សឿន សំណាង - La Reine Media

ប្រធានាធិបតី Trump ជំពាក់បំណុលធនាគារចិន រាប់សិបលានដុល្លារ

សារព័ត៌មាន Daily Mail បានរាយការណ៍ថា ប្រធានាធិបតីសហរដ្ឋអាមេរិក បច្ចុប្បន្នជំពាក់បំណុលធនាគារប្រទេសចិនរាប់សិបលានដុល្លារ ហើយថា នឹងពន្យារពេលបង់ប្រាក់សងធនាគារនេះនៅឆ្នាំ2022 (ពាក់កណ្ដាលអាណត្តិទី2របស់លោក Trump បើសិនលោកជាប់ឆ្នោតម្ដងទៀត)។

សិទ្ធិកាន់កាប់របស់លោក Trump ចំពោះអគារ Manhattan ដែលមាន43ជាន់ ត្រូវបានគេដឹងជាទូទៅអស់រយៈពេលច្រើនឆ្នាំមកហើយ ព្រមទាំងត្រូវបានលើកឡើងនៅក្នុងយុទ្ធនាការឃោសនារកសំឡេងឆ្នោតរបស់លោកTrump កាលពីឆ្នាំ2015ទៀតផង។

សារព័ត៌មាន Daily Mail បានឱ្យដឹងថា ប្រធានាធិបតីសហរដ្ឋអាមេរិក លោក Donald Trump កាន់កាប់ភាគហ៊ុនចំនួន30% នៅក្នុងអគារ 1290 Avenue of the Americas នៅឯទីក្រុងនីវយ៉ក សហរដ្ឋអាមេរិក។ អគារនេះ ត្រូវបានគេដឹងថា មានតម្លៃសរុបឡើងដល់ជាង1ពាន់លានដុល្លារ។

អគារ Trump Tower ដែលស្ថិតនៅតាមបណ្ដោយផ្លូវ 1290 នេះ គឺជាផ្នែកមួយនៃមោទកភាពរបស់លោក Trump នៅពេលលោកធ្វើយុទ្ធនាយការរកសំឡេងឆ្លោតសម្រាប់តំណែងប្រធានាធិបតីក្នុងឆ្នាំ2015។

លោក Trump បានថ្លែងកាលពីឆ្នាំ2015 នៅក្នុងអគារ Trump Tower ថា “ខ្ញុំបានយកឈ្នះលើប្រទេសចិនជាច្រើនជាបន្តបន្ទាប់។ ខ្ញុំបានកាន់កាប់មួយផ្នែកធំនៃអគារ Bank of America នៅ San Francisco និងអគារ 1290 Avenue ដែលខ្ញុំយកបានពីចិននៅក្នុងការប្រកួតប្រជែងមួយ។ ពិតជាមានតម្លៃខ្លាំងណាស់។ ខ្ញុំស្រឡាញ់ប្រទេសចិន”។

បើយោងតាមទំព័រ Politico បានឱ្យដឹងថា ដៃគូរបស់លោក Trump គឺក្រុមហ៊ុន Vornado Realty Trust កំពុងកាន់កាប់70%នៃអគារខាងលើ ចាប់តាំងពីឆ្នាំ2012 នៅពេលខ្ចីប្រាក់950លានដុល្លារដើម្បីសងបំណុលលើខ្ទង់វិនិយោគទៅលើអគារនេះ។ ក្នុងនោះ ទឹកប្រាក់ប្រមាណជា 211លានដុល្លារ បានមកពីកម្ចីពីធនាគារចិន (BOC)។

លោក Trump ធ្លាប់បានប្រកាសថានឹងដកខ្លួនចេញពីតួនាទីជាអ្នកគ្រប់គ្រងអាជីវកម្មក្នុងអំឡុងរដូវបោះឆ្នោតប្រធានាធិបតីឆ្នាំ2016 បើសិនជាលោកជាប់ឆ្នោត។

ក៏ប៉ុន្តែ មនុស្សជាច្រើនយល់ថា លោក Trump នៅតែមិនព្រមបោះបង់អាណាចក្រជំនួញរបស់ខ្លួន ដែលមានក្រុមហ៊ុនបុត្រសម្ព័ន្ធជាង500 និងអចលនទ្រព្យនៅក្នុងប្រទេសជាង20 នៅក្នុងពិភពលោក ខណៈបានក្លាយជាម្ចាស់សេតវិមានទៅហើយ។ លោកនៅតែគ្រប់គ្រង Trump Organization បើទោះជាបានប្រគល់សិទ្ធិចាត់ចែងទៅឱ្យកូនប្រុស2រូបរបស់ខ្លួនរួចហើយក្ដី។

កាលពីខែមករា2019 លោក Trump ធ្លាប់បានអំពាវនាវឱ្យមានការស៊ើបអង្កេតលើទំនាក់ទំនងរបស់អតីតអនុប្រធានាធិបតីសហរដ្ឋអាមេរិក លោក Joe Biden ដែលជាបេក្ខភាពលំដាប់កំពូលរបស់បក្សប្រជាធិបតេយ្យសម្រាប់ការបោះឆ្នោតប្រធានាធិបតីអាមេរិកាំងឆ្នាំ2020 ដែលសំដៅទៅលើទំនាក់ទំនងរបស់កូនប្រុសលោក Biden ជាមួយនឹងមូលនិធិមួយដែលបានស្វែងរកវិធីប្រមូលទុនពីប្រទេសចិន។

លោក Trump យល់ថា លោក Hunter Biden បានកេងចំណេញលើឥទ្ធិពលរបស់ឪពុកខ្លួន (លោក Joe Biden) ពេលដែលកំពុងកាន់កាប់តំណែងអនុប្រធានាធិបតី ដើម្បីទទួលបានប្រាក់ 1.5ពាន់លានដុល្លារពីរដ្ឋាភិបាលចិនសម្រាប់មូលនិធិភាគហ៊ុនរបស់ខ្លួន ហើយរកបានប្រាក់ចំណេញរាប់លានដុល្លារពីអំពើកេងខាងលើនេះ។

កាលពីដើមខែមេសា ឆ្នាំ2020 ក្រុមអ្នកធ្វើយុទ្ធនាការឃោសនារកសំឡេងឆ្នោតរបស់លោក Trump បានបង្ហោះសារមួយនៅលើបណ្ដាញសង្គមដែលមានខ្លឹមសារថា “ហេតុអ្វីបានជាធនាគារជាតិចិន បែរជាសហការជាមួយ Hunter Biden ពេលដែលឪពុករបស់គាត់កំពុងកាន់តំណែងជាអនុប្រធានាធិបតី?”។

ថ្មីៗនេះ នៅក្នុងសន្និសីទសារព័ត៌មានមួយនៅឯសេតវិមាន ប្រធានាធិបតីសហរដ្ឋអាមេរិក លោក Donald Trump យល់ថា “ប្រទេសចិននឹងគ្រប់គ្រង Joe Biden” នេះមានន័យថា បើសិនជាលោក Biden ជាប់ឆ្នោតជាប្រធានាធិបតី នៅក្នុងការបោះឆ្នោតនាខែវិច្ឆិកា ឆ្នាំ2020ខាងមុខ នោះប្រទេសចិននឹងអាចគ្រប់គ្រប់សហរដ្ឋអាមេរិក។

ប្រធានាធិបតី Donald Trump នៅតែរិះគន់ជាហូរហែអំពីទំនាក់ទំនងរវាងគូប្រកួតរបស់គាត់ គឺលោក Joe Biden ជាមួយនឹងប្រទេសចិន ក៏ប៉ុន្តែ លោក Trump បានភ្លេចថា ខ្លួននៅជំពាក់លុយយ៉ាងច្រើននៅធនាគាររបស់ប្រទេសចិន ហើយប្រការនេះអាចនឹងធ្វើឱ្យមានការលំបាកធំធេងសម្រាប់លោក ក្នុងយុទ្ធនាការរកសំឡេងឆ្នោតនៅចុងឆ្នាំ2020នេះ។

អ្នកជំនាញការ Robert Maguire មកពីអង្គការពលរដ្ឋដើម្បីការទទួលខុសត្រូវនិងក្រមសីលធម៌ ប្រចាំទីក្រុងវ៉ាស៊ីងតោន បានអះអាងថា “លោក Trump រិះគន់ទៅលើការរកស៊ីរបស់ Hunter ប៉ុន្តែ លោក Trump កំពុងតែកាន់កាប់ក្រុមហ៊នដែលរកបានប្រាក់ចំណេញពីបណ្ដាទំនាក់ទំនងហិរញ្ញវត្ថុជាមួយនឹងបណ្ដាប្រទេសដែលលោកកំពុងតែជំនួសមុខឱ្យប្រជាជនអាមេរិាំងក្នុងការចរចានានា”។

មិនត្រឹមតែប៉ុណ្ណោះ គម្រោងអចលនទ្រព្យជាន់ខ្ពស់2ផ្សេងទៀតដែលមានឈ្មោះ Trump នៅឯ អារ៉ាប់រួម (UAE) និងឥណ្ឌូនេស៊ី បែរជាកំពុងត្រូវបានសាងសង់ដោយក្រុមហ៊ុនជាតិរបស់ចិនទៅវិញ។ លោកប្រធានាធិបតី Trump និងកូនស្រីរបស់គាត់ គឺលោកស្រី Ivanka ទទួលបានកម្មសិទ្ធិលើពាណិជ្ជសញ្ញារាប់រយពីរដ្ឋាភិបាលចិនផងដែរ៕

ប្រភព៖ Daily Mail, Politico

April 27, 2020

ទាហានរុស្ស៊ី ជិត900នាក់ បានឆ្លងវីរុសCOVID-19

របាយការណ៍ដំបូងពីទីក្រុងម៉ូស្គូ ស្ដីអំពីស្ថានភាព COVID-19 ក្នុងជួរកងទ័ពរុស្ស៊ី បានឱ្យដឹងថា ទាហានចំនួន874នាក់នៃប្រទេសនេះ បានឆ្លងវីរុសបង្កជំងឺរលាកសួតប្រភេទ ក្នុងនោះមានទាហាន4នាក់កំពុងស្ថិតក្នុងសភាពធ្ងន់ធ្ងរ។

“ការធ្វើតេស្តរកមេរោគក្នុងជួរកងទ័ពរស្ស៊ី រាប់ចាប់ពីខែមីនា ដល់ថ្ងៃទី26មេសា បានបង្ហាញថា ទាហានចំនួន874នាក់ មានលទ្ធផលវិជ្ជមានជាមួយនឹង COVID-19។ ក្នុងចំណោមនេះ មាន314នាក់កំពុងទទួលការព្យាបាលនៅក្នុងមន្ទីរពេទ្យរបស់ក្រសួងការពារជាតិ 175នាក់ទទួលការព្យាបាលនៅក្នុងបន្ទាយ 6នាក់ព្យាបាលនៅមន្ត្រីពេទ្យសាធារណៈ និង379នាក់ទៀតកំពុងបង្ខាំងខ្លួនក្នុងផ្ទះ” នេះបើតាមក្រសួងការពារជាតិរុស្ស៊ី ប្រកាសកាលពីម្សិលមិញ។

កងទ័ពរុស្ស៊ីបានឱ្យដឹងបន្ថែមថា ទាហាន4នាក់មានអាការធ្ងន់ធ្ងរបន្ទាប់ពីបានឆ្លងវីរុសCOVID-19 ក្នុងនោះមានអ្នកជំងឺម្នាក់ត្រូវបំពាក់ម៉ាស៊ីនជំនួយដង្ហើម។ 15នាក់ស្ថិតក្នុងស្ថានភាពមធ្យម ក្រៅពីនេះគឺពុំទាន់មានរោគសញ្ញានៅឡើយ។ ជាងនេះ កងទ័ពរុស្ស៊ីក៏បានរកឃើញបុគ្គលិកផ្នែកស៊ីវិលរបស់ខ្លួនចំនួន245នាក់ និងសិក្ខាកាម779នាក់នៅតាមបណ្ដាសាលាយោធា ក៏មានផ្ទុកវីរុសនេះ ប៉ុន្តែភាគច្រើនពុំទាន់មានរោគសញ្ញា។

របាយការណ៍បានសរសេរថា “ទាហានទាំងអស់ត្រូវបានពិនិត្យសុខភាពរៀងរាល់ថ្ងៃ។ យានយន្តទាំងអស់របស់កងទ័ព ក៏ត្រូវបានបាញ់ថ្នាំសម្លាប់មេរោគយ៉ាងទៀតទាត់ផងដែរ”។

កងទ័ពរុស្ស៊ី កាលពីសប្ដាហ៍មុនបានប្រកាសថា ទាហានរបស់ខ្លួនរាប់ពាន់នាក់ ដែលប្រមូលផ្ដុំគ្នាដើម្បីធ្វើការហ្វឹកហាត់សម្រាប់ពិធីព្យុហយាត្រារំឭកពីជ័យជម្នះនៅទីក្រុងម៉ូស្គូ ត្រូវបង្ខំឱ្យនៅដាច់ដោយឡែករយៈពេល2សប្ដាហ៍ បន្ទាប់ពីត្រឡប់មកកាន់អង្គភាព ដើម្បីទប់ស្កាត់ការឆ្លងវីរុសCOVID-19។ ប៉ុន្តែ កងទ័ពរុស្ស៊ីមិនបានបញ្ជាក់ថា នេះជាវិធានការដើម្បីទប់ស្កាត់ជាមុន ឬមួយមានករណីឆ្លងមេរោគរួចហើយនោះទេ។

COVID-19 បានបង្ហាញខ្លួននៅក្នុងប្រទេស និងដែនដីចំនួន210 ក្នុងពិភពលោក បណ្ដាលឱ្យមនុស្សជិត3លាននាក់បានឆ្លងមេរោគ និងជាង206,000នាក់បានបាត់បង់ជីវិត។ កាលពីម្សិលមិញ រុស្ស៊ីបានរាយការណ៍ថា ប្រទេសនេះ មានអ្នកជំងឺ80,949នាក់បានឆ្លងវីរុស ក្នុងនោះមាន747នាក់បានស្លាប់ និង6,767នាក់បានជាសះស្បើយ។ រដ្ឋាភិបាលប្រទេសនេះបានធ្វើតេស្តរកមេរោគCOVID-19 សរុបជាង2.8លាននាក់នៅទូទាំងប្រទេស៕

ប្រភព៖ សារព័ត៌មានបរទេស

April 27, 2020

កូរ៉េខាងត្បូងអះអាង៖ គីម ជុង អ៊ុន មិនទាន់ស្លាប់ទេ កំពុងរស់នៅយ៉ាងសុខសប្បាយនៅទីក្រុងវ៉នសាន

រដ្ឋបាលកូរ៉េខាងត្បូងបានអះអាងថា លោក គីម ជុង អ៊ុន មេដឹកនាំកូរ៉េខាងជើងសុខសប្បាយជាទេ បន្ទាប់ពីមានដំណឹងចចាមអារ៉ាមដ៏ច្រើនសន្ធឹកថា លោកបានស្លាប់បាត់ទៅហើយ ក្រោយទទួលការវះកាត់បេះដូង។

ទីភ្នាក់ងារព័ត៌មានCNN បានរាយការណ៍ថា លោក មូន សង់ អ៊ីន ប្រធានទីប្រឹក្សាផ្នែកនយោបាយក្រៅប្រទេសរបស់លោកប្រធានាធិបតី មូន ជេ អ៊ីន នៃប្រទេសកូរ៉េខាងត្បូង បានអះអាងកាលពីថ្ងៃអាទិត្យ(ទី26មេសា)ម្សិលមិញថា លោកគីម ជុង អ៊ុន មេដឹកនាំខ្ពស់បំផុតនៃប្រទេសកូរ៉េខាងជើង នៅមានជីវិតនៅឡើយ និងសុខសប្បាយជាធម្មតាទេ ដោយកំពុងស្នាក់នៅក្នុងទីក្រុងវ៉នសាន ប៉ែកខាងកើតរបស់ប្រទេស តាំងតែពីថ្ងៃទី13 មេសាមកម្ល៉េះ និងរហូតមកដល់ពេលនេះ ពួកគេ(កូរ៉េខាងត្បូង)មិនទាន់រកឃើញសកម្មភាពអ្វីដែលគួរឱ្យសង្ស័យកើតឡើងនៅក្នុងប្រទេសកូរ៉េខាងជើងឡើយ។

សេចក្ដីថ្លែងការណ៍របស់រដ្ឋបាលកូរ៉េខាងត្បូងនេះ ធ្វើឡើងដើម្បីបង្ក្រាបព័ត៌មានចចាមអារ៉ាមពាក់ព័ន្ធនឹងបញ្ហាសុខភាពរបស់លោកគីម ជុង អ៊ុន បន្ទាប់សារព័ត៌មានអនឡាញ “Daily NK” របស់កូរ៉េខាងត្បូងបានរាយការណ៍ថា លោកគីម ជុង អ៊ុន បានចូលទទួលការវះកាត់បេះដូងដែលបណ្ដាលមកពីការជក់បារីដ៏ច្រើន ជំងឺធាត់ និងការធ្វើការងារច្រើនហួសហេតុ នៅឯភូមិគ្រឹះមួយនៅក្នុងតំបន់យ៉ាងសាន របស់ខេត្តផយ៉ង់អាន់ ខាងជើង និងបន្ទាប់ពីវាយតម្លៃរួចហើយថា អាការរបស់លោកគីម ល្អប្រសើឡើងវិញហើយនោះ គ្រូពេទ្យភាគច្រើននៅក្នុងក្រុមអ្នកព្យាបាល ក៏បានធ្វើដំណើរត្រឡប់ទៅទីក្រុងព្យុងយ៉ាងវិញនៅថ្ងៃទី9 មេសា នៅសល់តែមន្ត្រីដែលនៅចាំសង្កេតមើលអាការតែប៉ុន្មាននាក់ប៉ុណ្ណោះ។

បន្ទាប់ពីនោះ កាលពីដើមសប្ដាហ៍កន្លងទៅ ក្រុមមន្ត្រីរបស់សហរដ្ឋអាមេរិក បានប្រាប់CNN ថា ពួកគេកំពុងតាមដានសម្រង់ព័ត៌មានដែលរាយការណ៍ថា លោកគីមមានអាការធ្ងន់ធ្ងរក្រោយពីការវះកាត់រួច មុននឹងមន្ត្រីម្នាក់ទៀតបានប្រាប់CNN កាលពីថ្ងៃចន្ទ(ទី20មេសា)ថា ព័ត៌មានអំពីក្ដីកង្វល់ពាក់ព័ន្ធនឹងសុខភាពរបស់មេដឹកនាំកូរ៉េខាងជើងនេះ គួរឱ្យជឿទុកចិត្តបាន។

ហើយបន្ទាប់ពីនោះមក ទីភ្នាក់ងារព័ត៌មានជាច្រើនបានបញ្ចេញព័ត៌មាន ដោយបានផ្សាយថា លោកគីមបានស្លាប់ហើយ ឬក៏កំពុងស្ថិតក្នុងស្ថានភាពដេកសម្រាកបែបមិនអាចដឹងខ្លួនឡើងវិញបាន ដោយយោងតាមការបង្ហើបឱ្យដឹងពីប្រភពព័ត៌មានជាច្រើន តែរហូតមកដល់ពេលនេះ មិនទាន់មានការអះអាងពាក់ព័ន្ធនឹងសុខភាពរបស់លោកគីម ជាផ្លូវការពីរដ្ឋបាលកូរ៉េខាងជើងនៅឡើយ តែកាលពីថ្ងៃអាទិត្យ(ទី26មេសា)ម្សិលមិញ សារព័ត៌មាន រ៉ូដុង ស៊ីនមុន របស់ប្រទេសកូរ៉េក្រហមមួយនេះ មានរបាយការណ៍មួយថា លោកគីមបានផ្ញើសំបុត្រថ្លែងអំណរគុណក្រុមពលករដែលបានជួយជួសជុលទីក្រុង សាំជិយ៉ន តែក៏មិនអាចអះអាងបានថា សំបុត្រមួយនោះ ចេញមកពីលោកគីម ដោយផ្ទាល់ ឬយ៉ាងណាឡើយ?

យ៉ាងណាក៏ដោយ មានភ័ស្តុតាងបញ្ជាក់ច្បាស់អំពីរឿងដែលថា លោកគីម ជុង អ៊ុន អាចនឹងកំពុងតែស្ថិតនៅក្នុងទីក្រុងវ៉នសាន ដោយវេបសាយ “38North” ដែលចាំតាមដានសកម្មភាពនៅក្នុងប្រទេសកូរ៉េខាងជើង បានផ្សព្វផ្សាយរូបភាពផ្កាយរណបដែលបង្ហាញឱ្យឃើញពី ក្បួនរថភ្លើងមួយខ្សែ កំពុងចតនៅក្នុងស្ថានីយពិសេសមួយសម្រាប់តែមនុស្សត្រកូលគីមប៉ុណ្ណោះនៅក្នុងទីក្រុងវ៉នសាន ដោយបានសន្និដ្ឋានថា ក្បួនរថភ្លើងនោះបានមកដល់ទីនោះមុនថ្ងៃទី21មេសា និងបានប្រុងប្រៀបចេញដំណើរនៅថ្ងៃទី23 មេសា។

ទាំងអស់នេះ តាមរយៈព័ត៌មានពី38North បានឱ្យទៀតដឹងថា ទីក្រុងវ៉នសាន មានទីកន្លែងសម្រាប់សម្រាកលម្ហែ និងដើម្បីការកម្សាន្តជាច្រើន ដូចជានាវាទេសចរណ៍ខ្នាតធំ 9បន្ទប់ មជ្ឈមណ្ឌលសន្ទនាការ អគារខ្នាតធំដែលបានកសាងឡើង ក្រោយពីលោកគីម បានឡើងធ្វើជាមេដឹកនាំប្រទេស កំពង់ផែ ទីលានបាញ់កាំភ្លើង និងផ្លូវរ៉ាន់វេយ៍(ផ្លូវសម្រាប់យន្តហោះចុះឡើង)តូចមួយ ដែលកាលពីឆ្នាំ2019 ត្រូវបានផ្លាស់ប្ដូរទៅជាទីលានជិះសេះ ដែលជាការងារបន្ទាប់បន្សំរបស់មេដឹកនាំវ័យ 36ឆ្នាំរូបនេះទៀតផង៕

ប្រភព៖ សារព័ត៌មានបរទេស

April 27, 2020

ក្រសួងសុខាភិបាលថា កម្ពុជានៅសល់អ្នកជំងឺ COVID-19 តែ3នាក់ទៀតប៉ុណ្ណោះ

រដ្ឋមន្ត្រីក្រសួងសុខាភិបាល ព្រឹកនេះបានប្រកាសថា អ្នកជំងឺCOVID-19 បានជាសះស្បើយ2នាក់បន្ថែមទៀត ដូច្នេះ កម្ពុជានៅសល់អ្នកជំងឺរលាកសួតប្រភេទថ្មី តែ3នាក់ទៀតតែប៉ុណ្ណោះ។

អ្នកជំងឺ2នាក់ដែលបានជាសះស្បើយនេះ គឺជាប្តីប្រពន្ធជនជាតិបារាំង ស្នាក់នៅក្នុងសង្កាត់ទួលទំពូង រាជធានីភ្នំពេញ។ គិតមកដល់ថ្ងៃនេះ ចំនួនអ្នកដែលបានជាសះស្បើយពីជំងឺ COVID-19 សរុបឡើងដល់119នាក់ ដូច្នេះ បច្ចុប្បន្នកម្ពុជានៅសល់អ្នកជំងឺរលាកសួតប្រភេទថ្មី 3នាក់ទៀត ដែលកំពុងទទួលការព្យាបាលនៅមន្ទីរពេទ្យ ក្នុងនោះស្ត្រី1នាក់ និងបុរស2នាក់។ នេះបើតាមរដ្ឋមន្ត្រីក្រសួងសុខាភិបាល លោកវេជ្ជបណ្ឌិត ម៉ម ប៊ុនហេង។

រាប់ចាប់ពីវីរុសកូរ៉ូណាប្រភេទថ្មី បង្ហាញខ្លួននៅកម្ពុជា មកទល់នឹងថ្ងៃទី27មេសានេះ កម្ពុជាបានធ្វើតេស្តរកឃើញអ្នកផ្ទុក COVID-19 សរុប 122នាក់ ប៉ុន្តែ បើតាមក្រសួងសុខាភិបាល កម្ពុជាមិនទាន់មានករណីស្លាប់ដោយសារវីរុសនេះនៅឡើយ។ កម្ពុជាក៏មិនបានរកឃើញអ្នកជំងឺ COVID-19 ថ្មីបន្ថែមទៀតនោះទេ ក្នុងអំឡុងកន្លះខែមកនេះ៕

April 27, 2020

ករណីលោក Kim Jong-un ទទួលមរណាភាព តើអ្នកណានឹងឡើងស្នងតំណែងនៅកូរ៉េខាងជើង?

សារព័ត៌មានជប៉ុនបានឱ្យដឹងថា តាំងពីចុងឆ្នាំ2019 កូរ៉េខាងជើងបានសម្រេចហើយថា ក្នុងករណីចាំបាច់នៅប្រទេសនេះ ប្អូនស្រីរបស់លោក Kim Jong-un គឺលោកស្រី Kim Yo-jong នឹងឡើងកាន់កាប់តំណែងជាន់ខ្ពស់បំផុតរបស់ប្រទេសនេះ។ ក៏ប៉ុន្តែ លោក Thae Yong-ho អតីតអ្នកការទូតកូរ៉េខាងជើងបានថ្លែងថា ជាក់ស្ដែង ក្នុងក្រសែភ្នែករបស់ក្រុមព្រឹទ្ធាចារ្យ លោកស្រី Kim Yo-jong នៅតែជាក្មេងស្រីមួយតែប៉ុណ្ណោះ និងពិបាកក្នុងការគ្រប់គ្រងស្ថានការណ៍ក្នុងប្រទេសជាតិ។ ដូច្នេះ បេក្ខភាពដែលស័ក្ដិសមបំផុតសម្រាប់ស្នងតំណែងកំពូលនេះ អាចជា Kim Pyong-il ដែលត្រូវជាឪពុកមារបស់លោក Kim Jong-un។

CNN បានចេញផ្សាយថា មេដឹកនាំកូរ៉េខាងជើង លោក Kim Jong-un បានធ្លាក់ខ្លួនឈឺធ្ងន់ក្រោយពីបានឆ្លងកាត់ការវះកាត់ព្យាបាលបេះដូង។ ថ្វីបើដំណឹងនេះមិនទាន់ត្រូវបានបញ្ជាក់ ប៉ុន្តែវាបានបង្កឱ្យមានការព្រួយបារម្ភយ៉ាងខ្លាំងសម្រាប់បណ្ដាប្រទេសដែលស្និទ្ធនឹងកូរ៉េខាងជើង។ មុននេះ សារព័ត៌មានជប៉ុន Shukan Gendai (週刊現代, Modern Weekly) បានបង្ហើបឱ្យដឹងថា លោក Kim Jong-un មិនទាន់បាត់បង់ជីវិតនោះទេ ប៉ុន្តែ ដោយសារតែកំហុសបច្ចេកទេសក្នុងការវះកាត់ព្យាបាលបេះដូង មេដឹកនាំកូរ៉េខាងជើងរូបនេះបានក្លាយជាមនុស្សគ្មានវិញ្ញាណ ហើយម្យ៉ាងទៀត ក្រុមមន្ត្រីកូរ៉េខាងជើង ក៏មិនបានចេញមកបដិសេធព័ត៌មានទាំងនេះនោះដែរ។ ការស្ងាត់ស្ងៀមរបស់កូរ៉េខាងជើងបែបនេះ ធ្វើឱ្យពិភពក្រៅប្រទេសយល់អំពីស្ថានភាពដែលប្រទេសនេះកំពុងជួបប្រទះ។

ក្នុងករណីមិនដឹងច្បាស់អំពីស្ថានភាពសុខភាពរបស់លោក Kim Jong-un អ្នកស្នងតំណែងរបស់លោក បានក្លាយជាប្រធានបទសំខាន់ដែលត្រូវបានពិភពលោកចាប់អារម្មណ៍យ៉ាងខ្លាំង។ ប៉ុន្មានថ្ងៃកន្លងមកនេះ ទំព័រ Yomiuri Shimbun (ជប៉ុន) ទំព័រ JoongAng IIbo(កូរ៉េខាងត្បូង) និង KBS World បានដកស្រង់ប្រភពព័ត៌មានមួយពីកិច្ចពិភាក្សាបីភាគីរវាងកូរ៉េខាងត្បូង សហរដ្ឋអាមេរិក និងជប៉ុន បង្ហើបឱ្យដឹងថា កូរ៉េខាងជើងបានដាក់ចេញផែនការបន្ទាន់កាលពីចុងឆ្នាំមុន។ នៅក្នុងកិច្ចប្រជុំរួមរបស់គណៈកម្មធិការកណ្ដាលនៃបក្សពលករកូរ៉េខាងជើង ដែលត្រូវបានធ្វើឡើងនៅទីក្នុងទីក្រុងព្យុងយ៉ាងកាលពីចុងឆ្នាំមុន បានសម្រេចថា បើសិនលោក Kim Jonog-un មិនអាចបំពេញភារកិច្ចរបស់ខ្លួនបាន ដោយសារតែបានទទួលមរណភាព ឬហេតុផលផ្សេង នោះសិទ្ធិអំណាចទាំងអស់របស់លោកនឹងត្រូវប្រគល់ជូនលោកស្រី Kim Yo-jong ជាអ្នកចាត់ចែង។

ប្អូនស្រីរបស់លោក Kim Jong-un គឺលោកស្រី Kim Yo-jong (រូបខាងស្ដាំ)

ក៏ប៉ុន្តែ កូរ៉េខាងជើងគឺជាប្រទេសដែលមានទស្សនៈរើសអើងលើស្ត្រីភេទយ៉ាងជ្រាលជ្រៅ។ ស្ត្រីម្នាក់ដែលឡើងកាន់អំណាចនៅប្រទេសនេះ គឺជារឿងមិនងាយស្រួលនោះឡើយ ហើយជាងនេះ ក៏អាចធ្វើឱ្យស្ថានភាពនៅកូរ៉េខាងជើង ធ្លាក់ទៅក្នុងគ្រោះថ្នាក់ក៏ថាបាន។ ដូច្នេះ ការដែលថាលោកស្រី Kim Yo-jong នឹងឡើងស្នងតំណែងពីលោក Kim Jong-un គឺជារឿងពិបាកកើតឡើង។ បេក្ខភាពដែលអាចនឹងស្នងតំណែងរបស់មេដឹកនាំកូរ៉េខាងជើងបច្ចុប្បន្ន អាចមានដូចជា ទី1គឺលោក Kim Jong-chul ដែលជាបងប្រុសម្ដាយឪពុកតែមួយរបស់លោក Kim Jong-un និងទី2គឺកូនប្រុសច្បងអាយុ10ឆ្នាំរបស់លោក Kim Jong-un និងទី3គឺ Kim Pyong-il ដែលត្រូវជាឪពុកមា (ខាងឪពុក)របស់លោក Kim Jong-un។

អតីតមន្ត្រីការបរទេសម្នាក់របស់កូរ៉េខាងជើង ដែលបច្ចុប្បន្នជាសមាជិករដ្ឋសភាកូរ៉េខាងត្បូង គឺលោក Thae Ku-min (ឈ្មោះពិតគឺ Thae Yong-ho) នៅក្នុងកិច្ចសម្ភាសមួយជាមួយសារព័ត៌មាន People’s Daily នៃប្រទេសចិន នាពេលថ្មីៗនេះ និយាយថា នៅក្នុងក្រសែភ្នែករបស់បណ្ដាព្រឹទ្ធាចារ្យវ័យពី60-70ឆ្នាំនៅកូរ៉េខាងជើង លោកស្រី Kim Yo-jong ដែលមានវ័យ30ឆ្នាំ គឺគ្រាន់តែជាក្មេងស្រីម្នាក់តែប៉ុណ្ណោះ ហើយពិបាកនឹងធ្វើឱ្យពួកគេទទួលយកលោកស្រីជាអ្នកស្នងតំណែងកំពូលនេះ។ មួយវិញទៀត ក្រុមព្រឹទ្ធាចារ្យទាំងនេះ ក៏ត្រូវប្រឈមមុខជាមួយនឹងការព្រួយបារម្ភរយៈពេលវែងផងដែរ នោះគឺថាតើចង់បន្តដើរតាមរបបបច្ចុប្បន្នរបស់កូរ៉េខាងជើង ឬត្រូវធ្វើការជ្រើសរើសមេដឹកនាំថ្មីតាមឆន្ទះផ្ទាល់ខ្លួន។

លោក Kim Jong-un ទទួលមរណាភាព តើអ្នកណានឹងឡើងស្នងតំណែងនៅកូរ៉េខាងជើង? — លោក Thae Ku-min (ឈ្មោះពិតគឺ Thae Yong-ho) ជាអតីតមន្ត្រីការបរទេសម្នាក់របស់កូរ៉េខាងជើង តែបច្ចុប្បន្នជាសមាជិកសភារបស់កូរ៉េខាងត្បូង

លោក Thae Ku-min ឱ្យដឹងថា បើធៀបជាមួយលោក Kim Jong-un គេមើលឃើញថា លោក Kim Pyong-il ស័ក្ដិសមក្លាយជាអ្នកស្នងតំណែង។ លោក Kim Pyong-il គឺជាសមាជិករាជវង្សខ្សែ Kim ហើយលោកក៏ជាប្អូនប្រុសឪពុកតែមួយ ម្ដាយដោយខ្លួនរបស់អតីតមេដឹកនាំ Kim Jong-il ផងដែរ។ គេបានដឹងថា ជីតារបស់លោក Kim Jong-un គឺលោក Kim Il-sung ធ្លាប់មានបំណងលើកលោក Kim Pyong-il ឡើងស្នងរាជ។ ដូច្នេះ បន្ទាន់ពីលោក Kim Jong-il បានឡើងស្នងរាជ លោក Kim Pyong-il ក៏ត្រូវបានរុញច្រានទៅ “កៀនជញ្ជាំង” ដោយឱ្យទៅធ្វើការនៅក្រៅប្រទេស ក្នុងនាមជាឯកអគ្គរាជទូត និងត្រូវតាមដានយ៉ាងហ្មត់ចត់។ លោក Kim Pyong-il មិនបានត្រឡប់មកកូរ៉េខាងជើង រហូតដល់ខែវិច្ឆិកា ឆ្នាំ2019 ហើយមូលហេតុដែលលោកត្រឡប់មកប្រទេសវិញ គឺដោយសារ Kim Jong-un ចង់គ្រប់គ្រងលោកឱ្យបានល្អិតល្អន់ជាងមុន ដើម្បីទប់ស្កាត់ការលូកដៃពីបរទេសក្នុងការជួយឱ្យលោក Kim Pyong-il ក្លាយជាអ្នកស្នងរាជនៅកូរ៉េខាងជើង។

កូរ៉េខាងជើង មានឈ្មោះប្រទេសជាផ្លូវការថា សាធារណរដ្ឋប្រជាមានិតប្រជាធិបតេយ្យកូរ៉េ (Democratic People’s Republic of Korea) ក៏ពិតមែន ប៉ុន្តែ របបនេះត្រូវបានប្រជាជនកូរ៉េខាងជើងចាត់ទុកដូចជារបបរាជានិយម។ នៅកម្ពុជា ព្រះបរមរតនកោដិ ក៏ធ្លាប់មានបន្ទូលហៅមេដឹកនាំកូរ៉េខាងជើងថា “ព្រះអង្គៗ” ផងដែរ៕

ប្រភព៖ សារព័ត៌មានបរទេស

April 27, 2020

COVID-19! 5ប្រទេសដែលមានអ្នកស្លាប់ច្រើនជាង20,000នាក់ ខណៈពិភពលោកទាំងមូលមានអ្នកជំងឺជិត3លាននាក់

ពិភពលោកទាំងមូល មានអ្នកជំងឺសរុបជិត3លាននាក់ ក្នុងនោះមានជាង206,000នាក់បានបាត់បង់ជីវិត ខណៈអ្នកជំងឺបានជាសះស្បើយមានចំនួន 878,700នាក់។

យោងតាមស្ថិតិរបស់សាកលវិទ្យាល័យ Johns Hopkins បណ្ដាប្រទេស និងដែនដីចំនួន210 ក្នុងពិភពលោក មានអ្នកស្លាប់ចំនួន 206,265នាក់ ក្នុងចំណោមអ្នកជំងឺ COVID-19 សរុប2,965,363នាក់។ អ្នកជំងឺបានជាសះស្បើយមានចំនួន 863,464នាក់។ ថ្ងៃនេះ ពិភពលោក អ្នកជំងឺថ្មីមានចំនួន 77,469នាក់ និងអ្នកស្លាប់ថ្មីមានចំនួន3,897នាក់។

សហរដ្ឋអាមេរិកបន្តជាសម្បុកមេរោគ និងជា “វាលពិឃាត” ធំជាងគេក្នុងពិភពលោក ដោយមានអ្នកជំងឺសរុប 963,379នាក់ ក្នុងនោះមានអ្នកស្លាប់ 54,810នាក់។ អ្នកជំងឺកើនមានចំនួន 29,446នាក់ និងអ្នកស្លាប់ថ្មីកើន1,361នាក់។

អេស្ប៉ាញ មានអ្នកជំងឹថ្មី2,870នាក់ អ្នកស្លាប់ថ្មីមាន288នាក់។ អ្នកជំងឺសរុបមាន226,629នាក់ និងអ្នកស្លាប់សរុប23,190នាក់។ ប្រទេសនេះគឺជា “វាលពិឃាត” របស់ COVID-19 (អ្នកស្លាប់ដោយសារ COVID-19) ធំជាងគេទី2ក្នុងពិភពលោក។

អ៊ីតាលី៖ អ្នកជំងឺថ្មី2,324នាក់ អ្នកស្លាប់ថ្មី260នាក់។ អ្នកជំងឺសរុប197,675នាក់ និងអ្នកស្លាប់សរុប26,644នាក់។

បារាំង៖ អ្នកជំងឺថ្មី612នាក់ អ្នកស្លាប់ថ្មី242នាក់។ អ្នកជំងឺសរុប162,100នាក់ និងអ្នកស្លាប់សរុបមាន22,856នាក់។

អង់គ្លេស៖ អ្នកជំងឺថ្មី4,463នាក់ អ្នកស្លាប់ថ្មី413នាក់ ក្នុងចំណោមអ្នកជំងឺសរុប152,840នាក់ និងអ្នកស្លាប់សរុប20,732នាក់៕

ប្រភព៖ សារព័ត៌មានបរទេស

April 27, 2020

ក្បួនរថយន្តពាសដែកសង្ស័យថាជារបស់លោក Kim Jong-un បង្ហាញខ្លួន ខណៈមានដំណឹងចចាមអារ៉ាមជាច្រើនស្ដីពីសុខភាពរបស់លោក

តាមរយៈរូបភាពពីផ្កាយរណប អង្គភាពព័ត៌មាន 38 North របស់សហរដ្ឋអាមេរិក បានឱ្យដឹងថា ក្បួនរថយន្តដែលត្រូវបានគេជឿថាជារបស់មេដឹកនាំកូរ៉េខាងជើង បានចតជាជួរនៅក្នុងតំបន់លម្ហែកាយរបស់ប្រទេសនេះ។

ទីភ្នាក់ងារសារព័ត៌មាន Reuters ដកស្រង់ព័ត៌មានពីអង្គភាពព័ត៌មាន 38 North ដែលមានជំនាញខាងស្រាវជ្រាវអំពីកូរ៉េខាងជើង មានមូលដ្ឋាននៅទីក្រុងវ៉ាស៊ិងតោន កាលពីថ្ងៃទី25មេសា បានឱ្យដឹងថា យោងទៅលើរូបភាពដែលចាប់បានដោយផ្កាយរណប ពួកគេបានរកឃើញថា មានក្បួនរថយន្តពាសដែកមួយក្រុម ត្រូវបានគេជឿថា ជារបស់មេដឹកនាំកូរ៉េខាងជើង កំពុងចតនៅឯយានដ្ឋានផ្ទាល់ខ្លួនរបស់លោក Kim Jong-un នៅក្នុងតំបន់ Wonsan កាលពីថ្ងៃទី21មេសា និង23មេសា។

បើទោះជាអង្គភាពព័ត៌មាន 38 North យល់ថា នេះជាក្បួនរថយន្តពិសេសរបស់មេដឹកនាំកូរ៉េខាងជើង ប៉ុន្តែ សារព័ត៌មាន Reuters មិនទាន់រកបានប្រភពព័ត៌មានដែលបញ្ជាក់អំពីដំណឹងនេះនៅឡើយ។

អង្គភាពសារព័ត៌មាន 38 North បានលើកឡើងថា “វត្តមានរបស់ក្បួរថយន្តនេះ មិនបានអះអាងអំពីទីតាំងបច្ចុប្បន្នដែលមេដឹកនាំកូរ៉េខាងជើងកំពុងស្ថិតនៅ ហើយក៏មិនបានឱ្យដឹងអំពីប្រការណាមួយស្ដីអំពីសុខភាពរបស់លោក (Kim Jong-un) នោះដែរ ប៉ុន្តែ រូបភាពទាំងនេះបានបញ្ជាក់ឡើងវិញអំពីព័ត៌មានដែលថា លោក Kim ប្រហែលជាកំពុងសម្រាកនៅក្នុងតំបន់លម្ហែកាយមួយនៅតំបន់មាត់សមុទ្រភាគខាងកើតប្រទេសកូរ៉េខាងជើង”។

មកដល់ពេលនេះ ទីភ្នាក់ងារសារព័ត៌មានកូរ៉េខាងជើង មិនបាននិយាយដល់បញ្ហាសុខភាពរបស់លោក Kim Jong-un សោះឡើយ។ ចំណែកក្រុមមន្ត្រីសហរដ្ឋអាមេរិកវិញ ក្នុងនោះមានលោក Donald Drump ជាដើម ធ្លាប់បានថ្លែងថា សហរដ្ឋអាមេរិកមិនបានដឹងអំពីបញ្ហាទាក់ទិននឹងសុខភាពរបស់មេដឹកនាំកូរ៉េខាងជើងនោះទេ។ កូរ៉េខាងត្បូងក៏បានសង្ស័យទៅលើដំណឹងអំពីសុខភាពរបស់លោក Kim Jong-un ផងដែរ៕

ប្រភព៖ Reuters

April 26, 2020

ជាង2,887,000នាក់ឆ្លងវីរុសCOVID-19 នៅទូទាំងពិភពលោក៖ 7ប្រទេសដែលមានអ្នកជំងឺច្រើនជាង100,000នាក់

ពិភពលោកទាំងមូលមានអ្នកស្លាប់ជាង200,000នាក់ ដោយសារឆ្លងវីរុសCOVID-19 នៅក្នុងចំណោមអ្នកជំងឺជិត2.9លាននាក់ ដែលភាគច្រើនកើតឡើងនៅអឺរ៉ុប និងសហរដ្ឋអាមេរិក។

ទិន្នន័យពីសាកលវិទ្យាល័យ Johns Hopkins បានឱ្យដឹងថា នៅក្នុងបណ្ដាប្រទេស និងដែនដីចំនួន210 បានរកឃើញអ្នកឆ្លងវីរុសCOVID-19 ចំនួន2,887,894នាក់ ក្នុងនោះមាន202,368នាក់បានបាត់បង់ជីវិត។ អ្នកជំងឺថ្មីកើនបន្ថែម 96,908នាក់ និងអ្នកស្លាប់ថ្មីកើន 6,448នាក់ បើធៀបនឹងម្សិលមិញ ខណៈអ្នកជំងឺដែលបានជាសះស្បើយមានចំនួន 814,025នាក់។

សហរដ្ឋអាមេរិកនៅតែជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកជំងឺសរុប 933,933នាក់ និងអ្នកស្លាប់53,449នាក់។ អ្នកជំងឺថ្មីកើន43,409នាក់ ខណៈអ្នកស្លាប់ថ្មីកើន2,432នាក់ ធៀបនឹងមួយថ្ងៃមុននេះ។

អេស្ប៉ាញ៖ អ្នកជំងឺថ្មី3,995នាក់ អ្នកស្លាប់ថ្មី378នាក់។ អ្នកជំងឺសរុបជិត224,000នាក់ និងអ្នកស្លាប់សរុបជិត23,000នាក់។ ប្រទេសនេះជាសម្បុកមេរោគធំជាងគេលំដាប់ទី2ក្នុងពិភពលោក និងជា “វាលពិឃាត” របស់កូរ៉ូណា ធំជាងគេទី3 បន្ទាប់ពីសហរដ្ឋអាមេរិក និងអ៊ីតាលី។

អ៊ីតាលី៖ អ្នកជំងឺថ្មី2,357នាក់ និងអ្នកស្លាប់ថ្មី415នាក់។ អ្នកជំងឺសរុប195,351នាក់ និងអ្នកស្លាប់សរុប26,284នាក់។ តួលេខនៃការស្លាប់បានថយចុះទាបបំផុត រាប់ចាប់ពីថ្ងៃទី19មីនា។

បារាំង៖ អ្នកជំងឺថ្មី1,660នាក់ និងអ្នកស្លាប់ថ្មី369នាក់។ អ្នកជំងឺសរុប161,488នាក់ និងអ្នកស្លាប់សរុប22,614នាក់។ ប្រទេសនេះ នឹងអនុញ្ញាតឱ្យបើកសាលារៀនឡើងវិញ ក្រោយថ្ងៃទី11ឧសភា។

អាល្លឺម៉ង់៖ អ្នកជំងឺថ្មី1,419នាក់ អ្នកស្លាប់ថ្មី133នាក់។ អ្នកជំងឺសរុប156,418នាក់ និងអ្នកស្លាប់សរុប5,873នាក់។

អង់គ្លេស៖ អ្នកជំងឺថ្មី4,913នាក់ ខណៈអ្នកស្លាប់ថ្មីមាន8113នាក់។ អ្នកជំងឺសរុប148,377នាក់ និងអ្នកស្លាប់សរុប20,319នាក់។ អ្នកស្លាប់ដោយសារ COVID-19 ក្នុងប្រទេសនេះ មិនបានរាប់បញ្ចូលអ្នកស្លាប់នៅក្រៅមន្ទីរពេទ្យនោះទេ។

ប្រទេសទួរគី៖ អ្នកជំងឺសរុបមាន107,773នាក់ អ្នកស្លាប់សរុបមាន2,706នាក់ និងអ្នកដែលបានជាសះស្បើយមានចមនួន25,582នាក់៕

ប្រភព៖ សារព័ត៌មានបរទេស

April 26, 2020

សារព័ត៌មាននានាសង្ស័យថា Kim Jong-un បានបាត់បង់ស្មារតី ខណៈចិនបានបញ្ជូនក្រុមវេជ្ជបណ្ឌិតទៅកូរ៉េខាងជើង

ទីភ្នាក់ងារសារព័ត៌មានល្បីៗជាច្រើនបានចុះផ្សាយជាបន្តបន្ទាប់ស្ដីអំពីសុខភាពរបស់មេដឹកនាំកូរ៉េខាងជើង ខណៈដែលមានដំណឹងចចាមអារ៉ាមថា លោក Kim Jong-un កំពុងប្រឈមនឹងការបាត់បង់ជីវិត។

ទីភ្នាក់ងារសារព័ត៌មាន Shunkan Gendai របស់ជប៉ុន ធ្លាប់បានដកស្រង់ព័ត៌មានពីប្រភពជិតស្និទ្ធនឹងប្រទេសចិន ដែលធ្វើការក្នុងវិស័យសុខាភិបាល ឱ្យដឹងអំពីស្ថានភាពសុខភាពរបស់លោក Kim Jong-un ផងដែរ។ ប្រភពព័ត៌មានបានឱ្យដឹងថា នៅក្នុងពេលកំពុងធ្វើទស្សនកិច្ចទឹកដី លោក Kim Jong-un ស្រាប់តែយកដៃមកឱបទ្រូង រួចក៏ដួលទៅលើដី។ ក្រុមគ្រូពេទ្យ និងមន្ត្រីនៅក្បែរនោះ ក៏បានបញ្ជូនលោកទៅកាន់មន្ទីរពេទ្យសង្គ្រោះបន្ទាន់។ ទន្ទឹមនឹងនេះ កូរ៉េខាងជើងក៏បានស្នើសុំជំនួយពីចិនផងដែរ ទាក់ទិននឹងសុខភាពរបស់មេដឹកនាំប្រទេសនេះ។

សារព័ត៌មានកូរ៉េខាងត្បូង Daily NK ដែលមានជំនាញខាងផ្ដល់ព័ត៌មានអំពីកូរ៉េខាងជើង ក៏ធ្លាប់បានផ្សាយថា លោក Kim Jong-un បានឆ្លងកាត់ការវះកាត់មួយកាលពីថ្ងៃទី12មេសា។ ចំណែក CNN ក៏បានរាយការណ៍ថា ទីក្រុងវ៉ាស៊ីងតោន កំពុងស្រាវជ្រាវព័ត៌មានដើម្បីបញ្ជាក់អំពីដំណឹងដែលថា មេដឹកនាំកូរ៉េខាងជើងកំពុងស្ថិតក្នុងស្ថានភាពគ្រោះថ្នាក់ដល់ជីវិត បន្ទាប់ពីបានទទួលការវះកាត់។

ប្រភពព័ត៌មានមួយចំនួនក៏បានចេញផ្សាយថា ប្រទេសចិនប្រហែលជាកំពុង “ព្រួយបារម្ភខ្លាំង” នៅមានលេចឮព័ត៌មានចចាមអារ៉ាមជាច្រើនស្ដីអំពីសុខភាព ក៏ដូចជាការប្រឈមនឹងការបាត់បង់ជីវិតរបស់លោក Kim Jong-un ដែលអាចនាំឱ្យមានបញ្ហាអស្ថិរភាពក្នុងតំបន់ឧបទ្វីបកូរ៉េ។

ប្រទេសចិនត្រូវបានគេរាយការណ៍ថា បានបញ្ជូនគណៈប្រតិភូដែលមានក្រុមវេជ្ជបណ្ឌិតទៅកាន់កូរ៉េខាងជើង ដើម្បីជួយដោះស្រាយបញ្ហាសុខភាពរបស់លោក Kim Jong-un កាលពីថ្ងៃទី23មេសា បន្ទាប់ពីមានដំណឹងចចាមអារ៉ាមជាច្រើនទាក់ទិននឹងបញ្ហាសុខភាពរបស់មេដឹកនាំកូរ៉េខាងជើង ដែលត្រូវគេជឿថា កំពុងស្ថិតក្នុងស្ថានភាពគ្រោះថ្នាក់ដល់ជីវិតព្រោះតែជំងឺ៕

ប្រភព៖ សារព័ត៌មានបរទេស

April 25, 2020

អតីតបុគ្គលិកក្រុមហ៊ុន Google ក្លាយជាអ្នករកប្រាក់បានច្រើនជាងគេក្នុងពិភពលោក

កាលពីថ្ងៃទី20មេសា មហាសេដ្ឋីមកពីទីក្រុងសៀងហៃនៃប្រទេសចិន ឈ្មោះ Colin Huang បានក្លាយជាអ្នកដែលរកបានប្រាក់ច្រើនជាងបង្អស់ក្នុងពិភពលោក ជាមួយនឹងទំហំទំទឹកប្រាក់ឡើងដល់2.9ពាន់លានដុល្លារអាមេរិក។

តម្លៃមូលបត្ររបស់ Pinduoduo បានកើនឡើង12.7% ដោយមានតម្លៃ50,11ដុល្លារ/ហ៊ុន នៅលើផ្សារហ៊ុន Nasdaq កាលពីថ្ងៃទី20មេសា បន្ទាប់ពីព័ត៌មានស្ដីអំពីការវិនិយោគទៅលើ Gome ដែលជាផ្សារលក់រាយអនឡាយធំជាងគេបង្អស់មួយនៅប្រទេសចិន ត្រូវបានប្រកាស។ ប្រការនេះបានជួយឱ្យ Colin Huang រកបានប្រាក់ 2.9ពាន់លានដុល្លារបន្ថែមទៀត ដោយប្រើពេលតែ1ថ្ងៃប៉ុណ្ណោះ។

ក្រុមហ៊ុន Gome ដែលមានការិយាល័យកណ្ដាលនៅទីក្រុងប៉េកាំងប្រទេសចិន កាលពីថ្ងៃទី19មេសា បានឱ្យដឹងថា ក្រុមហ៊ុន Pinduoduo នឹងទិញមូលបត្រមួយចំនួនធំ តម្លៃ 200លានដុល្លារពីក្រុមហ៊ុន Gome ដែលមូលបត្រទាំងនេះអាចនឹងត្រូវបានប្ដូរទៅជា 5.6% នៃភាគហ៊ុនរបស់ Gome។ 1ថ្ងៃគត់ បន្ទាប់ពីដំណឹងខាងលើត្រូវបានប្រកាស តម្លៃមូលបត្ររបស់ក្រុមហ៊ុន Gome នៅផ្សារហ៊ុនហុងកុង បានឡើងថ្លៃ16%។

ក្រុមហ៊ុន Pinduoduo ត្រូវបានបង្កើតឡើងកាលពីឆ្នាំ2015 និងបានរីកចម្រើនយ៉ាងខ្លាំងក្លា ហើយក៏បានក្លាយជាអាជីវកម្មលក់រាយនៅលើអនឡាញធំបំផុតមួយនៅប្រទេសចិន ជាមួយនឹងតម្លៃទុនសរុបនាបច្ចុប្បន្ន ឡើងដល់58ពាន់លានដុល្លារអាមេរិក។

យោងតាមទស្សនាវដ្ដី Forbes មហាសេដ្ឋី Huang ដែលបច្ចុប្បន្នមានអាយុ40ឆ្នាំ កំពុងកាន់កាប់ទ្រព្យសម្បត្តិប្រមាណជា26.4ពាន់លានដុល្លារអាមេរិក ជាអ្នកមានជាងគេលំដាប់ទី3នៅប្រទេសចិន(ដីគោក) និងកំពុងឈរលំដាប់លេខរៀងទី35 នៅលើតារាងចំណាត់ថ្នាក់ទូទាំងពិភពលោក។

ប៉ុន្តែ ភាពអស្ចារ្យនេះមិនទាន់ធ្វើឱ្យ Huang អាចលោតរំលងអតីតថៅកែរបស់ខ្លួន គឺលោក Larry Page (សហស្ថាបនិករបស់ Google ដែលមានទ្រព្យ 55.9ពាន់លានដុល្លារ និង Sergey Brin មានទ្រព្យ 53.9ពាន់លានដុល្លារ) នៅឡើយ។ ទោះជាយ៉ាងនេះក្ដី Huang សម្រេចបានពាក់កណ្ដាលផ្លូវហើយ ខណៈបានលោតរំលងអតីតនាយកប្រតិបត្តិរបស់ Google គឺលោក Eric Schmidt ដែលបច្ចុប្បន្នមានទ្រព្យ 14.2ពាន់លានដុល្លារ។

ក្រុមហ៊ុន Gome ត្រូវបានបង្កើតឡើងកាលពីឆ្នាំ1987។ ចាប់ពីឆ្នាំ2007 មកដល់ពេលនេះ តម្លៃមូលបត្ររបស់ក្រុមហ៊ុននេះ បានថយចុះដល់ទៅ95% ធ្វើឱ្យតម្លៃទុនក្នុងទីផ្សារនៅសល់ត្រឹម 2.4ពាន់លានដុល្លារ។ លោក Wong Kwong Yu ដែលជាស្ថាបនិករបស់ Gome បច្ចុប្បន្ន ត្រូវជាប់ពន្ធនាគារក្រោមបទចោទពុករលួយ និងកេងបន្លំក្នុងការរកស៊ី។

ប្រទេសចិន គឺជាប្រភពនៃមហាសេដ្ឋីធំជាងគេលំដាប់ទី2នៅក្នុងពិភពលោក បន្ទាប់ពីសហរដ្ឋអាមេរិក។ បើទោះជាស្ថិតក្នុងស្ថានភាពវិបត្តិសុខភាព ប៉ុន្តែប្រទេសចិននៅតែមានសមាជិកថ្មីម្នាក់ទៀត បានឡើងដល់លំដាប់មហាសេដ្ឋីកំពូលៗរបស់ពិភពលោក៕

ប្រភព៖ Forbes

April 25, 2020

Author: សឿន សំណាង