សឿន សំណាង - La Reine Media

លោក Trump “ជឿជាក់” ថា ចុងឆ្នាំនឹងមានវ៉ាក់សាំង COVID-19

ប្រធានាធិបតីអាមេរិកាំង លោក Donald Trump កាលពីថ្ងៃទី3ឧសភា បានឱ្យដឹងថា លោក “ជឿជាក់” ថា សហរដ្ឋអាមេរិកនឹងមានវ៉ាក់សាំងទប់ស្កាត់វីរុសCOVID-19 នៅមុនដំណាច់ឆ្នាំនេះ។

លោក Trump សង្កត់ធ្ងន់ថា ក្រុមហ៊ុនជាច្រើនកំពុងប្រឹងប្រែងស្រាវជ្រាវ និងពិសោធវ៉ាក់សាំង ហើយពួកគេជិតទទួលបានជោគជ័យក្នុងការអភិវឌ្ឍវ៉ាក់សាំងនេះហើយ។ “ខ្ញុំគិតថា យើងនឹងមានវ៉ាក់សាំងក្នុងពេលឆាប់ៗនេះ” ប្រធានាធិបតីអាមេរិកាំងមានប្រសាសន៍បែបនេះជាមួយអ្នកយកព័ត៌មានរបស់ Fox News។

សហរដ្ឋអាមរិក និងបណ្ដាប្រទេសក្នុងពិភពលោក កំពុងតែប្រជែងគ្នាដើម្បីក្លាយជាអ្នកដំបូងគេដែលមានវ៉ាក់សាំងប្រឆាំងវីរុសCOVID-19។ ម្ចាស់សេតវិមានបានប្រកាសថា លោកនៅតែត្រេកអរជាទីបំផុតបើសិនក្រុមអ្នកស្រាវជ្រាវអាមេរិកាំង ត្រូវបានគេធ្វើឱ្យបរាជ័យក្នុងការប្រជែងលើការអភិវឌ្ឍថ្នាំសម្រាប់វីរុសCOVID-19។

លោក Trump ឱ្យដឹងថា “បើសិនប្រទេសណាមួយទទួលបានជោគជ័យមុនគេ ខ្ញុំនឹងដោះមួកគោរពកោតសរសើរ។ ខ្ញុំមិនខ្វល់អ្វីទាំងអស់ ខ្ញុំគ្រាន់តែចង់បានវ៉ាក់សាំងមួយដែលមានប្រសិទ្ធភាព”។

នៅពេលត្រូវបានសួរអំពីហានិភ័យដែលកើតឡើងចំពោះមនុស្សក្នុងការអភិវឌ្ឍវ៉ាក់សាំងតាមបែបប្រញាប់ប្រញាល់ខុសធម្មតាដូចបច្ចុប្បន្ន លោក Trump អះអាងថា អ្នកដែលបានចូលរួមក្នុងការពិសោធ គឺសុទ្ធតែជាអ្នកស្ម័គ្រចិត្ត។ លោកថា “ពួកគេដឹងនូវអ្វីដែលពួកគេកំពុងតែធ្វើ”។

សហរដ្ឋអាមេរិកបច្ចុប្បន្នគឺជាសម្បុកមេរោគធំជាងគេក្នុងពិភពលោក ដោយមានអ្នកជំងឺកូរ៉ូណាសរុបជិត1.2លាននាក់ ក្នុងនោះមានអ្នកជំងឺជិត69,000នាក់បានបាត់បង់ជីវិត ខណៈរដ្ឋប្រហែលពាក់កណ្ដាលនៃប្រទេសនេះ បានបន្ធូរបន្ថយការរឹតត្បិតលើការដើរហើរ។ ប៉ុន្តែ រដ្ឋមួយចំនួនក៏នៅតែមានការប្រុងប្រយ័ត្នខ្ពស់ចំពោះវីរុសនេះនៅឡើយ។

COVID-19 បានបង្ហាញខ្លួននៅប្រទេសចិនកាលពីចុងឆ្នាំ2019 ហើយមកដល់បច្ចុប្បន្ន វាមានវត្តមាននៅក្នុងប្រទេស និងដែនដីជាង200ក្នុងពិភពលោក បណ្ដាលឱ្យមានមនុស្សជិត3.6លាននាក់ត្រូវឆ្លងមេរោគ ក្នុងនោះមានជិត250,000នាក់បានបាត់បង់ជីវិត និងជាង1.1លាននាក់បានរួចផុតពីការស្លាប់៕

ប្រភព៖ សារព័ត៌មានបរទេស

May 4, 2020

Mike Pompeo៖ មានភ័ស្ដុតាងបង្ហាញថា COVID-19 មានប្រភពពីមន្ទីរពិសោធន៍នៅ Wuhan

រដ្ឋមន្ត្រីក្រសួងការបរទេសអាមេរិកាំង លោក Mike Pompeo កាលពីល្ងាចម្សិលមិញបានប្រកាសថា “មានភ័ស្ដុតាងធំ” បង្ហាញថា វីរុសCOVID-19 មានប្រភពពីមន្ទីរពិសោធន៍មួយនៅក្នុងទីក្រុង Wuhan ខេត្ត Hubei ប្រទេសចិន។

“មានភ័ស្ដុតាងយ៉ាងធំបញ្ជាក់ថា នោះគឺជាកន្លែងដែលវីរុសបង្ហាញខ្លួន” លោក Pompeo ថ្លែងនៅក្នុងកម្មវិធី “This Week” របស់ទូរទស្សន៍ ABC បែបនេះ។ រដ្ឋមន្ត្រីការបរទេសអាមេរិកាំងរូបនេះបន្តថា “ខ្ញុំគិតថា ពេលនេះពិភពលោកអាចមើលឃើញហើយថា ប្រទេសចិនមានប្រវត្តិចម្លងមេរោគដល់ពិភពលោក ហើយពួកគេគ្រប់គ្រងបន្ទប់ពិសោធន៍ដោយមិនមានស្តង់ដា”។

បើទោះជាបាន និងកំពុងរិះគន់យ៉ាងចាស់ដៃទៅលើវិធីដែលប្រទេសចិនប្រើប្រាស់ក្នុងការទប់ស្កាត់វីរុសCOVID-19 ប៉ុន្តែ រដ្ឋមន្ត្រី Pompeo បានបដិសេធមិនបញ្ចេញមតិអំពីលទ្ធភាពដែលថាប្រទេសចិនបានបញ្ចេញវីរុសនេះដោយចេតនានោះដែរ។ លោកបានសង្កត់ធ្ងន់ថា ការដែលប្រទេសចិនរកវិធីលាក់បាំងភាពធ្ងន់ធ្ងររបស់រោគរាតត្បាតនៅក្នុងដំណាក់កាលដំបូង បានធ្វើឱ្យមាន “ហានិភ័យធំធេង” ដល់ពិភពលោក។ រដ្ឋមន្ត្រីការបរទេសអាមេរិកាំងបានប្រកាសថា “ប្រធានាធិបតី Trump មានប្រសាសន៍យ៉ាងច្បាស់ថា យើងនឹងធ្វើឱ្យអ្នកដែលត្រូវទទួលខុសត្រូវ ត្រូវតែចេញមកទទួលកំហុស”។

ប្រធានាធិបតីសហរដ្ឋអាមេរិក Donald Trump តែងតែរិះគន់ទៅលើតួនាទីរបស់ប្រទេសចិននៅក្នុងបញ្ហាវិបត្តិសុខភាពដែលបង្កឡើងដោយវីរុសCOVID-19។ លោកអះអាងថា ទីក្រុងប៉េកាំងបានលាក់បាំងដោយមិនមានការពិចារណានូវព័ត៌មានសំខាន់អំពី COVID-19។ ទន្ទឹមនឹងនេះ លោក Trump ក៏បានទាមទារឱ្យប្រទេសចិន “ត្រូវតែទទួលខុសត្រូវ” ចំពោះទង្វើនេះ។

យោងតាមប្រភពព័ត៌មានមួយចំនួនបានឱ្យដឹងថា ប្រធានាធិបតីអាមេរិកាំង បានប្រគល់ភារកិច្ចក្នុងការស៊ើបអង្កេតលើបញ្ហាប្រភពនៃវីរុសកូរ៉ូណាថ្មីនេះទៅឱ្យក្រុមចារបុរសអាមេរិកាំង ដែលវីរុសនេះ ដំបូងឡើយត្រូវបានគេជឿថា បានចាប់ផ្ដើមឆ្លងចេញពីផ្សារលក់សត្វព្រៃរស់នៅក្នុងទីក្រុង Wuhan ប្រទេសចិន ក៏ប៉ុន្តែបច្ចុប្បន្ន វីរុសនេះត្រូវបានសង្ស័យថា ជាផលិតផលដែលចេញពីមន្ទីរពិសោធន៍។

វិទ្យាស្ថានវីរុសសាស្ត្រ Wuhan ដែលស្ថិតនៅក្នុងទីក្រុង Wuhan ជាទីកន្លែងបង្ហាញខ្លួនដំបូងរបស់វីរុសCOVID-19 បានបដិសេធចំពោះការសង្ស័យដែលថា វីរុសនេះបានឆ្លងចេញពីមន្ទីរពិសោធន៍របស់ខ្លួន។ អ្នកជំនាញភាគច្រើនយល់ថា វីរុសនេះ មានប្រភពពីសត្វព្រៃ ហើយសត្វប្រចៀវ និងពង្រូលត្រូវគេគិតថាជាសត្វចម្លងរោគ។

វីរុសCOVID-19 បានចាប់ផ្ដើមឆ្លងរាលដាលនៅប្រទេសចិន កាលពីខែធ្នូ2019 ដែលមកដល់បច្ចុប្បន្ន វាបានសម្លាប់មនុស្សយ៉ាងតិច245,000នាក់ ក្នុងចំណោមអ្នកជំងឺជាង1.1លាននាក់ នៅទូទាំងសកលលោក៕

ប្រភព៖ សារព័ត៌មានបរទេស

May 4, 2020

ជិត3.6លាននាក់ឆ្លងវីរុសCOVID-19 នៅទូទាំងពិភពលោក ក្នុងនោះមាន9ប្រទេសដែលមានអ្នកជំងឺលើសពី100,000នាក់

វីរុសCOVID-19 បានបង្កឱ្យមនុស្សស្លាប់យ៉ាងតិច248,000នាក់ ក្នុងចំណោមអ្នកជំងឺជិត3.6លាននាក់នៅក្នុងសកលលោកទាំងមូល។

ប្រទេស និងដែនដីចំនួន212ក្នុងពិភពលោក គិតមកដល់ថ្ងៃនេះ មានមនុស្សយ៉ាងតិច3,561,887នាក់បានឆ្លងមេរោគកូរ៉ូណាថ្មី ក្នុងនោះមានអ្នកជំងឺ248,084នាក់បានស្លាប់។ ពិភពលោកថ្ងៃនេះក៏បានរកឃើញអ្នកជំងឺថ្មី83,735នាក់ និងអ្នកស្លាប់ថ្មីចំនួន3,623នាក់។ ចំនួនអ្នកជំងឺដែលបានជាសះស្បើយ បានឡើងដល់1,152,993នាក់។ នេះបើតាមទំព័រ WorldoMeters។

ទ្វីបអាមេរិកនៅតែជាសម្បុកមេរោគធំជាងគេបង្អស់ក្នុងពិភពលោក ក្នុងនោះអាមេរិកខាងជើងមានអ្នកជំងឺសរុប1,290,469នាក់ អាមេរិកខាងត្បូងមាន211,800នាក់ ទ្វីបអឺរ៉ុបមាន1,447,503នាក់ ទ្វីបអាស៊ីមាន558,496នាក់ និងទ្វីបអាហ្វ្រិកមាន45,380នាក់។

សហរដ្ឋអាមេរិកក៏នៅតែជាសម្បុកមេរោគកូរ៉ូណាថ្មី ធំបំផុតក្នុងសកលលោក ដោយមានអ្នកជំងឺសរុប1,187,035នាក់ កើន26,261នាក់ធៀបនឹងម្សិលមិញ។ ប្រទេសនេះក៏មានអ្នកស្លាប់ថ្មីចំនួន1,115នាក់ ធ្វើឱ្យតួលេខនៃអ្នកស្លាប់សរុបដោយសារ COVID-19 កើនដល់68,559នាក់។

ចំណែកអេស្ប៉ាញវិញ មានអ្នកជំងឺកូរ៉ូណាសរុប247,122នាក់ ខណៈប្រទេសអ៊ីតាលីមាន210,717នាក់ អង់គ្លេសមាន186,599នាក់ បារាំងមាន168,693នាក់ អាល្លឺម៉ង់មាន165,664នាក់ ទួរគីមាន126,045នាក់ រុស្ស៊ីមាន134,687នាក់ និងប្រេស៊ីលមាន101,147នាក់។ ក្រៅពីនេះ គឺជាបណ្ដាប្រទេសដែលមានអ្នកជំងឺCOVID-19 ក្រោម100,000នាក់៕

ប្រភព៖ សារព័ត៌មានបរទេស

May 4, 2020

សហរដ្ឋអាមេរិកថា កូរ៉េខាងជើងបាញ់ទៅលើកូរ៉េខាងត្បូងគឺដោយ “មិនមានចេតនា”

រដ្ឋមន្ត្រីក្រសួងការបរទេសសហរដ្ឋអាមេរិក Mike Pompeo កាលពីម្សិលមិញបានឱ្យដឹងថា ការដែលកូរ៉េខាងជើងផ្ទុះអាវុធទៅកាន់កូរ៉េខាងត្បូងនៅតំបន់ DMZ គឺជាអចេតនា និងមិនបណ្ដាលឱ្យមានមនុស្សស្លាប់នោះទេ។

លោក Mike Pompeo បានថ្លែងនៅក្នុងកិច្ចសម្ភាសមួយជាមួយទីភ្នាក់ងារសារព័ត៌មាន ABC ថា “កាំភ្លើងជាច្រើនគ្រាប់ត្រូវបានបាញ់ចេញពីភាគខាងជើង យើងគិតថា វាជារឿងធ្វេសប្រហែល។ កូរ៉េខាងត្បូងបានបាញ់តបត។ ករណីនេះមិនបានបង្កឱ្យមានភាគីណាមួយបាត់បង់ជីវិតនោះទេ”។

កងទ័ពកូរ៉េខាងត្បូងមុននោះបានឱ្យដឹងថា ភាគីកូរ៉េខាងជើងបានបាញ់មកលើប៉មយាមរបស់កូរ៉េខាងត្បូងនៅក្បែរព្រំដែន នាំឱ្យកងទ័ពកូរ៉េខាងត្បូងបាញ់តបតដើម្បីព្រមាន។ យោងតាម អគ្គសេនាធិការចំរុះកូរ៉េខាងត្បូង JCS (The Joint Chiefs of Staff) ក្រុមទាហានដែលឈរយាមនៅប៉មយាមជិតទីរួមស្រុក Cheorwon បានឮសំឡេងកាំភ្លើងជាច្រើនគ្រាប់នៅវេលាម៉ោងប្រហេល7និង41នាទី(ម៉ោង5និង40នាទីនៅភ្នំពេញ) និងរកឃើញស្នាមគ្រាប់កាំភ្លើង4គ្រាប់នៅលើជញ្ជាំងប៉មយាមនោះ។

ទាហានកូរ៉េខាងត្បូងក៏បានបាញ់តបតចំនួន2លើក ក្នុង1លើក10គ្រាប់ ទៅកាន់កូរ៉េខាងជើង និងបានស្រែកព្រមានតាមឧបករណ៍បំពងសំឡេង។ ភាគីកូរ៉េខាងត្បូងមិនបានរកឃើញករណីស្លាប់ ឬខួចខាតទ្រព្យសម្បត្តិអ្វីមួយនោះទេ។

សហរដ្ឋអាមេរិកថា កូរ៉េខាងជើងបាញ់ទៅលើកូរ៉េខាងត្បូងគឺដោយសារ "អចេតនា" — ទីតាំងដែលមានការផ្ទុះអាវុធដាក់គ្នារវាងបងប្អូនកូរ៉េទាំង2

ហេតុការណ៍ផ្ទុះអាវុធដាក់គ្នារវាងប្រទេសកូរ៉េទាំង2 នៅតំបន់គ្មានកងទ័ព DMZ (demilitarized zone) មុននេះក៏ធ្លាប់កើតមានឡើងកាលពីខែវិច្ឆិកា ឆ្នាំ2017 ដែលកាលណោះទាហានការពារព្រំដែនរបស់កូរ៉េខាងជើងបានបាញ់កាំភ្លើងជាច្រើនគ្រាប់ចូលទឹកដីកូរ៉េខាងត្បូងដើម្បីស្កាត់ទាហានម្នាក់របស់កូរ៉េខាងជើងដែលកំពុងរត់គេចខ្លួន បណ្ដាលឱ្យទាហានម្នាក់នេះត្រូវរបួស ប៉ុន្តែទាហានកូរ៉េខាងត្បូងបានសង្គ្រោះទាន់ពេល។

ហេតុការណ៍ផ្ទុះអាវុធចុងក្រោយនេះ ត្រូវបានកូរ៉េខាងជើងធ្វើឡើងក្រោយពីសារព័ត៌មានកូរ៉េខាងជើងផ្សាយថា មេដឹកនាំកូរ៉េខាងជើង លោក Kim Jong-un បានបង្ហាញខ្លួនឡើងវិញ បន្ទាប់ពីអវត្តមានជិត3សប្ដាហ៍។

រដ្ឋមន្ត្រីការបរទេសសហរដ្ឋអាមេរិក មិនបានបង្ហើបឱ្យដឹងអំពីព័ត៌មានដែលសហរដ្ឋអាមេរិកក្ដាប់បានទាក់ទិននឹងអវត្តមានរបស់មេដឹកនាំកូរ៉េខាងជើង ក៏ដូចជាដំណឹងចចាមអារ៉ាមអំពីសុខភាពលោក Kim Jong-un នោះទេ។

លោក Mike Pompeo ថ្លែងថា “យើងក៏មើលឃើញដូចអ្វីដែលពិភពលោកមើលឃើញកាលពីម្សិលមិញនោះដែរ។ ប្រហែលជាលោកប្រធាន Kim នៅតែមានជីវិត និងមានសុខភាពល្អ។ ភារកិច្ចរបស់យើងនៅតែមិនប្ដូរផ្លាស់ នោះគឺការបញ្ចុះបញ្ចូលកូរ៉េខាងជើងឱ្យបោះបង់អាវុធនុយក្លេអែរ និងបង្កើតអនាគតល្អប្រសើរជាងនេះ សម្រាប់ប្រជាជនកូរ៉េខាងជើង”៕

ប្រភព៖ សារព័ត៌មានបរទេស

May 4, 2020

តម្លៃមាសពិភពលោក កើនឡើងខ្លាំងនាចុងសប្ដាហ៍នេះ

ក្រោយរយៈពេល1សប្ដាហ៍ដើរថយក្រោយ តម្លៃមាសក៏បានកើនឡើងជាង33ដុល្លារនៅក្នុងថ្ងៃចុងសប្ដាហ៍ ជួយឱ្យតម្លៃរបស់លោហធាតុនេះឡើងដល់1,703ដុល្លារក្នុង1អោន សម្រាប់សប្ដាហ៍នេះ។

ប្ដូរទៅតាមអត្រាប្ដូរប្រាក់ តម្លៃមាសពិភពលោកនាចុងសប្ដាហ៍នេះ មានតម្លៃប្រហាក់ប្រហែលនឹង 2,101ដុល្លារក្នុង1តម្លឹង។ ក្រោយការធ្លាក់ថ្លៃរយៈពេល1សប្ដាហ៍មកនេះ ចុងក្រោយតម្លៃមាសក៏បានវិលទៅរកចំណុច1,700ដុល្លារក្នុង1អោន(ounce)។ ប៉ុន្តែ តម្លៃនេះនៅតែទាបជាង1.6% បើធៀបជាមួយនឹងតម្លៃខ្ពស់់បំផុត (1,730ដុល្លារ) កាលពីចុងសប្ដាហ៍មុន។

ក្រុមអ្នកជំនាញបានព្យាករថា តម្លៃទាបរបស់មាស គឺគ្រាន់តែជាបញ្ហាបណ្ដោះអាសន្នប៉ុណ្ណោះ ហើយថាតម្លៃរបស់លោហធាតុមួយនេះនឹងកើនឡើងនៅក្នុងវិបត្តិនយោបាយ និងសេដ្ឋកិច្ចនាសម័យ COVID-19នេះ។ Gainesville Coins ដែលជាអ្នកជំនាញមកពី Everret Millman ថ្លែងថា “និយាយរួម មាសនៅតែមានពន្លឺ។ ក្រោយពីការធ្លាក់ថ្លៃ យើងនឹងបានឃើញតម្លៃរបស់វាកើនឡើងក្នុងសប្ដាហ៍ខាងមុខ”៕

ប្រភព៖ សារព័ត៌មានបរទេស

May 3, 2020

ជិត3.5លាននាក់ឆ្លងCOVID-19 នៅទូទាំងពិភពលោក ក្នុងនោះមាន12ប្រទេសដែលមានអ្នកជំងឺលើសពី5ម៉ឺននាក់

ពិភពលោកទាំងមូលមានអ្នកជំងឺកូរ៉ូណាចំនួនជាង244,000នាក់បានស្លាប់ ក្នុងពេលដែលអ្នកជំងឺកូរ៉ូណាសរុបបានកើនដល់ជិត3.5លាននាក់។

ប្រទេស និងដែនដីចំនួន212ក្នុងពិភពលោក បានរកឃើញអ្នកផ្ទុកវីរុសCOVID-19 សុបឡើងដល់ 3,478,152នាក់ និងអ្នកស្លាប់សរុប244,461នាក់។ ក្នុងនោះអ្នកជំងឺថ្មីកើន134,850នាក់ និងអ្នកស្លាប់ថ្មីកើន5,955នាក់បើធៀបនឹងម្សិលមិញ។ ក្នុងចំណោមអ្នកជំងឺសរុប មានអ្នកជំងឺជាង1.1លាននាក់បានជាសះស្បើយ។ នេះបើតាមស្ថិតិរបស់ WorldoMeters។

ទ្វីបអឺរ៉ុបកំពុងរងគ្រោះធ្ងន់ជាងគេ ដោយមានអ្នកជំងឺសរុប1,424,364នាក់់ ខណៈអាមេរិកខាងជើងមាន1,258,413នាក់ ទ្វីបអាស៊ីមាន545,544នាក់ អាមេរិកខាងត្បូងមាន199,750នាក់ និងទ្វីបអាហ្វ្រិកមានអ្នកជំងឺសរុប43,734នាក់។

បណ្ដាប្រទេសដែលមានអ្នកជំងឺCOVID-19 លើសពី 50,000នាក់ រួមមាន សហរដ្ឋអាមេរិក អេស្ប៉ាញ អ៊ីតាលី អង់គ្លេស បារាំង អាល្លឺម៉ង់ ទួរគី រុស្ស៊ី អ៊ីរ៉ង់ ប្រេស៊ីល ចិន និងកាដាណា៕

ប្រភព៖ សារព័ត៌មានបរទេស

May 3, 2020

សហរដ្ឋអាមេរិក៖ អ្នកឆ្លងCOVID-19 កើនដល់ជិត1,159,000នាក់ ខណៈរដ្ឋខ្លះបើកដំណើរការសេដ្ឋកិច្ចឡើងវិញស្ទើរតែ100%

សហរដ្ឋអាមេរិកគឺជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកជំងឺសរុប 1,158,881នាក់ កើន27,851ធៀបនឹងម្សិលមិញ។ អ្នកជំងឺដែលបានបាត់បង់ជីវិតនៅក្នុងប្រទេសនេះ បានកើនឡើងដល់ 67,293នាក់ ក្នុងនោះមានអ្នកស្លាប់ថ្មី1,540នាក់បន្ថែមទៀត។ អ្នកជំងឺដែលបានជាសះស្បើយ មានចំនួន160,705នាក់។

New York គឺជារដ្ឋដែលទទួលរងផលប៉ះពាល់ច្រើនបំផុតពីCOVID-19នៅសហរដ្ឋអាមេរិក។ រដ្ឋនេះ មានអ្នកជំងឺសរុប319,213នាក់ កើន3,991នាក់បើធៀបនឹងម្សិលមិញ(2ឧសភា) ចំណែកអ្នកស្លាប់ថ្មីដោយសារវីរុសកូរ៉ូណានៅ New York មានចំនួន299នាក់ នាំឱ្យអ្នកស្លាប់សរុបក្នុងរដ្ឋនេះកើនដល់24,368នាក់។

រដ្ឋនៅសហរដ្ឋអាមេរិកប្រមាណជាពាក់កណ្ដាល បានបន្ធូរបន្ថយការរឹតត្បិតលើកការដើរហើរចាប់ពីថ្ងៃទី1ឧសភា ខណៈដែលតួលេខនៃករណីឆ្លងវីរុសបានថយចុះ ឬនៅថេរ។ រដ្ឋ Texas បានអនុញ្ញាតឱ្យក្រុមហ៊ុន អាជីវកម្មនានាដំណើរការឡើងវិញទៅតាមផ្នែកដែលអាចធ្វើបាន ក្នុងពេលដែលហាងលក់រាយ និងមជ្ឈមណ្ឌលពាណិជ្ជកម្មបានបើកឡើងវិញក្នុងទំហំ25%នៃលទ្ធភាព។ នៅឯរដ្ឋ Georgia ក្រុមហ៊ុន អាជីវកម្មស្ទើរតែទាំងអស់ត្រូវបានអនុញ្ញាតឱ្យបើកដំណើរការឡើងវិញ៕

ប្រភព៖ សារព័ត៌មានបរទេស

May 3, 2020

ក្រុមហ៊ុនរបស់ Warren Buffett ខាតបង់50ពាន់លានដុល្លារព្រោះតែវីរុសCOVID-19

ការលក់ឡាយឡុងនៅលើទីផ្សារមូលបត្រដោយសារតែCOVID-19 បានធ្វើឱ្យក្រុមហ៊ុន Berkshire Hattaway របស់មហាសេដ្ឋី Warren Buffett ខាតបង់អស់50ពាន់លានដុល្លារនៅក្នុងត្រីមាសទី1 ឆ្នាំ2020នេះ។

ក្រុមហ៊ុន Berkshire Hattaway ល្បីឈ្មោះខ្លាំងនៅក្នុងការវិនិយោគទៅលើ Goldman Sachs នៅក្នុងអំឡុងវិបត្តិហិរញ្ញវត្ថុ។ ប៉ុន្តែ នៅក្នុងត្រីមាសកន្លង ផ្សារហ៊ុន S&P 500 Index (S&P 500) បានធ្លាក់ចុះ 20% ហើយភាគហ៊ុនដែលក្រុមហ៊ុន Berkshire កំពុងកាន់កាប់មួយចំនួនធំ ក៏បានដាំក្បាលចុះលឿនជាងគេ ក្នុងនោះមាន American Express, Bank of America, Wells Fargo និងក្រុមហ៊ុនអាកាសចរណ៍ចំនួន4ផ្សេងទៀត (American, Delta, Southwest និង United)។ បិទការជួញដូរកាលពីថ្ងៃទី1ឧសភា Berkshire បានធ្លាក់ចុះប្រមាណជា19%។

ការខាតបង់ដ៏ធ្ងន់ធ្ងររបស់ក្រុមហ៊ុន Berkshire គឺដោយសារមូលបត្រដែលនៅជួរមុខក្នុងតារាងវិនិយោគ ទទួលរងផលប៉ះពាល់ពីវិបត្តិសុខភាព(COVID-19)។ បណ្ដាក្រុមហ៊ុនដែលមានភាគហ៊ុនរបស់ Berkshire សុទ្ធតែរងផលវិបាកពីវីរុសនេះ ដោយមានការធ្លាក់ថ្លៃចាប់ពី 5.2-34%។ ក្នុងនោះ ក្រុមហ៊ុនសាងសង់ផ្លូវដែក BNSF ដែលត្រូវបាន Berkshire បានទិញកាលពីឆ្នាំ2010 និងបណ្ដាក្រុមហ៊ុនលក់រាយ សុទ្ធតែត្រូវផ្អាកសកម្មភាព។

នេះគឺជាលើកទីពីរហើយដែលក្រុមហ៊ុនរបស់មហាសេដ្ឋី Warren Buffett បានប្រកាសខាតបង់ បើគិតចាប់ពីត្រីមាសទី4 ឆ្នាំ2018។ ប៉ុន្តែ ក្រុមហ៊ុនរបស់មហាសេដ្ឋីនេះក៏នៅមានចំណេញពីវិស័យធានារ៉ាប់រងផងដែរ ដោយរកបានប្រាក់ចំណេញ5.9ពាន់លានដុល្លារ ដោយសារតម្លៃមូលបត្រវិស័យនេះកើន6%។

Warren Buffett គិតមកដល់បច្ចុប្បន្ន មានទ្រព្យសរុប 72ពាន់លានដុល្លារអាមេរិក។ បុរសវ័យ89ឆ្នាំរូបនេះ គឺជាមហាសេដ្ឋីលំដាប់ទី4 នៅក្នុងពិភពលោក៕

ប្រភព៖ Bloomberg

May 3, 2020

ប្រវត្តិសាស្ត្រ ដែលមនុស្សគួរតែដឹង…តើកូវីដ-19 និងការឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញកាលពីអតីតកាល ផ្លាស់ប្ដូរពិភពលោកយ៉ាងណា?

បើសិនលោកអ្នកនៅមិនទាន់ដែលធ្លាប់បានឮរឿងរ៉ាវការឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញកាលពីអតីតកាលមកនោះ វិបត្តិមេរោគកូវីដ-19 ដែលកំពុងកើតឡើងក្នុងខណៈពេលនេះ អាចធ្វើឱ្យលោកអ្នកបានដឹងពីវិបត្តិការណ៍មេរោគបំផ្លាញពិភពលោកដែលធ្លាប់បានកើតឡើងក្នុងអំឡុងដើមសតវត្សរ៍ទី20 មិនខាន។

ការឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញ ដែលកើតឡើងកាលពីជាង 100ឆ្នាំមុន តែងត្រូវបានគេហៅថា ជា “មាតានៃជំងឺរាតត្បាតទាំងពួង” ព្រោះព័ត៌មានអំពីអង្គការសុខភាពពិភពលោក រួមទាំងមជ្ឈមណ្ឌលគ្រប់គ្រង និងការពាររោគ(CDC) របស់សហរដ្ឋអាមេរិក បានបញ្ជាក់ថា មេរោគវីរុសមួយនេះបានប្រហារជីវិតមនុស្សអស់ប្រមាណជា 40-50លាននាក់ក្នុងរយៈពេលតែ 2ឆ្នាំប៉ុណ្ណោះ គឺចន្លោះឆ្នាំ1918-1920។

បណ្ដាអ្នកវិទ្យាសាស្ត្រ និងអ្នកប្រវត្តិសាស្ត្រ ជឿថា ប្រមាណជា 1ភាគ3 នៃប្រជាជនលើពិភពលោក ឬប្រមាណជា 1.8ពាន់លាននាក់ ក្នុងខណៈពេលនោះ បានឆ្លងមេរោគវីរុសមរណៈប្រភេទនេះ។

ជំងឺគ្រុនផ្ដាសាយធំ បានប្រហារជីវិតមនុស្សអស់ច្រើនជាងចំនួនអ្នកស្លាប់នៅក្នុងសង្គ្រាមលោកលើកទី1 ដែលបានបញ្ចប់ក្នុងអំឡុងពេលដែលជំងឺកំពុងចាប់ផ្ដើមឆ្លងរាលដាលទូទាំងពិភពលោកទៅទៀត។

ក្នុងខណៈដែលពិភពលោកនាពេលបច្ចុប្បន្នកំពុងតស៊ូជាមួយវិបត្តិកូវីដ-19 ឡារ៉ែនសូមបបួលមិត្តអ្នកអាន សម្លឹងថយទៅមើលប្រវត្តិសាស្ត្រ របស់ការកើតជំងឺរាតត្បាតដ៏ធំមួយដែលបានធ្វើឱ្យពិភពលោកត្រូវឈប់ង៉ក់នៅមួយកន្លែង និងរឿងរ៉ាវដែលបានកើតឡើងបណ្ដាលមកពីគ្រោះវិបត្តិក្នុងគ្រានោះដូចតទៅ៖

ឆ្នាំ1921 និងពិភពលោកដែលផ្លាស់ប្ដូរថ្មី

ក្នុងឆ្នាំ1918 ពិភពវេជ្ជសាស្ត្រ និងវិទ្យាសាស្ត្រ នៅមានកម្រិតច្រើននៅឡើយ ក្នុងការទប់ទល់នឹងជំងឺដង្កាត់ផ្សេងៗ បើប្រៀបធៀបនឹងសម័យបច្ចុប្បន្ន។

គ្រូពេទ្យក្នុងយុគសម័យនោះ មិនទាន់មានចំណេះដឹងរឿង Microbe ដែលជាមេខ្លោងចម្បង ធ្វើឱ្យកើតជំងឺគ្រុនផ្ដាសាយធំអេស្ប៉ាញ រួមទាំងនៅមិនទាន់ដឹងថា ជំងឺនេះអាចឆ្លងរាលដាលពីមនុស្សទៅមនុស្សបាននៅឡើយ តែគិតថា ជាជំងឺដែលកើតពីមេរោគបាក់តេរី មិនមែនជាមេរោគវីរុស។

វិធីការព្យាបាល ក៏នៅមានកម្រិត ឧទាហរណ៍ដូចជា ថ្នាំអង់ទីប៊ីយ៉ូទិក ដែលទើបរកឃើញក្នុងឆ្នាំ1928 ខណៈដែលវ៉ាក់សាំងការពារជំងឺគ្រុនផ្ដាសាយធំ ទើបនឹងមានការផលិតឱ្យប្រជាជនទូទៅបានប្រើ ក្នុងអំឡុងទសវត្សរ៍ទី1940។ អ្វីដែលសំខាន់ គឺក្នុងយុគសម័យនោះនៅមិនទាន់មានប្រព័ន្ធសាធារណៈសុខាភិបាលគ្រប់គ្រាន់ និងទូទៅនៅឡើយ និងសូម្បីតែក្នុងប្រទេសដែលសម្បូរទព្យធន ការងារសុខាភិបាល ថែមទាំងត្រូវបានចាត់ទុកថា ជារឿងទំនើបខ្លាំងណាស់ទៀតផង។

អ្នកស្រី ឡូរ៉ា ស្ពីននីយ៍ អ្នកនិពន្ធសៀវភៅប្រភេទវិទ្យាសាស្ត្ររឿង Pale Rider: The Spanish Flu of 1918 and How it Changed the World បានរៀបរាប់ថា “ក្នុងប្រទេសដែលមានភាពរីកចម្រើនខាងឧស្សាហកម្ម គ្រូពេទ្យភាគច្រើន ច្រើនតែធ្វើការនៅក្នុងគ្លីនិករបស់ខ្លួនឯង ឬបានទទួលប្រាក់ឧបត្ថម្ភពីអង្គការផ្នែកសប្បុរសធម៌ ឬសាសនា ហើយមនុស្សម្នាជាច្រើនមិនអាចចូលទៅដល់ការព្យាបាលរបស់ពួកគេបានឡើយ”។

មនុស្សវ័យកំលោះ-ក្រមុំ និងអ្នកក្រ

អ្វីដែលធ្វើឱ្យស្ថានការណ៍កាន់តែអាក្រក់ទៅទៀតនោះគឺ ការដែលជំងឺគ្រុនផ្ដាសាយធំអេស្ប៉ាញ បានធ្វើឱ្យប៉ះពាល់ដល់មនុស្សម្នាក្នុងរូបបែបដែលខុសប្លែកពីការឆ្លងរាតត្បាតរបស់ជំងឺគ្រុនផ្ដាសាយធំកាលពីគ្រាមុនៗ ដូចជា ការឆ្លងរាតត្បាតកាលពីឆ្នាំ1889-90 ដែលបានសម្លាប់ជីវិតមនុស្សអស់ជាង 1លាននាក់ទូទាំងពិភពលោក។

សម្រាប់គ្រានោះ ជនរងគ្រោះរបស់ជំងឺគ្រុនផ្ដាសាយធំអេស្ប៉ាញ គឺជាមនុស្សដែលស្ថិតក្នុងអំឡុងអាយុរវាង 20-40ឆ្នាំ ហើយមនុស្សប្រុស គឺជាក្រុមដែលរងផលប៉ះពាល់ខ្លាំងជាងគេ។ នេះអាចបណ្ដាលមកពីការឆ្លងរាតត្បាតដែលគេជឿថា បានចាប់ផ្ដើមកើតឡើងនៅក្នុងបន្ទាយទាហាននៅឯ “ខ្សែត្រៀមប្រយុទ្ធផ្នែកទិសខាងលិច” ក្នុងសង្គ្រាមលោកលើកទី1…បន្ទាប់ពីនោះ មេរោគបានចម្លងសាយភាយទៅទួទាំងពិភពលោក នៅពេលដែលពួកទាហានទាំងនោះធ្វើដំណើរត្រឡប់មកផ្ទះវិញ ក្រោយពេលសង្គ្រាមបានបញ្ចប់។

សូមរង់ចាំបន្តនៅថ្ងៃស្អែក…

ប្រភព៖ សាព័ត៌មានបរទេស

May 2, 2020

អាជ្ញាធរក្រុងនីវយ៉កចាប់ផ្ដើមស៊ើបអង្កេត ក្រោយរកឃើញសាកសពស្អុយរលួយជាងកន្លះរយនាក់ គរពេញក្នុងរថយន្តដឹកទំនិញ បញ្ចេញក្លិនស្អុយពេញទីក្រុង

ក្រុមអាជ្ញាធរទីក្រុងនីវយ៉ក កាលពីថ្ងៃព្រហស្បតិ៍(ទី30មេសា) បានបើកការស៊ើបអង្កេតជាផ្លូវការ 1ថ្ងៃក្រោយពីប៉ូលិសបានរកឃើញសាកសពជាងកន្លះរយនាក់ស្ថិតក្នុងសភាពហើមរលួយ បញ្ចេញក្លិនស្អុយពេញក្នុងរថយន្តដឹកទំនិញ និងរថយន្តទេសចរណ៍(ឡានតួរីស) ដែលចតចោលនៅក្នុងបរិវេណផ្នែកខាងមុខកន្លែងប្រកបពិធីបុណ្យមួយកន្លែង ក្រោមស្ថានការណ៍វិបត្តិឆ្លងរាតត្បាតរបស់មេរោគវីរុសកូវីដ-19។ នេះបើតាមសេចក្ដីរាយការណ៍របស់ទីភ្នាក់ងារព័ត៌មានAFP។

បណ្ដាក្រុមអាជ្ញាធរ បានប្រទះឃើញទិដ្ឋភាពដ៏គួរឱ្យភ្ញាក់ផ្អើលនេះកាលពីថ្ងៃពុធ(ទី29មេសា) ក្រោយពីពួកអ្នកស្រុកបានប្ដឹងទៅអាជ្ញាធរអំពីក្លិនស្អុយគម្រង់ ដែលសាយភាយចេញមកពីរថយន្តទាំង 2គ្រឿង ដែលចតនៅក្នុងបរិវេណផ្នែកខាងមុខកន្លែងប្រកបពិធីបុណ្យសព Andrew T.Cleckley ក្នុងតំបន់ប្រ៊ូគ្លីន រដ្ឋនីវយ៉ក។

“យើងកំពុងតែស៊ើបអង្កេតលើរឿងនេះ” លោក ហាវើដ សាក់ឃើរ គណៈកម្មការសាធារណៈសុខាភិបាលនៃរដ្ឋនីវយ៉ក បានប្រាប់ទៅអ្នកយកព័ត៌មាន ព្រមទាំងបានបញ្ជាក់ទៀតថា ខាងក្រសួងរបស់លោក មិនដែលបានទទួលពាក្យបណ្ដឹងណាមួយដែលពាក់ព័ន្ធនឹងកន្លែងប្រកបពិធីបុណ្យសពមួយនេះឡើយ តាំងពីដើមមក។

តាមរយៈការត្រួតពិនិត្យរយៈដំបូងរបស់ក្រុមអាជ្ញាធរ បានរកឃើញថា ប្រព័ន្ធម៉ាស៊ីនត្រជាក់នៅក្នុងបន្ទប់ក្លាស្សេនៅផ្នែកខាងក្រោយរបស់រថយន្តដឹកសាកសពទាំង 2គ្រឿងនោះមិនដំណើរការ ទើបធ្វើឱ្យសាកសពដែលត្រូវបានផ្ទុកនៅក្នុងនោះស្ថិតក្នុងស្ថានភាពគ្មានធាតុត្រជាក់ រហូតធ្វើឱ្យកើតមានក្លិនសាកសពសាយភាយចេញមកក្នុងអំឡុងពេលរង់ចាំនាំយកទៅប្រកបពិធីបញ្ចុះតាមសាសនា ខណៈដែលកន្លែងប្រកបពិធីបុណ្យសពនានានៅក្នុងទីក្រុងនីវយ៉កស៊ីធី ត្រូវទទួលរងបន្ទុកដ៏ធ្ងន់ធ្ងរក្នុងការចាត់ការសាកសពក្នុងចំនួនដ៏ច្រើន ដែលបានស្លាប់ដោយសារការឆ្លងមេរោគកូវីដ-19។

លោក ប៊ីល ដឺ ប្លាស៊ីអូ អភិបាលក្រុងនីវយ៉ក បានបញ្ជាក់ថា ការប្រតិបត្តិលើអ្នកស្លាប់របៀបនេះ គឺជារឿងដែលមិនអាចទទួលយកបានឡើយ។ លោកនិយាយថា “ទីកន្លែងប្រកបពិធីបុណ្យសព ត្រូវមានតួនាទីប្រតិបត្តិចំពោះសាកសពយ៉ាងមានកិត្តិយស”។

ចំណែកលោក Andrew Cleckley ដែលជាម្ចាស់កន្លែងប្រកបពិធីបុណ្យសពនោះ បានប្រាប់សារព័ត៌មាននីវយ៉ក ថាមស៍ថា ដូចជាអ្នកចាត់ការសាកសពដទៃទៀតទូទាំងទីក្រុងដែរ លោកត្រូវជួបនឹងចំនួនសាកសពដ៏ច្រើនហូរហៀរក្នុងអំឡុងការឆ្លងរាលដាលនៃមេរោគកូវីដ-19 ដូច្នេះហើយទើបយើងត្រូវប្រើរថយន្ត ផ្ទុកសាកសពដែលលើសចំណុះរបស់កន្លែងប្រកបពិធីរបស់យើងទុកមួយរយៈសិន ដោយសារតែក្នុងអំឡុងពេលនេះ កន្លែងប្រកបពិធីបុណ្យសពរបស់យើង ពេញហូរហៀរដោយសាកសពជាង 100សាកសពទៅហើយ។ លោកបន្ថែមថា “ខ្ញុំលែងមាននៅសល់កន្លែងសម្រាប់បញ្ចុះសាកសពទៀតហើយ”។

សារព័ត៌មាននៅក្នុងសហរដ្ឋអាមេរិក បានរាយការណ៍ដោយយោងលើប្រភពព័ត៌មានដែលបានបញ្ជាក់ថា មានសាកសពប្រមាណជា 60 ស្ថិតនៅក្នុងរថយន្តទាំង 2គ្រឿងនោះ។

មេរោគវីរុសកូរ៉ូណាប្រភេទថ្មីនេះ បានប្រហារជីវិតមនុស្សនៅក្នុងទីក្រុងនីវយ៉ករួចហើយចំនួនជាង 18,000នាក់ ក្នុងអំឡុងពេលមិនដល់ 2ខែផង ខណៈដែលដែនដីមួយនេះបានរងផលប៉ះពាល់ពីមេរោគកូវីដ-19 ធ្ងន់ធ្ងរជាងគេបំផុតនៅក្នុងប្រទេសអាមេរិក។

មានរបាយការណ៍ថា រោងតម្កល់សព, វាលបញ្ចុះសពទូទាំងទីក្រុងនីវយ៉ក សុទ្ធតែជួបនឹងបញ្ហាធ្ងន់ធ្ងរក្នុងការទប់ទល់នឹងចំនួនអ្នកស្លាប់ដែលកើនឡើងយ៉ាងលឿន បណ្ដាលឱ្យរថយន្តដឹកសាកសពដែលមានម៉ាស៊ីនត្រជាក់ បានក្លាយជារឿងមួយដែលគេមើលឃើញជាទូទៅនៅផ្នែកខាងក្រៅនៃមន្ទីរពេទ្យនានា ដែលពេញណែនដោយអ្នកជំងឺកូវីដ-19៕

ប្រភពៈ សារព័ត៌មានបរទេស

May 2, 2020

Author: សឿន សំណាង