Author: សឿន សំណាង

អ្នកបើកយន្តហោះម្នាក់ បើកយន្តហោះអំពាវនាវឱ្យប្រជាជនក្នុងពិភពលោកប្រយុទ្ធនឹង “COVID-19” ដោយការ “ស្ថិតនៅក្នុងផ្ទះ”
វីរុសធ្វើឱ្យពួកយើងត្រូវតែ “ឈានរំលង” ក្ដីភ័យខ្លាចទៅមុខឱ្យបាន
និងរួមកម្លាំងកាយ កម្លាំងចិត្តគ្នា ធ្វើនូវអ្វីដែលម្នាក់ៗអាចធ្វើបានដោយមិនពិបាក
ដើម្បី “បញ្ឈប់ការឆ្លងរាលដាល” របស់មេរោគវីរុសកូវីដ-19
ដោយវិធីមួយ គឺ “ផ្អាកការធ្វើដំណើរ” និង “ស្ថិតនៅក្នុងផ្ទះ” ក្នុងអំឡុងពេលនេះ។
វេបសាយព័ត៌មាន UPI បានរាយការណ៍ថា ថ្មីៗនេះ មានអ្នកបើកយន្តហោះជនជាតិអូទ្រីសម្នាក់
បាននាំយន្តហោះម៉ាស៊ីន1 ប្រភេទ ដៃម៉ន់ ឌីអេ 40 ដៃម៉ន់ ស្តារ៍
បើកហោះឡើងចេញពីអាកាសយានដ្ឋាន វីនើ ណយឆ៍ ដាត់ថ៍ ក្នុងប្រទេសអូទ្រីស
ឆ្ពោះទៅទីក្រុង ហ្គ្រាស ភាគខាងត្បូងទីក្រុង វៀនណា ដោយប្រើរយៈពេលហោះហើរ 24នាទី…។
ទាំងអស់នេះ គឺមិនមែនដើម្បី “ដឹកជញ្ជូនអ្នកដំណើរ” នោះទេ
តែ ត្រូវការ “ផ្ញើសារ” ឱ្យមនុស្សគ្រប់គ្នា ពួតដៃគ្នា “ស្ថិតនៅក្នុងផ្ទះ”
ផ្អាកការធ្វើដំណើរដែលមិនសំខាន់ ឬមិនចាំបាច់ក្នុងអំឡុងពេលនេះ
ដើម្បីជួយគ្នាបញ្ឈប់ការឆ្លងរាលដាលរបស់វីរុសកូវីដ-19 ដោយខ្សែផ្លូវហោះហើរ ដែលអ្នកបើកយន្តហោះរូបនោះបានហោះឆ្លងកាត់
ពេលគូសភ្ជាប់គ្នាជាខ្សែតាមប្រព័ន្ធរ៉ាដាហើយនោះ វាចេញជាតួអក្សរដែលមានន័យថា “STAY HOME”
ឬ “ស្ថិតនៅក្នុងផ្ទះ” ណា៎ទាំងអស់គ្នា!!!
ប្រភព៖ សារព័ត៌មានបរទេស
March 19, 2020
អាមេរិក-ចិនៈ ពីសង្គ្រាមពាណិជ្ជកម្ម សង្គ្រាមពាក្យសម្ដី មកដល់សង្គ្រាមព័ត៌មាន…
ខណៈដែលមនុស្សទូទាំងពិភពលោកកំពុងស្ថិតក្នុងក្ដីកង្វល់ជាមួយនឹងការឆ្លងរាតត្បាតរបស់មេរោគវីរុស COVID-19 ជាពិសេសនៅអឺរ៉ុប សហរដ្ឋអាមេរិក និងកំពុងរាលដាលទៅទ្វីបផ្សេងទៀត ដោយគ្មានវិធីអាចទប់ស្កាត់បាននោះ ប្រទេសមហាអំណាច2 គឺសហរដ្ឋអាមេរិក និងចិន បានបើកសមរភូមិប្រយុទ្ធថ្មីផ្នែកសង្គ្រាមពាក្យសម្ដី និងសង្គ្រាមព័ត៌មាន។
ចិនបានឆ្លើយតបវិធានការកាលពីពេលមុននេះរបស់សហរដ្ឋអាមេរិក ដោយការបញ្ជាឱ្យអ្នកយកព័ត៌មានអាមេរិកក្នុងស្ថាប័នធំៗ 3 បញ្ចប់ការធ្វើការងារនៅក្នុងប្រទេសចិន ហុងកុង និងម៉ាកាវ និងស្ថាប័ន 2ទៀតត្រូវរាយការណ៍លម្អិតផ្នែកការធ្វើការងារ ហើយប្រហែលជានឹងមានការវាយបកវិញដោយសហរដ្ឋអាមេរិកទៀតជាមិនខាន។
ហើយរឿងនេះ នឹងធ្វើឱ្យភាពទាស់ទែងខាងពាណិជ្ជកម្ម និងសម្ព័ន្ធភាពជារួមរបស់ប្រទេសទាំង2 ពិបាកនឹងវិលចូលទៅរកដំណើរផ្លូវនៃការចរចារក្នុងជុំបន្តទៅទៀត ហើយការឆ្លងរាលដាលរបស់វីរុស COVID-19 បានផ្លាស់ប្ដូរស្ទើរតែគ្រប់យ៉ាង គ្រប់ស្ថានភាពផ្នែកគោលការណ៍នយោបាយ ពាណិជ្ជកម្ម និងការរស់នៅរបស់មនុស្សជាតិ។
ប្រមុខសេតវិមាន លោក ដូណាល់ ត្រាំ មើលឃើញថា ចិនជាសត្រូវសំខាន់របស់អាមេរិក និងបានបើកឆាកសង្គ្រាមពាណិជ្ជកម្មដោយការដាក់រនាំងពន្ធទៅលើទំនិញរបស់ចិនជាង 1ឆ្នាំកន្លងមក ដែលជាហេតុនាំឆ្ពោះទៅរកការសងសឹកគ្នាដោយវិធានការផ្សេងៗ បណ្ដាលឱ្យឈឺខ្លួនទាំងសងខាង និងថែមទាំងធ្វើឱ្យសេដ្ឋកិច្ចទូទាំងពិភពលោករង្គោះរង្គើទៀតផង។
នៅមិនទាន់បានខិតចូលទៅរកសភាពប្រក្រតីវិញផង ក៏មានរឿងការឆ្លងរាតត្បាតរបស់វីរុស COVID-19 ចាប់ផ្ដើមឡើងនៅទីក្រុងវូហាន មណ្ឌលហ៊ូពេយ និងស្ថានការណ៍បានឈានចូលដំណាក់កាលវិបត្តិធ្ងន់ធ្ងរ ការឆ្លងរាលដាលយ៉ាងឆាប់រហ័ស និងមានមនុស្សស្លាប់ បានធ្វើឱ្យរដ្ឋបាលចិនត្រូវប្រកាសបិទទីក្រុងវូហាន បិទទាំងមណ្ឌល និងស្ទើរតែបិទទូទាំងប្រទេសទៀតផង។
ចិនប្រើពេលវេលា និងវិធានការម៉ឺងម៉ាត់ជាង 1ខែ រហូតអាចគ្រប់គ្រងស្ថានការណ៍បាន តែក៏ក្រោយពីមេរោគបានរាលដាលទៅដល់ប្រទេសជាច្រើនក្នុងទ្វីបអាស៊ី និងឆ្លងរាលដាលទៅកាន់ទ្វីបផ្សេងៗទៀតបាត់ទៅហើយ។ តែចិន និងកូរ៉េខាងត្បូងដែលជាប្រភពនៃការឆ្លងរាលដាលខ្លាំងក្នុងទ្វីបអាស៊ី បានធ្វើឱ្យការរាតត្បាតនេះថយចុះក្នុងកម្រិតគួរឱ្យពេញចិត្ត។
តែវីរុស COVID-19 បានទៅបញ្ចេញមហិទ្ធិរិទ្ធខ្លាំងនៅក្នុងទ្វីបអឺរ៉ុប និងសហរដ្ឋអាមេរិក និងភូមិភាគផ្សេងៗទៀត។ តួលេខអ្នកឆ្លងមេរោគ និងស្លាប់ ច្រើនជាងប្រទេសចិន និងធ្វើឱ្យលោកខាងលិចកំពុងតែវិតក្កកង្វល់យ៉ាងខ្លាំងថា ប្រហែលជាទប់មិនឈ្នះទេ ព្រោះអឺរ៉ុបដល់ថ្នាក់បិទទ្វីប ឯសហរដ្ឋអាមេរិកបិទប្រទេស និងប្រទេសជាច្រើនទៀតប្រើវិធានការម៉ឺងម៉ាត់ផ្សេងៗគ្នា។
តែសហរដ្ឋអាមេរិក ប្រមុខសេតវិមាននៅតែមិនឈប់រករឿងចិន។ ការនិយាយពីវីរុស COVID-19 ក្នុងអំឡុងដំបូងៗ ត្រាំតែងតែហៅថា “វីរុសក្រៅស្រុក” តែ 2-3ថ្ងៃក្រោយមកទៀត ត្រាំប្រើពាក្យថា “វីរុសចិន” ធ្វើឱ្យរដ្ឋាភិបាលចិនក្ដៅក្រហាយដូចភ្លើងឆេះផ្ទះ។ មន្ត្រីក្រសួងការបរទេសចិន បានសកទៅវិញថា វីរុសនេះចាប់ផ្ដើមមកពីអាមេរិក។
ព្រមទាំងអះអាងថា អគ្គនាយកមជ្ឈមណ្ឌលការពារការឆ្លងរាតត្បាតរបស់អាមេរិក លោក រ៉ូប៊ើត រេដហ្វ៊ីល ធ្លាប់បានឆ្លើយសារភាពនៅក្នុងការស៊ើបសួរថា អ្នកស្លាប់ដោយសារជំងឺគ្រុនផ្ដាសាយធំនៅក្នុងប្រទេស មានផ្ទុកមេរោគវីរុស COVID-19 ទៀតផង ធ្វើឱ្យចម្លើយនេះក្លាយជាភ័ស្តុតាងបញ្ជាក់ច្បាស់ ដោយចិនអះអាងថា ទាហានអាមេរិក គឺជាអ្នកចម្លងមេរោគនៅក្នុងពិធីប្រកួតកីឡាកងទ័ពពិភពលោកក្នុងទីក្រុងវូហាន កាលពីពាក់កណ្ដាលឆ្នាំកន្លងទៅ។
សង្គ្រាមពាក្យសម្ដីនៅតែដំណើរការទៅយ៉ាងក្ដៅគគុក គ្មាននរណាចុះចាញ់នរណា ហើយបច្ចុប្បន្ន ចិនមើលឃើញថា អាមេរិកកំពុងតែស្ថិតក្នុងសភាវលំបាក ក្នុងការទប់ទល់ និងទប់ស្កាត់ការឆ្លងរាតត្បាតរបស់វីរុស COVID-19 ហើយចិនក៏មិនបង្ហាញឥរិយាបថដែរថា នឹងផ្ដល់ការជួយយកអាសា មិនថាតែផ្នែកណាមួយឡើយ ព្រោះសហរដ្ឋអាមេរិកស្ដីបន្ទោសចិនឥតឈប់ឈរ។
ខណៈពេលជាមួយគ្នា ចិនបានផ្ដល់ការជួយយកអាសាប្រទេសផ្សេងៗ ដែលមានការឆ្លងរាលដាលធ្ងន់ធ្ងរ ដូចជាអ៊ីតាលី និងអ៊ីរ៉ង់ ជាដើម ដោយបានបញ្ជូនឧបករណ៍ខាងវេជ្ជសាស្ត្រ និងក្រុមមន្ត្រីអ្នកជំនាញការដែលមានបទពិសោធទៅជួយយ៉ាងពេញទំហឹង។
ត្រាំ ក៏បើកឆាកសង្គ្រាមជាមួយស្ថាប័នព័ត៌មានវិញម្ដង ដោយការបញ្ជាឱ្យទីស្នាក់ការព័ត៌មានរបស់ចិន ចូលជាខ្សែបណ្ដាញស្ថាប័នរដ្ឋ និងកំណត់ចំនួនបុគ្គលិកជនជាតិបរទេសដែលធ្វើការឱ្យ 4ភាគ5 របស់ទីស្នាក់ការព័ត៌មានរបស់ចិន។ សាងភាពលំបាកលំបិនដល់ទីស្នាក់ការព័ត៌មាន និងក្រុមការងាររបស់ចិន ព្រោះចិនមើលឃើញថា ជាការធ្វើបាប។
ហើយហ្នឹង ក៏ជាវិធីមួយទៀតដែលត្រាំព្យយាមចាត់ការចិន ដែលក្រៅពីការរារាំងធុរកិច្ចរបស់ក្រុមហ៊ុន Huawei និងក្រុមហ៊ុនតិចណូឡូជីផ្សេងទៀតរបស់ចិន និងដាក់សម្ពាធឱ្យសម្ព័ន្ធមិត្តនៅក្នុងអឺរ៉ុបធ្វើតាមខ្លួនទៀតផង តែមិនបានសម្រេចឡើយ ព្រោះប្រទេសជាច្រើនបានយល់ព្រមឱ្យ Huawei ធ្វើជាដៃគូកិច្ចសន្យា ដែលរឹតតែធ្វើឱ្យ ត្រាំមិនពេញចិត្តកាន់តែខ្លាំងឡើងទៅទៀត។
កាលពីថ្ងៃពុធ សប្ដាហ៍មុន រដ្ឋបាលចិនបានសងសឹកវិញក្នុងន័យសង្គ្រាមដូចគ្នា ដោយការបញ្ជាឱ្យអ្នកសារព័ត៌មានរបស់ នីវយ៉ក ថាមស៍, វ៉ាស៊ីនតោន ប៉ុស្ត និងដឹ វ៉លស្ទ្រីត ជើណាល ផ្ញើលិខិតធានារ៉ាប់រងការធ្វើការងារត្រឡប់មកវិញក្នុងរយៈពេល 10ថ្ងៃ បើសិនវីសាធ្វើការក្នុងប្រទេសចិន ផុតកំណត់នៅចុងឆ្នាំ2020នេះ។
ក្រៅពីហាមធ្វើការនៅក្នុងចិនដីគោកហើយ អ្នកយកព័ត៌មានរបស់ទាំង 3ស្ថាប័នធំៗនោះ នៅមិនទាន់បានទទួលការអនុញ្ញាតឱ្យធ្វើការនៅក្នុងហុងកុង និងម៉ាកាវ ដែលជាតំបន់គ្រប់គ្រងពិសេសរបស់ចិនទៀតផង ដែលមានន័យស្មើនឹងការបិទដំណើរការការធ្វើការនៅក្នុងតំបន់ 2ទៀតនោះ ដែលជាមូលដ្ឋានរបស់សារព័ត៌មានក្រៅប្រទេសទូទៅ។
រដ្ឋបាលចិន ឱ្យអ្នកសារព័ត៌មានទាំង 3ស្ថាប័ននោះ ត្រូវធ្វើដំណើរចេញក្រៅប្រទេស នៅសល់តែស្ថាប័នព័ត៌មានចម្បងៗផ្សេងទៀត ដូចជា CNN និងសារព័ត៌មានបោះពុម្ពដទៃទៀតប៉ុណ្ណោះ ធ្វើឱ្យស្ថាប័នព័ត៌មានទាំង3 ចេញលិខិតតវ៉ា និងថ្កោលទោសការសម្រេចចិត្តរបស់រដ្ឋបាលចិននេះ ថាជាការរារាំងការរាយការណ៍ព័ត៌មាននៃហេតុការណ៍សំខាន់ៗ។ និងអាងថា ការរារាំងនេះ កើតឡើងក្នុងខណៈដែលចិននៅមានបញ្ហាការរាតត្បាតរបស់វីរុស COVID-19 នៅឡើយ។
ប៉ុណ្ណឹងមិនទាន់គ្រប់គ្រាន់ទេ រដ្ឋាភិបាលចិននៅបានប្រកាសឱ្យ 5ស្ថាប័នព័ត៌មានចម្បងៗរបស់អាមេរិក ដែលរួមមាន 3ស្ថាប័នព័ត៌មានខាងលើ ត្រូវផ្ដល់របាយការណ៍ មានសេចក្ដីលម្អិតខាងការធ្វើការងាររបស់អ្នកយកព័ត៌មាន បញ្ជីឈ្មោះបុគ្គលិក ស្ថានភាពហិរញ្ញវត្ថុ ទ្រព្យសម្បត្តិដែលជាកម្មសិទ្ធិក្នុងរូបបែបអចលនទ្រព្យ និង 2ស្ថាប័នទៀតគឺ “VOA” និង “Time”។
រដ្ឋមន្ត្រីការបរទេស ម៉ៃ ប៉ុមប៉េអូ បានត្រឹមតែប្រាប់ថា ការសម្រេចចិត្តរបស់រដ្ឋាភិបាលចិននេះ ជារឿងគួរឱ្យសោកស្ដាយ ជាទង្វើប៉ះដៃយកដៃ ប៉ះជើងយកជើង កំហឹងទល់កំហល់ ហើយនឹងធ្វើឱ្យចិនបាត់បង់ផលប្រយោជន៍ ព្រោះមនុស្សទូទាំងពិភពលោក នឹងបានដឹងព័ត៌មានហេតុការណ៍ផ្សេងៗក្នុងប្រទេស តិចជាងអ្វីដែលជាការពិត។
“ជាអំឡុងពេលដែលសំខាន់ សម្រាប់ដំណឹងព័ត៌មាន និងភាពស្មោះត្រង់” លោក ប៉ុមប៉េអូ ថ្លែង។
អ្នកគ្រប់គ្រងស្ថាប័នព័ត៌មានចម្បងៗទាំង 3នោះ ក៏បានចេញមកថ្លែងការណ៍ ពាក់ព័ន្ធនឹងការសម្រេចចិត្តរបស់រដ្ឋបាលចិនដែរ តែមិនបាននិយាយពីវិធានការផ្សេងៗដែលសហរដ្ឋអាមេរិក បានធ្វើកាលពីពេលមុននេះឡើយ និងប្រហែលជាគ្មានជម្រើសអ្វីផ្សេងក្រៅពីនេះដែរ។
លោក ដូណាល់ ត្រាំ ប្រហែលជាមិនបន្ថយពាក្យសម្ដីឡើយ និងត្រូវតែរិះរកវិធីចាត់ការចិនបន្តទៅទៀត ព្រោះយល់ថា ខ្លួនឯងកំពុងកាន់សន្លឹកបៀធំជាងខាងផ្នែកពាណិជ្ជកម្ម តែក៏មិនទាន់ប្រាកដនៅឡើយដែរ ព្រោះសេដ្ឋកិច្ចរបស់សហរដ្ឋអាមេរិក និងអឺរ៉ុបកំពុងស្ថិតក្នុងសភាវថយចុះ ការគ្មានការងារធ្វើ ផ្នែកធុរកិច្ចឯកជនដែលកំពុងលំបាក បានស្រែកសុំជំនួយពីរដ្ឋបាល។
ហើយអឺរ៉ុប និងអាមេរិក ប្រហែលជាត្រូវប្រើប្រាស់លុយជាច្រើនទៀត តែត្រូវបញ្ឈប់ការឆ្លងរាតត្បាតរបស់វីរុស COVID-19 ឱ្យបានសិន!!
ប្រភព ៖ សារព័ត៌មានបរទេស
March 19, 2020
កម្ពុជាសម្រេចបិទច្រកព្រំដែនជាមួយវៀតណាម ក្នុងពេលវីរុស COVID-19 កាន់តែរីករាលដាលខ្លាំង
កម្ពុជាបានចេញបទបញ្ជាបិទច្រកចេញចូលទាំងអស់នៅតាមបណ្ដោយព្រំដែនជាមួយប្រទេសវៀតណាមជាបណ្តោះអាសន្ន ដើម្បីទប់ស្កាត់ការឆ្លងរាលដាលនៃជំងឺកូរ៉ូណ COVID-19។
ក្រសួងការបរទេសកម្ពុជា កាលពីថ្ងៃទី18 ខែមីនា ឆ្នាំ2020 បានឱ្យដឹងថា បទបញ្ជាខាងលើនេះ នឹងមិនអនុញ្ញាតឱ្យប្រជាពលរដ្ឋកម្ពុជា ចូលទៅប្រទេសវៀតណាម ហើយក៏មិនអនុញ្ញាឱ្យពលរដ្ឋវៀតណាម ចូលមកទឹកដីកម្ពុជានោះដែរ គិតចាប់ពីម៉ោង 23ៈ59នាទី នៃយប់ថ្ងៃទី20មីនា ឆ្នាំ2020។
“វិធានការនេះ មានគោលបំណងបញ្ចៀសនូវការលំបាកចំពោះពលរដ្ឋវៀតណាម ក៏ដូចជាពលរដ្ឋកម្ពុជា ដែលតម្រូវឱ្យបង្ខាំងខ្លួននៅដាច់ដោយឡែកពីគេចំនួន14ថ្ងៃ ក្រោយពីបានធ្វើដំណើរពីប្រទេសកម្ពុជា ចូលទៅវៀតណាម” នេះបើតាមការបញ្ជាក់របស់ក្រសួងការបរទេសកម្ពុជា។
វិធានការខាងលើនេះ នឹងមិនអនុវត្តចំពោះពលរដ្ឋកម្ពុជា និងពលរដ្ឋវៀតណាម ដែលប្រើប្រាស់លិខិតឆ្លងដែនការទូតនោះទេ។
គិតមកដល់ថ្ងៃនេះ កម្ពុជាបានរកឃើញអ្នកផ្ទុកមេរោគ COVID-19 ចំនួន 37នាក់ ក្នុងនោះមានជនជាតិចិន1នាក់ អង់គ្លេស3នាក់ កាណាដា1នាក់ ប៊ែលហ្ស៊ិក1នាក់ បារាំង2នាក់ ម៉ាឡេស៊ី5នាក់ ខ្មែរ24នាក់។ ចំណែកប្រទេសវៀតណាមវិញ ក៏បានរកឃើញអ្នកជំងឺសរុប 75ករណី ក្នុងនោះមាន16ករណីបានជាសះស្បើយកាលពីខែមុន និង59នាក់ទៀត កំពុងទទួលការព្យាបាល ក្នុងនោះដែរ មាន20នាក់នៅក្នុងរដ្ឋធានីហាណូយ។ វៀតណាមបច្ចុប្បន្ន មានខេត្តក្រុងចំនួន15 មានករណីផ្ទុកមេរោគកូរ៉ូណា៕
March 19, 2020
មេរៀនទប់ស្កាត់វីរុសកូរ៉ូណាពីប្រទេសចិនៈ កុំឱ្យអ្នកជំងឺចេញលុយថ្លៃពិនិត្យ និងព្យាបាលខ្លួនឯង…
ខណៈពេលនេះ ចិនបានគ្រប់គ្រងការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីដ-19 បាននៅក្នុងដៃរួចរាល់ហើយ គណៈកម្មាធិការសុខភាពនៃប្រទេសចិនបានថ្លែងកាលពីថ្ងៃអង្គារ(ទី17មីនា)ថា អ្នកឆ្លងមេរោគវីរុសកូវីដ-19 នៅក្នុងវូហាន ដែលជាមណ្ឌលកណ្ដាលនៃការឆ្លងរាលដាល នៅពេលនេះមានអ្នកឆ្លងមេរោគតែ 1នាក់គត់ ចំណែកឯតំបន់ផ្សេងៗនៅក្នុងប្រទេសចិនក្រៅពីវូហាន រកឃើញអ្នកឆ្លងមេរោគចំនួន 20នាក់ ដោយទាំងអស់គឺជាអ្នកធ្វើដំណើរមកពីក្រៅប្រទេស។
សារព័ត៌មានរបស់ហុងកុង សៅ ឆាយណា ម៉រនីង ផូស្ត បានចង្អុលបង្ហាញពីមេរៀនសំខាន់មួយអំពីប្រទេសចិនក្នុងការគ្រប់គ្រងការឆ្លងរាលដាលនៃមេរោគវីរុសកូវីដ-19 យ៉ាងមានប្រសិទ្ធភាពនោះគឺ ការត្រៀមថវិកាសម្រាប់ចាយវាយជំនួសអ្នកជំងឺ ដើម្បីការពារកុំឱ្យថ្លៃចំណាយក្លាយជាឧបសគ្គ ធ្វើឱ្យអ្នកឆ្លងមេរោគមិនព្រមមកពិនិត្យ និងព្យាបាលខ្លួនឯង។
នៅក្នុងប្រទេសចិន ថ្លៃពិនិត្យ និងពិសោធរកការឆ្លងមេរោគ ជាមធ្យម គឺប្រមាណ 370យន់ ឬប្រហែល 50ដុល្លារអាមេរិក។ នៅក្នុងទីក្រុងហ្សិនជឹន ថ្លៃចំណាយលើការព្យាបាលជំងឺរលាកសួតបណ្ដាលពីវីរុសប្រភេទថ្មី សម្រាប់អ្នកមានអាយុច្រើន(មនុស្សចាស់)អាចខ្ពស់ដល់ទៅប្រមាណ 23,000យន់(ឬប្រហែល 3,000ដុល្លារអាមេរិក) ដល់ប្រមាណ 5,600យន់(ឬប្រហែល 750ដុល្លារ) សម្រាប់ការព្យាបាលអ្នកជំងឺដែលមានអាការមិនធ្ងន់ធ្ងរ។ នេះបើតាមព័ត៌មានពី Chinese Hospital Management journal បង្ហាញឱ្យដឹងកាលពីថ្ងៃទី28 ខែកុម្ភៈ កន្លងទៅ។
លោកសាស្ត្រាចារ្យវេជ្ជបណ្ឌិត Dirk Pfeiffer ប្រធានក្រុមអ្នកជំនាញនៃស្ថាប័ន One Health របស់ City University បានថ្លែងថា ការគ្មានសមត្ថភាពក្នុងការចំណាយ(របស់ប្រជាជន) គឺជាឧបសគ្គធំមួយ របស់វិធានការគ្រប់គ្រងជំងឺឆ្លងរាតត្បាត។
រដ្ឋាភិបាលចិន បានបញ្ចេញថវិកាសម្រាប់ការព្យាបាលអ្នកជំងឺឆ្លងមេរោគវីរុសកូវីដ-19 ចំនួនដល់ទៅ 1.104សែនលានយន់៕
ប្រភព៖ សារព័ត៌មានបរទេស
March 19, 2020
តំណាងរាស្ត្រអាមេរិកាំងដំបូងគេ ឆ្លងវីរុស COVID-19
តំណាងរាស្ត្រមកពីបក្សសាធារណរដ្ឋម្នាក់ បានក្លាយជាសមាជិកសភាដំបូងគេនៅសហរដ្ឋអាមេរិក ដែលបានឆ្លងមេរោគកូរ៉ូណ COVID-19។
CNN កាលពីថ្ងៃទី18មីនា បានចេញផ្សាយថា តំណាងរាស្ត្រនៅសភាជាន់ទាបក្នុងរដ្ឋ Florida មកពីបក្សសាធារណរដ្ឋ លោក Mario Diaz-Balart បានក្លាយជាអ្នកតាក់តែងច្បាប់ដំបូងគេនៅសភាសហរដ្ឋអាមេរិក ដែលឆ្លងមេរោគកូរ៉ូណនេះ។ ការិយាល័យរបស់លោក Diaz-Balart បានឱ្យដឹងថា “យប់ថ្ងៃទី14មីនា តំណាងរាស្ត្រ Diaz-Balart មានអាការក្ដៅខ្លួន និងឈឺក្បាល។ ក្រោយមក លោកក៏ត្រូវបានគេឱ្យដឹងថា មានផ្ទុកវីរុស COVID-19″។
គិតមកដល់ពេលនេះ យ៉ាងហោចមានតំណាងរាស្ត្រសហរដ្ឋអាមេរិក14រូបហើយ ដែលបានប្រកាសនៅដាច់ដោយឡែក ដើម្បីការពារការឆ្លងរោគ។
បច្ចុប្បន្ន ចំនួនអ្នកបានឆ្លង និងស្លាប់ដោយសារ COVID-19 នៅសហរដ្ឋអាមេរិក នៅតែបន្តកើនឡើង។ សហរដ្ឋអាមេរិក មានអ្នកផ្ទុកមេរោគ COVID-19 ជាង8,500នាក់ ក្នុងនោះមាន118នាក់បានស្លាប់។ នេះបើតាមស្ថិតិរបស់សាកលវិទ្យាល័យ John Hopkins។
គិតត្រឹមថ្ងៃនេះ(19មីនា) នៅទូទាំងពិភពលោក មានអ្នកឆ្លងវីរុស COVID-19 កើនជិតដល់215,000នាក់ហើយ ក្នុងនោះមានអ្នកស្លាប់ 8,749នាក់៕
ប្រភព៖ សារព័ត៌មានបរទេស
March 19, 2020
ជាង 8,700នាក់បានស្លាប់! WHO ហៅ COVID-19 ថា “សត្រូវរបស់មនុស្សជាតិ”
ប្រធានអង្គការសុខភាពពិភពលោក (WHO) បានហៅវីរុសកូរ៉ូណា COVID-19 ថាជា “សត្រូវដែលប្រឆាំងនឹងមនុស្សជាតិ” ខណៈដែលរោគរាតត្បាតនេះ សម្លាប់មនុស្សកាន់តែច្រើនឡើងៗ។
“វីរុសកូរ៉ូណា កំពុងតែធ្វើបាបយើងទាំងអស់គ្នា ដែលមិនធ្លាប់មានពីមុនមក” ប្រធានអង្គការ WHO លោក Tedros Adhanom Ghebreyesus មានប្រសាសន៍បែបនេះ នៅក្នុងសន្និសីទសារព័ត៌មានមួយកាលពីថ្ងៃទី18មីនា។
លោក Tedros Adhanom Ghebreyesus សង្កត់ធ្ងន់អំពីការចាំបាច់ដែលប្រទេសនានាក្នុងពិភពលោក ត្រូវ “រួមដៃគ្នាបង្កើតជាសមរភូមិរួមដើម្បីទប់ទល់នឹងសត្រូវរួម៖ សត្រូវប្រឆាំងនឹងមនុស្សជាតិ”។
ការប្រកាសខាងលើរបស់ប្រធានអង្គការ WHO ត្រូវបានលើកឡើងក្នុងពេលដែលតួលេខនៃអ្នកបានឆ្លងវីរុស COVID-19 នៅលើពិភពលោក បានកើនដល់ជិត 215,000នាក់ ខណៈចំនួនអ្នកស្លាប់ក៏បានកើនដល់ជាង8,700នាក់ បើគិតមកដល់ត្រឹមថ្ងៃទី19មីនា។ រោគរាតត្បាតនេះ បច្ចុប្បន្ន បានរាលដាលដល់ប្រទេស និងដែនដីចំនួនជាង150 នៅទូទាំងពិភពលោក។
ប្រភព៖ សារព័ត៌មានបរទេស
March 19, 2020
ចំនួនអ្នកបានឆ្លងមេរោគ COVID-19 នៅកម្ពុជា ឈរលំដាប់លេខក្រោយគេ បើធៀបនឹងប្រទេសថៃ និងវៀតណាម
នៅក្នុងចំណោមប្រទេសទាំង3 គឺកម្ពុជា វៀតណាម និងថៃ ដែលបានប្រកាសថា បានរកឃើញអ្នកផ្ទុកមេរោគកូរ៉ូណា COVID-19 បន្ថែមកាលពីម្សិលមិញ គេឃើញថា ថៃ គឺជាប្រទេសដែលមានអ្នកឆ្លងរោគច្រើនជាងគេ។
ប្រទេសកម្ពុជា
ប្រទេសកម្ពុជា កាលពីម្សិលមិញ (18មីនា) បានប្រកាសថា បានរកឃើញអ្នកផ្ទុក COVID-19 ចំនួន4ករណីបន្ថែមទៀត ដែលធ្វើឱ្យចំនួនករណីអ្នកផ្ទុកវីរុសនេះកើនដល់37។
អ្នកជំងឺ4នាក់ដែលទើបបានរកឃើញនោះ រួមមាន បុរសជនជាតិម៉ាឡេស៊ី2នាក់ ដែលបច្ចុប្បន្ន កំពុងទទួលការព្យាបាលនៅឯខេត្តកំពត ចំណែក2ករណីទៀតគឺជាជនជាតិខ្មែរនៅខេត្តត្បូងឃ្មុំ ដែលបច្ចុប្បន្ន ទទួលការព្យាបាលនៅក្នងខេត្តនេះ។
គិតមកដល់បច្ចុប្បន្ន កម្ពុជាបានរកឃើញអ្នកផ្ទុកមេរោគ COVID-19 សរុប 37នាក់ ក្នុងនោះមានជនជាតិចិន1នាក់ អង់គ្លេស3នាក់ កាណាដា1នាក់ ប៊ែលហ្ស៊ិក1នាក់ បារាំង2នាក់ ម៉ាឡេស៊ី5នាក់ ខ្មែរ24នាក់។
ប្រទេសថៃ
កាលពីម្សិលមិញ ប្រទេសថៃ បានប្រកាសថាបានរកឃើញអ្នកជំងឺកូរ៉ូណាថ្មីចំនួន35នាក់បន្ថែមទៀត ធ្វើឱ្យតួលេខនៃអ្នកបានឆ្លងរោគក្នុងប្រទេសនេះ ឡើងដល់ 212នាក់។
ប្រទេសវៀតណាម
កាលពីយប់ម្សិលមិញ ក្រសួងសុខាភិបាលវៀតណាម បានប្រកាសថា បានរកឃើញអ្នកផ្ទុកមេរោគ COVID-19 ចំនួន8ករណីបន្ថែមទៀត ធ្វើឱ្យចំនួនអ្នកផ្ទុកមេរោគនេះ កើនដល់ 76ករណី។

ក្នុងចំណោមអ្នកបានឆ្លងជំងឺកូរ៉ូណាសរុប76នាក់ គឺមាន16នាក់បានជាសះស្បើយ។ អ្នកជំងឺ60នាក់ដែលទើបរកឃើញចាប់ពីថ្ងៃទី6មីនាដល់ថ្ងៃនេះ ក៏មាន19នាក់នៅទីក្រុងហាណូយ និង12នាក់នៅទីក្រុងហូជីមិញផងដែរ៕
March 19, 2020
កោះតៃវ៉ាន់ ហាមជនបរទេសចូលទឹកដី ខណៈទូទាំងពិភពលោក មានអ្នកឆ្លង COVID-19 ជិត 200,000នាក់ និងអ្នកស្លាប់ចំនួន…
កោះតៃវ៉ាន់ បានប្រកាសហាមមិនឱ្យផ្ដល់ទិដ្ឋាការចំពោះជនបរទេស រាប់ចាប់ពីថ្ងៃស្អែកតទៅ ខណៈដែលជនបរទេសដែលបានមកកាន់តៃវ៉ាន់ ត្រូវបានរកឃើញថា មានផ្ទុកមេរោគ COVID-19 កាន់តែច្រើនឡើងៗ។
សេចក្ដីប្រកាសកន្លងមករបស់កោះតៃវ៉ាន់ បានឱ្យដឹងថា អ្នកដែលបានចូលមកកោះនេះ ត្រូវតែបង្ខាំងខ្លួនដាច់ដោយឡែករយៈពេល14ថ្ងៃ។
មេដឹកនាំក្រសួងការបរទេសតៃវ៉ាន់ Joseph Wu ក្រោយមកទៀត ក៏បានប្រកាសសាជាថ្មីថា តៃវ៉ាន់នឹងចាប់ផ្ដើមផ្អាកផ្ដល់ទិដ្ឋាការចំពោះជនបរទេសទូទៅ លើកលែងតែអ្នកដែលមានលិខិតបញ្ជាក់ថា ជាអ្នករស់នៅតៃវ៉ាន់ពីមុនមក និងអ្នកការទូត រួមនឹងអ្នកជំនួញដែលមានលិខិតបញ្ជាក់ពិសេសពីតៃវ៉ាន់។
COVID-19 បានបង្ហាញខ្លួននៅក្នុងប្រទេស និងដែនដីចំនួន 160 នៅទូទាំងពិភពលោក ធ្វើឱ្យមនុស្សចំនួនជិត 200,000នាក់ បានកើតរោគ និងជិត 8,000នាក់បានស្លាប់។ កោះតៃវ៉ាន់ មកដល់ពេលនេះ មានអ្នកស្លាប់ដោយសារមេរោគ COVID-19 ត្រឹមតែ1ករណីប៉ុណ្ណោះ៕
ប្រភព៖ សារព័ត៌មានបរទេស
March 18, 2020
ដើម្បីអាចគេចផុតពីរោគរាតត្បាត ជនជាតិអាមេរិកាំង1ក្រុម បង្កើត “ជំរំស្វ័យការពារ” នៅតំបន់ព្រៃភ្នំ
ផ្លូវលំតូចមួយនៅឯតំបន់ Virginia ខាងលិច ក្បែរជើងភ្នំ Appalachia នាំទៅកាន់ជំរំមួយដែលស្ថិតនៅក្នុងព្រៃរបស់មនុស្សមួយក្រុមដែលគេចាត់ទុកថាជាអ្នកកាន់ “លទ្ធិការពារខ្លួន” (survivalism)។
ក្រុមនេះ បានចាប់ផ្ដើមត្រៀមតាំងពីយូរមកហើយ សម្រាប់ការដួលរលំនៃអរិយធម៌របស់មនុស្សជាតិ មុនពេលរោគរាតត្បាត COVID-19 បានមកដល់។
ជាមួយនឹងសម្ភារប្រើប្រាស់ ស្បៀងអាហារដែលមានសុពលភាពប្រើប្រាស់ដល់ទៅ25ឆ្នាំ រួមនឹងអង្ករ និងម្សៅមីជាដើម មនុស្សទាំងនេះ បាននាំគ្នាគេចចេញពីតំបន់ដែលអាចឆ្លងរោគ COVID-19 ទៅរស់នៅក្នុងតំបន់សុវត្ថិភាពដែលស្ថិតនៅក្នុងព្រៃជ្រៅ។ ស្បៀងអាហាររបស់ពួកគេត្រូវបានតម្រៀបយ៉ាងមានរបៀប នៅក្នុងឃ្លាំងក្រោមដី ដែលធ្វើអំពីបេតុង និងដែកយ៉ាងរឹងមាំ។
ក្រុមមនុស្សកាន់ “លទ្ធិការពារខ្លួន” ដែលគេហៅក្រុម Fortitude Ranchនេះ សម្បូរទៅដោយសម្ភារចាំបាច់ដែលកំពុងត្រូវបានគេតាម “ប្រមាញ់” នៅទូទាំងពិភពលោក នោះគឺ ក្រដាសអនាម័យ និងម៉ាស់។
Steve Rene ជាអ្នកគ្រប់គ្រងជំរំលាក់ខ្លួនដែលមានផ្ទៃដីទំហំ 40ហិកតា បានឱ្យដឹងថា “ពេលនេះ វា (ជំរំលាក់ខ្លួន) មានតម្លៃខ្លាំងណាស់”។
បាវចនារបស់ក្រុម Fortitude Ranch គឺ “ត្រៀមរួចរាល់សម្រាប់ស្ថានភាពអាក្រក់បំផុត និងរីករាយនឹងបច្ចុប្បន្នភាព!”។ ជារៀងរាល់ឆ្នាំ សមាជិកក្នុងក្រុមនេះ មានពេល2សប្ដាហ៍ដើម្បីមកលេង និងសម្រាកលម្ហែកាយក្នុងតំបន់ដាច់ស្រយាល និងពោរពេញដោយសម្រស់ធម្មជាតិ ព្រមទាំងអាចដើរកម្សាន្ត ឬស្ទូចត្រី នៅក្នុងទន្លេដែលមានឈ្មោះថា “Lost”។ ក្រុមនេះ ក៏មានសាខាមួយផ្សេងទៀត នៅក្នុងរដ្ឋ Colorado ផងដែរ។
លោក Rene ដែលសមាជិកម្នាក់ក្នុងក្រុម “លទ្ធិការពារខ្លួន” Fortitude Ranch បានឱ្យដឹងថា “នេះមិនមែនជាក្រុមមនុស្សល្ងង់ល្ងីល្ងើ ដែលចេះតែគិតអំពីថ្ងៃអវសាននៃពិភពលោកនោះទេ។ យើងមិនបានរើសអើង ហើយយើងក៏មិនមានទំនាក់ទំនងជាមួយក្រុមប្រដាប់អាវុធណាមួយនោះដែរ”។
ប៉ុន្តែ នៅលើទីតាំងនៃមុមទាំង4របស់ជំរំនៃក្រុម Fortitude Ranchនេះ សុទ្ធតែមានប៉មយាម ហើយក្នុងបន្ទប់ទទួលភ្ញៀវក៏មានកាំភ្លើងកាណុងវែង1ដើមផងដែរ ដើម្បីបង្ហាញថា ក្រុមនេះ ធ្វើសកម្មភាពយ៉ាងហ្មត់ចត់។ Rene និយាយថា “ក្រុមមនុស្សដែលអស់សង្ឃឹម គឺគេធ្វើរឿងអស់សង្ឃឹម”។
ក្រុម Fortitude Ranch នេះ មិនបានចាត់ទុកកម្លាំងបរទេស ឬកម្លាំងពិភពខាងក្រៅ ជាការគំរាមកំហែងលើពួកគេនោះទេ ប៉ុន្តែ ពួកគេបានចាត់ទុកជនជាតិអាមេរិកាំងខ្លួនឯង ដែលមានភាពច្របូកច្របល់ អាចមានសកម្មភាពប្លន់ស្បៀងអាហាររបស់ពួកគេ នៅពេលមានការវាយប្រហារដោយអាវុធនុយក្លេអែរ ឬអាវុធជីវសាស្ត្រ ការបះបោរផ្នែកនយោបាយ និងមហារោគរោគរាតត្បាត។ល។
“ជាក់ស្ដែងបញ្ហាខាងលើនេះ កម្រនឹងកើតឡើង ប៉ុន្តែ វានៅតែមានលទ្ធភាពអាចកើតឡើង។ បើសិនអ្នកមិនបានត្រៀមខ្លួន អ្នកនឹងមិនដឹងថាត្រូវទៅណា និងធ្វើអ្វីនោះទេ។ ពេលមានអាសន្នធំកើតឡើង ភាពច្របូកប្របល់នឹងធ្វើឱ្យមនុស្សអាចដណ្ដើមគ្នារស់ ហើយនិងមានបញ្ហាជាច្រើនហួសពីសមត្ថភាពទប់ទល់របស់យើង” លោក Rene រៀបរាប់។
គណៈកម្មការនៃក្រុមខាងលើនេះ មានសមាជិកចំនួន5នាក់ ក្នុងនោះមាន Rene ផងដែរ។ ក្នុងករណីបន្ទាន់ Rene នឹងសម្រេចចិត្តថាតើត្រូវប្រកាសអាសន្នដែរ ឬអត់។ ពេលនោះ សមាជិកនៃគណៈកម្មការ នឹងត្រូវបានអញ្ជើញមកកាន់ជំរំខាងលើ។ អ្នកដែលមានបំណងចូលកាន់ជំរំរបស់ក្រុម Fortitude Ranch គឺត្រូវតែប្រើប្រាស់ពាក្យសម្ងាត់ដែលក្រុមនេះបានកំណត់។
ករណីមានមហារោគរាតត្បាតកើតឡើងទូទាំងប្រទេស អ្នកចំណូលថ្មីដែលចូលមកកាន់ជំរំនេះ នឹងត្រូវវាស់កម្ដៅខ្លួន មុនពេលត្រូវបានអនុញ្ញាតឱ្យចូលក្នុងតំបន់ដែលមានប្រព័ន្ធអេកូឡូស៊ី ដែលអាចចិញ្ចឹមជីវិតដោយខ្លួនឯងបាន។ នៅក្នុងជំរំនេះ មានអណ្ដូងទឹក ប្រព័ន្ធថាមពលព្រះអាទិត្យ វិទ្យុ ផ្ទះកញ្ចក់ សត្វចិញ្ចឹមផ្សេងៗ ដូចជា មាន់ ពពែ គោ រួមនឹងកន្លែងរំលាយសាកសពអ្នកជំងឺដែលស្លាប់ដោយសាររោគរាតត្បាត។
ស្ថាបនិករបស់ Fortitude Ranch គឺ Drew Miller ដែលជាអតីតអ្នកជំនាញផ្នែកចារកម្មយោធា ដែលបានបញ្ចប់ការសិក្សានៅសាកលវិទ្យាល័យ Harvard។
ខុសពីប្រព័ន្ធបន្ទប់លាក់ខ្លួននៅក្រោមដីដ៏មានតម្លៃថ្លៃ ដែលមហាសេដ្ឋីនានាបានសាងសង់ Fortitude Ranch របស់ Drew Miller ផ្ដោតទៅលើក្រុមមនុស្សដែលមានទ្រព្យធម្យម និងទាប។ អ្នកដែលចូលមកសម្រាកនៅទីនេះ គ្រាន់តែចំណាយ1,000ដុល្លារអាមេរិកប៉ុណ្ណោះក្នុង1ឆ្នាំ សម្រាប់កញ្ចប់ទាបបំផុតដែលមានគ្រែ1នៅក្នុងបន្ទប់ក្រោមដី។
ថ្មីៗនេះ Rene ទទួលបានការស្នើ និងសាកសួរព័ត៌មានជាច្រើនតាមរយៈអ៊ីម៉េល ខណៈដែលរោគរាតត្បាត COVID-19 កំពុងបង្កភាពវឹកវរនៅពាសពេញសហរដ្ឋអាមេរិក៕
ប្រភព៖ សារព័ត៌មានបរទេស
March 18, 2020
ស្រឡាំងកាំង!! ជនជាតិម៉ាឡេស៊ីប្រជ្រៀតគ្នាចូលប្រទេសសិង្ហបុរី ប៉ុន្មានម៉ោងមុនដល់កំណត់បិទប្រទេស…
ជនជាតិម៉ាឡេស៊ីចំនួនរាប់ពាន់នាក់ នាំគ្នាយួរកាបូបដាក់សម្ភារចាំបាច់ និងសម្លៀកបំពាក់ ធ្វើដំណើរឆ្លងព្រំដែនចូលទៅប្រទេសសិង្ហបុរី កាលពីអំឡុងពេលល្ងាចថ្ងៃអង្គារម្សិលមិញ(ទី17មីនា) ត្រៀមខ្លួនចាកចេញពីស្រុកកំណើតរយៈពេល 2សប្ដាហ៍ នៅប៉ុន្មានម៉ោង មុនពេលវិធានការបិទព្រំដែនរបស់រដ្ឋបាលម៉ាឡេស៊ីត្រូវបានអនុវត្ត។ នេះបើតាមការរាយការណ៍របស់សារព័ត៌មានរ៉យទ័រ។
ដោយសារក្លាយជាប្រទេសដែលបានរកឃើញអ្នកឆ្លងមេរោគវីរុសកូរ៉ូណាប្រភេទថ្មី ឬកូវីដ-19 ច្រើនជាងគេនៅក្នុងតំបន់អាស៊ីភាគអាគ្នេយ៍ ម៉ាឡេស៊ីមានវិធានការហាមពលរដ្ឋរបស់ខ្លួនធ្វើដំណើរចេញទៅក្រៅប្រទេស និង ហាមជនបរទេសចូលមកក្នុងប្រទេសដូចគ្នា ចាប់តាំងពីអធ្រាត្រថ្ងៃទី17 មីនាកន្លងទៅ រហូតដល់ថ្ងៃទី31 មីនា ដើម្បីទប់ស្កាត់ការឆ្លងរាលដាលនៃមេរោគមរណៈនោះ។
ទាំងអស់នេះ ជាធម្មតា មានប្រជាជនម៉ាឡេស៊ីជាង 300,000នាក់ ដែលធ្វើដំណើរចេញ-ចូលទៅធ្វើការនៅក្នុងប្រទេសសិង្ហបុរីក្នុង 1ថ្ងៃៗ ហើយសេចក្ដីថ្លែងការណ៍កាលពីយប់ថ្ងៃចន្ទ(ទី16មីនា) អាចនឹងធ្វើឱ្យពួកគេត្រូវរស់នៅដោយគ្មានប្រាក់ចំណូលក្នុងរយៈពេលយូរ ដោយសារវិធានការបិទប្រទេសក្នុងគ្រានេះ។
ឡៅ តុងលីន អាយុ 21ឆ្នាំ បានប្រាប់ថា គេមានផែនការទៅសុំស្នាក់អាស្រ័យនៅជាមួយបងប្អូនជីដូនមួយនៅក្នុងប្រទេសសិង្ហបុរី “បើខ្ញុំមិនទៅទេ ខ្ញុំអាចចាំបាច់ត្រូវសុំច្បាប់ឈប់ដោយមិនបានទទួលប្រាក់ឈ្នួល និងខ្លាំងជាងនោះទៅទៀត គឺខ្ញុំខ្លាចអត់ការងារធ្វើ”
ប្រទេសសិង្ហបុរី ជាប្រទេសដែលមានប្រជាជនជាង 5.7លាននាក់ ដែលត្រូវពឹងលើជនជាតិម៉ាឡេស៊ីពីរដ្ឋយ៉ះហូរ យ៉ាងច្រើន សម្រាប់ធ្វើជាធនធានបុគ្គលិកក្នុងមុខជំនួញផ្សេងៗ រាប់តាំងពីភោជនីយដ្ឋាន រហូតទៅដល់ផ្នែកផលិត សឺមីខន់ដាក់ទើរ។
រដ្ឋបាលសិង្ហបុរី បានប្រាប់ថា នឹងជួយសង្គ្រោះក្រុមហ៊ុនផ្សេងៗ ដែលចាំបាច់ត្រូវរៀបចំត្រៀមកន្លែងស្នាក់នៅឱ្យពលករម៉ាឡេស៊ី ក្នុងនោះរួមទាំងសាលារៀន និងបន្ទប់ស្នាក់នៅតម្លៃថោកឱ្យពួកគេផងដែរ។
ក្រសួងការងារ បានបញ្ជាក់ថា នឹងឧបត្ថម្ភប្រាក់ចំនួន 50ដុល្លារសិង្ហបុរី(ប្រមាណ 30ដុល្លារអាមេរិក)ក្នុង 1យប់ ក្នុងរយៈពេល 14យប់ សម្រាប់ពលករម្នាក់ៗដែលក្រុមហ៊ុនមួយៗត្រូវតែជួយសម្រួលឱ្យ។
ប្រទេសសិង្ហបុរី កាលពីថ្ងៃអង្គារ(ទី17មីនា) បានរាយការណ៍ថា រកឃើញអ្នកឆ្លងមេរោគវីរុសកូរ៉ូណាប្រភេទថ្មីថែមទៀតចំនួន 23នាក់ ជាថ្ងៃដែលមានអ្នកឆ្លងមេរោគច្រើនបំផុត ចាប់តាំងពីការរកឃើញមានការឆ្លងរាលដាលមក ធ្វើឱ្យចំនួនអ្នកឆ្លងមេរោគនៅពេលនេះកើនឡើងដល់ 266នាក់ហើយ៕
ប្រភព ៖ ព័ត៌មានបរទេស
March 18, 2020