សឿន សំណាង - La Reine Media

“ស្នាមត្រានៃមហាវីរកម្ម លើផ្ទៃមុខដ៏ស្រស់ស្អាត នៃវីរបុរស-វីរនារី អ្នកប្រយុទ្ធតតាំងនឹងមេរោគ…

ពួកគេប្រៀបដូចជាអ្នកប្រយុទ្ធក្នុង “សង្គ្រាមមេរោគ” ដែលតស៊ូពុះពារប្រតិបត្តិតួនាទីក្នុងខ្សែត្រៀមមុខ កណ្ដាលក្រុមអ្នកជំងឺដែលផ្ទុកមេរោគកំណាច និងសាកសព ដោយមានម៉ាស់អនាម័យ និងឈុតការពារមេរោគ ជាខែលការពារខ្លួន ពីពួកសត្រូវដែលបំបាំងកាយនៅក្នុងអាកាសធាតុ…ជាសត្រូវដែលមើលមិនឃើញ។

ព័ត៌មានចាប់ពីថ្ងៃទី4 មករា រហូតមក មានបុគ្គលិកពេទ្យនៅក្នុងប្រទេសចិន ឆ្លងមេរោគកូរ៉ូណាប្រភេទថ្មី មិនតិចជាង 3,000នាក់ និងមានវេជ្ជបណ្ឌិត ដែលបានស្លាប់ មិនតិចជាង 10នាក់ឡើយ។

ពួកគេទាំងនោះ…គឺជាឪពុក ជាម្ដាយ ជាស្វាមី ជាភរិយា ជាកូន ជាមិត្តសំឡាញ់…ពួកគេបានប្រាប់ថា “ពួកយើង មិនមែនជាវីរបុរស-វីរនារីទេ ព្រោះនេះជាភារកិច្ចរបស់ពួកយើង”។

សារព័ត៌មានចិន នាន់ ហ្វាង ទូ ស៊ឺ (南方都市报) បានផលិតសារព័ត៌មានច្បាប់ពិសេស 1ច្បាប់ ឈ្មោះថា “ស្នាមត្រា” ដោយបានបង្ហាញរូបភាពឈុតនៃផ្ទៃមុខរបស់បណ្ដាគ្រូពេទ្យ និងគិលានុបដ្ឋាកដែលបានដោះម៉ាស់ការពារចេញ បង្ហាញឱ្យឃើញ “ស្នាមត្រានៃមហាវីរកម្ម”…ជាផ្ទៃមុខដ៏ស្រស់ស្អាត និងភាពតស៊ូដ៏មោះមុត។

យើងនាំគ្នាមកស្ដាប់ពាក្យសម្ដីដ៏សែនរំជួលចិត្តរបស់ពួកគេ ដូចតទៅ…៖

1.ជឹង តុងអ៊ឺ គិលានុបដ្ឋាក នៃមន្ទីពេទ្យរបស់មហាវិទ្យាល័យ ជីណាន់

“ពួកយើងមិនអាចថយបានទេ! និងមិនដែលគិតថា នឹងថយទៀតផង…”

2. ចូ យៀនភឹង គិលានុដ្ឋាក នៃមន្ទីរពេទ្យ ណាន់ហ្វាង

“ខ្ញុំនឹកសង្ឃឹមត្រឹមតែបានសាងជាគំរូដ៏ល្អដល់មនុស្សជំនាន់ក្រោយប៉ុណ្ណោះ
ជាគំរូមួយដ៏មានគុណតម្លៃ
សង្ឃឹមថា នៅពេលពួកគេជួបឧបសគ្គ ពួកគេនឹងមិនរួញរា…”

3. ទឹង យ៉ា គិលានុបដ្ឋាក នៃមន្ទីរពេទ្យប្រជាជន មណ្ឌល ក្វាងទុង

“ជាធម្មតា ពួកយើងនិយាយគ្នាតាម វីឆាត
ម៉ែនៅតែគិតថា ខ្ញុំកំពុងធ្វើការនៅក្វាងទុង
ហើយពុកក៏មិនបានប្រាប់ម៉ែដែរ…”

4. ខុង ភើយវឹន គិលានុបដ្ឋាក នៃមន្ទីពេទ្យប្រជាជន មណ្ឌល ក្វាងទុង

“វាមិនល្អមើលសោះ!
ឃើញស្លាកស្នាមទាំងអស់នេះហើយ នឹកអាណិតខ្លួនឯងណាស់…
ចាំឱ្យអ្វីៗគ្រប់យ៉ាងល្អប្រសើរឡើងវិញ នោះមនុស្សខ្ញុំដូចពីមុន នឹងត្រឡប់មកស្អាតម្ដង
ទៀត…”

5. វេជ្ជបណ្ឌិត ស៊ឺ ស៊ាង ផ្នែកអ្នកជំងឺធ្ងន់ នៃមន្ទីពេទ្យរបស់មហាវិទ្យាល័យ ចុងសាន់

“រឿងដែលខ្ញុំចង់ធ្វើខ្លាំងបំផុតនៅពេលនេះ គឺផឹកកូកាកូឡា 1ដប…ហ្នឹងគឺមានសេចក្ដីសុខបំផុត…
មុនហ្នឹង ខ្ញុំផឹកទឹកផ្លែឈើម្ដងកន្លះលិត្រ 1ក្អឹកអស់រលីង”

6. អ៊ូ ជីនលីង គិលានុបដ្ឋាក ប្រចាំមន្ទីពេទ្យរបស់មហាវិទ្យាល័យ ជីណាន់

“ពីដំបូងដែលឃើញអ្នកជំងឺដែលមើលទៅរាងអស់សង្ឃឹម
ពួកយើងមានអារម្មណ៍សោកសៅ និងអាណោចអធមខ្លាំងណាស់…
កាលពីសប្ដាហ៍មុន ពួកយើងស្លៀកឈុតការពារមេរោគពណ៌លឿង
លោកគ្រូពេទ្យ ពាក់វាត្រឹមតែ 1ម៉ោងក៏ហួសនឹងទ្រាំទៅហើយ
តែខ្ញុំទ្រាំស្លៀកវាបានដល់ទៅ 3ម៉ោង”

7. អ៊ូ ចាងមិង គិលានុបដ្ឋាក នៃមន្ទីរពេទ្យប្រជាជន ប្រចាំមណ្ឌល ក្វាងទុង

“មុនចាប់ផ្ដើមធ្វើការ ខ្ញុំថតវីដេអូខ្លួនឯង
ដកដង្ហើមធំហើយ…ស្រែក “ស៊ូឡើង! ស៊ូឡើង!”
ខ្ញុំត្រូវតែមើលថែទាំខ្លួនឯងឱ្យបាន ហើយនឹងត្រឡប់មកវិញព្រមជាមួយជ័យជម្នះ!”

8. វេជ្ជបណ្ឌិត សៀវ កួនហួ ផ្នែកប្រព័ន្ធដកដង្ហើម មន្ទីរពេទ្យ ណាន់ហ្វាង

“ការពិតទៅ ពេលនោះ ខ្ញុំមានអារម្មណ៍កង្វល់ខ្លាំងណាស់
ទើបប្រពន្ធខ្ញុំនិយាយឡើងថា
“បើបងឯងមិនទៅ វាលែងជាបងឯងហើយ…”

9. វេជ្ជបណ្ឌិត អ៊ី ហ៊ុយ ប្រចាំផ្នែកជំងឺប្រព័ន្ធដកដង្ហើម មន្ទីរពេទ្យ ចុងសាន់

“ម្សិលមិញ ជាថ្ងៃខួបកំណើតកូនស្រី
ខ្ញុំមានអារម្មណ៍សោកស្ដាយ
ដែលធ្វើឱ្យកូនអស់សង្ឃឹម…
ឆ្នាំនេះនាងអាយុ 4ឆ្នាំហើយ
រាល់ឆ្នាំ ខ្ញុំតែងនៅជាមួយនាង
សង្ឃឹមថា ពួកគេនឹងស្ងប់ចិត្ត និងមានសុវត្ថិភាព”

10. ចាង ជឺពួ គិលានុបដ្ឋាក មន្ទីរពេទ្យ ណាន់ហ្វាង

“សង្ឃឹមថា ស្ថានការណ៍ នឹងល្អប្រសើរឡើងឆាប់ៗនេះ
ចង់ត្រឡប់ទៅផ្ទះវិញ…
ខ្ញុំនៅខាងក្រៅយូរហើយ
យូររហូតដល់ភ្លេចពីអារម្មណ៍ពេលនៅផ្ទះមានប៉ាម៉ាក់មើលថែទាំ”៕

ប្រភព៖ សារព័ត៌មានបរទេស

March 9, 2020

អភិបាលតំបន់2រូបរបស់ប្រទេសអ៊ីតាលី បានឆ្លង Covid-19! អ៊ីតាលីក្លាយជាប្រទេសមានអ្នកឆ្លងវីរុសនេះច្រើនជាងគេលំដាប់ទី2 នៅក្នុង…

អភិបាលតំបន់ Piedmont លោក Alberto Cirio ត្រូវបានគេធ្វើតេស្តឃើញថា មានផ្ទុកវីរុសកូរ៉ូណា Covid-19 ក្លាយជាអ្នកដឹកនាំតំបន់ទី2 របស់អ៊ីតាលី ដែលបានឆ្លងមេរោគនេះ ក្នុងរយៈពេលត្រឹមតែ 24ម៉ោងកន្លងប៉ុណ្ណោះ។

តំបន់ Piedmont ស្ថិតនៅក្នុងភាគពាយព្យនៃប្រទេសអ៊ីតាលី ដោយមានទីក្រុងធំឈ្មោះ Turin។ នេះគឺជាតំបន់ដែលរងផលប៉ះពាល់ធ្ងន់បំផុតលំដាប់ទី4 ដោយសារវីរុស Covid-19 នៃប្រទេសនេះ។

នៅមុនករណីឆ្លងរោគរបស់អភិបាលតំបន់ Piedmont អភិបាលតំបន់ Lazio លោក Nicola Zingaretti អាយុ54ឆ្នាំ កាលពីថ្ងៃទី7មីនា ក៏បានប្រកាសថា បានឆ្លងរោគរាតត្បាត Covid-19 នេះដែរ ប៉ុន្តែ លោកឱ្យដឹងថា លោកនៅមានសុខភាពល្អនៅឡើយ។ លោក Zingaretti ក៏ជាមេដឹកនាំបក្សប្រជាធិបតេយ្យនៃប្រទេសអ៊ីតាលី ហើយបក្សនេះ បានរួមដៃជាមួយចលនាផ្កាយ5 (Five Star Movement) បង្កើតបានជារដ្ឋាភិបាលចម្រុះ ដឹកនាំប្រទេសអ៊ីតាលីផងដែរ។

លោក Zingaretti មេដឹកនាំបក្សប្រជាធិបតេយ្យ និងជាអភិបាលតំបន់ Lazio

ប្រទេសអ៊ីតាលី បានរកឃើញអ្នកផ្ទុកមេរោគកូរ៉ូណាចំនួន 1,492នាក់បន្ថែមទៀត ធ្វើឱ្យចំនួនអ្នកបានឆ្លងវីរុសនេះ កើនដល់ 7,375នាក់។ បច្ចុប្បន្ន ប្រទេសនេះ បានក្លាយជាសម្បុកមេរោគកូរ៉ូណាធំបំផុតទី2 ជំនួស “តំណែង” របស់កូរ៉េខាងត្បូង៕

ប្រភព៖ សារព័ត៌មានបរទេស

March 9, 2020

មនុស្សជិត 110,000នាក់ បានឆ្លងវីរុស Covid-19 នៅទូទាំងពិភពលោក ក្នុងនោះចំនួនអ្នកស្លាប់បានកើនដល់…

វីរុស Covid-19 បានឆ្លងរាលដាលទៅដល់ប្រទេស និងដែនដីចំនួន 104 នៅទូទាំងពិភពលោក បណ្ដាលឱ្យមនុស្សចំនួន 109,840នាក់បានឆ្លងជំងឺនេះ ក្នុងនោះមានអ្នកជំងឺ 3,805នាក់ បានបាត់បង់ជីវិត។

ចំនួនអ្នកឆ្លងវីរុសកូរ៉ូណា Covid-19 នៅប្រទេសអ៊ីតាលី និងអ៊ីរ៉ង់ នៅតែបន្តកើនឡើងយ៉ាងឆាប់រហ័ស។ អ៊ីតាលី បានរកឃើញអ្នកផ្ទុកមេរោគកូរ៉ូណាចំនួន 1,492នាក់បន្ថែមទៀត ធ្វើឱ្យចំនួនអ្នកបានឆ្លងវីរុសនេះ កើនដល់ 7,375នាក់ ខណៈដែលអ្នកបានឆ្លងជំងឺនេះនៅអ៊ីរ៉ង់ គឺ 6,566នាក់ កើន 743នាក់ បើធៀបនឹងមុននេះ1ថ្ងៃ។ ដូច្នេះ អ៊ីតាលី បានក្លាយជាសម្បុកមេរោគកូរ៉ូណាធំបំផុតទី2 ជំនួស “តំណែង” របស់កូរ៉េខាងត្បូង។

អ៊ីតាលី នៅតែជាប្រទេសដែលមានអ្នកស្លាប់ដោយសារ Covid-19 ច្រើនជាងគេលំដាប់ទី2 បន្ទាប់ពីប្រទេសចិន ដោយមានអ្នកស្លាប់366នាក់ កើន133ករណី ធៀបនឹងមុននេះ1ថ្ងៃ។ ប្រទេសនេះបានដាក់បម្រាមគោចរចំពោះពលរដ្ឋនៅក្នុងតំបន់សម្បុកមេរោគ Lombardy និងខេត្តចំនួន11 នៅក្នុងតំបន់ Emilia-Rmagna តំបន់ Veneto តំបន់ Piedmont និងតំបន់ Marche ដើម្បីទប់ស្កាត់ការឆ្លងរាលដាលនៃរោគរាតត្បាត Covid-19។

ប្រទេសកូរ៉េខាងត្បូងវិញ មានអ្នកឆ្លងរោគកូរ៉ូណានេះ ចំនួន7,314នាក់ គឺកើន272ករណី ធៀបនឹងមុននេះ1ថ្ងៃ។ ចំណែកអ្នកស្លាប់ដោយសារជំងឺរលាកសួតដែលបង្កឡើងដោយវីរុស Covid-19នេះ បានឡើងដល់50នាក់។

ប្រទេសចិន មិនទាន់បានប្រកាសឱ្យដឹងអំពីតួលេខថ្មីសម្រាប់ព្រឹកនេះនៅឡើយ ប៉ុន្តែ ព័ត៌មានចុងក្រោយបានឱ្យដឹងថា ប្រទេសនេះ មានអ្នកផ្ទុកមេរោគរាតត្បាតកូរ៉ូណាចំនួន 80,699នាក់ ក្នុងនោះ អ្នកជំងឺចំនួន 3,803នាក់បានបាត់បង់ជីវិត។

ប្រទេសបារាំង មានអ្នកផ្ទុកវីរុសកូរ៉ូណាចំនួន 1,126នាក់ ក្នុងនោះមានករណីស្លាប់ចំនួន19នាក់ ខណៈប្រទេសអាល្លឺម៉ង់មានអ្នកឆ្លងមេរោគនេះ ចំនួន 1,040នាក់។

ក្រៅពីបណ្ដាប្រទេសខាងលើ ក៏នៅមានប្រទេសជាច្រើន មានអ្នកផ្ទុកមេរោគកូរ៉ូណាច្រើនផងដែរ មានដូចជា ប្រទេសអេស្ប៉ាញ មានអ្នកផ្ទុកមេរោគកូរ៉ូណាចំនួន 673នាក់ ក្នុងនោះមានអ្នកស្លាប់ចំនួន 17នាក់។ សហរដ្ឋអាមេរិក មានអ្នកផ្ទុកមេរោគ 531នាក់ កើនឡើង96នាក់ បើធៀបនឹងម្សិលមិញ ក្នុងនោះដែរ អ្នកស្លាប់មានចំនួន21នាក់។

មេរោគរាតត្បាត Covid-19 បានចាប់ផ្ដើមផ្ទុះឆ្លងនៅតំបន់ Wuhan ចាប់ពីខែធ្នូ ឆ្នាំ2019 ហើយវាបានឆ្លងរាលដាលទៅប្រទេស និងដែនដីចំនួន 104 ក្នុងពិភពលោក ធ្វើឱ្យមនុស្សជិត 110,000នាក់ បានឆ្លងរោគនេះ ក្នុងនោះមានមនុស្ស 3,805នាក់បានស្លាប់ និងជិត 61,000នាក់ បានជាសះស្បើយពីជំងឺ៕

ប្រភព៖ សារព័ត៌មានបរទេស

March 9, 2020

អ្នកផ្ទុកវីរុស Covid-19 ម្នាក់នៅអាមេរិក បានចូលរួមក្នុងកិច្ចប្រជុំមួយដែលមានលោកក Trump និងលោក Mike Pence

មនុស្សម្នាក់ដែលត្រូវបានគេរកឃើញថាមានផ្ទុកមេរោគ Covid-19 បានចូលរួមសន្និសីទនយោបាយមួយនៅក្បែររដ្ឋធានី Washington ដែលមានការចូលរួមរបស់លោក Trump និងមន្ត្រីរដ្ឋាភិបាលសហរដ្ឋអាមេរិកជាច្រើនរូបផងដែរ។

នៅក្នុងកិច្ចប្រជុំដែលមានឈ្មោះថា “សន្និសីទសកម្មភាពនយោបាយអភិរក្សនិយម” ហៅកាត់ថា CPAC(Conservative Political Action Conference) ដែលមានវត្តមានរបស់អ្នកជំងឺកូរ៉ូណាម្នាក់ខាងលើនេះ និងត្រូវបានធ្វើឡើងនៅក្នុងរដ្ឋ Maryland នៃសហរដ្ឋអាមេរិក កាលពីថ្ងៃទី26 ដល់ថ្ងៃទី29 ខែមីនា ឆ្នាំ2020នោះ គេឃើញថាមានការចូលរួមរបស់មន្ត្រីជាន់ខ្ពស់អាមេរិកជាច្រើនរូប ដូចជាប្រធានាធិបតីអាមេរិក Donald Trump អនុប្រធានាធិបតីអាមេរិក Mike Pence។ល។

សហភាពអភិរក្សអាមេរិកាំង ACU (American Conservative Union) ដែលជាអ្នករៀបចំកិច្ចប្រជុំនេះ បានឱ្យដឹងថា “ម្នាក់នេះបានឆ្លងមេរោគ មុនពេលមកចូលរួមកិច្ចប្រជុំ។ មន្ទីរពេទ្យនៅ New Jersey បានបង្ខាំងអ្នកជំងឺនេះ និងបានធ្វើតេស្តរកមេរោគ ហើយក្រោយមក មជ្ឈមណ្ឌលគ្រប់គ្រង និងទប់ស្កាត់រោគឆ្លងរបស់សហរដ្ឋអាមេរិក បានបញ្ជាក់ថា មនុស្សនេះមានផ្ទុកមេរោគកូរ៉ូណាពិតមែន”។

“អ្នកជំងឺនេះមិនបាននៅក្បែរប្រធានាធិបតី ឬអនុប្រធានាធិបតី និងមិនបានចូលរួមក្នុងព្រឹត្តិការសំខាន់នៃកិច្ចប្រជុំនេះទេ” នេះបើតាម ACU។

សហរដ្ឋអាមេរិក បច្ចុប្បន្ន មានអ្នកជំងឺ Covid-19 ចំនួន 433នាក់ ក្នុងនោះមាន 17នាក់បានស្លាប់ ខណៈនៅទូទាំងពិភពលោក មានប្រទេស និងដែនដីចំនួន102 បានរាយការណ៍ថា មានអ្នកឆ្លងមេរោគនេះ ក្នុងនោះដែរចំនួនអ្នកបានឆ្លងមេរោគកូរ៉ូណាសរុប 106,165នាក់ ដោយបូករួមទាំងអ្នកដែលបានស្លាប់ចំនួន 3,594នាក់៕

ប្រភព៖ សារព័ត៌មានបរទេស

March 8, 2020

លទ្ធផលនៃការធ្វើតេស្តលើជនជាតិខ្មែរដែលសង្ស័យថាបានឆ្លង Covid-19 ត្រូវបានប្រកាសឱ្យដឹងហើយ

សមាជិកចំនួន3រូប (ប្រពន្ធ ប្អូន និងប្អូនថ្លៃ) របស់អ្នកជំងឺកូរ៉ូណាម្នាក់ ដែលជាបុរសវ័យ38ឆ្នាំនៅក្រុងសៀមរាប ដែលបានឆ្លងមេរោគពីជនជាតិជប៉ុន ពេលនេះ ក្រសួងសុខាភិបាលបានប្រកាសឱ្យដឹងថា ពួកគេមិនមានផ្ទុកមេរោគនេះនោះទេ។

នៅក្នុងកិច្ចប្រជុំបន្ទាន់ជាមួយមន្ត្រីជំនាញ និងវិស័យឯកជន ដើម្បីទប់ទល់នឹងវិបត្តិនានា បណ្តាលមកពីរោគរាតត្បាត Covid-19 លោក ទៀ សីហា បានបញ្ជាក់ថា ចំពោះអ្នកជាប់ពាក់ព័ន្ធផ្ទាល់ចំនួន4នាក់ ជាមួយជនជាតិជប៉ុនកន្លងមក គឺត្រូវបានធ្វើតេស្តឃើញវិជ្ជមានម្នាក់ គឺបុរសវ័យ38ឆ្នាំ ដែលត្រូវបានប្រកាសឱ្យដឹងកាលពីម្សិលមិញ។

ចំណែកមនុស្ស3នាក់ (ដែលជាប្រពន្ធ ប្អូន និងប្អូនថ្លៃរបស់អ្នកជំងឺកូរ៉ូណាដែលជាជនជាតិខ្មែរខាងលើ) ដែលជាប់ទាក់ទិនផ្ទាល់ជាមួយនឹងអ្នកជំងឺវ័យ38ឆ្នាំខាងលើ គឺមិនមានផ្ទុកមេរោគ Covid-19 នោះទេ។ នេះបើតាមប្រសាសន៍របស់លោក ទៀ សីហា អភិបាលខេត្តសៀមរាប។

គិតមកដល់ពេលនេះ កម្ពុជា បានរកឃើញអ្នកផ្ទុកមេរោគកូរ៉ូណាចំនួន2នាក់ ក្នុងនោះមានម្នាក់ជាជនជាតិចិន បានជាសះស្បើយរួចហើយ និងម្នាក់ទៀតជាជនជាតិខ្មែរ ដែលពេលនេះកំពុងទទួលការព្យាបាល និងដាក់ឱ្យនៅដាច់ដោយឡែក នៅឯមន្ទីរពេទ្យបង្អែកខេត្តសៀមរាប។

នៅទូទាំងពិភពលោក មានប្រទេស និងដែនដីចំនួន102 បានរាយការណ៍ថា មានអ្នកឆ្លងមេរោគនេះ ក្នុងនោះដែរចំនួនអ្នកបានឆ្លងមេរោគកូរ៉ូណាសរុប 106,165នាក់ ក្នុងនោះមាន 3,594នាក់បានបាត់បង់ជីវិត៕

March 8, 2020

បាក់រលំសណ្ឋាគារនៅចិន៖ 4នាក់បានស្លាប់ និង38នាក់ត្រូវបានជួយសង្គ្រោះ ខណៈ33នាក់កំពុង…

មនុស្សយ៉ាងតិច4នាក់ បានបាត់បង់ជីវិត និង33នាក់ផ្សេងទៀតជាប់នៅក្រោមគំនរបាក់បែក ក្នុងករណីបាក់រលំសណ្ឋាគារមួយដែលគេប្រើសម្រាប់ដាក់អ្នកជំងឺដែលបានឆ្លងមេរោគកូរ៉ូណា Covid-19 នៅឯខេត្ត Fujian ប្រទេសចិន កាលពីម្សិលមិញ។

“ក្រុមអ្នកសង្គ្រោះ បានជួយយកមនុស្ស38នាក់ដែលនៅមានជីវិត ចេញពីគំនរបាក់បែក ក្នុងនោះមាន5នាក់ស្ថិតក្នុងស្ថានភាពអាសន្នបំផុត។ នៅក្នុងអំឡុងអគារនេះត្រូវបាក់រលំ គឺមានមនុស្សចំនួន71នាក់កំពុងស្ថិតនៅក្នុងនោះ” នេះបើតាមការប្រកាសពីក្រសួងគ្រប់គ្រងគ្រោះអាសន្ននៃប្រទេសចិន។

សណ្ឋាគារកម្ពស់5ជាន់ ឈ្មោះ Xinjia នៅក្នុងខណ្ឌ Licheng ក្រុង Jinan ខេត្ត Fujian បានបាក់រលំកាលពីវេលាម៉ោងប្រហែល19:30ម្សិលមិញ។ សណ្ឋាគារនេះ ត្រូវបានអាជ្ញាធរប្រើប្រាស់ជាមជ្ឈមណ្ឌលសម្រាប់ដាក់អ្នកដែលត្រូវបានសង្ស័យថាមានផ្ទុកមេរោគកូរ៉ូណា Covid-19។

ក្រោយការបាក់រលំនៃអគារនេះបន្តិច ក្រុមអ្នកពន្លត់អគ្គិភ័យចំនួន 800នាក់ និងអ្នកស្ម័គ្រចិត្តចំនួន 200នាក់ បានទៅដល់កន្លែងកើតហេតុ។ ក្រៅពីនេះក៏មានអ្នកស្វែងរក និងអ្នកសង្គ្រោះចំនួន11ក្រុម រួមនឹងសុកជំនាញចំនួន7ក្បាល ក៏បានចូលរួមស្វែងរក និងជួយសង្គ្រោះជនរងគ្រោះក្នុងហេតុការណ៍នេះផងដែរ។

អាជ្ញាធរខេត្ត Fujian បានឱ្យដឹងថា គិតមកដល់ថ្ងៃទី6មីនា ខេត្តនេះ មានអ្នកផ្ទុកមេរោគកូរ៉ូណាសរុបចំនួន 296នាក់ និងអ្នកដែលត្រូវបានតាមដានសុខភាពជាពិសេសចំនួន 10,819នាក់។ នៅថ្ងៃទី8មីនានេះ ប្រទេសចិនបានប្រកាសថា មានអ្នកឆ្លងមេរោគកូរ៉ូណាថ្មីចំនួន44នាក់បន្ថែមទៀត និងអ្នកស្លាប់ថ្មីចំនួន27ករណី ដែលទាំងអស់សុទ្ធតែនៅក្នុងខេត្ត Hubei។ ប្រទេសនេះ បច្ចុប្បន្ន មានអ្នកផ្ទុកមេរោគកូរ៉ូណាសរុប 80,695នាក់ និងអ្នកស្លាប់បានឡើងដល់ 3,097នាក់។ នេះបើតាមសារព័ត៌មាន AFP។

Covid-19 បានឆ្លងរាលដាលនៅទីក្រុង Wuhan កាលពីចុងឆ្នាំ2019 ហើយមកដល់ពេលនេះ វាបានបង្ហាញខ្លួននៅក្នុងប្រទេស និងដែនដីចំនួន202 នៅទូទាំងពិភពលោក បណ្ដាលឱ្យមានអ្នកឆ្លងជំងឺរាតត្បាតនេះ ចំនួន 106,165នាក់ ក្នុងនោះមានអ្នកស្លាប់ជិត 3,600នាក់ និងអ្នកបានជាសះស្បើយ មានចំនួន59,963នាក់៕

ប្រភព៖ សារព័ត៌មានបរទេស

March 8, 2020

មេដឹកនាំបក្សប្រជាធិបតេយ្យនៅអ៊ីតាលី ឆ្លងវីរុស Covid-19 ស្របពេលមន្ត្រីជាន់ខ្ពស់មួយចំនួន ក៏ត្រូវបង្ខាំងខ្លួន…

Nicola Zingaretti ដែលជាមេដឹកនាំរបស់បក្សប្រជាធិបតេយ្យដែលស្ថិតក្នុងសម្ព័ន្ធភាពនៃក្រុមគ្រប់គ្រងអំណាចរបស់អ៊ីតាលី បានឱ្យដឹងថា លោកបានឆ្លងមេរោគ Covid-19 បន្ទាប់ពីបានធ្វើតេស្ត។

“លោកគ្រូពេទ្យប្រាប់ថា ខ្ញុំវិជ្ជមានជាមួយនឹង Covid-19។ ប៉ុន្តែ ខ្ញុំមានសុខភាពល្អ ហើយខ្ញុំនឹងនៅផ្ទះមួយរយៈពេល។ ខ្ញុំនឹងនៅតែបន្តតាមដានការងារដែលត្រូវធ្វើ” នេះគឺជាការអះអាងរបស់លោក Zingaretti អាយុ54ឆ្នាំ ជាប្រធានបក្សប្រជាធិបតេយ្យរបស់អ៊ីតាលី។

លោក Zingaretti ក៏បានឱ្យដឹងថា គ្រួសាររបស់លោក កំពុងតែអនុវត្តតាមការណែនាំរបស់ក្រុមគ្រូពេទ្យ ដើម្បីទប់ស្កាត់ការឆ្លងរាលដាលបន្ត។

មេដឹកនាំរូបនេះបន្តថា “ខ្ញុំធ្លាប់និយាយហើយថា ចូររួមគ្នាប្រយុទ្ធប្រឆាំងនឹងរោគរាតត្បាតនេះ។ ខ្ញុំនឹងធ្វើជាគំរូ និងអនុវត្តតាមការកំណត់របស់ក្រុមគ្រូពេទ្យ និងអ្នកវិទ្យាសាស្ត្រដែលបានលើកឡើង”។

លោក Zingaretti គឺជាមេដឹកនាំរបស់បក្សប្រជាធិបតេយ្យ (PD) តាំងពីឆ្នាំ2019។ គណបក្សនេះ បានរួមដៃជាមួយបក្ស ចលនាផ្កាយ5 (Five Star Movement) បង្កើតបានជារដ្ឋាភិបាលចម្រុះរបស់អ៊ីតាលី។ ករណីរបស់លោក Zingaretti បានធ្វើឱ្យមានការព្រួយបារម្ភខ្លាំងពីសំណាក់មន្ត្រីរដ្ឋាភិបាលចម្រុះនេះ ព្រោះថា មន្ត្រីជាន់ខ្ពស់ជាច្រើនធ្លាប់នៅក្បែរលោក មុនពេលលោកត្រូវបានគេរកឃើញថាមានផ្ទុក Covid-19។

ចំណែករដ្ឋមន្ត្រីក្រសួងឧស្សាហកម្មនៃប្រទេសអ៊ីតាលី លោក Stefano Patuanelli ក៏បានបង្ខាំងខ្លួនឯង បន្ទាប់ពីជំនួយការម្នាក់របស់លោកបានឆ្លងមេរោគកូរ៉ូណានេះ។ រីឯ Attilio Fontana ដែលជាអភិបាលតំបន់ Lombardy (ដែលជាតំបន់សម្បុកមេរោគមួយរបស់អ៊ីតាលី) ក៏បានធ្វើដូចគ្នានេះដែរ៕

ប្រភព៖ សារព័ត៌មានបរទេស

March 8, 2020

ជាង 106,000នាក់បានឆ្លងមេរោគ Covid-19 នៅទូទាំងពិភពលោក ក្នុងនោះមានអ្នកស្លាប់ចំនួន…

Covid-19 បានបង្ហាញខ្លួននៅក្នុងប្រទេស និងដែនដីចំនួន102 នៅទូទាំងពិភពលោក បានបណ្ដាលឱ្យមនុស្សជាង 106,011នាក់ឆ្លងមេរោគនេះ ក្នុងនោះវាក៏បានសម្លាប់មនុស្ស 3,570នាក់ផងដែរ។

តួលេខនៃករណីឆ្លងនៅអ៊ីតាលី និងអ៊ីរ៉ង់ បានកើនឡើងយ៉ាងរហ័សក្នុងប៉ុន្មានថ្ងៃមកនេះ។ បច្ចុប្បន្ន អ៊ីតាលី បានរកឃើញអ្នកផ្ទុកមេរោគបន្ថែម 1,247នាក់ ធ្វើឱ្យចំនួនអ្នកជំងឺរលាកសួតប្រភេទថ្មីនៅប្រទេសនេះ កើនដល់ 5,883នាក់ ខណៈដែលចំនួនអ្នកផ្ទុកមេរោគនេះនៅអ៊ីរ៉ង់គឺ 5,823នាក់។

អ៊ីតាលី នៅតែជាប្រទេសដែលមានអ្នកស្លាប់ដោយសារមេរោគ Covid-19 ច្រើនជាងគេបំផុតក្នុងពិភពលោក បន្ទាប់ពីប្រទេសចិន ដោយអ៊ីរ៉ង់មានអ្នកស្លាប់ 233នាក់ គឺកើន36ករណី បើធៀបនឹង1ថ្ងៃមុន។ ប្រទេសនេះ កំពុងត្រៀមខ្លួនសម្រាប់បិទមិនឱ្យចេញ-ចូលតំបន់ Lombardy ដើម្បីទប់ស្កាត់ការឆ្លងរាលដាលបន្ថែមនៃមេរោគកូរ៉ូណា។

ប្រទេសចិន មិនទាន់ប្រកាសឱ្យដឹងជាផ្លូវការនូវស្ថិតិស្ដីអំពីតួលេខអ្នកឆ្លងមេរោគកូរ៉ូណាកាលពីម្សិលមិញនៅឡើយ។

កូរ៉េខាងត្បូង បច្ចុប្បន្នគឺជាសម្បុកមេរោគកូរ៉ូណាធំទី2នៅក្នុងពិភពលោក ដោយមានអ្នកជំងឺជាង 7,041នាក់ កើន483ករណី បើធៀបនឹង1ថ្ងៃមុន និងមានអ្នកស្លាប់ចំនួន48នាក់។

អាល្លឺម៉ង់ និងបារាំង បានរកឃើញករណីថ្មីច្រើន ក្នុងនោះប្រទេសអាល្លឺម៉ង់ មានអ្នកជំងឺ 800នាក់ និងប្រទេសបារាំងមានអ្នកជងឺ 949នាក់។

ប្រទេស Bulgaria, Moldova, Paraguay, Maldives និង Malta បានរកឃើញករណីឆ្លងមេរោគដំបូងកាលពីថ្ងៃទី7មីនាផងដែរ។

Covid-19 បានចាប់ផ្ដើមឆ្លងរាលដាលនៅតំបន់ Wuhan កាលពីខែធ្នូ ឆ្នាំ2019 និងបានបង្ហាញខ្លួននៅក្នុងប្រទេស និងដែនដីចំនួន 102 នៅពាសពេញពិភពលោក ធ្វើឱ្យមនុស្សចំនួនជាង 106,000នាក់បានក្លាយជាអ្នកជំងឺ និងជិត 3,600បានស្លាប់ និង 58,635នាក់បានជាសះស្បើយ៕

ប្រភព៖ សារព័ត៌មានបរទេស

March 8, 2020

សហរដ្ឋអាមេរិក៖ អ្នកផ្ទុក Covid-19 2នាក់ ធ្លាប់បានចូលរួមកិច្ចប្រជុំជាមួយអនុប្រធានាធិបតី

មនុស្ស2នាក់ដែលត្រូវបានគេធ្វើតេស្តឃើញថា មានផ្ទុកមេរោគកូរ៉ូណា Covid-19 បន្ទាប់ពីបានចូលរួមកិច្ចប្រជុំមួយនៅឯទីក្រុង Washington ដែលមានការចូលរួមពីអនុប្រធានាធិតបីអាមេរិក លោក Mike Pence។

សន្និសីទគោលនយោបាយ ដែលត្រូវបានធ្វើឡើងដោយគណៈកម្មាធិការកិច្ចការសាធារណៈអាមេរិកាំងអ៊ីស្រាអែល ហៅកាត់ថា AIPAC (American Israel Public Affairs Committee) នៅទីក្រុង Washington ចាប់ពីថ្ងៃទី1 ដល់ទី3មីនា ក៏មានវត្តមានរបស់រដ្ឋមន្ត្រីការបរទេសអាមេរិក លោក Mike Pompeo និងសមាជិកសភារាប់សិបនាក់ទៀត ក្នុងនោះក៏មានមេដឹកនាំក្រុមសំឡេងភាគច្រើននៃសភាជាន់ខ្ពស់ លោក Mitch Mcconnell និងអតីតបេក្ខភាពប្រធានាធិបតីមកពីបក្សប្រជាធិបតេយ្យ លោក Mike Bloomberg ផងដែរ។

នៅក្នុងអ៊ីម៉េលដែលត្រូវបានផ្ញើទៅកាន់មនុស្សដែលបានចូលរួមសន្និសីទខាងលើ បូករួមទាំងក្រុមវាគ្មិន និងការិយាល័យសភាផង កាលពីថ្ងៃទី6 ខែមីនា AIPAC បានឱ្យដឹងថា មនុស្ស2នាក់ដែលបានឆ្លងមេរោគ Covid-19 នោះ បានធ្វើដំណើរពីទីក្រុង New York ទៅចូលរួមសន្និសីទនេះនៅឯទីក្រុង Washington។

រដ្ឋ New York បច្ចុប្បន្ន មានអ្នកផ្ទុកមេរោគកូរ៉ូណាចំនួនជាង 44នាក់ ដែលពួកគេភាគច្រើននៅក្នុងតំបន់ Westchecter។

អនុប្រធានាធិបតីអាមេរិក លោក Mike Pence គឺជាអ្នកដឹកនាំយុទ្ធនាការប្រយុទ្ធប្រឆាំងនឹងរោគរាតត្បាត Covid-19 របស់អាមេរិក។ ប្រទេសនេះ បច្ចុប្បន្ន មានអ្នកផ្ទុកមេរោគកូរ៉ូណាចំនួន 410នាក់ ក្នុងនោះ 15នាក់បានជាសះស្បើយ និង17នាក់បានបាត់បង់ជីវិត។ រដ្ឋ Washington California Florida និង Maryland បានប្រកាសភាពអាសន្នដោយសាររោគរាតត្បាត Covid-19 បានឆ្លងរាលដាលខ្លាំង៕

ប្រភព៖ សារព័ត៌មានបរទេស

March 8, 2020

សណ្ឋាគារសម្រាប់ដាក់អ្នកជំងឺ Covid-19 បាក់រលំសង្កត់មនុស្សយ៉ាងតិច70នាក់

សណ្ឋាគារមួយដែលមានកម្ពស់ 5ជាន់នៅប្រទេសចិន បានបាក់រលំ បណ្ដាលឱ្យមនុស្សយ៉ាងតិច70នាក់ជាប់នៅក្រោមគំនរបាក់បែក ដោយហេតុការណ៍នេះ បានកើតឡើងនៅវេលាម៉ោង7ល្ងាច ថ្ងៃទី7មីនា ឆ្នាំ2020។

អាជ្ញាធរក្នុងស្រុកលីងហៃបាននិយាយថា សណ្ឋាគារកម្ពស់ 5ជាន់ដែលស្ថិតនៅក្នុងខេត្ត Fujian ប្រទេសចិននេះ ត្រូវបានប្រើប្រាស់ជាកន្លែងសម្រាប់ដាក់អ្នកជំងឺ Covid-19ថ្មីឱ្យនៅដាច់ដោយឡែកពីគេ ដើម្បីការពារការឆ្លងរាលដាលនិងការតាមដានសុខភាព ក៏ដូចជាការព្យាបាលអ្នកជំងឺកូរ៉ូណា។

ប្រភពព័ត៌មានបានឱ្យដឹងថា មកដល់ពេលនេះ មិនទាន់មានរបាយការណ៍ណាមួយឱ្យដឹងអំពីចំនួនអ្នកស្លាប់ និងរងរបួសនៅឡើយ។ ក៏ប៉ុន្តែ មានរបាយការណ៍មួយឱ្យដឹងថា ជនរងគ្រោះចំនួន 23នាក់ត្រូវបានជួយសង្គ្រោះ។

ប្រភព៖ សារព័ត៌មានបរទេស

March 7, 2020

Author: សឿន សំណាង