សឿន សំណាង - La Reine Media

ជប៉ុន-កូរ៉េ ឯកភាពគ្នាវិលមកពិភាក្សាគ្នារឿងពាណិជ្ជកម្មឡើងវិញ ក្រោយប្រជុំពេញ 1យប់ 1ថ្ងៃ

ប្រទេសជប៉ុន និងកូរ៉េខាងត្បូងបានឯកភាពគ្នាក្នុងការពិភាក្សាបន្ត ដើម្បីស្វែងរកដំណោះស្រាយលើកកម្ពស់ការគ្រប់គ្រងការនាំចេញ បន្ទាប់ពីក្រុមមន្ត្រីរបស់ប្រទេសទាំង2 បានជួបប្រជុំគ្នាអស់រយៈពេលដ៏យូរ រហូតដល់ព្រឹកព្រលឹមថ្ងៃពុធ(ម្សិលមិញ)។

“យើងបានផ្លាស់ប្ដូរព័ត៌មានគ្នា និងស្វាគមន៍ចំពោះការរីកចម្រើនរបស់ភាគីទាំងសងខាង តែយ៉ាងណាក៏ដោយ យើងបានឯកភាពគ្នាថា យើងទើបតែធ្វើដំណើរទៅជាមួយគ្នាបានពាក់កណ្ដាលផ្លូវប៉ុណ្ណោះ” យ៉ូអ៊ិឈិ អៃដា ប្រធានផ្នែកគ្រប់គ្រងពាណិជ្ជកម្ម នៃក្រសួងសេដ្ឋកិច្ច ពាណិជ្ជកម្ម និងឧស្សាហកម្មរបស់ជប៉ុន បានថ្លែងក្រោយកិច្ចប្រជុំ។

ការប្រជុំក្នុងគ្រានេះ ពីដំបូងបម្រុងនឹងរៀបចំឡើងនៅទីក្រុងសេអ៊ូល តែក៏ផ្លាស់មករៀបចំជាកិច្ចប្រជុំបែប ថេឡេខុនហ្វ៊ើរេនស៍ វិញ ព្រោះទាំង 2ប្រទេសមានការកម្រិតការធ្វើដំណើរចូលប្រទេសរៀងៗខ្លួន ដើម្បីទប់ទល់នឹងមេរោគវីរុសកូរ៉ូណាដែលកំពុងរាតត្បាត។

លោក អៃដា បានធ្វើដំណើរទៅស្ថានទូតកូរ៉េខាងត្បូងប្រចាំទីក្រុងតូក្យូ ដើម្បីចូលរួមកិច្ចប្រជុំនេះជាមួយលោក លី មិនហូ អ្នកទទួលបន្ទុកកិច្ចការងារដូចគ្នារបស់ខាងប្រទេសកូរ៉េខាងត្បូង ដោយពួកគេបានចាប់ផ្ដើមតាំងពីថ្ងៃអង្គារ។ ពីដំបូង គេរំពឹងថា នឹងប្រជុំរយៈពេល 7ម៉ោង តែក៏បន្លាយពេលវេលាយូររហូតដល់ទៅជិត 16ម៉ោង ទៅបញ្ចប់នៅពេលព្រះអាទិត្យរះនាព្រឹកថ្ងៃពុធ(ម្សិលមិញ)។ ទាំងអស់នេះ បានបង្ហាញឱ្យឃើញថា ភាគីទាំង2 គ្មាននរណាសុខចិត្តចុះចាញ់នរណាដោយងាយៗឡើយ…។

សម្ព័ន្ធភាពរបស់ប្រទេសទាំង2 បានធ្លាក់ចុះយ៉ាងយ៉ាប់យ៉ឺនតាំងពីខែតុលា ឆ្នាំ2018 នៅពេលដែលតុលាការប្រទេសកូរ៉េខាងត្បូងបានបញ្ជាយ៉ាងដាច់ណាត់ឱ្យក្រុមហ៊ុនជប៉ុនសងជំងឺចិត្តដល់ពលករកូរ៉េដែលត្រូវបានជិះជាន់ក្នុងសម័យអំឡុងឆ្នាំ1910-1945 ដែលនៅពេលនោះ កូរ៉េបានធ្លាក់ជាអាណានិគមរបស់ជប៉ុន។

នៅក្នុងខែកក្កដា ឆ្នាំ2019 ជប៉ុនបានកម្រិតការនាំចេញវត្ថុធាតុដើម សេមីខុនដាក់ទើរ និងអេក្រង់ឌិសផ្លេយ៍ទៅឱ្យកូរ៉េខាងត្បូង។ បន្ទាប់ពីនោះមិនប៉ុន្មានខែ ជប៉ុនក៏ដកប្រទេសកូរ៉េខាងត្បូងចេញពី “វៃថ៍លីស្ត” ជាបញ្ជីឈ្មោះសម្ព័ន្ធមិត្តខាងពាណិជ្ជកម្មដែលបានទទួលការជឿទុកចិត្ត៕

ប្រភព៖ សារព័ត៌មានបរទេស

March 12, 2020

មនុស្សជាង126,000នាក់ បានឆ្លងវីរុស COVID-19 ក្នុងនោះ អ្នកស្លាប់បានកើនដល់ជាង4,600នាក់ នៅទូទាំងពិភពលោក

COVID-19 បានបង្ហាញខ្លួននៅក្នុងប្រទេស និងដែនដីចំនួន122 នៅទូទាំងពិភពលោក ហើយបានធ្វើឱ្យមនុស្សជាង126,000នាក់ ត្រូវឆ្លងជម្ងឺរលាកសួតប្រភេទថ្មី និងបានសម្លាប់មនុស្សជាង4,600នាក់ ក្នុងនោះ កំណើននៃចំនួនអ្នកស្លាប់ដោយសារមេរោគនេះនៅអ៊ីតាលី លឿនជាងគេបង្អស់។

ប្រទេសអ៊ីតាលី បានបញ្ជាក់ថា តួលេខថ្មីនៃចំនួនអ្នកស្លាប់បន្ថែមគឺ 196ករណី ធ្វើឱ្យចំនួនអ្នកស្លាប់ដោយសារ COVID-19 សរុបនៅប្រទេសនេះ ឡើងដល់ 827នាក់។ ប្រទេសនេះក៏បានរកឃើញអ្នកជំងឺថ្មីចំនួន 2,313ករណី នាំឱ្យចំនួនសរុបនៃអ្នកបានឆ្លងមេរោគនេះ កើនដល់12,462នាក់ ឈរលំដាប់ទី2 ក្នុងពិភពលោក។

នៅប្រទេសអ៊ីរ៉ង់ ចំនួនករណីឆ្លងវីរុសកូរ៉ូណា កាលពីថ្ងៃទី11មីនា គឺ9,000នាក់ កើន958ករណី។ ជាមួយនឹងករណីស្លាប់ថ្មីចំនួន63នាក់ អ៊ីរ៉ង់បច្ចុប្បន្នមានអ្នកស្លាប់ដោយសារ COVID-19 ឡើងដល់354នាក់។

ប្រទេសកូរ៉េខាងត្បូង កាលពីថ្ងៃទី11មីនា មានអ្នកឆ្លងមេរោគចំនួន242ករណីបន្ថែមទៀត នាំឱ្យចំនួនសរុបនៃករណីឆ្លងក្នុងប្រទេសនេះ កើនដល់ 7,755នាក់ ក្នុងនោះ មានអ្នកស្លាប់60នាក់។ កូរ៉េខាងត្បូង ព្រឹកនេះមិនទាន់បានប្រកាសឱ្យដឹងជាផ្លូវការអំពីស្ថិតិថ្មីបំផុតនៅឡើយ។ ប្រទេសនេះ តែងប្រកាស2លើកក្នុង1ថ្ងៃ គឺព្រឹក និងល្ងាច។

តួលេខនៃករណីឆ្លង និងស្លាប់នៅក្នុងប្រទេសចិន គិតមកថ្ងៃទី11មីនា តាមលំដាប់លំដោយគឺ 80,921នាក់ និង 3,161នាក់។

ប្រទេសជប៉ុន ក៏បានរកឃើញអ្នកជំងឺថ្មីចំនួន 52នាក់ នាំឱ្យចំនួនករណីឆ្លងរោគកូរ៉ូណា COVID-19 ក្នុងប្រទេសនេះឡើងដល់ 639នាក់។ ចំណែកករណីស្លាប់វិញ មានចំនួន15នាក់។

ប្រទេសអេស្ប៉ាញ និងអាល្លឺម៉ង់ មានករណីឆ្លងរោគថ្មីជាបន្តបន្ទាប់ ក្នុងនោះ ចំនួនករណីឆ្លងថ្មីនៅអេស្ប៉ាញគឺ493នាក់ និងអាល្លឺម៉ង់គឺ 288នាក់។ ចំនួនករណីឆ្លងសរុបនៅអេស្ប៉ាញ គឺ 2,188នាក់ ចំណែកអាល្លឺម៉ង់ គឺ 1,853នាក់។ រីឯតួលេខនៃអ្នកស្លាប់ដោយសារ COVID-19 នៅអេស្ប៉ាញគឺ 49នាក់ និងអាល្លឺម៉ង់ គឺមានចំនួន3នាក់។

អង់គ្លេស មានករណីឆ្លងថ្មីចំនួន 73នាក់ ធ្វើឱ្យចំនួនសរុបនៃករណីឆ្លង COVID-19 នៅប្រទេសនេះ កើនដល់ 456នាក់ ក្នុងនោះមានអ្នកស្លាប់ 6នាក់។

ចំណែកប្រទេសស្វីស ហូឡង់ និងស៊ុយអែត សុទ្ធតែបានរកឃើញអ្នកផ្ទុកមេរោគកូរ៉ូណា COVID-19 ករណីថ្មី លើសពី 120នាក់ដូចគ្នា។ ចំនួនអ្នកបានឆ្លងមេរោគកូរ៉ូណាសរុប នៅក្នុងប្រទេសទាំង3នេះ គឺ ស្វីស 652នាក់ ហូឡង់ 503នាក់ និងប្រទេសស៊ុយអែតមាន 477នាក់ ហើយប្រទេសទាំងនេះ ក៏សុទ្ធតែមានអ្នកស្លាប់ថ្មីចំនួន1ករណីដូចគ្នា។ ឯចំនួនករណីស្លាប់សរុបនៃប្រទេសទាំងនេះ គឺ ស្វីស 4នាក់ ហូឡង់ 5នាក់ និងស៊ុយអែត 1នាក់។

សហរដ្ឋអាមេរិក បានរកឃើញករណីឆ្លងមេរោគថ្មីចំនួន309នាក់ នាំឱ្យអ្នកផ្ទុកមេរោគ COVID-19 ក្នុងប្រទេសនេះ កើនដល់ 1,303នាក់។ ករណីស្លាប់ បានឡើងដល់38នាក់ កើន7ករណី បើធៀបនឹង1ថ្ងៃមុន។

ករណីដែលគួរឱ្យព្រួយបារម្ភជាងគេនៅមជ្ឈិមបូពា៌ នោះគឺប្រទេសកាតារ។ កាលពីថ្ងៃទី11មីនា ប្រទេសនេះ បានរកឃើញអ្នកផ្ទុកមេរោគ COVID-19 ចំនួន 238ករណីបន្ថែមទៀតក្នុងពេលត្រឹមតែ1ថ្ងៃ ខណៈមុននោះ1ថ្ងៃ កាតារ មានអ្នកជំងឺត្រឹមតែ24នាក់ប៉ុណ្ណោះ។

បែលហ្ស៊ិក ហូឡង់ ប៊ុលហ្គារី និងអៀរឡង់ គឺជាបណ្ដាប្រទេសដែលមានអ្នកស្លាប់ដំបូងដោយសារ COVID-19 កាលពីម្សិលមិញ (11មីនា) និងនៅព្រឹកនេះ។

ប្រទេសហុងឌូរ៉ាស (នៅអាមេរិកកណ្ដាល) និងកូតឌីវ័រ (នៅអាហ្វ្រិកខាងលិច) រួមនឹងកោះ Reunion របស់បារាំង គឺជាទឹកដីចុងក្រោយដែលបានរកឃើញអ្នកផ្ទុក COVID-19៕

ប្រភព៖ សារព័ត៌មានបរទេស

March 12, 2020

អនុប្រធានាធិបតី1រូប និងរដ្ឋមន្ត្រី2រូបរបស់អ៊ីរ៉ង់ បានឆ្លងវីរុស COVID-19 ខណៈអ្នកស្លាប់នៅប្រទេសនេះកើនដល់345នាក់

អនុប្រធានាធិបតីទី1របស់ប្រទេសអ៊ីរ៉ង់ Eshaq Jahangiri និង រដ្ឋមន្ត្រី2រូប របស់ប្រទេសនេះ ត្រូវបានធ្វើតេស្តរកឃើញវីរុស COVID-19 នេះបើតាមសារព័ត៌មាន Fars។

សារព័ត៌មាន Fars ដកស្រង់ប្រភពព័ត៌មានគួរឱ្យទុកចិត្តមួយ កាលពីថ្ងៃទី11មីនា ឱ្យដឹងថា អនុប្រធានាធីបតីអ៊ីរ៉ង់ Eshaq Jahangiri បានឆ្លងវីរុស COVID-19។ ព័ត៌មាននេះ ត្រូវបានលើកឡើង ក្រោយពីមានដំណឹងចចាមអារ៉ាមអំពីស្ថានភាពសុខភាពរបស់លោក Eshaq Jahangiri ដោយសារតែលោកមិនបានចូលរួមក្នុងកិច្ចប្រជុំកំពូលនានាក្នុងពេលថ្មីៗរបស់ប្រទេសអ៊ីរ៉ង់។ បច្ចុប្បន្ន គេមិនទាន់ដឹងថា លោក Eshaq Jahangiri ធ្លាប់បានប៉ះពាល់ផ្ទាល់ជាមួយនឹងប្រធានាធិបតីអ៊ីរ៉ង់ លោក Hassan Rouhani ក្នុងពេលថ្មីៗនេះដែរ ឬអត់នោះទេ។

សារព័ត៌មាន Fars ក៏បានឱ្យដឹងថា បច្ចុប្បន្ន អនុប្រធានាធិបតីអ៊ីរ៉ង់ លោក Eshaq កំពុងបង្ខាំងខ្លួននៅដាច់ដោយឡែកពីគេ ហើយស្ថានភាពសុខភាពរបស់គាត់នៅល្អនៅឡើយ។

ក្រៅពីអនុប្រធានាធិតី Eshaq Jahangiri រដ្ឋមន្ត្រី2រូបផ្សេងទៀតរបស់ប្រទេសអ៊ីរ៉ង់ ក៏ត្រូវបានធ្វើតេស្តរកឃើញថាមានផ្ទុកមេរោគ COVID-19 រួមមាន រដ្ឋមន្ត្រីក្រសួងបេតិកភណ្ឌវប្បធម៌ និងទេសចរណ៍ Ali Asghar Mounesan និងរដ្ឋមន្ត្រីក្រសួងឧស្សាហកម្ម រ៉ែ និងអាជីវកម្ម Reza Rahmani។

បច្ចុប្បន្ន សារព័ត៌មានរបស់រដ្ឋអ៊ីរ៉ង់ មិនទាន់បានចេញប្រកាសជាផ្លូវការអំពីករណីថ្មីទាំងនេះនៅឡើយ។ បើសិនជាព័ត៌មាននេះត្រូវបានបញ្ជាក់ជាផ្លូវការ នោះករណីទាំងនេះនឹងធ្វើឱ្យមន្ត្រីកំពូលៗនៅអ៊ីរ៉ង់ កាន់តែប្រឈមនឹងហានិភ័យនៃការឆ្លងវីរុសកូរ៉ូណានេះខ្ពស់បំផុត។ នេះបើតាមសារព័ត៌មាន Aljazeera។

មុនករណីនេះ អនុប្រធានាធិបតីទទួលបន្ទុកកិច្ចការនារី លោកស្រី Masoumeh Ebtekar និងអនុរដ្ឋមន្ត្រីក្រសួងសុខាភិបាលអ៊ីរ៉ង់ លោក Iraj Harirchi រួមនឹងតំណាងរាស្ត្ររាប់សិបនាក់ផ្សេងទៀតរបស់អ៊ីរ៉ង់ ក៏ត្រូវបានបញ្ជាក់ថា បានឆ្លងវីរុស COVID-19 ផងដែរ។

បច្ចុប្បន្ន អ៊ីរ៉ង់ គឺជាសម្បុកមេរោគកូរ៉ូណាធំបំផុត1 របស់ពិភពលោក។ គិតមកដល់ពេលនេះ ប្រទេសអ៊ីរ៉ង់ មានអ្នកឆ្លងមេរោគនេះសរុប 9,000នាក់ ក្នុងនោះមានអ្នកស្លាប់ដល់ទៅ 354នាក់។

នៅទូទាំងពិភពលោក ចំនួនអ្នកបានឆ្លងវីរុសកូរ៉ូណាបានកើនដល់ 125,865នាក់ ក្នុងនោះមានអ្នកស្លាប់ចំនួន 4,615នាក់៕

ប្រភព៖ សារព័ត៌មានបរទេស

March 12, 2020

មហាសង្គ្រាម! ស្វារាប់រយក្បាលលើកទ័ពមកប្រយុទ្ធគ្នានៅមុខទីសក្ការបូជា ដណ្ដើមទឹកដោះគោជូរ…

ហេតុកើតនៅក្នុងប្រទេសថៃ…បុរសម្នាក់បានបង្ហោះឃ្លិបហេតុការណ៍សត្វស្វា 3ក្រុម ចំនួនរាប់រយក្បាល បានបើកការវាយប្រយុទ្ធគ្នានៅក្នុងបរិវេណមុខទីសក្ការបូជា នៅក្នុងខេត្ត លុបប៊ុរី បណ្ដាលឱ្យមានការស្ទះចរាចរណ៍ មនុស្សម្នាទាំងអស់ត្រូវបញ្ឈប់ការធ្វើដំណើរ ដោយសារមូលហេតុដណ្ដើមទឹកដោះគោជូរ ដែលសប្បុរសជនបានយកមកថ្វាយទីសក្ការបូជាខាងលើ។

កាលពីថ្ងៃទី11 មីនា ម្សិលមិញ នៅលើហ្វេសប៊ុកដែលមានឈ្មោះថា “Sasaluk Rattanachai” បានបង្ហោះឃ្លីបវីដេអូហេតុការណ៍សត្វស្វាចំនួនដ៏ច្រើនរាប់រយក្បាល បានលើកបក្ខពួកមកប្រយុទ្ធគ្នានៅក្នុងបរិវេណទីសក្ការខាងលើ ដែលមានទាំងអស់ 3ក្រុម គឺស្វាមកពីក្រុមលិងសាន(ម្ចាស់ទីតាំង) ក្រុមលិងព្រះប៉ាងសាមយ៉ត និងក្រុមលិងទឹក និងបន្ទាប់ពីវាយប្រយុទ្ធគ្នារួចហើយ ស្វាខាងក្រុមលិងព្រះប៉ាងសាមយ៉ត និងក្រុមលិងទឹក បានដកទ័ពថយទៅតាមផ្លូវរៀងៗខ្លួន…៕

March 11, 2020

ដំណឹងល្អ! ចិននឹងសាកល្បងវ៉ាក់សាំងប្រឆាំង COVID-19 នៅក្នុងខែមេសាខាងមុខ

ទីភ្នាក់ងារយន្តការរួមការពារ និងគ្រប់គ្រងការឆ្លងរាតត្បាតរបស់វីរុស COVID-19 របស់គណៈរដ្ឋមន្ត្រីចិន បានរៀបចំធ្វើពិធីថ្លែងក្នុងសន្និសីទព័ត៌មានថា ក្រោយពីកិច្ចខិតខំប្រឹងប្រែងអស់រយៈពេលជាង 1ខែកន្លងមក កិច្ចការស្រាវជ្រាវតិចណូឡូជីការពារការឆ្លងរាតត្បាតរបស់វីរុស COVID-19 បានទទួលជោគជ័យហើយ។

ទីភ្នាក់ងារខាងលើបានថ្លែងថា ប្រទេសចិនអាចពិនិត្យវិនិច្ឆ័យរោគ ព្យាបាលអ្នកជំងឺឱ្យជាសះស្បើយ និងការពាររោគរាតត្បាតបានហើយ ដោយទាំងអស់នេះ ត្រូវបានរំពឹងថា ចិននឹងចាប់ផ្ដើមសាកល្បងវ៉ាក់សាំងការពារមេរោគវីរុស COVID-19 បាននៅក្នុងខែមេសាខាងមុខ។

បច្ចុប្បន្ន ចិនបានផ្ដល់រីអេជេនត៍សាកល្បងការឆ្លងមេរោគទៅឱ្យប្រទេសប៉ាគីស្ថាន ជប៉ុន និងសហភាពអាហ្វ្រិក និងថែមទាំងបានចែករំលែកផែនការព្យាបាលជំងឺទៅដល់ប្រជាសហគមន៍ពិភពលោកទៀតផង។

របាយការណ៍ព័ត៌មានបានបញ្ជាក់ថា មន្ត្រីក្រសួងវិទ្យាសាស្ត្រ និងតិចណូឡូជីរបស់ចិន បានថ្លែងថា ចិនរីករាយក្នុងការចែករំលែកបទពិសោធជាមួយប្រទេសដែលពាក់ព័ន្ធ រហូតដល់ការដំណើរការការសហការផ្នែកការស្រាវជ្រាវថ្នាំព្យាបាលរោគ វ៉ាក់សាំង និងរីអេជេនត៍សាកល្បងការឆ្លងមេរោគផងដែរ៕

ប្រភព៖ សារព័ត៌មានបរទេស

March 11, 2020

មន្ត្រីអន្តោប្រវេសន៍2រូបនៅអាកាសយានដ្ឋាន ដែលបានឆ្លង COVID-19 ប្រហែលជាបានចម្លងមេរោគនេះ ទៅឱ្យអ្នកដំណើរជាច្រើន មុនពេលពួកគេត្រូវធ្វើតេស្តរកមេរោគ

បុគ្គលិកផ្នែកអន្តោប្រវេសន៍ថៃ2រូបនៅព្រលានយន្តហោះសុវណ្ណភូមិ ក្នុងទីក្រុងបាងកក ត្រូវបានធ្វើតេស្តឃើញថា មានផ្ទុកមេរោគកូរ៉ូណា ដែលករណីនេះត្រូវបានគេជឿថា មានអ្នកដំណើរជាច្រើនត្រូវឆ្លងរោគកូរ៉ូណាពីមន្ត្រីទាំងនេះមិនខាន។

Sopon Iamsirithaworn ដែលជាមន្ត្រីម្នាក់មកពីនាយកដ្ឋានប្រយុទ្ធនឹងជំងឺរបស់ប្រទេសថៃ បានឱ្យដឹងថា បុគ្គលិកទី2រូបដែលមានតួនាទីគ្រប់គ្រងផ្នែកអន្តោប្រវេសន៍នេះ ត្រូវបានក្រុមគ្រូពេទ្យឱ្យដឹងថា បានឆ្លងមេរោគកាលពីថ្ងៃទី7មីនា និងទី8មីនា។ មន្ត្រីខាងលើបន្តថា បុគ្គលិកទាំង2នាក់នេះ ប្រហែលជាបានប៉ះពាល់អ្នកដំណើរជាច្រើនរូប មុនពេលពួកគេត្រូវបានពិនិត្យ និងរកឃើញមេរោគនេះ។

រដ្ឋមន្ត្រីក្រសួងមហាផ្ទៃនៃប្រទេសថៃ ក្នុងថ្ងៃនេះក៏បានប្រកាសថានឹងផ្អាកផ្ដល់ទិដ្ឋាការទៅឱ្យពលរដ្ឋកូរ៉េខាងត្បូង អ៊ីតាលី និងហុងកុងផងដែរ។

ប្រទេសថៃ បច្ចុប្បន្ន មានអ្នកឆ្លងជំងឺកូរ៉ូណាចំនួន59ករណី ក្នុងនោះមានអ្នកជំងឺម្នាក់កំពុងស្ថិតក្នុងស្ថានភាពអាសន្ន និង34នាក់បានជាសះស្បើយ។ ក្រុមហ៊ុនអាកាសចរណ៍ថៃ Thai Airways បានឱ្យដឹងថា ចាប់ពីថ្ងៃទី13មីនា ក្រុមហ៊ុននេះនឹងផ្អាកជើងហោះហើរទាំងអស់ដែលហោះទៅកាន់ប្រទេសអ៊ីតាលី ដែលជាតំបន់មួយមានអ្នកផ្ទុកមេរោគកូរ៉ូណាជាង 10,000នាក់ និងអ្នកស្លាប់ជាង600នាក់៕

ប្រភព៖ សារព័ត៌មានបរទេស

March 11, 2020

SpaceX ជិតដល់ពេលបាញ់បង្ហោះយានអវកាសដឹកមនុស្សដំបូងរបស់ខ្លួន ទៅកាន់ទីអវកាស

នាយកប្រតិបត្តិនៃក្រុមហ៊ុន SpaceX អ្នកស្រី Gwynne Shotwell កាលពីថ្ងៃទី10មីនា បានប្រកាសនៅក្នុងកិច្ចប្រជុំមួយ ស្ដីអំពីផ្កាយរណបឆ្នាំ2020 នៅក្នុងរដ្ឋធានី Washington D.C. ថា ក្រុមហ៊ុន SpaceX នឹងនាំមនុស្សឡើងទៅកាន់ទីអវកាសនាខែឧសភាខាងមុខ។

កាលពីខែមករាអគ្គនាយកប្រតិបត្តិរបស់ក្រុមហ៊ុនអវកាស SpaceX លោក Elon Musk ក៏បានថ្លែងដែរថា បេសកកម្មដែលមានមនុស្សបើកបរដំបូងដែលមានឈ្មោះថា Demo-2 អាចនឹងកើតឡើងនៅក្នុងត្រីមាសទី2 ឆ្នាំនេះ។ ក្នុងបេសកកម្មនេះ យានអវកាស Crew Dragon នឹងនាំអវកាសយានិករបស់ NASA 2រូប គឺ Bob Behnken និង Doug Hurley ឆៀងចូលធ្វើទស្សនកិច្ចស្ថានីយអវកាសអន្តរជាតិ (ISS) ផងដែរ។

SpaceX ត្រូវការតែកត្តា1ទៀតប៉ុណ្ណោះ ដើម្បីឈានដល់ដំណាក់កាលបាញ់បង្ហោះយានអវកាសដឹកមនុស្សជាលើកដំបូងរបស់ខ្លួន។ “យើងជិតបានឆ្លងកាត់ដំណាក់កាលនៃការទទួលស្គាល់” នេះគឺជាសម្ដីរបស់អ្នកស្រី Gwynne Shotwell។ បើសិនជាដំណាក់កាលនៃការទទួលស្គាល់ បានជោគជ័យ SpaceX នឹងក្លាយជាក្រុមហ៊ុនអាមេរិកាំងដំបូងគេដែលនាំអវកាសចរ ឡើងទៅកាន់ស្ថានីយអវកាស ISS ក្រោយរយៈពេលជិត1ទសវត្សរ៍កន្លងមកនេះ។ ចាប់ពីឆ្នាំ2011 ទីភ្នាក់ងារអវកាស NASA តែងតែប្រើប្រាស់យានអវកាសរបស់ប្រទេសរុស្ស៊ី ដើម្បីបំពេញភារកិច្ចនៅទីអវកាសរបស់ខ្លួន។

Shotwell បានឱ្យដឹងថា ក្រុមអ្នកជំនាញកំពុងតែពិចារណាទៅលើរយៈពេលនៃបេសកកម្ម។ អវកាសចរ2រូប គឺ Behnken និង Hurley កំពុងហ្វឹកហាត់បន្ថែម ព្រោះថា បើតាម NASA ពួកគេអាចនឹងត្រូវនៅក្នុងស្ថានីយអវកាសក្នុងរយៈពេលយូរជាងផែនការដំបូង។

SpaceX ក៏មានគម្រោងប្រើប្រាស់ឡើងវិញនូវយានអវកាស Crew Dragon ផងដែរ។ អ្នកជំនាញដែលគ្រប់គ្រងកម្មវិធី Commercial Crew របស់ NASA ធ្លាប់និយាយថា ក្រុមហ៊ុននេះនឹងប្រើប្រាស់យានថ្មី រៀងរាល់ពេលត្រូវបញ្ជូនអវកាសចររបស់ NASA ឡើងទៅកាន់ទីអវកាស។ Shotwell ថ្លែងថា “Crew Dragon អាចហោះហើរបានច្រើនដង។ ខ្ញុំប្រាកដណាស់ថា NASA នឹងយល់ព្រមប្រើប្រាស់យាននេះមិនខាន”។ នេះបើតាមការចេញផ្សាយរបស់ CNBC។

Doug Hurley (ស្ដាំ) និង Bob Behnken (ឆ្វេង) នៅក្នុងពេលហ្វឹកហាត់ មុនពេលធ្វើហោះទៅកាន់ទីអវកាស

ក្រុមហ៊ុន SpaceX ប្រើយាន Cargo Dragon ដែលជាកំណែមួយត្រូវបានផលិតឡើងមុនពេល យាន Crew Dragon បានបង្ហាញខ្លួន ក្នុងការដឹកទំនិញរបស់ NASA ទៅកាន់ស្ថានីយអវកាសអន្តរជាតិ។ ក្រុមហ៊ុន SpaceX ធ្លាប់បានប្រើប្រាស់ឡើងវិញដោយជោគជ័យ នូវយានអវកាស Cargo Dragon ចំនួន3លើកមកហើយ។ SpaceX ក៏មានឈ្មោះល្បីល្បាញក្នុងការប្រើប្រាស់ឡើងវិញនូវសម្បកកាំជ្រួចដែលប្រើសម្រាប់បាញ់បង្ហោះយានអវកាសផងដែរ។

អតិថិជនមួយចំនួនក៏បានចុះឈ្មោះ ហោះទៅកាន់ទីអវកាស តាមរយៈយាន Crew Dragon របស់ SpaceX។ កាលពីខែមុន ក្រុមហ៊ុននេះ បានប្រកាសថា ខ្លួនមានកិច្ចសន្យាចំនួន2 នៅក្នុងដៃ ដែលអនុញ្ញាតឱ្យក្រុមហ៊ុននេះ នាំភ្ញៀវទេសចរមួយចំនួន ឡើងទៅកាន់ស្ថានីយអវកាសអន្តរជាតិ ISS៕

ប្រភព៖ សារព័ត៌មានបរទេស

March 11, 2020

ប្រសាសន៍សម្ដេច ហ៊ុន សែន ល្បីដល់អឺរ៉ុប សារព័ត៌មានប្រទេសអង់គ្លេសបង្ហាញរូបភាព ព្រះអង្គម្ចាស់ ឆាលស៍ ទ្រង់ “សំពះ” ជំនួសការចាប់ដៃ ការពារការឆ្លងមេរោគ COVID-19

វេបសាយ ឌឹ ដេលី មីរើរ របស់ប្រទេសអង់គ្លេស បានរាយការណ៍ថា នៅក្នុងពិធីការមួយនៃបណ្ដាញសាខាចក្រភព នៅឯព្រះមហាវិហារ វេស្ទ មីនស្ទើរ ក្នុងទីក្រុងឡុងដ្រ៍ ប្រទេសអង់គ្លេស កាលពីថ្ងៃទី9 មីនា កន្លងទៅ ដែលមានខ្សែព្រះរាជវង្សានុវង្សលំដាប់ខ្ពស់ចូលរួមចំនួនដ៏ច្រើននោះ ក្នុងអំឡុងពេលស្វាគមន៍មន្ត្រីអ្នកមុខអ្នកការទាំងឡាយ ព្រះអង្គម្ចាស់ ឆាលស៍ មកុដរាជកុមារ នៃព្រះរាជាណាចក្រអង់គ្លេស ទ្រង់បានបដិសេធក្នុងការចាប់ដៃស្វាគមន៍ភ្ញៀវ(បែបអឺរ៉ុប)នៅក្នុងពិធី ដោយព្រះអង្គបានប្រើវិធី “សំពះ” ជំនួសវិញ ដែលបណ្ដាលមកពីការភ័យបារម្ភពាក់ព័ន្ធនឹងការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬ COVID-19 ដែលកំពុងរាតត្បាតខ្លាំងទូទាំងទ្វីបអឺរ៉ុបនាពេលបច្ចុប្បន្នេះ៕

ប្រភព៖ សារព័ត៌មានបរទេស

March 11, 2020

ចំនួនអ្នកឆ្លងវីរុស COVID-19 នៅសហរដ្ឋអាមេរិក កើនលើសពី1,000នាក់ទៅហើយ

ចំនួនមនុស្សដែលបានឆ្លងវីរុស COVID-19 នៅសហរដ្ឋអាមេរិក បានកើនឡើងលើសពី1,000នាក់ហើយ នេះបើតាមស្ថិតិថ្មីបំផុត។

យោងតាមស្ថិតិរបស់ទីភ្នាក់ងារសារព័ត៌មាន CNN និងសកលវិទ្យាល័យ Johns Hopkins ចំនួនអ្នកបានឆ្លងមេរោគ COVID-19 នៅសហរដ្ឋអាមេរិក គិតមកដល់ពេលនេះ បានកើនលើសពី1,000នាក់។ ចំនួនអ្នកជំងឺដែលត្រូវបានទទួលស្គាល់ដោយអាជ្ញាធរ បានកើនទ្វេដង ចាប់ពីថ្ងៃទី8មីនា ឆ្នាំ2020។

តួលេខនៃអ្នកស្លាប់ដោយសារវីរុស COVID-19 នៅសហរដ្ឋអាមេរិក មកដល់ពេលនេះ ក៏បានកើនដល់31នាក់។

យោងតាមមជ្ឈមណ្ឌលគ្រប់គ្រង និងទប់ស្កាត់រោគរបស់សហរដ្ឋអាមេរិក វីរុសបង្កជំងឺរលាកសួតប្រភេទថ្មីនេះ បានបង្ហាញខ្លួននៅក្នុងរដ្ឋចំនួន35 នៅទូទាំងសហរដ្ឋអាមេរិក។ ជិតពាក់កណ្ដាលនៃអ្នកជំងឺ គឺស្ថិតនៅក្នុងរដ្ឋចំនួន3 គឺ រដ្ឋ Washington រដ្ឋ California និងរដ្ឋ New York។

Washington បច្ចុប្បន្ន នៅតែជារដ្ឋដែលទទួលរងផលអាក្រក់បំផុតពីរោគរាតត្បាត COVID-19 នៅសហរដ្ឋអាមេរិក ដោយមានអ្នកជំងឺចំនួន273នាក់ និងអ្នកស្លាប់ចំនួន24នាក់។ ចំណែក California និង New York វិញ គឺមានអ្នកជំងឺជាង100នាក់ដូចគ្នា ខណៈដែល Massachusetts មានអ្នកជំងឺ 92នាក់។

យ៉ាងហោចណាស់ មានរដ្ឋចំនួន8 នៅសហរដ្ឋអាមេរិក បានប្រកាសភាពអាសន្ន ដោយសារវីរុស COVID-19។ ការ ប្រកាសអាសន្ននេះនឹងអនុញ្ញាតឱ្យអាជ្ញាធរមូលដ្ឋាន ប្រើប្រាស់រាល់មធ្យោបាយបន្ទាន់ទាំងអស់ ដើម្បីទប់ទល់នឹងរោគរាតត្បាត។ ក្រៅពីនេះ ទីក្រុង និងតំបន់មួយចំនួនរបស់សហរដ្ឋអាមេរិក ក៏បានប្រកាសអាសន្នដោយខ្លួនឯង ទាក់ទិននឹងផ្នែកវេជ្ជសាស្ត្រ ដើម្បីទប់ស្កាត់ COVID-19។

លោកវេជ្ជបណ្ឌិត Anthony Fauci អគ្គនាយកនៃវិទ្យាស្ថានជាតិអាឡែរហ្សី និងជំងឺឆ្លងរបស់សហរដ្ឋអាមេរិក (National Institute of Allergy and Infectious Diseases) កាលពីថ្ងៃទី8មីនា បានឱ្យដឹងថា ប្រទេសនេះអាចនឹងពិចារណាក្នុងការរឹតត្បិតទៅលើការដើរហើររបស់ប្រជាជន ទៅកាន់តំបន់ដែលមានមនុស្សច្រើន បើសិនរោគរាតត្បាតនេះ នៅតែបន្តឆ្លងរាលដាល។ លោកបានបដិសេធចំពោះការប្រើវិធានការដាក់បម្រាមគោចរទ្រង់ទ្រាយធំដូចនៅប្រទេសចិន និងប្រទេសអ៊ីតាលី ក៏ប៉ុន្តែ លោកក៏បានសង្កត់ធ្ងន់ថា សេណារីយ៉ោ ណា ក៏អាចកើតមានឡើងនោះដែរ៕

ប្រភព៖ សារព័ត៌មានបរទេស

March 11, 2020

នាយកដ្ឋានប្រយុទ្ធនឹងជំងឺឆ្លងកម្ពុជា CDC សំណូមពរឱ្យអាជ្ញាធរ ចាត់វិធានការផ្លូវច្បាប់ លើអ្នកដែលហៅទូរស័ព្ទទៅរំខានដល់លេខ 115 បើសិនជាចាំបាច់

“យេីងខ្ញុំសូមជំរាបជូនសាធារណជនថា ការទូរស័ព្ទចូលលេខ 115 មកមន្រ្តីទទួលបន្ទុក 115 នេះ មាន70% បានការដេីម្បីសួរព័ត៌មានអំពីជំងឺ COVID-19 ព្រមទាំងរាយការណ៍ស្ថានភាពសុខភាព និង 30% ភាគរយមិនបានការ។” នេះគឺជាការលើកឡើងនៅលើទំព័រ Facebook របស់នាយកដ្ឋានប្រយុទ្ធនឹងជំងឺឆ្លងកម្ពុជា ហៅកាត់ថា CDC។

នៅវេលាម៉ោងប្រហែលជា12ៈ30នាទីថ្ងៃត្រង់នេះ នៅលើទំព័រ Facebook របស់នាយកដ្ឋានប្រយុទ្ធនឹងជំងឺឆ្លងកម្ពុជា (CDC) បានបង្ហោះសារមួយដែលផ្ញើជូនសាធារណជន និងអាជ្ញាធរដើម្បីជ្រៀប។ ក្នុងខ្លឹមសារនៃសារនេះ បានលើកឡើងថា ទូរស័ព្ទលេខ 115 គឺប្រើសម្រាប់ទទួលការហៅចូលពីអ្នកទាំងឡាយណាដែលមានបញ្ហាទាក់ទិននឹងវីរុស COVID-19។ ប៉ុន្តែ CDC ឱ្យដឹងថា ក្នុងចំណោមការហៅចូលលេខទូរស័ព្ទ 115នេះ គឺមានដល់ទៅ30% គឺជាការហៅមិនបានការ ដោយរួមមាន៖

1. ប្រេីកុមារតូចៗឱ្យនិយាយជំនួស
2. ទូរស័ព្ទចូលមិននិយាយ បេីកចោល
3. ទូរស័ព្ទចូល ចាក់ចំរៀងឱ្យស្តាប់
4. ប្រេីសម្ដីអសុរោះ និងពាក្យប្រមាថ
5. អ្នកស្រវឹង ទូរស័ព្ទចូលនិយាយស្តាប់មិនយល់
6. ។ ល។

នាយកដ្ឋានប្រយុទ្ធនឹងជំងឺឆ្លងកម្ពុជា (CDC) ក៏បានសំណូមពរដល់សាធារណជន ឱ្យទុកឱកាសដល់អ្នកដទៃដែលត្រូវការចាំបាច់ក្នុងការហៅទៅលេខ 115 ទាក់ទិននឹងបញ្ហា COVID-19។ CDC ថែមទាំងបានស្នើឱ្យអាជ្ញាធរដែនដី ចាត់វិធានការទៅតាមច្បាប់ ទៅលើជនណាដែលបានហៅចូលលេខទូរស័ព្ទ 115 ដោយគ្មានប្រយោជន៍ និងរំខានដល់ដំណើរការនៃលេខទូរស័ព្ទនេះ៕

March 11, 2020

Author: សឿន សំណាង