សឿន សំណាង - La Reine Media

រាជរដ្ឋាភិបាលណែនាំឱ្យត្រៀមស្បៀងសំខាន់ៗ ដើម្បីទប់ទល់នឹងបញ្ហាដែលអាចកើតឡើងដោយសារ COVID-19

រាជរដ្ឋាភិបាលកម្ពុជាប្រកាសឱ្យត្រៀមស្បៀងអាហារសំខាន់ៗសម្រាប់ស្ថានការណ៍អាក្រក់ដែលអាចនឹងកើតមានឡើង ខណៈដែលវីរុសCOVID-19 កំពុងរាតត្បាតពិភពលោក។

សេចក្តីជូនដំណឹងស្តីពីលទ្ធផលនៃសម័យប្រជុំគណៈអចិន្ត្រៃយ៍គណៈរដ្ឋមន្ត្រី កាលពីថ្ងៃទី31មីនាកន្លងទៅ បានឱ្យដឹងថា “ក្នុងកាលៈទេសៈដ៏លំបាកនៃការរីករាលដាលការឆ្លងជំងឺវីរុសCOVID-19នេះ ត្រូវជំរុញវិស័យកសិកម្មក្នុងស្រុកដែលជាចំណុចខ្លាំងរបស់កម្ពុជា។ ត្រូវស្តុកបម្រុងទុកនូវទំនិញយុទ្ធសាស្ត្រដូចជា អង្ករ និងអំបិល”។

ចំពោះអង្ករដែលជាស្បៀងយុទ្ធសាស្ត្ររបស់កម្ពុជា ក៏ត្រូវបានរាជរដ្ឋាភិបាលហាមមិនឱ្យនាំចេញ លើកលែងតែអង្ករក្រអូប ដោយបទបញ្ជានេះនឹងត្រូវអនុវត្តចាប់ពីថ្ងៃទី5មេសា ឆ្នាំ2020 រហូតដល់មានសេចក្ដីប្រកាសថ្មី។ ក្រៅពីនេះ ទំនិញសំខាន់ៗមួយចំនួនផ្សេងទៀត ក៏ត្រូវបានរាជរដ្ឋាភិបាលណែនាំឱ្យយកចិត្តទុកដាក់ និងត្រៀមផងដែរ ដូចជាទឹកអាល់កុល និងម៉ាស់ជាដើម។

គិតមកដល់បច្ចុប្បន្ន កម្ពុជាបានរកឃើញអ្នកផ្ទុកមេរោគCOVID-19 ចំនួន109ករណី ក្នុងនោះមាន23ករណីបានជាសះស្បើយ និង86ករណីកំពុងស្ថិតក្នុងការព្យាបាល។

នៅទូទាំងពិភពលោក មានអ្នកឆ្លងវីរុសCOVID-19 សរុប 858,669នាក់ ក្នុងនោះមាន178,099នាក់បានជាសះស្បើយ និង 42,151នាក់ កំពុងប្រឈមនឹងការស្លាប់៕

April 1, 2020

អ្នកជំងឺជិត860,000នាក់បានឆ្លងវីរុសCOVID-19 នៅទូទាំងពិភពលោក

ល្បឿននៃការឆ្លងរាលដាលរបស់វីរុសCOVID-19 មិនទាន់មានសញ្ញាថមថយនៅឡើយ ពិសេសនៅអឺរ៉ុប និងសហរដ្ឋអាមេរិក នាំឱ្យចំនួនអ្នកបានឆ្លងមេរោគនេះ កើនឡើងដល់ជិត860,000នាក់ ជាមួយនឹងអ្នកស្លាប់ជាង42,000។

អ្នកឆ្លងមេរោគCOVID-19 ចំនួន854,612ករណី និងបាត់បង់ជីវិត 42,044ករណី នៅក្នុងប្រទេស និងដែនដីចំនួន202 នៅទូទាំងពិភពលោក ដោយអ្នកជំងឺថ្មីកើន72,578ករណី និងស្លាប់កើន4,435ករណីបន្ថែមទៀត ក្នុងរយៈពេល24ម៉ោងចុងក្រោយនេះ។ អ៊ីតាលីគឺជាប្រទេសដែលមានអ្នកស្លាប់ច្រើនជាងគេក្នុងពិភពលោក។

សហរដ្ឋអាមេរិក មកដល់ពេលនេះបានរកឃើញអ្នកឆ្លងCOVID-19 ចំនួន188,172ករណី ក្នុងនោះមានអ្នកស្លាប់3,899ករណី។ នេះបើតាមស្ថិតិរបស់សាកលវិទ្យាល័យ Johns Hokins។ ដូច្នេះ តួលេខនៃអ្នកស្លាប់ដោយសារវីរុសនេះនៅសហរដ្ឋអាមេរិក បានកើនឡើងលើសប្រទេសចិន ដែលមានអ្នកស្លាប់ចំនួន3,305ករណី។

អ៊ីតាលី៖ អ្នកឆ្លងវីរុសថ្មី4,035នាក់ អ្នកស្លាប់ថ្មី837នាក់។ អ្នកឆ្លងមេរោគសរុប105,792នាក់ និងអ្នកស្លាប់សរុប12,428នាក់។

អេស្ប៉ាញ៖ អ្នកឆ្លងវីរុសថ្មី7,967នាក់ អ្នកស្លាប់ថ្មី748នាក់។ អ្នកឆ្លងមេរោគសរុប95,923នាក់ និងអ្នកស្លាប់សរុប8,464នាក់ ដែលតួលេខនេះបានលោតរំលងប្រទេសចិន ដើម្បីក្លាយជាសម្បុកមេរោគធំបំផុតលំដាប់ទី3ក្នុងពិភពលោក។

អាល្លឺម៉ង់៖ អ្នកឆ្លងមេរោគថ្មី4,923នាក់ អ្នកស្លាប់ថ្មី130នាក់។ អ្នកឆ្លងមេរោគសរុប71,808នាក់ និងអ្នកស្លាប់សរុប775នាក់។ ប្រទេសនេះគឺជាសម្បុកមេរោគធំបំផុតទី3នៅអឺរ៉ុប បន្ទាប់ពីអ៊ីតាលី និងអេស្ប៉ាញ។

អង់គ្លេស៖ អ្នកឆ្លងមេរោគថ្មី3,009នាក់ និងអ្នកស្លាប់ថ្មី381នាក់។ អ្នកឆ្លងមេរោគសរុប25,150នាក់ និងអ្នកស្លាប់សរុប1,789នាក់។ ក្នុងចំណោមអ្នកជំងឺ ក៏មានព្រះអង្គម្ចាស់ Charles រួមនឹងនាយករដ្ឋមន្ត្រី Boris Johnson និងរដ្ឋមន្ត្រីក្រសួងសុខាភិបាល Matt Hancock ផងដែរ។

អ៊ីរ៉ង់៖ ប្រទេសនេះនៅតែជាសម្បុកមេរោគធំបំផុតទី2ក្នុងទ្វីបអាស៊ី បន្ទាប់ពីប្រទេសចិន។ អ៊ីរ៉ង់មានអ្នកឆ្លងមេរោគថ្មី3,110នាក់ និងករណីស្លាប់ថ្មី141នាក់ ដូច្នេះអ្នកឆ្លងមេរោគសរុបឡើងដល់44,605នាក់ និងអ្នកស្លាប់សរុប2,898នាក់។

ប្រទេសចិន៖ តួលេខចុងក្រោយ (ដែលមិនទាន់ប្រកាសតួលេខថ្មីក្នុងថ្ងៃនេះ) បង្ហាញថា មានអ្នកឆ្លងមេរោគសរុប 81,518នាក់ និងស្លាប់សរុប3,305នាក់។

កូរ៉េខាងត្បូង៖ តួលេខចុងក្រោយ (ដែលមិនទាន់ប្រកាសតួលេខថ្មីក្នុងថ្ងៃនេះ) បង្ហាញថា មានអ្នកឆ្លងមេរោគសរុប9,786នាក់ និងអ្នកស្លាប់សរុប162នាក់។

អាស៊ីអាគ្នេយ៍៖ ម៉ាឡេស៊ី គឺជាសម្បុកមេរោគធំបំផុតនៅក្នុងតំបន់នេះ ដោយមានអ្នកជំងឺសរុប2,766នាក់ និងស្លាប់43នាក់។ ចំណែកឥណ្ឌូនេស៊ីវិញ គឺជា “វាលពិឃាត” ធំបំផុតរបស់វីរុសCOVID-19 ដោយមានអ្នកស្លាប់ដល់ទៅ136នាក់ ក្នុងចំណោមអ្នកផ្ទុកមេរោគ1,528នាក់៕

ប្រភព៖ សារព័ត៌មានបរទេស

April 1, 2020

ប្រធានាធិបតី បេឡារូស ប្រាប់ឱ្យប្រជាជនផឹកស្រា vodka ដើម្បីសម្លាប់ COVID-19

ប្រធានាធិបតីនៃប្រទេសបេឡារូស បានណែនាំឱ្យប្រជាជនរបស់លោក ផឹកស្រា vodko ដើម្បី “បំពុលមេរោគ COVID-19” ឬប្រើវាដើម្បីសម្អាតខាងក្នុងរាងកាយ។

“ថ្មីៗនេះ ខ្ញុំមិនដែលបានផឹកស្រានោះទេ ប៉ុន្តែ ខ្ញុំបាននិយាយហើយថា អ្នករាល់គ្នាមិនគួរគ្រាន់តែលាងដៃនឹងស្រា vodka នោះទេ តែចូរប្រើវាដើម្បីបំពុលវីរុស។ អ្នកគួរតែផឹកស្រាខ្លាំង ប្រហែល40-50មីល្លីលីត្រ រាល់ថ្ងៃ ប៉ុន្តែ កុំផឹកនៅកន្លែងធ្វើការ” ប្រធានាធិបតីបេឡារូស លោក Alexander Lukashenko បានថ្លែងបែបនេះ បន្ទាប់ពីបានទស្សនាការប្រកួតវាយកូនបាល់លើទឹកកករួច កាលពីថ្ងៃទី29មីនា។

លោក Lukashenko ក៏បានអះអាងថា កីឡាគឺជា “ឱសថល្អបំផុតសម្រាប់ប្រឆាំងនឹងវីរុស។ ពុំមានមេរោគណានៅទីនេះនោះទេ ខ្ញុំមិនបានឃើញវាផង”។

បេឡារូស ជាប្រទេសមួយដែលមានប្រជាជន9.5លាននាក់ បានរកឃើញអ្នកផ្ទុកមេរោគCOVID-19 ចំនួន150នាក់ ក្នុងនោះមាន40នាក់បានជាសះស្បើយ និងមិនទាន់មានករណីស្លាប់នោះទេ។ នៅក្នុងប្រទេសនៅតំបន់អឺរ៉ុបខាងត្បូងមួយនេះ ហាងទាំងឡាយ រួមនឹងផ្សារជាដើម ក៏នៅមានសកម្មភាពធម្មតា កន្លែងប្រគំតន្ត្រីក៏នៅតែបើកដំណើរការ ចំណែកអ្នកចូលចិត្តកីឡាក៏នៅតែនាំគ្នាំទៅកាន់កីឡដ្ឋាន មើលការប្រកួត។

កាលពីថ្ងៃទី16មីនា ប្រធានាធិបតីរូបនេះ ក៏បានថ្លែងថា ពិភពលោក “កំពុងតែឡប់គ្រឿងដោយសារ COVID-19 និងកំពុងមាន “អាការវិកលចរិត” ព្រោះតែវីរុសធ្វើឱ្យសេដ្ឋកិច្ចត្រូវរាំងស្ទះ។ នៅក្នុងការថ្លែងដែលធ្វើឱ្យមានការរិះគន់កាលពីថ្ងៃទី16មីនានោះ លោក Lukashenko ក៏បានណែនាំឱ្យពលរដ្ឋបេឡារូស កុំស្លន់ស្លោ ហើយត្រូវទៅធ្វើការបន្តទៀត។

លោកថ្លែងថា “អ្នករាល់គ្នាគួរតែធ្វើការ ពិសេសគឺពេលនេះ។ ត្រាក់ទ័រ និងស្រែចំការនឹងព្យាបាលជំងឺឱ្យអ្នករាល់គ្នា”។

ក៏ប៉ុន្តែ មិនមែនពលរដ្ឋបេឡារូសទាំងអស់សុទ្ធតែយល់ស្របជាមួយលោកប្រធានាធិបតីនេះនោះទេ។ និពន្ធនាយកនៃសារព័ត៌មាន Tut.by អ្នកស្រី Marina Zolotova និយាយថា ប្រជាជនបេឡារូសជាច្រើន “គិតថា លោកបានបញ្ចេញសកម្មភាពដោយមិនសមហេតុផលតាមជាក់ស្ដែង និងខ្វះការទទួលខុសត្រូវ”។

ប្រភព៖ សារព័ត៌មានបរទេស

March 31, 2020

ឥណ្ឌូនេស៊ីប្រកាសអាសន្នទូទាំងប្រទេស និងបញ្ចេញវិធានការជំនួយ សម្រាប់ពលរដ្ឋមានចំណូលទាប

ប្រធានាធិបតីឥណ្ឌូនេស៊ី បានប្រកាសអាសន្នទូទាំងប្រទេសអំពីវិបត្តិសុខភាពសាធារណៈ ដោយសារតែ COVID-19 ព្រមទាំងបានប្រកាសអំពីវិធានការនានា ដើម្បីជួយដល់ពលរដ្ឋដែលមានចំណូលទាបផងដែរ។

“យើងសម្រេចរឹតបន្តឹងទៅលើវិធានការនានាក្នុងសង្គមជាទ្រង់ទ្រាយធំ ដោយយោងទៅតាមមាត្រាទី6 នៃច្បាប់ស្ដីអំពីការត្រួតពិនិត្យផ្នែកសុខាភិបាលឆ្នាំ2018។ យើងក៏បានចេញបទបញ្ជារបស់រដ្ឋាភិបាលស្ដីអំពីការកំណត់មួយចំនួនក្នុងសង្គម ក៏ដូចជាបទបញ្ជារបស់ប្រធានាធិបតីអំពីស្ថានភាពអាសន្ន” ប្រធានាធិបតីឥណ្ឌូនេស៊ី Joko Widodo មានប្រសាសន៍បែបនេះ នៅក្នុងពេលប្រកាសអាសន្នទូទាំងប្រទេស ទៅលើ COVID-19 ក្នុងថ្ងៃនេះ។

ប្រធានាធិបតីឥណ្ឌូនេស៊ី អំពាវនាវឱ្យមេដឹកនាំតំបន់ និងមូលដ្ឋានទាំងអស់ ត្រូវគោរពទៅតាមការកំណត់ដែលកំពុងមានសុពលភាព ចៀសវាងការចេញបទបញ្ចេញដោយឡែកបន្ថែមទៀត។ លោកប្រធានាធិបតី Widodo ក៏បានឱ្យដឹងថា លោកបានបញ្ជាឱ្យកងកម្លាំងនគរបាល ចាប់ផ្ដើមអនុវត្តដោយស្របច្បាប់នូវបទបញ្ជានេះ ប៉ុន្តែលោកមិនបានបកស្រាយអំពីវិធានការដែលសមត្ថកិច្ចអាចនឹងអនុវត្តនោះដែរ។

លោក Widodo ក៏បានប្រកាសអំពីវិធានការជំនួយដល់ពលរដ្ឋមានប្រាក់ចំណូលទាប ដែលរងផលប៉ះពាល់ពី COVID-19 ក៏ដូចជាពីបទបញ្ជារបស់រដ្ឋាភិបាលផងដែរ ក្នុងនោះមានដូចជាការបង្កើនសេវាសុខុមាលភាពសង្គម ជំនួយជាស្បៀងអាហារ បញ្ចុះតម្លៃអគ្គិសនី និងលើកលែងពន្ធជាដើម។

ឥណ្ឌូនេស៊ី គឺជាសម្បុកមេរោគ COVID-19 ធំជាងគេលំដាប់ទី4 នៅក្នុងតំបន់អាស៊ីអាគ្នេយ៍ ដោយមានមនុស្សជាង1,400នាក់បានឆ្លងមេរោគ ប៉ុន្តែ ប្រទេសនេះ ក៏ជាទឹកដីដែលមានអ្នកស្លាប់ដោយសារវីរុសកូរ៉ូណា ច្រើនជាងគេបង្អស់ក្នុងតំបន់នេះផងដែរ ដោយមានអ្នកស្លាប់ដល់ទៅ122នាក់៕

ប្រភព៖ សារព័ត៌មានបរទេស

March 31, 2020

COVID-19! វៀតណាបិទច្រកព្រំដែនជាមួយកម្ពុជា និងឡាវ ខណៈតំបន់ឥណ្ឌូចិនមានអ្នកឆ្លងមេរោគកូរ៉ូណាជាង300ករណី

ប្រទេសវៀតណាមបានសម្រេចបិទច្រកព្រំដែនទៅ-មកជាបណ្ដោះអាសន្ន រវាងវៀតណាម-ប្រទេសកម្ពុជា និងវៀតណាម-ឡាវ ចាប់ពីថ្ងៃទី1មេសាខាងមុខ ដើម្បីរឹតបន្តឹងវិធានការទប់ស្កាត់វីរុសCOVID-19។

ការសម្រេចចិត្តខាងលើនេះ នឹងអនុវត្តទៅលើអ្នកដំណើរដែលឆ្លងកាត់ច្រកព្រំដែនអន្តរជាតិ ច្រករបៀង ផ្លូវលំ រួមនឹងផ្លូវផ្សេងៗទៀតនៅតាមតំបន់ព្រំដែនជាប់ជាមួយកម្ពុជា និងឡាវ ដោយចាប់ផ្ដើមបិទពីម៉ោង00:00:00នាទី ថ្ងៃទី1មេសាខាងមុខ។

សេចក្ដីប្រកាសរបស់ក្រសួងការបរទេសវៀតណាមខាងលើនេះ ត្រូវបានធ្វើឡើងកាលពីថ្ងៃទី31មីនាកន្លងទៅ និងបានផ្ញើមកកាន់ឯកអគ្គរាជទូតកម្ពុជាប្រចាំនៅប្រទេសវៀតណាមហើយដែរ។ នេះបើតាមសារព័ត៌មាន វៀតណាម VNEXPRESS។

សេចក្ដីប្រកាសខាងលើក៏បានឱ្យដឹងថា វៀតណាមមានបំណងចង់បានកិច្ចសហការពីប្រទេសកម្ពុជា និងឡាវ ដើម្បីអាចគ្រប់គ្រងវីរុសCOVID-19 បានឆាប់រហ័ស។

គួររំឭកថា ចាប់ពីថ្ងៃទី20មីនា ប្រទេសកម្ពុជាក៏បានផ្អាកការផ្ដល់ទិដ្ឋាការចំពោះពលរដ្ឋវៀតណាម រីឯប្រទេសឡាវក៏បានផ្អាកការផ្ដល់ទិដ្ឋាការចំពោះអ្នកដំណើរដែលមកពីគ្រប់ច្រកព្រំដែនទូទាំងប្រទេសនេះ ចាប់ពីថ្ងៃទី30មីនាដល់ថ្ងៃទី19មេសា។ ប្រទេសឡាវក៏បានបិទច្រកព្រំដែនជាមួយវៀតណាម ចាប់ពីថ្ងៃទី19មីនា ដល់ថ្ងៃទី20មេសាផងដែរ។

គិតមកដល់បច្ចុប្បន្ន វៀតណាមបានរកឃើញអ្នកផ្ទុកមេរោគCOVID-19 ចំនួន204ករណី ខណៈដែលកម្ពុជាមានចំនួន109ករណី និងឡាវមានចំនួន9ករណី។

COVID-19 បានបង្ហាញខ្លួននៅក្នុងប្រទេស និងដែនដីចំនួន200នៅទូទាំងពិភពលោក បណ្ដាលឱ្យមនុស្ស 786,608នាក់បានឆ្លងមេរោគ ក្នុងនោះមានអ្នកជំងឺ37,832បានស្លាប់ 166,088នាក់បានជាសះស្បើយ និង
អ្នកជំងឺប្រមាណជា29,513នាក់កំពុងប្រឈមនឹងការស្លាប់ នៅទូទាំងពិភពលោក៕

ប្រភព៖ សារព័ត៌មានបរទេស

March 31, 2020

មេរៀនដែលពិភពលោកមិនចងចាំ!! ពីចិន ឆ្ពោះទៅអ៊ីតាលី, បង្ខាំងជំងឺ “កូវីដ-19” ខុសឆ្គង ប្រទេសជាតិអាចរលំរលាយ…

ចំនួនអ្នកឆ្លងមេរោគកូវីដ-19 កើនធ្លុះដល់រាប់សែននាក់ ក្នុងរយៈពេលត្រឹមតែ 2ខែប៉ុណ្ណោះ ការណ៍នេះបញ្ជាក់បានយ៉ាងច្បាស់ថា ប្រទេសអ៊ីតាលីកំពុងបានទទួលមេរៀនដ៏សែនឈឺចាប់ ពីការឆ្លងរាលដាលរបស់មេរោគវីរុសកូរ៉ូណាប្រភេទថ្មី ហើយអ្នកជំនាញការជនជាតិចិន ដែលធ្លាប់ជួបនឹងវាសនាកម្មបែបដូចគ្នានេះពីមុនមក បានចេញមកចង្អុលបង្ហាញថា អ៊ីតាលីត្រូវងាកមកបង្ខាំងអ្នកជំងឺគ្រប់រូប ទោះជាមានអាការបន្តិចបន្តួចក៏ដោយ និងមិនគួរអនុញ្ញាតឱ្យពួកគេត្រឡប់ទៅបង្ខាំងខ្លួនឯងនៅឯផ្ទះឡើយ ព្រោះនេះជាទង្វើដែលមហានាគចិនធ្លាប់បានខុសឆ្គងពីមុនមក រហូតដល់ត្រូវខាតបង់យ៉ាងសែនធ្ងន់ធ្ងរ។

លោកវេជ្ជបណ្ឌិត លៀង សុង អាន់ ប្រធានផ្នែកប្រព័ន្ធផ្លូវដង្ហើម នៃមន្ទីពេទ្យ សេឈួន បានទទួលស្គាល់ថា ក្រុមគណៈគ្រូពេទ្យនៅក្នុងទីក្រុងវូហាន ធ្លាប់បានធ្វើខុសឆ្គងបែបដូចគ្នានេះរួចមកហើយ ក្នុងអំឡុងពេលដំបូងៗរបស់ការឆ្លងរាលដាល។ ដោយពីដំបូង មន្ទីរពេទ្យផ្សេងៗ នឹងទទួលតែអ្នកជំងឺដែលមានអាការធ្ងន់ធ្ងរប៉ុណ្ណោះ ចំណែកអ្នកជំងឺដែលមានអាការបន្តិចបន្តួច គណៈគ្រូពេទ្យនឹងណែនាំឱ្យត្រឡប់ទៅបង្ខាំងខ្លួនឯងនៅឯផ្ទះ ដើម្បីកាត់បន្ថយភាពតានតឹងខាងប្រព័ន្ធសាធារណៈសុខាភិបាលរបស់ទីក្រុងវូហាន ដែលទ្រាំទ្របន្ទុកលែងរួច។

នៅពេលនោះនៅមិនទាន់បានដឹងជាទូទៅគ្រប់គ្នាថា អ្នកឆ្លងមេរោគមួយចំនួន ស្ទើរតែគ្មានបង្ហាញអាការជំងឺអ្វីទាំងអស់ តែពេលនេះពួកអ្នកវិទ្យាសាស្ត្របានដឹងហើយថា អ្នកដែលមានអាការបន្តិចបន្តួច និងបានទទួលការណែនាំឱ្យទៅបង្ខាំងខ្លួននៅតែក្នុងផ្ទះនោះ បានក្លាយជាបុគ្គលដែលប្រថុយប្រថានក្នុងការចម្លងមេរោគទៅសមាជិកក្នុងគ្រួសារដោយខ្លួនឯង ដូចគ្នានឹងអ្នកឯទៀតដែលនៅក្រៅផ្ទះដែរ បើសិនជាអ្នកផ្ទុកមេរោគមួយចំនួននៅតែធ្វើដំណើរទៅណាមកណាតាមប្រក្រតីនោះ។

លោក ម៉ៃ រ៉ៃអាន់ នាយកគ្រប់គ្រងផ្នែកគ្រោងការក្នុងគ្រាអាសន្នរបស់អង្គការសុខភាពពិភពលោក បានប្រាប់ថា “ដោយសារតែវិធានការបិទទីក្រុង ករណីការចម្លងមេរោគភាគច្រើនដែលកើតឡើងមែនទែនក្នុងប្រទេសជាច្រើនក្នុងពេលនេះ វាកើតឡើងក្នុងកម្រិតគ្រួសារ” លោកបន្តថា “យើងចាំបាច់ត្រូវតែចុះទៅមើលនៅតាមផ្ទះគ្រួសារនីមួយៗ ដើម្បីស្វែងរកអ្នកសង្ស័យថាបានឆ្លងមេរោគ និងនាំមនុស្សទាំងនោះទៅបង្ខាំងជំងឺនៅកន្លែងដែលមានសុវត្ថិភាព និងមានកិត្តិយស”។

Corriere della sera សារព័ត៌មានប្រចាំថ្ងៃរបស់អ៊ីតាលី បានរាយការណ៍កាលពីថ្ងៃចន្ទ(ទី30មីនា)ថា តាមរយៈការចូលបង្ក្រាបកាលពីថ្ងៃសៅរ៍(ទី28មីនា)បានរកឃើញប្រជាជនប្រពឹត្តល្មើសនឹងវិធានការបិទទីក្រុងក្នុងចំនួនដ៏ច្រើន ក្នុងនោះរួមទាំងអ្នកឆ្លងមេរោគប្រមាណជា 50នាក់ទៀតផង ដែលការពិតទៅ មនុស្សទាំងនោះ គួរតែមានការបង្ខាំងខ្លួនឯងនៅតែក្នុងផ្ទះ មិនមែនដើរលេងតាមផ្លូវថ្នល់សេរីបែបនេះទេ។

វូហាន ចាប់ផ្ដើមបង្ខាំងអ្នកឆ្លងមេរោគដែលមានអាការបន្តិចបន្តួច គ្រប់ករណីនៅតាមទីស្នាក់ការ ទីលានបាល់ទាត់ និងកន្លែងហាត់ប្រាណធំៗ ដែលកែច្នៃទៅជាមន្ទីរពេទ្យបណ្ដោះអាសន្នក្នុងអំឡុងដើមខែកុម្ភៈ។ ជាសកម្មភាពដែលជួយកាត់បន្ថយការឆ្លងរាលដាលមេរោគបានយ៉ាងឆាប់រហ័ស រហូតទាល់តែគ្រប់គ្រងការឆ្លងរាលដាលបានសម្រេច។ ព័ត៌មានជាផ្លូវការចុងក្រោយបំផុត៖ បានរកឃើញអ្នកឆ្លងមេរោគថ្មី ត្រឹមតែបន្តិចបន្តួចប៉ុណ្ណោះ ខុសពីប្រទេសផ្សេងៗ ដែលមានចំនួនកាន់តែកើនឡើងជារឿយៗ។

លោកវេជ្ជបណ្ឌិត លៀង ប្រាប់ថា ក្រុមការងាររបស់លោក បានណែនាំឱ្យប្រទេសអ៊ីតាលីធ្វើតាមចិន ក្នុងការបង្ខំអ្នកជំងឺដែលមានអាការរោគបន្តិចបន្តួចឱ្យចាកចេញពីគ្រួសារ ព្រោះនៅក្នុងប្រទេសចិន លទ្ធផលនៃការសិក្សាស្រាវជ្រាវ បានរកឃើញថា នៅក្នុងមណ្ឌលមួយ 80%នៃក្រុមឆ្លងមេរោគ មានប្រភពឆ្លងពីអ្នកជំងឺដែលបានទទួលការណែនាំឱ្យត្រឡប់ទៅបង្ខាំងជំងឺនៅផ្ទះ។

ទោះជាក្រុមគ្រួសាររបស់ប្រជាជនទូទៅនៅក្នុងប្រទេសអ៊ីតាលី ស្នាក់អាស្រ័យនៅក្នុងអគារអាផាតមិនត៍ដែលមានភាពធំទូលាយជាងនៅក្នុងទីក្រុងវូហានមែនក៏ដោយ តែលោកវេជ្ជបណ្ឌិត លៀង បានប្រាប់ថា វាចាប់ផ្ដើមបង្ហាញភ័ស្តុតាងកាន់តែច្បាស់ឡើងៗជារឿយៗថា ទូទាំងគ្រួសារច្រើនតែឆ្លងមេរោគពីអ្នកជំងឺត្រឹមតែម្នាក់គត់ ដែលស្ថិតនៅកណ្ដាលពួកគេ ទោះជាព្យាយាមបង្ខាំងខ្លួនឯងនៅក្នុងបន្ទប់ដាច់ដោយឡែកតែឯងក៏ដោយ។

“យើងមិនអាចនិយាយបានថា វិធានការបង្ខាំងជំងឺនៅផ្ទះរបស់អ៊ីតាលីជារឿងត្រូវ ឬខុសឡើយ ព្រោះប្រទេសនីមួយៗមានយន្តការរបស់ខ្លួនឯង តែយើងបានរកឃើញបញ្ហាខ្លះៗ” លោក លៀវ នីង អ្នកវិភាគមកពីមជ្ឈមណ្ឌលគ្រប់គ្រង និងការពាររោគឆ្លងរបស់ចិន ជាផ្នែកមួយរបស់ក្រុមការងារ បានថ្លែង និងបង្ហើបឱ្យដឹងថា ពួកអ្នកជំនាញការអ៊ីតាលីខ្លួនឯង ក៏មិនអាចឆ្លើយបានដែរថា មានក្រុមអ្នកឆ្លងមេរោគច្រើន-តិចប៉ុនណា ដែលមានប្រភពកំណើតមកពីការបង្ខាំងជំងឺនៅក្នុងផ្ទះ។

ទីក្រុងមីឡាន ចាប់ផ្ដើមកែច្នៃសណ្ឋាគារជាច្រើនឱ្យទៅជាមជ្ឈមណ្ឌលបង្ខាំងជំងឺ សម្រាប់អ្នកជំងឺដែលមានអាការបន្តិចបន្តួច មួយនៅក្នុងចំណោមនោះ គឺជាសណ្ឋាគារខ្នាត 306បន្ទប់ ដែលត្រៀមនឹងប្រើការបានក្នុងសប្ដាហ៍នេះ និងត្រូវបានកែច្នៃទុកឱ្យអ្នកជំងឺ បំបែកខ្លួនចេញពីក្រុមគ្រួសារក្នុងអំឡុងការបង្ខាំងជំងឺ។

តួលេខអ្នកស្លាប់របស់ប្រទេសអ៊ីតាលីហក់ឡើងហួស 11,000នាក់ ខ្ពស់បំផុតក្នុងពិភពលោក និងមានអត្រាស្លាប់ច្រើនស្លាប់ជាងចិនជាង 2ដង ទោះជាមានការសង្ស័យថា តួលេខជាផ្លូវការរបស់ចិននេះ ជាព័ត៌មានពិតមែន ឬយ៉ាងណាក៏ដោយ។

ប្រធានគណៈកម្មការគ្រាអាសន្នរបស់ប្រទេសអ៊ីតាលី ប្រាប់ថា ចំនួនអ្នកឆ្លងមេរោគនៅក្នុងប្រទេស អាចច្រើនជាងតួលេខផ្លូវការ 10ដង តែខណៈពេលជាមួយគ្នា វាក៏ទាញឱ្យអត្រាការស្លាប់របស់ប្រទេស មានភាពស្មើគ្នានឹងប្រទេសផ្សេងៗដែរ។

លោកវេជ្ជបណ្ឌិត លៀង យល់ឃើញថា ចំនួនអ្នកស្លាប់ដែលខ្ពស់ ភាគច្រើនដោយសារតែអ៊ីតាលី ជាប្រទេសដែលមានចំណែកពលរដ្ឋវ័យចំណាស់ស្ថិតក្នុងកម្រិតខ្ពស់។ អ្នកខ្លះមិនព្រមទៅជួបគ្រូពេទ្យ ក្រោយមានលទ្ធផលពិនិត្យចេញមកថា វិជ្ជមាន និងបានស្លាប់នៅក្នុងផ្ទះ។ ចំណែកនៅឯប្រទេសចិន អ្នកស្លាប់ចំនួនដ៏ច្រើន មិនបានរាយកាណ៍ ដោយសារតែមន្ទីរពេទ្យនានាដែលណែនតាន់តាប់នៅក្នុងតំបន់ហ៊ូពេយ លែងអាចទទួលអ្នកជំងឺឱ្យដេកព្យាបាលបាន ទោះជាមនុស្សទាំងនោះ មានលទ្ធផលពិនិត្យកូវីដ-19 ចេញមក “វិជ្ជមាន” ក៏ដោយ៕

ប្រភព៖ សារព័ត៌មានបរទេស

March 31, 2020

ផ្កាយមួយដួងកំពុង “ស៊ីសាច់” មិត្តរួមដំណើររបស់វា ក្នុងប្រព័ន្ធផ្កាយភ្លោះនៃកាឡាក់ស៊ីមួយដែលនៅក្បែរ Milky Ways

អ្នកវិទ្យាសាស្ត្របានប្រើប្រាស់កម្មវិធីកុំព្យូទ័រដើម្បីធ្វើការវិភាគទៅលើដំណើារវិវឌ្ឍន៍របស់ផ្កាយភ្លោះនេះ ហើយបានរកឃើញថា ផ្កាយដែលមានទំហំធំជាងគេ បានស្រូបយកវត្ថុធាតុពីផ្កាយតូចជាងដែលកំពុងគោចរជុំវិញវា នៅក្នុងរយៈចម្ងាយខ្លី។

ក្រុមតារាវិទូនៅមជ្ឈមណ្ឌលរុករករលកទំនាញ ARC Centre of Excellence for Gravitational Wave Discovery (OzGrav) របស់ក្រុមប្រឹក្សាស្រាវជ្រាវអូស្ត្រាលី សហការជាមួយមន្ទីរស្រាវជ្រាវ Max Planck របស់អាល្លឺម៉ង់ សាកលវិទ្យាល័យ Monash របស់អូស្ត្រាលី និងសាកលវិទ្យាល័យ Birmingham នៃប្រទេសអង់គ្លេស បានធ្វើការស្វែងយល់អំពីប្រភពនៃប្រព័ន្ធផ្កាយភ្លោះ Be X-ray ដែលត្រូវបានរកឃើញនៅក្នុងកាឡាក់ស៊ី Small Magellanic Cloud ដែលនៅមិនឆ្ងាយប៉ុន្មានពីកាឡាក់ស៊ី Milky Ways របស់មនុស្សយើង។

កាឡាក់ស៊ី Small Magellanic Cloud ដែលនៅមិនឆ្ងាយប៉ុន្មានពីកាឡាក់ស៊ី Milky Ways របស់មនុស្សយើង

ប្រព័ន្ធផ្កាយភ្លោះ Be X-ray គឺជាប្រព័ន្ធផ្កាយមួយ ដែលរួមមានផ្កាយនឺត្រុងមួយដែលគោចរយ៉ាងលឿនជុំវិញផ្កាយមួយទៀតដែលមានទំហំធំជាងវា។ ល្បឿននៃការគោចររបស់ផ្កាយនឺត្រុងតូច បានធ្វើឱ្យផ្កាយធំ បង្កើតបានជាកងអវកាសដ៏ធំមួយដែលពេញទៅដោយវត្ថុធាតុផ្សេងៗ។ បន្ទាប់មក ផ្កាយនឺត្រុងក៏បានបញ្ចេញកាំរស្មី X ដែលក្រុមតារាវិទូអាចសង្កេតឃើញ និងវាស់វែងបាន។

បណ្ឌិត Serena Vinciguerra ប្រធានក្រុមស្រាវជ្រាវនៅ OzGrav បានប្រើប្រាស់កម្មវិធីកុំព្យូទ័រ COMPAS ដើម្បីក្លែងបង្កើតបរិយាកាសដែលដូចទៅនឹងកាឡាក់ស៊ី Small Magellanic Cloud។ តាមរយៈការប្រៀបធៀបចំណុចពិសេសរបស់គន្លងគោចររបស់ប្រព័ន្ធផ្កាយភ្លោះ Be X-ray ដែលត្រូវបានបង្កើតឡើងក្នុងកុំព្យូទ័រ ជាមួយនឹងប្រព័ន្ធផ្កាយភ្លោះពិតនៅក្នុងអវកាសដែលត្រូវបានសង្កេតឃើញ ក្រុមតារាវិទូអាចស្វែងយល់អំពីដំណើការនៃការវិវឌ្ឍន៍របស់ផ្កាយទាំងនេះ៖

ដំបូងឡើយ ផ្កាយទាំងនេះបានកកើតក្នុងប្រព័ន្ធផ្កាយភ្លោះដែលមានគន្លងគោចររាងពងក្រពើតូចចង្អៀត។ ផ្កាយមួយដួងដែលមានទំហំធំជាងគេ មានការវិវឌ្ឍន៍លឿងជាង និងប្រែទៅជាធំជាងមុនយ៉ាងលឿន។ ដោយសារតែនៅមិនសូវឆ្ងាយពីគ្នា ផ្កាយធំជាង ក៏ស្រូបយកវត្ថុធាតុពីផ្កាយតូចជាងវាបានច្រើន។ នៅដំណាក់កាលចុងក្រោយនៃការវិវឌ្ឍន៍ ផ្កាយធំជាងគេអាចនឹងផ្ទុះឡើងក្រោមទម្រង់ supernova ហើយប្រែក្លាយជាផ្កាយនឺត្រុងតួច ប៉ុន្តែហាប់ណែន។ បើសិនជាផ្កាយទាំង2នេះនៅមានជីវិតបន្ទាប់ពីការផ្ទុះ ពួកវានឹងបង្កើតបានជាប្រព័ន្ធផ្កាយភ្លោះ Be X-ray ដោយមានផ្កាយនឺត្រុងតូចមួយ វិលជុំវិញផ្កាយយក្សធំមួយ ក្នុងល្បឿនយ៉ាងលឿន៕

ប្រភព៖ Sci Tech Daily

March 31, 2020

បកស្រាយចម្ងល់ តើមនុស្សទូទៅគួរពាក់ស្រោមដៃប្លាស្ទិក ដើម្បីការពារវីរុសកូវីដ-19 ឬទេ?

អ្នកជំនាញការបានចេញមកបកស្រាយចម្ងល់ថា តើមនុស្សទូទៅ គួរពាក់ស្រោមដៃប្លាស្ទិក ដើម្បីការពារវីរុសកូវីដ-19 ឬទេ? និងបានបញ្ជាក់បន្ថែមថា អ្នកស្រាវជ្រាវបានរកឃើញថា បើប្រើមិនត្រឹមត្រូវ នឹងក្លាយជាការសន្សំមេរោគទៅវិញ ហើយបានណែនាំឱ្យលាងសម្អាតដៃញឹកញាប់ គឺល្អបំផុត។

វេជ្ជបណ្ឌិតសាស្ត្រាចារ្យជំនាញខាងឱសថសាស្ត្ររបស់ប្រទេសថៃ លោក វីរៈផុង បានសរសេរបញ្ជាក់នៅក្នុងបណ្ដាញសង្គមថា មានមនុស្សជាច្រើនមានសំណួរថា តើមនុស្សទូទៅ ចាំបាច់ត្រូវពាក់ស្រោមដៃជ័រប្លាស្ទិក ដើម្បីការពារមេរោគវីរុសកូវីដ-19ឬទេ? ព្រោះការពាក់ស្រោមដៃប្លាស្ទិក មើលទៅហាក់ដូចជានឹងធ្វើឱ្យយើងមិនបានប៉ះពាល់នឹងវត្ថុកខ្វក់ ឬមេរោគដោយផ្ទាល់ឡើយ។

លោកបានបកស្រាយថា សម្រាប់ប្រជាជនទូទៅដែលរស់នៅដោយប្រតិបត្តិតាមវិធានការ រក្សាគម្លាតចម្ងាយពីគ្នាខាងសង្គម លាងសម្អាតដៃឱ្យបានញឹកញាប់ មិនចូលនៅក្នុងកន្លែងដែលមានមនុស្សច្រើនកុះករ មិនប៉ះពាល់ ឬនៅជិតស្និទ្ធនឹងអ្នកជំងឺនោះ ប្រជាជនទូទៅ “មិនមានភាពចាំបាច់អីត្រូវពាក់ស្រោមដៃប្លាស្ទិក ប្រភេទប្រើម្ដងចោលនោះទេ”។

ហេតុផលដែលមិនចាំបាច់ពាក់ស្រោមដៃប្លាស្ទិក

-ការពាក់ស្រោមដៃជ័រប្លាស្ទិក មិនអាចជំនួសវិធានការរក្សាសុខនាម័យល្អបានទេ ហើយការលាងសម្អាតដៃដោយសាប៊ូ និងទឹក នៅតែមានភាពចាំបាច់ត្រូវតែធ្វើឱ្យបានញឹកញាប់ ព្រោះជាវិធីដែលជួយកាត់បន្ថយការចម្លងសាយភាយរបស់មេរោគបាន។

-ការពាក់ស្រោមដៃប្លាស្ទិកប្រភេទប្រើរួច បោះចោល ច្រើនតែធ្វើឱ្យកើតមានអារម្មណ៍ថា ខ្លួនឯងមានសុវត្ថិភាព រហូតដល់ពេលខ្លះ ធ្វេសប្រហែសក្នុងការធ្វើនូវរឿងដែលការពារមេរោគបានល្អជាង។

-មិនណែនាំឱ្យប្រើស្រោមដៃប្លាស្ទិកក្នុងជីវិតប្រចាំថ្ងៃទេ ព្រោះត្រូវប្រើស្រោមដៃចំនួនច្រើនណាស់ នៅពេលប្ដូរការធ្វើការងារម្ដងៗ។

-ការមើលថែទាំសុខនាម័យរបស់ដៃ គឺការលាងដៃឱ្យស្អាតដោយសាប៊ូ និងទឹក រយៈពេល 20វិនាទី នៅតែជាវិធីដែលល្អបំផុតក្នុងការការពារការចម្លងសាយភាយរបស់មេរោគកូវីដ-19។

-មជ្ឈមណ្ឌលគ្រប់គ្រង និងការពាររោគ របស់ប្រទេសអាមេរិក ក៏មិនបានណែនាំឱ្យប្រជាជនទូទៅ ពាក់ស្រោមដៃប្លាស្ទិកដែរ។

-លើកលែងតែក្នុងករណី ដែលយើងចាំបាច់ត្រូវតែពាក់ស្រោមដៃប្លាស្ទិកប៉ុណ្ណោះ ដូចជា ពេលត្រូវមើលថែទាំអ្នកដែលទទួលការវិនិច័្ឆយអាការហើយថា មានជំងឺកូវីដ-19(សម្រាប់គ្រូពេទ្យ) ពេលមានការប៉ះពាល់វត្ថុរបស់របរ សម្លៀកបំពាក់ នៅពេលបោកខោអាវ និងពេលប៉ះវត្ថុរាវក្នុងរាងកាយ ជាដើម។ល៕

ប្រភព៖ ព័ត៌មានបរទេស

March 31, 2020

New York សុំជំនួយបន្ទាន់! ព្រោះតែCOVID-19

អភិបាលរដ្ឋ New York លោក Cuomo អំពាវនាវសុំជំនួយផ្នែកសុខាភិបាលជាបន្ទាន់ ខណៈដែលចំនួនអ្នកស្លាប់ដោយសារ COVID-19 នៅទីនេះ បានកើនឡើងលើស1,200ករណី។

“សូមមេត្តាចូលមកជួយ New York ជាបន្ទាន់។ យើងបានបាត់បង់មនុស្សជាង1,000នាក់ហើយ។ ចំពោះខ្ញុំ គឺយើងបានឆ្លងមកដល់ចំណុចដែលលើសពីការគួរឱ្យខ្លាចទៅហើយ” អភិបាលរដ្ឋ New York លោក Andrew Cuomo មានប្រសាសន៍កាលពីថ្ងៃទី30មីនាកន្លងទៅ។

លោកអភិបាលរូបនេះបានឱ្យដឹងថា ចំនួនអ្នកស្លាប់ដោយសារវីរុសCOVID-19 នៅក្នុងរដ្ឋដែលលោកកាន់កាប់ គឺបានកើនជាង250នាក់បន្ថែមទៀតក្នុងរយៈពេលតែមួយថ្ងៃ ធ្វើឱ្យអ្នកស្លាប់សរុបឡើងដល់ជាង1,200នាក់។ លោក Cuomo ថ្លែងថា រដ្ឋ New York ត្រូវការបុគ្គលិកសុខាភិបាលប្រមាណជាង1លាននាក់បន្ថែមទៀត ដើម្បីដោះស្រាយបញ្ហាវិបត្តិសុខភាពនាបច្ចុប្បន្ន។ មន្ត្រីអាមេរិកាំងជាច្រើនរូបក៏បានព្រមានថា ស្ថានភាពនៅ New York នាពេលនេះ អាចជាសេណារីយ៉ោមួយដែលរដ្ឋផ្សេងៗទៀតនឹងត្រូវជួបប្រទះនាពេលដ៏ខ្លីខាងមុខ។

នៅមុនពេលអភិបាលរដ្ឋ New York បានអំពាវនាវដូចខាងលើ ក្រុមអ្នកជំនាញ រួមនឹងក្រុមវេជ្ជបណ្ឌិត និងបុគ្គលិកសុខាភិបាលជិត80,000នាក់នៅ New York បានស្ម័គ្រចិត្តចូលរួមធ្វើ “សង្គ្រាម” ប្រឆាំងនឹង COVID-19។ នាវាមន្ទីរពេទ្យ USNS Comfort ដែលមានគ្រែសម្រាប់អ្នកជំងឺចំនួន1,000គ្រែ ក៏ត្រូវបានបញ្ជូនទៅកាន់រដ្ឋនេះ កាលពីថ្ងៃទី30មីនាកន្លងទៅ ដើម្បីជួយកាត់បន្ថយស្ថានភាពលើសចំណុះរបស់បណ្ដាមន្ទីរពេទ្យក្នុងតំបន់។

នៅឯរដ្ឋ California វិញ ក្រុមមន្ត្រីក៏បានស្នើសុំដូចខាងលើនេះដែរ ដើម្បីដោះស្រាយបញ្ហា នៅពេលដែលចំនួនអ្នកជំងឺត្រូវចូលព្យាបាល បានកើនឡើងទ្វេដងក្នុងរយៈពេលត្រឹម4ថ្ងៃមកនេះ ហើយអ្នកជំងឺដែលត្រូវព្យាបាលជាពិសេស បន្ទាន់ក៏បានកើនឡើងជាង3ដងផងដែរ។

នេះគឺជាសញ្ញាបង្ហាញថា “សង្គ្រាម” ប្រឆាំងនឹង COVID-19 នឹងបន្តអូសសន្លាយពេលយូរតទៅទៀត ខណៈដែលវីរុសនេះបានរាលដាលដល់ប្រទេស និងដែនដីចំនួន200 នៅទូទាំងពិភពលោក ក្នុងនោះសហរដ្ឋអាមេរិកគឺជាសម្បុកមេរោគធំបំផុត។ ពលរដ្ឋអាមេរិកាំងប្រមាណជា235លាននាក់ ស្មើនឹង2/3នៃប្រជាជនសរុប កំពុងរស់នៅក្នុងបម្រាមគោចរ៕

ប្រភព៖ សារព័ត៌មានបរទេស

March 31, 2020

CDC ចិន និយាយថា ពលរដ្ឋ “អាមេរិក និងអឺរ៉ុប” ខុសធ្ងន់ណាស់ ដែលមិនពាក់ម៉ាស់អនាម័យការពារ…

អគ្គនាយកមជ្ឈមណ្ឌលគ្រប់គ្រង និងការពារជំងឺរបស់ប្រទេសចិន(CDC) បានថ្លែងថា ការជំរុញឱ្យប្រជាជនពាក់ម៉ាស់អនាម័យការពារ ពេលចេញទៅក្រៅផ្ទះ មានចំណែកជួយទប់ស្កាត់ការចម្លងសាយភាយរបស់មេរោគវីរុសកូរ៉ូណាប្រភេទថ្មីបានច្រើនណាស់ ហើយការដែលពលរដ្ឋនៅក្នុងប្រទេសអាមេរិក និងអឺរ៉ុប មើលរំលងវិធានការដ៏ងាយៗនេះ គឺជា “ភាពខុសឆ្គងដ៏ធ្ងន់ធ្ងរ” ដែលបានធ្វើឱ្យចំនួនអ្នកឆ្លងមេរោគនៅទីនោះ កើនឡើងយ៉ាងឆាប់រហ័ស។

សារព័ត៌មាន សៅ ឆាយណា ម៉រនីង ផូស្ត បានអះអាងពីការយល់ឃើញរបស់លោក កៅ ហ៊្វូ អគ្គនាយក CDC របស់ចិន ដែលបានផ្ដល់បទសម្ភាសជាមួយទស្សនាវដ្តី Science Magazine ថា “កំហុសឆ្គងដ៏ធ្ងន់ធ្ងររបស់ប្រទេសអាមេរិក និងអឺរ៉ុប នៅក្នុងទស្សនៈរបស់ខ្ញុំ គឺការដែលប្រជាជន មិននាំគ្នានិយមពាក់ម៉ាស់អនាម័យការពារ”។

លោក កៅ អធិប្បាយថា លម្អងទឹកតូចល្អិតៗដែលចេញពីប្រព័ន្ធដកដង្ហើមរបស់មនុស្ស និងការប៉ះពាល់ជិតស្និទ្ធ គឺជាបច្ច័យចម្បងក្នុងការចម្លងរោគ “លម្អងទឹកតូចល្អិតៗមានតួនាទីក្នុងការចម្លងមេរោគអាក្រក់ណាស់ ដូច្នេះពួកអ្នក ត្រូវពាក់ម៉ាស់អនាម័យការពារ ព្រោះពេលដែលអ្នកនិយាយ នឹងមានលម្អងទឹកតូចល្អិតៗចេញមកពីក្នុងមាត់របស់អ្នកគ្រប់ពេលវេលា”។

លោក កៅ បន្ថែមថា អ្នកខ្លះ អាចនឹងមានមេរោគវីរុសនៅក្នុងខ្លួនដោយមិនបានឈឺថ្កាត់ ឬមិនទាន់បង្ហាញអាការឈឺថ្កាត់ ដូច្នេះ ម៉ាស់អនាម័យអាចជួយការពារលម្អងទឹកតូចល្អិតៗពីមនុស្សទាំងនោះ ដែលអាចធ្វើឱ្យមេរោគអាចចម្លងទៅបុគ្គលដទៃទៀតបាន។

ទោះជាស្ថានការណ៍ការឆ្លងរាលដាលនៅក្នុងប្រទេសចិន ពេលនេះអាចនិយាយបានថា ល្អប្រសើរឡើងច្រើនហើយក្ដី តែ CDC របស់ចិន នៅតែអំពាវនាវ និងណែនាំកាលពីថ្ងៃទី22 មីនាកន្លងទៅ ឱ្យប្រជាជនត្រូវតែពាក់ម៉ាស់អនាម័យការពារបន្តទៀត មិនថានៅក្នុងអូហ្វ៊ីស ក្នុងបន្ទប់ប្រជុំ ក្នុងបន្ទប់ជណ្ដើរយន្ត ឬខណៈពេលប្រើសេវាកម្មដឹកជញ្ជូនសាធារណៈក៏ដោយ តែមិនចាំបាច់ពាក់ពេលនៅក្នុងផ្ទះ នៅក្នុងទីកន្លែងដែលធំស្រឡះៗ ឬក្នុងស្ថានភាពបរិស្ថានដែលមានខ្យល់អាកាសបក់ចេញចូលល្អ និងមិនមានមនុស្សច្រើនកុះករក៏បាន។

យ៉ាងណាក៏ដោយ ពាក្យណែនាំទាំងនេះ ហាក់ដូចជាផ្ទុយគ្នាពីការយល់ឃើញរបស់អង្គការសុខភាពពិភពលោក(WHO) ដែលបានបញ្ជាក់ថា ឱ្យមនុស្សពាក់ម៉ាស់អនាម័យការពារតែនៅពេលណាដែលមានអាការក្អក ឬកណ្ដាស់ ឬនៅពេលត្រូវនៅមើលថែទាំជិតអ្នកដែលត្រូវបានសង្ស័យថា ឆ្លងមេរោគកូវីដ-19 តែប៉ុណ្ណោះ។

ចំណែកឯក្រសួងសាធារណៈសុខាភិបាលរបស់ប្រទេសសិង្ហបុរី ក៏បានណែនាំដល់ប្រជាជនរបស់ខ្លួនដែរថា មិនចាំបាច់ត្រូវពាក់ម៉ាស់អនាម័យការពារជាប់ជានិច្ចនោះទេ លើកលែងតែ ពេលមានអាការមិនស្រួលខ្លួន មានគ្រុនក្ដៅខ្លួន ក្អក ហៀរសម្បោរ ឬទើបនឹងជាសះស្បើយពីជំងឺផ្សេងៗតែប៉ុណ្ណោះ៕

ប្រភព៖ សារព័ត៌មានបរទេស

March 31, 2020

Author: សឿន សំណាង