សឿន សំណាង - La Reine Media

ពីមនុស្សធ្លាប់សុំអាហារគេហូប ក្លាយជាមហាសេដ្ឋី ព្រោះតែចេះប្រមាញ់ផ្ទះចាស់ៗ

Tins Plaza គឺជារោងចក្រផលិតជ័រមួយត្រូវបានគេទុកឱ្យនៅទំនេរ ដែលវាស្ថិតក្នុងសង្កាត់ Tuen Mun នៃទីក្រុងហុងកុង។ ប៉ុន្តែ នៅពេលបានឃើញភ្លាម អ្នកជំនួញ Tang Shing-bor ដឹងភ្លាមថា វាជាកំណប់ទ្រព្យ។

កាលពីឆ្នាំ2005 លោក Tang Shing-bor បានចំណាយប្រាក់36លានដុល្លារអាមេរិក ដើម្បីទិញរោងចក្រ Tins Plaza នេះ។ ប៉ុន្តែ គាត់មិននឹកស្មានថា 2ឆ្នាំក្រោយមក គាត់រកបានប្រាក់ចំណេញពីរោងចក្រនេះ ច្រើនជាង3ដង ធៀបនឹងប្រាក់ដែលលោកបានចំណាយសម្រាប់ទិញវា។

ដោយសារតែការស្វែងរកទិញអចលនទ្រព្យឧស្សាហកម្មចាស់ៗ ឬត្រូវគេទុកចោលទំនេរ ដូចជារោងចក្រ Tins Plaza ជាដើម ហើយជួសជុសឡើងវិញ រួចលក់ទៅឱ្យអ្នកផ្សេង លោក Tang បានរួចផុតពីមាត់ជ្រោះក្ស័យធនកាលពីឆ្នាំ2003 ហើយបានក្លាយជាមហាសេដ្ឋីក្នុងឆ្នាំ2016។ បច្ចុប្បន្ន មហាសេដ្ឋីវ័យ86ឆ្នាំរូបនេះ គឺជាអ្នកមានបំផុតលំដាប់ទី14នៅហុងកុង ដោយមានទ្រព្យ 5,7ពាន់លានដុល្លារអាមេរិក។ នេះបើតាមទស្សនាវដ្ដី Forbes។

ល្បីឈ្មោះខ្លាំងដោយសារតែការរកស៊ីបែបដើរបញ្ច្រាស់និន្នាការរបស់មនុស្សសម័យថ្មី និងមិនខ្វល់ពីបាតុកម្មដែលអូសបន្លាយពេលរាប់ខែនៅទូទាំងទីក្រុងហុងកុង លោក Tang នៅតែបញ្ចេញប្រាក់រកស៊ីខាងអចលនទ្រព្យឧស្សាហកម្មនៅទីនេះ។ កាលពីឆ្នាំទៅ(2019) គាត់បានចំណាយប្រាក់ដល់ទៅ 700លានដុល្លារអាមេរិកដើម្បីរកស៊ីក្នុងវិស័យនេះ។ យោងតាមក្រុមហ៊ុនស្រាវជ្រាវ Real Capital Analytics លោក Tang គឺជាអ្នកដែលបានចំណាយប្រាក់ច្រើនជាងគេបង្អស់នៅទីក្រុងហុងកុង ក្នុងការទិញអចលនទ្រព្យឧស្សាហកម្ម ក្នុងឆ្នាំ2019។

“នេះគឺជាឱកាសល្អបំផុតដែលខ្ញុំមិនធ្លាប់ជួបប្រទះ” នេះគឺជាសម្ដីរបស់លោក Tang ក្នុងកិច្ចសម្ភាសមួយនៅឯផ្ទះរបស់គាត់ក្នុងខណ្ឌ Mong Kok ដែលមានទីតាំងនៅមិនឆ្ងាយប៉ុន្មានពីតំបន់ដែលមានបាតុកម្មកើតឡើង។

ជំនាញរបស់លោក Tang ក្នុងការស្វែងរក និងកែលម្អអចលនទ្រព្យចាស់ៗក្នុងទីក្រុងហុងកុងពេលដែលវានៅជាមជ្ឈមណ្ឌលផលិតកម្ម បានទាក់ទាញដៃគូសហការជាច្រើន ដូចជា Chinese Estates Holdings និង Juayuan International ជាដើម។ ក្រុមហ៊ុនទាំង2ខាងលើនេះ បានសហការជាមួយក្រុមហ៊ុន Stan Group របស់លោក Tang ដើម្បីកែប្រែ ឬជួសជុសអចលនទ្រព្យទាំងឡាយដែលលោក Tang បានទិញ។ “គាត់ធ្វើការមានប្រសិទ្ធភាព និងមានបទពិសោធន៍ច្រើន” នេះបើតាម Joseph Lam ដែលជាអ្នកដឹកនាំម្នាក់នៃក្រុមហ៊ុន Colliers International។

ក្រុមអ្នករកស៊ីខាងអចលនទ្រព្យនៅទីក្រុងហុងកុង តែងតែហៅលោក Tang ថា “ពូ Bor”។ អចលនទ្រព្យ គ្រាន់តែជាផ្នែកមួយដែលលោកបានចូលរកស៊ី។ កាលពីទសវត្សរ៍ឆ្នាំ1950 លោក Tang ក៏ធ្លាប់ផលិតអំពូលភ្លើង neon និងធ្លាប់កាន់កាប់ភោជនីយដ្ឋានក្នុងទសវត្សរ៍ឆ្នាំ1970ផងដែរ។ ការរកស៊ីរបស់គាត់ ក៏បានបង្ហាញពីការរីកចម្រើនរបស់ទីក្រុងហុងកុងក្នុងរយៈពេលប៉ុន្មានទសវត្សរ៍ចុងក្រោយនេះ។

មហាសេដ្ឋីរូបនេះ មិនដែលមានការភ័យខ្លាចចំពោះបរាជ័យនោះទេ។ ឪពុករបស់គាត់បានស្លាប់ចោល ពេលគាត់មានអាយុត្រឹមតែ5ឆ្នាំ។ ចំណែកម្ដាយរបស់គាត់វិញ គឺត្រូវធ្វើការក្នុងរោងចក្រដើម្បីចិញ្ចឹមកូនៗ។ “ខ្ញុំត្រូវរិះរកវិធីជាច្រើនដើម្បីរស់” លោក Tang និយាយបែបនេះ។ លោកបន្តថា លោកធ្លាប់តែលតោលនៅខាងក្រៅអាហារដ្ឋាន នៅពេលកំពុងឃ្លានបាយ ដើម្បីរង់ចាំសុំអាហារពីគេ។

ការរស់នៅ និងធំដឹងក្ដីក្នុងភាពក្រីក្របែបនេះហើយ ធ្វើឱ្យលោក Tang មានស្មារតីអង់អាច និង “ថ្លើងធំ” ព្រោះគាត់មិនដែលខ្លាចបរាជ័យ។ លោកនិយាយ “គ្មានបញ្ហាណាដែលគ្មានដំណោះស្រាយនោះឡើយ”។

Tang រៀនចប់ត្រឹមបឋមសិក្សាប៉ុណ្ណោះ។ ឆ្នាំ1950 លោកបានដើរតាមក្រុមជាងធ្វើស្លាកយីហោ ដើម្បីរៀនជំនាញ។ ពេលអាយុ20ឆ្នាំ គាត់បានបើកហាងផ្ទាល់ខ្លួន។ ជោគជ័យក្នុងការរកស៊ីនេះ បាននាំឱ្យលោក អាចសហការជាមួយមិត្តភក្ដិរបស់គាត់ដើម្បីបើកភោជនីយដ្ឋានមួយ ក្នុងឆ្នាំ1970។ ចាប់តាំងពីពេលនោះ លោក Tang ក៏ចាប់ផ្ដើមវិនិយោគច្រើនទៅលើភោជនីយដ្ឋាន។

ទសវត្សរ៍ទី 80 លោក Tang បានលោតចូលវិនិយោគទៅលើវិស័យផ្សេងៗ ក្នុងនោះក៏មានវិស័យរថយន្តចាស់ៗ។ ប៉ុន្តែ ការដែលលោកទទួលបានជោគជ័យច្រើន ក៏ដោយសារតែការទិញលក់ហាងនានា។ ជំនួញដែលលេចធ្លោជាងគេរបស់គាត់ គឺការទិញអគារចាស់មួយក្នុងឆ្នាំ1990 ហើយកែប្រែវាឱ្យទៅជាមជ្ឈមណ្ឌល Mongkok Centre ដ៏ល្បីឈ្មោះ។

ឆ្នាំ1997 លោក Tang មានហាងក្នុងដៃចំនួនជាង200ហាង ដែលមានតម្លៃជិត7,3ពាន់លានដុល្លារហុងកុង (942លានដុល្លារអាមេរិក) ហើយក៏ចាប់ផ្ដើមរៀបគម្រោងចូលរួមក្នុងផ្សារមូលបត្រ (IPO)។ ប៉ុន្តែ ពេលក្រោយមកបន្តិច វិបត្តិហិរញ្ញវត្ថុអាស៊ីបានកើតឡើង។ ទីផ្សារអចលនទ្រព្យនៅទីក្រុងហុងកុងបានធ្លាក់់ថ្លៃដល់ទៅ70% ក្នុងអំឡុងចាប់ពីឆ្នាំ1997 ដល់ឆ្នាំ2004 ដោយមួយផ្នែកបណ្ដាលមកពីអាសន្នរោគ SARS។ ឆ្នាំ2004 លោក Tang ត្រូវជាប់បំណុល4ពាន់លានដុល្លារហុងកុង (514,982,760ដុល្លារអាមេរិក)។

លោក Tang ក៏បានចាប់ផ្ដើមលក់អចលនទ្រព្យខ្លះរបស់គាត់ បូករួមទាំង Mongkok Computer Centre។ ប៉ុន្តែ គាត់រក្សាទុកអចលនទ្រព្យឧស្សាហកម្មដែលបានទិញចាប់ពីឆ្នាំ1996 ដើម្បីការពារហានិភ័យ។

ឆ្នាំ2005 គាត់បានទិញ Tins Plaza ក្នុងតម្លៃ280លានដុល្លារហុងកុង (36,048,793 ដុល្លារអាមេរិក)។ គាត់ចំណាយប្រាក់ដែលមានក្នុងដៃត្រឹមតែ28លានដុល្លារហុងកុង ក្រៅពីនេះគឺលុយបានមកពីការបញ្ចាំអគារទាំងឡាយដែលគាត់បានទិញពីមុន។

6ខែក្រោយមក លោក Tang ទទួលបានការស្នើទិញអគារ Tins Plaza នេះ ពីក្រុមហ៊ុនអូស្ដ្រាលី Macquarie Goodman ក្នុងតម្លៃ500លានដុល្លារហុងកុង (64,372,845 ដុល្លារអាមេរិក)។ មកដល់ខែតុលា ឆ្នាំ2005ដដែល ក្រុមហ៊ុន Mapletree របស់សិង្ហបុរី បានឱ្យតម្លៃ520លានដុល្លារហុងកុង (70,810,129ដុល្លារអាមេរិក) ប៉ុន្តែ គាត់នៅតែមិនព្រមលក់។ នេះបើតាមទស្សនាវដ្ដី Forbes។

មហាសេដ្ឋីរូបនេះ ដឹងថា អចលនទ្រព្យពាណិជ្ជកម្ម វាមានតម្លៃខ្ពស់ជាងអចលនទ្រព្យឧស្សាហកម្ម ដូច្នេះ គាត់ក៏បានអភិវឌ្ឍ Tins Plaza ឱ្យធ្លាក់ទៅក្នុងវិស័យពាណិជ្ជកម្ម។ 2ឆ្នាំក្រោយមក តំណាងក្រុមហ៊ុន Macquarie មកពី Sydney ស្នើទិញក្នុងតម្លៃ850លានដុល្លារហុងកុង (109,433,836ដុល្លារអាមេរិក)។ គាត់ក៏បានលក់ឱ្យក្រុមហ៊ុននេះ ដោយទទួលបានប្រាក់ចំណេញ570លានដុល្លារហុងកុង (73,385,000ដុល្លារអាមេរិក)។ លោក Tang ថ្លែងថា “នេះគឺជាជំនួញដែលគួរឱ្យចងចាំបំផុតសម្រាប់ខ្ញុំ”។

ក្រោយមក លោក Tang នៅតែបន្តរកស៊ី ដោយមិនគិតពីរឿងចូលនិវត្តន៍។ គាត់បានឃើញរោងចក្រចាស់មួយនៅក្បែរនោះ គឺ Gold Sung Industrial Building។ មិនដូចការជួញដូរមុនៗ Gold Sun មានម្ចាស់ច្រើននាក់ ធ្វើឱ្យគាត់ត្រូវចំណាយពេលដើម្បីចរចាដាច់ដោយឡែកម្ដងមួយៗ។ គាត់ចាប់ផ្ដើមទិញជាន់ដំបូងគេក្នុងឆ្នាំ2006 ប៉ុន្តែ រហូតដល់ឆ្នាំ2014 ទើបបានជោគជ័យទាំងស្រុង។ គាត់រំឭកថា “ខ្ញុំត្រូវទិញម្ដងមួយជាន់ៗ”។

លោក Tang ក៏បានជួបនឹងសំណាងល្អច្រើនផងដែរ។ ដោយសារតែចង់បង្កើនប្រភពផ្គត់ផ្គង់អចលនទ្រព្យសម្រាប់ការិយាល័យ សណ្ឋាគារ និងតំបន់ពាណិជ្ជកម្ម អាជ្ញាធរទីក្រុងហុងកុងនាឆ្នាំ2010 ក៏បានចេញគោលនយោបាយលើកទឹកចិត្តឱ្យមានការអភិវឌ្ឍអចលនទ្រព្យឧស្សាហកម្មចាស់ៗ ឱ្យទៅជាតំបន់ពាណិជ្ជកម្ម។ល។ ដូច្នេះ ធ្វើឱ្យតម្លៃរោងចក្រចាស់ៗ ឡើងថ្លៃដល់152% ក្នុងអំឡុងពេលពីឆ្នាំ2010 ដល់2016។ ដូច្នេះ ការរកស៊ីរបស់លោក ក៏បានរលូតជាងមុនទៅទៀត។

គិតមកដល់បច្ចុប្បន្ន មហាសេដ្ឋី Tang កំពុងកាន់កាប់អគារនៅក្បែរអាកាសយានដ្ឋានចាស់ ប្រមាណជា73%។ ការកសាងឡើងវិញនូវអាកាសយានដ្ឋាន Kai Tak ប្រាកដជានឹងធ្វើឱ្យអចលនទ្រព្យនៅក្បែរៗនេះ ឡើងថ្លៃកប់ពពកមិនខាន។ ប្រការនេះ នឹងជួយឱ្យលោក Tang កើនទ្រព្យថែមមួយកម្រិតធំទៀត។

មហាសេដ្ឋីរូបនេះ ថ្លែងថា “ខ្ញុំពិតជាជឿជាក់លើអនាគតរបស់ហុងកុង។ ខ្ញុំបានស្គាល់ឧបសគ្គច្រើនមកហើយ។ វាតែងតែមានឱកាសច្រើនស្ថិតក្នុងហានិភ័យ ហើយនេះគឺជាឱកាសរបស់ខ្ញុំ”៕

ប្រភព៖ សារព័ត៌មានបរទេស

February 15, 2020

វិទ្យាសាស្ត្រ៖ ហេតុអ្វីសត្វអំពិលអំពែកអាចបញ្ចេញពន្លឺភ្លឹបភ្លែតៗបាន?

សត្វអំពិលអំពែកដែលបញ្ចេញពន្លឺភ្លឹបភ្លែតៗនាពេលរាត្រី អាចគ្រាន់តែជាវិធីបង្អួតសម្រស់ខាងក្រៅរបស់ពួកវា ដែលដូចទៅនឹងកន្ទុយដ៏វែងនៃសត្វហស្ស ដើម្បីទាក់ទាញចំណាប់អារម្មណ៍ពី “គូស្នេហ៍” របស់ពួកវាតែប៉ុណ្ណោះ?

តាមការសិក្សាស្រាវជ្រាវ ការបង្អួតសម្រស់ខាងក្រៅ មិនមែនមានតែនៅលើមនុស្ស ឬសត្វធំៗនោះទេ ប៉ុន្តែសត្វល្អិតផ្សេងៗ ក៏ចេះបញ្ចេញសម្រស់ ដើម្បីទាក់ទាញចំណាប់អារម្មណ៍ផងដែរ។

តាមពិត សារធាតុបញ្ចេញពន្លឺនៅក្នុងពោះរបស់អំពិលអំពែក ពេលវាប្រទះនឹងអុកស៊ីហ្សែន វានឹងបញ្ចេញពន្លឺ ប៉ុន្តែពន្លឺនោះមានសភាពខ្សោយខ្លាំងពេក ទើបយើងមិនអាចមើលឃើញនៅពេលថ្ងៃ។ អំពិលអំពែកឈ្មោលមានស្លាបសម្រាប់ហោះ ចំណែកអំពិលអំពែកញីវិញមិនមានស្លាបនោះទេ។ ដូច្នេះ ការបញ្ចេញពន្លឺនេះក៏ដើម្បីទាក់ទាញចំណាប់អារម្មណ៍រវាងគ្នានឹងគ្នាផងដែរ។

សត្វអំពិលអំពែកឈ្មោល ដែលអាចប្រមូល និងបញ្ចេញពន្លឺ fluorescent បានយូរ នឹងមានឱកាសជោគជ័យច្រើនក្នុងការស្វែងរកគូស្នេហ៍ និងជួយឱ្យអំពិលអំពែកញី បង្កើតកូនបានច្រើន។

អំពិលអំពែកមាន2ប្រភេទ គឺអំពិលអំពែកហោះ និងអំពិលអំពែកវារលើដី។ អំពិលអំពែកទាំង2ប្រភេទនេះ សុទ្ធតែអាចបញ្ចេញពន្លឺត្រជាក់ដូចគ្នា។ នោះគឺដោយសារក្នុងពេលបញ្ចេញពន្លឺ ថាមពលភាគច្រើនត្រូវបានអំពិលអំពែកបំប្លែងទៅជាពន្លឺ ពោលគឺមិនមែនបំប្លែងទៅជាថាមពលដូចប្រភពពន្លឺសិប្បនិម្មិតផ្សេងៗនោះទេ។

ពន្លឺរបស់អំពិលអំពែក ត្រូវបានបញ្ចេញពីផ្នែកខាងក្រោមក្នុងពោះរបស់វា។ ពេលថ្ងៃ ពោះរបស់វាមានពណ៌ប្រផេះលាយស ហើយនៅពេលយប់ ទើបវាអាចបញ្ចេញពន្លឺស្រទន់មកខាងក្រៅ។ ខាងក្នុងស្រទាប់ស្បែកពោះ គឺជាជួរនៃកោសិកាដែលអាចបញ្ចេញពន្លឺ ហើយស្រទាប់ផ្នែកខាងក្នុងបង្អស់គឺជាកោសិកាចំណាំងប្លាត ដែលមានមុខងារដូចទៅនឹងកញ្ចក់ ជួយបញ្ចាំងពន្លឺចេញទៅក្រៅ។

អំពិលអំពែក បញ្ចេញពន្លឺបានក៏ដោយសារការប្រតិកម្មធាតុគីមីនៅខាងក្នុងរាងកាយរបស់ពួកវា ដែលគេហៅថា ពន្លឺជីវសាស្ត្រ bioluminescence។

បណ្ដាកោសិកា luminescent មានផ្ទុកសារជាតិ luciferin និង luciferase។ នៅពេលគេផ្ដាច់សារធាតុទាំង2នេះចេញពីគ្នា ពួកវានឹងមិនអាចបញ្ចេញពន្លឺនោះទេ។ ប៉ុន្តែ ពេលដាក់វានៅក្បែរគ្នា luciferase នឹងជម្រុញឱ្យមានអុកស៊ីតកម្មនៅលើសារធាតុ luciferin (ដំណើរការប្រើអុកស៊ីហ្សែនដើម្បីដុតសារធាតុ lucifenrin)។ ដំណើរការអុកស៊ីតកម្មនេះ បង្កើតបានជាពន្លឺ។

ក្រៅពីអំពិលអំពែក សត្វមួយចំនួនផ្សេងទៀត ក៏អាចបញ្ចេញពន្លឺ ដូចជាសត្វ jellyfish ក្នុងសមុទ្រជាដើម។ អ្នកវិទ្យាសាស្ត្រនិយាយថា សូម្បីតែមនុស្សក៏អាចបញ្ចេញពន្លឺពីរាងកាយ ប៉ុន្តែពន្លឺនេះខ្សោយពេក មិនអាចឱ្យយើងមើលឃើញនឹងភ្នែកទទេ។ នេះគឺជាដំណើរការនៃប្រតិកម្មរបស់ជីវគីមី។

ភាពសុខគ្នារវាងការបញ្ចេញពន្លឺនៃអំពូលភ្លើង និងការបញ្ចេញពន្លឺពីសត្វអំពិលអំពែក៖

ភាពសុខគ្នារវាងការបញ្ចេញពន្លឺនៃអំពូលភ្លើង និងការបញ្ចេញពន្លឺពីសត្វអំពិលអំពែក គឺនៅត្រង់ថា អំពូលភ្លើងបញ្ចេញកំដៅខ្លាំងនៅពេលវាបញ្ចេញពន្លឺ ចំណែកអំពិលអំពែកវិញ វាបញ្ចេញពន្លឺត្រជាក់ ដោយសារថាមពលដែលប្រើប្រាស់ក្នុងការបញ្ចេញពន្លឺគឺមានកម្រិតទាប។ ប៉ុន្តែ បើសិនវាបញ្ចេញកំដៅខ្លាំង នោះអំពិលអំពែកប្រាកដជាមិនអាចរស់បាននោះទេ។

អំពិលអំពែកអាចគ្រប់គ្រងការបញ្ចេញពន្លឺនេះបានដោយខ្លួនឯង។ វាចាប់ផ្ដើម ឬបញ្ចប់ការបញ្ចេញពន្លឺដោយការបន្ថែម ឬបន្ថយកម្រិតអុកស៊ីហ្សែនទៅក្នុងដំណើរការនៃប្រតិកម្មជីវគីមី ដូចបានរៀបរាប់ខាងលើ។

សារព័ត៌មាន Science World Report ដកស្រង់របាយការណ៍មួយដែលចុះផ្សាយនៅលើទស្សនាវដ្ដី Physical Review Letters ឱ្យដឹងថា ក្រុមអ្នកវិទ្យាសាស្ត្របានប្រើប្រាស់បច្ចេកទេសថត CT (COMPUTER TOMOGRAPHY) និងមីក្រូទស្សន៍កាំរស្មីអ៊ិច បានរកឃើញថា អំពិលអំពែកអាចបង្វែរទិសរបស់អុកស៊ីហ្សែនដែលប្រើប្រាស់សម្រាប់មុខងារផ្សេងៗរបស់កោសិកា ដោយទាញអុកស៊ីហ្សែននោះចូលទៅខាងក្នុងនៃដំណើរការប្រតិកម្ម ហើយបំបែកសារធាតុ luciferin។ ក្នុងអំឡុងពេលនេះ កម្រិតនៃការប្រើប្រាស់អុកស៊ីហ្សែនក្នុងកោសិកា ត្រូវថយចុះ ធ្វើឱ្យដំណើរការផលិតថាមពលត្រូវយឺតមកវិញ។

សត្វល្អិតមួយចំនួនធំ ពុំមានសួតនោះទេ ពួកវាយកអុកស៊ីហ្សែនចូលទៅខាងក្នុងរាងកាយតាមរយៈរន្ធតូចៗជាច្រើន ដែលតភ្ជាប់គ្នា ដែលហៅថា រន្ធខ្យល់ (tracheoles)។ រហូតមកដល់បច្ច្ចប្បន្ន អ្នកវិទ្យាសាស្ត្រមិនទាន់យល់ច្បាស់អំពីវិធីដែលអំពិលអំពែកធ្វើឱ្យពន្លឺមានសភាពភ្លឹបភ្លែតៗក្នុងល្បឿនលឿនជាងធម្មតានៅឡើយ ខណៈដែលសាច់ដុំគ្រប់គ្រងបរិមាណអុកស៊ីហ្សែន ដំណើរការយឺត។

ការបកស្រាយបច្ចុប្បន្នដែលទទួលបានការគាំទ្រច្រើនបំផុតនោះគឺថា ឧស្ម័ន NO (Nitric Oxide) មានតួនាទីសំខាន់ក្នុងការចាត់ចែងពន្លឺ។ នៅពេលអំពូលភ្លើងនៃអំពិលអំពែកត្រូវបិទ ក៏ជាពេលដែល NO មិនត្រូវបានផលិត។ ក្នុងករណីនេះ បរិមាណនៃអុកស៊ីហ្សែនចូលទៅកាន់កោសិកាពន្លឺ ត្រូវបានភ្ជាប់ទៅនឹងផ្ទៃនៃកោសិកា mitochondria (កោសិកាដែលមានមុខងារផលិតថាមពលឱ្យកោសិកាដទៃ) ដូច្នេះ វានឹងមិនមានអុកស៊ីហ្សែនសម្រាប់ដំណើរការប្រតិកម្មបញ្ចេញពន្លឺ។

វត្តមានរបស់ឧស្ម័ន NO ក្នុងកោសិកាបញ្ចេញពន្លឺ អនុញ្ញាតឱ្យអុកស៊ីហ្សែនចូលរួមក្នុងដំណើរការប្រតិកម្មបញ្ចេញពន្លឺ ដោយសារតែ NO ត្រូវបានភ្ជាប់ទៅកាន់កោសិកាផលិតថាមពល ជំនួសឱ្យអុកស៊ីហ្សែន។ តាមធម្មតា ឧស្ម័ន NO តែងត្រូវបានរំលាយយ៉ាងលឿន ដូច្នេះទើបនៅពេល NO មិនត្រូវបានផលិតបន្ថែមទៀត អុកស៊ីហ្សែននឹងត្រូវបានកោសិកាផលិតថាមពលចាប់ទុក បែបនេះនឹងមិនមានអុកស៊ីហ្សែនសម្រាប់ដំណើរការប្រតិកម្មបញ្ចេញពន្លឺទៀត ដូច្នេះក៏ធ្វើឱ្យពន្លឺមានសភាពភ្លឹបភ្លែតៗ៕

ប្រភព៖ សារព័ត៌មានបរទេស

February 15, 2020

ទ្វីបអាហ្វ្រិកមានអ្នកផ្ទុកមេរោគកូរ៉ូណា COVID-19 ករណីដំបូង

ក្រសួងសុខាភិបាលអេហ្ស៊ីប កាលពីថ្ងៃទី 14កុម្ភៈ បានប្រកាសថា ប្រទេសនេះ បានរកឃើញអ្នកផ្ទុកមេរោគកូរ៉ូណាប្រភេទថ្មី COVID-19 ករណីដំបូងគេបង្អស់នៅក្នុងប្រទេសរបស់ពួកគេ ហើយនេះក៏ជាការណីទី1នៅទ្វីបអាហ្វ្រិកផងដែរ បន្ទាប់ពីវីរុសនេះ បានរាតត្បាតស្ទើរតែពេញពិភពលោក។

តាមរយៈសេចក្ដីប្រកាសកាលពីម្សិលមិញនេះ ក្រសួងសុខាភិបាលអេហ្ស៊ីប ឱ្យដឹងថា អ្នកឆ្លងមេរោគកូរ៉ូណា (COVID-19) ដំបូងនៅអាហ្វ្រិកនេះ មិនមែនជាជនជាតិអេហ្ស៊ីបនោះទេ។ ប៉ុន្តែ សេចក្ដីប្រកាសនេះ ក៏មិនបានបញ្ជាក់ថា អ្នកជំងឺមកពីប្រទេសណានោះដែរ។

អ្នកនាំពាក្យនៃក្រសួងសុខាភិបាលអេហ្ស៊ីប លោក Khaled Megahed ថ្លែងថា ៖ “ក្រសួងសុខាភិបាលកំពុងអនុវត្តវិធានការទប់ស្កាត់ និងតាមដានសុខភាពអ្នកជំងឺជាប់ជានិច្ច”។ លោកបន្តថា សុខភាពរបស់អ្នកជំងឺនេះ នៅល្អប្រសើរនៅឡើយ។

អេហ្ស៊ីបក៏បានរាយការណ៍ករណីនេះទៅកាន់អង្គការសុខភាពពិភពលោក (WHO) ចំណេកអ្នកជំងឺក៏បានបញ្ជូនទៅកាន់បន្ទប់ដាច់ដោយឡែកហើយដែរ។ នេះបើតាមសារព័ត៌មាន SCMP។

ទំនាក់ទំនងពាណិជ្ជកម្មស៊ីជម្រៅរបស់បណ្ដាប្រទេសក្នុងទ្វីបអាហ្វ្រិក ជាមួយនឹងប្រទេសចិន រួមនឹងប្រព័ន្ធសុខាភិបាលនៃបណ្ដាប្រទេសក្នុងតំបន់នេះ ធ្វើឱ្យមានការព្រួយបារម្ភជាខ្លាំង ចំពោះសមត្ថភាពនៃការទប់ទល់នឹងអាសន្នរោគកូរ៉ូណា COVID-19 បើសិនវីរុសនេះឆ្លងរាលដាលខ្លាំង។

កាលពីដើមខែមករា អេហ្ស៊ីបបានផ្អាកការហោះហើរទាំងអស់នៃក្រុមហ៊ុនអាកាសចរណ៍ជាតិ ទៅ-មកប្រទេសចិន។ ក្រៅពីនេះ អេហ្ស៊ីបក៏បានជម្លៀសពលរដ្ឋរបស់ខ្លួនចំនួន301នាក់ ចេញពីទីក្រុង Wuhan ប្រទេសចិន ហើយអ្នកទាំងនោះក៏កំពុងស្ថិតក្នុងបន្ទប់ដាច់ដោយឡែក។

គិតមកដល់ថ្ងៃទី15កុម្ភៈនេះ វីរុសកូរ៉ូណា COVID-19 បានឆ្លងទៅកាន់មនុស្សជាង 67,100នាក់ និងបានសម្លាប់មនុស្ស 1,526នាក់៕

ប្រភព៖ សារព័ត៌មានបរទេស

February 15, 2020

រកឃើញអ្នកផ្ទុកមេរោគកូរ៉ូណាថ្មីបន្ថែមជាង2,600នាក់ និងអ្នកស្លាប់កើនដល់…

ប្រទេសចិន បានរកឃើញអ្នកមានផ្ទុកមេរោគកូរ៉ូណាបន្ថែមចំនួន 2,641នាក់ ធ្វើឱ្យអ្នកឆ្លងមេរោគនេះកើនឡើងដល់ 67,100នាក់ ក្នុងនោះមានអ្នកស្លាប់ 1,526នាក់។

ខេត្ត Hubei ដែលជាសម្បុកមេរោគកូរ៉ូណា (Covid-19) មានអ្នកស្លាប់បន្ថែម 139នាក់ និងអ្នកឆ្លងថ្មី 2,420នាក់ ធ្វើឱ្យអ្នកស្លាប់សរុបក្នុងខេត្តនេះ ឡើងដល់ 1,457នាក់ និងអ្នកមានផ្ទុកមេរោគ 54,406នាក់។ នេះបើតាមទិន្នន័យរបស់គណៈកម្មការសុខាភិបាលខេត្ត ប្រកាសឱ្យដឹងនាព្រឹកនេះ (15កុម្ភៈ)។

គណៈកម្មការសុខាភិបាលជាតិនៃប្រទេសចិន ក៏បានឱ្យដឹងថា ប្រទេសនេះ មានអ្នកស្លាប់បន្ថែមដោយសារកូរ៉ូណា 143នាក់ និងអ្នកឆ្លងថ្មី មានចំនួន2,641នាក់។ អ្នកស្លាប់នៅទូទាំងប្រទេសចិន (ដីគោក) ឡើងដល់1,523នាក់ និងអ្នកឆ្លងសរុប 66,492នាក់។

ដូច្នេះ នៅទូទាំងពិភពលោក មានអ្នកផ្ទុកមេរោគរលាកសួត Covid-19 ដល់ទៅ 67,100នាក់ និងអ្នកស្លាប់ 1,526នាក់ និង 8,193នាក់ បានជាសះស្បើយពីជំងឺ។ ចំណែកអ្នកដែលបានស្លាប់នៅខាងក្រៅប្រទេសចិន (ដីគោក) មានចំនួន3នាក់ គឺម្នាក់នៅហុងកុង ម្នាក់នៅហ្វីលីពីន និងម្នាក់ទៀតនៅជប៉ុន៕

ប្រភព៖ សារព័ត៌មានបរទេស

February 15, 2020

អាចម៍ផ្កាយធ្លាក់មកលើតំបន់ឧស្សាហកម្មឥណ្ឌា បង្កើតបានជារណ្ដៅជម្រៅ…

កាមេរ៉ាសុវត្ថិភាពមួយ ថតបានទិដ្ឋភាពវត្ថុមួយធ្លាប់ពីលើមេឃ មកចំទីក្រុង Alwar រដ្ឋ Rajasthan កាលពីថ្ងៃទី11 ខែកុម្ភៈ ឆ្នាំ2020 បណ្ដាលឱ្យផ្ទៃមេឃឡើងភ្លឺចាំងភ្នែកក្នុងរយៈពេលច្រើនវិនាទី។

អាចម៍ផ្កាយនេះ បានធ្លាប់ចំតំបន់ឧស្សាហកម្មមួយកន្លែង បង្កើតបានជារណ្ដៅមួយដែលមានជម្រៅច្រើនម៉ែត្រនៅលើដី។ ហេតុការណ៍នេះ មិនបានធ្វើឱ្យមានអ្នកណាម្នាក់រងគ្រោះនោះទេ។

Sachin Bamba ដែលជាប្រធានទីភ្នាក់ងារតារាសាស្ត្រឥណ្ឌា (Space India) បានបញ្ជាក់ថា វត្ថុនោះគឺជាអាចម៍ផ្កាយ។ អ្នកវិទ្យាសាស្ត្រមួយក្រុម ត្រូវបានបញ្ជូនទៅកន្លែងកើតហេតុដើម្បីស្វែងយល់អំពីរណ្ដៅអាចម៍ផ្កាយនោះ។

យោងតាមមជ្ឈមណ្ឌលស្រាវជ្រាវវត្ថុក្បែរផែនដី Center for Near-Earth Object Studies (CNEOS) អាចម៍ផ្កាយនេះ បានធ្វើដំណើរក្នុងល្បឿន 31,7គីឡូម៉ែត្រក្នុង1វិនាទី និងបានបញ្ចេញថាមពលដ៏ខ្លាំងក្លា ប្រហាក់ប្រហែលនឹងការផ្ទុះរំសេវ95តោន។

ខណៈពេលអាចម៍ផ្កាយនេះធ្លាក់ចុះ វាបានធ្វើឱ្យអ្នកស្រុកដែលកំពុងដេកនៅក្បែរតំបន់នោះត្រូវភ្ញាក់ ដោយសារតែភាពញាប់ញ័រផែនដី ដូចទៅនឹងការរញ្ជួយដីដូច្នោះដែរ។ ពេលឮសូរសំឡេងផ្ទុះ Rajesh Kumar Gupta ដែលជាអ្នកស្រុករស់នៅក្បែរតំបន់កើតឧបទ្ទវហេតុនេះ បានចេញមកពិនិត្យមើល ក៏ដឹងថាវាមានខ្យល់ខ្លាំងនៅខាងក្រៅផ្ទះរបស់គាត់។ កសិករនៅតំបន់ Shahjahanpur ក៏បានឃើញអាចម៍ផ្កាយនេះ។ Ajay Chaudhary រស់នៅក្នុងតំបន់ Kotkasim ក៏បានឃើញពន្លឺដ៏ចិញ្ចាកចិញ្ចែញ និងមានវត្ថុអ្វីមួយដូចទៅនឹងកាំជ្រួចផ្លោងដែលបង្ហាញខ្លួនភ្លាមៗនៅលើអាកាស ខណៈគាត់កំពុងធ្វើដំណើរទៅយកទឹកដោះគោពេលព្រឹកព្រលឹម។

នេះមិនមែនជាលើកដំបូងនោះទេ ដែលមានអាចម៍ផ្កាយធ្លាក់ទៅលើប្រទេសឥណ្ឌា។ កាលពីខែកក្កដាឆ្នាំ2019 អាចម៍ផ្កាយធំមួយក៏បានធ្លាក់ចុះលើតំបន់ Nangla Kasota និងធ្វើឱ្យមានរណ្ដៅជម្រៅ6ម៉ែត្រផងដែរ៕

ប្រភព៖ សារព័ត៌មានបរទេស

February 14, 2020

រូបភាពពង្រីកធំនៃមេរោគកូរ៉ូណា Covid-19 ដំបូងបង្អស់ ត្រូវបានគេចេញផ្សាយ

សហរដ្ឋអាមេរិក៖ ក្រុមអ្នកវិទ្យាសាស្ត្រ បានពិនិត្យមើលដោយប្រើកែវពង្រីកមីក្រូទស្សន៍អេឡិចត្រុង(electron microscope) បានរកឃើញមេរោគកូរ៉ូណានេះ តោងជាប់នៅលើកោសិកានៃរាងកាយមនុស្ស។

សារព័ត៌មាន Live Science បានឱ្យដឹងថា បន្ទប់ពិសោធន៍ Rocky Mountain Laboratories(RML) នៃមន្ទីរប្រតិកម្ម និងជំងឺឆ្លងនៃសហរដ្ឋអាមេរិក បានចុះផ្សាយរូបថតពង្រីកធំមួយចំនួន ជាលើកដំបូងបង្អស់របស់មេរោគកូរ៉ូណា Covid-19 ដែលកំពុងរាតត្បាតពិភពលោក ពិសេសគឺនៅក្នុងទីក្រុងអ៊ូហាន ប្រទេសចិន ដោយបានសម្លាប់មនុស្សជិត1,500នាក់ និងអ្នកមានផ្ទុកមេរោគនេះ ឡើងដល់ 64,447នាក់។

មេរោគកូរ៉ូណា Covid-19 ទាំងនេះ មានរូបរាងដូចទៅនឹងកូនគ្រាប់ក្លីដ៏ល្អិត កំពុងតោងជាប់នៅលើកោសិកា និងស្ថិតក្នុងស្រទាប់ប្រូតេអ៊ីន។ មេរោគនេះ មានរូបរាងតូច រហូតដល់គេមិនអាចមើលឃើញដោយមីក្រូទស្សន៍អុបទិក (optical microscope)។

ក្រុមអ្នកវិទ្យាសាស្ត្រនៅឯ RML បានថតរូបភាពកោសិកាមានមេរោគកូរ៉ូណា ដែលបានមកពីអ្នកជំងឺជនជាតិអាមេរិកម្នាក់ ដោយប្រើកែវពង្រីកពីរប្រភេទ គឺមីក្រូទស្សន៍អេឡិចត្រុងប្រភេទស្កេន(Scanning electron microscope) និងមីក្រូទស្សន៍អេឡិចត្រុងប្រភេទបញ្ជូនរូបភាព(transmitted electron microscope) បន្ទាប់មក អ្នកវិទ្យាសាស្ត្របានបន្ថែមពណ៌ទៅលើរូបភាពទាំងនោះ។

មេរោគកូរ៉ូណា Covid-19 មានរូបរាងដូចទៅនឹងវីរុស MERS ឆ្នាំ2012 និងវីរុស SARS ក្នុងឆ្នាំ2002 ព្រោះថា ពួកវាស្ថិតក្នុងត្រកូលកូរ៉ូណាដូចគ្នា៕

ប្រភព៖ សារព័ត៌មានបរទេស

February 14, 2020

ហេតុអ្វីបានជាមេរោគកូរ៉ូណា Covid-19 អាចឆ្លងតាមរយៈបំពង់លូក្នុងអគារស្នាក់នៅបាន?

ក្រុមអ្នកសិក្សាស្រាវជ្រាវ កំពុងស្វែងយល់ឱ្យបានលម្អិតចំពោះសំណួរដែលសួរថា “តើមេរោគកូរ៉ូណា Covid-19 អាចឆ្លងតាមបំពង់លូក្នុងអគារស្នាក់នៅដែរ ឬអត់?

អាជ្ញាធរទីក្រុងហុងកុងថ្មីៗនេះ បានជម្លៀសពលរដ្ឋជាង100នាក់ ចេញពីអគារស្នាក់នៅ Hong Mei House នៅក្នុងតំបន់ Tsing Yi កាលពីថ្ងៃទី11 ខែកុម្ភៈ បន្ទាប់ពីស្ត្រីវ័យ62ឆ្នាំម្នាក់ បានក្លាយជាមនុស្សទីពីរក្នុងអគារ ឆ្លងមេរោគកូរ៉ូណា។ អ្នកជំងឺនេះ ស្នាក់នៅលើជាន់ទី3 ដែលមានចម្ងាយពីអ្នកជំងឺដំបូងរហូតដល់10ជាន់ ធ្វើឱ្យមានការព្រួយបារម្ភថា មេរោគនេះអាចឆ្លងតាមបំពង់លូក្នុងអគារ។ ក្រុមអ្នកវិទ្យាសាស្ត្រក៏បានរកឃើញបំពង់លូមួយដែលបានធ្លាយ នៅក្នុងបន្ទប់របស់អ្នកជំងឺទី2នេះផងដែរ។

ក្រុមមន្ត្រីសុខាភិបាលកំពុងស្រាវជ្រាវរកមូលហេតុដែលនាំឱ្យមានការឆ្លងរវាងអ្នកជំងឺទី1 និងអ្នកជំងឺទី2 ដែលនៅក្នុងអគារ Hong Mei House នេះ។ អង្គការសុខភាពពិភពលោក WHO ធ្លាប់បានឱ្យដឹងថា កាលពីឆ្នាំ2003 អ្នកវិទ្យាសាស្ត្រក៏បានរកឃើញមានករណីឆ្លងមេរោគ SARS តាមរយៈបំពង់លូខូច នៅក្នុងអគារ Amoy Gardens នៅក្រុងហុងកុងផងដែរ។

ករណីដែលបានកើតឡើងខាងលើ គឺដោយសារវីរុសកូរ៉ូណាប្រភេទ SARS អាចឆ្លងតាមរយៈលាមក និងកាកសំណល់ដែលមិនទាន់បានសម្លាប់មេរោគ។ វេជ្ជបណ្ឌិត Amesh Adalja អ្នកឯកទេសផ្នែកជំងឺឆ្លងនៃមជ្ឈមណ្ឌលសន្តិសុខផ្នែកសុខភាព Jonhs Hopkins ក្នុងតំបន់ Baltimore បានថ្លែងថា បំពង់លូបង្ហូរកាតសំណល់ ត្រូវបានគេរៀបចំដាក់ឱ្យដាច់ដោយឡែកពីកន្លែងរស់នៅ ប៉ុន្តែ បើសិនវាបែក ឬធ្លុះ វានឹងអាចជួយឱ្យមេរោគចេញមកខាងក្រៅបាន ប្រការនេះ ធ្វើឱ្យពលរដ្ឋដែលនៅក្បែរកន្លែងមានលូធ្លាយ ត្រូវប្រឈមទៅនឹងហានិភ័យនៃការឆ្លងមេរោគ។ នេះបើតាមសារព័ត៌មាន Live Science។

ក៏ប៉ុន្ដែ វេជ្ជបណ្ឌិត Amesh Adalja បានសង្កត់ធ្ងន់ថា បើទោះមេរោគកូរ៉ូណា Covid-19 អាចឆ្លងតាមរយៈបំពង់លូ តែនេះក៏មិនមែនជាការឆ្លងធម្មតានោះដែរ។ របៀបឆ្លងទូទៅបំផុតរបស់មេរោគនេះ គឺតាមរយៈកម្ទេចទឹកមាត់ កម្ទេចស្លេស្ម ដែលខ្ទាតចេញនៅពេលអ្នកជំងឺកណ្ដាស់ ឬក្អក។ ការពិនិត្យបឋមទៅលើបំពង់លូក្នុងអគារ Hong Mei House បង្ហាញថា ប្រព័ន្ធបំពង់លូនេះ ត្រូវបានរៀបចំយ៉ាងល្អ។

ចំពោះករណីឆ្លងតាមបំពង់លូក្នុងអគារ Amoy Gardens កាលពីជំនាន់អាសន្នរោគ SARS វិញ អ្នកជំនាញកាលណោះបានរកឃើញថា ប្រព័ន្ធបំពង់លូនោះ មានរចនាមិនល្អ។ ជាធម្មតា បំពង់លូក្នុងបន្ទប់ទឹក តែងមានរាងអក្សរ U ដើម្បីទប់មិនឱ្យកាកសំណល់ និងខ្យល់អាក្រក់រត់បញ្ច្រាស់មកក្រោយ ប៉ុន្តែ បំពង់លូនៅឯអគារ Amoy Gardens គេពិនិត្យឃើញថា ខ្យល់ហ្គាស់អាចភាយត្រឡប់ក្រោយបាន ដែលជាហេតុនាំឱ្យមេរោគអាចអណ្ដែតចេញមកក្រៅបាន៕

ប្រភព៖ សារព័ត៌មានបរទេស

February 14, 2020

ប្លាស្មាឈាមរបស់អ្នកជាពីជំងឺកូរ៉ូណា អាចកម្ចាត់មេរោគ Covid-19!

ប្រទេសចិន៖ ក្រុមអ្នកវិទ្យាសាស្ត្របានរកឃើញបរិមាណដ៏ច្រើននៃអង្គបដិប្រាណនៅក្នុងប្លាស្មាឈាមរបស់អ្នកជំងឺដែលមានជាសះស្បើយពីជំងឺកូរ៉ូណា Covid-19។

“លទ្ធផលដំបូងនានា បានបង្ហាញអំពីប្រសិទ្ធភាពនៃវិធីសាស្ត្របញ្ជូនប្លាស្មាឈាម ក្នុងការព្យាបាលអ្នកជំងឺកូរ៉ូណា Covid-19” នេះបើតាមលោក Zhang Dignyu ប្រធានមន្ទីរពេទ្យ Jinyintan នៅទីក្រុងអ៊ូហាន។ លោកបានអំពាវនាវដល់អ្នកដែលបានជាសះស្បើយពីជំងឺកូរ៉ូណា មកផ្ដល់ឈាម ដើម្បីជួយដល់អ្នកជំងឺដទៃ។

ក្រុមហ៊ុនបច្ចេកវិទ្យាជីវសាស្ត្រជាតិរបស់ចិន (CNBG) បានឱ្យដឹងថា ពួកគេបានត្រៀមដោយជោគជ័យនូវបណ្ដាផលិតផលប្លាស្មាឈាមការពារការឆ្លងរោគពិសេស ហើយនឹងប្រើប្រាស់វាក្នុងការព្យាបាលអ្នកជំងឺដែលកំពុងស្ថិតក្នុងស្ថានភាពធ្ងន់ធ្ងរ។ នេះបើតាមសារព័ត៌មាន Xinhua។

បណ្ដាផលិតផលនេះ សុទ្ធតែបានច្នៃចេញពីប្លាស្មាឈាម ដែលបានមកពីការបរិច្ចាគពីក្រុមអ្នកជំងឺដែលបានជាសះស្បើយពីជំងឺកូរ៉ូណា និងបានត្រៀមទុកក្រោយពីបានកម្ចាត់វីរុសរួចរាល់ និងការធ្វើតេស្តជាច្រើនទៀត។ នេះបើតាមការឱ្យដឹងពី CNBG។ អ្នកជំងឺជាង 10នាក់ បានយល់ព្រមទទួលការព្យាបាលដោយប្រើវិធីថ្មីជាមួយនឹងប្លាស្មាឈាមចម្ចាត់មេរោគពិសេសនេះ ហើយឃើញថា ស្ថានភាពជំងឺរបស់ពួកគេ បានប្រសើរឡើងគួរឱ្យកត់សម្គាល់ បន្ទាប់ពីបានព្យាបាលរយៈពេល 12-24ម៉ោង។

CNBG បានឱ្យដឹងដែរថា ភាគច្រើននៃអ្នកជំងឺដែលត្រូវបានព្យាបាលជាសះស្បើយ អាចបញ្ចេញអង់ទីគ័រដែលមានសមត្ថភាពកម្ចាត់វីរុស។ បច្ចុប្បន្ន នៅពេលដែលពិភពលោក មិនទាន់មានវ៉ាក់សាំង និងថ្នាំព្យាបាលពិសេស វិធីព្យាបាលដោយប្រើប្លាស្មាឈាមនេះ អាចជួយកាត់បន្ថយការស្លាប់បានមួយកម្រិត។

ឈាមជាសារធាតុរាវយ៉ាងសំខាន់សម្រាប់រាងកាយរបស់មនុស្សម្នាក់ៗ រួមមានសមាសធាតុផ្សំ4សំខាន់ៗគឺ ប្លាស្មា កោសិកាឈាមក្រហម កោសិកាឈាមស និងផ្លាកែត ដែលមានតួនាទី ដឹកនាំអុកស៊ីសែន និងសារធាតុចិញ្ចឹម បង្កើតឲ្យមានកំណកឈាម ដឹកនាំកាកសំណល់ទៅតម្រងនោម និងថ្លើម គ្រប់គ្រងសីតុណ្ហភាពក្នុងរាងកាយទៀតផង៕

ប្រភព៖ សារព័ត៌មានបរទេស

February 14, 2020

អាជ្ញាធរទីក្រុងក្វាងចូវ ហាមអ្នកទិញហូបអាហារនៅក្នុងភោជនីយដ្ឋាន

ប្រទេសចិន៖ អាជ្ញាធរនៃទីក្រុងក្វាងចូវ (Guangzhou) បានហាមមនុស្សម្នា ហូបអាហារនៅក្នុងអាហារដ្ឋាន ឬភោជនីយដ្ឋាន ប៉ុន្តែ អនុញ្ញាតឱ្យបញ្ជាទិញតាមអ៊ីនធើណិត និងខ្ចប់យកទៅផ្ទះ ដើម្បីទប់ស្កាត់ការឆ្លងរាលដាលបន្ថែមនៃជំងឺរលាកសួតថ្មីកូរ៉ូណា Covid-19។

យោងតាមសេចក្ដីប្រកាសកាលពីម្សិលមិញ អាហារដ្ឋាន និងភោជនីយដ្ឋានទាំងអស់នៅក្នុងទីក្រុងក្វាងចូល ខេត្តក្វាងតុង ភាគខាងត្បូងប្រទេសចិន ត្រូវបានហាមមិនឱ្យលក់អាហារដែលហូបនៅនឹងកន្លែងដូចសព្វដង។ ជំនួសមកវិញ អតិថិជនត្រូវតែបញ្ជាទិញតាមអនឡាញ និងទូរស័ព្ទ ឬទៅទិញយកមកហូបនៅឯផ្ទះ។ ប៉ុន្តែ អាជ្ញាធរបានផ្ដល់អនុសាសន៍ថា ការទិញតាមទូរស័ព្ទ ឬតាមអ៊ីនធើណិត គឺជាវិធីដែលមានសុវត្ថិភាពជាងគេ។

អ្នកនៅក្នុងក្រុងក្វាងចូវ ក៏ដូចជាបណ្ដាក្រុងផ្សេងៗ បានចាប់ផ្ដើមត្រឡប់ចូលធ្វើការវិញ បន្ទាប់ពីបានឈប់សម្រាកបុណ្យចូលឆ្នាំចិនមួយរយៈពេលវែង ព្រោះតែអាសន្នរោគកូរ៉ូណា។ ដូច្នេះ ដើម្បីទប់ស្កាត់ការឆ្លងមេរោគបន្ថែមទៀត អាជ្ញាធរក៏បានប្រើវិធីនេះ។ បទបញ្ជានេះ អនុវត្តតែទៅលើអាហារដ្ឋានខាងក្រៅ និងភោជនីយដ្ឋានតែប៉ុណ្ណោះ ចំណែកបុគ្គលិកការិយាល័យវិញ នៅតែអាចហូបអាហារក្នុងអាហារដ្ឋានរបស់ក្រុមហ៊ុនដែលពួកគេកំពុងធ្វើការនោះបាន។

ការទៅកាន់ភោជនីយដ្ឋានដើម្បីផឹកតែ និងហូបអាហារចិន Dim sum (Dim sum គឺជាម្ហូបចិនមួយបែប ដែលអាហារទាំងនោះ ត្រូវបានគេរៀបចំជាផ្នែកតូចៗ ដាក់ក្នុងកន្ត្រកចំហុយតូច ឬនៅលើចានតូចទាបមួយៗ) គឺជាទម្លាប់របស់អ្នកក្រុងក្វាងចូវ។

លោក He Zhijuan អាយុ 73ឆ្នាំ បាននិយាយថា ៖ “សូម្បីតែនៅពេលប្រទេសចិន ជួបនឹងគ្រោះអត់ឃ្លានកាលពីឆ្នាំ1959 ដល់1961 ខ្ញុំនៅចាំថា អាហារដ្ឋាននានានៅតែបើកដំណើរការ។ ខ្ញុំពិតជាមានការភ្ញាក់ផ្អើលណាស់ ពេលអាជ្ញាធរចេញបទបញ្ជាហាមបែបនេះ។ ខ្ញុំគិតថា អាសន្នរោគនេះ ប្រាកដជាធ្ងន់ធ្ងរណាស់ហើយ ទើបក្វាងចូវ ប្រើយុទ្ធសាស្ត្រនេះ”។

អាសន្នរោគកូរ៉ូណា Covid-19 បានចាប់ផ្ដើមផ្ទុះឆ្លងរាលដាល តាំងពីខែធ្នូ ឆ្នាំ2019 នៅទីក្រុងអ៊ូហាន (Wuhan) ប្រទេសចិន។ មកដល់ពេលនេះ ពិភពលោកទាំងមូល មានអ្នកស្លាប់ដោយសារមេរោគនេះ កើនដល់ 1,383នាក់ និងអ្នកមានផ្ទុកមេរោគនេះ កើនដល់ទៅ 64,437នាក់ ក្នុងនោះមានអ្នកជំងឺរាប់ពាន់នាក់ កំពុងស្ថិតក្នុងស្ថានភាពគ្រោះថ្នាក់ដល់ជីវិត៕

ប្រភព៖ សារព័ត៌មានបរទេស

February 14, 2020

ថ្ងៃបុណ្យនៃក្ដីស្រឡាញ់មកដល់ហើយ! ទាំងនេះជាកាដូដែលប្រកបដោយភាពទាក់ទាញ និងបង្កើនភាពផ្អែមល្ហែម សុភមង្គល សម្រាប់នារីគ្រប់រូប

ការជូនកាដូ ឬអំណោយគឺជាវិធីមួយដែលបង្ហាញពីក្ដីស្រឡាញ់ ការមេត្តា ឬមនោសញ្ចេតនាចំពោះអ្នកទទួល។ កាដូទាំងនោះ អាច “និយាយ” ជំនួសអ្នកនូវអ្វីដែលអ្នកចង់និយាយ។ ប៉ុន្តែ អ្នកគួរតែយកចិត្តទុកដាក់ទៅលើអត្ថន័យនៃអំណោយ ឬកាដូសម្រាប់ថ្ងៃនេះ ព្រោះថា វាមានតម្លៃទៅតាមកាលៈទេសៈ។ ក្នុងអត្ថបទនេះ យើងសូមនិយាយតែអំពីក្ដីស្រឡាញ់រវាងបុរស និងនារី ដែលជាគូស្នេហ៍នឹងគ្នាប៉ុណ្ណោះ។

ថ្ងៃបុណ្យនៃក្ដីស្រឡាញ់ (Valentinne 14/2) ឆ្នាំនេះ តើគួរជូនកាដូ ឬអំណោយអ្វីដល់នារីជាគូស្នេហ៍របស់អ្នក? ខាងក្រោមនេះ គឺជាកាដូមួយចំនួនដែលប្រកបដោយអត្ថន័យ សម្រាប់ថ្ងៃបុណ្យនៃក្ដីស្រឡាញ់ 14កុម្ភៈ 2020។

ផ្កាកុលាប

ឆ្នាំ 2020 គឺជាយុគសម័យនៃបច្ចេកវិទ្យា ប៉ុន្តែ អ្នកក៏មិនត្រូវភ្លេចកាដូដែលនៅតែពេញនិយមនោះដែរ នោះគឺផ្កាកុលាប។ មិនចាំបាច់ដល់ទៅមួយបាច់នោះទេ គ្រាន់តែមួយទងក៏គ្រប់គ្រាន់សម្រាប់ធ្វើឱ្យគូស្នេហ៍របស់អ្នកសប្បាយចិត្ត។ ប៉ុន្តែ បើគ្មានផ្កាកុលាបទេ វាហាក់ដូចជាខ្វះអត្ថន័យអ្វីម្យ៉ាង។

ដោយមានរូបរាងស្រស់ស្អាត លេចធ្លោ និងក្លិនក្រអូបស្រាលៗ ទាក់ទាញ ទើបផ្កាកុលាបត្រូវបានគេចាត់ទុកថា ជា “ស្ដេច” នៃបុប្ផា ដែលតំណាងឱ្យស្នេហា សម្រស់ សង្គ្រាម និងនយោបាយ។ ប៉ុន្តែ ប្រភេទផ្កាកុលាបនិមួយៗ វាមានអត្ថន័យ និងសម្រស់ដោយឡែក។

នៅក្នុងទេវកថាក្រិក ផ្កាកុលាបក្រហម ផ្សារភ្ជាប់ជាមួយនឹងរូបភាពទេពធីតានៃសេចក្ដីស្រឡាញ់។ ចាប់ពីពេលនោះ ផ្កាកុលាបក្រហម បានក្លាយជាអ្នកតំណាងឱ្យក្រីក្ដីស្រឡាញ់ស្មោះត្រង់ដ៏ខ្លាំងក្លា។ នៅពេលអ្នកជូនផ្កានេះទៅឱ្យអ្នកណាម្នាក់ គឺប្រៀបបានដូចជា អ្នកបានផ្ញើសារមួយទៅកាន់អ្នកទទួលថា “បងស្រឡាញ់អូន”។

សូកូឡា

ជាយូរយារណាស់មកហើយ សូកូឡា បានក្លាយជានិមិត្តរូបនៃស្នេហា នៃភាពផ្អែមល្ហែម និងការចូលចិត្តខ្លាំង។ សូកូឡា បានក្លាយជាអំណោយក្នុងថ្ងៃបុណ្យនៃក្ដីស្រឡាញ់ (Valentine) ចាប់តាំងពីឆ្នាំ 1902 មកម្ល៉េះ។

សូកូឡា ត្រូវបានចាត់ទុកជាកាដូពិសេសសម្រាប់ថ្ងៃ 14កុម្ភៈ ព្រោះថា វាមានរសជាតិផ្អែម និងល្វីងលាយឡំគ្នា ដូចទៅនឹងរសជាតិនៃស្នេហាពិតៗ។

គ្រឿងអលង្ការណ៍

ចំពោះស្ត្រី គ្រឿងអលង្ការណ៍បានក្លាយជារបស់មួយដែលស្ទើរតែមិនអាចខ្វះបាននៅក្នុងជីវភាពប្រចាំថ្ងៃ។ ក្រវិលដ៏តូចមួយគូ កងដៃស្រស់ស្អាតមួយវង់ ឬចិញ្ចៀនតូចមួយវង់ ក៏អាចជួយឱ្យនារីម្នាក់សប្បាយចិត្ត។

គ្រឿងអលង្ការណ៍មួយដែលសមស្របនឹងវ័យ និងការចូលចិត្តរបស់អ្នកទទួល ក៏រួមចំណែកជួយសម្ដែងអំពីការយកចិត្តទុកដាក់របស់អ្នកជូនផងដែរ។

គ្រឿងសំអាង

គ្រឿងសំអាង ដូចជាឡេលាបស្បែក ឡេការពារកម្ដៅថ្ងៃ ក្រែមលាបបបូរមាត់ ឬទឹកអប់ជាដើម គឺជារបស់ដែលនារីទាំងអស់ចូលចិត្ត។ ដូច្នេះ កាដូដែលជាគ្រឿងសំអាងនេះ នឹងបង្ហាញឱ្យឃើញថា អ្នកគឺជាបុរសដែលចេះយកចិត្តទុកដាក់ និងចូលចិត្តអ្វីដែលនាង (គូស្នេហ៍) ចូលចិត្ត និងចង់បាន។

ការជ្រើសរើសគ្រឿងសំអាងដើម្បីជូននាង គឺមិនមែននឹកឃើញភ្លាមទិញភ្លាមនោះទេ តែត្រូវចំណាយពេលស្វែងយល់ថា នាងចូលចិត្ត និងសមស្របជាមួយគ្រឿងសំអាងប្រភេទណា ដើម្បីចៀសវាងការខាតបង់ដោយសារនាងមិនចូលចិត្ត ឬផលិតផលនោះ ប្រើមិនកើតសម្រាប់នាង។

ដំណើរកម្សាន្តបែបរ៉ូម៉ែនទិក

កាដូនេះ សមស្របចំពោះគូស្វាមីភរិយាដែលមានបំណងបង្កើនមនោសញ្ចេតនា ឬគូស្នេហ៍វ័យក្មេងដែលចង់បង្កើតអនុស្សាវរីយ៍ផ្អែមល្ហែមពិបាកបំភ្លេច។

ក៏ប៉ុន្តែ ដោយសារតែបច្ចុប្បន្ន អាសន្នរោគកូរ៉ូណា Covid-19 កំពុងរាតត្បាតពិភពលោក ដូច្នេះ អ្នកត្រូវតែប្រុងប្រយ័ត្នទៅលើការថែរក្សាអនាម័យ ការពារសុខភាព ដូចជាពាក់ម៉ាស់ និងលាងដៃនឹងសាប៊ូ ឬទឹកកម្ចាត់មេរោគជាដើម នៅពេលទៅកាន់កន្លែងដែលមានមនុស្សច្រើន។

ញ៉ាំអាហារជាមួយគ្នា

មិនថា គូស្នេហ៍ថ្មីថ្មោង ឬគូស្នេហ៍ចាស់នោះទេ ការជូនផ្កាកុលាបតែមួយមុខ គឺហាក់ដូចខ្វះអ្វីម្យ៉ាងដែរ។ ដើម្បីបន្ថែមភាពផ្អែមល្ហែម និងសុភមង្គល អ្នកគួរនាំគូស្នេហ៍ ទៅញ៉ាំអ្វីមួយនៅកន្លែងដែលនាងចូលចិត្ត និងឆ្លៀតឱកាសនិយាយពាក្យស្នេហាទៅកាន់នាង។

ខោអាវ កាបូប ស្បែកជើង

នេះក៏ជាកាដូដែលមានលក្ខណចាំបាច់ ហើយនាងក៏ប្រាកដជាចូលចិត្ត។ ប៉ុន្តែ ដូចទៅនឹងគ្រឿងសំអាង កាដូជាខោអាវ ឬកាបូប គួរតែជ្រើសរើសទៅតាមការចូលចិត្តរបស់អ្នកទទួល។ ល្អបំផុត ក្រោយពីបានជូនផ្កាកុលាបទៅឱ្យនាង ប្រុសៗយើងគួរអញ្ជើញគូស្នេហ៍ទៅញ៉ាំអាហារនៅកន្លែងណាមួយ បន្ទាប់មក បបួលនាងដើរផ្សារជាមួយគ្នា។ បែបនេះ អ្នកទាំងពីរមានឱកាសច្រើនដើម្បីនៅក្បែរគ្នា ហើយអាចជ្រើសរើសកាដូសមស្របសម្រាប់នាងផងដែរ។

សម្ភារបច្ចេកវិទ្យា

ទូរស័ព្ទទំនើប ឬកុំព្យូទ័រជាដើម គឺជាកាដូដ៏អស្ចារ្យបំផុត ដែលនារីទាំងឡាយចូលចិត្ត មិនថានាងជាមនុស្សនិយម ឬមិននិយមបច្ចេកវិទ្យានោះទេ៕

February 14, 2020

Author: សឿន សំណាង