សឿន សំណាង - La Reine Media

អ្នកបើកបររថយន្ត ពាក់ម៉ាស់ម្ដង12ជាន់ ត្រូវគេរិះគន់ពេញបណ្ដាញសង្គម (មានវីដេអូ)

អ្នកបើកបររថយន្តម្នាក់នៅខេត្តក្វាងតុង (Guangdong Province) ប្រទេសចិន ត្រូវអ្នកប្រើប្រាស់បណ្ដាញសង្គមរិះគន់យ៉ាងចាស់ដៃ ព្រោះតែពាក់ម៉ាស់រហូតដល់ទៅ12ជាន់ក្នុងពេលតែមួយ ខណៈដែលប្រទេសនេះកំពុងខ្វះខាតផលិតផលការពារជីវិតដ៏សំខាន់មួយប្រភេទនេះ។

នៅក្នុងវីដេអូមួយដែលបានបង្ហោះនៅលើបណ្ដាញសង្គមចិន គេឃើញមានបុរសជាអ្នកបើកបររថយន្តម្នាក់ នៅក្នុងក្រុងតុងគួន(Dongguan) ខេត្តក្វាងតុង ត្រូវនគរបាលបញ្ជាឱ្យឈប់ ដើម្បីពិនិត្យកម្ដៅខ្លួន។ នៅពេលពិនិត្យ នគរបាលបានរកឃើញថា បុរសនេះ កំពុងពាក់ម៉ាស់ជាច្រើនជាន់ ហើយបានស្នើឱ្យដោះម៉ាស់ចេញខ្លះ។

អ្វីដែលគួរឱ្យខឹងនោះគឺថា បុរសនេះ ពាក់ម៉ាស់ម្ដងរហូតដល់12ជាន់។ នគរបាលបានណែនាំបុរសជាអ្នកបើកបរនេះថា ពាក់ម៉ាស់តែមួយជាន់គឺវាគ្រប់គ្រាន់ហើយ។

វីដេអូនេះ បាននាំឱ្យអ្នកលេងបណ្ដាញសង្គមនៅប្រទេសចិន មានការខឹងសម្បាយ៉ាងខ្លាំង ដោយសារតែប្រទេសនេះ កំពុងប្រឈមនឹងកង្វះខាតផលិតផលម៉ាស់ ខណៈអាសន្នរោគរលាកសួតបង្កឡើងដោយមេរោគកូរ៉ូណាប្រភេទ nCoV។ មនុស្សជាច្រើនបាននិយាយថា អ្នកបើកបរម្នាក់នេះ កំពុងតែខ្ជះខ្ជាយរបស់ដែលកំពុងខ្វះខាត។ អ្នកខ្លះក៏សរសេរថា ម៉ាស់ពេលនេះ បានក្លាយជាផលិតផលនាំមុខសម្រាប់ការបង្អួតភាពមានបានរបស់អ្នកមានមួយចំនួននៅប្រទេសចិន ដែលដូចទៅនឹងការប្រើប្រាស់នាឡិកា Apple ផលិតផលធ្វើអំពីមាស។ល។ នេះបើតាមសារព័ត៌មាន Shanghaiist។

សូមរំឭកថា មកដល់ថ្ងៃទី10កុម្ភៈនេះ អាសន្នរោគកូរ៉ូណា ដែលបាន “ចាប់កំណើត” នៅឯក្រុង Wuhan ប្រទេសចិន បានសម្លាប់មនុស្ស 910នាក់ និងអ្នកដែលបានឆ្លងមេរោគនេះ មានចំនួនជាង 40,000នាក់ ដែលភាគច្រើននៅក្នុងខេត្ត Hubei ប្រទសចិន។ ប្រតិភូមួយក្រុមដែលដឹកនាំដោយអង្គការសុខភាពពិភពលោក (WHO) កំពុងធ្វើដំណើរទៅកាន់ប្រទេសចិន ដើម្បីជួយប្រទេសនេះ ប្រយុទ្ធប្រឆាំងនឹងអាសន្នរោគ៕

ប្រភព៖ សារព័ត៌មានបរទេស

February 10, 2020

ក្រុមហ៊ុនអាមេរិកាំង ឧទ្ទេសនាមបច្ចេកវិទ្យាថ្មី តម្លៃទាប ដែលអាចជួយទប់ស្កាត់អាសន្នរោគកូរ៉ូណា 2019-nCoV

ក្រុមហ៊ុនថ្មី GenapSys មានទីស្នាក់ការកណ្ដាលនៅតំបន់ជ្រលងភ្នំ Silicon Valley បានស្នើឱ្យប្រទេសចិន ប្រើប្រាស់ម៉ាស៊ីនពិនិត្យលំដាប់ហ្សែន (Gene Sequencer) ខ្នាតតូច (mini) ដើម្បីទប់ទល់នឹងការរាតត្បាតនៃមេរោគកូរ៉ូណាប្រភេទ nCoV។

អ្នកនាំពាក្យនៃក្រុមហ៊ុន GenapSys កំពុងតែចរចាជាមួយមជ្ឈមណ្ឌលគ្រប់គ្រង និងបង្ការោគឆ្លង (CDC) របស់ចិន ដើម្បីស្វែងរកវិធីសាស្ត្រដែលមានប្រសិទ្ធភាពខ្ពស់បំផុត សម្រាប់ទប់ស្កាត់អាសន្នរោគ nCoV ដែលមកដល់ពេលនេះ វាបានសម្លាប់មនុស្សចំនួន 910នាក់ និងបានឆ្លងទៅកាន់មនុស្សជាង 40,547នាក់ផ្សេងទៀតនៅទូទាំងពិភពលោក។ នេះបើតាមទីភ្នាក់ងារសារព័ត៌មានចិន South China Morning Post។

ក្រុមហ៊ុនបច្ចេកវិទ្យាជីវសាស្ត្ររបស់អាមេរិក GenapSys បានប្រកាសថា ខ្លួនកំពុងកាន់កាប់បច្ចេកវិទ្យាបកស្រាយ ឬពិនិត្យលំដាប់ហ្សែន (gene sequencer) ដែលទំនើបបំផុតក្នុងពិភពលោក។ ម៉ាស៊ីននេះ មានទំហំប៉ុន iPad ពោលគឺតូចជាង100ដង បើធៀបនឹងម៉ាស៊ីនពិនិត្យលំដាប់ហ្សែនផ្សេងៗដែលកំពុងមាននៅក្នុងទីផ្សារ។ ឧបករណ៍នេះអាចបំពាក់ដោយងាយនៅតាមន្ទីរពេទ្យ ព្រលានយន្តហោះជាដើម ដែលជួយឱ្យមន្ត្រីសុខាភិបាលអាចពិនិត្យរកមេរោគផ្សេងៗបានយ៉ាងឆាប់រហ័ស ដូច្នេះ គេអាចគ្រប់គ្រងស្ថានភាពអាសន្នរោគបានប្រសើរជាងមុន។

បច្ចុប្បន្ន ការបកស្រាយ ឬពិនិត្យលំដាប់ហ្សែន ភាគច្រើនត្រូវបានធ្វើឡើងនៅក្នុងបន្ទប់ពិសោធន៍ធំៗរបស់ក្រុមហ៊ុន Illumina ដែលមានទីស្នាក់ការនៅអាមេរិក ជាកន្លែងដែលមានម៉ាស៊ីនទំនើបៗ ដែលមានតម្លៃជិត1លានដុល្លារអាមេរិក។ ឆ្នាំ2018 ក្រុមហ៊ុន Illumina បានដាក់លក់ម៉ាស៊ីនពិនិត្យលំដាប់ហ្សែនខ្នាតតូច ប៉ុនកុំព្យូទ័រ desktop ប៉ុន្តែវានៅតែមានតម្លៃដល់ទៅ20,000ដុល្លារ ខ្ពស់ជាងទ្វេដង បើធៀបនឹងតម្លៃម៉ាស៊ីនរបស់ក្រុមហ៊ុន GenapSys។

ការពិនិត្យលំដាប់ហ្សែន (Genetic sequencing) គឺពិតជាមានសារសំខាន់ ព្រោះថា វានឹងជួយឱ្យយើងយល់កាន់តែច្បាស់អំពីវីរុស ដែលក្រុមគ្រូពេទ្យអាចតាមដានការវិវដ្ដរបស់ពួកមេរោគ និងអាចបង្កើតវ៉ាក់សាំង ឬរកវិធីព្យាបាលបានឆាប់រហ័ស។

ក្រុមហ៊ុន GenapSys សង្ឃឹមថា បច្ចេកវិទ្យារបស់ពួកគេ នឹងឆាប់បានចូលខ្លួនទៅជួយទប់ស្កាត់អាសន្នរោគកូរ៉ូណាដែលកំពុងសម្លាប់មនុស្សជារៀងរាល់ថ្ងៃនេះ។ ការចរចារវាងក្រុមហ៊ុន GenapSys ជាមួយរដ្ឋាភិបាលចិន កំពុងស្ថិតក្នុងតំណាក់កាលដំបូង។ អ្នកនាំពាក្យរបស់ក្រុមហ៊ុននេះ និយាយថា ពួកគេនឹងគោរពទៅតាមរាល់ច្បាប់ទម្លាប់ និងការកំណត់នៃច្បាប់អន្តរជាតិ។ សារព័ត៌មាន SCMP បានរាយការណ៍ថា បច្ចុប្បន្ន ភាគីខាងប្រទេសចិន មិនទាន់ឆ្លើយតបជាផ្លូវការទៅនឹងសំណើររបស់ក្រុមហ៊ុននេះនៅឡើយ៕

ប្រភព៖ សារព័ត៌មានបរទេស

February 10, 2020

ប្រទេសចិនកំពុងពិសោធវ៉ាក់សាំងថ្មី ប្រឆាំងវីរុសកូរ៉ូណា nCoV

សកលវិទ្យាល័យថុងជី (Tongji University) និងក្រុមហ៊ុនមួយនៅសៀងហៃ កំពុងធ្វើការពិសោធវ៉ាក់សាំងប្រភេទ m-RNA សម្រាប់ទប់ស្កាត់វីរុសកូរ៉ូណា nCoV នៅលើសត្វកណ្ដុរតូចៗចំនួនជាង100ក្បាល។

ការពិសោធនៅលើសត្វគឺជាជំហានមួយដែលត្រូវធ្វើជាចាំបាច់ បើទោះវាជាវ៉ាក់សាំងប្រភេទណាក៏ដោយ នៅមុនការប្រើប្រាស់សម្រាប់មនុស្ស។ ក្រុមអ្នកវិទ្យាសាស្ត្រនៅសកលវិទ្យាល័យថុងជី នៃក្រុងសៀងហៃ កំពុងប្រើប្រាស់សត្វកណ្ដុរមាំមួនដើម្បីធ្វើការពិសោធវ៉ាក់សាំងថ្មីបំផុត សម្រាប់ប្រឆាំងនឹងវីរុសកូរ៉ូណាប្រភេទថ្មី nCoV។

លោក Liu Zhongmin ប្រធានមន្ទីរពេទ្យ Shanghai East Hospital នៃសកលវិទ្យាល័យថុងជី បានឱ្យដឹងថា ការពិសោធនៅលើសត្វកណ្ដុរ គឺដើម្បីជ្រើសរើសប្រភេទវ៉ាក់សាំងដែលសមស្រប។ បន្ទាប់ពីក្រុមអ្នកវិទ្យាសាស្ត្រពិនិត្យឃើញថា អង្គបដិប្រាណមានប្រសិទ្ធភាពក្នុងការប្រឆាំងវីរុស វ៉ាក់សាំងដែលមានសក្ដានុពលនោះនឹងត្រូវឆ្លងកាត់ការពិសោធនៅលើសត្វដែលមានរូបរាងធំជាងកណ្ដុរ ដូចជាសត្វស្វាជាដើម។ តំណាក់កាលនេះ នឹងអនុញ្ញាតឱ្យអ្នកវិទ្យាសាស្ត្រវាយតម្លៃទៅលើកម្រិតសុវត្ថិភាពរបស់វ៉ាក់សាំង មុនពេលធ្វើការពិសោធនៅលើមនុស្ស។

លោក Liu Zhongmin បន្តថា ក្រុមអ្នកវិទ្យាសាស្ត្រត្រូវការសត្វកណ្ដុរសរុបជាង 100ក្បាល ដើម្បីយកមកពិសោធ កាលពីថ្ងៃទី 9កុម្ភៈកន្លងទៅ។ ដើម្បីឱ្យមានសុក្រឹតភាព ការពិសោធនៅលើសត្វជាមួយនឹងវ៉ាក់សាំងនេះ ក៏ត្រូវបានធ្វើឡើងទន្ទឹមគ្នា នៅឯមជ្ឈមណ្ឌលគ្រប់គ្រង និងទប់ស្កាត់ជំងឺឆ្លង (CDC) របស់ចិន និងនាយកដ្ឋានគ្រប់គ្រងអាហារ និងឱសថជាតិនៃក្រុងប៉េកាំងផងដែរ។ បើតាមលោក Liu វ៉ាក់សាំងដែលយោងទៅលើ m-RNA គឺជាបច្ចេកវិទ្យាមួយក្នុងចំណោមបច្ចេកវិទ្យាផលិតវ៉ាក់ដ៏ទំនើបបំផុតនាបច្ចុប្បន្ន ដែលអាចជួយកាត់បន្ថយពេលវេលានៃការត្រៀមផលិត និងមានប្រសិទ្ធភាពខ្ពស់។

វ៉ាក់សាំងប្រភេទនេះ ត្រូវបានអភិវឌ្ឍឡើងក្នុងកម្មវិធីសហការ រវាង CDC ចិន រួមជាមួយសកលវិទ្យាល័យ Dongji University និងក្រុមហ៊ុនផលិតវ៉ាក់សាំងមួយនៅសៀងហៃ។ ក្រោយពីបានទទួលយកអង់ទីករ ពី CDC របស់ប្រទេសចិន កាលពីចុងខែមករា បណ្ឌិត Li Hangwen អគ្គនាយកប្រតិបត្តិនៃក្រុមហ៊ុន Stemirna Therapeutics LLC និងក្រុមការងារ ត្រូវចំណាយពេល2សប្ដាហ៍ដើម្បីផលិតវ៉ាក់សាំងគំរូ m-RNA ។ លោកបណ្ឌិតបានបន្តថា ពួកគេបានត្រៀមអង់ទីករចំនួនចាប់ពី9-12ប្រភេទផ្សេងគ្នា សម្រាប់វ៉ាក់សាំងគំរូដែលធ្វើការពិសោធនៅលើសត្វ។

បណ្ឌិត Li បានសង្កត់ធ្ងន់ថា ជាធម្មតា វ៉ាក់សាំងត្រូវឆ្លងកាត់ការពិសោធសាកល្បងចំនួន3តំណាក់កាល។ ពេលវេលានៃការពិសោធនេះ អាចមានរយៈពេលច្រើនខែ រហូតដល់ច្រើនឆ្នាំ អាស្រ័យទៅលើប្រភេទជំងឺ។ បើសិនការពិសោធនៅលើសត្វ ប្រព្រឹត្តទៅដោយរលូន ពួកគេនឹងចាប់ផ្ដើមពិសោធស៊ីជម្រៅជាងនេះ នៅដើមខែមេសាខាងមុខ។

ការស្វែងរកវ៉ាក់សាំងទប់ស្កាត់វីរុសកូរ៉ូណា nCoV កំពុងត្រូវបានពិភពលោក យកចិត្តទុកដាក់ខ្លាំង។ មកដល់ពេលនេះ មានក្រុមហ៊ុន និងស្ថាប័នរាប់សិប នៅទូទាំងពិភពលោក កំពុងវិនិយោគក្នុងទំហំទឹកប្រាក់ដ៏ច្រើនសន្ធឹក ដើម្បីបង្កើតវ៉ាក់សាំងសម្រាប់ទប់ស្កាត់មេរោគកូរ៉ូណាប្រភេទថ្មីដែលគេហៅថា 2019-nCoV។

គិតមកដល់ថ្ងៃនេះ (2កុម្ភៈ 2020) មេរោគបង្ករលាកសួតថ្មីនេះ បានសម្លាប់មនុស្ស 910នាក់ នៅទូទាំងពិភពលោក។ ដោយឡែកថ្ងៃនេះ មានមនុស្សចំនួន 97នាក់បានស្លាប់ដោយសារវីរុសកូរ៉ូណា គឺកើន11,9% បើធៀបនឹងថ្ងៃទី1កុម្ភៈ៕

ប្រភព៖ សារព័ត៌មានបរទេស

February 10, 2020

ដំណឹងល្អ! ម៉ាស់ដែលមានស្រោបជាតិអំបិល អាចកម្ចាត់វីរុសកូរ៉ូណា

ក្រុមអ្នកវិទ្យាសាស្ត្រនៅតំបន់ Alberta បានធ្វើការអភិវឌ្ឍបច្ចេកវិទ្យាស្រោបអំបិលទៅលើម៉ាស់ ដើម្បីទប់ទល់នឹងការរាតត្បាតរបស់មេរោគកូរ៉ូណាថ្មី (2019-nCoV) ព្រោះថា រចនាសម្ព័ន្ធម៉ូលេគុលរបស់អំបិល មានជ្រុងស្រួច និងរឹងដ៏ច្រើន ដែលអាចចាក់ទម្លុះ និងសម្លាប់វីរុសនេះបាន។

ម៉ាស់ការពារការឆ្លងមេរោគដែលមនុស្សភាគច្រើនប្រើប្រាស់សព្វថ្ងៃនេះ អាចបង្កការលំបាកក្នុងការប្រើប្រាស់ឱ្យត្រូវទៅតាមក្បួនពេទ្យ។ អ្នកប្រើប្រាស់ ច្រើនតែយកដៃទៅប៉ះ ចាប់ទាញ ដើម្បីសម្រួល ឬផ្លាស់ទីម៉ាស់ នៅពេលត្រូវការអេះរមាស់ ឬដោះចេញ និងពាក់ទៅវិញជាញឹកញាប់។ សកម្មភាពនេះ អាចជួយឱ្យមេរោគដែលជាប់នៅលើផ្នែកខាងក្រៅរបស់ម៉ាស់ មានឱកាសជ្រែកចូលទៅក្នុងផ្លូវដង្ហើមរបស់មនុស្ស។ ប៉ុន្តែវិស្វករជីវៈវេជ្ជសាស្ត្រ និងជាសាស្ត្រាចារ្យនៃសកលវិទ្យាល័យ Alberta នៅប្រទេសកាណាដា លោក Hyo-Jick Choi បានរកឃើញវិធីដ៏មានសក្ដានុពលមួយ នោះគឺបង្កើតប្រភេទម៉ាស់ដែលអាចកំចាត់មេរោគចង្រៃ ជំនួសឱ្យការដែលគ្រាន់តែទប់ស្កាត់ពួកវា។ ធាតុផ្សំដ៏អាថ៌កំបាំង គឺអំបិលថ្លាមួយប្រភេទ។

ដោយសារតែរចនាសម្ព័ន្ធម៉ូលេគុលអំបិលប្រភេទគ្រាប់ថ្លា មានជ្រុងដ៏ស្រួល និងរឹង អាចចាក់ទម្លុះរាងកាយរបស់មេរោគ ធ្វើឱ្យពួកវាមិនអាចរស់បាន។ ក្រុមរបស់លោក Choi បានធ្វើការពិសោធទៅលើម៉ាស់ដែលស្រោបដោយជាតិអំបិលក្នុងរយៈពេលជាច្រើនឆ្នាំមកនេះ ហើយបានរកឃើញថា ផលិតនេះអាចកម្ចាត់វីរុសផ្ដាសាយចំនួន3ប្រភេទ។ លទ្ធផលនៃការពិសោធខាងលើនេះ ត្រូវបានចុះផ្សាយនៅលើទស្សនាវដ្ដី Scientific Reports ឆ្នាំ 2017។ ក្រុមអ្នកវិទ្យាសាស្ត្រយល់ថា បច្ចេកវិទ្យាកម្ចាត់មេរោគនេះ អាចជួយដល់ការខិតខំប្រឹងប្រែងក្នុងការទប់ស្កាត់មេរោគឆ្លងនានា ហើយក៏សង្ឃឹមថា អាចបញ្ចេញម៉ាស់ប្រភេទនេះ ទៅក្នុងទីផ្សារក្នុងអំឡុងពេល 18ខែទៀត។

វីរុសជាច្រើនប្រភេទ អាចឆ្លងពីមនុស្សម្នាក់ ទៅមនុស្សម្នាក់ តាមរយៈចំហាយទឹកមាត់ ឬកម្ទេចស្លេស្មដែលមនុស្សកណ្ដាស់ ក្អក និយាយគ្នា ដង្ហើម ឬតោងជាប់នៅលើស្បែកមនុស្ស ឬផ្ទៃនៃវត្ថុអ្វីមួយ។ លោក Choi ថ្លែងថា “ភាគល្អិតនៃជាតិទឹកដែលមានផ្ទុកមេរោគកូរ៉ូណា ដែលខ្ទាតចេញពីអ្នកជំងឺ អាចហោះទៅជាប់នឹងផ្ទៃខាងក្រៅនៃម៉ាស់។ ឧបសគ្គធំបំផុតរបស់ម៉ាស់ធម្មតានាបច្ចុប្បន្ន គឺមិនអាចកម្ចាត់មេរោគដែលតោងជាប់នៅលើផ្ទៃម៉ាស់ ដែលនេះកំពុងធ្វើឱ្យហានិភ័យនៃការឆ្លងវីរុស មានការកើនឡើង”។

ប៉ុន្តែ នៅពេលដែលបានប្រើប្រាស់ម៉ាស់ដែលមានស្រោបជាតិអំបិលរបស់លោក Choi ភាគល្អិតនៃជាតិទឹកដែលមានផ្ទុកមេរោគ នឹងចាប់ផ្ដើមបឺតយកជាតិអំបិល។ បន្ទាប់ពីជាតិសំណើមហួតអស់ អ្វីដែលនៅសល់នោះគឺវីរុស និងជាតិអំបិល។ ជ្រុងស្រួចរឹងនៃអំបិល ក៏ចាប់ផ្ដើមបុកទៅលើមេរោគ ហើយសម្លាប់ពួកវា។ នៅក្នុងការពិសោធ វីរុសត្រូវបានកម្ចាត់ក្នុងអំឡុងពេល5នាទី ហើយត្រូវសម្លាប់ចោលទាំងស្រុង ក្នុងអំឡុង 30នាទី។ នេះបើតាមការឱ្យដឹងពីលោកសាស្ត្រាចារ្យ Choi។

កាសែត Business Insider បានឱ្យដឹងថា សាស្ត្រាចារ្យ Choi បាននឹកឃើញវិធីស្រោបអំបិលទៅលើម៉ាស់នេះ បន្ទាប់ពីគាត់បានបរាជ័យក្នុងការពិសោធផ្សេងមួយ។ ពេលនោះ គាត់រកវិធីបង្កើតវ៉ាក់សាំងមួយប្រភេទសម្រាប់ផឹក។ ក្នុងអំឡុងពេលនោះ ប្រភេទខ្សោយនៃមេរោគមួយប្រភេទដែលត្រូវលាយបញ្ចូលក្នុងធាតុរាវនៃជាតិស្ករ ប៉ុន្តែ រចនាសម្ព័ន្ធរបស់ស្ករ ធ្វើឱ្យគ្រាប់វីរុសត្រូវដាច់រហែកជាបន្តបន្ទាប់ បណ្ដាលឱ្យវ៉ាក់សាំងបាត់បង់ប្រសិទ្ធភាព។ Ilaria Rubino ដែលកាលណោះជានិស្សិតថ្នាក់បណ្ឌិត ធ្វើការនៅក្នុងបន្ទប់ពិសោធរបស់ Choi នៅឯសកលវិទ្យាល័យ Alberta បានបកស្រាយថា ៖ “ប្រភេទគ្រាប់ថ្លានៃរូបមន្តដែលមានជាតិស្ករ ធ្វើឱ្យវ៉ាក់សាំងបាត់បង់ស្ថេរភាព។ យើងខ្ញុំក៏ចាប់ផ្ដើមឆ្ងល់ថា តើការកកនៃជាតិអំបិល អាចកម្ចាត់មេរោគបានដែរ ឬអត់?”។

ដូច្នេះ ក្រុមរបស់លោក Choi ក៏បានចាប់ផ្ដើមសិក្សា និងអភិវឌ្ឍស្រទាប់អំបិល ហើយបញ្ចូលវាទៅលើសរសៃនៃស្រទាប់ចម្រោះមេរោគរបស់ម៉ាស់។ ក្រោយមក ពួកគេបានផលិតម៉ាស់ប្រទេសនេះ និងធ្វើការពិសោធ។ លោក Choi បានដាក់ពាក្យស្នើសុំបណ្ណកម្មសិទ្ធិបញ្ញាទាក់ទិននឹងបច្ចេកវិទ្យានេះ។ Choi និង Rubino កំពុងមានគម្រោងសហការជាមួយក្រុមហ៊ុននានា ដើម្បីផលិតម៉ាស់ដែលមានស្រោបអំបិល ដើម្បីបញ្ចេញលក់ក្នុងទីផ្សារក្នុងអំឡុងប្រហែល2ឆ្នាំទៀត៕

ប្រភព៖ សារព័ត៌មានបរទេស

February 10, 2020

ចំនួនអ្នកស្លាប់ដោយសារវីរុសកូរ៉ូណា បានកើនលើសពីអាសន្នរោគ SARS ទៅហើយ

អ្នកស្លាប់បន្ថែម 97នាក់ ដោយសារតែមេរោគកូរ៉ូណា គឺកើន11,9% បើធៀបនឹងម្សិលមិញ ធ្វើឱ្យចំនួនអ្នកស្លាប់សរុបឡើងដល់ 910នាក់ ច្រើនជាងជិត100នាក់ បើធៀបនឹងអាសន្នរោគ SARS។

គណៈកម្មការសុខាភិបាលខេត្ត Hebei នៃប្រទេសចិន ព្រឹកនេះបានបញ្ជាក់ថា មានអ្នកស្លាប់បន្ថែមចំនួន 91នាក់ ដោយសារបានឆ្លងមេរោគដ៏កំណាចនេះ ធ្វើឱ្យចំនួនអ្នកស្លាប់សរុបនៃខេត្ត Hubei ឡើងដល់ 871 នាក់។ នេះបើតាមទីភ្នាក់ងារសារព័ត៌មាន CNN។

ខេត្ត Hubei ក៏បានរកឃើញអ្នកឆ្លងមេរោគថ្មីចំនួន 2,618នាក់ ធ្វើឱ្យចំនួនសរុបនៃការបានឆ្លងមេរោគនេះនៅខេត្ត Hubei កើនឡើងដល់ 29,631នាក់។

គណៈកម្មការសុខាភិបាលជាតិរបស់ចិន ក៏បានប្រកាសដែរថា ចំនួនអ្នកស្លាប់ថ្មីនៅទូទាំងប្រទេសចិន គឺមាន 97នាក់ ធ្វើឱ្យចំនួនអ្នកស្លាប់សរុបនៃប្រទេសនេះ កើនដល់ 908នាក់។

ដូច្នេះ ចំនួនអ្នកស្លាប់ដោយសារមេរោគកូរ៉ូណាទូទាំងពិភពលោក សរុបមាន 910នាក់ ក្នុងនោះ មាន2នាក់ ស្លាប់នៅខាងក្រៅប្រទេសចិនដីគោក ពោលគឺ1ករណីនៅហុងកុង និង1ករណីទៀតនៅហ្វីលីពីន។ ចំនួនខាងលើនេះ បានលើសពីចំនួនអ្នកស្លាប់ដោយសារអាសន្នរោគ SARS ដែលបានកើតឡើងពីឆ្នាំ 2002-2003 នេះបើតាមអង្គការសុខភាពពិភពលោក។

គណៈកម្មការសុខាភិបាលចិន ក៏បានឱ្យដឹងថា ប្រទេសនេះ បច្ចុប្បន្ន មានអ្នកឆ្លងមេរោគកូរ៉ូណាបន្ថែមចំនួន 3,062នាក់ ធ្វើឱ្យចំនួនអ្នកឆ្លងមេរោគនេះ នៅប្រទេសចិនដីគោក សរុបឡើងដល់ 40,171នាក់៕

ប្រភព៖ សារព័ត៌មានបរទេស

February 10, 2020

នាយករដ្ឋមន្ត្រីថៃ ប្រកាសពីមូលហេតុដែលនាំឱ្យមានករណីមន្ត្រីយោធាបាញ់រះសម្លាប់មនុស្ស 26នាក់

នាយករដ្ឋមន្ត្រីថៃបានឱ្យដឹងថា នាយទាហានថ្នាក់ព្រឹន្ទបាលម្នាក់ឈ្មោះ Jakrapanth Thomma ដែលបានបាញ់រះសម្លាប់មនុស្សអស់ 26នាក់ កាលពីថ្ងៃទី8 ខែកុម្ភៈ គឺដោយសារ “បញ្ហាផ្ទាល់ខ្លួន” ទាក់ទិននឹងការលក់ផ្ទះ 1ខ្នង។

“ករណីបែបនេះ មិនធ្លាប់បានកើតឡើងទេនៅក្នុងប្រទេសថៃ។ ខ្ញុំសង្ឃឹមថា នេះជាលើកចុងក្រោយដែលបញ្ហាបែបនេះកើតឡើង”។ នេះគឺជាប្រសាសន៍របស់នាយករដ្ឋមន្ត្រីថៃ ប្រាយុធ ចន្ទអូឆា ដែលបានថ្លែងនៅខាងក្រៅមន្ទីរពេទ្យដែលព្យាបាលជនរងគ្រោះដោយអំពើបាញ់រះដ៏សាហាវឃោរឃៅ ដែលបានកើតឡើងនៅក្នុងខេត្តនគររាជសីមា ភាគឦសានប្រទេសថៃ។ ក្នុងចំណោមអ្នករងរបួសទាំងនោះ យ៉ាងហោចណាស់ក៏មាន 2នាក់ដែរដែលត្រូវធ្វើការវះកាត់ព្យាបាលខួរក្បាលជាបន្ទាន់។

នាយករដ្ឋមន្ត្រីថៃ បានបន្ថែមថា ខ្មាន់កាំភ្លើង ឈ្មោះ Jakrapanth ខឹងនឹងមេបញ្ជាការរបស់គេ ដោយសារតែមានជម្លោះទាក់ទិននឹងបញ្ហាបំណុល។ លោក ប្រាយុធ ចន្ទអូឆា បានបន្ថែមថា ក្នុងចំណោមជនរងគ្រោះដែលបានបាត់បង់ជីវិតទាំង 26នាក់ គឺមានទាំងកងកម្លាំងសន្តិសុខ និងជនស៊ីវិល ហើយក្នុងនោះក៏មានក្មេងប្រុសអាយុ 13ឆ្នាំម្នាក់ផងដែរ។ ខ្មាន់កាំភ្លើងរូបនោះ ត្រូវសមត្ថកិច្ចបាញ់សម្លាប់កាលពីព្រឹកមិញ (9កុម្ភៈ) បន្ទាប់ពីគេព្យាយាមតតាំងប្រយុទ្ធការពារខ្លួន ខណៈនៅក្នុងផ្សារទំនើប Terminal 21 តាំងពីថ្ងៃម្សិលមិញ(ទី8)រហូតមក។

មុននេះ ប្រភពព័ត៌មានមួយបានឱ្យដឹងថា មូលហេតុដំបូងនៃអំពើបាញ់ប្រហារនេះ គឺដោយសារជនដៃដល់ និងមេបញ្ជាការរបស់គេ ទាស់សម្ដីគ្នារឿងប្រាក់កម្រៃជើងសាទាក់ទិននឹងការលក់អចលនទ្រព្យមួយកន្លែង។ ដោយសារខឹងខ្លាំងពេក នាយទាហានដែលជាជនដៃដល់ ក៏បានដកកាំភ្លើងបាញ់សម្លាប់មេបញ្ជាការរបស់ខ្លួនតែម្ដង មុននឹងទៅប្រមូលយកអាវុធបន្ថែម និងបន្តបាញ់រះទៅលើហ្វូងមនុស្សនៅឯផ្សារទំនើបខាងលើ។

ខ្មាន់កាំភ្លើងម្នាក់នេះ គឺជានាយទាហាននៃកងវរសេនាតូចលេខ22 ឈរជើងនៅមូលដ្ឋានទ័ព Suratham Phithak ក្នុងខេត្តនគររាជសីមា។

លោកប្រាយុធ ចន្ទអូឆា បានអះអាងថា សន្តិសុខនៅក្នុងឃ្លាំងអាវុធនៃជំរំទ័ព សុទ្ធតែមានការការពារយ៉ាងតឹងរ៉ឹង។

ខេត្តនគររាជសីមា គឺជាតំបន់ដែលមានបន្ទាយទាហានធំៗជាច្រើន ខណៈដែលប្រទេសមួយនេះកំពុងគ្រប់គ្រងដោយរដ្ឋាភិបាលយោធា ថ្វីបើបានឆ្លងកាត់ការបោះឆ្នោតតាមលទ្ធិប្រជាធិបតេយ្យហើយក៏ដោយ។ ថៃក៏ជាប្រទេសមួយក្នុងចំណោមប្រទេសដែលមានអ្នកកាន់កាប់កាំភ្លើងច្រើនជាងគេមួយដែរនៅក្នុងពិភពលោក។ ប្រទេសនេះក៏ធ្លាប់មានករណីផ្ទុះអាវុធនៅក្នុងតុលាការកាលពីឆ្នាំមុនផងដែរ ដែលករណីទាំងអស់នេះបានធ្វើឱ្យមានការព្រួយបារម្ភកាន់តែខ្លាំងអំពីការកើនឡើងនៃអំពើហិង្សាប្រដាប់អាវុធ៕

ប្រភព៖ សារព័ត៌មានបរទេស

February 9, 2020

មូលហេតុដែលនាំឱ្យខ្មាន់កាំភ្លើងជាមន្ត្រីយោធា ហ៊ានបាញ់សម្លាប់មនុស្ស24នាក់…

មន្ត្រីយោធាថៃម្នាក់ ដែលបានធ្វើការបាញ់រះទៅលើហ្វូងមនុស្ស បណ្ដាលឱ្យមានអ្នកស្លាប់ 24នាក់ នៅក្នុងតំបន់ពាណិជ្ជកម្មមួយនៅក្នុងខេត្ត Nakhon Ratchasima ភាគឦសានប្រទេសថៃនោះ ត្រូវបានសមត្ថកិច្ចបាញ់សម្លាប់ បន្ទាប់ពីបានឡោមព័ទ្ធអស់់រយៈពេលប្រហែល 12ម៉ោងរួចមក។

ការបាញ់ប្រហារដ៏សាហាវនេះ បានកើតឡើងកាលពីយប់ថ្ងៃទី8 ខែកុម្ភៈ ឆ្នាំ2020 ដោយខ្មាន់កាំភ្លើងជាទាហានម្នាក់បម្រើការនៅក្នុងជួរកងទ័ពថៃ។ មុនការបាញ់រះនៅឯទីសាធារណៈនោះ ខ្មាន់កាំភ្លើងម្នាក់នេះបានបាញ់សម្លាប់មនុស្ស 3នាក់រួចទៅហើយនៅក្នុងបន្ទាយទាហានមួយដែលជននេះកំពុងបម្រើការ ក្នុងនោះក៏មានមេបញ្ជាការរបស់ខ្លួនម្នាក់ផងដែរ។

ប្រភពព័ត៌មានបានឱ្យដឹងថា មូលហេតុដែលនាំឱ្យឈានទៅដល់ការបាញ់ប្រហារខាងលើនេះ អាចបណ្ដាលមកពីជម្លោះរវាងខ្មាន់កាំភ្លើង និងមេបញ្ជាការរបស់ខ្លួន។ មន្ត្រីយោធាម្នាក់ គឺលោក Thanya បានឱ្យដឹងថា ជនដៃដល់ Jakrapanth បានឈ្លោះប្រកែកគ្នាយ៉ាងតឹងសរសៃ ក ជាមួយមេបញ្ជាការម្នាក់របស់ខ្លួន គឺលោក Anantharot Krasnae ទាក់ទិននឹងជម្លោះដីធ្លី ហើយក៏បានដកកាំភ្លើងបាញ់សម្លាប់លោកមេបញ្ជាការម្នាក់នោះ រួចបានយកកាំភ្លើងពីជនរងគ្រោះ រត់ចេញទៅក្រៅ បាញ់សម្លាប់មិត្តរួមការងារ 2នាក់ថែមទៀត។

បន្ទាប់មក ខ្មាន់កាំភ្លើងក៏បានចូលទៅក្នុងឃ្លាំងអាវុធ រួចប្រមូលយកអាវុធជាច្រើនបន្ថែមទៀត ព្រមទាំងបានលួចយករថយន្តពាសដែក 1គ្រឿង និងបានបើកចេញពីបន្ទាយ មុននឹងធ្វើការបាញ់រះទៅលើហ្វូងមនុស្ស និងរថយន្តនគរបាល ពេលមកដល់មជ្ឈមណ្ឌលពាណិជ្ជកម្ម Terminal 21 ក្នុងខេត្តខាងលើ។

មុនពេលចូលដល់មជ្ឈមណ្ឌលពាណិជ្ជកម្ម Terminal 21 ខ្មាន់កាំភ្លើងឈ្មោះ Jakrapanth នេះ បានបាញ់ទៅលើធុងខ្យល់ជាច្រើនធុង បណ្ដាលឱ្យមានការផ្ទុះឆេះនៅខាងក្រៅផ្សារទំនើប។ នៅក្នុងការបាញ់រះដ៏សាហាវនេះ ជនម្នាក់នេះថែមទាំងបានផ្សាយផ្ទាល់ (live video) នៅលើបណ្ដាញសង្គម និងថតសែលហ្វ៊ីជាមួយកាំភ្លើង 2ដើមដែលខ្លួនកំពុងកាន់ រួមទាំងកន្សែងយ័ន្តការពារខ្លួនដែលចងជាប់នឹងកាំភ្លើង ហើយប្រកាសថា ខ្លួនកំពុង “សងសឹក”។

“ធ្វើមានធ្វើបាន ដោយសារអំពើពុករលួយ និងកេងប្រវ័ញ្ចអ្នកដទៃ ពួកគេគិតថានឹងអាចយកលុយតាមខ្លួនទៅកាន់ស្ថាននរកមែនទេ!?”។ នេះជាសំណេររបស់ខ្មាន់កាំភ្លើងនៅលើបណ្ដាញសង្គម ដែលមិនដឹងថា សំដៅលើអ្នកណាឡើយ។

សាក្សីនៅកន្លែងកើតហេតុបានឱ្យដឹងថា ខ្មាន់កាំភ្លើងបានសម្រុកចូលទៅក្នុងផ្សារទំនើបនោះបណ្ដើរ បាញ់រះបណ្ដើរ បណ្ដាលឱ្យមនុស្សម្នាភ័យស្លន់ស្លោ រត់ចែកជើងគ្នាប្រសាច។

អ្នកនាំពាក្យនៃក្រសួងការពារប្រទេសថៃ លោក ឃុងឈីប តាន់ត្រាវ៉ានិតនិយាយថា តុល្យការបណ្ដោះអាសន្ននៃការបាញ់ប្រហារនោះ គឺមានអ្នកស្លាប់ប្រមាណជា 24នាក់៕

ប្រភព៖ សារព័ត៌មានបរទេស

February 9, 2020

មន្ត្រីយោធាថៃ បាញ់រះសម្លាប់មនុស្ស21នាក់ និងរបួសធ្ងន់ជាង14នាក់ (មានវីដេអូ)

មន្ត្រីយោធាថៃម្នាក់ បានប្រើកាំភ្លើងបាញ់រះទៅលើហ្វូងមនុស្សដែលនៅក្នុងតំបន់ពាណិជ្ជកម្មមួយនៅខេត្តនគររាជសីមា (Nakhon Ratchasima) ភាគឦសានប្រទេសថៃ បណ្ដាលឱ្យមានមនុស្សស្លាប់យ៉ាងតិច 21នាក់។

Krissana Pattanacharoen អ្នកនាំពាក្យនគរបាលថៃ កាលពីល្ងាចថ្ងៃទី8កុម្ភៈ បានឱ្យដឹងថា ការបាញ់រះរបស់ខ្មាន់កាំភ្លើងម្នាក់នោះ បានសម្លាប់មនុស្សយ៉ាងតិច21នាក់ និងបង្ករបួសធ្ងន់ដល់មនុស្សជាច្រើននាក់ផ្សេងទៀត។

ភ្លាមៗបន្ទាប់ពីការបាញ់រះ ក្រុមសមត្ថកិច្ចប្រដាប់អាវុធក៏បានឡោមព័ទ្ធតំបន់កើតហេតុ ដើម្បីស្វែងរកជនសង្ស័យ។ ក្រោយការឡោមព័ទ្ធទីតាំងផ្សារទំនើបមួយកន្លែងនៅក្រុង Korat នាខេត្តនគររាជសីមា អស់រយៈពេល 12ម៉ោង សមត្ថកិច្ចក៏បានបាញ់សម្លាប់ខ្មាន់កាំភ្លើងនោះ។

អ្នកនាំពាក្យយោធាថៃ Thanya Kriatisarn បាននិយាយថា ខ្មាន់កាំភ្លើងខាងលើ គឺជាមន្ត្រីយោធាថ្នាក់ព្រឹន្ទបាលនៃកងទ័ពថៃ បម្រើការនៅក្នុងមូលដ្ឋានទ័ព Suratham Phithak ក្នុងតំបន់ Nakhon Ratchasima។

https://www.youtube.com/watch?v=DPXUtuemU24

https://www.youtube.com/watch?v=xe5zRmc_Slg

ប្រភព៖ សារព័ត៌មានបរទេស

February 8, 2020

សហរដ្ឋអាមេរិកចាប់ផ្ដើមនាំគ្នា “រត់ប្រណាំង” ជា “ផ្លូវការ” ជាមួយពេលវេលា ក្នុងការទប់ស្កាត់វីរុសកូរ៉ូណាថ្មី បន្ទាប់ពី…

ការ “រត់ប្រណាំង” យក “ជ័យជ” រវាងសហរដ្ឋអាមេរិក និងមេរោគកូរ៉ូណា កំពុងចាប់ផ្ដើមជាបណ្ដើរៗហើយ បន្ទាប់ពីអ្នកជំងឺម្នាក់ អាយុ35ឆ្នាំ ត្រូវបានបញ្ជូនទៅកាន់មន្ទីរពេទ្យនៅក្នុងតំបន់ Snohomish និងបានរកឃើញថា មានផ្ទុកមេរោគរលាកសួតកូរ៉ូណា រួមនិងករណីពលរដ្ឋអាមេរិកាំងម្នាក់បានស្លាប់ក្នុងថ្ងៃនេះ (8កុម្ភៈ) នៅឯក្រុង Wuhan ដោយសារមេរោគកូរ៉ូណា។

បុគ្គលិកពេទ្យពិភាក្សាគ្នាអំពីវិធីកំចាត់មេរោគកូរ៉ូណានៅឯមន្ទីរសុខាភិបាលខណ្ឌ Snohomish រដ្ឋវ៉ាស៊ីនតោន។

អ្នកឯកទេស និងជាអ្នកគ្រប់គ្រងផ្នែករោគឆ្លងនៅមជ្ឈមណ្ឌលសុខាភិបាលខណ្ឌ Snohomish ក្រុងវ៉ាស៊ីនតោន សហរដ្ឋអាមេរិក ចាប់ផ្ដើមធ្វើសកម្មភាពភ្លាមៗ ដោយមិនរង់ចាំក្រុមសុខាភិបាលនៃមជ្ឈមណ្ឌលគ្រប់គ្រង និងទប់ស្កាត់រោគឆ្លងអាមេរិក (CDC) មកពី Atlanta នោះទេ នៅពេលទទួលបានរបាយការណ៍ថា មានករណីផ្ទុកមេរោគកូរ៉ូណាដំបូងក្នុងតំបន់ដែលគាត់គ្រប់គ្រង។ Hollianne Bruce បានសម្រេចចិត្តទាក់ទងទៅកាន់បុរសជាអ្នកជំងឺដែលកំពុងត្រូវបានដាក់ឱ្យនៅដោយឡែកក្នុងមន្ទីរពេទ្យមួយ ក្នុងតំបន់។

កន្លែងធ្វើតេស្តរកមេរោគ Corona នៅទីក្រុង Lynnwood រដ្ឋវ៉ាសនតោន

នៅសហរដ្ឋអាមេរិក ការទប់ស្កាត់ការឆ្លងរាលដាលនៃមេរោគឆ្លង គឺជាតួនាទីរបស់មូលដ្ឋាននិមួយៗ។ ក្រោយពីបានរកឃើញអ្នកឆ្លងមេរោគដំបូង ក្រុមមន្ត្រីសុខាភិបាលខណ្ឌ និងក្រុង ចាប់ផ្ដើមរត់ប្រណាំងជាមួយពេលវេលាដើម្បីនាំអ្នកជំងឺទៅដាក់ឱ្យនៅដោយឡែក និងស្វែងយល់អំពីកន្លែងដែលអ្នកជំងឺរស់នៅ និងតាមដានអ្នកដែលធ្លាប់បានជួបអ្នកជំងឺនេះ។ ក្រុមបុគ្គលិកសុខាភិបាលក៏ព្យាយាមបំបាត់ព័ត៌មានចចាមអារ៉ាមគ្មានមូលដ្ឋាន ដើម្បីកាត់បន្ថយការភ័យខ្លាចក្នុងសហគមន៍ ក៏ដូចជាត្រៀមជាស្រេចក្នុងការដោះស្រាយករណីឆ្លងមេរោគថ្មីបន្ទាប់។

នៅមជ្ឈមណ្ឌលសុខាភិបាលខណ្ឌ Snohomish បុគ្គលិក 113នាក់ បានចំណាយពេលសរុប 1,000ម៉ោងក្នុងការព្យាយាមគ្រប់គ្រងមេរោគ ចាប់តាំងពីបានផ្ញើគំរូមេរោគរបស់អ្នកជំងឺវ័យ 35ឆ្នាំខាងលើ ទៅកាន់មជ្ឈមណ្ឌលគ្រប់គ្រង និងបង្ការរោគឆ្លង CDC (Centers for Disease Control and Prevention)។ បុគ្គលិកត្រួតពិនិត្យអាហារ អ្នកគ្រប់គ្រងធនធានមនុស្ស និងអ្នកជំនាញនៃផ្នែកផ្សេងៗ ក៏បានចូលរួមក្នុងការរត់ប្រណាំងជាមួយពេលវេលានេះដែរ។

សកម្មភាពទប់ទប់នឹងមេរោគកូរ៉ូណា ក្នុងរយៈពេល2សប្ដាហ៍កន្លងទៅ នៅឯមជ្ឈមណ្ឌលសុខាភិបាលខណ្ឌ Snohomish ដែលជាកន្លែងមានការិយាល័យពោរពេញដោយពាក្យស្លោក និងសារក្រើនរំឭកជាច្រើន ដូចជា “ភាពស៊ាំ៖ ប្រព័ន្ធការពារល្អបំផុតរបស់អ្នក!” ឬផ្ដល់ឈាមសង្គ្រោះមនុស្ស” ជាដើម បង្ហាញឱ្យឃើញនូវអ្វីដែលអាចនឹងកើតឡើងនៅក្នុងមជ្ឈមណ្ឌលសុខាភិបាលចំនួន 3,000កន្លែង នៅមូលដ្ឋានក្នុងសហរដ្ឋអាមេរិក នាប៉ុន្មានសប្ដាហ៍ខាងមុខ ពិសេសគឺ បន្ទាប់ពីមានពលរដ្ឋអាមេរិកម្នាក់បានស្លាប់ដោយសារបានឆ្លងមេរោគកូរ៉ូណាថ្មីនៅប្រទេសចិន។

ក្រុមគ្រូពេទ្យកំពុងពិនិត្យអ្នកជំងឺនៅឯប្រទេសចិន

សូមបញ្ជាក់់ថា នៅក្នុងថ្ងៃនេះ (8កុម្ភៈ) ដែរ ស្ថានទូតអាមេរិកប្រចាំនៅទីក្រុងប៉េកាំងប្រទេសចិន បានប្រកាសថា ពលរដ្ឋអាមេរិកាំងម្នាក់ បានបាត់បង់ជីវិតដោយសារការឆ្លងមេរោគកូរ៉ូណាថ្មី។ ស្ថានទូតសហរដ្ឋអាមេរិកលើកឡើងថា ពលរដ្ឋខ្លួនម្នាក់នោះ មានវ័យ៦០ឆ្នាំ និងបានស្លាប់ក្នុងមន្ទីរពេទ្យទីក្រុង Wuhan នៃខេត្ត Hubei។ នេះបើតាមទីភ្នាក់ងារសារព័ត៌មាន AFP៕

ប្រភព៖ សារព័ត៌មានបរទេស

February 8, 2020

ពលរដ្ឋចិននាំគ្នារកទិញថ្នាំអេដស៍ ដើម្បីទុកទប់ទល់វីរុសកូរ៉ូណា! អ្នកឆ្លៀតឱកាសរកលុយ និងសប្បុរសជនក៏បង្ហាញខ្លួន

ដោយសារតែមិនទាន់មានវិធីសាស្ត្រ ឬថ្នាំព្យាបាលពិសេស ពលរដ្ឋជាច្រើននៅប្រទេសចិន បាននាំគ្នាស្វែងរកទិញថ្នាំព្យាបាលជំងឺអេដស៍មកជំនួសបណ្ដោះអាសន្ន ដោយសង្ឃឹមថាពួកគេអាចឆ្លងផុតគ្រាលំបាក និងនៅមានជីវិតក្រោយការរាតត្បាតនៃអាសន្នរោគកូរ៉ូណានេះ។

បច្ចុប្បន្ន ក្នុងពិភពលោក មិនទាន់មានថ្នាំពិសេស និងមានប្រសិទ្ធភាពខ្ពស់សម្រាប់ព្យាបាលអ្នកជំងឺកូរ៉ូណានៅឡើយ បណ្ដាលឱ្យវីរុសនេះ សម្លាប់មនុស្សដល់ទៅ 724នាក់ គិតមកត្រឹមថ្ងៃទី8កុម្ភៈ ឆ្នាំ2020។ បើទោះបីជាមិនទាន់មានភ័ស្ដុតាងបង្ហាញពីលទ្ធផលនៃការពិសោធន៍ស៊ីជម្រៅក៏ដោយ ប៉ុន្តែ គណៈកម្មការសុខាភិបាលកណ្ដាលរបស់ចិន បានឱ្យដឹងថា ថ្នាំ lopinavir/ritonavir ដែលគេប្រើសម្រាប់ព្យាបាលជំងឺអេដស៍ ក៏អាចប្រើប្រាស់ដើម្បីព្យាបាលអ្នកមានផ្ទុកមេរោគកូរ៉ូណាផងដែរ ថ្វីបើមិនទាន់បានបកស្រាយអំពីយន្តការព្យាបាលនៃថ្នាំនេះ។

គ្រូពេទ្យចិនប្រើថ្នាំព្យាបាលអេដស៍ ដើម្បីព្យាបាលជំងឺរលាកសួតថ្មីកូរ៉ូណា

អ្នកវិទ្យាសាស្ត្រក៏កំពុងដុតដៃដុតជើងក្នុងការរកវិធីបង្កើតថ្នាំប្រឆាំងមេរោគកូរ៉ូណានេះដែរ

ប្រការខាងលើនេះ បានធ្វើឱ្យមានការភ្ញាក់ផ្អើលខ្លាំង ពិសេសគឺចំពោះថ្នាំ Kaletra ឬហៅថា Aluvia។ នេះគឺជាថ្នាំ lopinavir/ritonavir ដែលត្រូវបានដាក់់លក់ក្រោមឈ្មោះ Kaletra និងជាថ្នាំប្រឆាំងមេរោគអេដស៍តែមួយប្រភេទគត់ដែលត្រូវបានដាក់លក់នៅប្រទេសចិន។

Devy អាយុ38ឆ្នាំ មកពីខេត្ត Shandong បានឱ្យដឹងថា គាត់គឺជាមនុស្សម្នាក់ក្នុងចំណោមរាប់រយនាក់ដែលបានព្យាយាមស្វែងរកជួបអ្នកមានផ្ទុកមេរោគអេដស៍ ដើម្បីសុំថ្នាំនេះ។

បើទោះបីជាថ្មីៗនេះ Devy មិនធ្លាប់បានទៅកាន់ខេត្ត Hubei ឬ ក្រុង Wuhan ដែលជាសម្បុកមេរោគកូរ៉ូណាក៏ដោយ ប៉ុន្តែគាត់នៅតែព្រួយបារម្ភខ្លាចឆ្លងជំងឺនេះ ព្រោះថា គាត់មានអាការក្ដៅខ្លួន និងរកកលក្អួត។ ក្នុងពេលមានអារម្មណ៍អស់សង្ឃឹម គាត់ក៏បានស្គាល់បុរសម្នាក់ដែលមានផ្ទុកមេរោគអេដស៍។ បុរសម្នាក់នេះ មានរហ័សនាមថា Brother Squirrel ហើយគាត់កំពុងផ្ដត់ថ្នាំ Kaletra ដោយមិនគិតថ្លៃចំពោះអ្នកណាដែលកំពុងសង្ស័យថា ខ្លួនឯងមានផ្ទុកមេរោគកូរ៉ូណា។ Devy បានទៅជួប Brother Squirrel ហើយទទួលបានថ្នាំនេះចំនួន 30គ្រាប់។

ថ្នាំវ៉ាក់សាំងទប់ស្កាត់មេរោគកូរ៉ូណា nCoV នឹងត្រូវបានពិសោធនៅដើមសប្ដាហ៍ក្រោយ

ឱសថបុរាណចិនក៏ត្រូវបានគេយកមកប្រើសម្រាប់ព្យាបាលជំងឺកូរ៉ូណា

សូម្បីតែក្រោយពេលគាត់ត្រូវគ្រូពេទ្យពិនិត្យឃើញថា មិនមានផ្ទុកមេរោគកូរ៉ូណាប្រភេទ nCoV ក៏ដោយ ប៉ុន្តែ Devy នៅតែជឿថា ការស្វែងរកថ្នាំអេដស៍ គឺជាជម្រើសត្រឹមត្រូវ។

“អ្នកមានរក្សាខ្សត់”

នៅលើទំព័រសារព័ត៌មាន Reuters លោក Brother Squirrel (ឈ្មោះពិត Andy Li) បានឱ្យដឹងថា បន្ទាប់ពីបានឮថា មន្ត្រីសុខាភិបាលចិន ណែនាំឱ្យប្រើថ្នាំសម្រាប់អ្នកជំងឺអេដស៍ ដើម្បីព្យាបាលជំងឺកូរ៉ូណា លោក និងអ្នកជំងឺអេដស៍ជាច្រើននាក់ ក៏បាននាំគ្នាចែករំលែក និងប្រមូលបានថ្នាំអេដស៍ Kaletra ប្រហែល 5,400គ្រាប់ ក្នុងរយៈពេលមិនដល់1សប្ដាហ៍។ ក្រោយមក ពួកគេបានបង្ហោះសារនៅលើបណ្ដាញសង្គម Weibo ដើម្បីស្វែងរកអ្នកត្រូវការថ្នាំនេះ។

Andy យល់ថា ក្រុមរបស់គាត់ដូចជា “កំពុងអនុវត្តភារកិច្ចយោធា” ដូច្នោះដែរ។ ក្នុងរយៈពេល3ថ្ងៃដំបូងបន្ទាប់ពីបង្ហោះសារ លោក Andy បានទទួលសាររាប់រយ ធ្វើឱ្យគាត់រវល់រកតែពេលហូបបាយមិនចង់បាន ព្រោះមមាញឹកនឹងការរៀបចំថ្នាំធ្វើទៅឱ្យអ្នកដែលកំពុងត្រូវការ។

Andy បន្ថែមថា ៖ “មានមនុស្សច្រើនណាស់ដែលកំពុងត្រូវការថ្នាំនេះ ហើយខ្ញុំក៏មិនចង់ខ្ជះខ្ជាយពេលវេលា ព្រោះពេលវេលានៅពេលនេះ គឺជាអាយុជីវិត”។

ឱកាសចំណេញពីថ្នាំអេដស៍

ទន្ទឺមនិងសប្បុរជនដូច Andy ក៏មានមនុស្សជាច្រើនកំពុងរកបានផលចំណេញពីតម្រូវការថ្នាំអេដស៍នេះ។

មនុស្សជាង 34,893នាក់ ត្រូវបានគេបញ្ជាក់ថា បានឆ្លងមេរោគកូរ៉ូណានៅប្រទេសចិន ដែលភាគច្រើនគឺជាអ្នកស្រុក Wuhan នៅខេត្ត Hubei។ ក៏ប៉ុន្តែ កង្វះខាតឧបករណ៍ពិសោធន៍ បានធ្វើឱ្យមនុស្សជាច្រើនសង្ស័យថា ជាក់ស្ដែងមានមនុស្សច្រើនជាងនេះកំពុងផ្ទុកមេរោគ តែមិនទាន់បានពិនិត្យ។

វ៉ាក់សាំងការពារមេរោគរលាកសួត Wuhan នឹងមានក្នុងអំឡុង3ខែទៀត

Gatsby Fang ដែលជាអ្នកនាំទំនិញឆ្លងដែននៅប្រទេសចិន បានប្រាប់ថា គាត់បានបញ្ជាទិញថ្នាំអេដស៍ Kaletra ពីប្រទេសឥណ្ឌាកាលពីថ្ងៃទី 23មករា បន្ទាប់ពីមានដំណឹងថា ប្រភេទថ្នាំនេះអាចជួយទប់ទល់មេរោគកូរ៉ូណាបាន។

Gatsby បង្ហើបឱ្យដឹងថា ថ្នាំមួយដបដែលមាន60គ្រាប់ គាត់លក់ក្នុងតម្លៃ600យន់ (ប្រហែល85ដុល្លារអាមេរិក) គឺគាត់ចំណេញចាប់ពី 200-300យន់ (28-42ដុល្លារ) ក្នុងមួយដប។ ជាធម្មតា តម្លៃរបស់ថ្នាំនេះ ត្រឹមតែ100យន់ (14ដុល្លារ) ប៉ុណ្ណោះ តែពេលនេះ វាបានឡើងដល់ 300-400យន់ (42-57ដុល្លារ) ក្នុងមួយដប។ ក្រោយការនាំចូលទំនិញបាន2ថ្ងៃ Gatsby បានលក់ដាច់គ្មានសល់។ មានអតិថិជនខ្លះ បានបញ្ជាទិញដល់ទៅ 600ដបក្នុងពេលតែមួយ។

តាមការឱ្យដឹងពីអ្នកជំនួញឆ្លងដែនខាងលើ អតិថិជនរបស់គាត់មានច្រើនប្រភេទ ចាប់ពីអ្នកដែលមានផ្ទុកមេរោគកូរ៉ូណា គ្រូពេទ្យជួរមុខនៅខេត្ត Hubei រហូតដល់អ្នកដែលមិនមានផ្ទុកមេរោគនេះសោះ ក៏ទិញទុកការពារផងដែរ។ ក្រៅពីនេះ ក៏មានអ្នកខ្លះក្លែងធ្វើជាអ្នកជំងឺមកទិញថ្នាំអេដស៍ដើម្បីយកទៅលក់បន្ត រកចំណេញ។

យ៉ាងណាក៏ដោយ លោក Gatsby បានឱ្យដឹងថា អតិថិជនភាគច្រើនរបស់គាត់ គឺជាអ្នកដែលមិនទាន់ទទួលបានការព្យាបាល ឬមិនទាន់ដឹងច្បាស់ថាខ្លួនមានផ្ទុកមេរោគដ៏សាហាវនេះដែរឬអត់។

សូមបញ្ជាក់ថា ថ្វីបើមានការប្រើប្រាស់ថ្នាំអេដស៍ដើម្បីព្យាបាលអ្នកជំងឺកូរ៉ូណានៅប្រទេសចិន ប៉ុន្តែ អង្គការសុខភាពពិភពលោក WHO បានប្រកាសថា បច្ចុប្បន្ន គេមិនទាន់រកឃើញថ្នាំ ឬវិធីព្យាបាលពិសេសណាមួយសម្រាប់មេរោគនេះនៅឡើយ៕

ប្រភព៖ សារព័ត៌មានបរទេស

February 8, 2020

Author: សឿន សំណាង