សឿន សំណាង - La Reine Media

COVID-19! វៀតណាមផលិតបន្ទប់សម្លាប់មេរោគទូទាំងរាងកាយ សម្រាប់ប្រើក្នុងមន្ទីរពេទ្យ ដែលវាមានតម្លៃ…

បន្ទប់សម្លាប់មេរោគ ដែលប្រើប្រាស់កម្ដៅ និងបាញ់ផ្សែងថ្នាំសម្លាប់មេរោគទូទាំងរាងកាយ ដោយប្រើពេលត្រឹមតែ30វិនាទី ត្រូវបានមន្ទីរពេទ្យមួយចំនួនដាក់ឱ្យប្រើប្រាស់។

វិទ្យាស្ថានវេជ្ជសាស្ត្រជនជាតិភាគតិចទីក្រុងហូជីមិញ ប្រើប្រាស់បន្ទប់សម្លាប់មេរោគ ចាប់ពីថ្ងៃទី22មីនា ឆ្នាំ2020។ វិទ្យាស្ថាននេះ ទទួលពិនិត្យអ្នកជំងឺប្រហែល1,000នាក់ក្នុង1ថ្ងៃៗ ពិសេសគឺមនុស្សចាស់។ អ្នកដែលមកពិនិត្យជំងឺនៅទីនេះ ត្រូវបានណែនាំឱ្យលាងដៃនឹងអាល់កុល រួចចូលទៅក្នុងបន្ទប់សម្លាប់មេរោគ មុនពេលឈាមចូលក្នុងបរិវេណមន្ទីរពេទ្យ។ បុគ្គលិកពេទ្យទាំងអស់ក៏ត្រូវតម្រូវឱ្យធ្វើដូច្នេះ នៅមុន និងក្រោយការពិនិត្យអ្នកជំងឺ។

ថ្ងៃទី23មីនា មន្ទីរពេទ្យអន្តរជាតិ DNA ក៏បានដាក់ឱ្យប្រើបន្ទប់សម្លាប់មេរោគចល័ត ដែលមានសមត្ថភាពសម្លាប់មេរោគឱ្យមនុស្សចំនួន1,000នាក់ក្នុងមួយថ្ងៃៗ។ សកម្មភាពនេះ ត្រូវបានធ្វើឡើងទន្ទឹមនឹងការបាញ់ថ្នាំសម្លាប់មេរោគទូទាំងមន្ទីរពេទ្យ វាស់កម្ដៅខ្លួន លាងដៃដោយអាល់កុល ពាក់ម៉ាស់ និងឈុតការពារមេរោគទាំងអ្នកជំងឺ និងគ្រូពេទ្យ។ល។

សារធាតុសម្លាប់មេរោគ ដែលប្រើនៅក្នុងបន្ទប់សម្លាប់មេរោគចល័តនេះ គឺធាតុរាវ anolyte ដែលត្រូវបានអនុញ្ញាតឱ្យប្រើដោយក្រសួងសុខាភិបាលវៀតណាម និងអន្តរជាតិ ក្នុងការសម្លាប់មេរោគនានា ដូចជា បាក់តេរី វីរុស ផ្សិត សម្រាប់លាងដៃ សម្លាប់មេរោគលើឧបករណ៍សុខាភិបាល។ល។ សារធាតុ anolyte មិនប៉ះពាល់ដល់សុខភាព ឬស្បែក និងកោសិកាមនុស្សនោះទេ។ ទឹកអំបិលអ៊ីយ៉ុងក្នុងបន្ទប់សម្លាប់មេរោគនេះ ក៏អាចសម្លាប់មេរោគក្នុងច្រមុះ និងបំពង់កបានដែរ។

បន្ទប់សម្លាប់មេរោគមួយចំនួន ត្រូវបានដាក់នៅទីតាំងនៃកិច្ចប្រជុំនានា នៅឯទីក្រុងហាណូយ ហើយពេលខាងមុខ វានឹងត្រូវដាក់នៅតាមមន្ទីរពេទ្យនានាក្នុងប្រទេសវៀតណាម។

បន្ទប់សម្លាប់មេរោគនេះ ត្រូវបានបង្កើតឡើងដោយមជ្ឈមណ្ឌលអភិវឌ្ឍវិទ្យាសាស្ត្រ និងបច្ចេកវិទ្យា ស្ថិតក្រោមសម្ព័ន្ធយុវជនក្រុងហូជីមិញ(Ho Chi Minh City Youth Union) សហការជាមួយមហាវិទ្យាពហុបច្ចេកទេសហូជីមិញ។ បន្ទប់សម្លាប់មេរោគនេះ មានបំពាក់ឧបរកណ៍ចាប់រូបភាពមនុស្ស អំពូលភ្លើងផ្ដល់សញ្ញា ប្រព័ន្ធបាញ់ចំហាយថ្នាំសម្លាប់មេរោគស្វយប្រវត្ត មិនធ្វើឱ្យសើម អាចសម្លាប់មេរោគទូទាំងរាងកាយ ដោយប្រើពេលតែ30វិនាទីប៉ុណ្ណោះ។ បន្ទប់សម្លាប់មេរោគនេះ ក៏មានកង់ និងអាចដោះចេញ ងាយដឹកជញ្ជូន ព្រមទាំងមានផ្លូវសម្រាប់ជនពិការជើងដែលប្រើរទេះផងដែរ។ បន្ទប់នេះក៏នឹងឈប់បាញ់ចំហាយថ្នាំដោយខ្លួនឯង បើសិនគ្មានអ្នកប្រើប្រាស់។

លោក Doan Ngoc Hai ប្រធានមន្ទីរសុខភាពការងារ និងបរិស្ថាន របស់ក្រសួងសុខាភិបាលបានឱ្យដឹងថា វៀតណាមបានដាក់ឱ្យប្រើប្រាស់វិធានការសម្លាប់មេរោគផ្សេងៗជាច្រើនដើម្បីទប់ស្កាត់វីរុស COVID-19 ដូចជាការលាងដៃនឹងអាល់កុល ជូតសម្លាប់មេរោគកន្លែងដែលប៉ះពាល់ច្រើនជាដើម ប៉ុន្តែ នៅលើរាងកាយមនុស្ស ដូចជាផ្ទៃមុខ ក ខោអាវជាដើម ក៏អាចមានជាប់មេរោគ។

ដោយមើលឃើញភាពជាក់ស្ដែងខាងលើ វិទ្យាស្ថានសុខភាពការងារ និងបរិស្ថាន សហការជាមួយមហាវិទ្យាល័យពហុបច្ចេកទេសហាណូយ ក៏បានបង្កើតប្រព័ន្ធសម្លាប់មេរោគទូទាំងរាងកាយនេះដែរ។ ប្រព័ន្ធសម្លាប់មេរោគនេះ មាន2បន្ទប់ គឺ1ជាបន្ទប់ស្ងួត និង1ទៀតជាបន្ទប់សើម។ បន្ទប់ស្ងួត សម្លាប់មេរោគដោយប្រើកម្ដៅ និងអូហ្សូន ខណៈបន្ទប់សើម គឺប្រើប្រាស់សារធាតុរាវដែលមានសមត្ថភាពក្នុងការសម្លាប់មេរោគ។

ប្រសិទ្ធភាពរបស់បន្ទប់ស្ងួត អាចសម្លាប់មេរោគបាន70% ចំណែកបន្ទប់សើមវិញ អាចសម្លាប់មេរោគរហូតដល់99.99%។ បន្ទប់សម្លាប់មេរោគនេះ មានតម្លៃប្រហែលពី 65-70លានឌុង (2,790-3,000ដុល្លារអាមេរិក)៕

ប្រភព៖ សារព័ត៌មានបរទេស

March 24, 2020

WHO ប្រកាសថា “COVID-19” កំពុងបង្កើនល្បឿនការឆ្លងរាតត្បាតយ៉ាងធំ

អង្គការសុខភាពពិភពលោក ឬ WHO បានប្រកាសដាស់តឿនថា ស្ថានការណ៍ការឆ្លងរាតត្បាតដ៏ធំរបស់វីរុសកូរ៉ូណាប្រភេទថ្មី ឬកូវីដ-19 កំពុងតែបង្កើនល្បឿនខ្លាំងឡើង ក្រោយពីមានការអះអាងអំពីអ្នកឆ្លងមេរោគនេះទូទាំងពិភពលោក រួចហើយចំនួនជាង 300,000នាក់។

ចាប់តាំងពីមានរបាយការណ៍ រកឃើញការឆ្លងរាលដាលរបស់កូវីដ-19 ជាលើកដំបូងមក ចំនួនអ្នកឆ្លងមេរោគបានកើនឡើងជិត 100,000នាក់ក្នុងរយៈពេល 67ថ្ងៃ និង 11ថ្ងៃក្រោយពីនោះ បានកើនឡើងទៅជា 200,000នាក់ និងត្រឹមតែ 4ថ្ងៃបន្ទាប់មកទៀត ចំនួនអ្នកឆ្លងមេរោគ បានកើនឡើងធ្លុះដល់ 300,000នាក់។

លោក ធីដ្រូស អាត់ហាណម គីប្រ៊ីយេស៊ុស ប្រធានអង្គការសុខភាពពិភពលោក បានថ្លែងថា នៅតែមានភាពអាចទៅរួចជានិច្ច ក្នុងការផ្លាស់ប្ដូរសញ្ញាទាំងនោះ ដោយលោកបានសំណូមពរឱ្យប្រទេសនានា ត្រូវតែធ្វើការត្រួតពិនិត្យយ៉ាងតឹងរ៉ឹងបំផុត ដើម្បីអះអាងពីអ្នកឆ្លងមេរោគ រួមទាំងការតាមដានអ្នកដែលអាចនឹងឆ្លងមេរោគតាមរយៈការមានទំនាក់ទំនងជាមួយអ្នកដទៃ។

“រឿងសំខាន់បំផុត ដែលយើងអាចធ្វើបានក្នុងខណៈពេលនេះ គឺត្រូវដឹងក្នុងចិត្តជាប់ជានិច្ចថា យើងមិនអាចយកឈ្នះការប្រកួតបាល់ទាត់ដោយគ្រាន់តែលេងបែបទប់ទល់បាននោះទេ តែយើងត្រូវធ្វើជាអ្នកវាយលុកឱ្យបានទៀតផង” លោកគីប្រ៊ីយេស៊ុសថ្លែង។

ប្រធានអង្គការសុខភាពពិភពលោក ថែមទាំងបានសំណូមពរឱ្យមនុស្សម្នាទាំងអស់ ស្ថិតនៅតែក្នុងផ្ទះ ប្រតិបត្តិតាមវិធានការ រក្សាចម្ងាយរវាងគ្នានឹងគ្នានៅក្នុងទីសាធារណៈ ព្រោះវាមានភាពសំខាន់ខ្លាំងណាស់ក្នុងការជួយបន្ថយល្បឿននៃការចម្លងរាតត្បាតរបស់វីរុស តែយ៉ាងណាក៏ដោយ លោកបានបញ្ជាក់ថា វិធានការគ្រប់យ៉ាងទាំងនេះ គ្រាន់តែជាវិធានការការពារប៉ុណ្ណោះ វាមិនបានជួយឱ្យយើងឈ្នះទេ។

លោកថ្លែងថា “បើត្រូវការឈ្នះ យើងចាំបាច់ត្រូវតែវាយប្រយុទ្ធវីរុសកំណាចនេះដោយតិចនិកដែលខ្លាំងក្លា និងចំមុខសញ្ញា។ យើងត្រូវត្រួតពិនិត្យអ្នកដែលសង្ស័យថា នឹងឆ្លងមេរោគក្នុងគ្រប់ករណី ត្រូវដំណើរការវិធានការបង្ខាំងខ្លួននៅដោយឡែកពីអ្នកដទៃ និងមើលថែទាំអ្នកជំងឺដែលបានទទួលការអះអាងហើយគ្រប់ករណី រួមទាំងតាមដាន និងបង្ខាំងបរិវេណអ្នកដែលជិតស្និទ្ធ និងប៉ះពាល់ជាមួយអ្នកជំងឺគ្រប់គ្នា”៕

ប្រភព៖ សារព័ត៌មានបរទេស

March 24, 2020

ពន្លឺភ្លើងនៅខាងចុងផ្លូវ…ក្ដីសង្ឃឹមនៅឆ្ងាយ! ចំនួនស្លាប់ដោយកូវីដ-19 នៅអ៊ីតាលីថយចុះ, ឆ្លងមេរោគថ្មីកើនតិច

AFP- អ៊ីតាលី កាលពីថ្ងៃចន្ទ(ទី23មីនា) បានរាយការណ៍អំពីតួលេខអ្នកស្លាប់ដោយសារវីរុសកូរ៉ូណាប្រភេទថ្មី ឬកូវីដ-19 ប្រចាំថ្ងៃ បានធ្លាក់ចុះជាថ្ងៃទី2 ជាប់ៗគ្នា តែយ៉ាងណាក្ដី វាបានសម្លាប់ជីវិតមនុស្សនៅក្នុងប្រទេសមួយនេះរួចទៅហើយជាង 6,000នាក់ ក្នុងរយៈពេលត្រឹមតែ 1ខែគត់ប៉ុណ្ណោះ។

នៅពេលនេះ អ៊ីតាលីបានរកឃើញតួលេខអ្នកស្លាប់ប្រចាំថ្ងៃ បានធ្លាក់ចុះពីលំដាប់ខ្ពស់បំផុតក្នុងពិភពលោក 793នាក់ កាលពីថ្ងៃសៅរ៍(ទី21មីនា) មកនៅសល់ត្រឹម 651នាក់ នៅថ្ងៃអាទិត្យ(ទី22មីនា) និងចុងក្រោយបំផុត នៅសល់ 601នាក់ប៉ុណ្ណោះកាលពីថ្ងៃចន្ទ(ទី23មីនា)។

ចំណែកតួលេខអ្នកឆ្លងមេរោគថ្មីប្រចាំថ្ងៃ ក៏បានធ្លាក់ចុះពីលំដាប់ខ្ពស់បំផុត 6,557 កាលពីថ្ងៃសៅរ៍(ទី21មីនា) នៅសល់ 4,789នាក់ កាលពីថ្ងៃចន្ទ(ទី23មីនា) ដែលអាចនិយាយបានថា ជាថ្ងៃដែលមានអ្នកឆ្លងមេរោគថ្មី តិចបំផុតក្នុងជុំ 5ថ្ងៃ។

លោក ជូលេអូ កាល់លេរ៉ា ប្រធានផ្នែកសាធារណសុខាភិបាលរបស់តំបន់ ឡមបាឌៀរ ដែលជាមូលដ្ឋានរបស់ទីក្រុងមីឡាន បានបង្ហាញខ្លួនតាមរយៈស្ថានីយទូរទស្សន៍ដោយស្នាមញញឹមជាលើកដំបូងក្នុងជុំជាច្រើនសប្ដាហ៍កន្លងមក ដោយលោកបានថ្លែងថា “យើងនៅមិនទាន់អាចប្រកាសជ័យជម្នះបានទេ តែវាមានពន្លឺភ្លើងនៅខាងចុងផ្លូវហើយ…”

យ៉ាងណាក៏ដោយ លោក ស៊ីលវីអូ ប្រ៊ូសាហ្វើរ៉ូ នាយកស្ថាប័នសាធារណសុខាភិបាលរបស់អ៊ីតាលី ដេលមើលទៅហាក់ដូចជាមានឥរិយាបថប្រយ័ត្នប្រយែងខ្លាំងជាង បានថ្លែងថា “វាជាចំនួនដែលជាសញ្ញាវិជ្ជមាន តែខ្ញុំសុំមិនបញ្ជាក់ច្បាស់លាស់ថា វាមានសញ្ញាថយចុះទេ”។

ប្រជាជនអ៊ីតាលីបានរើបម្រះស្វែងរកពន្លឺនៃក្ដីសង្ឃឹមមកជាយូរហើយ ក្រោយពីរស់នៅក្រោមសភាវបិទប្រទេសអស់ជាច្រើនសប្ដាហ៍រួចមក ដែលសូម្បីតែការរត់ហាត់ប្រាណនៅក្នុងសួនច្បារសាធារណៈ ក៏ត្រូវបានហាមឃាត់ដែរ។

តាមពីក្រោយតួលេខដ៏គួរឱ្យភ្ញាក់ផ្អើលកាលពីថ្ងៃសៅរ៍(ទី21មីនា) លោកនាយករដ្ឋមន្ត្រី ជូសិបប៉េ ខន់តេ ចាំបាច់ត្រូវតែបញ្ចេញវិធានការដើម្បីកម្រិតសកម្មភាពផ្សេងៗបន្ថែមទៀត ក្នុងនោះរួមមានទាំង ការបញ្ជាបិទរោងចក្រនានាដែលមិនមានភាពចាំបាច់ផងដែរ។

លោក ខន់តេ បានចេញមកប្រកាសតាមបណ្ដាញសង្គមហ្វេសប៊ុក ឱ្យផ្អាកដំណើរការកិច្ចការបែបពាណិជ្ជកម្មទូទាំងប្រទេស លើកលែងតែមុខជំនួញដែលមានភាពចាំបាច់ដល់ការរស់នៅ ឬពាក់ព័ន្ធនឹងការការពារការឆ្លងរាលដាលរបស់មេរោគវីរុសកូរ៉ូណាប្រភេទថ្មីតែប៉ុណ្ណោះ។

លោកនាយករដ្ឋមន្ត្រីនៃប្រទេសអ៊ីតាលី បានថ្លែងថា ស៊ូភើរម៉ាឃិត និងឱសថស្ថាន នៅតែបើកផ្ដល់សេវាកម្ម ក្នុងខណៈដែលធនាគារ និងផ្នែកដឹកជញ្ជូនដែលសំខាន់ៗ ក៏នឹងនៅតែដំណើរការជាបន្ត ចំណែកមុខជំនួញផ្សេងៗទៀត ដែលមិនមានភាពចាំបាច់ក្នុងខណៈពេលនេះ នឹងត្រូវបញ្ជាហាមឃាត់មិនឱ្យដំណើរការទាំងអស់។

រហូតមកដល់ថ្ងៃនេះ(ទី24មីនា) តួលេខអ្នកឆ្លងមេរោគស្ថិតនៅក្នុងចំនួន 63,927នាក់ ក្នុងនោះមានអ្នកស្លាប់ 6,077នាក់៕

ប្រភព៖ សារព័ត៌មានបរទេស

March 24, 2020

បុគ្គលិកពេទ្យជិត 4,000នាក់ បានឆ្លងវីរុស COVID-19 នៅអេស្ប៉ាញ!

ក្រុមមន្ត្រីអេស្ប៉ាញបានបញ្ជាក់ថា បុគ្គលិកពេទ្យចំនួន 3,910នាក់ បានឆ្លងមេរោគកូរ៉ូណា COVID-19 ពោលគឺស្មើនឹង12% នៃចំនួនអ្នកជំងឺកូរ៉ូណាសរុបក្នុងប្រទេសនេះ។

នាយកមជ្ឈមណ្ឌលសម្របសម្រួលករណីបន្ទាន់របស់ក្រសួងសុខាភិបាលអេស្ប៉ាញ លោក Fernando Simon បានថ្លែងកាលពីថ្ងៃទី23មីនាថា “យើងមានទិន្នន័យមួយដ៏គួរឱ្យព្រួយចិត្ត និងត្រូវតែគ្រប់គ្រងវាឱ្យបាន។ បុគ្គលិកពេទ្យចំនួន 3,910នាក់ បានឆ្លងវីរុស COVID-19″។

ដូចទៅនឹងប្រទេសផ្សេងៗទៀតដែរ ក្រុមគ្រូពេទ្យនៅអេស្ប៉ាញក៏បានឱ្យដឹងថា ពួកគេធ្វើការក្នុងភាពភ័យខ្លាច ព្រោះតែខ្វះឧបករណ៍ការពារខ្លួន ថ្វីបើអាជ្ញាធរ និងបណ្ដាក្រុមហ៊ុន បាន និងកំពុងតែជំរុញផលិតភាព ក៏ដូចជាបញ្ជាទិញពីខាងក្រៅបន្ថែមទៀត ដើម្បីផ្គត់ផ្គង់តាមតម្រូវការក៏ដោយ។

លោក Fernando Simon បានថ្លែងបន្តថា បទបញ្ជាបិទការធ្វើដំណើរទូទាំងប្រទេស នឹងត្រូវសភាអនុម័តពន្យារសុពលភាពនៅថ្ងៃទី25មីនា។ លោកសង្កត់ធ្ងន់ថា នេះមិនមែនជាពេលដែលអ្នករាល់គ្នាលម្ហែកាយនោះទេ តែត្រូវគោរពបទបញ្ជាដែលហាមមិនឱ្យចេញក្រៅផ្ទះ លើកលែងតែទៅបំពេញភារកិច្ច ឬទិញរបស់របរចាំបាច់ និងទិញថ្នាំពេទ្យ។

រាជរដ្ឋាភិបាលប្រទេសអេស្ប៉ាញ កាលពីម្សិលម៉្ងៃ បានប្រកាសថា ឧបនាយករដ្ឋមន្ត្រី Carmen Calvo បានចូលសម្រាកព្យាបាលនៅមន្ទីរពេទ្យ ទៅតាមការស្នើរបស់ក្រុមវេជ្ជបណ្ឌិត បន្ទាប់ពីបានធ្វើតេស្តរកមេរោគឃើញថា លោកស្រីមានផ្ទុកមេរោគផ្លូវដង្ហើម តែមិនមែនជា COVID-19។ លទ្ធផលនៃការធ្វើតេស្តរកវីរុស COVID-19 នឹងត្រូវប្រកាសក្នុងពេលឆាប់ៗនេះ។

មុននេះ រដ្ឋមន្ត្រីចំនួន2រូប រួមនឹងភរិយារបស់នាយករដ្ឋមន្ត្រីអេស្ប៉ាញ Pedro Sanchez ក៏ត្រូវបានធ្វើតេស្តឃើញថាមានផ្ទុកវីរុស COVID-19នេះផងដែរ។

មេរោគ COVID-19 បានឆ្លងរាលដាលនៅប្រទេសចិន ចាប់ពីខែធ្នូ ឆ្នាំ2019 ហើយមកដល់បច្ចុប្បន្ន វាបានបណ្ដាលឱ្យមនុស្សជាង 381,760នាក់កើតរោគ ក្នុងនោះមានជាង16,550នាក់បានស្លាប់ និងជាង12,060 កំពុងប្រឈមនឹងការស្លាប់។

ព្រះរាជាណាចក្រអេស្ប៉ាញ គិតមកដល់ពេលនេះ មានអ្នកឆ្លង COVID-19 ចំនួន 35,136នាក់ និងស្លាប់ចំនួន 2,311នាក់៕

ប្រភព៖ សារព័ត៌មានបរទេស

March 24, 2020

COVID-19! អ្នកជំងឺត្រូវដេកតាមបណ្ដោយផ្លូវដើរ រង់ចាំការព្យាបាល ខណៈមន្ទីរពេទ្យស្ទើរអស់លទ្ធភាពនឹងទទួល…(វីដេអូ)

ឃ្លីបវីដេអូស្ដីអំពីអ្នកជំងឺកូរ៉ូណានៅខាងក្នុងមន្ទីរពេទ្យ Infant Leonor ដែលស្ថិតនៅតំបន់ Madrid បានបង្ហាញថា អ្នកជំងឺជាច្រើនរូប ដេកនៅតាមបណ្ដោយផ្លូវដើរក្បែរបន្ទប់ ដើម្បីរង់ចាំបុគ្គលិកពេទ្យមកជួយសង្គ្រោះ។

ឃ្លីបវីដេអូ ដែលត្រូវបានថតនៅខាងក្នុងមន្ទីរពេទ្យ Infanta Leonor ក្នុងទីក្រុង Madrid ប្រទេសអេស្ប៉ាញ កាលពីចុងសប្ដាហ៍កន្លងទៅ បានបង្ហាញឱ្យឃើញទិដ្ឋភាពដ៏គួរឱ្យព្រួយបារម្ភ ខណៈដែលមានអ្នកជំងឺជាច្រើន ត្រូវដេកតាមបណ្ដោយផ្លូវដើរ ក្បែរបន្ទប់ព្យាបាលនានាក្នុងមន្ទីរពេទ្យ រង់ចាំគ្រូពេទ្យមកជួយសង្គ្រោះជីវិត។ នៅពេលដើរកាត់ទីនោះ គេឮសូរសំឡេងក្អកយ៉ាងច្បាស់ៗរបស់អ្នកជំងឺ ក្នុងនោះមានអ្នកខ្លះដេក អ្នកជំងឺខ្លះអង្គុយរង់ចាំនៅលើកៅអី។

ទីភ្នាក់ងារសារព័ត៌មាន EI Mundo របស់ប្រទេសអេស្ប៉ាញ បានឱ្យដឹងថា មន្ទីរពេទ្យ Severo Ochoa de Leganes នៅទីក្រុង Madrid ក៏ស្ថិតក្នុងស្ថានភាពដូចគ្នានេះដែរ ដោយមានអ្នកជំងឺជិត200នាក់ កំពុងរង់ចាំចូលសម្រាកព្យាបាលក្នុងមន្ទីរពេទ្យ។

មន្ទីរពេទ្យ Severo Ochoa de Leganes បានទទួលស្គាល់ថា ពួកគេ “មិនទទួលព្យាបាលអ្នកជំងឺបន្ថែមទៀត” នោះទេ ព្រោះបាន “លើសចំណុះច្រើនណាស់ទៅហើយ”។

តំណាងសហជីពសុខាភិបាលអេស្ប៉ាញ Javier Garcia បានឱ្យដឹងថា ស្ថានភាពបច្ចុប្បន្ននៅក្នុងបណ្ដាមន្ទីរពេទ្យ គឺកំពុងដំណើរការ “លើសពីសមត្ថភាពរហូតដល់3ដង” ហើយមាន “អ្នកជំងឺជាច្រើន ត្រូវអង្គុយលើកៅអីជាង30ម៉ោង ដោយសារតែខ្វះគ្រែ”។

Jorge Mora តំណាងរបស់សមាគមថែទាំសុខភាពអេស្ប៉ាញ បាននិយាយថា មន្ទីរពេទ្យ Infanta Leonor កំពុងដំណើរការលើសពីសមត្ថភាពដែលខ្លួនមាន ដោយកំពុងព្យាបាលអ្នកជំងឺជាង 500នាក់ ដែលបានឆ្លងមេរោគ COVID-19 ក្នុងនោះមាន300នាក់វិជ្ជមាន និង230នាក់កំពុងតាមដានសុខភាព។

អេស្ប៉ាញ បច្ចុប្បន្នមានអ្នកឆ្លងមេរោគ COVID-19 ជាង35,130នាក់ ក្នុងនោះមានអ្នកជំងឺជជាង 2,311នាក់បានបាត់បង់ជីវិត។

នៅទូទាំងពិភពលោក គិតមកដល់ពេលនេះ មានអ្នកឆ្លងរោគ COVID-19 សរុប 381,744នាក់ ក្នុងនោះមាន 16,558នាក់បានស្លាប់ និងជាង12,062នាក់ទៀតអាចបាត់បង់ជីវិត៕

https://www.youtube.com/watch?v=RuuqZUE_Kmw

ប្រភព៖ សារព័ត៌មានបរទេស

March 24, 2020

តំបន់អាស៊ីអាគ្នេយ៍ នៅសល់តែ1ប្រទេសគត់ដែលមិនទាន់មានអ្នកឆ្លង COVID-19 បន្ទាប់ពីមីយ៉ានម៉ា បានរកឃើញអ្នកផ្ទុក COVID-19 ដំបូងបង្អស់របស់ខ្លួន

កាលពីប៉ុន្មានថ្ងៃមុននេះ ម៉ីយ៉ានម៉ា គឺជាប្រទេស1 ក្នុងចំណោមប្រទេសដ៏តិចតួចក្នុងពិភពលោក ដែលមិនទាន់មានករណីឆ្លងមេរោគកូរ៉ូណា ក៏ប៉ុន្តែ ថ្ងៃនេះ មីយ៉ានម៉ា បានបញ្ជាក់អំពីការរកឃើញអ្នកឆ្លងវីរុស COVID-19 ជាលើកដំបូងរបស់ខ្លួនកាលពីថ្ងៃចន្ទទី23មីនា។

លោកស្រី អ៊ុងសានស៊ូជី (Aung San Suu Kyi) ទីប្រឹក្សារដ្ឋ ដែលជាអ្នកដឹកនាំប្រទេសដោយប្រយោល ធ្លាប់បានអះអាងកាលពីថ្ងៃទី16មីនាថា ប្រទេសនេះ មិនទាន់មានករណីឆ្លងមេរោគ COVID-19 នៅឡើយ។

កាលពីល្ងាចថ្ងៃចន្ទកន្លងទៅ ក្រសួងសុខាភិបាលមីយ៉ាន់ម៉ា បានឱ្យដឹងថា បុរសជនជាតិមីយ៉ាន់ម៉ាម្នាក់អាយុ36ឆ្នាំដែលធ្វើដំណើរត្រឡប់មកពីសហរដ្ឋអាម៉េរិក និង បុរសជនជាតិមីយ៉ាន់ម៉ាម្នាក់អាយុ26ឆ្នាំ ដែលត្រឡប់មកពីអង់គ្លេស ត្រូវបានធ្វើតេស្តរកឃើញថា មានផ្ទុកមេរោគកូរ៉ូណា COVID-19។

ក្រសួងសុខាភិបាលនៃប្រទេសមីយ៉ានម៉ា ក៏បានប្រកាសថា នឹងស្រាវជ្រាវរកពលរដ្ឋទាំងឡាយណាដែលបានទាក់ទងផ្ទាល់ និងប្រយោលជាមួយអ្នកជំងឺខាងលើនេះផងដែរ។

ដូច្នេះ នៅតំបន់អាស៊ីអាគ្នេយ៍ នៅសល់តែប្រទេស1គត់ដែលមិនទាន់មានករណីឆ្លងវីរុសកូរ៉ូណា COVID-19 នោះគឺសាធារណរដ្ឋប្រជាធិបតេយ្យប្រជាមានិតឡាវ៕

ប្រភព៖ សារព័ត៌មានបរទេស

March 24, 2020

អ្នកជំនាញការផ្នែកជំងឺរាតត្បាតល្បីឈ្មោះរបស់ចិន ប្រាប់ថា មាន “មនុស្ស 3ប្រភេទ“ ដែលវីរុសកូវីដ-19 ពិបាកឆ្លងចូល…

អ្នកជំនាញខាងជំងឺរាតត្បាតល្បីឈ្មោះ លោកស្រីវេជ្ជបណ្ឌិត លី ឡាន់ចួន បានណែនាំថា សុខភាពរាងកាយដែលរឹងមាំ គឺជាក្រោះដែកកម្រិតកំពូលដែលនឹងការពារមេរោគវីរុសកូវីដ-19 និងវីរុសប្រភេទផ្សេងទៀតមិនឱ្យចូលមកក្នុងរាងកាយយើងបាន។

ការសិក្សាអំពីមេរោគវីរុសកូរ៉ូណាប្រភេទថ្មី ចាប់តាំងពីអំឡុងពេលចាប់ផ្ដើមរាតត្បាតក្នុងប្រទេសចិនមក បានសរុបឱ្យដឹងពីវិធីការចម្លងសាយភាយរបស់មេរោគវីរុស ដូចតទៅៈ ទី1 គឺការចម្លងមេរោគតាមរយៈការប៉ះពាល់ជិតស្និទ្ធខាងរាងកាយ អាស្រ័យលើរយៈចម្ងាយគម្លាតពីគ្នា ដូច្នេះការនៅក្នុងផ្ទះ មិនចេញទៅខាងក្រៅ ចៀសវាងការជួបនឹងមនុស្សម្នាថ្មីៗប្លែកៗ ឬទៅទីកន្លែងដែលមានហ្វូងមនុស្សច្រើនកុះករ គឺជាការការពារការឆ្លងមេរោគដែលមានប្រសិទ្ធភាពបំផុត។

និង 1វិធីទៀតគឺ ការចម្លងសាយភាយមេរោគតាមរយៈលម្អងទឹកដែលអណ្ដែតនៅក្នុងអាកាសធាតុ ដូច្នេះហើយទើបការចេញទៅក្រៅផ្ទះ ត្រូវពាក់ម៉ាស់អនាម័យការពារ ដើម្បីបំបាត់ ឬកាត់បន្ថយឱកាសនៃការឆ្លងមេរោគពីការចម្លងរាលដាលខាងលម្អងទឹកដែលចេញពីរាងកាយអ្នកផ្ទុកមេរោគ។

ក្រៅពីវិធីការការពារខ្លួនខាងលើហើយ លោកស្រីវេជ្ជបណ្ឌិត លី ឡាន់ចួន និងអ្នកជំនាញការដទៃទៀត បានយល់ឃើញដូចៗគ្នាថា អ្នកដែលមានគុណសម្បត្តិ 3ប្រការខាងក្រោមនេះ នឹងមិនឆ្លងមេរោគ ”វីរុសកូរ៉ូណាប្រភេទថ្មី” នេះ ដោយងាយៗឡើយ នោះគឺ ៖

1. អ្នកដែលរស់នៅក្នុងគន្លងនៃការថែរក្សា និងបង្កើនសុខភាព

អំឡុងពេលដែលមេរោគវីរុសប្រភេទថ្មីឆ្លងរាតត្បាតខ្លាំង អ្នកខ្លះត្រូវមេរោគវីរុសវាយប្រហារបានយ៉ាងស្រួល តែអ្នកខ្លះ រួចផុតពីមេរោគឆ្លងរាតត្បាតបានយ៉ាងសប្បាយៗ…នេះគឺដោយសារតែប្រព័ន្ធប្រឆាំងជំងឺក្នុងរាងកាយដែលរឹងមាំ អាចតតាំងមេរោគបានបែបដាច់ខាត ដូច្នេះការថែរក្សាសុខភាពឱ្យនៅរឹងប៉ឹងមាំមួន គឺជារឿងសំខាន់បំផុត។

សុខភាពដែលរឹងប៉ឹងមាំមួន គឺស្ថិតលើការហាត់ប្រាណ…ចិនមានសុភាសិតមួយថា “ការហាត់ប្រាណ គឺជាថាមពលរបស់ជីវិត” អ្វីៗគ្រប់យ៉ាង សុំត្រឹមតែមិនឈប់ហាត់ប្រាណ ក៏អាចថែរក្សាថាមពលជីវិតបានស្រេចទៅហើយ។

ក្រៅពីការហាត់ប្រាណដែលសមរម្យហើយ ត្រូវមានកិច្ចការប្រចាំថ្ងៃដែលបង្កើនសុខភាពផងដែរ គឺឆាប់ចូលគេង និងភ្ញាក់ពីព្រឹក ព្យាយាមកុំអត់ងងុយ មិនផឹកស្រាជក់បារី គេងលក់ឱ្យឆ្អែត…ដោយមានតែកិច្ចការប្រចាំថ្ងៃ និងសុខនិស្ស័យទាំងនេះប៉ុណ្ណោះ ទើបអាចបង្កើនប្រព័ន្ធប្រឆាំងជំងឺបាន។

2. អ្នកដែលមានសុខនិស្ស័យខាងការបរិភោគដែលល្អ

ចិនមានសុភាសិតចំពោះរឿងនេះថា “ជំងឺចូលតាមមាត់”…ការកើតឡើងនៃជំងឺឈឺថ្កាត់ សុទ្ធតែពាក់ព័ន្ធនឹងជីវិតការរស់នៅប្រចាំថ្ងៃយ៉ាងមិនអាចញែកដាច់ពីគ្នាបានឡើយ អាចនិយាយបានថា ការសាងសុខនិស្ស័យខាងការបរិភោគដែលល្អ គឺជាគោលការណ៍ដែលធានាដ៏សំខាន់របស់សុខភាព ដោយការទទួលទានអាហារតាមរដូវកាល ព្យាយាមញ៉ាំបន្លែផ្លែឈើស្រស់តាមរដូវកាលឱ្យបានច្រើនបំផុត និងបន្ថយការញ៉ាំបន្លែផ្លែឈើខុសរដូវកាល។ ទោះជាពេលនេះ(នៅប្រទេសចិន)ឈានចូលដល់រដូវស្លឹកឈើលាស់ហើយក៏ដោយ តែស្ថានភាពធាតុអាកាសនៅតែត្រជាក់រងា ការបំពេញតួនាទីរបស់ប្រព័ន្ធក្រពះពោះវៀននៅទន់ខ្សោយនៅឡើយ ដូច្នេះទើបគួរញ៉ាំអាហារត្រជាក់ និងរបស់ខ្លាញ់ៗឱ្យតិចបំផុត ដើម្បីកុំឱ្យប្រព័ន្ធក្រពះពោះវៀនត្រូវធ្វើការធ្ងន់ខ្លាំងឡើង។

3. អ្នកដែលមានភាពដឹងខ្លួនជាប់ជានិច្ចក្នុងផ្នែកសុវត្ថិភាព

ក្នុងអំឡុងពេលពិសេសបែបនេះ ក្រៅពីការថែរក្សាសុខនិស្ស័យ ការរស់នៅ និងការហូបចុកហើយនោះ ត្រូវបង្កើនការនឹករឭកដឹងខាងផ្នែកសុវត្ថិភាពរបស់ខ្លួនឯងឱ្យបានជាប់ជានិច្ច ដូចជា ពាក់ម៉ាស់អនាម័យការពារ ពេលចេញទៅក្រៅផ្ទះ មិនទៅកន្លែងដែលមានមនុស្សម្នាច្រើនកុះករ មិនចូលរួមពិធីបុណ្យជប់លៀងរួមជាមួយមិត្តភក្តិម្រាក់ក្លើបងប្អូនសាច់ញាតិ…ការការពារការឆ្លងមេរោគឱ្យបានដាច់ខាត ត្រូវតម ឬផ្អាកទង្វើទាំងអស់ហ្នឹង។

វីរុសកូវីដ-19 នឹងមិនងាយចម្លងចូលទៅមនុស្សដែលមានគុណសម្បត្តិទាំង 3ប្រការនេះបានទេ(ចូរចាំទុក)។ បើលោកអ្នក ជាមនុស្សម្នាក់ស្ថិតក្នុងចំណោមមនុស្សពពួកនេះ ក៏អាចរាប់បានថា អ្នកជាបុគ្គលដែលមានសំណាងល្អហើយ…ក្នុងការរស់នៅ ពួកយើងក៏គួរធ្វើឱ្យបានបែបហ្នឹង ដើម្បីសុខភាពទាំងរបស់ខ្លួនឯង និងអ្នកឯទៀត។ រក្សាសុខនិស្ស័យល្អៗក្នុងការរស់នៅ បង្កើនការដឹងខ្លួនជាប់ជានិច្ចខាងផ្នែកសុវត្ថិភាព នោះលោកអ្នក ច្បាស់ជាស្ថិតនៅឆ្ងាយពីមេរោគមិនខាន៕

ប្រភព៖ សារព័ត៌មានបរទេស

March 24, 2020

ព័ត៌មានសំខាន់! រកឃើញ អ្នកជំនាញខាងជំងឺឆ្លងជនជាតិអាមេរិកម្នាក់ ធ្វើការនៅក្នុងទីក្រុងប៉េកាំង ត្រូវ លោក ត្រាំ កោះហៅឱ្យមកប្រទេសវិញ មុនពេលចិនកើតវិបត្តិ “កូវីដ-19” រាតត្បាត

ទីភ្នាក់ងារព័ត៌មាន រ៉យទ័រ បានជួបនឹងលោកស្រីវេជ្ជបណ្ឌិត លីនដា ឃ្វិក(Linda Quick) អ្នកជំនាញការផ្នែកជំងឺរាតត្បាត ប្រចាំនៅស្ថាប័ន CDC សហរដ្ឋអាមេរិក ដែលបានបំពេញតួនាទីផ្ដល់ការអប់រំដល់អ្នកជំនាញជំងឺរាតត្បាតជនជាតិចិន ដែលនៅសុខៗ មិនប៉ុន្មានខែមុនកើតវិបត្តិវីរុសកូរ៉ូណាប្រភេទថ្មី ស្រាប់តែលោកស្រី ត្រូវបានរដ្ឋបាលសហរដ្ឋអាមេរិក កោះហៅឱ្យត្រឡប់ទៅប្រទេសអាមេរិកវិញ និងមិនមានការបញ្ជូនអ្នកថ្មីទៅជំនួស ដែលបន្ទាប់ពីនោះមក មេរោគវីរុសកូវីដ-19 បានក្លាយជាមហាគ្រោះថ្នាក់លំដាប់ពិភពលោកនៅក្នុងថ្ងៃនេះ ដែលមានចំនួនអ្នកឆ្លងមេរោគនេះចុងក្រោយបំផុតចំនួន 333,966នាក់ និងស្លាប់សរុប 14,606នាក់។

ទីភ្នាក់ងារព័ត៌មានរ៉យទ័រ បានរាយការណ៍កាលពីថ្ងៃម្សិលមិញ(ទី23មិនា)ថា រ៉យទ័របានទទួលព័ត៌មានមកថា អ្នកជំនាញខាងជំងឺរាតត្បាតលំដាប់លេខ1 របស់មជ្ឈមណ្ឌលគ្រប់គ្រងរោគ និងការការពារនៃសហរដ្ឋអាមេរិក(Centers for Disease Control and Prevention ឬ CDC) គឺលោកស្រីវេជ្ជបណ្ឌិត លីនដា ឃ្វិក(Dr. Linda Quick ) ត្រូវបានកោះហៅឱ្យត្រឡប់ទៅសហរដ្ឋអាមេរិកវិញ នៅខែកក្កដា ឆ្នាំមុន មិនប៉ុន្មានខែ មុនកើតការឆ្លងរាលដាលរបស់មេរោគវីរុសកូរ៉ូណាប្រភេទថ្មីបានកើតឡើងនៅក្នុងប្រទេសចិន។

ទាំងអស់នេះ ប្រភពព័ត៌មាន 4រូប ដែលស្និទ្ធនឹងលោកស្រីវេជ្ជបណ្ឌិត លីនដា បានបង្ហើបឱ្យដឹងថា លោកស្រី លីនដា មានតួនាទីជាអ្នកផ្ដល់ការអប់រំដល់អ្នកជំនាញការផ្នែកជំងឺរាតត្បាតរបស់ចិននៅក្នុងទីក្រុងប៉េកាំង ដែលក្រោយមក បណ្ដាអ្នកជំនាញការជនជាតិចិនទាំងនោះត្រូវបានបញ្ជូនទៅចំណុចកណ្ដាលនៃការឆ្លងរាលដាល(ទីក្រុងវូហាន) ដើម្បីជួយតាមដាន ស៊ើបសួរ និងគ្រប់គ្រងជំងឺឆ្លង។

ដោយករណីជំងឺបណ្ដាលពីវីរុសកូរ៉ូណាប្រភេទថ្មី បានកើតឡើងដំបូងបំផុតនៅក្នុងខែវិច្ឆិកា ឆ្នាំមុន។

ក្រោយពីមានការឆ្លងរាលដាលកាន់តែខ្លាំងឡើង រដ្ឋបាលសហរដ្ឋអាមេរិករបស់លោកប្រធានាធិបតី ដូណាល់ ត្រាំ បែរជាចេញមកចោទប្រកាន់ថា ខាងក្រុងប៉េកាំងបានលាក់បាំងព័ត៌មាន និងមិនបានបញ្ជូនអ្នកជំនាញការផ្នែកជំងឺរាតត្បាតរបស់ខ្លួនចូលទៅក្នុងប្រទេសចិន ដើម្បីជួយទប់ស្កាត់ឡើយ។

លោក ប៉ៅ ពីង ហ្ស៊ូ(Bao-Ping Zhu) អ្នកជំនាញការផ្នែកជំងឺរាតត្បាតជនជាតិអាមេរិក ដើមកំណើតចិន ដែលបានបំពេញតួនាទីនោះដោយបានទទួលការគាំទ្រពីស្ថាប័ន CDC ក្នុងអំឡុងឆ្នាំ2007-2011 បានទទួលស្គាល់ថា “វាជារឿងរញ្ជួយចិត្តខ្លាំងណាស់ ដែលត្រូវទ្រាំឈរមើលហេតុការណ៍អាក្រក់កើតឡើង” និងបានបន្ថែមទៀតថា “បើសិនមាននរណាម្នាក់ស្ថិតនៅទីនោះ ប្រហែលជាមន្ត្រីសុខាភិបាល និងរដ្ឋបាលទូទាំងពិភពលោក អាចធ្វើអ្វីបានច្រើនជាងនេះ…”

ទាំងអស់នេះ គេបានដឹងថា លោកស្រី លីនដា គឺជាបេះដូងសំខាន់ក្នុងការធ្វើជាភ្នែកជាច្រមុះឱ្យសហរដ្ឋអាមេរិក និងប្រទេសដទៃទៀត សម្រាប់ការឆ្លងរាតត្បាតមេរោគកូវីដ-19 និងយ៉ាងហោចណាស់ ក៏អាចចេញមកប្រកាសប្រាប់អំពីគ្រោះភ័យដែលនឹងកើតឡើង ឱ្យបានដឹងមុនជាច្រើនសប្ដាហ៍ដែរ។

រ៉យទ័រ បានចង្អុលបង្ហាញថា គ្មានអ្នកជំនាញការផ្នែកជំងឺរាតត្បាតជនជាតិបរទេសណាម្នាក់ត្រូវបានបញ្ជូនចូលទៅធ្វើការជំនួសក្នុងគ្រោងការនោះ បន្ទាប់ពីលោកស្រី លីនដា បានធ្វើដំណើរត្រឡប់ចេញមកពីប្រទេសចិននៅក្នុងកក្កដានោះឡើយ ដោយលោក ហ្ស៊ូ បាននិយាយថា អ្នកជំនាញការដែលបានចុះធ្វើការនៅក្នុងតំបន់ អាចរៀនយល់ដឹងពាក់ព័ន្ធនឹងការឆ្លងរាតត្បាតនោះបានលឿនជាង បន្ទាប់ពីបានសាងសម្ព័ន្ធភាពជាមួយអ្នកជំនាញការចិនហើយ។

ការធ្វើដំណើរត្រឡប់ទៅប្រទេសវិញរបស់លោកស្រីវេជ្ជបណ្ឌិត លីនដា បានកើតឡើងកណ្ដាលជម្លោះខាងពាណិជ្ជកម្មរវាងប្រទេសចិនជាមួយសហរដ្ឋអាមេរិក ជាអំឡុងពេលដែលលោកស្រី លីនដា ឃ្វិក បានដឹងថា “គ្រោងការអប់រំផ្នែកជំងឺរាតត្បាតខាងការប្រតិបត្តិសហរដ្ឋអាមេរិក” (U.S Field Epidemiology Training Program) នឹងមិនទទួលបានការបន្តអាយុពីរដ្ឋបាលសហរដ្ឋអាមេរិកទៀតទេនៅក្នុងខែកញ្ញា ខណៈដែលប្រភពព័ត៌មានបានឱ្យដឹងថា CDC សហរដ្ឋអាមេរិក បានដឹងជាលើកដំបូងអំពីការកើតករណីជំងឺរលាកសួត ចំនួន 27ករណី តែមិនបានដឹងប្រភពថា មកពីទីក្រុងវូហានឡើយនៅថ្ងៃទី31 ធ្នូ ឆ្នាំមុន។

(សូមរង់ចាំអានវគ្គបន្តនៅថ្ងៃស្អែក)

ប្រភព៖ សារព័ត៌មានបរទេស

March 24, 2020

មនុស្សជាង1ពាន់លាននាក់ ត្រូវបង្ខំ និងស្នើឱ្យនៅតែក្នុងផ្ទះ ដោយសារវីរុស COVID-19

មនុស្សប្រមាណជាជាង 1ពាន់លាននាក់ នៅក្នុងប្រទេស និងដែនដីជាង50 ត្រូវបានបង្ខំ និងស្នើឱ្យនៅក្នុងផ្ទះ ខណៈដែលរដ្ឋាភិបាលចាត់វិធានការប្រយុទ្ធប្រឆាំងនឹងមេរោគកូរ៉ូណា COVID-19។

យ៉ាងហោចណាស់មានប្រទេស និងដែនដីចំនួន34ក្នុងពិភពលោក ដែលមានប្រជាជនជាង659លាននាក់ បានចាត់វិធានការដាក់បម្រាមគោចរ និងស្នើឱ្យពលរដ្ឋនៅក្នុងផ្ទះ ខណៈដែលវីរុស COVID-19 កាន់តែឆ្លងរាលដាលខ្លាំងនៅស្ទើរគ្រប់ទិសទីលើភពផែនដី។ បណ្ដាប្រទេសដែលបានចាត់វិធានការក្ដៅខាងលើនេះ ក៏មានប្រទេសបារាំង អ៊ីតាលី អាហ្សង់ទីន រដ្ឋកាលីហ្វ័រញ៉ារបស់សហរដ្ឋអាមេរិក ប្រទេសអ៊ីរ៉ាក់ និង រវ៉ាន់់ដាផងដែរ។

ក្រិកគឺជាប្រទេសថ្មីបំផុតដែលទើបបានដាក់បម្រាមគោចរ បង្ខំឱ្យពលរដ្ឋនៅក្នុងផ្ទះ ហើយបទបញ្ជានេះ មានសុពលភាពចាប់ពីព្រឹកមិញនេះ។ ប្រទេសកូឡុំប៊ី នឹងដាក់បម្រាមគោចរដោយបង្ខំ ចាប់ពីថ្ងៃទី24មីនា និងប្រទេស នូវែលហ្សេឡង់ ក៏អនុវត្តបទបញ្ជាដូចគ្នានេះ ចាប់ពីថ្ងៃទី25មីនា។ យ៉ាងណាក៏ដោយ ក៏នឹងនៅតែមានករណីលើកលែងខ្លះ ដូចជា ការធ្វើដំណើរទៅក្រៅដើម្បីទិញសម្ភារចាំបាច់ ឬទៅធ្វើការចាំបាច់ជាដើមផងដែរ។

យ៉ាងតិចណាស់ក៏មានប្រទេសចំនួន4 ដែលមានប្រជាជនច្រើនជាង228លាននាក់ រួមមានអ៊ីរ៉ង់ អាល្លឺម៉ង់ និងអង់គ្លេសជាដើម បានអំពាវនាវឱ្យពលរដ្ឋរបស់ខ្លួន នៅតែក្នុងផ្ទះ និងកាត់បន្ថយការជួបផ្ទាល់ជាមួយអ្នកដទៃ។

មានប្រទេស និងដែនដីយ៉ាងហោចចំនួន10 ដែលមានប្រជាជនសរុបជាង 117លាននាក់ បានចេញបទបញ្ជាហាមធ្វើដំណើរនៅពេលយប់។ វិធានការទាំងនេះ ត្រូវបានអនុវត្តនៅក្នុងប្រទេស ប៊ូគីណាហ្វាសូ ប្រទេសឈីលី រដ្ឋធានីម៉ានីលរបស់ប្រទេសហ្វីលីពីន ប្រទេសស៊ែប៊ី និងប្រទេសម៉ូរីតានី ខណៈដែលប្រទេសអារ៉ាប់ប៊ីសាអ៊ូឌីតនឹងអនុវត្តបទបញ្ជានេះ ចាប់ពីយប់នេះតទៅ រហូតដល់មានបទបញ្ជាថ្មី។

ក្រៅពីនេះក៏នៅមានតំបន់ និងទីក្រុងជាច្រើនទៀតដែលចាត់វិធានការដូចខាងលើ មានដូចជាទីក្រុងអាល់ម៉ាទីរបស់ប៊ុលហ្គារី ទីក្រុងណឺរស៊ុលតង់របស់ប្រទេសកាហ្សាក់ស្ថាន ទីក្រុងបាគូនៃប្រទេសអាហ្សែបែហ្សង់ រដ្ឋអូហៃអូ រដ្ឋល្វីសសាណា រដ្ឋដេឡាវ៉ារ និងរដ្ឋភីឡាដិលភានៃសហរដ្ឋអាមេរិកជាដើម ដោយមានប្រជាជនសរុបជិត30លាននាក់។

វីរុស COVID-19 មកដល់បច្ចុប្បន្ន មានវត្តមាននៅក្នុងប្រទេស និងដែនដីចំនួន192 នៅទូទាំងពិភពលោក បន្ទាប់ពីបានឆ្លងរាលដាលនៅប្រទេសចិន ចាប់ពីខែធ្នូ ឆ្នាំ2019។ រោគរាតត្បាតនេះ បានធ្វើឱ្យមនុស្សជាង 360,524នាក់បានកើតជំងឺ និងជាង 15,490បានបាត់បង់ជីវិត ខណៈជាង 11,649នាក់ កំពុងប្រឈមនឹងការស្លាប់៕

ប្រភព៖ សារព័ត៌មានបរទេស

March 24, 2020

ឧបនាយករដ្ឋមន្ត្រីអេស្ប៉ាញ ចូលព្យាបាលនៅមន្ទីរពេទ្យ ដោយសារឆ្លងមេរោគផ្លូវដង្ហើម

ឧបនាយករដ្ឋមន្ត្រីអេស្ប៉ាញ Carmen Calvo បានចូលសម្រាកព្យាបាលក្នុងមន្ទីរពេទ្យ ដោយសារឆ្លងមេរោគផ្លូវដង្ហើម និងកំពុងរង់ចាំលទ្ធនៃការធ្វើតេស្តរកវីរុស COVID-19។

“ឧបនាយករដ្ឋមន្ត្រី បានមកកាន់មន្ទីរពេទ្យកាលពីល្ងាចម្សិលមិញ ហើយក្រោយពីបានធ្វើតេស្តរកមេរោគ ក្រុមគ្រូពេទ្យបានស្នើឱ្យលោកស្រីនៅសម្រាកព្យាបាលក្នុងមន្ទីរពេទ្យ ព្រោះពិនិត្យឃើញថា លោកស្រីមានមេរោគក្នុងផ្លូវដង្ហើម” នេះបើតាមសេចក្ដីប្រកាសកាលពីម្សិលមិញរបស់រាជរដ្ឋាភិបាលអេស្ប៉ាញ។

លោកស្រី Calvo អាយុ63ឆ្នាំ ត្រូវបានធ្វើតេស្តរកមេរោគ COVID-19 រួចហើយ ចំណែកលទ្ធផលយ៉ាងណានោះ នឹងត្រូវបានប្រកាសបន្ទាប់ពីទទួលបានរបាយការណ៍ផ្លូវការពីក្រុមគ្រូពេទ្យ។

វីរុស COVID-19 មកដល់បច្ចុប្បន្ន មានវត្តមាននៅក្នុងប្រទេស និងដែនដីចំនួន192 នៅទូទាំងពិភពលោក បន្ទាប់ពីបានឆ្លងរាលដាលនៅប្រទេសចិន កាលពីខែធ្នូ ឆ្នាំ2019។ រោគរាតត្បាតនេះ បានធ្វើឱ្យមនុស្សចំនួនជាង 358,060នាក់បានកើតជំងឺ និងជាង 15,427បានស្លាប់។

ឧបនាយករដ្ឋមន្ត្រីអេស្ប៉ាញ លោកស្រី Carmen Calvo

អេស្ប៉ាញ បច្ចុប្បន្នមានអ្នកឆ្លងមេរោគកូរ៉ូណាចំនួនជាង 33,089នាក់ ក្នុងនោះមានអ្នកស្លាប់ចំនួន 2,206នាក់។ មុននេះ រដ្ឋមន្ត្រីក្រសួងសមធម៌អេស្ប៉ាញ លោក Irene Montero ក៏បានឆ្លងវីរុស COVID-19នេះដែរ៕

ប្រភព៖ សារព័ត៌មានបរទេស

March 23, 2020

Author: សឿន សំណាង