សឿន សំណាង - La Reine Media

អ្នកជំងឺកូរ៉ូណានៅសហរដ្ឋអាមេរិកកើនលើស1.4លាននាក់! អ្នកជំនាញថា វីរុសអាចផ្ទុះឆ្លងជាលើកទីពីរ

សហរដ្ឋអាមេរិកបានរកឃើញអ្នកជំងឺCOVID-19ថ្មីជិត24,000នាក់ក្នុងរយៈពេល24ម៉ោងចុងក្រោយនេះ ធ្វើឱ្យតួលេខអ្នកជំងឺកូរ៉ូណាសរុបឡើងដល់ជាង1.4លាននាក់ ក្នុងនោះមានជាង83,000នាក់បានបាត់បង់ជីវិត។

តួលេខនៃអ្នកជំងឺសរុប និងអ្នកស្លាប់សរុបដោយសារវីរុសCOVID-19នៅសហរដ្ឋអាមេរិកនាពេលបច្ចុប្បន្នគឺ 1,407,928នាក់ និង83,357នាក់ បន្ទាប់ពីប្រទេសនេះទើបបានរកឃើញអ្នកជំងឺថ្មី23,895នាក់ និងអ្នកស្លាប់ថ្មី1,654នាក់បន្ថែមទៀតក្នុងថ្ងៃនេះ។ អ្នកជំងឺដែលបានជាសះស្បើយនៅសហរដ្ឋអាមេរិកក៏បានកើនឡើងដល់293,074នាក់។ នេះបើតាម Worlddometer ជាគេហទំព័រដែលធ្វើបច្ចុប្បន្នភាពនៃស្ថានភាពវីរុសCOVID-19 លឿនជាងគេបំផុត។

អភិបាលរដ្ឋនូវយ៉ក លោក Andrew Cuomo កាលពីថ្ងៃទី12ឧសភា(13ឧសភានៅកម្ពុជា) បានប្រកាសថា មានអ្នកស្លាប់ថ្មីចំនួន195នាក់នៅក្នុងរដ្ឋនីវយ៉ក ធ្វើឱ្យអ្នកស្លាប់សរុបដោយសារវីរុសកូរ៉ូណាក្នុងរដ្ឋនេះឡើងដល់21,835នាក់ ក្នុងគ្រាដែលតំបន់ចំនួន3របស់នីវយ៉ក ជិតបើកដំណើរការសេដ្ឋកិច្ចឡើងវិញ បន្ទាប់ពីបានបំពេញគ្រប់លក្ខខណ្ឌដែលលោក Cuomo បានដាក់ចេញ។

ទីប្រឹក្សាជាន់ខ្ពស់ផ្នែកសុខាភិបាលរបស់សេតវិមាន លោក Anthony Fauci បានព្រមានថា បើសិនជាតំបន់នានាប្រញាប់ប្រញាល់បើកទ្វារសេដ្ឋកិច្ចឡើងវិញ នោះអាចនឹងមាន “ផលវិបាកធ្ងន់ធ្ងរ”។ លោកថា បណ្ដារដ្ឋដែលមើលស្រាលការព្រមានរបស់ក្រុមអ្នកជំនាញការ ពួកគេនឹងមាន “ហានិភ័យខ្ពស់ក្នុងការធ្វើឱ្យវីរុសនេះផ្ទុះឆ្លងរាលដាលជាលើកទីពីរដោយមិនអាចគ្រប់គ្រងបាន”៕

ប្រភព៖ សារព័ត៌មានបរទេស

May 13, 2020

COVID-19 បានសម្លាប់មនុស្សជាង292,000នាក់នៅទូទាំងសកលលោក

ពិភពលោកទាំងមូលបានរកឃើញអ្នកផ្ទុកមេរោគកូរ៉ូណា (COVID-19) សរុបជាង4.3លាននាក់ ក្នុងនោះមានអ្នកជំងឺជាង292,000នាក់បានបាត់បង់ជីវិត។

ប្រទេសនិងដែនដីចំនួន212ក្នុងពិភពលោក ត្រូវបានរាយការណ៍ថា មានអ្នកជំងឺCOVID-19 សរុប4,335,821នាក់ និងអ្នកស្លាប់សរុបមានចំនួន292,301នាក់ ដោយក្នុងរយៈពេល24ម៉ោងចុងក្រោយនេះ មានអ្នកជំងឺថ្មី89,026នាក់ និងអ្នកស្លាប់ថ្មីមាន5,561នាក់។ អ្នកជំងឺដែលបានជាសះស្បើយ មានចំនួន1,582,901នាក់។ នេះបើតាមស្ថិតិរបស់ Worldometer។

ទ្វីបអាមេរិកជាសម្បុកមេរោគធំជាងគេបង្អស់ ក្នុងនោះអាមេរិកខាងជើងមានអ្នកជំងឺសរុប1,543,974នាក់ អាមេរិកខាងត្បូងមាន335,624នាក់ ខណៈទ្វីបអឹរ៉ុបមាន1,675,742នាក់ ទ្វីបអាស៊ីមាន701,532នាក់ និងទ្វីបអាហ្វ្រិកមានអ្នកជំងឺសរុប70,947នាក់។

ប្រទេសដែលមានអ្នកស្លាប់ច្រើនជាង20,000នាក់ មាន5ប្រទេស គឺសហរដ្ឋអាមេរិក អង់គ្លេស អ៊ីតាលី បារាំង និងអេស្ប៉ាញ។ ចំណែកប្រទេសដែលមានអ្នកជំងឺសរុបលើសពី200,000នាក់ មាន5ប្រទេស គឺសហរដ្ឋអាមេរិក អេស្ប៉ាញ អង់គ្លេស រុស្ស៊ី និងអ៊ីតាលី៕

ប្រភព៖ សារព័ត៌មានបរទេស

May 13, 2020

Apple នឹងរើរោងចក្រពីប្រទេសចិនទៅកាន់ប្រទេសឥណ្ឌា

ក្រុមហ៊ុន Apple ត្រូវបានគេជឿថា កំពុងរៀបចំផែនការដើម្បីរើរោងចក្រផលិតឧបករណ៍បច្ចេកវិទ្យារបស់ខ្លួនចំនួន20% ចេញពីប្រទេសចិន ទៅកាន់ប្រទេសឥណ្ឌា ដែលក្នុងនោះក៏មាន iPhone ផងដែរ។

យោងតាម Economic Times នាយកប្រតិបត្តិមួយចំនួនរបស់ក្រុមហ៊ុន Apple បានពិភាក្សាជាមួយបណ្ដាមន្ត្រីជាន់ខ្ពស់ឥណ្ឌាកាលពីប៉ុន្មានថ្ងៃកន្លងទៅនេះ ទាក់ទងទៅនឹងក្រុមហ៊ុនអាមេរិកាំងនេះ ចង់បានការ “បើកផ្លូវ” ដើម្បីអាចបង្កើនចង្វាក់ផលិតកម្មរបស់ខ្លួននៅក្នុងប្រទេសឥណ្ឌា រួមទាំងការរើកម្លាំងផលិតកម្មចំនួន1/5ពីប្រទេសចិន មកកាន់ឥណ្ឌា។

បើសិនជាការផ្លាស់ទីនេះក្លាយជាការពិត Apple ក៏នឹងអាចក្លាយជាក្រុមហ៊ុននាំចេញធំជាងគេនៅឥណ្ឌា។

មន្ត្រីរដ្ឋាភិបាលមួយរូបបានបង្ហើបឱ្យដឹងថាឥណ្ឌាសង្ឃឹមថានឹងផលិតស្មាតហ្វូនដែលមានទំហំទឹកប្រាក់ដល់ទៅ40ពាន់លានដុល្លារអាមេរិកនៅក្នុងប្រទេសនេះក្នុងរយៈពេល5ឆ្នាំខាងមុខ ដែលភាគច្រើនគឺដើម្បីនាំចេញ។ ការផលិតនេះ ភាគច្រើនត្រូវបានធ្វើឡើងដោយក្រុមហ៊ុន Wistron និងក្រុមហ៊ុន Foxconn ដោយយោងទៅលើផលប្រយោជន៍ពីកម្មវិធីលើកទឹកចិត្តទាក់ទាញការផលិត PLI។

PLI (Production Linked Incentive Scheme) គឺជាកម្មវិធីដែលត្រូវបានឥណ្ឌាបង្កើតឡើងក្នុងបំណងលើកទឹកចិត្តដល់ការផលិតក្នុងស្រុក ទាក់ទាញការវិនិយោគ និងការផលិតពីបណ្ដាក្រុមហ៊ុនបរទេស។ Apple នឹងក្លាយជាក្រុមហ៊ុនមួយក្នុងចំណោមបណ្ដាក្រុមហ៊ុនដំបូងគេដែលទទួលបានផលប្រយោជន៍ពីគោលនយោបាយនេះ បន្ទាប់ពីមាត្រាមួយចំនួនត្រូវបានផ្ដើមអនុវត្តចាប់ពីសប្ដាហ៍ក្រោយ មុនពេលអនុវត្តពេញលេញចាប់ពីថ្ងៃទី1សីហា។

ទាក់ទិននឹងរឿងរ៉ាវខាងលើ ភាគីក្រុមហ៊ុន Apple មិនទាន់មានការបញ្ចេញមតិអ្វីនៅឡើយ។

ប្រទេសឥណ្ឌាមិនមែនជាទីផ្សារធំរបស់ Apple នោះទេ ព្រោះថាក្រុមហ៊ុននេះរកបានចំណូលត្រឹមតែ1.5ពាន់លានដុល្លារប៉ុណ្ណោះពីការលក់ iPhone នៅក្នុងប្រទេសនេះ រាប់ចាប់ពីឆ្នាំ2018ដល់2019 ពោលគឺកាន់កាប់ចំណែកទីផ្សារប្រមាណពី2ទៅ3%ប៉ុណ្ណោះ គឺមិនដល់0.5ពាន់លានដុល្លារនៃតម្លៃឧបករណ៍ដែលត្រូវបានផលិតក្នុងប្រទេសនេះ។ ផ្ទុយទៅវិញ Apple កំពុងតែពឹងផ្អែកច្រើនទៅលើប្រទេសចិន ទាំងការផលិត ទាំងទីផ្សារ។ នៅក្នុងអំឡុងពេលដូចគ្នា បើធៀបជាមួយប្រទេសឥណ្ឌា ក្រុមហ៊ុន Apple នៅប្រទេសចិនបានផលិតឧបករណ៍ដែលមានទំហំទឹកប្រាក់ដល់ដល់220ពាន់លានដុល្លារ ក្នុងនោះមាន185ពាន់លានដុល្លារបានមកពីការនាំចេញ។ ក្រៅពីនេះ Apple ក៏ប្រើប្រាស់កម្មករប្រមាណជា4.8លាននាក់នៅប្រទេសចិន ទាំងការផលិតផ្ទាល់ និងទាំងប្រយោល៕

ប្រភព៖ សារព័ត៌មានបរទេស

May 13, 2020

យានអវកាសអាមេរិកាំង1គ្រឿង ជិតធ្លាក់ឆេះក្នុងបរិយាកាសផែនដីហើយ

យានអវកាស1គ្រឿង ដែលមានផ្ទុកកាកសំណល់2,000គីឡូក្រាម និងឧបករណ៍វិទ្យាសាស្ត្រជាច្រើន នឹងត្រូវបានអ្នកវិទ្យាសាស្ត្របញ្ជាឱ្យបន្ទាបខ្លួនចូលក្នុងបរិយាកាលផែនដី ដើម្បីដុតកម្ទេចខ្លួនវា បន្ទាប់ពីបានបំពេញបេសកកម្មចាប់ជាស្ថាពរ។

យានអវកាស Cygnus NG-13 បានផ្ដាច់ខ្លួនចេញពីស្ថានីយអវកាសអន្តរជាតិ (ISS) កាលពីវេលាម៉ោង23និង09នាទី ថ្ងៃទី11ឧសភា(ម៉ោងនៅកម្ពុជា)។ ពេលដែលបានផ្ដាច់ខ្លួន Cygnus NG-13 ស្ថិតនៅក្នុងកម្ពស់ប្រហែល425គីឡូម៉ែត្រពីភពផែនដី។ យាននេះនឹងហោះនៅលើគន្លងគោចរជុំវិញផែនដីរយៈពេល2សប្ដាហ៍ ដើម្បីបង្ហោះផ្កាយរណបតូចៗចំនួន2 ដែលមានតួនាទីស្រាវជ្រាវរកវិធីកែលម្អបច្ចេកវិទ្យាបញ្ជូនទិន្នន័យនៅក្នុងលម្ហអវកាស និងប្រព័ន្ធផែនទី GPS។ ក្រុមវិស្វករនៅ Northrop Grumman ដែលជាក្រុមហ៊ុនផលិតយាន Cygnus NG-13 នឹងបញ្ជូនសញ្ញាដើម្បីឱ្យវាបន្ទាបខ្លួន ក្នុងបំណងដុតកម្ទេចខ្លួនវាផ្ទាល់នៅក្នុងស្រទាប់អូហ្សូន។

ក្នុងខណៈនោះដែរ NASA នឹងចាប់ផ្ដើមការពិសោធដែលមានឈ្មោះថា Spacecraft Fire Safety IV ដើម្បីពិនិត្យទៅលើប្រព័ន្ធស្វែងរកអណ្ដាតភ្លើង និងសិក្សាអំពីរបៀបដែលភ្លើងឆេះរាលដាលនៅក្នុងសម្ពាធប្រហាក់ប្រហែលនឹងសម្ពាធទឹកសមុទ្រលើផែនដី ក៏ដូចជានៅក្នុងសម្ពាធទាបជាងនេះ ជាមួយនឹងកំហាប់អុកស៊ីហ្សែនខ្ពស់ជាងធម្មតា។

NASA បានឱ្យដឹងថា “ការសិក្សាស្រាវជ្រាវនេះពិតជាមានសារសំខាន់ខ្លាំងណាស់ ព្រោះវាអាចជួយដល់អវកាសយានិកក្នុងការដោះស្រាយបញ្ហាអគ្គិភ័យ ពិសេសគឺនៅពេលដែលអវកាសយានិកមិនអាចចាកចេញពីយានអវកាសបាន ឬមិនអាចត្រឡប់មកផែនដីបានភ្លាមៗ”។

Cygnus NG-13 គឺជាយានអវកាសដឹកទំនិញប្រភេទ Cygnus ទី13ហើយ ដែលបានហោះទៅកាន់ ISS ដើម្បីបំពេញបេសកកម្មរបស់ NASA។ ពេលចេញដំណើរ យាននេះមានផ្ទុកទំនិញ3,400គីឡូក្រាម រួមមានសម្ភារ និងអាហារចាំបាច់ចាំបាច់ រួមនឹងឧបករណ៍វិទ្យាសាស្ត្រសម្រាប់អវកាសចរដើរនៅក្នុងលម្ហអវកាស។ យាននេះបានចាកចេញពីមូលដ្ឋាននៅលើកោះ Wallops កាលពីថ្ងៃទី15កុម្ភៈ តាមរយៈរ៉ុកកែត Antares។ 3ថ្ងៃក្រោយមក យាន Cygnus NG-13នេះ ក៏បានតភ្ជាប់ជាមួយស្ថានីយអវកាសអន្តរជាតិដោយជោគជ័យ៕

ប្រភព៖ សារព័ត៌មានបរទេស

May 12, 2020

រ៉ុកកែតទម្ងន់17.8តោនរបស់ចិន ធ្លាក់ត្រឡប់ចូលស្រទាប់អូហ្សូនរបស់ផែនដី ដោយគ្មានគោលដៅពិតប្រាកដ

រ៉ុកកែត Long March 5B របស់ប្រទេសចិន ក្លាយជាវត្ថុដែលមានទម្ងន់ធ្ងន់ជាងគេបង្អស់នៅលើគន្លងគោចរ ដែលបានបាត់បង់ទំនាក់ទំនងជាមួយទីបញ្ជាការនៅលើដី និងពិបាកដឹងបានថា វានឹងរសាត់ទៅទីណាឱ្យប្រាកដ។

យោងតាមក្រុមហោះហើរត្រួតពិនិត្យអវកាសលេខ18របស់កងទ័ពអាកាសអាមេរិកាំង រ៉ុកកែត Long March 5B របស់ចិន វិលត្រឡប់មកកាន់តំបន់ស្រទាប់អូហ្សូននៅវេលាម៉ោង10និង33នាទី ថ្ងៃទី11ឧសភា(ម៉ោងនៅកម្ពុជា) ស្ថិតនៅពីលើតំបន់លម្ហសមុទ្រភាគខាងលិចទ្វីបអាហ្វ្រិក ដោយឆ្ពោះទៅកាន់តំបន់ Nouakchott នៃប្រទេស Mauritania។

Jonathan McDowell បានឱ្យដឹងថា នៅក្នុងរយៈពេល30នាទីចុងក្រោយដែលស្ថិតនៅលើគន្លងគោចរ រ៉ុកកែតនេះបានហោះកាត់លើតំបន់ Hollywood រួមនឹង Colorado Springs និងឧទ្យាននៅក្នុងរដ្ឋនីវយ៉កនៃសហរដ្ឋអាមេរិក។ បញ្ហាបាត់បង់ទំនាក់ទំនងនៃរ៉ុកកែតខាងលើនេះ គឺបណ្ដាលមកពីឥទ្ធិពលរបស់អាកាសធាតុអវកាសក្នុងរយៈពេលប៉ុន្មានថ្ងៃកន្លងទៅនេះ។ សារធាតុដែលបាញ់ចេញពីព្រះអាទិត្យ អាចបង្កជាឧបសគ្គ និងធ្វើឱ្យការហោះហើររបស់រ៉ុកកែតនេះត្រូវច្របូកច្របល់ នាំឱ្យមានការពិបាកក្នុងការព្យាករអំពីទិសដៅរបស់វា។

Jonathan McDowell ដែលជាតារាវិទូម្នាក់នៅសាកលវិទ្យាល័យ Harvard នៃសហរដ្ឋអាមេរិក បានឱ្យដឹងថា មុនហេតុការណ៍ខាងលើនេះ ក៏ធ្លាប់មានហេតុការណ៍មួយស្រដៀងគ្នានេះដែរ ដែលបានកើតឡើងកាលពីឆ្នាំ1991 ក្នុងគ្រាដែលស្ថានីយអវកាស Salyut-7 ដែលមានទម្ងន់39តោនរបស់សូវៀត បានធ្លាក់នៅលើតំបន់អវកាសផ្នែកខាងលើប្រទេសអាហ្សង់ទីន។

កាលពីខែកក្កដា ឆ្នាំ2019 ស្ថានីយអវកាសចិន Tiangong-2 ក៏បានធ្លាក់មកក្នុងស្រទាប់អូហ្សូនរបស់ផែនដី។ ក៏ប៉ុន្តែ Tiangong-2 ដែលមានទម្ងន់ត្រឹមតែ8.6តោន ត្រូវបានអ្នកវិទ្យាសាស្ត្រប្រើប្រាស់ថាមពលចុងក្រោយរបស់វា ដើម្បីបញ្ជាឱ្យចុះចតនៅលម្ហសមុទ្រដ៏សែនឆ្ងាយនាកណ្ដាលសាគរ។ ឆ្នាំ2018 កំណែដំបូងរបស់ Tiangong-2 គឺ Tiangong-2 8.5តោន ក៏បានធ្លាក់បាត់បង់ការគ្រប់គ្រង ចូលទៅក្នុងមហាសមុទ្រប៉ាស៊ីហ្វីកផងដែរ៕

ប្រភព៖ សារព័ត៌មានបរទេស

May 12, 2020

និន្នាការថ្មី! CEO “Live” លក់ផលិតផល រកបានប្រាក់រាប់លានដុល្លារ ដោយប្រើពេលតិចតួចប៉ុណ្ណោះ

Dong Mingzhu ជាប្រធានក្រុមហ៊ុន Gree Electric អាចលក់បានទំនិញដែលជាគ្រឿងប្រើប្រាស់ក្នុងផ្ទះ ដែលតម្លៃសរុប 43.7លានដុល្លារអាមេរិក ដោយការឡាយ (livestream) ត្រឹមតែ3ម៉ោងប៉ុណ្ណោះ។

កាលពីប៉ុន្មានឆ្នាំចុងក្រោយនេះ livestream ត្រូវបានគេនិយមប្រើប្រាស់ច្រើននៅប្រទេសចិន។ បុគ្គលល្បីៗ និងអ្នកមានឥទ្ធិពលនៅលើអ៊ីនធើណិត តែងត្រូវបានក្រុមហ៊ុននានាជួលឱ្យជួយឃោសនាអំពីផលិតផលិតផលរបស់ពួកគេដោយការផ្សាយផ្ទាល់លើអ៊ីនធើណិត។ ប៉ុន្តែ ថ្មីៗនេះ មាននិន្នាការថ្មីមួយទៀតដែលកំពុងពេញនិយម នោះគឺថ្នាក់ដឹកនាំក្រុមហ៊ុនផ្ទាល់ ចេញមុខនៅតាមកម្មវិធីផ្សាយផ្ទាល់ (livestream) របស់ពួកគេដើម្បីណែនាំ និងលក់ផលិតផល។

Li Jing ដែលជានាយកក្រុមហ៊ុនជំនាញខាងតុបតែងគ្រឿងសង្ហារិម Mendale Textile រកបានប្រាក់3.5លានដុល្លារតាមរយៈការឡាយ ដោយចំណាយពេលត្រឹមតែ4ម៉ោងប៉ុណ្ណោះ កាលពីខែមីនា។ James Liang ដែលជាប្រធានក្រុមហ៊ុនទេសចរណ៍ Trip.com រកបានប្រាក់ចំនួន8.4លានដុល្លារជូនក្រុមហ៊ុន បន្ទាប់ពីបានឡាយ5លើក ដោយក្នុង1លើកៗ លោកចំណាយត្រឹមតែ1ម៉ោងប៉ុណ្ណោះ។ ដូចគ្នានេះដែរ កាលពីថ្ងៃទី10មីនា អ្នកស្រី Dong Mingzhu ដែលជាមេដឹកនាំរបស់ក្រុមហ៊ុន Gree Electric ក៏រកបានប្រាក់43.7លានដុល្លារ បន្ទាប់ពីបានឡាយលក់ផលិតក្នុងរយៈពេល3ម៉ោង។

កម្មវិធី ឬអែប(App) ដែលពេញនិយមសម្រាប់ការឡាយលក់ផលិតផលនៅប្រទេសចិន នោះគឺគេហទំព័រពាណិជ្ជកម្ម Taobao និង JD ខណៈដែលបណ្ដាញសង្គមដូចជា Douyin (កំណែភាសាចិនរបស់ TikTok) និង Kuaishou ក៏កំពុងទទួលបានចំណាប់អារម្មណ៍កាន់តែច្រើនឡើងៗផងដែរ។

Livestream កំពុងតែផ្លាស់ប្ដូរទម្លាប់ទិញដូររបស់អតិថិជននៅទូទាំងពិភពលោក ពិសេសគឺមនុស្សទាន់សម័យ និងយុវវ័យ។ បើសិនជាចង់ទិញផ្កា បន្លែផ្លែឈើ គឺមាន “តារាកសិករ” ជាច្រើនបង្ហាញខ្លួនរៀបរាប់អំពីផលិតផលនៅលើគេហទំព័រ Kuaishou។ ជាងនេះ កន្លងមក អ្នកលេងអ៊ីនធើណិតនៅប្រទេសចិនក៏ធ្លាប់បានជួបប្រទះអតិថិម្នាក់ ហ៊ានចំណាយប្រាក់ដល់ទៅ5.6លានដុល្លារអាមេរិកដើម្បីទិញរ៉ុកកែតពាណិជ្ជកម្ម Kuaizhou-1A 1ដើមទៀតផង តាមរយៈការឡាយលក់មួយនៅលើគេហទំព័រ Taobao។

COVID-19 បានផ្ទុះឡើងនៅប្រទេសចិន បណ្ដាលឱ្យមនុស្សត្រូវនៅផ្ទះ កន្លែងធ្វើការត្រូវបិទទ្វារ នាយកក្រុមហ៊ុននានាក៏ត្រូវស្វែងរកយុទ្ធសាស្ត្រថ្មីដើម្បីអាចរស់បន្តទៅមុខ។ យុទ្ធសាស្ត្រមួយដែលត្រូវបានគេប្រើប្រាស់ច្រើនជាងគេនោះគឺការឃោសនាលក់ផលិតផល ឬសេវាកម្មដោយការផ្សាយផ្ទាល់នៅលើអ៊ីនធើណិតដែលគេហៅថា “ឡាយ”។ ក្រៅពីមេដឹកនាំក្រុមហ៊ុននានាដូចបានរៀបរាបខាងលើ គេក៏ឃើញមានលោក Qian Jinbo ដែលជាប្រធានក្រុមហ៊ុនស្បែកជើង Red Dragonfly រួមនឹងលោក Liu Minghui ជាស្ថាបនិកក្រុមហ៊ុន China Gas និងលោក Chen Xiaodong ដែលជា CEO របស់ក្រុមហ៊ុន Intime Retail Group ជាដើម ក៏បានចូលរួមក្នុងការឡាយលក់ផលិតផលរបស់ពួកគេដែរ។

CEO បច្ចេកវិទ្យារកបានប្រាក់រាប់លានដុល្លារពីការ "Live" លក់ផលិតផល ដោយប្រើពេលតិចតួចប៉ុណ្ណោះ — លោក Liu Minghui ជាស្ថាបនិកក្រុមហ៊ុន China Gas Holdings

បើទោះជាយ៉ាងនេះក៏ដោយ អ្នកជំនាញក្នុងវិស័យច្នៃប្រឌិតនានាយល់ថា ការបង្ហាញវត្តមានរបស់មេដឹកនាំក្រុមហ៊ុន អាចបង្កើតឱ្យមានភាពប្លែកភ្នែកគ្រាដំបូងៗ ប៉ុន្តែបើសិនជាពួកគេចេះតែនិយាយអំពីប្រធានបទដដែលៗក្នុងរយៈពេលយូរ នោះចំនួនអ្នកចូលមើលការឡាយរបស់ពួកគេនឹងថយចុះបន្តិចម្ដងៗ។ CEO និងមេដឹកនាំក្រុមហ៊ុននានា ត្រូវតែមានការច្នៃប្រឌិតជានិច្ចនៅពេលពួកគេចង់រក្សា និងទាក់ទាញទស្សនិកជន។

ឧទាហរណ៍ដូចជា Hou Yi ដែលជា CEO របស់បណ្ដាញផ្សារទំនើប Hema នៃក្រុមហ៊ុន Alibaba បានចូលរួមប្រកួតបកសម្បកបង្កងនៅក្នុងការឡាយជាមួយ Viya ដែលជាបុគ្គលល្បីឈ្មោះនៅលើបណ្ដាញសង្គមចិន ឬក៏ដូចជា James Liang ដែលបានប្រើប្រាស់សម្លៀកបំពាក់តាមអ្នកស្រុកនៅតំបន់ផ្សេងៗដើម្បីឃោសនាអំពីកញ្ចប់សេវាកម្មទេសចរណ៍របស់ក្រុមហ៊ុន Trip.com ។ល។

ពិសេសទៀតនោះគឺករណីរបស់ Luo Yonghao ជា CEO របស់ក្រុមហ៊ុនទូរស័ព្ទ Smartisan ដែលរកបានប្រាក់15.5លានដុល្លារអាមេរិក តាមរយៈការឡាយ3ម៉ោងកាលពីខែមេសា។ អ្វីដែលគួរឱ្យចាប់អារម្មណ៍ នោះគឺ Luo Yonghao មិនបានលក់ផលិតផលណាមួយទាំងអស់ ប៉ុន្តែជំនួសមកវិញ គាត់បានសហការជាមួយបណ្ដាញសង្គម Douyin ដើម្បីបានធ្វើជា livestreamer (អ្នកផ្សាយផ្ទាល់/អ្នកឡាយ) ដោយការលក់ផលិតផលច្រើនមុខ ចាប់ពីអាហារ រហូតដល់ផលិតផលរបស់ក្រុមហ៊ុនផ្សេងៗ។

ករណីរបស់ Luo បានបង្ហាញថា CEO របស់បណ្ដាក្រុមហ៊ុន គឺពិតជាអាចក្លាយជាបុគ្គលដ៏មានឥទ្ធិពលខ្លាំងនៅលើបណ្ដាញអ៊ីនធើណិត ដែលអាចនាំមកនូវប្រភពចំណូលថ្មី និងច្រើនសន្ធឹកសន្ធាប់ដល់ក្រុមហ៊ុន។

យោងតាម iiMedia Research ទំហំទឹកប្រាក់ដែលត្រូវបានទូទាត់តាមរយៈការឡាយលក់ផលិតផលនៅប្រទេសចិន បានកើនដល់61ពាន់លានដុល្លារអាមេរិកក្នុងឆ្នាំ2019។ ដោយសារតែឥទ្ធិពលរបស់ COVID-19 វិស័យខាងលើនេះកំពុងមានការរីកចម្រើនខ្លាំងឡើងៗ រហូតដល់មានការព្យាករថា ទំហំទឹកប្រាក់់ដែលត្រូវបានទូទាត់តាមរយៈការឡាយនឹងឡើងដល់129ពាន់លានដុល្លារក្នុងឆ្នាំ2020នេះ៕

ប្រភព៖ សារព័ត៌មានបរទេស

May 12, 2020

ប្រកាសអាសន្ន!! ចំនួនឆ្លងកូវីដ-19 ពិតប្រាកដនៅជប៉ុន អាចរាប់សែន…នាំគ្នាជេរ រដ្ឋបាលមានចេតនាមិនពិនិត្យជំងឺប្រជាជន

គ្មានអ្នកណាដឹងពីចំនួនពិតប្រាកដរបស់អ្នកឆ្លងមេរោគវីរុសកូរ៉ូណាប្រភេទថ្មី ឬកូវីដ-19 នៅក្នុងប្រទេសជប៉ុនឡើយ…តាមរយៈការដាស់តឿនមួយនៅក្នុងក្រុមគណៈអ្នកជំនាញការតស៊ូនឹងជំងឺរាតត្បាតដ៏ធំរបស់រដ្ឋាភិបាលកាលពីថ្ងៃចន្ទ(ទី11 ឧសភា) ក្រោមសំឡេងរិះគន់យ៉ាងខ្លាំងក្លា និងច្រើនឡើងជារឿយៗថា រដ្ឋបាលមានចេតនាមិនពិនិត្យជំងឺប្រជាជន។ នេះបើតាមការរាយការណ៍របស់ទីភ្នាក់ងារព័ត៌មាន សៅថ៍ ឆាយណា ម៉រនីង ផូស្ត។

លោក ឈិង៉េរ៊ុ អូមិ ប្រធានគណៈអ្នកជំនាញការតស៊ូនឹងការឆ្លងរាលដាលរបស់មេរោគកូវីដ-19 របស់រដ្ឋាភិបាល បានប្រាប់ទៅគណៈកម្មាធិការគ្រប់គ្រងថវិការបស់ព្រឹទ្ធសភាថា “ប្រាកដណាស់ថា ចំនួនអ្នកឆ្លងមេរោគពិតប្រាកដ ខ្ពស់ជាងនៅក្នុងរបាយការណ៍ គ្មានអ្នកណាដឹងឡើយ ជួនកាលវាអាចខ្ពស់ជាង 10ដង 12ដង ឬ 20ដង ផងក៏មិនដឹង!?”

ជប៉ុនបានអះអាងរកឃើញអ្នកឆ្លងមេរោគសរុបចំនួន 15,777នាក់ ក្នុងនោះស្លាប់ 624នាក់ ដោយចំនួននេះ មិនរាប់បញ្ចូលអ្នកដំណើរ 712នាក់ ដែលត្រូវបានរកឃើញថា ឆ្លងមេរោគនេះនៅលើនាវាទេសចរណ៍ ដៃអាម៉ុន ព្រីនសេស ដែលចតនៅកំពង់ផែ និងត្រូវបានដាក់បង្ខាំងឱ្យនៅដោយឡែកនៅក្រៅឆ្នេរសមុទ្រជិតទីក្រុងតូក្យូ តាំងពីខែកុម្ភៈនោះឡើយ។

យ៉ាងណាក៏ដោយ ក្រុមអ្នករិះគន់បានប្រាប់ថា តួលេខអ្នកឆ្លងមេរោគពិតប្រាកដអាចខ្ពស់ជាងនេះ ជាង10ដង ព្រមទាំងរិះគន់រដ្ឋបាលរបស់លោកនាយករដ្ឋមន្ត្រី ស៊ីនហ្សូ អាបេ ថា មានចេតនាកំណត់ការពិនិត្យមេរោគប្រជាជន។

ក្រុមអ្នករិះគន់បានប្រាប់ថា រដ្ឋាភិបាលគិតតែពីខំប្រឹងព្យាយាមក្នុងការដំណើរការរៀបចំការប្រកួតកីឡាអូឡាំពិករដូវក្ដៅ ដែលទីក្រុងតូក្យូជាម្ចាស់ផ្ទះ ប្ដូរជាមួយការត្រួតពិនិត្យមេរោគប្រជាជនយ៉ាងមានកំណត់ តែនៅទីបំផុតទៅ គណៈកម្មការអូឡាំពិកអន្តរជាតិ និងជប៉ុន ក៏ឯកភាពគ្នានៅថ្ងៃទី24 មីនា សម្រេចពន្យារពេលការរៀបចំការប្រកួតនេះរហូតដល់ឆ្នាំក្រោយ។

សមាជិករដ្ឋសភា មកពីគណបក្សប្រឆាំង និងក្រុមអ្នកជំនាញការ បានទាមទារ ម្ដងហើយម្ដងទៀត ឱ្យរដ្ឋាភិបាលបន្ថែមបរិមាណការត្រួតពិនិត្យរកមេរោគដល់ប្រជាជន។

ថេដស៊ីរ៉ូ ហ្វ៊ូគូយ៉ាម៉ៈ លេខាធិការគណបក្សរដ្ឋធម្មនុញ្ញប្រជាធិបតេយ្យ(Constitutional Democratic Party ឬ CDP) បានប្រាប់ទៅគណៈកម្មាធិការថា ចំនួនប្រជាជនដែលមកសុំការពិនិត្យរកមេរោគ មានច្រើនជាង1លាននាក់ តែមានតែប្រហែល 60,000នាក់ប៉ុណ្ណោះ ដែលបានទទួលការត្រួតពិនិត្យរកមេរោគ។

ព័ត៌មានរបស់ក្រុមអ្នកស្រាវជ្រាវ Our World in Data នៃមហាវិទ្យាល័យ Oxford បានរកឃើញថា ជប៉ុនបានធ្វើការពិនិត្យមេរោគពីប្រជាជនបានត្រឹមតែ 1.68នាក់ប៉ុណ្ណោះសម្រាប់ចំនួនប្រជាជន 1,000នាក់(មិនដល់ 2នាក់ទេ ក្នុងចំនួនមនុស្ស1,000នាក់) ខណៈដែលកូរ៉េខាងត្បូង មានអត្រាការពិនិត្យមេរោគបាន 12.95(ជិត13នាក់) សម្រាប់ចំនួនប្រជាជន 1,000នាក់។

កាលពីអំឡុងចុងសប្ដាហ៍កន្លងមក ខាងក្រសួងសាធារណៈសុខាភិបាល ពលករ និងសុវត្ថិភាពសង្គម ទើបតែមានការសម្រេចចិត្តលុបចោលច្បាប់មួយចេញ ដើម្បីអនុញ្ញាតឱ្យប្រជាជនបានចូលទៅដល់ការត្រួតពិនិត្យមេរោគកាន់តែច្រើនឡើង បន្ទាប់ពីកាលពីពេលមុនហ្នឹង ធ្លាប់បានកំណត់ថា បុគ្គលដែលនឹងត្រូវទទួលបានការត្រួតពិនិត្យកូវីដ-19 ត្រូវតែមានសីតុណ្ហភាពរាងកាយលើស 37.5អង្សាC ឬក្ដៅខ្លាំងជាងហ្នឹងរយៈពេល 4ថ្ងៃជាប់គ្នាជាមុនសិន។

ខាស៊ឺណូប៊ុ ខាតូ រដ្ឋមន្ត្រីក្រសួងសាធារណៈសុខាភិបាល បានធ្វើការអះអាងកាលពីថ្ងៃសុក្រ(ទី8 ឧសភា) ថា ការកំណត់ខាងលើ គឺជា “ការយល់ច្រឡំ” និងជាពាក្យសម្ដីដែលបំប៉ោង និងសំឡេងរអ៊ូរទាំមួម៉ៅរបស់ប្រជាជន ក្នុងខណៈដែលក្រុមអ្នករិះគន់ បានបញ្ជាក់ថា ពួកអ្នករាជការក្នុងក្រសួង មិនហ៊ានពើងទ្រូងទទួលយកភាពបរាជ័យឡើយ។

កាលពីសប្ដាហ៍កន្លងទៅ លោកនាយករដ្ឋមន្ត្រី អាបេ បានពន្យារពេលការដាក់ប្រទេសក្នុងគ្រាអាសន្ន រហូតទៅដល់ចុងខែ
ឧសភា ក្នុងខណៈដែលប្រទេសជប៉ុនត្រូវប្រឈមនឹងតួលេខអ្នកឆ្លងមេរោគថ្មីខ្ទង់រយនាក់ជារៀងរាល់ថ្ងៃ។ ទាំងអស់នេះ រដ្ឋាភិបាលនឹងសម្រេចចិត្តនៅថ្ងៃព្រហស្បតិ៍(ទី14 ឧសភា)ខាងមុខនេះថា តើនឹងមានលុបចោលប្រកាសស្ថានការណ៍គ្រាអាសន្នក្នុងចំណែកខ្លះ ឬក៏អត់?៕

ប្រភព៖ សាព័ត៌មានបរទេស

May 12, 2020

COVID-19 នៅអាស៊ីអាគ្នេយ៍! តារាងស្ថិតិនៃករណីឆ្លង និងស្លាប់ដោយសារវីរុសកូរ៉ូណា

បណ្ដាប្រទេសនៅតំបន់អាស៊ីភាគអាគ្នេយ៍ទាំង11ប្រទេស បានរកឃើញអ្នកជំងឺCOVID-19 សរុបយ៉ាងតិច 59.748នាក់ និងអ្នកស្លាប់សរុបយ៉ាងតិច1.910នាក់។

សិង្ហបុរីដែលជាសម្បុកមេរោគកូរ៉ូណាធំជាងគេបង្អស់ក្នុងតំបន់អាស៊ីអាគ្នេយ៍ បានរាយការណ៍ថា មានអ្នកជំងឺថ្មីចំនួន451នាក់បន្ថែមទៀត នាំឱ្យតួលេខនៃអ្នកជំងឺសរុបរបស់ប្រទេសនេះឡើងដល់23,822នាក់។ ចំណែកអ្នកស្លាប់សរុបដោយសារវីរុសCOVID-19 នៅសិង្ហបុរីបានកើនដល់21នាក់ ខណៈដែលអ្នកជំងឺបានជាសះស្បើយមានចំនួន2,721នាក់។

កំណើននៃអ្នកជំងឺCOVID-19 ក្នុងប្រទេសជិតពាក់កណ្ដាលនៅអាស៊ីអាគ្នេយ៍ នៅតែបន្តកើនឡើង ខណៈដែលប្រទេសប្រមាណជាជិតពាក់កណ្ដាលផ្សេងទៀតក្នុងតំបន់នេះ រួមមាន កម្ពុជា វៀតណាម ទីម័រខាងកើត និងឡាវ ហាក់កំពុងស្ងប់ស្ងាត់ ដោយមកដល់បច្ចុប្បន្ន មិនទាន់មានករណីស្លាប់ដោយសារវីរុសCOVID-19 ដែលត្រូវបានគេរាយការណ៍ជាផ្លូវការនៅឡើយ។

ខាងក្រោមនេះគឺជាតារាងដែលបង្ហាញអំពីតួលេខនៃអ្នកជំងឺ និងអ្នកស្លាប់ដោយសារវីរុសCOVID-19 នៅតំបន់អាស៊ីអាគ្នេយ៍៖

ប្រភព៖ សារព័ត៌មានបរទេស

May 12, 2020

“ត្រាំ” វាយប្រហារ “ចិន” អាចមិនមែនត្រឹមតែសង្ឃឹម បិទបាំងកំហុសរបស់ខ្លួនឯង ក្នុងការទប់ទល់នឹងកូវីដ-19 ប៉ុណ្ណោះទេ

មើលតាមរយៈលទ្ធផលនៃសម្រង់ការយល់ឃើញរបស់ពលរដ្ឋអាមេរិកាំង ឃើញថា លោកប្រធានាធិបតី ដូណាល់ ត្រាំ ដូចជាមិនចាំបាច់ត្រូវអាស្រ័យលើការវាយប្រហារចិន ដើម្បីបង្វែរចំណាប់អារម្មណ៍ចេញពីកំហុសឆ្គងរបស់លោកក្នុងការទប់ទល់នឹងមេរោគកូវីដ-19 នោះទេ តែវាមើលឃើញច្បាស់ខ្លាំងណាស់ថា លោកត្រាំបាននឹករំពឹងសង្ឃឹម អាស្រ័យលើការតាមដេញបាញ់ចិនឥតឈប់នេះ គឺដើម្បីឱ្យខ្លួនឯងឈ្នះការបោះឆ្នោតក្នុងខែវិច្ឆិកាខាងមុខ ដោយលោក ចូ បៃដេន គូប្រជែងរបស់លោក ក៏មានគោលបំណងក្នុងទំនងដូចគ្នានេះដែរ។

លោកប្រធានាធិបតី ដូណាល់ ត្រាំ នៃសហរដ្ឋអាមេរិក កំពុងចងខ្លួនឯង និងអ្នកទស្សនា(អ្នកគាំទ្រ)ទាំងឡាយដោយមុខចំណងដែលចងច្រើនជាន់ទ្វេឡើងជារឿយៗ ដោយការថ្លែងបង្ហាញពីការយល់ឃើញក្នុងអំឡុងប៉ុន្មានសប្ដាហ៍ក្រោយៗនេះ ដែលពេលខ្លះលើកតម្កើង សរសើរចិន តែពេលខ្លះ ក៏វាយប្រហាររិះគន់ចិន ឆ្លាស់ទៅឆ្លាស់មកដែរ។ ទាំងអស់នេះ ប្រហែលជាមានតែខ្លួនលោកម្នាក់គត់ប៉ុណ្ណោះ ដែលអាចស្រាយមុខចំណងដ៏ច្របូកច្របល់ ដែលលោកខ្លួនឯងបានចងទុកនេះ ហើយលោកនឹងស្ថិតក្នុងឋានៈដែលនឹងធ្វើដូច្នេះបាន ក៏ប្រហែលជាត្រូវរង់ចាំរហូតទាល់តែដល់ខែវិច្ឆិកា នៅពេលដែលការទម្លាក់បណ្ណបោះឆ្នោតជ្រើសតាំងប្រធានាធិបតីសហរដ្ឋអាមេរិក កន្លងផុតទៅហើយតែប៉ុណ្ណោះ។

តើហេតុអី បានលោកត្រាំ ខំបញ្ចេញកម្លាំងប្រើពាក្យសម្ដី វោហារស័ព្ទគាបសង្កត់ចិនកាន់តែខ្លាំងឡើងក្នុងអំឡុងពេលនេះ? រឿងនេះអាចនឹងវាយតម្លៃបានច្រើនយ៉ាងខុសប្លែកពីគ្នា តែការអធិប្បាយដែលលេចធ្លោជាងគេ និងមានថាមពលគួរឱ្យជឿបាននោះ មាន 3ប្រការ។ មុនគេបង្អស់ គឺជាការវាយតម្លៃបែបដែលចិនចង់ឱ្យយើងជឿផងដែរនោះ បានបញ្ជាក់ថា អាចទៅរួចដែលលោកត្រាំបានពង្រីកការវិភាគរិះគន់ចិនរបស់លោក គឺដើម្បីបង្វែរចំណាប់អារម្មណ៍ចេញពីភាពបរាជ័យរបស់ក្រុមគណៈគ្រប់គ្រងរបស់លោកខ្លួនឯង ក្នុងការទប់ទល់ចាត់ការជាមួយជំងឺរាតត្បាតដ៏ធំដោយសារមេរោគវីរុសកូរ៉ូណានៅក្នុងសហរដ្ឋអាមេរិក។

មានរបាយការណ៍មួយដែលផ្សព្វផ្សាយខាងនីវយ៉ក ថាមស៍ កាលពីខែមេសា បានបញ្ជាក់ថា “ការពិនិត្យមើល បានបង្ហាញឱ្យឃើញថា លោកប្រធានាធិបតី បានទទួលពាក្យដាស់តឿន ពាក់ព័ន្ធនឹងភាពអាចទៅរួចក្នុងការកើតជំងឺរាតត្បាតដ៏ធំនេះ តែដោយសារតែការបែកបាក់គ្នាផ្ទៃក្នុង ការខ្វះខាតការរៀបចំផែនការ និងជំនឿទុកចិត្តរបស់លោកដែលមានចំពោះសញ្ជាតិញាណរបស់ខ្លួនឯង បាននាំឆ្ពោះទៅរកការឆ្លើយតប និងការទប់ទល់បែបមានចន្លោះប្រហោង ឆេវឆាវ និងតតាក់តតុប”។ របាយការណ៍នេះបានបន្តទៀតថា “ទីស្ដីការសភាសន្តិសុខជាតិ(National Security Council) ដែលទទួលខុសត្រូវរឿងការតាមដាន ការពារទប់ទល់នឹងជំងឺរាតត្បាតដ៏ធំទាំងឡាយ បានទទួលរបាយការណ៍ព័ត៌មានតាំងតែពីដើមខែមករា ដែលបានទស្សន៍ទាយពីការឆ្លងសាយភាយរបស់វីរុសនេះចូលមកក្នុងសហរដ្ឋអាមេរិក ហើយក្នុងអំឡុងពេលប៉ុន្មានសប្ដាហ៍បន្ទាប់ពីនោះ ក៏កំពុងតែមានការលើកឡើងពីសំណើ និងជម្រើសផ្សេងៗ ដែលស្រដៀងគ្នានឹងការទាមទារឱ្យពលរដ្ឋអាមេរិកាំងធ្វើការងារពីផ្ទះ និងការបិទទីក្រុងធំៗផងដែរ តែលោកប្រធានាធិបតី ត្រាំ បានទាត់ចោល មិនព្រមប្រើប្រាស់ដំណើរការទាំងនោះ រហូតទាល់តែមកដល់ខែមីនា”។

លោក Joe Biden អតីអនុប្រធានាធិបតីសហរដ្ឋអាមេរិក — លោក Joe Biden អតីតអនុប្រធានាធិបតីសហរដ្ឋអាមេរិក

ដូច្នេះលទ្ធផល ក៏គឺ លោកត្រាំបានបំផ្លាញពេលវេលាដ៏សំខាន់បំផុតនោះយ៉ាងខ្ចះខ្ជាយ ខណៈដែលចំនួនអ្នកឆ្លងមេរោគបានចាប់ផ្ដើមស្ទុះហក់ឡើងពេញ 1ខែកុម្ភៈ និងដើមខែមីនាជាប់រហូត… “ពីថ្ងៃទី26 កុម្ភៈ រហូតមកដល់ថ្ងៃទី16 មីនា ចំនួនករណីអះអាងថា ឆ្លងមេរោគកូវីដ-19 ក្នុងសហរដ្ឋអាមេរិក បានកើនឡើងពី 15 ទៅជា 4,226នាក់…(សម្រាប់ចំនួនអ្នកឆ្លងមេរោគកូវីដ-19សរុប ក្នុងខណៈពេលនេះ មានជាង 1លាននាក់ហើយ)។ មិនត្រឹមតែប៉ុណ្ណោះ ក្រុមមន្ត្រីដែលទទួលខុសត្រូវបានប្រាប់ផងដែរថា នៅមានទៀតជាច្រើនសែននាក់ដែលនៅមិនទាន់បានត្រួតពិនិត្យ ដែលក៏ប្រហែលជាមានឆ្លងមេរោគដូចគ្នា” និងខណៈនេះ ចំនួនអ្នកស្លាប់កំពុងស្ថិតក្នុងកម្រិតក្បែរៗ 80,000នាក់ហើយ រហូតមកដល់ថ្ងៃទី9 ឧសភា។

ដេញតាមបន្ទោសអ្នកដទៃ ដើម្បីបង្វែរចំណាប់អារម្មណ៍

អាចនាំគ្នាប៉ាន់ស្មានបានថា ការដើរតែថ្កោលទោស បន្ទោស និងថាឱ្យអ្នកដទៃ ដើម្បីបង្វែរចំណាប់អារម្មណ៍ បានក្លាយជាទីពឹងចុងក្រោយសម្រាប់គណៈរដ្ឋបាលរបស់លោកដូណាល់ ត្រាំ ក្នុងការបិទបាំងការខ្វះសមត្ថភាពរបស់ខ្លួនឯង។ លោកត្រាំ បានប្រើឥរិយាបថបែបចាំតែចោមរោមវាយប្រហាររហូតពេញមួយអំឡុងពាក់កណ្ដាលខែមីនា…មានការលើកសរសើរលោកប្រធានាធិបតី ស៊ី ជីន ភីង របស់ចិនថា កំពុងតែធ្វើបានល្អក្នុងការទប់ទល់នឹងការឆ្លងរាលដាលរបស់កូវីដ-19 តែរួចហើយសំឡេងបែបនេះ ក៏ផ្លាស់ប្ដូរបែបភ្លាមៗតែម្ដង នៅពេលដែលលោកងាកមកស្រែកប្រកាសពីប្រធានបទថ្មី ដោយបានហៅមេរោគវីរុសកូរ៉ូណាប្រភេទថ្មីនេះថា “វីរុសចិន”។

យ៉ាងណាក៏ដោយ ពេលតាមដាន ត្រួតពិនិត្យមើលយ៉ាងជិតស្និទ្ធដិតដល់ខ្លាំងឡើង បែរជារកឃើញថា លោកត្រាំ ដែលមានខ្សែភ្នែកមុតស្រួចខ្លាំងក្នុងរឿងវឌ្ឍចក្ររបស់ព័ត៌មាននោះ មិនមានភាពចាំបាច់ពិតប្រាកដអ្វីសោះឡើយ ក្នុងការត្រូវបែរមកពឹងលើវិធីដើរតែបន្ទោសអ្នកដទៃនោះ។ អត្រាការទទួលស្គាល់ស្នាដៃរបស់លោក នៅក្នុងផូលសម្រង់របស់ស្ថាប័ន Gallup poll ដែលបានផ្សព្វផ្សាយកាលពីថ្ងៃទី30 មេសា ស្ថិតក្នុងកម្រិតមិនគួរឱ្យជឿ គឺ 49%…ច្បាស់លាស់តែម្ដងថា ពិន្ទុទទួលស្គាល់លទ្ធផលការងាររបស់លោកជារួម គឺស្ថិតក្នុងកម្រិតអាច “រស់បាន” ជាពិសេសបំផុត មាន 50% ទៀតបានប្រាប់ថា ពួកគេទទួលស្គាល់ និងចូលចិត្តការចាត់ការជំងឺឆ្លងរាតត្បាតរបស់លោកត្រាំ។

លទ្ធផលនៃការសម្រង់ការយល់ឃើញរបស់ពលរដ្ឋអាមេរិកាំងជាថ្មី ដែលធ្វើឡើងដោយមជ្ឈមណ្ឌល Pew Research Center ក្នុងខែមីនាកន្លងទៅ បានបង្ហាញឱ្យឃើញថា “យើងអាចប៉ាន់ប្រមាណយ៉ាងត្រួសៗថា ប្រមាណជា 2ភាគ3នៃពលរដ្ឋអាមេរិក ក្នុងពេលនេះប្រាប់ថា ពួកគេមានការយល់ឃើញក្នុងទស្សនៈមិនចូលចិត្តប្រទេសចិន ដែលអាចរាប់ថា ជាភាគរយនៃអារម្មណ៍អវិជ្ជមានចំពោះប្រទេសមួយនេះ(ចិន)ដែលខ្ពស់បំផុត រាប់ចាប់ពីស្ថាប័នមួយនេះចាប់ផ្ដើមសួរសំណួរនេះក្នុងឆ្នាំ2005 និងកើនឡើងជិត 20% រាប់ចាប់តាំងពីគណៈគ្រប់គ្រងរបស់លោកប្រធានាធិបតី ដូណាល់ ត្រាំ ចាប់ផ្ដើមគ្រប់គ្រងសហរដ្ឋអាមេរិកក្នុងឆ្នាំ2017”។

រឿងដែលគួរឱ្យចម្លែកចិត្តបំផុត ក៏គឺ របាយការណ៍លទ្ធផលការសម្រង់ការយល់ឃើញរបស់ពលរដ្ឋអាមេរិកាំងក្នុងគ្រានេះ របស់ Pew Research Center បានឱ្យដឹងថា ពេលនេះមានពលរដ្ឋអាមេរិកាំង កើនឡើងច្រើន ដែលមើលឃើញថា សហរដ្ឋអាមេរិកជាមហាអំណាចខាងសេដ្ឋកិច្ច ដែលនាំមុខគេ លើសអ្នកណាៗទាំងអស់នៅក្នុងពិភពលោក ដែលលទ្ធផលនេះអាចរាប់បានថា ខ្ពស់ជាងការធ្វើសម្រង់ក្នុងគ្រាណាៗទាំងអស់ពេញមួយរយៈពេល 12ឆ្នាំកន្លងមក និងពួកគេបាននាំគ្នាជឿយ៉ាងខ្លាំងលើសលប់ដូចគ្នាថា ប្រទេសរបស់ពួកគេ គឺជាអ្នកនាំមុខផ្នែកយោធារបស់ពិភពលោក និងជឿទៀតថា ពិភពលោកនេះបានល្អប្រសើរឡើង ដោយសារតែការមានសហរដ្ឋអាមេរិកជាអ្នកដឹកនាំ ពេលប្រៀបធៀបនឹងការឱ្យ ចិនធ្វើជាអ្នកដឹកនាំ។

ខ្លាំងជាងនោះទៅទៀត “មានត្រឹមតែ 1ភាគ4” នៃប្រជាជនអាមេរិកប៉ុណ្ណោះ ដែលធ្វើសម្រង់ដោយស្ថាប័នដដែល បានប្រាប់ថា “ពួកគេមានទស្សនគតិនិយមពេញចិត្ត” ប្រទេសចិន។

សូមរង់ចាំអាន វគ្គបន្ត…

ប្រភព៖ សាព័ត៌មានបរទេស

ប្រែសម្រួលដោយ តាវ៉ែនតា

May 12, 2020

បើកប្រវត្តិ “គីម យ៉ូ ចង” ស្ត្រីដែលមនុស្សទូទាំងពិភពលោក តាមសង្កេតមើល ក្នុងឋានៈលេខាផ្ទាល់របស់បងប្រុស “គីម ជុង អ៊ុន”

តាមរយៈចរន្តព័ត៌មានរបស់លោក គីម ជុង អ៊ុន មេដឹកនាំកូរ៉េខាងជើង ដែលកាលពីប៉ុន្មានសប្ដាហ៍មុន មានលេចឮព័ត៌មានចចាមអារ៉ាមថា កំពុងតែមានអាការធ្ងន់ធ្ងរខាងសុខភាព និងមានព័ត៌មានខ្លះទៀត ដល់ថ្នាក់ផ្សព្វផ្សាយថា អាចនឹងក្លាយជាព្រះអង្គម្ចាស់និទ្រា (ពិការ ដេកនៅលើគ្រែ) រហូតនោះ បានធ្វើឱ្យមនុស្សទូទាំងពិភពលោក នាំគ្នាបែរមកតាមសង្កេតមើល គីម យ៉ួ ចង ដែលជាប្អូនស្រី និងជាស្ត្រីកូរ៉េខាងជើងដំបូងគេ ដែលអាចនឹងឈានឆ្ពោះទៅរកតំណែងខ្ពស់បំផុតរបស់ប្រទេសកុម្មុយនីស្តផ្ដាច់ការមួយនេះ។

បើកប្រវត្តិ “គីម យ៉ូ ចង” ស្ត្រីដែលមនុស្សទូទាំងពិភពលោក តាមសង្កេតមើល ក្នុងឋានៈលេខាផ្ទាល់របស់បងប្រុស “គិម ជុង អ៊ុន”

ថយត្រឡប់ទៅកាលពីខែកុម្ភៈ ឆ្នាំទៅ(2019) ក្រុងហាណូយ ប្រទេសវៀតណាម មានការរៀបចំការប្រជុំផុតកំពូលលើកទី2 រវាងលោកប្រធានាធិបតី ដូណាល់ ត្រាំ របស់សហរដ្ឋអាមេរិក ជាមួយលោក គីម ជុង អ៊ុន មេដឹកនាំនៃប្រទេសកូរ៉េខាងជើង ក្នុងប្រធានបទលុបបំបាត់កម្មវិធីអាវុធនុយក្លេអ៊ែរ និងបន្ធូរបន្ថយទណ្ឌកម្មសេដ្ឋកិច្ចពីប្រទេសកូរ៉េខាងជើង តែលទ្ធផលនៃការចរចាក្នុងគ្រានោះ ពុំទទួលបានគាប់ប្រសើរឡើយ ធ្វើឱ្យការចុះហត្ថលេខាលើកិច្ចព្រមព្រៀងផ្សេងៗត្រូវបានបរាជ័យទាំងអស់។

ដែលនៅក្នុងខណៈពេលនោះ ក្រៅពីគ្រប់ទីភ្នាក់ងារព័ត៌មានទូទាំងពិភពលោក បានតាមសម្លឹងមើលទៅលើ លោកដូណាល់ ត្រាំ និងលោក គីម ជុង អ៊ុន គ្រប់ឥរិយាបថហើយនោះ ក៏នៅមានស្ប៉តឡៃត៍ មួយទៀត បានហ្វូខឹស ទៅរកស្ត្រីជនជាតិកូរ៉េខាងជើងម្នាក់ឈ្មោះ គីម យ៉ូ ចង (Kim Yo Jong) ដែលជាប្អូនស្រីរួមខ្សែលោហិតរបស់ប្រមុខដឹកនាំកូរ៉េខាងជើងក្នុងឋានៈជា លេខាផ្ទាល់ អ្នកដើរតាមជាប់ពីក្រោយបងប្រុស ប្រៀបដូចជាស្រមោលរបស់បងប្រុសខ្លួនដូច្នោះដែរ។

ទាំងអស់នេះ “គីម យ៉ូ ចង” គឺជាប្អូនស្រីពៅ ដែលមានម្ដាយរួមគ្នាជាមួយលោក “គីម ជុង អ៊ុន” ដែលម្ដាយរបស់ពួកគេទាំង 2នាក់ គឺជាជនជាតិកូរ៉េខាងជើង ដែលជាប់ខ្សែស្រឡាយជប៉ុន និងរហូតមកដល់ពេលបច្ចុប្បន្ននេះ គ្មាននរណាម្នាក់បានដឹងពីអាយុពិតប្រាកដរបស់ គីម យ៉ូ ចង ឡើយ ដែលគេបានត្រឹមតែប៉ាន់ស្មានថា ប្រហែលជាខ្ទង់ជាង 30ឆ្នាំ។

“គីម យ៉ូ ចង” បញ្ចប់ការសិក្សាកម្រិតមធ្យមសិក្សានៅឯសាលា Liebefeld-Steinholzli នៅក្នុងប្រទេសស្វ៊ីស មុននឹងចូលទៅសិក្សាបន្តយកបរិញ្ញាត្រី នៅមហាវិទ្យាល័យ គីម អ៊ីល ស៊ុង ក្នុងទីក្រុងព្យុង យ៉ាង។ សម្រាប់ប្រវត្តិផ្នែកផ្សេងទៀតរបស់នាង មិនងាយរកបានឡើយ ព្រោះនាងតែងតែប្រើឈ្មោះក្លែងក្លាយក្នុងការរស់នៅ និងធ្វើកិច្ចការងារផ្សេងៗ។ ពីមុន នាងធ្លាប់គ្រងតំណែងជាអគ្គនាយិការង នៅក្នុងស្ថាប័នឃោសនាគោលនយោបាយ និងសកម្មភាពរបស់បក្សពលករកូរ៉េ។

ភាគច្រើន នាងច្រើនតែធ្វើជារបាំងត្រួតពិនិត្យដំបូងគេ មុននឹងចូលទៅដល់លោក គីម ជុង អ៊ុន។ នាងធ្វើគ្រប់យ៉ាង ដើម្បីផ្ដល់ភាពងាយស្រួលដល់បងប្រុស សូម្បីតែការឈរកាន់ចាន់គោះកន្ទុយបារីឱ្យបងប្រុសទៀតផង។ គេនាំគ្នានិយាយថា ដែលនាងត្រូវធ្វើដល់ថ្នាក់នោះ ព្រោះតែខ្លាច DNA របស់បងប្រុសត្រូវរបូតធ្លាយចេញទៅដល់ដៃខ្មាំង។
“គីម យ៉ូ ចង” តែងតែទទួលបានការជឿទុកចិត្តឱ្យដំណើរការរឿងសំខាន់ៗ ជាពិសេស រឿងដែលពាក់ព័ន្ធនឹងសម្ព័ន្ធភាពជាមួយប្រទេសកូរ៉េខាងត្បូង នាងហាក់ដូចជាមានតួនាទីក្នុងរឿងនេះច្រើន មិនថាតែក្នុងការរួមដៃគ្នារៀបចំការប្រកួតកីឡាអូឡាំពិករដូវរងា ក្នុងឆ្នាំ2018 រួមទាំងការប្រជុំកំពូលកាលពីឆ្នាំ2019 ទៀតផង។

សម្រាប់មុខតំណែងតួនាទីរបស់នាង នាពេលបច្ចុប្បន្នវិញ គឺអគ្គនាយិកាស្ថាប័នទំនាក់ទំនងផ្សព្វផ្សាយ ដែលមានតួនាទីចម្បងគឺ ការសាងនិមិត្តសញ្ញាល្អៗដល់បងប្រុសរបស់នាង គឺលោក គីម ជុង អ៊ុន ឱ្យមើលទៅឃើញស្អាត មានអំណាចនៅចំពោះមុខមនុស្សទូទាំងពិភពលោក។ ក្រៅពីនេះ នាងនៅបានទទួលការតែងតាំងឱ្យធ្វើជាសមាជិកម្នាក់ក្នុងក្រុម ប៉ូលីតបូរ៉ូ ដែលគេអាចនិយាយបានថា នាងគឺជាស្ត្រីដែលមានឥទ្ធិពលខ្លាំងបំផុតនៅក្នុងប្រទេសកូរ៉េខាងជើង បន្ទាប់ពីបងប្រុសរបស់នាង។

យ៉ាងណាក៏ដោយ មានរបាយការណ៍មិនផ្លូវការជាច្រើនបានឱ្យដឹងថា នៅក្នុងកិច្ចប្រជុំសាមញ្ញរបស់គណៈកម្មាធិការបក្សពលករ ដែលរៀបចំឡើងនៅក្នុងទីក្រុងព្យុងយ៉ាង កាលពីចុងឆ្នាំកន្លងទៅ(2019) ពួកគេ បានសម្រេចចិត្តក្នុងការរៀបចំការផ្ទេរអំណាចទាំងអស់ទៅឱ្យស្ត្រីម្នាក់នេះ(គីម យ៉ូ ចង) ដោយសារតែពេលនេះ “គីម ជុង អ៊ុន” ហាក់ដូចជាមិនអាចក្ដោបក្ដាប់អំណាចតទៅទៀតបានឡើយ ដោយសារតែបញ្ហាសុខភាព ហើយចាប់តាំងពីនោះមក សេចក្ដីសម្រេច និងបទបញ្ជាផ្សេងៗ ជាច្រើនរបស់បក្ស ក៏ជាការចុះហត្ថលេខារបស់ គីម យ៉ូ ចង ទាំងអស់ដែរ។

ក្រៅពីនេះ នៅមានរបាយការណ៍ពីទីស្នាក់ការផ្នែកព័ត៌មានអន្តរជាតិ បានឱ្យដឹងទៀតដែរថា លោកគីម ជុង អ៊ុន ធ្លាប់បានផ្ដល់បទសម្ភាសថា ប្អូនស្រីរបស់លោក ចាប់អារម្មណ៍ចង់ធ្វើការងារខាងនយោបាយ និងតាមរយៈចរន្តព័ត៌មានដែលបែកធ្លាយចេញមក ធ្វើឱ្យពេលនេះ រូបនាងគឺជាជនទី1 ដែលនឹងក្លាយជាអនាគតមេដឹកនាំរបស់កូរ៉េខាងជើង បន្ទាប់ពីបងប្រុសរបស់នាង ដែលរឿងនេះ គឺជារឿងថ្មីមួយដែលគួរឱ្យតាមដានសង្កេតយ៉ាងខ្លាំង ព្រោះនាងអាចនឹងក្លាយជាស្ត្រីដំបូងគេ ដែលឈានឡើងដល់តំណែងខ្ពស់បំផុតរបស់កូរ៉េខាងជើង ក៏អាចថាបានដែរ!!៕

ប្រភព៖ សារព័ត៌មានបរទេស

ប្រែសម្រួលដោយ តាវ៉ែនតា

May 12, 2020

Author: សឿន សំណាង