សឿន សំណាង - La Reine Media

វៀតណាមរកឃើញអ្នកផ្ទុកវីរុស COVID-19 ម្នាក់ទៀតហើយ នៅក្នុងផ្សារទំនើប ធ្វើឱ្យអ្នកជំងឺសរុបឡើងដល់…

នៅមុននេះបន្តិច (11មីនា) វៀតណាមបានប្រកាសអំពីការរកឃើញអ្នកផ្ទុកមេរោគកូរ៉ូណា ករណីទី35 នៅប្រទេសនេះ។ អ្នកជំងឺនេះ គឺជាបុគ្គលិកនៅផ្សារទំនើប Supermarket electronics Green មួយកន្លែង នៅក្នុងខេត្តដាណាំង ភាគកណ្ដាលប្រទេសវៀតណាម និងជាអ្នកដែលធ្លាប់បានប៉ះពាល់ផ្ទាល់ជាមួយនឹងអ្នកទេសចរជនជាតិអង់គ្លេស2នាក់ដែលមានផ្ទុកវីរុស COVID-19។

ក្រសួងសុខាភិបាលវៀតណាម ប្រកាសថា អ្នកជំងឺកូរ៉ូណាទី35របស់វៀតណាម គឺជានារីជនជាតិវៀតណាមម្នាក់ មានអាយុ29ឆ្នាំ។ ចំណែកជនជាតិអង់គ្លេស2រូបដែលបានចម្លងវីរុស COVID-19 ទៅឱ្យនារីខាងលើនេះ គឺជាអ្នកជំងឺទី22 និង23 ដែលត្រូវបានរកឃើញនៅប្រទេសវៀតណាម។

បច្ចុប្បន្ន នារីដែលបានឆ្លងមេរោគកូរ៉ូណាខាងលើ កំពុងត្រូវបានព្យាបាល និងដាក់ឱ្យនៅដាច់ដោយឡែកក្នុងមន្ទីរពេទ្យដាណាំង។

គិតមកដល់ថ្ងៃត្រង់ (11មីនា)នេះ ប្រទេសវៀតណាម បានរកឃើញអ្នកផ្ទុកមេរោគកូរ៉ូណាចំនួន 35នាក់ ក្នុងនោះមាន 16នាក់បានជាសះស្បើយ ចំណែក19នាក់ផ្សេងទៀត កំពុងទទួលការព្យាបាល៕

ប្រភព៖ សារព័ត៌មានបរទេស

March 11, 2020

លទ្ធផលធ្វើតេស្តទៅលើម្ចាស់ម៉ូតូកង់3ឥណ្ឌា ដែលបានដឹកជនជាតិជប៉ុនម្នាក់ដែលផ្ទុក COVID-19 ត្រូវបានមន្ទីរសុខាភិបាលខេត្តសៀមរាបបញ្ចេញឱ្យដឹងហើយ

រដ្ឋបាលខេត្តសៀមរាបបានឱ្យដឹងថា មន្ទីរសុខាភិបាលខេត្តនេះ បានបញ្ចេញលទ្ធផលនៃការធ្វើតេស្តរកមេរោគទៅលើបុរសជាម្ចាស់ម៉ូតូកង់3ឥណ្ឌាម្នាក់ ដែលធ្លាប់បានដឹកជនជាតិជប៉ុនដែលមានផ្ទុកមេរោគកូរ៉ូណានេះហើយ ដោយបង្ហាញថា ម្ចាស់ម៉ូតូកង់3ម្នាក់នេះ មិនមានផ្ទុកមេរោគ COVID-19នោះទេ។

រដ្ឋបាលខេត្តសៀមរាប បានបន្តថា ពេលនេះ បុរសជាម្ចាស់ម៉ូតូកង់3ខាងលើ មិនមានរោគសញ្ញាអ្វីនោះដែរ ពោលគឺគាត់មានសុខភាពល្អធម្មតា។ បុរសនេះត្រូវបានដាក់ឱ្យនៅដាច់ដោយឡែករយៈពេល14ថ្ងៃ នៅក្នុងអគារជំងឺឆ្លងនៃមន្ទីរពេទ្យបង្អែកខេត្តសៀមរាប ដើម្បីបន្តតាមដានសុខភាព។

គិតមកដល់ថ្ងៃនេះ កម្ពុជាបានរកឃើញអ្នកផ្ទុកវីរុស COVID-19 ចំនួន3ករណីហើយ ដោយករណីទី1គឺជាជនជាតិចិន ដែលត្រូវបានរកឃើញនៅខេត្តព្រះសីហនុកាលពីថ្ងៃទី27មករា។ ចំណែកករណីទី2 គឺជាបុរសជនជាតិខ្មែរនៅខេត្តសៀមរាប ដែលជាមនុស្សម្នាក់ ធ្លាប់បានធ្វើការជាមួយជនជាតិជប៉ុនម្នាក់ដែលត្រូវបានគេរកឃើញថាមានផ្ទុកមេរោគកូរ៉ូណា នៅពេលគាត់ត្រឡប់ទៅដល់ប្រទេសជប៉ុន។ រីឯករណីទី3 ដែលត្រូវបានរកឃើញនៅខេត្តកំពង់ចាម គឺជាស្ដ្រីអ្នកទេសចរជនជាតិអង់គ្លេសម្នាក់ មានអាយុ65ឆ្នាំ ដែលធ្វើដំណើរតាមនាវាទេសចរណ៍មួយ មកពីប្រទេសវៀតណាម៕

March 11, 2020

Jack Ma ដណ្ដើមបានតំណែងអ្នកមានបំផុតនៅអាស៊ីវិញហើយ ខណៈអ្នកមានបំផុតទាំង500នាក់របស់ពិភពលោក បានបាត់បង់ប្រាក់ 238.5ពាន់លានដុល្លារអាមេរិក កាលពីម្សិលម៉្ងៃ

ក្រោយពីបានលក់មូលបត្រទូទាំងពិភពលោកកាលពីថ្ងៃទី9មីនាកន្លងទៅ ទ្រព្យសម្បត្តិរបស់មហាសេដ្ឋីឥណ្ឌា លោក Mukesh Ambani បានថយចុះមកនៅក្រោមស្ថានិក Alibaba គឺមហាសេដ្ឋីចិន លោក Jack Ma។

យោងតាម Bloomberg Billionaires Index លោក Mukesh Ambani បានបាត់បង់5.8ពាន់លានដុល្លារអាមេរិកកាលពីម្សិលម៉្ងៃ (9មីនា) ធ្វើឱ្យគាត់បាត់បង់តំណែងជាអ្នកមានបំផុតប្រចាំទ្វីបអាស៊ី ដោយធ្លាក់ទៅលើដៃមហាសេដ្ឋីចិន លោក Jack Ma ដែលជាស្ថានិកនៃក្រុមហ៊ុន Alibaba។ មហាសេដ្ឋីចិន Jack Ma បច្ចុប្បន្ន មានទ្រព្យ 44.5ពាន់លានដុល្លារអាមេរិក ច្រើនជាងមហាសេដ្ឋីឥណ្ឌា លោក Mukesk Ambani ប្រមាណជា 2.6ពាន់លានដុល្លារអាមេរិក។

មូលបត្រ Alibaba កាលពីថ្ងៃទី9មីនា បានធ្លាក់ថ្លៃ3.41% នៅលើផ្សារហ៊ុន New York បណ្ដាលឱ្យមហាសេដ្ឋី Jack Ma បាត់បង់ 1.06ពាន់លានដុល្លារអាមេរិក។ ក៏ប៉ុន្តែ តម្លៃមូលបត្រពហុវិស័យ Reliance Industries របស់មហាសេដ្ឋី Ambani បានដាំក្បាលចុះខ្លាំងជាងនេះទៅទៀត ពោលគឺធ្លាក់ថ្លៃដល់ទៅ12% (ទាបបំផុតរាប់ចាប់ពីឆ្នាំ2009មកនេះ)។ ចាប់ពីដើមឆ្នាំ តម្លៃមូលបត្រ Reliance Industries បានថយចុះសរុបចំនួន 26%។

ចំណែក Alibaba វិញ ថ្វីបើរោគរាតត្បាត COVID-19 កំពុងតែ “ធ្វើទុក្ខ” ទៅលើវិស័យជំនួញមួយចំនួនរបស់ក្រុមហ៊ុននេះ ប៉ុន្តែ COVID-19 ក៏បានជួយជំរុញឱ្យតម្រូវការដែលទាក់ទិននឹងបច្ចេកវិទ្យាចល័ត មានកំណើនខ្ពស់ ដែលបាន និងកំពុងហុចផលប្រយោជន៍ខ្លះដល់មហាសេដ្ឋីចិន លោក Jack Ma។

តម្លៃមូលបត្រទូទាំងពិភពលោក កាលពីម្សិលម៉្ងៃ(9មីនា) បានធ្លាក់ចុះខ្លាំង ដោយសារតម្លៃប្រេងបានដាំក្បាលចុះ ហើយអ្នកវិនិយោគមានការព្រួយបារម្ភអំពីរោគរាតត្បាត COVID-19។ កត្តានេះ ក៏បានធ្វើឱ្យមានការសង្ស័យថា Reliance Industries មិនអាចសងអស់បំណុលនៅមុនដំណាច់ឆ្នាំ2021 ដូចដែលមហាសេដ្ឋីឥណ្ឌា Ambani បានសន្យា។

ភាពច្របូកច្របល់នៅលើផ្សារហ៊ុនកាលពីម្សិលម៉្ងៃ ក៏បានធ្វើឱ្យអ្នកមានមួយចំនួនក្នុងពិភពលោក ត្រូវខាតបង់រាប់ពាន់លានដុល្លារអាមេរិក។ ទ្រព្យរបស់មហាសេដ្ឋីប្រេង Harold Hamm បានថយចុះរហូតដល់ពាក់កណ្ដាល នៅសល់ត្រឹមតែ 2.4ពាន់លានដុល្លារ។ ចំណែក Jeff Hildebrand ក៏បាត់បង់ 3ពាន់លានដុល្លារអាមេរិក។ សរុបមក អ្នកមានបំផុតទាំង500នាក់របស់ពិភពលោក បានបាត់បង់ប្រាក់ 238.5ពាន់លានដុល្លារអាមេរិក នៅលើផ្សារហ៊ុន កាលពីម្សិលម៉្ងៃ ដែលការខាតបង់នេះ ខ្ពស់ជាងពេលណាៗទាំងអស់ រាប់ចាប់ពីឆ្នាំ2016៕

ប្រភព៖ សារព័ត៌មានបរទេស

March 11, 2020

បុគ្គលិកម្នាក់របស់ Apple បានក្លាយជាអ្នកមានផ្ទុក COVID-19 ដំបូងគេបង្អស់នៅក្នុងក្រុមហ៊ុន

បុគ្គលិកម្នាក់របស់ក្រុមហ៊ុនបច្ចេកវិទ្យា “ខ្នាតយក្ស” Apple នៅឯទីក្រុង Cork ក្នុងប្រទេសអៀរឡង់ ត្រូវបានរកឃើញថា មានផ្ទុកវីរុស COVID-19 ហើយបានក្លាយជាអ្នកឆ្លងមេរោគកូរ៉ូណាដំបូងគេក្នុងក្រុមហ៊ុននេះ។

“ម្នាក់ក្នុងចំណោមបុគ្គលិករបស់យើង ដែលធ្វើការនៅក្នុងទីក្រុង Cork ត្រូវបានរកឃើញថាមានផ្ទុក COVID-19។ យើងកំពុងសហការជាមួយក្រុមមន្ត្រីសុខាភិបាលមូលដ្ឋាន ដើម្បីដោះស្រាយបញ្ហានេះ។ ចំណែកអ្នកជំងឺវិញ កំពុងបង្ខាំងខ្លួនឯងនៅឯផ្ទះរបស់គាត់” នេះបើតាមការឱ្យដឹងពីអ្នកនាំពាក្យនៃក្រុមហ៊ុន Apple ដែលចុះផ្សាយដោយសារព័ត៌មាន CNBC។

Apple យល់ថា ការឆ្លងរោគពីអ្នកជំងឺនេះ គឺមានហានិភ័យទាប។ យ៉ាងណាក៏ដោយ ដើម្បីទប់ស្កាត់ការឆ្លងរាលដាល ក្រុមហ៊ុននេះក៏បានស្នើឱ្យសមាជិកមួយចំនួនក្នុងក្រុមដែលមានជាប់ទាក់ទិននឹងអ្នកជំងឺខាងលើ ធ្វើការនៅឯផ្ទះ ហើយក្រុមហ៊ុន Apple ក៏កំពុងតែធ្វើការជាមួយរដ្ឋបាលសុវត្ថិភាព និងសុខភាពដើម្បីវាយតម្លៃស្ថានភាពនៃករណីនេះ។

តំណាងក្រុមហ៊ុន Apple បានអះអាងថា “យើងកំពុងអនុវត្តវិធានការទប់ស្កាត់ចាំបាច់នានា ទៅតាមការណែនាំរបស់ក្រសួងសុខាភិបាល”។

មុននេះ Apple ក៏បានណែនាំឱ្យបុគ្គលិករបស់ខ្លួន ធ្វើការនៅឯផ្ទះ “បើសិនមានលក្ខខណ្ឌអំណោយផល” ទន្ទឹមនឹងនេះ ក្រុមហ៊ុនក៏កំពុងតែ “កាត់បន្ថយចំនួនមនុស្សនៅក្នុងការិយាល័យ” និង “ធានាចំពោះបុគ្គលិកដែលមកធ្វើការក្នុងការិយាល័យ ដើម្បីឱ្យពួកគេទទួលបានសុវត្ថិភាព និងស្ងប់ចិត្តក្នុងពេលធ្វើការ” ដើម្បីកាត់បន្ថយការឆ្លងរាលដាលនៃវីរុស COVID-19។

យោងតាមស្ថិតិនាថ្ងៃទី11មីនា វីរុសកូរ៉ូណា COVID-19 បានបង្ហាញខ្លួននៅក្នុងប្រទេស និងដែនដីចំនួន119 នៅទូទាំងពិភពលោក បណ្ដាលឱ្យមនុស្សចំនួន 119,027នាក់ បានឆ្លងជំងឺនេះ ក្នុងនោះមាន 4.284នាក់បានបាត់បង់ជីវិត។ ដោយឡែកនៅអៀរឡង់ មានអ្នកជំងឺកូរ៉ូណាចំនួន 34នាក់ ប៉ុន្តែ មិនទាន់មានករណីស្លាប់ដោយសារវីរុសនេះនៅឡើយ៕

ប្រភព៖ សារព័ត៌មានបរទេស

March 11, 2020

ស៊ី ជីនភីង អាឡោះអាល័យអ្នកស្លាប់ និងបុគ្គលិកជួរមុខ ដែលពលីជីវិតតស៊ូនឹងវីរុសCOVID-19

លោក ស៊ី ជីនភីង ប្រធានាធិបតីនៃប្រទេសចិន បានសម្ដែងក្ដីអាឡោះអាល័យចំពោះជនជាតិចិន និងបុគ្គលិកពេទ្យដែលបានស្លាប់បាត់បង់ជីវិតពីហេតុការណ៍ឆ្លងរាលដាលរបស់វីរុសកូរ៉ូណាប្រភេទថ្មី ឬ COVID-19។

កាលពីថ្ងៃអង្គារ ទី10 ម្សិលមិញ លោក ស៊ី ជីនភីង បានសម្ដែងការសោកស្ដាយចំពោះមុខជនជាតិចិនដែលបានស្លាប់ដោយសារតែហេតុការណ៍ឆ្លងរាតត្បាតរបស់មេរោគវីរុសកូរ៉ូណាប្រភេទថ្មី និងបានសម្ដែងការសោកស្ដាយចំពោះការបាត់បង់ធនធានមនុស្សសំខាន់ៗក្នុងខ្សែត្រៀមមុខ ដែលបានពលីជីវិតក្នុងអំឡុងពេលប្រយុទ្ធប្រឆាំងនឹងជំងឺរាតត្បាតក្នុងគ្រានេះ។

លោក ស៊ី ជីនភីង បានធ្វើដំណើរទៅកាន់ទីក្រុងវូហានកាលពីថ្ងៃអង្គារ ទី10 មីនា(ម្សិលមិញ) ដើម្បីចុះទៅដល់ទីតាំងត្រួតពិនិត្យការដំណើរការការពារ និងគ្រប់គ្រងជំងឺឆ្លងមេរោគ COVID-19។

ទាំងអស់នេះ លោកប្រធានាធិបតី ស៊ី នៅបានសម្ដែងការគោរពរាប់អានចំពោះបុគ្គលិកពេទ្យ កងយោធា អាជ្ញាធរទីប្រជុំជន ប៉ូលិស បុគ្គលិកស្ម័គ្រចិត្ត និងប្រជាជនគ្រប់ទិសទី ដែលបានចូលរួមតស៊ូប្រឆាំងនឹងមេរោគ COVID-19 នៅក្នុងសមរភូមិជួរមុខ។

ក្រៅពីនេះ លោកប្រធានាធិបតីចិន នៅបានសម្ដែងនូវការយល់ចិត្ត និងអាណិតអាសូរអ្នកជំងឺដែលកំពុងតស៊ូជាមួយជំងឺរាតត្បាត និងសាច់ញាតិរបស់ពួកគេ រួមទាំងសម្ដែងការយល់ចិត្ត អាណិតអាសូរ និងចូលរួមរំលែកទុក្ខ ដល់ក្រុមគ្រួសាររបស់អ្នកស្លាប់ដោយសារជំងឺរាតត្បាត និងអ្នកដែលស្លាប់ក្នុងខណៈប្រតិបត្តិតួនាទីទៀតផង។

តាមចំនួននៅក្នុងរបាយការណ៍នៅថ្ងៃនេះ(ពុធទី11មីនា) នៅក្នុងប្រទេសចិនដីគោក មានអ្នកជំងឺដែលបានអះអាងលទ្ធផលថា មានផ្ទុកមេរោគទាំងអស់ 80,955នាក់(ម្សិលមិញ 80,932នាក់) និងមានអ្នកស្លាប់ 3,162នាក់(ម្សិលមិញ 3,140)៕

ប្រភព៖ សារព័ត៌មានបរទេស

March 11, 2020

មនុស្សជិត 119,000នាក់បានឆ្លង COVID-19 នៅទូទាំងពិភពលោក ខណៈអនុរដ្ឋមន្ត្រីសុខាភិបាលអង់គ្លេស ក៏បានឆ្លងវីរុសនេះដែរ

COVID-19 បានបង្ហាញខ្លួននៅក្នុងប្រទេស និងដែនដីចំនួន 119 នៅទូទាំងពិភពលោក បណ្ដាលឱ្យមនុស្សជិត 119,000នាក់ បានឆ្លងវីរុសនេះ និងជាង 4,200នាក់ បានបាត់បង់ជីវិត ក្នុងនោះចំនួនអ្នកស្លាប់នៅអ៊ីតាលី បន្តកើនឡើងខ្ពស់។

តួលេខនៃករណីឆ្លង និងស្លាប់បន្ថែម ដោយសារវីរុសកូរ៉ូណា នៅប្រទេសអ៊ីតាលី នៅតែបន្តកើនឡើង ដោយប្រទេសនេះ បានរកឃើញអ្នកផ្ទុកមេរោគចំនួន 977ករណីបន្ថែមទៀត ធ្វើឱ្យចំនួនអ្នកឆ្លងវីរុសកូរ៉ូណាសរុបឡើងដល់ 10.149នាក់ ខ្ពស់ជាងគេលំដាប់ទី2ក្នុងពិភពលោក បន្ទាប់ពីប្រទេសចិន។

ប្រទេសអ៊ីតាលី ថ្ងៃនេះបានប្រកាសថា ចំនួនអ្នកស្លាប់បន្ថែមដោយសារកូរ៉ូណា គឺមានចំនួន168នាក់ ធ្វើឱ្យចំនួនអ្នកស្លាប់សរុបឡើងដល់ 631នាក់ ឈរលេខ2 បន្ទាប់ពីប្រទេសចិន។

ចំនួនអ្នកបានឆ្លងកូរ៉ូណានៅប្រទេសអ៊ីរ៉ង់ គឺ 8,042នាក់ កើន 881ករណី។ ជាមួយនឹងចំនួនអ្នកស្លាប់បន្ថែម54ករណី អ្នកស្លាប់សរុបនៅអ៊ីរ៉ង់កើនដល់ 291នាក់។

ប្រទេសកូរ៉េខាងត្បូង ចំនួនអ្នកឆ្លងកូរ៉ូណាថ្មីបន្ថែម 35នាក់ អ្នកបានឆ្លងសរុប 7,513នាក់ ក្នុងនោះមាន 58នាក់បានបាត់បង់ជីវិត (ប្រទេសនេះ តែងប្រកាសលទ្ធផលនៃការធ្វើតេស្តអ្នកជំងឺ 2លើកក្នុង1ថ្ងៃ គឺពេលព្រឹក និងពេលរសៀល)។

ប្រទេសចិន ចំនួនអ្នកឆ្លងកូរ៉ូណាថ្មីបន្ថែម 24នាក់ អ្នកបានឆ្លងសរុប 80,778នាក់ ក្នុងនោះមានអ្នកស្លាប់បន្ថែម22នាក់ ចំណែកអ្នកស្លាប់ សរុបគឺ 3,158នាក់។

ប្រទេសជប៉ុន ចំនួនអ្នកឆ្លងកូរ៉ូណាថ្មីបន្ថែម 57នាក់ អ្នកបានឆ្លងសរុប 587នាក់ ក្នុងនោះអ្នកស្លាប់សរុប មានចំនួន10នាក់។

ប្រទេសបារាំង និងអេស្ប៉ាញក៏បានរកឃើញករណីឆ្លងថ្មី ក្នុងនោះបារាំងរកឃើញបន្ថែម 372ករណី និងអេស្ប៉ាញ 464ករណី។ ចំនួនអ្នកឆ្លងមេរោគនៅប្រទេសបារាំង សរុប 1,784ករណី ចំណែកអេស្ប៉ាញគឺ 1,695ករណី រីឯចំនួនអ្នកស្លាប់នៅប្រទេសបារាំង និងអេស្ប៉ាញ គឺ 33 និង35ករណី។

ប្រទេសអាល្លឺម៉ង់ បានរកឃើញអ្នកជំងឺកូរ៉ូណាសរុប 1,565នាក់ កើន 341ករណី បើធៀបនឹងម្សិលមិញ ចំណែកចំនួនអ្នកស្លាប់គឺនៅដដែល (2ករណី)។

ប្រទេសអង់គ្លេស បានរកឃើញអ្នកឆ្លងថ្មីបន្ថែម 62ករណី ធ្វើឱ្យអ្នកជំងឺសរុប ឡើងដល់383នាក់ ក្នុងនោះមាន6នាក់បានបាត់បង់ជីវិត។ អនុរដ្ឋមន្ត្រីក្រសួងសុខាភិបាលអង់គ្លេស Nadine Dorries ក៏បានឆ្លងវីរុស COVID-19 នេះដែរ។

សហរដ្ឋអាមេរិក មានអ្នកឆ្លងមេរោគកូរ៉ូណាសរុប 975នាក់ កើន271នាក់ បើធៀបនឹងម្សិលមិញ ចំណែកអ្នកស្លាប់មានចំនួន30នាក់ កើន4ករណី។

ប្រទេសទួរគី ចាម៉ៃកា ប៉ាណាម៉ា ម៉ុងហ្គោលី និងបូលីវី គឺជាបណ្ដាប្រទេសដែលបានរកឃើញករណីឆ្លង COVID-19 ដំបូង កាលពីម្សិលមិញ និងព្រឹកនេះ។

ពិភពលោក បច្ចុប្បន្ន មានអ្នកឆ្លងមេរោគសរុបចំនួន 118,934នាក់ ក្នុងនោះមាន 4,293នាក់ស្លាប់ និង 66,576នាក់បានជាសះស្បើយ៕

ប្រភព៖ សារព័ត៌មានបរទេស

March 11, 2020

មនុស្ស27នាក់បានស្លាប់ ដោយសារ “ផឹកស្រាកម្ចាត់វីរុស COVID-19”

យ៉ាងហោចណាស់ មានមនុស្ស27នាក់បានបាត់បង់ជីវិត ដោយសារពុលស្រានៅប្រទេសអ៊ីរ៉ង់ ព្រោះតែយល់ថា ការផឹកស្រាគឺជាវិធីមួយដែលអាចកម្ចាត់រោគរាតត្បាត COVID-19បាន។

“ពលរដ្ឋមួយចំនួននៅក្នងតំបន់ Ahwaz បានឮគេនិយាយតៗគ្នាថា ផឹកស្រាអាចជួយសម្លាប់មេរោគកូរ៉ូណាបាន ទើបពួកគេផឹកស្រា ដើម្បីទប់ស្កាត់មេរោគនេះ”។ នេះបើតាមសារព័ត៌មាន Mehr (Mehr News Agency) ដែលបានដកស្រង់សម្ដីរបស់លោក Ali Ehsanpour អ្នកនាំពាក្យរបស់សកលវិទ្យាល័យវេជ្ជសាស្ត្រ Ahwaz ដែលបានចុះផ្សាយកាលពីថ្ងៃទី9មីនាកន្លងទៅ។

ក្នុងពេលដែលរោគរាតត្បាត COVD-19 បានកើតឡើងនៅប្រទេសអ៊ីរ៉ង់ នៅលើបណ្ដាញសង្គមក៏មានព័ត៌មាន និងដំណឹងចចាមអារ៉ាមជាច្រើនលេចឡើងព្រោងព្រាត ស្ដីអំពីវិធីព្យាបាលចម្លែកៗ ដើម្បីទប់ស្កាត់ ឬប្រឆាំងនឹងវីរុសកូរ៉ូណានេះ ក្នុងនោះក៏មានវិធីផឹកស្រាដើម្បីសម្លាប់មេរោគផងដែរ។

ប៉ុន្តែ ដោយសារតែអ៊ីរ៉ង់គឺជាប្រទេសដែលហាមមិនឱ្យផឹកស្រា យ៉ាងនេះហើយ មនុស្សមួយចំនួនក៏បានផឹកស្រាដែលគេផលិតសម្រាប់តែការងារអនាម័យ ដូច្នេះពួកគេក៏បានពុលស្រានោះ។ លទ្ធផល គឺមានមនុស្សយ៉ាងហោច27នាក់នៅក្នុងខេត្ត Khuzestan និង Alborz បានបាត់បង់ជីវិត ព្រោះតែផឹកស្រាការពារ COVID-19។

សារព័ត៌មាន ABC បានចុះផ្សាយថា ខេត្ត Khuzestan បច្ចុប្បន្ន មានអ្នកផ្ទុកមេរោគ COVID-19 ត្រឹមតែ73នាក់ប៉ុណ្ណោះ ប៉ុន្តែ ចំនួនអ្នកពុលស្រាដែលត្រូវបញ្ជូនចូលមន្ទីរពេទ្យសង្គ្រោះបន្ទាន់វិញ បានកើនឡើងដល់ 218ករណី។ ចំណែកខេត្ត Alborz ចំនួនករណីស្លាប់ដោយសារពុលស្រា មានចំនួន7នាក់។

អ៊ីរ៉ង់គឺជាប្រទេសដែលកំពុងរងគ្រោះខ្លាំងបំផុតនៅមជ្ឈិមបូពា៌ ដោយសាររោគរាតត្បាត COVID-19។ មកដល់ពេលនេះ ប្រទេសនេះ មានអ្នកស្លាប់ដោយសារមេរោគកូរ៉ូណា យ៉ាងតិច291នាក់ និង8,042នាក់ បានឆ្លងមេរោគនេះ។

នៅទូទាំងពិភពលោក បច្ចុប្បន្ន មានមនុស្សចំនួន 115,965នាក់ បានឆ្លងវីរុសកូរ៉ូណា ក្នុងនោះមានអ្នកស្លាប់ចំនួន 4,087នាក់៕

ប្រភព៖ សារព័ត៌មានបរទេស

March 10, 2020

ជាលើកដំបូងហើយ ដែលអ្នកវិទ្យាសាស្ត្របានរកឃើញផ្កាយមួយ មានរូបរាងដូចតំណក់ទឹក

ដោយសារតែកម្លាំងទំនាញក្នុងប្រព័ន្ធផ្កាយភ្លោះនេះ ផ្កាយ HD74423 ក្នុងកាឡាក់ស៊ី មីលគីវ៉េ (Milky Way Galaxy) របស់យើង ត្រូវបានទាញឱ្យប្រែរូបនៅតំបន់អឌ្ឍគោលដែលនៅទល់មុខកូនផ្កាយរបស់វា។

ការរកឃើញនេះត្រូវបានធ្វើឡើងដោយក្រុមតារាវិទូអន្តរជាតិ ដែលដឹកនាំដោយលោកបណ្ឌិត Simon Murphy មកពីមហាវិទ្យាល័យ Dydney របស់អូស្ត្រាលី ដោយប្រើប្រាស់កែវយឹតអវកាស TESS របស់អង្គការ NASA។ ផ្កាយខាងលើនេះ មានទម្ងន់ធ្ងន់ជាងព្រះអាទិត្យរបស់យើង ជិត 1,7ដង ហើយវាមានចម្ងាយពីភពផែនដី ប្រមាណជា 1,500ឆ្នាំពន្លឺ (1ឆ្នាំពន្លឺ មានប្រវែង 9,46 លានលានគីឡូម៉ែត្រ)។

“ផ្កាយបែបនេះតែងតែសម្បូរទៅដោយលោហធាតុ ប៉ុន្តែ HD74423 គឺផ្ទុយពីនេះ ធ្វើឱ្យវាក្លាយជាផ្កាយដែលក្ដៅកម្របានជួប” នេះបើតាមលោកបណ្ឌិត Murphy។

HD74423 ត្រូវបានគេចាត់ចូលក្នុងប្រភេទផ្កាយ “ចង្វាក់បេះដូង” (ជាពាក្យដែលសំដៅទៅលើផ្កាយដែលមានពន្លឺប្ដូរទៅតាមវដ្ដ) ដែលបង្កឡើងដោយកម្លាំងទំនាញរបស់ផ្កាយ1ទៀតដែលនៅក្បែរវា។ នៅក្នុងប្រព័ន្ធផ្កាយភ្លោះ នៅពេលផ្កាយ1ដែលមានគន្លងគោចររាង elip (រាងពងក្រពើ) ទៅជិតផ្កាយ1ទៀត ដែលជាដៃគូរបស់វា នោះកម្លាំងទំនាញនឹងទាញវាឱ្យប្រែរាង ពីមូលទៅជាពងក្រពើ ធ្វើឱ្យពន្លឺរបស់វាត្រូវប្រែប្រួល។ ផ្កាយដែលមានរូបរាងដូចពងក្រពើដែលត្រូវបានរកឃើញកន្លងមក សុទ្ធតែប្រែរូបរាងនៅត្រង់តំបន់អឌ្ឍគោលទាំង2។ ក៏ប៉ុន្តែ ផ្កាយ HD74423 គឺជាផ្កាយដំបូងដែលត្រូវគេរកឃើញថា ប្រែរូបតែមួយចំហៀងប៉ុណ្ណោះ ធ្វើឱ្យវាមានរូបរាងដូចតំណក់ទឹក។ នេះបើតាមសារព័ត៌មាន CNN។

ក្នុងករណីរបស់ផ្កាយ HD74423 ការដែលរូបរាងរបស់វាខុសប្រក្រតីបែបនេះ គឺកើតឡើងដោយសារផ្កាយតូចក្រហមដែលស្ថិតក្នុងប្រព័ន្ធជាមួយគ្នា។ ផ្កាយទាំង2នេះ វិលជុំវិញគ្នាយ៉ាងលឿន ដោយ1ជុំ ពួកវាប្រើពេលមិនដល់2ថ្ងៃផង។ កត្តានេះក៏ជួយឱ្យផ្កាយធំ ត្រូវប្រែរូបរាងទៅជារូបតំណក់ទឹក។ ទិន្នន័យលម្អិតអំពីប្រព័ន្ធផ្កាយនេះ ត្រូវបានចុះផ្សាយនៅលើទស្សនាវដ្ដី Nature Astronomy កាលពីថ្ងៃទី9មីនាកន្លងទៅ៕

ប្រភព៖ សារព័ត៌មានបរទេស

March 10, 2020

លទ្ធផលរកឃើញថ្មីៈ ក្នុងលក្ខខណ្ឌខ្លះ មេរោគCOVID-19 អាចសាយភាយបាន 4.5ម៉ែត្រ រស់នៅក្នុងអាកាសបាន 30នាទី

អ្នកជំនាញខាងជំងឺរាតត្បាតរបស់ចិន បានបង្ហើបឱ្យដឹងពីរបាយការណ៍ថ្មីចុងក្រោយបំផុត ដែលសង្កត់ធ្ងន់ពីលើភាពសំខាន់នៃការពាក់ម៉ាស់អនាម័យការពារនៅក្នុងរថយន្តធ្វើដំណើរផ្លូវឆ្ងាយ និងបិទបង្អួចជិត។

លទ្ធផលសិក្សាស្រាវជ្រាវដោយក្រុមអ្នកជំនាញការខាងរោគរាតត្បាតរបស់រដ្ឋបាលចិន បានរកឃើញថា មេរោគវីរុស COVID-19 អាចស្ថិតក្នុងអាកាសធាតុបានយ៉ាងតិច 30នាទី និងធ្វើដំណើរបានឆ្ងាយដល់ទៅ 4.5ម៉ែត្រ ច្រើនជាងចម្ងាយសុវត្ថិភាពដែលអាជ្ញាធរសុខាភិបាលទូទាំងពិភពលោក បានណែនាំឱ្យនៅឆ្ងាយពីអ្នកផ្ទុកមេរោគ 1-2ម៉ែត្រ ទៅទៀត។

ក្រៅពីនេះ អ្នកស្រាវជ្រាវបានរកឃើញទៀតថា មេរោគវីរុស COVID-19 អាចមានជីវិតបានយូរច្រើនថ្ងៃនៅលើវត្ថុដែលមានកម្ទេចលម្អងពីប្រព័ន្ធផ្លូវដង្ហើមដែលធ្លាក់ចុះមកលើស្រទាប់លើ ដែលបង្កើនភាពប្រថុយប្រថានក្នុងការចម្លងមេរោគថែមទៀត បើសិនជាមានអ្នកណាយកដៃមកប៉ះកម្ទេចលម្អងនៅលើវត្ថុនោះ ហើយយកទៅប៉ះផ្ទៃមុខ តែរយៈពេលដែលមេរោគស្ថិតនៅលើវត្ថុអ្វីមួយនោះ វាស្ថិតនៅលើបច្ច័យជាច្រើន ដូចជាសីតុណ្ហភាព និងប្រភេទនៃវត្ថុ ដូចជាបើស្ថិតក្នុងសីតុណ្ហភាព 37អង្សាC មេរោគអាចមានជីវិតនៅបានយូរដល់ទៅ2-3ថ្ងៃ នៅលើកែវ ក្រណាត់ លោហៈ ប្លាស្ទិក ឬក្រដាស ជាដើម។

សម្រាប់ប្រទេសចិន ដោយសាររដ្ឋបាលចិនបានកំណត់ឱ្យរថយន្តដឹកអ្នកដំណើរផ្លូវឆ្ងាយទាំងអស់ ត្រូវបំពាក់កេមេរ៉ាសុវត្ថិភាព ទើបឃ្លីបដែលបានមក មានប្រយោជន៍ជាខ្លាំងសម្រាប់អ្នកស្រាវជ្រាវ ក្នុងការសិក្សាពីវិធីការចម្លងមេរោគនៅក្នុងរថយន្តBus ដែលបិទបង្អួចជិតទាំងអស់ ទើបគេអាចអះអាងបានថា ស្ថិតនៅក្នុងសភាពបរិស្ថានបែបបិទជិត មានម៉ាស៊ីនត្រជាក់ មេរោគវីរុសកូរ៉ូណាប្រភេទថ្មី នឹងអាចចម្លងបានឆ្ងាយជាងរយៈសុវត្ថិភាពដែលយើងបានដឹងទៅទៀត ក្រៅពីនេះ នៅមានភាពប្រថុយប្រថានក្នុងការដែលមេរោគវីរុសអាចនៅតែមាន បន្ទាប់ពីអ្នកដំណើរដែលមានជាប់មេរោគបានចុះពីរថយន្តBus ទៅហើយទៀតផង ដូច្នេះហើយទើប ដំបូន្មានរបស់យើងគឺ “ត្រូវពាក់ម៉ាស់អនាម័យការពារគ្រប់ពេលវេលា ពេលស្ថិតនៅក្នុងរថយន្តធ្វើដំណើរ”៕

ប្រភព៖ សារព័ត៌មានបរទេស

March 10, 2020

ទ្វីបតែ1គត់នៅលើពិភពលោក ដែលមិនទាន់មានអ្នកឆ្លងវីរុស COVID-19

អង់តាកទិក (Antarctica) ដែលស្ថិតនៅប៉ូលខាងត្បូងនៃភពផែនដី គឺជាទ្វីបតែ1គត់ ដែលមិនទាន់មានករណីឆ្លង ឬស្លាប់ដោយសាររោគរាតត្បាត COVID-19 ដោយសារទ្វីបនេះ បានអនុវត្តវិធានការយ៉ាងតឹងរុឹងដើម្បីធានាមិនឱ្យមានការឆ្លងវីរុសនេះ។

អ្នកវិទ្យាសាស្ត្រជនជាតិអង់គ្លេស លោក Michael Brian ដែលជាប្រធាន Rothera (Rothera Research Station) ដែលជាស្ថានីយស្រាវជ្រាវមួយរបស់ប្រទេសអង់គ្លេសនៅប៉ូលខាងត្បូង បានឱ្យដឹងថា ស្ថានីយស្រាវជ្រាវនេះ បានអនុវត្តវិធានការយ៉ាងតឹងរុឹងដើម្បីការពារសុខភាព និងសុវត្ថិភាពនៃសមាជិកទាំង140នាក់របស់ខ្លួន។ ក្រុមអ្នកស្រាវជ្រាវនឹងមានហនិភ័យខ្ពស់ក្នុងការឆ្លងវីរុស បើសិន COVID-19 បង្ហាញវត្តមាននៅលើទ្វីបនេះ ព្រោះថា ពួកគេទាំងអស់ប្រើប្រាស់បន្ទប់ហូបបាយរូម និងរស់នៅក្បែរគ្នា ក្នុងស្ថានីយស្រាវជ្រាវនេះ ហើយសីតុណ្ហភាពនៅខាងក្រៅ ត្រជាក់រហូតដល់ -20អង្សាសេ។

“យើងទទួលបានការការពារយ៉ាងល្អនៅទីនេះ និងអនុវត្តវិធានការច្រើនដើម្បីថែរក្សាសុខភាព។ បើសិនរោគរាតត្បាត COVID-19 នៅតែបន្តឆ្លងរាលដាល ហើយធ្វើឱ្យប៉ះពាល់ដល់ប្រភពផ្គត់ផ្គង់ស្បៀងអាហារ និងថាមពលសម្រាប់់អង់តាកទិក មន្ទីរស្រាវជ្រាវនេះ ក៏មានផែនការដើម្បីទប់ទល់” នេះបើតាមលោក Michael Brian។

លោក Michael Brian បន្តថា បុគ្គលិកដែលត្រឡប់មកពីទ្វីបផ្សេង នឹងត្រូវបានធ្វើតេស្ត។ បុគ្គលិកណាដែលមានរោគសញ្ញា នឹងត្រូវបានដាក់ឱ្យនៅដាច់ដោយឡែកភ្លាម ដើម្បីទប់ស្កាត់ការឆ្លងបន្ត។

Steven Marshall ប្រធានគ្រប់គ្រងហានិភ័យរបស់មន្ទីរស្រាវជ្រាវនៅឯទ្វីបអង់តាកទិករបស់អង់គ្លេស ហៅកាត់ថា BAS (British Antarctic Survey) បានឱ្យដឹងថា “បើសមាជិកណាម្នាក់ក្នុងក្រុម ដែលត្រៀមនឹងត្រឡប់មកទ្វីបអង់តាកទិក ដែលជាអ្នកត្រូវសង្ស័យថា មានផ្ទុកមេរោគ ពួកគេនឹងត្រូវដាក់ឱ្យនៅដាច់ដោយឡែករយៈពេល2សប្ដាហ៍ មុនពេលឡើងនាវាមកកាន់ទ្វីប (អង់តាកទិក)។ នាវានេះនឹងចំណាយពេលធ្វើដំណើរ4សប្ដាហ៍ ទើបទៅដល់ស្ថានីយ Rothera។ រយៈពេល (4សប្ដាហ៍) នេះ គឺគ្រប់គ្រាន់សម្រាប់បញ្ចេញរោគសញ្ញា បើសិនពួកគេមានផ្ទុកមេរោគ”។

ទំនាក់ទំនងរវាងស្ថានីយស្រាវជ្រាវ និងពិភពលោកគឺតាមរយៈយន្តហោះ BAS Dash 7 និងនាវា ដើម្បីដឹកទំនិញសំខាន់ៗសម្រាប់ការសិក្សាស្រាវជ្រាវនៅលើទ្វីបអង់តាកទិក។ នេះបើតាមសារព័ត៌មាន Express។

ក្រៅពីនេះ នៅលើទ្វីបអង់តាកទិក ក៏មានជើងហោះហើរផ្ទៃក្នុងរវាងស្ថានីយស្រាវជ្រាវនានា ដែលគ្រប់គ្រងដោយប្រទេសផ្សេងៗ ដូចជាប្រទេសអ៊ីតាលី អាហ្សង់ទីន អ៊ុយក្រែន អាល្លឺម៉ង់ រុស្ស៊ី និងឥណ្ឌា។ បន្ទាប់ពីរោគរាតត្បាត COVID-19 ចាប់ផ្ដើមឆ្លងរាលដាល ចិនគឺជាប្រទេសតែ1គាត់ ដែលបានដកបុគ្គលិករបស់ខ្លួនចេញពីស្ថានីយស្រាវជ្រាវនៅលើទ្វីបអង់តាកទិក៕

ប្រភព៖ សារព័ត៌មានបរទេស

March 10, 2020

Author: សឿន សំណាង