សឿន សំណាង - La Reine Media

ប្រធាន WHO ត្រូវបានចោទថា លាក់អាសន្នរោគ3លើក នៅក្នុងឆ្នាំ2017

ប្រធានអង្គការសុខភាពពិភពលោកWHO លោក Tedro ត្រូវបានចោទប្រកាន់ចំនួន3លើក ទាក់ទិននឹងការលាក់បាំងអាសន្នរោគ cholerae ដែលបានផ្ទុះឆ្លងរាលដាលនៅឯស្រុកកំណើតរបស់លោក ដែលកាលណោះលោកកំពុងកាន់តំណែងជារដ្ឋមន្ត្រីក្រសួងសុខាភិបាលប្រទេសអេត្យូពី (Ethiopia)។

វេជ្ជបណ្ឌិត Tedros Adhanom Ghebreyesus បានជាប់ឆ្នោតជាប្រធានអង្គការសុខភាពពិភពលោក(WHO) នៅថ្ងៃទី1កក្កដាឆ្នាំ2017 ដោយមានអាណត្តិកាល5ឆ្នាំ ក្លាយជាមន្ត្រីសុខាភិបាលដែលមានអំណាចជាងគេបង្អស់ក្នុងពិភពលោក។

ប៉ុន្តែ កាលពីខែឧសភា ឆ្នាំ2017 មុនពេលលោកបានឡើងកាន់កាប់តំណែងនេះ មានសំណួរជាច្រើនត្រូវបានលើកឡើងអំពីភាពសមហេតុផលរបស់លោកជាមួយនឹងតំណែងជាអ្នកជំនាញខាងសុខភាពទូទាំងពិភពលោក។ នៅក្នុងកិច្ចសម្ភាសមួយជាមួយនឹង NYTimes កាលណោះ សាស្ត្រាចារ្យ Larry Gostin ដែលជាអ្នកជំនាញផ្នែកសុខាភិបាលសកល បានចោទប្រកាន់វេជ្ជបណ្ឌិត Tedros ថា មិនបានទទួលស្គាល់អាសន្នរោគ cholerae ចំនួន3លើក ដែលបានឆ្លងរាលដាលនៅប្រទេសអេត្យូពី ដែលកាលណោះ លោក Tedros គឺជារដ្ឋមន្ត្រីក្រសួងសុខាភិបាលប្រទេសនេះ។

សាស្ត្រាចារ្យ Gostin យល់ថា លោក Tedros បានលាក់បាំងអាសន្នរោគ cholerae នៅប្រទេសអេត្យូពី ដល់ទៅ3លើកផ្សេងៗគ្នា រួមមាន ក្នុងឆ្នាំ2006 2009 និង2011។ លោក Tedros គឺជារដ្ឋមន្ត្រីក្រសួងសុខាភិបាលប្រទេសអេត្យូពីចាប់ពីឆ្នាំ2005ដល់ឆ្នាំ2012 មុនពេលលោកបានក្លាយជារដ្ឋមន្ត្រីការបរទេស4ឆ្នាំ ពោលគឺរហូតដល់ឆ្នាំ2016។

“វេជ្ជបណ្ឌិត Tedros គឺជាមន្ត្រីសុខាភិបាលសាធារណៈដែលមានទឹកចិត្តប្រកបដោយមេត្តាធម៌ និងមានថាមពលល្អ។ ប៉ុន្តែ គាត់នៅមានភារកិច្ចនិយាយអំពីការពិត និងស្មោះត្រង់ក្នុងការរាយការណ៍អំពីការផ្ទុះឆ្លងអាសន្នរោគcholerae ដែលត្រូវបានផ្ទៀងផ្ទាត់ក្នុងមួយរយៈពេលវែង” លោក Gostin ដែលបច្ចុប្បន្នជាប្រធានមជ្ឈមណ្ឌលសហការផ្នែកច្បាប់សុខភាពសាធារណៈ និងសិទ្ធិមនុស្សរបស់ WHO បានថ្លែងប្រាប់ទីភ្នាក់ងារសារព័ត៌មាន NYTimes បែបនេះកាលពី3ឆ្នាំមុន។

សាស្ត្រាចារ្យ Gostin ក៏ធ្លាប់បានសម្ដែងការព្រួយបារម្ភខ្លាចក្រែង WHO “អាចបាត់បង់ភាពស្របច្បាប់” បើសិនត្រូវបានដឹកនាំដោយតំណាងប្រទេសមួយរូបដែលធ្លាប់លាក់បាំងអាសន្នរោគ។

លោក Tedros ជាប់ឆ្នោតក្លាយជាប្រធាន WHO កាលពីឆ្នាំ2017 ប៉ុន្តែ មិនយូរប៉ុន្មាន លោកក៏ទទួលរងការរិះគន់នៅពេលលោកមិនបានកត់ត្រាអាសន្នរោគ cholerae នៅស៊ូដង់ ដែលជាប្រទេសជិតខាងរបស់អេត្យូពី។

ខែកញ្ញាឆ្នាំ2017 វេជ្ជបណ្ឌិតមួយក្រុមរបស់សហរដ្ឋអាមេរិក ដែលមានជំនាញខាងជំងឺឆ្លង បានសរសេរសំបុត្ររិះគន់លោក Tedros ដោយបានចោទថា លោកនិង WHO បានបដិសេធមិនទទួលស្គាល់សម្បុកអាសន្នរោគcholerae នៅប្រទេសស៊ូដង់។ សកម្មភាពនេះរបស់ WHO គឺដើម្បីការពារកេរ្តិ៍ឈ្មោះរបស់អង្គការនេះនៅលើឆាកអន្តរជាតិ។

កាលណោះ នៅក្នុងសំបុត្ររបស់ក្រុមវេជ្ជបណ្ឌិតសហរដ្ឋអាមេរិក មានឃ្លាសរសេរថា “ការស្ងៀមស្ងាត់របស់លោក (Tedros) នៅចំពោះមុខអាសន្នរោគនៅស៊ូដង់ កាន់តែគួរឱ្យបន្ទោស។ ការដែលលោកមិនអនុញ្ញាតឱ្យបញ្ជូនសំណាករបស់អ្នកជំងឺនៅស៊ូដង់ទៅកាន់ប្រទេសស្វីសដើម្បីវិភាគ និងបញ្ចាក់អំពីអាសន្នរោគ ធ្វើឱ្យលោកក្លាយជាអ្នកសមគំនិតក្នុងការជួយឱ្យទុក្ខលំបាក និងការស្លាប់ដ៏សាហាវ បន្តរាលដាលធំឡើងៗ ហួសពីលទ្ធភាពគ្រប់គ្រង ខណៈដែលរបាយការណ៍ថ្មីប្រចាំថ្ងៃជាច្រើន បញ្ជាក់ថានេះពិតជាអាសន្នរោគcholerae។ ប្រវត្តិនៃអាសន្នរោគនេះ ប្រាកដជាមានឈ្មោះរបស់លោក”។

អាសន្នរោគនៅប្រទេសអេត្យូពី និងស៊ូដង់ សុទ្ធតែត្រូវបាន WHO ហៅថា “ជំងឺរាកស្រួចស្រាល” ជំនួសឱ្យពាក្យអាសន្នរោគcholerae។ មតិជាច្រើនយល់ថា ដោយការលាក់បាំងអាសន្នរោគcholerae ខណៈដែលនៅជារដ្ឋមន្ត្រីសុខាភិបាល អេត្យូពី បានជួយឱ្យលោក Tedros បន្តជាប់ជារដ្ឋមន្ត្រីការបរទេសរហូតដល់ឆ្នាំ2016។ ចំណែកសម្បុកអាសន្នរោគនៅស៊ូដង់វិញ WHO សង្កត់ធ្ងន់ថា ឈ្មោះរបស់ជំងឺ មិនអាចផ្លាស់ប្ដូរវិធីប្រយុទ្ធប្រឆាំងនឹងរោគនេះនោះទេ។

Tedros បច្ចុប្បន្នអាយុ55ឆ្នាំ មានសញ្ញាបត្រវេជ្ជបណ្ឌិតរបស់សាកលវិទ្យាល័យ Nottingham និងសញ្ញាបត្រអនុបណ្ឌិតរបស់សាកលវិទ្យាល័យ London។ ឆ្នាំ2017 លោកក៏ធ្លាប់បានច្រានចោលការចោទប្រកាន់ខាងលើផងដែរ។ លោក Tedros ថ្លែងថា លោកជាជនរងគ្រោះក្នុងយុទ្ធនាការបរិហារកេរ្តិ៍នៅនាទីចុងក្រោយ ដើម្បីរារាំងមិនឱ្យលោកបានអង្គុយលើកៅអី “មន្ត្រីសុខាភិបាលកំពូលរបស់ពិភពលោក”។ លោក Tedros ពន្យល់ថា ជំងឺឆ្លងបានកើតនៅក្នុងតំបន់ដាច់ស្រយាលនៅអេត្យូពី បង្កការលំបាកដល់បេសកកម្មពិសោធន៍មេរោគ។

សាស្ត្រាចារ្យ Gostin កាលពីសប្ដាហ៍មុនបានបដិសេធការបញ្ចេញមតិជាមួយ Telegraph ដោយនិយាយថា កិច្ចសម្ភាសជាមួយ NYTimes កាលណោះ គឺជារឿងយូរហើយ។ ប៉ុន្តែ នៅលើទស្សនាវដ្ដីសុខាភិបាលអង់គ្លេស លោក Gostin បែរជានិយាយថា យោបល់របស់លោកត្រូវបាន NYTimes ចុះផ្សាយ “មិនត្រឹមត្រូវ”។

ប្រធាន WHO ថ្មីៗនេះ ត្រូវប្រទេសជាច្រើនរិះគន់ ក្នុងនោះមានសហរដ្ឋអាមេរិក ជប៉ុន តៃវ៉ាន់ជាដើម ទាក់ទិននឹងរោគរាតត្បាតCOVID-19៕

ប្រភព៖ សារព័ត៌មានបរទេស

April 13, 2020

អាថ៌កំបាំងធម្មជាតិ…វីរុសកូវីដ-19 ប្រណីជីវិតក្មេងតូច?

ជារឿងដែលគួរឱ្យចម្លែកចិត្តខ្លាំងបំផុតជាមួយនឹងអាថ៌កំបាំងធម្មជាតិ ថាតើបណ្ដាលមកពីហេតុអ្វី ទើបវីរុសកូរ៉ូណាប្រភេទថ្មីដ៏កំណាចនេះ មើលទៅហាក់ដូចជាលើកលែង(ប្រណី)ជីវិតឱ្យកូនមនុស្សតូចៗ(ទារក) ដែលជាអនាគតនៃពូជពង្សមនុស្ស?

កាលពីពេលមុននេះ សារព័ត៌មានស៊ីនហួ បានរាយការណ៍ពីលទ្ធផលនៃការស្រាវជ្រាវវិភាគមួយនៅក្នុងព្រឹត្តិបត្រ វេជ្ជសាស្ត្រកុមារអន្តរជាតិ លេខថ្មីចុងក្រោយបំផុត ដែលដំណើរការស្រាវជ្រាវដោយអ្នកជំនាញការនៃមជ្ឈមណ្ឌលវេជ្ជសាស្ត្រកុមារនៃប្រទេសចិន និងមជ្ឈមណ្ឌលវេជ្ជសាស្ត្រកុមារនៃទីក្រុងសៀងហៃ ក្នុងបណ្ដាញមហាវិទ្យាល័យវេជ្ជសាស្ត្រ នៃមហាវិទ្យាល័យសៀងហៃ ចៀវថុង។

លទ្ធផលនៃការស្រាវជ្រាវ បានបញ្ជាក់ថា ទោះជាអាការឆ្លងមេរោគនៅលើកុមារ នឹងមិនធ្ងន់ធ្ងរ ដូចមនុស្សធំមែន តែកុមារគ្រប់វ័យ មានភាពប្រថុយប្រថានក្នុងការឆ្លងមេរោគវីរុសគ្រប់គ្នា ដោយមិនបែងចែកថា ក្មេងប្រុស ឬក្មេងស្រីនោះឡើយ តែទារកនឹងមានភាពប្រថុយប្រថានក្នុងការឆ្លងមេរោគខ្លាំងជាង។ យ៉ាងណាក៏ដោយ ការឆ្លងមេរោគនៅលើក្មេង ទោះជាបង្ហាញអាការក៏ដោយ តែច្រើនតែមិនធ្ងន់ធ្ងរឡើយ ព្រោះការខូចខាតដោយសារការតតាំងជាមួយវីរុសរបស់ប្រព័ន្ធប្រឆាំងជំងឺរបស់ក្មេងដែលនៅមិនទាន់រីកចម្រើនពេញទំហឹង។

ការសិក្សាស្រាវជ្រាវ បានយោងទៅលើព័ត៌មានពីអ្នកជំងឺដែលបានទទួលការអះអាងលទ្ធផលហើយថា មានឆ្លងមេរោគទាំងប៉ុន្មាននៅក្នុងប្រទេសចិនមុនថ្ងៃទី8 កុម្ភៈ ឆ្នាំ2020 បានរកឃើញថា តួលេខអ្នកជំងឺក្មេង សរុបស្ថិតក្នុងចំនួន 731នាក់ គិតជាភាគរយគឺ 2.3ភាគរយនៃចំនួនអ្នកឆ្លងមេរោគសរុបទូទាំងប្រទេសចិន។

ក្នុងចំនួននេះ មានកុមារស្លាប់ 1នាក់ ក្មេងដែលមានអាការកម្រិតធ្ងន់ធ្ងរ 3នាក់ ខណៈដែលអ្នកជំងឺក្មេង 709នាក់ទៀត បង្ហាញអាការមិនធ្ងន់ធ្ងរ ដែលគិតជាភាគរយគឺ 97% នៃចំនួនក្មេងឆ្លងមេរោគទាំងអស់។

ហេតុអីបានមេរោគវីរុសកូរ៉ូណាប្រភេទថ្មី មិនបង្កផលអាក្រក់ដល់អវយវៈរបស់ក្មេងតូចៗ?

លោក ហ្គ្រេហ៊ែម រ៉ូប៊ើត អគ្គនាយកមជ្ឈមណ្ឌលស្រាវជ្រាវជំងឺប្រតិកម្មចាញ់របស់ស្ថាប័ន ដេវីត ហាយដ៍ ក្នុងទីក្រុងនីវផត នៃប្រទេសអង់គ្លេស បាននិយាយថា “មូលហេតុមួយនៅក្នុងចំណោមមូលហេតុដែលគួរតែអាចទៅរួចនោះគឺ វីរុសត្រូវការប្រូតេអ៊ីននៅលើស្រទាប់ស្បែករបស់កោសិកា ដើម្បីចូលទៅផ្នែកខាងក្នុងរបស់កោសិកា និងចាប់ផ្ដើមបង្កឱ្យកើតមានអាការរោគ ដែលវាអាចទៅរួចថា ក្មេងមានប្រូតេអ៊ីននៅលើស្រទាប់ស្បែកកោសិកា តិចជាងក្នុងប្រព័ន្ធដង្ហើមផ្នែកខាងក្រោម(សួត) តិចជាងផ្លូវដង្ហើមផ្នែកខាងលើ ដែលនេះជាមូលហេតុដែលថា ហេតុអីបានជាក្មេងៗដែលឆ្លងមេរោគ មានអាការត្រឹមតែបរិវេណផ្លូវដង្ហើមផ្នែកខាងលើ(ច្រមុះ មាត់ និងបំពង់ក) មិនចុះទៅដល់សួត រហូតធ្វើឱ្យឆ្លងមេរោគរលាកសួតរុករានដល់ជីវិតដូចមនុស្សចាស់”។

លោក អ៊ែនឌ្រូវ៍ ផលឡាត ប្រធានមជ្ឈមណ្ឌលវ៉ាក់សាំង អុកស្វ៉ដ អ្នកស្រាវជ្រាវម្នាក់ក្នុងក្រុមអ្នកស្រាវជ្រាវរកវ៉ាក់សាំងដើម្បីការពារជំងឺកូវីដ-19 បានថ្លែងថា មានបច្ច័យជាច្រើនក្នុងប្រព័ន្ធប្រឆាំងជំងឺរបស់ក្មេង ដែលខុសប្លែកពីមនុស្សធំមិនតិចទេ ដែលហុចផលខុសប្លែកពីគ្នាជាមូលដ្ឋាន ពាក់ព័ន្ធនឹងវិធីចាត់ការមេរោគវីរុសនៅលើក្មេង និងមនុស្សធំ។ ប្រព័ន្ធប្រឆាំងជំងឺរបស់ក្មេង នៅតែរីកចម្រើនមិនទាន់ពេញលេញ ហុចផលឱ្យក្រោយពីការព្យាយាមរបស់រាងកាយក្នុងការកម្ចាត់វីរុស មិនកើតសភាវក្ដៅ និងបន្សល់ការខូចខាតធ្ងន់ធ្ងរ(Cytokine storm) នៅលើអវយវៈស្មើនឹងមនុស្សធំឡើយ ទើបមិនបង្កឱ្យកើតគ្រោះថ្នាក់ ឬការខូចគាំងលើអវយវៈជាច្រើនដែលពាក់ព័ន្ធ។

យ៉ាងណាក៏ដោយ លោក ហ្គ្រេហ៊ែម រ៉ូប៊ើត អគ្គនាយកមជ្ឈមណ្ឌលស្រាវជ្រាវជំងឺប្រតិកម្មចាញ់របស់ស្ថាប័ន ដេវីត ហាយដ៍ ក្នុងទីក្រុងនីវផត នៃប្រទេសអង់គ្លេស បានទទួលស្គាល់ថា “នៅមានរឿងច្រើនទៀតដែលយើងមិនដឹង ពាក់ព័ន្ធនឹងវីរុសប្រភេទថ្មីនេះ”៕

ប្រភព៖ សារព័ត៌មានបរទេស

April 13, 2020

គ្រោះរាំងស្ងួត…កសិផលធ្លាក់ថ្លៃ…កូវីដ-19 វាយលុក…ផ្សារបិទ…អត់អ្នកទិញ កសិករថៃនាំគ្នាដឹកផ្លែក្រូចទៅចាក់ចោលទាំងតោនៗ

ម្ចាស់ចម្ការក្រូចនៅក្នុងខេត្ត ស៊ុខូថៃ ក្នុងប្រទេសថៃ កំពុងរងគ្រោះធ្ងន់ ក្រោយពីជួបនឹងគ្រោះរាំងស្ងួតវាយលុក តម្លៃកសិផលធ្លាក់ចុះ រោគរាតត្បាត ផ្សារបិទ គ្មានអ្នកទិញ លក់មិនដាច់ ផ្លែក្រូចចាប់ផ្ដើមស្អុយខូច ត្រូវនាំគ្នាដឹកយកទៅចាក់ចោលទាំងតោនៗ ហើយបន្តិចទៀត ស្វាយ និងក្រូចឆ្មារ ក៏ប្រហែលនឹងរងវាសនាកម្មដូចគ្នាដែរ…។

កសិករអ្នកដាំក្រូចឃ្វិច នៅក្នុងឃុំមែស៊ីន ស្រុកស៊ីសាត់ឆណាល័យ ខេត្តស៊ុខូថៃ នៅប្រទេសថៃ ដែលជាប្រភពទិន្នផលក្រូចឃ្វិចដ៏ធំបំផុតមួយរបស់ប្រទេសថៃ ខណៈពេលនេះ កំពុងរងផលប៉ះពាល់យ៉ាងធ្ងន់ធ្ងរដោយសារបញ្ហាការឆ្លងរាលដាលយ៉ាងខ្លាំងក្លារបស់មេរោគកូវីដ-19 ធ្វើឱ្យគ្មានឈ្មួញកណ្ដាលមកទទួលទិញ រហូតកសិករទាំងនោះត្រូវបង្ខំចិត្តដឹងផ្លែក្រូចទាំងនោះយកទៅចាក់ទាំងតោនៗ។

ប្រភព៖ សារព័ត៌មានបរទេស

April 13, 2020

COVID-19! នាយករដ្ឋមន្ត្រីអង់គ្លេសរៀបរាប់អំពី “48ម៉ោងដែលលោកប្រឈមនឹងការស្លាប់ដោយសារកូរ៉ូណា”

បន្ទាប់ពីបានចេញពីមន្ទីរពេទ្យ នាយករដ្ឋមន្ត្រីអង់គ្លេស លោក Boris Johnson បានរ៉ាយរ៉ាប់អំពីអំឡុងពេល48ម៉ោងដែលលោកបានប្រឈមនឹងគ្រោះថ្នាក់ដល់ជីវិត ដោយសារតែអាការរោគដ៏ធ្ងន់ធ្ងរនៃជំងឺCOVID-19ដែលលោកបានឆ្លង។

យោងតាមសារព័ត៌មាន Telegraph នាយករដ្ឋមន្ត្រី Johnson កាលពីថ្ងៃទី12មេសាកន្លងទៅ បានរៀបរាប់ថា “48ម៉ោងដែលអ្វីៗទាំងអស់អាចឆ្ពោះទៅទិសផ្សេង”។ លោកនាយករដ្ឋមន្ត្រីរូបនេះក៏បានថ្លែងអំណរគុណចំពោះបុគ្គលិកសុខាភិបាលអង់គ្លេស NHS (National Health Service) “ដែលបានជួយសង្គ្រោះជីវិតខ្ញុំ ជាទង្វើដែលខ្ញុំមិនមានអ្វីអាចប្រកែកបាន”។

លោក Johnson ត្រូវបានអនុញ្ញាតឱ្យចេញពីមន្ទីរពេទ្យកាលពីម្សិលមិញ និងបានទៅកាន់ភូមិគ្រឹះ Chequers នៅតំបន់ Buckinghamshire ជាកន្លែងភរិយាកំពុងមានផ្ទៃពោះ(លោកស្រី Carrie Symonds)របស់លោក រស់នៅ។

លោក Johnson និងលោកស្រី Carrie Symonds មិនបានជួបគ្នាអស់មួយរយៈពេល ចាប់តាំងពីលោក Johnson បានឆ្លងវីរុសCOVID-19 កាលពីចុងខែមុន។

មុនពេលទៅកាន់ Chequers ដើម្បីសម្រាកយកកម្លាំង លោក Johnson បានបង្ហោះសារជាវីដេអូមួយ រៀបរាប់អំពីកម្រិតនៃភាពធ្ងន់ធ្ងររបស់ជំងឺដែលលោកបានឆ្លង ជាពេលវេលាដែលអាចគ្រោះថ្នាក់ដល់ជីវិត ហើយលោកក៏បានកោតសរសើរចំពោះបុគ្គលិកសុខាភិបាល(NHS) ដែលបានជួយសង្គ្រោះជីវិត និងថែទាំរូបលោក។

“ថ្ងៃនេះខ្ញុំបានចេញពីមន្ទីរពេទ្យ បន្ទាប់ពីទទួលការព្យាបាលអស់រយៈពេល1សប្ដាហ៍។ នៅទីនោះ ក្រុមបុគ្គលិកសុខាភិបាលបានជួយសង្គ្រោះជីវិតខ្ញុំ។ ខ្ញុំពិតជាពិបាករកពាក្យអ្វីមកសម្ដែងអំពីការដែលខ្ញុំជំពាក់គុណពួកគេខ្លាំងណាស់” នាយករដ្ឋមន្ត្រី Johnson ថ្លែងនៅក្នុងសារខាងលើ។

លោកស្រី Carrie Symonds ភរិយារបស់នាយករដ្ឋមន្ត្រីអង់គ្លេស (រូបកណ្ដាល)

នាយករដ្ឋមន្ត្រីអង់គ្លេសបានឱ្យដឹងថា លោកបានមើលឃើញផ្ទាល់នឹងភ្នែកនូវ “សម្ពាធដែលបុគ្គលិកសុខាភិបាលកំពុងជួបប្រទះ” ហើយលោកសង្កត់ធ្ងន់ថា NHS នឹងទទួលបានជោគជ័យលើវីរុសCOVID-19។ លោកប្រាប់ថា NHS គឺជាស្ថាប័នល្អបំផុតនៅអង់គ្លេស។

ក្នុងសារខាងលើ លោកនាយករដ្ឋមន្ត្រីអង់គ្លេសក៏បានថ្លែងអំណរគុណចំពោះបុគ្គលិកសុខាភិបាលមួយចំនួន ដូចជា “Jenny មកពី នូវែលហ្សេឡង់ និង Luis មកពីព័រទុយហ្គាល់” ផងដែរ។ “ខ្ញុំសង្ឃឹមថា ពួកគេនឹងមិនប្រកាន់នោះទេនៅពេលខ្ញុំរំឭកពីគិលានុបដ្ឋាយិកា2រូបដែលនៅក្បែរខ្ញុំ48ម៉ោង ខណៈដែលអ្វីៗអាចឆ្ពោះទៅទិសផ្សេង”។

“មូលហេតុដែលរាងកាយរបស់ខ្ញុំ ក្នុងដំណាក់កាលចុងក្រោយ អាចមានសុខភាពល្អ នោះគឺដោយសារថា ជារៀងរាល់វិនាទីក្នុងរាត្រី ពួកគេសុទ្ធតែសង្កេតមើល គិតគូរ យកចិត្តទុកដាក់ និងធ្វើអ្វីដែលខ្ញុំត្រូវការ” លោក Johnson ថ្លែងដូច្នេះ។ លោកក៏បានអរគុណដល់ក្រុមវេជ្ជបណ្ឌិតនៅមន្ទីរពេទ្យ St Thomas ដែលបានប្រឹងប្រែងព្យាបាលរូបលោក។

នាយករដ្ឋមន្ត្រីអង់គ្លេសក៏បានសម្ដែងការគោរពចំពោះការលះបង់របស់សាធារណជន ក្នុងពេលខិតខំធ្វើតាមបទបញ្ជាបម្រាមគោចដ៏លំបាក ដែលត្រូវបានប្រកាសឱ្យអនុវត្តកាលពី3សប្ដាហ៍មុន។

បន្ទាប់ពីលោក Johnson បានចេញពីមន្ទីរពេទ្យ លោកស្រី Carrie Symonds ក៏បានផ្ញើសារថ្លែងអំណរគុណដល់ក្រុមការងារ NHS ផងដែរ។

ការិយាល័យនាយករដ្ឋមន្ត្រីអង់គ្លេសបានឱ្យដឹងថា លោក Johnson នឹងមិនទាន់វិលមកបំពេញភារកិច្ចបានភ្លាមៗនោះទេ៕

ប្រភព៖ សារព័ត៌មានបរទេស

April 13, 2020

COVID-19! ស្ថិតិសង្ខេបស្ដីអំពីករណីឆ្លង និងស្លាប់នៅអាស៊ីអាគ្នេយ៍

តំបន់អាស៊ីអាគ្នេយ៍មានប្រទេសសរុបចំនួន11 ក្នុងនោះមានសមាជិក ASEAN ចំនួន10ប្រទេស និងអ្នកសង្កេតការណ៍(ទីម័រ/Timor-Leste)1ប្រទេស សុទ្ធតែមានករណីឆ្លងវីរុសCOVID-19។

ម៉ាឡេស៊ីគឺជាសម្បុកមេរោគធំជាងគេបង្អស់ក្នុងតំបន់អាស៊ីអាគ្នេយ៍នេះ ដោយមានអ្នកជំងឺសរុប4,683នាក់ និងអ្នកស្លាប់សរុប76នាក់។

ហ្វីលីពីនជាសម្បុកមេរោគCOVID-19 ធំជាងគេលំដាប់ទី2នៅអាស៊ីអាគ្នេយ៍ ដោយមានអ្នកជំងឺសរុប4,648នាក់ និងស្លាប់297នាក់។

ឥណ្ឌូនេស៊ីគឺជា “វាលពិឃាត” របស់វីរុសCOVID-19 ធំជាងគេលំដាប់ទី1 និងជាសម្បុកមេរោគធំជាងគេលំដាប់ទី3នៅក្នុងតំបន់នេះ ដោយមានអ្នកស្លាប់សរុបឡើងដល់373នាក់ កើន46នាក់បើធៀបនឹងម្សិលមិញ។ អ្នកជំងឺសរុបមានចំនួន4,241នាក់។

ប្រទេសថៃ៖ អ្នកជំងឺសរុប2,551នាក់ និងស្លាប់សរុប38នាក់។

សិង្ហបុរី៖ អ្នកជំងឺថ្មី មាន233នាក់ និងអ្នកជំងឺសរុបមាន2,532នាក់ ក្នុងនោះមាន8នាក់បានបាត់បង់ជីវិត។

វៀតណាម៖ អ្នកជំងឺសរុប262នាក់ (មិនទាន់មានអ្នកស្លាប់)។

ប៊្រុយណេ៖ អ្នកជំងឺសរុប136នាក់ និងអ្នកស្លាប់សរុប1នាក់។

កម្ពុជា៖ អ្នកជំងឺសរុប122នាក់ ក្នុងនោះមាន77នាក់បានជាសះស្បើយ និង45នាក់កំពុងព្យាបាល។

មីយ៉ានម៉ារ៖ អ្នកជំងឺសរុប41នាក់ និងស្លាប់សរុប4នាក់។

ប្រទេសឡាវ៖ អ្នកជំងឺសរុប19នាក់។

ទីម័រខាងកើត(Timor-Leste)៖ អ្នកជំងឺសរុប2ករណីដដែល។

ប្រភព៖ សារព័ត៌មានបរទេស

April 13, 2020

COVID-19! នាវិកជិត600នាក់របស់នាវាផ្ទុកយន្តហោះចម្បាំងអាមេរិកាំង បានឆ្លងវីរុស

កងទ័ពជើងទឹកសហរដ្ឋអាមេរិក កាលពីម្សិលមិញ(12មេសា) បានបញ្ជាក់ថា បានរកឃើញនាវិកចំនួន103នាក់នៅលើនាវាផ្ទុកយន្តហោះចម្បាំង USS Theodore Roosevelt មានផ្ទុកវីរុសCOVID-19 នាំឱ្យចំនួនអ្នកផ្ទុកវីរុសនៅលើនាវានេះកើនដល់585នាក់។

យោងតាមស្ថិតិពីកងទ័ពជើងទឹកអាមេរិកាំង សមាជិកក្រុមនាវិកប្រមាណជា90% នៃនាវា USS Theodore Roosevelt ត្រូវបានធ្វើតេស្តរកវីរុសCOVID-19 ក្នុងនោះមានលទ្ធផលវិជ្ជមានចំនួន585នាក់ និងអវិជ្ជមានចំនួន3,724នាក់។

តួលេខនៃនាវិកនៅលើនាវា USS Theodore Roosevelt ដែលបានឆ្លងវីរុស មានចំនួន75% ក្នុងចំណោមអ្នកជំងឺសរុបនៅក្នុងជួរកងទ័ពជើងទឹកសហរដ្ឋអាមេរិក។

នាវិកម្នាក់ដែលបានឆ្លងវីរុសនៅលើនាវា USS Theodore Roosevelt កាលពីថ្ងៃទី10មេសាបានសន្លប់ និងត្រូវបញ្ជូនទៅសង្គ្រោះបន្ទាន់នៅមន្ទីរពេទ្យកងទ័ពជើងទឹកនៅលើកោះ Guam។

កងទ័ពជើងទឹកសហរដ្ឋអាមេរិក បានរាយការណ៍អំពីករណីឆ្លងវីរុសCOVID-19 នៅលើនាវាផ្ទុកយន្តហោះចំនួន4គ្រឿង រួមមាននាវា Nimitz នាវា Ronald Reagan នាវា Carl Vinson និងនាវា Theodore Roosevelt រួមនឹងនាវាចម្បាំងមួយចំនួនផ្សេងទៀតផងដែរ។

សហរដ្ឋអាមេរិក បច្ចុប្បន្នមានអ្នកជំងឺសរុប554,226នាក់ កើន29,323នាក់ធៀបនឹងម្សិលមិញ ក្នុងនោះអ្នកស្លាប់មានចំនួន21,994នាក់។ ប្រទេសនេះជាសម្បុកមេរោគធំជាងគេបង្អស់នៅក្នុងពិភពលោក៕

ប្រភព៖ សារព័ត៌មានបរទេស

April 13, 2020

ជាង1.8លាននាក់ឆ្លងវីរុសCOVID-19 នៅទូទាំងពិភពលោក

ពិភពលោកទាំងមូល មានករណីឆ្លងមេរោគជាង1.8លាននាក់ និងស្លាប់ជាង114,000នាក់ដោយសារ COVID-19 ក្នុងនោះសហរដ្ឋអាមេរិក និងអឺរ៉ុបបន្តជាសម្បុកមេរោគធំជាងគេបង្អស់។

ស្ថិតិរបស់សាកលវិទ្យាល័យ Johns Hopkins បានឱ្យដឹងថា មនុស្សចំនួន1,846,680នាក់បានឆ្លងរោគ និង114,090នាក់បានបាត់បង់ជីវិត ដោយសារតែវីរុសCOVID-19 នៅក្នុងប្រទេស និងដែនដីចំនួន210 ក្នុងពិភពលោក ដោយមានអ្នកជំងឺថ្មី78,825នាក់ និងអ្នកស្លាប់ថ្មី5,809នាក់។ អ្នកជំងឺដែលបានជាសះស្បើយមានចំនួន421,497នាក់។

សហរដ្ឋអាមេរិក៖ អ្នកជំងឺសរុប554,226នាក់ កើន29,323នាក់ធៀបនឹងម្សិលមិញ ក្នុងនោះអ្នកស្លាប់មានចំនួន21,994នាក់។ ប្រទេសនេះជាសម្បុកមេរោគធំជាងគេក្នុងពិភពលោក។

អេស្ប៉ាញ៖ អ្នកជំងឺថ្មី3,804នាក់ និងអ្នកស្លាប់ថ្មី603នាក់។ អ្នកជំងឺសរុប166,831នាក់ និងអ្នកស្លាប់សរុប17,209នាក់។ ប្រទេសនេះជាសម្បុកមេរោគធំជាងគេលំដាប់ទី2ក្នុងពិភពលោក និងលំដាប់ទី1នៅអឺរ៉ុប។

អ៊ីតាលី៖ អ្នកជំងឺថ្មី4,092នាក់ និងអ្នកស្លាប់ថ្មី431នាក់។ អ្នកជំងឺសរុប156,363នាក់ និងអ្នកស្លាប់សរុប19,899នាក់។

បារាំង៖ អ្នកជំងឺថ្មី2,937នាក់ និងអ្នកស្លាប់ថ្មី561នាក់។ អ្នកជំងឺសរុប132,591នាក់ និងអ្នកស្លាប់សរុប14,393នាក់។ បារាំងជាសម្បុកមេរោគធំជាងគេលំដាប់ទី4ក្នុងពិភពលោក។

អាល្លឺម៉ង់៖ អ្នកជំងឺថ្មី2,402នាក់ និងអ្នកស្លាប់ថ្មី3,022នាក់។ អ្នកជំងឺសរុបមានចំនួន127,854នាក់។

អង់គ្លេស៖ អ្នកជំងឺសរុប84,279នាក់ ក្នុងនោះមានអ្នកស្លាប់សរុប10,612នាក់។ អ្នកស្លាប់ថ្មី មានចំនួន737នាក់។ ប្រទេសនេះជាសម្បុកមេរោគធំជាងគេលំដាប់ទី5នៅអឺរ៉ុប។

ប្រទេសចិនមិនទាន់ប្រកាសតួលេខថ្មី ប៉ុន្តែស្ថិតិចុងក្រោយបង្ហាញថា អ្នកជំងឺសរុបមាន 82,160នាក់ និងស្លាប់សរុប3,341នាក់។

អ៊ីរ៉ង់៖ អ្នកជំងឺសរុប71,686នាក់ និងអ្នកស្លាប់សរុប4,474នាក់។ ប្រទេសនេះជាសម្បុកមេរោគធំជាងគេលំដាប់ទី2នៅអាស៊ី បន្ទាប់ពីប្រទេសចិន៕

ប្រភព៖ សារព័ត៌មានបរទេស

April 13, 2020

ប្រទេសចិន៖ ឆេះនាវាចម្បាំងផ្ទុកឧទ្ធម្ភាគចក្រដំបូងដែលផលិតដោយចិន

នាវាចម្បាំងផ្ទុកឧទ្ធម្ភាគចក្រ Type-075 ដំបូងដែលត្រូវបានផលិតផ្ទាល់ដោយប្រទេសចិន បានឆេះសន្ធោសន្ធៅ បន្ទាប់ពីសាងសង់បានសម្រេចជាស្ថាពរនៅទីក្រុងសៀងហៃ ប៉ុន្តែ គេមិនទាន់ដឹងអំពីទំហំនៃការខូចខាតនៅឡើយ។

ហេតុការខាងលើនេះបានកើតឡើងនៅក្នុងរោងចក្រផលិតនាវា Hudong Zhonghua Shipyard ក្នុងទីក្រុងសៀងហៃកាលពីព្រឹកថ្ងៃទី11មេសា។ អណ្ដាតភ្លើងហាក់បានរាលដាលចេញពីបន្ទប់ផ្ទុកឧទ្ធម្ភាគចក្រ ដែលស្ថិតនៅខាងក្នុងនាវា Tepe-075។

អគ្គិភ័យនេះត្រូវបានពន្លត់ទាន់ពេល ប៉ុន្តែនាវានេះត្រូវរងការខូចខាតច្រើន។ ចំពោះមូលហេតុនៃហេតុការណ៍នេះ មិនទាន់ត្រូវបានគេឱ្យដឹងនៅឡើយ។ រីឯភាគីខាងក្រសួងការពារជាតិចិន ក៏មិនទាន់មានមតិជុំវិញបញ្ហានេះដែរ។

ទំហំរបស់នាវាផ្ទុកឧទ្ធម្ភាគចក្រនេះ ប្រហាក់ប្រហែលនឹងនាវាចម្បាំង Wasp របស់សហរដ្ឋអាមេរិក។ ប៉ុន្តែនាវានេះ អាចនឹងមានសមត្ថភាពអន់ជាងច្រើនបើធៀបនឹងនាវារបស់អាមេរិកាំង ព្រោះថា Tepe-075 មិនមានយន្តហោះដែលអាចហោះឡើងដោយប្រើផ្លូវខ្លី និងចុះចតត្រង់ពីលើ (STOVL) ដូចទៅនឹង F-35B និង MV-22 Osprey៕

ប្រភព៖ សារព័ត៌មានបរទេស

April 12, 2020

ទូរ “ATM អង្ករ” នៅវៀតណាម កំពុងពេញនិយមក្នុងវិបត្តិCOVID-19

ខណៈដែលវីរុសCOVID-19 កំពុងតែរាលដាលនៅប្រទេសវៀតណាម ពិសេសគឺនៅទីក្រុងហាណូយ និងទីក្រុងសៃហ្គន (ហូជីមិញ) សកម្មភាពមនុស្សធម៌ជាច្រើនត្រូវបានបង្កើតឡើងដើម្បីជួយសម្រាលទុក្ខលំបាករបស់គ្រួសារក្រីក្រ នោះគឺក៏មានទូរ “ATM អង្ករ” ផងដែរ។

កាលពីព្រឹកមិញ ទូរ “ATM អង្ករ” មួយកន្លែងនៅតំបន់ហាដុង រដ្ឋធានីហាណូយ ត្រូវបានបង្កើតឡើងដោយយកតម្រាប់តាមគំរូ ទូរ “ATM អង្ករ” នៅទីក្រុងហូជីមិញ ដើម្បីធ្វើជាទីតាំងចែកអង្ករដោយមិនគិតថ្លៃដល់ប្រជាជនក្រីក្រដែលកំពុងជួបបញ្ហាសេដ្ឋកិច្ចធ្ងន់ធ្ងរដោយសារវិបត្តិសុខភាពCOVID-19។ បន្ទាប់ពីចាប់ដំណើរការភ្លាម ពលរដ្ឋក្រីក្រជាច្រើន បាននាំគ្នាមកទទួលអង្ករមនុស្សធម៌ពីទូរ “ATM អង្ករ” នេះ។

សារព័ត៌មានក្នុងស្រុកបានឱ្យដឹងថា ពលរដ្ឋដែលមកទទួលអង្ករពីទូរ “ATM អង្ករ”នេះ ដំបូងគឺតម្រូវឱ្យលាងដៃដោយអាល់កុល រួចត្រូវតម្រង់ជួរតាមលំដាប់លំដោយ និងត្រូវគោរពទៅតាមវិធានការទប់ស្កាត់ការឆ្លងរាលដាលនៃវីរុសCOVID-19 ដែលត្រូវបានកំណត់ដោយរដ្ឋអំណាច និងអ្នកគ្រប់គ្រង “ATM”។

លោក Nguyen Van Thuan តំណាងរបស់ទូរ “ATM អង្ករ” ខាងលើបានឱ្យដឹងថា បន្ទាប់ពីមានការអនុញ្ញាតពីអាជ្ញាធរ លោកក៏បានដំឡើងទូរ “ATM អង្ករ”នេះ។

គណៈកម្មការគ្រប់គ្រងទូរ “ATM អង្ករ” ខាងលើ បានត្រៀមអង្ករចំនួន10តោនដើម្បីផ្ដល់ជូនអ្នកក្រីក្រ។ ពលរដ្ឋដែលមកទទួលអង្ករពីទូរ “ATM អង្ករ” នេះ នឹងទទួលបានអង្ករ1គីឡូក្រាម/លើក។ កម្មវិធីមនុស្សធម៌នេះនឹងបន្តរហូតដល់ថ្ងៃទី15មេសា ចាប់ពីម៉ោង8ព្រឹកដល់ម៉ោង18ល្ងាចជារៀងរាល់ថ្ងៃ។ លោក Thuan បានបន្តថា “បើសិនជារដ្ឋនៅតែបន្តសុពលភាពនៃបម្រាមគោចរក្នុងតំបន់នេះ ខ្ញុំនិងមិត្តភក្ដិរបស់ខ្ញុំ ក៏នឹងនៅតែបន្តសកម្មភាពមនុស្សធម៌នេះ”។

ទូរ “ATM អង្ករ” ថ្មីមួយនេះ រួមនឹងទូរ “ATM អង្ករ” ជាច្រើនផ្សេងទៀត ត្រូវបានបង្កើតឡើងដោយយោងទៅតាមគំរូ ទូរ “ATM អង្ករ” នៅទីក្រុងសៃហ្គន ភាគខាងត្បូងប្រទេសវៀតណាម។ ទូរ “ATM អង្ករ” នេះ រួមមានប៊ូតុងមួយដែលភ្ជាប់ជាមួយសន្ទះបិទបើកស្វ័យប្រវត្ត និងធុងដាក់អង្ករមួយដែលត្រូវបានបញ្ជាដោយប្រព័ន្ធឆ្លាតវៃ។ ប្រព័ន្ធដំណើរការនេះក៏អាចដឹងបានថា អ្នកដែលមកទទួលអង្ករ ពិតជាអ្នកក្រីក្រមែន ឬអត់ ហើយពួកគេបានមកទទួលអង្ករប៉ុន្មានដងផងដែរ។

អ្នកមកទទួលអង្ករ គ្រាន់តែចុចលើប៊ូតុងមួយ នោះអង្ករក្នុងទូរ “ATM អង្ករ” នឹងហូរចេញមកទៅតាមបរិមាណដែលបានកំណត់៕

ប្រភព៖ សារព័ត៌មានបរទេស

April 12, 2020

ស្ថិតិស្ដីពីករណីឆ្លង និងស្លាប់ដោយសារCOVID-19នៅអាស៊ីអាគ្នេយ៍

នៅក្នុងតំបន់អាស៊ីអាគ្នេយ៍ ប្រទេសម៉ាឡេស៊ីគឺជាសម្បុកមេរោគCOVID-19ធំជាងលំដាប់ទី1 ចំណែកឥណ្ឌូនេស៊ីវិញ គឺជា “វាលពិឃាត” របស់COVID-19 ធំជាងគេលំដាប់ទី1ផងដែរក្នុងតំបន់នេះ។

ម៉ាឡេស៊ីបច្ចុប្បន្ន មានអ្នកជំងឺសរុប4,530នាក់ និងអ្នកស្លាប់សរុប73នាក់។ អ្នកបានជាសះស្បើយមានចំនួន1,995នាក់ និងកំពុងព្យាបាល2,462នាក់។

ហ្វីលីពីន៖ អ្នកជំងឺសរុប4,428នាក់ ក្នុងនោះមានអ្នកស្លាប់247នាក់ និង157នាក់បានជាសះស្បើយ។

ឥណ្ឌូនេស៊ី៖ អ្នកជំងឺសរុប3,842នាក់ និងអ្នកស្លាប់សរុប327នាក់ ក្នុងនោះមានអ្នកស្លាប់ថ្មី21នាក់ និងជាសះស្បើយ286នាក់។

ប្រទេសថៃ៖ អ្នកជំងឺសរុប2,518នាក់ និងស្លាប់សរុប35នាក់។ អ្នកជំងឺបានជាសះស្បើយមាន1,135នាក់។

សិង្ហបុរីទើបបានរកឃើញអ្នកជំងឺថ្មី121នាក់ ធ្វើឱ្យអ្នកជំងឺសរុបឡើងដល់2,229នាក់។ អ្នកស្លាប់សរុបមាន8ករណី កើន1ករណីបើធៀបនឹងម្សិលមិញ។

វៀតណាម៖ អ្នកជំងឺសរុប258នាក់ ក្នុងនោះមាន144នាក់បានជាសះស្បើយ។

ប៊្រុយណេ៖ អ្នកជំងឺសរុប136នាក់ ក្នុងនោះមាន1នាក់បានស្លាប់ និង104នាក់បានជាសះស្បើយ។

កម្ពុជា៖ អ្នកជំងឺសរុប៖ 122នាក់ ក្នុងនោះមាន77នាក់បានជាសះស្បើយ និង45នាក់កំពុងព្យាបាល។

ប្រទេសភូមា(មីយ៉ានម៉ារ)៖ អ្នកជំងឺសរុប35នាក់ ក្នុងនោះមាន3នាក់បានស្លាប់ និង2នាក់ជាសះស្បើយ។

ប្រទេសឡាវ៖ អ្នកជំងឺសរុប18នាក់។

ទីម័រខាងកើត(Timor-Leste)៖ អ្នកជំងឺសរុប2នាក់ ក្នុងនោះមានម្នាក់បានជាសះស្បើយ។

ពិភពលោកបច្ចុប្បន្នបានរកឃើញអ្នកឆ្លងមេរោគCOVID-19សរុប1,776,157នាក់ និងអ្នកស្លាប់ដោយសារមេរោគនេះសរុប108,702នាក់នៅក្នុងប្រទេស និងដែនដីចំនួន210 ដោយអ្នកផ្ទុកមេរោគកើនជាង76,136នាក់ និងអ្នកស្លាប់កើនជាង6,145នាក់ បើធៀបនឹងម្សិលមិញ។ អ្នកជំងឺបានជាសះស្បើយមានចំនួន402,270នាក់៕

ប្រភព៖ សារព័ត៌មានបរទេស

April 12, 2020

Author: សឿន សំណាង