Author: សឿន សំណាង

121ប្រទេស ស្រែកសុំ “កូរ៉េខាងត្បូង” ឱ្យជួយចាត់ចែងរកឈុតពិនិត្យមេរោគវីរុសឱ្យផង…
កាលពីថ្ងៃទី1 ខែមេសា ម្សិលមិញ ទីភ្នាក់ងារសាររព័ត៌មានរ៉យទ័រ បានរាយការណ៍ព័ត៌មាន ដោយយោងតាមការបង្ហើបឱ្យដឹងពីមន្ត្រីក្រសួងការបរទេសនៃប្រទេសកូរ៉េខាងត្បូងដែលបានបញ្ជាក់ថា កូរ៉េខាងត្បូងបានទទួលការសំណូមពរពីប្រទេសចំនួន121 ទូទាំងពិភពលោក ឱ្យជួយចាត់ចែងរកឈុតពិនិត្យមេរោគវីរុសឱ្យប្រទេសរបស់ពួកគេទាំងនោះ ដែលម្នាក់ៗសុទ្ធតែកំពុងតស៊ូទប់ទល់យ៉ាងខ្លាំងក្លានឹងការឆ្លងរាលដាលរបស់វីរុសកូវីដ-19 និងថា កូរ៉េខាងត្បូង បានតែងតាំងគណៈកម្មការពិសេសមួយឡើង ដើម្បីពិចារណាចំពោះរឿងនេះថា តើនឹងត្រូវផ្ដល់ការជួយសង្គ្រោះយ៉ាងណា ដែលអាចជាការនាំចេញឈុតពិនិត្យមេរោគវីរុស(បែបពាណិជ្ជកម្ម) ឬក៏ផ្ដល់ការជួយសង្គ្រោះផ្នែកមនុស្សធម៌?។
យ៉ាងណាក៏ដោយ មន្ត្រីក្រសួងការបរទេសកូរ៉េខាងត្បូង មិនបានបង្ហើបឱ្យដឹងថា មានប្រទេសណាខ្លះដែលសំណូមពរសុំការជួយសង្គ្រោះនេះទេ តែក្រុមហ៊ុនផលិតឈុតពិនិត្យមេរោគវីរុសរបស់កូរ៉េខាងត្បូងជាច្រើន មានការធ្វើកិច្ចសន្យារៀបចំចាត់ចែងរកឧបករណ៍ខាងផ្នែកវេជ្ជសាស្ត្រទាំងនេះជាមួយប្រទេសអាមេរិក និងប្រទេសជាច្រើនទៀត រួមទាំងប្រទេសអ៊ីតាលីដែលកំពុងមានការឆ្លងរាលដាលយ៉ាងធ្ងន់ធ្ងររបស់វីរុសកូវីដ-19នេះរួចហើយផងដែរ។ ខណៈដែលកាលពីសប្ដាហ៍មុន លោកប្រធានាធិបតី ដូណាល់ ត្រាំ បានចេញមកសុំអង្វរឱ្យកូរ៉េខាងត្បូងជួយចាត់ចែងបញ្ជូនឧបករណ៍ខាងវេជ្ជសាស្ត្រឱ្យទៅសហរដ្ឋអាមេរិកផង ព្រមទាំងបានសន្យាថា នឹង ជួយ សម្រួល និងបើកផ្លូវឱ្យក្រុមហ៊ុនអ្នកផលិតឧបករណ៍ទាំងនោះរបស់កូរ៉េខាងត្បូង បានទទួលការអនុញ្ញាតពីអ្នកគ្រប់គ្រងច្បាប់របស់សហរដ្ឋអាមេរិកក្នុងការចាត់ចែងបញ្ជូនឧបករណ៍ខាងវេជ្ជសាស្ត្រទាំងនោះចូលទៅប្រទេសអាមេរិកទៀតផង។
ទាំងអស់នេះ ក្រុមហ៊ុនអ្នកផលិតតិចណូឡូជីសរីរាង្គរបស់កូរ៉េខាងត្បូង បានបង្កើនកម្លាំងការផលិតឧបករណ៍ខាងវេជ្ជសាស្ត្រទាំងនោះយ៉ាងពេញទំហឹង ដើម្បីធានាដល់តម្រូវការក្នុងទីផ្សារពិភពលោកដែលកំពុងហក់ឡើងខ្ពស់ក្រោយកើតមានជំងឺឆ្លងរាលដាលនេះ ដែលថែមទាំងធ្វើឱ្យតម្លៃភាគហ៊ុនរបស់បណ្ដាក្រុមហ៊ុនក្នុងផ្នែកការផលិតនេះ ស្ទុះឡើងខ្លាំងជិត 3ដង តាំងពីពេលចាប់ផ្ដើមឆ្នាំថ្មីកន្លងមកទៀតផង ខណៈដែលយុទ្ធនាការតម្រង់ទៅរកការពិនិត្យរកមេរោគវីរុសយ៉ាងទំលំទូលាយចំនួនដ៏ច្រើន និងការតាមដានស្វែងរកអ្នកប៉ះពាល់ និងទាក់ទងនឹងអ្នកឆ្លងជំងឺរបស់កូរ៉េខាងត្បូង បានក្លាយជាយុទ្ធសាស្ត្រសំខាន់ ដែលជួយឱ្យកូរ៉េខាងត្បូងអាចពន្យឺតការឆ្លង រាលដាលរបស់មេរោគមរណៈនេះនៅក្នុងប្រទេសបាន ដែលខុសពីពេលមុននេះ កូរ៉េខាងត្បូង គឺជាប្រទេសមួយដែលមានការឆ្លងរាលដាលរបស់មេរោគកូវីដ-19 ធ្ងន់ធ្ងរខ្លាំងបំផុត បន្ទាប់ពីចិន៕
ប្រភព៖ សាព័ត៌មានបរទេស
April 2, 2020
ជាង930,000នាក់បានឆ្លងវីរុសCOVID-19 នៅទូទាំងពិភពលោក
សហរដ្ឋអាមេរិក និងអឺរ៉ុប នៅតែបន្តជាចំណុចក្ដៅនៃរោគរាតត្បាតCOVID-19 នាំឱ្យតួលេខនៃអ្នកឆ្លងវីរុសនេះ កើនឡើងដល់ជាង930,000នាក់ ក្នុងនោះមានជិត47,000នាក់បានបាត់បង់ជីវិត។
ពិភពលោកមានអ្នកជំងឺរលាកសួតប្រភេទថ្មីដែលបង្កឡើងដោយវីរុសCOVID-19 ចំនួន933,688នាក់ និងអ្នកស្លាប់កើនដល់46,869នាក់នៅក្នុងប្រទេស និងដែនដីចំនួន203 ក្នុងនោះមានអ្នកឆ្លងមេរោគថ្មី79,076នាក់ និងអ្នកស្លាប់4,825នាក់បន្ថែមទៀត ក្នុងរយៈពេលត្រឹមតែ24ម៉ោងចុងក្រោយនេះ។
សហរដ្ឋអាមេរិក៖ អ្នកឆ្លងវីរុសសរុប213,372នាក់ និងអ្នកស្លាប់សរុប4,757នាក់។ ប្រទេសនេះបន្តជាសម្បុកមេរោគCOVID-19 ធំជាងគេក្នុងពិភពលោក។
ប្រទេសអ៊ីតាលី៖ អ្នកឆ្លងវីរុសថ្មី 4,782នាក់ និងអ្នកស្លាប់ថ្មី 727នាក់។ អ្នកជំងឺសរុប110,574នាក់ និងអ្នកស្លាប់សរុប13,155នាក់។
អេស្ប៉ាញ៖ អ្នកទើបបានឆ្លងមេរោគថ្មីៗ 8,195នាក់ និងអ្នកទើបស្លាប់ 923នាក់។ អ្នកបានឆ្លងមេរោគសរុប104,118នាក់ និងអ្នកស្លាប់សរុប9,387នាក់។ ប្រទេសនេះបានក្លាយជាសម្បុកមេរោគធំបំផុតលំដាប់ទី3ក្នុងពិភពលោក។
អាល្លឺម៉ង់៖ អ្នកឆ្លងមេរោគថ្មី6,173នាក់ និងអ្នកស្លាប់ថ្មី156នាក់។ អ្នកបានឆ្លងមេរោគសរុប77,981នាក់ និងអ្នកស្លាប់សរុប931នាក់។ ប្រទេសនេះ ជាសម្បុកមេរោគធំបំផុតទី3នៅអឺរ៉ុប បន្ទាប់ពីអ៊ីតាលី និងអេស្ប៉ាញ។
អង់គ្លេស៖ អ្នកទើបតែឆ្លងមេរោគ មានចំនួន4,324នាក់ និងអ្នកទើបតែបានស្លាប់ 563នាក់។ អ្នកជំងឺសរុប29,474នាក់ និងអ្នកស្លាប់សរុប2,352នាក់។
ប្រទេសអ៊ីរង់៖ ប្រទេសនេះនៅតែជាសម្បុកមេរោគធំទី2នៅក្នុងទ្វីបអាស៊ី បន្ទាប់ពីប្រទេសចិន ដោយមានអ្នកជំងឺសរុប47,593នាក់ និងអ្នកស្លាប់សរុប3,036នាក់ បន្ទាប់ពីបានរកឃើញអ្នកផ្ទុកមេរោគថ្មីចំនួន2,988ករណី និងអ្នកស្លាប់ថ្មី138ករណី។
ប្រទេសចិន និងកូរ៉េខាងត្បូង៖ ប្រទេសទាំង2នេះ មិនទាន់ប្រកាសអំពីតួលេខថ្មីនៅឡើយ ប៉ុន្តែបើតាមទិន្នន័យចុងក្រោយបង្ហាញថា ប្រទេសចិន មានអ្នកឆ្លងមេរោគសរុប82,361នាក់ ក្នុងនោះមានអ្នកស្លាប់សរុប 3,316នាក់។ ចំណែកកូរ៉េខាងត្បូងវិញ មានអ្នកជំងឺសរុប 9,976នាក់ និងអ្នកស្លាប់សរុប169នាក់។
អាស៊ីអាគ្នេយ៍៖ ម៉ាឡេស៊ីជាសម្បុកមេរោគធំបំផុតក្នុងតំបន់នេះ ដោយមានអ្នកជំងឺ2,908នាក់ និងអ្នកស្លាប់45នាក់។ រីឯប្រទេសឥណ្ឌូនេស៊ី ដែលជា “វាលពិឃាត” របស់ COVID-19 ធំជាងគេក្នុងតំបន់ មានអ្នកស្លាប់157នាក់ ក្នុងចំណោមអ្នកជំងឺសរុប1,677នាក់។ អត្រានៃការស្លាប់ដោយសារវីរុសCOVID-19 នៅប្រទេសនេះ គឺប្រមាណជាជិត9.4%៕
ប្រភព៖ សារព័ត៌មានបរទេស
April 2, 2020
COVID-19! អ្នកលក់ឆ្នោតនៅវៀតណាមនឹងទទួលបានប្រាក់ឧបត្ថម្ភ 50,000ដុងក្នុង1ថ្ងៃ សម្រាប់រយៈពេល15ថ្ងៃ
អ្នកលក់ឆ្នោតប្រមាណជា8,000នាក់នឹងទទួលបានប្រាក់ឧបត្ថម្ភចំនួន 50,000ដុង (2.14ដុល្លារ)/ថ្ងៃ ទៅតាមសំណើរបស់មន្ទីរការងារ-យុទ្ធជនពិការ និងសង្គមកិច្ច។
ការផ្ដល់ជំនួយនេះ មានរយៈពេល15ថ្ងៃ រាប់ចាប់ពីថ្ងៃទី1មេសា។ ប្រាក់ជំនួយដែលបានមកពីមូលនិធិដើម្បីអ្នកក្រទីក្រុង និងស្រុកខណ្ឌនេះ មានទំហំឡើងដល់ជិត6ពាន់លានដុង (257,000ដុល្លារអាមេរិក)។
ប្រការខាងលើនេះ ត្រូវបានធ្វើឡើងទៅតាមការស្នើរបស់គណៈកម្មធិការទីក្រុងហូជីមិញ បន្ទាប់ពីក្រុមហ៊ុនឆ្នោតនានាបានផ្អាកដំណើរការបណ្ដោះអាសន្ន ដោយសារតែវីរុសCOVID-19។
កិច្ចប្រជុំរបស់គណៈកម្មធិការប្រជាជននៃទីក្រុងហូជីមិញកាលពីថ្ងៃទី27មីនា បានអនុម័តទៅលើខ្ទង់ប្រាក់ឧបត្ថម្ភជាង2,750ពាន់លានដុង (118,193,000ដុល្លារអាមេរិក) ដើម្បីទប់ស្កាត់ COVID-19 ក្នុងនោះ ខ្ទង់ប្រាក់ប្រមាណជា1,800ពាន់លានដុង (77,356,000ដុល្លារ) សម្រាប់ជួយដល់ពលរដ្ឋជួបការលំបាកដោយសារ COVID-19 ដោយម្នាក់ៗនឹងទទួលបាន1លានដុង (43ដុល្លារ) /ខែ រួមមាន៖ គ្រូបង្រៀន បុគ្គលិកសិក្សាកម្រិតមត្តេយ្យឯកជន។ ទីក្រុងហូជីមិញក៏មានគម្រោងជួយដល់ជនអនាថា និងអ្នកទីទាល់ក្រផងដែរ។
បច្ចុប្បន្ន ទីក្រុងសៃហ្គន (ហូជីមិញ) បានរកឃើញអ្នកផ្ទុកមេរោគCOVID-19 ចំនួន50នាក់ និងជាង9,000នាក់កំពុងត្រូវបានដាក់ឱ្យនៅដោយឡែកតាមតំបន់ និងជិត1,800នាក់ត្រូវបង្ខាំងខ្លួននៅក្នុងផ្ទះ។
នៅក្នុងថ្ងៃនេះ (1មេសា) នាយករដ្ឋមន្ត្រីវៀតណាម Nguyen Xuan Phuc ក៏បានចុះហត្ថលេខាលើសេចក្ដីសម្រេចក្នុងការប្រកាសបញ្ជាក់ថាវីរុសCOVID-19 រាតត្បាតទូទាំងប្រទេសជាផ្លូវការផងដែរ បន្ទាប់ពីបានចេញបទបញ្ជាដាក់បម្រាមគោចរនៅគ្រប់ខេត្តក្រុង៕
ប្រភព៖ សារព័ត៌មានបរទេស
April 1, 2020
ប្រយ័ត្ន!! ពេទ្យប្រាប់ថា អ្នកកណ្ដាស់ខ្លាំងៗ អាចធ្វើឱ្យមេរោគវីរុសកូវីដ-19 ហោះទៅឆ្ងាយបាន 8.2ម៉ែត្រ
វេបសាយ ដេលី មែល បានរាយការណ៍នៅថ្ងៃទី1 ខែមេសាថា លោកវេជ្ជបណ្ឌិត អ៊ែនថូនី ហ្វូស៊ី ប្រធានក្រុមការងារផ្នែកការឆ្លងរាលដាលរបស់មេរោគវីរុសកូវីដ-19 របស់សហរដ្ឋអាមេរិក បានចេញមកថ្លែងការណ៍អំពីលទ្ធផលនៃការវិភាគរបស់ស្ថាប័នតិចណូឡូជី ម៉ាសាឈូសិតស៍ ឬ MIT ដោយបានបញ្ជាក់អំពីលទ្ធផលនៃការស្រាវជ្រាវវិភាគថ្មីៗដែលបានរកឃើញថា ការកណ្ដាស់យ៉ាងខ្លាំងក្លា អាចធ្វើឱ្យលម្អងទឹកតូចៗល្អិតៗ(មើលមិនឃើញដោយភ្នែកទទេ)ដែលអាចមានមេរោគវីរុសកូវីដ-19 ជាប់មកជាមួយ អាចអណ្ដែតទៅឆ្ងាយបានដល់ទៅ 27ហ៊្វុត ឬប្រមាណជា 8.2ម៉ែត្រ ដែលលទ្ធផលនៃការរកឃើញនេះ ហុចផលឱ្យការណែនាំក្នុងការរក្សាគម្លាតចម្ងាយខាងសង្គម 6ហ៊្វុត ឬប្រមាណជា 2ម៉ែត្រ នាពេលបច្ចុប្បន្ននេះ អាចនឹងមិនគ្រប់គ្រាន់។
លោក ហ្វូស៊ី បានបញ្ជាក់ថា ការស្រាវជ្រាវវិភាគមួយនេះ គឺជាការសាកល្បងការចម្លងរាលដាលរបស់ទឹកមាត់ ក្នុងករណីកណ្ដាស់យ៉ាងខ្លាំង មិនមែនសាយភាយតាមរយៈការនិយាយ ឬក្អក ឬការកណ្ដាស់ធម្មតានោះទេ តែនោះវាមានន័យថា បើសិនប្រទះឃើញអ្នកណាដែលកណ្ដាស់ខ្លាំងៗ ចូរប្រញាប់ថយចេញឱ្យឆ្ងាយពីទីកន្លែងនោះភ្លាមៗតែម្ដង ឬព្យាយាមស្ថិតនៅឱ្យឆ្ងាយពីចំណុចនោះប្រមាណ 8ម៉ែត្រ។
ទាំងអស់នេះ លទ្ធផលនៃការស្រាវជ្រាវវិភាគរបស់ MIT បានរកឃើញថា ការកណ្ដាស់ខ្លាំងៗ បូកជាមួយខ្យល់ដែលកើតឡើង បានហុចផលឱ្យលម្អងទឹកតូចៗល្អិតៗ(មើលមិនឃើញដោយភ្នែកទទេ)អណ្ដែតទៅកាន់តែឆ្ងាយឡើង ខណៈដែលភាពសើម ក៏ហុចផលឱ្យលម្អងទឹកតូចៗល្អិតៗអណ្ដែតនៅក្នុងអាកាសបានកាន់តែយូរឡើងដូចគ្នា៕
ប្រភព៖ សារព័ត៌មានបរទេស
April 1, 2020
វៀតណាម៖ ពលករអត់ការងារធ្វើដោយសារ COVID-19 នឹងទទួលបាន1.8លានដុងក្នុង1ខែ ខណៈអគ្គិសនីនឹងត្រូវបញ្ចុះតម្លៃ10ភាគរយ…
ដើម្បីជួយសម្រួលការលំបាកដែលកើតឡើងដោយសារវិបត្តិសុខភាព COVID-19 គ្រួសារនីមួយៗនឹងអាចទទួលបានការបញ្ចុះតម្លៃ10% ទៅលើតម្លៃអគ្គិសនីក្នុងរយៈពេល3ខែ។ នេះបើតាមសំណើរបស់ក្រសួងឧស្សាហកម្ម និងពាណិជ្ជកម្មសៀតណាម។
នៅក្នុងកិច្ចប្រជុំរបស់រដ្ឋាភិបាលថ្ងៃនេះ (1មេសា) ក្រសួងឧស្សាហកម្ម និងពាណិជ្ជកម្មរៀតណាម បានដាក់សំណើទៅនាយករដ្ឋមន្ត្រីដើម្បីសុំការអនុញ្ញាតបញ្ចុះតម្លៃអគ្គិសនី សម្រាប់ជួយសម្រួលដល់ជីវភាពប្រជាជន និងក្រុមហ៊ុនដែលកំពុងរកស៊ីនៅប្រទេសនេះ។
ថ្លែងប្រាប់សារព័ត៌មានក្នុងស្រុក លោក Nguyen Anh Tuan ប្រធាននាយកដ្ឋានគ្រប់គ្រងអគ្គិសនីរបស់ក្រសួងឧស្សាហកម្ម និងពាណិជ្ជកម្ម បានឱ្យដឹងថា អ្នកប្រើប្រាស់អគ្គិសនីចាប់ពីកម្រិតទី1 ដល់កម្រិតទី4 នឹងទទួលបានការបញ្ចុះតម្លៃ10% ក្នុងរយៈពេល3ខែ។
ក្រសួងខាងលើក៏បានធ្វើសំណើឱ្យរក្សាតម្លៃដដែលចំពោះគ្រួសារដែលប្រើប្រាស់អគ្គិសនីចាប់ពី300kWh ឡើងទៅ ព្រោះថា “អតិថិជនដែលប្រើអគ្គិសនីកម្រិតនេះ គឺជាគ្រួសារដែលមានចំណូលខ្ពស់ មិនសូវរងផលប៉ះពាល់ពីវិបត្តិសុខភាព COVID-19។
ក្រសួងឧស្សាហកម្ម និងពាណិជ្ជកម្មវៀតណាម ក៏បានស្នើឱ្យរដ្ឋាភិបាលបញ្ចុះតម្លៃអគ្គិសនីសម្រាប់ក្រុមហ៊ុន និងរោងចក្រផងដែរ។ ជាក់ស្ដែង តម្លៃអគ្គិសនីសម្រាប់ក្រុមហ៊ុន និងរោងចក្រ ក៏នឹងទទួលបានការបញ្ចុះតម្លៃ10% ចាប់ពីខែមេសាដល់ខែមិថុនា។
បច្ចុប្បន្ន វៀតណាមមានអ្នកប្រើប្រាស់អគ្គិសនីប្រមាណជា28លានគ្រួសារ។ ទំហំទឹកប្រាក់នៃការបញ្ចេុះតម្លៃខាងលើ គឺជិតស្មើនឹង 1.1លានលានដុង (47,399,000ដុល្លារអាមេរិក)។
នាយករដ្ឋមន្ត្រីវៀតណាម លោក Nguyen Xuan Phuc
គិតមកដល់បច្ចុប្បន្ន រដ្ឋាភិបាលវៀតណាម បានចាត់វិធានការទៅលើគោលនយោបាយឥណទាន និងពន្ធសម្រាប់ជួយដល់បណ្ដាក្រុមហ៊ុន។ ទន្ទឹមនឹងកញ្ចប់ឥណទាន 250លានលានដុង (10,772,670,000ដុល្លារ) ធនាគារជាច្រើនក៏កំពុងអនុវត្តវិធានការដើម្បីជួយសម្រួលដល់កូនបំណុលរបស់ពួកគេផងដែរ។ ក្រសួងហិរញ្ញវត្ថុក៏កំពុងតែណែនាំការអនុវត្តលើកញ្ចប់ថវិកា 80.2លានលានដុង (3,455,874,000ដុល្លារអាមេរិក) ដើម្បីជួយក្នុងការពន្យារពេលនៃការបង់ពន្ធទៀតផង។
កាលពីថ្ងៃទី31មីនា នាយករដ្ឋមន្ត្រីវៀតណាម លោក Nguyen Xuan Phuc ក៏បានឱ្យដឹងថា នឹងមានកញ្ចប់ថវិកា 30លានលានដុង(1,292,720,000ដុល្លារអាមេរិក) ដើម្បីធានាសុខុមាលភាពសង្គម សម្រាប់ពលរដ្ឋដែលទទួលរងផលប៉ះពាល់ពី COVID-19។ កម្មករ កម្មការិនីដែលត្រូវបានឱ្យផ្អាកពីការងារបណ្ដោះអាសន្នដោយសារ COVID-19 នឹងទទួលបានខ្ទង់ថវិកាជំនួយ1.8លានដុង (77ដុល្លារ) ក្នុង1ខែ។ សម្រាប់ពលរដ្ឋក្រីក្រនឹងទទួលបានជំនួយ1លានដុង (43ដុល្លារ)។ អ្នកមានគុណចំពោះរដ្ឋនឹងទទួលបាន500,000ដុង (21ដុល្លារ) រៀងរាល់ខែ។ អាជីវកម្មលក្ខណៈគ្រួសារដែលត្រូវផ្អាកដំណើរការ និងចួបការលំបាកខ្លាំងដោយសារ COVID-19 នឹងទទួលបានជំនួយ1លានដុង (43ដុល្លារ)រៀងរាល់ខែ៕
ប្រភព៖ VNEXPRESS
April 1, 2020
ព័ត៌មាន Update តាមជាប់ស្ថានការណ៍ COVID-19 ជុំវិញពិភពលោក
ព័ត៌មាន Update ស្ថានការណ៍មេរោគកូវីដ-19 ជុំវិញពិភពលោកថ្ងៃនេះ…
អូស្ត្រាលី ចាប់ផ្ដើមលេងធម៌ក្ដៅជាមួយពួកបំពានវិធានការ “បិទទីក្រុង”
AFP/ នៅក្នុងប្រទេសអូស្ត្រាលី អាជ្ញាធរបានចាប់ផ្ដើមប្រើការដាក់ទណ្ឌកម្មខ្លាំងៗ ចំពោះអ្នកដែលល្មើសច្បាប់កំណត់ការដើរហើរ ដើម្បីទប់ស្កាត់មេរោគវីរុសកូវីដ-19 ដោយនៅរដ្ឋនីវសៅវេលស៍ អាជ្ញាធរកំពុងដាក់ទោសដោយការពិន័យប្រាក់ខ្ពស់បំផុតចំនួន 11,000ដុល្លារអូស្ត្រាលី និងដាក់ពន្ធនាគាររយៈយូរដល់ទៅ 6ខែ សម្រាប់អ្នកដែលចេញពីផ្ទះដោយ “គ្មានការបញ្ជាក់ដែលសមហេតុសមផល” ឬទៅផ្ដុំគ្នាជាក្រុមលើសពី 2នាក់។
របាយការណ៍បានបញ្ជាក់ថា មានអ្នកប្រព្រឹត្តល្មើសយ៉ាងតិចជាង 10នាក់ហើយដែលត្រូវរងការពិន័យខាងលើ ក្នុងចំនួននេះ មានអ្នកខ្លះ ជាអ្នកដែលមិនព្រមបំបែកខ្លួនឯងនៅដាច់ដោយឡែកតាមការកំណត់ ឬមិនព្រមឱ្យបង្ខាំងការពារជំងឺតាមរយៈពេលដែលបានកំណត់។
***មជ្ឈមណ្ឌលគ្រប់គ្រង និងការពាររោគនៃប្រទេសកូរ៉េខាងត្បូង(KCDC) បានរាយការណ៍អំពីចំនួនអ្នកឆ្លងមេរោគកូវីដ-19ថ្មី រួមទាំងអស់ 125នាក់កាលពីថ្ងៃទី31 មីនា ធ្វើឱ្យចំនួនអ្នកឆ្លងមេរោគទូទាំងប្រទេស ស្ថិតលើតួលេខ 9,786នាក់ ស្លាប់ 162នាក់ ដោយតួលេខនៃចំនួនអ្នកឆ្លងមេរោគប្រចាំថ្ងៃនៅក្នុងប្រទេសនេះ នៅតែទាប ឬខ្ពស់ជាង100 មិនច្រើនប៉ុន្មានឡើយ ពេញមួយរយៈពេល 3សប្ដាហ៍កន្លងមកនេះ។
រដ្ឋាភិបាលកូរ៉េខាងត្បូង បានបញ្ជាក់កាលពីថ្ងៃម្សិលមិញ(ទី31មីនា)ថា សាលារៀនទូទាំងប្រទេស នឹងចាប់ផ្ដើមបើកការបង្រៀន និងរៀនអនឡាញចាប់ពីសប្ដាហ៍ក្រោយតទៅ ហើយនឹងពន្យារពេលការប្រឡងចូលមហាវិទ្យាល័យ រហូតទៅដល់ខែវិច្ឆិកា ដោយសារនៅតែរកឃើញមានការឆ្លងរាលដាលរបស់មេរោគវីរុសមរណៈនេះនៅក្នុងចំណោមក្រុមមនុស្សចំនួនតិចៗនៅឡើយ។
***ទីក្រុងមិកស៊ិកូ បានប្រកាសសភាវអាសន្នផ្នែកសាធារណៈសុខាភិបាលកាលពីថ្ងៃចន្ទ(ទី30មីនា)កន្លងទៅ ព្រមទាំងកំណត់ប្រើវិធានការគ្រប់គ្រងតឹងរ៉ឹង ដើម្បីទប់ស្កាត់ការឆ្លងរាលដាលរបស់មេរោគវីរុសកូរ៉ូណាប្រភេទថ្មីនេះ ក្រោយពីចំនួនអ្នកឆ្លងមេរោគនេះបានហក់ឡើងដល់លើស 1ពាន់នាក់ និងមានអ្នកស្លាប់កើនឡើងយ៉ាងឆាប់រហ័ស។
អាជ្ញាធរមិកស៊ិកូ បានរាយការណ៍ថា តួលេខអ្នកជំងឺទូទាំងប្រទេសបានកើនឡើងដល់ 1,094នាក់ ពី 993នាក់ កាលពី1ថ្ងៃមុន និងមានអ្នកស្លាប់ក្នុង 1ថ្ងៃដល់ទៅ 8នាក់ រួមទាំងអស់ 28នាក់ ដែលបើសិនជាគ្មានវិធានការគ្រប់គ្រងដែលល្អត្រឹមត្រូវទេនោះ អាចនឹងធ្វើឱ្យប្រព័ន្ធសាធារណៈសុខាភិបាលលែងអាចទ្រាំទ្របានមិនខាន។
ទាំងអស់នេះ រដ្ឋាភិបាលនៃប្រទេសមិកស៊ិក បានចេញច្បាប់ហាមការជួបជុំគ្នានៅក្នុងទីសាធារណៈលើសពី 50នាក់ និងពង្រីកពេលវេលាផ្អាកកិច្ចការងារផ្សេងៗដែលមិនចាំបាច់ទៀតផង។
***អ្នកទោសក្នុងគុកនៃប្រទេសអ៊ីរ៉ង់ បានបង្កចលាចលដោយសារភ័យខ្លាចមេរោគកូវីដ-19 និងចំនួនអ្នកស្លាប់ដោយសារមេរោគនេះនៅថ្ងៃអង្គារ(ទី31មីនា)មានចំនួន 2,757នាក់ ឆ្លងមេរោគសរុប 41,495នាក់។
អ្នកទោសនៅក្នុងពន្ធនាគារភាគខាងត្បូងរបស់ប្រទេសអ៊ីរ៉ង់ កាលពីថ្ងទី30 មីនា បានបង្កចលាចលឡើងនៅខាងក្នុងពន្ធនាគារ ដោយអភិបាលខេត្តFars លោក អ៊ីណាយ៉ាតុលឡោះ រ៉ាហ៊ីមី(Enayatollah Rahimi) បានថ្លែងថា ការតវ៉ាបានកើតឡើងនៅក្នុងអំឡុងពេលព្រឹកថ្ងៃអាទិត្យ(ទី29មីនា) នៅឯពន្ធនាគារ Adel Abad ក្នុងទីក្រុង Shiraz។
លោក រ៉ាហ៊ីមី បានថ្លែងថា អ្នកទោសបានបំផ្លាញកាមេរ៉ាទូរទស្សន៍សុវត្ថិភាព និងធ្វើឱ្យមានការខូចខាតយ៉ាងច្រើននៅក្នុងដែនឃុំឃាំងទី2 ប៉ុន្តែមិនមានរបាយការណ៍ពីការរត់គេច ឬរងរបួសកើតមានឡើយ។ ទាំងអស់នេះ កាលពីមុនថ្ងៃសុក្រ(ទី27មីនា) មានអ្នកទោសចំនួនប្រមាណជា 70នាក់ បានរត់គេចខ្លួនចេញពីពន្ធនាគារ Saqqez ក្នុងខេត្តឃើឌិស្ថាន។
***ប្រទេសរុស្ស៊ី មើលឃើញតួលេខការឆ្លងមេរោគកើនឡើងខ្ពស់ជាថ្ងៃទី7 ជាប់ៗគ្នា
សារព័ត៌មាន ដឹ ហ្គាដៀន បានរាយការណ៍ថា ប្រទេសរុស្ស៊ីមានចំនួនអ្នកឆ្លងមេរោគកូវីដ-19 ថ្មី កើនឡើង 500នាក់ បណ្ដាលឱ្យចំនួនអ្នកឆ្លងមេរោគនេះសរុបចុងក្រោយបំផុត 2,337នាក់កាលពីថ្ងៃអង្គារ(ទី31មីនា)ម្សិលមិញ ដែលនេះអាចនិយាយបានថា ជាចំនួនបន្ថែមករណីថ្មីច្រើនបំផុត រយៈពេល 7ថ្ងៃជាប់ៗគ្នា។
នៅក្នុងទីក្រុងមូស្គូ មានអ្នកឆ្លងមេរោគកំណាចនេះ18នាក់បានស្លាប់ ខណៈដែល 121នាក់បានជាសះស្បើយ។
***ប្រធានាធិបតីនៃប្រទេសឥណ្ឌូនេស៊ី ប្រកាសសភាវគ្រាអាសន្នកូវីដ-19 តែមិនទាន់ “បិទប្រទេស” នៅឡើយ
AFP/ លោក ចូខូ វីដូដូ ប្រធានាធិបតីនៃប្រទេសឥណ្ឌូនេស៊ី កាលពីថ្ងៃអង្គារ(ទី31មីនា) បានប្រកាសស្ថានការណ៍គ្រាអាសន្ន ក្រោយពីចំនួនអ្នកស្លាប់ដោយសារវីរុសកូរ៉ូណាប្រភេទថ្មី ឬកូវីដ-19 ក្នុងប្រទេសដែលមានប្រជាជនច្រើនបំផុតលំដាប់ទី4 មួយនេះ បានហក់ឡើងខ្ពស់ជាថ្មីម្ដងទៀត តែនៅជំទាស់នឹងសំឡេងទាមទារឱ្យបិទប្រទេស។
រដ្ឋបាលរបស់លោក វីដូដូ បានរងការរិះគន់យ៉ាងធ្ងន់ធ្ងរចំពោះករណីដែលមិនទាន់សម្រេចចិត្តបិទការចូល-ចេញទីក្រុងធំៗនានា ក្នុងនោះរួមទាំងទីក្រុងចាការតា ទីក្រុងដែលមានប្រជាជនប្រមាណជា 30លាននាក់ផងដែរ ខណៈដែលអ្នកស្លាប់ដោយសារមេរោគមរណៈកូវីដ-19នៅក្នុងប្រទេស ភាគច្រើន គឺស្ថិតនៅក្នុងទីក្រុងមួយនេះ។
មេដឹកនាំឥណ្ឌូនេស៊ី បានផ្ដល់សេចក្ដីលម្អិតនៅក្នុងសេចក្ដីប្រកាសស្ថានការណ៍គ្រាអាសន្នត្រឹមតែបន្តិចបន្តួចប៉ុណ្ណោះ បន្ថែមពីលើការអំពាវនាវឱ្យប្រជាជនអនុវត្តយ៉ាងម៉ឺងម៉ាត់ជាមួយវិធានការរក្សាគម្លាតចម្ងាយខាងសង្គម តែខណៈពេលជាមួយគ្នា ក៏បានប្រកាសចំណាយថវិកា 1,500លានដុល្លារ លើកកម្ពស់ការជួយសង្គ្រោះផ្នែកសង្គម និងគាំទ្រពលករដែលមានប្រាក់ចំណូលទាប។
កាលពីថ្ងៃអង្គារ(ទី31មីនា) អាជ្ញាធរបានបង្ហើបឱ្យដឹងថា មានអ្នកស្លាប់ដោយសារមេរោគកូវីដ-19 កើនឡើងថែមទៀត 14នាក់ សរុប 136នាក់ ចំណែកចំនួនសរុបនៃអ្នកឆ្លងមេរោគបានកើនឡើងដល់ 1,528នាក់ តែគេបានប៉ាន់ស្មានថា ចំនួនអ្នកឆ្លងមេរោគផ្លូវការនេះ ប្រហែលជាទាបការពិតច្រើនណាស់នៅក្នុងប្រទេសបណ្ដុំកោះ ដែលមានប្រជាជនច្រើនជាង 260លាននាក់មួយនេះ៕
ប្រភព៖ សារព័ត៌មានបរទេស

April 1, 2020
ចុំ?!? មន្ទីរពេទ្យជាច្រើននៅអាមេរិក គំរាមដេញគ្រូពេទ្យចេញ ឈប់ឱ្យធ្វើការ និងហាមនិយាយរឿងផ្ទៃក្នុងមន្ទីរពេទ្យ
មន្ទីរពេទ្យជាច្រើនកន្លែងនៅក្នុងប្រទេសអាមេរិក បានគំរាមដេញមន្ត្រីផ្នែកសាធារណៈសុខាភិបាលណា ដែលហ៊ានចេញមករិះគន់យ៉ាងបើកចំហ អំពីស្ថានភាពក្នុងកន្លែងធ្វើការ ក្នុងអំឡុងពេលវិបត្តិនៃការឆ្លងរាតត្បាតរបស់មេរោគវីរុសកូរ៉ូណាប្រភេទថ្មី(កូវីដ-19) និងមានអ្នកខ្លះត្រូវបានបណ្ដេញចេញពីការងាររួចរាល់ហើយទៀតផង។ នេះបើតាមរបាយការណ៍របស់សារព័ត៌មាន ប្ល៊ូមប៊ើក។
មិង លីន គ្រូពេទ្យប្រចាំបន្ទប់សង្គ្រោះបន្ទាន់ក្នុងទីក្រុងវ៉ាស៊ីនតោន បានបង្ហើបឱ្យដឹងកាលពីថ្ងៃសុក្រ សប្ដាហ៍មុនថា រូបគេត្រូវអស់ការងារធ្វើ ក្រោយពីបានទៅផ្ដល់បទសម្ភាសដល់សារព័ត៌មានមួយច្បាប់ ពាក់ព័ន្ធនឹងព័ត៌មានដែលរូបគេបានផូស្តនៅលើហ្វេសប៊ុកកាលពីពេលមុននោះ ដោយគេបានសរសេរបង្ហាញពីគំនិតយោបល់នៅលើបណ្ដាញសង្គមអនឡាញ ណែនាំមិត្តរួមការងារថា ការពាក់ម៉ាស់អនាម័យការពារតែម្យ៉ាង មិនគ្រប់គ្រាន់ទេសម្រាប់ការការពារមេរោគកូវីដ-19។
នៅក្នុងទីក្រុងស៊ីកាហ្គោ គិលានុបដ្ឋាកម្នាក់ ក៏ត្រូវបានបណ្ដេញចេញពីការងារដូចគ្នាដែរ បន្ទាប់ពីនាងបានសរសេរអ៊ីមែលផ្ញើទៅមិត្តភក្តិ ដោយរអ៊ូថា ត្រូវការម៉ាស់អនាម័យការពារមេរោគច្រើនជាងនេះក្នុងអំឡុងពេលប្រតិបត្តិតួនាទី។ ចំណែកឯនៅទីក្រុងនីវយ៉កវិញ មណ្ឌលព្យាបាល NYU Langone Health បានចេញសេចក្ដីប្រកាស ព្រមានដល់គ្រូពេទ្យ និងក្រុមគិលានុបដ្ឋាកដែលជានិយោជិតថា ពួកគេនឹងត្រូវបណ្ដេញចេញពីការងារ បើសិនជាទៅផ្ដល់សម្ភាសជាមួយសារព័ត៌មានណាមួយដោយគ្មានការអនុញ្ញាត។
អ្នកស្រី រូត ឈូប៊ែត អ្នកនាំពាក្យ នៃសមាគមគិលានុបដ្ឋាកនៃទីក្រុងនីវយ៉ក បានឱ្យដឹងថា “មន្ទីរពេទ្យទាំងឡាយ កំពុងរិះរកវិធីហាមប្រាមបណ្ដាគិលានុបដ្ឋាក និងមន្ត្រីសាធារណៈសុខាភិបាលដទៃទៀត ដើម្បីព្យាយាមការពារកេរ្តិ៍ឈ្មោះរបស់ខ្លួន វាគួរឱ្យឈឺចាប់ណាស់” អ្នកស្រីនិយាយថា “ជាធម្មតា មន្ទីរពេទ្យនានា តែងតែប្រកាន់ខ្ជាប់ក្បួនច្បាប់ប្រតិបត្តិផ្នែកទំនាក់ទំនងមហាជនយ៉ាងតឹងរ៉ឹង ដើម្បីការពារសិទ្ធិបុគ្គលរបស់អ្នកជំងឺ ដោយទាមទារឱ្យមន្ត្រីនិយាយជាមួយសារព័ត៌មានតាមរយៈអង្គភាពទំនាក់ទំនងព័ត៌មានតែប៉ុណ្ណោះ តែក្នុងអំឡុងពេលវិបត្តិរោគរាតត្បាតដ៏សាហាវនេះ វាបាននាំមកនូវយុគសម័យមួយដែលប្រែប្រួលខុសពីមុន”។
អ្នកស្រីបន្តថា៖ “មន្ត្រីសាធារណៈសុខាភិបាល ត្រូវតែបានទទួលឱកាសក្នុងការប្រកាសប្រាប់ទៅសាធារណជន ឱ្យបានដឹងថា មានអ្វីកើតឡើងខ្លះ នៅក្នុងមណ្ឌលព្យាបាលដែលកំពុងមើលថែទាំអ្នកជំងឺកូវីដ-19”។
គ្រូពេទ្យ និងគិលានុបដ្ឋាកដែលជានិយោជិតរបស់មណ្ឌលព្យាបាល NYU Langone Health បានទទួលការឱ្យដំណឹងពី លោក ខេធី លូអ៊ីស អនុប្រធានគ្រប់គ្រងផ្នែកព័ត៌មានថា អ្នកណាក៏ដោយដែលនិយាយជាមួយសារព័ត៌មានដោយមិនមានការអនុញ្ញាត នឹងត្រូវទទួលទោសខាងវិន័យ ក្នុងនោះមានទាំងការបណ្ដេញចេញពីការងារផងដែរ។
លោក ជីមម៉ានឡឺរ៍ អ្នកនាំពាក្យរបស់ NYU Langone Health បានប្រាប់ថា គោលការណ៍នេះ គឺដើម្បីការពាររឿងសម្ងាត់របស់អ្នកជំងឺ និងបុគ្គលិក(គ្រូពេទ្យ និងគិលានុបដ្ឋាក) “ព្រោះថា ព័ត៌មានទាំងឡាយ វាអាចប្រែប្រួលជារឿយៗ វាជាផលប្រយោជន៍ខ្ពស់បំផុតរបស់បុគ្គលិក និងស្ថាប័នរបស់យើង និងជាពិសេសអ្នកដែលមានព័ត៌មានអាប់ឌែតថ្មីៗ នឹងបានទទួលការអនុញ្ញាតឱ្យនិយាយពីប្រធានបទទាំងនោះជាមួយអ្នកយកព័ត៌មាន”។
អ្នកស្រី ឡូរី ម៉ាស៊ូខៀវិស ជាគិលានុបដ្ឋាក និងជាអ្នកទីក្រុងស៊ីកាហ្គោ ត្រូវបានបណ្ដេញចេញពីមន្ទីរពេទ្យ Northwestern Memorial Hospital ក្រោយពីអ្នកស្រីទាមទារឱ្យមិត្តរួមការងារស្លៀកឈុតការពារឱ្យបានច្រើនជាន់ ជាងពេលបច្ចុប្បន្ន ហើយពេលនេះ អ្នកស្រីកំពុងដាក់ពាក្យប្ដឹងមន្ទីរពេទ្យខាងលើ ពីបទបណ្ដេញឈប់ដោយមិនត្រឹមត្រូវ។ អ្នកស្រីបាននិយាយថា “មន្ទីរពេទ្យជាច្រើន កំពុងប្រាប់បុគ្គលិករបស់ពួកគេថា ត្រឹមតែម៉ាស់អនាម័យការពារមួយ វាគ្រប់គ្រាន់ហើយ ហើយមកដល់ពេលនេះ មានគ្រូពេទ្យ និងគិលានុបដ្ឋាកជាច្រើន កំពុងធ្លាក់ខ្លួនឈឺ ពួកគេកំពុងតែជិតស្លាប់”។
អ្នកស្រី ម៉ាស៊ូខៀវីស វ័យ 40ឆ្នាំ ត្រូមើលថែឪពុកដែលកំពុងធ្លាក់ខ្លួនឈឺ ដោយជំងឺខាងផ្លូវដង្ហើម និងស្ថិតក្នុងវ័យ 75ឆ្នាំ ឪពុករបស់អ្នកស្រី ស្ថិតក្នុងក្រុមមនុស្សដែលមានភាពប្រថុយប្រថានបំផុតពីការឆ្លងរាតត្បាតរបស់មេរោគកូវីដ-19៕
ប្រភព៖ សារព័ត៌មានបរទេស
April 1, 2020
តម្លៃប្រេងសាំងនៅកម្ពុជានឹងធ្លាក់មកនៅត្រឹមជាង2,000រៀលក្នុង1លីត្រ ចាប់ពីថ្ងៃនេះ
នៅក្នុងថ្ងៃនេះ (ទី1មេសា) ឆ្នាំ2020 ក្រសួងពាណជិ្ជកម្មបានចេញសេចក្ដីប្រកាសមួយស្ដីអំពីតម្លៃប្រេងសាំងនៅតាមបណ្ដាស្ថានីយលក់ប្រេងក្នុងប្រទេសកម្ពុជា។
សេចក្ដីប្រកាសនេះ គឺយោងទៅតាមប្រកាសរបស់អន្តរក្រសួង រួមនឹងយោងទៅលើការព្រមព្រៀងលើរូបមន្តកំណត់តម្លៃប្រេងជាមួយបណ្ដាក្រុមហ៊ុនប្រេងឥន្ទនៈនៅកម្ពុជា និងយោងទៅការប្រែប្រួលនៃតម្លៃប្រេងលើទីផ្សារក្នុងតំបន់ និងអន្តរជាតិ។
ដើម្បីបានជ្រាបច្បាស់ សូមអានសេចក្ដីជូនដំណឹងរបស់ក្រសួងពាណិជ្ជកម្ម ដូចខាងក្រោម៖
April 1, 2020
សើច! អំឡុងវិបត្តិសុខភាព COVID-19 បើសិនជាចង់ចេញទៅក្រៅ ត្រូវតែមានគំនិតច្នៃប្រឌិតបែបនេះ(វីដេអូ)
វីដេអូឃ្លិបកំប្លែងខាងក្រោមនេះ កំពុងតែធ្វើឱ្យមានចំណាប់អារម្មណ៍ច្រើននៅលើបណ្ដាញសង្គម ដោយវាបានទាក់ទាញមនុស្សចូលមើលរាប់លានដង។
ឃ្លិបវីដេអូនេះត្រូវបានថតដោយប្ដី-ប្រពន្ធមួយគូដែលជាអ្នកជិតខាងរបស់បុរសក្នុងវីដេអូ។ ប្ដីប្រពន្ធ1គូ គឺ Nicholas Murray និង Madeline Mai-Davies ថតបានសកម្មភាពនេះ នៅឯទីរួមស្រុក Stevenage ក្នុងតំបន់ Hertfordshire នៃប្រទេសអង់គ្លេស។
ឃ្លីបវីដេអូននេះបានបង្ហាញអំពីសកម្មភាពរបស់បុរសម្នាក់ដែលបន្លំខ្លួនជារុក្ខជាតិ ដើម្បីអាចចេញទៅក្រៅទិញរបស់របរចាំបាច់។ ប៉ុន្តែ ប្រហែលជាមិនចង់ជួបអ្នកណាម្នាក់ គាត់ក៏សម្រេចចិត្តតុបតែងខ្លួនបែបនេះ។
ក៏ប៉ុន្តែ យោងទៅលើសកម្មភាពរបស់គាត់ ហាក់ដូចជាបង្កប់ភាពកំប្លែង និងបញ្ហាដែលគាត់ រួមនឹងអ្នកជិតខាងក៏ដូចជាមនុស្សទូទៅកំពុងចួបប្រទះនៅក្នុងវបត្តិសុខភាព COVID-19នេះ។ វីដេអូនេះ ត្រូវបានគេចាប់អារម្មណ៍ច្រើននៅលើបណ្ដាញសង្គម TikTok។
https://www.youtube.com/watch?v=glYAQRDzUxI
ប្រភព៖ Daily Mail/Youtube
April 1, 2020
COVID-19! ពិធីកររបស់ CNN និងជាប្អូនប្រុសរបស់អភិបាលរដ្ឋ New York បានឆ្លងវីរុសបង្ករលាកសួត
Chris Cuomo ជាពិធីករម្នាក់របស់ស្ថានីយទូរទស្សន៍ CNN និងជាប្អូនប្រុសរបស់អភិបាលរដ្ឋ New York លោក Andrew Cuomo បានទទួលលទ្ធផលវិជ្ជមានជាមួយនឹងវីរុសCOVID-19។
“Chris Cuomo អាយុ49ឆ្នាំ មានសុខភាពល្អខ្លាំងណស់” នេះបើតាមសាររបស់ CNN ដែលបានផ្ញើទៅកាន់បុគ្គលិកទាំងអស់របស់ខ្លួន បន្ទាប់ពីពិធីករម្នាក់នេះបានឆ្លងវីរុសCOVID-19។
Chris ដែលបានចូលធ្វើការនៅ CNN តាំងពីឆ្នាំ2013 គឺជាប្អូនប្រុសរបស់អភិបាលរដ្ឋ New York នៃសហរដ្ឋអាមេរិក និងជាកូនប្រុសពៅរបស់លោក Mario Cuomo ដែលជាអតីតអភិបាលរដ្ឋ New York។ គិតមកដល់បច្ចុប្បន្ន Chris គឺជាបុគ្គលិកទី3របស់ CNN នៅ New York វិជ្ជមានជាមួយនឹងCOVID-19។
“ខ្ញុំបាននៅក្បែរមនុស្សជាច្រើនក្នុងរយៈពេលប៉ុន្មានថ្ងៃចុងក្រោយនេះ ដែលក្រោយមក អ្នកទាំងនោះត្រូវបានធ្វើតេស្តរកឃើញថាមានផ្ទុក COVID-19។ ខ្ញុំក្ដៅខ្លួន ស្រៀវស្រាញ និងពិបាកដកដង្ហើម”។ លោក Chris សរសេរបែបនេះនៅលើទំព័រ Twitter កាលពីថ្ងៃទី31មីនា។
អភិបាលរដ្ឋ New York លោក Andrew Cuomo
COVID-19 បានបង្ហាញខ្លួននៅក្នុងប្រទេស និងដែនដីចំនួន200 នៅទូទាំងពិភពលោក បណ្ដាលឱ្យមនុស្សជាង 857,800នាក់បានឆ្លងវីរុសនេះ ក្នុងនោះមានជាង42,000នាក់បានបាត់បង់ជីវិត។ សហរដ្ឋអាមេរិក គឺជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកជំងឺសរុបជាង189,500នាក់ ក្នុងនោះមាន4,076នាក់បានស្លាប់។ រដ្ឋ New York គឺជាតំបន់ដែលរងគ្រោះធ្ងន់ធ្ងរបំផុតដោយសារវិបត្តិសុខភាពនេះ៕
ប្រភព៖ សារព័ត៌មានបរទេស
April 1, 2020