល់ថ្នាក់ប្រហារជីវិត។ នេះបើយោងតាមសេចក្ដីប្រកាសរបស់តុលាការមួយនេះ កាលពីថ្ងៃទី31 មករា។
ក្រុមប៉ូលិសនៅក្នុងមណ្ឌល ឈីងហៃ ក្នុងភាគអាគ្នេយ៍ប្រទេសចិនដូចគ្នា កំពុងសើបសួរបុរសអ្នកឆ្លងមេរោគវីរុសម្នាក់ ដែល “រារាំងការទប់ស្កាត់មេរោគវីរុសយ៉ាងខ្លាំងក្លា និងបង្កគ្រោះអន្តរាយដល់ប្រព័ន្ធសធារណៈសុខាភិបាល”។ នេះបើតាម សារព័ត៌មាន ស៊ីនហួ ដោយមិនបានអធិប្បាយបន្ថែម៕
ប្រភព៖ សារព័ត៌មានបរទេស
February 4, 2020
តើទីក្រុងតូក្យូនឹងទៅជាយ៉ាងណា ពេលភ្នំភ្លើង Fuji ផ្ទុះ?
រដ្ឋាភិបាលប្រទេសជប៉ុនបានធ្វើការវាយតម្លៃថា បើសិនជាភ្នំភ្លើង ហ្វូជិ កើតការផ្ទុះដ៏ធំមួយឡើង អាចធ្វើឱ្យមានកម្អែភ្នំភ្លើងគ្របដណ្ដប់ទូទាំងទីក្រុងតូក្យូ និងតំបន់ជុំវិញ និងអាចធ្វើឱ្យការចែកចាយចរន្តអគ្គិសនី និងការធ្វើចរាចរណ៍គាំងស្ទះដំណើរការមិនខាន។
អ្នកវិទ្យសាស្ត្រល្បីៗលំដាប់ជួរមុខ បាននាំគ្នាចេញមកដាស់តឿនថា សភាវផែនដីឡើងកម្ដៅ នឹងធ្វើឱ្យកើតការរញ្ជួយផែនដីកើនច្រើនឡើងទូទាំងពិភពលោក ហើយភ្នំភ្លើងនឹងផ្ទុះឡើង និងដោយសារតែសីតុណ្ហភាពពិភពលោកដែលកាន់តែក្ដៅឡើង ធ្វើឱ្យទឹកកកនៅកំពូលផែនដីរលាយ…នៅពេលទឹកកករលាយ ក៏នឹងគ្មានអ្វីទាញសង្កត់ផ្ទាំងសម្បកផែនដី…បន្ទះផែនដីនឹងកម្រើក ធ្វើឱ្យផែនដីកាន់តែរញ្ជួយខ្លាំងឡើង និងម៉េកម៉ាខាងក្រោមដីនឹងហូរមកផ្ដុំគ្នា រហូតរង់ចាំកម្លាំងរុញឱ្យផ្ទុះចេញមកនៅកន្លែងណាមួយលើផែនដី…។
ភ្នំហ្វូជិ និមិត្តសញ្ញារបស់ប្រទេសជប៉ុនដែលនៅស្ងៀមនឹងមកអស់រយៈពេលជាង 300ឆ្នាំហើយនោះ នឹងមិនមែននៅស្ងប់ស្ងៀមដូចដែលអ្នកណាៗមើលឃើញនោះទៀតទេ តែគឺជាភ្នំភ្លើងដែលមានថាមពលសកម្ម(Active Volcano) អ្នកជំនាញការជនជាតិជប៉ុនបញ្ជាក់ថា ភ្នំហ្វូជិ នឹងផ្ទុះឡើងម្ដងទៀតយ៉ាងពិតប្រាកដ គ្រាន់តែនៅមិនទាន់ដឹងថា នឹងកើតឡើងនៅពេលណាប៉ុណ្ណោះ។
ក្រុមការងារមួយរបស់រដ្ឋបាលជប៉ុន បានប៉ាន់ប្រមាណការណ៍ថា បើសិនភ្នំភ្លើងហ្វូជិកើតការផ្ទុះដ៏ធំឡើង អាចនឹងមានកម្អែភ្នំភ្លើងហូរធ្លាក់មកប្រមូលសន្សំក្នុង 1ម៉ោងកម្ពស់ប្រមាណ 1-2សង់ទីម៉ែត្រនៅក្នុងទីក្រុងកូតិមបាក់ របស់ខេត្តឈិស៊ូអូកាក់ ដែលនៅជិតជើងភ្នំ ហើយបើភ្នំភ្លើងបាក់ហូរធ្លាក់មកគ្របសង្កត់ទីនោះទាំងអស់ អាចនឹងមានកម្ពស់ដល់ទៅ 1.2ម៉ែត្រ។
ក្នុងតំបន់ស៊ិនជូកុ របស់ទីក្រុងតូក្យូ ដែលឆ្ងាយពីភ្នំហ្វូជិប្រមាណ 90គីឡូម៉ែត្រ ទោះជាមិនមានកម្អែភ្នំភ្លើងធ្លាក់មកគរភ្លាមៗមែន តែនឹងខ្ទាតមកដល់នៅថ្ងៃទី13 ក្រោយការផ្ទុះ និងអាចមានកម្អែភ្នំភ្លើងគ្រប់សង្កត់កម្ពស់ប្រមាណ 1.3សង់ទីម៉ែត្រ។
អ្នកជំនាញការបញ្ជាក់ថា បើកម្អែភ្នំភ្លើងធ្លាក់នៅក្នុងទីក្រុងតូក្យូ និងតំបន់ជុំវិញ មនុស្សម្នាចំនួនដ៏ច្រើនអាចនឹងមិនអាចត្រឡប់ទៅផ្ទះបាន ក្រៅពីនេះការដឹកជញ្ជូនអាហារ និងវត្ថុប្រើប្រាស់ចាំបាច់ផ្សេងៗក្នុងជីវិតប្រចាំថ្ងៃ អាចនឹងជាប់គាំងស្ទះនៅមួយកន្លែង ហើយបើសិនមានហេតុការណ៍រញ្ជួយផែនដីកើតឡើងផងនោះ អាចនឹងមានអ្នកស្លាប់រាប់ពាន់នាក់ ជា “មហាគ្រោះវិបត្តិ” ធំមួយក្នុងទីក្រុងនៃដែនដីកោះមួយនេះ។
កាលពីអតីតកាល បណ្ដាទីក្រុងនានាដែលស្ថិតនៅជុំវិញភ្នំហ្វូជិ តែងចៀសគេចពីការពិភាក្សារឿងផែនការការពារគ្រោះវិបត្តិ ព្រោះបារម្ភខ្លាចក្រែងថា នឹងបង្កឱ្យកើតមានការភិតភ័យភ្ញាក់ផ្អើលដល់ទីប្រជុំជនដែលស្ថិតនៅជុំវិញនោះ តែក្រោយពីភ្នំហ្វូជិបានចុះបញ្ជីជាបេតិកភណ្ឌពិភពលោករបស់អង្គការយូណេស្កូ កាលពីឆ្នាំ2012 មក អ្នកទេសចរ និងអ្នកឡើងភ្នំដែលបានមកដល់ភ្នំហ្វូជិ មានចំនួនកាន់តែច្រើនឡើងៗ ធ្វើឱ្យអង្គភាពផ្សេងៗនៅទីនោះត្រូវធ្វើសេចក្ដីព្រាងវិធានការផ្នែកសុវត្ថិភាពឡើង។
អ្នកជំនាញការជនជាតិជប៉ុនបានរៀបរាប់ថា ភ្នំភ្លើង អាចធ្វើឱ្យមានការខូចខាតយ៉ាងខ្លាំង បើសិនជាវាផ្ទុះឡើង តែបើសម្លឹងមើលក្នុងរយៈពេលវែងវិញ ភ្នំភ្លើងក៏សាងនូវគុណប្រយោជន៍ឱ្យច្រើនដែរ ដូចជា ទស្សនីយភាពដ៏ស្រស់ស្អាតប្លែកភ្នែក ទឹកនៅក្រោមដីដែលនឹងមានយ៉ាងបរិបូរណ៍ និងផ្ទៃដីជើងភ្នំដ៏ធំទូលាយ ដែលស័ក្តិសមបំផុតក្នុងការដំណើរការកិច្ចការងារខាងសេដ្ឋកិច្ចដ៏សម្បូរបែប។
អំឡុងពេលដែលភ្នំភ្លើងផ្ទុះនោះ ជាអំឡុងពេលដែលខ្លីបំផុត បើប្រៀបធៀបនឹងអំឡុងពេលដែលវានៅស្ងប់ស្ងៀម បើសិនមានការត្រៀមរួចជាស្រេច និងដំណើរការវិធានការទប់ទល់ដែលគ្រប់គ្រាន់ បណ្ដាភ្ញៀវទេសចរ និងអ្នករស់នៅក្នុងបរិវេណជុំវិញភ្នំ ក៏នឹងបានរំភើបរីករាយជាមួយនឹងភាពស្រស់ស្អាតរបស់ភ្នំភ្លើងបានយ៉ាងមានសុវត្ថិភាព។
ក្ដីព្រួយកង្វល់រឿងភ្នំភ្លើងហ្វូជិ ថានឹងផ្ទុះឡើងម្ដងទៀតនោះ អាចទប់ទល់បានដោយការត្រៀមរួចជាស្រេចនូវផែនការគ្រោះវិបត្តិ និងការធ្វើឱ្យមនុស្សម្នាទាំងឡាយយល់ដឹងពីគ្រោះអន្តរាយរបស់ភ្នំភ្លើង តែមិនភ័យឆ្លេឆ្លាភ្ញាក់ផ្អើល…ប្រជាជនគួរត្រៀមខ្លួនឱ្យរួចជាស្រេចចំពោះការផ្ទុះដែលអាចនឹងកើតឡើង តែក៏នឹងនៅតែបានស្ងើចសរសើរចំពោះទស្សនីយភាព និងប្រើប្រាស់ប្រយោជន៍ពីភ្នំភ្លើងបានដែរ៕
ប្រភព៖ សារព័ត៌មានបរទេស
February 4, 2020
អ្នកដែលជាពីជំងឺរលាកសួត Corona អាចនឹងឆ្លងមេរោគនេះសាជាថ្មី?
អ្នកវិទ្យាសាស្ត្រនៃគណៈកម្មការសុខាភិបាលជាតិនៃប្រទេសចិន កាលពីថ្ងៃទី31មករា បានព្រមានថា អ្នកជំងឺរលាកសួត nCoV (Corona) ដែលបានជាសះស្បើយពីជំងឺនេះហើយ នៅតែអាចឆ្លងវីរុសនេះជាថ្មីម្ដងទៀតបានជានិច្ច។
Zhan Qungyuan ប្រធានផ្នែកទប់ស្កាត់ និងព្យាបាលជំងឺរលាកសួតនៃមន្ទីរពេទ្យមិត្តភាពចិន-ជប៉ុន ដែលជាអ្នកដឹកនាំក្រុមជំនាញផ្នែក nCoV បានព្រមានថា សូម្បីតែអ្នកដែលបានជាសះស្បើយពីជំងឺនេះហើយ ក៏នៅតែអាចឆ្លងសាជាថ្មីម្ដងទៀតបានដែរ។ ថ្វីបើរាងកាយរបស់ពួកគេអាចបង្កើតអង្គបដិប្រាណ (antibody)បានមែន ប៉ុន្តែសម្រាប់អ្នកខ្លះ អង្គបដិប្រាណនេះមិនអាចគង់នៅបានយូរអង្វែងទេ។
លោក Zhan Qungyuan បានណែនាំឱ្យអ្នកដែលបានជាសះស្បើយពីជំងឺអាសន្នរោគនេះ លើកកម្ពស់ការការពារការឆ្លងមេរោគ ថែរក្សាសុខភាព និងចៀសវាងអាកាសធាតុត្រជាក់ខ្លាំង ឬរោគផ្ដាសាយ។ អ្នកវេជ្ជសាស្ត្រចិនរូបនេះ ក៏បានស្នើឱ្យអ្នកជំងឺដែលបានជាសះស្បើយហើយ ត្រូវពិនិត្យសុខភាពតាមការកំណត់របស់គ្រូពេទ្យ។
អម្បូរមេរោគ Corona គឺរួមទាំងវីរុសបង្កើតជំងឺផ្ដាសាយធម្មតា អាសន្នរោគ SARS និង MERS ។ ភាគច្រើននៃវីរុស Corona អាចបង្កជំងឺរលាកផ្លូវដង្ហើមផ្នែកខាងលើ ចាប់ពីស្រាល ដល់មធ្យម និងឆ្លងពីសត្វមកមនុស្ស។ នៅពេលមេរោគបានចូលក្នុងរាងកាយមនុស្ស វានឹងរកវិធីតោងទាម និងរុកចូលក្នុងកោសិកានៃរាងកាយមនុស្ស។ ដើម្បីទប់ទល់នឹងមេរោគនេះ ប្រព័ន្ធការពាររាងកាយរបស់មនុស្សនឹងបង្កើតអង្គបដិប្រាណ ដែលជាប្រូតិអ៊ីនមួយប្រភេទអាចកំណត់អត្តសញ្ញាណមេរោគ រួចបណ្ដេញវាចេញពីរាងកាយ។ នេះជាវិធីដែលជួយឱ្យមនុស្សមិនឆ្លងមេរោគមួយចំនួនដែលពួកគេធ្លាប់បានឆ្លងរួចមកហើយ។ វ៉ាក់សាំងក៏ជាវិធីសាស្ត្រមួយផ្សេងទៀតដើម្បីជួយចម្រើនអង្គបដិប្រាណនេះដែរ។
Amira Roess សាស្ត្រាចារ្យផ្នែកសុខាភិបាល និងអាសន្នរោគ នៃសាកលវិទ្យាល័យ George Mason បាននិយាយថា៖ “ចំពោះជំងឺឆ្លងមួយចំនួន រាងកាយមនុស្សអាចបង្កើតប្រព័ន្ធអង្គបដិប្រាណដើម្បីទប់ស្កាត់មេរោគជាក់លាក់ណាមួយ ក្រោយពីបានឆ្លងមេរោគ។ ជាធម្មតា អ្នកដែលបានឆ្លងមេរោគម្ដងហើយ នឹងមិនឆ្លងម្ដងទៀតទេ បើទោះពួកគេបានប៉ះពាល់មេរោគនោះក៏ដោយ។ ក្នុងករណីអម្បូរមេរោគ Corona ថ្មី (nCoV) អ្នកវិទ្យាសាស្ត្រកំពុងតែស្វែងរកចម្លើយ ដើម្បីដោះស្រាយបញ្ហានេះ”។
ក្រុមគ្រូពេទ្យ និងអ្នកមេរោគវិទ្យា មិនទាន់ដឹងច្បាស់នៅឡើយអំពី nCoV ដើម្បីប្រាកដថា តើរាងកាយមនុស្សអាចបង្កើតអង្គបដិប្រាណបានគ្រប់គ្រាន់ដែរឬទេ បន្ទាប់ពីបានឆ្លងមេរោគដ៏សាហាវនេះ?។ លោក Zhan Qungyuan បន្តថា ក្រុមអ្នកវិទ្យាសាស្រមិនទាន់ប្រាកដថា អង្គបដិប្រាណដែលរាងកាយមនុស្សផលិតនោះ អាចការពារពួកគេពីការឆ្លងមេរោគម្ដងទៀតឬយ៉ាងណានៅឡើយ?។ មេរោគ Corona ថ្មី ប្រភេទ nCoV ក៏អាចរីកចម្រើន និងប្រែកាយយ៉ាងលឿនដែរ ដូច្នេះអង្គបដិប្រាណដែលអាចទប់ស្កាត់មេរោគប្រភេទនេះ ក៏មិនអាចធានាបានថា អាចទប់ស្កាត់មេរោគប្រភេទផ្សេងបានដែរ។
អង្គការសុខភាពពិភពលោក WHO បានប្រកាសភាពអាសន្នចំពោះមេរោគរាតត្បាត Corona ប្រភេទថ្មី (nCoV) នេះកាលពីថ្ងៃទី 30មករាកន្លងទៅ។ គិតមកដល់ថ្ងៃទី 4មករានេះ ចំនួនអ្នកស្លាប់ដោយសារអាសន្នរោគនេះបានកើនដល់ 427នាក់ និងអ្នកបានឆ្លងមេរោគនេះ កើនដល់ 20,622នាក់៕
ប្រភព៖ សារព័ត៌មានបរទេស
February 4, 2020
“ខ្ញុំមិនមែនវីរុសទេ!!” ដាស់ស្មារតីមនុស្សជុំវិញពិភពលោក បញ្ឈប់ការដាក់បដាបិទហាង-ដេញ-និងបិទប្រទេស ហាមជនជាតិចិន
មនុស្សជុំវិញពិភពលោកដែលកំពុងភ័យរន្ធត់ខ្លាំងអំពី “វីរុសកូរ៉ូណា” បានបណ្ដាលឱ្យកើតមានក្រសែស្អប់ខ្ពើម-រើសអើងជនជាតិចិន រហូតដល់នៅក្នុងប្រទេសថៃ មានការសរសេរបដាហាមជនជាតិចិនចូលទៀតផង!។ សង្គមមនុស្សជាតិបានដាក់សំណួរថា “តើធ្វើនេះត្រឹមត្រូវហើយ ឬធ្វើហួសហេតុជ្រុលពេក?”។ ថ្មីៗនេះ អ្នកជំនាញការផ្នែកទំនាក់ទំនង និងសម្ព័ន្ធភាពអន្តរជាតិ បានធ្វើការវិភាគពី “ការបិទប្រទេស” ថា “រឹតតែសាងស្នាមរបួសលើសម្ព័ន្ធភាពដ៏ល្អ” និងបានសង្កត់ធ្ងន់លើ “ការរួមដៃគ្នាខាងវេជ្ជសាស្ត្រទើបជាការប្រសើរបំផុត!”។
ទូទាំងពិភពលោកភ័យខ្លាចវីរុស មិនស្វាគមន៍ជនជាតិចិន!
“សូមអភ័យទោស មិនទទួលភ្ញៀវចិន និងអតិថិជនបរទេស…ដែលយើងមិនអាចផ្ដល់សេវាកម្មជូនលោកអ្នកបាននេះ គឺដោយសាតែបញ្ហាមេរោគវីរុសកូរ៉ូណា…សូមអរគុណដែលបានយល់ចិត្ត”
អត្ថបទដែលមានទាំងភាសាថៃ និងអង់គ្លេស ត្រូវបានបំពាក់នៅផ្នែកខាងមុខមាត់ទ្វារនៃភោជនីយដ្ឋានមួយនៅក្នុងខេត្តឈៀងម៉ៃ ប្រទេសថៃ ដោយសារតែការភ័យខ្លាចវីរុសកូរ៉ូណា រហូតដល់ត្រូវកំណត់អតិថិជនចំពោះតែជនជាតិថៃប៉ុណ្ណោះដែលអាចចូលបាន។
រឿងនេះបានក្លាយជារឿងមួយដែលត្រូវបានជជែកដេញដោលគ្នាយ៉ាងទូលំទូលាយ ដែលមានទាំងយល់ស្រប និងមិនយល់ស្របថា ជាទង្វើដែលរើសអើង ឬតើនឹងធ្វើឱ្យអ្នកទេសចរខូចអារម្មណ៍ នឹកអន់ចិត្តដែរឬទេ? ខណៈដែលមនុស្សភាគច្រើនយល់ឃើញថា ខាងភោជនីយដ្ឋានបានធ្វើត្រឹមត្រូវហើយ ដែលផ្ដល់ភាពសំខាន់លើរឿងសុវត្ថិភាពជាចម្បង។
មិនមែនមានតែជនជាតិថៃប៉ុណ្ណោះទេ ដែលមានកង្វល់រឿងការឆ្លងមេរោគពីជនជាតិចិន តែជនជាតិចិនគ្នាឯងនៅក្នុងប្រទេសចិនក៏បានរារាំងគ្នាឯងដែរ ខណៈដែលប្រទេសជាច្រើនទូទាំងពិភពលោកសុទ្ធតែមានវិធានការ និងការប្រតិបត្តិដែលហាក់ដូចជាដាច់ខាត ឬដែលអាក្រក់បំផុតនោះគឺ វាកើតជាក្រសែរើសអើងជនជាតិអាស៊ី បែបម៉ៅរួមទៅជាមួយគ្នាតែម្ដង។
ឧទាហរណ៍ ហាងលក់ទំនិញ ឬភោជនីយដ្ឋានមួយចំនួននៅក្នុងប្រទេសជប៉ុន និងកូរ៉េខាងត្បូង មានការដាក់បដាប្រកាសមិនស្វាគមន៍ជនជាតិចិន រួមទាំងសណ្ឋាគារមួយនៅក្នុងប្រទេសវៀតណាមក៏មានការដាក់បដាផងដែរថា “ប្រទេសរបស់អ្នក កំពុងតែចម្លងមេរោគ ទើបយើងមិនស្វាគមន៍ភ្ញៀវមកពីប្រទេសចិន”។ ខណៈដែលប្រទេសក្នុងតំបន់អឺរ៉ុបក៏មានប្រតិកម្មចំពោះជនជាតិចិន និងជនជាតិអាស៊ីក្នុងទំនងដូចគ្នាដែរ ដូចជានៅប្រទេសបារាំង មានការនិយាយគ្នាអំពីស្ត្រីម្នាក់ដែលជិះនៅក្នុងរថយន្តក្រុងថា “មានស្រីចិនម្នាក់ កំពុងចម្លងមេរោគមកពួកយើង”។ ដែលការពិតទៅ នាងគឺជាអ្នកទីក្រុងប៉ារីសដែលមានសែស្រឡាយវៀតណាម រហូតធ្វើឱ្យកើតក្រសែជជែកតវ៉ាគ្នាយ៉ាងខ្លាំងនៅក្នុងប្រទេសបារាំង ព្រមជាមួយហេចថេក #je ne suis pas un virus ឬ ខ្ញុំមិនមែនជាវីរុសទេ!!។
អ្នកជំនាញការផ្នែកទំនាក់ទំនង និងសម្ព័ន្ធភាពអន្តរជាតិ ខាងលើបានសរុបថា ក៏ចង់ផ្ដាំផ្ញើថា គួរយល់ចិត្ត និងអាណិតជនជាតិចិន ការពិតទៅគឺមនុស្សទូទាំងពិភពលោកហ្នឹងឯង! យើងជាពលរដ្ឋរួមពិភពលោកតែមួយ បញ្ហានេះ បើសិនតទៅមុខទៀត វាកើតលើប្រទេសណាមួយ ប្រទេសនោះច្បាស់ជាយ៉ាប់យ៉ឺនដូចតែគ្នាហ្នឹងឯង ដូច្នេះខ្ញុំជឿថា ទីបំផុតទៅ ទូទាំងពិភពលោកត្រូវតែជួយគ្នា ទើបអាចឆ្លងផុតទៅបាន៕
February 4, 2020
អាមេរិកាំងថាចិនយល់ព្រមឱ្យអ្នកវេជ្ជសាស្ត្រអាមេរិកាំងចូលជួយ បន្ទាប់ពីចិនចោទអាមេរិកាំងថា មិនបានជួយអ្វីសោះ
រដ្ឋាភិបាលប្រទេសចិនបានយល់ព្រមឱ្យអ្នកវេជ្ជសាស្ត្រអាមេរិកាំង ចូលមកកាន់ប្រទេសចិនដើម្បីជួយទប់ទល់នឹងមេរោគរលាកសួតកូរ៉ូណាប្រភេទថ្មី(nCoV2019). នេះបើតាមការឱ្យដឹងពីសេតវិមាន។
អ្នកនាំពាក្យរបស់សេតវិមាន លោក Judd Deere កាលពីថ្ងៃទី2 កុម្ភៈ) បានឱ្យដឹងថា៖ “ចិនបានយល់ព្រមឱ្យអាមេរិកាំងបញ្ចូលអ្នកជំនាញផ្នែកវេជ្ជសាស្ត្ររបស់ខ្លួន ទៅក្នុងគណៈប្រតិភូនៃអង្គការសុខភាពពិភពលោក (WHO) នៅប្រទេសចិន ដើម្បីស្វែងយល់បន្ថែម និងស្វែងរកវិធីថ្មីទប់ទល់នឹងមេរោគរលាកសួតប្រភេទថ្មី Corona”។
ប្រធានមជ្ឈមណ្ឌលជាតិសម្រាប់ការចាក់វ៉ាក់សាំង និងជំងឺផ្លូវដង្ហើមរបស់អាមេរិកាំង NCIRD (National Center for Immunization and Respiratory Diseases) បាននិយាយថា វត្តមានរបស់ក្រុមអ្នកឯកទេសនៃមជ្ឈមណ្ឌលគ្រប់គ្រង និងទប់ស្កាត់ជំងឺឆ្លងអាមេរិកាំង CDC (Centers for Disease Control and Prevention) នឹងមានប្រយោជន៍ច្រើន ព្រោះពួកគេសុទ្ធតែជា “អ្នកវិទ្យាសាស្ដ្រដែលមានបទពិសោធ បច្ចេកទេសទាក់ទិននឹងប្រភេទជំងឺប្រហាក់ប្រហែលនេះ”។
ការប្រកាសរបស់សេតវិមាន ត្រូវបានធ្វើឡើង ក្រោយពីអ្នកនាំពាក្យនៃក្រសួងការបរទេសចិន បានចោទប្រកាន់អាមេរិកថា មិនបានជួយអ្វីសោះ ក្រៅតែពីបង្កើនភាពភ័យខ្លាចចំពោះអាសន្នរោគរលាកសួត Corona (nCoV) ដែលរួមទាំងបទបញ្ជាហាមមិនឱ្យអ្នកទេសចរចិនចូលទឹកដីអាមេរិក និងបានដើរផ្ទុយពីអនុសាសន៍របស់អង្គការសុខភាពពិភពលោក (WHO) ។
ប៉ុន្តែ បន្ទាប់មកលោកស្រីបណ្ឌិត Nancy Messonnier ប្រធានមជ្ឈមណ្ឌលជាតិការពារជំងឺឆ្លង និងជំងឺផ្លូវដង្ហើមអាមេរិកាំង បានឆ្លើយតបវិញថា វិធានការទាំងឡាយរបស់ទីក្រុងវ៉ាស៊ីនតោន គឺយោងទៅលើមូលដ្ឋាននៃវិទ្យាសាស្ត្រ ហើយពួកគេកំពុងការពារសុខភាព និងសុវត្ថិភាពរបស់ពលរដ្ឋអាមេរិកាំងទាំងមូល។
សហរដ្ឋអាមេរិកដែលកំពុងមានអ្នកឆ្លងមេរោគ Corona ចំនួន 11ករណី កាលពីសប្ដាហ៍មុនបានប្រកាសភាពអាសន្នស្ដីអំពីសុខភាពសាធារណៈ និងបានចេញបញ្ជាហាមមិនឱ្យជនបរទេសទាំងឡាយណាដែលធ្លាប់បានទៅកាន់ប្រទេសចិនដីគោកក្នុងអំឡុង 2សប្ដាហ៍មុន ចូលស្រុកអាមេរិក។ អាមេរិកាំងក៏បានចេញអនុសាសន៍កម្រិត4 សម្រាប់វិស័យទេសចរណ៍ ដែលជាកម្រិតខ្ពស់បំផុត ដើម្បីព្រមានពលរដ្ឋអាមេរិកាំង កុំឱ្យទៅកាន់ប្រទេសចិន។ ក្រុមហ៊ុនអាកាសចរណ៍ស្ទើរតែទាំងអស់របស់អាមេរិកាំង បានលុបចោលជើងហោះហើរទៅ-មកប្រទេសចិន។
គិតមកត្រឹមព្រឹកនេះ (4កុម្ភៈ) នៅទូទាំងពិភពលោក មានអ្នកស្លាប់ដោយសារមេរោគកូរ៉ូណា ឡើងដល់ 427នាក់ ក្នុងនោះមាន 425នាក់ស្លាប់នៅឯប្រទេសចិនដីគោក និងម្នាក់ស្លាប់នៅហ្វីលីពីន ម្នាក់ទៀតទើបតែបាត់បង់ជីវិតនៅឯក្រុងហុងកុង។ ចំណែកអ្នកដែលបានឆ្លងមេរោគនេះ កើនឡើងដល់ 20,604 នៅទូទាំងពិភពលោក៕
ប្រភព៖ សារព័ត៌មានបរទេស
February 4, 2020
វៀតណាម៖ មនុស្សរាប់រយនាក់ប្រជ្រៀតគ្នា ដណ្ដើមទិញម៉ាស់ តាំងពីព្រឹកដល់រសៀល (មានវីដេអូ)
វៀតណាម៖ នៅប្រហែលម៉ោង 2រសៀលថ្ងៃទី3 កុម្ភៈ(ម្សិលមិញ) មនុស្សចំនួនរាប់រយនាក់បានប្រជ្រៀតគ្នា ដណ្ដើមទិញម៉ាស់ នៅឯហាងលក់ផលិតផលសុខាភិបាលមួយកន្លែងដែលមានទីតាំងនៅលើផ្លូវ Nguyen Gian Thanh ក្នុងទីក្រុងហូជីមិញ។ នេះបើតាមការចុះផ្សាយរបស់សារព័ត៌មាន VNexpress។
នៅហាងនេះ មនុស្សម្នាក់មានសិទ្ធិទិញម៉ាស់ បានត្រឹមតែ 3ប្រអប់ប៉ុណ្ណោះ ក្នុងតម្លៃ105,000ដុងក្នុង 1ប្រអប់ (ប្រហែល4.5ដុល្លារអាមេរិក)។
នៅក្នុងរូបភាពវីដេអូនេះ មានអតិថិជនជាច្រើនបានបង្ហាញអំពីការលំបាកក្នុងការរកទិញម៉ាស់ ព្រោះថា មិនសូវមានគេដាក់លក់ដូចធម្មតាទេ ហើយបើមានគេលក់ ក៏លក់ក្នុងតម្លៃថ្លៃហួសហេតុ។ ប៉ុន្តែ អ្នកខ្លះក៏បានបង្ហាញពីអារម្មណ៍សប្បាយចិត្តដែរ ព្រោះទិញបានដូចបំណង។
អតិថិជនម្នាក់ឈ្មោះ Nguyen Van Hung នៅទីក្រុងហូជីមិញបាននិយាយថា៖ “ថប់ដណ្ហើមចង់សន្លប់ មិនទាន់បានហូបបាយថ្ងៃត្រង់ផង”។
អតិថិជនម្នាក់ទៀតប្រាប់ថា៖ “ដើររកមើលនៅក្បែរៗនេះ មិនឃើញមានអ្នកណាគេលក់សោះ។ ឃើញតែកន្លែងនេះដែលមានលក់ ទើបប្រជ្រៀតចូលទិញនឹងគេ”។
ពលរដ្ឋវៀតណាមម្នាក់ទៀត លោក Ngo Thanh Truong និយាយថា៖ មកតម្រង់ជួរតាំងពីម៉ោង 9ព្រឹករហូតមកដល់ពេលនេះ។ និយាយរួម គឺនឿយហត់ណាស់ តែពេលទិញបានម៉ាស់ហើយ ក៏មានអារម្មណ៍ថា ស្ងប់ចិត្ត”។
អតិថិជនម្នាក់ទៀតឈ្មោះ On Thi Ngoc Tram ប្រាប់ថា៖ “មកពីគេតម្រង់ជួរគ្មានរបៀប ទើបប្រជ្រៀតគ្នាហត់បែបនេះ។ ធម្មតា ខ្ញុំមកទីនេះ ទិញតាមធម្មតា ទិញបានភ្លាម ត្រឡប់ទៅវិញភ្លាម មិនដែលប្រជ្រៀតគ្នាឱ្យហត់បែបនេះទេ។ ប៉ុន្តែ ខ្ញុំនៅតែអាចទទួលយកបាន ព្រោះថានៅទីនេះ តម្លៃថោកជាងច្រើន បើធៀបនឹងនៅខាងក្រៅ(កន្លែងផ្សេង)។
ដោយសារតែមានអ្នកទិញច្រើនពេក ទើបបណ្ដាលឱ្យចរាចរណ៍នៅទីនោះត្រូវកកស្ទះយ៉ាងខ្លាំង។
ម្ចាស់ហាងទំនិញនេះ គឺលោក Nguyen Ngoc Duy បានឱ្យដឹងថា៖ ប្រអប់ដែលមានម៉ាស់ច្រើនបំផុត គឺមានតម្លៃ 36,000ដុង (1,55ដុល្លារ)។ យើងខ្ញុំជួយបងប្អូន ទើបលក់តម្លៃបែបនេះ។ មានអ្នកផ្សេងគេមកទិញក្នុងតម្លៃ 100,000ដុងក្នុង 1ប្រអប់ឯណោះ ប៉ុន្តែខ្ញុំនៅតែមិនលក់ឱ្យ។ ផលិតផលនេះ យើងខ្ញុំរក្សាទុកតាំងពីមុនចូលឆ្នាំ បើពេលនេះវិញ គឺអស់ទំនិញហើយ។ ល្ងាចនេះ លក់ 6ឡាំងទៀត គឺអស់ហើយ។
បច្ចុប្បន្ន ម៉ាស់បានក្លាយជាទំនិញមួយដែលកំពុងខ្វះខាតយ៉ាងខ្លាំង ខណៈដែលអាសន្នរោគរលាកសួតកំពុងឆ្លងរាលដាលស្ទើរគ្រប់ទិសទីក្នុងពិភពលោក។
វៀតណាម បានរកឃើញអ្នកមានផ្ទុកមេរោគ Corona ចំនួន 8ករណី ដែលត្រូវបានដាក់ឱ្យនៅដាច់ដោយឡែក និងកំពុងទទួលការព្យាបាល៕
ប្រភព៖ សារព័ត៌មានបរទេស
February 4, 2020
ចិនស្ដីបន្ទោសអាមេរិកថា មិនបានជួយ ហើយថែមទាំងបន្ថែមក្ដីភ័យខ្លាចលើវីរុសវូហានទៀត…
កាលពីថ្ងៃទី3 មករា ម្សិលមិញ ទីភ្នាក់ងារព័ត៌មាន AFP និង រ៉យទ័រ បានរាយការណ៍ថា ចិនបានចេញមកចោទប្រកាន់សហរដ្ឋអាមេរិកថា មិនត្រឹមតែមិនបានផ្ដល់ការជួយសង្រ្គោះអ្វីដែលសំខាន់ៗក្នុងការទប់ទល់នឹងការឆ្លងរាលដាលរបស់វីរុសកូរ៉ូណាប្រភេទថ្មីនេះប៉ុណ្ណោះទេ តែសហរដ្ឋអាមេរិកបែរជាថែមទាំងបន្ថែមភ្លើងនៃការភ័យខ្លាចក្នុងការតបស្នងទប់ទល់នឹងការឆ្លងរាលដាលរបស់វីរុសកំណាចនេះរបស់ចិនកាន់តែខ្លាំងដៃឡើងទៅទៀតដោយវិធានការដ៏ខ្លាំងក្លារបស់សហរដ្ឋអាមេរិក ដែលរួមមានការជម្លៀសពលរដ្ឋរបស់ខ្លួនត្រឡប់ទៅប្រទេសវិញមុនប្រទេសណាៗទាំងអស់ និងថែមទាំងហាមមិនឱ្យអ្នកធ្វើដំណើរមកពីចិន ចូលទៅក្នុងប្រទេសរបស់ខ្លួនទៀត។
“សហរដ្ឋអាមេរិក មិនបានផ្ដល់នូវការជួយសង្គ្រោះសំខាន់ៗអ្វីទាំងអស់ មានតែសាងនូវក្ដីភ័យភ្ញាក់ផ្អើលឱ្យចិនតែប៉ុណ្ណោះ” លោកស្រី ហួ ឈុន អ៊ិង អ្នកនាំពាក្យនៃក្រសួងការបរទេសចិននៅបានអះអាងពីការណែនាំរបស់អង្គការសុខភាពពិភពលោកដែលបានចេញមកប្រកាសដាស់តឿនថា ការហាម ឬការកំណត់ការធ្វើដំណើរ មិនមែនជាវិធានការចាំបាច់ក្នុងការតស៊ូជាមួយការឆ្លងរាលដាលរបស់មេរោគទេ។
“ប្រទេសអភិវឌ្ឍន៍ជាច្រើនប្រទេស ដូចជាសហរដ្ឋអាមេរិក ដែលមានសមត្ថភាព និងមានឧបករណ៍ជួយផ្ដល់ភាពងាយស្រួលក្នុងការការពារការឆ្លងរាលដាលដ៏មាំមួន បានប្រើវិធានការគ្រប់គ្រងហួសពីភាពចាំបាច់ ដែលផ្ទុយនឹងការណែនាំរបស់អង្គការសុខភាពពិភពលោក”។ លោកស្រីអ្នកនាំពាក្យនៃក្រសួងការបរទេសចិនបានបន្ថែមទៀតថា៖ “ប្រទេសទាំងអស់នេះ គួរពិចារណាការសម្រេចចិត្តលើមូលដ្ឋាននៃហេតុផល ភាពសុភាពនឹងនរ និងប្រកាន់យកគោលការណ៍ខាងវិទ្យាសាស្ត្រ”
ឥរិយាបថឆ្លើយតបរបស់ចិននេះបានធ្វើឡើង បន្ទាប់ពីប្រទេសសហរដ្ឋអាមេរិកបានប្រកាសស្ថានការណ៍អាសន្នខាងសាធារណសុខាភិបាលនៅក្នុងប្រទេសអាមេរិកកាលពីថ្ងៃសុក្រ ទី31 មករា កន្លងមក ក្រោយកើតការឆ្លងរាលដាលរបស់មេរោគវីរុសកូរ៉ូណាវូហាននៅក្នុងប្រទេសចិន និងរាលដាលទៅប្រទេសជាច្រើនទូទាំងពិភពលោក និងថែមទាំងហាមជនបរទេសដែលធ្លាប់បានធ្វើដំណើរទៅប្រទេសចិនក្នុងអំឡុង 2សប្ដាហ៍កន្លងមក មិនឱ្យចូលប្រទេសអាមេរិក និងឱ្យជនជាតិអាមេរិកដែលធ្វើដំណើរមកពីវូហាន មជ្ឈមណ្ឌលកណ្ដាលនៃការចម្លងរាលដាលរបស់វីរុសមរណៈមួយនេះ ស្ថិតក្នុងការដាក់បង្ខាំងឱ្យនៅដោយឡែកដើម្បីការពារមេរោគរយៈពេល 14ថ្ងៃទៀតផង។
ក្រៅពីនេះ អ្នកនាំពាក្យនៃក្រសួងការបរទេសចិនបានថ្លែងទៀតថា អ្វីដែលចិនមានតម្រូវការយ៉ាងបន្ទាន់បំផុតគឺ ឧបករណ៍ការពារខាងវេជ្ជសាស្ត្រ ទាំងម៉ាស់ការពារ ឈុតស្លៀកការពារ និងវ៉ែនតាការពារការឆ្លងមេរោគ តែយ៉ាងណាក៏ដោយ មានប្រទេសជាច្រើន ដែលរួមទាំងប្រទេសកូរ៉េខាងត្បូង ជប៉ុន កាហ្សាក់ស្ថាន និងហុងគ្រី បានបរិច្ចាគជួយឧបត្ថម្ភគ្រឿងវេជ្ជភណ្ឌដល់ចិនមួយចំណែកហើយ។
ខណៈដែលក្រសួងឧស្សាហកម្មរបស់ចិនបានបង្ហើបឱ្យដឹងថា រោងចក្រនៅក្នុងប្រទេសចិនដែលកំពុងដំណើរការផលិតយ៉ាងពេញទំហឹងនោះ អាចផលិតម៉ាស់អនាម័យបាន 1ថ្ងៃត្រឹមតែ 20លានសន្លឹកប៉ុណ្ណោះ ដោយមន្ត្រីក្នុងក្រសួងនេះបានបញ្ជាក់ទៀតថា រដ្ឋាភិបាលកំពុងបន្ថែមកូតាការនាំចូលម៉ាស់ការពារនេះពីអឺរ៉ុប ជប៉ុន និងអាមេរិកថែមទៀត៕
ប្រភព៖ សារព័ត៌មានបរទេស
February 4, 2020