សឿន សំណាង - La Reine Media

WHO ថា “នេះជាពេលដែលត្រូវប្រមូលកម្លាំងទាំងអស់ដើម្បីទប់ទល់នឹងរោគរាតត្បាត” ស្របពេលដែលប្រទេសខ្លះ មានវិធានការមិនសមស្របទៅនឹងទំហំនៃការរាតត្បាតរបស់វីរុស Covid-19

ប្រធានអង្គការសុខភាពពិភពលោក WHO លោក Todros Adhanom Ghebreyesus បានប្រកាសថា “ពេលនេះមិនមែនជាពេលដែលត្រូវចុះចាញ់ ឬលើកឡើងនូវពាក្យដែលប្រកបដោយលេសដោះសានោះទេ។ នេះគឺជាពេលដែលត្រូវប្រើប្រាស់កម្លាំងទាំងអស់ដែលមាន”។

លោក Tedros ថ្លែងដូចខាងលើនេះ នៅក្នុងសន្និសីទសារព័ត៌មានមួយនៅឯទីស្នាក់ការកណ្ដាលរបស់អង្គការសុខភាពពិភពលោក ក្នុងទីក្រុងហ្សឺណែវ ប្រទេសស្វីស កាលពីថ្ងៃទី 3មីនា។ លោក Tedros បានអំពាវនាវឱ្យប្រទេសទាំងអស់ក្នុងពិភពលោក ប្រើប្រាស់កម្លាំងទាំងអស់ដែលមាន ដើម្បីទប់ទល់នឹងរោគរាតត្បាត Covid-19 ខណៈដែលវាកំពុងតែឆ្លងរាលដាលយ៉ាងខ្លាំងក្លានៅទូទាំងសកលលោក។

ប្រធានអង្គការ WHO ថ្លែងថា “រោគរាតត្បាតនេះ អាចត្រូវបានរុញច្រានទៅឆ្ងាយដោយការសហការគ្នាលើគ្រប់វិស័យ រវាងរដ្ឋាភិបាលទាំងអស់ក្នុងពិភពលោក។ យើងអំពាវនាវ សូមឱ្យប្រទេសទាំងអស់ ធ្វើសកម្មភាពដោយប្រើប្រាស់ទ្រង់ទ្រាយធំ ល្បឿនលឿន និងការប្ដេជ្ញាចិត្តខ្ពស់បំផុត”។

WHO មានការព្រួយបារម្ភខ្លាំង ចំពោះការឆ្លងរាលដាលកាន់តែច្រើនឡើងៗនៃមេរោគ Covid-19 ពិសេសគឺនៅក្នុងបណ្ដាប្រទេសដែលមានប្រព័ន្ធសុខាភិបាលអន់ខ្សោយ និងប្រទេសដែលធ្វើសកម្មភាព ឬចាត់វិធានការមិនសមស្របទៅនឹងទំហំនៃការគំរាមកំហែងរបស់រោគរាតត្បាតនេះ។

លោក Tedros សង្កត់ធ្ងន់ថា “នេះមិនមែនជាពេលដែលត្រូវចុះចាញ់ ហើយក៏មិនមែនជាពេលដែលត្រូវយកលេសដោះសា មកនិយាយនោះដែរ។ វាជាពេលវេលាដែលត្រូវប្រើប្រាស់កម្លាំងទាំងអស់ដែលមាន ព្រោះថា បញ្ហាអាក្រក់បំផុតអាចនឹងកើតមានចំពោះប្រទេសមួយ ឬសូម្បីតែបុគ្គលម្នាក់។ នេះបើតាម CNBC។

បច្ចុប្បន្ន អត្តានៃការស្លាប់របស់អ្នកជំងឺដែលផ្ទុកមេរោគ Covid-19 ត្រូវបានគេគណនារួមទូទាំងពិភពលោក គឺត្រឹម 3,4% ចំណែកគ្រុនផ្ដាសាយរដូវ (seasonal flu) គឺ 1%។

មុននេះ WHO បានវាយតម្លៃទៅលើហានិភ័យរបស់ Covid-19 ពីកម្រិត “ខ្ពស់” ឡើងទៅកម្រិត “ខ្ពស់ខ្លាំង” និងជាសកល មានន័យថា “កម្រិតនៃការយកចិត្តទុកដាក់របស់ WHO កំពុងស្ថិតក្នុងកម្រិតខ្ពស់បំផុត” នេះបើតាមលោកបណ្ឌិត Mike Ryan ប្រធានកម្មវិធីវេជ្ជសាស្ត្របន្ទាន់របស់អង្គការសុខភាពពិភពលោក។

វីរុស Covid-19 ដែលបង្កឱ្យមានជំងឺរលាកសួតប្រភេទថ្មី បានបង្ហាញខ្លួននៅក្នុងប្រទេស និងដែនដីចំនួន 89 នៅទូទាំងពិភពលោក បណ្ដាលឱ្យមនុស្សជាង 98,385នាក់ត្រូវកើតជំងឺ ក្នុងនោះមាន 3,383នាក់ បានបាត់បង់ជីវិត៕

ប្រភព៖ សារព័ត៌មានបរទេស

March 6, 2020

ក្រសួងនឹងរកអគារមួយសម្រាប់ដាក់មនុស្សទាំង40នាក់ដែលសង្ស័យថាបានឆ្លង Covid-19 ដោយប្រយោលពីជនជាតិជប៉ុនម្នាក់នៅខេត្តសៀមរាប

មួយផ្នែកនៃមន្ទីរពេទ្យបង្អែកខេត្តសៀមរាប បានក្លាយកន្លែងសម្រាប់ដាក់មនុស្សចំនួន4នាក់ ដែលកំពុងត្រូវបានសង្ស័យថាបានឆ្លងមេរោគកូរ៉ូណា Covid-19 ដោយផ្ទាល់ពីជនជាតិជប៉ុនម្នាក់ដែលត្រូវបានអាជ្ញាធរជប៉ុនរកឃើញថាមានផ្ទុកមេរោគកូរ៉ូណា។

មកដល់ពេលនេះ ក្រសួងសុខាភិបាល បានបង្កើតទីតាំងមួយសម្រាប់ដាក់មនុស្សទាំង4នាក់ខាងលើនេះហើយ ដោយយកបន្ទប់ធំមួយនៅក្នុងមន្ទីរពេទ្យបង្អែកខេត្តសៀមរាបធ្វើជាកន្លែងព្យាបាលដាច់ដោយឡែក ឬហៅថា ចត្តាឡីស័ក។

ចំណែកមនុស្សចំនួន40នាក់ដែលធ្លាប់បានប៉ះពាល់ដោយប្រយោលជាមួយនឹងអ្នកជំងឺជនជាតិជប៉ុននោះ ក្រសួងក៏នឹងរៀបចំអគារមួយសម្រាប់តាមដានសុខភាពរបស់ពួកគេផងដែរ។ រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វ៉ាន់ឌីន គឺជាអ្នកចាត់ចែងកិច្ចការខាងលើនេះ។

សូមបញ្ជាក់ថា មូលហេតុដែលនាំឱ្យមានវិធានការខាងលើ គឺកើតឡើងបន្ទាប់ពីជនជាតិជប៉ុនម្នាក់នៅខេត្តសៀមរាប ត្រូវបានអាជ្ញាធរជប៉ុនពិនិត្យឃើញថាមានផ្ទុកមេរោគ Covid-19 ក្រោយពីបុរសម្នាក់នេះ បានធ្វើដំណើរតាមជើងហោះហើរមួយរបស់ក្រុមហ៊ុនអាកាសចរណ៍វៀតណាម ចេញចំណើរពីខេត្តសៀមរាប ឆ្ពោះទៅកាន់ប្រទេសជប៉ុន ដោយបានចុះចត និងប្ដូរយន្តហោះក្នុងប្រទេសវៀតណាម ហើយបានបន្តដើម្បីទៅកាន់ប្រទេសជប៉ុន។

ជនជាតិជប៉ុនម្នាក់ខាងលើនេះ ធ្លាប់បានធ្វើដំណើរទៅកាន់ប្រទេសជាច្រើនក្នុងតំបន់អាស៊ីអាគ្នេយ៍ មុននឹងត្រឡប់មកកាន់កម្ពុជា និងចាកចេញពីខេត្តសៀមរាបទៅកាន់ប្រទេសជប៉ុន៕

March 6, 2020

មេទ័ពធំរបស់អ៊ីរ៉ង់ ចោទសហរដ្ឋអាមេរិកថា នៅពីក្រោយវីរុសមរណៈ ជាការរុករានខាងអាវុធជីវសាស្ត្រ

ឧត្ដមសេនីយ៍ដ៏ល្បីឈ្មោះរបស់អ៊ីរ៉ង់ បានអះអាងថា មេរោគវីរុស COVID-19 គឺជាការវាយប្រហារខាងអាវុធជីវសាស្ត្ររបស់សហរដ្ឋអាមេរិកទៅលើប្រទេសចិន មុននឹងមកដល់អ៊ីរ៉ង់។

លោកឧត្ដមសេនីយ៍ ហូសសេន សាឡាមី អគ្គមេបញ្ជាការនៃកងកម្លាំងការពារការបដិវត្តន៍អ៊ិស្លាមនៃប្រទេសអ៊ីរ៉ង់ បាននិយាយកាលពីថ្ងៃម្សិលមិញ(ថ្ងៃទី5មីនា)ថា សហរដ្ឋអាចស្ថិតនៅពីក្រោយខ្នងមេរោគ COVID-19 ដែលកំពុងរាតត្បាតយ៉ាងខ្លាំងនៅក្នុងអ៊ីរ៉ង់ និងចិន ព្រមទាំងបានព្រមានឱ្យសហរដ្ឋប្រយ័ត្នខ្លួន បើសិនជានៅពីក្រោយខ្នងនៃមេរោគវីរុសមរណៈនេះពិតមែននោះ មេរោគនេះនឹងត្រឡប់ទៅចាត់ការអាមេរិកវិញយ៉ាងសមមុខនៅទីបំផុត វិញមិនខាន។

“ថ្ងៃនេះ ប្រទេសជាតិស្ថិតនៅក្នុងសមរភូមិអាវុធជីវសាស្ត្រ យើងនឹងតស៊ូជាមួយវីរុសដែលអាចជាស្នាដៃនៃការរុករានឈ្លានពានខាងអាវុធជីវសាស្ត្ររបស់អាមេរិក ចម្លងទៅចិនមុនគេ បន្ទាប់មកអ៊ីរ៉ង់ និងទូទាំងពិភពលោក” ឧត្ដមសេនីយល្បីឈ្មោះថ្លែងប្រាប់អ្នកចូលរួមដ៏ច្រើននៅក្នុងទីក្រុង ឃើរម៉ាន កាលពីថ្ងៃម្សិលមិញ។

ចំណែកលោកឧត្ដមសេនីយ៍ រេសៅ ចាឡាលី អគ្គមេបញ្ជាការអង្គការការពារគ្រោះភ័យពលរដ្ឋនៃប្រទេសអ៊ីរ៉ង់ បានថ្លែងកាលពីពេលមុនថា ការបំផុសក្ដីភ័យខ្លាចរបស់វីរុសថ្មីនេះនៅក្នុងប្រទេសអ៊ីរ៉ង់តាមរយៈព័ត៌មាន រឹតតែបន្ថែមទម្ងន់ទៀតថា មេរោគវីរុស គឺជាការវាយប្រហារខាងអាវុធជីវសាស្ត្រមកលើអ៊ីរ៉ង់ និងចិន តែយ៉ាងណាក្ដី ការសង្ស័យនេះត្រូវអាស្រ័យលើការស៊ើបអង្កេតខាងជីវសាស្ត្រ និងការសិក្សាស្រាវជ្រាវជីណូម ឬព័ត៌មានលម្អិតខាងពូជអម្បូររបស់វីរុស”៕

ប្រភព៖សាព័ត៌មានបរទេស

March 6, 2020

ទិដ្ឋភាពដ៏ស្រស់ស្អាត នៅឯមន្ទីរពេទ្យ Wuhan ដែលធ្វើឱ្យមានការចាប់អារម្មណ៍ខ្លាំង នៅប្រទេសចិន

Liu Kai អាយុ 27ឆ្នាំ ជាវេជ្ជបណ្ឌិតម្នាក់នៅឯមន្ទីរពេទ្យ Renmin បានសួរអ្នកជំងឺរបស់ខ្លួនបន្ទាប់ពីនាំគាត់ទៅថត CT កាលពីថ្ងៃទី3មីនាថា ៖ “លោកចូលចិត្តទិដ្ឋភាពថ្ងៃរៀបលិចដែរទេ?”។

អ្នកជំងឺវ័យ 87ឆ្នាំ ដែលកំពុងស្ថិតនៅលើគ្រែសម្រាប់អ្នកជំងឺ ក៏ឆ្លើយថា “វាស្អាតខ្លាំងណាស់”។ បានឮដូច្នេះ វេជ្ជបណ្ឌិត Liu ក៏បានរុញគ្រែ និងអ្នកជំងឺដោយថ្នមៗ ចេញទៅខាងក្រៅមន្ទីរពេទ្យ និងគយគន់ទិដ្ឋភាពថ្ងៃរៀបលិចជាមួយគ្នា។

អ្នកជំងឺស្ថិតនៅលើគ្រែ ចំណែកលោកវេជ្ជបណ្ឌិត Liu ស្ថិតក្នុងសម្លៀកបំពាក់ការពារមេរោគ ដែលគ្របដណ្ដប់ជិតពីក្បាល ដល់ចុងជើង។ អ្នកទាំង2 បានឆ្លៀតឱកាសដ៏កម្រនេះដើម្បីទទួលយកពន្លឺស្រាលៗពីព្រះអាទិត្យដែលកំពុងតែរៀបអស្ដង្គត នៅឯទីក្រុង Wuhan ប្រទេសចិន។ រូបថតត្រូវបានថតដោយបុគ្គលិកពេទ្យម្នាក់ដែលដើរជាមួយពួកគេ បានធ្វើឱ្យមានការភ្ញាក់ផ្អើលខ្លាំងនៅលើសណ្ដាញសង្គម ក៏ដូចជាសារព័ត៌មាននៅប្រទេសចិនកាលពីម្សិលមិញ បន្ទាប់ពីវាត្រូវបានបង្ហោះ និងចុះផ្សាយ។

លោកវេជ្ជបណ្ឌិត Liu ថ្លែងថា “អ្នកជំងឺនេះ មិនបានឃើញពន្លឺថ្ងៃអស់រយៈពេល1ខែមកហើយ។ គាត់សប្បាយចិត្តខ្លាំងណាស់ នៅពេលបានឈរក្រោមកម្ដៅព្រះអាទិត្យជាមួយគ្នា”។ លោក Liu ឱ្យដឹងថា ខ្លួនគាត់ផ្ទាល់ ដូចជាមិនមានឱកាសមើលឃើញព្រះអាទិត្យ ព្រោះតែបានចំណាយពេលច្រើននៅក្នុងមន្ទីរពេទ្យ។

បន្ទាប់ពីបានបង្ហោះនៅលើបណ្ដាញសង្គម រូបថតខាងលើ បានធ្វើឱ្យមានការចាប់អារម្មណ៍ខ្លាំងពីសំណាក់អ្នកប្រើប្រាស់បណ្ដាញសង្គមនៅប្រទេសចិន។ មនុស្សម្នាក់បានបញ្ចេញមតិថា “មិនត្រឹមតែព្រះអាទិត្យនោះទេ ប៉ុន្តែរូបថតនេះក៏បានបង្ហាញអំពីក្ដីសង្ឃឹម ឬទិដ្ឋភាពដ៏កក់ក្ដៅ ដោយពន្លឺនៅចំពីមុខរបស់ពួកគេ”។

ក្រោយមក លោកវេជ្ជបណ្ឌិត Liu ក៏បាននាំអ្នកជំងឺនេះត្រឡប់ចូលមន្ទីរពេទ្យវិញ ហើយអ្នកជំងឺនេះក៏បានសម្រាន្តលង់លក់ទៅ។

វេជ្ជបណ្ឌិត Liu បានរៀបរាប់ថា អ្នកជំងឺវ័យ 87ឆ្នាំរូបនេះ កំពុងស្ថិតក្នុងស្ថានភាពធ្ងន់ធ្ងរ ប៉ុន្តែ ក្រុមគ្រូសារមិនអាចមកមើលអ្នកជំងឺញឹកញាប់បាន ដោយសារបញ្ហាសុវត្ថិភាព និងការដើរហើរ។ ដូច្នេះ អ្នកជំងឺនេះត្រូវបានថែទាំងដោយក្រុមបុគ្គលិកពេទ្យ។

ក្នុងរយៈពេល20ថ្ងៃនៃការព្យាបាល សុខភាពរបស់អ្នកជំងឺខាងលើ ក៏បានល្អប្រសើរឡើងវិញបន្តិចម្ដងៗ។ នេះបើតាម Global Times។

ក្រុមរបស់លោកវេជ្ជបណ្ឌិត Liu កំពុងតែធ្វើការនៅឯមន្ទីរពេទ្យ Renmin នៃមហាវិទ្យាល័យ Wuhan ដែលជាកន្លែងសម្រាប់ព្យាបាលអ្នកជំងឺដែលមានអាការធ្ងន់ធ្ងរ ឬកំពុងប្រឈមនឹងការបាត់បង់ជីវិត។

លោក Liu បន្តថា “អ្នកជំងឺស្ទើរតែទាំងអស់ មានសុខភាពល្អឡើងវិញ ហើយអ្នកជំងឺមួយចំនួនត្រូវបានអនុញ្ញាតឱ្យចេញពីមន្ទីរពេទ្យ”៕

ប្រភព៖ សារព័ត៌មានបរទេស

March 6, 2020

សមាជិកសភាបារាំង ឆ្លងមេរោគ Covid-19 ខណៈអ្នកជំងឺ 23នាក់ផ្សេងទៀតកំពុងស្ថិតក្នុងស្ថានភាពគ្រោះថ្នាក់ដល់ជីវិត

សមាជិកសភាបារាំងម្នាក់ត្រូវបានបញ្ជូនទៅកាន់មន្ទីរពេទ្យបន្ទាន់ដើម្បីព្យាបាលជំងឺ បន្ទាប់ពីពិនិត្យឃើញថា មានផ្ទុកមេរោគកូរ៉ូណា Covid-19។

សភាជាន់ទាបរបស់បារាំង បានចេញសេចក្ដីប្រកាសកាលពីថ្ងៃទី 5មីនា ឱ្យដឹងថា តំណាងរាស្ត្រមួយរូបរបស់ប្រទេសនេះ ត្រូវបានបញ្ជូនទៅកាន់មន្ទីរពេទ្យ ក្រោយពីបានឆ្លងវីរុស Covid-19 ដែលមេរោគនេះកំពុងសម្លាប់មនុស្សជារៀងរាល់ថ្ងៃ។

បុគ្គលិកម្នាក់ដែលធ្វើការនៅក្នុងវិមានសភាបារាំង ក៏ត្រូវបានរកឃើញថាមានផ្ទុកមេរោគកូរ៉ូណានេះដែរ ហើយក៏កំពុងបង្ខាំងខ្លួននៅឯផ្ទះ។ ក្នុងសេចក្ដីប្រកាសខាងលើ ក៏បានឱ្យដឹងថា បុគ្គលិកម្នាក់ផ្សេងទៀតដែលធ្វើការនៅក្នុងអាហារដ្ឋានរបស់ក្រុមអ្នកតំណាងរាស្ត្របារាំង ក៏ត្រូវបានសង្ស័យថា បានឆ្លងមេរោគកូរ៉ូណា ក្រោយមកបុគ្គលិកម្នាក់នេះក៏ត្រូវបានបញ្ជូនទៅកាន់មន្ទីរពេទ្យ។

សេចក្ដីប្រកាសរបស់សភាជាន់ទាបបារាំង មិនបានប្រាប់ឱ្យដឹងអំពិឈ្មោះរបស់សមាជិកសភាដែលបានឆ្លងមេរោគកូរ៉ូណានេះនោះទេ ប៉ុន្តែ បានសង្កត់ធ្ងន់ថា មនុស្សទាំងអស់ដែលធ្វើការនៅក្នុងវិមានសភានេះ ត្រូវបានជូនដំណឹងរួចរាល់ហើយអំពីករណីខាងលើ។ នេះបើតាមសារព័ត៌មាន Straits Times។

កាលពីថ្ងៃទី5មីនាកន្លងទៅ ប្រធានាធិបតីបារាំង លោក Emmanuel Macron បានជួបពិភាក្សាជាមួយក្រុមអ្នកវិទ្យាសាស្ត្រ និងក្រុមអ្នកជំនាញ ដើម្បីស្វែងរកវិធីទប់ស្កាត់ការឆ្លងរាលដាលខ្លាំងនៃមេរោគ Covid-19 នៅប្រទេសនេះ។

ប្រទេសបារាំង បច្ចុប្បន្ន មានអ្នកផ្ទុកមេរោគ Covid-19 ចំនួន 423នាក់ ក្នុងនោះមានអ្នកស្លាប់ 7នាក់។ រដ្ឋមន្ត្រីក្រសួងសុខាភិបាលបារាំង Jérôme Salomon បានឱ្យដឹងថា ក្នុងចំណោមអ្នកផ្ទុកមេរោគនេះ មានអ្នកជំងឺ 23នាក់កំពុងស្ថិតក្នុងស្ថានភាពគ្រោះថ្នាក់ដល់ជីវិត៕

ប្រភព៖ សារព័ត៌មានបរទេស

March 6, 2020

កម្ពុជានឹងចំណាយ 30លានដុល្លារអាមេរិក ដើម្បីដោះស្រាយវិបត្តិសុខភាព Covid-19 ខណៈមេរោគនេះបានសម្លាប់មនុស្ស3,354នាក់ នៅទូទាំងពិភពលោក

ក្រសួងសុខាភិបាល កំពុងសហការជាមួយនឹងបណ្តាក្រសួង-ស្ថាប័នពាក់ព័ន្ធ ដើម្បីរៀបចំផែនការយុទ្ធសាស្ត្រ និងចាត់វិធានការឆ្លើយតបជាបន្ទាន់ សម្រាប់ទប់ស្កាត់រោគរាតត្បាត Covid-19 ដែលអាចផ្ទុះឆ្លងរាលដាលនាពេលខាងមុខ។

ដើម្បីជាការឆ្លើយតបទៅនឹងរោគរាតត្បាត Covid-19 ដែលអាចនឹងកើតឡើង កម្ពុជានឹងចំណាយថវិកាចំនួន 30លានដុល្លារសហរដ្ឋអាមេរិក តាមរយៈក្រសួងសេដ្ឋកិច្ច និងហរិញ្ញវត្ថុ សហការជាមួយក្រសួងសុខាភិបាល និងក្រសួងពាក់ព័ន្ធ ដើម្បីបំពាក់ឧបករណ៍តាមដាន ត្រួតពិនិត្យ និងរៀបចំទីកន្លែងសម្រាប់ព្យាបាលអ្នកជំងឺដែលឆ្លងមេរោគកូរ៉ូណា Covid-19 រួមទាំងការបណ្ដុះបណ្ដាល និងបង្កើនសមត្ថភាពរបស់ក្រុមគ្រូពេទ្យ។ល។

ក្រសួងសេដ្ឋកិច្ច និងហរិញ្ញវត្ថុ បានឱ្យដឹងថា ថវិកាចំនួន 30លានដុល្លារនេះ នឹងត្រូវចំណាយត្រឹមរយៈពេល៦ខែទៅមុខ ដោយរាប់ចាប់ពីខែមីនា រហូតដល់ខែសីហា ឆ្នាំ2020។

បច្ចុប្បន្ន កម្ពុជាកំពុងតែដាក់មនុស្សចំនួន40នាក់ឱ្យស្ថិតក្រោមការតាមដានសុខភាព និង4នាក់ផ្សេងទៀតត្រូវបានដាក់ឱ្យនៅដាច់ដោយឡែក ព្រោះមានជាប់ទាក់ទិននឹងជនជាតិជប៉ុនដែលផ្ទុកមេរោគ Covid-19។ កន្លងមក កម្ពុជាក៏ធ្លាប់មានអ្នកផ្ទុកមេរោគកូរ៉ូណានេះដែរ ដោយអ្នកជំងឺគឺជាជនជាតិចិន មកពីតំបន់ Wuhan។

មេរោគកូរ៉ូណា Covid-19 បានចាប់ផ្ដើមផ្ទុះឆ្លងនៅឯទីក្រុង Wuhan ប្រទេសចិន កាលពីខែធ្នូ ឆ្នាំ2019 ហើយមកដល់ថ្ងៃនេះ (6មីនា) មេរោគនេះបានឆ្លងទៅមនុស្សជាង 98,041នាក់ ក្នុងនោះមាន 3,349នាក់បានបាត់បង់ជីវិត និងជាង 53,827នាក់់ បានជាសះស្បើយ៕

March 6, 2020

Kim Jong-un ជូនពរកូរ៉េខាងត្បូង ឆ្លងផុតពីវិបត្តិសុខភាព ខណៈប្រទេសនេះ មានអ្នកផ្ទុក Covid-19 ជាង 6,088នាក់

មេដឹកនាំកូរ៉េខាងជើង លោក Kim Jong-un បានផ្ញើលិខិតមួយច្បាប់ជូនកូរ៉េខាងត្បូង សម្ដែងការជឿជាក់ថា ប្រទេសនេះនឹងឆាប់ទទួលបានជោគជ័យលើរោគរាតត្បាត Covid-19 និងអាចការពារសុខភាពរបស់ប្រជាជន។

លេខាធិការសារព័ត៌មាននៃវិមានប្រធានាធិបតីកូរ៉េខាងត្បូង បានឱ្យដឹងនៅថ្ងៃនេះថា “ប្រធានរដ្ឋ Kim Jong-un មានបំណងលើកទឹកចិត្តប្រជាជន (កូរ៉េខាងត្បូង) ដែលកំពុងប្រយុទ្ធប្រឆាំងនឹងវីរុសកូរ៉ូណា។ គាត់ជឿជាក់ថា យើងនឹងទទួលបានជ័យជំនះ ហើយសង្ឃឹមថា សុខភាពរបស់ប្រជាជនកូរ៉េខាងត្បូងនឹងត្រូវបានការពារ”។

លិខិតមួយច្បាប់នោះ ត្រូវបានលោក Kim ផ្ញើទៅកាន់ប្រធានាធិបតីកូរ៉េខាងត្បូង លោក Moon Jae-in កាលពីថ្ងៃ ទី4មីនា ឆ្នាំ2020។ នៅក្នុងលិខិតនោះ លោក Kim Jong-un បានសម្ដែងការព្រួយបារម្ភចំពោះសុខភាពរបស់ថ្នាក់ដឹកនាំកូរ៉េខាងត្បូង ព្រមទាំងបានបកស្រាយអំពី “គំនិតស្មោះត្រង់” របស់លោក Kim Joong-un អំពីស្ថានការណ៍នៅលើឧបទ្វីបកូរ៉េនាបច្ចុប្បន្ន។

ប្រធានាធិបតីកូរ៉េខាងត្បូង លោក Moon Jae-in ក៏បានផ្ញើលិខិតមួយច្បាប់ឆ្លើយតបទៅកាន់កូរ៉េខាងជើង ក្នុងនោះលោក Moon បានសម្ដែងការអរគុណចំពោះការយកចិត្តទុកដាក់របស់ប្រធានរដ្ឋកូរ៉េខាងជើងផងដែរ។

កូរ៉េខាងត្បូង ថ្ងៃនេះបានរកឃើញអ្នកផ្ទុកមេរោគ Covid-19 បន្ថែមចំនួនជាង332នាក់ នាំឱ្យចំនួនអ្នកបានឆ្លងមេរោគនេះ សរុបឡើងដល់ជាង 6,088នាក់ ក្នុងនោះមាន 35នាក់បានបាត់បង់ជីវិត និងជាង40នាក់បានជាសះស្បើយពីជំងឺ។ ប្រទេសនេះ បានក្លាយជាសម្បុកមេរោគ Covid-19 ធំជាងគេក្នុងពិភពលោកបន្ទាប់ពីប្រទេសចិន។

ចំណែកនៅទូទាំងពិភពលោកវិញ មនុស្សចំនួន 95,748នាក់ ត្រូវបានគេរាយការណ៍ថា បានឆ្លងមេរោគ Covid-19 ក្នុងនោះមាន 3,286នាក់ បានស្លាប់ និង 53,423នាក់ បានជាសះស្បើយពីជំងឺ៕

ប្រភព៖ សារព័ត៌មានបរទេស

March 5, 2020

ក្រសួងអប់រំចេញសេចក្តីណែនាំស្តីពី ការអនុវត្តវិធានការបង្ការជំងឺ Covid-19 នៅតាមគ្រឹះស្ថានសិក្សា

ក្រសួងអប់រំ យុវជន និងកីឡា នៅថ្ងៃទី5មីនានេះ បានចេញសេចក្ដីណែនាំមួយ ស្ដីអំពីការអនុវត្តវិធានការបង្ការជំងឺផ្លូវដង្ហើមដែលបាន និងកំពុងរាតត្បាតពិភពលោក ពិសេសគឺជំងឺរលាកសួតប្រភេទថ្មីដែលបង្ករឡើងដោយវីរុសកូរ៉ូណា Covid-19 ដែលមកដល់ពេលនេះ វាបានឆ្លងទៅមនុស្សជាង 95,748នាក់ នៅទូទាំងពិភពលោក ក្នុងនោះមានមនុស្សចំនួន 3,286នាក់ បានបាត់បង់ជីវិត។

ខាងក្រោមនេះគឺជាសេចក្ដីណែនាំរបស់ក្រសួងអប់រំ យុវជន និងកីឡា៖

March 5, 2020

សេដ្ឋកិច្ចចិននឹងអាចស៊ូទ្រាំជាមួយរោគរាតត្បាត Covid-19 បានដល់ពេលណា?

សាស្ត្រាចារ្យ Michael Spence ដែលធ្លាប់ទទួលបានពានរង្វាន់ Nobel សេដ្ឋកិច្ច យល់ថា ឥទ្ធិពលរបស់ Covid-19 ទៅលើសេដ្ឋកិច្ចចិន គ្រាន់តែកើតឡើងមួយរយៈពេលខ្លីប៉ុណ្ណោះ ចំណែករយៈពេលវែងវិញ វាហាក់មិនអាចទៅរួចនោះទេ។

រោគរាតត្បាត Covid-19 មកដល់បច្ចុប្បន្ន បានសម្លាប់មនុស្សរាប់ពាន់នាក់ និងធ្វើឱ្យមនុស្សរាប់រយលាននាក់នៅទូទាំងពិភពលោក ត្រូវរងផលប៉ះពាល់យ៉ាងធ្ងន់ធ្ងរ។ ដោយសារតែអ្នកវិទ្យាសាស្ត្រមិនទាន់រកឃើញថ្នាំ ឬវិធីពិសេសដែលអាចទប់ស្កាត់ ឬព្យាបាលមេរោគនេះ ដូច្នេះមិនមានអ្នកណាម្នាក់ហ៊ានអះអាងថា ពេលណារោគរាតត្បាតនេះត្រូវបានគេគ្រប់គ្រងទាំងស្រុងនោះទេ កុំថាឡើយនិយាយដល់រឿងសេដ្ឋកិច្ចនឹងល្អប្រសើរឡើងវិញក្នុងរយៈពេលខ្លី។

ក៏ប៉ុន្តែ ប្រការខាងលើនេះ មិនមែនមានន័យថា គេមិនអាចព្យាករអ្វីបានទាំងអស់នោះទេ។ កាលពីអតីតកាល បទពិសោធប្រហាក់ប្រហែលគ្នានឹងរោគរាតត្បាតកូរ៉ូណា Covid-19នេះ បានបង្ហាញថា ការខាតបង់សេដ្ឋកិច្ចរយៈពេលខ្លី អាចមានច្រើន ហើយវិស័យដែលទទួលរងផលប៉ះពាល់ច្រើនជាងគេនោះគឺ វិស័យដឹកជញ្ជូន ទេសចរណ៍ រថយន្ត និងផលិតផលប្រណិត។

ការព្យាករមួយចំនួនដែលអាចជឿទុកចិត្តបាន ក៏បានបង្ហាញថា កំណើន GDP របស់ចិន អាចថយចុះពី 2-4ពិន្ទុភាគរយរៀងរាល់ត្រីមាស រហូតដល់រោគរាតត្បាតនេះបានកើនឡើងដល់កំពូល។ ផលិតផលនាំចេញនាំចូល សុទ្ធតែមានការថយចុះ ដោយសារមានការកាត់បន្ថយសកម្មភាពផលិត ការបញ្ជាទិញ និងការដឹកជញ្ជូន ទាំងស្ម័គ្រចិត្ត ទាំងត្រូវបង្ខំ។ កត្តាជំរុញកំណើនសេដ្ឋកិច្ចដែលពឹងទៅលើរដូវកាលបុណ្យចូលឆ្នាំចិនឆ្នាំនេះក៏មិនបានកើនឡើង។

សំណួរសួរថា តើពេលណារោគរាតត្បាតនេះឡើងដល់កម្រិតកំពូល? ការព្យាករប្រកបដោយភាពជឿជាក់ យល់ថា សេដ្ឋកិច្ចមួយផ្នែកនឹងងើបឡើងវិញនៅក្នុងត្រីមាសទី2។ លោក Michael Spence អ្នកវិទ្យាសាស្ត្រដែលទទួលបានពានរង្វាន់ Nobel សេដ្ឋកិច្ច និងជាសាស្ត្រាចារ្យផ្នែកសេដ្ឋកិច្ចមកពីសាលាសេដ្ឋកិច្ច Stern របស់សកលវិទ្យាល័យ New York និងជាសមាជិកជាន់ខ្ពស់នៃវិទ្យាស្ថាន Hoover យល់ថា វានឹងឃើញជាក់ស្ដែងជាងនេះ បើសិនគេរង់ចាំការងើបឡើងវិញនៃសេដ្ឋកិច្ចនៅត្រីមាសទី3។

ប៉ុន្តែ លោក Michael Spence ក៏បានថ្លែងថា គេនឹងមិនអាចទាត់ចោលនូវលទ្ធភាពដែល Covid-19 ក្លាយជាមហារោគរាតត្បាត ដែលអុកឡុកពិភពលោករយៈពេលវែង ដែលបង្ករការខាតបង់ច្រើនជាងនេះ ចំពោះសេដ្ឋកិច្ច ព្រោះថាអ្នកជំនួញកាន់តែពិបាករកស៊ី ចំនួនអ្នកធ្វើការក៏ត្រូវបានកាត់បន្ថយច្រើនឡើង អ្នកវិនិយោគមានការរារែកកាន់តែខ្លាំង។ល។

អ្នជំនាញផ្នែកសេដ្ឋកិច្ចខាងលើបានអះអាងថា ជារួម ឥទ្ធិពលរយៈពេលវែងរបស់ Covid-19 ទៅលើសេដ្ឋកិច្ចចិន គឺមានតិចតួច។ សេដ្ឋកិច្ចរបស់មហាអំណាចចិនបច្ចុប្បន្ន គេមិនអាចប្រើពាក្យថា “ទន់ខ្សោយ” បានទៀតទេ។ ជាការពិត ប្រទេសនេះលែងពឹងផ្អែកច្រើនទៅលើការនាំចេញ បើធៀបនឹងឆ្នាំ2003 ដែលពេលនោះអាសន្នរោគ SARS កំពុងកើតឡើង។ សេដ្ឋកិច្ចប្រទេសចិន ក៏មានកត្តាជាច្រើនដើម្បីងើបឡើងវិញយ៉ាងលឿន ចេញពីវិបត្តិសុខភាពនេះ។

លោកសាស្ត្រាចារ្យ Michael Spence យល់ថា ប្រភពកម្លាំងដែលកន្លងមកត្រូវបានគេវាយតម្លៃទាបនោះគឺការពង្រីកខ្លួនយ៉ាងលឿនរបស់សេដ្ឋកិច្ចឌីជីថលនៃប្រទេសចិន។ ការលក់រាយតាមអនឡាញនៅប្រទេសចិន បានកើនឡើងរហូតដល់ 35,3% ឬ 25% (តាមស្ថិតិមួយផ្សេងទៀត)។ ការរកស៊ីតាមអនឡាញនៅប្រទេសចិន ពេលនេះកំពុងតែមានកំណើនខ្ពស់។

កត្តាខាងលើនេះ ក៏ជាជំនួយមួយផ្នែកធំដែលជំរុញឱ្យសេដ្ឋកិច្ចចិន ងើបឡើងវិញបានឆាប់រហ័ស ពិសេសគឺនៅចំពោះមុខវិបត្តិមួយដែលកាត់បន្ថយលទ្ធភាពនៃការធ្វើដំណើរ។ វិស័យបច្ចេកវិទ្យារីកចម្រើនខ្លាំង ក៏មានន័យថា បុគ្គលិកក្រុមហ៊ុនអាចធ្វើការឱ្យក្រុមហ៊ុនពេលដែលពួកគេនៅឯផ្ទះ ឬកន្លែងណាមួយដែលនៅខាងក្រៅក្រុមហ៊ុន សូម្បីតែពេលពួកគេត្រូវបង្ខាំងដើម្បីការពារការឆ្លងមេរោគក៏ដោយ។ ចំណែកវិស័យអប់រំក៏មិនខុសគ្នាប៉ុន្មានដែរ ដោយសារគ្រូ និងសិស្សអាចបង្រៀន និងទទួលចំណេះដឹងដោយប្រើអ៊ីនធើណិត។

ក្រុមហ៊ុនដែលជួបបញ្ហាទាក់ទិននឹងលម្ហូរសាច់ប្រាក់ និងទុន នោះឥណទានអាចនឹងត្រូវបានពន្យាពេល និងផ្គត់ផ្គង់ពីចម្ងាយ។ ប្រការនេះនឹងជួយកាត់បន្ថយការខាតបង់ក្នុងរយៈពេលវែងសម្រាប់វិស័យទេសចរណ៍ ពិសេសគឺក្រុមហ៊ុនខ្នាតតូច និងមធ្យម។ ផលិតផល ឬសេវាកម្មធានារ៉ាប់រងតាមអនឡាញក៏អាចត្រូវបានពង្រីកទៅក្នុងវិស័យមួយចំនួន។ ការបញ្ជាទិញសម្ភារវេជ្ជសាស្ត្រតាមអនឡាញ ក៏អាចជួយបញ្ចៀសបញ្ហាខ្វះខាតដោយសារវិបត្តិសុខភាពនេះ ព្រោះថាកម្មវិធីកុំព្យូទ័រ មានសមត្ថភាពដឹង នឹងដោះស្រាយបញ្ហាបានយ៉ាងឆាប់រហ័ស។

កម្មវិធី ផ្សារ ឬ App អនឡាញនានាក៏អាចការពារមិនឱ្យមានបញ្ហាឱកាសនិយម និងការពារអ្នកដែលងាយរងគ្រោះ។ ឧទាហរណ៍ ក្រុមហ៊ុនផ្សារអនឡាញ Amazon បានព្រមានមិនឱ្យ “ម្ចាស់តូប” នៅលើផ្សារអនឡាញនេះ ដាក់លក់ផលិតផលម៉ាស់ក្នុងតម្លៃខ្ពស់ បើសិនករណីនេះកើតឡើង “ម្ចាស់តូប” នោះនឹងត្រូវបានគេបិទចោល។

នៅពេលសេដ្ឋកិច្ចត្រូវបានដាក់នៅលើអនឡាញ ការតាមដានប្រសិទ្ធភាពរបស់វា បានក្លាយជារឿងងាយស្រួល លឿន និងសុក្រឹតជាងមុន។ ទិន្នន័យនេះ អាចត្រូវបានប្រើប្រាស់ដើម្បីកែសម្រួលលើបញ្ហានានាដែលកើតមាន ព្រមទាំងអាចជួយកែលម្អសុក្រឹតភាពនៃការព្យាករ ជាហេតុធ្វើឱ្យមានទំនុកចិត្តទៅលើការរកស៊ី និងជំរុញឱ្យសេដ្ឋកិច្ចអាចងើបឡើងបានឆាប់រហ័ស។

និយាយមួយ ការដាំក្បាលចុះដល់កម្រិតអាក្រក់បំផុតនៃសេដ្ឋកិច្ចចិន គឺពិតជាគួរឱ្យខ្លាច និងមានហានិភ័យខ្ពស់។ ប៉ុន្តែ បញ្ហានេះមិនងាយនឹងកើតឡើងនោះឡើយ ព្រោះថា ប្រទេសចិន និងពិភពលោកបាន និងកំពុងតែចាត់វិធានការយ៉ាងខ្លាំងក្លា ដើម្បីទប់ទល់នឹងបញ្ហានេះ។ ក៏ប៉ុន្តែ អ្វីដែលគេសោកស្ដាយនោះ គឺការបាត់បង់ជីវិតមនុស្ស៕

ប្រភព៖ សារព័ត៌មានបរទេស

March 5, 2020

វេជ្ជបណ្ឌិតនៅ Wuhan ចែករំលែកបទពិសោធក្នុងការប្រយុទ្ធប្រឆាំងនឹង Covid-19

ការរៀបចំផែនការលម្អិតសម្រាប់ក្រុមគ្រូពេទ្យនីមួយៗ និងអ្នកជំងឺម្នាក់ៗ ការបណ្ដុះបណ្ដាលវិធីទប់ស្កាត់ការឆ្លងមេរោគសម្រាប់បុគ្គលិកពេទ្យជាដើម គឺជារឿងដែលអ្នកប្រយុទ្ធនឹងរោគរាតត្បាត Covid-19 នៅក្នុង “សមរភូមិ” ជួរមុខ បានដកបទពិសោធ ទុកជាមេរៀន។

ការថ្លែងរបស់វេជ្ជបណ្ឌិត Qiao Jie ដែលជាប្រធានមន្ទីរពេទ្យលេខ3នៃសកលវិទ្យាល័យទីក្រុងប៉េកាំង (Peking University Third Hospital) នៅក្នុងសិក្ខាសាលាមួយកាលពីថ្ងៃទី4មីនា នៅទីក្រុង Wuhan ប្រទេសចិន បានធ្វើឡើងដោយសង្ឃឹមថា បណ្ដាប្រទេសក្នុងពិភពលោក ដកបទពិសោធបានច្រើនពីអ្នកដែលបានប្រយុទ្ធផ្ទាល់ជាមួយនឹងរោគរាតត្បាតនេះ Covid-19។

លោកវេជ្ជបណ្ឌិត Qiao Jie បានឱ្យដឹងថា បុគ្គលិកពេទ្យស្ទើរតែទាំងអស់ ខ្វះបទពិសោធក្នុងការព្យាបាលអ្នកជំងឺដែលមានផ្ទុករោគឆ្លងទាក់ទិននឹងផ្លូវដង្ហើម។ ដូច្នេះ ការបណ្ដុះបណ្ដាលក្រុមបុគ្គលិកពេទ្យ គឺជាវិធីល្អបំផុតដើម្បីអាចជួយពួកគេយកឈ្នះលើ Covid-19 ចាប់ពីការថែទាំ ការព្យាបាលអ្នកជំងឺស្រាល រហូតដល់អ្នកជំងឺធ្ងន់ ទន្ទឺមនឹងនេះ ពួកគេនឹងជួយការពារខ្លួនឯងពីការឆ្លងមេរោគដ៏កាចសាហាវនេះ។

លោកវេជ្ជបណ្ឌិតសង្កត់ធ្ងន់ថា “សូម្បីតែការស្លៀកពាក់ឈុតការពារមេរោគ ក៏ទាមទារឱ្យមានការបណ្ដុះបណ្ដាលផងដែរ”។

បច្ចុប្បន្ន Covid-19 បានបង្ហាញវត្តមាននៅក្នុងប្រទេស និងដែនដីចំនួន 84 ក្នុងពិភពលោក បន្ទាប់ពីបានផ្ទុះឆ្លងរាលដាលនៅក្នុងទីក្រុង Wuhan កាលពីខែធ្នូ ឆ្នាំ2019 ហើយមកដល់ពេលនេះ វាបានបណ្ដាលឱ្យមានអ្នកឆ្លងមេរោគសរុបជាង 95,425នាក់ ក្នុងនោះមានអ្នកស្លាប់ជិត3,300នាក់ និង 53,600នាក់បានជាសះស្បើយពីជំងឺនេះ។

កំណើននៃករណីឆ្លងមេរោគ Covid-19 បន្ថែមនៅប្រទេសចិន មានការថយចុះបន្តិច ប៉ុន្តែវាបានកើនឡើងខ្លាំង និងលឿននៅតាមបណ្ដាប្រទេសផ្សារៗ ដូចជា កូរ៉េខាងត្បូង អ៊ីរ៉ង់ អ៊ីតាលី និងជប៉ុនជាដើម។

វេជ្ជបណ្ឌិត Du Bin មកពីមន្ទីរពេទ្យសហព័ន្ធវេជ្ជសាស្ត្រក្រុងប៉េកាំង (Peking Union Medical College Hospital) បានទៅកាន់ទីក្រុង Wuhan ដើម្បីជួយព្យាបាលអ្នកជំងឺដែលបានឆ្លងមេរោគកូរ៉ូណា Covid-19 តាំងពីពាក់កណ្ដាលខែមករា ឆ្នាំ2020។ លោកវេជ្ជបណ្ឌិត យល់ថា ដើម្បីទប់ស្កាត់ការឆ្លងរោគក្នុងមន្ទីរពេទ្យនានា កត្តាសំខាន់នោះគឺការរៀបផែនការ។

“អ្នកត្រូវតែរៀបផែនការសម្រាប់អ្នកទាំងឡាយណាដែលត្រូវបានសង្ស័យថា បានឆ្លងមេរោគកូរ៉ូណា ដែលកំពុងនៅក្នុងមជ្ឈមណ្ឌលដាច់ដោយឡែក ចំពោះអ្នកជំងឺគ្រុនក្ដៅ ទាំងអ្នកជំងឺក្នុងមន្ទីរពេទ្យ ទាំងអ្នកជំងឺក្រៅមន្ទីរពេទ្យ។ ក្រៅពីនេះ អ្នកត្រូវតែមានសមត្ថភាពក្នុងការធ្វើតេស្តរកមេរោគក្នុងបន្ទប់ពិសោធ ចំពោះអ្នកជំងឺដែលកំពុងត្រូវបានសង្ស័យ ហើយត្រូវបង្ខាំងឱ្យនៅដោយឡែកចំពោះអ្នកជំងឺដែលកំពុងត្រូវសង្ស័យ មុននឹងលទ្ធផលនៃការធ្វើតេស្តបានចេញជាផ្លូវការ”។ នេះគឺជាការឱ្យដឹងរបស់លោកវេជ្ជបណ្ឌិត Du Bin។

ដូច្នេះ ដើម្បីទប់ស្កាត់ការឆ្លងបន្ត ចូរត្រៀមខ្លួន និងរៀបផែនការឱ្យបានច្បាស់លាស់ជាមុន ហើយត្រូវបង្កើនការបណ្ដុះបណ្ដាលបុគ្គលិកផ្នែកសុខាភិបាល ដើម្បីជួយឱ្យពួកគេអាចទប់ទល់នឹងការឆ្លងរាលដាលនៃមេរោគនេះដោយសុវត្ថិភាព។ នេះគឺជាមេរៀនដែលដកពិសោធចេញពីសម្បុកមេរោគកូរ៉ូណា Covid-19 ដែលត្រូវបានក្រុមវេជ្ជបណ្ឌិតចិនណែនាំ ក៏ដូចជាព្រមានចំពោះសហគមន៍វេជ្ជសាស្ត្រពិភពលោក នៅក្នុងកិច្ចប្រជុំក្នុងថ្ងៃដដែលដូចបានរៀបរាប់ខាងលើ។

ក្រៅពីនេះ បើតាមលោក Du ផែនការទាំងឡាយត្រូវតែបង្កើតឡើងដើម្បីទប់ទល់នឹងរោគរាតត្បាត ជួយសម្រួលដល់អ្នកជំងឺដែលបានឆ្លងរោគ និងអ្នកដែលធ្លាប់បាននៅក្បែរអ្នកជំងឺ ព្រមទាំងផ្ដល់មូលដ្ឋានគ្រឹះដើម្បីអាចបង្ខាំងឱ្យនៅដោយឡែក ហើយតាមដាន ពិនិត្យ និងស្វែងរកអ្នកដែលត្រូវសង្ស័យថាបានឆ្លងមេរោគពីអ្នកកំពុងជាប់សង្ស័យ។

ពិសេសជាងនេះ ដើម្បីអាចគ្រប់គ្រងមេរោគនេះបាន គេត្រូវការប្រើប្រាស់រាល់ធនធានដែលមានក្នុងសង្គម ដោយមិនត្រឹមតែក្រុមវេជ្ជបណ្ឌិតជាន់ខ្ពស់ ឬបុគ្គលិកសុខាភិបាលជាន់ទាបនៅជួរមុខនោះទេ ប៉ុន្តែក៏ត្រូវតែមានការចូលរួមពីបណ្ដាបុគ្គលិកនានាក្នុងសង្គម និងកម្លាំងជួរក្រោយផងដែរ។

លោក Du បានសង្កត់ធ្ងន់ថា “យើងត្រូវការសាមគ្គីភាព និងជួយគ្នាទៅវិញទៅមក ចាប់ពីវេជ្ជបណ្ឌិត នគរបាល រហូតដល់អ្នកដឹកជញ្ជូន។ល។ នោះគឺជាវិធីតែមួយគត់ដើម្បីគ្រប់គ្រងរោគរាតត្បាត ដែលមិនត្រឹមតែនៅប្រទេសចិននោះទេ តែសម្រាប់ទូទាំងពិភពលោកផងដែរ។ នេះបើតាម SCMP។

វេជ្ជណ្ឌិត Li Hichao មកពីមន្ទីពេទ្យលេខ1នៃមហាវិទ្យាល័យប៉េងកាំង បានឱ្យដឹងថា ការបង្កើតឡើងនូវយន្តការមួយដើម្បីចែករំលែកចំណេះដឹង និងបទពិសោធដល់សាធារណជន គឺជាវិធីល្អមួយដើម្បីរួមចំណែកក្នុងការដោះស្រាយចំពោះករណីអ្នកជំងឺមានសភាពធ្ងន់ធ្ងរ ឬកំពុងប្រឈមនឹងគ្រោះថ្នាក់ដល់ជីវិត។

លោក Li Hichao បានបញ្ជាក់ថា “Covid-19 គឺជាជំងឺថ្មី។ ដូច្នេះ យើងបានបង្កើតឡើងនូវយន្តការពហុវិស័យដើម្បីបញ្ជូនចំណេះដឹង និងចែករំលែកបទពិសោធដល់មនុស្សគ្រប់រូប នៅក្នុងវិស័យផ្សេងៗគ្នា ក្នុងបំណងរាំងខ្ទប់រោគរាតត្បាតនេះ”៕

ប្រភព៖ សារព័ត៌មានបរទេស

March 5, 2020

Author: សឿន សំណាង