សឿន សំណាង - La Reine Media

ទីរួមស្រុក1របស់អ៊ីតាលី បោះពុម្ភក្រដាសប្រាក់ដោយឡែក ដើម្បីឱ្យប្រជាជនចាយ បំណងជួយពួកគេឆ្លងកាត់វិបត្តិសុខភាពCovid-19

ទីរួមស្រុកតូចមួយនៅប្រទេសអ៊ីតាលី បានបោះពុម្ភក្រដាសប្រាក់ដោយឡែករបស់ខ្លួន ដើម្បីរួមចំណែកជួយដល់ប្រជាជនក្នុងតំបន់នេះ ដែលពួកគេកំពុងជួបការលំបាកដោយសារផលប៉ះពាល់ពីមេរោគCOVID-19។

ការបោះពុម្ភក្រដាសប្រាក់ដោយឡែកបែបនេះ ជួយឱ្យប្រជាជនប្រមាណជា550នាក់នៅទីរួមស្រុក Castellino del Biferno នៅភាគត្បូងប្រទេសអ៊ីតាលី មានភាពងាយស្រួលក្នុងការទិញដូរសម្ភារសំខាន់ៗក្នុងបណ្ដាហាងទំនិញនៅក្នុងមូលដ្ឋាន។

អភិបាលទីរួមស្រុក Castellino del Biferno លោក Enrico Fratangelo ថ្លែងថា “យើងសម្រេចចិត្តបោះពុម្ភក្រដាសប្រាក់នេះគឺដើម្បីធានាឱ្យសេដ្ឋកិច្ចក្នុងមូលដ្ឋាន អាចទប់ទល់ជាមួយនឹងឥទ្ធិពលរបស់ស្ថានភាពនេះ(វិបត្តិសុខភាព COVID-19)។

ក្រដាសប្រាក់ Ducati ត្រូវបានប្រើប្រាស់ដើម្បីទិញដូរស្បៀងអាហារ និងរបស់របរប្រើប្រាស់ចាំបាច់ផ្សេងទៀតនៅក្នុងហាងទំនិញដែលស្ថិតក្នុងទីរួមស្រុក។ តម្លៃនៃក្រដាសប្រាក់ Ducati នេះ គឺស្មើនឹងតម្លៃក្រដាសប្រាក់ EUR ក្នុងនោះក្រដាសប្រាក់ដែលមានតម្លៃទាបបំផុតគឺ 5Ducati ដែលស្មើនឹង5 EUR។

ទីរួមស្រុក1របស់អ៊ីតាលី បោះពុម្ភក្រដាសប្រាក់ដោយឡែក ដើម្បីជួយប្រជាជនឆ្លងកាត់វិបត្តិសុខភាពCovid-19 — អភិបាលទីរួមស្រុក Castellino del Biferno លោក Enrico Fratangelo

ក្រដាសប្រាក់ Ducati ត្រូវបានបោះពុម្ភនៅក្នុងហាងថតចម្លង(photocopy) ក្នុងទីរួមស្រុក បន្ទាប់មកត្រូវបានក្រុមប្រឹក្សាទីរួមស្រុកបោះត្រាពីលើដើម្បីធានាអំពីតម្លៃរបស់វា។ ការបោះពុម្ភក្រដាសប្រាក់នេះ ពិតជាមានភាពស្របច្បាប់ ព្រោះវាគោរពទៅតាមការកំណត់ដែលត្រូវបានរដ្ឋាភិបាលអ៊ីតាលីអនុម័តយល់ព្រមកាលពីឆ្នាំ2018។

គិតមកដល់បច្ចុប្បន្ន ក្រដាសប្រាក់ Ducati រាប់ពាន់សន្លឹកត្រូវបានបោះពុម្ភ និងចែកចាយដល់ប្រជាជន និងអាជីវករនៅក្នុងទីរួមស្រុក។ រៀងរាល់2សប្ដាហ៍ម្ដង ក្រុមអ្នករកស៊ី និងប្រជាជននឹងយកក្រដាសប្រាក់ Ducati ដែលពួកគេរកបានតាមរយៈការជួញ មកប្រគល់ជូនក្រុមប្រឹក្សាទីរួមស្រុក ហើយពួកគេនឹងទទួលបានក្រដាសប្រាក់ EUR ដែលមានតម្លៃដូចគ្នាត្រឡប់ទៅវិញ។

ទីរួមស្រុក Castellino del Biferno ទទួលបានជំនួយជាថវិកា5,500 EUR ពីរដ្ឋាភិបាលដើម្បីចែកប័ណ្ណទទួលអាហារដល់គ្រួសារក្រីក្រ និងគ្រួសារដែលរងគ្រោះដោយសារ COVID-19។ ទីរួមស្រុកនេះត្រូវប្រើប្រាស់ខ្ទង់ប្រាក់សន្សំ និងបោះពុម្ភក្រដាសប្រាក់ Ducati សម្រាប់ជួយដល់គ្រួសារជាង200 នៅក្នុងទីរួមស្រុក Castellino del Biferno នេះ។

អភិបាលទីរួមស្រុកCastellino del Biferno យល់ថា ក្រៅពីការជួយដល់ពលរដ្ឋក្នុងការទិញដូររបស់របរប្រើប្រាស់ប្រចាំថ្ងៃ ក្រដាសប្រាក់ Ducati នេះ ក៏អាចជួយឱ្យប្រជាជនក្នុងតំបន់មានអារម្មណ៍ល្អ និងស្និទ្ធស្នាលជាមួយនឹងទីកន្លែងដែលពួកគេកំពុងរស់នៅ ដោយអាជ្ញាធរទីរួមស្រុកនេះ បានបោះពុម្ភរូបភាពនានាដែលជានិមិត្តរូបរបស់ទីរួមស្រុក នៅលើក្រដាសប្រាក់ Ducati៕

ប្រភព៖ សារព័ត៌មានបរទេស

April 30, 2020

ស្រីស្អាត Kim Tae Hee រៀបរាប់អំពីជីវិតអាពាហ៍ពិពាហ៍ជាមួយ Rain

Kim Tae Hee ដែលជាកំពូលតារាសម្ដែងរបស់កូរ៉េខាងត្បូង រៀបរាប់ថា បន្ទាប់ពីបានរៀបការជាមួយកំពូលតារាចម្រៀង Rain នាងទទួលបានបទពិសោធន៍ជីវិតយ៉ាងច្រើន ជីវភាពមានការលំបាកខ្លះ ប៉ុន្តែមានសុភមង្គល។

នៅលើទូរទស្សន៍ SBS (Seoul Broadcasting System) កាលពីម្សិលមិញ(29មេសា) ស្រីស្អាតកូរ៉េខាងត្បូង Kim Tae Hee ជាលើកដំបូងបាននិយាយរៀបរាប់អំពីជីវិតអាពាហ៍ពិពាហ៍របស់ខ្លួនជាសាធារណៈ។ Kim Tae Hee ថ្លែងថា “ការរៀបការធ្វើឱ្យយើងយល់ដឹងច្រើនពីជីវិត ការរស់នៅបានល្អជាងមុន ព្រមទាំងធ្វើឱ្យមានអារម្មណ៍ច្រើនប្រភេទ និងពោរពេញដោយបទពិសោធន៍ជីវិត។ល។”។ Kim Tae Hee ប្រាប់ថា ពេលខ្លះត្រូវចួបការលំបាក ប៉ុន្តែដោយមានជំនួយពីក្រុមគ្រួសារ ធ្វើឱ្យនាងមានកម្លាំងចិត្តបន្ថែម និងមិនមានអារម្មណ៍ឯកា។

តារាសម្ដែងស្រីរូបនេះមានបំណងក្លាយជាមិត្តជិតស្និទ្ធរបស់កូនស្រីជាទីស្រឡាញ់ទាំង2រូបរបស់នាង ដើម្បីឱ្យពួកគេមានអារម្មណ៍ស្រួលចិត្ត នៅពេលម្ដាយនិងកូននៅក្បែរគ្នា។ Kim Tae Hee បន្តថា ថ្វីបើរយៈពេល3ឆ្នាំកន្លងទៅហើយដែលនាងមានកូនដំបូង ប៉ុន្តែនាងនៅតែមានអារម្មណ៍ថា ហាក់ដូចជានៅថ្មីៗ ហើយពេលខ្លះក៏មានអារម្មណ៍ថាបានធ្វើរឿងឆ្គាំឆ្គង និងមិនសូវរលូន។

ចាប់តាំងពីខែមីនា Kim Tae Hee បានពឹងញាតិរបស់ខ្លួនឱ្យជួយមើលថែកូនៗ ដើម្បីនាងមានពេលគ្រប់គ្រាន់សម្រាប់ថតខ្សែភាពយន្តថ្មី រឿង Hi Bye Mama។ ខ្សែភាពយន្ត Hi Bye Mamaនេះ បានថតចប់ជាស្ថាពរកាលពីពាក់កណ្ដាលខែមេសា ហើយនាងក៏បានត្រឡប់មកកាន់គ្រួសារវិញហើយដែរ។ ស្រីស្អាត Kim Tae Hee កំពុងត្រៀមខ្លួនដើម្បីថតរឿងថ្មី ដែលនាងគិតថា នាងនឹងបានថតរឿងល្អៗនាពេលខាងមុខ។

ស្រីស្អាត Kim Tae Hee និងកំពូលតារា Jung Ji-hoon(Rain) បានរៀបការយ៉ាងសាមញ្ញកាលពីឆ្នាំ2017 ហើយពួកគេក៏បានទទួលស្វាគមន៍កូនស្រីច្បងរបស់ខ្លួននៅក្នុងឆ្នាំដដែលនេះដែរ។ កំពូលតារាសម្ដែងស្រី Kim Tae Hee បានបង្កើតកូនស្រីទី2 កាលពីខែកញ្ញា ឆ្នាំ2019។ Kim Tae Hee ទទួលបានការសរសើរ និងការគាំទ្រយ៉ាងខ្លាំង ចំពោះខ្សែភាពយន្តមនោសញ្ចេតនាដែលនាងបានសម្ដែង។ ជាងនេះ ឈុតផ្សាយពាណិជ្ជកម្មរបស់នាង ទាក់ទិននឹងគ្រឿងសម្អាង គ្រឿងអលង្ការ សម្ភារគេហដ្ឋានជាដើម ក៏ទទួលបានការសរសើរថា នាងធ្វើបានល្អ នាងនៅតែស្អាត បើទោះបានឈានចូលវ័យ40ឆ្នាំ៕

ប្រភព៖ សារព័ត៌មានបរទេស

April 30, 2020

កូរ៉េខាងត្បូង៖ ជាលើកដំបូងដែលមិនមានករណីឆ្លងCOVID-19ថ្មីក្នុងស្រុក ក្រោយចំណាយពេលអស់2ខែក្នុងការធ្វើ “សង្គ្រាមជីវសាស្ត្រ”

កូរ៉េខាងត្បូងថ្ងៃនេះ បានប្រកាសថា រកឃើញអ្នកជំងឺថ្មីចំនួន4ករណីបន្ថែមទៀត ប៉ុន្តែទាំងនេះសុទ្ធតែជាអ្នកជំងឺ “នាំចូល” (អ្នកជំងឺមកពីបរទេស) ដូច្នេះ ថ្ងៃនេះគឺជាលើកដំបូងហើយដែលកូរ៉េខាងត្បូងមិនមានករណីឆ្លងវីរុសកូរ៉ូណានៅក្នុងស្រុក រាប់ចាប់ពីថ្ងៃទី29មីនាមកដល់បច្ចុប្បន្ន។

មជ្ឈមណ្ឌលគ្រប់គ្រង និងទប់ស្កាត់ជំងឺរបស់កូរ៉េខាងត្បូង KCDC (Korea Centers for Disease Control and Prevention) ថ្ងៃនេះក៏បានឱ្យដឹងថា តួលេខសរុបនៃអ្នកបានឆ្លងវីរុសCOVID-19 ក្នុងប្រទេសនេះ កើនឡើងដល់10,765នាក់ ក្នុងនោះមាន247នាក់បានស្លាប់។ អ្នកស្លាប់កើន1ករណីបើធៀបនឹងម្សិលមិញ។

KCDC បានឱ្យដឹងដែរថា អ្នកជំងឺថ្មីចំនួន4ករណីនេះ ក៏ជាតួលេខទាបបំផុតក្នុងអំឡុង2ខែមកនេះ។ អ្នកជំងឺCOVID-19 ដែលបានជាសះស្បើយនៅកូរ៉េខាងត្បូង មានចំនួន9,059នាក់។

បើទោះបីជាមានសញ្ញាបង្ហាញថា COVID-19 កំពុងថមថយកម្លាំងហើយក្ដី ប៉ុន្តែមន្ត្រីសុខាភិបាលកូរ៉េខាងត្បូងនៅតែបង្ហាញការប្រុងប្រយ័ត្នខ្ពស់ ខណៈដែលទិវាពលកម្មអន្តរជាតិ(1ឧសភា) និងទិវាកុមារកូរ៉េ(5ឧសភា) ជិតចូលមកដល់៕

ប្រភព៖ សារព័ត៌មានបរទេស

April 30, 2020

រុស្ស៊ីចាប់ខ្លួនអតីតប្រធានសមាគមឱសថបុរណវៀតណាម ដែលលក់ថ្នាំបុរាណព្យាបាល COVID-19

Than Duc Tai ជាជនជាតិវៀតណាមរស់នៅក្នុងទីក្រុងម៉ូស្គូ ប្រទេសរុស្ស៊ី ត្រូវបានចាប់ខ្លួន ព្រោះតែបានឃោសនាលក់ឱសថបុរាណដែលខ្លួនបានផ្សំឡើងដើម្បីព្យាបាលអ្នកជំងឺCOVID-19។

សមត្ថកិច្ចរុស្ស៊ី រួមមានក្រុមត្រួតពិនិត្យឱសថ និងក្រុមប៉ូលិស កាលពីថ្ងៃទី27មេសា បានឆ្មក់ចូលត្រួតពិនិត្យគ្លីនិកបុរាណ “Doktor Tai” នៅជាយក្រុងម៉ូស្គូ និងបានចាប់ខ្លួនគ្រូឱសថបុរាណម្នាក់នៅទីនេះ។ នេះបើតាមទូរទស្សន៍ Moskva-24។

ទីភ្នាក់ងារសារព័ត៌មាន MK របស់សម្ព័ន្ធយុវជនកុម្មុយនិស្តម៉ូស្គូ បានឱ្យដឹងថា លោក Than Duc Tai មិនបានបដិសេធអំពីឱសថដែលខ្លួនឃោសនាថាមានប្រសិទ្ធភាពក្នុងការព្យាបាលCOVID-19នោះទេ ប៉ុន្តែថែមទាំងបានអួតថា ខ្លួនធ្លាប់បានប្រើថ្នាំនេះដើម្បីព្យាបាលប្រធានាធិបតីរបស់សាធារណរដ្ឋអាបាខាហ្សី (Abkhazia) ក៏ដូចជាអ្នកជំងឺជាច្រើននៅទីក្រុងម៉ូស្គូ ឱ្យជាសះស្បើយពីជំងឺCOVID-19ទៀតផង។

នៅក្នុងគ្លីនិកបុរាណរបស់ជនជាតិវៀតណាមរូបនេះ គេឃើញមានស្នែងសត្វ ស្មៅ ឫសឈើមិនមានប្រភពច្បាស់លាស់ រួមនឹងឧបករណ៍ដឹកជញ្ជូនធាតុរាវ និងទឹក ដែលបុរសនេះបកស្រាយថា “បានបញ្ចូលអគ្គិសនី” រួចហើយ។

រុស្ស៊ីចាប់ខ្លួនជនជាតិវៀតណាម លក់ឱសថបុរាណព្យាបាល COVID-19 — អំឡុងឆ្នាំ2016 Than Duc Tai ធ្លាប់ធ្វើជាប្រធានសមាគមគ្រូឱសថបុរាណវៀតណាមប្រចាំសហព័ន្ធរុស្ស៊ី

“ឱសថ” ត្រូវបានបុរសនេះផ្សំឡើង និងវេចខ្ចប់នៅក្នុងគ្លីនិកនេះ រួចឃោសនាលក់ក្នុងតម្លៃចាប់ពី7,000-9,000រូប(Russian Rouble) ស្មើនឹង122ដុល្លារអាមេរិក។ ក៏ប៉ុន្តែ លោក Tai មានតែសញ្ញាបត្រទាក់ទិននឹងវិជ្ជាគក់ច្របាច់ និងប្រើម្ជុលវិទ្យាសាស្ត្រតាំងពីឆ្នាំ2009តែប៉ុណ្ណោះ។ សមត្ថកិច្ចបានរឹបអូសយកឱសថបុរាណរបស់បុរសនេះ ដើម្បីធ្វើជាភ័ស្ដុតាង ចំណែកគ្រូថ្នាំបុរាណរូបនេះ អាចត្រូវប្រឈមនឹងការចោទប្រកាន់ពីបទលក់ថ្នាំក្លែងក្លាយ។

កាលពីថ្ងៃទី28មីនា ឆ្នាំ2019 សារព័ត៌មាន Bao Moi របស់វៀតណាម ធ្លាប់បានចេញផ្សាយថា បុរសឈ្មោះ Than Duc Tai ខាងលើនេះ ធ្លាប់ត្រូវបានសមាគមវេជ្ជសាស្ត្រវៀតណាមប្រចាំប្រទេសរុស្ស៊ីរកឃើញថា បានទិញសញ្ញាបត្រក្លែងក្លាយទាក់ទិននឹងមុខរបរពេទ្យរបស់កាត់ផងដែរ។ អំឡុងឆ្នាំ2016 ជនសង្ស័យនេះធ្លាប់ធ្វើជាប្រធានសមាគមគ្រូឱសថបុរាណវៀតណាមប្រចាំសហព័ន្ធរុស្ស៊ីផងដែរ។

រុស្ស៊ី បច្ចុប្បន្នគឺជាសម្បុកមេរោគCOVID-19 ធំជាងគេលំដាប់ទី8ក្នុងពិភពលោក ដោយមានអ្នកជំងឺសរុបជិត100,000នាក់ ក្នុងនោះមានជិត1,000នាក់បានបាត់បង់ជីវិត៕

ប្រភព៖ សារព័ត៌មានបរទេស

April 30, 2020

ឧទ្ធម្ភាគចក្រយោធាកាណាដា បាត់ខ្លួននៅលើលម្ហសមុទ្របរទេស

ឧទ្ធម្ភាគចក្រឈ្លបយកការណ៍ CH-148 បានបាត់ខ្លួនបន្ទាប់ពីបានហោះឡើងពីនាវាចម្បាំងអមការពារ HMCS Frederiction ដែលកំពុងធ្វើសមយុទ្ធនៅលើលម្ហសមុទ្រចន្លោះដែនទឹកក្រិក និងអ៊ីតាលី។

ក្រសួងការពារជាតិកាណាដាថ្ងៃនេះបានចេញសេចក្ដីប្រកាសឱ្យដឹងថា “ឧទ្ធម្ភាគចក្របានបាត់ទំនាក់ទំនងនៅពេលកំពុងចូលរួមសមយុទ្ធយោធានៅលម្ហសមុទ្រប្រទេសក្រិក ក្នុងយុទ្ធនាការ Reassurance”។ ក៏ប៉ុន្តែ សេចក្ដីប្រកាសនេះមិនបានឱ្យដឹងអំពីចំនួនមនុស្សដែលជិះនៅលើឧទ្ធម្ភាគចក្រនេះនោះទេ។

ប្រភពព័ត៌មានពីកងទ័ពក្រិក ឱ្យដឹងថា ឧទ្ធម្ភាគចក្រដែលបានបាត់ខ្លួននេះ មានដឹកមនុស្ស6នាក់ ខណៈកំពុងហោះឆ្វែលត្រួតពិនិត្យលើផ្ទៃសមុទ្រចម្ងាយ93គមពីកោះ Cephalonia ដែលស្ថិតក្រៅការគ្រប់គ្រងរបស់ប្រទេសក្រិក។ ក្រសួងការពារជាតិប្រទេសក្រិកបានត្រៀមជាស្រេចដើម្បីជួយស្វែងរក បើសិនជាមានការស្នើពីភាគីអ៊ីតាលី។

អ្នកនាំពាក្យនៃបញ្ជាការដ្ឋានកំពូលរបស់សម្ព័ន្ធមិត្តអឺរ៉ុប(SHAPE) ដែលជាអង្គភាពចាត់ចែងរាល់យុទ្ធនាការយោធារបស់ NATO បានទទួលស្គាល់ហេតុការណ៍នេះ។ អ្នកនាំពាក្យរូបនេះ ថ្លែងថា “ការស្វែងរក និងសង្គ្រោះកំពុងធ្វើឡើង ចំណែកប្រទេសម្ចាស់ឧទ្ធម្ភាគចក្រក៏ត្រូវបានជូនដំណឹងរួចរាល់ហើយ”។

សូមបញ្ជាក់ថា សមយុទ្ធខាងលើនេះត្រូវបានធ្វើឡើងនៅលើលម្ហសមុទ្រ Ionian ដែលស្ថិតនៅចន្លោះដែនសមុទ្រអ៊ីតាលី និងក្រិក ដោយមានការចូលរួមពីបណ្ដាប្រទេសក្នុងអង្គការ NATO។ នាវាចម្បាំងអ៊ីតាលី និងទួរគី បានចាកចេញពីតំបន់សមុទ្រក្រិក ឆ្ពោះទៅកាន់លម្ហសមុទ្រអ៊ីតាលីកាលពីថ្ងៃទី29មេសា៕

ប្រភព៖ សារព័ត៌មានបរទេស

April 30, 2020

ទូទាំងសកលលោកមានមនុស្សជាង227,000នាក់ស្លាប់ដោយសារវីរុសCOVID-19

ពិភពលោកទាំងមូល មានអ្នកស្លាប់ជាង227,000នាក់ ក្នុងចំណោមអ្នកជំងឺCOVID-19 ជិត3.2នាក់ ក្នុងនោះតំបន់អឺរ៉ុប និងអាមេរិកខាងជើង រងគ្រោះធ្ងន់ធ្ងរជាងគេបំផុត។

ទិន្នន័យពីសាកលវិទ្យាល័យ Johns Hopkins បានឱ្យដឹងថា ប្រទេស និងដែនដីចំនួន210ក្នុងពិភពលោក បានរកឃើញអ្នកជំងឺCOVID-19 ចំនួន3,187,919នាក់ ក្នុងនោះមានអ្នកស្លាប់សរុប227,177នាក់។ អ្នកជំងឺថ្មីមានចំនួន76,189នាក់ និងអ្នកស្លាប់ថ្មីមានចំនួន10,320នាក់ក្នុងអំឡុង24ម៉ោងចុងក្រោយនេះ។ អ្នកជំងឺដែលបានជាសះស្បើយ មានចំនួនជិត1លាននាក់។

គិតមកដល់ព្រឹកថ្ងៃទី30មេសានេះ ទំព័រ WorldOMeters បានឱ្យដឹងថា តំបន់ដែលមានអ្នកជំងឺCOVID-19 ច្រើនជាងគេគឺទ្វីបអឺរ៉ុប ដោយមានអ្នកជំងឺសរុប1,347,380នាក់ ខណៈតំបន់អាមេរិកខាងជើងមាន1,150,083នាក់ អាស៊ីមាន507,328នាក់ អាមេរិកខាងត្បូងមាន165,812នាក់ និងអាហ្វ្រិកមាន37,663នាក់។

ប្រទេសដែលមានអ្នកជំងឺCOVID-19 ច្រើនជាងគេ នៅតែជាសហរដ្ឋអាមេរិក ដោយមានអ្នកជំងឺសរុប1,037,526នាក់ ក្នុងនោះមានអ្នកស្លាប់សរុប60,846នាក់។ អ្នកជំងឺថ្មីនៅប្រទេសនេះមាន25,926នាក់ និងអ្នកស្លាប់ថ្មីមាន2,503នាក់។

អេស្ប៉ាញ៖ អ្នកជំងឺថ្មី4,771នាក់ និងអ្នកស្លាប់ថ្មី453នាក់។ អ្នកជំងឺសរុបនៅប្រទេសនេះមាន 236,899នាក់ និងអ្នកស្លាប់សរុប24,275នាក់។

អ៊ីតាលី៖ អ្នកជំងឺថ្មី2,086នាក់ និងអ្នកស្លាប់ថ្មី323នាក់។ អ្នកជំងឺសរុប203,591នាក់ និងអ្នកស្លាប់សរុប27,682នាក់៕

ប្រភព៖ សារព័ត៌មានបរទេស

April 30, 2020

សហរដ្ឋអាមេរិក៖ ជាង61,000នាក់ស្លាប់ដោយសារCOVID-19! សេដ្ឋកិច្ចដាំក្បាលចុះខ្លាំង

COVID-19 បានសម្លាប់មនុស្សជាង61,000នាក់នៅសហរដ្ឋអាមេរិក និងបានធ្វើឱ្យសេដ្ឋកិច្ចដាំក្បាលចុះយ៉ាងឆាប់រហ័ស និងធ្ងន់ធ្ងរបំផុត រាប់ចាប់ពីវិបត្តិហិរញ្ញវត្ថុកាលពីឆ្នាំ2008។

យោងតាមទិន្នន័យនៅលើទំព័រ Worldometers គិតមកដល់ពេលនេះ សហរដ្ឋអាមេរិកមានអ្នកស្លាប់ថ្មីដោយសារ COVID-19 ជាង1,900នាក់បន្ថែមទៀត នាំឱ្យអ្នកស្លាប់សរុបដោយសារវីរុសនេះឡើងដល់61,180នាក់។ ក្នុងអំឡុង24ម៉ោងចុងក្រោយនេះ សហរដ្ឋអាមេរិកក៏បានរកឃើញអ្នកជំងឺកូរ៉ូណាថ្មីប្រមាណជាជិត21,000នាក់ ធ្វើឱ្យអ្នកជំងឺសរុបកើនដល់ជិត1,06លាននាក់។

តួលេខអំពីអ្នកស្លាប់ដោយសារCOVID-19 នៅសហរដ្ឋអាមេរិក ប្រហាក់ប្រហែលទៅនឹងតួលេខអ្នកស្លាប់ដោយជំងឺផ្ដាសាយរដូវ(seasonal influenza (flu) នៅប្រទេសនេះកាលពីឆ្នាំ2017-2018។ ក្រុមអ្នកជំនាញព្យាករថា ចំនួនអ្នកស្លាប់ដោយសារCOVID-19 នៅសហរដ្ឋអាមេរិកអាចកើនដល់74,000នាក់នៅដើមខែសីហាខាងមុខ។

COVID-19 ចាប់ផ្ដើមផ្ទុះឆ្លងរាលដាលនៅសហរដ្ឋអាមេរិកចាប់ពីចុងខែមករា ឆ្នាំ2020 បានធ្វើឱ្យប៉ះពាល់យ៉ាងធ្ងន់ធ្ងរដល់សេដ្ឋកិច្ចប្រទេសនេះ។ យោងតាមទិន្នន័យដែលទើបត្រូវបានប្រកាស ក្រសួងពាណិជ្ជកម្មសហរដ្ឋអាមេរិកបានឱ្យដឹងថា GDP ក្នុងត្រីមាសទី1របស់ប្រទេសនេះ បានធ្លាក់ចុះ4.8% ដែលនេះបានបង្ហាញថា សេដ្ឋកិច្ចបានដាំក្បាលចុះខ្លាំងបំផុតចាប់ពីវិបត្តិហិរញ្ញវត្ថុឆ្នាំ2008។

ប្រធាននាយកដ្ឋាននៃប្រព័ន្ធបម្រុងសហរដ្ឋអាមេរិក(Fed) កាលពីម្សិលមិញបានព្រមានថា “យើងនឹងអាចឃើញតួលេខសេដ្ឋកិច្ចក្នុងត្រីមាសទី2 អាក្រក់ជាងពេលណាៗទាំងអស់”។ មន្ត្រីរូបនេះសង្កត់ធ្ងន់ថា ដំណើរការនៃការងើបឡើងវិញរបស់សេដ្ឋកិច្ច នឹងស៊ីពេលយ៉ាងយូរ និងមានឧបសគ្គច្រើន ប៉ុន្តែក៏អាចងើបឡើងវិញបន្តិចម្ដងៗនៅត្រីមាសទី3 នៅពេលដែលបណ្ដាក្រុមហ៊ុន អាជីវកម្មចាប់បើកដំណើរការឡើងវិញ។

ព័ត៌មានខាងលើត្រូវបានលើកឡើង ក្នុងពេលដែលរដ្ឋនានារបស់សហរដ្ឋអាមេរិក បានចាប់ផ្ដើមបន្ធូរបន្ថយការរឹតត្បិតលើការដើរហើរ និងអនុញ្ញាតឱ្យក្រុមហ៊ុន អាជីវកម្មមួយចំនួនដំណើរការឡើងវិញ។ ប៉ុន្តែ ប្រការនេះក៏ត្រូវបានអ្នកជំនាញព្យាករថា អាចធ្វើឱ្យ COVID-19 ងើបក្បាលឡើងវិញផងដែរ។

វិបត្តិសុខភាពនេះ បានបណ្ដាលឱ្យមនុស្សប្រមាណជា27លាននាក់នៅសហរដ្ឋអាមេរិក បាត់បង់ការងារធ្វើ។ Kevin Hassett ដែលជាទីប្រឹក្សាសេដ្ឋកិច្ចរបស់ប្រធានាធិបតី Trump កាលពីថ្ងៃទី26មេសា បានឱ្យដឹងថា អត្រានៃអ្នកបាត់បង់ការងារឡើងដល់16% ឬខ្ពស់ជាងនេះនៅក្នុងខែមេសា និង “អាក្រក់ជាងនេះ” ក្នុងពេលខាងមុខ៕

ប្រភព៖ សារព័ត៌មានបរទេស

April 30, 2020

ឆេះការដ្ឋានសំណាង់អគារ4ជាន់ សម្លាប់មនុស្ស38នាក់

កូរ៉េខាងត្បូង៖ ករណីអគ្គិភ័យឆេះសំណង់អគារឃ្លាំងកំពស់4ជាន់នៅតំបន់ Icheon បណ្ដាលឱ្យមានមនុស្សស្លាប់យ៉ាងតិច38នាក់ និង10នាក់ផ្សេងទៀតរងរបួស។

ហេតុការណ៍អគ្គិភ័យខាងលើនេះ បានកើតឡើងនៅវេលាម៉ោង13និង32នាទី(ម៉ោង11និង30នាទីនៅភ្នំពេញ) នាថ្ងៃនេះ នៅតំបន់ Icheon ដែលមានចម្ងាយប្រហែល80គម ភាគអាគ្នេយ៍រដ្ឋធានី Seoul។ កម្មករប្រមាណជា78នាក់កំពុងបំពេញការងារនៅជាន់ក្រោមដីរបស់អគារនេះ ខណៈពេលអគ្គិភ័យកំពុងកើតឡើង។ កងកម្លាំងពន្លត់អគ្គិភ័យ និងក្រុមសង្គ្រោះបន្ទាន់ចំនួន410 ត្រូវបានបញ្ជូនទៅកាន់កន្លែងកើតហេតុ និងបានគ្រប់គ្រងស្ថានការណ៍នៅវេលាម៉ោង18និង42នាទី ត្រូវនឹងម៉ោង16និង40នាទីនៅកម្ពុជា។

សមត្ថកិច្ចសង្ស័យថា ហេតុការណ៍នេះកើតឡើងដោយសារការផ្ទុះមួយទាក់ទិននឹងការដំឡើងជណ្ដើរយន្តដឹកទំនិញពីជាន់ក្រោមដី និង urethane ដែលជាសារធាតុគីមីងាយឆាបឆេះ ប្រើសម្រាប់ការពារកម្ដៅ។ ជនរងគ្រោះដែលនៅមានជីវិតយល់ថា កន្ទុយបារីអាចជាមូលហេតុនៃហេតុការណ៍ដ៏អាក្រក់នេះ។

ប្រធានាធិបតី Moon Jae-in បានបញ្ជាឱ្យក្រុមមន្ត្រីរដ្ឋាភិបាល ប្រើប្រាស់គ្រប់មធ្យោបាយដើម្បីជួយសង្គ្រោះជនរងគ្រោះក្នុងករណីនេះ។

គួររំឭកថា កាលពី2ឆ្នាំមុន អគ្គិភ័យមួយក៏បានកើតឡើងនៅក្នុងមជ្ឈមណ្ឌលហាត់ប្រាណមួយកន្លែងនៅតំបន់ Jecheon បណ្ដាលឱ្យមនុស្ស29នាក់បានស្លាប់ ហើយ1ខែក្រោយ បន្ទាប់ពីហេតុការណ៍នេះ ក៏មានអគ្គិភ័យ1ទៀតបានកើតឡើងនៅក្នុងមន្ទីរពេទ្យ1នៅទីក្រុង Miryang ដែលបានសម្លាប់មនុស្ស41នាក់ផងដែរ៕

ប្រភព៖ សារព័ត៌មានបរទេស

April 29, 2020

ឥស្លាមសាសនិករាប់រយនាក់នៅឥណ្ឌូនេស៊ី ប្រជ្រៀតគ្នាអង្គុយបួងសួងកណ្ដាលCOVID-19 ដោយមិនបានពាក់ម៉ាស់

ឥស្លាមសាសនិករាប់រយនាក់ បានអង្គុយប្រជ្រៀតគ្នានៅក្នុងពិធីបុណ្យបួងសូង Ramadan នៅឯវិហារ Baiturrahman នៃប្រទេសឥណ្ឌានេស៊ី បើទោះជាមានការព្រួយបារម្ភអំពីវីរុសCOVID-19យ៉ាងណាក៏ដោយ។

សាសនិកទាំងនេះបាននាំគ្នាលាងសម្អាតដៃដើម្បីកាត់បន្ថយការឆ្លងរាលដាលមេរោគកូរ៉ូណានៅមុនពេលចាប់ផ្ដើមបួងសួងនៅឯវិហារ Baiturrahman Grand ក្នុងទីក្រុង Banda Aceh នៃខេត្ត Aceh កាលពីទី28មេសា។ ពួកគេបានពាក់ម៉ាស់គ្រប់គ្នាក្នុងពេលធ្វើដំណើរមកកាន់វិហារ ក៏ប៉ុន្តែ នៅពេលសូត្រធម៌បួងសួង ពួកគេបែរជាដោះម៉ាស់ចេញទាំងអស់គ្នាទៅវិញ។

Umar ជាអ្នកកាន់សាសនាឥស្លាមម្នាក់ដែលបានមកចូលរួមពិធីបុណ្យនេះនិយាយថា “ខ្ញុំមានអារម្មណ៍ថា ដូចជាមិនបានធ្វើអ្វីមួយពេញលេញ បើសិនមិនបានមកបួងសួងនៅវិហារនេះ”។ Umar ថា គាត់សម្រេចចិត្តមកចូលរួមបួងសួងនឹងគេដែរ ប៉ុន្តែគាត់ថា គាត់ត្រូវតែពាក់ម៉ាស់ដើម្បីគោរពតាមការណែនាំរបស់រដ្ឋាភិបាល។

ទិដ្ឋភាពនេះផ្ទុយស្រឡះពីពិធីបុណ្យ Ramadan កាលពីពេលកន្លងមក ដោយសារវិហារនៅ Banda Acehនេះ កាលពីឆ្នាំមុនៗគឺមានសាសនិករាប់ពាន់នាក់ចូលមកបួងសួង ហើយមនុស្សរាប់ពាន់នាក់ត្រូវនៅខាងក្រៅវិហារ។ ចំណែកឆ្នាំនេះ មានសាសនិកមកចូលរួមប្រហែលត្រឹម400នាក់ប៉ុណ្ណោះ។ ពួកគេមិនប្រជ្រៀតគ្នា ប៉ុន្តែក៏មិនបានរក្សាគំលាតពីគ្នាទៅតាមវិធានទប់ស្កាត់ COVID-19 របស់រដ្ឋាភិបាលនោះដែរ។

ក្រសួងកិច្ចការសាសនរបស់ឥណ្ឌូនេស៊ី បានចេញសេចក្ដីណែនាំឱ្យពលរដ្ឋធ្វើការបួងសួងនៅឯផ្ទះ ទន្ទឹមនឹងការណែនាំឱ្យធ្វើការពីចម្ងាយ។ ក្រុមប្រឹក្សា Ulema ដែលស្ថាប័នជាតិគ្រប់គ្រងឥស្លាមសាសនារបស់ប្រទេសនេះ ក៏បានហាមមិនឱ្យក្រុមសាសនិកប្រមូលផ្ដុំគ្នាដើម្បីបួងសួងនៅតំបន់ដែលមានវត្តមានរបស់ COVID-19 នោះឡើយ។ ក៏ប៉ុន្តែ បម្រាមនេះហាក់មិនមានប្រសិទ្ធភាព។

ឥណ្ឌូនេស៊ីគឺជាសម្បុកមេរោគកូរ៉ូណាCOVID-19 ធំជាងគេលំដាប់ទី2នៅអាស៊ីអាគ្នេយ៍ ប៉ុន្តែប្រទេសនេះមានអត្រាស្លាប់ដោយសារវីរុសនេះខ្ពស់ជាងគេបង្អស់។ ឥណ្ឌូនេស៊ី មានអ្នកជំងឺ COVID-19 សរុបជាង9,500នាក់ ក្នុងនោះមាន775នាក់បានស្លាប់។ ទីក្រុងJakarta មានអ្នកស្លាប់ដល់ទៅជាង370នាក់ ក្នុងចំណោមអ្នកជំងឺជាង4,000នាក់៕

ប្រភព៖ សារព័ត៌មានបរទេស

April 29, 2020

លោកត្រាំ លេងមែនទែន!! បញ្ជាកងទ័ពជើងទឹកឱ្យបាញ់ពន្លិចនាវាប្រដេញរបស់អ៊ីរ៉ង់ បើចូលមករំខាននាវាចម្បាំងរបស់សហរដ្ឋអាមេរិក…

ទីភ្នាក់ងារព័ត៌មាន CNN បានរាយការណ៍ថា លោកប្រធានាធិបតី ដូណាល់ ត្រាំ បានសរសេរនៅក្នុងធ្វីតធើរកាលពីចុងសប្ដាហ៍កន្លងទៅ ដោយបានបញ្ជាក់ថា លោកបានបញ្ជាឱ្យកងទ័ពជើងទឹកនៃសហរដ្ឋអាមេរិក បាញ់ និងកម្ទេចនាវាណាក៏ដោយរបស់អ៊ីរ៉ង់ បើសិននាវាទាំងនោះចូលមករំខាន ឬរករឿងនាវារបស់សហរដ្ឋអាមេរិកនៅក្នុងដែនសមុទ្រ។

សំណេររបស់លោកត្រាំនៅក្នុងធ្វីតធើរនេះ បានកើតមានឡើងបន្ទាប់ពីកងទ័ពជើងទឹកសហរដ្ឋអាមេរិក បានផ្សព្វផ្សាយឃ្លីបវីដេអូមួយដែលបង្ហាញឱ្យឃើញនាវាប្រដេញចំនួន 11គ្រឿងរបស់កងកម្លាំងការពារការបដិវត្តអ៊ីរ៉ង់ ឬIRGC បានបើកចូលមកក្បែរនាវារបស់កងទ័ពសហរដ្ឋអាមេរិក និងអង្គភាពការពារដែនសមុទ្រក្នុងរយៈចម្ងាយដ៏គ្រោះថ្នាក់បំផុត ខណៈកំពុងធ្វើដំណើរនៅក្នុងឈូងសមុទ្រពែក្ស៍ ធ្វើឱ្យសហរដ្ឋអាមេរិក ថ្លែងថ្កោលទោសថា ជាទង្វើដែលបង្កគ្រោះថ្នាក់ និងពន្យុះសង្គ្រាម។

យ៉ាងណាក៏ដោយ នៅមិនទាន់ច្បាស់ប្រាកដថា បញ្ជាចុងក្រោយបំផុតរបស់លោកប្រធានាធិបតី ត្រាំ នឹងក្លាយជាច្បាប់ដែលត្រូវតម្កល់ទុកប្រចាំកងទ័ពជើងទឹក ឬយ៉ាងណានោះទេ និងថែមទាំងមិនទាន់ប្រាកដច្បាស់ថា ទីបញ្ជាការជាន់ខ្ពស់ ដែលមានតួនាទីគ្រប់គ្រងប្រតិបត្តិការនៅក្នុងតំបន់មជ្ឈិមបូព៌ា នឹងបញ្ជាឱ្យបាញ់នាវារបស់អ៊ីរ៉ង់ ឬយ៉ាងណានៅឡើយដែរ។ តែបញ្ជាបែបនេះ អាចធ្វើឱ្យភាពតានតឹងរវាងសហរដ្ឋអាមេរិក នឹងអ៊ីរ៉ង់ ដែលប៊ិះនឹងកើតមានសង្គ្រាមកាលពីអំឡុងដើមឆ្នាំនោះ កាន់តែអាក្រក់ឡើងទៅទៀត។

Caption រូបភាពដែលផ្សព្វផ្សាយដោយកងទ័ពជើងទឹកសហរដ្ឋអាមេរិក បានបង្ហាញឱ្យឃើញនាវាប្រដេញរបស់កងទ័ពអ៊ីរ៉ង់បើកមកប្រកៀកនាវាចម្បាំង USS Paul Hamilton និងនាវាផ្សេងៗទៀតរបស់សហរដ្ឋអាមេរិក ក្នុងរយៈចម្ងាយអសុវត្ថិភាព កាលពីថ្ងៃទី15 មេសាកន្លងទៅ…

ចំណែកអ្នកនាំពាក្យរបស់ IRGC បានចេញមកឆ្លើយតបធ្វីតធើររបស់លោកត្រាំថា “ជំនួសឱ្យការ ចង់មករំលោភអ្នកដទៃដូចថ្ងៃនេះហើយ ពួកអាមេរិកាំង គួរតែខំប្រឹងព្យាយាមដើម្បីជួយបុគ្គលិកកងទ័ពរបស់ខ្លួនឯងដែលឆ្លងមេរោគវីរុសកូរ៉ូណាឱ្យជាសះស្បើយវិញ ប្រសើរជាង”៕

ប្រភព៖ សារព័ត៌មានបរទេស

April 29, 2020

Author: សឿន សំណាង