សឿន សំណាង - La Reine Media

ក្ដីសង្ឃឹម រលាយអស់!! លទ្ធផលនៃការសាកល្បងថ្នាំ “Remdesivir” ព្យាបាលកូវីដ-19 បរាជ័យក្នុងការជួយអ្នកជំងឺធ្ងន់ធ្ងរនៅចិន

ថ្នាំសាកល្បងប្រឆាំងវីរុសឈ្មោះ“Remdesivir” របស់ក្រុមហ៊ុន Gilead Sciences Inc បានបរាជ័យក្នុងការជួយសង្គ្រោះអ្នកជំងឺកូវីដ-19 ដែលមានអាការធ្ងន់ធ្ងរ ក្នុងអំឡុងពេលសាកល្បងខាងគ្លីនិក(ព្យាបាល)នៅក្នុងប្រទេសចិន តែយ៉ាងណាក៏ដោយ ក្រុមហ៊ុនផលិតថ្នាំពេទ្យមួយនេះ បានប្រាប់ថា លទ្ធផលនៃការសិក្សាស្រាវជ្រាវទាំងនោះ មិនទាន់ជាបទសរុបទេ ដោយសារតែវា ចប់មុនកំណត់។ នេះបើតាមសេចក្ដីរាយការណ៍របស់ទីភ្នាក់ងារព័ត៌មានរ៉យទ័រ។

ភាគហ៊ុនរបស់ Gilead បានធ្លាក់ចុះច្រើនជាង4% តាមក្រោយព័ត៌មានដែលលេចធ្លាយចេញមកដោយចៃដន្យ ដែលធ្វើឡើងដោយសារព័ត៌មាន Financial Times ដែលបានរាយការណ៍មុនគេ ខណៈដែលរបាយការណ៍នេះធ្វើឡើងមិនប៉ុន្មានថ្ងៃ ក្រោយពេលមានលេចឮដំណឹងថា អ្នកជំងឺដែលឆ្លងមេរោគកូវីដ-19 ដែលបានទទួលថ្នាំ“Remdesivir” ក្នុងការសាកល្បងខាងការព្យាបាលរបស់មន្ទីរពេទ្យ នៃមហាវិទ្យាល័យឈិកាហ្គោ សហរដ្ឋអាមេរិក បានជាសះស្បើយយ៉ាងឆាប់រហ័ស។

ចំណែកឯទីភ្នាក់ងារព័ត៌មានSTAT បានរាយការណ៍ កាលពីសប្ដាហ៍មុន ដោយបានដកស្រង់សម្ដីអ្នកដឹកនាំការសាកល្បងដែលបានបញ្ជាក់ថា អ្នកជំងឺដែលបានចូលរួមក្នុងការសាកល្បងខាងគ្លិនិកថ្នាំមួយនេះ សុទ្ធតែមានអាការគ្រុនក្ដៅខ្លួនខ្លាំង និងមានអាការខាងប្រព័ន្ធដង្ហើមធ្ងន់ធ្ងរ អាចចាកចេញពីមន្ទីរពេទ្យបានក្នុងរយៈពេលមិនដល់1សប្ដាហ៍ផង។

យ៉ាងណាក៏ដោយ ខាងមហាវិទ្យាល័យ បានដាស់តឿនថា វាហាក់ដូចជាលឿនពេកក្នុងប្រញាប់សរុបរឿងនេះ ដោយសារតែការសាកល្បងនោះ មិនបានរួមជាមួយការ “សាកល្បងបែបជាក្រុមដែលមានការគ្រប់គ្រង” នៅឡើយ ដូច្នេះទើបវាជារឿងពិបាកក្នុងការចង្អុលបង្ហាញច្បាស់ៗថា ការពិតទៅថ្នាំនេះ នឹងជួយឱ្យអ្នកជំងឺឆាប់ធូរស្រាលបានល្អឡើង ឬអត់នោះទេ?។ ទាំងអស់នេះ ក្នុងការសាកល្បងបែបគ្រប់គ្រង អ្នកជំងឺខ្លះ នឹងមិនបានទទួលថ្នាំដើម្បីបើកផ្លូវឱ្យក្រុមគណៈគ្រូពេទ្យរកបទសរុបថា ការពិតទៅ តើថ្នាំនេះហុចផលប៉ះពាល់ដល់អាការឈឺថ្កាត់របស់អ្នកជំងឺដែរឬទេ?

ថ្នាំ “Remdesivir” របស់ Gilead បានទទួលការចាប់អារម្មណ៍យ៉ាងខ្លាំង ដោយសារតែបច្ចុប្បន្នមិនទាន់មានថ្នាំ ឬវិធីការព្យាបាលណាមួយដែលបានទទួលការអនុម័តនៅឡើយ ដូចគ្នានឹងវ៉ាក់សាំងការពារមេរោគកូវីដ-19ដែរ ខណៈដែលបណ្ដាក្រុមគណៈគ្រូពេទ្យទូទាំងពិភពលោក កំពុងរិះរកគ្រប់បែបយ៉ាង តាមដែលអាចធ្វើបាន ដើម្បីបង្វែរដំណើរផ្លូវរបស់ជំងឺឆ្លងដ៏ធ្ងន់ធ្ងរនេះដែលអាចធ្វើទុក្ខសួតរបស់អ្នកឆ្លងមេរោគ។

សេចក្ដីព្រាងឯកសារ ដែលអង្គការសុខភាពពិភពលោកធ្វើឱ្យបែកធ្លាយចេញមកដោយចៃដន្យ បានបញ្ជាក់ថា ក្នុងការសាកល្បងនៅប្រទេសចិន ដែលជាការប្រើថ្នាំចាក់ចូលទៅតាមសរសៃឈាម មិនទទួលបានជោគជ័យក្នុងការជួយអ្នកជំងឺឱ្យមានអាការល្អប្រសើរឡើង ឬបន្ថយមេរោគក្នុងក្រសែឈាមនោះទេ តែយ៉ាងណាក៏ដោយ សេចក្ដីលម្អិតផ្សេងៗមិនទាន់មានច្រើននៅឡើយ និងបានបង្ហាញថា ចំណុចមិនសមប្រកបផ្សេងៗក្នុងការវាយតម្លៃព័ត៌មាន មិនទាន់ល្អពេញលេញនៅឡើយ។

ក្នុងសេចក្ដីព្រាងឯកសារនោះបានបញ្ជាក់ថា ការសាកល្បងខាងគ្លីនិក(ព្យាបាល)ពាក់ព័ន្ធនឹងអ្នកជំងឺ 237នាក់ ក្នុងនោះមាន 158នាក់បានទទួលថ្នាំ “Remdesivir” ចំណែក 79នាក់ទៀតបានទទួលថ្នាំបញ្ឆោត ដែលធ្វើឱ្យរកឃើញថា អត្រាការស្លាប់ក្នុងអ្នកជំងឺដែលបានទទួលថ្នាំ “Remdesivir” ស្ថិតក្នុងអត្រា 13.9% ប្រហាក់ប្រហែលនឹងអត្រាការស្លាប់ក្នុងក្រុមគ្រប់គ្រង(អ្នកទទួលថ្នាំបញ្ឆោត) ដែលស្ថិតក្នុងអត្រា 12.8%។

Gilead បានថ្លែងថា “លទ្ធផលការសិក្សាស្រាវជ្រាវ នៅមិនទាន់ទទួលបានចំណុចសរុបដែលច្បាស់ពិតប្រាកដនៅឡើយទេ ទោះជាសញ្ញានៅក្នុងព័ត៌មានបានបង្ហាញពីសក្ដានុពលដែលជាប្រយោជន៍របស់ “Remdesivir” ជាពិសេសជាមួយអ្នកជំងឺដែលបានទទួលការព្យាបាលតាំងពីដំបូងៗក្ដី”

យ៉ាងណាក៏ដោយ ពួកអ្នកវិភាគដទៃទៀត ទទួលបានចំណុចសរុបមួយចំនួន ពីការសាកល្បងទាំងនោះហើយ។ លោក ស្ទីហ្វេន ស៊ីដហៅស៍ អ្នកវិភាគពីស្ថាប័ន ចាដរេយ៍ម៉ន់ដ៍ ចេមស៍ និយាយថា “ឈុតព័ត៌មានដែលគ្រប់គ្រងដោយចិន នឹងបង្កឱ្យកើតមានទស្សនៈនៃការពិត ដែលមានចំពោះ “Remdesivir” នោះគឺ វាមើលទៅហាក់ដូចជាប្រើមិនបានលទ្ធផលល្អទេ ជាមួយអ្នកជំងឺដែលមានអាការធ្ងន់ធ្ងរ”៕

ប្រភព៖ សារព័ត៌មានបរទេស

April 24, 2020

មិនគួរឱ្យជឿ!! “លុយ$ 1លាន 7សែន” កប់នៅក្នុងកាបូបលុយ 4ខែ!!!

គឺជារឿងពិត មិនមែនប្រឌិតឡើយ…

ហើយរឿងដែលយើងកំពុងតែ ប្រុងរៀបរាប់តទៅនេះ គឺជា “រឿងពិត” 100ភាគរយ
ជារឿងពិត ដែលអាចធ្វើឱ្យមនុស្សជាច្រើន មានអារម្មណ៍ “ច្រណែន” បែបមិនដឹងខ្លួនទៀតផង…
ព្រោះ វាជារឿងរបស់លុយដែលមានចំនួនដល់ទៅ 1លាន 7សែនដុល្លារ!!!
ហាស ហាស ហា!!

ទាំងអស់ខាងលើ ត្រូវបានរៀបរាប់ថា នេះគឺជា “ដំណឹងល្អ” មួយដែលកើតឡើងចំពោះស្ត្រីជនជាតិអូស្ត្រាលីម្នាក់ ក្នុងទីក្រុងស៊ីដនីដែលទើបតែដឹងថា ខ្លួនឯងត្រូវឆ្នោតរបស់ក្រុមហ៊ុន $30 Million Megadraw បានប្រាក់រង្វាន់ដល់ទៅ 1លាន 7សែនដុល្លារ

ស្ត្រីមហាសំណាងដែលត្រូវឆ្នោត ក្នុងអំឡុងជីវិតកំពុងធ្លាក់ក្នុងបរិយាកាស “បិទទីក្រុង” បានរៀបរាប់ថា
នាងបានទិញឆ្នោតទុក តាំងពីខែធ្នូ ឆ្នាំទៅ(2019)ម្ល៉េះ និងទុកសន្លឹកឆ្នោតនោះនៅក្នុង “កាបូបលុយ” រហូតទាល់តែទើបនឹងរើយកមកផ្ទៀងលេខរង្វាន់កាលពីពេលថ្មីៗនេះឯង ក្រោយពីទុកចោលឱ្យពេលវេលាកន្លងទៅដល់ទៅ 4ខែ!!!

នាងប្រាប់ថា នាងតាំងចិត្តថា នឹងបែងចែកលុយរង្វាន់ឱ្យទៅមិត្តភក្តិ និងសាច់ញាតិខ្លះ
ចំណែកថា នឹងយកលុយហ្នឹងទៅធ្វើអ្វីខ្លះនោះ នាងប្រាប់ថា “ខ្ញុំកំពុងនៅរាងភាំងៗ និងនឹកមិនទាន់ឃើញនៅឡើយ”

“ហើយក្នុងអំឡុងពេលដែលត្រូវបង្ខាំងខ្លួននៅតែក្នុងផ្ទះបែបនេះ ខ្ញុំនៅមានពេលអង្គុយគិតទៀតម៉ាគំនរ…”
…
ប្រភព៖ សារព័ត៌មានបរទេស

April 24, 2020

Trump ផ្ដល់អនុសាសន៍៖ ចាក់ពន្លឺ ឬថ្នាំសម្អាតមេរោគទៅក្នុងរាងកាយ ដើម្បីព្យាបាលCOVID-19

ការចាក់ថ្នាំសម្អាតមេរោគទៅក្នុងរាងកាយអ្នកជំងឺ អាចសម្លាប់COVID-19បាន ប៉ុន្តែក្រុមអ្នកជំនាញផ្នែកសុខាភិបាលយល់ថា គំនិតនេះ “គ្រោះថ្នាក់ណាស់”។

“ខ្ញុំឃើញថា សារធាតុរម្ងាប់មេរោគ អាចសម្លាប់វីរុសដោយប្រើពេលត្រឹមតែ1នាទី គឺ1នាទីតែប៉ុណ្ណោះ។ ហើយថា តើមានវិធីណាដែលយើងអាចធ្វើបែបនេះបាន ដោយការចាក់បញ្ចូលវាទៅក្នុងរាងកាយ ឬក៏មានវិធីណាមួយដែលអាចសម្លាប់វាបានដែរទេ?” ប្រធានាធិបតី Donald Trump ថ្លែងបែបនេះនៅក្នុងសន្និសីទសារព័ត៌មានមួយនៅសេតវិមានកាលពីថ្ងៃទី23មេសា។ ប៉ុន្តែ លោក Trump មិនបានលើកឡើងអំពីឈ្មោះថ្នាំណាមួយនោះទេ។

លោក Trump យល់ថា COVID-19 វាយលុកចូលទៅក្នុងសួតដោយចំនួនដ៏ច្រើន ដូច្នេះលោកមានការយកចិត្តទុកដាក់ទៅលើគំនិតមួយ នោះគឺ ការប្រើប្រាស់សារធាតុសម្អាតមេរោគ។ លោក Trump ថ្លែងថា “យើងទាំងអស់គ្នានឹងត្រូវពឹងលើក្រុមគ្រូពេទ្យ ប៉ុន្តែប្រការនេះចំពោះខ្ញុំ គឺពិតជាគួរឱ្យចាប់អារម្មណ៍”។

មន្ត្រីសុខាភិបាលជាន់ខ្ពស់ម្នាក់បានឱ្យដឹងបន្ទាប់ពីប្រសាសន៍របស់លោក Trump ថា បន្ទប់ពិសោធន៍នានារបស់សហរដ្ឋអាមេរិក កំពុងតែពិនិត្យ និងអភិវឌ្ឍវិធីសាស្ត្រព្យាបាល COVID-19 ដោយប្រើសារធាតុសម្អាតមេរោគនេះ។

យោបល់របស់ប្រធានាធិបតីសហរដ្ឋអាមេរិកនេះ ត្រូវបានលើកឡើងបន្ទាប់ពី Bill Bryan ដែលជាមន្ត្រីក្រសួងសន្តិសុខផ្ទៃក្នុង បានរាយការណ៍អំពីការពិសោធដែលក្រុមនេះបានធ្វើឡើង ដែលលទ្ធផលបង្ហាញថា COVID-19 មិនអាចរស់បានយូរនៅក្នងបរិយាកាសក្ដៅនិងសើមនោះឡើយ។ ការដែលលោក Bryan ថ្លែងថា “មេរោគនេះងាប់យ៉ាងលឿននៅក្រោមពន្លឺថ្ងៃ” ធ្វើឱ្យលោក Trump សួរខ្លួនឯងថា តើគេអាចនាំយកពន្លឺ “ចាក់បញ្ចូលទៅក្នុងរាងកាយ” ដើម្បីសម្លាប់វីរុសនេះដែរ ឬអត់?

ឆ្លើយតបបន្ថែមទៅនឹងសំណួររបស់អ្នកយកព័ត៌មាន លោក Bryan និយាយថា បើមានតែកម្ដៅ និងសំណើម នោះនឹងមិនអាចសម្លាប់ COVID-19 បានទេ បើសិនជាអ្នករាល់គ្នាមិនបន្តគោរពវិធានការបម្រាមគោចរ និងវិធានការផ្សេងៗ។

ក្រុមអ្នកជំនាញខាងសុខាភិបាលនៅសហរដ្ឋអាមេរិក ក្នុងនោះមាន Vin Gupta ដែលជាវេជ្ជបណ្ឌិតឯកទេសខាងជំងឺសួត អ្នកជំនាញផ្នែកខាងគោលនយោបាយសុខាភិបាលសកល បានច្រានចោល “អនុសាសន៍មិនសមស្រប” របស់ប្រធានាធិបតីអាមេរិកាំង។ Gupta បានថ្លែងថា “គំនិតស្ដីអំពីការចាក់បញ្ចូល ឬលេបផលិតផលអ្វីមួយទៅក្នុងរាងកាយដើម្បីសម្អាតមេរោគ គឺជារឿងដែលមិនអាចទៅរួច និងប្រកបដោយគ្រោះថ្នាក់។ នោះគឺជាវិធីដែលត្រូវបានគេប្រើប្រាស់ច្រើន នៅពេលពួកគេចង់សម្លាប់ខ្លួន”។

លោក Trump កន្លងមកធ្លាប់បានសរសើរចំពោះវិធីព្យាបាលអ្នកជំងឺCOVID-19 ដែលមិនទាន់ត្រូវបានត្រួតពិនិត្យ នៅក្នុងសន្និសីទសារព័ត៌មានស្ដីអំពី COVID-19។ លោកធ្លាប់គាំទ្រឱ្យប្រើថ្នាំព្យាបាលជំងឺគ្រុនចាញ់ hydroxychloroquine ដើម្បីព្យាបាល COVID-19 ហើយលោក Trump ថែមទាំងបានសរសើរថា នេះអាចជា “អំណោយរបស់ព្រះ” ទៀតផង។ ក៏ប៉ុន្តែ ក្រុមមន្ត្រីសុខាភិបាលបានព្រមានអំពីការប្រើប្រាស់ថ្នាំនេះសម្រាប់ព្យាបាលCOVID-19។

បុរសម្នាក់រស់នៅក្នុងរដ្ឋ Arizona នៃសហរដ្ឋអាមេរិក កាលពីខែមីនាបានបាត់បង់ជីវិត បន្ទាប់ពីលេបថ្នាំ chloroquine phosphate ព្រោះតែជឿថា វាជួយឱ្យគាត់ទប់ស្កាត់ COVID-19។ ប្រពន្ធរបស់បុរសដែលបានស្លាប់ខាងលើនេះ បានប្រាប់ NBC News ថា អ្នកស្រីធ្លាប់បានមើលកម្មវិធីទូរទស្សន៍មួយ ក្នុងនោះមានប្រធានាធិបតី Donald Trump បាននិយាយអំពីអត្ថប្រយោជន៍នានារបស់ថ្នាំ chloroquineនេះ។

ពិភពលោកទាំងមូល បច្ចុប្បន្នមានប្រទេស និងដែនដីចំនួន210ហើយ ដែលមានវត្តមានរបស់COVID-19។ វីរុសនេះ បានបណ្ដាលឱ្យមនុស្ស 2,725,920នាក់កើតរោគ ក្នុងនោះមាន191,061នាក់បានស្លាប់។ ចំណែកនៅសហរដ្ឋអាមេរិកវិញ មានអ្នកជំងឺសរុប 886,709នាក់ ក្នុងនោះមានអ្នកស្លាប់ 50,243នាក់ ខណៈអ្នកដែលបានជាសះស្បើយ មានចំនួន 85,922នាក់៕

ប្រភព៖ សារព័ត៌មានបរទេស

April 24, 2020

ពិសមេរោគកូវីដ-19 ធ្វើឱ្យជនជាតិអាមេរិក 1នាក់ ក្នុងចំណោម 6នាក់ បាត់បង់ការងារធ្វើ

តួលេខគ្មានការងារធ្វើនៅក្នុងសហរដ្ឋអាមេរិក បានកើនឡើងជាបន្តបន្ទាប់ ច្រើនជាងក្នុងអំឡុងពេលមានវិបត្តិសេដ្ឋកិច្ចដ៏ធំកាលពីទសវត្សរ៍1930 ទៅទៀត ដោយខណៈពេលនេះ មានជនជាតិអាមេរិក 1នាក់ ក្នុងចំណោម 6នាក់ ត្រូវបានបញ្ឈប់ពីការងារ ដោយសារតែវិបត្តិមេរោគវីរុសកូវីដ-19។

តួលេខចុងក្រោយបំផុតដែលបានបង្ហាញឡើង បានឱ្យដឹងថា ជនជាតិអាមេរិកដែលបានដាក់ពាក្យសុំជំនួយ ដោយសារតែគ្មានការងារធ្វើ កាលពីសប្ដាហ៍កន្លងទៅ បានកើនឡើងច្រើនជាង 4.4លាននាក់ ធ្វើឱ្យតួលេខសរុបរបស់អ្នកគ្មានការងារធ្វើនៅក្នុងសហរដ្ឋអាមេរិកក្នុងខណៈពេលនេះ មានខ្ពស់ដល់ជាង 26លាននាក់ហើយ ដែលអាចប្រៀបធៀបបានជាមួយនឹងតួលេខរបស់ពលរដ្ឋក្នុងទីក្រុងដែលធំបំផុត 10កន្លែងរបស់សហរដ្ឋអាមេរិករួមគ្នា។
ការប្រកាសពីស្ថានភាពអ្នកគ្មានការងារធ្វើសរុបជាង 26លាននាក់នេះ ជាតួលេខដែលកើនឡើងជាបន្តបន្ទាប់ និងបានទទួលការប្រកាសទាំងអស់នេះត្រឹមតែរយៈពេល 5សប្ដាហ៍កន្លងមក ពេលដែលមានការចេញវិធានការគ្រប់គ្រងតឹងរ៉ឹង ដើម្បីការពារការឆ្លងរាលដាលរបស់មេរោគកូវីដ-19។

ផលប៉ះពាល់ដ៏ធ្ងន់ធ្ងរខាងសេដ្ឋកិច្ច បានធ្វើឱ្យមានមនុស្សម្នានៅក្នុងរដ្ឋជាច្រើនចេញមកតវ៉ាទាមទារ ឱ្យបន្ធូរបន្ថយវិធានការបិទទីក្រុង និងមានការចាប់ផ្ដើមដំណើរការរៀបចំផែនការបន្ធូរបន្ថយការគ្រប់គ្រងតឹងរ៉ឹងផ្សេងៗខ្លះហើយ បើទោះជាសហរដ្ឋអាមេរិកនៅតែជាប្រទេសមួយដែលមានចំនួនអ្នកស្លាប់ និងឆ្លងមេរោគកូវីដ-19 ច្រើនជាងគេនៅលើពិភពលោកក៏ដោយ។

CBS news របស់សហរដ្ឋអាមេរិក បានធ្វើគំរូបែបសម្រង់គំនិតយោបល់ ពាក់ព័ន្ធនឹងការបន្ធូរបន្ថយវិធានការគ្រប់គ្រងតឹងរ៉ឹងនេះ ហើយលទ្ធផលបានបង្ហាញថា 63% នៃអ្នកឆ្លើយតប មានអារម្មណ៍វិតក្កកង្វល់ពាក់ព័ន្ធនឹងការលុបចោលវិធានការគ្រប់គ្រងតឹងរ៉ឹងលឿនជ្រុលពេក ដែលអាចនឹងរឹតតែធ្វើឱ្យការឆ្លងរាលដាលកាន់តែធ្ងន់ធ្ងរឡើង ខ្លាំងជាងការភ័យខ្លាចពីផលប៉ះពាល់ខាងសេដ្ឋកិច្ចទៅទៀតក្នុងករណីបិទទីក្រុងយូរ។ ចំណែកអ្នកឆ្លើយតប 13% ទៀតបានបញ្ជាក់ថា ចង់ចេញទៅនៅក្នុងទីសាធារណៈម្ដងទៀតភ្លាមៗតែម្ដង នៅពេលមានការលុបចោលបញ្ជាហាមចេញក្រៅផ្ទះ៕

ប្រភព៖ សារព័ត៌មានបរទេស

April 24, 2020

នាវិក90នាក់បានឆ្លងCOVID-19 នៅលើនាវាទេសចរណ៍Costa Atlantica របស់អ៊ីតាលី ដែលសំចតនៅជប៉ុន

សមាជិកក្រុមនាវិកចំនួន40នាក់នៅលើនាវាទេសចរណ៍ Costa Atlantica របស់ប្រទេសអ៊ីតាលី ដែលកំពុងសំចតនៅកំពង់ផែ Nagasaki ប្រទេសជប៉ុន វិជ្ជមានជាមួយនឹងវីរុសCOVID-19 ធ្វើឱ្យចំនួនអ្នកជំងឺនៅលើនាវានេះកើនដល់90នាក់។

ស្ថានីយទូរទស្សន៍ NHK របស់ជប៉ុន ថ្ងៃនេះបានប្រកាសថា តួលេខសរុបនៃអ្នកជំងឺកូរ៉ូណានៅលើនាវា Costa Atlantica ដែលកំពុងសំចតនៅក្នុងកំពង់ផែន Nagasaki បានកើនដល់90នាក់ហើយ បន្ទាប់ពីបានរកឃើញអ្នកជំងឺថ្មី40នាក់បន្ថែមទៀត។ នាវាទេសចរណ៍ Costa Atlantica របស់ប្រទេសអ៊ីតាលីនេះ មិនមានដឹកភ្ញៀវនោះទេ ដោយវាត្រូវបាននាំទៅកាន់រោងចក្រជួសជុលនាវាមួយកន្លែងនៅក្នុងទីក្រុង Nagasaki នៅភាគនិរតីប្រទេសជប៉ុន ដើម្បីជួសជុល ក៏ប៉ុន្តែត្រូវបានពន្យារពេលដោយសារតែ COVID-19។

ក្រុមមន្ត្រីសុខាភិបាលនៅ Nagasaki បានឱ្យដឹងថា ពួកគេនឹងបញ្ចប់ការធ្វើតេស្តរកមេរោគនៅលើនាវិកទាំង623នាក់របស់នាវាCosta Atlanticaនេះ ប៉ុន្តែក៏មានការព្រួយបារម្ភខ្លាំងផងដែរ ចំពោះហានិភ័យឆ្លងរាលដាលទៅដល់ប្រជាជននៅក្នុងទីក្រុង បន្ទាប់ពីមានលេចឮព័ត៌មានថា មាននាវិកម្នាក់របស់ Costa Atlantica បានចាកចេញពីតំបន់ជួសជុលនាវានេះ។

ព័ត៌មានស្ដីអំពីសម្បុកមេរោគនៅលើនាវាទេសចរណ៍ Costa Atlantica បានធ្វើឱ្យមានចំណាប់អារម្មណ៍ច្រើននៅលើ Twitter នៅពេលដែលមានគេប្រៀបធៀបវាទៅនឹងនាវាទេសចរណ៍ Diamond Princess ដែលធ្លាប់មានមនុស្សជាង700នាក់បានឆ្លងវីរុសCOVID-19 ក្នុងនោះមាន13នាក់បានបាត់បង់ជីវិត។ នាវា Diamond Princess ធ្លាប់ត្រូវបានដាក់ឱ្យនៅដោយឡែកនៅឯលម្ហសមុទ្រ Yokohama ប្រទេសជប៉ុន កាលពីខែកុម្ភៈនៅមុនពេលអ្នកទេសចរ និងក្រុមនាវិកត្រូវបានជម្លៀសចេញពីនាវា។

អ្នកលេងបណ្ដាញសង្គមម្នាក់សរសេរថា “មានបញ្ហាអ្វីទៀតហើយ តើមិនបានដកបទពិសោធន៍ពី Diamond Princess ទេអី? វាបានចូលចតនៅកំពង់ផែដើម្បីជួសជុល ប៉ុន្តែសួរថា តើស្ថានភាពនោះចាំបាច់ដល់កម្រិតនេះហើយឬនៅ? ហេតុអ្វីបានជាអនុញ្ញាតឱ្យវាចូលចតបែបនេះ?”។

បច្ចុប្បន្ន ប្រទេសជប៉ុនបានរកឃើញអ្នកជំងឺCOVID-19 ជាង12,000នាក់ ក្នុងនោះមានអ្នកជំងឺជិត300នាក់បានស្លាប់ ដោយមិនទាន់បូករួមស្ថិតិនៅលើនាវាទេសចរណ៍ Diamond Princess នៅឡើយ។ នាយករដ្ឋមន្ត្រីជប៉ុន លោក Shizon Abe បានប្រកាសអាសន្នទូទាំងប្រទេស ទន្ទឹមនឹងការស្នើឱ្យប្រជាជនទាំងអស់នៅក្នុងផ្ទះ លើកលែងតែមានកិច្ចការចាំបាច់ ដើម្បីកាត់បន្ថយទំនាក់ទំនងផ្ទាល់ក្នុងសង្គមឱ្យបាន80% បំណងទប់ស្កាត់ការឆ្លងរាលដាលនៃវីរុសCOVID-19។

គិតមកដល់បច្ចុប្បន្ន មានប្រទេស និងដែនដីចំនួន210ហើយដែលមានវត្តមានរបស់វីរុសCOVID-19។ វីរុសនេះបានសម្លាប់មនុស្សយ៉ាងតិច191,000នាក់ ក្នុងចំណោមអ្នកជំងឺជាង2.7លាននាក់៕

ប្រភព៖ សារព័ត៌មានបរទេស

April 24, 2020

COVID-19! ទ្វីបអាស៊ីមានអ្នកជំងឺសរុបជាង435,000នាក់ ខណៈពិភពលោកមានអ្នកស្លាប់ជាង190,000នាក់

ពិភពលោកទាំងមូល មានអ្នកស្លាប់ជាង190,000នាក់ ក្នុងចំណោមអ្នកជំងឺCOVID-19 ជាង2.7លាននាក់ ដែលភាគច្រើននៅអឺរ៉ុប និងសហរដ្ឋអាមេរិក។

ស្ថិតិរបស់សាកលវិទ្យាល័យ Johns Hopkins ឱ្យដឹងថា វីរុសCOVID-19 បានបង្ហាញខ្លួននៅក្នុងប្រទេស និងដែនដីចំនួន210 នៅក្នុងពិភពលោក ធ្វើឱ្យមនុស្សយ៉ាងតិច 2,708,590នាក់បានឆ្លងមេរោគ ក្នុងនោះមានអ្នកជំងឺ190,303នាក់បានស្លាប់។ អ្នកជំងឺថ្មីកើន 88,011នាក់ និងអ្នកស្លាប់ថ្មីកើន7,400នាក់ បើធៀបនឹងម្សិលមិញ។ ចំនួនករណីដែលបានជាសះស្បើយ មានចំនួន744,866នាក់។

សហរដ្ឋអាមេរិកគឺជាសម្បុកមេរោគធំជាងគេបង្អស់ក្នុងពិភពលោក។ ប្រទេសនេះមានអ្នកស្លាប់សរុប49,751នាក់ និងអ្នកស្លាប់ថ្មីជិត2,100នាក់ ដោយសារឆ្លងវីរុសCOVID-19 ។ នៅក្នុងថ្ងៃដដែលនេះ សហរដ្ឋអាមេរិកក៏មានអ្នកជំងឺថ្មីជាង 30,000នាក់ ធ្វើឱ្យអ្នកជំងឺសរុបកើនដល់ជិត879,000នាក់។

អេស្ប៉ាញដែលជាសម្បុកមេរោគធំជាងគេទី2ក្នុងពិភពលោក បានរាយការណ៍ថា មានអ្នកជំងឺថ្មី4,635នាក់ អ្នកស្លាប់ថ្មី440នាក់។ អ្នកជំងឺសរុប213,023នាក់ ខណៈអ្នកស្លាប់សរុបឡើងដល់22,157នាក់។

អ៊ីតាលី៖ អ្នកជំងឺថ្មី2,646នាក់ អ្នកស្លាប់ថ្មី464នាក់ ចំណែកអ្នកជំងឺសរុបមាន189,973នាក់ និងអ្នកស្លាប់សរុប 25,549នាក់។ ប្រទេសនេះជាសម្បុកមេរោគធំជាងគេលំដាប់ទី3ក្នុងពិភពលោក ប៉ុន្តែជា “វាលពិឃាត” ធំជាងគេលំដាប់ទី2ក្នុងពិភពលោក។

បារាំង៖ អ្នកជំងឺថ្មី2,323នាក់ អ្នកស្លាប់ថ្មី516នាក់ ខណៈដែលអ្នកជំងឺសរុបមាន158,183នាក់ និងអ្នកស្លាប់សរុបមាន21,856នាក់។

អាល្លឺម៉ង់៖ អ្នកជំងឺថ្មីមានចំនួន1,136នាក់ និងអ្នកស្លាប់ថ្មីមាន126នាក់ នាំឱ្យអ្នកជំងឺសរុបកើនដល់151,784នាក់ និងអ្នកស្លាប់សរុបឡើងដល់5,404នាក់។

នៅទូទាំងទ្វីបអឺរ៉ុបមានអ្នកជំងឺកូរ៉ូណាសរុប1,193,276នាក់ អាមេរិកខាងជើងមាន948,983នាក់ ទ្វីបអាស៊ីមាន435,282នាក់ អាមេរិកខាងត្បូងមាន103,336នាក់ និងទ្វីបអាហ្វ្រិកមាន28,104នាក់៕

ប្រភព៖ សារព័ត៌មានបរទេស

April 24, 2020

លោក Trump ប្ដូរគំនិតលើការបើកដំណើរការសេដ្ឋកិច្ចឡើងវិញ ខណៈពលរដ្ឋអាមេរិកាំងជិត50,000នាក់ ស្លាប់ដោយសារ COVID-19!

ប្រធានាធិបតី Donald Drump បានឱ្យដឹងថា លោកអាចពន្យារសុពលភាពនៃការដាក់សង្គមឱ្យឃ្លាត់ពីគ្នារហូតដល់ប្រទេសនេះមានសុវត្ថិភាពនៅចំពោះមុខ COVID-19 ដែលជាវីរុសដ៏សាហាវ សម្លាប់មនុស្សជិត50,000នាក់នៅសហរដ្ឋអាមេរិក។

យោងតាមស្ថិតិនៅលើទំព័រ Worldometers គិតមកដល់ថ្ងៃទី23មេសា(ម៉ោងក្នុងស្រុក) សហរដ្ឋអាមេរិកមានអ្នកស្លាប់សរុប49,751នាក់ និងអ្នកស្លាប់ថ្មីជិត2,100នាក់ ដោយសារឆ្លងវីរុសCOVID-19 ។ នៅក្នុងថ្ងៃដដែលនេះ សហរដ្ឋអាមេរិកក៏មានអ្នកជំងឺថ្មីជាង 30,000នាក់ ធ្វើឱ្យអ្នកជំងឺសរុបកើនដល់ជិត879,000នាក់។

រដ្ឋមួយចំនួននៅសហរដ្ឋអាមេរិក បានចាប់ផ្ដើមបន្ធូរបន្ថយការរឹតត្បិតលើការដើរហើរ ដើម្បីត្រៀមបើកដំណើរការសេដ្ឋកិច្ចឡើងវិញ ដែលនេះជាសកម្មភាពត្រូវបានលោក Trump គាំទ្រ។ ក៏ប៉ុន្តែ មួយរយៈពេលខ្លីចុងក្រោយនេះ លោក Trump ហាក់បានផ្លាស់ប្ដូរការយល់ឃើញអំពីការបើកដំណើរការសេដ្ឋីកិច្ចឡើងវិញនេះ។ ជាក់ស្ដែង លោកបានបដិសេធគម្រោងបើកដំណើរការសេដ្ឋកិច្ចឡើងវិញរបស់រដ្ឋ Georgia។ លោក Trump ថ្លែងនៅក្នុងសន្និសីទសារព័ត៌មានមួយកាលពីថ្ងៃទី22មេសាថា “ខ្ញុំគិតថា វាដូចជាឆាប់ពេកហើយ”។

កាលពីម្សិលមិញ លោកក៏បានលើកបញ្ហាខាងលើនេះមកនិយាយម្ដងទៀត៖ ខ្ញុំចង់ឱ្យរដ្ឋនានាបើកដំណើរការសេដ្ឋកិច្ចបានឆាប់ គឺឆាប់ជាងគាត់ (អភិបាលរដ្ឋ Georgia លោក Brian Kemp) ទៅទៀត។ ប៉ុន្តែ ខ្ញុំមិនចង់ឃើញកន្លែងស្ប៉ាបើកទ្វារនៅដំណាក់កាលដំបូងនេះ ហើយក្រុមគ្រូពេទ្យក៏ដូចគ្នា”។ លោក Trump បាននិយាយដល់គម្រោងរបស់អាជ្ញាធររដ្ឋ Georgia ដែលសម្រេចអនុញ្ញាតឱ្យអាជីវកម្មមួយចំនួនដំណើរការឡើងវិញ ក្នុងនោះមានទាំងបន្ទប់ហាត់ប្រាណ ហាងធ្វើក្រចកនិងសក់ និងហាងម៉ាស្សាជាដើម បើកទ្វារចាប់ពីថ្ងៃទី24មេសា។

នៅក្នុងសន្និសីទសារព័ត៌មានការពីថ្ងៃទី23មេសា លោក Trump ឱ្យដឹងថា លោកអាចសម្រេចពន្យារសុពលភាពនៃការដាក់សង្គមឱ្យនៅឃ្លាតពីគ្នារហូតដល់ក្រោយថ្ងៃទី1ឧសភា បើសិនជាលោកយល់ថា សហរដ្ឋអាមេរិកមិនទាន់មានសុវត្ថិភាពនៅចំពោះមុខរោគរាតត្បាត COVID-19។ “យើងអាចអូសបន្លាយពេលយូរជាងនេះ…។ យើងនឹងពន្យារសុពលភាព (បម្រាមគោចរ) រហូតដល់ពេលដែលយើងមានសុវត្ថិភាព” លោក Trump សង្កត់ធ្ងន់បែបនេះ៕

ប្រភព៖ សារព័ត៌មានបរទេស

April 24, 2020

COVID-19! នាវាទេសចរណ៍នៅជប៉ុនមួយគ្រឿងទៀតហើយ ដែលក្លាយជាសម្បុកមេរោគរលាកសួតថ្មី

នាវាទេសចរណ៍របស់ប្រទេសអ៊ីតាលីមួយគ្រឿងដែលកំពុងចតនៅកំពង់ផែប្រទេសជប៉ុនដើម្បីជួសជុល បានក្លាយជាសម្បុកមេរោគ COVID-19 ខណៈមកដល់ពេលនេះ វាមានអ្នកជំងឺកូរ៉ូណាប្រភេទថ្មី យ៉ាងតិច48នាក់។

នៅថ្ងៃនេះ (23មេសា) មន្ត្រីនៅ Nagasaki ប្រទេសជប៉ុនបានឱ្យដឹងថា នាវាទេសចរណ៍អ៊ីតាលី Costa Atlantica មានអ្នកជំងឺ COVID-19 យ៉ាងតិចចំនួន48នាក់។ នាវា Costa Atlantica បានក្លាយជាសម្បុកមេរោគលើផ្ទៃទឹកទី2នៅជប៉ុន បន្ទាប់នាវា Diamond Princess ដែលមានអ្នកជំងឺកូរ៉ូណាសរុប700នាក់។ ក៏ប៉ុន្តែ នាវា Costa Atlantica វិញ មានតែក្រុមនាវិកប៉ុណ្ណោះដែលកំពុងនៅលើនាវា ព្រោះថា វាកំពុងចតនៅកំពង់ផែ Nagasaki ដើម្បីជួសជុល។

នាវាខាងលើនេះ បានទៅកាន់រោងចក្រសាងសង់នាវាមួយនៅតំបន់ Nagagaki កាលពីចុងខែកុម្ភៈ ក្រោយពី COVID-19 បានធ្វើឱ្យគម្រោងជួសជុលរបស់ពួកគេនៅប្រទេសចិនមុននោះត្រូវបានលុបចោល។

អ្នកជំងឺកូរ៉ូណាថ្មីចំនួន14នាក់ដែលត្រូវបានរកឃើញនៅលើនាវា Costa Atlantica បានធ្វើឱ្យមានការព្រួយបារម្ភថា វាអាចនាំឱ្យឆ្លងដល់ប្រជាជនក្នុងតំបន់ Nagasaki។ មុននេះ មានព័ត៌មានក្រៅផ្លូវការបានឱ្យដឹងថា នាវិកមួយចំនួនបានចាកចេញពីតំបន់ដែលគេបានកំណត់ បើទោះជាក្រុមហ៊ុន Costa Cruises (Italia) ដែលជាអ្នកគ្រប់គ្រងនាវា Costa Atlantica បានសន្យាថា ក្រុមនាវិករបស់ខ្លួននឹងនៅតែក្នុងតំបន់រោងចក្រសាងសង់នាវាដែលពួកគេកំពុងស្ថិតនៅក៏ដោយ។

នាវាទេសចរណ៍របស់អ៊ីតាលីនេះ មាននាវិក និងអ្នកបម្រើចំនួន623នាក់ និងមិនមានភ្ញៀវទេសចរណ៍នោះទេ។ សមាជិកក្រុមនាវិកម្នាក់ ដែលបានឆ្លងវីរុស COVID-19 កំពុងទទួលការព្យាបាលនៅឯមន្ទីរពេទ្យ។ អ្នកជំងឺនេះកំពុងស្ថិតក្នុងស្ថានភាពគ្រោះថ្នាក់ដល់ជីវិត និងត្រូវប្រើម៉ាស៊ីនជំនួយដង្ហើម។

ចំណែកអ្នកជំងឺ47នាក់ផ្សេងទៀត កំពុងបង្ខាំងខ្លួននៅក្នុងបន្ទប់ដោយឡែក។ ពួកគេមិនទាន់មានអាការរោគធ្ងន់ធ្ងរនៅឡើយ។

សារព័ត៌មាន AP បានឱ្យដឹងថា មន្ត្រីជប៉ុនកំពុងតែស្រាវជ្រាវរកប្រភពចម្លងរបស់សម្បុកមេរោគនេះ ខណៈដែលតំបន់ Nagasaki មានអ្នកជំងឺតែ17នាក់ប៉ុណ្ណោះ។ ក្រុមមន្ត្រីជប៉ុនបានសង្ស័យថា មេរោគប្រហែលជាបានឆ្លងនៅពេលដែលបុគ្គលិកនៃក្រុមនាវិកបានចេញទៅក្រៅ ឬបានឆ្លងនៅពេលនាវានេះបានប្ដូរនាវិកកាលពីប៉ុន្មានសប្ដាហ៍មុន។

បច្ចុប្បន្ន ជប៉ុនមានអ្នកជំងឺកូរ៉ូណាសរុបប្រមាណជាជិត12,000នាក់ និងជិត300នាក់បានបាត់បង់ជីវិត។ តួលេខនេះ មិនបានរាប់បញ្ចូលទាំងអ្នកជំងឺនៅលើនាវា Diamond Princess នោះទេ៕

ប្រភព៖ Channel News Asia

April 23, 2020

តម្លៃប្រេងអាច “ថោក” រហូតដល់ -100ដុល្លារក្នុង1បារ៉ែល នៅខែក្រោយ

ពិភពលោកប្រឈមនឹងការអស់កន្លែងសម្រាប់ដាក់ប្រេងនៅចុងខែឧសភាខាងមុខ ក្នុងពេលដែលការទិញដូរប្រេងឆៅមិនមានការកំណត់តម្លៃអប្បបរមា អាចជាន់ពន្លិចតម្លៃប្រេងចុះដល់ចំណុច “ហៅលែងឮ” ថែមទៀត។

ត្រូវបានបាញ់បង្ហោះឡើងទៅកាន់គន្លងគោចរតាំងពីឆ្នាំ2014 ផ្កាយរណប Sentinel-1 មានតួនាទីថត និងផ្ញើមកកាន់ផែនដីនូវរូបភាពច្បាស់បំផុតស្ដីអំពីសកម្មភាពនៅលើផ្ទៃភពផែនដី រួមទាំងអាងដាក់ប្រេង និងបណ្ដាកប៉ាល់ដឹកប្រេងផងដែរ។ ទិន្នន័យទាំងនេះត្រូវបានគេប្រើដើម្បីគន់គូរអំពីបរិមាណប្រេងឆៅដែលត្រូវបានរក្សាទុក។ ថ្មីៗនេះ រូបភាពពី Sentinel-1 បានផ្ញើសារដ៏គួរឱ្យប្រកាសអាសន្នមួយ នោះគឺ “បណ្ដាឃ្លាំងដាក់ប្រេងបានពេញអស់ទៅហើយ”។

នេះគឺជាបញ្ហាដែលមិនធ្លាប់បានកើតឡើងពីមុនមក។ ក្រុមអ្នកជំនាញបានឱ្យដឹងថា ប្រហែលជាប៉ុន្មានសប្ដាហ៍ទៀតប៉ុណ្ណោះ ពិភពលោកនឹងអស់កន្លែងសម្រាប់ដាក់ប្រេង។ ជាលទ្ធផល តម្លៃប្រេងនៅក្នុងតំបន់ខ្លះ ត្រូវបានព្យាករថានឹងធ្លាក់ដល់0ដុល្លារ ឬទាបជាងនេះ។

Florian Thaler អ្នកជំនាញមកពីក្រុមហ៊ុន Oilx ជាក្រុមហ៊ុនស្រាវជ្រាវទិន្នន័យដែលបានពីផ្កាយរណប Sentinel-1 បានឱ្យដឹងថា “ទិន្នន័យពីផ្កាយរណប Sentinel-1 បានបង្ហាញថា នៅចុងខែឧសភា ឬដើមខែមិថុនា ពិភពលោកនឹងធ្លាក់ទៅក្នុងស្ថានភាពអស់ទីតាំងដាក់ប្រេង”។

ចំណែក Paul Sankey ដែលជាអ្នកជំនាញក្នុងការវិភាគបញ្ហាប្រេងប្រចាំ Mizuho Bank ក៏បានឱ្យដឹងដែរថា “យើងត្រូវងាកទៅប្រើយុទ្ធសាស្ត្រគ្រប់គ្រងវិបត្តិជារៀងរាល់ថ្ងៃ”។ អ្នកជំនាញរូបនេះធ្លាប់បានព្រមាន និងព្យាករដ៏ត្រឹមត្រូវអំពីតម្លៃ0ដុល្លាររបស់ប្រេងនៅក្នុងខែមីនា ហើយពេលនេះ លោកក៏បន្តព្យាករប្រកបដោយទុទិដ្ឋិនិយមខ្លាំងជាងមុនទៅទៀត។ គាត់និយាយថា “តើយើងនឹងបានឃើញតម្លៃប្រេងធ្លាក់មកនៅ-100ដុល្លារក្នុង1បារ៉ែលនៅក្នុងខែក្រោយនេះ? ប្រការនេះពិតជាអាចកើតឡើង”។

បញ្ហាសំខាន់បំផុត គឺថា តម្លៃប្រេងឆៅត្រូវបានកំណត់ដោយយោងទៅលើការផ្គត់ផ្គង់ និងការបញ្ជាទិញ ពោលគឺវាមិនមានតម្លៃអប្បបរមាដែលកំណត់ដោយរដ្ឋាភិបាលណាមួយនោះទេ។ ក្រោយហេតុការណ៍ក្នុងសប្ដាហ៍នេះ បញ្ហាអ្វីក៏អាចកើតឡើងបានដែរ។

បើទោះបីជាការព្យាករអាចមានភាពខុសគ្នាខ្លះមែន ប៉ុន្តែ ប្រការដែលប្រាកដប្រជានោះគឺថា រូបភាពពីផ្កាយរណប Sentinel-1 បានបង្ហាញថា ពិភពលោកកំពុងតែសល់ប្រេងយ៉ាងច្រើនសន្ធឹក។ ប្រេងចំនួន50លានបារ៉ែល ត្រូវបានដឹកទៅកាន់បណ្ដាឃ្លាំងជារៀងរាល់សប្ដាហ៍ ដែលតួលេខនេះ គ្រប់គ្រាន់សម្រាប់តម្រូវការប្រើប្រាស់របស់អាល្លឺម៉ង់ បារាំង អ៊ីតាលី អេស្ប៉ាញ និងអង់គ្លេសបូកចូលគ្នា។

នៅក្នុងផ្សារហ៊ុនកាលពីថ្ងៃទី21មេសា ប្រេងត្រូវបាន “លក់ឡាយឡុង”។ កិច្ចសន្យាប្រេង Brent ដែលនឹងផ្គត់ផ្គង់ក្នុងខែមិថុនា បានថយចុះ15% នៅសល់តែ16ដុល្លារក្នុង1បារ៉ែល ដែលជាតម្លៃទាបបំផុតក្នុងអំឡុងជិត21ឆ្នាំមកនេះ។ ប្រេងឆៅដែលមានប្រភពពីអឺរ៉ុប និងអាហ្វ្រីក ដែលធ្លាប់តែមានតម្លៃទាបជាងប្រេង Brent ក៏ត្រូវបានលក់ក្នុងតម្លៃក្រោម10ដុល្លារក្នុង1បារ៉ែល ហើយមានកន្លែងខ្លះ តម្លៃរបស់វាត្រូវបានគេលក់ក្រោម5ដុល្លារទៀតផង។

នៅឥណ្ឌា ឃ្លាំងដាក់ប្រេងនៅក្នុងបណ្ដារោងចក្រចម្រាញ់ប្រេង បច្ចុប្បន្នបានពេញរហូតដល់95%ទៅហើយ។ ក្រុមហ៊ុនចម្រាញ់ប្រេងក៏មិនអាចទិញប្រេងបន្ថែមទៀតដែរ ព្រោះតម្រូវការប្រើប្រាស់បានថយចុះយ៉ាងគំហុក។

ក្រុមហ៊ុនផលិតប្រេងមួយចំនួនបានផ្អាកដំណើរការ ប៉ុន្តែក៏នៅតែមានក្រុមហ៊ុនខ្លះ ត្រូវបូមប្រេងឡើងផងដែរ។ ជាមួយនឹងបណ្ដាក្រុមហ៊ុនដែលពោរពេញទៅដោយបំណុល សូម្បីតែតម្លៃ4-10ដុល្លារក្នុង1បារ៉ែល ក៏ពួកគេចាត់ទុកថាគ្រាន់បើជាងមិនមានអ្វីសោះ។ មិនមានកន្លែងសម្រាប់លក់ចេញ ប្រេងឆៅមានតែនៅសម្ងំក្នុងឃ្លាំង។ ទិន្នន័យពី Sentinel-1 នៅតែត្រូវបានគេយល់ថា នៅមានសង្ឃឹម។ មានឃ្លាំងដាក់ប្រេងជាច្រើននៅទំនេរ ក៏ប៉ុន្តែ ទាំងនោះត្រូវបានគេជួលតាំងពីមុនអស់ទៅហើយ វាគ្រាន់តែរង់ចាំគេចាក់ប្រេងបំពេញតែប៉ុណ្ណោះ។

Pierre Andurand ដែលជាស្ថាបនិកនៃមូលនិធិការពារប្រេង បានឱ្យដឹងថា “យើងយល់ថា តម្លៃប្រេងនឹងធ្លាក់ចុះដល់កម្រិត0ដុល្លារ ឬទាបជាងកម្រិត0ដុល្លារទៅទៀត។ ទីផ្សារបច្ចុប្បន្នកំពុងគ្រោះថ្នាក់ខ្លាំងណាស់ក្នុងការទិញដូរ”។

នៅទីផ្សារសហរដ្ឋអាមេរិក អ្នកវិនិយោគបានងាកទៅរក Cushing ដែលជាមជ្ឈមណ្ឌលជួញដូរប្រេងដ៏ធំប្រចាំរដ្ឋ Oklahoma។ នៅទីនេះអាចដាក់ប្រេងបានដល់ទៅជិត80លានបារ៉ែល។ ក៏ប៉ុន្តែ ព័ត៌មានមុននេះបានឱ្យដឹងថា ទីនេះអស់កន្លែងសម្រាប់ដាក់ប្រេងទៅហើយដែរ។

បញ្ហានៅមានបន្តទៀត៖ Plains All American Pipelines ដែលជាក្រុមហ៊ុនដឹកជញ្ជូនប្រេងដ៏ធំបំផុតមួយនៅសហរដ្ឋអាមេរិក បានស្នើឱ្យក្រុមហ៊ុន Eastern Kansas Common ចំណាយឱ្យខ្លួន55ដុល្លារសម្រាប់1បារ៉ែល បើសិនជាចង់លក់ប្រេងឆៅដែលក្រុមហ៊ុននេះផលិត។

បណ្ដាឃ្លាំងប្រេងនៅ Rotterdam ដែលជាមជ្ឈមណ្ឌលចម្រាញ់ប្រេងរបស់អឺរ៉ុបខាងលិច រួមនឹងឃ្លាំងប្រេងនៅលើកោះមួយចំនួននៅតំបន់ Caribbean និងនៅសិង្ហបុរី នឹងអស់កន្លែងដាក់ប្រេងនាពេលដ៏ខ្លីខាងមុខ។ បណ្ដាកប៉ាល់ដឹកប្រេងដែលត្រូវបានយកមកធ្វើជាឃ្លាំងដាក់ប្រេងបណ្ដោះអាសន្ន ក៏នឹងលែងមានកន្លែងដាក់ទៀតដែរ។

Royal Vopak ដែលជាក្រុមហ៊ុនផ្ដល់សេវាកម្មជួលឃ្លាំងដាក់ប្រេងឯករាជ្យធំបំផុតក្នុងពិភពលោក បានឱ្យដឹងថា ពិភពលោកទាំងមូលកំពុងស្វែងរកកន្លែងសម្រាប់ដាក់ប្រេង។ “សមត្ថភាពផ្ទុកដែលអាចរកបាននៅទូទាំងពិភពលោក ពេលនេះត្រូវបានគេទិញស្ទើរតែទាំងអស់ទាំងស្រុងទៅហើយ” នេះបើតាម Gerard Paulides ដែលជានាយកផ្នែកហិរញ្ញវត្ថុរបស់ក្រុមហ៊ុន Royal Vopak៕

ប្រភព៖ សារព័ត៌មានបរទេស

April 23, 2020

យន្តហោះនៃប្រទេសចំនួន7 ដែលហោះទៅយកសម្ភារសុខាភិបាលពីចិន ត្រូវត្រឡប់មកស្រុកដោយដៃទទេ

រដ្ឋមន្ត្រីការបរទេសកាណាដា បានរៀបរាប់អំពីស្ថានការណ៍ដណ្ដើមគ្នាទិញសម្ភារសុខាភិបាលពីប្រទេសចិន នៅកណ្ដាលសម័យកាល COVID-19 គឺដូចទៅនឹងខ្សែភាពយន្តរឿង “Wild Wild West” បន្ទាប់ពីយន្តហោះជាច្រើនគ្រឿងរបស់បណ្ដាប្រទេស ត្រូវហោះត្រឡប់មកស្រុកដោយ “ដៃទទេ”។

សារព័ត៌មាន Fox News ដកស្រង់សម្ដីរបស់នាយករដ្ឋមន្ត្រីកាណាដា លោក Justin Trudeau កាលពីថ្ងៃទី21មេសា បានឱ្យដឹងថា យន្តហោះ2គ្រឿងរបស់ប្រទេសនេះ បានហោះទៅកាន់ប្រទេសចិនដើម្បីដឹកសម្ភារសុខាភិបាល ត្រូវបង្ខំឱ្យវិលត្រឡប់មកប្រទេសវិញដោយ “ដៃទទេ” កាលពីដើមសប្ដាហ៍នេះ។ លោក Trudeau មានប្រសាសន៍ថា “បទបញ្ជារឹតបន្តឹងដ៏ខ្លាំងក្លា” ទាក់ទិនទៅនឹងពេលវេលាដែលយន្តហោះមួយគ្រឿងត្រូវចុះចតនៅលើព្រលានយន្តហោះរបស់ប្រទេសចិន បានធ្វើឱ្យយន្តហោះ2គ្រឿងរបស់កាណដា ត្រូវវិលមកប្រទេសវិញ ដោយមិនអាចយកទំនិញបាន។ នេះគឺជាយន្តហោះ2គ្រឿងដែលត្រូវបានបញ្ជូនទៅប្រទេសចិនដើម្បីទទួលសម្ភារសុខាភិបាល មកឱ្យរដ្ឋាភិបាល និងខេត្តមួយទៀតរបស់ប្រទេសកាណាដា។

នាយករដ្ឋមន្ត្រីកាណដាថ្លែងថា ផ្លូវដែលរថយន្តដឹកទំនិញត្រូវធ្វើដំណើរមកកាន់ព្រលានយន្តហោះ មានការលំបាកខ្លាំង ហើយត្រូវរអាក់រអួលដោយសារតែត្រូវឈប់នៅកន្លែងត្រួតពិនិត្យរកមេរោគ ដូច្នេះ ពេលវេលានៃការដឹកជញ្ជូនក៏ត្រូវអូសបន្លាយ។ បច្ចុប្បន្ន គេមិនទាន់ដឹងថា តើលោក Trudeau បានបញ្ជាឱ្យយន្តហោះ ធ្វើដំណើរទៅកាន់ប្រទេសចិនម្ដងទៀតដើម្បីយកទំនិញដែរ ឬយ៉ាងណានោះទេ ប៉ុន្តែ លោកបាននិយាយថា កាណាដាសង្ឃឹមថា នឹងមានប្រភពទំនិញបន្ថែមទៀតនាពេលខាងមុខ។

ឧបនាយករដ្ឋមន្ត្រី និងជារដ្ឋមន្ត្រីការបរទេសកាណាដា លោកស្រី Chrystia Freeland បានថ្លែងថា “ស្ថានភាពពេលនេះ ប្រៀបដូចជាស្ថានភាពនៅក្នុងភាពយន្ត “Wild Wild West” យ៉ាងដូច្នោះដែរ”។

ទីភ្នាក់ងារសារព័ត៌មាន Politico បានដកស្រង់សម្ដីរបស់មន្ត្រីកាណាដាម្នាក់ដែលសុំមិនបញ្ចេញឈ្មោះ បានឱ្យដឹងថា កាណាដាមិនមែនជាប្រទេសតែមួយគត់ដែលជួបបញ្ហាដូចខាងលើនេះនោះទេ ព្រោះថា មានយន្តហោះរបស់ប្រទេសយ៉ាងតិចចំនួន6ផ្សេងទៀត បានជួបបញ្ហាដូចគ្នានេះដែរ។ ក៏ប៉ុន្តែ មន្ត្រីរូបនេះមិនបានបញ្ជាក់ថា ប្រទេសទាំងនោះគឺជាប្រទេសណាខ្លះនោះទេ។

មន្ត្រីខាងលើបានប្រាប់សារព័ត៌មាន Politico ថា ព្រលានយន្តហោះសៀងហៃរបស់ប្រទេសចិន បានស្ថិតក្នុងស្ថានភាពលើសចំណុះ នៅពេលដែលជើងហោះហើរបានកើនឡើដ4ដង បើធៀបនឹងពេលធម្មតា ខណៈដែលប្រទេសជាច្រើនបានបញ្ជូនយន្តហោះទៅកាន់ទីនេះដើម្បីដឹកសម្ភារសុខាភិបាល។ មន្ត្រីនេះក៏បានបញ្ជាក់ថា សម្ភារសុខាភិបាលប្រមាណជា70%របស់ប្រទេសកាណាដា ត្រូវបាននាំចូលពីប្រទេសចិន ក្រៅពីនេះគឺនាំចូលពីសហរដ្ឋអាមេរិក អង់គ្លេស និងស្វីស។

បច្ចុប្បន្ន ប្រទេសចិនមិនទាន់បានបញ្ចេញមតិអ្វីជុំវិញបញ្ហាខាងលើនេះនៅឡើយ។

COVID-19 បានចាប់ផ្ដើមឆ្លងរាលដាលនៅប្រទេសចិន ចាប់ពីចុងឆ្នាំ2019 ហើយបច្ចុប្បន្ន វាបានធ្វើឱ្យមនុស្សយ៉ាងតិច 2,648,481នាក់ឆ្លងវីរុស ក្នុងនោះមានអ្នកស្លាប់184,616នាក់ និងអ្នកបានជាសះស្បើយមានចំនួន724,382នាក់។ ប្រទេសកាណាដា បច្ចុប្បន្ន មានអ្នកជំងឺកូរ៉ូណា 40,190នាក់ ក្នុងនោះអ្នកស្លាប់មានចំនួន1,974នាក់៕

ប្រភព៖ សារព័ត៌មានបរទេស

April 23, 2020

Author: សឿន សំណាង