សឿន សំណាង - La Reine Media

WHO ប្រកាស៖ ចំនួនអ្នកឆ្លងមេរោគកូវីដ-19 កើនជាងកន្លះលាន ចំណែកវ៉ាក់សាំង គ្មានផ្លូវកាត់ទេ ត្រូវរង់ចាំ 1ឆ្នាំ

ទីក្រុងហ្សឺណែវ ថ្ងៃទី27 មីនា អង្គការសុខភាពពិភពលោក ឬ WHO បានបង្ហើបឱ្យដឹងថា ចំនួនអ្នកឆ្លងមេរោគវីរុសកូរ៉ូណាប្រភេទថ្មី ឬកូវីដ-19 ដែលបានអះអាងហើយទូទាំងពិភពលោក បានកើនឡើងដល់ជាងកន្លះ លាននាក់ និងមានអ្នកស្លាប់ច្រើនជាង 20,000នាក់ហើយ ដែលនេះជា “ស្ថិតិដ៏គួរឱ្យសោកសៅ” បំផុត។

WHO បានបញ្ជាក់ថា ចំនួនអ្នកឆ្លងមេរោគកូវីដ-19 ទូទាំងពិភពលោកបានកើនឡើងដល់ 509,164នាក់ គិតត្រឹមម៉ោង10 ម៉ោងនៅអឺរ៉ុប នៃថ្ងៃសុក្រ ទី27 មីនា ដោយវីរុសបានឆ្លងសាយភាយទូទាំងប្រទេស និងភូមិភាគ ជាង 200កន្លែង និងធ្វើឱ្យមានអ្នកស្លាប់ច្រើនរហូតដល់ 23,335នាក់។

លោក ថេដ្រូស អាត់ហាណូម គីប្រ៊ីយេស៊ុស ប្រធានអង្គការសុខភាពពិភពលោក បានថ្លែងថា នៅតែត្រូវរង់ចាំយ៉ាងហោចណាស់ក៏ 12-18ខែទៀតដែរ ទម្រាំនឹងមានវ៉ាក់សាំងការពារមេរោគមួយនេះ…។ លោកព្រមទាំងបាននិយាយសង្កត់ធ្ងន់ទៅលើភាពចាំបាច់យ៉ាងបន្ទាន់ក្នុងការព្យាបាលអ្នកជំងឺ និងបន្ថយចំនួនអ្នកស្លាប់ ទៀតផង។

“ការសាកល្បងដែលបានរួមដៃគ្នាជាធ្លុងមួយ មានន័យអំពីការសាកល្បងខាងការព្យាបាលរបស់ប្រទេសជាច្រើន ដើម្បីស្វែងរកវិធីព្យាបាលជំងឺដែលបណ្ដាលមកពីវីរុសកូវីដ-19 គឺជាការសាកល្បងជាប្រវត្តិសាស្ត្រ ដែលវានឹងជួយឱ្យការពិសោធភ័ស្តុតាងពាក់ព័ន្ធនឹងថ្នាំដែលមានប្រសិទ្ធផលខាងការព្យាបាល”

លោក ថេដ្រូស បានប្រកាសថា អ្នកជំងឺ 1ឈុតដំបូងនៅក្នុងប្រទេសន័រវេយ៍ និងអេស្បាញ នឹងចូលរួមការសាកល្បងខាងការព្យាបាលក្នុងពេលឆាប់ៗនេះ ដើម្បីប្រៀបធៀបពីសុវត្ថិភាព និងប្រសិទ្ធភាពរបស់ឱសថតែមួយ ឬឱសថផ្សំ ដែលអាចមានសក្ដានុពលព្យាបាលជំងឺដ៏សាហាវមួយនេះ ចំនួន 4មុខ”

“រឹតតែមានប្រទេសផ្សេងៗ ចូលរួមការសាកល្បងកាន់តែច្រើនឡើង នឹងរឹតតែជួយឱ្យយើងបានទទួលលទ្ធផលកាន់តែលឿនឡើង”។ លោកបានបន្តទៀតថា បច្ចុប្បន្ន មានប្រទេស និងភូមិភាគប្រមាណជា 45 កំពុងរួមដៃគ្នាសាកល្បងខាងគ្លីនិក ដើម្បីស្វែងរកវិធីការព្យាបាល និងសង្ឃឹមថា នឹងមានអ្នកចូលរួមកើនឡើងទៀត។

ខណៈពេលជាមួយគ្នា លោក ថេដ្រូស បានអំពាវនាវឱ្យចៀសវាងពីវិធីព្យាបាលដែលមិនបានបង្ហាញពីប្រសិទ្ធផល ដោយលោកបានសង្កត់ធ្ងន់ថា វា “គ្មានផ្លូវកាត់” ទេ និងត្រូវតែប្រកាន់យកភ័ស្តុតាងដែលមានការពិសោធសាកល្បង និងរៀនយល់ជាបន្តបន្ទាប់ថា តើវិធីការមួយណាដែលទទួលបានលទ្ធផល៕

ប្រភព៖ សារព័ត៌មានបរទេស

March 30, 2020

អតីតរដ្ឋមន្ត្រីរបស់បារាំងម្នាក់ បានបាត់ស្លាប់ដោយសារ COVID-19

លោក Patrick Devedjian អាយុ75ឆ្នាំ ដែលជាអតីតរដ្ឋមន្ត្រីម្នាក់របស់ប្រទេសបារាំង បានក្លាយជាអ្នកនយោបាយជាន់ខ្ពស់ដំបូងបង្អស់របស់ប្រទេសនេះ បានស្លាប់ដោយសារ COVID-19។

Patrick Devedjian គឺជារដ្ឋមន្ត្រីទទួលបន្ទុកដោះស្រាយបញ្ហាសេដ្ឋកិច្ចរបស់ប្រទេសបារាំង ក្រោយវិបត្តិហិរញ្ញវត្ថុឆ្នាំ2008។ លោកក៏ធ្លាប់ធ្វើជាទីប្រឹក្សាផ្ទាល់របស់អតីតប្រធានាធិបតីបារាំង Nicolas Sarkozy ផងដែរ។ អតីតរដ្ឋមន្ត្រីរូបនេះ បានប្រកាសថា លោកមានរោគសញ្ញាឆ្លង COVID-19 កាលពីថ្ងៃទី25មិនា។

លោក Devedjian ធ្លាប់បានកាន់កាប់តំណែងជាច្រើន តាំងពីបានចូលប្រលូកក្នុងឆាកនយោបាយចាប់ពីឆ្នាំ1983។ លោកក៏ធ្លាប់បានធ្វើជាអភិបាលក្រុង Antony មុនពេលចូលកាន់តំណែងប្រធានតំបន់ Haut-de-Seine នៅជាយក្រុងភាគខាងលិចនៃរដ្ឋធានីបារីស។

គិតមកដល់ពេលនេះ ប្រទេសបារាំង បានរកឃើញអ្នកជំងឺ COVID-19 ចំនួន38,105នាក់ ក្នុងនោះមាន 2,317នាក់បានបាត់បង់ជីវិត និងជិត6,000នាក់បានជាសះស្បើយ៕

ប្រភព៖ សារព័ត៌មានបរទេស

March 29, 2020

រដ្ឋមន្ត្រីហិរញ្ញវត្ថុអាល្លឺម៉ង់ ស្លាប់ដោយសារធ្វើអត្តឃាត ព្រោះតែបារម្ភអំពី COVID-19

Thomas Schaefer ជារដ្ឋមន្ត្រីក្រសួងហិរញ្ញវត្ថុរបស់រដ្ឋ Hesse នៃប្រទេសអាល្លឺម៉ង់ ត្រូវបានគេរាយការណ៍ថា បានធ្វើអត្តឃាតព្រោះតែ “មានការបារម្ភជ្រុល” អំពីវិធានការទប់ទល់នឹងហានិភ័យដួលរលំនៃសេដ្ឋកិច្ចជាតិ ដោយសារតែ COVID-19។

Schaefer មានអាយុ54ឆ្នាំ ត្រូវបានប្រទះឃើញដេកស្លាប់នៅក្បែរផ្លូវរថភ្លើងមួយកន្លែងកាលពីថ្ងៃទី28មីនាកន្លងទៅ។ ការិយាល័យរដ្ឋអាជ្ញានៃតុលាការក្រុង Wiesbaden បានឱ្យដឹងថា ពួកគេជឿថា រដ្ឋមន្ត្រីរូបនេះ បានធ្វើអត្តឃាត។

“យើងពិតជាតក់ស្លុតខ្លាំងណាស់…។ យើងពិតជាមានការសង្វេគខ្លាំងណាស់” អភិបាលរដ្ឋ Hesse លោក Volker Bouffier មានប្រសាសន៍បែបនេះនៅក្នុងសេចក្ដីប្រកាសរបស់លោក បន្ទាប់ពីករណីខាងលើបានកើតឡើង។

លោក Bouffier បានឱ្យដឹងថា លោក Schaefer បានកាន់កាប់តំណែងរដ្ឋមន្ត្រីហិរញ្ញវត្ថុនៃរដ្ឋ Hesse អស់រយៈពេល10ឆ្នាំមកហើយ។ លោកបានខិតខំប្រឹងប្រែង “មិនថាយប់ថ្ងៃ” ដើម្បីជួយដល់ក្រុមហ៊ុននានា និងកម្មករទូទៅ ក្នុងការប្រយុទ្ធប្រឆាំងនឹងផលប៉ះពាល់សេដ្ឋកិច្ចពី COVID-19។

អភិបាលរដ្ឋ Hesse បានថ្លែងថា “យើងជឿថា គាត់ពិតជាមានការព្រួយបារម្ភខ្លាំងណាស់។ នេះពិតជាដំណាក់កាលដ៏លំបាកដែលយើងត្រូវការមនុស្សដូចគាត់”។

Schaefer កន្លងមកនេះ ត្រូវបានគេយល់ថាជាអ្នកបន្តវេនរបស់អភិបាលរដ្ឋ Hesse គឺលោក Bouffier។ រដ្ឋមន្ត្រីហិរញ្ញវត្ថុរូបនេះ បានលាចាកលោកនេះទៅ ដោយបន្សល់ទុកភរិយា និងកូន2នាក់ឱ្យរស់នៅដោយគ្មានស្វាមី និងឪពុក។

គិតត្រឹមម៉ោងនេះ ប្រទេសអាល្លឺម៉ង់ បានរកឃើញអ្នកផ្ទុកមេរោគCOVID-19 ចំនួន 58,247នាក់ និងស្លាប់ចំនួន455នាក់៕

ប្រភព៖ សារព័ត៌មានបរទេស

March 29, 2020

ហ្វីលីពីន៖ យន្តហោះដឹកអ្នកជំងឺឆ្ពោះទៅកាន់ជប៉ុន ផ្ទុះឆេះនៅព្រលានយន្តហោះ Ninoy Aquino

យន្តហោះដឹកមនុស្ស8នាក់ ក្នុងនោះមានអ្នកជំងឺម្នាក់ បានផ្ទុះឆេះ និងជ្រុលចេញផុតពីផ្លូវនៃព្រលានយន្តហោះ Ninoy Aquino ក្នុងរដ្ឋធានីម៉ានីល ប្រទេសហ្វីលីពីន។

យន្តហោះធន់តូច IAI Westwind ត្រូវបានគេឱ្យដឹងថា ជាយន្តហោះដែលរដ្ឋាភិបាលប្រទេសហ្វីលីពីនជួលដើម្បីដឹកអ្នកជំងឺម្នាក់ទៅកាន់ប្រទេសជប៉ុន។ យន្តហោះ ដែលមានស្លាកលេខ RP-C5880នេះ បានចាប់ផ្ដើមហោះហើរនៅវេលាម៉ោង20 ថ្ងៃទី29មីនា។ ក្នុងពេលចាប់ផ្ដើមហោះហើរ យន្តហោះនេះស្រាប់តែឆេះសន្ធោសន្ធៅ និងធ្លាក់ចេញពីផ្លូវក្នុងព្រលានយន្តហោះ។ កងកម្លាំងពន្លត់អគ្គិភ័យត្រូវប្រើពេលដល់ទៅ1ម៉ោង ទើបអាចពន្លត់ភ្លើងឆេះយន្តហោះនេះបាន។

អ្នកយកព័ត៌មានក្នុងស្រុក Dexter Cabalza បានឱ្យដឹងថា យន្តហោះនេះដឹកមនុស្ស8នាក់ ក្នុងនោះមានបុគ្គលិកសុខាភិបាល3នាក់ និងអ្នកជំងឺម្នាក់។ សារព័ត៌មាន Reuters បានចេញផ្សាយថា មនុស្សទាំង8នាក់នៅលើយន្តហោះនេះ បានបាត់បង់ជីវិត។ ចំណែកអ្នកជំងឺម្នាក់នៅលើយន្តហោះនេះ គេមិនទាន់ដឹងច្បាស់ថា ជាអ្នកជំងឺ COVID-19 ឬយ៉ាងណានោះដែរ។

នៅមុនពេលជួបគ្រោះថ្នាក់ យន្តហោះនេះបានហោះហើរជាច្រើនលើកជុំវិញបណ្ដាកោះរបស់ហ្វីលីពីន ដើម្បីដឹកជញ្ជូនឧបករណ៍វេជ្ជសាស្ត្រសំខាន់ៗ។ ទន្ទឹមនឹងនេះ យន្តហោះនេះក៏ធ្លាប់បានហោះទៅកាន់ប្រទេសជប៉ុន ប្រទេសថៃ និងកោះតៃវ៉ាន់ផងដែរ៕

https://www.youtube.com/watch?v=voZKaQANXFI

ប្រភព៖ សារព័ត៌មានបរទេស

March 29, 2020

ក្រោយពីបានជាសះស្បើយ អ្នកជំងឺCOVID-19 នៅតែមានផ្ទុកវីរុសនេះរយៈពេល8ថ្ងៃបន្តទៀត

អ្នកផ្ទុកវីរុសCOVID-19 ដែលត្រូវបានព្យាបាលជាសះស្បើយ និងលែងមានអាការរោគ នៅតែអាចបញ្ចេញវីរុសក្នុងអំឡុងពេលពី1ថ្ងៃទៅ8ថ្ងៃបន្តទៀត។

ក្រុមអ្នកវិទ្យាសាស្ត្រមកពីមន្ទីរពេទ្យ PLA នៃប្រទេសចិន និងសាកលវិទ្យាល័យវេជ្ជសាស្ត្រ Yale របស់សហរដ្ឋអាមេរិក បានរកឃើញថា ពាក់កណ្ដាលនៃអ្នកជំងឺCOVID-19 កម្រិតស្រាលដែលត្រូវបានព្យាបាលជាសះស្បើយ នៅតែមានផ្ទុកវីរុសនេះរហូតដល់8ថ្ងៃ ក្រោយពីលែងមានរោគសញ្ញា។ លទ្ធផលនៃការសិក្សាស្រាវជ្រាវនេះ ត្រូវបានចុះផ្សាយកាលពីថ្ងៃទី23មីនានៅលើទស្សនាវដ្ដី Respiratory and Critical Care Medicine របស់សមាគម American Thoracic Society នៅសហរដ្ឋអាមេរិក។

សាស្ត្រាចារ្យ Lixin Xie និងវេជ្ជបណ្ឌិត Lokesh Sharma រួមនឹងសហការី បានសិក្សាទៅលើអ្នកជំងឺCOVID-19ចំនួន16នាក់ ដែលព្យាបាលនៅមន្ទីរពេទ្យ PLA ក្នុងទីក្រុងប៉េកាំង ចាប់ពីថ្ងៃទី28មករា ដល់ថ្ងៃទី9មីនា ឆ្នាំ2020។ អ្នកជំងឺទាំងនេះ មានវ័យជាមធ្យម 35.5ឆ្នាំ។ ក្រុមអ្នកវិទ្យាសាស្ត្របានពិសោធទៅលើសំណាកវត្ថុវិភាគរបស់អ្នកជំងឺ ដែលបានជាសះស្បើយ ដោយមានលទ្ធផលអវិជ្ជមាន2លើកបន្តបន្ទាប់គ្នានៅពេលធ្វើតេស្ត។

“របកគំហើញសំខាន់បំផុតពីការសិក្សាស្រាវជ្រាវរបស់យើងនោះគឺ ពាក់កណ្ដាលនៃអ្នកជំងឺ នៅតែបន្តបញ្ចេញវីរុស បើទោះពួកគេត្រូវបានព្យាបាលជាសះស្បើយពីអាការរោគ” នេះបើតាមប្រសាសន៍របស់វេជ្ជបណ្ឌិត Sharma មកពីសាកលវិទ្យាល័យវេជ្ជសាស្ត្រ Yale។ លោក Sharma បន្តថា “ករណីអ្នកជំងឺដែលមានសភាពធ្ងន់ធ្ងរ អាចនឹងនៅតែបញ្ចេញវីរុសក្នុងរយៈពេលយូរ”។

ការសិក្សាស្រាវជ្រាវខាងលើនេះក៏បានបង្ហាញថា រយៈពេលនៃការសម្ងំលាក់ខ្លួនរបស់វីរុស ភាគច្រើនអូសបន្លាយពេល5ថ្ងៃ។ រយៈពេលដែលអ្នកជំងឺអាចចេញរោគសញ្ញា គឺ8ថ្ងៃ ហើយរយៈពេលដែលពួកគេនៅមានផ្ទុកវីរុសក្រោយពីលែងមានរោគសញ្ញា គឺចាប់ពី1ថ្ងៃដល់8ថ្ងៃ។

ក្រុមអ្នកវិទ្យាសាស្ត្រខាងលើបានសង្កាត់ធ្ងន់ថា ចំនួនអ្នកជំងឺដែលពួកគេបានវិភាគ គឺមានចំនួនតិចតួចពេក ហើយសុទ្ធតែជាអ្នកជំងឺដែលមានអាការរោគស្រាលៗ។ ពួកគេនិយាយថា ពួកគេត្រូវការសិក្សាបន្ថែមច្រើនជាងនេះទៀតដើម្បីទទួលបានលទ្ធផលសុក្រឹតជាងនេះ៕

ប្រភព៖ Phys.org

March 29, 2020

ការផលិតម៉ាស់នៅប្រទេសចិន ប្រៀបដូចជាការបោះពុម្ភក្រដាសប្រាក់

នៅពេលដែល COVID-19 រាតត្បាតពេញពិភពលោក ក៏ជាពេលដែលរោងចក្រជាច្រើននៅប្រទេសចិនបង្វែរទិសដៅរបស់ខ្លួនឆ្ពោះទៅក្នុងទីផ្សារដ៏ធំធេងលាតសន្ធឹងទូទាំងពិភពលោក ដែលរកប្រាក់ចំណេញបានច្រើនមិនធ្លាប់មានពីមុនមក នោះគឺការផលិតម៉ាស់។

កាលពីដើមខែកុម្ភៈ ជាពេលដែលជំងឺរលាកសួតប្រភេទថ្មី កំពុងតែអុកឡុកប្រទេសចិន ក្រុមហ៊ុនរបស់ Guan Xunze អាយុ34ឆ្នាំ បានសាងសង់រោងចក្រថ្មីមួយដើម្បីផលិតម៉ាស់ ដោយប្រើពេលត្រឹមតែ7ថ្ងៃប៉ុណ្ណោះ។

រោងចក្ររបស់ Guan ដែលមានខ្សែចង្វាក់ផលិតកម្មចំនួន5 និងស្ថិតនៅភាគឦសានប្រទេសចិននេះ ផ្គង់ផ្គង់ម៉ាស់ប្រភេទ N95 ដើម្បីឆ្លើយតបទៅនឹងតម្រូវការដ៏ច្រើនរបស់ទីផ្សារ ខណៈដែលតួលេខនៃការឆ្លងវីរុសCOVID-19 នៅតែកើនឡើងយ៉ាងគំហុកជារៀងរាល់ថ្ងៃ។

បច្ចុប្បន្ន បើទោះជាចំនួនអ្នកឆ្លងមេរោគនៅប្រទេសចិនបានថយចុះក៏ដោយ ប៉ុន្តែ Guan នៅតែបន្តរកប្រាក់ចំណេញបានយ៉ាងច្រើន ដោយនាំម៉ាស់ចេញទៅកាន់ទីផ្សារប្រទេសអ៊ីតាលី ជាកន្លែងដែលមានអ្នកស្លាប់ដោយសារ COVID-19 10,023នាក់ ពោលគឺច្រើនជាងប្រទេសចិនដែលមានអ្នកស្លាប់ត្រឹមតែ3,304នាក់។

នៅទូទាំងពិភពលោក ករណីឆ្លងវីរុសកូរ៉ូណា COVID-19នេះ កើនដល់ជិត680,000នាក់ ហើយតម្រូវការសម្ភារការពារសុវត្ថិភាពសុខភាពកំពុងតែកើនឡើងខ្លាំងពីមួយថ្ងៃទៅមួយថ្ងៃ។

Shi Xinghui ដែលជានាយកផ្នែកទីផ្សារម្នាក់របស់ក្រុមហ៊ុនផ្គត់ផ្គង់ម៉ាស៊ីនផលិតម៉ាស់មួយ នៅក្នុងខេត្តក្វាងទុង ប្រទេសចិននិយាយថា “ម៉ាស៊ីនផលិតម៉ាស់ គឺប្រៀបដូចជាម៉ាស៊ីនបោះពុម្ភក្រដាសប្រាក់ពិតៗ”។ លោកបន្ថែមថា ប្រាក់ចំណេញដែលបានមកពីការផលិតម៉ាស់ បានកើនឡើងច្រើនដងធៀបនឹងមុននេះ។

ចំណែក Qi Guangtu បានវិនិយោគប្រាក់7លានដុល្លារអាមេរិក ដើម្បីបង្កើតរោងចក្រផលិតម៉ាស់របស់ខ្លួន។ រោងចក្ររបស់ Qi ធ្វើការមិនឈប់ឈរសូម្បីតែ1វិនាទី ចាប់ពីថ្ងៃដំណើរការដំបូងរហូតដល់ពេលនេះ។

Qi បានឱ្យដឹងថា “ការស្វែងរកទុន មិនមែនជាបញ្ហាធំនោះទេ”។ ក្រោយរយៈពេល2ខែ ក្រុមហ៊ុនរបស់គាត់ លក់ដាច់ម៉ាស់ចំនួន70ឈុត ក្នុង1ឈុតៗមានតម្លៃ 71,000ដុល្លារអាមេរិក។ ថៅកែរូបនេះកំពុងមានអតិថិជនក្នុងដៃចំនួនជាង200នាក់។ ការបញ្ជាទិញពីអតិថិជនទាំងនេះ មានតម្លៃសរុបឡើងដល់ 14លានដុល្លារអាមេរិក។

“ក្រោយពីទិញម៉ាស៊ីន និងដំណើរការក្នុងរយៈពេល15ថ្ងៃ យើងរកបានប្រាក់ចំណេញស្មើនឹងទុនវិនិយោគសរុបទៅហើយ” នេះបើតាមការឱ្យដឹងពី Qi។

You Lixin មិនធ្លាប់បានឈានជើងចូលក្នុងវិស័យផលិតម៉ាស់នោះទេ ប៉ុន្តែដោយឃើញឱកាសល្អ You ក៏បានលោតចូលវិស័យនេះ និងបង្កើតបានរោងចក្រផលិតម៉ាស់មួយកន្លែង ដោយប្រើពេលតែ10ថ្ងៃក្នុងការសាងសង់រោងចក្រនេះ។

You ថ្លែងថា “ខ្ញុំគេងបានតែ2-3ម៉ោងប៉ុណ្ណោះក្នុង1ថ្ងៃ។ អតិថិជនរបស់ខ្ញុំក៏ដូច្នេះដែរ”។ You ឱ្យដឹងថា ពេលខ្លះ អតិថិជនរបស់គាត់ ត្រូវគេងនៅក្នុងរោងចក្ររបស់គាត់ទៀតផង ដើម្បីរង់ចាំទទួលទំនិញ។

ការផលិតម៉ាស់ចេះតែកើនឡើង ហើយតម្លៃវត្ថុធាតុដើម (ក្រណាត់) ក៏ចេះតែកើនឡើងពី1,400ដុល្លារ ដល់ជិត68,000ដុល្លារក្នុង1តោន។ ថ្វីបើការផលិតត្រូវចំណាយទុនច្រើន ប៉ុន្តែប្រាក់ចំណេញក៏នៅតែមានទំហំធំដដែល។

បរិមាណម៉ាស់ដែលផលិតនៅប្រទេសចិន គឺច្រើនជាង116លានបន្ទះក្នុង1ថ្ងៃ ដែលនេះគ្រប់គ្រាន់សម្រាប់ផ្គង់ផ្គង់ក្នុងស្រុក និងអាចនាំចេញទៅក្រៅប្រទេសបានខ្លះផងដែរ៕

ប្រភព៖ AFP

March 29, 2020

កម្ពុជាមានអ្នកឆ្លងវីរុសCOVID-19ចំនួន103ករណី ខណៈប្រទេសថៃកើនជិតដល់1,400ករណី និងវៀតណាច្រើនជាងកម្ពុជាជិតទ្វេដង

នៅព្រឹកនេះ កម្ពុជាបានប្រកាសឱ្យដឹងថា បានរកឃើញអ្នកជំងឺCOVID-19ថ្មីចំនួន1ករណីបន្ថែមទៀត ធ្វើឱ្យតួលេខនៃអ្នកបានឆ្លងវីរុសCOVID-19 សរុបឡើងដល់103ករណី។

កម្ពុជា

អ្នកផ្ទុកជំងឺCOVID-19 ដែលទើបត្រូវបានរកឃើញនេះ ជាស្ត្រីវ័យ36ឆ្នាំ ធ្វើការនៅ Star TV និងរស់នៅក្នុងភូមិបាលេឡៃ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ បច្ចុប្បន្នសម្រាកព្យាបាលនៅមន្ទីរពេទ្យបង្អែកខេត្តបន្ទាយមានជ័យ។

អ្នកបានជាសះស្បើយពីជំងឺរលាកសួតប្រភេទថ្មីនេះ មានចំនួន8ករណី ក្នុងនោះមានបុរសជនជាតិអង់គ្លេសម្នាក់ ស្ត្រីជនជាតិអង់គ្លេសម្នាក់ បុរសជនជាតិបារាំងម្នាក់ និងបុរសជនជាតិខ្មែរ5នាក់។

គិតមកដល់ពេលនេះ កម្ពុជាមានអ្នកឆ្លងវីរុសCOVID-19 សរុប103នាក់ ក្នុងនោះ អ្នកជំងឺកំពុងទទួលការព្យាបាលមានចំនួន82នាក់ អ្នកបានជាសះស្បើយមានចំនួន21នាក់។ កម្ពុជាមិនទាន់មានករណីស្លាប់ដោយសារវីរុសCOVID-19 នៅឡើយ។

នៅប្រទេសវៀតណាម បច្ចុប្បន្ន មានអ្នកឆ្លងមេរោគCOVID-19 សរុប188 ករណី ក្នុងនោះមាន28ករណីបានជាសះស្បើយ។ ក្នុងចំណោមអ្នកបានឆ្លងមេរោគសរុប មាន71ករណីនៅឯរដ្ឋធានីហាណូយ 45ករណីនៅទីក្រុងសៃហ្គន(ហូជីមិញ) និងក្រៅពីនេះគឺនៅក្នុងខេត្តផ្សេងៗទៀត។

ប្រទេសថៃ មានអ្នកឆ្លងមេរោគសរុប1.388ករណី ក្នុងនោះមានអ្នកស្លាប់7ករណី និងជាសះស្បើយ97ករណី។ ចំណែកអ្នកជំងឺដែលកំពុងទទួលការព្យាបាលមាន1,284ករណី។

គិតមកដល់ពេលនេះ នៅទូទាំងពិភពលោក មានអ្នកឆ្លងវីរុសCOVID-19 ចំនួន678.910ករណី ក្នុងនោះមានអ្នកស្លាប់31.771ករណី និងជាសះស្បើយចំនួន146.319ករណី៕

March 29, 2020

អ្នកជំនាញបកស្រាយ៖ ហេតុអ្វី កូវីដ-19 អាចសម្លាប់ជីវិតមនុស្សប្រុស ច្រើនជាងមនុស្សស្រី?

ទីភ្នាក់ងារព័ត៌មាន ស៊ីនហួ បានរាយការណ៍ថា ជំងឺឆ្លងដោយសារមេរោគវីរុសកូរ៉ូណាប្រភេទថ្មី(កូវីដ-19) ដែលកំពុងតែរាតត្បាតទូទាំងពិភពលោកនាពេលបច្ចុប្បន្ននេះ មានសញ្ញាថា បានសម្លាប់ជីវិតអ្នកជំងឺ “ភេទប្រុស” ច្រើនជាងអ្នកជំងឺ “ភេទស្រី”។

ក្រុមអ្នកជំនាញការ បានផ្ដល់ការយល់ឃើញថា ក្រៅពីសភាវរាងកាយមិនសូវរឹងមាំ និស្ស័យចូលចិត្តកាត់បន្ថយសុខភាពខ្លួនឯង ដូចជាការជក់បារី និងផឹកគ្រឿងស្រវឹង ដែលអាចបំផ្លាញសួតហើយនោះ ឥទ្ធិពលពីអ័រម៉ូនក្នុងការតបស្នងរបស់ប្រព័ន្ធប្រឆាំងជំងឺ អាចមានតួនាទីសំខាន់នៅក្នុងបាតុភូតនេះផងដែរ…។

លោកស្រីវេជ្ជបណ្ឌិត ដេប្រាហ៍ ប៊ើស ប្រធានកងប្រតិបត្តិការកូវីដ-19 ជនជាតិអាមេរិក ប្រចាំសេតវិមាន បានលើកឡើងនៅក្នុងសេចក្ដីថ្លែងការណ៍ប្រចាំថ្ងៃថា មានរបាយការណ៍ពីប្រទេសអ៊ីតាលី ដែលបានបង្ហាញឱ្យឃើញពីការស្លាប់បាត់បង់ជីវិតដោយសារមេរោគវីរុសកូវីដ-19 របស់មនុស្សប្រុសគ្រប់អំឡុងវ័យ មានអត្រាខ្ពស់ជាងមនុស្សស្រី…ដែលនេះជា “សញ្ញាដ៏គួរឱ្យវិតក្កកង្វល់មួយ”។

ស្ថិតិ ពីអង្គភាពសាធារណៈសុខាភិបាលអ៊ីតាលី បានបញ្ជាក់ថា បុរសមានអត្រាច្រើនដល់ទៅ 58ភាគរយនៃអ្នកជំងឺកូវីដ-19 ទាំងអស់ 13,882នាក់ ហើយ 72% នៃអ្នកជំងឺដែលស្លាប់ក្នុងអំឡុងថ្ងៃទី 21កុម្ភៈ-12 មីនា ដោយមនុស្សប្រុសដែលចូលមន្ទីរពេទ្យមានសញ្ញាថា បានស្លាប់ច្រើនជាងមនុស្សស្រីច្រើនដល់ទៅ 75%។

ខណៈដែលស្ថិតិពីប្រទេសផ្សេងៗ ក៏បានរកឃើញដូចគ្នាដែរថា មនុស្សប្រុសបានស្លាប់ដោយសារវីរុសកូវីដ-19 ច្រើនជាងមនុស្សស្រី។

មជ្ឈមណ្ឌលគ្រប់គ្រង និងការពាររោគ នៃប្រទេសចិន(CCDC) បានចង្អុលបង្ហាញថា ការស្លាប់របស់មនុស្សប្រុសដែលបានទទួលការអះអាងហើយថា បានឆ្លងមេរោគកូរ៉ូណាប្រភេទថ្មីនេះ ច្រើនជាងមនុស្សស្រី 65%។

ក្រុមអ្នកជំនាញការបានមើលឃើញថា និស្ស័យចូលចិត្តកាត់បន្ថយសុខភាពខ្លួនឯង ដូចជាការជក់បារី និងផឹកគ្រឿងស្រវឹង ច្រើនតែឃើញមាននៅលើបុរសច្រើនជាងនារី ដែលទង្វើទាំងនេះ អាចបំផ្លាញសួត និងជាបច្ច័យចម្បងរបស់អាការរលាក ខណៈពេលព្យាបាលសភាវឆ្លងមេរោគកូរ៉ូណាប្រភេទថ្មី។

ចំណែកលោក ខេនត៍ ភិនឃើរតុន សាស្ត្រាចារ្យប្រចាំគណៈវេជ្ជសាស្ត្រ ដេវីស នៃមហាវិទ្យាល័យ កាលីហ្វ័រនៀ បានថ្លែងថា ការតបស្នងរបស់ប្រព័ន្ធប្រឆាំងជំងឺ រវាងភេទប្រុស និងភេទស្រី អាចពាក់ព័ន្ធនឹងអ័រម៉ូន តែអ្នកវិទ្យាសាស្ត្រនៅត្រូវសិក្សាស្រាវជ្រាវតទៅទៀត ដើម្បីស្វែងរកវិធីទប់ទល់នឹងការឆ្លងរាលដាលនៃវីរុសកូរ៉ូណាឱ្យកាន់តែល្អប្រសើរឡើង៕

ប្រភព៖ សារព័ត៌មានបរទេស

March 29, 2020

ភ្នាក់ងារវីង(Wing) បន្តវប្បធម៌ចែករំលែក ខណៈពេលដែលវីរុសCOVID-19 កំពុងរាតត្បាតនៅកម្ពុជា

ខណៈពេលដែលបងប្អូនប្រជាពលរដ្ឋមួយចំនួនកំពុងចួបទុក្ខលំបាក ភ្នាក់ងារ វីង(Wing) នៅតាមបណ្តាខេត្ត និងនៅទីក្រុងភ្នំពេញ បានស្ម័គ្រចិត្តធ្វើយុទ្ធនាការចែកអង្ករ ទឹកអាល់កុលលាងដៃ ប្រេងកូឡានិងថវិកាផ្ទាល់ខ្លួនមួយចំនួនចែកជូនដល់បងប្អូនប្រជាពលរដ្ឋដែលកំពុងខ្វះខាត ដើម្បីទប់ស្កាត់ការរាតត្បាតនៃវីរុសកូវីដ១៩ ។

អ្នកស្រី អេង ប៊ុនថា ដែលជាម្ចាស់ភ្នាក់ងារវីង ប៊្លូ អាយ ដែលស្ថិតនៅផ្លូវ430 នៅជិតសណ្ឋាគាររ៉េស៊ីដង់នាទីក្រុងភ្នំពេញបានឱ្យដឹងថា ដោយមើលឃើញអត្រានៃការឆ្លងវីរុសកូវីដ១៩ ចេះតែបន្តជារៀងរាល់ថ្ងៃ អ្នកស្រីបានបរិច្ចាគអង្ករចំនួន300គីឡូក្រាម អាលកុលលាងដៃ និងប្រេងកូឡាចែកជូនដល់បងប្អូនដែលកំពុងតែខ្វះខាត។

អ្នកស្រីបានឱ្យដឹងថា៖ «បងប្អូនអ្នកប្រកបរបររើសអេតចាយ និងអ្នករត់ម៉ូតូឌុបមួយចំនួន មិនអាចទិញម៉ាស់ អាល់កុលដើម្បីការពារខ្លួនពីការឆ្លងវីរុសកូវីដ១៩ បានឡើយ ព្រោះថា ក្នុងអំឡុងពេលដ៏លំបាកនេះ ពួកគាត់ក៏មិនអាចរកប្រាក់កម្រៃបានសមរម្យដើម្បីទ្រទ្រង់ជីវភាពរបស់ពួកគាត់នោះដែរ។ ហេតុដូច្នេះហើយគ្រួសាររបស់ខ្ញុំបានឧបត្ថម្ភអង្ករ300គីឡូក្រាមដើម្បីចែកជូនដល់ពួគាត់»។

ដោយមើលឃើញសន្តានចិត្តដ៏ប្រពៃរបស់អ្នកស្រី អ្នកជិតខាងរបស់អ្នកស្រីក៏បានចូលរួមឧបត្ថម្ភ ប្រេងកូឡា ទឹកអាល់កុលលាងដៃដើម្បីចែកជូនដល់បងប្អូនដែលកំពុងខ្វះខាតផងដែរ។ គិតត្រឹមថ្ងៃទី28 ខែមីនានេះ មានបងប្អូនជាង100នាក់ហើយដែលបានទទួលអំណោយសប្បុរសធម៌ពីក្រុមគ្រួសារ និងអ្នកជិតខាងរបស់អ្នកស្រី។

លោកស្រី គង់ មុនីភក្តី ដែលជាម្ចាស់វីង ឈ្មោះ រតនៈ រង្សី នៅផ្សារឈូកមាស រាជធានីភ្នំពេញ បានរៀបចំចែកជូនជែលលាងដៃដល់អ្នកធ្វើដំណើរ និងអតិថិជនគាត់ជាប្រចាំ។ លោកស្រីបានឱ្យដឹងថា៖ « ខ្ញុំចែកជែលពួកគាត់នៅតាមហាងវីងរបស់ខ្ញុំទាំង4សាខាតែម្តង មួយថ្ងៃនៅតាមហាងនីមួយខ្ញុំចែកជូនអស់ប្រហែល100ដប។ ក្រៅពីនេះខ្ញុំបរិច្ចាគថវិកាទៅសមាគមផ្សេងៗដើម្បីជួយអ្នកទីទាល់ក្រផងដែរ»។

ដោយឡែកនៅសង្កាត់ទួលស្វាយព្រៃ ខ័ណ្ឌចំការមន រាជធានីភ្នំពេញ វិញ ភ្នាក់ងារវីង ដែលមានស្លាកយីហោ ងួន សីថា បានចែករំលែកទឹកអាល់កុលលាងដៃ និង ម៉ាស់ជាច្រើនដោយឥតគិតថ្លៃដល់អតិថិជន និងអ្នកធ្វើដំណើរផងដែរ។

មិនត្រឹមតែភ្នាក់ងារវីងនៅរាជធានីភ្នំពេញនោះទេ សូម្បីតែបងប្អូនភ្នាក់ងារវីងនៅតាមបណ្តាខេត្ត ក៏ចូលរួមទប់ស្កាត់មេរោគវីដ១៩នេះដែរ។ តួយ៉ាង លោក ឃិន លីហាក់ ម្ចាស់ភ្នាក់ងារវីងមួយកន្លែង និងក្រុមគ្រួសាររបស់លោកក៏បានរួមចំណែកជាទឹកប្រាក់ចំនួន បួនលានរៀល សម្រាប់ជួយបងប្អូនកំពុងតែខ្វះខាត ដែលស្ថិតក្នុងភូមិស្រល់ ឃុំត្រែងត្រយឹង ស្រុកភ្នំស្រួចខេត្តកំពង់ស្ពឺ តាមរយៈលោកមេភូមិ ដោយមួយគ្រួសារៗអាចស្នើថវិកានេះបាន10ម៉ឺនរៀល។

លោក ឃិន លីហាក់ បានមានប្រសាសន៏ថា៖ «នៅពេលដែលសង្គមរបស់យើងកំពុងទទួលរងការវាយប្រហារពីមេរោគកូវីដ១៩នេះ យើងមិនអាចឈរឱបដៃមើលបានឡើយ។ នៅពេលដែលយើងមានស៊ីគ្រប់គ្រាន់ហើយ យើងត្រូវតែចេះចែករំលែក ជាពិសេសក្នុងគ្រាដ៏លំបាកនេះ»។

ក្រៅពីនេះ ក៏នៅមានភ្នាក់ងារវីងនៅតាមកន្លែងផ្សេងដទៃទៀតនៅក្នុងប្រទេសកម្ពុជា ដែលបានស្ម័គ្រចិត្តបរិច្ចាគថវិកាផ្ទាល់ខ្លួនដើម្បីរួមចំណែកឧបត្ថម្ភដល់ប្រជាជនកម្ពុជាដែលមានជីវភាពខ្វះខាតផងដែរ។

យោងតាមសេចក្តីប្រកាសរបស់ក្រសួងសុខាភិបាលចុះផ្សាយនៅព្រឹកថ្ងៃទី29 ខែមីនា ឆ្នាំ2020នេះ បានឱ្យដឹងថា កម្ពុជាបានរកឃើញអ្នកផ្ទុកមេរោគកូវីដ១៩ ចំនួន01នាក់បន្ថែមទៀត ដែលធ្វើឱ្យចំនួនអ្នកឆ្លងសរុបនៅទូទាំងប្រទេសកម្ពុជាកើនដល់ទៅ 103ករណី៕

March 29, 2020

COVID-19! តួលេខចុងក្រោយ៖ មនុស្សជាង30,000នាក់បានស្លាប់ដោយសារជំងឺរលាកសួតប្រភេទថ្មីនៅទូទាំងពិភពលោក

តួលេខនៃការស្លាប់ដោយសារវីរុសCOVID-19 នៅទូទាំងពិភពលោក បានកើនឡើងយ៉ាងឆាប់រហ័ស ពិសេសគឺនៅអឺរ៉ុប និងសហរដ្ឋអាមេរិក នាំឱ្យករណីស្លាប់សរុបកើនដល់30,851នាក់ ក្នុងចំណោមអ្នកផ្ទុកវីរុស662,967នាក់។

ករណីស្លាប់ដោយសារវីរុសCOVID-199 នៅទូទាំងពិភលោកមាន30,671ករណី ក្នុងនោះ អឺរ៉ុបមាន2/3។ ចំណែកអ៊ីតាលីវិញមាន1/3 ក្នុងចំណោមករណីស្លាប់នៅទូទាំងពិភពលោក ដោយប្រទេសនេះមានអ្នកស្លាប់10,023ករណី។

សហរដ្ឋអាមេរិកបន្តជាសម្បុកមេរោគCOVID-19 ធំជាងគេក្នុងលោក ដោយមានអ្នកផ្ទុកមេរោគចំនួន123,313ករណី អ្នកស្លាប់2,211ករណី និងជាសះស្បើយ3,231ករណី។ ករណីស្លាប់នៅសហរដ្ឋអាមេរិកបានកើនឡើងទ្វេដងក្នុងរយៈពេល3ថ្ងៃមកនេះ។

អ៊ីតាលីជាសម្បុកមេរោគធំលំដាប់ទី2ក្នុងពិភពលោក៖ ករណីឆ្លងមេរោគថ្មី5,974នាក់ អ្នកឆ្លងមេរោគសរុប92,472នាក់ អ្នកស្លាប់ថ្មី889នាក់ អ្នកស្លាប់សរុប10,023នាក់។

អេស្ប៉ាញជាសម្បុកមេរោគធំលំដាប់ទី2 នៅអឺរ៉ុប៖ ករណីឆ្លងមេរោគថ្មី7,516នាក់ អ្នកឆ្លងមេរោគសរុប73,235 នាក់ អ្នកស្លាប់ថ្មី844នាក់ អ្នកស្លាប់សរុប5,982នាក់។

អាល្លឺម៉ង់ជាសម្បុកមេរោគធំទី5ក្នុងពិភពលោក៖ អ្នកឆ្លងមេរោគថ្មី6,824ករណី អ្នកស្លាប់ថ្មី82នាក់ អ្នកឆ្លងមេរោគសរុប57,695ករណី និងអ្នកស្លាប់សរុប433ករណី។

បារាំង៖ មានអ្នកឆ្លងមេរោគថ្មី4,611ករណី អ្នកឆ្លងមេរោគសរុប37,573នាក់ អ្នកស្លាប់ថ្មី319ករណី និងអ្នកស្លាប់សរុប2,314ករណី។

អង់គ្លេសមានអ្នកឆ្លងមេរោគថ្មី2,546ករណី អ្នកស្លាប់ថ្មី260ករណី អ្នកឆ្លងសរុប17,089ករណី និងអ្នកស្លាប់សរុប1,019ករណី។

អ៊ីរ៉ង់គឺជាសម្បុកមេរោគធំទី2នៅអាស៊ី បន្ទាប់ពីប្រទេសចិន ដោយមានអ្នកឆ្លងមេរោគថ្មី3,076ករណី អ្នកស្លាប់ថ្មី139ករណី អ្នកឆ្លងមេរោគសរុប35,408ករណី អ្នកស្លាប់សរុប2,517ករណី៕

ប្រភព៖ សារព័ត៌មានបរទេស

March 29, 2020

Author: សឿន សំណាង