សឿន សំណាង - La Reine Media

មហាសេដ្ឋី10រូបដែលមានវ័យនៅក្មេងបំផុតក្នុងពិភពលោក

នៅក្នុងបញ្ជីឈ្មោះស្ដីអំពីមហាសេដ្ឋីដែលទស្សនាវដ្ដី Forbes របស់សហរដ្ឋអាមេរិកទើបតែបានចេញផ្សាយនាពេលថ្មីៗនេះ បានឱ្យដឹងថា មហាសេដ្ឋីវ័យក្មេងចំនួន10រូបដែលមានអាយុចាប់ពី30ឆ្នាំចុះក្រោម កាន់កាប់ទ្រព្យសម្បត្តិសរុប 16ពាន់លានដុល្លារអាមេរិក។

1.Kylie Jenner

-វ័យ៖ 22ឆ្នាំ
-ទ្រព្យសរុប៖ 1ពាន់លានដុល្លារអាមេរិក
-ប្រភពចំណូល៖ គ្រឿងសម្អាង
-Kylie Jenner គឺជាមហាសេដ្ឋិនីដែលមានវ័យនៅក្មេងបំផុតក្នុងពិភពលោក។ កាលពីខែវិច្ឆិកា2019 នាងបានចុះកិច្ចព្រមព្រៀងលក់ភាគហ៊ុន51% របស់ក្រុមហ៊ុន Kylie Cosmetics ដែលខ្លួនបានបង្កើត ទៅឱ្យក្រុមហ៊ុន Coty ក្នុងតម្លៃ600លានដុល្លារអាមេរិក។

2.Alexandra Andresen

-វ័យ៖ 23ឆ្នាំ
-ទ្រព្យសរុប៖៖ 1.1 ពាន់លានដុល្លារ
-ប្រភពចំណូល៖ ក្រុមហ៊ុនវិនិយោគ
-នាង និងបងស្រី Katharina របស់នាងទទួលបានមរតកជាភាគហ៊ុនចំនួន84% របស់ Ferd ដែលជាក្រុមហ៊ុនវិនិយោគរបស់ឪពុក (លោក Johan Andresen) របស់ពួកនាង។

3.Katharina Andresen

-វ័យ៖ 24ឆ្នាំ
-ទ្រព្យសរុប៖ 1.1ពាន់លានដុល្លារ
-ប្រភពចំណូល៖ ក្រុមហ៊ុនវិនិយោគ
-នាង Katharina Andresen កើតឆ្នាំ1995 និងជាបងស្រីបង្កើតរបស់នាង Alexandra Andresen។

4.លោក Gustav Magnar Witzoe

-វ័យ៖ 26ឆ្នាំ
-ទ្រព្យសរុប៖ 2.6ពាន់លានដុល្លារ
-ប្រភពចំណូល៖ វារីវប្បកម្ម(ចិញ្ចឹមសត្វ និងដាំដុះរុក្ខជាតិនៅក្នុង/លើទឹក)
-លោក Gustav Magnar Witzoe កាន់កាប់ជិតពាក់កណ្ដាលនៃ Salmar ដែលជាក្រុមហ៊ុនផ្គត់ផ្គង់ត្រីសាល្មុង(Salmon)ធំបំផុតមួយនៅក្នុងពិភពលោក។ បច្ចុប្បន្ន គាត់គឺជាតារាបង្ហាញម៉ូដ អ្នកវិនិយោគវិស័យបច្ចេកវិទ្យា និងអចលនទ្រព្យ។

5.នាង Elisabeth Furtwaengler

-វ័យ៖ 28ឆ្នាំ
-ទ្រព្យសរុប៖ 1.2ពាន់លានដុល្លារ
-ប្រភពចំណូល៖ ផលិតកម្ម
-នាង Furtwaenger និងបងប្អូន Jacob របស់នាង បានទទួលភាគហ៊ុនពីឪពុករបស់ពួកគេ ម្នាក់ៗចំនួន37% នៃក្រុមហ៊ុនផ្សព្វផ្សាយអាល្លឺម៉ង់ Hubert Burda Media។

6.Jonathan Kwok

-វ័យ៖ 28ឆ្នាំ
-ទ្រព្យសរុប៖ 2ពាន់លានដុល្លារ
-ប្រភពចំណូល៖ អចលនទ្រព្យ
-ឆ្នាំ2018 Kwok និងបងប្រុស Geoffrey ទទួលបានភាគហ៊ុនពីឪពុក (ឈ្មោះ Walter Kwok ដែលបានស្លាប់ទៅ) នៅក្នុងក្រុមហ៊ុន Sun Hung Kai Properties (SHKP) ដែលជាក្រុមហ៊ុនអចលនទ្រព្យធំបំផុតនៅទីក្រុងហុងកុង។

7.John Collison

-វ័យ៖ 29ឆ្នាំ
-ទ្រព្យសរុប៖ 3,2ពាន់លានដុល្លារ
-ប្រភពចំណូល៖ ក្រុមហ៊ុនទូទាត់ប្រាក់ Stripe

8.Evan Spiegel

-វ័យ៖ 29ឆ្នាំ
-ទ្រព្យសរុប៖ 1.9ពាន់លានដុល្លារ
-ប្រភពចំណូល៖ បណ្ដាញសង្គម Snapchat

9.Pedro De Godoy Bueno

-វ័យ៖ 29ឆ្នាំ
-ទ្រព្យសរុប៖ 1.1ពាន់លានដុល្លារ
-ប្រភពចំណូល៖ សេវារោគវិនិច្ឆ័យ និងមន្ទីរពិសោធន៍ Diagnósticos da América

10. Lisa Draexlmaier

-វ័យ៖ 29ឆ្នាំ
-ទ្រព្យសរុប៖ 1ពាន់លានដុល្លារ
-ប្រភពចំណូល៖ គ្រឿងបន្លាស់រថយន្ត
-Lisa (រូបទី2 ពីឆ្វេងមកស្ដាំ) និងឪពុករបស់នាង គឺលោក Fritz Draexlmaier (រូបខាងស្ដាំបង្អស់) គឺជាសហនាយកប្រតិបត្តិរបស់ក្រុមហ៊ុនអាល្លឺម៉ង់ Fritz Draexlmaier Holdings៕

ប្រភព៖ សារព័ត៌មានបរទេស

April 9, 2020

អ្នកស្រាវជ្រាវប្រាប់ថា រត់ និងធាក់កង់ហាត់ប្រាណ ក្នុងអំឡុងពេលនេះ ប្រថុយនឹងការប៉ះល្អងទឹកមាត់ និងសម្បោរដែលមានវីរុស និងណែនាំគម្លាតឆ្ងាយពីគ្នាបន្ថែមទៀត

វេបសាយ មីឌៀម បានរាយការណ៍កាលពីថ្ងៃទី8 មេសាកន្លងទៅថា ការងារស្រាវជ្រាវរបស់មហាវិទ្យាល័យ KU Leuven ក្នុងប្រទេសបែលហ្ស៊ិក និងមហាវិទ្យាល័យ TU Eindhoven ក្នុងប្រទេសហូល្លង់ បានធ្វើគំរូបែបចម្លងរបស់មនុស្សហាត់ប្រាណ និងបានរកឃើញថា ការរត់ ឬការធាក់កង់ហាត់ប្រាណនៅក្នុងទីសាធារណៈតាមៗគ្នាទៅនោះ នឹងប្រថុយប្រថានក្នុងការប៉ះនឹងល្អងទឹកមាត់ និងសម្បោរ ច្រើនជាងការឈរនៅស្ងៀម និងបានណែនាំថា ការរត់តាមពីក្រោយគ្នា គួររក្សាគម្លាតចម្ងាយពីគ្នា 4-5ម៉ែត្រ និងបើសិនជាធាក់កង់ គួស្ថិតនៅឆ្ងាយៗពីគ្នា 10 ទៅ 20ម៉ែត្រ។

ការងារស្រាវជ្រាវនេះ បានធ្វើគំរូបែបចម្លង ការរត់ហាត់ប្រាណបន្តកន្ទុយគ្នានោះ បានរកឃើញថា បើអ្នកដែលរត់នៅខាងមុខ ក្អក ឬកណ្ដាស់ នឹងបណ្ដាលឱ្យល្អងទឹកមាត់ និងសម្បោរ ខ្ទាតខ្ចាយជាក្រុម ហុចផលឱ្យអ្នកដែលរត់តាមមកពីក្រោយ ប្រថុយប្រថានក្នុងការបានទទួលមេរោគវីរុសដែលមាននៅក្នុងល្អងទឹកមាត់ និងសម្បោរទាំងនោះបាន។ ដោយគំរូបែបចម្លងនោះ ជារូបភាព 3D បង្ហាញឱ្យឃើញល្អងទឹកមាត់ និងសម្បោរដែលអាចខ្ទាតខ្ចាយពីអ្នករត់នៅខាងមុខ និងអ្នករត់តាមពីក្រោយ អាចត្រូវប៉ះពាល់ល្អងទឹកទាំងនោះដោយមិនបានដឹងខ្លួន រួមទាំងអាចខ្ទាតមកប្រឡាក់ខោអាវ ក្លាយជាការប្រថុយប្រថានក្នុងការចម្លងតៗគ្នាបានទៀតផង។

ដូច្នេះ ក្រុមអ្នកស្រាវជ្រាវ បានបញ្ជាក់ថា ការរក្សាគម្លាតឆ្ងាយពីគ្នា 1-2ម៉ែត្រ តាមការណែនាំទូទៅនោះ អាចនឹងមិនអាចប្រើការបានទេ សម្រាប់អ្នកដែលរត់ ឬធាក់កង់ហាត់ប្រាណដែលមានការធ្វើចលនាទៅមុខដោយល្បឿន លឿន ដូច្នេះគួររក្សាគម្លាតឆ្ងាយពីគ្នាចម្ងាយ 4-5ម៉ែត្រ សម្រាប់អ្នករត់តាមៗគ្នាជាជួរ ចំណែកឯការធាក់កង់ យឺតៗតាមៗគ្នាវិញ ក៏គួរតែរក្សាគម្លាតឆ្ងាយពីគ្នា 10ម៉ែត្រ ចំណែកការធាក់កង់ហាត់ប្រាណតាមពីក្រោយគ្នាដោយល្បឿនលឿនៗ គួររក្សាគម្លាតឆ្ងាយពីគ្នាយ៉ាងតិច 20ម៉ែត្រ៕

ប្រភព៖ សារព័ត៌មានបរទេស

April 9, 2020

អង្គការ Oxfam ព្យាករថា វីរុសកូវីដ-19 នឹងធ្វើឱ្យពិភពលោកនេះមាន “អ្នកក្រ” កើនឡើងជាង 500លាននាក់

អង្គការ Oxfam បានបង្ហើបឱ្យដឹងថា វីរុសកូរ៉ូណាប្រភេទថ្មី ដែលបានបំផ្លាញសេដ្ឋកិច្ចពិភពលោក និងលេបត្របាក់ជីវិតមនុស្សរួចហើយអស់ជិត 90,000នាក់នេះ អាចនឹងធ្វើឱ្យប្រជាជនលើពិភពលោកដាំក្បាលចុះឆ្ពោះទៅរកភាពទ័លក្រ ថែមឡើងដល់ទៅ 500លាននាក់។ នេះបើតាមការរាយការណ៍របស់ទីភ្នាក់ងារព័ត៌មានរ៉យទ័រ។

Oxfam បានផ្សព្វផ្សាយរបាយការណ៍ថ្មីមួយនៅថ្ងៃនេះ(ទី9មេសា) មុននឹងមានការប្រជុំប្រចាំឆ្នាំរបស់អង្គការូបិយប័ណ្ណអន្តរជាតិ(IMF) និងធនាគារពិភពលោក(World Bank) ក្នុងសប្ដាហ៍នេះ ដោយនឹងសិក្សាអំពីផលប៉ះពាល់ដោយសារវិបត្តិវីរុសកូរ៉ូណាប្រភេទថ្មី ឬកូវីដ-19 ដែលមានចំពោះបញ្ហាភាពទីទ័លក្រទូទាំងពិភពលោក ដោយ្សារតែគ្រប់ក្រុមគ្រួសារមានប្រាក់ចំណូល និងការបរិភោគដែលថយចុះ។

របាយការណ៍បញ្ជាក់ថា “វិបត្តិសេដ្ឋកិច្ចដែលកំពុងកើតឡើង អាចនិយាយបានថា ដុនដាបខ្លាំងជាងវិបត្តិហិរញ្ញវត្ថុពិភពលោកកាលពីឆ្នាំ2008 ទៅទៀត”

“តាមរយៈការវាយតម្លៃ បានរកឃើញថា មិនថាស្ថានការណ៍នឹងទៅជាយ៉ាងណានោះទេ តែកម្រិតនៃភាពទីទ័លក្រទូទាំងពិភពលោក នឹងហក់ខ្ពស់ឡើងជាលើកដំបូង ចាប់តាំងពីឆ្នាំ1990មក”

Oxfam ប៉ាន់ប្រមាណថា ការរាតត្បាតរបស់មេរោគវីរុស នឹងធ្វើឱ្យប្រទេសខ្លះកាន់តែមានឋានៈទ័លក្រឡើង រហូតប្រៀបធៀបបាននឹងអំឡុងកាលពី 3ទសវត្សរ៍មុន។

គណៈក្រុមអ្នកវិភាគ បានយោងលើខ្សែបន្ទាត់ភាពទីទ័លក្រ(Poverty lines) ច្រើនកម្រិតតាមនិយមន័យរបស់ធនាគារពិភពលោក ដែលគ្របដណ្ដប់លើអ្នកដែលមានប្រាក់ចំណូលទាបជាង 1.90ដុល្លារអាមេរិកក្នុង 1ថ្ងៃ ឡើងរហូតដល់ទាបជាង 5.50ដុល្លារអាមេរិកក្នុង 1ថ្ងៃ។

ទាំងអស់នេះ បើសិនជាប្រាក់ចំណូលថយចុះ 20% ដែលជាទិដ្ឋភាពកម្រិតអាក្រក់បំផុតនោះ ចំនួនប្រជាជនដែលទីទ័លក្រផុតកំពូល(Extreme poverty) នឹងកើនឡើង 434លាននាក់ សរុប 922លាននាក់ទូទាំងពិភពលោក និងស្ថិតក្រោមលក្ខខណ្ឌដូចគ្នានេះដែរ នឹងមានប្រជាជនដែលមានប្រាក់ចំណូលទាបជាង 5.50 ដុល្លារអាមេរិកក្នុង 1ថ្ងៃ កើនឡើង 548លាននាក់ សរុបទាំងអស់ប៊ិះៗនឹង 4,000លាននាក់។

ស្ត្រី នឹងមានភាពប្រថុយប្រថានខ្លាំងជាងបុរស ដោយសារតែស្ត្រី ច្រើនតែប្រកបអាជីពបែបមិនផ្លូវការ ដែលធ្វើឱ្យពួកគេចូលទៅដល់សិទ្ធិពលករបានត្រឹមតែបន្តិចបន្តួច ឬអាចនឹងមិនមានតែម្ដង។

ធនាគារពិភពលោក បានព្រមានកាលពីសប្ដាហ៍កន្លងទៅថា ភូមិភាគអាស៊ីខាងកើត និងប៉ាស៊ីហ្វ៊ិក នឹងមានអ្នកក្រ កើនឡើងដល់ទៅ 11លាននាក់ បើស្ថានការណ៍វីរុសកូវីដ-19 ធ្លាក់ចុះដុនដាបជាងពេលបច្ចុប្បន្ន។

ដើម្បីសម្រាលផលប៉ះពាល់ពីវីរុសនេះ Oxfam បានលើកឡើងនូវផែនការប្រតិបត្តិការ 6ចំណុច ដែលរួមទាំងការចែកលុយសុទ្ធ ឬប្រាក់ឧបត្ថម្ភដល់ពលរដ្ឋ និងផ្នែកធុរកិច្ចឯកជនដែលមានភាពលំបាកលំបិន ការលុបចោលបំណុល ការគាំទ្រពីអៃអឹមអេហ្វ និងការលើកកម្ពស់ការជួយសង្គ្រោះផ្សេងៗ។ ក្រៅពីនេះ Oxfam នៅបានស្នើឱ្យមានការចាត់ប្រមូលពន្ធភាស៊ីពីទ្រព្យសម្បត្តិ ផលកម្រៃពិសេស និងទំនិញខាងហិរញ្ញវត្ថុបែបកេងកម្រៃ (Speculative finance products) ដើម្បីប្រមូលប្រាក់ទុនដែលចាំបាច់ផងដេរ។

Oxfam ក៏បានបញ្ជាក់ទៀតដែរថា រដ្ឋបាលទូទាំងពិភពលោកចាំបាច់ត្រូវតែប្រមូលប្រាក់ទុនយ៉ាងហោចណាស់ 2.5លានលានដុល្លារអាមេរិក ដើម្បីគាំទ្រប្រទេសកំពុងអភិវឌ្ឍន៍ ឱ្យអាចប្រយុទ្ធតស៊ូនឹងមេរោគវីរុសនេះបាន៕

ប្រភព៖ សារព័ត៌មានបរទេស

April 9, 2020

“ម៉ៃក៍ ថៃសាន់” រំឭករឿងចាស់ ធ្លាប់ចំណាយលុយ សុំវាយជាមួយ “ហ្គូរីឡា”

ម៉ៃ ថៃសាន់ អ្នកប្រយុទ្ធលើសង្វៀនដ៏ល្បីល្បាញ អតីតជើងឯកប្រដាល់ពិភពលោកទម្ងន់ធ្ងន់ បានបង្ហើបឱ្យដឹងថា ខ្លួនធ្លាប់ចំណាយលុយទៅឱ្យបុគ្គលិកសួនសត្វ ដើម្បីសុំវាយ 1ទល់1 ជាមួយ ហ្គូរីឡា។

ក្នុងអំឡុងពេលនៃការឆ្លងរាលដាលរបស់មេរោគវីរុសកូវីដ-19 នេះ ថៃសាន់ អតីតម្ចាស់តំណែងជើងឯកប្រដាល់ពិភពលោកទម្ងន់ធ្ងន់ ដែលកាលនោះនៅមានអាយុតិចបំផុតក្នុងឆ្នាំ1986 មានឱកាសបានបង្ហើបប្រាប់អ្នកយកព័ត៌មាន អំពីអំឡុងពេលដ៏រុងរឿងរបស់ខ្លួនកាលពីអតីតកាល រួមទាំងឡៃហ្វ៍ស្តាយ៍ដ៏ទាក់ទាញដែលគ្មាននរណាដូចទៀតផង។

ដោយក្នុងអំឡុងឆ្នាំ1980 ជាអំឡុងពេលដែល “ពេជ្ឈឃាតខ្មៅ” រុងរឿងផុតកំពូលក្នុងពិភពកីឡាប្រដាល់សកលនោះ បាននិយាយថា គេធ្លាប់ព្យាយាមចំណាយប្រាក់សូកបុគ្គលិកសួនសត្វ ដើម្បីឱ្យរូបគេបានផ្លោះរបងចូលទៅដាល់ជាមួយនឹង សត្វហ្គូរីឡាខ្នង-ស ដែលល្បីថា ជាសត្វគីងកុងព្រៃភ្នំកំពូលអ្នកប្រយុទ្ធ។

អតីតជើងឯកប្រដាល់ពិភពលោក វ័យ 53ឆ្នាំ បានរំឭកអតីតកាលថា “ខ្ញុំបានស្នើចាយលុយឱ្យទៅបុគ្គលិកសួនសត្វនៅទីក្រុងនីវយ៉ក ដើម្បីបើកទ្វារឱ្យខ្ញុំ ជាមួយរ៉ូប៊ីន(អតីតភរិយា) ចូលទៅខាងក្នុងពេលយើងដើរមកដល់ទ្រុងហ្គូរីឡា ដែលមានអាខ្នង-ស មាឌធំមួយនៅខាងក្នុង ដែលមើលទៅដូចជាកំពុងធ្វើបាបគ្នាវា ពួកវាមើលទៅដូចជាមានកម្លាំងខ្លាំងណាស់ តែកែវភ្នែកហាក់ដូចជាស្លូត…”

“ខ្ញុំស្នើលុយ 10,000ដុល្លារ ឱ្យគេបើកទ្រុង ហើយទុកឱ្យខ្ញុំដាល់ច្រមុះអាខ្នង-ស 1ក្បាលនោះ តែបុគ្គលិកម្នាក់នោះបដិសេធ”

ទាំងអស់នេះ ម៉ៃក៍ ថៃសាន់ អាចហៅបានថា ជាអ្នកស្រឡាញ់សត្វចិញ្ចឹមខ្លាំងណាស់ ព្រោះនៅឯផ្ទះរបស់គេ គេចិញ្ចឹមសត្វព្រាបជាង 1,000ក្បាល រួមទាំងសត្វខ្លាបេងហ្គូល 2ក្បាលទៀតផង នៅក្នុងភូមិគ្រឹះដ៏ធំមួយនៅក្នុងទីក្រុងឡាស់ វេហ្គាស់ កាលពីចុងឆ្នាំកន្លងទៅ៕

ប្រភព៖ សារព័ត៌មានបរទេស

April 9, 2020

រកឃើញស្រទាប់ជាតិស្ករដែល COVID-19 ប្រើដើម្បី “បំបាំងកាយ” ពីប្រព័ន្ធការពាររាងកាយមនុស្ស

ស្រទាប់ម៉ូលេគុលស្ករ glycan ជាប់នៅលើប្រូតេអ៊ីនរាងបន្លារបស់COVID-19 ធ្វើឱ្យវីរុសនេះក្លាយជា “ចចកពាក់ស្បែកចៀម” ដែលអាចជ្រែកចូលក្នុងរាងកាយមនុស្សដោយមិនឱ្យប្រព័ន្ធការពាររាងកាយដឹងបាន។

ក្រុមអ្នកវិទ្យាសាស្ត្រនៅសាកលវិទ្យាល័យ Southampton ប្រទេសអង់គ្លេស បានបង្កើតគំរូ 3Dនៅលើកុំព្យូទ័រ ហើយពួកគេក៏បានរកឃើញវិធីដែល COVID-19 “បន្លំខ្លួន” ដើម្បីបំបាំងកាយពីប្រព័ន្ធការពាររាងកាយមនុស្ស។ សាស្ត្រាចារ្យ Max Crispin ប្រធានក្រុមអ្នកស្រាវជ្រាវបានឱ្យដឹងថា មានបន្លាជាច្រើនលូតចេញមកក្រៅដើម្បីតោង និងវាយប្រហារទៅលើកោសិកា។ នេះគឺជាការរកឃើញដំបូងដែលបញ្ជាក់ថា បន្លារបស់វីរុសCOVID-19 ត្រូវបានគ្របដណ្ដប់ដោយម៉ូលេគុលស្ករ1ស្រទាប់ដែលមានឈ្មោះថា glycan ដែលជួយបិទបាំងប្រូតេអ៊ីរបស់វីរុសCOVID នៅពេលពួកវារុលចូលក្នុងរាងកាយ។ សាស្ត្រាចារ្យ Crispin រួមនឹងសហការីរបស់គាត់ បានប្រកាសលទ្ធផលនៃការសិក្សាស្រាវជ្រាវនេះ នៅលើទស្សនាវដ្ដី bioRxivv កាលពីថ្ងៃទី28មីនា និងកំពុងរង់ចាំការពិនិត្យទទួលស្គាល់ពីគណៈកម្មការជំនាញ។

“ដោយវិធីប្រើប្រាស់ស្រទាប់ម៉ូលេគុលស្ករមកគ្របដណ្ដប់ វីរុសប្រភេទនេះ ត្រូវបានប្រៀបប្រដូចទៅនឹងចចកពាក់ស្បែកចៀមយ៉ាងដូច្នោះដែរ។ ប៉ុន្តែ ការរកឃើញដ៏សំខាន់ក្នុងការសិក្សាស្រាវជ្រាវរបស់យើង នោះគឺសមត្ថភាពនៃការលាក់ខ្លួនរបស់វីរុសCOVID-19 មិនមានកម្រិតខ្ពស់ដូចបណ្ដាវីរុសប្រភេទផ្សេង” នេះបើតាមសាស្ត្រាចារ្យ Crispin។

គំរូ 3D បង្ហាញអំពីប្រូតេអ៊ីនរាងបន្លារបស់វីរុសCOVID-19។ រូបភាពរបស់សាកលវិទ្យាល័យ Southampton។

សាស្ត្រាចារ្យ Crispin បានបកស្រាយថា វីរុសHIV នៅពេលបានចូលដល់ក្នុងរាងកាយ វានឹងនៅគ្រប់កន្លែងក្នុងរាងកាយរបស់អ្នកជំងឺ ហើយវាតែងលាក់ខ្លួនពីប្រព័ន្ធការពាររាងកាយ និងមានស្រទាប់ជាតិស្ករ glycan យ៉ាងក្រាស់ដែលមានតួនាទីដូចទៅនឹងខែលការពារការវាយប្រហារពីប្រព័ន្ធការពាររាងកាយរបស់មនុស្ស។ ប៉ុន្តែ ក្នុងករណី COVID-19វិញ វីរុសនេះមានលទ្ធភាពលាក់ខ្លួនខ្សោយជាងវីរុសHIV។ ស្រទាប់ម៉ូលេគុលស្ករដែលគ្របដណ្ដប់លើ COVID-19 បង្ហាញថា នេះគឺជាប្រភេទវីរុសដែលមានជំនាញក្នុងការ “វាយប្រហារ រួចហើយគេចខ្លួន”។ ក៏ប៉ុន្តែ ស្រទាប់ម៉ូលេគុលជាតិស្ករ glycan ដែលមានកម្រិតស្ដើងបែបនេះ គឺមានន័យថា ប្រព័ន្ធការពាររាងកាយមនុស្សក៏ត្រូវប្រឈមនឹងឧបសគ្គតិចតួចក្នុងការកម្ចាត់វីរុសដោយប្រើអង្គបដិបក្ខ។ នេះគឺជាសញ្ញាគួរឱ្យត្រេកអរមួយសម្រាប់ការអភិវឌ្ឍន៍វ៉ាក់សាំង។

សាស្ត្រាចារ្យ Crispin និងសហការី បានធ្វើការសិក្សាស្រាវជ្រាវដោយប្រើឧបករណ៍ពិសេសដែលមានការរួមចំណែកពីមូលនិធិ Bill and Melinda Gates តាមរយៈគម្រោងជំនួយអន្តរជាតិ Collaboration for AIDS Vaccine Discovery៕

ប្រភព៖ Independent

April 9, 2020

ប្រធាន WHO ៖ “សូមមេត្តាកុំយកមេរោគវីរុសមកលេងល្បែងនយោបាយ តែបើអ្នកត្រូវការឃើញក្ដារមឈូសដាក់សាកសពជាច្រើនទៀត ក៏សូមអញ្ជើញ…”

លោក ថេដ្រូស អ៊ែដហាណូម កេប្រេយេស៊ុស ប្រធានអង្គការសុខភាពពិភពលោក កាលពីថ្ងៃពុធ(ទី8មេសា) បានសំណូមពរឱ្យបណ្ដាមេដឹកនាំលើពិភពលោកបញ្ឈប់ការលេងនយោបាយក្រោមវិបត្តិជំងឺឆ្លងរាតត្បាតដ៏ធំ កូវីដ-19 ក្រោយពីអង្គការលំដាប់ពិភពលោកមួយនេះ ត្រូវរងការរិះគន់យ៉ាងធ្ងន់ធ្ងរពីលោកប្រធានាធិបតី ដូណាល់ ត្រាំ នៃសហរដ្ឋអាមេរិក។

ក្រៅពីនេះ ប្រធានអង្គការសុខភាពពិភពលោក ថែមទាំងបានជំរុញឱ្យសហរដ្ឋអាមេរិក និងចិន រួមកម្លាំងគ្នាក្នុងការប្រយុទ្ធតស៊ូនឹងមេរោគកំណាចនេះ ជំនួសឱ្យការគិតតែពីស្ដីបន្ទោស និងចោទប្រកាន់គ្នាទៅវិញទៅមកនោះ។

ការឆ្លើយតបរបស់លោក ថេដ្រូស បានកើតឡើង ក្រោយពីលោកប្រធានាធិបតី ត្រាំ រិះគន់អង្គភាពផ្នែកសាធារណៈសុខាភិបាលរបស់អង្គការសហប្រជាជាតិមួយនេះ ដោយបានចោទថា ទទួលប្រាក់ពីសហរដ្ឋអាមេរិក តែទៅកាន់ជើងចិន ជាតំបន់ដែលមេរោគកូវីដ-19 ចាប់កំណើតឡើងកាលពីខែធ្នូឆ្នាំទៅ។

លោកត្រាំ បានសរសេរនៅក្នុងធ្វីតធើរថា “អង្គការសុខភាពពិភពលោក បានធ្វើខុសយ៉ាងធ្ងន់ធ្ងរសម្រាប់ហេតុផលមួយចំនួន…បានទទួលប្រាក់គាំទ្រមួយផ្នែកធំពីអាមេរិក តែទៅផ្ដល់ភាពសំខាន់ចំពោះចិនខ្លាំងជ្រុលពេក” លោកបានសរសេរបន្តថា “សំណាងល្អដែរ ដែលខ្ញុំបានបដិសេធការណែនាំរបស់ពួកគេ ដែលប្រាប់ថា ឱ្យបើកព្រំដែនស្វាគមន៍ចិនក្នុងអំឡុងពេលដំបូងៗ…តើហេតុអី បានពួកគេផ្ដល់ការណែនាំដែលខុសឆ្គងដល់ពួកយើង?”

ក្នុងរឿងនេះ លោក ថេដ្រូស បានថ្លែងការពារ វិធីការខាងការគ្រប់គ្រងចាត់ការរោគរាតត្បាតដ៏ធំរបស់អង្គការសុខភាពពិភពលោក ក្នុងខណៈដែលវីរុសកូវីដ-19 បានសម្លាប់ជីវិតមនុស្សរួចហើយ អស់ច្រើនជាង 80,000នាក់ និងមានអ្នកឆ្លងមេរោគមួយនេះយ៉ាងតិច 1លាន 4សែននាក់នេះថា៖

“សហរដ្ឋអាមេរិក និងចិន គួរតែបែរមុខមករកគ្នា និងប្រយុទ្ធតស៊ូនឹងសត្រូវដ៏គ្រោះថ្នាក់នេះ។ ប្រធានបទចម្បងដែលគ្រប់គ្នាត្រូវផ្ដល់ភាពសំខាន់ គឺការការពារជីវិតមនុស្ស…សូមមេត្តាកុំយកមេរោគវីរុសមកលេងល្បែងនយោបាយ តែបើអ្នកត្រូវការឃើញក្ដារមឈូសដាក់សាកសពជាច្រើនទៀត ក៏សូមអញ្ជើញ! តែបើអ្នកមិនត្រូវការឃើញក្ដារមឈូសជាច្រើនទៀតទេនោះ អ្នកគួរអត់ទ្រាំពីការលេងល្បែងនយោបាយ…”

“រារាំងមេរោគ ឬល្បែងនយោបាយកូវីដ យើងមិនគួរខាតពេលប្រើចង្អុលដៃជ្រើសរើសនោះទេ វាប្រៀបដូចជាលេងជាមួយភ្លើង យើងនឹងមានក្ដារមឈូសដាក់សាកសពជាច្រើនទៀត គរនៅពីមុខ បើសិនយើងមិនឈប់ធ្វើខ្លួនបែបហ្នឹង ព្រោះពេលណាដែលមានភាពប្រះឆាកើតឡើង ទាំងក្នុងកម្រិតជាតិ និងកម្រិតពិភពលោក ពេលនោះវីរុសនឹងសម្រេចគោលដៅរបស់វាមិនខាន…ឱ្យស្លាប់ទៅចុះ! យើងបាត់បង់ប្រជាជនលើពិភពលោករួចទៅហើយជាង 80,000នាក់ តើយើងរវល់តែនាំគ្នាធ្វើអី?! ប៉ុនហ្នឹង មិនទាន់គ្រប់គ្រាន់ទៀត ឬយ៉ាងណា?!”

នៅក្នុងកិច្ចសម្ភាសន៍ជាមួយអ្នកសារព័ត៌មាន នៅទីក្រុងវ៉ាស៊ីនតោន កាលពីថ្ងៃអង្គារ(ទី7មេសា) លោកត្រាំបានគំរាមថា លោកមានផែនការនឹងកាត់បន្ថយចំណែកប្រាក់គាំទ្រអង្គការសុខភាពពិភពលោក ក្រោយពីមិនពេញចិត្ត ដែលអង្គការមួយនេះលម្អៀងទៅខាងប្រទេសចិនខ្លាំងជ្រុលពេក និងថែមទាំងផ្ដល់ការណែនាំដែលគ្មានប្រសិទ្ធភាព រហូតធ្វើឱ្យមេរោគវីរុសកូរ៉ូណាប្រភេទថ្មីនេះឆ្លងរាលដាលទូទាំងពិភពលោក។

យ៉ាងណាក៏ដោយ លោកថេដ្រូស បានថ្លែងអំណរគុណក្រុងវ៉ាស៊ីនតោន សម្រាប់ការគាំទ្រ និងជួយឧបត្ថម្ភរហូតមកដល់ពេលនេះ ព្រមទាំងសម្ដែងក្ដីរំពឹងថា សហរដ្ឋអាមេរិក នឹងនៅតែទុកចំណែកប្រាក់គាំទ្រអង្គការសុខភាពពិភពលោកដូចដើមដដែល។

លោក ថេដ្រូស និយាយថា ស្ថានការណ៍របស់មេរោគកូវីដ-19 នឹងកាន់តែអាក្រក់ឡើង បើសិនប្រទេសនានា មិនរួមគ្នាជាធ្លុងមួយ ក្នុងការក្រោកឈរប្រយុទ្ធតតាំងនឹងការឆ្លងរាលដាលនេះ។ លោកថ្លែងថា “ចូរជួយគ្នាតស៊ូឱ្យអស់ពីសមត្ថភាព ដើម្បីយកឈ្នះ និងគ្រប់គ្រងវីរុសនេះឱ្យបាន វាពិតជាគ្រោះថ្នាក់ខ្លាំងណាស់ មិនដូច្នោះទេ តាមរយៈវិធីការដែលយើងកំពុងធ្វើក្នុងពេលនេះ ខ្ញុំគិតថា យើងប្រហែលជានឹងត្រូវសោកស្ដាយមិនខាន…”៕

ប្រភព៖ សារព័ត៌មានបរទេស

April 9, 2020

បាក់ស្ពានវែងមួយនៅអ៊ីតាលី បណ្ដាលឱ្យមនុស្សម្នាក់រងរបួសស្រាល(វីដេអូ)

ស្ពានមួយកន្លងនៅក្នុងតំបន់ Aulla ភាគខាងជើងនៃប្រទេសអ៊ីតាលី បានបាក់រាបដល់ដី កាលពីម្សិលថ្ងៃទី8មេសាកន្លងទៅ បណ្ដាលឱ្យមនុស្សម្នាក់គត់ត្រូវរងរបួសស្រាល ដោយសារតែ COVID-19។

អាជ្ញាធរបានឱ្យដឹងថា មានរថយន្តដឹកទំនិញធុញតូច2គ្រឿងកំពុងឆ្លងកាត់ស្ពាននេះ ខណៈវាកំពុងបាក់ជាបំណែកៗ និងធ្លាក់ចូលទៅទឹកទន្លេ និងមាត់ទន្លេ Magra។ ក្នុងឧបទ្ទវហេតុនេះ មានជនរងគ្រោះតែម្នាក់គត់បានរងរបួសស្រាល និងត្រូវបានបញ្ជូនទៅកាន់មន្ទីរពេទ្យដោយឧទ្ធម្ភាគចក្រ។

ជាធម្មតា ស្ពានដែលបាក់នេះ មានអ្នកដំណើរឆ្លងកាត់ជាច្រើន និងគ្រប់ពេល ប៉ុន្តែ វាបានបាក់ចំពេលដែលប្រទេសនេះ កំពុងស្ថិតក្រោមបទបញ្ជារឹតត្បិតការធ្វើដំណើរដើម្បីទប់ស្កាត់ការឆ្លងរាលដាលនៃវីរុសCOVID-19។

ស្ពាននេះមានប្រវែងប្រមាណជា400ម៉ែត្រ និងកម្ពស់7-8ម៉ែត្រ ស្ថិតក្នុងតំបន់ Albiano Magra ក្បែរព្រំប្រទល់រវាងស្រុក Liguria និង និងស្រុក Tuscany។ ស្ពាននេះត្រូវបានក្រុមវិស្វករពិនិត្យលើកចុងក្រោយកាលពីខែវិច្ឆិកា ឆ្នាំ2019 បន្ទាប់ពីមានស្នាមប្រេះ ក្រោយពីមានភ្លៀងធំមួយមេ។ ប៉ុន្តែ Anas ដែលជាភាគីគ្រប់គ្រងស្ពាននេះ ធ្លាប់បានឱ្យដឹងថា ស្ពាននេះមិនស្ថិតក្នុង “ស្ថានភាពគ្រោះថ្នាក់” នោះទេ។

អ្នកស្រុក Caprigliola ដែលនៅក្បែរនោះ បានឱ្យដឹងថា ពួកគេបានឮសូរសំឡេង “គ្រាំ” និងសំឡេងដូចជា “ដុំថ្មធ្លាក់” នៅវេលាម៉ោងប្រហែល10និង30នាទីព្រឹក(ម៉ោង13និង30នាទីនៅភ្នំពេញ)។ ឧបទ្ទវហេតុនេះប្រហែលជាបានធ្វើឱ្យបំពង់បង្ហូរប្រេងត្រូវរងការខូចខាត ប៉ុន្តែអ្នកនាំពាក្យរបស់ក្រុមហ៊ុន Italgas ឱ្យដឹងថា កងកម្លាំងសង្គ្រោះបន្ទាន់បានបិទមិនឱ្យធ្លាយប្រេងរួចហើយ។

អភិបាលតំបន់ Tuscany លោក Enrico Rossi ថ្លែងថា “ហេតុការណ៍បាក់ស្ពាននៅ Albiano Magra នេះ អាចជាគ្រោះថ្នាក់ដ៏ធ្ងន់ធ្ងរ បើសិនមានអ្នកដំណើរច្រើនដូចថ្ងៃធម្មតា។ នេះបញ្ជាក់ថា ហេដ្ឋារចនាសម្ព័ន្ធក្នុងតំបន់នេះ បច្ចុប្បន្នស្ថិតក្នុងស្ថានភាពទ្រុឌទ្រោម”។

កាលពីខែសីហា ឆ្នាំ2018 ក៏ធ្លាប់មានករណីបាក់ស្ពានមួយកន្លែងនៅក្នុងទីក្រុង Genova ដែលស្ថិតនៅចម្ងាយ100គីឡូម៉ែត្រពី Albiano Magra បណ្ដាលឱ្យមនុស្ស43នាក់បានបាត់បង់ជីវិត៕

https://www.youtube.com/watch?v=OfFAhf8zpy4

ប្រភព៖ សារព័ត៌មានបរទេស

April 9, 2020

តួលេខអ្នកឆ្លងCOVID-19 នៅអ៊ីតាលីកើនឡើងជាថ្មី នាំឱ្យប្រទេសនេះក្លាយជាសម្បុកមេរោគធំទី3ក្នុងពិភពលោក

ប្រទេសអ៊ីតាលីបានរកឃើញអ្នកផ្ទុកមេរោគថ្មីចំនួន3,836ករណីបន្ថែមទៀត ដែលនេះបង្ហាញថា តួលេខកើនឡើងវិញបើធៀបនឹងមុននេះមួយថ្ងៃ ធ្វើឱ្យតួលេខសរុបនៃករណីឆ្លងមេរោគ កើនដល់ជាង139,422ករណី ក្នុងនោះមានអ្នកស្លាប់17,669ករណី។

អង្គភាពការពារប្រជាជនអ៊ីតាលី កាលពីថ្ងៃទី8មេសា បានរាយការណ៍ថា ប្រទេសនេះមានអ្នកស្លាប់ថ្មីចំនួន542ករណីបន្ថែមទៀត ហើយនេះជាថ្ងៃទី3ដែលតួលេខនៃអ្នកស្លាប់ថ្មីមានការថយចុះ។ នៅទូទាំងប្រទេស តួលេខនៃអ្នកស្លាប់សរុប បានកើនដល់17,669ករណី បណ្ដាលឱ្យអ៊ីតាលីក្លាយជា “វាលពិឃាត” របស់ COVID-19 ធំជាងគេបំផុតក្នុងពិភពលោក។

កាលពីថ្ងៃទី7មេសាកន្លងទៅ ប្រទេសនេះ បានរកឃើញអ្នកផ្ទុកមេរោគថ្មី 3,039ករណី ដែលជាតួលេខទាបបំផុតក្នុងអំឡុង25ថ្ងៃកន្លងមកនេះ។ ក៏ប៉ុន្តែ តួលេខនេះបានកើនឡើងជាថ្មីក្នុងថ្ងៃទី8មេសា ដោយមានអ្នកជំងឺថ្មីចំនួន3,836ករណី នាំឱ្យតួលេខនៃអ្នកជំងឺសរុបក្នុងប្រទេសនេះ ឡើងដល់139,422ករណី ដែលនេះក៏ធ្វើឱ្យអ៊ីតាលីក្លាយជាសម្បុកមេរោគCOVID-19 ធំជាងគេលំដាប់ទី3 ក្នុងពិភពលោក បន្ទាប់ពីសហរដ្ឋអាមេរិក និងអេស្ប៉ាញ។ ក្នុងចំណោមអ្នកជំងឺសរុប មានអ្នកជំងឺ3,693នាក់កំពុងប្រឈមនឹងការស្លាប់ និង 26,491នាក់បានជាសះស្បើយ៕

ប្រភព៖ សារព័ត៌មានបរទេស

April 9, 2020

សហរដ្ឋអាមេរិក៖ អ្នកស្លាប់ថ្មីកើនជិត2,000នាក់ ខណៈអ្នកផ្ទុកCOVID-19សរុបកើនលើស420,000នាក់

តួលេខនៃអ្នកស្លាប់ដោយសារ COVID-19 នៅសហរដ្ឋអាមេរិកបន្តកើនឡើងខ្លាំង ដោយមានជិត2,000នាក់ក្នុង1ថ្ងៃ នៅក្នុងសប្ដាហ៍ដែលមន្ត្រីអាមេរិកាំងជឿថា រោគរាតត្បាតនេះអាចឡើងដល់ចំណុចកំពូល។

យោងតាមទិន្នន័យនៅលើគេហទំព័រ Worldometer គិតត្រឹមល្ងាចថ្ងៃទី8មេសា (ម៉ោងនៅសហរដ្ឋអាមេរិក) សហរដ្ឋអាមេរិកមានអ្នកស្លាប់ថ្មីចំនួន1,805ករណី ធ្វើឱ្យតួលេខសរុបនៃអ្នកស្លាប់ដោយសារ COVID-19 នៅប្រទេសនេះ ឡើងដល់14,646ករណី។

ក្នុងរយៈពេល24ម៉ោងកន្លងទៅ សហរដ្ឋអាមេរិក បានរកឃើញអ្នកផ្ទុកមេរោគCOVID-19 ចំនួន26,550នាក់បន្ថែមទៀត នាំឱ្យអ្នកឆ្លងមេរោគសរុបក្នុងប្រទេសនេះ កើនជិតដល់426,000នាក់។

សម្បុកមេរោគ New York កាលពីម្សិលមិញក៏មានអ្នកស្លាប់ច្រើនមិនធ្លាប់មានផងដែរ។ អភិបាលរដ្ឋ New York លោក Andrew Cuomo ឱ្យដឹងថា រដ្ឋនេះមានអ្នកស្លាប់779ករណីដោយសារCOVID-19 ក្នុងរយៈពេលតែ24ម៉ោងចុងក្រោយ ធ្វើឱ្យអ្នកស្លាប់សរុបក្នុងរដ្ឋនេះកើនជិតដល់6,300នាក់ ក្នុងនោះទីក្រុង New York មានដល់ទៅជាង5,600ករណី។

អភិបាលរដ្ឋ New York យល់ថា តូលេខនៃអ្នកស្លាប់នឹងបន្តកើនឡើង សូម្បីតែនៅក្នុងអំឡុងអ្នកឆ្លងមេរោគមានការថយចុះក៏ដោយ។ លោកបន្តថា ការបង្ខាំងទូទៅក្នុងសហគមន៍នឹងនៅតែជាវិធានការដ៏មានប្រសិទ្ធភាពដើម្បីទប់ស្កាត់ការឆ្លងរាលដាល។

លោកប្រធានាធិបតិអាមេរិកាំង Donald Trump មានបំណងបើកទ្វារសេដ្ឋកិច្ចឡើងវិញ ប៉ុន្តែទីប្រឹក្សារបស់លោកអំពាវនាវឱ្យលោក មានការប្រុងប្រយ័ត្ន ព្រោះថាការបើកទ្វារសេដ្ឋកិច្ចឆាប់ពេកនឹងអាចនាំឱ្យការឆ្លងរាលដាលផ្ទុះឡើងខ្លាំងបន្ថែមទៀត។

ក្រុមអ្នកជំនាញផ្នែកសុខាភិបាលអាមេរិកាំងបានព្រមានថា តួលេខនៃអ្នកស្លាប់ដោយសារ COVID-19 នៅក្នុងប្រទេសនេះ អាចកើនឡើងដល់100,000នាក់ ទៅ200,000នាក់ បើសិនជាមិនមានវិធានការខ្លាំងក្លា និងប្រសិទ្ធភាព៕

ប្រភព៖ សារព័ត៌មានបរទេស

April 9, 2020

ប្រធានាធិបតីអាមេរិកត្រូវខាតបង់ប្រាក់1ពាន់លានដុល្លារដោយសារ COVID-19 ខណៈក្រុមហ៊ុនជាច្រើនរបស់លោក កំពុងជួបបញ្ហា

ប្រធានាធិបតីសហរដ្ឋអាមេរិក មានទ្រព្យ2.1ពាន់លានដុល្លារ ថយចុះ1ពាន់លានដុល្លារបើធៀបជាមួយនឹង1ខែមុន ហើយពេលនេះ លោក Trump ក៏បានបាត់ឈ្មោះចេញពីបញ្ជី Top 1.000 នៃអ្នកមានបំផុតក្នុងពិភព លោករបស់ទស្សនាវដ្ដី Forbes ផងដែរ។

នៅក្នុងបញ្ជីឈ្មោះនៃមហាសេដ្ឋីពិភពលោកដែលទើបត្រូវបានចេញផ្សាយ ទស្សនាវដ្ដី Forbes បានពិនិត្យទៅលើការប្រែប្រួលនៃតម្លៃភាគហ៊ុនទៅតាមវិស័យជំនួញនីមួយៗរបស់លោក Trump ដើម្បីគន់គូរអំពីកម្រិតនៃផលប៉ះពាល់ពីវីរុសCOVID-19 ដល់ទ្រព្យសម្បត្តិរបស់ប្រធានាធិបតីអាមេរិករូបនេះ។

ក្នុងនោះ អចលនទ្រព្យប្រភេទពាណិជ្ជកម្ម បានថយចុះដែលគេអាចដឹងយ៉ាងច្បាស់។ មូលបត្ររបស់ក្រុមហ៊ុនមួយចំនួន ក្នុងនោះមាន Boston Properties និង Vornado Realty Trust ក៏បានថយចុះជាមធ្យម37% ចាប់ពីថ្ងៃទី1មីនា ដល់ថ្ងៃដែល Forbes ត្រូវគន់គូរអំពីទ្រព្យរបស់មហាសេដ្ឋីនានានៅក្នុងបញ្ជីឈ្មោះ។ តម្លៃមូលបត្ររបស់បណ្ដាក្រុមហ៊ុនក្នុងវិស័យសណ្ឋាគារ ខុនដូ និងអាជីវកម្មទីលានវាយកូនគោល (golf) ក៏ធ្លាក់ចុះច្រើន។

ទ្រព្យសម្បត្តិរបស់ប្រធានាធិបតីអាមេរិក កាលពីខែមីនា គឺមាន3.1ពាន់លានដុល្លារ។ បន្ទាប់ពីបានពិនិត្យ និងវាយតម្លៃគ្រប់ជ្រុងជ្រោយ ទស្សនាវដ្ដី Forbes បានរកឃើញថា ទ្រព្យសរុបរបស់លោក Trump បានបាត់បង់1ពាន់លានដុល្លារ ដោយសារតែវីរុសCOVID-19 ដូច្នេះ ទ្រព្យរបស់លោក Trump នៅសល់តែ2.1ពាន់លានដុល្លារប៉ុណ្ណោះ។

តម្លៃនៃអចលនទ្រព្យប្រភេទផ្ទះសម្រាប់រស់នៅរបស់លោក Trump ក៏បានថយចុះ87លានដុល្លារ នៅសល់ត្រឹម148លានដុល្លារ។ បច្ចុប្បន្ន ប្រធានាធិបតីអាមេរិក មានផ្ទះប្រមាណជា500ខ្នង នៅពាសពេញសហរដ្ឋអាមេរិក។

ក្នុងដំណាក់កាលនៃវិបត្តិសុខភាពនេះ ក្រុមហ៊ុនអចលនទ្រព្យ Trump Organization បានព្យាយាមលក់សណ្ឋាគារមួយនៅ Washington ប៉ុន្តែ គម្រោងការនេះត្រូវបានពន្យារពេល។ សារព័ត៌មាន Wall Street Journal បានចុះផ្សាយថា បណ្ដាក្រុមហ៊ុនរបស់លោកប្រធានាធិបតីអាមេរិក បានបញ្ឈប់បុគ្គលិកជាង550នាក់។ បើធៀបនឹងអំឡុងពេលមុនវិបត្តិសុខភាពCOVID-19 សណ្ឋាគាររបស់លោក Trump ពេលនេះបានបាត់បង់តម្លៃជិត70លានដុល្លារ នៅសល់ត្រឹម38លានដុល្លារប៉ុណ្ណោះ។

យីហោ Hotel Management & Licensing របស់លោក Trump ក៏បានបាត់បង់តម្លៃ32លានដុល្លារផងដែរ។ ចាប់ពីដើមខែមីនា តម្លៃរបស់ទីលានវាយកូនគោលរបស់ប្រធានាធិបតីអាមេរិក ក៏បានធ្លាក់ចុះ20% នៅសល់ត្រឹម217លានដុល្លារ។

ក្រៅពីទ្រព្យសម្បត្តិខាងលើ លោក Trump ក៏មានសាច់ប្រាក់សុទ្ធសរុប160លានដុល្លារ និងមូលបត្រតម្លៃ295លានដុល្លារ រួមនឹងទ្រព្យប្រភេទផ្សេងៗជាច្រើនទៀតផងដែរ។ ឆ្នាំនេះ ប្រធានាធិបតីអាមេរិក ឈរលំដាប់លេខរៀងទី1,001 នៅក្នុងបញ្ជីឈ្មោះនៃអ្នកមានទ្រព្យច្រើនបំផុតក្នុងពិភពលោករបស់ទស្សនាវដ្ដី Forbes ដោយបានធ្លាក់ចុះជិត300ថ្នាក់ បើធៀងនឹងឆ្នាំ2019៕

ប្រភព៖ សារព័ត៌មានបរទេស

April 8, 2020

Author: សឿន សំណាង