សឿន សំណាង - La Reine Media

កុមារអច្ឆរិយពិភពលោកនៅឥណ្ឌា ដែលធ្លាប់បានព្យាករយ៉ាងឆុតអំពី COVID-19 តាំងពីខែសីហា2019 យល់ដឹងច្បាស់ពីគម្ពីរត្រៃវេទ សំស្រ្កឹត និងប្រព័ន្ធវេជ្ជសាស្ត្រហិណ្ឌូបុរាណ…

ថ្ងៃទី22សីហាឆ្នាំ2019 កុមារាជាអ្នកជំនាញខាងហោរាសាស្ត្រម្នាក់ឈ្មោះ Abhigya Anand អាយុ14ឆ្នាំ នៅប្រទេសឥណ្ឌា បានបង្ហោះឃ្លីបវីដេអូមួយនៅលើ Youtube ដោយបានធ្វើការព្យាករយ៉ាងឆុតអំពីសោកនាដកម្មបង្កឡើងដោយវីរុស COVID-19 នាបច្ចុប្បន្ន។

នៅក្នុងវីដេអូដែលបានបង្ហោះនៅថ្ងៃទី22សីហាឆ្នាំ2019នោះ Abhigya Anand បានធ្វើការព្យាករថានឹងមានសោកនាដកម្មមួយកើតឡើងនៅលើផែនដីចាប់ពីដើមខែវិច្ឆិកា ឆ្នាំ2019 ដល់ចុងខែមេសាឆ្នាំ2020។ កុមារាដែលធ្លាប់ទទយលបានពានរង្វាន់ “អច្ឆរិយកុមារពិភពលោក” រូបនេះបានឱ្យដឹងថា ពិភពលោកនឹងបានឃើញសង្គ្រាមជីវសាស្ត្រមួយនៅឆ្នាំ2020 ដែលប្រការនេះត្រូវបានគេជឿថាជារោគរាតត្បាតCOVID-19។

Abhigya Anand ព្យាករថា សោកនាដកម្មបែបរោគរាតត្បាតនឹងកើតឡើង និងគ្របដណ្ដប់ទូទាំងសកលលោក ចាប់ពីអាស៊ីដល់អឺរ៉ុប រហូតដល់ទ្វីបអាមេរិក ឥណ្ឌា រួមនឹងបណ្ដាប្រទេសនៅភាគពាយព្យប្រទេសឥណ្ឌា។ល។

កុមារារូបនេះក៏បានព្យាករថា ប្រទេសចិនគឺជាប្រទេសមួយក្នុងចំណោមប្រទេសដែលរងគ្រោះធ្ងន់ធ្ងរបំផុតដោយសារសោកនាដកម្មនេះ។ ទន្ទឹមនឹងនេះ បណ្ដាប្រទេសអ្នកមាន ឬក៏ប្រទេសដែលមានអណ្ដូងប្រេងច្រើនដូចជា សហរដ្ឋអាមេរិក អង់គ្លេស ប៉ាគីស្ថាន អ៊ីស្រាអែលជាដើម ក៏នឹងត្រូវរងឥទ្ធិពលយ៉ាងធ្ងន់ធ្ងរដោយសារសោកនាដកម្មនេះផងដែរ។

គ្រោះមហន្តរាយនេះក៏នឹងបង្កឱ្យមានវិបត្តិសេដ្ឋកិច្ចទ្រង់ទ្រាយធំទូទាំងពិភពលោកដោយសារតែរោគរាតត្បាតឆ្លងរាលដាល។ ក្នុងនោះ វិស័យសេដ្ឋកិច្ច ដឹកជញ្ជូន និងទេសចរណ៍ក៏ទទួលរងផលប៉ះពាល់ធ្ងន់ធ្ងរបំផុត។ នេះបើតាមសម្ដីកុមារាអច្ឆរិយ Abhigya។

អ្នកជំនាញខាងហោរាសាស្ត្រនេះក៏បាននិយាយបន្ថែមថា សង្គ្រាមជីវសាស្ត្រ ដែលតាមការយល់ឃើញរបស់កុមារនេះនោះគឺសង្គ្រាមរបស់មនុស្ស ប្រឆាំងទៅនឹងវីរុសដ៏គ្រោះថ្នាក់។ កុមារានេះក៏បានស្នើឱ្យអ្នករាល់គ្នានៅក្នុងផ្ទះក្នុងអំឡុងពេលសង្គ្រាមជីវសាស្ត្រនេះកំពុងកើតឡើង ព្រោះថាការចេញក្រៅផ្ទះនឹងធ្វើឱ្យមានហានិភ័យខ្ពស់ក្នុងការផ្ទុះជារោគរាតត្បាត។

កុមារ Abhigya Anand មានបញ្ញាខ្ពស់គួរឱ្យកោតសរសើរ

Abhigya Anand ទទួលបានសមត្ថិផលយ៉ាងច្រើនគួរឱ្យគោរពកោតសរសើរ។ កុមារនេះបច្ចុប្បន្នមានអាយុ14ឆ្នាំ ប៉ុន្តែបានក្លាយជាអ្នកព្យាករវ័យក្មេងបំផុតក្នុងពិភពលោក ដែលមានការយល់ដឹងច្រើនអំពីគម្ពីរត្រៃវេទ(The Vedas) និងប្រព័ន្ធវេជ្ជសាស្ត្រហិណ្ឌូបុរាណ(Ayurveda)។

Abhigya ទទួលបានសញ្ញាប័ត្របញ្ចប់ការសិក្សាផ្នែកមីក្រូជីវសាស្រ្ត Ayurveda (Post Graduate Diploma in Ayurvedic Microbiology(PGDAM) ហើយក៏ជាសិស្សក្មេងបំផុតដែលបានទទួលសញ្ញាបត្រកម្រិតនេះនៅក្នុងប្រទេសឥណ្ឌា។ បច្ចុប្បន្ន កុមាររូបនេះកំពុងតែសិក្សាលើមុខវិជ្ជាព្យាករផ្នែកហិរញ្ញវត្ថុជាន់ខ្ពស់នៅសាកលវិទ្យាល័យ Divya Jyothi ប្រទេសឥណ្ឌា។

Abhigya Anand ក៏បានស្រាវជ្រាវ និងយល់ដឹងស៊ីជម្រៅអំពីភាសាសំស្ក្រឹត រហូតដល់ថ្នាក់ដែលអាចបង្រៀនសិស្សដូចទៅនឹងសាស្ត្រាយ៉ាងដូច្នោះដែរ។ កុមាររូបនេះ រួមនឹងប្អូនស្រីរបស់គាត់ មានប៉ុស្តិ៍ Youtube មួយដែលមានវីដេអូជាង700ឃ្លីប ក្នុងនោះមាន300ឃ្លីបនិយាយអំពីការព្យាករនានា។

ដោយសារតែសមិទ្ធិផលដ៏ល្អបំផុតរបស់ខ្លួន Abhigya Anand ក៏ទទួលបានពានរង្វាន់ “អច្ឆរិយកុមារពិភពលោក” (Global Child Prodigy) ដែលពានរង្វាន់ប្រភេទនេះបានប្រគល់ជូនកុមារតែប៉ុន្មានរយនាក់ប៉ុណ្ណោះនៅក្នុងពិភពលោកនាបច្ចុប្បន្ន៕

ប្រភព៖ សារព័ត៌មានបរទេស

April 29, 2020

តាមដានខ្សែរថភ្លើងមេដឹកនាំកូរ៉េខាងជើង នៅស្ថានីយ វ៉នសាន ខំផ្លេកស៍

ក្រោយការបាត់ខ្លួនយ៉ាងគ្មានតម្រុយរបស់លោក គីម ជុង អ៊ុន មេដឹកនាំកូរ៉េខាងជើង ពីការមិនទៅចូលរួមពិធីបុណ្យអបអរសាទរថ្ងៃកំណើតរបស់លោក គីម អ៊ីល ស៊ុង ជីតារបស់ខ្លួនអ្នកបង្កើតសាធារណរដ្ឋប្រជាមានិតប្រជាធិបតេយ្យកូរ៉េ កាលពីថ្ងៃទី15 មេសាកន្លងទៅនោះ បានធ្វើឱ្យកើតមានព័ត៌មានចចាមអារ៉ាមដ៏ច្រើនសន្ធឹក អំពីរឿងសុខភាពរបស់លោក គីម ជុង អ៊ុន និងថែមទាំងមានរបាយការណ៍ពីទីភ្នាក់ងារព័ត៌មាន CNN ដែលដកស្រង់ពីសម្រង់ព័ត៌មាន បានបញ្ជាក់ថា លោកគីម បានចូលវះកាត់ព្យាបាលបេះដូង និងមានអាការធ្ងន់ធ្ងរ។

កណ្ដាលព័ត៌មានចចាមអារ៉ាមដែលខ្ចរខ្ចាយដ៏ច្រើននោះ ក៏មានរបាយការណ៍ពីក្រុមអង្គការ 38North ជាក្រុមអ្នកសង្កេតការណ៍ និងតាមដានហេតុការណ៍ផ្សេងៗនៅក្នុងកូរ៉េខាងជើង ដែលបានបង្ហាញរូបភាពតាមរយៈផ្កាយរណប ដែលបង្ហាញឱ្យឃើញពីក្បួនរថភ្លើងដែលត្រូវបានបញ្ជាក់ថា ជាក្បួនរថភ្លើងរបស់លោកប្រធាន គីម ជុង អ៊ុន ដែលមានប្រវែងប្រមាណជា 250ម៉ែត្រ កំពុងចតនៅក្នុង “ស្ថានីយរថភ្លើងមហាមេដឹកនាំ” ក្នុងទីក្រុងវ៉នសាន ដែលត្រូវបានគេរកឃើញថា បានចតនៅទីនោះតាំងពីថ្ងៃទី21 មេសា រហូតដល់ថ្ងៃទី23 មេសា។

ស្ថានីយរថភ្លើងមហាមេដឹកនាំនេះ ជាស្ថានីយរថភ្លើង ដែលប្រើប្រាស់បានចំពោះតែមនុស្សក្នុងត្រកូលគីមតែប៉ុណ្ណោះ ស្ថិតក្នុងបរិវេណមជ្ឈមណ្ឌល “វ៉នសាន ខំផ្លេកស៍” ជាកន្លែងដែលមានអគារធំៗដ៏ច្រើន ដែលសាងសង់ឡើងមិនយូរប៉ុន្មានក្រោយពីលោក គីម ជុង អ៊ុនឡើងគ្រប់គ្រងប្រទេសកាលពីឆ្នាំ2011។

នៅខាងក្នុងមជ្ឈមណ្ឌល វ៉នសាន ខំផ្លេកស៍ មានផ្ទះទទួលភ្ញៀវខ្នាតធំដល់ទៅ 9ខ្នង និងបន្ទប់សន្ទនាការ 1កន្លែង ក្រៅពីនេះនៅមានកំពង់ផែចំណតនាវាកម្សាន្តទំនើបខ្នាតធំរបស់លោកគីម ទីលានបាញ់កាំភ្លើង និងបន្ទប់ទស្សនាភាពយន្តទៀតផង។

នៅក្បែរនឹងស្ថានីយរថភ្លើងមហាមេដឹកនាំ នៅមានរ៉ាន់វេយ៍(ផ្លូវចុះចត និងហោះឡើងរបស់យន្តហោះ)ខ្នាតតូចមួយ ដែលកាលពីដើមសម្រាប់ប្រើជាមួយយន្តហោះធុនតូច តែមកដល់ពាក់កណ្ដាលឆ្នាំកន្លងទៅ(2019) ទីនោះត្រូវបានកែច្នៃឱ្យក្លាយជាទីលានសម្រាប់ជិះសេះ ជាការងារដែលលោកប្រធានគីម ចូលចិត្តបំផុត។

យ៉ាងណាក៏ដោយ ការបង្ហាញខ្លួនរបស់ក្បួនរថភ្លើងរបស់លោកប្រធានគីមនេះ នៅមិនទាន់អាចពិសោធបានថា តើលោកប្រធានគីមពិតជាស្នាក់នៅមជ្ឈមណ្ឌលវ៉នសាន ខំផ្លេកនេះ ឬយ៉ាងណានោះទេ?

ព្រោះរបាយការណ៍របស់ DailyNK សារព័ត៌មានរបស់ក្រុមអ្នករត់គេចចេញពីប្រទេសកូរ៉េខាងជើង បានរាយការណ៍កាលពីចុងសប្ដាហ៍មុនថា ក្រោយពីចូលទទួលការវះកាត់បេះដូងរួច លោកគីម ក៏ត្រូវបាននាំខ្លួនទៅសម្រាកស្ដារសុខភាពឡើងវិញ នៅឯផ្ទះលម្ហែ យកខ្យល់អាកាសនៅក្នុងខេត្ត ផយ៉ង់ កាន់ ខាងជើង។

ពេលនេះ កុំថាតែរឿងកន្លែងស្នាក់នៅរបស់លោកគីម ជុង អ៊ុន ថានៅទីណានោះ សូម្បីតែថា តើលោក គីម ជុង អ៊ុន នៅមានជីវិតរស់នៅ ឬអត់នោះ ក៏មិនទាន់មានអ្នកណាដឹងច្បាស់នៅឡើយ?…៕

ប្រភព៖ សារព័ត៌មានបរទេស

April 29, 2020

អ្នកវិទ្យាសាស្ត្រអាមេរិកាំងថតបានរូបភាព COVID-19 កំពុងជ្រែកចេញពីកោសិកាជិតងាប់

ក្រុមអ្នកវេជ្ជសាស្ត្រថតបានទិដ្ឋភាពហ្វូងវីរុសCOVID-19ថ្មីដែលទើបត្រូវបានបង្កើតឡើងពីកោសិកាមនុស្ស ដើម្បីត្រៀមវាយលុកចូលគ្រប់គ្រងកោសិកាថ្មីផ្សេងទៀតនៅក្នុងរាងកាយមនុស្ស ដោយប្រើប្រាស់កែវពង្រីកមីក្រូទស្សន៍ទំនើប។

អ្នកស្រី Elizabeth Fischer ប្រធានក្រុមអ្នកគ្រប់គ្រងផ្នែកកែវពង្រីកមីក្រូទស្សន៍អេឡិចត្រុងនៅឯមន្ទីរពិសោធន៍ Rocky Mountain(RML) ក្នុងតំបន់ Montana នៃសហរដ្ឋអាមេរិក ថតបានរូបភាពយ៉ាងច្បាស់នៃកោសិការាងកាយមនុស្សដែលបានផ្ទុក COVID-19 ដោយប្រើកែវពង្រីកមីក្រូទស្សន៍អេឡិចត្រុងប្រភេទស្កេន(Scanning electron microscope)។ ក្រៅពីរូបថតថ្មីនេះ អ្នកស្រីក៏ធ្លាប់ថតបានវីរុសកូរ៉ូណាប្រភេទផ្សេងផងដែរ ដូចជាវីរុសMERS ជាដើម។

បណ្ដាផ្នត់ និងបន្ទាត់កោងពណ៌ប្រផេះ ឬទឹកក្រូច គឺជាផ្ទៃខាងលើនៃកោសិកាដែលត្រូវបានលុកលុយដោយវីរុសCOVID-19។ បណ្ដាគ្រាប់ល្អិតពណ៌ខៀវដែលជ្រែកចេញពីកោសិកា គឺជាវីរុសCOVID-19។ យោងតាមវិទ្យាស្ថានជាតិផ្នែកសុខភាពសហរដ្ឋអាមេរិក NIH (National Institutes of Health) រូបភាពនេះបង្ហាញអំពីដំណើរការដែលមានឈ្មោះថា “ដោះលែងវីរុស” ដែលក្នុងនោះ កោសិកាជិតងាប់បានបញ្ចេញកូនវីរុសCOVID-19ថ្មី។

Francis Collins ដែលជាអ្នកវេជ្ជសាស្ត្រប្រចាំ NIH បកស្រាយថា “រូបភាពនេះ បង្ហាញអំពីកម្រិតនៃរបួសស្នាមដែលវីរុស COVID-19 បានបង្កឡើង នៅពេលវាគ្រប់គ្រងកោសិកាមនុស្ស។ កោសិកាមួយដែលបានឆ្លងវីរុសCOVID-19 គឺអាចបង្កើតបានវីរុសCOVID-19ថ្មីរាប់ពាន់ក្បាល និងឆ្លងទៅកាន់កោសិកាថ្មីមួយផ្សេងទៀត”។

រូបថតលម្អិតបែបនេះ ជួយឱ្យក្រុមអ្នកវិទ្យាសាស្ត្រយល់ដឹងកាន់តែស៊ីជម្រៅអំពីវីរុសដ៏គ្រោះថ្នាក់ដែលបានធ្វើឱ្យមនុស្សជាង3លាននាក់នៅជុំវិញពិភពលោក ត្រូវកើតជំងឺ ក្នុងនោះមានជាង1លាននាក់នៅសហរដ្ឋអាមេរិក៕

ប្រភព៖ សារព័ត៌មានបរទេស

April 29, 2020

អាមេរិកទប់ស្កាត់ផលអាក្រក់ពីអនុសាសន៍របស់ Trump ដែលថា “កម្ចាត់ COVID-19 ដោយចាក់សារធាតុជម្រះមេរោគចូលក្នុងរាងកាយ”

ក្រុមមន្ត្រីអាមេរិកាំង បានចាប់ផ្ដើមធ្វើសកម្មភាពជាបន្ទាន់ដើម្បីទប់ស្កាត់ផលប៉ះពាល់ដែលអាចកើតឡើងពីអនុសាសន៍របស់លោក Trump ដែលបានថ្លែងថា៖ គួរតែពិសោធលើកការចាក់សារធាតុសម្អាតមេរោគចូលក្នុងរាងកាយអ្នកជំងឺដើម្បីកម្ចាត់ COVID-19។

ប៉ុន្មានម៉ោងក្រោយពីសន្និសីទសារព័ត៌មានកាលពីថ្ងៃទី23មេសា ដែលកាលណោះលោក Trump បានផ្ដល់អនុសាសន៍ដូចខាងលើ គេឃើញថាមានសេចក្ដីប្រកាសបន្ទាន់ជាច្រើនត្រូវបានធ្វើឡើងជាបន្តបន្ទាប់ ដោយព្រមានដល់សាធារណជនអំពីហានិភ័យដែលអាចនាំឱ្យបាត់បង់ជីវិតទាក់ទិននឹងវិធីសាស្ត្រដែលប្រធានាធិបតីអាមេរិកាំងបានលើកឡើងកាលពីថ្ងៃទី23មេសាកន្លងទៅនោះ។

រដ្ឋបាលគ្រប់គ្រងចំណីអាហារ និងឱសថ(FDA/Food and Drug Administration) របស់សហរដ្ឋអាមេរិក កាលពីថ្ងៃទី24មេសា ក៏បានព្រមានអំពីការប្រើប្រាស់ hydroxychloroquine ជាថ្នាំប្រឆាំងជំងឺគ្រុនចាញ់ដែលលោក Trump បានសរសើរជាច្រើនដងថា ជាកត្តា “ផ្លាស់ប្ដូរល្បែងលេង” ក្នុងសង្គ្រាមប្រឆាំងនឹង COVID-19 ព្រោះថាថ្នាំនេះមានបង្កប់ហានិភ័យដែលគ្រោះថ្នាក់ដល់ចង្វាក់បេះដូង។

Stephen Hahn សមាជិកម្នាក់របស់ FDA បានថ្លែងថា “ខ្ញុំប្រាកដក្នុងចិត្តហើយថា នឹងមិនផ្ដល់អនុសាសន៍ស្ដីអំពីការចាក់បញ្ចូលសារធាតុសម្អាតមេរោគទៅក្នុងរាងកាយនោះឡើយ”។ ទីភ្នាក់ងារការពារបរិស្ថានសហរដ្ឋអាមេរិកក៏បានណែនាំពលរដ្ឋមិនឱ្យធ្វើតាមគំនិតរបស់លោក Trump ផងដែរ។ បណ្ឌិត Jerome Adams បានអំពាវនាវឱ្យអ្នកដែលកំពុងតាមដានលោកនៅលើបណ្ដាញសង្គម Twitter ថា “សូមមេត្តាសួរយោបល់ពីគ្រូពេទ្យ មុននឹងអនុវត្តវិធីព្យាបាលណាមួយ ឬថ្នាំណាមួយសម្រាប់ក្រុមគ្រួសារ”។ ចំណែកក្រុមហ៊ុនផលិតសារធាតុសម្លាប់មេរោគ Lysol បានអះអាងថា មិនត្រូវបញ្ចូលសារធាតុកម្ចាត់មេរោគ ចូលទៅក្នុងរាងកាយមនុស្ស “បើទោះជាក្នុងករណីណាក៏ដោយ”។

វិធីសាសន៍ដែលត្រូវបានលោក Trump ណែនាំឱ្យធ្វើការពិសោធនោះ បានធ្វើឱ្យមានការព្រួយបារម្ភកាន់តែច្រើនឡើងៗ ក្នុងអំឡុងសង្គ្រាមប្រឆាំង COVID-19។ នៅរដ្ឋ Maryland ខ្សែទូរស័ព្ទបន្ទាន់របស់អាជ្ញាធរ បានទទួលការហៅចូលជាង100លើកពីពលរដ្ឋ ដែលបានសួរថា “តើការចាក់ថ្នាំសម្អាតមេរោគចូលក្នុងរាងកាយគឺពិតជាវិធីព្យាបាលជំងឺមែន ឬយ៉ាងណា?”។

នៅសេតវិមាន Kayleigh McEnany ដែលជាជំនួយការផ្នែកសារព័ត៌មានរបស់លោក Trump បានចោទក្រុមអ្នកសារព័ត៌មានថា “គ្មានការទទួលខុសត្រូវ” ដោយបាននាំយកមតិចាកឆ្ងាយពីស្ថានភាពជាក់ស្ដែង។ ប៉ុន្តែ ប៉ុន្មានម៉ោងក្រោយមក លោក Trump ក៏បានឱ្យដឹងថា យោបល់របស់លោក ដែលត្រូវបានចុះផ្សាយនោះគឺជាការពិត ប៉ុន្តែលោក Trump បានអះអាងថា លោកគ្រាន់តែនិយាយបែប “បញ្ឆិតបញ្ឆៀង” តែប៉ុណ្ណោះ។

វេជ្ជបណ្ឌិត Deborah Birx អ្នកគ្រប់គ្រងផ្នែកប្រតិកម្មរហ័សរបស់សេតវិមានចំពោះ COVID-19 បានការពារប្រធានាធិបតី ដោយលោកយល់ថា មតិយោបល់ដែលលោក Trump បានលើកឡើងគឺជាផ្នែកមួយក្នុងការយល់ឃើញ បើទោះមិនបានទទួលស្គាល់ជាផ្លូវការ។ Deborah Birx ថ្លែងប្រាប់ Fox News ថា “នៅពេលប្រធានាធិបតីទទួលបានព័ត៌មានថ្មី គាត់ក៏ចង់និយាយចេញ និងចង់ពិភាក្សាជាមួយគ្នា”។

ក៏ប៉ុន្តែ ក្រុមអ្នកជំនាញខាងវេជ្ជសាស្ត្រយល់ថា អនុសាសន៍គ្មានមូលដ្ឋានពីប្រធានាធិបតី Trump ដែលជាអ្នកមិនមានការបណ្ដុះបណ្ដាលផ្នែកវេជ្ជសាស្ត្រ ប៉ុន្តែសម្ដីមានឥទ្ធិពល គឺពិតជា “គ្រោះថ្នាក់ខ្លាំងណាស់”។

Jack Chow ដែលជាឯកអគ្គរដ្ឋទូតសកលអំពី HIV/AIDS របស់សហរដ្ឋអាមេរិកក្នុងសម័យប្រធានាធិបតី George W. Bush មានយោបល់ថា “គំនិតរបស់ប្រធានាធិបតី Trump បើសិនជាមានអ្នកសាកល្បង នោះអាចនឹងបង្កឱ្យមានផលវិបាកធ្ងន់ធ្ងរចំពោះសុខភាព ឬនាំឱ្យមានការពិសោធប្រកបដោយការខាតបង់ និងមិនអាចបង្កើតបានជាវិធីព្យាបាលណាមួយ”។

កាលពីខែមុន បន្ទាប់ពីលោក Trump បានប្រកាសថា hydroxychloroquine គឺជាសន្លឹកបៀរដែលជួយ “ផ្លាស់ប្ដូរស្ថានការណ៍” ក្នុងសង្គ្រាមប្រឆាំងនឹង COVID-19 មានប្ដីប្រពន្ធមួយគូធ្វើតាមការលើកឡើងនេះ ដោយផឹកទឹកថ្នាំដែលមានសារធាតុគីមី chloroquine phosphate ដែលមានសារធាតុផ្សំដូចទៅនឹងការលើកឡើងរបស់លោក Trump ដោយសង្ឃឹមថានឹងអាចជួយសម្លាប់មេរោគក្នុងខ្លួន។ ប៉ុន្តែ ពួកគេបានធ្លាក់ខ្លួនឈឺ និងត្រូវបញ្ជូនទៅសង្គ្រោះបន្ទាន់ ដែលក្រោយមកបុរសជាប្ដីបានបាត់បង់ជីវិត ខណៈប្រពន្ធបានរួចផុតពីការស្លាប់។

ករណីខាងលើនេះ ធ្វើឱ្យមជ្ឈមណ្ឌលគ្រប់គ្រងនិងបង្ការជំងឺ CDC (Centers for Disease Control and Prevention) របស់សហរដ្ឋអាមេរិក កាលពីថ្ងៃទី28មេសា ត្រូវចេញសេចក្ដីព្រមានដល់បណ្ដាគ្លីនិកទូទាំងប្រទេស ស្ដីអំពីគ្រោះថ្នាក់របស់សារធាតុ chloroquine phosphate ដែល “អាចបង្កផលវិបាកយ៉ាងធ្ងន់ធ្ងរដល់សុខភាព និងអាយុជីវិត”៕

ប្រភព៖ សារព័ត៌មានបរទេស

>Trump ផ្ដល់អនុសាសន៍៖ ចាក់ថ្នាំសម្អាតមេរោគ ឬពន្លឺចូលទៅក្នុងរាងកាយ ដើម្បីព្យាបាលCOVID-19

April 29, 2020

គួរឱ្យស្ដាយ…គ្រូពេទ្យលំដាប់ខ្ពស់អាមេរិកម្នាក់ធ្វើអត្តឃាត អាចមកពីមានអារម្មណ៍តានតឹង ព្រោះឃើញអ្នកជំងឺកូវីដ-19 រងទុក្ខវេទនាពេក…

សារព័ត៌មាន នីវយ៉ក ថាមស៍ បានរាយការណ៍ថា គ្រូពេទ្យប្រចាំបន្ទប់សង្គ្រោះបន្ទាន់ម្នាក់នៅក្នុងទីក្រុងនីវយ៉កស៊ីធី ដែលជាសះស្បើយពីការឆ្លងមេរោគកូវីដ-19 និងបានវិលត្រឡប់មកជួយព្យាបាលអ្នកជំងឺវីរុសកូរ៉ូណាប្រភេទថ្មី ឬកូវីដ-19 វិញនោះ បានធ្វើអត្តឃាតយ៉ាងគួរឱ្យរន្ធត់ចិត្ត និងសោកស្ដាយយ៉ាងក្រៃលែង កាលពីថ្ងៃអាទិត្យ ទី26 មេសាកន្លងទៅ ដែលមូលហេតុ អាចបណ្ដាលមកពីភាពតានតឹងក្នុងអារម្មណ៍។

អ្នកស្រីវេជ្ជបណ្ឌិត ឡូណា អេម ប្រ៊ីន អាយុ 49ឆ្នាំ នាយិកាវេជ្ជសាស្ត្ររបស់ផ្នែកសង្គ្រោះបន្ទាន់ នៃមន្ទីរពេទ្យ ផ្រេសប៊ីថេរៀន ក្នុងតំបន់មែនហាត់តុន នីវយ៉ក ដែលពោរពេញទៅដោយអ្នកជំងឺកូវីដ-19នោះ បានស្លាប់នៅក្នុងផ្ទះ ក្នុងទីក្រុងឆាឡត់វីលល៍ រដ្ឋវើជីនៀ ដែលអ្នកស្រីស្នាក់នៅជាមួយក្រុមគ្រួសារ។

ថៃលើរ៍ ហន អ្នកនាំពាក្យក្រុមប៉ូលិសទីក្រុងឆាឡត់វីលល៍ បានឱ្យដឹងតាមរយៈអ៊ីមែលថា កាលពីថ្ងៃអាទិត្យ(ទី26មេសា) អាជ្ញាធរបានទទួលទូរស័ព្ទសុំជំនួយសង្គ្រោះពីគ្រូពេទ្យ ក៏ប្រញាប់ធ្វើដំណើរទៅកន្លែងកើតហេតុភ្លាមតែម្ដង។ លោកបានឱ្យដឹងថា “ជនរងគ្រោះត្រូវបានដឹកទៅមន្ទីរពេទ្យរបស់មហាវិទ្យាល័យវើជីនៀ តែបានស្លាប់នៅពេលក្រោយមក ព្រោះមិនអាចទ្រាំនឹងអាការរបួសបាន”។

មិនទាន់ដឹងច្បាស់លាស់នៅឡើយថា អ្វីគឺជាមូលហេតុ ដែលធ្វើឱ្យអ្នកស្រីសម្រេចចិត្តផ្ដាច់ជីវិតខ្លួនឯងនោះទេ ប៉ុន្តែខាងក្រុមគ្រួសារ ប៉ូលិស និងគ្រូពេទ្យដទៃទៀត បានបញ្ជាក់ប្រាប់ថា អាចបណ្ដាលមកពីភាពតានតឹងក្នុងអារម្មណ៍ ដោយសារតែរោគរាតត្បាតដ៏ធំក្នុងទីក្រុងនីវយ៉កនាពេលបច្ចុប្បន្ន ទើបនាំឆ្ពោះទៅរកការធ្វើអត្តឃាតរបស់អ្នកគ្រូពេទ្យម្នាក់នេះ។ លោក ហ្វ៊ីលីព ប្រ៊ីន ឪពុករបស់អ្នកស្រីវេជ្ជបណ្ឌិត ឡូណា អេម ប្រ៊ីន បានប្រាប់កាសែត នីវយ៉ក ថាមស៍ថា “នាងប្រឹងប្រែងព្យាយាមបំពេញតួនាទីរបស់ខ្លួន ហើយការងារនោះវាសម្លាប់នាង”។

ឪពុករបស់អ្នកស្រីបានបន្តទៀតថា អ្នកស្រីវេជ្ជបណ្ឌិត ឡូណា អេម ប្រ៊ីន ធ្លាប់ឆ្លងមេរោគវីរុសកូរ៉ូណាប្រភេទថ្មីនេះម្ដងរួចមកហើយ មុននឹងជាសះស្បើយ ហើយបានត្រឡប់ទៅធ្វើការងារតាមប្រក្រតីឡើងវិញ បន្ទាប់ពីបានសម្រាកប្រមាណជាជាង 1សប្ដាហ៍រួចមក ហើយបន្ទាប់ពីនោះ ក៏ត្រូវបានខាងកន្លែងធ្វើការ បញ្ជូនអ្នកស្រីត្រឡប់មកផ្ទះវិញម្ដងទៀត…អំឡុងពេលនោះ ក្រុមគ្រួសារមានការសង្ស័យថា អាចមានអ្វីម្យ៉ាងខុសប្រក្រតីហើយមើលទៅ? ទើបសម្រេចចិត្តនាំគ្នាទៅទទួលយកអ្នកស្រីមករស់នៅជាមួយគ្នា ឯរដ្ឋវើជីនៀ។

លោកហ្វ៊ីលីព ប្រ៊ីន បានអះអាងថា កូនស្រីរបស់លោក គ្មានប្រវត្តិឈឺថ្កាត់ផ្នែកផ្លូវចិត្តទេ តែពេលដែលលោកជជែកគ្នាជាមួយនាងលើកចុងក្រោយបង្អស់ មើលទៅនាង ហាក់ដូចជាអស់សង្ឃឹម ដូចមានអ្វីម្យ៉ាងខុសប្រក្រតី។ នាងប្រាប់ថា មានអ្នកជំងឺច្រើនណាស់ ដែលស្ថិតក្នុងអាការជិតស្លាប់តាំងពីមុនពេលនាំខ្លួនចុះពីរថយន្តសង្គ្រោះម្ល៉េះ”… “កូនស្រីខ្ញុំ គឺជាអ្នកប្រយុទ្ធដ៏រឹងមាំនៅក្នុងសមរភូមិជួរមុខ សូមជឿចុះថា នាងនឹងត្រូវបានលើកតម្កើងក្នុងឋានៈជាវីរនារី ព្រោះនាងជាវីរនារី…”

លោក រ៉ាឆេលល៍ ប្រ៊ាក់ន័រ មេបញ្ជាការប៉ូលិសទីក្រុងឆាឡត់វីលល៍ បានប្រាប់ថា “អ្នកប្រកបវិជ្ជាជីវៈផ្នែកសាធារណៈសុខាភិបាលនៅជួរមុខ និងអង្គភាពសង្គ្រោះបន្ទាន់ គ្មានប្រព័ន្ធការពារខាងផ្លូវចិត្ត ឬការពារផលប៉ះពាល់ខាងផ្លូវចិត្ត ដោយសាររោគរាតត្បាតនាពេលបច្ចុប្បន្ននេះទេ”

ចំណែកនាយកវិទ្យាល័យវេជ្ជសាស្ត្របន្ទាន់នៃសហរដ្ឋអាមេរិក ដែលអ្នកស្រីដុកទ័រ ឡូណា អេម ប្រ៊ីន ក៏ជាសមាជិកម្នាក់ដែរនោះ បានប្រាប់ថា ការស្លាប់របស់អ្នកស្រី គឺជារឿងដាស់តឿនផ្លូវចិត្តដ៏គួរឱ្យរន្ធត់ចិត្តមួយ ពាក់ព័ន្ធនឹងក្ដីទុក្ខលំបាកវេទនាដែលបណ្ដាក្រុមមន្ត្រីសាធារណៈសុខាភិបាលជាច្រើននាក់ត្រូវប្រឈម កណ្ដាលការឆ្លងរាលដាលដ៏ធំរបស់វីរុសកូវីដ-19។

លោក វីលៀម ចាកវីស ប្រធានគណៈកម្មាធិកាវិទ្យាល័យវេជ្ជសាស្ត្របន្ទាន់ នៃសហរដ្ឋអាមេរិក បានថ្លែងថា “វាជារឿងហួសវិស័យ ដែលស្ថានការណ៍នៅតាមមន្ទីរពេទ្យនានារបស់យើង ធ្វើឱ្យយើងកើតមានស្នាមរបួសដ៏ជ្រៅ…ក្នុងរឿងរ៉ាវរបស់ដុកទ័រ ប្រ៊ីន ខ្ញុំនឹកស្រមៃបានត្រឹមតែថា វាធ្ងន់ធ្ងរហួសនឹងនាងអាចទ្រាំទ្របាន វាមិនមែនជាភាពទន់ជ្រាយទេ តែវាជាភាពរឹងមាំនៅក្នុងអារម្មណ៍វេទនាចិត្តអាណិតអ្នកដទៃរបស់នាង…”

ព័ត៌មាននៅក្នុងវេបសាយរបស់មហាវិទ្យាល័យ ចន ហប់គីនស៍ បានរកឃើញថា រហូតមកដល់ថ្ងៃអង្គារម្សិលមិញ(ទី28មេសា) នៅក្នុងរដ្ឋនីវយ៉ក មានអ្នកស្លាប់ដោយសារវីរុសកូរ៉ូណាប្រភេទថ្មីនេះរួចហើយ ជាង 17,500នាក់ ជិតស្មើនឹង 1ភាគ3 នៃចំនួនអ្នកស្លាប់ទាំងអស់នៅទូទាំងសហរដ្ឋអាមេរិក៕

ប្រភព ៖ សារព័ត៌មានបរទេស

April 29, 2020

ជិត217,000នាក់ស្លាប់ដោយសារ COVID-19 នៅទូទាំងសកលលោក

ពិភពលោកទាំងមូលមានអ្នកស្លាប់ជិត217,000នាក់ ក្នុងចំណោមអ្នកជំងឺ COVID-19 ជាង3.1លាននាក់ ខណៈដែលប្រទេសមួយចំនួនបានចាប់ផ្ដើមបន្ធូរបន្ថយការរឹតត្បិតលើការដើរហើរ។

យោងតាមស្ថិតិរបស់សាកលវិទ្យាល័យ Johns Hopkins នៃសហរដ្ឋអាមេរិក បានឱ្យដឹងថា នៅក្នុងប្រទេស និងដែនដីចំនួន210ក្នុងពិភពលោក មានអ្នកជំងឺ COVID-19សរុបឡើងដល់ 3,111,730នាក់ និង216,857នាក់បានបាត់បង់ជីវិត ក្នុងនោះមានករណីឆ្លងថ្មីចំនួន75,553នាក់ និងករណីស្លាប់ថ្មីចំនួន6,306នាក់។ ករណីដែលបានជាសះស្បើយមានចំនួន925,442នាក់។

ប្រទេសដែលមានអ្នកជំងឺលើសពី200,000នាក់ មាន3ប្រទេស គឺសហរដ្ឋអាមេរិក អេស្ប៉ាញ និងអ៊ីតាលី៖

ប្រទេសដែលត្រូវបានចាត់ជាសម្បុកមេរោគ COVID-19 ធំជាងគេបង្អស់លំដាប់ទីមួយក្នុងពិភពលោក គឺនៅតែជាសហរដ្ឋអាមេរិកដដែល ដោយមានអ្នកជំងឺរហូតដល់1,011,600នាក់ ក្នុងនោះមាន58,343នាក់បានបាត់បង់ជីវិត។ អ្នកជំងឺថ្មីរបស់ប្រទេសនេះមាន 26,226នាក់ និងអ្នកស្លាប់ថ្មីមាន2,391នាក់។

អេស្ប៉ាញទើបបានរកឃើញអ្នកជំងឺថ្មីចំនួន2,706នាក់ និងអ្នកស្លាប់ថ្មី301នាក់ ក្នុងចំណោមអ្នកជំងឺសរុប232,128នាក់ និងអ្នកស្លាប់សរុប23,822នាក់។

អ៊ីតាលី៖ អ្នកជំងឺថ្មី2,091នាក់ និងអ្នកស្លាប់ថ្មី382នាក់ ក្នុងចំណោមអ្នកជំងឹសរុប201,505នាក់ និងអ្នកស្លាប់សរុបមាន27,359នាក់។ ប្រទេសនេះជាសម្បុកមេរោគធំជាងគេលំដាប់ទី3 ប៉ុន្តែជា “វាលពិឃាត” ធំជាងគេលំដាប់ទី2នៅក្នុងពិភពលោក៕

ប្រភព៖ សារព័ត៌មានបរទេស

April 29, 2020

នៅវៀតណាម ប្រជាជនយកកាំភ្លើងមកប្រគល់ឱ្យសមត្ថកិច្ច ទទួលបានអាហារត្រឡប់ទៅវិញ

ប្រជាជនជាច្រើននៅក្នុងទីក្រុងសៃហ្គន(Ho Chi Minh) ប្រទេសវៀតណាម បាននាំគ្នាយកអាវុធមកប្រគល់ឱ្យសមត្ថកិច្ចជាបន្តបន្ទាប់ ដោយក្នុងនោះមានអាវុធស្ទើរគ្រប់ប្រភេទ តាំងពីកាំបិត រហូតដល់កាំភ្លើង។

ប៉ុន្មានថ្ងៃចុងក្រោយនេះ នៅទីក្រុងសៃហ្គន ភាគខាងត្បូងប្រទេសវៀតណាម គឺឃើញមានសកម្មភាពប្រមូលអាវុធ និងប្រគល់អាវុធបានកើតឡើងជាហូរហែ ពិសេសគឺនៅក្នុងខណ្ឌ Binh Thanh។ កាំភ្លើងខ្យល់ (Air gun) កាំភ្លើងគ្រាប់ជ័រ កាំបិត machete មានវែងមានខ្លី រួមនឹងគ្រាប់កាំភ្លើង គ្រឿងផ្ទុះ និងគ្រឿងអាវុធជាច្រើនផ្សេងទៀត ត្រូវបានប្រជាជននាំយកមកប្រគល់ឱ្យប៉ូលីស។ ជាមួយគ្នានេះដែរ បន្ទាប់ពីបានយកអាវុធមកប្រគល់ឱ្យសមត្ថកិច្ចហើយ អតីតម្ចាស់អាវុធទាំងនោះក៏ទទួលបានអំណោយជាអាហារពីសំណាក់អាជ្ញាធរក្រុង។

លោក Le Phat Minh មកពីខណ្ឌ Binh Thanh បានឱ្យដឹងថា “កាំភ្លើងដែលខ្ញុំបានទិញនេះគឺទុកសម្រាប់បាញ់សត្វកាលពីនៅក្មេង។ ក្រោយមក ដោយសារតែឃើញថាវាលែងមានប្រយោជន៍ និងអាចបង្កគ្រោះថ្នាក់ដល់សង្គម ព្រមទាំងមានការប្រកាសពីខាងសង្កាត់ ដែលឱ្យប្រជាជនប្រគល់អាវុធ ខ្ញុំក៏យកវាមកប្រគល់ឱ្យប៉ូលីស ដើម្បីចៀសវាងហេតុការណ៍អាក្រក់កើតឡើង។

ចំណែកពលរដ្ឋម្នាក់ទៀតឈ្មោះ Huynh Le Tuan Khanh ដែលបានយកអាវុធមកប្រគល់ឱ្យសមត្ថកិច្ចដែរនោះ បាននិយាយថា “កាំភ្លើងនេះ ខ្ញុំរើសបាននៅលើដងផ្លូវ។ ក្រោយពីមានការប្រកាសពីអាជ្ញាធរសង្កាត់ ខ្ញុំក៏សម្រេចចិត្តយកវាមកប្រគល់ឱ្យសមត្ថកិច្ចតែម្ដង ដើម្បីកុំឱ្យមានបញ្ហាដល់ខ្លួន។

លោក Nguyen Dinh Anh ដែលបានយកអាវុធមកប្រគល់ឱ្យសមត្ថកិច្ច បានថ្លែងថា “បើទោះជាមិនមានអំណោយ ក៏ខ្ញុំនៅតែយកវាមកប្រគល់ឱ្យនគរបាលជាធម្មតា គឺដើម្បីសុវត្ថិភាពផ្ទាល់ខ្លួន។ អំណោយសម្រាប់ខ្ញុំគឺមិនមានសំខាន់នោះទេ”។

សារព័ត៌មានវៀតណាមដកស្រង់ប្រភពព័ត៌មានពីសមត្ថកិច្ចឱ្យដឹងថា អាវុធទាំងនេះនឹងត្រូវកំណត់តាមប្រភេទ រួចហើយយកទៅកម្ទេចចោល។ ប្រធានប៉ូស្តិ៍នគរបាលសង្កាត់2 លោក Le Tran Trung បានថ្លែងថា “នៅក្នុងរយៈពេលនៃការសម្រាកនៅផ្ទះដោយសារបម្រាមគោចរកន្លងមក មានករណីឈ្លោះប្រកែកគ្នាច្រើន ដែលនាំឱ្យមានបញ្ហាប្រើប្រាស់អាវុធកើតឡើង។ ក្រោយពីបម្រាមគោចរបានបញ្ចប់ សង្កាត់ក៏មានកម្មវិធីប្រមូលអាវុធ ព្រោះថា ការប្រើប្រាស់អាវុធគឺជារឿងគ្រោះថ្នាក់ ដែលអាចបង្កឱ្យមានរឿងស្ដាយក្រោយជាច្រើន។ មេប៉ូស្តិ៍រូបនេះបន្ថែមថា “សមត្ថកិច្ចនឹងបន្តប្រមូលអាវុធដែលនៅសល់ឱ្យអស់ ពិសេសគឺចំពោះក្រុមក្មេងៗ។

សមត្ថកិច្ចបានឱ្យដឹងថា សកម្មភាពប្រមូលអាវុធខាងលើនេះនឹងត្រូវបានអាជ្ញាធរក្រុងសៃហ្គន បន្តអនុវត្តដល់ដំណាច់ឆ្នាំ2020៕

ប្រភព៖ សារព័ត៌មានបរទេស

April 28, 2020

WHO ថា “ប្រទេសនីមួយៗត្រូវទទួលសុខត្រូវលើបញ្ហា COVID-19 ដោយខ្លួនឯង”

ប្រធានអង្គការសុខភាពពិភពលោក(WHO) លោក Tedros បានឱ្យដឹងថា អង្គការនេះបានត្រឹមតែលើកឡើងនូវអនុសាសន៍តែប៉ុណ្ណោះ ចំណែកប្រទេសនីមួយៗត្រូវតែទទួលខុសត្រូវដោយខ្លួនឯងចំពោះវិធានការទប់ស្កាត់ COVID-19។

លោក Tedros Adhanom Ghebreyesus ប្រធានអង្គការសុខភាពពិភពលោក(WHO) បានថ្លែងនៅក្នុងសន្និសីទសារព័ត៌មានកាលពីថ្ងៃទី27មេសា នៅទីក្រុង Geneva ប្រទេសស្វីសថា “យើងខ្ញុំបានត្រឹមតែផ្ដល់អនុសាសន៍តែប៉ុណ្ណោះ ប៉ុន្តែត្រូវតែដឹងច្បាស់ថា យើងខ្ញុំមិនមានកាតព្វកិច្ចក្នុងការបង្ខំប្រទេសណាមួយឱ្យធ្វើតាមយើងខ្ញុំនោះឡើយ។ ប្រការនេះគឺអាស្រ័យទៅលើប្រទេសនីមួយៗ ដែលពួកគេអាចទទួលយក ឬបដិសេធអនុសាសន៍របស់យើងខ្ញុំ”។

លោក Tedros បន្តថា WHO តែងតែលើកឡើងនូវអនុសាសន៍ដែលយោងទៅលើកត្តាវិទ្យាសាស្ត្រ និងភ័ស្ដុតាងប្រកបដោយទំនុកចិត្ត។ កាលពីថ្ងៃទី30មករា WHO បានប្រកាសអាសន្នទូទាំងពិភពលោកអំពីវីរុស COVID-19។ មេដឹកនាំ WHO ថ្លែងថា “បើសិនជាអ្នកនៅចាំបាន ពេលនោះគឺមានករណីឆ្លងវីរុសត្រឹមតែ82នាក់ប៉ុណ្ណោះនៅខាងក្នុងប្រទេសចិន”។

ប្រធានអង្គការសុខភាពពិភពលោកសង្កត់ធ្ងន់ថា “ពិភពលោកគួរណាស់តែស្ដាប់តាម WHO ដោយប្រុងប្រយ័ត្ន។ ប្រទេសទាំងអស់ពេលនោះអាចបញ្ចេញវិធានការផ្នែកសុខាភិបាលប្រកបដោយប្រសិទ្ធភាព”។

លោក Tedros បញ្ជាក់ថា “អ្នកគួរតែពិនិត្យឡើងវិញ បណ្ដាប្រទេសដែលបានស្ដាប់តាមអនុសាសន៍ ពួកគេកំពុងតែមានស្ថានភាពល្អប្រសើរជាងបណ្ដាប្រទេសដទៃ។ នោះគឺជាការពិត។ និយាយរួម ប្រទេសនីមួយៗ ត្រូវតែទទួលខុសត្រូវរៀងៗខ្លួន”។

បើទោះជាមានការខិតខំប្រឹងប្រែង ប៉ុន្តែអង្គការ WHO ក៏ត្រូវបានគេវាយតម្លៃថា មិនមានសមត្ថភាពគ្រប់គ្រាន់ក្នុងការដឹកនាំពិភពលោក ឆ្លងកាត់វិបត្តិសុខភាពនេះនោះឡើយ។ ប្រធានាធិបតីសហរដ្ឋអាមេរិក លោក Donald Trump ជាច្រើនលើក បានចោទប្រកាន់ WHO ថា “បានធ្វើឱ្យពិភពលោកបង្កកំហុសឆ្គងយ៉ាងធ្ងន់ធ្ងរនៅពេលប្រយុទ្ធប្រឆាំងនឹង COVID-19 ព្រមទាំងបានបិទបាំងអំពីការឆ្លងរាលដាលរបស់វីរុសនេះទៀតផង”៕

ប្រភព៖ សារព័ត៌មានបរទេស

April 28, 2020

COVID-19! ក្រុមវេជ្ជបណ្ឌិតអាល្លឺម៉ង់បង្ខំចិត្តថតអាក្រាតកាយដើម្បីទាមទារឈុតការពារវីរុស

វេជ្ជបណ្ឌិតអាល្លឺម៉ង់មួយក្រុមបានថតរូបអាក្រាតកាយដើម្បីទាក់ទាញចំណាប់អារម្មណ៍របស់សាធារណជន និងក្រុមអ្នកនយោបាយ ដើម្បីឱ្យគិតគូរអំពីស្ថានភាពខ្វះឈុតការពារមេរោគ និងសម្ភារវេជ្ជសាស្ត្រ ក្នុងអំឡុងពេលវីរុស COVID-19 កំពុងរាតត្បាត។

យោងតាមសារព័ត៌មាន Guardian ចលនានេះមានឈ្មោះថា “Blanke Bedenken”។ សមាជិកដែលចូលរួមក្នុងចលនានេះថ្លែងថា ពួកគេមានអារម្មណ៍ថា កំពុងត្រូវគំរាមកំហែងដល់អាយុជីវិត ដោយសារវីរុស COVID-19 ហើយការអំពាវនាវសុំជំនួយរបស់ពួកគេក្នុងរយៈពេលច្រើនខែមកនេះ មិនត្រូវបានឆ្លើយតបនោះដែរ។

Ruben Bernau ថ្លែងប្រាប់ Arztezeitung ថា លោកនឹងក្រុមការងារមិនមានឈុតការពារសុវត្ថិភាពសុខភាព និងសម្ភារវេជ្ជសាស្ត្រគ្រប់គ្រាន់សម្រាប់ប្រើប្រាស់ដើម្បីការពារពីវីរុសCOVID-19 នោះឡើយ។ លោកថ្លែងថា “ការអាក្រាតកាយគឺជារូបភាពបង្ហាញថា ពួកយើងស្ថិតក្នុងសភាពងាយរងគ្រោះពីវីរុសដែលយើងកំពុងប្រឈម នៅពេលខ្វះសម្ភារការពារខ្លួន”។

វេជ្ជបណ្ឌិតពហុឯកទេស Christian Rechtenwald បានឱ្យដឹងថា ពួកគេយកគំរូតាមវេជ្ជបណ្ឌិតជនជាតិបារាំងម្នាក់ដែលមានឈ្មោះថា Alain Colombie ដែលធ្លាប់បានថតរូបអាក្រាតកាយដើម្បីបង្ហាញអំពីការខ្វះខាតសម្ភារវេជ្ជសាស្ត្រដែលគាត់ និងមិត្តរួមការងារបានជួបប្រទះ។

វេជ្ជបណ្ឌិត Husemann អះអាងថា ពួកគាត់ចង់ជួយសង្គ្រោះអ្នកជំងឺខ្លាំងណាស់ ប៉ុន្តែពួកគាត់ក៏ត្រូវការសម្ភារវេជ្ជសាស្ត្រដែលសមស្របផងដែរ។ វេជ្ជបណ្ឌិតមួយរូបផ្សេងទៀតថ្លែងថា “ខ្ញុំបានទទួលការបណ្ដុះដើម្បីដេរមុខរបួស។ ហេតុអ្វីឱ្យខ្ញុំដេរម៉ាស់ដោយខ្លួនឯងទៀត?”។

ក្រុមវេជ្ជបណ្ឌិតអាល្លឺម៉ង់ បានអំពាវនាវជាបន្តបន្ទាប់ឱ្យមានការបន្ថែមសម្ភារវេជ្ជសាស្ត្រចាប់តាំងពី COVID-19 បានបង្ហាញខ្លួនក្នុងប្រទេសនេះកាលពីចុងខែមករា។ មកដល់បច្ចុប្បន្នអាល្លឺម៉ង់ បានរកឃើញអ្នកជំងឺ 158,758នាក់ និងជាង6,200នាក់បានបាត់បង់ជីវិតដោយសារវីរុសកូរ៉ូណានេះ។

បណ្ដាក្រុមហ៊ុន និងរោងចក្រនៅអាល្លឺម៉ង់ បានបង្កើនចង្វាក់ផលិតកម្មរបស់ខ្លួនដើម្បីផ្គត់ផ្គង់ឈុតការពារមេរោគ ក៏ដូចជាសម្ភារវេជ្ជសាស្ត្រ ប៉ុន្តែនៅតែមិនអាចសមតាមតម្រូវការជាក់ស្ដែង។

ក្រៅពីការខ្វះខាតសម្ភារវេជ្ជសាស្ត្រក៏ដូចជាឈុតការពារមេរោគ បុគ្គលិកសុខាភិបាលនៃប្រទេសនេះក៏បានរាយការណ៍ថា មានករណីលួចទឹកថ្នាំសម្លាប់មេរោគ និងម៉ាស់ពីមន្ទីរពេទ្យរបស់ពួកគេទៀតផង។ ភាគីខាងប៉ូលីសអាល្លឺម៉ង់ បានអះអាងថា ក្រុមចោរដែលមានរចនាសម្ព័ន្ធគឺជាអ្នកនៅពីក្រោយបញ្ហានេះ។ មន្ទីរពេទ្យជាច្រើនបានបង្កើនការប្រុងប្រយ័ត្នផ្នែកសន្តិសុខដើម្បីការពារសម្ភារដូចដែលបានរៀបរាប់ខាងលើ។

ការសិក្សាស្រាវជ្រាវថ្មីកន្លងមកនេះរបស់សមាគមនៃក្រុមហ៊ុនធានារ៉ាប់រងសុខភាពអាល្លឺម៉ង់ បានឱ្យដឹងថា ក្រុមគ្រូពេទ្យកំពុងតែខ្វះម៉ាស់ប្រភេទប្រើ1ដងចោល ប្រមាណជា100លានបន្ទះ និងម៉ាស់ប្រភេទមានតម្រងច្រោះខ្យល់ជិត50លានបន្ទះ រួមនឹងស្រោមដៃប្រើម្ដងចោលជាង60លានស្រោម៕

ប្រភព៖ សារព័ត៌មានបរទេស

April 28, 2020

ដំណឹងល្អសម្រាប់ពិភពលោក!!…អាចរកឃើញវ៉ាក់សាំងបង្អាក់មេរោគកូវីដ-19 លឿនជាងការរំពឹងទុក គឺនៅក្នុងឆ្នាំនេះតែម្ដង…

អាចនឹងមានវ៉ាក់សាំងរម្ងាប់ការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីដ-19 យ៉ាងលឿនបំផុតនៅក្នុងឆ្នាំនេះតែម្ដង ដោយជាបឋម គេរំពឹងថា នឹងអាចប្រើបានសម្រាប់ក្រុមមនុស្សដែលមានសុខភាពទន់ខ្សោយ និងក្រុមមនុស្សដែលប្រថុយប្រថាននឹងជំងឺផ្សេងៗ ដោយក្នុងនោះរួមទាំងបណ្ដាក្រុមមន្ត្រីផ្នែកសាធារណៈសុខាភិបាល លឿនជាងការរំពឹងទុកកាលពីពេលដំបូងៗ។ នេះបើតាមសេចក្ដីរាយការណ៍របស់ទីភ្នាក់ងារព័ត៌មាន ប្ល៊ូមប៊ើក។

កាលពីពេលមុននេះ ក្រុមសម្ព័ន្ធមិត្តរួមសហការផ្នែកនវានុវត្តន៍ដើម្បីទប់ទល់នឹងរោគរាតត្បាត ឬ Coalition for Epidemic Preparedness Innovations ឬ CEPI ដែលផ្ដល់ការគាំទ្រថវិកាលើគ្រោងការវ៉ាក់សាំងប្រឆាំងវីរុសកូរ៉ូណាប្រភេទថ្មី 9គ្រោងការ បានធ្លាប់ចង្អុលបង្ហាញថា វ៉ាក់សាំង ប្រហែលជានឹងត្រៀមរួចរាល់ក្នុងអំឡុងពេល 12 ដល់ 18ខែទៀត តែយ៉ាងណាក៏ដោយ ចុងក្រោយបំផុតនេះ ពួកគេបានកំណត់គោលដៅដោយនឹងបង្កើនល្បឿនឱ្យលឿនជាងនេះ។

លោក រិឆាត ហេចឆេតត៍ ប្រធានក្រុម CEPI ដែលជាស្ថាប័នល្បីល្បាញស្ថិតនៅក្នុងទីក្រុងអូស្លូ បានប្រាប់ថា ការវាយតម្លៃចុងក្រោយបំផុត មិនទាន់រាប់បញ្ជូលភាពអាចទៅរួចក្នុងករណីដែលក្រុមហ៊ុនទាំងឡាយកំពុងរួមដៃគ្នាយ៉ាងជិតស្និទ្ធក្នុងការបង្រួញដំណាក់កាលផ្សេងៗ និងបើកទទួលអ្នកស្ម័គ្រចិត្តក្នុងការសាកល្បងនៅលើមនុស្សឱ្យបានកាន់តែលឿនឡើង រួមទាំងបច្ច័យផ្សេងៗទៀតផង។

លោកបានថ្លែងកាលពីថ្ងៃចន្ទ(ទី27មេសា) ថា “ទាំងអស់ និងទាំងមូលដែលយើងកំពុងសម្លឹងមើលនៅក្នុងពេលនេះ ប្រៀបដូចជាឱកាសនៃភាពអាចទៅរួច ដែលជួនកាលអាចបង្ហាញខ្លួនវ៉ាក់សាំងបានឆាប់ជាងរយៈពេល 12 ឬ 18ខែ ដូចដែលយើងធ្លាប់បាននិយាយគ្នា”

ក្នុងខណៈដែលចំនួនអ្នកឆ្លងមេរោគកូវីដ-19 ទូទាំងពិភពលោកហក់ឡើងលើស 3លាននាក់ បានចាប់ផ្ដើមមានកម្លាំងសម្ពាធកាន់តែធ្ងន់ធ្ងរឡើងៗជារឿយៗចំពោះអ្នកជំនាញការ ឱ្យប្រញាប់រិះរកវិធីព្យាបាល ឬវ៉ាក់សាំងប្រឆាំងនឹងជំងឺរាតត្បាតដ៏ធំនេះ ដោយក្នុងពេលនេះ មានរាប់សិបក្រុមហ៊ុនទូទាំងពិភពលោក កំពុងស្រាវជ្រាវរកវ៉ាក់សាំងព្យាបាលកូវីដ-19 ដែលក្នុងនោះមានក្រុមហ៊ុនសារ៉ូហ្វ៊ិ, ចនសុន អ៊ែនដ៍ ចនសុន និងម៉ូឌើណា អ៊ិងក៍ ជាដើម។

គណៈអ្នកជំនាញការមកពីមហាវិទ្យល័យ អុកស្វ៊ើដ ដែលដឹកនាំដោយលោក សារ៉ាហ្វ ហ្គីលប៊ើក សាស្ត្រាចារ្យផ្នែកវ៉ាក់សាំងវិទ្យា បានចាប់ផ្ដើមសាកល្បងវ៉ាក់សាំងដែលមាននៅក្នុងបណ្ដាញហើយ និងមានគោលដៅទទួលបានលទ្ធផលដែលមានប្រសិទ្ធផលយ៉ាងលឿនបំផុតក្នុងខែកញ្ញា។

អ្នកជំនាញការខ្លះ បានទាមទារឱ្យមានការប្រុងប្រយ័ត្ន ដែលទោះបីជាថា វ៉ាក់សាំងភាគច្រើនត្រូវប្រើពេលវេលាសាកល្បងរយៈពេលរាប់ឆ្នាំ(12-18ខែ) មុននឹងបានដាក់លក់នៅលើទីផ្សារ ដែលរយៈពេលនេះអាចរាប់ថា លឿនបំផុតហើយក៏ដោយ និងថែមទាំងបានដាស់តឿនទៀតថា ការប្រញាប់ប្រញាល់អភិវឌ្ឍវ៉ាក់សាំងប្រឆាំងវីរុសកូរ៉ូណាប្រភេទថ្មី ក្រោមតិចណូឡូជីថ្មីនេះ នៅមិនដែលធ្លាប់បានទទួលការពិសោធថា ប្រើបានលទ្ធផលល្អជាមួយមនុស្សនៅឡើយ។

ក្នុងរឿងនេះ លោកហេចឆេតត៍ បានប្រាប់ថា លោកក៏មិនអាចផ្ដល់ការសន្យាខ្លាំងហួសប្រមាណដែរ តែបានប្រាប់ថា វ៉ាក់សាំងជាច្រើនដែលបានទទួលការគាំទ្រពី CEPI អាចចូលដល់ដំណាក់កាលទី2 នៃការសាកល្បង យ៉ាងលឿនបំផុតក្នុងអំឡុងចុងរដូវស្លឹកឈើលាស់ ឬក្នុងអំឡុងរដូវក្ដៅនេះតែម្ដង។ នោះគឺមានន័យថា វ៉ាក់សាំងដំបូងអាចនឹងកើតមានឡើងក្នុងឆ្នាំ2020នេះ បើសិនជាវាឆ្លងផុតការពិសោធផ្នែកសុវត្ថិភាព និងប្រសិទ្ធផល ដោយជួនកាលក្នុងរយៈដំបូង វាអាចនឹងរួចរាល់សម្រាប់ក្រុមមនុស្សប្រថុយប្រថានមួយចំនួន មុននឹងអាចចូលទៅដល់ក្នុងកម្រិតដែលធំទូលាយជាបន្ត។

លោកថ្លែងថា៖ “អ្នកអភិវឌ្ឍន៍បានផ្ដល់ចំណាប់អារម្មណ៍ទៅលើគំរូផ្សេងៗកន្លងមក ដោយមានការប្រញាប់ប្រញាល់អភិវឌ្ឍយ៉ាងឆាប់រហ័ស តែអកុសល វាបាននាំឆ្ពោះទៅរកលទ្ធផលដែលយ៉ាប់ៗ ដូច្នេះទើបយើងត្រូវធ្វើវាដោយភាពពិតប្រាកដជាទីបំផុត។ យើងមិនអាចធ្វើអ្វី ឱ្យតែរួចៗនោះទេ វាជារឿងសំខាន់បំផុតដែលយើងត្រូវប្រញាប់ធានាពីសុវត្ថិភាព និងប្រសិទ្ធផលរបស់វា”៕

ប្រភព៖ សារព័ត៌មានបរទេស

April 28, 2020

Author: សឿន សំណាង