Author: សឿន សំណាង

អ្នកស្លាប់ដោយសារវីរុសកូរ៉ូណា (Covid-19) កើនដល់ 1,115នាក់ ក្នុងនោះ 8.242នាក់ កំពុងស្ថិតក្នុងស្ថានភាពធ្ងន់ធ្ងរ
អ្នកស្លាប់ថ្មីដោយសារមេរោគកូរ៉ូណា មានចំនួន 97នាក់ កើន 9,5% បើធៀបនឹងថ្ងៃម្សិលមិញ (11កុម្ភៈ) ធ្វើឱ្យចំនួនអ្នកស្លាប់សរុបឡើងដល់ 1.115នាក់ និងអ្នកបានឆ្លងមេរោគនេះ កើនដល់ 45.153នាក់។
គណៈកម្មការសុខាភិបាលខេត្ត Hubei នៃប្រទេសចិន ថ្ងៃនេះ បានប្រកាសថា អ្នកស្លាប់ថ្មីដោយសារមេរោគកូរ៉ូណា មានចំនួន 94នាក់ តិចជាង 9នាក់ បើធៀបនឹងម្សិលមិញ ធ្វើឱ្យចំនួនអ្នកស្លាប់នៅក្នុងខេត្ត Hubei ឡើងដល់ 1.068នាក់។
ខេត្ត Hubei ក៏បានរកឃើញអ្នកផ្ទុកមេរោគកូរ៉ូណាថ្មីបន្ថែម 1.638នាក់ ធ្វើឱ្យចំនួនអ្នកឆ្លងមេរោគនេះ សរុប កើនដល់ 33,366នាក់។
ចំនួនអ្នកស្លាប់ថ្មីនៅទូទាំងប្រទេសចិន (ដីគោក) គឺ 97នាក់។ អ្នកឆ្លងថ្មីមានចំនួន 1.998នាក់។ បច្ចុប្បន្ន ទូទាំងប្រទេសចិន មានអ្នកស្លាប់សរុបទាំងមុនទាំងក្រោយ គឺ 1.113នាក់ និងអ្នកឆ្លងមេរោគសរុប 44.636 នាក់។ ចំណែកអ្នកដែលបានជាសះស្បើយពីជំងឺនេះ មានចំនួន 4.633នាក់។
ដូច្នេះ គិតមកដល់ថ្ងៃនេះ នៅទូទាំងពិភពលោក មានអ្នកស្លាប់ដោយសារអាសន្នរោគកូរ់ូណា សរុប 1.115នាក់ ក្នុងនោះមាន2ករណីនៅខាងក្រៅប្រទេសចិន (ដីគោក) គឺមួយនៅហ្វីលីពីន និងមួយករណីទៀតនៅក្រុងហុងកុង។ រីឯអ្នកដែលមានផ្ទុកមេរោគនេះ មានចំនួន 45.153នាក់ ក្នុងនោះមាន 8.242នាក់ កំពុងស្ថិតក្នុងស្ថានភាពធ្ងន់ធ្ងរ។ អ្នកដែលបានព្យាបាលជាសះស្បើយនៅទូទាំងពិភពលោក មានចំនួន 4.687នាក់៕
ប្រភព៖ សារព័ត៌មានបរទេស
February 12, 2020
បើសិនយើងពង្រីងទឹកសមុទ្រឱ្យអស់ តើផែនដីនឹងមានរូបរាងយ៉ាងណា?
សមុទ្រកំពុងគ្របដណ្ដប់ផ្ទៃដីភាគច្រើននៃភពផែនដី រួមទាំងជួរភ្នំវែងបំផុតក្នុងលោក និងតំបន់ “ស្ពាន” បុរាណដែលមនុស្សប្រើប្រាស់ដើម្បីធ្វើដំណើរឆ្លងទ្វីប។
នៅក្នុងឃ្លីបវីដេអូមួយដែលត្រូវបានបង្កើតឡើងដោយទីភ្នាក់ងារអវកាស NASA កាលពីឆ្នាំ 2008 អ្នកវិទ្យាសាស្ត្រខាងភព គឺលោកបណ្ឌិត James O’Donoghue បានបង្ហាញឱ្យយើងឃើញអំពីរូបរាងដ៏សោះកក្រោះនៃភពផែនដី បន្ទាប់ពីទឹកក្នុងមហាសមុទ្រ ត្រូវបានធ្វើឱ្យរីងហួតអស់។
លោកបណ្ឌិត James O’Donoghue បច្ចុប្បន្ន ធ្វើការឱ្យទីភ្នាក់ងារអវកាសជប៉ុន JAXA ដែលដើមឡើយ គាត់ធ្លាប់បានធ្វើការឱ្យអង្គការ NASA របស់សហរដ្ឋអាមេរិក។ លោកបណ្ឌិត James O’Donoghue បានប្រើប្រាស់ឃ្លីបវីដេអូរបស់អ្នករូបវិទ្យា និងជាផលិតករភាពយន្តតុក្កតា Horace Mitchell ដែលបានបង្កើតឡើងកាលពីឆ្នាំ 2008។ បណ្ឌិតរូបនេះ បានបន្ថយល្បឿននៃវីដេអូ និងបានបន្ថែមសញ្ញា ឬរូបភាពនៃកម្រិតទឹកក្នុងសមុទ្រដែលហួតបន្តិចម្ដងៗ ទាល់តែអស់ពីផែនដី។
បន្ទាប់ពីទឹកសមុទ្រត្រូវរីង ផ្នែកដំបូងនៃផ្ទៃដីដែលលេចចេញ គឺជាខ្ពង់រាបបាត់សមុទ្រ និងបណ្ដាចង្កេះទ្វីប ឬតំបន់ខណ្ឌចែកព្រំដែននៃបណ្ដាទ្វីប។
លោកបណ្ឌិត James O’Donoghue បានមានប្រសាសន៍ថា ៖ “ខ្ញុំបានពន្យឺតផ្នែកដំបូងនៃវីដេអូ ហើយពិតជាគួរឱ្យភ្ញាក់់ផ្អើលណាស់ ព្រោះមានទេសភាពដ៏ស្រស់ស្អាតនៅក្នុងសមុទ្រដែលលេចចេញក្នុងជម្រៅ10ម៉ែត្រដំបូង”។
បណ្ដាខ្ពង់រាបបាតសមុទ្ររួមមានតំបន់ខ្ពស់ៗដែលមនុស្សយើងសម័យដើម បានប្រើប្រាស់ដើម្បីធ្វើការផ្លាស់ទីពីទ្វីបនេះ ទៅកាន់ទ្វីបនោះ។ កាលពីប៉ុន្មានម៉ឺនឆ្នាំមុន បុព្វបុរសរបស់យើងអាចធ្វើដំណើរពីទ្វីបអឺរ៉ុបទៅកាន់ចក្រភពអង់គ្លេស ពីរុស្ស៊ីទៅកាន់អាមេរិក និងពីអូស្ត្រាលីទៅកាន់បណ្ដាកោះផ្សេងៗដែលនៅជុំវិញនោះ។
បណ្ឌិត O’Donoghue បន្ថែមថា ៖ “នៅពេលដែលយុគសម័យទឹកកកចុងក្រោយបានកើតឡើង ទឹកសមុទ្រត្រូវកកជាទឹកកក ដូចទៅនឹងផ្ទាំងទឹកកកធំៗនៅប៉ូលទាំងពីរនៃផែនដី។ នោះគឺជាមូលហេតុដែលនាំឱ្យបណ្ដា “ស្ពាន” នៃទ្វីបកើតឡើង។ “ស្ពាន” ទាំងនេះ អនុញ្ញាតឱ្យមនុស្សលោកអាចធ្វើដំណើរពីតំបន់មួយទៅតំបន់មួយ។ នៅពេលយុគសម័យទឹកកកបានកន្លងផុតទៅ ទឹកសមុទ្រក៏បានលុបផ្លូវទាំងនេះ”។
ដោយការបំបាត់ទឹកសមុទ្រ ឃ្លីបវីដេអូនេះ បាននាំយើងទៅទស្សនាពិភពលោកក្នុងយុគសម័យដើមរបស់មនុស្ស។
វាក៏បានបង្ហាញឱ្យឃើញជួរភ្នំដែលវែងបំផុតរបស់ផែនដី នៅពេលទឹកសមុទ្រស្រកចុះចាប់ពី 2,000ម៉ែត្រ ទៅ 3,000ម៉ែត្រ។ នោះគឺជាជួរភ្នំដែលស្ថិតនៅកណ្ដាលមហាសមុទ្រ ប្រវែងជាង 60,000គីឡូម៉ែត្រ និងអូសបន្លាយពេញផែនដី។ 90% នៃជួរភ្នំនេះ ស្ថិតក្រោមទឹកសមុទ្រ។
នៅពេលទឹកសមុទ្របានស្រកចុះជាង 6,000ម៉ែត្រ ផ្ទៃក្រឡានៃសមុទ្រភាគច្រើនបានបាត់បង់។ ប៉ុន្តែ គេត្រូវសម្រកទឹកសមុទ្រ 5,000ម៉ែត្របន្ថែមទៀត ទើបតំបន់ជ្រៅបំផុតនៃជ្រលង Mariana ត្រូវរីងអស់។
លោកបណ្ឌិត James O’Donoghue បញ្ជាក់ថា ៖ “ការធ្វើឱ្យទឹកសមុទ្ររីង មិនត្រឹមតែឱ្យយើងមើលឃើញជម្រៅបាតសមុទ្រនោះទេ តែវាក៏ជួយឱ្យមើលឃើញប្រវត្តិសាស្ត្រនាយុគសម័យដើមនៃមនុស្សជាតិផងដែរ”៕
ប្រភព៖ សារព័ត៌មានបរទេស
February 11, 2020
ក្រុមគិលានុបដ្ឋាកនៅវូហាន នាំគ្នាកោរសក់ តស៊ូមេរោគ និងមើលថែទាំអ្នកជំងឺវីរុសកូរ៉ូណា
ប្រព័ន្ធសារព័ត៌មាន ប៊ីស៊ីនីស អ៊ីនសៃឌើរ បានរាយការណ៍នៅថ្ងៃទី11 កុម្ភៈថា ក្រុមគិលានុបដ្ឋាកជនជាតិចិនដែលធ្វើដំណើរទៅប្រតិបត្តិតួនាទីនៅក្នុងទីក្រុងវូហាន បានរួមគ្នាកោរសក់ ដើម្បីងាយស្រួលក្នុងការប្រតិបត្តិភារកិច្ចតស៊ូប្រយុទ្ធប្រឆាំងនឹងការឆ្លងរាលដាលរបស់មេរោគវីរុសកូរ៉ូណាប្រភេទថ្មី។
របាយការណ៍បានឱ្យដឹងថា ការកោរសក់ក្បាលនេះ មានប្រយោជន៍ចំពោះការធ្វើការងារច្រើនប្រការ ទាំងការការពារការឆ្លងមេរោគដែលចម្លងតាមរយៈសរសៃសក់ដែលប៉ះពាល់គ្នា កាត់បន្ថយភាពប្រថុយប្រថានក្នុងការប្រឡាក់ប្រឡូសមេរោគ និងថែមទាំងជួយឱ្យការពាក់ និងដោះឧបករណ៍ការពារផ្សេងៗបានកាន់តែងាយស្រួលទៀតផង។
សម្ពាធរឿងពេលវេលាសម្រាប់បុគ្គលិកពេទ្យនៅក្នុងទីក្រុងវូហាន មានភាពខ្លាំងក្លា និងមានតម្លៃគ្រប់វិនាទី…
ការកោរសក់ដែលវែងរំសាយនៅលើក្បាលចេញ គឺជាគំរូដ៏អស្ចារ្យមួយនៃការលះបង់របស់បណ្ដាក្រុមបុគ្គលិកពេទ្យដែលកំពុងស្ថិតនៅក្នុងសមរភូមិមុខក្នុងការប្រយុទ្ធជាមួយការឆ្លងរាលដាលនៃមេរោគ។
ក្រៅពីការកាត់បន្ថយការឆ្លងរាលដាលរបស់មេរោគដែលអាចកើតឡើងហើយ ការគ្មានសក់ក្បាល នៅបានធ្វើឱ្យដំណាក់កាលនៃការពាក់ និងដោះឈុតការពារគ្រោះថ្នាក់ កាន់តែងាយស្រួលឡើងតាមឃ្លីបវីដេអូដែលបានផូស្តដោយទីភ្នាក់ងារសារព័ត៌មានស៊ីនហួរបស់ចិនទៀតផង។
សាន សៀ ដែលធ្វើការជាគិលានុបដ្ឋាកនៅក្នុងមន្ទីរពេទ្យ រឹន មីន នៃមហាវិទ្យាល័យវូហាន បានកោរសក់ទាំងអស់នៅក្បាលរបស់នាងចោលទាំងអស់កាលពីចុងខែមករានោះ បាននិយាយថា៖ “បុគ្គលិកនៅក្នុងមន្ទីរពេទ្យក្នុងទីក្រុងវូហាន នឹងត្រូវស្លៀកឈុតការពារពេញមួយថ្ងៃ និងដើម្បីសន្សំសំចៃពេលវេលាដ៏មានតម្លៃជាមួយការពាក់ និងដោះឈុតនេះពេលត្រូវចូលបន្ទប់ទឹក…ពួកយើងនឹងស្លៀកខោទឹកនោមសម្រាប់មនុស្សធំ ដើម្បីកុំឱ្យត្រូវដោះឈុតការពារនោះពេលចូលបន្ទប់ទឹក”។
អ្នកព្យាបាលដោយការធ្វើចលនាមកពីទីក្រុងប៉េកាំង លោក ឃែនដៃស៍ ឈិន បានរៀបរាប់កាសែត វ៉ាស៊ីនតោន ផូស្តថា “បុគ្គលិកពេទ្យ ក៏ជាមនុស្សដូចគ្នាដែរ ខ្ញុំគិតថា វាជាអំឡុងពេលនៃភាពលំបាកលំបិនទាំងខាងរាងកាយ និងផ្លូវចិត្ត សម្រាប់គ្រូពេទ្យ និងគិលានុបដ្ឋាក និងមន្ត្រីពេទ្យគ្រប់រូបនៅក្នុងទីក្រុងវូហាន”៕
ប្រភព៖ សារព័ត៌មានបរទេស
February 11, 2020
ម្ដាយរបស់សពលោកគ្រូ Li Wenliang ស្នើឱ្យក្រុមនគរបាលនៅ Wuhan ចេញមកបកស្រាយ ក្រោយការស្លាប់របស់កូនប្រុស
ម្ដាយរបស់សពវេជ្ជបណ្ឌិត Li Wenliang និយាយថាកូនប្រុសរបស់គាត់ត្រូវគេចាប់ទៅកាន់ការិយាល័យនគរ បាលទាំងកណ្ដាលយប់ និងត្រូវបង្ខំឱ្យស៊ីញេទទួលស្គាល់ថា បានបង្ហោះសារប្រឌិត ខណៈដែលគេមិនទាន់ដឹងច្បាស់អំពីបញ្ហានោះ។ អ្នកស្រីស្នើឱ្យនគរបាលក្រុង Wuhan ចេញមុខបកស្រាយអំពីរឿងនេះ។
សារព័ត៌មាន South China Morning Post កាលពីថ្ងៃទី 9កុម្ភៈ បានរាយការណ៍ថា ម្ដាយរបស់សពលោកវេជ្ជបណ្ឌិត Li Wenliang (ដែលបានបាត់បង់ជីវិតដោយសារមេរោគកូរ៉ូណា ក្រោយពីបានបញ្ចេញសារព្រមានអំពីអាសន្នរោគនេះ) ស្នើឱ្យនគរបាលបកស្រាយអំពីអ្វីដែលពួកគេបានធ្វើមកលើកូនរបស់គាត់។
ក្នុងឃ្លីបវីដេអូមួយដែលបានបង្ហោះនៅលើទំព័រ Pear Video ម្ដាយរបស់សពលោកគ្រូពេទ្យ Li Wenliang បាននិយាយថាកូនរបស់គាត់ត្រូវគេហៅទៅកាន់ការិយាល័យនគរបាលក្រុង Wuhan និងបានចាប់ឱ្យចុះហត្ថលេខាលើកំណត់ត្រាមួយដែលបង្ខំឱ្យទទួលស្គាល់ថា បានចែករំលែកព័ត៌មានមិនពិតអំពីអាសន្នរោគកូរ៉ូណា នៅពេលបញ្ហាមិនទាន់បានស៊ើបអង្កេតត្រឹមត្រូវ។
ម្ដាយរបស់សពលោកគ្រូ Li រៀបរាប់បណ្ដើរ យំបណ្ដើរ៖ “នៅពេលដែលការពិតមិនទាន់លាតត្រដាង កូនប្រុសរបស់ខ្ញុំត្រូវគេកោះហៅទៅកាន់ប៉ុស្តិ៍នគរបាលនៅ Wuhan ទាំងកណ្ដាលយប់។ បើសិនពួកគេមិនបកស្រាយឱ្យបានច្បាស់អំពីបញ្ហានេះ គឺមិនបាននោះទេ!”។
Li Wenliang ត្រូវបានគេចាត់ទុកថា ជាមនុស្សម្នាក់ក្នុងចំណោមមនុស្សដំបូងគេដែលបានចែករំលែកព័ត៌មាន និងព្រមានអំពីអាសន្នរោគរលាកសួតដែលបង្កឡើងដោយមេរោគកូរ៉ូណា (nCoV) នៅប្រទេសចិន។ ក្នុងថ្ងៃទី30 ខែធ្នូ ឆ្នាំ2019 Li Wenliang បានផ្ញើសារចូលក្នុងក្រុម WeChat របស់គាត់ដែលមានមិត្តភក្ដិរបស់គាត់ 150នាក់ ដែលជាមិត្តចាស់។ គាត់បានព្រមានអំពីអ្នកជំងឺ 7នាក់ដែលបានឆ្លងមេរោគមួយប្រភេទដែលគាត់យល់ថា ដូចទៅនឹងមេរោគផ្លូវដង្ហើម SARS (Severe Acute Respiratory Syndrome) ដែលធ្លាប់បានកើតឡើងនៅប្រទេសចិនកាលពីឆ្នាំ2002 និងបានសម្លាប់មនុស្សប្រមាណជា800នាក់ នៅទូទាំងពិភពលោក។
សាររបស់លោកគ្រូ Li បានទាក់ទាញចំណាប់អារម្មណ៍របស់ក្រុមមន្ត្រីអាជ្ញាធរក្រុង បន្ទាប់ពីមនុស្សម្នាក់ក្នុងក្រុមរបស់គាត់ បានបង្ហោះរូបភាពនៃការជជែករបស់ពួកគេនៅលើបណ្ដាញសង្គម។ ក្រោយមកទៀត គ្រូពេទ្យ7នាក់ដែលស្ថិតក្នុងក្រុមជជែករបស់លោកគ្រូ Li ក៏បានចែករំលែកព័ត៌មាននេះទៅកាន់ក្រុមជជែកចំនួន3ផ្សេងទៀត។
នៅក្នុងយប់ដដែលនោះ ក្រុមមន្ត្រីសុខាភិបាលនៃក្រុង Wuhan បានកោះហៅលោកគ្រូ Li ដោយស្នើឱ្យគាត់និយាយអំពីមូលហេតុដែលគាត់បានចែករំលែកព័ត៌៌មាននេះ។ ថ្ងៃទី3មករា ក្រុមនគរបាលបានហៅគាត់ទៅសួរនាំ ហើយបង្ខំឱ្យគាត់សន្យាថា “បានចែករំលែកព័ត៌មានមិនពិត ធ្វើឱ្យច្របូកច្របល់ក្នុងសង្គមជាតិ”។
ថ្ងៃទី8មករា លោកគ្រូ Li បានពិនិត្យសុខភាពអ្នកជំងឺកូរ៉ូណាម្នាក់។ ពីរថ្ងៃក្រោយមក លោកគ្រូ Li ចាប់ផ្ដើមមានអាការក្អក និងពិបាកដកដង្ហើម ប៉ុន្តែ ការពិនិត្យជាច្រើនលើកបង្ហាញថា គាត់មិនមានផ្ទុកមេរោគកូរ៉ូណា nCoV នោះទេ។
ថ្ងៃទី12មករា គ្រូពេទ្យ Li បានចូលសម្រាកព្យាបាលក្នុងមន្ទីរពេទ្យ ហើយថ្ងៃទី1កុម្ភៈ គាត់ត្រូវគេបញ្ជាក់ថា មានផ្ទុកមេរោគកូរ៉ូណា។
ម្ដាយរបស់សពលោកគ្រូ Li បន្តថា កូនប្រុសរបស់គាត់ជាកូនល្អ ហើយនៅកន្លែងធ្វើការវិញ គេក៏ជាអ្នករួមការងារដ៏ល្អម្នាក់ដែរ។ នៅក្នុងការរៀបចំកាលបរិច្ឆេទប្រចាំការ គ្រូពេទ្យម្នាក់នេះ តែងតែត្រៀមខ្លួនជានិច្ចដើម្បីមកប្រចាំការជំនួសមិត្តរួមការងារ ប្រសិនបើពួកគេត្រូវការ។
អ្នកស្រីនិយាយថា៖ “តាំងពីតូច វាតែងស្ដាប់បង្គាប់ឪពុកម្ដាយ ហើយពេលត្រូវរំពាត់ក៏មិនដែលនិយាយថាឈឺនោះដែរ។ អ្វីៗក៏វាចេះទ្រាំទាំងអស់។ ការងាររបស់វា រវល់ខ្លាំងណាស់ មានពេលខ្លះវាត្រូវយាម2យប់ក្នុង1សប្ដាហ៍ ស្របពេលដែលអ្នកខ្លះ យាមតែ1យប់/អាទិត្យ”។
សូមរំឭកថា ថ្មីៗនេះ តុលាការកំពូលរបស់ចិន ក៏ធ្លាប់បាននិយាយថា នគរបាលក្រុង Wuhan មិនគួរពិន័យទៅលើលោកវេជ្ជបណ្ឌិត Li រួមនឹងមនុស្ស 7នាក់ផ្សេងទៀត ដោយសារតែព័ត៌មានរបស់ពួកគេ មិនមែនប្រឌិត។
ចំណែកគណៈកម្មការត្រួតពិនិត្យជាតិនៃប្រទេសចិន ថ្មីៗនេះ ក៏បានបញ្ជូនក្រុមស៊ើបអង្កេតមួយក្រុមទៅកាន់ក្រុង Wuhan បន្ទាប់ពីការស្លាប់របស់វេជ្ជបណ្ឌិត Li Wenliang។ សកម្មភាពនេះ បានបង្ហាញថា ស្ថានភាពអាសន្នរោគកូរ៉ូណានៅទីនោះ ពិតជាមិនធម្មតានោះទេ។
កាលពីថ្ងៃទី 8កុម្ភៈ Fu Xuejie ដែលជាប្រពន្ធរបស់សពលោកគ្រូពេទ្យ Li ក៏បាននិយាយជាសាធារណៈដំបូងរបស់នាង ដោយក្នុងនោះ នាងបានអរគុណអ្នកទាំងអស់គ្នាដែលមានការអាណិតអាសូរចំពោះស្វាមីនាង។ នាងក៏ថែមទាំងបានបដិសេធអំពីព័ត៌មានដែលថា នាងបានអំពាវនាវសុំជំនួយពីសាធារណៈជន ទាក់ទិននឹងបញ្ហាហិរញ្ញវត្ថុ។
Fu Xuejie បានថ្លែងថា នាងនឹងទទួលយកតែសំណងជាផ្លូវការពីអាជ្ញាធរ កន្លែងធ្វើការរបស់ស្វាមីនាង និងប្រាក់សំណងទៅតាមគោលនយោបាយធានារ៉ាប់រង ឬប្រាក់រួមចំណែកពីក្រុមអង្គការមនុស្សធម៌ណាដែលទទួលស្គាល់ពីអាជ្ញាធរតែប៉ុណ្ណោះ។
គ្រួសារសពលោកគ្រូ Li ដែលជាគ្រូពេទ្យដំបូងម្នាក់ក្នុងចំណោមក្រុមគ្រូពេទ្យដំបូងគេដែលបានព្រមានអំពីអាសន្នរោគកូរ៉ូណា ប៉ុន្តែត្រូវអាជ្ញាធរចោទថា បាន “បញ្ចេញព័ត៌មានមិនពិត” ទទួលបានសំណងជាទឹកប្រាក់ 821,000យន់ (ប្រហែល 117,400 ដុល្លារអាមេរិក) បន្ទាប់ពីបានបាត់បង់ជីវិតដោយសារមេរោគកូរ៉ូណា។ National Interest បានរាយការណ៍ថា សំណងនេះរួមមាន សំណងមួយលើក 785,000យន់ ($112,100) និងប្រាក់ចំណាយលើពិធីបុណ្យសព 36,834យន់ ($5,260)៕
ប្រភព៖ សារព័ត៌មានបរទេស
February 11, 2020
“ប៉ាធីងហ្គា” ភយន្តរាយលំដាប់លេខ2 បន្ទាប់ពីវីរុសកូរ៉ូណា…
ខណៈដែលទូទាំងពិភពលោក កំពុងតស៊ូជាមួយការឆ្លងរាលដាលរបស់មេរោគវីរុសកូរ៉ូណាប្រភេទថ្មី2019 ដែលមានដើមកំណើតពីសត្វព្រៃនៅក្នុងទីក្រុងវូហាន មណ្ឌលហ៊ូពេយ ក្នុងប្រទេសចិននោះ នៅឯភូមិភាគសមុទ្រខ្សាច់ “តំបន់ចុងពយ អាហ្វ្រិក” ក្នុងតំបន់អាហ្វ្រិកខាងកើត ក៏កំពុងប្រឈមនឹងភយន្តរាយពីសត្វដូចគ្នាដែរ តែវាគឺ ហ្វូង“សត្វកណ្ដូបប៉ាធីងហ្គា” ដែលកំពុងរាតត្បាតរាលដាលយ៉ាងខ្លាំក្លាដូចភ្លើងឆេះព្រៃចំនួនរាប់ម៉ឺនលានក្បាល ខាំស៊ីកម្ទេចផលដំណាំ និងរុក្ខជាតិខូចខាតស្ទើរតែគ្មានសល់អ្វី។
ហ្វូងប៉ាធីងហ្គា ឬសត្វកណ្ដូបពុកមាត់ខ្លីនេះ ចាប់ផ្ដើមរាតត្បាតមកពីប្រទេស “យេមែន” ហោះហើរឆ្លងសមុទ្រក្រហមចូលមកក្នុងតំបន់អាហ្វ្រិកខាងកើតតាំងពីចុងឆ្នាំកន្លងទៅ(ដូចវីរុសកូរ៉ូណាដែរ)ក្រោយពីមានភ្លៀងធ្លាក់នៅក្នុងប្រទេសយេមែន ធ្វើឱ្យពួកវាអាចបន្តបង្កាត់ពូជបានយ៉ាងលឿនរហ័សជាពិសេស និងក្នុង 1ថ្ងៃៗ ពួកវាអាចហើរបានឆ្ងាយដល់ទៅ 150គីឡូម៉ែត្រ និងមួយក្បាលៗនៅអាចស៊ីចំណីបានស្មើនឹងទម្ងន់ខ្លួនរបស់វាទៀតផង។
អង្គការស្បៀងអាហារ និងកសិកម្ម(FAO)នៃអង្គការសហប្រជាជាតិ បានអំពាវនាវឱ្យគ្រប់ប្រទេសជួយគ្នាតស៊ូប្រយុទ្ធនឹងសត្វកណ្ដូបប៉ាធីងហ្គាតាំងពីពាក់កណ្ដាលខែមករា ឆ្នាំនេះមកម្ល៉េះ មុននឹងដល់រដូវប្រមូលផលក្នុងខែមេសា និងថែមទាំងបានព្រមានថា ប្រសិនបើ “ទប់ទល់មិនបាន” ក្នុងខែមិថុនា ពួកវានឹងកើនចំនួនទ្វេដងឡើងដល់ 500ដង!! និងអាចរាតត្បាតឆ្លងទៅដល់ឆ្នាំក្រោយ ឬឆ្នាំតៗទៅទៀតផង។
អង្គការសហប្រជាជាតិបានបញ្ជាក់ថា ការរាតត្បាតរបស់ហ្វូងសត្វកណ្ដូបប៉ាធីងហ្គាលើកនេះ ធ្ងន់ធ្ងរបំផុតក្នុងរយៈពេល 70ឆ្នាំកន្លងមកក្នុងប្រទេសកេនយ៉ា និងធ្ងន់ធ្ងរបំផុតក្នុងរយៈពេល 25ឆ្នាំក្នុងប្រទេសសូម៉ាលី និងអេត្យូពី រហូតដល់កាលពីដើមខែកុម្ភៈនេះ ប្រទេសសូម៉ាលី បានក្លាយជាប្រទេសដំបូងគេដែលបានប្រកាស”ស្ថានភាពអាសន្ន” ក្នុងប្រទេស ដើម្បីទប់ទល់នឹងគ្រោះភ័យដែលឈ្លានពានដោយសត្វកណ្ដូបប៉ាធីងហ្គា។
តែប្រទេសសូម៉ាលី មានបញ្ហាសន្តិសុខជាតិគ្មានស្ថិរភាព ទើបមិនអាចបញ្ជូនយន្តហោះឡើងទៅរោយថ្នាំសម្លាប់សត្វល្អិតដើម្បីកម្ចាត់ហ្វូងសត្វកណ្ដូបប៉ាធីងហ្គាបាននៅក្នុងតំបន់ជាច្រើន ធ្វើឱ្យការរាតត្បាតដ៏អាក្រក់នេះកាន់តែពង្រីកខ្លួនយ៉ាងធំទូលាយឡើង។ កសិករជាច្រើនខូចខាត និងបាត់បង់ទិន្នផលអស់យ៉ាងគ្មានសល់អ្វី ហុចផលប៉ះពាល់ដល់សន្តិសុខផ្នែកស្បៀងអាហារកាន់តែធ្ងន់ធ្ងរឡើង ខណៈដែលភូមិភាគនេះ មានមនុស្សអត់ឃ្លានយ៉ាងសែនលំបាកស្រាប់ទៅហើយចំនួនជាង 19លាននាក់។
ក្រៅពីសាងនូវភាពខូចខាតដល់ដំណាំកសិកម្មហួសនឹងបរិយាយហើយនោះ ហ្វូងសត្វកណ្ដូបប៉ាធីងហ្គា ថែមទាំងបង្កគ្រោះថ្នាក់ដល់ខ្សែផ្លូវហោះហើររបស់យន្តហោះទៀតផង ដូចជា កាលពីខែធ្នូ ឆ្នាំកន្លងទៅ ហ្វូងសត្វកណ្ដូបប៉ាធីងហ្គាបានហើរទៅចូលក្នុងប្រអប់គ្រឿងយន្ត បុកកញ្ចក់មុខ និងក្បាលយន្តហោះដឹកអ្នកដំណើររបស់ក្រុមហ៊ុនអាកាសចរណ៍ អេត្យូពី អ៊ែរឡាញ រហូតដល់ត្រូវប្ដូរផ្លូវហោះហើរត្រឡប់ទៅចុះចតបន្ទាន់នៅឯព្រលានយន្តហោះនៃទីក្រុង អ៊ែដឌិស អាបាបា វិញ។
គួររំឭកដែរថា កាលពីទសវត្សរ៍1990 “តំបន់ចុងពយ អាហ្វ្រិក” ធ្លាប់ប្រឈមនឹងការរាតត្បាតរបស់ហ្វូងសត្វកណ្ដូបប៉ាធីងហ្គាដល់ទៅ 6លើកធំៗ រួមទាំងក្នុងអំឡុងឆ្នាំ1987-1989 និងឆ្នាំ2003-2005 ផងដែរ។
តំបន់ចុងពយ អាហ្វ្រិក ជាតំបន់មួយនៅក្នុងភូមិភាគដែលក្រីក្រតោកយ៉ាក និងខ្វះការអភិវឌ្ឍខ្លាំងបំផុតក្នុងពិភពលោក ដូច្នេះហើយទើបភយន្តរាយពីកណ្ដូបប៉ាធីងហ្គាប្រៀបដូចជា “គ្រោះមហន្តរាយដ៏សែនអាក្រក់” ដែលយើងទាំងអស់គ្នាគួរតែបួងសួងភាវនា សូមកុំឱ្យ “វីរុសវូហាន” ឆ្លងរាលដាលទៅដល់ទីនោះអី ព្រោះគ្រាន់តែប៉ុណ្ណឹង តំបន់ចុងពយ អាហ្វ្រិក ហួសនឹងទប់ទល់បានទៅហើយ៕
ប្រភព៖ សារព័ត៌មានបរទេស
February 11, 2020
គួរឱ្យព្រួយបារម្ភ! ការសិក្សាស្រាវជ្រាវថ្មីបំផុត៖ រយៈពេលនៃការសម្ងំលាក់ខ្លួននៃមេរោគកូរ៉ូណាក្នុងខ្លួនមនុស្ស អាចឡើងដល់ 24ថ្ងៃ
ការសិក្សាស្រាវជ្រាវថ្មីបំផុតទៅលើអ្នកជំងឺកូរ៉ូណា nCoV ចំនួន 1,099នាក់ នៅឯមន្ទីរពេទ្យចំនួន 552កន្លែង បានរកឃើញថា រយៈពេលនៃការសម្ងំលាក់ខ្លួនរបស់មេរោគនេះនៅក្នុងរាងកាយមនុស្ស គឺយូរជាងការណែនាំកន្លងមក ដែលថា មានរយៈពេលត្រឹមតែ 2សប្ដាហ៍។
អ្នកវិទ្យាសាស្ត្រចិនមួយក្រុមបានប្រកាសអំពីការរកឃើញខាងនេះនៅលើទំព័រសារព័ត៌មាន medRxiv កាលពីថ្ងៃទី9 កុម្ភៈ ឆ្នាំ2020។ របាយការណ៍ខាងលើនេះ ត្រូវបានសរសេរដោយអ្នកសិក្សាស្រាវជ្រាវចំនួន 37រូប ក្នុងនោះមាន លោកវេជ្ជបណ្ឌិត Zhong Nanshan ជាប្រធានក្រុមដែលត្រូវបានតែងតាំងដោយគណៈកម្មការសុខាភិបាលជាតិនៃប្រទេសចិន។ អ្នកវិទ្យាសាស្ត្រមួយក្រុមនេះ បានប្រមូលទិន្នន័យពីអ្នកជំងឺកូរ៉ូណាចំនួន 1,099នាក់មកពីមន្ទីរពេទ្យចំនួន 552កន្លែង នៅក្នុងខេត្តក្រុងចំនួន 31របស់ប្រទេសចិន។
លទ្ធផលនៃការវិភាគទិន្នន័យដែលប្រមូលបាន បានបង្ហាញថា រយៈពេលនៃការសម្ងំលាក់ខ្លួន ជាមធ្យមគឺ 3ថ្ងៃ ខ្លីជាង 5ថ្ងៃ បើធៀបនឹងការស្រាវជ្រាវកន្លងមក ប៉ុន្តែ រយៈពេលនៃការសម្ងំលាក់ខ្លួននៅក្នុងរាងកាយមនុស្សរបស់វីរុសកូរ៉ូណា nCoV នេះ អាចចាប់ពី 0 ដល់ 24ថ្ងៃមុននឹងបញ្ចេញអាការ មិនមែន 14ថ្ងៃដូចការអះអាងកន្លងមកនោះទេ ហើយក្នុងចំណោមអ្នកដែលបានឆ្លងមេរោគនេះ គឺមានតែពាក់កណ្ដាលប៉ុណ្ណោះដែលមានរោគសញ្ញាគ្រុនក្ដៅ នៅពេលគ្រូពេទ្យពិនិត្យលើកទី1។
អំពីអាការរោគវិញ គឺគ្រុនក្ដៅ (57.9%) និងក្អក (67.7%) គឺជារោគសញ្ញាដែលកើតមានច្រើនបំផុត ប៉ុន្តែ ក៏មានអ្នកជំងឺត្រឹមតែ 43.8% ប៉ុណ្ណោះ ដែលមានអាការដូចខាងលើ មុនពេលចូលពេទ្យ។ ចំណែករោគសញ្ញារាក មាន 3.7% និងក្អួតចង្អោរ 5% គឺមានតិចតួចណាស់។ អ្នកជំងឺប្រមាណជា 25.2% គឺតែងមានជំងឺសម្ពាធឈាមខ្ពស់ ឬជំងឺស្ទះដង្ហើម។
អ្នកជំងឺដែលមិនបានបង្ហាញរោគសញ្ញាគ្រុនក្ដៅនៅពេលបានឆ្លងមេរោគកូរ៉ូណានេះ មានអត្រាខ្ពស់ជាង បើធៀបនឹងការមិនបង្ហាញរោគសញ្ញានៃអ្នកជំងឺ SARS និង MERS។ អ្នកជំងឺប្រភេទនេះ អាចចម្លងទៅអ្នកដទៃច្រើននាក់ដោយស្ងាត់ៗ ព្រោះថា អ្នកជំងឺខ្លួនឯងផ្ទាល់ ព្រមទាំងគ្រូពេទ្យ មិនបានដឹងថា ខ្លួនឯងមានផ្ទុកមេរោគនេះទេ។
“ការរកឃើញរយៈពេលនៃការសម្ងំលាក់ខ្លួនក្នុងរាងកាយមនុស្សបន្ទាប់ពីឆ្លងចូលហើយ ដែលអាចអូសបន្លាយដល់ទៅ 24ថ្ងៃបែបនេះ គឺពិតជាគួរឱ្យព្រួយបារម្ភខ្លាំងណាស់ ពិសេសចំពោះអ្នកដែលកំពុងត្រូវគេដាក់ឱ្យនៅដាច់ដោយឡែក បន្ទាប់ពីសង្ស័យថា មានផ្ទុកមេរោគកូរ៉ូណា។ ក៏ប៉ុន្តែ រយៈពេលមធ្យមនៃការសម្ងំលាក់ខ្លួន គឺខ្លីណាស់ ពោលគឺត្រឹមតែ 3ថ្ងៃប៉ុណ្ណោះ។ ប្រការនេះ មានន័យថា ពាក់កណ្ដាលនៃអ្នកឆ្លងមេរោគនេះ នឹងបញ្ចេញរោគសញ្ញា ក្រោយពីបានឆ្លងមេរោគបាន 3ថ្ងៃ ហើយអត្រានៃអ្នកជំងឺដែលមានមេរោគសម្ងំលាក់ខ្លួនយូរ គឺមានកម្រិតទាប”។ នេះបើតាមលោក Paul Hunter ជាសាស្ត្រាចារ្យផ្នែកវេជ្ជសាស្ត្រ នៅសាកលវិទ្យាល័យ East Anglia នៃប្រទេសអង់គ្លេស។
ការសិក្សាស្រាវជ្រាវថ្មីនេះ ទទួលបានជំនួយផ្នែកហិរញ្ញវត្ថុពីអង្គភាព និងស្ថាប័នចំនួន4 របស់ចិន គឺក្រសួងវិទ្យាសាស្ត្រ និងបច្ចេកវិទ្យា គណៈកម្មការវេជ្ជសាស្ត្រជាតិ សមាគមវិទ្យាសាស្ត្រធម្មជាតិ និងស្ថាប័នវិទ្យាសាស្ត្រ និងបច្ចេកវិទ្យានៃខេត្តក្វាងតុង។ ក្រុមអ្នកវិទ្យាសាស្ត្រដែលបានធ្វើការសិក្សាស្រាវជ្រាវខាងលើនេះ អះអាងថា ការរកឃើញរបស់ពួកគេ មិនទាន់ទទួលបានការវាយតម្លៃណាមួយពីក្រុមអ្នកជំនាញនៅឡើយទេ។ អង្គការសុខភាពពិភពលោក WHO ក៏បានបង្ហើបឱ្យដឹងដែរថា អង្គការនេះនឹងមិនធ្វើការផ្លាស់ប្ដូរការណែនាំកន្លងមករបស់ខ្លួនដែលថា រយៈពេលនៃការសម្ងំលាក់ខ្លួនរបស់មេរោគកូរ៉ូណានេះ គឺ 2សប្ដាហ៍នោះឡើយ៕
ប្រភព៖ សារព័ត៌មានបរទេស
February 11, 2020
ហុងកុងជម្លៀសមនុស្សចេញពីអាផាតមិនត៍មួយកន្លែង ដោយសារបារម្ភខ្លាចវីរុសកូរ៉ូណាឆ្លងតាមលូបង្ហូរទឹក
រដ្ឋបាលក្រុងហុងកុងបានជម្លៀសប្រជាជនមួយចំនួនចេញពីអាផាតមិនត៍ 1កន្លែង បន្ទាប់ពីរកឃើញភាពដែលអាចទៅរួចមួយដែលថា វីរុសកូរ៉ូណាអាចនឹងចម្លងវីរុសតាមរយៈលូបង្ហូរទឹកក្នុងអគារ។
ទីភ្នាក់ងារព័ត៌មាន CNN បានរាយការណ៍ថា ក្រុមមន្ត្រីសាធារណៈសុខាភិបាលនៅក្នុងតំបន់គ្រប់គ្រងពិសេសហុងកុង បានដំណើរការជម្លៀសអ្នកស្នាក់នៅមួយចំនួនចេញពីអគារអាផាតមិនត៍មួយកន្លែង ក្រោយពីរកឃើញភាពអាចទៅរួចដែលថា មេរោគវីរុសកូរ៉ូណាប្រភេទ2019 អាចចម្លងតាមរយៈប្រព័ន្ធលូទឹករបស់អគារមួយខ្នងនេះ។
លោកសាស្ត្រាចារ្យ យួន វ៉ក់ យង់ ប្រធានផ្នែករោគឆ្លងរបស់គណៈកម្មការមីក្រូជីវវិទ្យានៃមហាវិទ្យាល័យហុងកុង និងជាអ្នកជំនាញការម្នាក់នៅក្នុងក្រុមអ្នកស្រាវជ្រាវប្រយុទ្ធនឹងវីរុសកូរ៉ូណា បានធ្វើសន្និសីទព័ត៌មានបន្ទាន់មួយកាលពីរាត្រីថ្ងៃចន្ទ ទី10កុម្ភៈកន្លងទៅ ដោយលោកបានបញ្ជាក់ថា រកឃើញអ្នកឆ្លងមេរោគមរណៈប្រភេទនេះ យ៉ាងតិច 2នាក់នៅក្នុងអាផាតមិនត៍ “ហុង មើយ ហៅស៍” ដែលស្ថិតនៅក្នុងតំបន់ ឈីង យី។
“ដោយសារតែលូបង្ហូរទឹកស្អុយបានពាក់ព័ន្ធនឹងបំពង់បញ្ចេញខ្យល់ ទើបវាមានភាពអាចទៅរួចយ៉ាងខ្លាំង ដែលវីរុសនៅក្នុងលាមក អាចនឹងសាយភាយបន្តតាមរយៈកង្ហារបំភាយខ្យល់អាកាសចូលទៅក្នុងបន្ទប់បង្គន់” លោកសាស្ត្រាចារ្យ យួន អធិប្បាយ។ ពួកគេនៅមិនទាន់អាចអះអាងអំពីរឿងនេះបានយ៉ាងច្បាស់លាស់នៅឡើយទេ ដូច្នេះហើយទើបការជម្លៀសត្រូវបានធ្វើឡើងដើម្បីការពារទុកជាមុន ខណៈដែលពេលនេះ ក្រុមមន្ត្រីសាធារណៈសុខាភិបាល និងក្រុមវិស្វករកំពុងចូលទៅពិនិត្យមើលអាគារ។
សម្រាប់សកម្មភាពថ្មីៗចុងក្រោយបំផុតនេះ បានកើតឡើងបន្ទាប់ពីរដ្ឋបាលទីក្រុងហុងកុងបានអះអាងពីការរកឃើញអ្នកឆ្លងមេរោគវីរុសកូរ៉ូណាទី42 និងបានរកឃើញថា អ្នកជំងឺម្នាក់នេះ និងអ្នកជំងឺទី12 ធ្លាប់បានស្នាក់នៅក្នុងអាផាតមិនត៍ ហុង មើយ ហៅស៍៕
ប្រភព៖ សាព័ត៌មានបរទេស
February 11, 2020
វៀតណាម៖ ទារិកាអាយុ 3ខែម្នាក់ ឆ្លងវីរុសកូរ៉ូណា ក្រោយពីទៅលេងជីដូន4ថ្ងៃ
ក្រសួងសុខាភិបាលវៀតណាម នាពេលព្រឹកនេះ (11កុម្ភៈ) បានបញ្ជាក់ថា ទារិកាអាយុ 3ខែម្នាក់ នៅស្រុកបិញស្វៀន ខេត្តវិញហ្វុក ភាគខាងជើងក្រុងហាណូយ ប្រទេសវៀតណាម បានក្លាយជាករណីឆ្លងមេរោគវីរុសកូរ៉ូណា nCoV ទី15 នៅក្នុងប្រទេសនេះ។
មូលហេតុនៃការឆ្លងមេរោគកូរ៉ូណាលើទារិកាអាយុ 3ខែនេះ បានត្រូវក្រសួងសុខាភិបាលវៀតណាមអះអាងថា មានជាប់ទាក់ទិននឹងអ្នកជំងឺរលាកសួតកូរ៉ូណាម្នាក់ឈ្មោះ ង្វៀន ធី យឺ អាយុ 23ឆ្នាំ ដែលបានជាសះស្បើយ និងបានចេញពីមន្ទីរពេទ្យកាលពីល្ងាចថ្ងៃទី10កុម្ភៈកន្លងទៅ។
ទារិកាខាងលើ កើតនៅថ្ងៃទី5វិច្ឆិកា ឆ្នាំ2019 ជាចៅស្រីបង្កើតរបស់អ្នកជំងឺរលាកសួតកូរ៉ូណាម្នាក់ទៀត អាយុ 42ឆ្នាំដែលជាអ្នកឆ្លងមេរោគទី10 នៅវៀតណាម។ ស្ត្រីអ្នកជំងឺអាយុ 42ឆ្នាំរូបនេះបានឆ្លងវីរុសកូរ៉ូណានៅពេលទៅលេងផ្ទះរបស់អ្នកជំងឺ ង្វៀន ធី យឺ។
ទារិកាអាយុ 3ខែនេះ ត្រូវម្ដាយយកទៅលេងផ្ទះយាយរបស់នាង កាលពីថ្ងៃទី 28មករា ដល់ថ្ងៃទី31មករា។ ក្រោយមក យាយរបស់ទារិកានេះ ត្រូវគេរកឃើញថា បានឆ្លងមេរោគកូរ៉ូណា ហើយទារិកានេះក៏ត្រូវគេចាត់ចូលក្នុងចំណោមអ្នកដែលបាននៅក្បែរលោកយាយរូបនោះដែរ ទើបត្រូវក្រុមគ្រូពេទ្យតាមដានជាប្រចាំ។
ថ្ងៃទី 6កុម្ភៈ ទារិកាអាយុ3ខែនេះ មានអាការក្អក ហៀរសំបោរ និងក្ដៅខ្លួនដោយមិនដឹងមូលហេតុ។ បន្ទាប់ពីបានធ្វើតេស្ត ទើបគេដឹងថា ទារិកាដ៏កម្សត់ម្នាក់នេះមានផ្ទុកវីរុសកូរ៉ូណា nCoV។
បច្ចុប្បន្ន ក្មេងស្រីខាងលើ និងម្ដាយរបស់នាង ត្រូវគេដាក់ឱ្យនៅដាច់ដោយឡែក ក្នុងបន្ទប់ពិនិត្យជំងឺ ក្វាងហា ក្នុងស្រុក បិញស្វៀន។ បច្ចុប្បន្នសុខភាពរបស់អ្នកជំងឺទាំង 2នាក់នេះ នៅធម្មតានៅឡើយ។
ក្មេងស្រីនេះ គឺជាមនុស្សទី10នៅខេត្ត វិញ ហ្វុក ដែលបានឆ្លងមេរោគកូរ៉ូណាប្រភេទថ្មី ដែលជាប់ទាក់ទិននឹងអ្នកជំងឺឈ្មោះ ង្វៀន ធី យឺ។ មុនពេលក្មេងស្រីនេះឆ្លងមេរោគ ក៏មានមនុស្ស 4នាក់ផ្សេងទៀត បានឆ្លងវីរុសពីអ្នកជំងឺឈ្មោះ ង្វៀន ធី យឺ នេះដែរ គឺមានម្ដាយ ប្អូនស្រី បងស្រីជីដូនមួយ និងអ្នកជិតខាងម្នាក់របស់គាត់។
គិតមកដល់ថ្ងៃទី11កុម្ភៈនេះ វៀតណាមមានអ្នកជំងឺរលាកសួតដោយមេរោគវីរុសកូរ៉ូណាប្រភេទថ្មី ចំនួន15នាក់ហើយ ក្នុងនោះ 6នាក់បានជាសះស្បើយ។ នេះបើតាមគេហទំព័រ Vnexpress។
សម្រាប់ព្រឹកនេះដែរ ប្រភពព័ត៌មានពីប្រទេសចិនបានរាយការណ៍ថា អ្នកស្លាប់ដោយសារមេរោគរលាកសួតថ្មី មានចំនួន 108នាក់ កើន11,8% បើធៀបនឹងម្សិលមិញ ធ្វើឱ្យអ្នកស្លាប់សរុបទូទាំងពិភពលោក កើនឡើងដល់ 1,018នាក់ និង 43.098នាក់ផ្សេងទៀតកំពុងផ្ទុកមេរោគនេះ៕
ប្រភព៖ សារព័ត៌មានបរទេស
February 11, 2020
ចំនួនអ្នកស្លាប់ដោយសារវីរុសកូរ៉ូណា កើនដល់ 1,018នាក់ ឯ 7.345នាក់ផ្សេងទៀត កំពុងប្រឈមនឹងការស្លាប់
អ្នកជំងឺរលាកសួតដែលបាត់បង់ជីវិត ត្រូវគេរាយការណ៍ព្រឹកនេះថា មានចំនួន 108នាក់ កើន11,8% បើធៀបនឹងម្សិលមិញ ធ្វើឱ្យអ្នកស្លាប់សរុបឡើងដល់ 1,018នាក់ និងអ្នកបានឆ្លង 43.098នាក់។
គណៈកម្មការសុខាភិបាលខេត្ត Hubei នៃប្រទេសចិន ថ្ងៃនេះបានប្រកាសថា ខេត្តនេះមានអ្នកស្លាប់ថ្មីដោយសារឆ្លងមេរោគកូរ៉ូណា ប្រភេទ nCoV ចំនួន 103នាក់ និងករណីបានឆ្លងមេរោគបន្ថែមចំនួន 2,097នាក់ ធ្វើឱ្យចំនួនអ្នកស្លាប់សរុបនៅខេត្ត Hubei ឡើងដល់ 974នាក់ និងអ្នកមានផ្ទុកមេរោគ សរុប 31,728នាក់។
នៅទូទាំងប្រទេសចិន (ដីគោក) ករណីស្លាប់ដោយសារអាសន្នរោគនេះ មានចំនួន 1,011នាក់។ ចំណែកអ្នកមានផ្ទុកមេរោគ មានចំនួន 42,369នាក់។ រីឯអ្នកជំងឺ 4,051នាក់ បានជាសះស្បើយពីជំងឺ។
សម្រាប់ពិភពលោកទាំងមូល មានអ្នកស្លាប់ដោយសារវីរុសកូរ៉ូណា សរុប 1018នាក់ ក្នុងនោះមាន2ករណី ស្លាប់នៅខាងក្រៅប្រទេសចិន (ដីគោគ) គឺម្នាក់នៅហ្វីលីពីន និងម្នាក់ទៀតនៅហុងកុង។ ចំណែកអ្នកកំពុងផ្ទុកមេរោគកូរ៉ូណា កើនដល់ 43.098នាក់ ក្នុងនោះមានអ្នកជំងឺចំនួន 7.345នាក់ កំពុងស្ថិតក្នុងស្ថានភាពធ្ងន់ធ្ងរ។ អ្នកដែលបានជាសះស្បើយ មានចំនួន 4,043នាក់។
ចំនួនអ្នកស្លាប់ដោយសារមេរោគកូរ៉ូណា បានកើនលើសពី813នាក់ ដែលជាចំនួនអ្នកស្លាប់ដោយសារអាសន្នរោគ SARS ដែលរាតត្បាតពិភពលោក ចាប់ពីឆ្នាំ 2002 ដល់ឆ្នាំ 2003។ នេះបើតាមទិន្នន័យរបស់អង្គការសុខភាពពិភពលោក (WHO)៕
ប្រភព៖ សារព័ត៌មានបរទេស
February 11, 2020
កម្សត់ទៀតហើយ! ពិធីមង្គលការ មួយជាតិមានតែម្ដង ប៉ុន្តែមិនមានភ្ញៀវចូលរួមសូម្បីតែម្នាក់ ព្រោះតែ…
កូនកំលោះ Zhang Long និងកូនក្រមុំ Chen Xiao ប្រារព្ធពិធីមង្គលការនៅទីធ្លាខាងក្រៅផ្ទះរបស់ខ្លួន នៅក្រុងកំពង់ផែ Qingdao ខេត្ត Shandong ភាគខាងកើតប្រទេសចិន កាលពីថ្ងៃទី6កុម្ភៈកន្លងទៅ ដោយមានការចូលរួមតែពីឪពុកម្ដាយខាងប្រុស និងឪពុកម្ដាយខាងស្រី។
នៅក្នុងពីធីមង្គលការដ៏កម្សត់នេះ ឪពុករបស់កូនក្រមុំធ្វើជាអធិបតី ចំណែកម្ដាយរបស់កូនក្រមុំ ធ្វើជាជាងថតរូប។ ពិធីមង្គលការទាំងមូលនេះ ត្រូវបានធ្វើឡើងក្នុងរយៈពេលត្រឹមតែ2នាទីប៉ុណ្ណោះ។ កូនកំលោះ Zhang Long បាននិយាយថា ៖ “ឪពុកក្មេករបស់ខ្ញុំ និយាយលឿនណាស់។ យើងខ្ញុំប្រារព្ធពិធីគោរពម្ចាស់ទឹកម្ចាស់ដី គោរពឪពុកម្ដាយ និងហើយប្ដីប្រពន្ធគោរពគ្នាទៅវិញទៅមក គឺជាការស្រេច”។
មុននេះ កូនកំលោះ Zhang Long និងកូនក្រមុំ មានគម្រោងប្រារព្ធពិធីមង្គលការតាមប្រពៃណី ដោយអញ្ជើញភ្ញៀវ50តុ រថយន្តសម្រាប់ហែកូនក្រមុំចំនួន20គ្រឿង អ្នកកំដរចំនួន4គូ។ ប៉ុន្តែ ដោយសារជួបប្រទះនឹងគ្រោះអាសន្នរោគកូរ៉ូណា អ្នកទាំងពីរត្រូវបង្ខំចិត្តលុបចោលគម្រោងប្រចាំជីវិតមួយនេះ។
កូនកំលោះបន្តថា ៖ “បេសកកម្មទប់ស្គាត់អាសន្នរោគ គឺជារឿងសំខាន់ណាស់ ទើបយើងខ្ញុំសម្រេចចិត្តមិនអញ្ជើញភ្ញៀវ ហើយក៏មិនប្រារព្ធពិធីធំដុំ។ ពិធីមង្គលការនេះ ធ្វើឡើងដើម្បីបង្គ្រប់កិច្ចតែប៉ុណ្ណោះ អ្វីដែលសំខាន់ជាងនេះគឺសុភមង្គលរបស់យើងខ្ញុំ”។
Chen Xiao ជាកូនក្រមុំក៏បានយល់ស្របនឹងប្ដី៖ “គាត់ចំណាយតែប៉ុន្មានរយយន់ប៉ុណ្ណោះដើម្បីការខ្ញុំ។ ប៉ុន្តែ នេះមិនមែនជារឿងសំខាន់ទេ គាត់ជាមនុស្សរបស់ខ្ញុំ”។
ក្រៅពីការដែលមិនបានអញ្ជើញភ្ញៀវមកចូលរួម Zhang និង Chen ក៏បានការពារសុវត្ថិភាពនៃសុខភាពរបស់ពួកគេ ដោយការពាក់ម៉ាស់ តាំងពីពិធីដង្ហែកូនក្រមុំ រហូតដល់ចប់កម្មវិធី។ កូនកំលោះនិយាយថា ៖ “សូម្បីតែបបូរមាត់របស់នាង ខ្ញុំក៏មិនដឹងថាលាបពណ៌អ្វីនោះដែរ”។
នៅលើដងផ្លូវដង្ហែកូនក្រមុំទៅផ្ទះខាងប្រុស Zhang និង Chen ត្រូវឈប់ដល់ទៅ3ដង ដើម្បីវាស់កម្ដៅខ្លួន។
កូនក្រមុំនិយាយថា ៖ “ក្រុមអ្នកស្ម័គ្រចិត្តបានជូនពរយើងខ្ញុំ បើទោះមិនមែនជាញាតិ ឬមិត្តភក្ដិ។ យើងខ្ញុំជឿថា នេះគឺជាការជូនពរចេញពីក្រឳបេះដូង”។ នៅលើបណ្ដាញសង្គម អ្នកជិតខាង និងអ្នកស្គាល់គ្នា រួមនឹងមិត្តភក្ដិរបស់គូស្វាមីភរិយាថ្មីនេះ ក៏បាននាំគ្នាអបអរសាទរ និងជូនពរផងដែរ។ នេះបើតាមសារព័ត៌មាន Shine របស់ចិន។
នៅមុនពិធីមង្គលការរបស់ Zhang និង Chen ក៏មានពិធីមង្គលការរបស់ Sun Wenlong និង Liu Miaomiao ដែលបានប្រារព្ធឡើងកាលពីថ្ងៃទី27មករា ដោយគ្មានភ្ញៀវចូលរួមផងដែរ។ Sun បាននិយាយថា ៖ “នៅពេលអាសន្នរោគបានកន្លងផុតទៅ ខ្ញុំប្រាកដជាប៉ះប៉ូវជូននាងមិនខាន”។
នៅប្រទេសសិង្ហបុរីឯណោះវិញ ក៏មានពិធីមង្គលការមួយដែលរងឥទ្ធិពលពីអាសន្នរោគកូរ៉ូណានេះដែរ។ ពិធីជប់លៀងអាពាហ៍ពិពាហ៍ ប្រារព្ធឡើងតាមការគ្រោងទុក ភ្ញៀវដែលបានអញ្ជើញ បានមកចូលរួមគ្រប់គ្នា។ ប៉ុន្តែ កូនកំលោះ និងកូនក្រមុំត្រូវបង្ខាំងខ្លួនក្នុងផ្ទះដែលនៅឆ្ងាយពីកន្លែងជប់លៀង ហើយពួកគេទទួលភ្ញៀវតាមរយៈអេក្រង់ទូរទស្សន៍ដោយការផ្សាយផ្ទាល់តាមអ៊ីនធើណិត។ មូលហេតុដែលពួកគេធ្វើបែបនេះ ក៏ព្រោះតែមិនចង់ឱ្យភ្ញៀវមានការព្រួយបារម្ភអំពីវីរុសកូរ៉ូណា ដោយសារក្រុមគ្រួសារពួកគេ ទើបត្រឡប់មកពីប្រទេសចិន ដែលជាប្រទេសកំពុងត្រូវរាតត្បាតដោយអាសន្នរោគកូរ៉ូណា៕
ប្រភព៖ សារព័ត៌មានបរទេស
February 10, 2020