សឿន សំណាង - La Reine Media

COVID-19! ការិយាល័យអង្គការសហប្រជាជាតិ មានករណីឆ្លងវីរុស COVID-19 ដំបូងគេបង្អស់ហើយ!

មន្ត្រីការបរទេសម្នាក់របស់ប្រទេសហ្វីលីពីន បានក្លាយជាអ្នកផ្ទុកវីរុស COVID-19 ដំបូងគេបង្អស់នៅទីស្នាក់ការនៃអង្គការសហប្រជាជាតិ នាទីក្រុង New York សហរដ្ឋអាមេរិក។

“មកដល់ពេលនេះ គណៈប្រតិភូហ្វីលីពីន (នៅឯការិយាល័យអង្គការសហប្រជាជាតិ) កំពុងត្រូវបានស្នើឱ្យនៅមួយកន្លែង ហើយសមាជិកទាំងអស់ក៏ត្រូវបានស្នើឱ្យនៅដាច់ដោយឡែក និងស្វែងរកជំនួយផ្នែកសុខាភិបាល បើសិនជាមានអាការនៃជំងឺ COVID-19។ យើងកំពុងកំណត់ថា យើងបានឆ្លងមេរោគ” Reuters ដកស្រង់សេចក្ដីប្រកាសរបស់ឯកអគ្គរដ្ឋទូតស្តីទីហ្វីលីពីន ប្រចាំនៅអង្គការសហប្រជាជាតិ លោកស្រី Kira Christianne Azucena។

យោងតាមសារព័ត៌មាន Reuters ស្ត្រីដែលជាមន្ត្រីការបរទេសហ្វីលីពីននេះ ត្រូវបានរកឃើញថា មានផ្ទុកមេរោគ COVID-19 កាលពីថ្ងៃទី12មីនា ដែលនេះជាករណីដំបូងបង្អស់នៅឯអង្គការសហប្រជាជាតិ នាទីក្រុង New York។

គណៈប្រតិភូហ្វីលីពីននៅឯទីស្នាក់ការនៃអង្គការសហប្រជាជាតិ មានមន្ត្រីការបរទេសចំនួន12នាក់។ មន្ត្រីការបរទេសដែលបានឆ្លងមេរោគនេះ គឺជាអ្នកតំណាងឱ្យប្រទេសហ្វីលីពីន នៅឯគណៈកម្មការផ្នែកច្បាប់នៃមហាសន្និបាតអង្គការសហប្រជាជាតិ។

ឯកអគ្គរដ្ឋទូតស្តីទីរបស់ប្រទេស ហ្វីលីពីនប្រចាំនៅអង្គការសហប្រជាជាតិ លោកស្រី Kira Christianne Azucena បានឱ្យដឹងថា អ្នកការទូតដែលបានឆ្លង COVID-19នេះ បានទៅដល់ទីស្នាក់ការអង្គការសហប្រជាជាតិ កាលពីថ្ងៃទី9មីនា និងនៅទីនោះរយៈពេលប្រហែល1ម៉ោង។ នៅក្នុងអំឡុងពេលនោះ លោកស្រីអ្នកការទូតរូបនោះ មិនមានរោគសញ្ញាអ្វីនោះទេ។

ទីស្នាក់ការរបស់អង្គការសហប្រជាជាតិ នៅទីក្រុង New York សហរដ្ឋអាមេរិក

អ្នកការទូតខាងលើចាប់ផ្ដើមមានរោគសញ្ញានៅថ្ងៃទី10មីនា និងបានទៅពិនិត្យសុខភាព និងធ្វើតេស្តរកមេរោគ។

អង្គការសហប្រជាជាតិកំពុងចាត់វិធានការមួយចំនួនដើម្បីទប់ស្កាត់ការឆ្លងមេរោគកូរ៉ូណា នៅទីស្នាក់ការក្នុងទីក្រុង New York រួមមានទាំងការកាត់បន្ថយពេលនៃមហាសន្និបាតស្ដីអំពីសិទ្ធិរបស់ស្ត្រី ដែលមានរយៈពេល2ថ្ងៃ មកនៅត្រឹម1ថ្ងៃ ព្រមទាំងកាត់ចោលនូវកិច្ចប្រជុំខ្លីៗទៀតផង។

ចំណែកប្រតិភូមកពីបណ្ដាប្រទេស ក៏ត្រូវបានអង្គការសហប្រជាជាតិស្នើឱ្យកាត់បន្ថយចំនួនសមាជិកដែលនឹងមកចូលរួមប្រជុំនៅអង្គការសហប្រជាជាតិផងដែរ៕

ប្រភព៖ សារព័ត៌មានបរទេស

March 13, 2020

សហរដ្ឋអាមេរិក ចេញច្បាប់ហាមក្រុមហ៊ុនអ៊ីនធើណិត មិនឱ្យប្រើប្រាស់ឧបករណ៍បច្ចេកវិទ្យារបស់ក្រុមហ៊ុនចិន Huawei

ប្រធានាធិបតីសហរដ្ឋអាមេរិក លោក Donald Trump កាលពីម្សិលមិញ បានចេញច្បាប់ហាមក្រុមហ៊ុនអ៊ីនធើណិតក្នុងប្រទេសនេះ មិនឱ្យយកប្រាក់ជំនួយរបស់រដ្ឋាភិបាល ទៅទិញឧបករណ៍បច្ចេកវិទ្យាពីក្រុមហ៊ុនចិន Huawei។

ទន្ទឹមនឹង Huawei ច្បាប់នេះក៏ហាមក្រុមហ៊ុនទូរគមនាគមន៍នៅសហរដ្ឋអាមេរិក ទិញឧបករណ៍ពីបណ្ដាក្រុមហ៊ុនផ្សេងដែលត្រូវបានសហរដ្ឋអាមេរិក ចាត់ទុកថាជា “ការគំរាមកំហែងដល់សន្តិសុខជាតិ”។

ច្បាប់នេះក៏បានស្នើឱ្យគណៈកម្មការទូរគមនាគមន៍សហរដ្ឋ FCC (Federal Communications Commission) បង្កើតកម្មវិធីជំនួយដល់បណ្ដាក្រុមហ៊ុនអ៊ីនធើណិតតូចៗផងដែរ។ ក្រុមហ៊ុនតូចទាំងនោះ នឹងទទួលបានប្រាក់ជំនួយពីរដ្ឋាភិបាល បើសិនពួកគេយល់ព្រមបោះបង់ឧបករណ៍ ឬសេវាកម្មរបស់ចិន ដែលត្រូវបានហាមដោយអាមេរិក ចេញពីប្រព័ន្ធទូរគមនាគមន៍។

កាលពីថ្ងៃទី27មីនា សភាជាន់ខ្ពស់សហរដ្ឋអាមេរិក បានបោះឆ្នោតយល់ព្រមទម្លាក់កញ្ចប់ថវិកាជំនួយ ចំនួន1ពាន់លានដុល្លារ សម្រាប់ក្រុមហ៊ុនទូរគមនាគមន៍ណាដែលមិនប្រើប្រាស់ឧបករណ៍ដែលផលិតឡើងដោយក្រុមហ៊ុន ចិន Huawei និង ZTE។ កញ្ចប់ជំនួយនេះ នឹងប្រើប្រាស់ដើម្បីជួយដល់ក្រុមហ៊ុនអ៊ីនធើណិតតូចៗ ដែលកំពុងធ្វើសកម្មភាពនៅតាមតំបន់ជនបទ នៅទូទាំងសហរដ្ឋអាមេរិក។ នេះបើតាមការចុះផ្សាយរបស់សារព័ត៌មាន SCMP។

សមាគមទូរគមនាគមន៍មិនប្រើខ្សែនៅជនបទរបស់សហរដ្ឋអាមេរិក RWA (Rural Wireless Association) បានសរសើរអំពីកាយវិការនេះរបស់សភាជាន់ខ្ពស់ ប៉ុន្តែ សមាគមនេះយល់ថា 1ពាន់លានដុល្លារ គឺវា “មិនសមស្រប” នោះទេ។ នេះបើតាមសារព័ត៌មាន Reuters។

បច្ចុប្បន្ន ក្រុមហ៊ុនទូរគមនាគមន៍ជាច្រើននៅសហរដ្ឋអាមេរិក បានបំពាក់ឧបករណ៍ផ្សេងៗដែលផលិតដោយក្រុមហ៊ុនចិន Huawei និង ZTE ដោយសារតែវាមានតម្លៃទាប។ ប៉ុន្តែ ឧបករណ៍ទាំងនោះ ភាគច្រើន ត្រូវបានបំពាក់តាំងពីប៉ុន្មានឆ្នាំមុនមកហើយ។

សេតវិមាន ធ្លាប់បានលើកឡើង និងសង្ស័យថា Huawei បានប្រើប្រាស់បណ្ដាញទូរគមនាគមន៍ដើម្បីបើកដៃឱ្យរដ្ឋាភិបាលចិន ធ្វើសកម្មភាពចារកិច្ច។ រដ្ឋាភិបាលសហរដ្ឋអាមេរិក ក៏មានការព្រួយបារម្ភ ខ្លាចក្រុមហ៊ុនចិននឹង “បង្កការគំរាមកំហែងដល់សន្តិសុខជាតិ” បើសិនជាទទួលបានការអនុញ្ញាតឱ្យដំឡើងប្រព័ន្ធ 5G នៅលើទឹកដីសហរដ្ឋអាមេរិក។ ប៉ុន្តែ ក្រុមហ៊ុន Huawei តែងតែបដិសេធរាល់ការចោទប្រកាន់នេះ៕

ប្រភព៖ សារព័ត៌មានបរទេស

March 13, 2020

តភាគ រឿងសង្គ្រាមពាក្យសម្ដី អាមេរិក-ចិន ៖ ពិធីករទូរទស្សន៍អាមេរិក ទាមទារឱ្យជនជាតិចិនសុំទោស រឿងដើមកំណើតចម្លងមេរោគCOVID-19 មុននឹងប៉ះអ្នកនាំពាក្យប្រទេសចិនឆ្លើយបកវិញបែបស្លូតៗ តែឈឺៗ

ធ្វើឱ្យភាន់ភាំងគ្រប់ៗគ្នា នៅពេលដែល “ចេសស៊ី វ៉ាត់ធើរស៍” ពិធីករកម្មវិធីព័ត៌មានរបស់ Fox News និយាយខ្លាំងៗតាមរលកធាតុអាកាស ដោយជេរប្រមាថជនជាតិចិនថា ជាពួកល្មោភស៊ី ស៊ីតាំងពីប្រចៀវឆៅ និងពស់ និងទាមទារឱ្យមេដឹកនាំចិនចេញមកសូមទោស ដែលបានចម្លងវីរុសទូទាំងពិភពលោក មុននឹងប៉ះអ្នកនាំពាក្យក្រសួងការបរទេសចិនឆ្លើយបកវិញ ដោយលើករឿងមេរោគ H1N1 ដែលចេញមកពីអាមេរិក ធ្វើឱ្យមនុស្សស្លាប់រាប់មិនអស់ ក៏មិនដែលសូមទោសដូចគ្នា។

រឿងហេតុកើតឡើងដោយសារតែ ពិធីករវ័យ 41ឆ្នាំ បានទាមទារឱ្យជនជាតិចិន ចេញមកសូមទោសជាផ្លូវការ ដោយសុំឱ្យធ្វើឡើងភ្លាមៗដោយប្រធានាធិបតី ស៊ី ជីនភីង ឬស្ថានទូតចិនក៏បានដែរ…។

“កូរ៉ូណាវីរុស វាមានដើមកំណើតមកពីចិន ហើយខ្ញុំនៅមិនទាន់បានឮពាក្យអ្វីមួយម៉ាត់សោះឡើយពីពួកជនជាតិចិន ត្រឹមតែពាក្យសូមទោសធម្មតាៗមួយម៉ាត់ គួរតែធ្វើទៅ និងគួរតែធ្វើតាំងពីយូរហើយ”

បន្ទាប់ពីនោះ ពិធីកររូបនោះ ថែមទាំងនិយាយបែបរើសអើងជនជាតិចិនឥតឈប់ ដោយបានប្រាប់ថា “ជាពួកល្មោភស៊ី” និង “រដ្ឋាភិបាលកុម្មុយនិស្តចិន បណ្ដោយឱ្យប្រជាជនអត់ឃ្លាន”

ចំណែកបណ្ដាពិធីកររួមកម្មវិធីឯទៀត បានចាប់ផ្ដើមសម្ដែងអាការអៀនខ្មាស់ចំពោះពាក្យសម្ដីរបស់ ចេសស៊ី វ៉ាត់ធើរស៍ ព្រមទាំងបានព្យាយាមហាមមិនឱ្យ ចេសស៊ី និយាយបន្តទៀត។

ខាងចិនឆ្លើយបកវិញបែបទន់ភ្លន់ តែឈឺៗ

ក្នុងការឆ្លើយនឹងសំណួររបស់អ្នកសារព័ត៌មានដែលសួរទៅលោក ចាវ លីចៀន អ្នកនាំពាក្យក្រសួងការបរទេសចិន ដែលបានសួរលោក ពាក់ព័ន្ធនឹងពាក្យសម្ដីរបស់ ចេសស៊ី វ៉ាត់ធើរស៍ ខាងលើ លោកចាវ បានឆ្លើយតបត្រឹមតែថា វាជារឿងកំប្លែង ហើយពិធីករម្នាក់ហ្នឹង “អំណួត អគតិ និងគ្មានដឹងស្អីទាំងអស់”

ដោយលោកបានឆ្លើយថា “មុនគេបង្អស់ វីរុស គឺជាសត្រូវរបស់មនុស្សជាតិទាំងមូល ហើយអ្នកដែលបានឆ្លងមេរោគទូទាំងពិភពលោក គឺជាជនរងគ្រោះ ដូច្នេះខ្ញុំមើលមិនឃើញសោះថា ទ្រឹស្ដីការសូមទោសដែលពោលមកនោះ វាសមល្មមដែលយើងនឹងធ្វើតាមនៅត្រង់ណាទៅ?” បន្ទាប់ពីនោះ លោកនៅបានអះអាងពីអង្គការសុខភាពពិភពលោក(WHO)ដែលជាមិត្តជាមួយចិន ដោយបានថ្លែងថា ខាងអង្គការសុខភាពពិភពលោកធ្លាប់បានបញ្ជាក់ជាច្រើនលើកហើយថា ការសាងត្រាបាបដោយការមើលងាយ និងរើសអើងគ្នា វាគ្រោះថ្នាក់ខ្លាំងជាងមេរោគវីរុសទៅទៀត។

បន្ទាប់មក លោកចាវ នៅបានថ្លែងទៀតថា វាគ្មានហេតុផលអី ដែលចិនត្រូវសម្ដែងការសូមទោសនោះទេ “ព្រោះដើមកំណើតរបស់មេរោគវីរុស ពេលនេះនៅមិនទាន់មានការអះអាងច្បាស់លាស់នៅឡើយ ចិនខ្លួនឯង ក៏ជាប្រទេសដែលត្រូវរងគ្រោះពីមេរោគវីរុសនេះធ្ងន់ធ្ងរដូចគ្នា ជាជនរងគ្រោះដែលត្រូវប្រឈមនឹងការខំប្រឹងប្រែងគ្រប់គ្រងការឆ្លងរាលដាលរបស់វីរុសនេះឱ្យបាន ដូចគ្នា”

និងថែមទាំងសួរត្រឡប់ទៅវិញថា កាល H1N1 កើតចេញពីអាមេរិក តើមានអ្នកណាទាមទារឱ្យចេញមកសូមទោសខ្លះទេ?

លោកចាវ លីចៀន ថ្លែងថា “H1N1 (គ្រុនផ្ដាសាយជ្រូក) ដែលមានដើមកំណើតពីសហរដ្ឋអាមេរិក ឆ្លងរាលដាលទូទាំង 214ប្រទេស ដែលធ្វើឱ្យមានមនុស្សស្លាប់ទូទាំងពិភពលោកមិនតិចជាង 18,400នាក់នោះ តើមានអ្នកណាទាមទារពាក្យសូមទោសពីអាមេរិកដែរទេ?!”

***កំណត់សម្គាល់៖ យ៉ាងណាក៏ដោយ ការសិក្សាស្រាវជ្រាវខាងវិទ្យាសាស្ត្របានបង្ហើបឱ្យដឹងថា ការពិតទៅ ដើមកំណើតនៃមេរោគវីរុស H1N1 មានប្រភពមកពីប្រទេសមិកស៊ិក។

ប្រភព ៖ សារព័ត៌មានបរទេស

March 13, 2020

រដ្ឋមន្ត្រីក្រសួងមហាផ្ទៃអូស្ត្រាលី ឆ្លង COVID-19 ខណៈប្រទេសនេះមានអ្នកស្លាប់ចំនួន3នាក់

រដ្ឋមន្ត្រីក្រសួងមហាផ្ទៃអូស្ត្រាលី លោក Dutton ត្រូវបានពិនិត្យឃើញថា មានផ្ទុកមេរោគ COVID-19 និងបានបញ្ជូនទៅកាន់មន្ទីរពេទ្យមួយនៅក្នុងរដ្ឋ Queensland ដើម្បីនៅដាច់ដោយឡែក និងទទួលការព្យាបាល។

“កាលពីព្រឹកនេះ ខ្ញុំបានក្រោកពីគេង ស្រាប់តែមានអារម្មណ៍ថាក្ដៅខ្លួន និងឈឺបំពង់ក។ ខ្ញុំក៏បានទាក់ទងទៅកាន់ក្រុមគ្រូពេទ្យ ហើយក៏បានធ្វើតេស្តរកមេរោគ។ ក្រោយមក ពួកគេឱ្យដឹងថា ខ្ញុំបានឆ្លងមេរោគ COVID-19” នេះជាការឱ្យដឹងរបស់រដ្ឋមន្ត្រីក្រសួងមហាផ្ទៃអូស្ត្រាលី លោក Dutton។

បច្ចុប្បន្ន លោករដ្ឋមន្ត្រី កំពុងសម្រាកព្យាបាលនៅឯមន្ទីរពេទ្យ។ លោកបានឱ្យដឹងដែរថា លោកមានសុខភាពល្អប្រសើរនៅឡើយ។

លោក Dutton គឺជាអ្នកនយោបាយអូស្ត្រាលីទី1ហើយ ដែលបានឆ្លងវីរុស COVID-19។

គិតមកដល់ពេលនេះ ប្រទេសអូស្ត្រាលី មានអ្នកឆ្លងវីរុសកូរ៉ូណាចំនួន 150នាក់ ក្នុងនោះមានអ្នកស្លាប់ចំនួន 3នាក់ ខណៈដែលនៅទូទាំងពិភពលោក ចំនួនអ្នកដែលបានឆ្លងមេរោគនេះ កើនឡើងដល់128,343នាក់ ក្នុងនោះមាន 4,720នាក់ បានបាត់បង់ជីវិត៕

ប្រភព៖ សារព័ត៌មានបរទេស

March 13, 2020

កម្ពុជាផ្អាកការអនុញ្ញាតឱ្យនាវាដឹកអ្នកដំណើរ ឬនាវាទេសចរណ៍បរទេស ដែលចូលមកកម្ពុជាតាមច្រកក្អមសំណ

ក្រសួងសាធារណការ និងដឹកជញ្ជូនបានចេញសេចក្ដីប្រកាសថា កម្ពុជាសម្រេចផ្អាកការអនុញ្ញាតឱ្យនាវាទេសចរណ៍ ឬនាវាដឹកអ្នកដំណើរបរទេស ចូលមកកាន់កម្ពុជាចាប់ពីថ្ងៃនេះ រហូតដល់មានការសម្រេចចិត្តសាជាថ្មី។ បម្រាមនេះ នឹងត្រូវអនុវត្តទៅលើតែនាវាទេសចរណ៍ ឬនាវាដឹកអ្នកដំណើរដែលចូលមកកម្ពុជា តាមច្រកក្អមសំណតែប៉ុណ្ណោះ។

សេចក្តីប្រកាសព័ត៌មានរបស់អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ នៃក្រសួងសាធារណការ និងដឹកជញ្ជូននេះ បានឱ្យដឹងថា ការសម្រេចបែបនេះគឺដោយសារតែការឆ្លងរាលដាលនៃវីរុស COVID-19 ពីអ្នកដំណើរបរទេសដែលធ្វើដំណើរតាមនាវាទេសចរណ៍ ដែលបានចូលមកសំចតក្នុងកំពង់ផែកម្ពុជា។

សូមបញ្ជាក់ថា មកដល់បច្ចុប្បន្ន កម្ពុជាបានរកឃើញអ្នកផ្ទុកមេរោគកូរ៉ូណា COVID-19 ចំនួន5ករណី ដែលសុទ្ធសឹងតែបានឆ្លងពីជនបរទេស។

March 13, 2020

បេសកកម្មទៅកាន់ពិភពព្រះអង្គារ ដើម្បីស្វែងរកសភាវរស់ ត្រូវបានពន្យារពេល ដោយសារតែ…

ផែនការបញ្ជូនរ៉ូបូតឡើងទៅស្វែងរកសភាវរស់នៅលើពិភពព្រះអង្គារ របស់រុស្ស៊ី និងទីភ្នាក់ងារអវកាសអឺរ៉ុប(ESA) ត្រូវបានពន្យារពេលចំនួន2ឆ្នាំ ដោយសារបញ្ហាបច្ចេកទេស និងផលប៉ះពាល់របស់រោគរាតត្បាត COVID-19។

ទីភ្នាក់ងារអវកាសរុស្ស៊ី(Roscosmos) និងទីភ្នាក់ងារអវកាសអឺរ៉ុប(ESA) បានសម្រេចចិត្តពន្យាពេលក្នុងការបាញ់បង្ហោះយានអវកាសរបស់ពួកគេទៅខែសីហា ឬខែកញ្ញា ឆ្នាំ2022 ពោលគឺយឺតជាង2ឆ្នាំ ធៀបនឹងផែនការដែលបានគ្រោងទុក។ ក្រុមអ្នកគ្រប់គ្រងគម្រោងបានឱ្យដឹងថា ពួកគេត្រូវធ្វើការពិសោធជាច្រើនទៀត ដើម្បីធានាឱ្យបានថា រាល់ផ្នែកនៃយានអវកាស ដំណើរការល្អបំផុតក្នុងបេសកកម្មទៅកាន់ឋានព្រះអង្គារ។

“នោះគឺជាការសម្រេចចិត្តដ៏លំបាកមួយ ប៉ុន្តែវាចាំបាច់ណាស់” Dmitry Rogozin អ្នកដឹកនាំទីភ្នាក់ងារអវកាស Roscosmos របស់សហព័ន្ធរុស្ស៊ី ថ្លែងអំពីការពន្យាពេលលើការបាញ់បង្ហោះយានអវកាសទៅកាន់ពិភពព្រះអង្គារ។ តាមផែនការដំបូង យានអវកាសគ្មានមនុស្សបើកបរ ExoMars ដែលនឹងមានភារកិច្ចនាំរ៉ូបូតឡើងទៅកាន់ពិភពព្រះអង្គារដើម្បីស្វែងរកសភាវរស់នេះ នឹងត្រូវបាញ់បង្ហោះនៅចុងឆ្នាំ បន្ទាប់ពីបានពន្យាពេលជាច្រើនលើក ប៉ុន្តែពេលនេះ វានៅតែត្រូវបានពន្យាពេលម្ដងទៀត។

អគ្គនាយកនៃទីភ្នាក់ងារអវកាស ESA លោក Jan Worner សង្កត់ធ្ងន់ថា “ទាំង2ភាគី សុទ្ធតែចង់ឱ្យបេសកកម្មនេះទទួលបានជោគជ័យ 100%។ សកម្មភាពសាកល្បងនានានឹងជួយធានាសុវត្ថិភាពសម្រាប់ការបាញ់បង្ហោះ ហើយតាមរយៈនេះ យើងនឹងទទួលបានលទ្ធផលល្អបំផុតផ្នែកវិទ្យាសាស្ត្រ”។ នេះបើតាមសារព័ត៌មាន AFP។

ទន្ទឹមនឹងមូលហេតុបច្ចេកទេស ការពន្យារពេលខាងលើក៏បានកើតឡើងដោយសារផលប៉ះពាល់ពីរោគរាតត្បាត COVIVD-19 ផងដែរ។ Rogozin បានឱ្យដឹងថា បទបញ្ជារឹតបន្តឹងការធ្វើដំណើររវាងបណ្ដាប្រទេស បានធ្វើឱ្យក្រុមអ្នកវិទ្យាសាស្ត្រជួបបញ្ហាក្នុងការសហការគ្នា ដើម្បីអនុវត្តគម្រោងការនេះ។

កម្មវិធីអវកាសរួម ExoMars ត្រូវបានគេមើលឃើញថាជានិមិត្តរូបសំខាន់ក្នុងកិច្ចសហប្រតិបត្តិការ រវាងរុស្ស៊ី និងអឺរ៉ុប នៅក្នុងស្ថានភាពតានតឹងជាមួយអ៊ុយក្រែន និងស៊ីរី។ ទីភ្នាក់ងារអវកាស Roscosmos របស់រុស្ស៊ី នឹងផ្ដល់កន្លែងបាញ់បង្ហោះ កន្លែងចុះចត និងម៉ូឌុលដើម ចំណែកទីភ្នាក់ងារអវកាសអឺរ៉ុប ESA នឹងទទួលខុសត្រូវក្នុងការអភិវឌ្ឍ និងគ្រប់គ្រងដំណើរការរ៉ូបូត Rosalind Franklin។

រ៉ូបូតខាងលើនឹងត្រូវបានបញ្ជាពីមជ្ឈមណ្ឌលអវកាសមួយ នៅក្នុងតំបន់ Torino ភាគខាងជើងប្រទេសអ៊ីតាលី ដែលជាកន្លែងកំពុងរងគ្រោះខ្លាំងដោយសាររោគ COVID-19 នៅអឺរ៉ុប។ Rosalind Franklin គឺជាឧបករណ៍ដំបូងគេដែលមានសមត្ថភាពស្វែងរកសភាវរស់នៅក្រោមដី ជម្រៅ 2ម៉ែត្រ៕

ប្រភព៖ សារព័ត៌មានបរទេស

March 13, 2020

ភរិយារបស់នាយករដ្ឋមន្ត្រីកាណាដា ឆ្លងវីរុស COVID-19 បន្ទាប់ពីបានត្រឡប់មកពីប្រទេសអង់គ្លេស

លោកស្រី Sophie Gregoire ដែលជាភរិយារបស់នាយករដ្ឋមន្ត្រីកាណាដា ត្រូវបានធ្វើតេស្តរកឃើញថា មានផ្ទុកវីរុស COVID-19 បន្ទាប់ពីបានវិលត្រឡប់មកពីប្រទេសអង់គ្លេស ប៉ុន្តែ នៅមានសុខភាពល្អ និងមានអាការរោគស្រាលប៉ុណ្ណោះ។

“ដំបូង ខ្ញុំសូមអរគុណយ៉ាងជ្រាលជ្រៅចំពោះអ្នកទាំងអស់ដែលបានសួរសុខទុក្ខខ្ញុំ។ បើទោះជាត្រូវឆ្លងកាត់អាការរោគមិនស្រួលខ្លួនដោយសារវីរុស តែខ្ញុំនឹងមានសុខភាពល្អឡើងវិញមិនខាន” លោកស្រី Sophie Gregoire Trudeau ដែលកំពុងបង្ខាំងខ្លួននៅក្នុងផ្ទះ បានឱ្យដឹងបែបនេះនៅក្នុងសេចក្ដីប្រកាសកាលពីថ្ងៃទី12មីនាកន្លងទៅ។

ការិយាល័យនាយករដ្ឋមន្ត្រីកាណាដា ក៏បានទទួលស្គាល់ថា លោកស្រី Sophie បានឆ្លងមេរោគកូរ៉ូណានេះ។ ការិយាល័យនេះក៏បានឱ្យដឹងថា លោកនាយករដ្ឋមន្ត្រី Trudeau មិនទាន់បានធ្វើតេស្តរកមេរោគនៅឡើយ ដោយសារតែគាត់ពុំមានរោគសញ្ញាដែលគួរសង្ស័យ ប៉ុន្តែលោកនឹងចាប់ផ្ដើមបង្ខាំងខ្លួនឯងក្នុងរយៈពេល14ថ្ងៃ។

លោកស្រី Sophie Gregoire ទើបតែបានវិលត្រឡប់មកប្រទេសកាណាដាវិញ បន្ទាប់ពីបានទៅបំពេញបេសកកម្មនៅឯទីក្រុងឡុងដ៍ ប្រទេសអង់គ្លេស ហើយក៏ចាប់ផ្ដើមមានអាការមិនស្រួលខ្លួនកាលពីយប់ថ្ងៃទី11មីនា ប៉ុន្តែ ភ្លាមនោះ លោកស្រីក៏បានស្វែងរកជំនួយពីក្រុមគ្រូពេទ្យ។

គិតមកដល់ពេលនេះ ប្រទេសកាណាដា បានរកឃើញអ្នកផ្ទុកវីរុសកូរ៉ូណាចំនួន 117នាក់ ក្នុងនោះមានម្នាក់បានបាត់បង់ជីវិត។

COVID-19 បានចាប់ផ្ដើមឆ្លងរាលដាលនៅប្រទេសចិន កាលពីខែធ្នូ ឆ្នាំ2019 ហើយមកដល់ពេលនេះ វាបានបង្ហាញខ្លួននៅក្នុងប្រទេស និងដែនដីចំនួន130 នៅទូទាំងពិភពលោក បណ្ដាលឱ្យមានអ្នកឆ្លងជំងឺជាង 128,343នាក់ ក្នុងនោះមាន 4,720នាក់បានស្លាប់ និង68,324នាក់បានជាសះស្បើយ៕

ប្រភព៖ សារព័ត៌មានបរទេស

March 13, 2020

សង្គ្រាមពាក្យសម្ដីចាប់ផ្ដើមហើយ…អ្នកនាំពាក្យក្រសួងការបរទេសចិនចោទថា ទាហានអាមេរិកជាអ្នកនាំវីរុសកូរ៉ូណាចូលទៅចិន!

អ្នកនាំពាក្យក្រសួងការបរទេសប្រទេសចិន បានធ្វីតធើរចោទប្រកាន់ ព្រមជាមួយឃ្លីបវីដេអូដែលលោក រ៉ូប៊ើត រេដហ្វ៊ីល អគ្គនាយកមជ្ឈមណ្ឌលគ្រប់គ្រង និងការពាររោគរបស់សហរដ្ឋអាមេរិកដែលបានចូលបកស្រាយចំពោះគណៈកម្មាធិការគ្រប់គ្រង និងកែសម្រួល នៃសភាតំណាងរាស្ត្រ ដោយបានទទួលស្គាល់ថា មានជនជាតិអាមេរិកាំងដែលស្លាប់ដោយសាររោគគ្រុនផ្ដាសាយធំ ត្រូវបានរកឃើញថាមានឆ្លងមេរោគវីរុសកូវីដ-19 មែន។

កងទ័ពសហរដ្ឋអាមេរិក អាចនៅពីក្រោយហេតុការណ៍នេះ។ ជាទ្រឹស្ដីផ្សំគំនិតដែលផ្សព្វផ្សាយនៅលើសារព័ត៌មានសង្គមអនឡាញរបស់ចិនកាលពីពេលថ្មីៗនេះថា ទាហានសហរដ្ឋអាមេរិកបាននាំមេរោគវីរុសកូរ៉ូណាប្រភេទថ្មីចូលទៅក្នុងវូហាន ក្នុងអំឡុងពេលចូលរួមព្រឹត្តិការណ៍ប្រកួតកីឡាទាហានពិភពលោក ឆ្នាំ2019(Military World Games) ដែលរៀបចំឡើងនៅមណ្ឌលហ៊ូពេយ អំឡុងថ្ងៃទី18 ដល់ 27 ខែតុលា ឆ្នាំ2019។

ការចោទប្រកាន់របស់អ្នកនាំពាក្យក្រសួងការបរទេសចិននេះ បានកើតឡើងបន្ទាប់ពីលោក រ៉ូប៊ើត អូប្រៃអាន់ ទីប្រឹក្សាសន្តិសុខជាតិសហរដ្ឋអាមេរិក បានរិះគន់ចិនថា បានឆ្លើយតបនឹងការឆ្លងរាតត្បាតរបស់វីរុសនៅក្នុងទីក្រុងវូហានកាលពីចុងឆ្នាំកន្លងទៅ យឺតយ៉ាវ និងមិនស្មោះត្រង់គ្រប់គ្រាន់ ធ្វើឱ្យពិភពលោកខាតពេលអស់ជិត 2ខែ សម្រាប់ការត្រៀមខ្លួនទប់ទល់ស្ថានការណ៍ឆ្លងរាតត្បាតនេះ តែលោក ចាវ លីចៀន បានធ្វើតធ្វើរតបថា គឺសហរដ្ឋអាមេរិកទៅវិញទេ ដែលខ្វះភាពស្មោះត្រង់ “អ្នកជំងឺដំបូងគេ(Patient zero) ក្នុងសហរដ្ឋអាមេរិកចាប់ផ្ដើមមកនៅពេលណា?! មានមនុស្សប៉ុន្មាននាក់ហើយដែលឆ្លងមេរោគ? ឯណាឈ្មោះមន្ទីរពេទ្យ? អាចជាទាហានសហរដ្ឋអាមេរិក ដែលនាំការឆ្លងរាលដាលដ៏ធំទៅក្នុងទីក្រុងវូហាន…ចូរបង្ហាញព័ត៌មានដល់សាធារណជនយ៉ាងស្មោះត្រង់!! សហរដ្ឋអាមេរិកត្រូវតែអធិប្បាយប្រាប់ចិនឱ្យបានចំពោះរឿងនេះ!”។

លោក ចាវ ទើបតែឡើងមកបំពេញតួនាទីជាអ្នកនាំពាក្យនៃក្រសួងការបរទេសចិនបានមិនយូរប៉ុន្មាន បន្ទាប់ពីធ្វើជាអនុប្រធានស្ថានទូតចិនប្រចាំនៅប្រទេសប៉ាគីស្ថាន និងតែងតែប្រើប្រាស់ប្រព័ន្ធធ្វីតធើរឆ្លើយតបបែបកាប់ឆៅៗ និងក្ឌុងក្ឌាំងបែបនេះជានិច្ច។ កាលពីអតីត លោកធ្លាប់មានជម្លោះពាក្យសម្ដីនៅលើធ្វីតធើរ ជាមួយអតីតទីប្រឹក្សាសន្តិសុខជាតិអាមេរិក លោកស្រី ស៊ូហ្សាន រ៉ៃស៍ ដែលធ្វើឱ្យលោកស្រី រ៉ៃស៍ ចោទលោក ចាវ ថា រើសអើងជាតិសាសន៍ពណ៌សម្បុរ។

នៅមុននេះ ក្នុងថ្ងៃជាមួយគ្នា លោក Geng Shuang អ្នកនាំពាក្យនៃកងទ័ពចិន ក៏បានរិះគន់បណ្ដាក្រុមមន្ត្រីសហរដ្ឋអាមេរិកដែរថា បានសម្ដែងការយល់ឃើញដោយគ្មានភាពទទួលខុសត្រូវ ក្រោយពីបានស្ដីបន្ទោសការទប់ទល់មេរោគវីរុសរបស់រដ្ឋាភិបាលក្រុងប៉េកាំង ធ្វើឱ្យពិភពលោកត្រូវប្រឈមនឹងស្ថានការណ៍ឆ្លងរាតត្បាតធ្ងន់ធ្ងរ…តែគឺជាចិនទៅវិញទេ ដែលខំព្យាយាមពន្យឺតការឆ្លងរាតត្បាត និងជួយពន្យារពេលឱ្យពិភពលោកបានត្រៀមខ្លួនជាស្រេចសម្រាប់ការទប់ទល់មេរោគវីរុស និងសង្ឃឹមថា អាជ្ញាធរសហរដ្ឋអាមេរិកនឹងលះបង់កម្លាំងថាមពលជាមួយការទប់ទល់មេរោគវីរុស បង្កើនការសហការ ជំនួសឱ្យការស្ដីបន្ទោសចិន៕

ប្រភព៖ សារព័ត៌មានបរទេស

March 13, 2020

រឿងពិតដែលកំពុងល្បីក្នុងបណ្ដាញសង្គមនៅប្រទេសចិន ក្រោយការឆ្លងរាលដាលវីរុសក្នុងប្រទេសនេះស្ងប់ស្ងាត់…

“បើដឹងថា នឹងមានថ្ងៃនេះ(ដែលមានអ្នកស្លាប់ច្រើនបែបនេះ) ខ្ញុំនឹងមិនខ្វល់អ្វីទាំងអស់ ទោះជាត្រូវទទួលទោសធ្ងន់ធ្ងរខាងវិន័យយ៉ាងណាក៏ដោយ ក៏ខ្ញុំនឹងនិយាយយ៉ាងចំហ…” លោកស្រីវេជ្ជបណ្ឌិត អៃ ហ្វឹន។

រឿងធំ រឿងក្ដៅប្រចាំសប្ដាហ៍ដែលត្រូវបានស៊ែរតៗគ្នានៅក្នុងបណ្ដាញសង្គមដ៏ធំមួយនៅក្នុងប្រទេសចិន វីឆាត(WeChat) គឺរឿងរ៉ាវរបស់ “អ្នកប្រកាសដំណឹង” លោកស្រីវេជ្ជបណ្ឌិត អៃ ហ្វឹន ប្រធានផ្នែកសង្គ្រោះបន្ទាន់ នៃមន្ទីរពេទ្យកណ្ដាល ទីក្រុងវូហាន។ លោកស្រីជាមនុស្សដំបូងគេ ដែលចេញមកបង្ហើបរឿងរោគរាតត្បាតវីរុសកូរ៉ូណាប្រភេទថ្មីក្នុងរង្វង់គ្រូពេទ្យដូចគ្នានៅក្នុងវូហាន ដែលតមកលោកវេជ្ជបណ្ឌិត លី វឹនលៀង អ្នកពលីជីវិតក្នុងសមរភូមិវីរុសកូវីដ និងគ្រូពេទ្យដទៃទៀតបាននាំគ្នាចេញមកជួយគ្នា “ផ្សាយដំណឹង”។

“នៅថ្ងៃទី30 ធ្នូ ឆ្នាំ2019 លោកស្រីវេជ្ជបណ្ឌិត អៃ ហ្វឹន បានអានរបាយការណ៍ករណីអ្នកជំងឺឆ្លងមេរោគវីរុសរលាកសួតអាថ៌កំបាំងម្នាក់ លោកស្រីបានប្រើគំនូសរង្វង់មូលពណ៌ក្រហមបញ្ជាក់ដោយតួអក្សរថា “វីរុសកូរ៉ូណាSARS”។ នៅពេលនិស្សិតពេទ្យសួរពាក់ព័ន្ធនឹងករណីនេះ លោកស្រីបានថតរបាយការណ៍នោះ បញ្ជូនបន្តទៅឱ្យមិត្តភក្តិរបស់និស្សិតម្នាក់នោះ។ នៅរាត្រីនោះឯង របាយការណ៍នោះត្រូវបានបញ្ជូនបន្តទៅទូទាំងពិភពគ្រូពេទ្យក្នុងទីក្រុងវូហាន។ ក្រុមអ្នកដែលបញ្ជូនបន្តរបាយការណ៍ 1ច្បាប់នោះ មានទាំងគ្រូពេទ្យ 8នាក់ ដែលត្រូវប៉ូលិសចាប់ខ្លួនយកទៅសាកសួរ និងដាក់ទោសខាងវិន័យ។

លោកស្រីវេជ្ជបណ្ឌិត អៃ ហ្វឹន ត្រូវប្រឈមនឹងបញ្ហាលំបាក ពីបទជាដើមរឿងនៃការបញ្ជូនបន្តរបាយការណ៍នោះ។ គណៈកម្មាធិការត្រួតពិនិត្យវិន័យប្រចាំមន្ទីរពេទ្យ បានកោះហៅលោកស្រីទៅសាកសួរ និងបាន “ទិតៀន និងដាក់ទោសកម្រិតធ្ងន់ធ្ងរ ជាករណីដែលមិនធ្លាប់មានពីមុនមក”។ លោកស្រីត្រូវបានថ្កោលទោសថា ជាអ្នកជំនាញការដែលបង្កើតព័ត៌មានចចាមអារ៉ាម។

“អៃ ហ្វឹន គឺជាករណីគ្រូពេទ្យម្នាក់ទៀតដែលត្រូវបានសាកសួរ កោះហៅទៅទិតៀន ដាក់ទោស និងអប់រំវិន័យ” ដែលលេចឡើងច្បាស់។ កាលពីពេលមុនហ្នឹង មានរបាយការណ៍ទាំងក្នុងសារព័ត៌មានរបស់រដ្ឋចិនដូចជា ស៊ីនហួ និងសារព័ត៌មានប្រជាជន(People daily) គឺករណីលោកវេជ្ជបណ្ឌិត លី វឹនលៀង ដែលជាគ្រូពេទ្យតែម្នាក់គត់ដែលចេញមក “ប្រកាសដំណឹង”។ (លោកវេជ្ជបណ្ឌិត លី អាយុ 34ឆ្នាំ បានស្លាប់កាលពីថ្ងៃទី7 កុម្ភៈ ដោយសារមេរោគវីរុសកូរ៉ូណាប្រភេទថ្មី)។

មនុស្សម្នាដែលបានដឹងរឿងរ៉ាវទាំងនេះ បានដាក់រហស្សនាមឱ្យលោកស្រីវេជ្ជបណ្ឌិត អៃ ហ្វឹន ថាជា “អ្នកផ្លុំកញ្ចែ(ប្រកាសអាសន្ន)” តែលោកស្រីវេជ្ជបណ្ឌិត អៃ ហ្វឹន បានសុំកែរហស្សនាមរបស់ខ្លួនឯងថាជា “អ្នកចែកកញ្ចែ” វិញ។

រឿងរ៉ាវ “អ្នកចែកកញ្ចែ” ដែលអ្នកលេងអ៊ីនធើណិត ស៊ែរតៗគ្នាយ៉ាងភ្លូកទឹកភ្លូកដីនៅក្នុង WeChat នេះ ចេញមកពី “រឿងលើទំព័រទី1” របស់ព្រឹត្តិបត្រចិនឈ្មោះថា “បុគ្គល” ដែលបានបោះពុម្ពផ្សាយនៅថ្ងៃទី10 ខែមីនា ឆ្នាំ2020 គឺជាបទសម្ភាសរបស់លោកស្រីវេជ្ជបណ្ឌិត អៃ ហ្វឹន ប្រធានផ្នែកសង្គ្រោះបន្ទាន់នៃមន្ទីពេទ្យទីក្រុងវូហាន…តែនៅពេលព្រឹត្តិបត្រនេះ ចេញលក់នៅលើតូបកាសែតកាលពីថ្ងៃអង្គារ(ទី10មីនា) បានត្រឹមតែ 3ម៉ោងគត់ ក៏ត្រូវប្រកាសឱ្យដកចេញពីគ្រប់តូបកាសែតវិញភ្លាម។

អ្នកយកព័ត៌មាននៃព្រឹត្តិបត្រ “បុគ្គល” ដែលសម្ភាសលោកស្រីវេជ្ជបណ្ឌិត អៃ ហ្វឹន បានប្រាប់ថា គាត់បានសម្ភាសលោកស្រីវេជ្ជបណ្ឌិត អៃ ហ្វឹន នៅថ្ងៃទី1 មីនា នៅពេលព្រឹកព្រលឹម ម៉ោងប្រហែល5។ បន្ទាប់ពីនោះប្រមាណជាកន្លះម៉ោង មិត្តរួមការងាររបស់លោកស្រីវេជ្ជបណ្ឌិត អៃ ហ្វឹន គឺលោកវេជ្ជបណ្ឌិត ចៀង ស្វៀស៊ីង ប្រធានផ្នែកវះកាត់ថៃរ៉យដ៍ និងដើមទ្រូង នៃមន្ទីរពេទ្យកណ្ដាល ទីក្រុងវូហានក៏ស្លាប់ដោយសារមេរោគវីរុសកូវីដ-19 ហើយ 2ថ្ងៃតមកទៀត អនុប្រធានផ្នែកជំងឺចក្ខុ(ភ្នែក) នៃមន្ទីរពេទ្យកណ្ដាល ទីក្រុងវូហាន លោកវេជ្ជបណ្ឌិត មើយ ចុងមិង ក៏ស្លាប់ដោយសារវីរុសកូវីដ-19 ដូចគ្នា(គ្រូពេទ្យ មើយ ជាមិត្តសម្លាញ់នឹងលោកគ្រូពេទ្យ លី វឹនលៀង)។

រដ្ឋបាលចិនបានធ្វើពិធីកាន់ទុក្ខសពលោកវេជ្ជបណ្ឌិត លី វឹនលៀង អាយុ 34ឆ្នាំ ស្លាប់កាលពីថ្ងៃ7 កុម្ភៈ ដោយសារមេរោគវីរុសកូរ៉ូណាប្រភេទថ្មី។ លោកគ្រូពេទ្យ លី គឺជាមនុស្សម្នាក់ដែលចេញមកឱ្យដំណឹងពីការ “ឆ្លងរាលដាលនៃវីរុសប្រភេទថ្មី”

បន្ទាប់ពីមានដំណឹងពីការប្រមូលព្រឹត្តិបត្រ “បុគ្គល” នៅក្នុងប្រទេសចិនដែលបោះពុម្ពផ្សាយពីបទសម្ភាសរបស់លោកស្រីវេជ្ជបណ្ឌិត អៃ ហ្វឹន រួចមក ក៏មានការរៀបចំការសម្ដែង “សិល្បកម្មប្រជាជន” ជារឿងរ៉ាវរបស់ “អ្នកផ្លុំកញ្ចែ” ក្នុងវើហ្សឹន 33ភាសា និងលេខកូដ ទាំងភាសាបុរាណចិនដែលចារិកនៅលើស្នូកអណ្ដើក តួអក្សរប្រ៊េលល៍(សម្រាប់អ្នកពិការភ្នែក)មកមើលជាគំរូវើហ្សឹនភាសា និងលេខកូដផ្សេងៗដែលរៀបរាប់ពីរឿងរ៉ាវរបស់ “អ្នកចែកកញ្ចែ”៕

ប្រភព៖ សារព័ត៌មានបរទេស

March 13, 2020

គ្រូបង្វឹករបស់ Arsenal ឆ្លងវីរុស COVID-19 ៖ ការប្រកួតរវាងក្រុម Arsenal និង Brighton នៅថ្ងៃសៅរ៍នេះ អាចនឹងត្រូវពន្យាពេល

លោក Mikel Arteta ត្រូវបានក្រុមវេជ្ជបណ្ឌិតរកឃើញថា មានផ្ទុកវីរុស COVID-19 ហើយថាគ្រូបង្វឹករូបនេះ ប្រហែលជាបានចម្លងមេរោគទៅឱ្យសមាជិកផ្សេងៗក្នុងក្រុម ក៏ដូចជាក្រុមគ្រូបង្វឹកដទៃរបស់ Arsenal ផងដែរ។

ការប្រកាសរបស់ Arsenal ដែលបានធ្វើឡើងកាលពីយប់ម្សិលមិញ បានលើកឡើងថា “មជ្ឈមណ្ឌលហ្វឹកហាត់របស់យើង (London Colney) ត្រូវបានបិទបណ្ដោះអាសន្ន បន្ទាប់ពីប្រធានក្រុមគ្រូបង្វឹក លោក Mikel Arteta ត្រូវបានធ្វើតេស្ត និងរកឃើញថា មានផ្ទុកវីរុស COVID-19។ បុគ្គលិកទាំងអស់ក្នុងក្លឹប ដែលធ្លាប់បានប្រស្រ័យទាក់ទងផ្ទាល់ជាមួយ Mikel ក្នុងពេលកន្លង នឹងត្រូវបង្ខាំងខ្លួននៅដាច់ដោយឡែក ទៅតាមការណែនាំរបស់រដ្ឋាភិបាល”។

បច្ចុប្បន្ន គេមិនទាន់ដឹងថា គ្រូបង្វឹករូបនេះ បានឆ្លងមេរោគពីអ្នកណានៅឡើយ ប៉ុន្តែ គេសង្ស័យថា គ្រូបង្វឹករូបនេះ ប្រហែលជាបានឆ្លងពីលោក Evangelos Marinakis។ មុននេះ លោក Evangelos Marinakis ដែលជាម្ចាស់ក្លឹប Olympiacos ធ្លាប់បានជួបផ្ទាល់ជាមួយក្រុមមេដឹកនាំ ក៏ដូចជាកីឡាករមួយចំនួនរបស់ក្លឹប Arsenal នៅពេលដែលក្លឹបទាំង2នេះ បានប្រកួតជាមួយគ្នានៅ Europa League កាលពីខែកុម្ភៈ។ ក្រោយមកមិនយូរប៉ុន្មាន បន្ទាប់ពីការប្រកួតតង់ទី2 នៅ Emirates លោក Marinakis ប្រកាសថា លោកមានផ្ទុកវីរុស COVID-19។ បញ្ហានេះក៏បានធ្វើឱ្យការប្រកួតបន្ថែមម៉ោងរវាង Arsenal និង Man City កាលពីពាក់កណ្ដាលសប្ដាហ៍នេះ ត្រូវបានពន្យាពេលផងដែរ។

សារព័ត៌មាន Sky Sports បានឱ្យដឹងថា តាមគម្រោង ក្រុម Arsenal នឹងត្រូវប្រកួតជាមួយក្រុម Brighton នៅថ្ងៃសៅរ៍ខាងមុខនេះ នៅក្នុងក្របខណ្ឌ English Premier League។ ប៉ុន្តែ ដោយមានការប្រែប្រួលទាក់ទិននឹងរោគរាតត្បាត COVID-19 នៅក្នុងក្លឹប Arsenal ការប្រកួតនោះប្រាកដជាត្រូវបានលើកពេលមិនខាន។

នៅព្រឹកថ្ងៃសុក្រ(ម៉ោងក្នុងស្រុក) គណៈកម្មការនៃពានរង្វាន់បាល់ទាត់ English Premier League នឹងត្រូវបើកកិច្ចប្រជុំបន្ទាន់មួយដើម្បីកែសម្រួលកាលបរិច្ឆេទនៃការប្រកួត៕

March 13, 2020

Author: សឿន សំណាង