សឿន សំណាង - La Reine Media

អាមេរិកាំងប្រតិកម្មហើយ បន្ទាប់ពីចិនតឿនឱ្យសង “បំណុល” ដល់ UN

អាមេរិកាំងបានចោទប្រកាន់ចិនថា កំពុងតែព្យាយាម “បង្វែរ” ចំណាប់អារម្មណ៍របស់ពិភពលោកអំពីវិធានការទប់ទល់ COVID-19 ប្រកបដោយ “កំហុសឆ្គង និងលាក់បាំង” របស់ចិន បន្ទាប់ពី “មហាយក្ស” នៅអាស៊ីមួយនេះ បានតឿនឱ្យអាមេរិកាំងប្រញាប់ “សងបំណុល” ឱ្យអង្គការសហប្រជាជាតិ (UN)។

“គិតមកដល់ថ្ងៃទី14ឧសភា ខ្ទង់ប្រាក់សរុបដែលមិនទាន់ត្រូវបានទូទាត់សម្រាប់ទ្រទ្រង់របស់អង្គការសហប្រជាជាតិ (UN Regular Budget) និងថវិកាសម្រាប់ថែរក្សាសន្តិភាពរបស់អង្គការសហប្រជាជាតិ បានឡើងដល់ 1.6ពាន់លានដុល្លារ និង2.1ពាន់លានដុល្លារអាមេរិក” ចិនបានប្រកាសបែបនេះកាលពីថ្ងៃទី15ឧសភា ដោយដកស្រង់របាយការណ៍មួយពីការិយាល័យអគ្គលេខាធិការនៃអង្គការសហប្រជាជាតិ។

យោងតាមសេចក្ដីប្រកាសរបស់ទីក្រុងប៉េកាំង ខ្ទង់បំណុលខាងលើនេះបានអូសបន្លាយពេលជាច្រើនឆ្នាំកន្លងមកហើយ។ ក្នុងនោះ “សហរដ្ឋអាមេរិកគឺជាកូនបំណុលធំបំផុត ដោយនៅជំពាក់1.1ពាន់លានដុល្លារសម្រាប់ថវិកាទ្រទ្រង់(UN) និង1.3ពាន់លានដុល្លារសម្រាប់ថវិការក្សាសន្តិភាព”។

សហរដ្ឋអាមេរិកគឺជាអ្នកចូលរួមចំណែកក្នុងការបង់វិភាគទានច្រើនជាងគេបង្អស់សម្រាប់ជួយដល់អង្គការសហប្រជាជាតិ ក្នុងនោះមាន22% (ប្រមាណជា3ពាន់លានដុល្លារ/ឆ្នាំ) សម្រាប់ទ្រទ្រង់អង្គការនេះ និង25% (ប្រមាណជា6ពាន់លានដុល្លារ/ឆ្នាំ) សម្រាប់បេសកកម្មថែរក្សាសន្តិភាព។

យោងតាម AFP បើគិតជាផ្លូវការ សហរដ្ឋអាមេរិកត្រូវបង់ប្រាក់វិភាគទានចំនួន27.89% នៃថវិកាសរុបសម្រាប់សកម្មភាពរក្សាសន្តិភាព ប៉ុន្តែសភាអាមេរិកាំង និងប្រធានាធិបតី Donald Trump កាលពីឆ្នាំ2017 បានសម្រេចកាត់បន្ថយវិភាគទានរបស់ខ្លួនជាង2% ពោលគឺប្រហែល200លានដុល្លារ/ឆ្នាំ។

ប្រតិភូអាមេរិកាំងប្រចាំនៅអង្គការសហប្រជាជាតិបានច្រានចោលការអំពាវនាវរបស់ចិន ដោយបានចោទទីក្រុងប៉េកាំងថា “ប៉ុនប៉ងបង្វែរចំណាប់អារម្មណ៍ចេញពីការលាក់បាំង និងការគ្រប់គ្រងប្រកបដោយកំហុសរបស់ប្រទេសចិន ទៅលើវិបត្តិ COVID-19 ហើយនេះគឺជាមូលហេតុមួយ”។

ប្រតិភូអាមេរិកាំងឱ្យដឹងថា “ថ្មីៗនេះ សហរដ្ឋអាមេរិកបានបង់វិភាគទាន 726លានដុល្លារសម្រាប់បេសកកម្មថែរក្សាសន្តិភាព ហើយជាធម្មតាម នឹងបង់វិភាគទានមួយចំណែកធំនៅចុងឆ្នាំ”។

ទីក្រុងវ៉ាស៊ីងតោនបន្ថែមថា ខ្ទង់ប្រាក់វិភាគទានសរុបដែលមិនទាន់បង់សម្រាប់សកម្មភាពរក្សាសន្តិភាពគឺ 888លានដុល្លារ ហើយ2/3ក្នុងខ្ទង់នេះគឺជាលទ្ធផលពីការរួមចំណែកទៅតាមអត្រា25% ចាប់ពីឆ្នាំ2017 រហូតដល់បច្ចុប្បន្ន។

ការទូទាត់លើខ្ទង់វិភាគទានរបស់បណ្ដាប្រទេសជាសមាជិក UN សម្រាប់សកម្មភាពថែរក្សាសន្តិភាព គឺមានផលប៉ះពាល់ផ្ទាល់ដល់ខ្ទង់ប្រាក់ដែលអង្គការនេះត្រូវចំណាយទៅឱ្យបណ្ដាប្រទេសដែលបានបញ្ជូនទ័ពរបស់ពួកគេទៅបំពេញភារកិច្ចនានាចំនួន15លើករបស់អង្គការសហប្រជាជាតិ។

ប្រទេសចិនគឺជាអ្នកដែលបានចូលរួមបង់វិភាគទានច្រើនជាងគេលំដាប់ទី2 បន្ទាប់ពីសហរដ្ឋអាមេរិក ដោយចិនត្រូវបង់12% នៃថវិកាសរុបសម្រាប់ទ្រទ្រង់ UN និង15% សម្រាប់សកម្មភាពរក្សាសន្តិភាពរបស់អង្គការនេះ៕

ប្រភព៖ សារព័ត៌មានបរទេស

May 16, 2020

ចិនតឿនអាមេរិកាំងឱ្យឆាប់សងបំណុលអង្គការសហប្រជាជាតិ

ប្រទេសចិនបានអំពាវនាវឱ្យបណ្ដាប្រទេសជាសមាជិកនៃអង្គការសហប្រជាជាតិ (UN) ប្រញាប់បំពេញតួនាទីផ្នែកហិរញ្ញវត្ថុជាមួយនឹងអង្គការនេះ ដោយបានសង្កត់ធ្ងន់ថា សហរដ្ឋអាមេរិកនៅជំពាក់ UN ដល់ទៅជាង2ពាន់លានដុល្លារ។

“គិតមកដល់ថ្ងៃទី14ឧសភា ខ្ទង់ប្រាក់សរុបដែលមិនទាន់ត្រូវបានទូទាត់សម្រាប់ទ្រទ្រង់របស់អង្គការសហប្រជាជាតិ (UN Regular Budget) និងថវិកាសម្រាប់ថែរក្សាសន្តិភាពរបស់អង្គការសហប្រជាជាតិ បានឡើងដល់ 1.6ពាន់លានដុល្លារ និង2.1ពាន់លានដុល្លារអាមេរិក” ចិនបានប្រកាសបែបនេះកាលពីថ្ងៃទី15ឧសភា ដោយដកស្រង់របាយការណ៍មួយពីការិយាល័យអគ្គលេខាធិការនៃអង្គការសហប្រជាជាតិ។

យោងតាមសេចក្ដីប្រកាសរបស់ទីក្រុងប៉េកាំង ខ្ទង់បំណុលខាងលើនេះបានអូសបន្លាយពេលជាច្រើនឆ្នាំកន្លងមកហើយ។ ក្នុងនោះ “សហរដ្ឋអាមេរិកគឺជាកូនបំណុលធំបំផុត ដោយនៅជំពាក់1.1ពាន់លានដុល្លារសម្រាប់ថវិកាទ្រទ្រង់(UN) និង1.3ពាន់លានដុល្លារសម្រាប់ថវិការក្សាសន្តិភាព”។

សហរដ្ឋអាមេរិកគឺជាប្រទេសដែលចូលរួមបង់វិភាគទានធំជាងគេបង្អស់របស់អង្គការសហប្រជាជាតិ ពោលគឺប្រមាណជា22%នៃការចំណាយសរុបប្រចាំឆ្នាំរបស់ UN ដែលមានតម្លៃប្រហែល3ពាន់លានដុល្លារ និង25%សម្រាប់សកម្មភាពរក្សាសន្តិភាព ដែលមានតម្លៃជាទឹកប្រាក់ប្រហែល6ពាន់លានដុល្លារ។

មកដល់បច្ចុប្បន្ន មិនទាន់មានប្រតិកម្មណាមួយពីសហរដ្ឋអាមេរិកនៅឡើយទាក់ទិននឹងការប្រកាសរបស់ប្រទេសចិនដែលបានរៀបរាប់ខាងលើ។ ការទូទាត់លើខ្ទង់វិភាគទានរបស់បណ្ដាប្រទេសជាសមាជិក UN សម្រាប់សកម្មភាពថែរក្សាសន្តិភាព គឺមានផលប៉ះពាល់ផ្ទាល់ដល់ខ្ទង់ប្រាក់ដែលអង្គការនេះត្រូវចំណាយទៅឱ្យបណ្ដាប្រទេសដែលបានបញ្ជូនទ័ពរបស់ពួកគេទៅបំពេញភារកិច្ចនានាចំនួន15លើករបស់អង្គការសហប្រជាជាតិ។

នៅក្នុងរបាយការណ៍មួយដែលបានប្រកាសកាលពីថ្ងៃទី11ឧសភា អគ្គលេខាធិការនៃអង្គការសហប្រជាជាតិ Antonio Guterres បានព្រមានថា ការសងប្រាក់ទៅឱ្យបណ្ដាប្រទេសខាងលើនឹងអាចត្រូវពន្យារពេលយូរ លើកលែងតែ UN មានថវិកាគ្រប់គ្រាន់។

គិតមកដល់ថ្ងៃទី14ឧសភា ប្រទេសចំនួន50/193 ដែលជាសមាជិក UN ក្នុងនោះមានប្រទេសចិនជាដើម បានបង់ប្រាក់វិភាគទានរួចរាល់ហើយ។ ប្រទេសចិន ចូលរួមបង់វិភាគទានប្រមាណជា12%នៃការចំណាយសម្រាប់ទ្រទ្រង់ UN និង15% សម្រាប់សកម្មភាពរក្សាសន្តិភាពនៅជុំវិញពិភពលោក៕

ប្រភព៖ សារព័ត៌មានបរទេស

May 16, 2020

ជាង308,000នាក់ស្លាប់ដោយសារCOVID-19 នៅទូទាំងពិភពលោក

ពិភពលោកទាំងមូលមានមនុស្សជាង308,000នាក់បានបាត់បង់ជីវិតដោយសារមេរោគកូវីដ-១៩ ក្នុងចំណោមអ្នកជំងឺសរុបជាង4.6លាននាក់។

ប្រទេសនិងដែនដីចំនួន213ក្នុងសកលលោក ត្រូវបានគេរាយការណ៍ថា មានអ្នកជំងឺសរុប4,619,489នាក់ និងអ្នកស្លាប់សរុប308,108នាក់ ក្នុងនោះមានអ្នកជំងឺថ្មី101,273នាក់ និងអ្នកស្លាប់ថ្មី5,142នាក់។ អ្នកជំងឺដែលបានជាសះស្បើយមានចំនួនជាង1.7លាននាក់។ នេះបើតាមស្ថិតិរបស់ Worldometer។

ប្រទេសដែលជាសម្បុកមេរោគធំជាងគេក្នុងពិភពលោក នៅតែជាសហរដ្ឋអាមេរិក ដោយមានអ្នកជំងឺកូរ៉ូណាសរុប1,482,524នាក់ និងអ្នកស្លាប់សរុប88,424នាក់ បន្ទាប់ពីបានរកឃើញអ្នកជំងឺថ្មី24,931នាក់ និងអ្នកស្លាប់ថ្មី1,512នាក់នៅក្នុងរយៈពេល24ម៉ោងចុងក្រោយនេះ។

ប្រទេសដែលមានអ្នកជំងឺCOVID-19 លើសពី200,000នាក់ មាន6ប្រទេស រួមមាន សហរដ្ឋអាមេរិក អេស្ប៉ាញ រុស្ស៊ី អង់គ្លេស អ៊ីតាលី និងប្រេស៊ីល៕

ប្រភព៖ សារព័ត៌មានបរទេស

May 16, 2020

ពលរដ្ឋក្រីក្រនៅវ៉េណេស៊ុយអេឡា ហូប “ឈាមគោ” ជំនួសបាយ ដើម្បីរក្សាជីវិតក្នុងគ្រាអាសន្ន(វីដេអូ)

ចាប់តាំងពីប្រទេសវ៉េណេស៊ុយអេឡាបានចេញបម្រាមគោចរ ជារៀងរាល់ថ្ងៃ គេឃើញមានប្រជាជនក្រីក្រជាច្រើនតែងតែនាំគ្នាមកតម្រៀងជួររង់ចាំនៅខាងក្រៅទីតាំងកាប់គោមួយកន្លែងនៅក្នុងទីរួមស្រុកភាគខាងលិចតំបន់ San Cristobal ដើម្បីទទួលយកប្រូតេអ៊ីនដោយមិនគិតថ្លៃតែមួយគត់ នោះគឺ “ឈាមសត្វ”។

ជាងជួសជុលម៉ាស៊ីនម្នាក់ ឈ្មោះ Aleyair Romero អាយុ20ឆ្នាំ តែងតែមកសុំឈាមសត្វពីកន្លែងកាប់គោ 2លើកក្នុង1សប្ដាហ៍។ Aleyair Romero បានបាត់បង់ការងារ ធ្វើឱ្យគាត់គ្មានប្រាក់ទិញអាហារហូបប្រចាំថ្ងៃ ចំណែកអាហារដែលជាជំនួយរបស់រដ្ឋាភិបាលលោក Nicolas Maduro ក៏មានការយឺតយ៉ាវ។ “ខ្ញុំត្រូវតែស្វែងរកអាហារដែលខ្ញុំអាចរកបាន” Romero ថ្លែងបែបនេះ ខណៈកំពុងកាន់កូនធុងតូចមួយ រង់ចាំទទួលយកឈាមសត្វដែលកន្លែងសម្លាប់សត្វមួយនេះកំពុងចែកជូនដោយមិនគិតថ្លៃ។

ឈាមគោគឺជាផ្នែកមួយនៃទំនៀមទម្លាប់ក្នុងការចម្អិនស៊ុប ភីឆុន(pichon)របស់ជនជាតិវ៉េណេស៊ុយអេឡានៅតំបន់ Andes។ អ្នកក្រីក្រជាច្រើន បានចាប់ផ្ដើមស្វែងរកឈាមគោតាំងពីវិបត្តិ COVID-19 ចាប់ផ្ដើមកើតឡើងក្នុងប្រទេសនេះ។

នៅក្នុងប្រទេសវ៉េណេស៊ុយអេឡា ដើមឡើយគេឃើញមានមនុស្សតិចណាស់ដែលហូបឈាមគោជំនួសសាច់ ព្រោះថា ឈាមគោមានតម្លៃថ្លៃ។ ប៉ុន្តែ ចាប់តាំងពីប្រធានាធិបតី Maduro ចេញបញ្ជាឱ្យដំឡើងប្រាក់ខែបន្ថែម 150,000បូលីវ៉ា(bolivar) (ប្រហែល1.7ដុល្លារ) កាលពីខែតុលា2019 អត្រានៃការលក់ឈាមសត្វនៅប្រទេសនេះ ក៏បានកើនឡើងពីមួយថ្ងៃទៅមួយថ្ងៃ។

បើទោះជាមានអ្នកស្លាប់ដោយសារវីរុសCOVID-19 ត្រឹមតែ10នាក់ និងអ្នកជំងឺសរុប445នាក់ ប៉ុន្តែ ប្រជាជនក្នុងប្រទេសនៅអាមេរិកខាងត្បូងមួយនេះក៏ត្រូវទទួលផលវិបាកខ្លាំងពីវិបត្តិសេដ្ឋកិច្ច និងការយឺតយ៉ាវនៃកម្មវិធីផ្គត់ផ្គង់អាហារ CLAP របស់រដ្ឋាភិបាល។

នៅមុនវិបត្តិ COVID-19 អង្គការសហប្រជាជាតិធ្លាប់បានហៅគ្រោះទុរភិក្សនៅវ៉េណេស៊ុយអេឡាថាជាវិបត្តិមនុស្សធម៌អាក្រក់បំផុតមួយក្នុងពិភពលោកនាឆ្នាំ2019 ខណៈដែលមនុស្ស9.3លាននាក់ក្នុងចំណោមប្រជាជនសរុប30លាននាក់ មិនមានស្បៀងអាហារគ្រប់គ្រាន់។ ជាលទ្ធផល មនុស្សប្រមាណជា5លាននាក់បានបង្ខំចិត្តធ្វើចំណាកស្រុក។

ថ្វីបើរដ្ឋាភិបាលវ៉េណេស៊ុយអេឡងប្រកាសថា បានរកឃើញអ្នកជំងឺកូរ៉ូណាត្រឹមតែ440នាក់ និងអ្នកស្លាប់ត្រឹមតែ10នាក់ ក៏ប៉ុន្តែ ក្រុមអ្នកតាមដានស្ថានករណ៍ជឿថា តួលេខពិតប្រាកដគឺច្រើនជាងនេះឆ្ងាយណាស់។

ទីតាំងផ្ដល់អាហារដោយមិនគិតថ្លៃ មានមនុស្សកាន់តែច្រើនឡើងៗ ព្រោះតែការយឺតយ៉ាវរបស់រដ្ឋាភិបាលក្នុងការបែងចែកអាហារ ហើយបម្រាមគោចរដែលបានចាប់ផ្ដើមអនុវត្តតាំងពីពាក់កណ្ដាលខែមីនា បណ្ដាលឱ្យមនុស្សជាច្រើនបានបាត់បង់ការងារ។ Romero បានឱ្យដឹងថា “រដ្ឋាភិបាលបញ្ជូនអាហារមកឱ្យប្រជាជន តាមតែចិត្តរបស់ពួកគេ”។

ក្រុមអ្នកបម្រើនៅឯទីតាំងចម្អិនអាហារមួយក្នុងតំបន់ក្រីក្រនៃរដ្ឋធានី Caracas ដែលចាត់ចែងដោយក្រុម Feeding Solidarity បាននិយាយថា ជាធម្មតាពួកគេចម្អិន និងផ្គត់ផ្គង់អាហារឱ្យកុមារត្រឹមតែ80នាក់ប៉ុណ្ណោះ ប៉ុន្តែបច្ចុប្បន្នពួកគេត្រូវផ្គត់ផ្គង់ដល់មនុស្សពេញវ័យចំនួន350នាក់បន្ថែមទៀត។

នៅពេលទទួលស៊ុបមួយចាន ជាមួយនឹងសាំងវិចមួយដុំ ស្ដ្រីមួយចំនួនបានទុកអាហារខ្លះឱ្យកូនហូបនៅព្រឹកស្អែក។ អ្នកស្រី Ysimar Pernalete អាយុ38ឆ្នាំ មានកូន2នាក់ បានឱ្យដឹងថា “អាហារដែលបានពីកម្មវិធី CLAP មិនគ្រប់គ្រាន់សម្រាប់ឱ្យយើងឆ្លងផុតគ្រាលំបាកនេះទេ។ តើយើងត្រូវធ្វើយ៉ាងណាដើម្បីអាចនិយាយជាមួយកូនៗថា “ម្ដាយមិនមានអ្វីឱ្យកូនហូបនោះទេ!”?។

នៅឯកន្លែងកាប់គោក្នុងតំបន់ San Cristobal មនុស្សប្រមាណពី30ទៅ40នាក់ នាំគ្នាតម្រៀបជួររៀងរាល់ថ្ងៃដើម្បីសុំឈាម។ បុគ្គលិកម្នាក់នៅកន្លែងសម្លាប់សត្វនេះថ្លែងថា ឈាមសត្វនឹងត្រូវគេស្អប់នៅក្នុងសម័យក្រោយ COVID-19 មិនខាន។

“ពួកយើងឃ្លានខ្លាំងណាស់” Baudilio Chacon អាយុ46ឆ្នាំ ជាកម្មករសំណង់ម្នាក់ដែលបានបាត់បង់ការងារដោយសារវិធានការទប់ទល់នឹងCOVID-19 និយាយបែបនេះនៅពេលគាត់កំពុងរង់ចាំទទួលឈាមសត្វពីកន្លែងកាប់គោ។ គាត់បន្ថែមថា “ខ្ញុំមានបងប្អូនប្រុស4នាក់ និងក្មេងអាយុ10ឆ្នាំម្នាក់។ ពួកយើងរស់បានដល់ពេលនេះគឺដោយសារគុណរបស់ឈាមសត្វ”៕

ប្រភព៖ សារព័ត៌មានបរទេស

May 15, 2020

Facebook សាងសង់បណ្ដាញខ្សែកាបអ៊ីនធើណិតក្រោមសមុទ្រ ប្រវែងជិត1ជុំផែនដី

Facebook ត្រៀមកសាងបណ្ដាខ្សែកាប់អ៊ីនធើណិតក្រោមសមុទ្រ ដែលមានប្រវែងសរុប37,000គីឡូម៉ែត្រ តភ្ជាប់ប្រទេសចំនួន23នៅទ្វីបអាហ្វ្រិក ជាមួយនឹងទ្វីបអឺរ៉ុប និងមជ្ឈិមបូពា៌។

តំណាងរបស់ក្រុមហ៊ុន Facebook បានឱ្យដឹងថា គម្រោងខាងលើនេះមានឈ្មោះថា 2Africa (ឈ្មោះដំបូងគឺ Simba)។ គម្រោងនេះមានការសហការគ្នាជាមួយក្រុមហ៊ុនអ៊ីនធើណិតជាច្រើន រួមមាន China Mobile របស់ចិន MTN របស់ប្រទេសអាហ្វ្រិកខាងត្បូង Orange និង Vodafone របស់បារាំង ក៏ដូចជាបណ្ដាក្រុមហ៊ុនរកស៊ីក្នុងវិស័យទូរគមនាគមន៍ជាច្រើនទៀតនៅពាសពេញទ្វីបអាហ្វ្រិក ជាកន្លែងដែលខ្សែកាបអ៊ីនធើណិតទៅដល់។ ប្រព័ន្ធខ្សែកាបអ៊ីនធើណិតក្រោមសមុទ្រនេះនឹងត្រូវបានផ្គត់ផ្គង់ដោយក្រុមហ៊ុន Nokia ហើយក្រុមហ៊ុន Alcatel នឹងជាអ្នកសាងសង់។

ជាមួយនឹងប្រវែង37,000គីឡូម៉ែត្រនេះ Facebook ប្រកាសថា វាគឺជាបណ្ដាញខ្សែកាប់អ៊ីនធើណិតក្រោមសមុទ្រដែលវែងជាងគេបង្អស់មួយនៅក្នុងពិភពលោក ពោលគឺវា “ជិតស្មើនឹង1ជុំផែនដី”។

2Africa នឹងប្រើប្រាស់ខ្សែកាបដែលសរសៃខាងក្នុងរបស់វាធ្វើអំពីអាលុយមីញ៉ូម ជំនួសឱ្យសរសៃធ្វើអំពីស្ពាន់ ក្នុងបំណងដើម្បីបង្កើនសមត្ថភាពនៃការបញ្ជូនអ៊ីនធើណិត។ បន្ទាប់ពីកសាងរួចរាល់ បណ្ដាញខ្សែកាបនេះនឹងអាចផ្គត់ផ្គង់អ៊ីនធើណិតល្បឿន150Terabit/វិនាទី (1Terabit=1,000Gigabit)។ សមត្ថភាពនេះខ្លាំងជាង3ដងបើធៀបជាមួយនឹងបណ្ដាញខ្សែកាប់ទាំងអស់ដែលមាននៅទ្វីបអាហ្វ្រិកនាបច្ចុប្បន្ន បូកចូលគ្នា។

Kevin Salvadori ដែលជានាយកផ្នែកវិនិយោគលើអ៊ីនធើណិតរបស់ Facebook បានឱ្យដឹងថា ក្រុមហ៊ុននេះបានចាប់ផ្ដើមពិភាក្សាជាមួយដៃគូនានាអំពីគម្រោង 2Africa ចាប់តាំងពីឆ្នាំ2018។ គម្រោងនេះនឹងត្រូវសាងសង់រួចរាល់នៅក្នុងឆ្នាំ2023 ឬដើមឆ្នាំ2024 ហើយត្រូវដាក់ឱ្យដំណើរការភ្លាមៗ ក្រោយពីកសាងរួចរាល់។

តំណាងរបស់ Facebook បានបដិសេធមិនប្រាប់អំពីខ្ទង់ប្រាក់ដែលត្រូវចំណាយទៅលើគម្រោងនេះទេ។ ប៉ុន្តែ Michael Ruddy ដែលជានាយកផ្នែកសិក្សាស្រាវជ្រាវអន្តរជាតិនៃក្រុមហ៊ុនវិភាគទីផ្សារ Terabit Consulting Inc បានគន់គូរឃើញថា បណ្ដាញខ្សែកាបអ៊ីនធើណិតខាងលើនេះ នឹងត្រូវចំណាយប្រាក់យ៉ាងតិច 800លានដុល្លារអាមេរិក។

កន្លងមក ក្រុមហ៊ុន Facebook ក៏ធ្លាប់មានបំណងផ្គត់ផ្គង់ Wifi ទៅកាន់តំបន់ដាច់ស្រយាលនានានៅទូទាំងពិភពលោក ដែលក្នុងនោះក៏មានតំបន់នានាក្នុងទ្វីបអាហ្វ្រិកផងដែរ ដោយប្រើ Aquila (គម្រោងបាញ់រលកសញ្ញា Wifi តាមរយៈយន្តហោះគ្មានមនុស្សបើកដែលដំណើរការដោយថាមពលព្រះអាទិត្យ) ប៉ុន្តែគម្រោងនេះត្រូវបានផ្អាកចាប់ពីឆ្នាំ2018។

ក្រៅពី Facebook ក្រុមហ៊ុន Google ក៏កំពុងដំណើរការគម្រោងសាងសង់ខ្សែកាបអុបទិកមួយទៀតដែលមានឈ្មោះថា Equino ដែលនឹងតភ្ជាប់ទ្វីបអាហ្វ្រិកជាមួយនឹងអឺរ៉ុប។ Google ក៏កំពុងមានមហិច្ឆតាក្នុងការបាញ់រលកសញ្ញាអ៊ីនធើណិត 4G ទៅកាន់តំបន់ដាច់ស្រយាលនៅទូទាំងពិភពលោក ដោយគម្រោង Project Loon ដែលប្រើប្រាស់បាឡុងហោះ។ បច្ចុប្បន្ន គម្រោងនេះកំពុងធ្វើការសាកល្បងនៅក្នុងប្រទេសមួយចំនួននៅទ្វីបអាហ្វ្រិក ក្នុងនោះក៏មានប្រទេស Mozambique ផងដែរ។

សារព័ត៌មានផ្នែកបច្ចេកវិទ្យា WSJ បានឱ្យដឹងថា នាបច្ចុប្បន្ន ទ្វីបអាហ្វ្រិកមានប្រជាជនសរុបជាង 1.2ពាន់លាននាក់កំពុងរស់នៅ។ ក៏ប៉ុន្តែ ពួកគេភាគច្រើនមិនបានប្រើប្រាស់អ៊ីនធើណិត ឬបានប្រើដែរ តែតាមរយៈឧបករណ៍ 2G ប៉ុណ្ណោះ៕

ប្រភព៖ សារព័ត៌បរទេស

May 15, 2020

ចិនរឹបអូសប្រាក់ក្លែងក្លាយច្រើនបំផុតមិនធ្លាប់មានក្នុងប្រវត្តិសាស្ត្រ

កងកម្លាំងនគរបាលចិន បានធ្វើការរឹបអូសប្រាក់ក្លែងក្លាយចំនួន6តោន ដែលមានតម្លៃ422លានយន់ នៅក្នុងបេសកកម្មស្រាវជ្រាវរកបណ្ដាញផលិតក្រដាសប្រាក់ក្លែងក្លាយដ៏ធំនៅប្រទេសនេះ។

សមាជិកចំនួន16នាក់នៃបណ្ដាញផលិតប្រាក់ក្លែងក្លាយត្រូវបានចាប់ខ្លួន នៅក្នុងយុទ្ធនាការបោសសម្អាតទ្រង់ទ្រាយធំចាប់ពីខេត្តក្វាងទុង(Guangdong) នៅភាគខាងត្បូងប្រទេសចិន រហូតដល់ខេត្តហីឡុងជាំង(Heilongjiang) នៅភាគឦសានប្រទេស។ នេះបើតាមសេចក្ដីប្រកាសកាលពីម្សិលមិញរបស់ក្រសួងសន្តិសុខសាធារណៈរបស់ប្រទេសចិន។

កងកម្លាំងនគរបាល បានរឹបអូសប្រាក់ក្លែងក្លាយចំនួន6តោន មានតម្លៃស្មើនឹង422លានយន់(ប្រហែលនឹង59លានដុល្លារអាមេរិក) ដែលនេះគឺជាប្រាក់ក្លែងក្លាយមានចំនួនច្រើនបំផុតមិនធ្លាប់មាន រាប់ចាប់តាំងពីសាធារណរដ្ឋប្រជាមានិតចិនត្រូវបានបង្កើតឡើងកាលពីឆ្នាំ1849។ ក្រសួងសន្តិសុខសាធារណៈប្រទេសចិនបានអះអាងថា ប្រាក់ក្លែងក្លាយទាំងនេះមិនទាន់ត្រូវបានគេប្រើប្រាស់នៅឡើយ។ កងកម្លាំងនគរបាលចិនក៏បានប្រមូលយកឧបករណ៍ទាំងអស់ដែលទាក់ទិននឹងការផលិតប្រាក់ក្លែងក្លាយនេះ។

នគរបាលខេត្តក្វាងទុង បានរកឃើញតម្រុយនៃបណ្ដាញផលិតប្រាក់ក្លែងក្លាយទ្រង់ទ្រាយធំនេះកាលពីចុងឆ្នាំ2019 និងបានរាយការណ៍ទៅក្រសួងសន្តិសុខសាធារណៈ។ ក្រោយរយៈពេល3ខែនៃការស្រាវជ្រាវ ក្រសួងសន្តិសុខសាធារណៈកំណត់បានអត្តសញ្ញាជនសង្ស័យជាច្រើននាក់ ហើយក៏បានចាប់ផ្ដើមយុទ្ធនាការបោសសម្អាតព្រមៗគ្នា៕

ប្រភព៖ សារព័ត៌មានបរទេស

May 15, 2020

អីយ៉ា!! លោក ត្រាំ និយាយថា គ្មានអារម្មណ៍និយាយជាមួយ“ស៊ី ជីន ភីង”ទេ…លើកប្រធានបទកូវីដ-19 គំរាមផ្ដាច់សម្ព័ន្ធភាពទាំងអស់ជាមួយចិន

លោកប្រធានាធិបតី នៃសហរដ្ឋអាមេរិក ដូណាល់ ត្រាំ បានថ្លែងបញ្ជាក់នៅថ្ងៃព្រហស្បតិ៍(ទី14 ឧសភា)ថា លោកមិនស្ថិតក្នុងអារម្មណ៍ក្នុងការនិយាយជាមួយលោក ស៊ី ជីន ភីង មេដឹកនាំចិននោះទេ ព្រមទាំងដំឡើងសំឡេងព្រមានយ៉ាងមិនសូវជាច្បាស់លាស់ប៉ុន្មានថា លោកអាចនឹងកាត់ផ្ដាច់សម្ព័ន្ធភាពជាមួយមហាអំណាចគូទំនាស់មួយនេះ ចំពោះវិធីរបស់ក្រុងប៉េកាំងក្នុងការទប់ទល់នឹងការឆ្លងរាតត្បាតរបស់វីរុសកូរ៉ូណាប្រភេទថ្មី ឬកូវីដ-19។ នេះបើតាមការរាយការណ៍របស់ទីភ្នាក់ងារព័ត៌មាន AFP។

លោកប្រធានាធិបតី ដូណាល់ ត្រាំ បានថ្លែងនៅក្នុងបទសម្ភាសមួយជាមួយទីភ្នាក់ងារព័ត៌មាន Fox News ថា “ខ្ញុំមានសម្ព័ន្ធភាពដ៏ល្អខ្លាំងណាស់ តែពេលនេះ ខ្ញុំគ្រាន់តែមិនចង់និយាយជាមួយគេប៉ុណ្ណឹងឯង…អ្វីដែលខ្ញុំអាចប្រាប់ពួកអ្នកបាននៅពេលនេះគឺ ខ្ញុំមានអារម្មណ៍អស់សង្ឃឹមខ្លាំងណាស់ជាមួយចិន”

នៅពេលត្រូវបានសួរពាក់ព័ន្ធនឹងវិធីដែលសហរដ្ឋអាមេរិក អាចនឹងជ្រើសរើសប្រើសម្រាប់ឆ្លើយតបទៅចិនវិញនោះ លោកត្រាំ មិនបានផ្ដល់ចម្លើយយ៉ាងច្បាស់លាស់ចំៗណាមួយឡើយ តែបានប្រើសំឡេងក្នុងន័យគំរាមថា “មានរឿងជាច្រើនដែលយើងអាចធ្វើបាន យើងអាចនឹងធ្វើរឿងផ្សេងៗ យើងអាចនឹងកាត់ផ្ដាច់សម្ព័ន្ធភាពទាំងអស់” លោកបានបន្ថែមថា “បើអ្នកធ្វើបែបហ្នឹង តើវាហ្នឹងមានរឿងអ្វីកើតឡើងអ៊ីចឹងហ្អេ៎? អ្នកនឹងសន្សំសំចៃប្រាក់បាន 500,000ដុល្លារ បើអ្នកកាត់ផ្ដាច់សម្ព័ន្ធភាពទាំងអស់”

ភាពតានតឹងរវាងសហរដ្ឋអាមេរិក និងចិន កំពុងតែក្ដៅគគុកខ្លាំងឡើង ខណៈដែលពួកគេបានសាចភក់ដាក់គ្នាទៅវិញទៅមក ពាក់ព័ន្ធនឹងប្រភពកំណើតរបស់ជំងឺឆ្លងរាតត្បាតដ៏ធំ ដែលបានសម្លាប់ជីវិតមនុស្សទូទាំងពិភពលោករួចហើយអស់ជិត 300,000នាក់។

ច្រើនសប្ដាហ៍កន្លងទៅ ដែលលោកដូណាល់ ត្រាំ បានចោទប្រកាន់ចិនថា បានបិទបាំងការពិត ពាក់ព័ន្ធនឹងព្រំដែននៃការឆ្លងរាលដាល ដែលចាប់ផ្ដើមឡើងនៅក្នុងទីក្រុងវូហាន កាលពីអំឡុងចុងឆ្នាំ2019 ដោយហេតុនេះហើយ ទើបវាស្មើនឹងការបើកផ្លូវឱ្យមេរោគវីរុសកូរ៉ូណាប្រភេទថ្មីមានឱកាសឆ្លងរាលដាលយ៉ាងស្ងាត់ៗ។

ក្រុងប៉េកាំង បានបដិសេធការចោទប្រកាន់នេះយ៉ាងដាច់ខាត ព្រមទាំងអះអាងថា ពួកគេបានបញ្ជូនព័ត៌មានទាំងអស់ដែលមាន ទៅឱ្យអង្គការសុខភាពពិភពលោកយ៉ាងលឿនបំផុតតាមដែលអាចទៅរួច រួចហើយ។

យ៉ាងណាក៏ដោយ លោកត្រាំ បានបន្ថែមទម្ងន់ការចោទប្រកាន់ទាំងអស់នោះម្ដងទៀត ក្នុងអំឡុងការផ្ដល់បទសម្ភាសជាមួយ Fox News កាលពីថ្ងៃព្រហស្បតិ៍(ទី14 ឧសភា) ថា “ទាំងអស់ វាមកពីចិន ហើយពួកគេគួរតែបញ្ឈប់វាឱ្យបាន!!”៕

ប្រភព៖ សារព័ត៌មានបរទេស

May 15, 2020

សភាអាមេរិកាំងអនុម័តច្បាប់សម្រាប់ជនជាតិអ៊ុយហ្គួរ បើកផ្លូវឱ្យមានការដាក់ទណ្ឌកម្មចិន

សភាជាន់ខ្ពស់សហរដ្ឋអាមេរិកបានអនុម័តយល់ព្រមដោយមិនចាំបាច់បោះឆ្នោត ទៅលើសេចក្ដីព្រាងច្បាប់មួយសម្រាប់ជនជាតិអ៊ុយហ្គួរ ក្នុងបំណងបើកផ្លូវឱ្យមានការដាក់ទណ្ឌកម្មលើប្រទេសចិន ទាក់ទិននឹងបញ្ហាសិទ្ធិមនុស្ស។

កាលពីម្សិលមិញ(14ឧសភា) សភាជាន់ខ្ពស់អាមេរិកាំងបានអនុម័តច្បាប់គោលនយោបាយសិទ្ធិមនុស្សរបស់ជនជាតិអ៊ុយហ្គួរ (Uyghur) ដែលអំពាវនាវឱ្យមានការដាក់ទណ្ឌកម្មទៅលើអ្នកដែលត្រូវទទួលខុសត្រូវក្នុងអំពើឃុំឃាំងជនជាតិអ៊ុយហ្គួរ និងក្រុមអ្នកកាន់សាសនាឥស្លាមមួយចំនួនទៀតនៅតំបន់ស្វយ័តស៊ីនជាំង(Xinjiang) នៃប្រទេសចិន។ សេចក្ដីព្រាងច្បាប់នេះត្រូវបានរៀបចំឡើងដោយតំណាងរាស្ត្រ Marco Rubio មកពីបក្សសាធារណរដ្ឋ និងតំណាងរាស្ត្រ Bob Menendez មកពីបក្សប្រជាធតិបតេយ្យ នៃសភាជាន់ខ្ពស់អាមេរិកាំង។ សេចក្ដីព្រាងច្បាប់នេះត្រូវបានអនុម័តយល់ព្រមពីតំណាងរាស្ត្រទាំងអស់ក្នុងសភាជាន់ខ្ពស់អាមេរិកាំង។

ច្បាប់នេះស្នើឱ្យសេតវិមានបញ្ជូនរបាយការណ៍ឡើងទៅសភាក្នុងរយៈពេលយ៉ាងយូរ180ថ្ងៃ ដើម្បីកំណត់អត្តសញ្ញាណអ្នកទាំងឡាយណាដែលត្រូវបានចាត់ទុកថាជាអ្នកទទួលខុសត្រូវចំពោះអំពើរំលោភសិទ្ធិមនុស្សទៅលើជនជាតិអ៊ុយហ្គួរ។ អ្នកទទួលខុសត្រូវទាំងនោះនឹងត្រូវបានដាក់ទណ្ឌកម្មតាមរយៈការបង្កកទ្រព្យសម្បត្តិនៅសហរដ្ឋអាមេរិក និងការហាមមិនឱ្យចូលទឹកដីសហរដ្ឋអាមេរិកជាដើម។

សេចក្ដីព្រាងច្បាប់ខាងលើនេះនឹងត្រូវបានបញ្ជូនបន្តទៅកាន់សភាជាន់ទាបដែលបក្សប្រជាធតិបតេយ្យជាអ្នកគ្រប់គ្រង ដើម្បីធ្វើការពិនិត្យ និងអនុម័ត។ បើសិនជាសភាជាន់ទាបអនុម័តយល់ព្រម នោះសេចក្ដីព្រាងច្បាប់នេះនឹងត្រូវបញ្ជូនបន្តទៅកាន់សេតវិមានដើម្បីប្រធានាធិបតីពិនិត្យ និងសម្រេចថា គួរចុះហត្ថលេខាដើម្បីឱ្យវាក្លាយជាច្បាប់ដែរ ឬអត់។

សូមបញ្ជាក់ថា ចាប់តាំងពីឆ្នាំ2017 រដ្ឋាភិបាលចិនត្រូវបានចោទប្រកាន់ថា បានបញ្ជូនខ្លួនជនជាតិអ៊ុយហ្គួរ និងជនជាតិភាគតិចកាន់សាសនាឥស្លាមប្រមាណជា1លាននាក់ ទៅកាន់ជំរំមួយចំនួន។ ភាគីខាងប្រទេសចិនបានឱ្យដឹងថា ជំរំទាំងនោះគឺជា “មជ្ឈមណ្ឌលបណ្ដុះបណ្ដាលវិជ្ជាជីវៈ” ហើយពួកគេកំពុងប្រតិកម្មដោយស្របច្បាប់ទៅនឹងការគំរាមកំហែងពីភាពជ្រុលនិយមខាងសាសនា។ សេចក្ដីប្រកាសនេះរបស់ចិន មិនបានធ្វើឱ្យក្រុមប្រទេសលោកខាងលិចស្ងប់ចិត្តនោះទេ ពិសេសគឺសហរដ្ឋអាមេរិក។

គួររំឭកផងដែរថា សភាជាន់ទាប់អាមេរិកាំងកាលពីខែវិច្ឆិកា ឆ្នាំ2019 ក៏ធ្លាប់បានអនុម័តលើសេចក្ដីព្រាងច្បាប់មួយ ដែលឱ្យឈ្មោះថា Uighur Intervention and Global Humanitarian Unified Response Act of 2019 ឬ the UIGHUR Act of 2019 (ការធ្វើអន្តរាគមន៍ជួយជនជាតិអ៊ូហ្គួរ និងការឆ្លើយតបផ្នែកមនុស្សធម៌ជាសកល) ដែលអនុញ្ញាតឱ្យរដ្ឋាភិបាលអាមរិកាំង កំណត់អត្តសញ្ញាណ និងដាក់ទណ្ឌកម្មទៅលើមន្ត្រីណាដែលត្រូវបានគេចាត់ទុកថាជាអ្នកទទួលខុសត្រូវចំពោះអំពើឃុំឃាំងក្រុមជនជាតិភាគតិចនៅតំបន់ស្វយ័តស៊ីនជាំង ក្នុងក៏មានឈ្មោះលេខាធិការនៃគណៈកម្មាធិការបក្សរបស់ស៊ីនជាំង គឺលោក Chen Quanguo។

សេចក្ដីច្បាប់ថ្មីដែលទើបត្រូវបានសភាជាន់ខ្ពស់អាមេរិកាំងអនុម័តនេះ ក៏បាននិយាយដល់ឈ្មោះ Chen Quanguo និងអនុលេខាបក្សនៃតំបន់ស៊ីនជាំង គឺលោក Zhu Hailun ផងដែរ។

តំបន់ស្វយ័តស៊ីនជាំង (Xinjiang) នៃប្រទេសចិន

ចំណែកប្រទេសចិនវិញ ក៏ធ្លាប់ព្រមានថានឹងសងសឹក បើសិនជាលោក Chen Quanguo បានក្លាយជាគោលដៅនៃការដាក់ទណ្ឌកម្ម។ ប្រទេសចិនក៏បានហៅសកម្មភាពរបស់អាមេរិកាំងថាជា “អន្តរាគមន៍ប្រកបដោយហិង្សា” ទាក់ទិននឹងបញ្ហាផ្ទៃក្នុងរបស់ប្រទេសចិន នៅក្នុងតំបន់ស្វយ័តស៊ីនជាំង។

អគ្គរដ្ឋទូតចិនប្រចាំនៅរដ្ឋធានីវ៉ាស៊ីតោន មិនទាន់មានប្រតិកម្មចំពោះសេចក្ដីព្រាងច្បាប់ថ្មីរបស់សហរដ្ឋអាមេរិកខាងលើនេះនៅឡើយ។

ឥរិយាបថរបស់សភាជាន់ខ្ពស់អាមេរិកាំងនេះ ត្រូវបានធ្វើឡើងក្នុងស្ថានភាពទំនាក់ទំនងរវាងអាមេរិកនិងចិនកំពុងតែអាក្រក់ទៅៗដោយសារវីរុសCOVID-19។ អាមេរិកាំងបានចោទចិនថា មិនមានតម្លាភាព និងលាក់បាំងបញ្ហាវីរុស និងយឺតយ៉ាវក្នុងការប្រកាសអាសន្ន ប៉ុន្តែប្រទេសចិនបានទាត់ចោលរាល់ការចោទប្រកាន់ពីសហរដ្ឋអាមេរិក៕

ប្រភព៖ សារព័ត៌មានបរទេស

May 15, 2020

Trump មិនពាក់ម៉ាស់ទៀតហើយ ពេលកំពុងធ្វើទស្សនកិច្ចមន្ទីរផ្គត់ផ្គង់សម្ភារវេជ្ជសាស្ត្រ ខណៈអ្នកស្លាប់ក្នុងប្រទេសនេះកើនដល់ជាង 86,900នាក់

លោក Donald Trump មិនបានពាក់ម៉ាស់ការពារវីរុស នៅពេលដែលលោកកំពុងធ្វើទស្សនកិច្ចមជ្ឈមណ្ឌលគ្រប់គ្រងសម្ភារវេជ្ជសាស្ត្រនៅក្នុងរដ្ឋ Pennsylvania ខណៈដែលមនុស្សនៅជុំវិញ សុទ្ធតែពាក់ម៉ាស់ការពារ។

ប្រធានាធិបតីសហរដ្ឋអាមេរិក Donald Trump កាលពីថ្ងៃទី14ឧសភាកន្លងទៅ បានធ្វើទស្សនកិច្ចនៅមជ្ឈមណ្ឌលគ្រប់គ្រងសម្ភារវេជ្ជសាស្ត្រ Owens & Minor Inc នៅក្នុងរដ្ឋ Pennsylvania ជាកន្លែងផ្គត់ផ្គង់ម៉ាស់ប្រភេទ N95 និងខោអាវការពារមេរោគ រួមនឹងស្រោមដៃសុខាភិបាលដល់បណ្ដាមន្ទីរពេទ្យនៅសហរដ្ឋអាមេរិក។

រូបថតស្ដីអំពីដំណើរទស្សនកិច្ចនេះបង្ហាញថា ម្ចាស់សេតវិមានរូបនេះមិនបានពាក់ម៉ាស់នោះទេ ក្នុងពេលដែលមន្ត្រីអមដំណើរ និងបុគ្គលិករបស់មជ្ឈមណ្ឌលនេះសុទ្ធតែពាក់ម៉ាស់គ្រប់គ្នា។ នេះគឺជាលើកទីពីរហើយដែលលោក Trump មិនបានពាក់ម៉ាស់ក្នុងខណៈពេលធ្វើទស្សនកិច្ចមជ្ឈមណ្ឌលក្នុងវិស័យសុខាភិបាលនៅក្នុងអំឡុង10ថ្ងៃចុងក្រោយនេះ។ កាលពីថ្ងៃទី6ឧសភា លោកក៏មិនបានពាក់ម៉ាស់ដែរ នោពេលធ្វើទស្សនកិច្ចរោងចក្រ Honeywell។

ក្នុងគ្រានោះដែរ លោក Trump បានប្រកាសអំពីគម្រោងបន្ថែមទំនិញទៅក្នុងឃ្លាំងរក្សាសម្ភារវេជ្ជសាស្ត្រយុទ្ធសាស្ត្ររបស់សហរដ្ឋអាមេរិក ដែលបច្ចុប្បន្នមានការខ្វះខាតច្រើនដោយសារវីរុសCOVID-19។ លោក Trump ថែមទាំងបានចោទអតីតរដ្ឋាភិបាលរបស់លោក Barack Obama ថា បានបន្សល់ទុកផលវិបាកនេះដល់រដ្ឋាភិបាលបច្ចុប្បន្ន។ លោក Trump អះអាងថា នឹងស្វែងរកវិធីដើម្បីរក្សាសម្ភារវេជ្ជសាស្ត្រឱ្យបានគ្រប់គ្រាន់សម្រាប់ប្រើប្រាស់ក្នុងរយៈពេល3ខែ ដែលបច្ចុប្បន្នឃ្លាំងនេះអាចផ្គត់ផ្គង់ការប្រើប្រាស់បានតែរយៈពេល3សប្ដាហ៍ប៉ុណ្ណោះ។

ម្ចាស់សេតវិមានថ្លែងថា “ខ្ញុំប្ដេជ្ញាជួយឱ្យសហរដ្ឋអាមេរិកមានលទ្ធភាពគ្រប់គ្រាន់សម្រាប់ទប់ទល់នឹងជំងឺរាតត្បាតនាពេលអនាគត ហើយខ្ញុំសង្ឃឹមថា បញ្ហា (ជំងឺរាតត្បាត) នោះនឹងមិនកើតឡើងនោះទេ”។

ប្រភពព័ត៌មានបានឱ្យដឹងថា ប្រព័ន្ធសុខាភិបាលសហរដ្ឋអាមេរិកមានម៉ាស់ប្រភេទ N95 ប្រហែលតែ13លានបន្ទះប៉ុណ្ណោះនៅមុន COVID-19 ផ្ទុះឡើង។ ក្រុមមន្ត្រីជាន់ខ្ពស់របស់រដ្ឋាភិបាលអាមេរិកាំង កាលពីម្សិលមិញនិយាយថា ពួកគេកំពុងតែមានគម្រោងរកម៉ាស់ឱ្យបាន300លានបន្ថែមទៀតនៅមុនដំណាច់រដូវស្លឹកឈើជ្រុះ។

ចាប់តាំងពីមជ្ឈមណ្ឌលគ្រប់គ្រងនិងទប់ស្កាត់ជំងឺរបស់សហរដ្ឋអាមេរិក(Centers for Disease Control and Prevention) បានណែនាំឱ្យអ្នកគ្រប់គ្នាពាក់ម៉ាស់នៅទីសាធារណៈ គេឃើញថា លោក Trump បានប្រតិកម្មជាច្រើនលើកថា នោះជាប្រការ “មិនមានន័យ និងមិនស័ក្ដិសមជាមួយឋានៈជាមេដឹកនាំមួយរូបក្នុងពិភពសេរីភាព”។

វេជ្ជបណ្ឌិត Viswanath សាស្ត្រាចារ្យសារព័ត៌មានវេជ្ជសាស្ត្រមកពីមជ្ឈមណ្ឌលសិក្សាស្រាវជ្រាវផ្នែកវេជ្ជសាស្ត្រសាធារណៈ Harvard T.H. Chan របស់ឥណ្ឌាបានថ្លែងថា អ្នករាល់គ្នានឹងសង្កេតមើលសកម្មភាពរបស់អ្នកដឹកនាំដែលបានធ្វើផ្ទុយទៅនឹងការណែនាំដែលពួកគេបានលើកឡើង។ លោកថា “ក្នុងស្ថានភាពអាក្រក់បំផុត បញ្ហានេះអាចធ្វើឱ្យសាធារណជនសង្ស័យថា តើវិធានការ ឬសារណែនាំសម្រាប់ពួកគេពិតជាមានសារសំខាន់ ឬអត់”។

COVID-19 បានបង្ហាញខ្លួននៅក្នុងប្រទេសនិងដែនដីចំនួន212ក្នុងពិភពលោក បណ្ដាលឱ្យមនុស្សជាង4.5លាននាក់ត្រូវឆ្លងវីរុស និងជាង300,000នាក់បានស្លាប់។ សហរដ្ឋអាមេរិកគឺជាសម្បុកមេរោគធំជាងគេបង្អស់ក្នុងពិភពលោក ដោយមានអ្នកជំងឺកូរ៉ូណាជាង1.5លាននាក់ និងអ្នកស្លាប់ជាង 86,900នាក់៕

ប្រភព៖ សារព័ត៌មានបរទេស

May 15, 2020

ជាង300,000នាក់ស្លាប់ដោយសារ COVID-19 នៅទូទាំងពិភពលោក

ពិភពលោកទាំងមូលត្រូវបានគេរាយការណ៍ថា មានអ្នកស្លាប់ជិត303,000នាក់ដោយសារបានឆ្លងវីរុសកូរ៉ូណាប្រភេទថ្មី ខណៈដែលមនុស្សជាង4.5លាននាក់បានឆ្លងវីរុសនេះ។

ប្រទេសនិងដែនដីចំនួន212ក្នុងសកលលោក បានរកឃើញអ្នកជំងឺCOVID-19សរុប 4,518,216នាក់ និងអ្នកស្លាប់សរុប302,966នាក់ ក្នុងនោះមានអ្នកជំងឺថ្មីចំនួន94,314នាក់ និងអ្នកស្លាប់ថ្មីមានចំនួន5,301នាក់។ អ្នកជំងឺដែលបានជាសះស្បើយមានចំនួនជិត1.7លាននាក់។ នេះបើតាមស្ថិតិរបស់ Worldometer។

នៅក្នុងទ្វីបអឺរ៉ុបមានអ្នកជំងឺCOVID-19 សរុប1,718,672នាក់ ខណៈទ្វីបអាមេរិកមាន1,636,843នាក់ អាស៊ីមាន738,920នាក់ និងទ្វីបអាហ្វ្រិកមាន77,002នាក់។

ប្រទេសចំនួន3ដែលមានអ្នកជំងឺកូរ៉ូណាច្រើនជាងគេ នោះគឺសហរដ្ឋអាមេរិកឈរលំដាប់ទីមួយ (អ្នកជំងឺសរុប1,455,866នាក់) អេស្ប៉ាញឈរលំដាប់ទីពីរ(អ្នកជំងឺសរុប272,646នាក់) និងរុស្ស៊ីឈរលំដាប់ទីបី(អ្នកជំងឺសរុប252,245នាក់)៕

ប្រភព៖ សារព័ត៌មានបរទេស

May 15, 2020

Author: សឿន សំណាង