សឿន សំណាង - La Reine Media

វៀតណាមសុំឱ្យកម្ពុជា ជួយតាមចាប់ជនសង្ស័យសម្លាប់មនុស្ស៥នាក់ បន្ទាប់ពីកម្លាំងចម្រុះ៥០០នាក់ មិនទាន់ចាប់បានជនសង្ស័យនេះ

កាលពីថ្ងៃទី7កុម្ភៈ ឆ្នាំ2020 នៅលើទំព័រ Facebook របស់សមត្ថកិច្ចកងរាជអាវុធហត្ថខេត្តស្វាយរៀង បានសរសេរថាសមត្ថកិច្ចវៀតណាម បានសុំសហការជាមួយសមត្ថកិច្ចកម្ពុជា និងបានប្រកាសស្វែងរកចាប់ខ្លួនជនសង្ស័យជាជនជាតិវៀតណាមម្នាក់ ដែលត្រូវអាជ្ញាធរអះអាងថា បានបាញ់សម្លាប់មនុស្សចំនួន5នាក់ នៅខណ្ឌ Cu Chi ជាយក្រុងហូជីមិញ (ព្រៃនគរ) ភាគខាងត្បូងប្រទេសវៀតណាម។

វៀតណាមប្រើកម្លាំងចម្រុះជាង 500នាក់ ឡោមព័ទ្ធចាប់បុរសម្នាក់ ដែលសង្ស័យថាបានសម្លាប់មនុស្ស5នាក់

កម្លាំងចម្រុះដែលវៀតណាមបញ្ជាឱ្យតាមចាប់ខ្លួនជនសង្ស័យ

កងរាជអាវុធហត្ថខេត្តស្វាយរៀង ក៏បានប្រកាសជូនដំណឹងដែលទាក់ទិននិងបញ្ហាខាងលើ ដល់កងកម្លាំងប្រដាប់អាវុធគ្រប់លំដាប់ថ្នាក់ រួមនឹងមន្ត្រីរាជការ និងប្រជាពលរដ្ឋទាំងអស់ ដែលរស់នៅតាមខេត្តជាប់បន្ទាត់ព្រំដែនកម្ពុជា-វៀតណាម។ ទំព័រ Facebook របស់សមត្ថកិច្ចកងរាជអាវុធហត្ថខេត្តស្វាយរៀងបន្តថា ជនសង្ស័យឈ្មោះ ឡេ ក្វុក ត្វឹន (Le Quoc Tuan) ហៅ ត្វឹន ឃី (Tuan Khi) ភេទប្រុស អាយុ33ឆ្នាំ កំពស់1,66ម៉ែត្រ ជនជាតិវៀតណាម បានប្រព្រឹត្តបទល្មើសឧក្រិដ្ឋ ដោយបានសម្លាប់មនុស្សចំនួន5នាក់ កាលពីថ្ងៃទី29មករា ឆ្នាំ2020 នៅខណ្ឌ Cu Chi ជាយក្រុងហូជីមិញ ប្រទេសវៀតណាម ហើយរត់គេចខ្លួនបាត់ពីកន្លែងកើតហេតុ។

ប្រភពព័ត៌មានពីប្រទេសវៀតណាមបានឱ្យដឹងថា ជនសង្ស័យខាងលើ បានបាញ់សម្លាប់មនុស្សចំនួន 4នាក់ ដោយសារមានជម្លោះក្នុងពេលលេងល្បែងស៊ីសង និងបានប្លន់យកលុយ នៅក្នុងឃុំ Tan Than Dong ជាយក្រុងព្រៃនគរ កាលពីថ្ងៃទី29មករា ឆ្នាំ2020។

កាមេរ៉ាសុវត្ថិភាព បានបង្ហាញថា ជនសង្ស័យ Le Quoc Tuan បានជិះម៉ូតូ ពាក់ម៉ាស់បាំងមុខ និងដាក់កាំភ្លើងនៅពីមុខ ជិះគេចខ្លួនពីកន្លែងកើតហេតុភ្លាមៗ។ ក្រោយមក ជននេះក៏បានបាញ់សម្លាប់មនុស្ស2នាក់ផ្សេងទៀត ព្រមទាំងបានប្លន់យកម៉ូតូរបស់អ្នកស្រុកផងដែរ ខណៈកងកម្លាំងប្រដាប់អាវុធចម្រុះប្រមាណជា500នាក់ ដែលរួមមាននគរបាល និងទាហានផង កំពុងឡោមព័ទ្ធទីតាំងដែលជនសង្ស័យនេះកំពុងលាក់ខ្លួន។

សារព័ត៌មាន Vnexpress បានរាយការណ៍ថា ជនសង្ស័យ Le Quoc Tuan ដែលមានកាំភ្លើង AK មួយដើមក្នុងដៃ មិនទាន់ត្រូវបានចាប់ខ្លួននៅឡើយ។ ជនសង្ស័យ Le Quoc Tuan គឺជាមន្ត្រីនគរបាលម្នាក់ដែលធ្វើការនៅមន្ទីរឃុំឃាំងបណ្ដោះអាសន្ននៃអធិការដ្ឋាននគរបាលសង្កាត់លេខ11 ដែលមានឋានន្តរស័ក្តិអនុសេនីយ៍ទោពិសេស(ស័ក្តិ2 ត្រៀមឡើងស័ក្តិ3)។ ជនសង្ស័យនេះ មានកូន2នាក់ និងជាមនុស្សញៀនល្បែងស៊ីសងរយៈពេលច្រើនឆ្នាំមកហើយ។

កាលពីថ្ងៃទី5កុម្ភៈ សមត្ថកិច្ចវៀតណាម បានអំពាវនាវឱ្យជងសង្ស័យ Le Quoc Tuan ចេញមកសារភាព ដើម្បីទទួលបានការសម្រាលទោសទៅតាមច្បាប់នៃប្រទេសនេះ។ បច្ចុប្បន្ន គេសង្ស័យថា ជននេះកំពុងលាក់ខ្លួននៅតាមបណ្ដោយព្រំដែនជាប់ជាមួយកម្ពុជា។ ដូច្នេះ សូមបងប្អូនដែលរស់នៅតាមបន្ទាត់ព្រំដែនកម្ពុជា-វៀតណាម មានការប្រុងប្រយ័ត្ន និងសូមរាយការណ៍ជាបន្ទាន់ បើសិនសង្ស័យថា មានមនុស្សចម្លែកដែលមានរូបរាងដូចក្នុងរូបថតនេះ ចូលក្នុងភូមិដ្ឋាន៕

February 8, 2020

អាជ្ញាធរចិន មិនបានសុំទោសចំពោះសពលោកវេជ្ជបណ្ឌិត Li Wenliang ដែលត្រូវមហាជនចាត់ទុកជា “វីរបុរសប្រឆាំងកូរ៉ូណា”

មន្ត្រីចិនមិនបានឆ្លើយតបទៅនឹងសំណួរដែលសួរថា “តើអាជ្ញាធរនឹងសុំទោសចំពោះការស្លាប់របស់លោកគ្រូពេទ្យ Li Wenliang ដែរ ឬអត់?” នោះទេ ផ្ទុយទៅវិញ គ្រាន់តែអានសេចក្ដីប្រកាសចូលរួមរំលែកទុក្ខប៉ុណ្ណោះ។

ក្នុងសន្និសីទសារព័ត៌មាននៅហុងកុងកាលពីម្សិលមិញ តំណាងក្រសួងការបរទេសចិនប្រចាំក្រុងហុងកុង លោក Xie Feng បានអានសេចក្ដីប្រកាសដ៏ខ្លីមួយដែលផ្ញើមកពីអាជ្ញាធរក្រុង Wuhan សម្ដែងការចូលរួមរំលែកទុក្ខដ៏ក្រៀមក្រំបំផុត ជាមួយក្រុមគ្រួសារនៃសពលោកវេជ្ជបណ្ឌិត Li Wenliang ដែលបានបាត់បង់ជីវិតកាលពីព្រឹកម្សិលមិញ (7កុម្ភៈ ឆ្នាំ2020) ដោយសារជំងឺរលាកសួតដែលបង្កឡើងដោយមេរោគកូរ៉ូណាប្រភេទថ្មី nCoV។

តំណាងក្រសួងការបរទេសចិន បានបន្តថា មេរោគកូរ៉ូាណា nCoV នេះ អាចត្រូវបានទប់ស្កាត់ និងព្យាបាលជាសះស្បើយ ហើយថា ការជឿជាក់នេះកើតចេញពីកម្លាំងនៃប្រព័ន្ធសុខាភិបាលប្រទេសចិន។ លោកក៏បានកោតសរសើរចំពោះល្បឿននៃប្រតិកម្មរបស់ក្រុងប៉េកាំងចំពោះអាសន្នរោគនេះ ខណៈដែលរដ្ឋអំណាចគ្រប់ជាន់ថ្នាក់ ត្រូវបានប្រមូលផ្ដុំ និងសាមគ្គីគ្នាជាធ្លុងមួយ។

សូមរំឭកថា អ្នកប្រើបណ្ដាញសង្គមនៅប្រទេសចិន បាននាំគ្នាសម្ដែងការស្ដាយស្រណោះចំពោះការចាកចេញដោយគ្មានថ្ងៃត្រឡប់របស់វេជ្ជបណ្ឌិត Li Wenliang ហើយថា អាជ្ញាធរនៅជំពាក់ពាក្យសុំទោសចំពោះគាត់។

Li Wenliang ត្រូវបានគេចាត់ទុកថា ជាមនុស្សម្នាក់ក្នុងចំណោមមនុស្សដំបូងគេដែលបានចែករំលែកព័ត៌មាន និងព្រមានអំពីអាសន្នរោគរលាកសួតដែលបង្កឡើងដោយមេរោគកូរ៉ូណា (nCoV) នៅប្រទេសចិន។ ក្នុងថ្ងៃទី30 ខែធ្នូ ឆ្នាំ2019 Li Wenliang បានផ្ញើសារចូលក្នុងក្រុម WeChat របស់គាត់ដែលមានមិត្តភក្ដិរបស់គាត់ 150នាក់ ដែលជាមិត្តចាស់។ គាត់បានព្រមានអំពីអ្នកជំងឺ 7នាក់ដែលបានឆ្លងមេរោគមួយប្រភេទដែលគាត់យល់ថា ដូចទៅនឹងមេរោគផ្លូវដង្ហើម SARS (Severe Acute Respiratory Syndrome) ដែលធ្លាប់បានកើតឡើងនៅប្រទេសចិនកាលពីឆ្នាំ2002 និងបានសម្លាប់មនុស្សប្រមាណជា800នាក់ នៅទូទាំងពិភពលោក។

បន្ទាប់ពីបែកធ្លាយសារខាងលើ ក្រុមមន្ត្រីសុខាភិបាលនៃក្រុង Wuhan បានកោះហៅលោកគ្រូ Li ដោយស្នើឱ្យគាត់និយាយអំពីមូលហេតុដែលគាត់បានចែករំលែកព័ត៌៌មាននេះ។ ថ្ងៃទី3មករា ក្រុមនគរបាលក៏បានហៅគាត់ទៅសួរនាំ ហើយបង្ខំឱ្យគាត់សន្យាថា “បានចែករំលែកព័ត៌មានមិនពិត ធ្វើឱ្យច្របូកច្របល់ក្នុងសង្គមជាតិ”។

បើទោះជាមានការខឹងសម្បាខ្លាំងពីមជ្ឈដ្ឋានទូទៅ មន្ត្រីតំណាងក្រសួងការបរទេសចិនលោក Xie Feng ក៏នៅតែមិនឆ្លើយតបនឹងសំណួរដែលសួរថា “តើអាជ្ញាធរនឹងសុំទោសចំពោះការស្លាប់របស់លោកគ្រូពេទ្យ Li Wenliang ដែរ ឬអត់?” ផ្ទុយទៅវិញ លោក Xie Feng គ្រាន់តែអានសេចក្ដីប្រកាសចូលរួមរំលែកទុក្ខតែប៉ុណ្ណោះ។

លោកគ្រូពេទ្យ Li Wenliang ដែលត្រូវមហាជនចិន ចាត់ទុកជាវីរបុរសប្រឆាំងអាសន្នរោគកូរ៉ូណា

លោក Xie Feng បានប្រកាសថា ពលរដ្ឋចិនមានសេរីភាពក្នុងការបញ្ចេញមតិ និងទទួលព័ត៌មានបានពេញលេញទៅតាមច្បាប់។ លោកថា ៖ “បើសិនប្រើអ៊ីនធើណិត អ្នកនឹងបានឃើញថា អ្នករាល់គ្នាអាចបញ្ចេញមតិអំពីបញ្ហាអាសន្នរោគដោយសេរី និងសកម្មបែបណា”។

សូមបញ្ជាក់ថា អាសន្នរោគកូរ៉ូណា បានចាប់ផ្ដើមឆ្លងរាលដាលតាំងពីចុងឆ្នាំ 2019 នៅក្រុង Wuhan ប្រទេសចិន ហើយមកទល់នឹងពេលនេះ អាសន្នរោគនេះ បានសម្លាប់មនុស្ស 724នាក់ និងអ្នកជំងឺ 6,106នាក់ផ្សេងទៀត កំពុងស្ថិតក្នុងស្ថានភាពគ្រោះថ្នាក់ដល់ជីវិត៕

ប្រភព៖ សារព័ត៌មានបរទេស

February 8, 2020

អ្នកស្លាប់ដោយសារអាសន្នរោគកូរ៉ូណា កើនដល់724នាក់ ខណៈអ្នកផ្ទុកមេរោគដែលស្ថិតក្នុងស្ថានភាពអាសន្ន កើនដល់ 6,106នាក់

មនុស្សចំនួន 86នាក់បន្ថែមទៀតហើយបានស្លាប់ដោយសារអាសន្នរោគកូរ៉ូណា។ ចំនួននេះកើនឡើង 13,4% បើធៀបនឹងចំនួនអ្នកស្លាប់កាលពីម្សិលមិញ។ ករណីស្លាប់បន្ថែមនេះ បានធ្វើឱ្យចំនួនអ្នកស្លាប់សរុបកើនដល់ 724នាក់។

គណៈកម្មការសុខាភិបាលខេត្ត Hubei ព្រឹកនេះបានបញ្ជាក់ថា មានអ្នកស្លាប់បន្ថែម 81នាក់ គឺច្រើនជាង12នាក់ បើធៀបនឹងម្សិលមិញ។ ប្រការនេះ បានបង្កើនចំនួនអ្នកស្លាប់ដោយសារមេរោគកូរ៉ូណាថ្មីនៅក្នុងខេត្តនេះ ឡើងដល់ 699នាក់។

ខេត្ត Hubei ក៏បានរកឃើញអ្នកឆ្លងមេរោគថ្មីនេះបន្ថែម 2,841ករណី នាំឱ្យចំនួនអ្នកឆ្លងសរុបក្នុងខេត្តនេះ ឡើងដល់ 24,953នាក់។

គណៈកម្មការសុខាភិបាលចិនឯណោះវិញ ក៏បានប្រកាសថា ចំនួនអ្នកស្លាប់បន្ថែមនៅទូទាំងប្រទេសចិនដីគោក គឺ 86នាក់។ ចំនួននេះ បានធ្វើឱ្យអ្នកស្លាប់សរុបនៅទូទាំងពិភពលោក កើនដល់ 722នាក់។ ចំណែកអ្នកឆ្លងថ្មី មានចំនួន 3,385នាក់ ធ្វើឱ្យអ្នកឆ្លងសរុបនៅចិនដីគោក ឡើងដល់ 34,546នាក់។

ដូច្នេះ គិតមកដល់ពេលនេះ នៅទូទាំងពិភពលោក មានអ្នកស្លាប់សរុប 724នាក់ រួមទាំងអ្នកស្លាប់ម្នាក់នៅហ្វីលីពីន និងម្នាក់នៅហុងកុង។ ចំណែកអ្នកឆ្លងសរុបទូទាំងពិភពលោកក៏កើនឡើងដល់ 34,879នាក់ ក្នុងនោះមាន 6,106នាក់កំពុងស្ថិតក្នុងស្ថានភាពអាសន្នបំផុត៕

ប្រភព៖ សារព័ត៌មានបរទេស

February 8, 2020

ប្រជាជនចិនកំពុងអាណិត ស្រណោះ “អ្នកក្លាហានដំបូងគេ ដែលបានព្រមានអំពីអាសន្នរោគកូរ៉ូណា”

អ្នកប្រើបណ្ដាញសង្គមនៅប្រទេសចិន បាននាំគ្នាសម្ដែងការស្ដាយស្រណោះចំពោះការចាកចេញដោយគ្មានថ្ងៃត្រឡប់របស់វេជ្ជបណ្ឌិត Li Wenliang ហើយថា អាជ្ញាធរនៅជំពាក់ពាក្យសុំទោសចំពោះគាត់។

មន្ទីរពេទ្យធំរបស់ក្រុង Wuhan កាលពីព្រឹកមិញ បានបញ្ជាក់នៅលើទំព័រ Weibo របស់ខ្លួនថា វេជ្ជបណ្ឌិត Li Wenliang អាយុ34ឆ្នាំ ដែលជាមនុស្សម្នាក់ក្នុងចំណោមមនុស្សដែលបានបញ្ចេញសារព្រមានអំពីអាសន្នរោគរលាកសួតថ្មី ពិតជាបានបាត់បង់ជីវិតនៅវេលាម៉ោង2និង58នាទី (ប្រហែលម៉ោង2 នៅភ្នំពេញ) ក្រោយពីបានប្រយុទ្ធនឹងជំងឺរលាកសួត nCoV អស់មួយរយៈពេលមកនេះ។

ព័ត៌មានស្ដីអំពីការស្លាប់របស់គ្រូពេទ្យខាងលើនេះត្រូវបានសារព័ត៌មាន Global Times ដែលគ្រប់គ្រងដោយទីភ្នាក់ងារសារព័ត៌មាន People’s Daily (អ្នកនាំពាក្យផ្លូវការរបស់បក្សកុម្មុយនីសចិន) បានបង្ហោះសារដំបូងនៅលើបណ្ដាញសង្គម Twetter កាលពីវេលាម៉ោងប្រហែល20និង40នាទីនៃថ្ងៃទី6កុម្ភៈកន្លងទៅ។ មិត្តភក្ដិ និងក្រុមគ្រូពេទ្យនៅមន្ទីរពេទ្យ Wuhan ប្រាប់ថា ការស្លាប់របស់់គ្រូពេទ្យ Li Wenliang គឺបណ្ដាលមកពីជំងឺរលាកសួតដែលបង្កឡើងដោយមេរោគកូរ៉ូណា nCoV នេះបើតាមសារព័ត៌មាន Global Times។

បន្ទាប់ពីការបានបង្ហោះសារដំបូងនៅលើបណ្ដាញសង្គម Twetter ត្រឹមតែប៉ុន្មាននាទីប៉ុណ្ណោះ អ្នកលេងបណ្ដាញសង្គមរាប់ពាន់នាក់បានបញ្ចេញមតិសោកស្ដាយ និងអាណិតអាសូរចំពោះការស្លាប់របស់វេជ្ជបណ្ឌិតរូបនេះ។

អ្នកលេងបណ្ដាញសង្គមម្នាក់បញ្ចេញមតិនៅខាងក្រោមសេចក្ដីប្រកាសរបស់មន្ទីរពេទ្យក្រុង Wuhan ថា ៖ “យើងខ្ញុំនឹងចងចាំមិនភ្លេចចំពោះលោកគ្រូពេទ្យដែលបានបញ្ចេញព័ត៌មានដំបូងគេទាក់ទិននឹងអាសន្នរោគនេះ ហើយដែលត្រូវគេចាត់ទុកថាជាព័ត៌មានមិនពិត។ តើយើងខ្ញុំអាចធ្វើអ្វីបានខ្លះ? ប្រការដែលយើងខ្ញុំអាចធ្វើបាននោះគឺមិនភ្លេចគាត់”។

Hashtag “គ្រូពេទ្យ Li បាត់បង់ជីវិត” ភ្លាមនោះ ទទួលបានការចូលមើល និងការបញ្ចេញមតិរាប់លានដង នៅលើបណ្ដាញសង្គម Weibo។ ប៉ុន្តែប៉ុន្មានម៉ោងក្រោយមក អត្ថបទដែលបានបង្ហោះនៅលើគណនី Twitter របស់ Global Times ក៏ត្រូវបានគេលុបចោល។ ទំព័រសារព័ត៌មានផ្សេងៗរបស់រដ្ឋចិន ក៏បានលុបចោលព័ត៌មានដែលទាក់ទិននឹងការស្លាប់របស់វេជ្ជបណ្ឌិតវ័យក្មេង ដោយមិនមានការបកស្រាយអ្វីទាំងអស់។

អង្គការសុខភាពពិភពលោក WHO ដំបូងក៏បានសម្ដែងការសោកស្ដាយចំពោះវេជ្ជបណ្ឌិត Li Wenliang នៅលើទំិព័រ Twetter ៖ “យើងខ្ញុំពិតជាក្ដុកក្ដួលចំពោះមរណភាពរបស់វេជ្ជបណ្ឌិត Li Wenliang។ យើងទាំងអស់គ្នាត្រូវតែលើកតម្កើងកិត្តិយសនៃកិច្ចការដែលគាត់បានធ្វើ ទាក់ទិននឹង #nCoV2019″។ ប៉ុន្តែ ក្រោយមក មិនដឹងមានមូលហេតុអ្វី WHO ក៏បានកែប្រែអត្ថបទរបស់ខ្លួន ដោយសរសេរថា ពួកគេពុំមានព័ត៌មានអ្វីស្ដីអំពីស្ថានភាពរបស់លោក Li Wenliang នោះឡើយ។

មនុស្សជាច្រើនកំពុងតែសង្ឃឹមទៅលើអព្ភូតហេតុដ៏អស្ចារ្យមួយកើតឡើង ខណៈដែលមន្ទីរពេទ្យធំរបស់ក្រុង Wuhan កាលពីវេលាម៉ោង 00និង45នាទី ថ្ងៃទី7កុម្ភៈ ប្រកាសថា គ្រូពេទ្យ Li “កំពុងស្ថិតក្នុងស្ថានភាពគ្រោះថ្នាក់” ប៉ុន្តែ មិនទាន់បាត់បង់ជីវិតដូចការរាយការណ៍របស់សារព័ត៌មាននោះទេ។

“យប់នេះ ពួកយើងមិនដេកនោះទេ ពួកយើងគឺនៅរង់ចាំអព្ភូតហេតុ។ យប់នេះយើងខ្ញុំមិនបាច់ដេកទេ ប៉ុន្តែ Li Wenliang ត្រូវតែរស់”។

មនុស្សជាច្រើនបានបញ្ចេញមតិនៅលើគណនីបណ្ដាញសង្គម Weibo របស់លោកគ្រូ Li ដោយបួងសួងឱ្យគាត់អាចបន្តបង្ហោះសារនៅលើទំព័ររបស់គាត់តទៅទៀត។ ប្រហែល 2ម៉ោងក្រោយការប្រកាសលើកទីមួយរបស់មន្ទីរពេទ្យធំនៅក្រុង Wuhan មន្ទីរពេទ្យនេះបានចេញសេចក្ដីប្រកាសជាលើកទីពីរ។ អព្ភូតហេតុដែលមនុស្សគ្រប់គ្នាកំពុងរង់ចាំ ពេលនេះមិនបានកើតសោះឡើយ។ មន្ទីរពេទ្យធំនៃក្រុង Wuhan បានបញ្ជាក់ថា លោកគ្រូពេទ្យ Li បានបាត់បង់ជីវិតក្រោយការប្រកាសព័ត៌មានលើកទីមួយ។

“អ្នកដែលរក្សាអណ្ដាតភ្លើងឱ្យហ្វូងមនុស្ស នឹងក្លាយជាមនុស្សដែលស្លាប់កកប្រាណ ព្រោះតែខ្យល់ និងព្រឹល” អ្នកលេងបណ្ដាញសង្គម នាំគ្នាចែករំលែកតៗគ្នានូវពាក្យមួយឃ្លានេះ ដើម្បីសម្ដែងការសោកស្ដាយចំពោះការលាចាកលោករបស់លោកគ្រូពេទ្យ Li Wenliang។

ប្រធានបទ ” អាជ្ញាធរក្រុង Wuhan នៅជំពាក់ពាក្យសុំទោសលោកគ្រូ Li Wenliang” ដែលគេយកមកជជែកគ្នានៅលើបណ្ដាញសង្គមចិន Weibo បានទាក់ទាញចំណាប់អារម្មណ៍អ្នកប្រើប្រាស់អ៊ីនធើណិតរាប់ម៉ឺននាក់ចូលមកបញ្ចេញមតិ មុនពេលប្រធានបទនេះត្រូវបានលុបចេញ។

“មនុស្សពេញវ័យជាច្រើននឹងដឹងខ្លួនបន្ទាប់ពីយប់នេះ ៖ ពិភពលោកមិនស្រស់ស្អាតដូចអ្វីដែលយើងបានស្រមៃនោះទេ។ អ្នកទាំងអស់មានការខឹងសម្បាខ្លាំងដែរទេ បើសិនអ្នកណាម្នាក់ក្នុងចំណោមពួកយើង មានសំណាងគ្រប់គ្រាន់ក្នុងការបញ្ចេញមតិដើម្បីអនាគតសង្គម? សូមមេត្តាធានាឱ្យបានប្រាកដថា អ្នកទាំងអស់គ្នានឹងចងចាំការខឹងសម្បានាយប់នេះ” នេះគឺជាមតិមួយដែលត្រូវគេយកចិត្តទុកដាក់ច្រើនបំផុត ក្នុងចំណោមមតិដែលត្រូវបានបង្ហោះនៅខាងក្រោមសេចក្ដីប្រកាសរបស់មន្ទីរពេទ្យធំ Wuhan។

Li Wenliang ត្រូវបានគេចាត់ទុកថា ជាមនុស្សម្នាក់ក្នុងចំណោមមនុស្សដំបូងគេដែលបានចែករំលែកព័ត៌មាន និងព្រមានអំពីអាសន្នរោគរលាកសួតដែលបង្កឡើងដោយមេរោគកូរ៉ូណា (nCoV) នៅប្រទេសចិន។ ក្នុងថ្ងៃទី30 ខែធ្នូ ឆ្នាំ2019 Li Wenliang បានផ្ញើសារចូលក្នុងក្រុម WeChat របស់គាត់ដែលមានមិត្តភក្ដិរបស់គាត់ 150នាក់ ដែលជាមិត្តចាស់។ គាត់បានព្រមានអំពីអ្នកជំងឺ 7នាក់ដែលបានឆ្លងមេរោគមួយប្រភេទដែលគាត់យល់ថា ដូចទៅនឹងមេរោគផ្លូវដង្ហើម SARS (Severe Acute Respiratory Syndrome) ដែលធ្លាប់បានកើតឡើងនៅប្រទេសចិនកាលពីឆ្នាំ2002 និងបានសម្លាប់មនុស្សប្រមាណជា800នាក់ នៅទូទាំងពិភពលោក។

សាររបស់លោកគ្រូ Li បានទាក់ទាញចំណាប់អារម្មណ៍របស់ក្រុមមន្ត្រីអាជ្ញាធរក្រុង បន្ទាប់ពីមនុស្សម្នាក់ក្នុងក្រុមរបស់គាត់ បានបង្ហោះរូបភាពនៃការជជែករបស់ពួកគេនៅលើបណ្ដាញសង្គម។ ក្រោយមកទៀត គ្រូពេទ្យ7នាក់ដែលស្ថិតក្នុងក្រុមជជែករបស់លោកគ្រូ Li ក៏បានចែករំលែកព័ត៌មាននេះទៅកាន់ក្រុមជជែកចំនួន3ផ្សេងទៀត។

នៅក្នុងយប់ដដែលនោះ ក្រុមមន្ត្រីសុខាភិបាលនៃក្រុង Wuhan បានកោះហៅលោកគ្រូ Li ដោយស្នើឱ្យគាត់និយាយអំពីមូលហេតុដែលគាត់បានចែករំលែកព័ត៌៌មាននេះ។ ថ្ងៃទី3មករា ក្រុមនគរបាលបានហៅគាត់ទៅសួរនាំ ហើយបង្ខំឱ្យគាត់សន្យាថា “បានចែករំលែកព័ត៌មានមិនពិត ធ្វើឱ្យច្របូកច្របល់ក្នុងសង្គមជាតិ”។

ថ្ងៃទី8មករា លោកគ្រូ Li បានពិនិត្យសុខភាពអ្នកជំងឺកូរ៉ូណាម្នាក់។ ពីរថ្ងៃក្រោយមក លោកគ្រូ Li ចាប់ផ្ដើមមានអាការក្អក និងពិបាកដកដង្ហើម ប៉ុន្តែ ការពិនិត្យជាច្រើនលើកបង្ហាញថា គាត់មិនមានផ្ទុកមេរោគកូរ៉ូណា nCoV នោះទេ។ យ៉ាងនេះក្ដី គាត់នៅតែនៅឆ្ងាយពីប្រពន្ធដែលកំពុងមានផ្ទៃពោះ និងកូនតូចរបស់គាត់។ ឪពុកម្ដាយរបស់គាត់ក៏កំពុងសម្រាកព្យាបាលដោយសារជំងឺគ្រុនក្ដៅ ប៉ុន្តែ ពេលនេះមិនដឹងថា ពួកគេបានឆ្លងមេរោគនេះដែរឬយ៉ាងណា? សារព័ត៌មានក្នុងស្រុកមួយចំនួន ចេញផ្សាយថា ប្រពន្ធរបស់គាត់ក៏បានឆ្លងមេរោគនេះដែរ។

ថ្ងៃទី12មករា គ្រូពេទ្យ Li បានចូលសម្រាកព្យាបាលក្នុងមន្ទីរពេទ្យ ហើយថ្ងៃទី1កុម្ភៈ គាត់ត្រូវគេបញ្ជាក់ថា មានផ្ទុកមេរោគកូរ៉ូណា។ នៅក្នុងសំណេរចុងក្រោយនៅលើគណនី Weibo លោកគ្រូ Li រៀបរាប់អំពីស្ថានភាពជំងឺរបស់គាត់ ហើយទទួលបានមតិរាប់ម៉ឺនដែលបង្ហាញការអាណិតអាសូរចំពោះគាត់។

ក្នុងចំណោមមតិទាំងនោះ គេឃើញមានមតិមួយដែលទទួលបានការចុចចូលចិត្តជាង 100,000លើក ដោយបានសរសេរថា ៖ “លោកគ្រូ Li លោកជាគ្រូពេទ្យដែលល្អ និងមានបេះដូង”។

មនុស្សម្នាក់ទៀត បានហៅលោកគ្រូ Li ថាជាមនុស្សម្នាក់ក្នុងចំណោម “ព្យាការី” ទាំង8រូប ៖ “ប្រជាជនទូទាំងប្រទេស រួមគ្នាសាមគ្គីជាមួយលោក”។

តុលាការកំពូលចិន កាលពីថ្ងៃទី28មករា បានបង្ហោះសារនៅលើបណ្ដាញសង្គម រិះគន់ទៅលើចំណាត់ការរបស់មន្ត្រីនៅ Wuhan ដែលបានចោទប្រកាន់លោកគ្រូ Li និងក្រុមគ្រូពេទ្យមួយចំនួនទៀតថាបានចែករំលែកព័ត៌មានចចាមអារ៉ាម។ មានឃ្លាមួយសរសេរថា “បើសិនសាធារណជនស្ដាប់ “ពាក្យចចាមអារ៉ាម” នោះ ហើយអនុវត្តវិធានការទប់ស្កាត់ ដូចជាពាក់ម៉ាសការពារ ឬសម្អាតមេរោគ និងជៀសវាងការទៅកាន់ផ្សារលក់សត្វរស់ជាដើម ប្រាកដជាអាចទប់ស្កាត់ការឆ្លងរាលដាលនៃមេរោគនេះបាន”៕

ប្រភព៖ សារព័ត៌មានបរទេស

February 7, 2020

លោកវេជ្ជបណ្ឌិត លី អ្នកប្រកាសអាសន្នពីវីរុសកូរ៉ូណាដំបូងគេ បានស្លាប់ហើយ ដោយសារមេរោគវីរុសកូរ៉ូណា

Global Times ប្រព័ន្ធផ្សព្វផ្សាយផ្លូវការរបស់ចិន បានរាយការណ៍កាលពីថ្ងៃទី6 កុម្ភៈម្សិលមិញថា លោកវេជ្ជបណ្ឌិតលី វឹនលៀង អាយុ 34ឆ្នាំ ដែលឆ្លងមេរោគវីរុសកូរ៉ូណាប្រភេទថ្មី និងធ្លាក់ខ្លួនឈឺធ្ងន់នោះ បានស្លាប់បាត់បង់ជីវិតហើយកាលពីព្រលប់ថ្ងៃព្រហស្បតិ៍ ទី6 កុម្ភៈ។

លោកវេជ្ជបណ្ឌិត លី វឹនលៀង ជាមន្ត្រីម្នាក់ក្នុងចំណោមមន្ត្រីពេទ្យ 8នាក់ដែលត្រូវមន្ត្រីនគរបាលក្នុងតំបន់រិះគន់ថា បានផ្សព្វផ្សាយព័ត៌មានចចាមអារ៉ាមម ក្រោយពីពួកគាត់បានក្លាយជាអ្នកផ្សព្វផ្សាយដំណឹង និងព្យាយាមប្រាប់ទៅគ្រូពេទ្យដទៃទៀតអំពីការឆ្លងរាលដាលនៃមេរោគវីរុសកូរ៉ូណាប្រភេទថ្មី តាំងពីចុងខែធ្នូ ឆ្នាំកន្លងទៅ មុនពេលដែលខ្លួនឯងបានឆ្លងមេរោគនេះ និងធ្លាក់ខ្លួនឈឺកាលពីចុងខែមករាកន្លងទៅ។

កាលពីពេលមុននេះ សារព័ត៌មានចិនបានរាយការណ៍នៅថ្ងៃទី30 ធ្នូ ឆ្នាំទៅថា លោកវេជ្ជបណ្ឌិត លី បានផ្ញើដំណឹងទៅមិត្តរួមការងារពាក់ព័ន្ធនឹងស្ថានការណ៍ការឆ្លងរាលដាលនៃមេរោគនៅក្នុងផ្សារលក់អាហារសមុទ្រស្រស់ក្នុងទីក្រុងវូហាន ដោយសារតែគាត់បានឃើញលទ្ធផលនៃការពិសោធរបស់អ្នកជំងឺជាច្រើននៅពេលនោះ ដែលគាត់ជឿជាក់ថា ជាមេរោគវីរុសមួយដែលស្រដៀងនឹងមេរោគសារស៍។ គាត់ក៏បញ្ជូនដំណឹងទៅដាស់តឿនមិត្តរួមការងារ ដើម្បីឱ្យពួកគេយកចិត្តទុកដាក់ក្នុងការការពារ។

មិនយូរប៉ុន្មាន បន្ទាប់ពីនោះ គាត់ក៏បានទទួលការព្រមានពីស្នងការដ្ឋានប៉ូលិសក្នុងតំបន់ ដែលបានចោទប្រកាន់គាត់ថា “បានផូស្តរឿងកុហកតាមប្រព័ន្ធបណ្ដាញសង្គម”។ ការិយាល័យសន្តិសុខសាធារណៈ បានកោះហៅរូបគាត់ និងសុំឱ្យគាត់ចុះហត្ថលេខាទទួលយកការព្រមាន និងបានព្រមានគាត់យ៉ាងធ្ងន់ធ្ងរថា គាត់នឹងត្រូវទទួលទោសតាមច្បាប់ បើគាត់មិនប្រតិបត្តិតាមការណែនាំរបស់រដ្ឋបាលក្នុងតំបន់វូហាននេះ។

លោកវេជ្ជបណ្ឌិត លី វឹនលៀង បានតវ៉ាថា “សង្គមដែលរឹងមាំ មិនគួរមានសំឡេងតែមួយ”។

លោកវេជ្ជបណ្ឌិតលី វឹនលៀង ជាមនុស្សម្នាក់ ក្នុងចំណោម 8នាក់ ដែលជា “អ្នកធ្វើខុស” ក្នុងបទចោទថា បាន “បង្កើត និងផ្សព្វផ្សាយព័ត៌មានក្លែងក្លាយ ធ្វើឱ្យមានការភ្ញាក់ផ្អើលក្នុងសង្គម”។

រហូតដល់ថ្ងៃទី1 កុម្ភៈកន្លងទៅ លោកវេជ្ជបណ្ឌិត លី វឹនលៀង បានសម្រេចចិត្តប្រកាសលទ្ធផលរបស់ខ្លួនដែលបានឆ្លងមេរោគវីរុសកូរ៉ូណា ព្រមជាមួយលទ្ធផលបញ្ជាក់ការវិនិច្ឆ័យថា គាត់កំពុងតែឈឺធ្ងន់ និងកំពុងតែទ្រាំទ្រយ៉ាងលំបាកជាមួយជំងឺរលាកសួតដោយមេរោគវីរុស និងបាននិយាយថា “បើសិនជាខ្ញុំជាសះស្បើយ ខ្ញុំក៏នឹងនៅតែត្រឡប់ទៅសមរភូមិមុខ ប្រយុទ្ធនឹងមេរោគដែលនៅតែរាតត្បាតនោះតទៅទៀត ខ្ញុំនឹងមិនក្លាយជាទាហានដែលរត់ចោលជួរជាដាច់ខាត”។

លោកវេជ្ជបណ្ឌិត លី វឹនលៀង បានស្លាប់កាលពីពេលព្រលប់ នៃថ្ងៃព្រហស្បតិ៍ ទី6 កុម្ភៈ(ម្សិលមិញ) ក្រោយពីបានតស៊ូជាមួយអំឡុងពេលវិបត្តិរបស់ជំងឺអស់រយៈពេល 5ថ្ងៃ៕

ប្រភព៖ សារព័ត៌មានបរទេស

February 7, 2020

កិច្ចប្រជុំមួយនៅសិង្ហបុរី ត្រូវគេសង្ស័យថា បានធ្វើឱ្យមេរោគកូរ៉ូណា ឆ្លងរាលដាលទៅប្រទេសជាច្រើនក្នុងពិភពលោក

យ៉ាងហោចណាស់មានជនជាតិកូរ៉េខាងត្បូង និងម៉ាឡេស៊ី 3នាក់ បានឆ្លងមេរោគកូរ៉ូណាប្រភេទថ្មី nCoV បន្ទាប់ពីបានត្រឡប់មកពីចូលរួមកិច្ចប្រជុំមួយនៅសិង្ហបុរី ដែលនេះនាំឱ្យ WHO ចាប់ផ្ដើមធ្វើការស្រាវជ្រាវ។

អង្គការសុខភាពពិភពលោក (WHO) កំពុងសហការជាមួយស្ថាប័នសុខាភិបាលនៃបណ្ដាប្រទេសដើម្បីស្រាវជ្រាវទៅលើកិច្ចប្រជុំរបស់ក្រុមហ៊ុនពហុជាតិមួយដែលបានធ្វើឡើងនៅសិង្ហបុរី កាលពីខែមករា ឆ្នាំ2020។ កិច្ចប្រជុំនេះត្រូវគេសង្ស័យថា បានធ្វើឱ្យមេរោគកូរ៉ូណាប្រភេទថ្មី (nCoV) ឆ្លងរាលដាលទៅប្រទេសជាច្រើនក្នុងពិភពលោកតាមរយៈអ្នកដែលបានចូលរួមកិច្ចប្រជុំនោះ។

កិច្ចប្រជុំខាងលើ ត្រូវក្រុមហ៊ុនមួយនោះ រៀបចំឡើងនៅក្នុងសណ្ឋាគារ Grand Hayatt ចាប់ពីថ្ងៃទី20 ដល់ 22មករា ឆ្នាំ2020 ដោយមានការចូលរួមរបស់បុគ្គលិក 94នាក់ មកពីបណ្ដាប្រទេសផ្សេងៗ និងបុគ្គលិកជនជាតិសិង្ហបុរី 15នាក់ផងដែរ។ បន្ទាប់ពីម៉ាឡេស៊ី និងកូរ៉េខាងត្បូងបានបញ្ជាក់ថា បុគ្គលិក3នាក់នៃក្រុមហ៊ុននោះ មានផ្ទុកមេរោគកូរ៉ូណា (nCoV) ក្រោយពីត្រឡប់មកពីចូលរួមកិច្ចប្រជុំ ក្រសួងសុខាភិបាលសិង្ហបុរីក៏បានបង្ហើបឱ្យដឹងថា ជនជាតិសិង្ហបុរី4នាក់ដែលបានចូលរួមក្នុងកិច្ចប្រជុំនោះដែរ បានចាប់ផ្ដើមមានរោគសញ្ញានៃជំងឺរលាកសួតថ្មី nCoV។

មន្ត្រីសិង្ហបុរី មិនបានបង្ហើបឱ្យដឹងអំពីឈ្មោះក្រុមហ៊ុន ឬវិស័យដែលក្រុមហ៊ុនបានបើកកិច្ចប្រជុំនោះកំពុងរកស៊ីនោះទេ។

អ្នកនាំពាក្យ WHO លោក Olivia Lawe-Davies បានឱ្យដឹងថា ៖ “នៅពេលដែលបណ្ដាប្រទេសទាំងអស់ នាំគ្នារឹតបន្តឹងវិធានការគ្រប់គ្រងអាសន្នរោគ ករណីឆ្លងក្នុងសហគមន៍អាចនឹងត្រូវរកឃើញច្រើនក្នុងពេលខាងមុខ”។

ក្រុមមន្ត្រីសុខាភិបាលម៉ាឡេស៊ី បានឱ្យដឹងថា កិច្ចប្រជុំខាងលើនោះ ក៏មានការចូលរួមពីបុគ្គលិកជាច្រើននាក់មកពីប្រទេសចិន ក្នុងនោះមានម្នាក់មកពីក្រុង Wuhan ដែលជាសម្បុកមេរោគរលាកសួតកូរ៉ូណាប្រទេស nCoV ដែលបានផ្ទុះឆ្លងរាលដាលចាប់ពីខែធ្នូ ឆ្នាំ2019 ហើយបច្ចុប្បន្ន មេរោគនេះបានសម្លាប់មនុស្សចំនួន 638នាក់ នៅទូទាំងពិភពលោក។

ម៉ាឡេស៊ី បានដឹងអំពីករណីនេះ បន្ទាប់ពីពួកគេបានរកឃើញពលរដ្ឋម៉ាឡេស៊ីម្នាក់ អាយុ 41ឆ្នាំ បានឆ្លងមេរោគកូរ៉ូណា nCoV ក្រោយពីបានទៅចូលរួមកិច្ចប្រជុំមួយ ជាមួយនឹងមិត្តរួមការងារជាជនជាតិចិនច្រើននាក់ផ្សេងទៀត។

ប្រទេសកូរ៉េខាងត្បូងវិញ បានបញ្ជាក់ថា ពលរដ្ឋរបស់ខ្លួន2រូបដែលបានឆ្លងមេរោគ nCoV ក៏ធ្លាប់បានទៅចូលរួមកិច្ចប្រជុំមួយនោះដែរ។ យោងតាមសារព័ត៌មានកូរ៉េខាងត្បូង អ្នកដែលបានចូលរួមក្នុងកិច្ចប្រជុំនោះ បានទទួលទានអាហារជាមួយគ្នាផងដែរ។

ពលរដ្ឋសិង្ហបុរី4នាក់ដែលមានរោគសញ្ញារលាកសួតកូរ៉ូណា ក្រោយពីត្រឡប់មកពីកិច្ចប្រជុំនោះ បានត្រូវបញ្ជូនទៅកាន់មជ្ឈមណ្ឌលជំងឺឆ្លងជាតិ នេះបើតាមក្រសួងសុខាភិបាលសិង្ហបុរី។ ក្រសួងនេះបន្ថែមថា ជនជាតិបរទេសទាំងអស់ដែលបានមកចូលរួមកិច្ចប្រជុំនោះ បានចាកចេញពីសិង្ហបុរីទៅហើយ៕

ប្រភព៖ សារព័ត៌មានបរទេស

February 7, 2020

បេះដូងឪពុក…មន្ត្រីចិនម្នាក់លាកូនស្រីទើបនឹងកើត មុនធ្វើដំណើរទៅតតាំងសង្គ្រាមមេរោគនៅ “វូហាន”

នៅថ្ងៃទី7 កុម្ភៈនេះ ទីភ្នាក់ងារសារព័ត៌មានស៊ីនហួ បានចុះផ្សាយរឿងរ៉ាវដ៏សែនរំជួលចិត្ត នៅពេលដែលកូនស្រីរបស់លោក ហាវ ធៀនតាន់ សមាជិកម្នាក់ក្នុងក្រុមគ្រូពេទ្យឈុតទី3 នៃមណ្ឌលសានស៊ី ដែលបានធ្វើដំណើរឆ្ពោះទៅមណ្ឌលហ៊ូពេយកាលពីថ្ងៃពុធ ទី5 ដើម្បីទៅរួមអន្តរាគមន៍ក្នុងភារកិច្ចតស៊ូជាមួយមេរោគវីរុសកូរ៉ូណាប្រភេទថ្មី ទើបតែប្រសូតចេញមកបើកភ្នែកមើលពិភពលោកបានត្រឹមតែ 2ថ្ងៃប៉ុណ្ណោះ។

ចាង សៃហុង ភរិយារបស់ ហាវ ធៀនតាន់ ក៏ជាមន្ត្រីម្នាក់ក្នុងក្រុមមន្ត្រីពេទ្យដូចគ្នាដែរ ទោះជានាងកំពុងស្ថិតក្នុងអំឡុងពេលសម្រាកស្ដារកម្លាំងក្រោយពេលឆ្លងទន្លេក្ដី តែក៏នាងនៅតែនិយាយយ៉ាងម៉ឺងម៉ាត់ថា “បងទៅចុះ…មិនបាច់បារម្ភទេ…នៅផ្ទះយើងនៅមានអូនម្នាក់ទៀតដែរ…”

ហាវ បានពោលពាក្យលាភរិយា និងកូនស្រីអាយុ 2ថ្ងៃរបស់គេ និងបើទោះជានៅស្ទាក់ស្ទើរដែលចាំបាច់ត្រូវតែបែកពីកូន និងភរិយាជាទីស្រឡាញ់ក៏ដោយ តែក៏រូបគេជឿជាក់ថា កូនស្រីរបស់គេនឹងមានមោទនភាពខ្លាំងណាស់ចំពោះរូបគេ នៅពេលដែលនាងធំធាត់ឡើង…។

ប្រភព៖ សារព័ត៌មានបរទេស

February 7, 2020

រកឃើញអ្នកផ្ទុកមេរោគកូរ៉ូណា 41នាក់បន្ថែមទៀត នៅលើកប៉ាល់ទេសចរណ៍យក្សរបស់ជប៉ុន

កប៉ាល់ទេសចរណ៍យក្ស Diamond Princess ដែលតម្រូវឱ្យចូលចតនៅឯកំពង់ផែ Yokohamn បានរកឃើញអ្នកឆ្លងមេរោគកូរ៉ូណាចំនួន41នាក់បន្ថែមទៀត ធ្វើឱ្យចំនួនអ្នកជំងឺនៅលើកប៉ាល់នេះ កើនដល់ 61នាក់ នេះបើតាមការចុះផ្សាយរបស់សារព័ត៌មាន AFP។

“លទ្ធផលនៃការពិនិត្យរកមេរោគកូរ៉ូណានៅលើភ្ញៀវទេសចចំនួន 171នាក់ បានបង្ហាញថា មាន41នាក់មានផ្ទុកមេរោគនេះ។ ថ្ងៃនេះ ពួកគេនឹងត្រូវបញ្ជូនទៅកាន់មន្ទីរពេទ្យ ហើយយើងខ្ញុំកំពុងរៀបចំសម្រាប់កិច្ចការនេះ។ ជាសរុប ក្នុងចំណោមអ្នកទេសចរ 273នាក់ដែលបានធ្វើតេស្ត យើងបានរកឃើញ61នាក់មានផ្ទុកមេរោគកូរ៉ូណា” នេះបើតាមការឱ្យដឹងរបស់រដ្ឋមន្ត្រីក្រសួងសុខាភិបាលជប៉ុន លោក Katsunobu Kato ដែលបានចុះផ្សាយដោយសារព័ត៌មាន Tokyo នៅព្រឹកនេះ។

ក្រុមមន្ត្រីសុខាភិបាលជប៉ុន បានចាប់ផ្ដើមធ្វើតេស្តរកមេរោគនៅលើអ្នកដំណើរ 3,700នាក់ និងក្រុមនាវិកទាំងអស់នៅលើកប៉ាល់ទេសចរណ៍យក្ស Diamond Princess ដែលគ្រប់គ្រងដោយក្រុមហ៊ុន Carnival Japan Inc បន្ទាប់ពីមានអ្នកដំណើរវ័យចំណាស់ម្នាក់អាយុ 80ឆ្នាំ មានផ្ទុកមេរោគកូរ៉ូណា nCoV។

កប៉ាល់ទេសចរណ៍យក្ស Diamond Princess មុននេះ បានរកឃើញអ្នកដំណើរ 20នាក់ ដែលមានផ្ទុកមេរោគកូរ៉ូណា ហើយបាននាំពួកគេទៅកាន់មន្ទីរពេទ្យនៅក្នុងខេត្ត Kanagawa ប្រទេសជប៉ុន។ ក្រៅពីនេះ ភ្ញៀវទេសចរទាំងអស់ និងក្រុមនាវិក ត្រូវបានគេស្នើឱ្យនៅក្នុងកប៉ាល់រយៈពេលយ៉ាងតិច 2សប្ដាហ៍ ដើម្បីតាមដានរកមេរោគ៕

ប្រភព៖ សារព័ត៌មានបរទេស

February 7, 2020

អ្នកស្លាប់ដោយសារវីរុសកូរ៉ូណា កើនដល់ 638នាក់ ក្នុងនោះក៏មានវេជ្ជបណ្ឌិតដែលបានបញ្ចេញព័ត៌មានមុនគេអំពីមេរោគនេះ

គិតមកត្រឹមព្រឹកនេះ (7កុម្ភៈ) មានអ្នកស្លាប់បន្ថែមដល់ទៅ 73នាក់ កើន 12,9% ធៀបនឹងម្សិលមិញ ធ្វើឱ្យចំនួនអ្នកស្លាប់សរុបទូទាំងពិភពលោក ឡើងដល់ 638នាក់។

គណៈកម្មការសុខាភិបាលខេត្ត Hubei ព្រឹកនេះបានបញ្ជាក់ថា មានករណីស្លាប់បន្ថែមដោយសារមេរោគកូរ៉ូណាចំនួន 69នាក់ ធ្វើឱ្យចំនួនអ្នកស្លាប់សរុបនៅក្នុងខេត្តនេះកើនដល់ 618នាក់។

ផែនទីបង្ហាញពីការរីករាលដាលនៃមេរោគរលាកសួតថ្មី Coronavirus 2019-nCoV

ខេត្ត Hubei ក៏មានអ្នកឆ្លងមេរោគកូរ៉ូណា 2,447នាក់បន្ថែមទៀត នាំឱ្យចំនួនអ្នកឆ្លងរោគសរុបកើនដល់ 22,112នាក់។

នៅទូទាំងប្រទេសចិន គិតមកត្រឹមព្រឹកនេះ អ្នកស្លាប់សរុប ឡើងដល់ 637នាក់។ អ្នកឆ្លងសរុបនៅប្រទេសនេះ ឡើងដល់ 31,161នាក់។

ដូច្នេះ នៅទូទាំងពិភពលោក ចំនួនអ្នកស្លាប់បានកើនដល់ 638នាក់ រួមនិងករណីស្លាប់ម្នាក់នៅហ្វីលីពីន។ អ្នកដែលកំពុងផ្ទុកមេរោគនេះ មានចំនួន 31.481នាក់ ក្នុងនោះ 4,824នាក់ កំពុងប្រឈមនិងហានិភ័យបាត់បង់ជីវិត។ ចំណែកអ្នកដែលបានជាសះស្បើយ មានចំនួន 1,563នាក់។

លោកវេជ្ជបណ្ឌិត Li Wenliang ដែលបានបញ្ចេញព័ត៌មានដំបូង ទាក់ទិននឹងវីរុសកូរ៉ូណា ប៉ុន្តែត្រូវអាជ្ញាធរហៅទៅព្រមាន

នៅក្នុងចំណោមករណីស្លាប់ថ្មី ក៏មានឈ្មោះលោកវេជ្ជបណ្ឌិត Li Wenliang ដែលជាអ្នកធ្លាប់ត្រូវអាជ្ញាធរហៅទៅព្រមាននិងផ្ដិតមេដៃ ដោយចោទថា បានបញ្ចេញព័ត៌មានមិនពិតស្ដីអំពីមេរោគកូរ៉ូណាដែលកាលណោះមិនទាន់មានអ្នកណាដឹងនៅឡើយ៕

ប្រភព៖ សារព័ត៌មានបរទេស

February 7, 2020

មេរោគគ្រោះថ្នាក់បំផុតទាំង៩ដែលមាននៅលើផែនដី

មេរោគ អេបូឡា អេដស៍ និងគ្រុនឈាម ឬគ្រុនផ្ដាសាយតាមរដូវជាដើម សុទ្ធតែបានសម្លាប់មនុស្សក្នុងអត្រាខ្ពស់ ហើយវាតែងតែគំរាមកំហែងដល់មនុស្សលោកជានិច្ច។

មេរោគ ម៉ារបឺក (Marburg Virus)

ក្រុមអ្នកវិទ្យាសាស្ត្របានរកឃើញវីរុសម៉ាបឺកនេះក្នុងឆ្នាំ 1967 នៅពេលអាសន្នរោគនេះបានឆ្លងរាលដាលលើបុគ្គលិកនៃមន្ទីរពិសោធន៍អាល្លឺម៉ង់ ដោយពួកគេបានប៉ះពាល់សត្វស្វាមានផ្ទុកមេរោគម៉ាបឺកដែលនាំមកពីប្រទេសអ៊ូហ្គង់ដា (Uganda)។ មេរោគម៉ាបឺក ដូចទៅនឹងមេរោគអេបូឡា (Ebola) ត្រង់ថា វាបង្កឱ្យអ្នកជំងឺមានអាការគ្រុនឈាម មានន័យថា អ្នកជំងឺនឹងត្រូវគ្រុនក្ដៅ ហើយចេញឈាមតាមសរសៃឈាមក្នុងខួរក្បាល និងក្រពះជាដើម បណ្ដាលឱ្យស្លាប់បាន។

អត្រាស្លាប់ក្នុងការផ្ទុះឆ្លងលើកដំបូង ត្រឹម20% ប៉ុន្តែ វាបានឡើងដល់80% ក្នុងការផ្ទុះឆ្លងរាលដាលចាប់ពីឆ្នាំ 1998-2000 នៅប្រទេសកុងហ្គោ (Congo) និងឆ្នាំ 2005 នៅអាងហ្គោឡា (Angola) នេះបើតាមអង្គការសុខភាពពិភពលោក WHO។

មេរោគអេបូឡា (Ebola Virus)

ការផ្ទុះឆ្លងរាលដាលនៃមេរោគអេបូឡាដំបូងនៅលើមនុស្ស បានកើតឡើងក្នុងអំឡុងពេលតែមួយនៅស៊ូដង់ និង កុងហ្គោ ក្នុងឆ្នាំ 1976។ អេបូឡា ឆ្លងតាមរយៈការប៉ះពាល់ឈាម ឬទឹករងៃនៃរាងកាយ ឬជាលិការបស់មនុស្ស ឬសត្វដែលមានផ្ទុកមេរោគនេះ។ ប្រភេទមេរោគអេបូឡាផ្សេងៗគ្នា បង្កគ្រោះថ្នាក់ក្នុងកម្រិតផ្សេងៗគ្នាដែរ។
អេបូឡាប្រភេទ Reston ភាគច្រើនមិនធ្វើឱ្យអ្នកជំងឺធ្លាក់ខ្លួនឈឺនោះទេ ប៉ុន្តែ ប្រភេទ Bundibugyo សម្លាប់មនុស្សក្នុងអត្រា 50% និងប្រភេទ Sundan គឺ 71%។ អាសន្នរោគនេះ បានរាតត្បាតខ្លាំងបំផុតគឺនៅដើមឆ្នាំ 2014 ហើយវាក៏មានភាពស្មុគស្មាញបំផុតគិតមកដល់បច្ចុប្បន្ន។

មេរោគឆ្កួត (Rabies Virus)

បើទោះជាថ្នាំវ៉ាក់សាំងការពារជំងឺឆ្កួតនៅលើសត្វចិញ្ចឹម ត្រូវបានប្រើប្រាស់តាំងពីឆ្នាំ 1920 ធ្វើឱ្យជំងឺនេះមិនសូវកើតមាននៅក្នុងបណ្ដាប្រទេសអភិវឌ្ឍ ប៉ុន្តែ វានៅតែជាបញ្ហាធំនៅប្រទេសឥណ្ឌា និងបណ្ដាប្រទេសនៅទ្វីបអាហ្វ្រិក។

សាស្ត្រាចារ្យឯកទេសខាងមីក្រូជីវសាស្ត្រនៃសកលវិទ្យាល័យ Boston លោក Elke Muhlberger បានឱ្យដឹងថា ៖ “មេរោគឆ្កួត បំផ្លាញខួរក្បាលរបស់មនុស្ស និងសត្វដែលបានឆ្លងមេរោគនេះ ហើយវាពិតជាអាសន្នរោគដ៏កាចសាហាវ។ បើសិនមានអ្នកណាម្នាក់ត្រូវសត្វដែលមានផ្ទុកមេរោគឆ្កួតនេះ យើងអាចព្យាបាលបាន ប៉ុន្តែ បើសិនព្យាបាលមិនទាន់ពេល នោះហានិភ័យនៃការស្លាប់គឺ 100%។

មេរោគអេដស៍ (HIV)

អេសដ៍អាចជាមេរោគដ៏គ្រោះថា្នក់ក្នុងពិភពលោកនាបច្ចុប្បន្ន ព្រោះវានៅតែជាមេរោគដែលសម្លាប់មនុស្សច្រើនបំផុត នៅទូទាំងពិភពលោក។ មេរោគនេះបានសម្លាប់មនុស្សប្រមាណជា 36លាននាក់ រាប់ចាប់ពីវាត្រូវបានគេរកឃើញកាលពីទសវត្សរ៍ឆ្នាំ 1980 នេះបើតាមការលើកឡើងរបស់បណ្ឌិត Amesh Adalja អ្នកឯកទេសផ្នែកជំងឺឆ្លង និងជាអ្នកនាំពាក្យនៃសមាគមជំងឺឆ្លងអាមេរិក។

យោងតាមអង្គការសុខភាពពិភពលោក (WHO) ថ្វីបើបច្ចុប្បន្ន យើងមានថ្នាំព្យាបាលជំងឺអេដស៍ ប៉ុន្តែ មេរោគនេះនៅតែឆ្លងរាលដាលខ្លាំងនៅតំបន់ដែលមានប្រជាជនក្រីក្រច្រើនរស់នៅ។ របាយការណ៍របស់ WHO បានឱ្យដឹងថា នៅក្បែរតំបន់សាហារ៉ានៃទ្វីបអាហ្វ្រិក ក្នុងចំណោមមនុស្សពេញវ័យ 20នាក់ គឺមានម្នាក់មានផ្ទុកមេរោគអេដស៍។

មេរោគអុតធំ (Smallpox)

ឆ្នាំ 1980 មហាសន្និបាតសុខភាពពិភពលោក បានប្រកាសថា ជំងឺអុតធំ ត្រូវបានកម្ចាត់ចោលទាំងស្រុង។ ប៉ុន្តែ មុននោះ មនុស្សជាតិត្រូវចំណាយពេលរាប់ពាន់ឆ្នាំក្នុងការប្រយុទ្ធប្រឆាំងជំងឺនេះ ដោយក្នុងចំណោមអ្នកជំងឺ3នាក់ គឺមានម្នាក់ស្លាប់។ ចំណែកអ្នកដែលបានជាសះស្បើយពីជំងឺនេះ ពួកគេខ្លះក៏ត្រូវពិការភ្នែក។

ក្រុមប្រវត្តិវិទូ បានឱ្យដឹងថា គិតត្រឹមសតវត្សរ៍ទី20 ជំងឺនេះបានសម្លាប់មនុស្សយ៉ាងតិច 300លាននាក់។

មេរោគស្ទះសួត ហានតា (Hantavirus)

មេរោគនេះត្រូវបានរកឃើញកាលពីឆ្នាំ 1993 នៅសហរដ្ឋអាមេរិក នៅពេលដែលប្ដីប្រពន្ធមួយគូបានស្លាប់ បន្ទាប់ពីមានអាការហត់ និងដង្ហក់តែប៉ុន្មានថ្ងៃប៉ុណ្ណោះ។ ពលរដ្ឋអាមេរិកាំងជាង 600នាក់បានឆ្លងមេរោគនេះ ក្នុងនោះ 36% បានបាត់បង់ជីវិត នេះបើតាមមជ្ឈមណ្ឌលគ្រប់គ្រង និងទប់ស្កាត់ជំងឺឆ្លងនៃសហរដ្ឋអាមេរិក។
មេរោគ Hanta មិនឆ្លងពីមនុស្សទៅមនុស្ស ប៉ុន្តែវាឆ្លងតាមរយៈការប៉ះពាល់លាមករបស់សត្វកណ្ដុរមួយប្រភេទដែលមានផ្ទុកមេរោគនេះ។ កាលពីជំនាន់សង្គ្រាមឧបទ្វីបកូរ៉េ មេរោគនេះ បានឆ្លងទៅទាហានប្រមាណជា 3,000នាក់ ក្នុងនោះមានទាហានប្រហែល 12% ដែលមានផ្ទុកមេរោគនេះ បានបាត់បង់ជីវិត នេះបើតាមការចុះផ្សាយនៅលើទស្សនាវដ្ដី Clinical Microbiology Reviews កាលពីឆ្នាំ 2010។

មេរោគផ្ដាសាយតាមរដូវ (flu season)

WHO បានឱ្យដឹងថា ក្នុងរដូវផ្ដាសាយ មនុស្សប្រហែល 500,000នាក់នៅក្នុងពិភពលោក អាចបាត់បង់ជីវិតដោយឆ្លងមេរោគផ្ដាសាយ។ អាសន្នរោគផ្ដាសាយដែលបានសម្លាប់មនុស្សច្រើនបំផុតគឺមេរោគផ្ដាសាយអេស្ប៉ាញ ដែលចាប់ផ្ដើមក្នុងឆ្នាំ 1918 និងបានឆ្លងទៅមនុស្ស 40% ក្នុងពិភពលោក ក្នុងនោះមានអ្នកស្លាប់ដល់ទៅ 50លាននាក់។

គ្រុនចាញ់

ជំងឺនេះបានកើតឡើងដំបូងនៅក្នុងអំឡុងទសវត្សរ៍ឆ្នាំ 1950 នៅប្រទេសហ្វីលីពីន និងប្រទេសថៃ។ ក្រោយមកវាបានឆ្លងរាលដាលពេញតំបន់ត្រូពិក។ អាសន្នរោគដែលកើតឡើងដោយសារមូសខាំនេះ នឹងរាតត្បាតកាន់តែខ្លាំងនៅពេលផែនដីកើនកំដៅជាងនេះ។

យោងតាម WHO មេរោគនេះបានឆ្លងទៅមនុស្សចាប់ពី 50-100លាននាក់ជារៀងរាល់ឆ្នាំ។ មកដល់បច្ចុប្បន្ន ពិភពលោកមិនទាន់មានថ្នាំវ៉ាក់សាំងការពារមេរោគនេះនៅឡើយ ប៉ុន្តែ ក្រុមហ៊ុនផលិតឱសថ Sanofi របស់បារាំង បាន និងកំពុងពិសោធថ្នាំវ៉ាក់សាំងមួយប្រភេទដែលបង្ហាញលទ្ធផលល្អបង្គួរ។

មេរោគរាកសូស (Rotavirus)

សារព័ត៌មាន Live Science បានចេញផ្សាយថា មេរោគ Rota ធ្វើឱ្យក្មេង និងទារកត្រូវរាករូសខ្លាំងពេលឆ្លងមេរោគនេះ។ មេរោគនេះអាចឆ្លងយ៉ាងឆាប់រហ័សតាមរយៈការប៉ះពាល់លាមកមនុស្ស។ ឆ្នាំ 2008 WHO បានរាយការណ៍ថា ក្មេងអាយុក្រោម 5ឆ្នាំ ប្រមាណជា 453,000នាក់បានស្លាប់ដោយសារឆ្លងមេរោគរាករូសនេះ។ បច្ចុប្បន្ន ពិភពលោកកំពុងប្រើថ្នាំវ៉ាក់សាំងពីរប្រភេទដើម្បីទប់ស្កាត់មេរោគនេះ៕

ប្រភព៖ សារព័ត៌មានបរទេស

February 6, 2020

Author: សឿន សំណាង