សឿន សំណាង - La Reine Media

ចំនួនអ្នកស្លាប់ដោយសារមេរោគ COVID-19 នៅខេត្ត Hubei កើនឡើងដល់2,346នាក់ ធ្វើឱ្យចំនួនអ្នកស្លាប់នៅទូទាំងពិភពលោក កើនដល់…

មកដល់ពេលនេះ ខេត្ត Hubei មានអ្នកស្លាប់បន្ថែមចំនួន96នាក់ដោយសារមេរោគកូរ៉ូណា គឺកើន4,2% បើធៀបនឹងម្សិលមិញ ធ្វើឱ្យចំនួនអ្នកស្លាប់នៅទូទាំងពិភពលោក ឡើងដល់2,459នាក់។

គណៈកម្មការសុខាភិបាលខេត្ត Hubei ប្រទេសចិន ព្រឹកនេះបានឱ្យដឹងថា ខេត្តនេះមានអ្នកស្លាប់បន្ថែមចំនួន96នាក់ នាំឱ្យអ្នកស្លាប់សរុបក្នុងខេត្តនេះ កើនដល់ 2,346នាក់។ ខេត្ត Hubei ក៏រកឃើញអ្នកផ្ទុកមេរោគថ្មីបន្ថែម630នាក់ទៀត ធ្វើឱ្យចំនួនអ្នកផ្ទុកមេរោគកូរ៉ូណាសរុបក្នុងខេត្តនេះ ឡើងដល់64,084នាក់។

នៅទូទាំងពិភពលោក មកដល់ព្រឹកនេះ មានអ្នកស្លាប់សរុបឡើងដល់2,459នាក់ និងអ្នកផ្ទុកមេរោគមានចំនួន78,633នាក់ រីឯអ្នកបានជាសះស្បើយមានចំនួន22,939នាក់។

February 23, 2020

ជួយត្រេកអរ! វ៉ាក់សាំង COVID-19 ដែលបានពិសោធលើកសត្វដំបូងគេបង្អស់ បានកកើត អង់ទីគ័រហើយ

ប្រទេសចិន៖ ការចាក់វ៉ាក់សាំងកូរ៉ូណា COVID-19 ពិសោធនៅលើសត្វកណ្ដុរ អាចទប់ស្កាត់មេរោគបានយ៉ាងល្អ ដោយវាបានកកើតអង្គបដិប្រាណ (អង់ទីគ័រ/antibody) ដែលនេះត្រូវបានអ្នកវិទ្យាសាស្ត្រសង្ឃឹមថា នឹងទទួលបានជោគជ័យក្នុងការបង្កើតវ៉ាក់សាំងសម្រាប់ទប់ស្កាត់វីរុសកូរ៉ូណា។

កាលពីល្ងាចម្សិលមិញ (22កុម្ភៈ) មន្ទីរវិទ្យាសាស្ត្រ និងបច្ចេកវិទ្យាខេត្ត Zhejiang បានធ្វើសន្និសីទសារព័ត៌មានមួយ ប្រកាសឱ្យដឹងអំពីស្ថានភាពគ្រប់គ្រងអាសន្នរោគរលាកសួត COVID-19។ តំណាងក្រុមអ្នកវិទ្យាសាស្ត្របានឱ្យដឹងថា វ៉ាក់សាំងក្រុមទីមួយនៃខេត្តនេះ បានកកើតអង្គបដិប្រាណហើយ។ បច្ចុប្បន្ន វ៉ាក់សាំងនេះត្រូវបានពិសោធនៅលើសត្វ។

យោងតាមក្រុមអ្នកជំនាញ ជាធម្មតា នៅក្នុងវ៉ាក់សាំងមួយតែងមានផ្ទុកអង់ទីហ្សែន (Antigen) ក្នុងកម្រិតណាមួយដែលវាអាចបង្កើតជាជំងឺ ហើយនៅពេលចាក់បញ្ចូលវាទៅក្នុងសត្វ បើសិនរាងកាយសត្វនោះឆ្លើយតបទៅនឹងប្រព័ន្ធភាពស៊ាំបានល្អ នោះវានឹងបង្កើតអង់ទីគ័រ សម្រាប់ប្រឆាំងទៅនឹងអង់ទីហ្សែននោះដើម្បីការពាររាងកាយ។ លទ្ធផលបែបនេះនឹងអនុញ្ញាតឱ្យអ្នកវិទ្យាសាស្ត្រ បង្កើតបានវ៉ាក់សាំងល្អមួយបាន។ នេះបើតាមសារព័ត៌មាន Sina។

លោក Song Zhiheng អនុប្រធានមន្ទីរវិទ្យាសាស្ត្រ និងបច្ចេកវិទ្យាខេត្ត Zhejiang បានឱ្យដឹងថា គិតចាប់ពីអាសន្នរោគបានផ្ទុះឆ្លង ក្រុមអ្នកវិទ្យាសាស្ត្រក៏បានចាប់ផ្ដើមប្រឹងប្រែងដើម្បីស្វែងយល់ និងស្វែងរកប្រភពនៃវីរុសកូរ៉ូណាប្រភេទថ្មីនេះ និងរកថ្នាំព្យាបាល អភិវឌ្ឍវ៉ាក់សាំងទប់ស្កាត់ ព្រមទាំងបានអនុវត្តគម្រោងស្រាវជ្រាវចំនួន6អំពីមេរោគកូរ៉ូណា COVID-19 និងមានមូលនិធិវិទ្យាសាស្ត្រចំនួន3 បានគាំទ្រដល់ការសិក្សាស្រាវជ្រាវនេះ។

លទ្ធផលដ៏ល្អនៃវ៉ាក់សាំងក្រុមដំបូងនេះ នឹងជួយបង្កើនភាពជឿជាក់ទៅលើសមត្ថភាពយកជ័យជំនះទៅលើអាសន្នរោគកូរ៉ូណា COVID-19 ដែលកំពុងមានវត្តមាននៅលើប្រទេស និងតំបន់ចំនួន30ក្នុងពិភពលោក ហើយវាបានសម្លាប់មនុស្សជិត 2,500នាក់៕

ប្រភព៖ សារព័ត៌មានបរទេស

February 23, 2020

ល្ងាចនេះកូរ៉េខាងត្បូងរកឃើញអ្នកផ្ទុកមេរោគកូរ៉ូណាថ្មី87នាក់ទៀតហើយ

កូរ៉េខាងត្បូង បានរកឃើញអ្នកមានផ្ទុកមេរោគកូរ៉ូណាថ្មីចំនួន87នាក់ទៀតនៅល្ងាចនេះ នាំឱ្យចំនួនអ្នកផ្ទុកមេរោគរលាកសួតថ្មីនេះឡើងដល់433នាក់។

មជ្ឈមណ្ឌលគ្រប់គ្រង និងទប់ស្កាត់អាសន្នរោគនៃប្រទេសកូរ៉េខាងត្បូង (KCDC) បានប្រកាសកាលពីព្រឹកនេះថា ប្រទេសនេះ មានអ្នកឆ្លងមេរោគកូរ៉ូណា COVID-19 ចំនួន142នាក់។ ការរកឃើញអ្នកមានផ្ទុកមេរោគថ្មីចំនួន87នាក់នៅល្ងាចនេះ បានធ្វើឱ្យចំនួនអ្នកផ្ទុកមេរោគថ្មីសរុបក្នុងថ្ងៃនេះ ឡើងដល់229នាក់។

នៅក្នុងចំណោមករណីឆ្លងថ្មីចំនួន229នាក់ក្នុងថ្ងៃនេះ មាន95ករណី មានជាប់ពាក់ព័ន្ធនឹងមន្ទីរពេទ្យ Daenam នៅក្នុងតំបន់ Cheongdo ខេត្ត Gyeongsang ខាងជើង ដែលជាកន្លែងមានករណីស្លាប់ដំបូងគេបង្អស់ដោយសារវីរុសកូរ៉ូណានៅកូរ៉េខាងត្បូង។ កាលពីម្សិលមិញ អ្នកជំងឺម្នាក់ក៏បានបាត់បង់ជីវិតនៅក្នុងមន្ទីរពេទ្យមួយនៅតំបន់ Busan ក្រោយពីបានបញ្ជូនមកពីមន្ទីរពេទ្យ Daenam។

ក្នុងចំណោមករណីឆ្លងមេរោគថ្មី មានអ្នកជំងឺចំនួន62នាក់ មានជាប់ទាក់ទិននឹងវិហារ Shincheonji។ ស្ត្រីអាយុ61ឆ្នាំម្នាក់ជាសមាជិកនៃវិហារនេះ ត្រូវបានគេជឿថា បានចម្លងមេរោគកូរ៉ូណាទៅអ្នកឯទៀតដែលបានចូលរួមក្នុងពិធីបួងសួងមួយនៅក្នុងវិហារមួយនៅឯ Daegu។

នៅឯមន្ទីរពេទ្យ Daenam មានអ្នកផ្ទុកមេរោគកូរ៉ូណាសរុបចំនួន111នាក់ ដោយរួមមានទាំងបុគ្គលិកសុខាភិបាលចំនួន9នាក់ផងដែរ ក្រៅពីនេះគឺជាអ្នកជំងឺ។ មន្ទីរពេទ្យនេះ ត្រូវបានបិទដើម្បីទប់ស្កាត់ការឆ្លងរាលដាលបន្ត។ ចំនួនអ្នកឆ្លងមេរោគកូរ៉ូណាទាំង231នាក់ សុទ្ធតែជាប់ទាក់ទិននឹងពិធីបួងសួងនៅវិហារ Shincheonji ក្នុងតំបន់ Daegu។ KCDC បានឱ្យដឹងថា ខ្លួនបានស្នើឱ្យសមាជិកចំនួន9,336នាក់នៃវិហារ Shincheonji នេះ ត្រូវតែបង្ខាំងខ្លួននៅដាច់ដោយឡែកពីគេ។ ក្នុងចំណោមនោះ មាន544នាក់ត្រូវបានគេសង្ស័យថាមានផ្ទុកមេរោគកូរ៉ូណា និងកំពុងត្រូវបានធ្វើតេស្តរកមេរោគ។

ក្រុមមន្ត្រីសុខាភិបាលកូរ៉េខាងត្បូង កំពុងស្រាវជ្រាវទៅលើទំនាក់ទំនងរវាងមន្ទីរពេទ្យ Daenam និងវិហារសាសនា Shincheonji ។ កាលពីដើមខែនេះ ពិធីបុណ្យសពបងប្រុសរបស់អ្នកបង្កើនវិហារ Shincheonji ត្រូវបានប្រារព្ធឡើងនៅឯមន្ទីរពេទ្យ Daenam។

កូរ៉េខាងត្បូង បានរកឃើញអ្នកផ្ទុកមេរោគជាច្រើននៅក្នុងខេត្តផ្សេងៗ ដូចជាខេត្ត Jeju ខេត្ត Chungcheong ខេត្ត Jeolla ខាងជើង និងខេត្ត Gyeonggi។ អ្នកផ្ទុកមេរោគ4នាក់ ត្រូវបានរកឃើញនៅក្នុងតំបន់ Busan ជាទីក្រុងធំទី2នៅកូរ៉េខាងត្បូង ដែលមានប្រជាជន3,4លាននាក់កំពុងរស់នៅ។ ក្នុងថ្ងៃនេះ ក្រុមហ៊ុន Samsung Electronics បានឱ្យដឹងថា ខ្លួនបានរកឃើញបុគ្គលិកម្នាក់មានផ្ទុកមេរោគកូរ៉ូណានៅក្នុងរោងចក្រផលិតឧបករណ៍អេឡិចត្រូនិកនៅក្នុងទីក្រុង Gumi ភាគអាគ្នេយ៍កូរ៉េខាងត្បូង។ Samsung គ្រោងនឹងផ្អាកដំណើរការរោងចក្ររបស់ខ្លួនរហូតដល់ព្រឹកថ្ងៃទី24កុម្ភៈ។

អ្នកជំងឺកូរ៉ូណា COVID-19 នៅកូរ៉េខាងត្បូងស្ទើរតែទាំងអស់ នៅមានសុខភាពល្អនៅឡើយ ប៉ុន្តែ អ្នកជំងឺប្រហែល9នាក់ ហាក់មានសភាពធ្ងន់ធ្ងរគួរឱ្យព្រួយបារម្ភ។ ចំណែកអ្នកជំងឺ 18នាក់ បានជាសះស្បើយពីជំងឺ។

គិតមកដល់ម៉ោង10យប់នេះ នៅទូទាំងពិភពលោក មានអ្នកស្លាប់ដោយសារមេរោគកូរ៉ូណា ឡើងដល់ 2,361នាក់ និងអ្នកមានផ្ទុកមេរោគនេះ ឡើងដល់ 77,918នាក់៕

ប្រភព៖ សារព័ត៌មានបរទេស

February 22, 2020

សហរដ្ឋអាមេរិក៖ ស្ដ្រីអ្នកទេសចរវ័យ83ឆ្នាំ មកពីនាវា Westerdam អាចមានជំងឺផ្លូវដង្ហើម តែមិនមែនកូរ៉ូណានោះទេ

“អ្នកទេសចរទាំងអស់នៅមកពីនាវា Westerdam ដែលបានចូលចតនៅឯកំពង់ផែខេត្តព្រះសីហនុ កាលពីពេលថ្មីៗនេះ មិនមានអ្នកណាម្នាក់មានផ្ទុកមេរោគកូរ៉ូណានោះទេ” នេះបើតាមបញ្ជាក់របស់អ្នកនាំពាក្យនៃមជ្ឈមណ្ឌលទប់ស្កាត់ និងការពារជំងឺឆ្លងសហរដ្ឋអាមេរិក (CDC)។

អ្នកទេសចរវ័យ83ឆ្នាំ ដែលបានធ្វើដំណើរតាមនាវាទេសចរណ៍ Westerdam ដែលត្រូវបានម៉ាឡេស៊ីពិនិត្យ និងរកឃើញថា មានផ្ទុកមេរោគកូរ៉ូណា COVID-19 រួមនឹងអ្នកដំណើរផ្សេងទៀត ត្រូវបានអ្នកនាំពាក្យរបស់មជ្ឈមណ្ឌលទប់ស្កាត់ និងការពារជំងឺឆ្លងសហរដ្ឋអាមេរិក (CDC) លោក Richard Quartarone បញ្ជាក់ថា អ្នកទេសចរទាំងនោះ មិនមានផ្ទុកមេរោគកូរ៉ូណាតាំងពីដើមមកម៉្លេះ។ អ្នកនាំពាក្យរូបនេះនិយាយថា អាមេរិកបានទទួលលទ្ធផលនៃការធ្វើតេស្តទៅលើអ្នកដំណើរខាងលើ កាលពីថ្ងៃទី20កុម្ភៈកន្លងទៅ។

លោក Rechard បានឱ្យដឹងថា ស្ត្រីជនជាតិអាមេរិកាំងវ័យ83ឆ្នាំ ដែលត្រូវបានម៉ាឡេស៊ីបញ្ជូនទៅកាន់មន្ទីរពេទ្យ បន្ទាប់ពីពិនិត្យឃើញថាមានផ្ទុកមេរោគកូរ៉ូណានោះ អាចមានជំងឺផ្លូវដង្ហើមតែប៉ុណ្ណោះ ពោលគឺមិនមែនជាវីរុសកូរ៉ូណានោះទេ។ នេះបើតាមការចុះផ្សាយរបស់សារព័ត៌មាននៃសហរដ្ឋអាមេរិក។

គួររំឭកថា ស្ត្រីជនជាតិអាមេរិកាំងវ័យ83ឆ្នាំ រួមនឹងភ្ញៀវចំនួន 145នាក់ផ្សេងទៀត មកពីនាវាទេសចរណ៍ MS Westerdam បានធ្វើដំណើរចេញពីកម្ពុជាតាមជើងយន្តហោះពិសេសមួយ ទៅកាន់ទីក្រុង Kuala Lumpur បន្ទាប់ពីបានឡើងគោក។ ក្នុងចំណោមអ្នកដំណើរទាំងអស់នៅលើយន្តហោះនោះ គឺមានស្ត្រីវ័យ83ឆ្នាំខាងលើ ត្រូវបានអាជ្ញាធរម៉ាឡេស៊ីអះអាងថា មានផ្ទុកមេរោគកូរ៉ូណា។ បញ្ហានេះ បានធ្វើឱ្យកម្ពុជាមានការសង្ស័យ និងបានតវ៉ះទៅកាន់ទីក្រុង Kuala Lumpur ដោយស្នើឱ្យប្រទេសនេះ ធ្វើតេស្តឡើងវិញ។ បន្ទាប់ទីក្រុង Kuala Lumpur ក៏បានធ្វើតាមសំណូមពរ ហើយប្រទេសម៉ាឡេស៊ីនៅតែអះអាងថា ស្ត្រីខាងលើ មានផ្ទុកមេរោគពិតមែន។ ក៏ប៉ុន្តែ កាលពីម្សិលមិញនេះ ទីក្រុង Kuala Lumpur បានប្រកាសថា ស្ត្រីរូបនេះ បានជាសះស្បើយវិញហើយ។ ប្រការក៏នាំឱ្យកម្ពុជាកាន់តែមិនជឿថា ស្រ្តីវ័យ83ឆ្នាំខាងលើនេះ មានផ្ទុកមេរោគកូរ៉ូណានោះឡើយ៕

ប្រភព៖ សារព័ត៌មានបរទេស

February 22, 2020

មេរោគកូរ៉ូណាអាចសម្ងំក្នុងខ្លួនអ្នកជំងឺ ដល់ទៅ27ថ្ងៃ ដោយគ្មានរោគសញ្ញា

មន្ត្រីសុខាភិបាលនៅខេត្ត Hubei ប្រទេសចិន ដែលជាតំបន់មាន “សម្បុក” មេរោគកូរ៉ូណា COVID-19 បានឱ្យដឹងថា បុរសវ័យ70ឆ្នាំម្នាក់នៅក្នុងខេត្តនេះ បានឆ្លងមេរោគកូរ៉ូណារយៈពេលដល់ទៅ27ថ្ងៃ ដោយមិនមានរោគសញ្ញាអ្វីសោះ។

គេហទំព័ររបស់អាជ្ញាធរខេត្ត Hubei បានចុះផ្សាយថា កាលពីថ្ងៃទី24មករា បុរសដែលមានត្រកូល Jiang ខាងលើនេះ បានបើកបររថយន្តពីសង្កាត់ Yanzhou ទៅកាន់សង្កាត់ Shennongjia ក្នុងខេត្ត Hubei និងបាននៅក្បែរប្អូនស្រីរបស់ខ្លួន ដែលជាអ្នកមានផ្ទុកមេរោគកូរ៉ូណា។

បុរសខាងលើនេះ មានជំងឺក្ដៅខ្លួននៅថ្ងៃទី 20កុម្ភៈ ហើយមួយថ្ងៃក្រោយមក គាត់ត្រូវបានគេពិនិត្យឃើញថាមានផ្ទុកមេរោគកូរ៉ូណា។ ប្រការនេះបានបង្ហាញថា ក្នុងករណីរបស់លោក Jiang មេរោគកូរ៉ូណាបានសម្ងំក្នុងខ្លួនគាត់អស់រយៈពេល27ថ្ងៃ មិនមែនពី2-14ថ្ងៃ តាមការយល់ឃើញមុននេះនោះទេ។

លទ្ធផលនៃការសិក្សាស្រាវជ្រាវមួយដែលបានចុះផ្សាយនៅលើទស្សនាវដ្ដី សមាគមវេជ្ជសាស្ត្រអាមេរិកាំង (American Medical Association) កាលពីម្សិលមិញ ក៏បានឱ្យដឹងដែរថា នារីវ័យ20ម្នាក់ មកពីទីក្រុង Wuhan បានចម្លងមេរោគកូរ៉ូណាទៅឱ្យមនុស្ស5នាក់នៅឯតំបន់ Anyang ខេត្ត Henan ប្រទេសចិន បើទោះជានាងមិនមានរោគសញ្ញាបន្ទាប់ពីបានឆ្លងមេរោគនេះអស់រយៈពេលជាង1ខែ។

រយៈពេលនៃការសម្ងំលាក់ខ្លួនបានយូរជាងមុន ដោយមិនបញ្ចេញរោគសញ្ញាអ្វីសោះបែបនេះ ធ្វើឱ្យស្ថានភាពអាសន្នរោគកូរ៉ូណា កាន់តែមានភាពស្មុគស្មាញខ្លាំងឡើងៗ។ គិតមកដល់ពេលនេះ មេរោគរលាកសួតថ្មី COVID-19 បានបង្ហាញវត្តមាននៅក្នុងប្រទេស និងតំបន់ចំនួនដល់ទៅ30ទៅហើយ តាំងពីមេរោគនេះបានចាប់ផ្ដើមឆ្លងនៅក្នុងទីក្រុង Wuhan ខេត្ត Hubei កាលពីខែធ្នូ ឆ្នាំ2019។ មកដល់រសៀលថ្ងៃទី22កុម្ភៈនេះ វាបានសម្លាប់មនុស្សយ៉ាងតិច2,360នាក់ និងបានឆ្លងទៅមនុស្សយ៉ាងហោច77,662នាក់ នៅទូទាំងពិភពលោក៕

ប្រភព៖ សារព័ត៌មានបរទេស

February 22, 2020

WHO ថា “ឱកាសទប់ស្កាត់ COVID-19 កំពុងមានតិចទៅៗ” ពេលដែលករណីឆ្លងនៅក្រៅប្រទេសចិន កាន់តែមានច្រើនឡើងៗ

អង្គការសុខភាពពិភពលោក WHO បានព្រមានថា ឱកាសនៃការគ្រប់គ្រងការឆ្លងរាលដាលនៃវីរុសកូរ៉ូណា កំពុងតែមានតិចទៅៗ ដោយសារតែករណីឆ្លងមេរោគនេះនៅខាងក្រៅប្រទេសចិន កាន់តែកើនឡើងច្រើន។

សេចក្ដីប្រកាសខាងលើត្រូវបានធ្វើឡើងនៅក្នុងសន្និសីទសារព័ត៌មានមួយកាលពីថ្ងៃទី21កុម្ភៈ។ មុននោះ ប្រធានអង្គការសុខភាពពិភពលោក Tedros Adhanom Gherbreyesus ធ្លាប់បាននិយាយថា តួលេខនៃការឆ្លងជំងឺនៅខាងក្រៅប្រទេសចិន នៅមានតិច ដែលនេះគឺជា “ឱកាសមិនងាយមាន” សម្រាប់ទប់ស្កាត់ការឆ្លងរាលដាលទូទាំងពិភពលោក។

ក៏ប៉ុន្តែ 1សប្ដាហ៍បានកន្លងផុតទៅ ចំនួនអ្នកឆ្លងមេរោគថ្មីបានកើនឡើងនៅពាសពេញមជ្ឈិមបូព៌ា និងកូរ៉េខាងត្បូង។ លោក Tedros ព្រមានថា៖ យើងកំពុងស្ថិតក្នុងដំណាក់កាលអាចទប់ស្កាត់អាសន្នរោគនេះបាន ប៉ុន្តែ ឱកាសកាន់តែខើចទៅៗ”។

ប្រធានអង្គការសុខភាពពិភពលោកក៏បានយល់ថា បើសិនជាបណ្ដាប្រទេសក្នុងពិភពលោកមិនប្រើប្រាស់រាល់ធនធានដែលមានដើម្បីទប់ស្កាត់ការឆ្លងរាលដាលរបស់វីរុស នោះ “ការផ្ទុះឆ្លងអាចកើតឡើងទៅគ្រប់ទិសទី”។

អាសន្នរោគ COVID-19 បានកើតឡើងដំបូងនៅក្នុងខែធ្នូ ឆ្នាំ2019 បើគិតមកដល់ថ្ងៃនេះ វាបានសម្លាប់មនុស្សជាង2,360នាក់ និងឆ្លងទៅមនុស្សជាង77,662នាក់ នៅទូទាំងពិភពលោក។

កាលពីថ្ងៃទី 21មករា ប្រទេសជាច្រើននៅមជ្ឈិមបូព៌ា ក្នុងនោះមានអ៊ីស្រាអែល និងលីបង់ ចាប់ផ្ដើមរកឃើញអ្នកមានផ្ទុកមេរោគកូរ៉ូណាដំបូង ខណៈដែលអ៊ីរ៉ង់បានប្រកាសថាប្រទេសខ្លួន មានអ្នកស្លាប់4នាក់ និង18នាក់មានផ្ទុកមេរោគកូរ៉ូណា។

ទន្ទឹមគ្នានេះដែរ តួលេខនៃអ្នកជំងឺថ្មី នៅប្រទេសកូរ៉េខាងត្បូង បានកើនឡើងស្ទើរតែមិនគួរឱ្យជឿក្នុងរយៈពេលមិនដល់1សប្ដាហ៍ ធ្វើឱ្យកូរ៉េខាងត្បុង ក្លាយជាប្រទេសដែលទទួលរងផលប៉ះពាល់ធ្ងន់បំផុតក្នុងពិភពលោក បន្ទាប់ពីប្រទេសចិន។ មកដល់ព្រឹកនេះ(22កុម្ភៈ) កូរ៉េខាងត្បូងមានអ្នកផ្ទុកមេរោគកូរ៉ូណាដល់ទៅ346នាក់ និង2នាក់បានបាត់បង់ជីវិត។

នៅក្នុងទីរួមស្រុកមួយនៅភាគខាងជើងប្រទេសអ៊ីតាលី អាជ្ញាធរបានចេញបញ្ជាឱ្យបិទហាងនានា និងសាលារៀនជាដើម ក្នុងរយៈពេល5ថ្ងៃ បន្ទាប់ពីរកឃើញអ្នកផ្ទុកមេរោគកូរ៉ូណាចំនួន6នាក់។

លោក Tedros ប្រធានអង្គការសុខភាពពិភពលោក បានសង្កត់ធ្ងន់ថា បើទោះជាតួលេខនៃអ្នកជំងឺនៅខាងក្រៅប្រទេសចិន នៅមាន “តិចតួច” នៅឡើយ ក៏ប៉ុន្តែ “ករណីឆ្លងថ្មីជាច្រើន មិនមានទំនាក់ទំនងច្បាស់លាស់ជាមួយនឹងអាសន្នរោគ ដូចជាឆ្លងតាមរយៈដំណើរទេសចរណ៍ ឬនៅក្បែរអ្នកជំងឺ” ធ្វើឱ្យការគ្រប់គ្រងអាសន្នរោគនេះ កាន់តែពិបាកទៅៗ។

WHO បានអំពាវនាវឱ្យបណ្ដាប្រទេសក្នុងពិភពលោក លើកកម្ពស់ការប្រុងប្រយ័ត្ន និងអនុវត្ត “យ៉ាងម៉ឺងម៉ាត់” ចំពោះបេសកកម្មបំបាត់អាសន្នរោគ។

លោក Tedros ថ្លែងថា “យើងមិនត្រូវបណ្ដោយរហូតដល់ត្រូវស្ដាយក្រោយ ព្រោះតែមិនបានប្រើប្រាស់ឱកាសដែលមានស្រាប់នោះទេ”។

នៅពេលដែលតួលេខអ្នកជំងឺនៅទូទាំងពិភពលោកកើនឡើងខ្លាំង ចំនួនអ្នកឆ្លងរោគនៅប្រទេសចិន មានការថយចុះក្នុងអំឡុង1សប្ដាហ៍កន្លងមកនេះ។ នេះគឺជាភ័ស្តុតាងបង្ហាញថា វិធានការក្ដៅរបស់រដ្ឋាភិបាលទីក្រុងប៉េកាំង កំពុងតែបង្ហាញប្រសិទ្ធភាព។ ក៏ប៉ុន្តែ ប្រទេសចិន ទើបតែបានរកឃើញករណីផ្ទុកមេរោគជាច្រើននាក់នៅក្នុងមន្ទីរពេទ្យចំនួន2 នៅទីក្រុងប៉េកាំង និងអ្នកមានផ្ទុកមេរោគកូរ៉ូណាចំនួន500នាក់ផ្សេងទៀតនៅក្នុងពន្ធនាគារមួយចំនួន។

នៅក្នុងកិច្ចប្រជុំមួយរបស់ក្រសួងកិច្ចការនយោបាយ ដែលមានលោក ស៊ី ជិនពីង ជាអធិបតី ក្រុមមន្ត្រីបានឱ្យដឹងថា អាសន្នរោគកូរ៉ូណា COVID-19 មិនទាន់លោតដល់កម្រិតកំពូលនោះទេ។

នៅថ្ងៃនេះ(22កុម្ភៈ) ក្រុមអ្នកជំនាញអន្តរជាតិមកពីអង្គការសុខភាពពិភពលោក នឹងមកដល់សម្បុកមេរោគកូរ៉ូណានៅអ៊ូហាន។ មកដល់ពេលនេះ ក្រុមអ្នកជំនាញ បានមកបំពេញការងារនៅឯទីក្រុងប៉េកាំង ស៊ីឈួន និងក្វាងទុង។

គណៈប្រតិភូខាងលើនេះ មានអ្នកជំនាញកំពូលៗចំនួន12នាក់ មកពីសហរដ្ឋអាមារិក អាល្លឺម៉ង់ ជប៉ុន រុស្ស៊ី សិង្ហបុរី កូរ៉េខាងត្បូងជាដើម បានសហការជាមួយក្រុមអ្នកជំនាញរបស់ចិន ដើម្បីស្វែងយល់បន្ថែមអំពីមេរោគកូរ៉ូណា មានដូចជា ល្បឿននៃការឆ្លងរាលដាល និងវិធីព្យាបាលដែលមានប្រសិទ្ធភាពបំផុត។ល។

ប្រភព៖ សារព័ត៌មានបរទេស

February 22, 2020

ចំនួនអ្នកស្លាប់ដោយសារវីរុសកូរ៉ូណា កើនឡើងដល់2,360នាក់ ខណៈអ្នកផ្ទុកមេរោគនេះមានចំនួន…

នៅក្នុងខេត្ត Hubei ករណីស្លាប់បន្ថែមដោយសារមេរោគកូរ៉ូណា COVID-19 មានចំនួន106នាក់ កើន4,9% បើធៀបនឹងម្សិលមិញ ធ្វើឱ្យចំនួនអ្នកស្លាប់សរុបនៅទូទាំងពិភពលោក ឡើងដល់ 2,360នាក់។

នៅទូទាំងប្រទេសចិន (ចិនដីគោក) មានអ្នកស្លាប់បន្ថែមចំនួន109នាក់ ធ្វើឱ្យចំនួនអ្នកស្លាប់សរុបក្នុងប្រទេសនេះ ឡើងដល់2,345នាក់។ ចិនក៏បានរកឃើញអ្នកមានផ្ទុកមេរោគកូរ៉ូណាបន្ថែម397នាក់ នាំឱ្យអ្នកផ្ទុកមេរោគនេះ សរុបឡើងដល់76,288នាក់ ក្នុងនោះមាន11,477នាក់ស្ថិតក្នុងស្ថានភាពគ្រោះថ្នាក់។

ដូច្នេះ នៅទូទាំងពិភពលោក ចំនួនអ្នកស្លាប់ដោយសារអាសន្នរោគនេះកើនឡើងដល់2,360នាក់ និងអ្នកផ្ទុកមេរោគ ចំនួន77,672នាក់។ អ្នកជំងឺ12,071នាក់កំពុងប្រឈមនឹងការស្លាប់ និង20,895នាក់ បានជាសះស្បើយ៕

ប្រភព៖ សារព័ត៌មានបរទេស

February 22, 2020

ចំនួនអ្នកឆ្លងមេរោគកូរ៉ូណា COVID-19 នៅទីក្រុងប៉េកាំង កើនឡើងយ៉ាងឆាប់រហ័ស

ករណីឆ្លងវីរុសកូរ៉ូណា COVID-19 បានកើនឡើងយ៉ាងឆាប់រហ័សនៅឯមន្ទីរពេទ្យចំនួន2ក្នុងទីក្រុងប៉េកាំង ធ្វើឱ្យមានការព្រួយបារម្ភកាន់តែខ្លាំងចំពោះហានិភ័យនៃការផ្ទុះឆ្លងរាលដាលក្នុងរដ្ឋធានីមួយនេះ។

បើធៀបនឹងបណ្ដាទីក្រុងផ្សេងៗ រដ្ឋធានីប៉េកាំងរបស់ចិន បានរកឃើញអ្នកផ្ទុកមេរោគកូរ៉ូណា COVID-19 មិនច្រើននោះទេ ខណៈដែលកាលពីថ្ងៃទី21កន្លងទៅ ទីក្រុងប៉េកាំង មានអ្នកផ្ទុកមេរោគនេះត្រឹមតែ396នាក់ និងអ្នកស្លាប់ដោយសារមេរោគនេះមានចំនួន4នាក់ប៉ុណ្ណោះ។ ក៏ប៉ុន្តែ បច្ចុប្បន្ន មន្ទីរពេទ្យ Fuxing មានអ្នកជំងឺកូរ៉ូណាយ៉ាងតិច36នាក់ គឺកើនឡើងច្រើនរាប់ចាប់តាំងពីថ្ងៃទី3កុម្ភៈ ស្របពេលដែលបុគ្គលិកសុខាភិបាល5នាក់នៅក្នុងមន្ទីរពេទ្យ Fuxing បានឆ្លងវីរុស។

មន្ទីរពេទ្យសកលវិទ្យាល័យប៉េកាំង (Peking University People’s Hospital) ក៏បានប្រកាសថា មានអ្នកជំងឺកូរ៉ូណាថ្មីចំនួន3ករណី ក្នុងនោះមានស្ត្រីម្នាក់ រួមនឹងកូនស្រី និងកូនប្រសា ដែលអ្នកទាំងនេះ ធ្លាប់បានទៅសួរសុខទុក្ខលោកយាយរបស់ពួកគេ បន្ទាប់ពីត្រឡប់មកពីតំបន់ទេសចរណ៍ស៊ីនជាំង(Xinjiang)។

អាជ្ញាធរទីក្រុងប៉េកាំង បានចេញសេចក្ដីប្រកាសថា ពលរដ្ឋទាំងឡាយណាដែលមកកាន់ទីក្រុងប៉េកាំង ត្រូវតែនៅដាច់ដោយឡែកក្នុងរយៈពេល14ថ្ងៃ បើមិនដូច្នោះទេនឹងត្រូវទទួលទោសតាមច្បាប់។ បទបញ្ជានេះ តម្រូវឱ្យអ្នកត្រឡប់មកកាន់ទីក្រុងប៉េកាំង ត្រូវតែជូនដំណឹងជាមុនទៅអាជ្ញាធរដែនដី ដែលជាកន្លែងពួកគេរស់នៅ។

គិតមកដល់ពេលនេះ ជំងឺរលាកសួតបង្កឡើងដោយមេរោគកូរ៉ូណា COVID-19 បានសម្លាប់មនុស្ស2,252នាក់ និងអ្នកមានផ្ទុកមេរោគនេះ មានចំនួន77,277នាក់ នៅទូទាំងពិភពលោក៕

ប្រភព៖ សារព័ត៌មានបរទេស

February 22, 2020

រដ្ឋមន្ត្រីអ៊ុយក្រែន ស្ម័គ្រចិត្តចូលរស់នៅជាមួយជនភៀសខ្លួនមកពីអ៊ូហាន ខណៈមានការតវ៉ាពីពលរដ្ឋក្នុងតំបន់

រដ្ឋមន្ត្រីក្រសួងសុខាភិបាលអ៊ុយក្រែន Zoryana Skaletska បានប្រកាសថា លោកស្រីនឹងចំណាយពេល2សប្ដាហ៍ ចូលទៅរស់នៅក្នុងតំបន់ដាក់ឱ្យនៅដាច់ដោយឡែក ជាមួយនឹងអ្នកដែលបានជម្លៀសមកពី “សម្បុកមេរោគកូរ៉ូណា” អ៊ូហាន នៃខេត្តហ៊ូប៉ី ប្រទេសចិន។

ទីភ្នាក់ងារសារព័ត៌មាន AFP បានរាយការណ៍ថា លោកស្រី Zoryana Skaletska បានចេញសេចក្ដីប្រកាសខាងលើ បន្ទាប់ពីបាតុករអ៊ុយក្រែនបានប៉ះទង្គិចជាមួយក្រុមនគរបាល ដោយក្រុមបាតុករបានគប់ដុំថ្មទៅលើរថយន្តដឹកពលរដ្ឋដែលត្រូវបានជម្លៀសចេញពីទីក្រុងអ៊ូហាន ត្រឡប់មកប្រទេសវិញ។

ប្រទេសអ៊ុយក្រែន កាលពីថ្ងៃទី 20កុម្ភៈកន្លងទៅ បាននាំពលរដ្ឋចំនួន45នាក់នៃប្រទេសនេះ និងជនបរទេស37នាក់ ដែលភាគច្រើនគឺជាជនជាតិអាមេរិកខាងត្បូង មកពីទីក្រុងអ៊ូហាន ទៅស្រុក Novi Sanzhary ក្នុងតំបន់ Poltava ដើម្បីធ្វើការដាក់ឱ្យនៅដាច់ដោយឡែកក្នុងរយៈពេល14ថ្ងៃ។ ក៏ប៉ុន្តែ ប្រជាពលរដ្ឋក្នុងតំបន់នេះ មិនយល់ស្របជាមួយនឹងវិធានការរបស់រដ្ឋាភិបាល ហើយពួកគេក៏បានស្កាត់ផ្លូវ និងគប់ដុំថ្មទៅលើរថយន្តដឹកជនភៀសខ្លួនទាំងនោះ។ ក្នុងហេតុការណ៍នោះ យ៉ាងហោចណាស់មានរថយន្ត3គ្រឿងត្រូវរងការខួចខាត ដោយសារតែបាតុករ។

នៅក្នុងសេចក្ដីប្រកាសមួយដែលបានផ្ញើទៅកាន់ពលរដ្ឋ លោកស្រី Skaletska បាននិយាយថា “ខ្ញុំនឹងចំណាយពេល14ថ្ងៃ ដើម្បីទៅរស់នៅជាមួយពួកគេ នៅក្នុងតំបន់តែមួយ និងក្នុងស្ថានភាពតែមួយ”។

លោកស្រីសរសេរនៅលើ Facebook ថា “ពួកគេទាំងនោះគឺជាអ្នកស្រុករបស់យើង។ យើងរស់នៅក្នុងប្រទេសតែមួយ និងត្រូវតែថែរក្សាសុខភាព និងសុវត្ថិភាពរបស់ពួកគេ”។

ក្រុមមន្ត្រី៊អ៊ុយក្រែន រួមទាំងប្រធានាធិបតី Volodymyr Zelensky បានអំពាវនាវឱ្យពលរដ្ឋបន្ធូរបន្ថយភាពតានតឹង ប៉ុន្តែ អ្នកស្រុកបាននិយាយថា ពួកគេមានការព្រួយបារម្ភអំពីការឆ្លងរាលដាលនៃវីរុសកូរ៉ូណា។

រដ្ឋមន្ត្រីក្រសួងមហាផ្ទៃអ៊ុយក្រែន Arsen Avakov ក៏បានទៅកាន់កន្លែងកើតហេតុ។ ចំណែកនាយករដ្ឋមន្ត្រី Oleksiy Goncharuk កាលពីថ្ងៃទី20 ក៏បានទៅកាន់តំបន់ Novi Sanzhary ផងដែរ។

លោកប្រធានាធិបតីអ៊ុយក្រែន Zelensky បានអំពាវនាវឱ្យពលរដ្ឋបង្ហាញអំពីសាមគ្គីភាព និងត្រូវចងចាំថា “យើងគឺសុទ្ធតែជាមនុស្ស”។

អាជ្ញាធរអ៊ុយក្រែន បានបង្កើនការការពារសន្តិសុខនៅក្នុងតំបន់ដែលមានពលរដ្ឋ10,000នាក់កំពុងរស់នៅនេះ ដោយការដាក់ពង្រាយរថយន្តពាសដែកជាច្រើនគ្រឿង រួមនឹងកងកម្លាំងប្រដាប់អាវុធរាប់រយនាក់។

បច្ចុប្បន្ន ប្រទេសអ៊ុយក្រែន មិនទាន់មានករណីឆ្លងវីរុសកូរ៉ូណា COVID-19 ណាមួយនៅឡើយ។ អាសន្នរោគនេះ បានសម្លាប់មនុស្សយ៉ាងតិច2,252 និងអ្នកបានឆ្លងមេរោគនេះកើនឡើងដល់ 76,844នាក់ នៅទូទាំងពិភពលោក៕

ប្រភព៖ សារព័ត៌មានបរទេស

February 22, 2020

ស្មាតហ្វូនថ្មី តម្លៃទាបបំផុតរបស់ Apple នឹងមានឈ្មោះថា “iPhone”

ទូរស័ព្ទឆ្លាតវៃ តម្លៃ “ទាបបំផុត” របស់ក្រុមហ៊ុន Apple ដែលជិតបង្ហាញខ្លួនក្នុងទីផ្សារពិភពលោកនាពេលខាងមុខនេះ មិនមែនមានឈ្មោះថា iPhone 9 ឬ iPhone SE2 ដូចព័ត៌មានចចាមអារ៉ាមកន្លងមកនោះទេ ប៉ុន្តែ វានឹងមានឈ្មោះដ៏សាមញ្ញបំផុត ងាយហៅបំផុត និងប្រកបដោយភាពស្និទ្ធស្នាលបំផុត នោះគឺឈ្មោះ “iPhone”។

Jon Prosser មកពីឆានែល YouTube ឈ្មោះ Front Page Tech ធ្លាប់ជាអ្នកបញ្ចេញព័ត៌មានត្រឹមត្រូវ និងមិនដែលខុស ទាក់ទិននឹងស្មាតហ្វូនដែលជិតបង្ហាញខ្លួន បានឱ្យដឹងថា ក្រុមហ៊ុន Apple កំពុងរៀបគម្រោងបង្ហាញ និងដាក់លក់ស្មាតហ្វូនថ្មី តម្លៃទាំបរបស់ខ្លួនដែលមានឈ្មោះថា “iPhone”។ ប្រការនេះ គឺដូចទៅនឹងអ្វីដែល Apple ធ្លាប់បានធ្វើទៅលើ iPad ដូច្នោះដែរ ដោយក្រុមហ៊ុននេះ ធ្លាប់បានដាក់ឈ្មោះឱ្យថេប្លេតនេះថា “iPad”។

ចំណែកសារព័ត៌មាន Phonearena វិញ យល់ថា ការដែល Apple ដាក់ឈ្មោះសាមញ្ញទៅឱ្យ iPhone ជំនាន់ថ្មីបែបនេះ គឺពិតជាមានបង្កប់គំនិតអ្វីមួយ។ យុទ្ធសាស្ត្រនេះ នឹងជួយលើកតម្លៃអតិថិជន ដោយពួកគេនឹងមិនគិតថា ស្មាតហ្វូន iPhone ថ្មីដែលមានតម្លៃទាបដែលខ្លួនកំពុងកាន់ប្រើ គឺវា “អន់” ឬចាស់ជាង បើធៀបនឹង iPhone XR ឬ iPhone 11 ហើយវាក៏នឹងបើកផ្លូវឱ្យមានប្រភេទ “iPhone គ្មានលេខ” នាពេលអនាគត ព្រមទាំងមានភាពងាយស្រួលក្នុងការលក់នៅក្នុងទីផ្សារនៃប្រទេសដែលកំពុងអភិវឌ្ឍ។

ព័ត៌មានចចាមអារ៉ាមថ្មីៗនេះបានឱ្យដឹងថា iPhone ថ្មីនោះ នឹងមានតម្លៃត្រឹមតែ399ដុល្លារប៉ុណ្ណោះ សម្រាប់កំណែដែលមានអង្គចងចាំ64GB និង450ដុល្លារអាមេរិកសម្រាប់កំណែដែលមានអង្គចងចាំ128GB។ ស្មាតហ្វូននេះនឹងមានរូបរាងដូច iPhone 8 និងមានអេក្រង់ LCD 4,7 inch ជាមួយនឹងប៊ូតុង Home ដែលមានបំពាក់មុខងារស្កេនក្រយៅដៃ Tuoch ID និងប្រើប្រាស់ឈីប Apple A13 ជាមួយនឹង RAM 3GB និងដំណើរការដោយប្រព័ន្ធប្រតិបត្តិ iOS 13។

ទាក់ទិននឹងថ្ងៃបង្ហាញខ្លួនរបស់ស្មាតហ្វូនខាងនេះ មានព័ត៌មានខ្លះនិយាយថា វានឹងមានមុខនៅក្នុងទីផ្សារនាចុងខែមិនាខាងមុខ។ ប៉ុន្តែ ថ្មីៗនេះ សារព័ត៌មាន Nikkei Asian Review ជឿថា ពេលវេលាបង្ហាញខ្លួនរបស់វាអាចនឹងយឺតជាងនេះ ពោលគឺនៅដើមខែមេសា ឆ្នាំ2020 ដោយសារតែរងផលប៉ះពាល់ពីអាសន្នរោគកូរ៉ូណា COVID-19 ដែលកំពុងរាតត្បាតពិភពលោក៕

ប្រភព៖ សារព័ត៌មានបរទេស

February 21, 2020

Author: សឿន សំណាង