សឿន សំណាង - La Reine Media

សហរដ្ឋអាមេរិកមានអ្នកស្លាប់ជាង40,400នាក់ដោយសារCOVID-19

សហរដ្ឋអាមេរិកគឺជាសម្បុកមេរោគធំជាងគេបង្អស់នៅក្នុងពិភពលោក ដោយមានអ្នកជំងឺសរុប755,533នាក់ អ្នកស្លាប់សរុប40,461នាក់ និងអ្នកជំងឺជាសះស្បើយមាន67,172នាក់។

ប្រទេសនេះ បានធ្វើតេស្តរកវីរុសសរុបចំនួនជាង3,865,864នាក់ ក្នុងនោះមាន617,555នាក់ត្រូវបានធ្វើតេស្តនៅ New York។ រដ្ឋ New York គឺជា “វាលពិឃាត” របស់មេរោគCOVID-19 ធំជាងគេនៅសហរដ្ឋអាមេរិក ដោយមានអ្នកស្លាប់ដល់ទៅ14,451នាក់។

ពលរដ្ឋមួយចំនួននៅរដ្ឋ Minnesota, Michigan, Ohio, Carolina ខាងជើង, Virginia និងរដ្ឋមួយចំនួនផ្សេងទៀត បានធ្វើបាតុកម្មកាលពីចុងសប្ដាហ៍កន្លងទៅដើម្បីជំទាស់ទៅនឹងបម្រាមគោចរដែលអូសបន្លាយពេលយូរ។ លោក Trump ក៏បានគាំទ្របាតុកម្មនេះដែរ ដោយយល់ថា គួរតែបើកដំណើរការសេដ្ឋកិច្ចឡើងវិញសម្រាប់រដ្ឋណាដែលមានអ្នកជំងឺកូរ៉ូណាតិច និងស្ថានភាពមិនអាក្រក់ខ្លាំង។

លោក Trump កាលពីថ្ងៃទី17មេសា ក៏បានណែនាំឱ្យបើកដំណើរការសេដ្ឋកិច្ចឡើងវិញ ក្រោយCOVID-19 ដោយគូសវាសការបើកដំណើរការសេដ្ឋកិច្ចសហរដ្ឋអាមេរិកជា3ដំណាក់កាល។ ការណែនាំនេះមិនបានលើកឡើងលម្អិតអំពីកាលបរិច្ឆេទជាក់លាក់នោះទេ ប៉ុន្តែ គម្រោងនេះបានលើកទឹកចិត្តឱ្យបណ្ដារដ្ឋ សម្រេចចិត្តដោយខ្លួនឯង ដោយយោងទៅលើស្ថានភាពជាក់ស្ដែងនៃរដ្ឋនីមួយៗ។

ពិភពលោកទាំងមូលបានរកឃើញអ្នកផ្ទុកមេរោគCOVID-19 ជិត2.4លាននាក់ ក្នុងនោះមានអ្នកជំងឺជិត165,000នាក់បានបាត់បង់ជីវិត ដែលភាគច្រើននៅសហរដ្ឋអាមេរិក និងបណ្ដាប្រទេសនៅអឺរ៉ុប៕

ប្រភព៖ សារព័ត៌មានបរទេស

April 20, 2020

COVID-19! សិង្ហបុរីក្លាយជាសម្បុកមេរោគធំបំផុតនៅអាស៊ីអាគ្នេយ៍

សិង្ហបុរីបានរកឃើញអ្នកផ្ទុកវីរុសCOVID-19ថ្មីជិត600នាក់បន្ថែមទៀត ធ្វើឱ្យប្រទេសនេះក្លាយជាសម្បុកមេរោគធំជាងគេបង្អស់នៅអាស៊ីអាគ្នេយ៍ ខណៈតំបន់នេះក៏បានរកឃើញអ្នកជំងឺថ្មីជាង1,200នាក់នៅថ្ងៃនេះ។

ថ្ងៃនេះ សិង្ហបុរីបានប្រកាសថា បានរកឃើញករណីផ្ទុកមេរោគកូរ៉ូណា596នាក់បន្ថែមទៀត នាំឱ្យតួលេខនៃអ្នកជំងឺសរុបកើនដល់6,588នាក់ ខណៈតួលេខនៃអ្នកស្លាប់នៅដដែល ពោលគឺ11នាក់។ ដូច្នេះ ប្រទេសនេះបានក្លាយជាសម្បុកមេរោគធំជាងគេនៅអាស៊ីអាគ្នេយ៍។ ភាគច្រើននៃអ្នកជំងឺថ្មីនៅសិង្ហបុរីគឺជាពលករបរទស។

សាស្ត្រាចារ្យរង Alex Cook អនុប្រធានផ្នែកស្រាវជ្រាវនៅសាលាសុខាភិបាលសាធារណៈ Saw Swee Hock នៃសាកលវិទ្យាល័យជាតិសិង្ហបុរី បានឱ្យដឹងថា អ្នកជំងឺថ្មីដែលជាពលករបរទេស ស្នាក់នៅក្នុងលំនៅឋានសម្រាប់ពលករបរទេសកាលពីសប្ដាហ៍កន្លង អាចជាសញ្ញាបង្ហាញថា ពលករបរទេសយ៉ាងតិច10,000-20,000នាក់អាចឆ្លងវីរុសCOVID-19 នៅចុងខែមេសានេះ។

ឥណ្ឌូនេស៊ី ជាសម្បុកមេរោគធំជាងគេលំដាប់ទី2ក្នុងតំបន់ បានរាយការណ៍ថា បានរកឃើញអ្នកជំងឺថ្មី327នាក់ និងអ្នកស្លាប់ថ្មី47នាក់ ធ្វើឱ្យអ្នកជំងឺសរុបកើនដល់ 6,575នាក់ និងអ្នកស្លាប់សរុបមានចំនួន582នាក់។

វេជ្ជបណ្ឌិត20នាក់បានបាត់បង់ជីវិតចាប់តាំងពីវីរុសនេះបានចាប់ផ្ដើមបង្ហាញវត្តមាននៅឥណ្ឌូនេស៊ី។ ក្រុមអ្នករិះគន់បានព្រមានថា តួលេខនៃអ្នកស្លាប់ដែលត្រូវបានប្រកាសគឺមានចំនួនទាបខ្លាំងណាស់បើធៀបនឹងស្ថានភាពជាក់ស្ដែងនៅក្នុងប្រទេសមួយដែលមានការធ្វើតេស្តCOVID-19 កម្រិតទាបបំផុតក្នុងពិភពលោក។

ហ្វីលីពីន រកឃើញអ្នកជំងឺថ្មី172នាក់ និងអ្នកស្លាប់ថ្មី12នាក់បន្ថែមទៀត នាំឱ្យអ្នកជំងឺCOVID-19 សរុបកើនដល់6,259នាក់ និងអ្នកស្លាប់កើនឡើងដល់409នាក់។

ម៉ាឡេស៊ី រកឃើញអ្នកជំងឺថ្មី84នាក់ នាំឱ្យតួលេខនៃអ្នកជំងឺសរុបឡើងដល់5,389នាក់ ខណៈដែលតួលេខនៃអ្នកស្លាប់សរុបគឺ89នាក់ បន្ទាប់ពីមានអ្នកស្លាប់ថ្មី1ករណីបន្ថែមទៀត។ រាជរដ្ឋាភិបាលម៉ាឡេស៊ី បានដាក់បម្រាមគោចរទូទាំងប្រទេសចាប់ពីថ្ងៃទី18មីនា ដើម្បីទប់ស្កាត់វីរុសCOVID-19។

ប្រទេសថៃ៖ អ្នកជំងឺថ្មី32នាក់ និងអ្នកជំងឺសរុប2,765នាក់។ ចំនួនអ្នកស្លាប់ដោយសារវីរុសកូរ៉ូណានៅប្រទេសនេះមាន47នាក់ដដែល។

កម្ពុជា វៀតណាម ឡាវ និងទីម័រខាងកើតគឺជាប្រទេសនៅអាស៊ីអាគ្នេយ៍ដែលមិនទាន់មានអ្នកស្លាប់ដោយសារវីរុសCOVID-19 នៅឡើយ។ ទីម័រខាងកើតគឺជាប្រទេសដែលមានករណីឆ្លងវីរុសកូរ៉ូណាទាបជាងគេបង្អស់ក្នុងតំបន់អាស៊ីអាគ្នេយ៍៕

ប្រភព៖ សារព័ត៌មានបរទេស

April 19, 2020

ក្រសួងសុខាភិបាល៖ អ្នកជំងឺCOVID-19 2នាក់ទៀតបានជាសះស្បើយនៅថ្ងៃនេះ

កម្ពុជាមានអ្នកជំងឺដែលបានជាសះស្បើយសរុបឡើងដល់105នាក់ហើយ បន្ទាប់ពីមានអ្នកជំងឺ2នាក់ទៀតបានជាសះស្បើយ។

អ្នកជំងឺដែលបានជាសះស្បើយនេះរួមមាន ស្ដ្រីអ្នកទេសចរជនជាតិវៀតណាមដែលស្នាក់នៅបណ្ដោះអាសន្នក្នុងតំបន់កោះពេជ្រ និងកុមារជនជាតិខ្មែរនៅខេត្តសៀមរាប។ អ្នកទាំងនេះ ទទួលបានលទ្ធផលអវិជ្ជមាន2លើកក្នុងការធ្វើតេស្តរកមេរោគCOVID-19។ ពួកគេត្រូវបានអនុញ្ញាតឱ្យចេញពីមន្ទីរពេទ្យហើយ។ នេះបើតាមការឱ្យដឹងពីក្រសួងសុខាភិបាល។

គិតមកដល់បច្ចុប្បន្ន កម្ពុជាមានអ្នកជំងឺCOVID-19 សរុប122នាក់ ដោយព្រឹកនេះមិនមានករណីឆ្លងថ្មីនោះទេ។ អ្នកជំងឺដែលកំពុងទទួលការព្យាបាលនៅមន្ទីរពេទ្យ នៅសល់ចំនួន17នាក់ទៀតតែប៉ុណ្ណោះ៕

April 19, 2020

ជិត160,000នាក់ស្លាប់ដោយសារCOVID-19 នៅទូទាំងពិភពលោក

នៅក្នុងពិភពលោកទាំងមូល អ្នកស្លាប់ដោយសារឆ្លងវីរុសCOVID-19 បានកើនឡើងជិតដល់160,000នាក់ ក្នុងចំណោមអ្នកជំងឺជាង2.3លាននាក់ ដែលភាគច្រើនគឺនៅសហរដ្ឋអាមេរិក និងបណ្ដាប្រទេសនៅទ្វីបអឺរ៉ុប។

ស្ថិតិពីសាកលវិទ្យាល័យ Johns Hopkins បានឱ្យដឹងថា ពិភពលោកបានរកឃើញអ្នកផ្ទុកវីរុសCOVID-19 ចំនួន2,317,759នាក់ នៅក្នុងប្រទេសនិងដែកដីចំនួន210 ក្នុងនោះមាន159,691នាក់បានបាត់បង់ជីវិត និង592,319នាក់បានជាសះស្បើយ។

សហរដ្ឋអាមេរិកនៅតែជាសម្បុកមេរោគធំជាងបង្អស់ក្នុងពិភពលោក ដោយមានអ្នកជំងឺ732,197នាក់ និងអ្នកស្លាប់38,721នាក់ ខណៈ64,697នាក់បានជាសះស្បើយ។

រដ្ឋ New York ដែលជាស្នូលនៃរោគរាតត្បាតCOVID-19 នៅសហរដ្ឋអាមេរិក មានអ្នកជំងឺដល់ទៅ222,284នាក់ ក្នុងនោះមាន14,636នាក់បានបាត់បង់ជីវិត។ រដ្ឋនេះនៅតែបន្តពន្យារសុពលភាពនៃបម្រាមគោចររហូតដល់ថ្ងៃទី15ឧសភា។

សម្បុកមេរោគធំជាងគេលំដាប់ទី2ក្នុងពិភពលោកគឺប្រទេសអេស្ប៉ាញ បានឱ្យដឹងថា បានរកឃើញអ្នកជំងឺថ្មី887នាក់ និងអ្នកស្លាប់ថ្មី637នាក់ ធ្វើឱ្យអ្នកជំងឺសរុបកើនដល់191,726នាក់ និងអ្នកស្លាប់សរុប20,639នាក់។ តួលេខនៃករណីឆ្លងមេរោគ និងស្លាប់ កំពុងថយចុះ ខណៈដែលអ្នកជំងឺបានជាសះស្បើយ កើនឡើងជិតដល់75,000នាក់។

ក៏ប៉ុន្តែ នាយករដ្ឋមន្ត្រី Pedro Sanchez កាលពីម្សិលមិញបានសម្រេចអូសបន្លាយបម្រាមគោចរទូទាំងប្រទេស រហូតដល់ថ្ងៃទី9ឧសភា។

អ៊ីតាលី៖ អ្នកជំងឺថ្មី3,491នាក់ អ្នកជំងឺសរុប175,925នាក់ និងអ្នកស្លាប់ថ្មី482នាក់ អ្នកស្លាប់សរុប23,227នាក់។ ប្រទេសនេះក៏បន្តសុពលភាពនៃបម្រាមគោចររហូតដល់ថ្ងៃទី3ឧសភា ប៉ុន្តែ បានអនុញ្ញាតឱ្យរោងចក្រ និងហាងមួយចំនួនដំណើរការឡើងវិញចាប់ពីថ្ងៃទី14មេសា។

បារាំងរកឃើញអ្នកជំងឺថ្មី3,824នាក់ អ្នកស្លាប់ថ្មី642នាក់ និងអ្នកជំងឺសរុប151,793នាក់ អ្នកស្លាប់សរុប19,323នាក់។ ប្រទេសនេះបានចាប់ផ្ដើមដាក់បម្រាមគោចរពីថ្ងៃទី17មីនា ប៉ុន្តែប្រធានាធិបតីបារាំង លោក Macron បានប្រកាសក្នុងសប្ដាហ៍នេះថា បម្រាមគោចរនេះអាចនឹងត្រូវបន្ធូរបន្ថយចាប់ពីថ្ងៃទី11ឧសភា។

អាល្លឺម៉ង៖ អ្នកជំងឺថ្មី1,945នាក់ អ្នកស្លាប់ថ្មី107នាក់ និងអ្នកជំងឺសរុប143,342នាក់ អ្នកស្លាប់សរុបឡើងដល់4,459នាក់។ រដ្ឋមន្ត្រីសុខាភិបាល Jens Spahn ថ្លែងថា តួលេខនៃករណីឆ្លងវីរុសថ្មីនៅអាល្លឺម៉ង់ “បានថយចុះច្រើន” ហើយសម្បុកមេរោគកំពុង “ត្រូវបានគ្រប់គ្រង”។

អង់គ្លេស៖ អ្នកជំងឺថ្មី5,525នាក់ អ្នកស្លាប់ថ្មី888នាក់ ធ្វើឱ្យអ្នកជំងឺសរុបកើនដល់114,217នាក់ អ្នកស្លាប់សរុប15,464នាក់។ សាស្ត្រាចារ្យ Anthony Costello មកពីវិទ្យាស្ថានសុខាភិបាលសកល UCL នៅទីក្រុងឡុងដ៍បានព្រមានថា អ្នកស្លាប់ដោយសារវីរុសកូរ៉ូណាអាចកើនដល់ជាង40,000នាក់ ព្រោះតែរាជរដ្ឋាភិបាលមានការយឺតយ៉ាវក្នុងការចាត់វិធានការទប់ស្កាត់។

ប្រទេសចិន៖ តួលេខចុងក្រោយបង្ហាញថា មានអ្នកជំងឺសរុប8,719នាក់ និងអ្នកស្លាប់សរុប4,632នាក់។

អ៊ីរ៉ង់បន្តជាសម្បុកមេរោគធំជាងគេលំដាប់ទី2នៅអាស៊ី ដោយមានអ្នកជំងឺសរុប80,568នាក់ និងអ្នកស្លាប់សរុប5,031នាក់។ ប្រទេសនេះទើបតែបានរកឃើញអ្នកជំងឺថ្មី1,374នាក់ និងអ្នកស្លាប់ថ្មី73នាក់បន្ថែមទៀត។ នេះជាថ្ងៃទី5ហើយដែលប្រទេសនេះមានអ្នកស្លាប់ក្រោម100នាក់ក្នុងមួយថ្ងៃ៕

ប្រភព៖ សារព័ត៌មានបរទេស

April 19, 2020

“ទ្រឹស្ដីឃុបឃិត” សង្ស័យថា Bill Gates ជាអ្នកបង្កើតវីរុសCOVID-19(មានវីដេអូ)

ការវាយប្រហារទៅលើមហាសេដ្ឋីលំដាប់លេខ2ក្នុងពិភពលោក កំពុងតែកើតឡើងនៅពាសពេញបណ្ដាញសង្គម Facebook Twitter និង Youtube ដោយចោទប្រកាន់ ឬសង្ស័យថា លោកជាអ្នកបង្កើតវីរុសកូរ៉ូណា ដើម្បីបានចំណេញ។

កាលពីឆ្នាំ2015 នៅក្នុងកម្មវិធី TED Talks លោក Bill Gates បានព្រមានថា បញ្ហាប្រឈមធំបំផុតរបស់មនុស្សលោក មិនមែនជាសង្គ្រាមនុយក្លេអែរនោះទេ ប៉ុន្តែវាគឺជាវីរុសឆ្លងមួយប្រភេទ ដែលនឹងគំរាមកំហែងដល់ជីវិតមនុស្សរាប់លាននាក់។

ការព្យាកររបស់លោក Bill Gates បានក្លាយជាការពិត នៅពេលCOVID-19 បានកើតឡើង។ ប្រសាសន៍កាលពី5ឆ្នាំមុនរបស់សហស្ថាបនិក Microsoft បានក្លាយជាប្រធានបទមួយដែលត្រូវបានអ្នកលេងអ៊ីនធើណិតចាប់អារម្មណ៍ ដោយមានអ្នកចូលមើលជាង25លានលើកនៅលើ Youtube។ ក៏ប៉ុន្តែ ក្រុមអ្នកប្រឆាំងវ៉ាក់សាំង និងក្រុមអ្នកប្រាជ្ញឆ្វេងនិយម បានយកវីដេអូខាងលើនេះ ទុកដូចជាភ័ស្ដុតាងដើម្បីចោទលោក Bill Gates ថា បានរៀបចំគម្រោងប្រើប្រាស់វីរុសនេះដើម្បីគ្រប់គ្រងប្រព័ន្ធសុខាភិបាលទូទាំងពិភពលោក។

យោងតាមក្រុមហ៊ុនវិភាគទូរគមនាគមន៍ Zignal Labs ទ្រឹស្ដីឃុបឃិតទាក់ទិននឹងលោក Bill Gates គឺជាព័ត៌មានដែលត្រូវបានគេយកចិត្តទុកដាក់បំផុតក្នុងចំណោមដំណឹងចចាមអារ៉ាមស្ដីអំពីវីរុសកូរ៉ូណា។ ចាប់ពីខែកុម្ភៈ ដល់ខែមេសានេះ មានការនិយាយដល់បញ្ហានេះដល់ទៅ1.2លានលើក នៅលើបណ្ដាញសង្គម និងទូរទស្សន៍ ពោលគឺច្រើនជាង33% បើធៀបនឹងទ្រឹស្ដីឃុបឃិតទាក់ទិននឹង5G។

ស្ថិតិរបស់សារព័ត៌មាន New York Times បានបង្ហាញថា មានអត្ថបទជាង16,000ត្រូវបានបង្ហោះនៅលើ Facebook ជាមួយនឹងការបញ្ចេញមតិជិត900,000លើកទាក់ទិននឹងការចោទប្រកាន់ខាងលើនេះ។ នៅលើ Youtube គេឃើញមានវីដេអូចំនួន10 ដែលបានចោទលោក Bill Gates ដែលវាស្ថិតក្នុងចំណោមវីដេអូកំពូលៗត្រូវបានបង្ហោះនៅក្នុងខែមីនា និងខែមេសា ដោយមានអ្នកចូលមើលជិត5លានលើក។

រលកនៃការសង្ស័យទៅលើលោក Bill Gates កាន់តែធំឡើងៗនៅពេលលោកបានស្នើឱ្យបិទសាលារៀនទូទាំងសហរដ្ឋអាមេរិក និងរិះគន់ទៅលើការផ្អាកជំនួយដល់អង្គការសុខភាពពិភពលោកពីសំណាក់ប្រធានាធិបតី Donald Trump។ Claire Wardle នាយកប្រតិបត្តិរបស់ First Draft ដែលជាអង្គការប្រយុទ្ធប្រឆាំងនឹងការខ្វែងគំនិតគ្នាលើអ៊ីនធឺណិតបានថ្លែងថា “បណ្ដាទ្រឹស្ដីឃុបឃិតស្ដីអំពីលោក Bill Gates អាចធ្វើឱ្យខូចខាតដល់ការខិតខំប្រឹងប្រែងស្រាវជ្រាវវ៉ាក់សាំងប្រឆាំងវីរុសកូរ៉ូណា។ ព័ត៌មានក្លែងក្លាយនេះ អាចបង្កជាការផ្ដួចផ្ដើមសម្រាប់យុទ្ធនាការអំពាវនាវឱ្យអ្នករាល់គ្នាបដិសេធការចាក់វ៉ាក់សាំងប្រឆាំងវីរុស”។

មកដល់បច្ចុប្បន្ន មហាសេដ្ឋី Bill Gates មិនទាន់មានប្រតិកម្មណាមួយទៅនឹងព័ត៌មានក្លែងក្លាយខាងលើនៅឡើយ។ កាលពីថ្ងៃទី15មេសា មហាសេដ្ឋីរូបនេះបានផ្ញើការថ្លែងអំណរអរគុណទៅដល់បុគ្គលិកសុខាភិបាល។ សាររបស់លោក ទទួលបានមតិឆ្លើយតបជាង14,000លើក ក្នុងនោះគេឃើញមានមតិជ្រុលនិយមមិនតិចនោះទេ។ ទន្ទឹមនឹងនេះ រូបភាព poster មួយនៃខ្សែភាពយន្ត Kill Bill ត្រូវបានកាត់តទៅជា “Kill Bill Gates” ក៏បានបង្ហាញខ្លួននៅក្នុងថ្ងៃជាមួយគ្នានោះដែរ៕

ប្រភព៖ សារព័ត៌មានបរទេស

April 18, 2020

នៅក្នុងពិភពលោកទាំងមូល តើមានប៉ុន្មានប្រទេសឱ្យប្រាកដ?

យោងតាមមាត្រាទី1នៃអនុសញ្ញា Montevideo ស្ដីអំពីសិទ្ធិ និងកាតព្វកិច្ចរបស់បណ្ដាប្រទេស ដែលត្រូវបានចុះហត្ថលេខានៅទីក្រុង Montevideo ប្រទេសអ៊ុយរូហ្គាយកាលពីថ្ងៃទី26ធ្នូ ឆ្នាំ1933 បានបញ្ជាក់ថា ប្រទេសមួយ គឺជាប្រធានបទមួយរបស់ច្បាប់អន្តរជាតិ(ប្រទេសមួយដែលមានអធិបតេយ្យភាពទាំងស្រុង) ត្រូវតែមានមានស្ដង់ដាដូចតទៅ៖ ចំនួនប្រជាជនមានស្ថេរភាព ដែនដីមានទីតាំងកំណត់ជាក់លាក់ មានរដ្ឋាភិបាល និងមានលទ្ធភាពក្នុងការចូលរួមទំនាក់ទំនងអន្តរជាតិ។

ជាការពិត មានប្រទេសមួយចំនួនបានចាត់ទុកខ្លួនឯងថាមានឯករាជ្យ ប៉ុន្តែពួកគេមិនត្រូវបានទទួលស្គាល់ដោយអន្តរជាតិ ឬក៏មានការទទួលស្គាល់ទូលំទូលាយ ប៉ុន្តែរដ្ឋាភិបាលមិនមានសិទ្ធិអំណាចគ្រប់គ្រាន់។

ប្រទេសឯករាជ្យនីមួយៗ ត្រូវតែមាន៖

ដែនដីដោយឡែក ដែលមានព្រំដែនច្បាស់លាស់
ប្រជាជនរស់នៅអចិន្ត្រៃយ៍
រដ្ឋាភិបាល និងស្ថាប័នច្បាប់ផ្សេងៗ
អធិបតេយ្យភាព(ដំណើរការដោយឯករាជ្យពីប្រទេសផ្សេង និងមានសិទ្ធិអំណាចគ្រប់គ្រងដាច់ខាតនៅលើដែនដីរបស់ខ្លួន គ្រប់គ្រងនិងការពារវាពីការឈ្លានពានពីខាងក្រៅ អនុវត្តច្បាប់និងប្រមូលពន្ធ)
លទ្ធភាពនៃការរក្សាទំនាក់ទំនងជាមួយភាគីខាងក្រៅ(តាមជាក់ស្ដែង ទំនាក់ទំនងការទូតផ្លូវការ អាចត្រូវបានបង្កើតឡើងនៅពេលប្រទេសមួយត្រូវបានទទួលស្គាល់ដោយបណ្ដាប្រទេសជាដៃគូ)។

អ្វីខ្លះជាការចាំបាច់ជាដាច់ខាតសម្រាប់ប្រទេសនីមួយៗ?

អ្វីៗដែលត្រូវការចាំបាច់ជាដាច់ខាតសម្រាប់ប្រទេសនីមួយៗនោះគឹ ទង់ជាតិ ភ្លេងជាតិ និមិត្តសញ្ញាជាតិ រដ្ឋធានី/រាជធានី អត្តសញ្ញាណប័ណ្ណរបស់ពលរដ្ឋ ភាសា រូបិយប័ណ្ណ លេខកូដISOជាតិ(ISO Country Codes) លេខកូដទូរស័ព្ទអន្តរជាតិ និងឈ្មោះប្រទេស។

ក៏ប៉ុន្តែ បើសិនបើគេបូករួមទាំងបណ្ដាប្រទេសដូចខាងក្រោមនេះ នោះពិភពលោកទាំងមូលបច្ចុប្បន្ន មានប្រទេសសរុបដល់ទៅ204ប្រទេស។ ក្នុងនោះរួមមាន៖

193ប្រទេសដែលត្រូវបានទទួលស្គាល់ជាសមាជិកផ្លូវការរបស់អង្គការសហប្រជាជាតិ។
2ប្រទេសគឺជាអ្នកសង្កេតការណ៍នៅអង្គការសហប្រជាជាតិ ៖ ទីក្រុងវ៉ាទីកង់(Vatican) និងប៉ាលេស្ទីន(Palestine)។ មូលហេតុដែលធ្វើឱ្យដែនដីទាំងនេះមិនមែនជាប្រទេសពេញសិទ្ធិ គឺព្រោះតែប្រទេសជាច្រើនមិនទទួលស្គាល់ថាជាប្រទេស។
2ប្រទេសដែលត្រូវបានប្រទេសជាច្រើនទទួលស្គាល់ និងមានឯករាជ្យជាក់ស្ដែងនោះគឺកោះតៃវ៉ាន់ (មាន19ប្រទេសជាសមាជិកអង្គការសហប្រជាជាតិ និងទីក្រុងវ៉ាទីកង់រក្សាទំនាក់ទំនងជាមួយ ជាផ្លូវការ) និងដែនដី កូសូវ៉ូ/Kosovo (111ប្រទេសជាសមាជិកអង្គការសហប្រជាជាតិ 23ប្រទេសក្នុងចំណោម28ប្រទេសនៃសហភាពអឺរ៉ុប 24ក្នុងចំណោម28នៃសមាជិកណាតូ/NATO 35ក្នុងចំណោម61នៃសមាជិកអង្គការសហប្រតិបត្តិការឥស្លាមទទួលស្គាល់)។
1ប្រទេសដែលទទួលស្គាល់ដោយប្រទេសជាច្រើន ប៉ុន្តែមិនមានឯករាជ្យនៅក្នុងស្ថានភាពជាក់ស្ដែង នោះគឺដែនដី សាហារ៉ាខាងលិច/Western Sahara (សហភាពអាហ្វ្រិក និងប្រទេសយ៉ាងតិចចំនួន41ផ្សេងទៀត យល់ថានេះជាដែនដីដែលមានអាធិបតេយ្យ ប៉ុន្តែកំពុងត្រូវបានភាគីផ្សេងកាន់កាប់)។
6ប្រទេសដែលបានប្រកាសឯករាជ្យ ប៉ុន្តែមិនត្រូវបានទទួលស្គាល់ នោះគឺដែនដី អាបាខាហ្សី/Abkhazia (មានតែប្រទេសរុស្ស៊ី នីការ៉ាហ្គ័/Nicaragua វេណេហ្ស៊ុយអេឡា/Venezuela ណូរូ/Nauru ទូវ៉ាលូ/Tuvalu និងប្រទេស វ៉ានូអាទូ/Vanuatu តែប៉ុណ្ណោះដែលបានទទួលស្គាល់)។ ប្រទេសសាយព្រឺសខាងជើង/Northern Cyprus(ទួរគីជាអ្នកទទួលស្គាល់)។ ប្រទេសអូសេទីខាងត្បូង/South Ossetia(ប្រទេសរុស្ស៊ី នីការ៉ាហ្គ័/Nicaragua វេណេហ្ស៊ុយអេឡា/Venezuela និងប្រទេសណូរូ/Nauru ជាអ្នកទទួលស្គាល់)។ ចំណែកប្រទេសសូម៉ាលីឡែនដ៍/Somaliland ប្រទេសត្រែនស្នីសទ្រា/Transnistria និងប្រទេសណេហ្គ័ណូ-ការ៉ាបាក/Nagorno – Karabakh មិនទាន់មានប្រទេសណាមួយទទួលស្គាល់នៅឡើយ៕

ប្រភព៖ សារព័ត៌មានបរទេស

April 18, 2020

គិលានុបដ្ឋាកជនជាតិថៃម្នាក់ ធ្វើការនៅក្នុងបន្ទប់ ICU រៀបរាប់ពី វិនាទីសោកសង្រេងរបស់អ្នកជំងឺកូវីដ-19 លាបងប្អូននៅលើ FaceTime មុនផុតដង្ហើមស្លាប់

គិលានុបដ្ឋាកជនជាតិថៃម្នាក់ ធ្វើការក្នុងបន្ទប់ ICU ក្នុងមន្ទីរពេទ្យ នៃមជ្ឈមណ្ឌលព្យាបាលអ្នកជំងឺកូវីដ-19 នៅទីក្រុងដែលមានប្រាក់ចិញ្ចឹមជីវិតថ្លៃបំផុតក្នុងសហរដ្ឋអាមេរិក បានរៀបរាប់អំពីជ្រុងមួយនៃជីវិតការធ្វើការងារដែលប្រថុយប្រថាននឹងការឆ្លងមេរោគកូវីដ-19 គ្រប់ពេលវេលា…ថា៖

“ខ្ញុំចែករំលែករឿងរ៉ាវនេះ គឺដើម្បីចង់ឱ្យមនុស្សលោកយើងភ្ញាក់រឭកឡើង យល់ដឹងឱ្យច្បាស់ តែមិនស្លន់ស្លោនឹងស្ថានការណ៍កូវីដ-19 ដែលកំពុងរាតត្បាតទូទាំងពិភពលោក។ សុំឱ្យអ្នកទាំងអស់គ្នារួមដៃគ្នា និងចូលរួមប្រតិបត្តិយ៉ាងម៉ឺងម៉ាត់នៅតាមតំបន់ដែលយើងរស់នៅ តាមដានព័ត៌មានយ៉ាងតាំងស្មារតី ដើម្បីកុំឱ្យត្រូវនាំមនុស្ស ដែលយើងស្រឡាញ់ទៅដល់ស្ថានការណ៍អាសន្ន ដូចក្នុងប្រទេសអ៊ីតាលី ដែលត្រួវជ្រើសរើសថា តើអ្នកណាដែលត្រូវទុកឱ្យរស់ អ្នកណាដែលត្រូវទុកចោលឱ្យស្លាប់ ព្រោះបើសិនជាស្លាប់ វាជារឿងដ៏គួរឱ្យសោកសៅជាទីបំផុត ព្រោះនឹងគ្មានឱកាសបានជួប បានលាបងប្អូនញាតិមិត្ត ឬមនុស្សដែលយើងស្រឡាញ់ទាំងនោះឡើយ”

លោក ម៉េក ខាំថៃ គិលានុបដ្ឋាកជនជាតិថៃ ធ្វើការក្នុងបន្ទប់ ICU របស់មន្ទីរពេទ្យ ក្នុងមជ្ឈមណ្ឌលសម្រាប់អ្នកជំងឺដែលឆ្លងមេរោគកូវីដ-19 នៅទីក្រុងសានហ្វ្រានស៊ីស្កូ រដ្ឋកាលីហ្វ័រនៀ សហរដ្ឋអាមេរិក បានរៀបរាប់ប្រាប់សារព័ត៌មានរបស់ប្រទេសថៃមួយ អំពីរឿងរ៉ាវដ៏សែនសោកសង្រេង អំពីមេរោគកូវីដ-19សម្លាប់អ្នកជំងឺ និងជីវិតការងារនៅក្នុងបន្ទប់ ICU។

លោក ម៉េក វីរបុរសអ្នកប្រយុទ្ធឈុតស ប្រថុយជីវិតតស៊ូមេរោគវីរុសកូវីដ-19

ធ្ងន់ធ្ងរ ប្រថុយនឹងការឆ្លងមេរោគ តែធ្វើដោយចិត្តស្រឡាញ់!

បង្ហាញពីជីវិតការធ្វើការនៅក្នុងបន្ទប់ ICU ប្រថុយដោយជីវិតគ្រប់វិនាទី

ការធ្វើការនៅក្នុងបន្ទប់ ICU ព្យាបាលអ្នកជំងឺកូវីដ-19 លោក ម៉េក រៀបរាប់ថា ចាប់តាំងពីថ្ងៃទី25 ខែមីនា ឆ្នាំ2020 មក លោកអភិបាលក្រុងសានហ្វ្រានស៊ីស្កូ បានប្រកាសជាផ្លូវការ ឱ្យមន្ទីរពេទ្យមួយនេះ ធ្វើជាមជ្ឈមណ្ឌលព្យាបាលអ្នកជំងឺកូវីដ-19 ប្រចាំទីក្រុងសានហ្វ្រានស៊ីស្កូ។ គ្រូពេទ្យ គិលានុបដ្ឋាក និងបុគ្គលិកពេទ្យគ្រប់រូប បាននាំគ្នាធ្វើការយ៉ាងខ្លាំងក្លា និងសកម្ម។ សម្រាប់លោក ម៉េក ជាធម្មតា ធ្វើការ 8ម៉ោងក្នុង 1ថ្ងៃ និង 4ថ្ងៃក្នុង1សប្ដាហ៍ តែបច្ចុប្បន្ន ត្រូវធ្វើការ 8ថ្ងៃជាប់ៗគ្នា ដោយមិនបានឈប់សម្រាក និងធ្វើការអូធីវែង 16ម៉ោង រយៈពេល 4ថ្ងៃ ឆ្លាស់គ្នាជាមួយមិត្តរួមការងារ ម្នាក់ 30នាទី។

អ្នកជំងឺកូវីដ-19 ដែលចូលមកព្យាបាលក្នុងមន្ទីរពេទ្យ មានរៀងរាល់ថ្ងៃ ស្ថិតក្នុងអំឡុងអាយុ 25-80ឆ្នាំ។ ការធ្វើការនៅក្នុងបន្ទប់ ICU នឹងជួបអ្នកជំងឺដែលមានអាការដកដង្ហើមមិនរួច ត្រូវដាក់ម៉ាស៊ីនជួយដកដង្ហើម។ អាការរបស់អ្នកជំងឺម្នាក់ៗ អាស្រ័យលើអាយុ និងរោគប្រចាំកាយរបស់ពួកគេ។ ត្រូវមើលប្រព័ន្ធបេះដូង ដង្ហើម ថ្លើម ក្រលៀន សួត ប្រព័ន្ធទឹកមូត្រ ប្រព័ន្ធបន្ទោបង់លាមក និងដាក់បំពង់ប្រព័ន្ធរំលាយអាហារឱ្យបើមានអាការសន្លប់ ឬកូម៉ា ហើយអ្នកខ្លះបាត់បង់ស្មារតីទាំងស្រុងក៏មានច្រើនដែរ។

ក្នុងការធ្វើការ ដែលត្រូវនៅក្នុងបន្ទប់សម្ពាធឈាមអវិជ្ជមាន(Negative pressure) ដ៏តូចចង្អៀត ជាមួយអ្នកជំងឺរយៈពេល 5-6ម៉ោង បើសិននឹងប្រាប់ថា មិនខ្លាចឆ្លងមេរោគកូវីដ-19នោះ លោកម៉េក ប្រាប់ថា ប្រហែលមិនមែនជាការពិតទេ។ ការប្រតិបត្តិការងារម្ដងៗ ត្រូវប្រយ័ត្នប្រយែង និងការពារខ្លួនឯងកាន់តែខ្លាំងឡើង មិនឱ្យឆ្លងមេរោគ ដើម្បីឱ្យបាននៅព្យាបាលអ្នកជំងឺ ឱ្យបានច្រើនៗនាក់ទៀត។ មុនចូលបន្ទប់ ICU ត្រូវស្លៀក និងបំពាក់ឧបករណ៍ការពារ PPE តាំងពីក្បាលដល់ចុងជើង មើលទៅដូចអ្នកបើកយានអវកាស ត្រូវពាក់ម៉ាស់ការពារ 2ជាន់ ទាំង Face shield វ៉ែនតា ម៉ាស់N95 ពាក់ស្រោមដៃលើគ្នា 2ជាន់ និងពាក់ថង់ប្លាស្ទិកឃ្លុំស្បែកជើង។

លោក ម៉េក វីរបុរសអ្នកប្រយុទ្ធឈុតស ជាមួយឧបករណ៍ការពារការឆ្លងមេរោគវីរុសកូវីដ-19 មុនចូលទៅមើលថែទាំអ្នកជំងឺកូវីដ-19 ក្នុងបន្ទប់ICU

ការព្យាបាលអ្នកជំងឺកូវីដ-19 គឺប្រថុយជីវិតគ្រប់ពេលវេលា ទោះជាការពាក់ម៉ាស់N95 ដើម្បីការពារការឆ្លងមេរោគហើយក្ដី ក៏អាចមានគ្រោះថ្នាក់ដល់ជីវិតបានដែរ ដែលចំពោះរឿងនេះ លោកម៉េកខ្លួនឯងក៏ធ្លាប់មានអាការងងឹតមុខ ធីងធោង ដកដង្ហើមស្ទះៗ បេះដូងលោតញាប់ ដោយសារតែហត់នឿយ ព្រោះតែអុកស៊ីហ្ស៊ែនមិនគ្រប់គ្រាន់ជាញឹកញាប់ រហូតដល់ត្រូវដោះឈុត PPE ចេញ ហើយទៅឈរនៅមុខបន្ទប់ រយៈពេល 5នាទី រៀងរាល់ 1ម៉ោងម្ដង បន្ទាប់ពីនោះ ក៏ត្រឡប់ចូលមកមើលថែទាំអ្នកជំងឺក្នុងបន្ទប់ជាបន្តទៀត។

“ម៉ាស់N95 នឹងចាប់សារធាតុកាបោនទុក ធ្វើឱ្យការប្ដូរយកសារធាតុអុកស៊ីហ្ស៊ែនដែលរាងកាយត្រូវការខណៈពាក់ម៉ាស់នេះ មានការពិបាក ធ្វើឱ្យដកដង្ហើមយកអត្រាកាបោន ចូលទៅក្នុងខ្លួនច្រើនណាស់ ព្រោះត្រូវនៅក្នុងបន្ទប់ជាមួយអ្នកជំងឺយូរជ្រុលពេក”

គិលានុបដ្ឋាកជនជាតិថៃម្នាក់ ធ្វើការនៅក្នុងបន្ទប់ ICU រៀបរាប់ពី វិនាទីសោកសង្រេងរបស់អ្នកជំងឺកូវីដ-19 FaceTime លាបងប្អូនមុនផុតដង្ហើមស្លាប់ — សម្រាប់អ្នកជំងឺកូវីដ-19 គ្រប់វិនាទីសុទ្ធតែមានតម្លៃ ក្រលៀសភ្នែកតែបន្តិច អ្នកជំងឺអាចគាំងប្រកាច់ និងស្លាប់បាន

ក្នុងការមើលថែទាំអ្នកជំងឺកូវីដ-19 ក្នុងបន្ទប់ ICU លោកម៉េក បានប្រាប់ឱ្យដឹងថា ត្រូវមិនងាកភ្នែកចេញពីអ្នកជំងឺ សូម្បីតែ 1វិនាទីឡើយ ទោះជាពេលចេញទៅស្រូបយកខ្យល់អាកាសត្រឹមតែ 5នាទីក៏ដោយ ក៏ខ្សែភ្នែកត្រូវតែមើលអ្នកជំងឺ និងគ្រឿងលាងសម្អាតក្រលៀនឆ្លងកាត់កញ្ចក់ ជាប់រហូតដែរ ព្រោះបើសិនជាខ្សែផ្សេងៗដែលភ្ជាប់រវាងអ្នកជំងឺនឹងម៉ាស៊ីននោះរបូត នោះអ្នកជំងឺអាចនឹងបាត់បង់ឈាមច្រើន កើតសភាវគាំងប្រកាច់ និងស្លាប់បានក្នុងរយៈពេលត្រឹមតែមិនប៉ុន្មាននាទីប៉ុណ្ណោះ។

ពេលត្រូវការចាក់ថ្នាំអ្នកជំងឺកូវីដ-19 ម្ដងៗ មុនចាក់ថ្នាំឱ្យអ្នកជំងឺ យើងត្រូវចេញមកផ្នែកខាងក្រៅបន្ទប់អ្នកជំងឺ ហើយដោះឧបករណ៍ការពារនៅលើក្បាល ដោះវ៉ែនតាចេញមកផ្លុំលាងចំហាយទឹកដែលជាប់លើវ៉ែនតាចេញ ព្រោះវាអាចធ្វើឱ្យមើលមិនឃើញ អាចចាក់ខុស មកត្រូវខ្លួនឯងបាន…។

ក្នុងពេលធ្វើការ បើមិនចាំបាច់ មិនគួរដោះម៉ាស់ការពារចេញ ឬក៏ត្រូវដោះចេញដែរ តែដោះឱ្យបានតិចដងបំផុត។ លោក ម៉េក ប្រាប់ថា វាត្រូវតែមានដោះខ្លះហើយ មិនដូច្នោះទេ ត្រចៀកអាចនឹងរយះ ព្រោះខ្សែម៉ាស់ វារឹបណែនខ្លាំងណាស់។ ពេលធ្វើការចប់ ត្រូវងូតទឹក ដុសខាត់ខ្លួនប្រាណ 2-3ដង ដើម្បីការពារ ការនាំយកមេរោគទៅចម្លងអ្នកនៅក្នុងក្រុមគ្រួសារ។

“ឃើញអ្នកជំងឺដែលមានអាការធ្ងន់ធ្ងរចូលមក យើងតែងគិតថា គេគឺជាបងប្អូនពូមីងរបស់យើង ហើយក៏ត្រូវមើលថែទាំគាត់យ៉ាងពេញដៃពេញជើង ព្រោះចង់ឱ្យគាត់បានវិលត្រឡប់ទៅជួបប្រពន្ធកូនបងប្អូន និងក្រុមគ្រួសារវិញ។ ពេលចេញពីធ្វើការ ត្រឡប់ទៅដល់ផ្ទះ យើងត្រូវប្រយ័ត្នប្រយែងគ្នាទៅវិញទៅមក សូម្បីតែឆ្កែក៏មិនហ៊ានប៉ះដែរ មិនឱ្យវាចូលមកក្បែរទេ ព្រោះធ្វើការមើលថែអ្នកជំងឺកូវីដ មិនមែនប្រថុយត្រឹមតែយើងម្នាក់ឯងទេ មនុស្សក្នុងក្រុមគ្រួសារ ក៏ប្រថុយជាមួយយើងដែរ។ ត្រូវរកវិធីទប់ទល់នឹងស្ថានការណ៍ដែលប្រែប្រួលរៀងរាល់ថ្ងៃ ព្រោះអ្នកជំងឺដែលឆ្លងមេរោគ ក៏មានចូលមកជារឿយៗ”

វិនាទីអាណោចអធម្ម សាច់ញាតិអ្នកជំងឺយល់ព្រមឱ្យបញ្ឈប់ការព្យាបាល ខាងមន្ទីរពេទ្យ ឱ្យអ្នកជំងឺប្រើ Face Time លាបងប្អូន មុនអ្នកជំងឺផុតដង្ហើមស្លាប់

អ្នកជំងឺកូវីដ-19 ក្នុងបន្ទប់ ICU ភាគច្រើនមានអាការធ្ងន់ធ្ងរ ឆ្លើយតបអ្វីលែងបានហើយ បើសិនដល់ថ្នាក់សន្លប់កូម៉ាធ្ងន់ធ្ងរ អាការមិនល្អឡើងវិញនោះ លោកម៉េក បានបង្ហើបប្រាប់ពីកម្មវិធីការព្យាបាលថា នឹងកើតមានការសម្រេចចិត្តរួមគ្នា 3អ្នក គឺនាយកផ្នែកមើលថែអ្នកជំងឺ គ្រូពេទ្យប្រចាំបន្ទប់សង្គ្រោះបន្ទាន់ និងក្រុមគ្រួសារអ្នកជំងឺដែលត្រឹមត្រូវតាមច្បាប់ អាចជាកូន ឬប្រពន្ធដែលយល់ព្រមឯកភាពឱ្យបញ្ឈប់ការព្យាបាល។ ពេលនោះគ្រូពេទ្យនឹងដោះឧបករណ៍ការព្យាបាលគ្រប់យ៉ាងចេញពីអ្នកជំងឺ…។

លោកម៉េក វីរបុរស ក្នុងថ្ងៃឈប់សម្រាក មុនផ្ទុះការឆ្លងរាតត្បាតរបស់មេរោគវីរុសកូវីដ-19 ក្នុងប្រទេសអាមេរិក — ទិដ្ឋភាពខ្សែរយីងរយាង ក្នុងការព្យាបាលអ្នកជំងឺកូវីដ-19 ម្នាក់ ក្នុងបន្ទប់ ICU ដែលលោក ម៉េក មើលថែ

ដោយសារតែអ្នកជំងឺកូវីដ-19 ត្រូវបានហាមសាច់ញាតិចូលសួរសុខទុក្ខ ដូច្នេះការប្រើ Face Time គឺដើម្បីឱ្យសាច់ញាតិរបស់អ្នកជំងឺកូវីដ ដែលជិតផុតដង្ហើមយ៉ាងសន្សឹមៗនោះ មានឱកាសបានលាគ្នា។ គឺជារឿងចុងក្រោយដែលខាងមន្ទីរពេទ្យអនុញ្ញាតឱ្យធ្វើ ដើម្បីឱ្យអ្នកជំងឺ និងបងប្អូនកូនចៅ បានឃើញមុខគ្នា បានពោលពាក្យលា និងអរគុណគ្នាជាលើកចុងក្រោយ ទោះជាអ្នកជំងឺលែងដឹងខ្លួន និងនិយាយលែងកើតហើយក៏ដោយ។

“ហេតុការណ៍ក្នុងគ្រានោះ ដែលអ្នកជំងឺត្រូវស្លាប់ មានខ្ញុំ និងលោកគ្រូវេជ្ជបណ្ឌិត ឈរនៅក្បែរៗគ្រែអ្នកជំងឺ និងបានឮសំឡេងលាគ្នា និងសំឡេងទ្រហោយំ របស់សាច់ញាតិអ្នកជំងឺ តាមរយៈអៃផេដ…ទាំងអស់គ្នានិយាយលាគ្នាម្ដងម្នាក់ៗ ឪពុកម្ដាយប្រាប់ថា ស្រឡាញ់ប្រពន្ធកូន យំលាបងប្អូនញាតិមិត្ត…ជាទិដ្ឋភាពដែលគួរឱ្យសោកសៅក្នុងចិត្តជាទីបំផុត”

អ្នកជំងឺដែលស្លាប់ម្នាក់នេះ លោកម៉េក បានប្រាប់ពីប្រវត្តិថា ជាបុរសវ័យកណ្ដាលម្នាក់ គ្មានរោគប្រចាំកាយទេ…ក្នុងការព្យាបាលគាត់ ពេទ្យប្រើពេលវេលាអស់ 16ម៉ោង ជាមួយ OT ដើម្បីជួយស្រោចស្រង់ជីវិតគាត់។ រាងកាយអ្នកជំងឺ មានខ្សែ IV រយីងរយាង ដើម្បីព្យាបាលយ៉ាងពេញទំហឹង តែទីបំផុត អ្នកជំងឺក៏ស្លាប់ ធ្វើឱ្យលោកម៉េក មានអារម្មណ៍ថា ហាក់ដូចជាបរាជ័យក្នុងការតស៊ូជាមួយអាមេរោគកំណាចកូវីដ-19 រហូតមានអារម្មណ៍ចង់អស់កម្លាំងចិត្ត។ តែពេលនឹកឡើងវិញម្ដងទៀត ក៏គិតថា ខ្លួនបានបំពេញតួនាទីយ៉ាងអស់ពីសមត្ថភាពហើយ ព្រមទាំងផ្ដល់កម្លាំងចិត្តឱ្យខ្លួនឯងថា ត្រូវតែបន្តដំណើរទៅមុខទៀត ព្រោះនៅមានអ្នកជំងឺដទៃទៀតនៅរង់ចាំរៀងរាល់ថ្ងៃ។

“ខ្ញុំប្រាប់ខ្លួនឯងថា កម្លាំងចិត្តរបស់យើង ត្រូវតែឆាប់មានឡើងវិញ ហើយដើរទៅមុខទៀត ព្រោះខ្ញុំនៅមានអ្នកជំងឺនៅក្នុងបន្ទប់ជាប់ហ្នឹង រង់ចាំខ្ញុំ…សូមឱ្យខ្ញុំបានតស៊ូយ៉ាងអស់ពីសមត្ថភាពតទៅទៀត។

ចង់ឱ្យអ្នកដែលបានអានរឿងរ៉ាវដែលខ្ញុំចែករំលែកក្នុងថ្ងៃនេះ ភ្ញាក់រឭកឡើង ដឹងច្បាស់ពីភាពដ៏គ្រោះថ្នាក់របស់មេរោគកូវីដ-19 ព្រោះនៅឃើញមានមនុស្សច្រើនទៀតណាស់ ដែលនៅតែចេញទៅដើរលេង ជប់លៀងផារ៍ធី មិនទទួលខុសត្រូវខ្លួនឯងសោះ ខ្លួនឯងអាចនឹងមិនអីខ្លាំងក្លាទេ តែមនុស្សជុំវិញខ្លួនយើង ដែលមានប្រព័ន្ធប្រឆាំងជំងឺខ្សោយជាង អាចមានគ្រោះថ្នាក់ដល់ជីវិត។ វាជារឿងដែលកើតឡើងពិតៗ និងមិនចង់ឱ្យសោកស្ដាយនៅពេលក្រោយឡើយ”

លោកម៉េក វីរបុរស អ្នកប្រយុទ្ធនឹងវីរុសកូវីដ-19 បានប្រាប់នៅក្នុងសេចក្ដីបញ្ចប់ថា គ្រប់គ្នាអាចក្លាយជាវីរបុរសបាន ដោយការកាត់បន្ថយភាពអត្មានិយម ព្យាយាមនឹកដល់អ្នកឯទៀត ចែករំលែកតែអ្វីដែលល្អៗ ដែលចម្រើន និងធ្វើជាកម្លាំងចិត្តដល់គ្នាទៅវិញទៅមក។ ចេះចែករំលែកឱ្យអ្នកដទៃ ដោយមិនប្រកាន់ជាតិសាសន៍ ឬសាសនា…ទីបំផុតទាំងអស់គ្នា នឹងមានសុខភាពកាយ និងសុខភាពចិត្តដែលល្អ និងឆ្លងកាត់វិបត្តិនេះទៅបានទាំងអស់គ្នា៕

ប្រភព៖ សារព័ត៌មានបរទេស

April 18, 2020

បុគ្គល 5នាក់ ដែលយើងគួរទូរស័ព្ទទំនាក់ទំនងឱ្យបានជាប់លាប់ ក្នុងអំឡុងវិបត្តិកូវីដ-19

“Social distancing” ជាពាក្យមួយដែលសក្តិសមបំផុត ក្នុងអំឡុងស្ថានការណ៍បែបនេះ នោះគឺការដែលយើងត្រូវនៅឱ្យឆ្ងាយៗពីគ្នាយ៉ាងតិច 1-2ម៉ែត្រ ដើម្បីការពារការឆ្លងមេរោគកូវីដ-19 ដែលធ្វើឱ្យមនុស្សជាច្រើនត្រូវធ្វើការនៅផ្ទះ។ សម្រាប់អ្នកណាដែលនៅជាមួយក្រុមគ្រួសារ ក៏អាចនឹងមិនសូវជាអផ្សុកប៉ុន្មានទេ តែសម្រាប់អ្នកណាដែលនៅតែម្នាក់ឯង ប្រហែលជាមានអារម្មណ៍អផ្សុកមិនស្ទើរឡើយ តែចូរកុំភ្លេចឱ្យសោះថា ទោះជាយ៉ាងណា យើងគួរតែទូរស័ព្ទ ឬVDO Call ទៅបុគ្គលទាំងឡាយ ដូចខាងក្រោមនេះ ដែលទោះជាមិនបានជួបមុខគ្នាមែន តែការបាននិយាយជជែកគ្នា ការបានឃើញមុខគ្នា ប្រហែលជាអាចជួយកាត់បន្ថយក្ដីអផ្សុកបានខ្លះៗដែរ…។

មនុស្សក្នុងក្រុមគ្រួសារ

ប្រាកដណាស់ ក្នុងអំឡុងហេតុការណ៍វិបត្តិកូវីដ-19 នេះ ប្រហែលជាមានមនុស្សជាច្រើនត្រូវស្ថិតនៅឆ្ងាយពីផ្ទះ ឬមិនបានត្រឡប់មកផ្ទះវិញ ដូច្នេះការទូរស័ព្ទទៅមនុស្សនៅក្នុងក្រុមគ្រួសារ ដើម្បីជជែកគ្នា អាប់ឌែតស្ថានការណ៍ គឺជារឿងមួយដែលយើងគួរធ្វើជាទៅបំផុត ព្រោះក្រៅពីយើងបានអាប់ឌែតដំណឹងព័ត៌មានអំពីគ្នាហើយ វាថែមទាំងជាការរឹតចំណងសម្ព័ន្ធភាពរវាងឪពុកម្ដាយបងប្អូនឱ្យកាន់តែល្អឡើងទៀតផង។

ចៅហ្វាយនាយ ឬមេក្រុមការងារ

បុគ្គលមួយទៀតដែលយើងមិនគួរខ្វះការទំនាក់ទំនងនោះគឺ ចៅហ្វាយនាយរបស់យើងហ្នឹងឯង ព្រោះការធ្វើការងារបែប Work from home អាចធ្វើឱ្យការធ្វើការងារមានភាពខ្វះចន្លោះបាន ព្រោះយើងមិនបានជជែកពិភាក្សាទល់មុខគ្នា ដូច្នេះការដែលយើងបានជជែកនិយាយជាមួយចៅហ្វាយនាយជាប់ជានិច្ចនោះ គឺដើម្បីអាប់ឌែតអំពីការងារឱ្យវាដំណើរការឆ្ពោះទៅរកទិសដៅតែមួយដូចគ្នា និងពេលកើតមានបញ្ហាអ្វីមួយឡើង យើងអាចកែខៃស្ថានការណ៍បានទាន់ពេលវេលា។

មិត្តរួមការងារ

សម្រាប់មនុស្ស 1ក្រុមទៀតដែលសំខាន់មិនចាញ់គ្នាប៉ុន្មានដែរនោះ គឺមិត្តរួមការងារហ្នឹងឯង…រឹតតែអ្នកណាដែលត្រូវធ្វើការងារជាក្រុមផងនោះ ការបានជជែកពិភាក្សាគ្នាឱ្យបានយល់ពីសេចក្ដីលម្អិតរបស់ការងារ ការបែងចែកតួនាទីឱ្យច្បាស់លាស់ថា អ្នកណាធ្វើអី មានតួនាទីទទួលខុសត្រូវអ្វីខ្លះ ហើយត្រូវបញ្ជូនការងារទៅឱ្យនរណានោះ គឺជារឿងសំខាន់បំផុត…។

គូស្នេហ៍ ឬមនុស្សសំខាន់

ផ្ដល់ភាពសំខាន់ជាមួយមនុស្សគ្រប់គ្នាហើយ នៅមានមនុស្សម្នាក់ទៀតដែលយើងមិនអាចខ្វះបានឡើយ នោះគឺគូស្នេហ៍ ឬមនុស្សដែលយើងផ្ដល់ភាពសំខាន់ឱ្យគេហ្នឹងឯង ព្រោះស្ថិតក្នុងពេលវេលាបែបនេះ មានគូសង្សារជាច្រើន ត្រូវរស់នៅឆ្ងាយពីគ្នា ហើយប្រាកដណាស់ ច្បាស់ជាកើតការនឹករឭកគ្នាទៅវិញទៅមកជារឿងធម្មតា។ ដូច្នេះ រឿងដែលអាចធ្វើបាននៅពេលនេះ គឺការនិយាយគ្នាតាមរយៈប្រព័ន្ធបណ្ដាញសង្គម ផ្ដល់កម្លាំងចិត្តគ្នា ស្ដាប់ពីបញ្ហារបស់គ្នាទៅវិញទៅមក និងដែលសំខាន់បំផុត បើមិនចាំបាច់ទេ ក្នុងអំឡុងពេលនេះ ចូរកុំឈ្លោះគ្នាឱ្យសោះ…អ្នកគ្រូ ឆវី សូមណែនាំថា គួរនិយាយដោយហេតុផល យល់ចិត្តគ្នា និងទទួលស្ដាប់គ្នាទៅវិញទៅមក ព្រោះវាជារឿងដែលសំខាន់បំផុតសម្រាប់គូស្នេហ៍ទាំងឡាយក្នុងអំឡុងពេលនេះ។

អ្នកជំនាញការក្នុងផ្នែកផ្សេងៗ

មិនអាចបដិសេធបានទេថា ក្នុងអំឡុងស្ថានការណ៍បែបនេះ វាប្រហែលជាធ្វើឱ្យមនុស្សជាច្រើន ត្រូវជួបនឹងបញ្ហាផ្សេងៗ បើមិនច្រើន ក៏តិចដែរ ទាំងរឿងការងារ រឿងលុយកាក់ រឿងការរស់នៅ រួមទាំងរឿងសុខភាពរាងកាយ និងសុខភាពផ្លូវចិត្តផងដែរ ដូច្នេះ ការដែលយើងបានជជែកនិយាយជាមួយនរណាម្នាក់ដែលជាអ្នកជំនាញការក្នុងផ្នែកនោះដោយផ្ទាល់ នឹងធ្វើឱ្យយើងបានរកឃើញចម្លើយ ឬដំណោះស្រាយដែលច្បាស់លាស់ខ្លាំងឡើង និងជួយឱ្យយើងអាចសម្រេចចិត្តចំពោះរឿងអ្វីមួយបានកាន់ងាយស្រួលឡើងទៀតផង។

កុំភ្លេចណា៎ ស្ថានការណ៍តឹងតែងដែលកើតឡើងនេះ បន្តិចទៀត វានឹងកន្លងផុតទៅដោយសុវត្ថិភាពមិនខាន ដូច្នេះអ្វីដែលសំខាន់នៅពេលនេះ គឺការផ្ដល់ភាពសំខាន់ និងកម្លាំងចិត្តចំពោះមនុស្សសំខាន់របស់យើង ហើយនៅទីបំផុត យើងនឹងអាចឆ្លងកាត់ឧបសគ្គនេះទៅបានទាំងអស់គ្នាយ៉ាងពិតប្រាកដ៕

បំណងល្អពីអ្នកគ្រូ ឆវី នៃទស្សនាវដ្តី ឡារ៉ែន

April 18, 2020

ជាង153,000នាក់ស្លាប់ដោយសារCOVID-19 នៅទូទាំងពិភពលោក! ឥណ្ឌូនេស៊ី “លេចធ្លោ” ជាងគេនៅអាស៊ីអាគ្នេយ៍

ពិភពលោកមានអ្នកស្លាប់ដោយសារCOVID-19 សរុបជាង153,000នាក់ ក្នុងចំណោមអ្នកជំងឺសរុប ជាង2.2លាននាក់។

សាកលវិទ្យាល័យ Johns Hopkins ប្រកាសថា មានអ្នកជំងឺកូរ៉ូណាសរុប2,234,109នាក់ និងស្លាប់153,379នាក់នៅក្នុងប្រទេស និងដែនដី210 នៅក្នុងពិភពលោកទាំងមូល ក្នុងនោះមានអ្នកជំងឺបានជាសះស្បើយ 569,953នាក់ផងដែរ។

សហរដ្ឋអាមេរិកនៅតែជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកជំងឺសរុប699,706នាក់ និងអ្នកស្លាប់សរុប36,727នាក់ ក្នុងនោះមានអ្នកជំងឺថ្មី32,481នាក់ និងអ្នកស្លាប់ថ្មី4,041នាក់។

អេស្ប៉ាញ៖ អ្នកជំងឺថ្មី3,291នាក់ អ្នកស្លាប់ថ្មី316នាក់ និងអ្នកជំងឺសរុប188,167នាក់ អ្នកស្លាប់សរុប19,631នាក់។ ប្រទេសនេះជាសម្បុកមេរោគCOVID-19 ធំជាងគេបង្អស់នៅទ្វីបអឺរ៉ុប និងលំដាប់ទី2នៅក្នុងពិភពលោក។

អ៊ីតាលី៖ អ្នកជំងឺថ្មី3,493នាក់ អ្នកស្លាប់ថ្មី575នាក់ និងអ្នកជំងឺសរុប172,434នាក់ អ្នកស្លាប់សរុប22,745នាក់។

បារាំង៖ អ្នកជំងឺថ្មី1,909នាក់ អ្នកស្លាប់ថ្មី761នាក់ និងអ្នកជំងឺសរុប147,969នាក់ អ្នកស្លាប់សរុបឡើងដល់18,681នាក់។

ចំនួនអ្នកផ្ទុកមេរោគសរុប និងស្លាប់សរុបនៅប្រទេសអាល្លឺម៉ង់គឺ 140,886នាក់ និង4,326នាក់ បន្ទាប់ពីបានរកឃើញករណីឆ្លងមេរោគថ្មី3,188នាក់ និងស្លាប់ថ្មី274នាក់។

អង់គ្លេសគឺជាសម្បុកមេរោគធំជាងគេលំដាប់ទី5នៅអឺរ៉ុប ដោយមានអ្នកជំងឺសរុប108,692នាក់ និងស្លាប់សរុបឡើងដល់14,576នាក់ ក្នុងនោះមានអ្នកជំងឺថ្មី5,599នាក់ និងអ្នកស្លាប់ថ្មី847នាក់។

ប្រទេសចិន បានរកឃើញអ្នកជំងឺថ្មី27នាក់ ក្នុងនោះមាន17នាក់ជាករណីនាំចូល។ ប្រទេសនេះក៏បានរាយការណ៍ថាបានរកឃើញអ្នកជំងឺថ្មីដែលមិនមានរោគសញ្ញាចំនួន54ករណីផងដែរ។ ចំនួនសរុបនៃករណីឆ្លងវីរុសនៅប្រទេសចិន គិតមកដល់ថ្ងៃនេះ បានកើនដល់82,719នាក់ ក្នុងនោះមាន4,512នាក់បានបាត់បង់ជីវិត។

អ៊ីរ៉ង់បន្តជាសម្បុកមេរោគធំជាងគេទី2នៅអាស៊ី ដោយមានអ្នកជំងឺសរុប79,494នាក់ និងអ្នកស្លាប់សរុប4,958នាក់។ ប្រទេសនេះទើបតែបានរកឃើញអ្នកជំងឺថ្មី1,499នាក់ និងស្លាប់ថ្មី89នាក់បន្ថែមទៀត។

ចំណែកអាស៊ីអាគ្នេយ៍វិញ ប្រទេសឥណ្ឌូនេស៊ីក្លាយជាសម្បុកមេរោគធំជាងគេដោយមានអ្នកជំងឺសរុប5,923នាក់ និងស្លាប់សរុប520នាក់ ក្នុងនោះមានអ្នកជំងឺថ្មីមានចំនួន407នាក់ និងអ្នកស្លាប់ថ្មី24នាក់។ ហ្វីលីពីនឈរលំដាប់ទី2 ដោយមានអ្នកជំងឺសរុប5,878នាក់ និងស្លាប់សរុប387នាក់ ខណៈម៉ាឡេស៊ីទើបរកឃើញអ្នកជំងឺថ្មី69នាក់ និងអ្នកស្លាប់ថ្មី2នាក់ ដែលធ្វើឱ្យតួលខនៃអ្នកជំងឺសរុបនៅប្រទេសនេះកើនដល់5,251នាក់ និងស្លាប់សរុបកើនដល់86នាក់៕

ប្រភព៖ សារព័ត៌មានបរទេស

April 18, 2020

លោក Trump ប្រកាសជួយកសិករ 19ពាន់លានដុល្លារ ព្រោះតែវិបត្តិសុខភាពCOVID-19

សហរដ្ឋអាមេរិកនៅតែជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកជំងឺសរុប699,706នាក់ និងអ្នកស្លាប់សរុប36,727នាក់ ក្នុងនោះមានអ្នកជំងឺថ្មី32,481នាក់ និងអ្នកស្លាប់ថ្មី4,041នាក់។

រដ្ឋ New York ដែលជាចំណុចកណ្ដាលនៃវីរុសនៅសហរដ្ឋអាមេរិក នឹងបើកមជ្ឈមណ្ឌលធ្វើតេស្ត COVID-19 ចំនួន5កន្លែងបន្ថែមទៀតចាប់ពីថ្ងៃទី20មេសាខាងមុខ។

សហរដ្ឋអាមេរិកទទួលរងផលប៉ះពាល់យ៉ាងធ្ងន់ធ្ងរជាងគេដោយសារវិបត្តិសុខភាពដែលបង្កឡើងដោយវីរុសCOVID-19 នាបច្ចុប្បន្ន។ វិបត្តិនេះ បានធ្វើឱ្យមនុស្សជាច្រើនត្រូវបាត់បង់ការងារធ្វើ ក្នុងនោះមានជាង22លាននាក់ត្រូវបង្ខំចិត្តដាក់ពាក្យសុំជំនួយពីរដ្ឋាភិបាល។ ចំណែកវិស័យកសិកម្មរបស់ប្រទេសនេះវិញ ក៏រងផលប៉ះពាល់យ៉ាងធ្ងន់ធ្ងរផងដែរ ព្រោះតែផលិតផលរបស់ពួកគេគ្មានទីផ្សារ។

ទាក់ទិននឹងវិស័យកសិកម្ម ប្រធានាធិបតីអាមេរិកាំង កាលពីថ្ងៃទី17មេសា បានប្រកាសប្រើប្រាស់កញ្ចប់ថវិកាជំនួយ19ពាន់លានដុល្លារ សម្រាប់ជួយដល់វិស័យកសិកម្ម។ កម្មវិធីនេះរួមមាន ការទូទាត់ផ្ទាល់ដល់កសិករ ម្ចាស់កសិដ្ឋាន និងក្រុមអ្នកផលិតកសិផលដែលត្រូវបានលោក Trump និយាយថា បានឆ្លងកាត់ “ការខាតបង់មិនធ្លាប់មានពីមុនមក នៅក្នុងយុគសម័យរោគរាតត្បាត”៕

ប្រភព៖ សារព័ត៌មានបរទេស

April 18, 2020

Author: សឿន សំណាង