សឿន សំណាង - La Reine Media

រកឃើញសត្វថ្មី30ប្រភេទ៖ សត្វខ្លះប្រវែង47ម៉ែត្រ(មានវីដេអូ)

មហាសមុទ្រនានាត្រូវបានគេចាត់ទុកថាជាព្រំដែនចុងក្រោយរបស់ភពផែនដី។ ថ្មីៗនេះ ក្រុមអ្នកវិទ្យាសាស្ត្របានធ្វើការរុករកមួយនៅឯលម្ហសមុទ្រនៃប្រទេសអូស្ត្រាលីភាគខាងលិច ហើយបានរកឃើញសត្វសមុទ្រយ៉ាងតិច30ប្រភេទ ក្នុងនោះមានសត្វខ្លះ មានដងខ្លួនវែងមិនធ្លាប់បានឃើញពីមុនមក។

ការរុញរកខាងលើនេះ ត្រូវបានធ្វើឡើងដោយក្រុមអ្នកវិទ្យាសាស្ត្រមកពីសារមន្ទីរជាតិអូស្ត្រាលីខាងលិច សាកលវិទ្យាល័យ Curtin នាយកដ្ឋានភូមិសាស្ត្រអូស្ត្រាលី វិទ្យាស្ថានស្រាវជ្រាវមហាសមុទ្រ Scripps និងវិទ្យាស្ថានស្រាវជ្រាវមហាសមុទ្រ Schmidt។ ក្រុមអ្នកវិទ្យាសាស្ត្រនេះ បានប្រើពេល180ម៉ោង និងបានមុជចូលក្រោមសមុទ្រ20លើក ដើម្បីស្រាវជ្រាវតំបន់ជ្រលងភ្នំ Ningaloo នៅតំបន់មហាសមុទ្រឥណ្ឌា ដែលមានជម្រៅ4,500ម។

ដោយប្រើប្រាស់រ៉ូបូតបញ្ជាពីចម្ងាយដែលមានឈ្មោះថា ROV SuBastian ក្រុមអ្នកស្រាវជ្រាវថតបានទិដ្ឋភាពសត្វសមុទ្រចម្លែកៗជាច្រើន។ មានសត្វខ្លះ គេមិនធ្លាប់បានឃើញនៅទីនេះពីមុននោះដែរ រួមមាន មឹក Taning ដែលមានចម្រុះពណ៌ ត្រសក់សមុទ្រកន្ទុយវែង និងបណ្ដាសត្វដែលមានរូបរាងទន់ផ្សេងៗទៀត។

ក្រុមអ្នកវិទ្យាសាស្ត្រក៏បានរកឃើញសត្វ Hydra ដ៏ធំមួយ ដែលមានពណ៌ក្រហមស្រស់ និងប្រវែងជាង1ម៉ែត្រ។

នៅក្នុងចំណោមសត្វសមុទ្រថ្មីៗដែលទើបត្រូវបានរកឃើញ ក៏មានសត្វ Apolemia ថ្មី មានប្រវែងរហូតដល់47ម៉ែត្រ ជាសត្វសមុទ្រវែងជាងគេបង្អស់ក្នុងចំណោមសត្វដែលមានដងខ្លួនវែងជាងគេនៅលើភពផែនដី។ ត្រីបាឡែនពណ៌ខៀវ មានប្រវែងជិត30ម៉ែត្រ។

Apolemia មិនមែនជាសត្វទោលតែឯងនោះទេ ប៉ុន្តែវាគឺជាបណ្ដុំនៃសត្វតូចៗជាច្រើនដែលហៅថា zooids ដោយពួកវាត្រូវពឹងលើគ្នាទៅវិញទៅមក ដោយរួមគ្នាអនុវត្តភារកិច្ច ដូចជាការការពារខ្លួន ការបង្កើតកូន និងការរំលាយអាហារជាដើម។

លោក Logan Mock-Bunting អ្នកនាំពាក្យរបស់វិទ្យាស្ថានស្រាវជ្រាវមហាសមុទ្រ Schmidt បានឱ្យដឹងថា “ជាក់ស្ដែង សត្វនេះអាចមានដងខ្លួនវែងខ្លាំងណាស់។ យើងបានប៉ាន់ប្រមាណឃើញថា វាអាចមានប្រវែងដល់ទៅជាង120ម៉ែត្រឯណោះ”។

Rebecca Helm ដែលជាជំនួយការរបស់សាស្ត្រាចារ្យនៅសាកលវិទ្យាល័យ Carolina Asheville ខាងជើង (University of North Carolina Asheville) ឱ្យដឹងថា “ខ្ញុំធ្លាប់បានឃើញសត្វ siphonophore (Apolemia) នេះ ប៉ុន្តែ ទាំងអស់សុទ្ធតែមានប្រវែងត្រឹម20សម ហើយវែងបំផុតក៏ត្រឹមតែ1ម។ ប៉ុន្តែ លើកនេះគឺផ្សេង។ នេះគឺជា siphonophore ធំបំផុត និងស្អាតបំផុតដែលខ្ញុំធ្លាប់បានឃើញ។

លទ្ធផលនៃការរុករកខាងលើនឹងត្រូវបានដាក់តាំងនៅក្នុងសារមន្ទីរអូស្ត្រាលីខាងលិច។ ទិន្នន័យនៃការសិក្សាស្រាវជ្រាវនេះក៏នឹងប្រកាសឱ្យដឹងជាសាធារណៈដើម្បីជាជំនួយដល់ការសិក្សាស្រាវជ្រាវផ្សេងៗទៀត៕

ប្រភព៖ សារព័ត៌មានបរទេស

April 23, 2020

ចិនសម្ពោធនាវាចម្បាំងផ្ទុកឧទ្ធម្ភាគចក្រថ្មីទីពីរ មុនខួប71ឆ្នាំនៃការបង្កើតកងទ័ពជើងទឹកប្រទេសនេះ

ប្រទេសចិនបញ្ចេញនាវាចម្បាំងផ្ទុកឧទ្ធម្ភាគចក្រប្រភេទ Type-075 ទី2របស់ខ្លួន បន្ទាប់ពីនាវាទី1ត្រូវបានដាក់ឱ្យដំណើរការកាលពី8ខែមុន បើទោះជា Type-075 ទី2នេះ មិនទាន់រួចរាល់ជាស្ថាពរក៏ដោយ។

ពិធីសម្ពោធបង្ហាញវត្តមានរបស់នាវានេះត្រូវបានធ្វើឡើងនៅឯរោងចក្រផលិតនាវា Hudong Zhonghua នាទីក្រុងសៀងហៃកាលពីថ្ងៃទី22មេសា នៅមុនថ្ងៃខួប71ឆ្នាំនៃការបង្កើតកងទ័ពជើងទឹករបស់ប្រទេសចិន។ រូបភាពពី flycam បានបង្ហាញថា ផ្នែកខាងលើនៃនាវានេះមិនទាន់រួចរាល់ជាស្ថាពរនៅឡើយ។

Li Jie ដែលជាអ្នកជំនាញផ្នែកជើងទឹកប្រចាំទីក្រុងប៉េកាំងបានសង្កត់ធ្ងន់ថា ការដែលនាវាផ្ទុកឧទ្ធម្ភាគចក្រ2គ្រឿងដែលត្រូវបានដាក់ដំណើរការដោយមុន-ក្រោយគ្នាត្រឹមតែ8នេះ បង្ហាញថា ប្រទេសចិនមានបច្ចេកវិទ្យាសាងសង់នាវាផ្ទុកឧទ្ធម្ភាគចក្រខ្នាតធំ ក៏ដូចជាបណ្ដាប្រភេទឧទ្ធម្ភាគចក្រនៅលើនាវានេះ។ លោក Li Jie បន្ថែមថា “ដំណើរការនៃការសាងសង់នាវា ត្រូវបានធ្វើឡើងយ៉ាងលឿន ខណៈដែលប្រព័ន្ធ និងឧបករណ៍នានា តាមគម្រោងនឹងត្រូវបានបំពាក់នាពេលដ៏ខ្លីខាងមុខ”។

Type-075 អាចផ្ទុកទម្ងន់បានដល់40,000តោន គឺច្រើនជាង បើធៀបនឹងនាវាផ្ទុកឧទ្ធម្ភាគចក្ររបស់ប្រទេសមួយចំនួនក្នុងតំបន់។ ប្រទេសចិន មានគម្រោងសាងសង់នាវាប្រភេទ Type-075 នេះចំនួន3គ្រឿង ក៏ប៉ុន្តែ ចិនបានរក្សាការសម្ងាត់នៃដំណើរការអភិវឌ្ឍន៍នាវាទាំងនេះ។ Type-075 មានបណ្ដោយប្រវែង237ម៉ែត្រ ប្រហាក់ប្រហែលនឹងនាវា Wasp របស់សហរដ្ឋអាមេរិក។

អ្នកជំនាញយល់ថា នាវានេះពិបាកនឹងដាក់ឱ្យបម្រើការនៅក្នុងជួរកងទ័ពជើងទឹកក្នុងរយៈពេលដ៏ខ្លីខាងមុខ។ ដោយសារតែជានាវាផ្ទុកឧទ្ធម្ភាគចក្រក្នុងស្រុកដំបូងរបស់ប្រទេសចិន ដូច្នេះ Type-075 នឹងត្រូវការពេលច្រើនឆ្នាំសម្រាប់ធ្វើការសាកល្បងដើម្បីធានាថាវាដំណើរការល្អ។

ក្រុមនាវិក និងអ្នកបើកយន្តហោះនៃកងទ័ពជើងទឹកចិន ក៏ត្រូវការហ្វឹកហាតស៊ីជម្រៅដើម្បីអាចបំពេញភារកិច្ចនៅលើនាវាផ្ទុកឧទ្ធម្ភាគចក្រនេះបានល្អ៕

ប្រភព៖ សារព័ត៌មានបរទេស

April 23, 2020

WHO ដាស់តឿនពិភពលោក៖ កុំប្រហែស! ព្រោះ កូវីដ-19 នៅជាមួយយើងយូរតទៅទៀត…

ខណៈដែលប្រទេសជាច្រើនកំពុងស្ថិតក្នុងអំឡុងពេលបន្ធូរបន្ថយវិធានការបិទប្រទេស ដើម្បីកាត់បន្ថយផលប៉ះពាល់ខាងសេដ្ឋកិច្ច ដែលបណ្ដាលមកពីការឆ្លងរាលដាលរបស់វីរុសកូរ៉ូណាប្រភេទថ្មី ឬកូវីដ-19 នោះ លោក ថេដ្រូស អាត់ហាណូម គីប្រ៊ីយេស៊ុស ប្រធានអង្គការសុខភាពពិភពលោក ឬ WHO បានចេញមកដាស់តឿនប្រទេសនានាថា ចូរកុំធ្វើអ្វីខុសឆ្គងឱ្យសោះ ព្រោះនៅមានដំណើរផ្លូវវែងឆ្ងាយតទៅទៀត ដែលត្រូវដើរ ហើយវីរុសកូវីដ-19 នឹងនៅជាមួយយើងយូរតទៅទៀត។

លោក គីប្រ៊ីយេស៊ុស ថ្លែងថា “ប្រទេសភាគច្រើន នៅតែកំពុងស្ថិតក្នុងដំណាក់កាលដំបូងនៃការឆ្លងរាលដាលប៉ុណ្ណោះ ខណៈដែលប្រទេស ដែលមានការឆ្លងរាលដាលតាំងពីដំបូងៗនោះ ខណៈនេះ ក៏កំពុងរកឃើញការឆ្លងរាលដាលថ្មីៗកើតឡើងដូចគ្នា..”

លោកប្រធានអង្គការ WHO បានសម្ដែងក្ដីកង្វល់ពាក់ព័ន្ធនឹងសញ្ញានៃការកើនឡើងក្នុងការឆ្លងរាលដាលដ៏ធំមួយនៅក្នុងផ្លែកខ្លះរបស់ទ្វីបអាហ្វ្រិក ខណៈដែលការឆ្លងរាលដាលនៅក្នុងអឺរ៉ុបខាងលិច មើលទៅហាក់ដូចជាកំពុងស្ថិតក្នុងសភាវស្មើ និងថយចុះជាបណ្ដើរៗហើយ។

លោក គីប្រ៊ីយេស៊ុស បានដាស់តឿនថា នៅតែមានចន្លោះប្រហោងជាច្រើនទៀត ក្នុងការដាក់វិធានការដើម្បីការពារការឆ្លងរាលដាលរបស់មេរោគវីរុសកូវីដ-19 ទូទាំងពិភពលោក និងគ្មានប្រទេសណាមួយក្នុងពិភពលោក មានភាពត្រៀមខ្លួនរួចជាស្រេចគ្រប់យ៉ាងឡើយ។ ប្រទេសនានាចាំបាច់ត្រូវចំណាយប្រាក់ពាក់ព័ន្ធនឹងការត្រៀមខ្លួនឱ្យរួចជាស្រេច ព្រោះក្នុងខណៈពេលនេះ មានត្រឹមតែ 76% ប៉ុណ្ណោះ ដែលមានប្រព័ន្ធតាមដានដែលអាចត្រួតពិនិត្យរកអ្នកឆ្លងមេរោគបាន។

ស្ថិតក្រោមពាក្យរិះគន់ថា WHO ឆ្លើយតបនឹងការឆ្លងរាលដាលរបស់មេរោគកូវីដ-19 មិនបានល្អគ្រប់គ្រាន់នោះ លោកគីប្រ៊ីយេស៊ុស នៅតែអះអាងថា ការប្រកាសសភាវអាសន្នកម្រិតពិភពលោក ដែលជាការប្រកាសកម្រិតខ្ពស់បំផុតរបស់អង្គការមួយនេះកាលពីថ្ងៃទី30 មករាកន្លងទៅ គឺជាពេលវេលាដែលសមរម្យហើយ និងស្ថិតក្នុងអំឡុងពេលដែលពិភពលោកមានពេលវេលាល្មមគ្រប់គ្រាន់ សម្រាប់ទប់ទល់នឹងស្ថានការណ៍ទាំងនោះ ដោយខណៈនោះ មានអ្នកឆ្លងមេរោគកូវីដ-19 នៅក្រៅប្រទេសចិន មានត្រឹមតែ 82នាក់ប៉ុណ្ណោះ។

ចំណែកលោក ម៉ៃក៏ រ៉ៃអាន់ អ្នកជំនាញការរបស់អង្គការ WHO បានដាស់តឿនថា ការបើកដំណើរការទេសចរណ៍លឿនជ្រុលពេក ត្រូវមានការគ្រប់គ្រងចាត់ការភាពប្រថុយប្រថានយ៉ាងប្រុងប្រយ័ត្ន ព្រោះខណៈពេលនេះ ក្នុងតំបន់ខ្លះរបស់ទ្វីបអាហ្វ្រិក ដូចជា សូម៉ាលី ជាដើម បានរកឃើញការកើនឡើងនៃអ្នកឆ្លងមេរោគដល់ទៅជិត 300% ក្នុងអំឡុងសប្ដាហ៍កន្លងទៅ ដែលការណ៍នេះបានបង្ហាញឱ្យឃើញថា ស្ថានការណ៍ការឆ្លងរាលដាលធំនៅក្នុងទ្វីបអាហ្វ្រិក ទើបតែចាប់ផ្ដើមប៉ុណ្ណោះ៕

ប្រភព៖ សារព័ត៌មានបរទេស

April 23, 2020

កូរ៉េខាងត្បូងអះអាងថា អ្នកវិជ្ជមានឡើងវិញជាមួយCOVID-19 នឹងមិនអាចចម្លងទៅអ្នកផ្សេងបានឡើយ

ក្រុមអ្នកជំនាញផ្នែកសុខាភិបាលកូរ៉េខាងត្បូងបានបញ្ជាក់ថា អ្នកជំងឺកូរ៉ូណាមួយចំនួននៅកូរ៉េខាងត្បូង វិជ្ជមានជាមួយវីរុសCOVID-19នេះឡើងវិញ ប៉ុន្តែមិនមានលទ្ធភាពចម្លងទៅអ្នកដទៃនោះទេ។

ប្រធានមជ្ឈមណ្ឌលគ្រប់គ្រង និងទប់ស្កាត់ជំងឺឆ្លងរបស់កូរ៉េខាងត្បូង KCDC (Korea Centers for Disease Control and Prevention) បណ្ឌិត Jung Eun-kyeong បានថ្លែងនៅក្នុងសន្និសីទសារព័ត៌មានមួយកាលពីថ្ងៃទី22មេសា ឱ្យដឹងថា អ្នកជំងឺCOVID-19មួយចំនួនដែលបានជាសះស្បើយរបស់ប្រទេសនេះ បានកើតជំងឺនេះជាថ្មី ប៉ុន្តែ មិនមានលទ្ធភាពក្នុងការចម្លងមេរោគទៅអ្នកដទៃនោះឡើយ។

KCDC បានធ្វើការវិភាគទៅលើអ្នកជំងឺ25នាក់ដែលបានជាពីជំងឺដើម្បីស្វែងយល់ថាតើពួកគេនៅមានផ្ទុកវីរុសCOVID-19នេះដែរ ឬអត់។ អ្នកទាំងនេះ សុទ្ធតែមានអង្គបដិប្រាណទប់ទល់នឹង COVID-19 ក៏ប៉ុន្តែ 12នាក់ក្នុងចំណោម25នាក់ខាងលើ បានបង្ហាញលទ្ធផលវិជ្ជមានជាមួយនឹងវីរុសនេះម្ដងទៀត។

“បញ្ហានេះអាស្រ័យទៅលើអ្នកជំងឺម្នាក់ៗ ដែលអាចធ្វើឱ្យវីរុសនេះស្ថិតនៅក្នុងរាងកាយបានយូរដោយមិនអាចបណ្ដេញពីរាងកាយឱ្យអស់ សូម្បីតែនៅពេលរាងកាយបានបង្កើតអង្គបដិប្រាណរួចហើយ។ ការសិក្សាស្រាវជ្រាវបន្ថែមកំពុងត្រូវបានធ្វើឡើង”។ នេះបើតាមសម្ដីរបស់លោកJung Eun-kyeong។

កូរ៉េខាងត្បូង ព្រឹកនេះបានរាយការណ៍ថា មានអ្នកជំងឺថ្មី8នាក់បន្ថែមទៀត ធ្វើឱ្យអ្នកជំងឺសរុបនៅប្រទេសនេះកើនដល់10,702នាក់។ ក្នុងចំណោមអ្នកជំងឺថ្មី ក៏មាន4នាក់ជាអ្នកជំងឺនាំចូល ដែលមកទល់នឹងពេលនេះ កូរ៉េខាងត្បូងមានអ្នកជំងឺនាំចូលសរុប1,021នាក់។ ប្រទេសនេះមានអ្នកស្លាប់ដោយសារវីរុសកូរ៉ូណាចំនួន240នាក់ ខណៈអ្នកជំងឺបានជាសះស្បើយមានចំនួន8,411នាក់ ក្នុងនោះមាន134នាក់ទើបតែត្រូវបានអនុញ្ញាតឱ្យចេញពីមន្ទីរពេទ្យ។

គិតមកដល់បច្ចុប្បន្ន ពិភពលោកទាំងមូលមានប្រទេស និងដែនដីចំនួន210ហើយ ដែលមានវត្តមានរបស់វីរុសCOVID-19 បណ្ដាលឱ្យមនុស្សជាង2.6លាននាក់បានឆ្លងមេរោគ និងជាង184,000នាក់បានបាត់បង់ជីវិត៕

ប្រភព៖ សារព័ត៌មានបរទេស

April 23, 2020

ពលរដ្ឋបារាំងនាំគ្នាវាយបំផ្លាញសម្បត្តិសាធារណៈ ដោយមិនខ្វល់អំពីបម្រាមគោចរ

ប្រជាជនបារាំងជាច្រើន បាននាំគ្នាចេញមកតាមដងផ្លូវ ហើយបានដុតបំផ្លាញធុងសំរាម វាយបំបែករថយន្ត ព្រមទាំងប៉ះទង្គិចជាមួយក្រុមសមត្ថកិច្ច ដោយមិនខ្វល់អំពីបម្រាមគោចរទប់ស្កាត់ COVID-19 នៅប្រទេសនេះ។

បារាំងបានដាក់បម្រាមគោចរចាប់ពីថ្ងៃទី17មីនា ដល់ថ្ងៃទី11ឧសភា នៅពេលដែលចំនួនអ្នកឆ្លងមេរោគ និងស្លាប់ដោយសារ COVID-19 ចេះតែកើនឡើងពីមួយថ្ងៃទៅមួយថ្ងៃ។ បច្ចុប្បន្ន ប្រទេសនេះមានអ្នកជំងឺសរុប159,877នាក់ និងអ្នកស្លាប់ឡើងដល់21,340នាក់ ហើយក្លាយជាសម្បុកមេរោគកូរ៉ូណាធំជាងគេលំដាប់ទី4នៅក្នុងពិភពលោក។

ក៏ប៉ុន្តែ បម្រាមគោចរដែលមានសុពលភាពយូរពេក បានធ្វើឱ្យភាពតានតឹងរវាងប្រជាជន ជាមួយនឹងក្រុមប៉ូលិស។ ស្ថានភាពតានតឹងបានរាលដាលធំឡើងៗ បន្ទាប់ពីមានករណីបរុសម្នាក់បើកបរម៉ូតូក្នុងល្បឿនលឿន បានបុកទ្វាររថយន្តរបស់ប៉ូលិស ដែលកំពុងឈប់នៅពេលស្តុបភ្លើងក្រហម ក្នុងតំបន់ Villeneuve-la-Garenne ជាយក្រុងភាគខាងជើងប៉ារីសកាលពីថ្ងៃទី18មេសា។

សាក្សីនៅកន្លែងកើតហេតុបានឱ្យដឹងថា មន្ត្រីនគរបាលបានបើកទ្វាររថយន្តដោយចេតនាដើម្បីស្កាត់អ្នកជិះម៉ូតូម្នាក់នោះ ក៏ប៉ុន្តែសមត្ថកិច្ចបានច្រានចោលការអះអាងនេះ។ ករណីនេះក៏បានធ្វើឱ្យផ្ទុះកំហឹងពាសពេញប្រទេសបារាំង។

នៅក្នុងខណ្ឌមួយនៅទីក្រុងLyon ក្រុមមនុស្សប្រមាណជា30នាក់ បាននាំគ្នាវាយកម្ទិចស្ថានីយរង់ចាំរថយន្តមួយកន្លែង ហើយពួកគេក៏បានដុតធុងសំរាម វាយបំផ្លាញរថយន្ត និងកម្ទិចខ្លោងទ្វារចូលទៅកាន់មណ្ឌលកុមារមួយកន្លែងកាលពីថ្ងៃទី20មេសាកន្លងទៅ ដោយមូលហេតុថា “ទាមទារយុត្តិធម៌ជូន Villeneuve-la-Garenne”។

នៅក្នុងទីក្រុងមួយចំនួនទៀតដូចជា Toulouse, Strasbourg, Bordeaux និង Versailles ជាដើម ក៏មានសកម្មភាពវាយបំផ្លាញដូចគ្នានេះដែរ។ អំពើហិង្សាបានបន្តកើតឡើងនៅយប់ថ្ងៃទី21មេសា នៅពេលដែលសាលាបឋមសិក្សាមួយកន្លែងនៅជាយក្រុងប៉ារីស ត្រូវបានដុតបំផ្លាញទាំងស្រុង ខណៈដែលប៉ូលិសនៅក្នុងខណ្ឌមួយផ្សេងទៀតក៏បានរាយការណ៍ថា ពួកគេត្រូវបានវាយប្រហារដោយកាំជ្រួច។

“ខ្ញុំយល់អំពីមូលហេតុដែលអ្នកបានវាយបំផ្លាញរថយន្ត។ សូមមេត្តាត្រឡប់ទៅផ្ទះ និងធ្វើចិត្តឱ្យត្រជាក់” នេះគឺជាសម្ដីរបស់អ្នកជិះម៉ូតូ អាយុ30ឆ្នាំ និយាយក្នុងឃ្លីបវីដេអូមួយដែលថតពីមន្ទីរពេទ្យ ជាកន្លែងដែលគាត់កំពុងសម្រាកព្យាបាលដោយសារតែបាក់ជើងក្នុងហេតុការណ៍មួយកាលពីសប្ដាហ៍មុន ដែលបង្កឡើងដោយប៉ូលិស។

អភិបាលក្រុង Lyon លោក Alexandre Vincendet បានហៅក្រុមអ្នកប្រើអំពើហិង្សា ដោយមិនខ្វល់ពីបម្រាមគោចរនោះថា ជា “ក្រុមមនុស្សឆោតល្ងង់”។ លោកសង្កត់ធ្ងន់ថា “ពួកគេក៏ប្រហែលជាមិនដឹងថា Villeneuve-la-Garenne នៅទីណាលើផែនទីទៀតផងក៏មិនដឹង។ នោះគ្រាន់តែជាលេសសម្រាប់សកម្មភាពបំផ្លិចបំផ្លាញតែប៉ុណ្ណោះ”៕

ប្រភព៖ សារព័ត៌មានបរទេស

April 23, 2020

COVID-19! សហរដ្ឋអាមេរិកស្នើចិនអនុញ្ញាតឱ្យអ្នកត្រួតពិនិត្យអន្តរជាតិ ចូលមើលបន្ទប់ពិសោធន៍

រដ្ឋមន្ត្រីការបរទេសអាមេរិកាំង លោក Pompeo កាលពីថ្ងៃទី22មេសា បានជំរុញឱ្យប្រទេសចិន អនុញ្ញាតឱ្យក្រុមអ្នកត្រួតពិនិត្យចូលទៅកាន់បន្ទប់ពិសោធន៍សម្ងាត់របស់ប្រទេសនេះ ដោយលោកបានសម្ដែងការព្រួយបារម្ភអំពីកម្រិតសុវត្ថិភាពរបស់បន្ទប់ពិសោធន៍ទាំងនោះ នៅក្នុងករណី COVID-19។

“បណ្ដាបន្ទប់ពិសោធន៍បែបនេះ នៅតែបន្តបើកដំណើរការនៅប្រទេសចិន ហើយពួកវាអាចមានមេរោគដ៏ស្មុគស្មាញកំពុងត្រូវបានពិសោធ។ មិនមែនមានតែវិទ្យាស្ថានវីរុសសាស្ត្រមួយនៅអ៊ូហាននោះទេ។ ប្រការដែលសំខាន់គឺថា សម្ភារទាំងនោះត្រូវតែមានសុវត្ថិភាព និងធានាឱ្យបានត្រឹមត្រូវ ដើម្បីកុំឱ្យកើតមានបញ្ហាសាយភាយមេរោគដោយសារគ្រោះថ្នាក់ផ្សេងៗ” នេះបើតាមរដ្ឋមន្ត្រីការបរទេស Mike Pompeo ថ្លែងនៅក្នុងសន្និសីទសារព័ត៌មានកាលពីថ្ងៃទី22មេសា នៅក្រសួងការបរទេសសហរដ្ឋអាមេរិក។

លោក Pompeo បានលើកឧទាហរណ៍អំពីសកម្មភាពត្រួតពិនិត្យទៅលើមជ្ឈមណ្ឌលនុយក្លេអែរនានានៅលើពិភពលោក ដើម្បីធានាសុវត្ថិភាព។ រដ្ឋមន្ត្រីរូបនេះក៏បានថ្លែងថា មិនរំលងចោលលទ្ធភាពដែលថា COVID-19 រួចចេញពីបន្ទប់ពិសោធន៍នៅទីក្រុងអ៊ូហាន ជាសម្មតិកម្មមួយដែលធ្លាប់ត្រូវបានប្រទេសចិនបដិសេធរួចហើយ។

លោក Pompeo និយាយថា “យើងនៅតែមិនទាន់ទទួលបានសំណាកវីរុស ហើយពិភពលោកក៏មិនមានសិទ្ធិចូលទៅកាន់មជ្ឈមណ្ឌល ឬបន្ទប់ពិសោធន៍ផ្សេងៗ ជាកន្លែងដែលវីរុសអាចរួចចេញនៅទីក្រុងអ៊ូហាន”។

អ្នកជំនាញមួយចំនួនរបស់ប្រទេសចិនបាននិយាយថា COVID-19 អាចចាប់ផ្ដើមឆ្លងរាលដាលចេញពីផ្សារលក់សត្វរស់មួយកន្លែងនៅទីក្រុងអ៊ូហានកាលពីខែធ្នូ ឆ្នាំ2019។ ប៉ុន្តែ បន្ទប់ពិសោធន៍ដ៏សម្ងាត់មួយស្ថិតនៅក្បែរតំបន់ផ្សារខាងលើ បានធ្វើឱ្យមានសំណួរជាច្រើនទាក់ទិននឹងប្រភពរបស់វីរុសនេះ។ ទន្ទឹមនឹងនេះ ក្រុមមន្ត្រីជាន់ខ្ពស់របស់សហរដ្ឋអាមេរិកជាច្រើន បានលើកឡើងអំពីសម្មតិកម្មមួយដែលថាវីរុសនេះអាចរួចចេញពីបន្ទប់ពិសោធន៍មួយនេះ។

ទោះជាយ៉ាងណាក៏ដោយ មានមតិរិះគន់ជាច្រើនសំដៅលើប្រធានាធិបតី Donald Trump ដោយចោទថា លោកកំពុងតែបង្វែរការទម្លាក់កំហុសទៅលើវិធីដែលលោកយកមកដោះស្រាយបញ្ហា COVID-19 ដែលមកដល់បច្ចុប្បន្ន វីរុសនេះបានសម្លាប់មនុស្សជាង46,000នាក់នៅសហរដ្ឋអាមេរិក៕

ប្រភព៖ សារព័ត៌មានបរទេស

April 23, 2020

មនុស្សជិត183,000នាក់ស្លាប់ដោយសារវីរុសCOVID-19 នៅទូទាំងពិភពលោក៖ 4ប្រទេសមានអ្នកស្លាប់លើសពី20,000នាក់

ពិភពលោកទាំងមូលមានអ្នកស្លាប់ជិត183,000នាក់ ក្នុងចំណោមអ្នកជំងឺCOVID-19 ជាង2.6លាននាក់ ដែលភាគច្រើននៅអឺរ៉ុប និងសហរដ្ឋអាមេរិក។

ស្ថិតិរបស់សាកលវិទ្យាល័យ Johns Hopkins បានឱ្យដឹងថា នៅក្នុងបណ្ដាប្រទេស និងដែនដីចំនួន210 បានរកឃើញអ្នកផ្ទុកវីរុសកូរ៉ូណាCOVID-19 ចំនួន 2,620,579នាក់ ក្នុងនោះមាន 182,903នាក់បានបាត់បង់ជីវិត។ អ្នកជំងឺថ្មីមានចំនួន60,075នាក់ និងអ្នកស្លាប់ថ្មីមាន5,977នាក់ ខណៈអ្នកជំងឺដែលបានជាសះស្បើយមានចំនួន709,541នាក់។

សហរដ្ឋអាមេរិក៖ អ្នកជំងឺថ្មីមាន23,725នាក់ អ្នកស្លាប់ថ្មីមាន1,804នាក់។ អ្នកជំងឺសរុបមាន846,982នាក់ អ្នកស្លាប់សរុបមាន46,609នាក់។ ប្រទេសនេះគឺជាសម្បុកមេរោគCOVID-19 ធំជាងគេបង្អស់ក្នុងពិភពលោក។

អេស្ប៉ាញ៖ អ្នកជំងឺថ្មីមាន4,211នាក់ អ្នកស្លាប់ថ្មីមាន435នាក់។ អ្នកជំងឺសរុប208,389នាក់ អ្នកស្លាប់សរុប21,717នាក់។

អ៊ីតាលី៖ អ្នកជំងឺថ្មី3,370នាក់ អ្នកស្លាប់ថ្មីមាន437នាក់។ អ្នកជំងឺសរុបមាន187,327នាក់ អ្នកស្លាប់សរុបមាន25,085នាក់។

បារាំង៖ អ្នកជំងឺថ្មីមាន1,827នាក់ អ្នកស្លាប់ថ្មីមាន544នាក់។ អ្នកជំងឺសរុបមាន159,877នាក់ អ្នកស្លាប់សរុបមាន21,340នាក់។ ប្រទេសនេះបានក្លាយជា “វាលពិឃាត” របស់ COVID-19 ធំជាងគេលំដាប់ទី4ក្នុងពិភពលោកដែលមានអ្នកស្លាប់លើសពី20,000នាក់៕

ប្រភព៖ សារព័ត៌មានបរទេស

April 23, 2020

មាសនឹងអាចឡើងថ្លៃខ្ពស់ជាង50% នៃតម្លៃឯតទគ្គកម្មនាបច្ចុប្បន្ន

Bank of America បានឱ្យដឹងថា គោលនយោបាយជំរុញសេដ្ឋកិច្ចយ៉ាងខ្លាំងក្លារបស់បណ្ដាប្រទេសក្នុងវិបត្តិសុខភាពលើកនេះ នឹងរុញតម្លៃមាសឱ្យឡើងដល់ 3,000ដុល្លារក្នុង1អោន (ounce) នាចុងឆ្នាំក្រោយ។

ធនាគារ Bank of America កាលពីថ្ងៃទី20មេសាកន្លងទៅ បានបញ្ចេញរបាយការណ៍មួយដែលមានឈ្មោះថា “Fed មិនអាចបោះពុម្ភមាស” ក្នុងនោះបានព្យាករថា រយៈពេល18ខែទៀត តម្លៃមាសនឹងកើនពី2,000ដុល្លារទៅ3,000ដុល្លារក្នុង1អោន។ តួលេខនេះ ខ្ពស់ជាង50% បើធៀបនឹងឯតទគ្គកម្មបច្ចុប្បន្នរបស់លោហធាតុដែលមានតម្លៃមួយនេះ។

ការព្យាករខាងលើត្រូវបានធ្វើឡើងបន្ទាប់ពីប្រទេសជាច្រើន បានបញ្ចេញកញ្ចប់ថវិកាជំនួយសេដ្ឋកិច្ចក្នុងទំហំមិនធ្លាប់មានពីមុនមក ដើម្បីកាត់បន្ថយផលប៉ះពាល់ធ្ងន់ធ្ងរដែលបង្កឡើងដោយវិបត្តិសុខភាព COVID-19។ “នៅពេល GDP ថយចុះខ្លាំង ការចំណាយក្នុងគោលនយោបាយសារពើពន្ធ និងតារាងតុល្យការរបស់បណ្ដាធនាគារកណ្ដាលធំឡើងទ្វេដង ហើយរូបិយប័ណ្ណរបស់បណ្ដាប្រទេសក៏នឹងរងសម្ពាធខ្លាំង ដែលមូលហេតុនេះហើយ ធ្វើឱ្យអ្នកវិនិយោគនឹងងាកទៅរកមាស”។

ពួកគេយល់ថា មាសគឺជា “ឧបករណ៍រក្សាតម្លៃសំខាន់បំផុត” នៅក្នុងអំឡុងសេដ្ឋកិច្ចកំពុងជួបឱនភាពដ៏ធ្ងន់ធ្ងរ។ បន្ទាប់ពីការលក់ចេញកាលពីឆ្នាំមុន មាសបានងើបឡើងវិញបន្តិចម្ដងៗ។

ធនាគារ Bank of America ព្យាករថា តម្លៃមាសជាមធ្យមក្នុងឆ្នាំនេះគឺ 1,695ដុល្លារក្នុង1អោន ហើយឆ្នាំក្រោយគឺ 2,063ដុល្លារក្នុង1អោន។ តម្លៃខ្ពស់បំផុតរបស់មាសនៅក្នុងទសវត្សរ៍នេះគឺ 1,921ដុល្លារ គឺនៅក្នុងខែកញ្ញា ឆ្នាំ2011។ តម្លៃមាសបច្ចុប្បន្ន គឺប្រមាណជា 1,688ដុល្លារអាមេរិកក្នុង1អោន ពោលគឺកើន12% បើគិតតាំងពីដើមឆ្នាំ។

Bank of America យល់ថា បច្ចុប្បន្ននៅមានកន្លែងច្រើនសម្រាប់អ្នកជំនួញដែលចង់វិនិយោគទៅលើមាស។ បើទោះជាតម្លៃរបស់មាសបានងើបឡើងតាំងពីចុងខែឧសភាឆ្នាំមុន ប៉ុន្តែបើតាមធនាគារនេះ បង្ហាញថា ទុនភាគច្រើននៅតែមិនទាន់សម្រុកចូលទៅទីផ្សារមាសនៅឡើយ។

បើទោះជាយ៉ាងនេះក្ដី ធនាគារនេះក៏បានសង្កត់ធ្ងន់ថា តម្លៃមាសនៅពេលខាងមុខ នៅតែមានឧបសគ្គច្រើន នោះគឺប្រាក់ដុល្លារអាមេរិកមានកម្លាំងខ្លាំង ការប្រែប្រួលនៅក្នុងទីផ្សារហិរញ្ញវត្ថុបានធូរស្រាល និងតម្រូវការប្រើប្រាស់គ្រឿងអលង្ការណ៍នៅប្រទេសឥណ្ឌា និងប្រទេសចិន បានដាំក្បាលចុះ សូម្បីតែនៅក្រោយសម័យ COVID-19៕

ប្រភព៖ Bloomberg

April 22, 2020

គ្រូពេទ្យចិន 2នាក់ ស្បែកដូរពណ៌ ដោយសារផលប៉ះពាល់ពីថ្នាំព្យាបាលកូវីដ-19

CCTV និងក្រុមទីភ្នាក់ងារព័ត៌មាន បានរាយការណ៍កាលពីថ្ងៃទី21 មេសា ថា គ្រូពេទ្យក្នុងទីក្រុងវូហាន 2នាក់ ដែលធ្លាក់ខ្លួនឈឺធ្ងន់ដោយសារការឆ្លងមេរោគ និងតស៊ូជាមួយវីរុស រហូតរួចផុតពីសេចក្ដីស្លាប់ ប៉ុន្តែស្បែកបានប្ដូរពណ៌ទៅជាពណ៌ខ្មៅស្រគាំ ដោយសារតែការប្រើថ្នាំព្យាបាល គួបផ្សំនឹងសភាពការធ្វើការរបស់ថ្លើម ដែលនៅមិនទាន់ស្ដារស្ថានភាពឡើងវិញបាន 100ភាគរយ។

របាយការណ៍នោះបានឱ្យដឹងថា លោកវេជ្ជបណ្ឌិត អ៊ី ហ្វាន និងលោកវេជ្ជបណ្ឌិត វើយ ហ្វឹង ទាំង 2នាក់បានទទួលការវិនិច្ឆ័យកាលពីថ្ងៃទី18 មករាថា ឆ្លងមេរោគវីរុសកូរ៉ូណាប្រភេទថ្មី តាមរយៈការព្យាបាលយ៉ាងជិតដិតនឹងអ្នកជំងឺនៅក្នុងមន្ទីរពេទ្យកណ្ដាល ក្រុងវូហាន កាលពីខែមករា និងត្រូវបាននាំខ្លួនចូលទៅព្យាបាលនៅឯមន្ទីរពេទ្យរោគសួត វូហាន ហើយត្រូវបានផ្លាស់ប្ដូរកន្លែងព្យាបាលដល់ទៅ 2ដងទៀតផង។

លោកវេជ្ជបណ្ឌិត លី ស៊ូស៊ឹង អ្នកមើលការថែទាំ និងរក្សាព្យាបាលលោកវេជ្ជបណ្ឌិតទាំង 2នាក់ខាងលើ បានថ្លែងថា ទាំង 2នាក់បានទទួលការជួយសង្គ្រោះយ៉ាងពេញទំហឹង ដើម្បីសង្គ្រោះជីវិត តែជាផលប៉ះពាល់ពីការព្យាបាលក្នុងអំឡុងពេលដំបូងៗនៃការឆ្លងមេរោគ បានធ្វើឱ្យស្បែករបស់លោកវេជ្ជបណ្ឌិតទាំង2 ប្ដូរទៅជាពណ៌ខ្មៅស្រគាំ ដែលគេសន្និដ្ឋានថា បណ្ដាលមកពីការប្រែប្រួលកម្រិតដែលមិនមានតុល្យភាពរបស់អ័រម៉ូន ដែលកើតឡើងដោយសារថ្លើម ដែលបានទទួលរងការខូចខាតដោយសារមេរោគវីរុស និងនៅមិនទាន់ស្ដារស្ថានភាពឱ្យប្រក្រតីឡើងវិញបាន។

របាយការណ៍អំពីទីភ្នាក់ងារសារព័ត៌មានចិនបានឱ្យដឹងថា លោកវេជ្ជបណ្ឌិត អ៊ី និងលោកវេជ្ជបណ្ឌិត វើយ បានធ្វើការរួមគ្នាជាមួយលោកវេជ្ជបណ្ឌិត លី វឹនលៀង អ្នកដែលនៅពេលដំបូងៗនៃការឆ្លងរាលដាលរបស់មេរោគ ត្រូវបានប៉ូលិសទីក្រុងវូហានស៊ើបសួរ និងចោទថា បានផ្សព្វផ្សាយព័ត៌មានចចាមអារ៉ាម និងក្រោយមកបានស្លាប់ដោយសារមេរោគកំណាចនោះកាលពីថ្ងៃទី7 កុម្ភៈ និងក្រោយមកទៀត បានទទួលនូវការលើកតម្កើងជាវីរបុរសរបស់ប្រទេសជាតិមាតុភូមិ។

វេជ្ជបណ្ឌិត អ៊ី ជាអ្នកឯកទេសខាងជំងឺបេះដូង បានទទួលការព្យាបាលជំងឺកូវីដ-19 ដោយប្រើម៉ាស៊ីនជួយគាំទ្រការធ្វើការរបស់បេះដូង និងសួត ដែលស្ថិតក្នុងសភាវធ្ងន់ធ្ងរ ដែលគេហៅថា ECMO ដែលចូលទៅធ្វើការជំនួសបេះដូង និងសួត ដោយការស្រូបបាញ់អុកស៊ីហ្ស៊ែនចូលទៅក្នុងឈាមខាងក្នុងរាងកាយ ដើម្បីប្រគងជីវិតឱ្យរស់នៅបានយូរ រហូតដល់រាងកាយអាចវិលត្រឡប់មកដូចដើមវិញបានក្នុងរយៈពេល 39ថ្ងៃក្រោយមក។

ខណៈដែលលោកវេជ្ជបណ្ឌិត លី ស៊ូស៊ឹង ដែលជាអ្នកព្យាបាលសុខភាពលោកវេជ្ជបណ្ឌិតទាំង 2 បានថ្លែងថា ពណ៌ស្បែករបស់លោកវេជ្ជបណ្ឌិតទាំង 2នាក់ បានផ្លាស់ប្ដូរខុសពីមុន ដោយសារតែកាលពីដំបូងៗនៃការព្យាបាល ពួកគាត់ទាំង2 បានទទួលថ្នាំ 1ប្រភេទ ដែលផលប៉ះពាល់របស់វា គឺធ្វើឱ្យស្បែកឡើងពណ៌ខ្មៅ។

លោកវេជ្ជបណ្ឌិត លី ថ្លែងថា “ពណ៌ស្បែករបស់លោកវេជ្ជបណ្ឌិតទាំង 2នាក់នោះ សន្និដ្ឋានថា អាចនឹងត្រឡប់ទៅជាប្រក្រតីឡើងវិញ នៅពេលដែលថ្លើមចាប់ផ្ដើមធ្វើការបានយ៉ាងពេញលេញឡើងវិញ” ៕

ប្រភព៖ សារព័ត៌មានបរទេស

April 22, 2020

រដ្ឋមន្ត្រីត្រូវបានចាប់ខ្លួនព្រោះតែគេចពីបម្រាមគោចរ លួចទៅទិញស្រាផឹក

រដ្ឋមន្រ្តីក្រសួងប៉ូលីស និងសន្តិសុខសាធារណៈនៃប្រទេសឡេសូថូ (Lesotho) ត្រូវបានចាប់ខ្លួន ដោយសារតែមិនព្រមចូលតុលាការ ក្រោយពីមានការចោទប្រកាន់ថាបានរំលោភលើបម្រាមគោចរដែលកំពុងអនុវត្តនៅក្នុង “សង្គ្រាម” ប្រឆាំងនឹងវីរុសCOVID-19 ដោយបានលួចទៅទិញស្រាផឹកទៅវិញ។

Lehlohonolo Moramotse ដែលជារដ្ឋមន្ត្រីក្រសួងប៉ូលីស និងសន្តិសុខសាធារណៈនៃប្រទេសឡេសូថូ ត្រូវបានប្រទះឃើញកំពុងទិញស្រា នៅក្នុងពេលដែលប្រទេសនេះកំពុងអនុវត្តបម្រាមគោចរទូទាំងប្រទេសក្នុងរយៈពេល24ថ្ងៃ។ រដ្ឋមន្ត្រីរូបនេះ ត្រូវបានកោះហៅឱ្យចូលតុលាការកាលពីថ្ងៃទី20មេសា ប៉ុន្តែលោកមិនបានចូលខ្លួននោះទេ ទើបត្រូវបានសមត្ថកិច្ចចាប់ខ្លួននៅក្នុងការិយាល័យរបស់លោក នៅក្នុងរាជធានី Maseru ក្នុងថ្ងៃដដែលនោះ។

លោក Mpiti Mopeli អ្នកនាំពាក្យរបស់នគរបាលនៃប្រទេសនេះបានឱ្យដឹងថា “គាត់ត្រូវបានចាប់ខ្លួន និងឃុំខ្លួន1យប់នៅឯអធិការដ្ឋាននគរបាលក្នុងទីក្រុង Maseru។ គាត់កំពុងប្រឈមនឹងបទចោទថាបានរំលោភលើបម្រាមគោចរ និងតភ្ជាប់បំពង់ទឹកចូលទៅផ្ទះរបស់គាត់ដោយខុសច្បាប់”។

រាជាណាចក្រឡេសូថូ ដែលជាប្រទេសឯករាជ្យមួយ ដែលព័ន្ធជុំវិញដោយទឹកដីនៃប្រទេសអាហ្វ្រិកខាងត្បូង គិតមកដល់បច្ចុប្បន្ន មិនទាន់មានករណីឆ្លងវីរុសCOVID-19 នៅឡើយ។ នាយករដ្ឋមន្ត្រី Thomas Thabane បានចេញបម្រាមគោចរទូទាំងប្រទេសចាប់ពីថ្ងៃទី29មិនា ដោយសារមានការព្រួយបារម្ភថា វីរុសCOVID-19 អាចនឹងឆ្លងពីប្រទេសអាហ្វ្រិកខាងត្បូង ដែលមានអ្នកជំងឺកូរ៉ូណាជាង3,300នាក់ និងអ្នកស្លាប់យ៉ាងតិច 60នាក់។

គិតមកដល់ពេលនេះ COVID-19 បានសម្លាប់មនុស្សយ៉ាងតិច 177,674នាក់ ក្នុងចំណោមអ្នកជំងឺសរុប2,557,837នាក់ នៅទូទាំងពិភពលោក៕

ប្រភព៖ សារព័ត៌មានបរទេស

April 22, 2020

Author: សឿន សំណាង