សឿន សំណាង - La Reine Media

ទស្សនាទិដ្ឋភាពខាងក្នុងនាវាទេសចរណ៍ ដែលត្រូវគេដាក់ឱ្យនៅដាច់ដោយឡែកដោយសារតែ…

ក្នុងអំឡុងពេលនៃការដាក់ឱ្យនៅដាច់ដោយឡែក សកម្មភាពកម្សាន្តនៅកន្លែងរួមទាំងអស់លើនាវា ទេសចរណ៍ Diamond Princess ក៏ត្រូវបានលុបចោល។

នាវាទេសចរណ៍យក្ស ឈ្មោះ Diamond Princess ត្រូវបានដាក់ឱ្យនៅដាច់ដោយឡែកនៅលើផ្ទៃសមុទ្រនៃទីក្រុង Yokohama ក្បែររាជធានី Tokyo ប្រទេសជប៉ុន ចាប់ពីថ្ងៃទី4កុម្ភៈ បន្ទាប់ពីមានមនុស្សម្នាក់ក្នុងចំណោមអ្នកនៅលើនាវា ត្រូវបានគេរកឃើញថា មានផ្ទុកមេរោគកូរ៉ូណា COVID-19។ មកដល់ថ្ងៃទី17កុម្ភៈ មានអ្នកផ្ទុកមេរោគនេះ យ៉ាងតិច454នាក់ ក្នុងចំណោមអ្នកទេសចរ 3,700នាក់ រួមទាំងបុគ្គលិកនាវា។ មុននោះ នាវាទេសចរណ៍នេះ ទើបតែបានបញ្ចប់ដំណើរទេសចរណ៍តាមសមុទ្រចំនួន14ថ្ងៃ ក្នុងអំឡុងរដូវបុណ្យចូលឆ្នាំចិន។
នៅពេលនាវា Diamond Princess នេះ ត្រូវបានដាក់ឱ្យនៅដាច់ដោយឡែក អ្នកទេសចរចំណាយពេលស្ទើរតែទាំងអស់របស់ខ្លួន សម្ងំនៅក្នុងបន្ទប់។ ប៉ុន្តែ មិនមែនបន្ទប់ណាក៏មានបង្អួចនោះដែរ។ បន្ទប់ធំបំផុតមានទំហំ86ម៉ែត្រក្រឡា និងបន្ទប់តូចបំផុតមានទំហំប្រហែល14ម៉ែត្រក្រឡា និងបំពាក់ដោយសម្ភារគ្រប់ប្រភេទ រួមទាំងបន្ទប់ទឹកធំទូលាយ។ល។

អ្នកទេសចរអាចមើលភាពយន្តដោយមិនគិតថ្លៃនៅលើ TV ក្នុងបន្ទប់របស់ពួកគេផ្ទាល់…មេចុងភៅទាំងអស់នៅតែធ្វើការក្នុងអំឡុងពេលនាវាត្រូវបានដាក់ឱ្យនៅដាច់ដោយឡែក ដើម្បីបម្រើដល់ភ្ញៀវនៅតាមបន្ទប់នីមួយៗ ជាមួយនឹងបញ្ជីមុខម្ហូបប្ដូរផ្លាស់រាល់ថ្ងៃ។

ក្នុងអំឡុងពេលទប់ស្កាត់ការឆ្លងរាលដាលនៃមេរោគកូរ៉ូណា ភ្ញៀវទាំងអស់មិនអាចប្រើប្រាស់កន្លែងកម្សាន្តរួមនៅលើនាវានោះទេ។ ប៉ុន្តែ ពួកគេអាចដើរនៅលើដំបូលនាវាដើម្បីលំហែកាយ ទៅតាមការចាត់ចែងរបស់ភាគីនាវា ដោយផ្ដល់អាទិភាពឱ្យអ្នកទេសចរដែលស្នាក់នៅក្នុងបន្ទប់ដែលមិនមានបង្អួច។

នាវានេះ មាន18ជាន់ ហើយជាន់នីមួយៗ ត្រូវបានតុបតែងទៅតាមប្រធានបទនៃមហាសមុទ្រនីមួយៗ។

ចាប់ពីជាន់ទី5 ដល់ទី7 គឺជាកន្លែងដែលមានសកម្មភាពរស់រវើកបំផុត។ Grand Plaza ស្ថិតនៅលើជាន់ទី6 និងទី7 ជាកន្លែងដែលប្រធាននាវាបង្ហាញខ្លួនក្នុងពិធីជប់លៀងធំៗ។ សកម្មភាពទាំងនេះ ត្រូវបានផ្អាកបណ្ដោះអាសន្នក្នុងពេលមានវិបត្តិសុខភាពកូរ៉ូណា។

ស្នាដៃសិល្បៈទាំងឡាយត្រូវបានដាក់បង្ហាញក្នុងបន្ទប់ធំមួយនៅលើនាវា ដើម្បីឱ្យភ្ញៀវទស្សនា ឬទិញដោយការលក់ដេញថ្លៃ។

នាវានេះ មានភោជនីយដ្ឋាន ហាងកាហ្វេ និងបូហ្វេចំនួន14កន្លែង ដោយមានអាហារច្រើនប្រភេទ និងសម្បុរបែប។ ប៉ុន្តែ ពេលនេះ ភ្ញៀវទេសចរបានត្រឹមតែហូបអាហារនៅក្នុងបន្ទប់របស់ខ្លួនតែប៉ុណ្ណោះ។

នាវាប្រវែង290ម៉ែត្រនេះ ត្រូវបានសាងសង់ឡើងដូចទៅនឹងទីក្រុងអណ្ដែតដូច្នោះដែរ។ ជាន់ខាងលើបង្អស់ គឺជាកន្លែងដែលភ្ញៀវលំហែកាយ នៅក្បែរអាងហែលទឹក បារ និងរោងភាពយន្តនៅខាងក្រៅ។

នាវាយក្សផ្កាយ5នេះ ក៏មានអាងទឹកក្ដៅបែបជប៉ុនផងដែរ។ បន្ទប់ងួតទឹក Izumi ដ៏ធំ នៅផ្នែកខាងក្រោយនៃនាវា និងស្ថិតនៅជាន់ទី15 ដែលមានបន្ទប់ដាច់ដោយឡែកជាច្រើន និងអាចគយគន់ទេសភាពនៃសមុទ្រដ៏ធំល្វឹងល្វើយ៕

ប្រភព៖ សារព័ត៌មានបរទេស

February 18, 2020

មេរោគកូរ៉ូណា COVID-19 សម្លាប់មនុស្ស 1,873នាក់

ខេត្ត Hubei មានអ្នកស្លាប់បន្ថែម 93នាក់ ដោយសារវីរុសកូរ៉ូណា COVID-19 ធ្វើឱ្យអ្នកស្លាប់សរុបទូទាំងពិភពលោក ឡើងដល់ 1,873នាក់។

មន្ត្រីសុខាភិបាលនៅខេត្ត Hubei ប្រទេសចិន ដែលជាសម្បុកមេរោគកូរ៉ូណា ថ្ងៃនេះ បានប្រកាសថា បានរកឃើញអ្នកផ្ទុកមេរោគបន្ថែមចំនួន 1,807នាក់ និងអ្នកស្លាប់93នាក់ ធ្វើឱ្យចំនួនអ្នកបានឆ្លងមេរោគក្នុងខេត្តនេះឡើងដល់ 59,989នាក់ និងអ្នកស្លាប់ឡើងដល់ 1,789នាក់។ ក្នុងនោះ ទីក្រុង Wuhan មានអ្នកជំងឺថ្មី 1,600នាក់ និងអ្នកស្លាប់បន្ថែម72នាក់។

ចំនួនអ្នកជំងឺថ្មីនៅក្នុងខេត្ត Hubei កើន 3% ខណៈករណីស្លាប់កើន 5% បើធៀបនឹងថ្ងៃម្សិលមិញ។

គណៈកម្មសុខាភិបាលជាតិនៃប្រទេសចិន ថ្ងៃនេះ មិនទាន់បានប្រកាសទិន្នន័យថ្មីនៅឡើយ។

នៅទូទាំងពិភពលោក បច្ចុប្បន្ន មានអ្នកជំងឺរលាកសួតកូរ៉ូណាសរុប 73,326នាក់ ខណៈដែលអ្នកស្លាប់កើនដល់1,873នាក់ និងអ្នកបានជាសះស្បើយចំនួន 12,677នាក់។ ក្នុងចំណោមអ្នកស្លាប់ទាំងអស់ ក្រៅពីប្រទេសចិន (ចិនដីគោក) ក៏មានអ្នកស្លាប់នៅក្នុងប្រទេស និងតំបន់មួយចំនួនផងដែរ ដូចជាជប៉ុន ហុងកុង បារាំង ហ្វីលីពីន និងតៃវ៉ាន់។

អាសន្នរោគ COVID-19 (មេរោគបង្ករលាកសួតប្រភេទថ្មី កូរ៉ូណា) បានផ្ទុះឆ្លងរាលដាលចេញពីតំបន់ Wuhan ប្រទេសចិន ចាប់ពីខែធ្នូ ឆ្នាំ2019 ហើយបានឆ្លងដល់ប្រទេស និងតំបន់ចំនួន27នៅទូទាំងពិភពលោក។៕

ប្រភព៖ សារព័ត៌មានបរទេស

February 18, 2020

ម្ចាស់នាវា MS Westerdam សហការជាមួយកម្ពុជា និងប្រទេសពាក់ព័ន្ធ តាមរកអ្នកទេសចរដែលបានចាកចេញពីនាវានេះ

ម្ចាស់នាវាទេសចរណ៍ MS Westerdam កំពុងសហការជាមួយអាជ្ញាធរកម្ពុជា និងម៉ាឡេស៊ីដើម្បីស្វែងរកអ្នកដែលបានចាកចេញពីនាវា បន្ទាប់ពីបានពិនិត្យឃើញថា អ្នកទេសចរម្នាក់មានផ្ទុកមេរោគកូរ៉ូណា COVID-19។

“យើងខ្ញុំកំពុងតែសហការជាមួយមន្ត្រីសុខាភិបាលកម្ពុជា និងមា៉ឡេស៊ី ក៏ដូចជាអ្នកជំនាញមកពីមជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក (CDC) និងអង្គការសុខភាពពិភពលោក។ អ្នកទេសចរដែលបានវិលត្រឡប់ទៅដល់ផ្ទះ នឹងត្រូវបានមន្ត្រីសុខាភិបាលក្នុងតំបន់ ធ្វើការទំនាក់ទំនង និងផ្ដល់ព័ត៌មានបន្ថែម”។ នេះគឺជាការប្រកាសរបស់ក្រុមហ៊ុន Holland America Line ដែលជាម្ចាស់នាវាទេសចរណ៍ MS Westerdam ឱ្យដឹងនៅថ្ងៃនេះ (17កុម្ភៈ ឆ្នាំ2020)។ នេះបើតាមសារព័ត៌មាន Reuters។

សេចក្ដីប្រកាសនេះ ត្រូវបានធ្វើឡើងបន្ទាប់ពីអ្នកដំណើរ145នាក់ ចាកចេញពីនាវា MS Westerdam ដែលចូលចតក្នុងកំពង់ផែនខេត្តព្រះសីហនុ បានធ្វើដំណើរតាមយន្តហោះទៅម៉ាឡេស៊ី ដើម្បីបន្តដំណើរត្រឡប់ទៅផ្ទះ។ ប៉ុន្តែ អ្នកដំណើរ8នាក់ត្រូវបានម៉ាឡេស៊ី ឃាត់ឱ្យនៅ ដើម្បីពិនិត្យរកមេរោគកូរ៉ូណា ក្នុងនោះលោកយាយអាយុ83ឆ្នាំម្នាក់ ត្រូវបានគេរកឃើញថា មានផ្ទុកមេរោគរលាកសួតប្រភេទថ្មីកូរ៉ូណា COVID-19។ រឿងនេះបានធ្វើឱ្យមានការព្រួយបារម្ភ និងសង្ស័យថា អ្នកដំណើរ137នាក់ ដែលចាកចេញពីទីក្រុង Kuala Lumpur ដើម្បីបន្តដំណើរទៅផ្ទះ អាចមានផ្ទុកមេរោគ COVID-19 នេះដែរ។

ក្រុមហ៊ុន Holland America Line បានឱ្យដឹងថា អ្នកទេសចរ 1,454នាក់ និងក្រុមបុគ្គលិកនាវា 802នាក់ មុននោះមិនមានអាការនៃជំងឺកូរ៉ូណានោះទេ។

យ៉ាងហោចណាស់មានអ្នកដំណើរ236នាក់ និងបុគ្គលិកនាវា747នាក់ នៅបន្តស្នាក់នៅក្នុងនាវា ខណៈដែលអ្នកដំណើរផ្សេងទៅស្នាក់នៅក្នុងសណ្ឋាគារនានាក្នុងក្រុងភ្នំពេញ។ អាជ្ញាធរថៃក៏បានប្រកាសថា អ្នកដំណើររាប់សិបនាក់ដែលធ្លាប់នៅលើនាវា MS Westerdam ក៏បានចូលមកទឹកដីថៃ ដើម្បីបន្តដំណើរទៅផ្ទះ។

សូមបញ្ជាក់ថា នាវាទេសចរណ៍ MS Westerdam បានចូលចតក្នុងកំពង់ផែខេត្តព្រះសីហនុ កាលពីថ្ងៃទី13កុម្ភៈ ក្រោយរយៈ2សប្ដាហ៍ធ្វើដំណើរគ្មានគោលដៅនៅលើផ្ទៃសមុទ្រ ដោយសារត្រូវបានប្រទេសជាច្រើនដូចជា ហ្វីលីពីន តៃវ៉ាន់ ជប៉ុន កូរ៉េខាងត្បូង និងប្រទេសថៃ បដិសេធមិនឱ្យចូលចត ព្រោះតែខ្លាចឆ្លងវីរុសកូរ៉ូណាដល់ពលរដ្ឋរបស់ពួកគេ។ ប៉ុន្តែ ដោយសារតែទទួលដំណឹងដូចខាងលើ និងបានដឹងថា នាវានេះជិតអស់ស្បៀង ទើបកម្ពុជាអនុញ្ញាតឱ្យនាវានេះចូលចត។

ក្រោយពីទីក្រុង Kuala Lumpur ប្រកាសថា អ្នកដំណើរម្នាក់មកពីនាវា MS Westerdam មានផ្ទុកមេរោគកូរ៉ូណា គម្រោងបញ្ជូនអ្នកទេសចរលើនាវាទៅកាន់ប្រទេសពួកគេវិញ ត្រូវបានអាក់ខាន ហើយអ្នកដំណើរដែលប្រុងនឹងចាកចេញពីកម្ពុជាទៅកាន់ប្រទេសម៉ាឡេស៊ីក៏ត្រូវបានលុបចោល។

ម្ចាស់នាវា MS Westerdam នាល្ងាចនេះ បានប្រកាសថា យ៉ាងហោចណាស់មានភ្ញៀវទេសចរចំនួន 255នាក់ និងបុគ្គលិកនាវា747នាក់ ក្នុងនាវា Westerdam ត្រូវបានធ្វើតេស្តរកមេរោគ។

គិតមកដល់ល្ងាចនេះ (17កុម្ភៈ) អ្នកទេសចរលើនាវា MS Westerdam ជាង1ពាន់នាក់ហើយ បានចាកចេញពីកម្ពុជា។ ក្រៅពីនេះ អ្នកដំណើរប្រហែល500នាក់ កំពុងស្នាក់នៅក្នុងប្រទេសកម្ពុជា។ អ្នកទេសចរជាង120នាក់ ដែលបានពិនិត្យសុខភាពរួចរាល់ហើយ បានធ្វើទេសចរណ៍នៅរាជធានីភ្នំពេញ និងមួយចំនួនទៀតនៅលើកប៉ាល់ ជាមួយនឹងបុគ្គលិកនាវា Westerdam ជាង800នាក់។

ក្រុមហ៊ុន Holland America Line បានឲ្យដឹងនៅថ្ងៃទី17នេះថា នាវា MS Westerdam កំពុងស្ថិតនៅឯកំពង់ផែខេត្តព្រះសីហនុ នៅឡើយ៕

February 17, 2020

ក្រុមហ៊ុន Justeen Miracle រៀបចំសិក្ខាសាលាបង្កើនការលក់ពី “0ទៅ1០០” ជូនដល់តំណាងចែកចាយ ដើម្បីប្រែខ្លួនពីអ្នកលក់ធម្មតាទៅជាអ្នកលក់ដ៏ឆ្នើម

រាជធានីភ្នំពេញ៖ កាលពីថ្ងៃទី១៥ ខែកុម្ភៈ ឆ្នាំ2020 ក្រុមហ៊ុន Justeen Miracle ដែលជាក្រុមហ៊ុនគ្រឿងសម្អាងធំមួយនៅក្នុងប្រទេសកម្ពុជា បានរៀបចំសិក្ខាសាលាស្តីពីការ “លក់ពី0 ទៅ 100” ដើម្បីចែករំលែកចំណេះដឹង នឹងក្បួនគ្រប់គ្រងអាជីវកម្មទៅកាន់តំណាងចែកចាយទាំងអស់ ដែលមាននៅក្នុងក្រុមហ៊ុន Justeen Miracle។ ជាពិសេសគឺដើម្បីឱ្យពួកគាត់កាន់តែពូកែលក់ជាងមុន ហើយនៅក្នុងកម្មវិធីនេះ ក៏មានការផ្តល់ពានរង្វាន់ជូនតំណាងចែកចាយឆ្នើមៗជាង 18រូបផងដែរ។

លោកស្រី ម៉ុក ទិព្វរាសី នាយិកាក្រុមហ៊ុន Justeen Miracle ដែលជាក្រុមហ៊ុនទទួលសិទ្ធិនាំចូល និងចែកចាយផលិតផល Justeen Miracle នៅក្នុងប្រទេសកម្ពុជាបានឲ្យដឹងថា ការរៀបចំសិក្ខាសាលាមួយនេះ គឺដើម្បីចែករំលែកចំណេះដឹងដែលលោកស្រីមាន និងគន្លឹះជោគជ័យពីការលក់អនឡាញ ទៅកាន់តំណាងចែកចាយឱ្យទទួលបានជោគជ័យ ជាពិសេស តំណាងចែកចាយនៅក្នុងក្រុមហ៊ុន Justeen Miracle គឺសុទ្ធសឹងតែជាស្រ្តីមេផ្ទះ ហេតុនេះហើយទើបលោកស្រីចង់បង្ហាត់បង្រៀនពួកគាត់ ឱ្យមានចំណេះជំនាញកាន់តែខ្លាំងជាងមុនក្នុងអាជីពជាអ្នកលក់អនឡាញ និងដើម្បីទទួលបានជោគជ័យនៅក្នុងទីផ្សារប្រទេសកម្ពុជា។

លោកស្រីបានបន្តថា ផលិតផលរបស់ក្រុមហ៊ុន Justeen Miracle បានចាប់ផ្តើមលក់រយៈពេល៣ឆ្នាំមកហើយ ប៉ុន្តែ នៅក្នុងឆ្នាំនេះ ក្រុមហ៊ុនទទួលបានជោគជ័យខ្លាំងជាងឆ្នាំមុនៗ ព្រោះតែតំណាងចែកចាយក៏ចេះតែកើនឡើង ហើយតំណាងចែកចាយនីមួយៗ ក៏សុទ្ធតែរកលុយបានច្រើន រហូតដល់ទិញបានផ្ទះ ទិញបានដី មាសពេជ្រ និងរថយន្តផងដែរ។ នេះគឺជាថាមពលដ៏ខ្លាំងក្លា ជួយជំរុញឱ្យក្រុមហ៊ុន Justeen Miracle កាន់តែរីកចំរើនពីមួយថ្ងៃទៅមួយថ្ងៃ។

នាយិកាក្រុមហ៊ុន Justeen Miracle បានបញ្ជាក់ថា តំណាងចែកចាយស្ទើរតែទាំងអស់នៅក្នុងក្រុមហ៊ុន Justeen Miracle ដើមឡើយគឺសុទ្ធសឹងតែជាស្រ្តីមេផ្ទះដ៏សាមញ្ញ ពោលគឺពួកគាត់មិនសូវមានមុខមាត់នៅក្នុងសង្គមទាល់តែសោះ ប៉ុន្តែ បន្ទាប់ពីពួកគាត់បានក្លាយទៅជាតំណាងចែកចាយរបស់ក្រុមហ៊ុន Justeen Miracle ពួកគាត់បានចាប់ផ្ដើមមានការរីកចម្រើនកាន់តែខ្លាំង។ ក្នុងរយៈពេលដ៏ខ្លី តំណាងចែកចាយនីមួយៗ សុទ្ធតែទទួលបានជោគជ័យខ្លាំងឡើងៗនៅលើទីផ្សារ ដោយពួកគាត់អាចរកចំណូលបានរាប់ម៉ឺនដុល្លារក្នុង1ខែៗ។

គួររំឭកដែរថា សម្រាប់សិក្ខាសាលាកាលពីថ្ងៃទី15 ខែកុម្ភៈ ឆ្នាំ2020នេះ ការចំណាយសម្រាប់ការរៀបចំកម្មវិធីគឺជាថវិកាផ្ទាល់ខ្លួនរបស់លោកស្រីនាយិកាក្រុមហ៊ុន Justeen Miracle។ ជាងនេះទៀត លោកស្រី ថែមទាំងបានបរិច្ចាគថវិកាផ្ទាល់ខ្លួនចំនួន 10លានដុល្លារ ជូនមន្ទីរពេទ្យគន្ធបុប្ផាទៀតផង៕

February 17, 2020

IMF ព្រមានអំពីការខាតបង់សេដ្ឋកិច្ច ព្រោះតែកូរ៉ូណា ប៉ុន្តែថាសេដ្ឋកិច្ចនឹងងើបឡើងឆាប់រហ័ស ក្រោយវិបត្តិសុខភាពនេះ

ប្រធានអង្គការមូលនិធិរូបិយវត្ថុអន្ដរជាតិ IMF (International Monetary Fund) អ្នកស្រី Kristalina Georgieva បានព្រមានថា សេដ្ឋកិច្ចទូទាំងពិភពលោកសម្រាប់ឆ្នាំ2020 នឹងខាតបង់ច្រើនដោយសារអាសន្នរោគកូរ៉ូណា COVID-19 ប៉ុន្តែថា វានឹងងើបឡើងវិញបានឆាប់រហ័ស។

ថ្លែងក្នុងវេទិកាស្ត្រីសកលដែលបានធ្វើឡើងនៅទីក្រុង Dubai (អារ៉ាប់រួម) កាលពីថ្ងៃទី16កុម្ភៈ ប្រធានអង្គការមូលនិធិរូបិយវត្ថុអន្តរជាតិ IMF អ្នកស្រី Kristalina Georgieva យល់ថា វាមិនទាន់ដល់ពេលដើម្បីធ្វើការវាយតម្លៃគ្រប់ជ្រុងជ្រោយទៅលើឥទ្ធិពលនៃអាសន្នរោគកូរ៉ូណា COVID-19។

AFP ដកស្រង់សម្ដីប្រធានអង្គការនេះ បកស្រាយថា ព័ត៌មានអំពីអាសន្នរោគកូរ៉ូណា នៅតែមិនទាន់ត្រូវបានស្វែងយល់លម្អិតនៅឡើយ ហើយបច្ចុប្បន្ន គេក៏នៅមិនទាន់ដឹងថា ប្រទេសចិននឹងអាចទប់ទល់មេរោគនេះបានដល់ពេលណា ឬក៏មេរោគនេះអាចរាលដាលទូទាំងពិភពលោក?

ប៉ុន្តែ អ្នកស្រី Georgieva ទទួលស្គាល់ថា អាសន្នរោគនេះ បានបង្ករផលប៉ះពាល់ខ្លាំងដល់វិស័យមួយចំនួន ដូចជាវិស័យទេសចរណ៍ និងដឹកជញ្ជូនជាដើម។ “អាចថា (កំណើនសេដ្ឋកិច្ចទូទាំងពិភពលោក) នឹងទទួលរងការខូចខាត ហើយយើងសង្ឃឹមថា កម្រិតនៃការខូចខាតនឹងមានប្រហែលពី 0,1-0,2%”។ អ្នកស្រី Georgieva ថ្លែងដូច្នេះ។

កត្តាមួយដែលត្រូវបានគេយកមកប្រៀបធៀបអំពីកម្រិតនៃផលប៉ះពាល់របស់អាសន្នរោគ COVID-19 នោះគឺទំហំសេដ្ឋកិច្ចរបស់ប្រទេសចិន។ ឆ្នាំ2002 ដល់ឆ្នាំ2003 ប្រទេសចិនកាន់កាប់8%នៃទំហំសេដ្ឋកិច្ចទូទាំងពិភពលោក នាសម័យអាសន្នរោគ SARS ប៉ុន្តែបច្ចុប្បន្ន ចំនួននេះ បានកើនឡើងដល់19%។

អ្នកស្រី Georgieva ថ្លែងថា សេដ្ឋកិច្ចពិភពលោក អាចនឹងមានឱនភាពខ្លាំងក្នុងមួយរយៈពេលខ្លីដោយសារអាសន្នរោគកូរ៉ូណា ហើយក្រោយវិបត្តិសុខភាពនេះ សេដ្ឋកិច្ចនឹងងើបឡើងបានឆាប់រហ័ស។

សូមរំឭកថា មុននេះ ក្នុងរបាយការណ៍មួយស្ដីអំពីការរំពឹងទុកនៃសេដ្ឋកិច្ចពិភពលោក ដែលត្រូវបានប្រកាសកាលពីខែមករា មូលនិធី IMF បានទម្លាក់ពិន្ទុនៃកំណើនសេដ្ឋកិច្ចទូទាំងពិភពលោកសម្រាប់ឆ្នាំ2020 មកនូវត្រឹម3,3% ថយចុះ0,1% បើធៀបនឹងការប៉ានស្មានមុននេះ។ កំណើនសេដ្ឋកិច្ចក្នុងឆ្នាំ2019 ត្រឹមតែ2,9% ពោលគឺទាបបំផុតក្នុងអំឡុង1ទសវត្សរ៍កន្លង៕

ប្រភព៖ សារព័ត៌មានបរទេស

February 17, 2020

ប្រជាពលរដ្ឋប៉ាគីស្ថាន ធ្វើបាតុកម្មទាមទារឱ្យរដ្ឋាភិបាលជម្លៀសនិស្សិតរបស់ប្រទេសនេះ ចេញពីស្រុកចិន

រដ្ឋាភិបាលប៉ាគីស្ថាន បានសម្រេចចិត្តមិនជម្លៀសនិស្សិតរបស់ខ្លួនជាង1,000នាក់ ចេញពីតំបន់ Wuhan ដែលជាសម្បុកមេរោគកូរ៉ូណា ខណៈនិស្សិតជាច្រើនមានបំណងត្រឡប់មកស្រុកវិញ។

រដ្ឋមន្ត្រីក្រសួងសុខាភិបាលប៉ាគីស្ថាន Zafar Mirza បានឱ្យដឹងនៅលើទំព័រ Twitter កាលពីថ្ងៃទី15កុម្ភៈថា រូបលោក និងក្រុមរដ្ឋមន្ត្រី នឹងបើកកិច្ចប្រជុំមួយសម្រាប់អាណាព្យាបាលសិស្ស និស្សិតនៅ ទីក្រុង Islamabad នាថ្ងៃពុធ ហើយរដ្ឋាភិបាលក៏កំពុងធ្វើការជាមួយអាជ្ញាធរចិន ដើម្បីធានាសុវត្ថិភាពរបស់និស្សិតដែលកំពុងសិក្សានៅឯក្រុង Wuhan ប្រទេសចិន។

ក៏ប៉ុន្តែ និស្សិត និងគ្រួសាររបស់ពួកគេ បានសម្ដែងការខកចិត្តកាន់តែខ្លាំង ខណៈចំនួនអ្នកស្លាប់ដោយសារមេរោគកូរ៉ូណា ចេះតែកើនឡើងពីមួយថ្ងៃទៅមួយថ្ងៃ។

“ដើម្បីផលប្រយោជន៍របស់យើង យើងស្នើរឱ្យរដ្ឋាភិបាលយកចិត្តទុកដាក់ទៅលើកូនចៅរបស់យើងខ្ញុំ សូមមេត្តាស្ដាប់នូវការកើតទុក្ខមិនសុខចិត្តរបស់អ្នកម្ដាយមួយរូបដូចខ្ញុំ”។ នេះគឺជាសម្ដីរបស់បាតុករម្នាក់ដែលសុំមិនបញ្ចេញឈ្មោះ បានថ្លែងប្រាប់អ្នកយកព័ត៌មាន។

បាតុករនាំគ្នាស្រែកខ្លាំងៗថា “នាំកូនយើងខ្ញុំត្រឡប់មកស្រុកវិញ” និងនាំគ្នាលើកបដាដែលមានសរសេរពាក្យដូចគ្នានេះ។

កាលពីដើមសប្ដាហ៍មុន មនុស្សរាប់រយនាក់នៅទីក្រុង Lahore នៃប្រទេសប៉ាគីស្ថាន ក៏បានធ្វើបាតុកម្មដូចគ្នានេះដែរ នៅខាងក្រៅស្ថានកុងស៊ុលចិន ដោយសារតែមាននិស្សិតជនជាតិប៉ាគីស្ថានជាច្រើននាក់ បានឆ្លងមេរោគកូរ៉ូណានៅប្រទេសចិន។ អាជ្ញាធរប៉ាគីស្ថានបានឱ្យដឹងថា និស្សិតប៉ាគីស្ថាន6នាក់ដែលបានឆ្លងមេរោគនេះ កំពុងទទួលការព្យាបាល និងកំពុងមានសុខភាពប្រសើរឡើងវិញខ្លះហើយ។

យ៉ាងនេះក្ដី ក្រុមនិស្សិតប៉ាគីស្ថានដែលកំពុងជាប់គាំងនៅឯប្រទេសចិន បានទាក់ទងមកកាន់ភ្នាក់ងារសារព័ត៌មាន Reuters ដោយប្រាប់ថា ពួកគេចង់ចាកចេញពីប្រទេសចិន៕

ប្រភព៖ សារព័ត៌មានបរទេស

February 17, 2020

ធនាគារសម្រេចចិត្ត “ដុតកម្ទេច” សាច់ប្រាក់ ដើម្បីទប់ស្កាត់ការឆ្លងវីរុសកូរ៉ូណា COVID-19

ធនាគារកណ្ដាលរបស់ប្រទេសចិន សាខាក្វាងចូវ (Guangzhou) សម្រេចចិត្តថានឹងដុតកម្ទេចក្រដាសប្រាក់មួយចំនួន ដែលធ្លាប់ចរាចរនៅក្នុងមន្ទីរពេទ្យ ផ្សារលក់អាហារ និងចំណត់រថយន្ត ដើម្បីរួមចំណែកទប់ស្កាត់ការឆ្លងរាលដាលនៃមេរោគកូរ៉ូណា។

ដើម្បីអនុវត្តបាន បណ្ដាធនាគារពាណិជ្ជកម្មក្នុងខេត្ត នឹងត្រូវញែកក្រដាសប្រាក់ដែលធ្លាប់បានចរាចរនៅក្នុងតំបន់ដែលមានហានិភ័យខ្ពស់ក្នុងការឆ្លងមេរោគកូរ៉ូណា ទុកមួយឡែក ដើម្បីងាយស្រួលសម្លាប់មេរោគ។ ក្រោយមក ក្រដាសប្រាក់នោះនឹងត្រូវបញ្ជូនទៅកាន់ធនាគារកណ្ដាលរបស់ចិន សាខាខេត្តក្វាងចូវ ដើម្បីដុតសម្លាប់មេរោគ។ នេះបើតាមសារព័ត៌មាន SCMP។

ទាក់ទិននឹងវិធានការនេះ អគ្គនាយករងនៃធនាគារធំមួយនៅក្នុងខេត្តក្វាងចូវ សុំមិនបញ្ចេញឈ្មោះ បាននិយាយថា អតិថិជននឹងត្រូវស្នើឱ្យបញ្ជាក់អំពីប្រភពនៃក្រដាសប្រាក់របស់ពួកគេដែលបានផ្ញើនៅក្នុងសាខាធនាគាររបស់ពួកគេ។ ប៉ុន្តែ មន្ត្រីធនាគាររូបនេះ ជឿថា វិធានការបែបនេះ ពិបាកនឹងធ្វើឱ្យមានប្រសិទ្ធភាព។

ដំណោះស្រាយខាងលើរបស់ខេត្តក្វាងចូវ ត្រូវបានដាក់ចេញ បន្ទាប់ពីអគ្គនាយករងធនាគារ PBOC បានឱ្យដឹងថា ប្រាក់ប្រភេទក្រដាសថ្មី ចំនួន600ពាន់លានយន់ (85,6ពាន់លានដុល្លារអាមេរិក) ត្រូវបានដាក់ឱ្យប្រើប្រាស់ទូទាំងប្រទេសចាប់ពីថ្ងៃទី17មករា ឆ្នាំ2020 រួមទាំងប្រាក់ថ្មីចំនួន4ពាន់លានយន់ ត្រូវបានបញ្ជូនទៅកាន់ក្រុង Wuhan ខណៈដែលប្រាក់ចំនួន7,8ពាន់លានយន់ជាសាច់ប្រាក់សុទ្ធ ត្រូវបានដកចេញពីការចរាចរ។

PBOC បានឱ្យដឹងថា ខ្លួននឹងប្រើប្រាស់កម្ដៅខ្ពស់ ឬកាំរស្មី UV (ultraviolet ray) ដើម្បីរម្ងាប់មេរោគនៅលើក្រដាសប្រាក់ទាំងនោះ បន្ទាប់មកដាក់វាទុកដាច់ដោយឡែករយៈពេល14ថ្ងៃ មុនពេលដាក់ឱ្យប្រើប្រាស់ឡើងវិញ៕

ប្រភព៖ សារព័ត៌មានបរទេស

February 17, 2020

អ្នកដំណើរដែលចាកចេញពីកម្ពុជា ត្រូវបានថៃរឹតបន្តឹងខ្លាំង ទាក់ទិននឹងមេរោគកូរ៉ូណា

អាកាសយានដ្ឋាននានានៅប្រទេសថៃ កំពុងតែត្រូវបានរឹតបង្កើនខ្លាំង ទៅលើការត្រួតពិនិត្យអ្នកដំណើរទាំងឡាយណាដែលធ្វើដំណើតតាមយន្តហោះមកពីប្រទេសកម្ពុជា ក្រោយពីកម្ពុជាបានអនុញ្ញាតឱ្យនាវាទេសចរណ៍ MS Westerdam ចូលចតនៅឯកំពង់ផែនខេត្តព្រះសីហនុ។

“វិធានការរឹតបន្តឹងនានាត្រូវបានអនុវត្តនៅឯព្រលានយន្តហោះអន្តរជាតិ Suvarnabhumi និង Don Mueang រួមនឹង ព្រលានយន្តហោះ Phuket ដែលមានជើងហោះហើរពីប្រទេសកម្ពុជា”។ នេះបើតាមសេចក្ដីប្រកាសរបស់អាជ្ញាធរអាកាសចរណ៍ថៃ (AOT)

ការរឹតបន្តឹងខាងលើនេះ ត្រូវបាន AOT លើកឡើងបន្ទាប់ពីកម្ពុជាបានអនុញ្ញាតឱ្យនាវាទេសចរណ៍ MS Westerdam ចូលចតក្នុងកំពង់ផែនខេត្តព្រះសីហនុ ដែលត្រូវបានគេចាត់ទុកថាដើម្បីសម្រួលឱ្យអ្នកទេសចរណ៍នៅលើកប៉ាល់នេះ បានវិលត្រឡប់ទៅកាន់ប្រទេសរៀងៗខ្លួន។

សូមរំឭកថា ក្រុមមន្ត្រីម៉ាឡេស៊ី កាលពីថ្ងៃទី15កុម្ភៈ បានឱ្យដឹងថា ស្ត្រីអ្នកទេសចរវ័យ83ឆ្នាំម្នាក់ដែលបានស្ថិតនៅលើនាវា Westerdam ត្រូវបានម៉ាឡេស៊ីរកឃើញថា មានផ្ទុកមេរោគកូរ៉ូណា COVID-19 បន្ទាប់ពីជិះយន្តហោះពីកម្ពុជាទៅកាន់ម៉ាឡេស៊ី។ ម៉ាឡេស៊ីបានធ្វើតេស្តរកមេរោគកូរ៉ូណាលើស្រ្តីដដែលនេះជាលើកទីពីរ ទៅតាមការស្នើរពីភាគីកម្ពុជា ហើយជាលទ្ធផល ស្ត្រីនេះពិតជាមានផ្ទុកមេរោគកូរ៉ូណាប្រាកដមែន។

ព្រលានយន្តហោះរបស់ថៃ ចំនួន3ខាងលើ ត្រូវបាន AOT រៀបចំឱ្យមានកន្លែងចុះចតដោយឡែក សម្រាប់យន្តហោះដែលមកពីកម្ពុជា ក្នុងអំឡុងពេលចាប់ពីថ្ងៃទី14កុម្ភ ដល់ថ្ងៃទី21កុម្ភៈ ឆ្នាំ2020 ដូចទៅនឹងជើងហោះហើរពីប្រទេសចិន។

ចំណែកជើងហោះហើរ TG585 របស់ក្រុមហ៊ុនអាកាសចរណ៍ Thai Airways មានដឹកអ្នកដំណើរ27នាក់ ហោះចេញពីភ្នំពេញ ក៏ត្រូវបានគេត្រួតពិនិត្យសុខភាពចំពោះអ្នកដំណើរទាំងនោះ ប៉ុន្តែមិនបានរកឃើញអ្នកដំណើរណាម្នាក់មានផ្ទុកមេរោគកូរ៉ូណានោះទេ ដូច្នេះទើបថៃបានអនុញ្ញាតឱ្យបន្តដំណើរប្រកាន់ប្រទេសរបស់ពួកគេ។ នេះបើតាមសារព័ត៌មាន Nation Thailand។

អាកាសយានដ្ឋានទាំង3ខាងលើ ទទួលការចុះចតពីយន្តហោះចំនួន27ជើងមកពីកម្ពុជាជារៀងរាល់ថ្ងៃ។ ប្រទេសថៃមិនអនុញ្ញាតឱ្យយន្តហោះមកពីកម្ពុជា ចុះចតលើអាកាសយានដ្ឋានណាមួយផ្សេងទៀត ក្រៅតែពីព្រលានយន្តហោះទាំង3ដែលបានរៀបរាប់ខាងលើនេះនោះទេ។

អាសន្នរោគកូរ៉ូណា Covid-19 បានចាប់ផ្ដើមផ្ទុះការឆ្លងរាលដាលចេញពីទីក្រុង Wuhan ខេត្ត Hubei នៃប្រទេសចិន កាលពីដើមខែធ្នូ ឆ្នាំ2019 បច្ចុប្បន្ន បានលេចមុខនៅក្នុងប្រទេស និងតំបន់ចំនួន27នៅទូទាំងពិភពលោក បណ្ដលឱ្យមានអ្នកស្លាប់ 1,775នាក់ និងអ្នកដែលបានឆ្លងមេរោគនេះ ចំនួន71,331នាក់៕

ប្រភព៖ សារព័ត៌មានបរទេស

February 17, 2020

ក្រុមជម្រើសជាតិកម្ពុជាផ្តល់ក្តីស្រឡាញ់ថ្ងៃទី14កុម្ភៈ

ក្រុមការងារសហព័ន្ធកីឡាបាល់ទាត់កម្ពុជា រួមជាមួយគ្រូជំនួយក្រុមជម្រើសជាតិកម្ពុជា នឹងក្រុមការងារស្ម័គ្រចិត្ត កាលពីថ្ងៃទី14 កុម្ភៈកន្លងទៅ បានដើរទិញសម្ភារ និងគ្រឿងទេសមួយចំនួន និងបានធ្វើម្ហូបអាហារជាមួយក្រុមកីឡាករជម្រើសជាតិទាំងអស់ ដើម្បីចែកជូនដល់អ៊ំៗចាស់ជរាតាមទីសារធារណៈក្នុងទិវាថ្ងៃនៃក្ដីស្រលាញ់។

ខាងក្រោមនេះ គឺជារូបភាពមួយចំនួននៃការចម្អិនម្ហូបអាហារ និងបង្អែមរបស់ក្រុមកីឡាករជម្រើសជាតិ ជាមួយក្រុមការងារគ្រូបង្វឹក ក្រុមការងារស្ម័គ្រចិត្ត ក៏ដូចជាដៃគូសហការឧបត្ថម ដោយបានយកទៅចែកជូនដល់អ៊ុំៗចាស់ជរាតាមទីសាធារណៈក្នុងទិវាថ្ងៃនៃក្ដីស្រឡាញ់ 14កុម្ភៈកន្លងទៅ។

នេះជាសកម្មភាពសប្បុរសធម៌មួយរបស់ក្រុមបាល់ទាត់គោព្រៃជម្រើសជាតិកម្ពុជាក្នុងកិច្ចការងារសង្គម។ ក្រោយពីបានបញ្ចប់ការវេចខ្ចប់នេះហើយ ក្រុមជម្រើសជាតិកម្ពុជា បានធ្វើដំណើរតាមរថយន្តក្រុងរបស់ពួកគេ និងយកម្ហូបអាហារទាំងនោះទៅចែកជូនដល់ជនចាស់ជរានៅតាមទីសាធារណៈនានាក្នុងទីក្រុងភ្នំពេញ៕

February 17, 2020

ក្រុមជម្រើសជាតិកម្ពុជា នឹងបង្ហាញឈុតថ្មីនៅខែមិថុនានេះ

ឯកសណ្ឋានឈុតថ្មីរបស់ក្រុមជម្រើសជាតិកម្ពុជា តែងតែចេញម៉ូដថ្មីរបស់ខ្លួនជារៀងរាល់ 2ឆ្នាំម្តង ហើយនៅឆ្នាំ2020នេះ គឺជាគម្រប់ខួប ដែលសហព័ន្ធកីឡាបាល់ទាត់កម្ពុជា ត្រូវបង្ហាញឈុតថ្មីនេះហើយ។

ចំពោះឈុតថ្មីក្រុមជម្រើសជាតិកម្ពុជា សម្រាប់ឆ្នាំនេះពួកគេត្រៀមនឹងបង្ហាញខ្លួននៅក្នុងខែមិថុនាខាងមុខនេះហើយ ដោយនឹងបង្ហាញខ្លួនក្នុងក្រុមឈុតធំកម្ពុជា (អាចនឹងក្នុងការប្រកួតមិត្តភាពនាខែមិថុនាខាងមុខ)។ ដោយឡែកកាលបរិច្ឆេទចេញលក់ជូនអ្នកគាំទ្រជម្រើសជាតិកម្ពុជា នៅមិនទាន់បានដឹងច្បាស់នៅឡើយទេ។

គួរបញ្ជាក់ផងដែរថា ឯកសណ្ឋានក្រុមជម្រើសជាតិកម្ពុជាបច្ចុប្បន្ន ដែលបានចេញកាលពីឆ្នាំ2018 កន្លងទៅ បានទទួលនូវការគាំទ្រយ៉ាងខ្លាំង ហើយកាលនោះ 1ឈុតមានតម្លៃ 20$ កាលពីពេលចេញលក់ជាលើកដំបូង៕

February 17, 2020

Author: សឿន សំណាង