សឿន សំណាង - La Reine Media

កូរ៉េខាងជើងឆ្នាំ2020៖ ករណីប្រហារជីវិតព្រោះតែមើលភាពយន្តកូរ៉េខាងត្បូង មានការកើនឡើង

ជីវភាពរស់នៅរបស់ប្រជាជនកូរ៉េខាងជើងក្រោមការគ្រប់គ្រងរបស់គ្រួសារត្រកូល Kim នៅតែជាអាថ៌កំបាំងដែលពិភពលោកចាប់អារម្មណ៍។ ក្នុងសៀវភៅ “សៀវភៅសស្ដីអំពីសិទ្ធិមនុស្សរបស់កូរ៉េខាងជើងឆ្នាំ2020” របស់វិទ្យាស្ថានបង្រួបបង្រួមកូរ៉េខាងត្បូង (Korea Institute for National) ដែលត្រូវបានចេញផ្សាយកាលពីថ្ងៃទី12ឧសភាកន្លងទៅ បានបង្ហាញថា ក្នុងរយៈពេលច្រើនឆ្នាំចុងក្រោយនេះ ករណីកាត់ទោសប្រហារជីវិតនៅកូរ៉េខាងជើងមានការកើនឡើងខ្ពស់ ពិសេសគឺពាក់ព័ន្ធនឹងការប្រើប្រាស់គ្រឿងញៀន ការរក្សាទុក និងចែករំលែកខ្សែភាពយន្តកូរ៉េខាងត្បូង ទន្ទឹមនឹងនេះ ការផ្សព្វផ្សាយសាសនាគ្រិស្ត និងរក្សាទុកគម្ពីរគ្រិស្តសាសនាក៏ត្រូវបានកាត់ទោសប្រហារជីវិតផងដែរ។

រូបភាព៖ យោងតាម “សៀវភៅសស្ដីអំពីសិទ្ធិមនុស្សរបស់កូរ៉េខាងជើងឆ្នាំ2020” ស្ថានភាពនៃការណីប្រហារជីវិតនៅកូរ៉េខាងជើងបង្ហាញថា ការចែកចាយ និងប្រើប្រាស់គ្រឿងញៀន ការមើលនិងចែករំលែកភាពយន្តទូរទស្សន៍កូរ៉េខាងត្បូង ការផ្សព្វផ្សាយសាសនាគ្រិស្តនិងរក្សាគម្ពីរគ្រិស្តសាសនានៅក្នុងប្រទេសនេះមានការកើនឡើង

យោងតាមសារព័ត៌មាន JoongAng Ilbo របស់រដ្ឋាភិបាលកូរ៉េខាងត្បូង ខ្លឹមសាររបស់សៀវភៅសបានឱ្យដឹងថា ស្ថានភាពប្រជាជននៅកូរ៉េខាងជើងដែលទស្សនានិងចែករំលែកខ្សែភាពយន្តទូរទស្សន៍របស់កូរ៉េខាងត្បូងមានការកើនឡើងច្រើន ធ្វើឱ្យរដ្ឋាភិបាលទីក្រុងព្យុងយ៉ាងរឹតបន្តឹងការហាម និងការដាក់ទណ្ឌកម្ម។ ពលរដ្ឋម្នាក់ដែលបានរត់ចេញពីប្រទេសកូរ៉េខាងជើងបានសម្រេច បាននិយាយថា កាលពីឆ្នាំ2014 នៅទីលានមួយក្នុងខេត្ត North Hamgyong រដ្ឋអំណាចបានប្រហារជីវិតពលរដ្ឋដែលបានរត់ពន្ធថាសភាពយន្តទូរទស្សន៍កូរ៉េខាងត្បូង និងអ្នកជួញដូរថ្នាំញៀន។ ក្នុងឆ្នាំដដែល រដ្ឋអំណាចខេត្ត Ryanggang ក៏បានប្រហារជីវិតបុរស2នាក់ដោយចោទប្រកាន់ថាបានចែកចាយខ្សែភាពយន្តកូរ៉េខាងត្បូង និងផ្ដល់អាសយដ្ឋានទីតាំងអ្នករកស៊ីផ្លូវភេទ។

អ្នករត់គេចខ្លួនពីកូរ៉េខាងជើងក៏បាននិយាយថា រដ្ឋាភិបាលប្រទេសនេះបានហាមការផ្សព្វផ្សាយសាសនាគ្រិស្តផងដែរ ហើយអ្នកដែលរក្សាទុកគម្ពីរគ្រិស្តសាសនាក៏នឹងត្រូវប្រហារជីវិតជាសាធារណៈ។ ស្ថានភាពសិទ្ធិមនុស្សនៅក្នុងបណ្ដាពន្ធនាគាររបស់កូរ៉េខាងជើង មានលក្ខណៈអាក្រក់ជាងការស្មានទៅទៀត ដោយរដ្ឋអំណាចតែងតែធ្វើការហួសពីច្បាប់ដែលបានកំណត់ ពួកគេប្រហារជីវិតមនុស្សដោយមិនបាច់មានការកាត់ទោស។ ជនជាតិកូរ៉េខាងជើងដែលបានរត់ចោលប្រទេសបានថ្លែងថា កន្លងមក នៅក្នុងជំរំអ្នកទោស Chongori នៅខេត្ត North Hamgyong មានករណីអ្នកទោសវាយតប់គ្នាដែលធ្វើឱ្យអ្នកទោសម្នាក់ស្លាប់ ក្រោយមកអ្នកទោសម្នាក់ដែលបានចូលរួមក្នុងការវាយគ្នានោះក៏ត្រូវបានប្រហារជីវិតដោយការបាញ់សម្លាប់នៅនឹងមុខអ្នកទោសផ្សេងទៀត។

“សៀវភៅសស្ដីអំពីសិទ្ធិមនុស្សរបស់កូរ៉េខាងជើងឆ្នាំ2020” ក៏បានឱ្យដឹងថា បើទោះជាអាជ្ញាធរកូរ៉េខាងជើងតែងតែប្រហារជីវិតជាសាធារណៈ ប៉ុន្តែក្នុងមួយរយៈពេលចុងក្រោយនេះ ក្រុមមេដឹកនាំបានកាត់បន្ថយការបង្ខិតបង្ខំឱ្យពលរដ្ឋមូលដ្ឋានទៅមើលការប្រហារជីវិតរបស់រដ្ឋអំណាច ដូច្នេះ តួលេខនៃអ្នកទៅមើលការប្រហារជីវិតនៅកូរ៉េខាងជើងមានការថយចុះច្រើនជាបន្តបន្ទាប់។

សោកនាដកម្មនៅក្នុងជំរំអ្នកទោស

យោងតាមសារព័ត៌មាន The Asahi Shimbun របស់ជប៉ុន កាលពីឆ្នាំ2018 បានចេញផ្សាយថា ស្ថាប័ននេះបានសម្ភាសជាមួយស្ត្រីជនជាតិកូរ៉េខាងជើងម្នាក់ដែលមានឈ្មោះសម្គាល់ថា Eun-sook ដែលធ្លាប់ត្រូវបានឃុំខ្លួននៅក្នុងជំរំអ្នកទោស Chongori (ឬហៅថាជំរំ Kyo-hwa-so No.12) ក្នុងទីក្រុង Hoeryong ខែត្ត North Hamgyong។

Eun-sook បានឱ្យដឹងថា ជំរំអ្នកទោសខាងលើនេះមានអ្នកទោសភេទប្រុសសរុបប្រហែល2,000នាក់ និងស្រី600នាក់ ដែលភាគច្រើន (60%) ជាអ្នករត់គេចខ្លួនពីប្រទេសកូរ៉េខាងជើង ប៉ុន្តែត្រូវចិនបញ្ជូនត្រឡប់មកស្រុកវិញ ហើយក្រៅពីនេះគឺជាអ្នកទោសគ្រឿងញៀន និងអ្នកទោសលួចមើលខ្សែភាពយន្តកូរ៉េខាងត្បូង។ នៅក្នុងបន្ទប់ឃុំខ្លួន អ្នកទោសមានចំនួនច្រើន គឺច្រើនរហូតដល់ពេលគេង ពួកគេស្ទើរតែមិនអាចរើខ្លួនរួច។

Eun-sook បន្តថា អ្នកទោសក្នុងជំរំនេះបានធ្លាក់ខ្លួនឈឺជាបន្តបន្ទាប់ និងស្លាប់ដោយសារតែកង្វះអាហារូបត្ថម្ភ ឬកង្វះអនាម័យ។ នៅទីនេះ អ្នកទោសម្នាក់នឹងទទួលបានអាហារជាម្សៅពោធត្រឹមតែ150ក្រាម និងសម្លប្រៃមួយកូនចានប៉ុណ្ណោះសម្រាប់អាហារមួយពេល។

ឆ្នាំ2012 របាយការណ៍របស់គណៈកម្មធិការសិទ្ធិមនុស្សកូរ៉េខាងជើង (Committee for Human Rights in North Korea) ដែលជាអង្គការសិទ្ធិមនុស្សមួយរបស់សហរដ្ឋអាមេរិកក៏បានដកស្រង់សម្ដីពលរដ្ឋម្នាក់ដែលបានរត់រួចពីទឹកដីកូរ៉េខាងជើង ដែលធ្លាប់ត្រូវឃុំខ្លួននៅជំរំអ្នកទោស Kyo-hwa-so No.12 បានឱ្យដឹងថា អ្នកទោសប្រហែល800នាក់បានស្លាប់នៅក្នុងជំរំ ក្នុងអំឡូង8ខែដែលគាត់ត្រូវជាប់ឃុំនៅទីនោះ។

ពន្ធនាគារគួរឱ្យខ្លាចនៅកូរ៉េខាងជើង

យោងតាម BBC កាលពីឆ្នាំ2012 អ្នកផ្សព្វផ្សាយសាសនាម្នាក់ឈ្មោះ Kenneth Bae ត្រូវបានអាជ្ញាធរកូរ៉េខាងជើងចាប់ខ្លួន ព្រោះតែត្រូវបានគេចាត់ទុកថាជាសត្រូវរបស់ប្រទេសជាតិ។ Kenneth Bae គឺជាជនជាតិកូរ៉េខាងត្បូង ប៉ុន្តែមានសញ្ជាតិអាមេរិកាំង។ គាត់បានទៅកាន់កូរ៉េខាងជើងជាច្រើនលើក ហើយនៅពេលត្រូវបានចាប់ខ្លួន គេរកឃើញឧបករណ៍មួយដែលមានផ្ទុកព័ត៌មានស្ដីអំពីសាសនាគ្រិស្ត។ ដោយសារតែភ័ស្តុតាងនេះហើយ ទើបលោកត្រូវបានកាត់ទោសឱ្យជាប់ពន្ធនាគាររយៈពេល15ឆ្នាំ។

Kenneth Bae បានសរសេរនៅក្នុងសៀវភៅកំណត់ហេតុរបស់លោកថា ក្នុងខែដំបូងនៃការជាប់ពន្ធនាគារ លោកក៏ត្រូវមន្ត្រីពន្ធនាគារហៅទៅសួរនាំតាំងពីម៉ោង8ព្រឹកដល់ម៉ោង10 ឬ11យប់ ហើយក្រោយមកក៏បានបង្ខំឱ្យលោកសរសេរពាក្យសុំទោសរាប់សិបទំព័រ។ ចុងក្រោយក៏បានបញ្ជូនលោកទៅកាន់ជំរំពលកម្ម ដែលនៅក្នុងជំរំនេះ អ្នកទោសត្រូវក្រោកពីម៉ោង6ព្រឹក បន្ទាប់មកត្រូវធ្វើការងារធ្ងន់ធ្ងរគ្រប់យ៉ាង។ ក្នុង1សប្ដាហ៍ អ្នកទោសត្រូវជញ្ជូនថ្ម និងរករ៉ែធ្យូងថ្មចាប់ពីម៉ោង8ព្រឹកដល់ម៉ោង6ល្ងាច។ លោក Kenneth Bae បន្តថា ក្នុងរយៈពេល735ថ្ងៃនៃការទទួលទោសដោយពលកម្ម រាងកាយរបស់លោកត្រូវស្រកទម្ងន់ប្រហែល27គីឡូក្រាម ហើយសុខភាពក៏ទ្រុឌទ្រោម ដែលសព្វថ្ងៃលោកត្រូវទៅពេទ្យជាញឹកញាប់។ ក្រៅពីរងផលវិបាកផ្នែករាងកាយ លោក Kenneth Bae ក៏បានរងផលវិបាកផ្នែកសតិអារម្មណ៍ផងដែរ៕

ប្រភព៖ សារព័ត៌មានបរទេស

May 18, 2020

លទ្ឋផល Survey បង្ហាញថា ឆ្នាំ2019 លោក ជែក ម៉ា មានជាងគេបំផុតនៅក្នុងប្រទេស ដោយប្រាក់ចំណូល 9.13លានយន់/1ម៉ោង

លោក ជែក ម៉ា មានប្រាក់ចំណូលកើនឡើង 8ម៉ឺនលានយន់កាលពីឆ្នាំកន្លងទៅ ដែលមានន័យថា លោកបានសាងប្រាប់ចំណូលជាមធ្យម ក្នុង1ម៉ោង 9.13លានយន់។

ទីភ្នាក់ងារព័ត៌មាន ឆាយណា ដេលី បានរាយការណ៍កាលពីថ្ងៃទី12 ឧសភា ថា លោក ជែក ម៉ា ស្ថាបនិកបណ្ដាញក្រុមហ៊ុនអាលីបាបា បានឈរលើលំដាប់ថ្នាក់លេខ1 ក្នុងចំណោមមហាសេដ្ឋីទាំង 500នាក់នៅក្នុងប្រទេសចិន ដោយមានទ្រព្យសម្បត្តិច្រើនបំផុតសរុបជាង 3សែនលានយន់។

ទស្សនាវដ្តី New Fortune បានបង្ហាញពីលទ្ធផលស្ទាបស្ទង់ចំណាត់ថ្នាក់មហាសេដ្ឋីទាំង 500នាក់នៅក្នុងប្រទេសចិន ឆ្នាំ2019 ថា លំដាប់លេខ1 នៃអ្នកដែលមានទ្រព្យសម្បត្តិច្រើនបំផុតនៅក្នុងប្រទេសចិនឆ្នាំ2019 គឺលោក ជែក ម៉ា ដោយប្រាក់ចំណូលបានកើនឡើង 8ម៉ឺនលានយន់ក្នុងឆ្នាំកន្លងទៅ ដែលមានន័យថា លោកបានសាងប្រាក់ចំណូលបានជាមធ្យមក្នុង 1ម៉ោង 9.13លានយន់(ប្រមាណជាជាង 1.2លានដុល្លារអាមេរិក ក្នុងអត្រាប្ដូរប្រាក់ 1ដុល្លារ=7.11យន់) ច្រើនជាងអ្នកគ្រប់គ្រង់លំដាប់កំពូលរបស់ក្រុមហ៊ុនចុះបញ្ជីជាច្រើន។

លោក ហួង ជឹង ប្រធាន និងជា CEO របស់ក្រុមហ៊ុន Pinduoduo Inc បានជាប់ក្នុងបញ្ជីឈ្មោះ 10នាក់លើគេបំផុត ជាលើកដំបូង ដោយបានស្ថិតក្នុងលំដាប់ថ្នាក់លេខ8។

លោក ចាង យង់ និងភរិយា ឈូ ពីង ម្ចាស់មុខជំនួញឆ្នាំងភ្លើង ហៃទីឡៅ(Haidilao) បានឡើងមកឈរលើលំដាប់លេខ10 ដោយទ្រព្យសម្បត្តិ 1.172សែនលានយន់ កើនឡើងមកពីលំដាប់លេខ20 កាលពីឆ្នាំ2018។

លោក ស៊ុន ភៀវ យ៉ាង ប្រធានក្រុមហ៊ុន ចៀងស៊ូ ហេងរុយ(Jiangsu Hengrui Medicine Co Ltd) និងភរិយារបស់លោក គឺលោកស្រី ចុង ហ៊ុយ ចួន(Zhong Huijuan) ប្រធានក្រុមហ៊ុន Hansoh Pharmaceutical Group Company Limited ឬ “Hansoh Pharma” ក្រុមហ៊ុនជីវឱសថលំដាប់ជួរមុខនៅក្នុងប្រទេសចិន នៅតែជាប់ក្នុងបញ្ជីឈ្មោះមហាសេដ្ឋីទាំង 10 ដោយទ្រព្យសម្បត្តិដែលកើនឡើងលឿនបំផុត 1.10សែនលានយន់។

មហាសេដ្ឋីអ្នកមានបំផុតរបស់ចិនទាំង 500នាក់ មានទ្រព្យសម្បត្តិសរុបទាំងអស់ 10លានលានយន់ ដែលទាំងអស់នេះ បានបង្ហាញឱ្យឃើញអំពីសក្ដានុពលការអភិវឌ្ឍខាងសេដ្ឋកិច្ច ដ៏រឹងមាំនៅក្នុងប្រទេសចិន។

ក្នុងចំណោមមហាសេដ្ឋីទាំង 500នាក់នោះ មាន 96នាក់ មកពីឧស្សាហកម្មទូរគមនាគមន៍ ព័ត៌មាន និងតិចណូឡូជី ដែលមានចំនួនច្រើនជាងឧស្សាហកម្មអចលនទ្រព្យ 50%។

នៅពេលយុគសម័យ 5G ជិតចូលមកដល់ គេរំពឹងថា នឹងមានបុគ្គលដែលនឹងមានទ្រព្យសម្បត្តិច្រើនឡើងក្នុងការអភិវឌ្ឍអ៊ីនធើណិត ហើយនឹងក្លាយជាឱកាសមាស របស់ឧស្សាហកម្មថ្មីៗក្នុងផ្នែកបញ្ញាសិប្បនិម្មិត (AI) កុំព្យូទ័រ ខ្លោដ៍ មនុស្សយន្ត(Robot) និងBlockChain។

គួរបញ្ជាក់ដែរថា ការចាត់លំដាប់ថ្នាក់ 500 មហាសេដ្ឋីចិនលើកនេះ គឺជាឆ្នាំទី18ហើយ ដោយទស្សនាវដ្តី New Fortune ដែលបានចាប់ផ្ដើមរៀបចំធ្វើឡើងតាំងពីឆ្នាំ2003៕

ប្រភព៖ សាព័ត៌មានបរទេស

May 18, 2020

យន្តហោះយោធាកាណាដា ធ្លាក់ដាំក្បាលបុកទៅលើផ្ទះប្រជាជន ធ្វើឱ្យមនុស្សស្លាប់យ៉ាងតិចម្នាក់(វីដេអូ)

យន្តហោះមួយគ្រឿងដែលស្ថិតក្នុងក្រុមហោះហើរ Snowbirds របស់ទ័ពអាកាសនៃប្រទេសកាណាដា បានធ្លាក់នៅក្នុងពេលហោះហើរសម្ដែងដើម្បីលើកទឹកចិត្តប្រជាជនក្នុងគ្រាលំបាកដោយសារវីរុសCOVID-19 បណ្ដាលឱ្យអ្នកបើកបរយន្តហោះម្នាក់បាត់បង់ជីវិត។

កងទ័ពអាកាសរបស់ប្រទេសកាណាដា បានបង្ហោះសារប្រកាសនៅលើ Twitter កាលពីថ្ងៃទី17ឧសភាថា “យើងខ្ញុំពិតជាមានការសោកស្ដាយខ្លាំងណាស់ និងសូមជម្រាបជាដំណឹងថា សមាជិកម្នាក់នៃក្រុមហោះហើរសម្ដែង Snowbirds បានបាត់បង់ជីវិត និងម្នាក់ទៀតរងរបួសធ្ងន់”។

វីដេអូដែលត្រូវបានបង្ហោះនៅលើ Twitter បានបង្ហាញថា យន្តហោះ CT-114 Tutor ពីរគ្រឿងរបស់ក្រុម Snowbirds នេះ បានហោះឡើងពីអាកាសយានដ្ឋាននៃទីក្រុង Kamloops ខេត្ត British Columbia ដើម្បីធ្វើការសម្ដែងក្នុងបំណងលើកទឹកចិត្តប្រជាជនក្នុងវិបត្តិសុខភាពCOVID-19។ បន្ទាប់ពីហោះចេញពីព្រលាន យន្តហោះមួយគ្រឿងស្រាប់តែហោះឡើងខ្ពស់ជាងគេក្នុងល្បឿនយ៉ាងលឿន ហើយក៏ដាំក្បាលចុះតម្រង់ទៅដី។ អ្នកបើកបរយន្តហោះម្នាក់បានចុចបង្ហោះកៅអីសង្គ្រោះបន្ទាន់មុនពេលយន្តហោះដាំក្បាលបុកទៅលើផ្ទះប្រជាជន។

Rose Miller ជាប្រជាជនម្នាក់ដែលរស់នៅក្បែរកន្លែងកើតហេតុ ឱ្យដឹងថា នាងបានទៅកាន់បង្អួចនៅពេលឮសូរសំឡេងលាន់របស់យន្តហោះ និងសំឡេងផ្ទុះខ្លាំង ហើយក៏បានឃើញយន្តហោះនោះហោះបុកទៅលើដី។ Rose Miller បន្តថា “វាហាក់ដូចជាយន្តហោះដាំក្បាលបុកទៅលើផ្លូវ ហើយក៏ផ្ទុះឡើង ដោយបំណែករបស់វាបានខ្ទាតធ្លាក់រាយប៉ាយស្ទើរគ្រប់កន្លែង។ បំណែកធំមួយបានធ្លាក់មកលើទីធ្លាខាងក្រោយផ្ទះរបស់ខ្ញុំ ហើយប៉ូលិសនិយាយថា វាជាកៅសង្គ្រោះបន្ទាន់”។

ចំណែកទ័ពអាកាសកាណាដាបានឱ្យដឹងថា ហេតុការណ៍ធ្លាក់យន្តហោះនេះបានបណ្ដាលឱ្យអ្នកបើកបរយន្តហោះម្នាក់ ដែលជាប្រធានក្រុម ឈ្មោះ Jennifer Casey បានបាត់បង់ជីវិត ខណៈដែលអ្នកបើកបរម្នាក់ទៀតរងរបួសធ្ងន់។ ប្ដីប្រពន្ធមួយគូដែលរស់នៅក្នុងភូមិកើតហេតុខាងលើ បានរួចផុតពីការស្លាប់ប្រកបដោយមហាសំណាង នៅពេលត្រូវយន្តហោះបុកចំពីលើផ្ទះ ដែលពេលនោះ ស្ត្រីជាប្រពន្ធកំពុងស្ថិតនៅក្នុងបន្ទប់ក្រោមដី ចំណែកប្ដីរបស់នាងកំពុងនៅខាងក្រោយផ្ទះ។

សមត្ថកិច្ចបានជម្លៀសប្រជាជនចេញពីផ្ទះចំនួន5ខ្នងដែលនៅក្បែរកន្លែងកើតហេតុ។ “ហេតុការណ៍គ្រោះថ្នាក់នេះ ធ្វើឱ្យយើងភ្ញាក់ផ្អើលខ្លាំងណាស់” នេះបើតាមសម្ដីអភិបាលក្រុង Kamloops លោក Ken Christian។

យន្តហោះដែលជួបឧបទ្ទវហេតុខាងលើនេះ បានចូលរួមក្នុងយុទ្ធនាការហោះហើរសម្ដែងលើកទឹកចិត្តប្រជាជនដែលកំពុងរស់នៅក្រោមសម្ពាធ COVID-19។ យុទ្ធនាការនេះត្រូវបានចាប់ផ្ដើមធ្វើឡើងនៅតំបន់ Nova Scotia កាលពីដើមខែឧសភា។ Snowbirds បានបញ្ជូនយន្តហោះចំនួន9គ្រឿងទៅចូលរួមក្នុងយុទ្ធនាការខាងលើនេះ។

ក្រុម Snowbirds ប្រើប្រាស់យន្តហោះ CT-114 Tutor ដែលអភិវឌ្ឍដោយក្រុមហ៊ុន Canadair ចាប់ពីទសវត្សរ៍ឆ្នាំ1960។ កងទ័ពអាកាសកាណាដា បានដាក់ឱ្យប្រើប្រាស់យន្តហោះប្រដេញនេះកាលពីឆ្នាំ1963 ហើយបានប្រើវាសម្រាប់ការសម្ដែងចាប់ពីឆ្នាំ1971៕

ប្រភព៖ សារព័ត៌មានបរទេស

May 18, 2020

វីរបុរសវេជ្ជបណ្ឌិត សម័យមេរោគSARS អះអាងថា បើគ្មានវ៉ាក់សាំងការពារ ចិនមិនអាចនៅសុខបានទេ…

កាលពីថ្ងៃទី17 ឧសភា លោកវេជ្ជបណ្ឌិត ចុង ណានសាន អគ្គទីប្រឹក្សាផ្នែកវេជ្ជសាស្ត្ររបស់រដ្ឋាភិបាលចិន អ្នកដែលត្រូវបានទទួលស្គាល់ថាជាវីរបុរសកាលពីសម័យមេរោគសារស៍ រាតត្បាតនៅឆ្នាំ2003 បានផ្ដល់បទសម្ភាសជាមួយ CNN ទីភ្នាក់ងារព័ត៌មានធំបំផុតរបស់សហរដ្ឋអាមេរិក ដោយបានព្រមានថា ការខ្វះប្រព័ន្ធការពារមេរោគ នឹងធ្វើឱ្យចិនប្រថុយប្រថាននឹងការឆ្លងរាតត្បាតរបស់មេរោគកូវីដ-19 ជាថ្មីម្ដងទៀត ដែលនេះជាក្ដីព្រួយបារម្ភដ៏ធំមួយ។

“ការខ្វះប្រព័ន្ធការពារមេរោគកូវីដ-19 គឺជាបញ្ហាធ្ងន់ធ្ងរ ចិនត្រូវតែប្រញាប់អភិវឌ្ឍវ៉ាក់សាំងការពារមេរោគនេះតទៅទៀត ដោយមានវ៉ាក់សាំង 3ប្រភេទនៅក្នុងប្រទេសចិននាពេលបច្ចុប្បន្ននេះ កំពុងស្ថិតក្នុងដំណាក់កាលសាកខុស សាកត្រូវនៅឡើយ។ ចំណែកវ៉ាក់សាំងដែលល្អឥតខ្ចោះ ទំនងជាត្រូវប្រើពេលវេលាច្រើនឆ្នាំទៀត”

សម្រាប់តួលេខ អ្នកឆ្លងមេរោគវីរុសកូរ៉ូណាប្រភេទថ្មីរបស់ប្រទេសចិនមានជាង 82,000នាក់ ស្លាប់យ៉ាងតិច 4,633នាក់។ ការរស់នៅរបស់ប្រជាជាននៅក្នុងប្រទេសចិនបានវិលត្រឡប់ទៅរកសភាពប្រក្រតីវិញជាបណ្ដើរៗ បន្ធូរបន្ថយការបិទទីក្រុង ហើយសាលារៀន និងរោងចក្រមួយចំនួនត្រូវបានបើកឡើងវិញ តែយ៉ាងណាក្ដី នៅឯមណ្ឌលជីលីន រដ្ឋបាលក្នុងតំបន់ នៅត្រូវបង្ខាំងប្រជាជនយ៉ាងតិច 8,000នាក់ ឱ្យនៅដាច់ដោយឡែក ដើម្បីពិនិត្យមើលមេរោគនៅឡើយ។

លោកវេជ្ជបណ្ឌិត ចុង ថ្លែងថា អាជ្ញាធរចិន មិនគួរព្រងើយកន្តើយឡើយ ដោយសារតែគ្រោះថ្នាក់ពីការឆ្លងមេរោគរលកទី2 ដែលកំពុងបង្ហាញខ្លួនយ៉ាងទូលំទូលាយជាបណ្ដើរៗហើយ តាមរយៈករណី ក្លាស្ទើរ ឬក្រុមថ្មីនៃអ្នកឆ្លងមេរោគកូវីដ-19 បានបង្ហាញខ្លួនឡើងទូទាំងប្រទេសចិនក្នុងអំឡុង 2-3សប្ដាហ៍កន្លងទៅនេះ ដែលមិនមែនមានតែនៅជីលីនប៉ុណ្ណោះទេ តែរួមទាំងទីក្រុងវូហាន មណ្ឌលហ៊ូពេយ មណ្ឌលកណ្ដាលនៃការឆ្លងរាលដាលដំបូងគេនៅក្នុងប្រទេសចិន និងរួមទាំងមណ្ឌលហ៊ើយ ចៀងលង់ ទៀតផង។

លោកវេជ្ជបណ្ឌិត ចុង បានបន្តថា “ពលរដ្ឋចិនភាគច្រើនក្នុងអំឡុងពេលនេះ នៅតែទន់ជ្រាយចំពោះការឆ្លងមេរោគកូវីដ-19 នៅឡើយ ដោយសារតែខ្វះប្រព័ន្ធការពារមេរោគ…ខ្ញុំគិតថា ពេលនេះយើងកំពុងតែប្រឈមនឹងការសាកល្បងដ៏ធំមួយ ដែលវាមិនបានល្អជាងប្រទេសក្រៅប៉ុន្មានឡើយ”

លោកវេជ្ជបណ្ឌិត ចុង បានទទួលការតែងតាំងជាអ្នកដឹកនាំការតស៊ូប្រឆាំងនឹងមេរោគកូវីដ-19 នៅក្នុងប្រទេសចិន ជាពិសេសនៅក្នុងការឆ្លងរាតត្បាតដំណាក់កាលដំបូងៗ តាំងពីថ្ងៃទី20 មករាមក លោកវេជ្ជបណ្ឌិត បានអះអាងតាមរយៈស្ថានីយទូរទស្សន៍ CCTV ថា វីរុសកូរ៉ូណាប្រភេទថ្មី2019 អាចចម្លងតាមរយៈមនុស្សទៅមនុស្សបាន តែនៅពេលនោះក្រុមមន្ត្រីសាធារណៈសុខាភិបាលក្នុងតំបន់របស់ទីក្រុងវូហាន មិនទាន់បានអះអាងពីការចម្លងពីមនុស្សទៅមនុស្សនៅឡើយ។

ក្នុងឋានៈជាប្រធានក្រុមអ្នកជំនាញការ ដែលតែងតាំងដោយគណៈកម្មាធិការផ្នែកសុខភាពនៃប្រទេសចិន លោកវេជ្ជបណ្ឌិត ចុង បានចុះទៅទីក្រុងវូហាន នៅថ្ងៃទី18 មករា និងបានបញ្ជាក់ថា ក្នុងខណៈនោះ លោកបានទទួលទូរស័ព្ទជាច្រើនខ្សែពីគ្រូពេទ្យ និងកូនសិស្សរបស់លោកជាច្រើននាក់ ដែលបានប្រាប់លោកថា ស្ថានការណ៍អាក្រក់ខ្លាំងជាងខាងរដ្ឋបាលក្នុងតំបន់ រាយការណ៍ទៅទៀត។

លោកថ្លែងថា “អាជ្ញាធរក្នុងតំបន់ ក្នុងអំឡុងពេលនោះ ពួកគេមិនត្រូវការនិយាយការពិតទេ ហើយក្នុងអំឡុងពេលចាប់ផ្ដើមដំបូងៗ ក្រុមអាជ្ញាធរបានសម្ងំនៅស្ងៀម តែខ្ញុំបាននិយាយឡើងថា អ្នកឆ្លងមេរោគអាចមានចំនួនច្រើនជាងក្នុងរបាយការណ៍ ព្រោះតែនឹកសង្ស័យឡើងថា តាមរយៈការសង្កេតមើលតួលេខដែលរដ្ឋបាលតំបន់រាយការណ៍ពីស្ថានការណ៍នៅវូហាន នៅពេលនោះមានអ្នកជំងឺតែ 41នាក់ដដែលៗ រយៈពេល10ថ្ងៃ ទាំងដែលបាតុភូតឆ្លងរាលដាលនៅក្រៅប្រទេស បានកើតឡើងទៅហើយ”

លោកវេជ្ជបណ្ឌិត ចុង បានបន្ថែមថា “ខ្ញុំមិនជឿតួលេខចំនួនអ្នកឆ្លងមេរោគនោះទេ ដូច្នេះទើបខ្ញុំតែងសាកសួរជាប់ជានិច្ចថា អ្នកត្រូវប្រាប់តួលេខអ្នកឈឺពិតប្រាកដមកខ្ញុំ…ខ្ញុំគិតថា ពួកគេនៅស្ទាក់ស្ទើរខ្លាំងណាស់ក្នុងការឆ្លើយនឹងសំណួររបស់ខ្ញុំ”។

2ថ្ងៃ តមក វូហាន រាយការណ៍ថា មានអ្នកឆ្លងមេរោគខណៈពេលនេះចំនួន 198នាក់ ស្លាប់ 3នាក់ និងមន្ត្រីពេទ្យឆ្លងមេរោគ 13នាក់…តមក យើងបានរៀបចំការប្រជុំក្រុមមន្ត្រីរដ្ឋបាលមជ្ឈិមប៉េកាំង រួមទាំងលោក លី ខឺ ឈាង នាយករដ្ឋមន្ត្រីចិនរួមជាមួយផងដែរ ទើបលោកវេជ្ជបណ្ឌិតលើកសំណូមពរឱ្យបិទទីក្រុងវូហាន ដើម្បីទប់ស្កាត់ការឆ្លងរាលដាលរបស់មេរោគវីរុសដ៏សាហាវនេះ។

តមកទៀត ទីក្រុងវូហានត្រូវបានបិទ 100%នៅថ្ងៃទី23 មករា ជាហេតុការណ៍ដែលមិនធ្លាប់កើតមានឡើងពីមុនមក។ រហូតមកដល់ថ្ងៃទី27 មករា ទើបលោកចូ សៀន វ៉ាង អភិបាលក្រុងវូហាន ទទួលស្គាល់ថា រដ្ឋបាលក្នុងតំបន់របស់ខ្លួន បានបិទបាំងព័ត៌មានវីរុសឆ្លងរាលដាលចំពោះប្រជាជន តាមដែលបានធ្វើតាមៗគ្នាមក និងថា រដ្ឋបាលក្នុងតំបន់អាចបង្ហើបប្រាប់ពីព័ត៌មាននេះបាន លុះត្រាតែមានការអនុញ្ញាតជាមុន។

យ៉ាងណាក្ដី សម្រាប់ការសង្ស័យដែលថា ស្ថិតិរបស់រដ្ឋបាលចិន នៅតែមិនគួរឱ្យជឿជាក់ដដែល បើទោះជារដ្ឋបាលមជ្ឈិមប៉េកាំង បានចុះមកគ្រប់គ្រងដោយខ្លួនឯងក្នុងអំឡុងចុងខែមករាក្ដី រួមទាំងការតាំងសំណួរដែលបង្ហាញពីការមិនទុកចិត្តអំពីលោក ដូណាល់ ត្រាំ មេដឹកនាំសហរដ្ឋអាមេរិកផងនោះ លោកវេជ្ជបណ្ឌិត ចុង បានបដិសេធថា មិនមែនដូច្នោះទេ។

លោកវេជ្ជបណ្ឌិតថ្លែងថា “រដ្ឋបាលចិន បានទទួលមេរៀនពីអំឡុងពេលដែលមេរោគសារស៍រាតត្បាតរួចមកហើយ ដែលនៅពេលនោះចិនបានបិទបាំងការឆ្លងរាតត្បាតប្រមាណជា 2 ឬ 3ខែ តែលើកនេះ រដ្ឋបាលចិនបានប្រកាសថា គ្រប់ទីក្រុង គ្រប់សហគមន៍ គួរតែរាយការណ៍ពីតួលេខពិត បើសិនមិនធ្វើតាម នឹងត្រូវដាក់ទោស ដូច្នេះខ្ញុំគិតថា តាំងពីថ្ងៃទី23 មករាមក គ្រប់ព័ត៌មាន សុទ្ធតែត្រឹមត្រូវ”

អ្នកជំនាញការល្បីឈ្មោះរបស់ចិនរូបនេះ ថែមទាំងបានបដិសេធទ្រឹស្ដីដែលលោកដូណាល់ ត្រាំ និងលោកម៉ៃក៍ ប៉ុមប៉េអូ រដ្ឋមន្ត្រីការបរទេសសហរដ្ឋអាមេរិក ព្យាយាមវាយប្រហារចិនថា វីរុសនេះកើតឡើងនៅក្នុងមន្ទីរពិសោធន៍វូហាននោះទៀតផង។

លោកថ្លែងថា “កាលនោះ ខ្ញុំបានសួរបញ្ជាក់លោកស្រី ស៊ឺ ជឹង លី អ្នកជំនាញខាងជំងឺរាតត្បាតនៅឯស្ថាប័នជំងឺរាតត្បាតវិទ្យារបស់វូហាន លោកស្រីជាមិត្តភក្តិដ៏ល្អរបស់ខ្ញុំ។ លោកស្រីប្រាប់ថា ការចោទប្រកាន់ដែលសង្ស័យថា មេរោគវីរុសនេះកើតឡើងនៅក្នុងបន្ទប់ពិសោធន៍ដោយឧប្បត្តិហេតុនោះ គឺជារឿងផ្ដេសផ្ដាស់ វាគ្មានអ្វីបែបនោះទេ និងដោយឧបករណ៍ជំនួយភាពងាយស្រួលទាំងឡាយ និងបុគ្គលិកនៅទីនោះ វាមិនអាចទៅរួចសោះឡើយ ដែលថាមានការសាងវីរុសឡើងបាននៅក្នុងពេលនោះ”

នៅដើមខែកុម្ភៈ មានមន្ត្រីពីក្រុមគ្រប់គ្រងរោគពីផ្នែកមជ្ឈិមរបស់ចិន បានទៅត្រួតពិនិត្យបន្ទប់ពិសោធន៍របស់វូហាន អស់រយៈពេល 2សប្ដាហ៍ តែក៏រកមិនឃើញមានអ្វីខុសប្រក្រតីឡើយ៕

ប្រភព៖ សារព័ត៌មានបរទេស

ប្រែសម្រួលដោយ តាវ៉ែនតា

May 18, 2020

សង្គ្រាមពាក្យសម្ដីរវាង Trump និង Obama កាន់តែ “សាហាវ” ខណៈតួលេខអ្នកស្លាប់ដោយសារCOVID-19 នៅសហរដ្ឋអាមេរិក កើនលើស90,000នាក់

អតីតប្រធានាធិបតីសហរដ្ឋអាមេរិក លោក Barack Obama ថ្មីៗនេះ បានរិះគន់ជាបន្តបន្ទាប់ទៅលើការដឹកនាំរបស់រដ្ឋបាលលោក Donald Trump ទាក់ទងទៅនឹង COVID-19 ដែលនេះបានបណ្ដាលឱ្យប្រធានាធិបតីកំពុងកាន់អំណាច មានប្រតិកម្មតបយ៉ាងខ្លាំងក្លា។

ក្នុងអំឡុង24ម៉ោងចុងក្រោយនេះ សហរដ្ឋអាមេរិកបានរកឃើញអ្នកជំងឺកូរ៉ូណាថ្មីចំនួន19,053នាក់បន្ថែមទៀត ធ្វើឱ្យតួលេខអ្នកជំងឺCOVID-19 នៅប្រទេសនេះឡើងដល់ជាង1,526,800នាក់។ អ្នកស្លាប់ដោយសារវីរុសនេះ មានជាង90,970នាក់ ក្នុងនោះ អ្នកស្លាប់ថ្មីមានចំនួន860នាក់។ សហរដ្ឋអាមេរិកនៅតែជាសម្បុកមេរោគធំជាងគេបង្អស់ក្នុងពិភពលោក។

ទាក់ទងនឹងបញ្ហានៃវិធានការទប់ទល់នឹងវិបត្តិ COVID-19 នៅសហរដ្ឋអាមេរិក ថ្មីៗនេះ អតីតប្រធានាធិបតីសហរដ្ឋអាមេរិក លោក Barack Obama បានបញ្ចេញសំឡេងរិះគន់ទៅលើរដ្ឋបាលលោក Trump ជាបន្តបន្ទាប់ ធ្វើឱ្យលោក Trump ឆ្លើយតបប្រកបដោយភាពខ្លាំងក្លា។

លោក Barack Obama ធ្លាប់បានថ្លែងថា “មេរោគរាតត្បាតនេះ បានកាត់ផ្ដាច់យោបល់ដែលថា ថ្នាក់ដឹកនាំជាច្រើនបានដឹងថា ខ្លួនកំពុងធ្វើអ្វី។ ក្នុងចំណោមពួកគេ មានថ្នាក់ដឹកនាំមិនតិចនោះទេដែលមិនខ្ចីទាំងធ្វើពើថាខ្លួនកំពុងគ្រប់គ្រង (ការងារ)”។ លោកក៏បានសង្កត់ធ្ងន់ថា COVID-19 បានបង្ហាញអំពីភាពមិនស្មើភាពគ្នានៃពូជសាសន៍នៅហសរដ្ឋអាមេរិក។ អតីតប្រធានាធិបតីរូបនេះក៏បានបង្ហាញការខឹងសម្បាខ្លាំងចំពោះករណីបុរសស្បែកខ្មៅវ័យ25ឆ្នាំ ឈ្មោះ Ahmaud Armaud Arbery ត្រូវបានគេបាញ់សម្លាប់នៅពេលកំពុងដើរហាត់ប្រាណនៅឯរដ្ឋ Georgia កាលពីថ្ងៃទី23កុម្ភៈ2020 ដោយសារតែមិនបានឆ្លើយតបនឹងសំណួររបស់ក្រុមមនុស្សដែលចេញមករារាំងគាត់។ កាលពីដើមខែឧសភា លោក Obama បានហៅវិធានការទប់ទល់ COVID-19 របស់សេតវិមានថាជា “គ្រោះមហន្តរាយដ៏ច្របូកច្របល់”ផងដែរ។

ឆ្លើយតបនឹងការរិះគន់ខាងលើ លោក Trump ក៏បានចោទលោក Obama ថា “ពិតជាគ្មានសមត្ថភាព” ក្នុងអំឡុងកាន់អំណាច។ លោក Trump បន្តថា “ចូរគិតឡើងវិញ គាត់ធ្លាប់ជាប្រធានាធិបតីអសមត្ថភាព នោះគឺជាអ្វីដែលខ្ញុំអាចនិយាយបាន។ គាត់ជាមនុស្សអសមត្ថភាពពិតមែន”។

ថ្មីៗនេះ លោក Trump បានចាប់ផ្ដើមបង្ហោះសារជាបន្តបន្ទាប់ដើម្បីរិះគន់អតីតប្រធានាធិបតីអាមេរិកាំង។ លោក Trump បានប្រើប្រាស់ពាក្យ “Obamagate” ជាច្រើនលើក ដោយចោទលោក Obama ថា បានរារាំងលោកក្នុងដំណាក់កាលដំបូងនៃការឡើងកាន់អំណាចដោយការប្រើប្រាស់ FBI ដើម្បី “ដាក់អន្ទាក់” ចាប់ទីប្រឹក្សាផ្នែកនយោបាយមួយចំនួនរបស់លោក ដូចជាអតីតទីប្រឹក្សាសន្តិសុខជាតិ Michael Flynn ជាដើម។ លោក Trump យល់ថា លោក Obama នៅពីក្រោយការស៊ើបអង្កេតទៅលើករណីរុស្ស៊ីលូកដៃក្នុងការបោះឆ្នោតនៅសហរដ្ឋអាមេរិក បណ្ដាលឱ្យលោក Flynn ត្រូវជាប់ទោស។

នៅក្នុងប្រតិកម្មមួយកាលពីម្សិលមិញ (17ឧសភា) លោក Trump បានស្នើឱ្យកាត់ទោសលោក Obama និងលោក Joe Biden (បេក្ខភាពប្រធានាធិបតីមកពីបក្សប្រជាធិបតេយ្យ នាបច្ចុប្បន្ន) ឱ្យជាប់ពន្ធនាគារ50ឆ្នាំ។ ម្ចាស់សេតវិមាន បានចោទលោក Obama និងលោក Biden ថា ជាប់ទាក់ទិននឹងការស៊ើបអង្កេតមួយដែលលោក Trump ហៅថាជា “អំពើអាបធ្មប់” របស់ FBI ប្រឆាំងនឹងលោក Flynn៕

ប្រភព៖ សារព័ត៌មានបរទេស

May 18, 2020

រុស្ស៊ីជាសម្បុកមេរោគធំជាងគេលំដាប់ទី2ក្នុងពិភពលោក! រដ្ឋមន្ត្រីក្រសួងការបរទេសថាមិនបានលាក់បាំងតួលេខ ខណៈអភិបាលក្រុងម៉ូស្គូថាចំនួនអ្នកឆ្លងអាច…

ប្រទេសរុស្ស៊ីបានក្លាយជាសម្បុកមេរោគCOVID-19 ធំជាងគេលំដាប់ទី2ក្នុងពិភពលោកបន្ទាប់ពីសហរដ្ឋអាមេរិក ដោយមានអ្នកជំងឺសរុបជាង281,700នាក់។

ជាសម្បុកមេរោគកូរ៉ូណាធំជាងគេលំដាប់ទី2ក្នុងសកលលោក ប្រទេសរុស្ស៊ីមានអ្នកជំងឺCOVID-19 សរុប281,752នាក់ ក្នុងនោះមានអ្នកជំងឺថ្មី 9,709នាក់។ អ្នកដែលបានស្លាប់ដោយសារវីរុសកូរ៉ូណានៅប្រទេសនេះក៏បានកើនដល់2,631នាក់ បន្ទាប់ពីមានអ្នកស្លាប់ថ្មី94នាក់បន្ថែមទៀតក្នុងរយៈពេល24ម៉ោងចុងក្រោយនេះ។ អ្នកជំងឺដែលបានជាសះស្បើយមានចំនួន67,373នាក់។

រុស្ស៊ីជាសម្បុកមេរោគធំជាងគេលំដាប់ទី2ក្នុងពិភពលោក — រដ្ឋមន្ត្រីការបរទេសរុស្ស៊ី លោក Sergey Lavrov

សហព័ន្ធរុស្ស៊ី បានកាត់បន្ថយការរឹតត្បិតលើការដើរហើរ និងបានបញ្ចប់ការឈប់សម្រាកដែលមានប្រាក់ខែរបស់អ្នកធ្វើការភាគច្រើន ចាប់ពីថ្ងៃទី12ឧសភា។ រដ្ឋមន្ត្រីការបរទេសរុស្ស៊ី លោក Sergey Lavrov កាលពីថ្ងៃទី15ឧសភាបានអះអាងថា ប្រទេសនេះមិនបានលាក់បាំងតួលេខទាក់ទិននឹងវីរុសCOVID-19 នោះទេ ខណៈដែលអភិបាលក្រុងម៉ូស្គូ លោក Sergei Sobyanin បានព្រមានថា ទំហំនៃការឆ្លងរាលដាលរបស់មេរោគCOVID-19 នៅទីក្រុងម៉ូស្គូ អាចធំជាងតួលេខដែលបានរាយការណ៍ ព្រោះថា មានករណីជាច្រើនដែលអ្នកជំងឺមិនមានរោគសញ្ញា ដូច្នេះពួកគេមិនដឹងថាខ្លួនបានឆ្លងវីរុសនេះ ហើយក៏បន្តចម្លងទៅអ្នកដទៃដោយអចេតនា។

ពិភពលោកទាំងមូល បានរកឃើញអ្នកជំងឺ COVID-19 សរុបជាង4,798,000នាក់ និងអ្នកស្លាប់សរុបជាង316,500នាក់ ខណៈអ្នកជំងឺដែលបានជាសះស្បើយមានចំនួន 1,855,089នាក់។ នេះបើតាមស្ថិតិរបស់ Worldometer៕

ប្រភព៖ សារព័ត៌មានបរទេស

May 18, 2020

ជិង317,000នាក់ស្លាប់ដោយសារ COVID-19 នៅទូទាំងពិភពលោក

ពិភពលោកត្រូវបានគេរាយការណ៍ថា មានអ្នកស្លាប់ដោយសារវីរុសCOVID-19 ចំនួនជិត317,000នាក់ ក្នុងចំណោមអ្នកជំងឺជិត4.8លាននាក់។

ប្រទេសនិងដែនដីចំនួន213ក្នុងសកលលោក បានរកឃើញអ្នកជំងឺ COVID-19 សរុបចំនួន4,798,145នាក់ និងអ្នកស្លាប់សរុប316,507នាក់ ខណៈអ្នកជំងឺដែលបានជាសះស្បើយមានចំនួន 1,855,089នាក់។ នេះបើតាមស្ថិតិរបស់ Worldometer។

ទ្វីបអាមេរិកមានអ្នកជំងឺ COVID-19 ច្រើនជាងគេបង្អស់ ក្នុងនោះតំបន់អាមេរិកខាងជើងមានអ្នកជំងឺកូរ៉ូណាសរុប1,683,947នាក់ អាមេរិកខាងត្បូងមាន440,182នាក់ ខណៈអឺរ៉ុបមាន1,780,753នាក់ អាស៊ីមាន798,308នាក់ និងទ្វីបអាហ្វ្រិកមាន86,376នាក់។

បណ្ដាប្រទេសដែលមានអ្នកជំងឺកូរ៉ូណាច្រើនជាង100,000នាក់ មានចំនួន10ប្រទេស រួមមាន៖ សហរដ្ឋអាមេរិក រុស្ស៊ី អេស្ប៉ាញ អង់គ្លេស ប្រេស៊ីល អ៊ីតាលី បារាំង អាល្លឺម៉ង់ ទួរគី និងអ៊ីរ៉ង់៕

ប្រភព៖ សារព័ត៌មានបរទេស

May 18, 2020

ថៃ៖ ក្រុមហ៊ុន Thai Airways កំពុងត្រៀមខ្លួនដើម្បី “ក្ស័យធន”

រដ្ឋមន្ត្រីហិរញ្ញវត្ថុប្រទេសថៃ អ៊ុតតាម៉ា សុវណ្ណាយ៉ាណា បានបញ្ជាក់ថា ប្រទេសថៃកំពុងពិចារណាទៅលើលទ្ធភាពនៃការដាក់ឱ្យក្រុមហ៊ុន Thai Airways ក្ស័យធន។ មូលហេតុចម្បងដែលត្រូវបានគេលើកឡើងសម្រាប់បញ្ហាខាងលើនេះ នោះគឺវិបត្តិហិរញ្ញវត្ថុដែលក្រុមហ៊ុនអាកាសចរណ៍ថៃមួយនេះបាន និងកំពុងជួបប្រទះក្នុងរយៈពេលច្រើនឆ្នាំចុងក្រោយនេះ រួមនឹងឥទ្ធិពលរបស់ COVID-19។

សេចក្ដីសម្រេចចុងក្រោយនឹងត្រូវបានធ្វើឡើងដោយរាជរដ្ឋាភិបាល ឬតុលាការថៃ។ ការដាក់ឱ្យក្ស័យធនត្រូវបានគេចាត់ទុកថាជា “ការរុះរើ” ដ៏ធំមួយក្នុងបំណងកសាងឡើងវិញនូវក្រុមហ៊ុនអាកាសចរណ៍ជាតិនៃប្រទេសថៃ។

ព័ត៌មាននេះត្រូវបានរដ្ឋមន្ត្រីក្រសួងហិរញ្ញវត្ថុថៃ លោក អ៊ុតតាម៉ា សុវណ្ណាយ៉ាណា (Uttama Savanayana) លើកឡើងកាលពីចុងសប្ដាហ៍កន្លងទៅ។ ដំណើរការខាងលើនេះនឹងត្រូវបានធ្វើឡើងដោយជោគជ័យ បើសិនជាមានការយល់ព្រមពីគណៈកម្មាធិការគោលនយោបាយសហគ្រាសរបស់រដ្ឋ និងរាជរដ្ឋាភិបាល ឬតាមរយៈសាលក្រមរបស់តុលាការ។

រដ្ឋមន្ត្រីក្រសួងហិរញ្ញវត្ថុថៃ បានឱ្យដឹងថា “ក្រសួងហិរញ្ញវត្ថុ និងក្រសួងដឹកជញ្ជូន រួមនឹងស្ថាប័នតាមដាន Thai Airways ក្នុងនាមជាក្រុមហ៊ុនរដ្ឋ បានពិភាក្សាគ្នារួចហើយដើម្បីលើកឡើងអំពីផែនការរុះរើ និងបង្កើតឡើងវិញនូវក្រុមហ៊ុននេះ ក៏ប៉ុន្តែ រាល់កិច្ចការនៅតែអាស្រ័យទៅលើការសម្រេចចុងក្រោយរបស់គណរដ្ឋមន្ត្រី។ រាជរដ្ឋាភិបាលនឹងរើសយកជម្រើសល្អបំផុតសម្រាប់ Thai Airways ក៏ដូចជាភាគីពាក់ព័ន្ធ”។

មុននេះ យោងតាមទិន្នន័យពីនាយកដ្ឋានគ្រប់គ្រងផ្សារមូលបត្រថៃ ការខាតបង់សុទ្ធរបស់ Thai Airways បានកើនឡើងពី 2.11ពាន់លានបាតនៅក្នុងឆ្នាំ2017 ឡើងដល់11.6ពាន់លានបាតនៅក្នុងឆ្នាំ2018 និង12ពាន់លានបាត ដែលស្មើនឹង374,299,650ដុល្លារអាមេរិក ក្នុងឆ្នាំ2019។

កាលពីចុងខែមេសាកន្លងទៅ ដើម្បីជៀសវាងហានិភ័យក្លាយជាក្រុមហ៊ុនអាកាសចរណ៍ជាតិដំបូងគេក្នុងពិភពលោកត្រូវក្ស័យធនដោយសារ COVID-19 ក្រុមហ៊ុន Thai Airways បានស្នើសុំជំនួយជាទឹកប្រាក់ចំនួន10ពាន់លានបាត (307លានដុល្លារ) ពីរាជរដ្ឋាភិបាលថៃដើម្បីបើកប្រាក់ខែជូនបុគ្គលិកចំនួន1ខែ។ ក្រុមហ៊ុននេះក៏បានស្នើឱ្យមានការអនុម័តផ្ដល់ប្រាក់កម្ចីចំនួន70ពាន់លានបាត (ជាង 2,183,414,000ដុល្លារអាមេរិក) ផ្សេងទៀត ដោយមានក្រសួងហិរញ្ញវត្ថុជាអ្នកធានា ដើម្បីអាចបន្តសកម្មភាពជំនួញទៅមុខទៀត៕

ប្រភព៖ សារព័ត៌មានបរទេស

May 17, 2020

COVID-19! អ្នកជំងឺកើនលើសមួយលានកន្លះនៅអាមេរិក លោក Obama បន្តរិះគន់ខ្លាំងលើរដ្ឋាភិបាល

អ្នកស្លាប់ថ្មីដោយសារវីរុសCOVID-19 នៅសហរដ្ឋអាមេរិក ត្រូវបានរាយការណ៍ថា មានចំនួន1,500នាក់បន្ថែមទៀតក្នុងរយៈពេល24ម៉ោងចុងក្រោយនេះ នាំឱ្យចំនួនអ្នកស្លាប់សរុបឡើងដល់88,424នាក់ ក្នុងចំណោមអ្នកជំងឺសរុបជាង1.5លាននាក់។ ទាំងនេះជាមូលហេតុមួយដែលនាំឱ្យអតីតប្រធានាធិបតីអាមេរិកាំង លោក Barack Obama បន្តរិះគន់កាន់តែខ្លាំងក្លាទៅលើរដ្ឋបាលលោក Trump។

សហរដ្ឋអាមេរិកទើបតែបានរកឃើញអ្នកជំងឺថ្មីចំនួន22,726នាក់បន្ថែមទៀត ធ្វើឱ្យតួលេខសរុបនៃអ្នកជំងឺ COVID-19 នៅប្រទេសនេះបានកើនដល់1,505,250នាក់ ក្នុងនោះមានអ្នកស្លាប់សរុបចំនួន89,521នាក់ អ្នកស្លាប់ថ្មី1,097នាក់។ សហរដ្ឋអាមេរិកគឺជាសម្បុកមេរោគ និង “វាលពិឃាត” របស់ COVID-19 ធំជាងគេក្នុងពិភពលោក។

កត្តាខាងលើនេះ បាននាំឱ្យអតីតប្រធានាធិបតី Barack Obama ធ្វើការរិះគន់យ៉ាងខ្លាំងក្លាទៅលើរដ្ឋបាលរបស់លោកប្រធានាធិបតី Trump។ លោក Barack Obama ថ្លែងតាមបណ្ដាញអ៊ីនធើណិតទៅកាន់ក្រុមនិស្សិតដែលទើបបានបញ្ចប់ការសិក្សានៅសាកលវិទ្យាល័យ និងមហាវិទ្យាល័យជនជាតិស្បែកខ្មៅ HBCU (historically black college or university) ថា “មេរោគរាតត្បាតនេះ បានកាត់ផ្ដាច់យោបល់ដែលថា ថ្នាក់ដឹកនាំជាច្រើនបានដឹងថា ខ្លួនកំពុងធ្វើអ្វី។ ក្នុងចំណោមពួកគេ មានថ្នាក់ដឹកនាំមិនតិចនោះទេដែលមិនខ្ចីទាំងធ្វើពើថាខ្លួនកំពុងគ្រប់គ្រង (ការងារ)”។

លោក Obama មិនបានរំឭកដល់ឈ្មោះប្រធានាធិបតី Donald Trump នោះទេ ប៉ុន្តែសម្ដីទាំងឡាយរបស់លោក ត្រូវបានគេយល់យ៉ាងច្បាស់ថា កំពុងរិះគន់ទៅលើវិធីទប់ទល់ COVID-19 របស់លោក Trump។ នេះគឺជាការណ៍ដ៏កម្រមួយដែលអតីតប្រធានាធិបតីអាមេរិកាំង រិះគន់លើប្រធានាធិបតីបន្ទាប់របស់ខ្លួន។ លោក Obama ត្រូវបានគេសម្គាល់ឃើញថា លោកកម្រនឹងថ្លែងការណ៍ជាសាធារណៈ ចាប់តាំងពីបានចាកចេញពីសេតវិមានកាលពីខែមករា ឆ្នាំ2017។

អតីតប្រធានាធិបតី Obama ក៏បានសង្កត់ធ្ងន់ថា មេរោគរាតត្បាតនេះក៏បានបង្ហាញអំពីវិសមភាពនៃពូជសាសន៍នៅហសរដ្ឋអាមេរិក។ ទន្ទឹមនឹងនេះ លោកក៏បានបង្ហាញការខឹងសម្បាខ្លាំងចំពោះករណីបុរសវ័យ25ឆ្នាំ ឈ្មោះថា Ahmaud Armaud Arbery ត្រូវបានគេបាញ់សម្លាប់នៅពេលកំពុងដើរហាត់ប្រាណនៅឯរដ្ឋ Georgia កាលពីថ្ងៃទី23កុម្ភៈ2020។

លោក Obama ថ្លែងថា “យើងបានឃើញឥទ្ធិពលមិនស្មើគ្នារបស់ COVID-19 នៅក្នុងសង្គម។ មនុស្សស្បែកខ្មៅម្នាក់ដើរហាត់ប្រាណ និងមនុស្សមួយក្រុមគិតថាមានសិទ្ធិក្នុងការស្ទាក់ផ្លូវសួរនាំ ក្រោយមកបានបាញ់សម្លាប់ម្នាក់នោះ ព្រោះតែមិនបានឆ្លើយតប”។

កាលពីដើមខែឧសភា លោក Obama បានហៅវិធានការទប់ទល់ COVID-19 របស់សេតវិមានថាជា “គ្រោះមហន្តរាយ”ផងដែរ៕

ប្រភព៖ សារព័ត៌មានបរទេស

May 17, 2020

អាមេរិកាំងនឹងផ្ដល់ជំនួយដល់ WHO ឡើងវិញ ទៅតាមអ្វីដែលចិនបានធ្វើ

រដ្ឋាភិបាលអាមេរិកាំងត្រូវបានគេរាយករណ៍ថានឹងផ្ដល់ជំនួយដល់អង្កការសុខភាពពិភពលោក(WHO) ឡើងវិញ ប៉ុន្តែ មិនមែនក្នុងទំហំទឹកប្រាក់ដ៏ច្រើនសន្ធឹកដូចដើមនោះទេ។ នេះបើតាមសារព័ត៌មាន Fox News។

ទីភ្នាក់ងារសារព័ត៌មាន Fox News កាលពីថ្ងៃទី15ឧសភាកន្លងទៅ បានដកស្រង់ប្រភពព័ត៌មានពីលិខិតព្រាងដែលគ្រោងនឹងត្រូវបញ្ជូនទៅកាន់ប្រធានអង្គការសុខភពពិភពលោក (Tedros) បានឱ្យដឹងថា រដ្ឋបាលរបស់លោក Trump អាចនឹងផ្ដល់ជំនួយមួយផ្នែកដល់ WHO សាជាថ្មី។

ប្រភពខាងលើឱ្យដឹងថា សហរដ្ឋអាមេរិកត្រូវគេជឿថានឹង “យល់ព្រមផ្ដល់ជំនួយជាថវិកាប្រហាក់ប្រហែលនឹងអ្វីដែលប្រទេសចិនបានរួមចំណែកជួយដល់ WHO”។

Fox News សេសេរថា ប្រភពព័ត៌មានពីរដ្ឋាភិបាលសហរដ្ឋអាមេរិកបានបញ្ជាក់ថា លោក Trump ទំនងជាបាន “យល់ព្រមទៅតាមគម្រោងដែលបានគូសវាសនៅក្នុងលិខិតព្រាង” ប៉ុន្តែ មិនទាន់ចុះហត្ថលេខា។

ប្រធានាធិបតី Donald Trump បានផ្អាកផ្ដល់ជំនួយដល់ WHO កាលពីថ្ងៃទី14មេសា ដោយបានចោទអង្គការនេះថា កំពុងជួយដល់យុទ្ធនាការ “ផ្ដល់ព័ត៌មានមិនពិត” របស់ចិន អំពី COVID-19។ លោក Trump ប្រកាសថា អាមេរិកាំងនឹងបើកការស៊ើបអង្កេតទៅលើ WHO។ ក្រុមមន្ត្រីរបស់ WHO បានច្រានចោលការចោទប្រកាន់របស់អាមេរិកាំង ខណៈដែលចិនក៏បានអះអាងថា ខ្លួនមានតម្លាភាព។

សហរដ្ឋអាមេរិកគឺជាម្ចាស់ជំនួយធំបំផុតរបស់ WHO។ បើសិនជាសហរដ្ឋអាមេរិកផ្ដល់ជំនួយស្មើនឹងប្រទេសចិន នោះប្រភពថវិកានេះនឹងស្មើនឹង1/10នៃថវិកាសរុបដែលសហរដ្ឋអាមេរិកធ្លាប់បានផ្ដល់ឱ្យ WHO។ កន្លងមក អាមេរិកាំងធ្លាប់បានផ្ដល់ជំនួយជាមធ្យម 400លានដុល្លារ/ឆ្នាំ ទៅឱ្យអង្គការសុខភាពពិភពលោក។

យោងតាម Fox News លិខិតព្រាងនោះ មានឃ្លាសរសេរថា “ខ្ញុំជឿថា បើទោះជាមានកង្វះខាតខ្លះ ប៉ុន្តែ WHO នៅតែមានសក្ដានុពលធំធេង ហើយខ្ញុំចង់ឱ្យ WHO បង្ហាញអំពីសក្តានុពលនោះ ពិសេសគឺនៅក្នុងកាលៈទេសៈវិបត្តិទូទាំងពិភពលោកបែបនេះ។ នោះគឺជាមូលហេតុដែលខ្ញុំសម្រេចថា អាមេរិកាំងនឹងបន្តជាដៃគូសហការជាមួយ WHO។ ប្រទេសចិនកំពុងជំពាក់បំណុលពិភពលោកដ៏ធំសម្បើម ហើយពួកគេអាចចាប់ផ្ដើមបង់វិភាគទានឱ្យបានស្មើភាពគ្នាទៅឱ្យ WHO”។

លោក Trump ធ្លាប់បានចោទថា WHO គឺជាអាយ៉ងរបស់ចិន

លិខិតព្រាងបន្ថែមថា “បើសិនជាប្រទេសចិនបង្កើនជំនួយដល់ WHO យើងខ្ញុំក៏នឹងពិចារណាក្នុងការបង្កើនជំនួយ”។

កន្លងមក លោក Trump ធ្លាប់បានថ្លែងថា WHO ត្រូវតែទទួលខុសត្រូវចំពោះការដែល COVID-19 បានឆ្លងរាលដាលពេញពិភពលោក ព្រោះថា អង្គការនេះបានជឿជាក់លើការប្រកាសរបស់ចិនទាក់ទិននឹងកម្រិតនៃភាពធ្ងន់ធ្ងររបស់មេរោគរាតត្បាត នៅដំណាក់កាលដំបូង។

លោក Trump ធ្លាប់បានចោទថា “ពួកគេ (WHO) គឺជាអាយ៉ងរបស់ចិន។ យើងខ្ញុំបានផ្ដល់ជំនួយយ៉ាងច្រើនដល់ WHO គឺច្រើនជាងប្រទេសដទៃ។ ដូច្នេះ ខ្ញុំនឹងធ្វើការសម្រេចចិត្តក្នុងពេលឆាប់ៗខាងមុខ (ទាក់ទងនឹងខ្ទង់ជំនួយសម្រាប់ WHO)”។

មុននោះ ប្រធានាធិបតីអាមេរិកាំង លោក Donald Trump ក៏ធ្លាប់បានឱ្យដឹងថា សហរដ្ឋអាមេរិកបានចំណាយ450លានដុល្លារទៅឱ្យ WHO ខណៈដែលប្រទេសចិនបានចំណាយត្រឹមតែ38លានដុល្លារប៉ុណ្ណោះ។

ដោយបានចាប់ផ្ដើមផ្ទុះឆ្លងរាលដាលពីប្រទេសចិន បច្ចុប្បន្ន COVID-19 បានបណ្ដាលឱ្យមនុស្សជាង4.5លាននាក់ត្រូវឆ្លងរោគ និងជាង307,000នាក់បានបាត់បង់ជីវិត ក្នុងនោះសហរដ្ឋអាមេរិកគឺជាអ្នករងគ្រោះធ្ងន់ធ្ងរជាងគេ៕

ប្រភព៖ សារព័ត៌មានបរទស

May 16, 2020

Author: សឿន សំណាង