សឿន សំណាង - La Reine Media

ក្រុមហ៊ុនអាកាសចរណ៍ Thai Airways ទទួលបានការ “ស្រោចស្រង់ជីវិត” ពីរាជរដ្ឋាភិបាល

ក្រុមហ៊ុនអាកាសចរណ៍ជាតិរបស់ប្រទេសថៃនឹងត្រូវបាន “កសាង” ឡើងវិញដោយមានការជួយជ្រោមជ្រែងពីតុលាការផ្នែកហិរញ្ញវត្ថុរបស់ប្រទេសនេះ ដើម្បីជៀសវាងការរំលាយ ឬការលក់ចោល។ល។

កាលពីថ្ងៃទី19ឧសភាពកន្លងទៅ ក្រុមហ៊ុន Thai Airways បានប្រកាសឱ្យដឹងថា រាជរដ្ឋាភិបាលប្រទេសថៃ បានយល់ព្រមចំពោះគម្រោងបង្កើតរចនាសម្ព័ន្ធឡើងវិញរបស់ក្រុមហ៊ុនអាកាសចរណ៍ថៃ ដោយតុលាការហិរញ្ញវត្ថុរបស់ប្រទេសនេះជាអ្នកឃ្លាំមើល។ ផែនការខាងលើនេះត្រូវបានធ្វើឡើងដើម្បីបញ្ជៀសបញ្ហាដែលនាំឱ្យក្រុមហ៊ុន Thai Airways ត្រូវរំលាយ ឬមួយត្រូវលក់ចោល ឬក៏ត្រូវប្រកាសក្ស័យធន។ ក្រសួងហិរញ្ញវត្ថុថៃ និងធនាគារសន្សំរបស់រាជរដ្ឋាភិបាលកំពុងកាន់កាប់ភាគហ៊ុនច្រើនជាងគេនៅក្នុងក្រុមហ៊ុនអាកាសចរណ៍នេះ។

“នេះគឺជាការសម្រេចដ៏លំបាកមួយ ប៉ុន្តែវាត្រូវបានធ្វើឡើងទៅតាមវិធីដែលអាចជួយការពារផលប្រយោជន៍ជាតិ និងប្រជាជនថៃ។ ខ្ញុំ និងអ្នករាល់គ្នាសង្ឃឹមថា Thai Airways នឹងក្លាយជាមោទកភាពឡើងវិញរបស់ប្រទេសជាតិ” នេះបើតាមសម្ដីរបស់នាយករដ្ឋមន្ត្រីថៃ លោក ប្រាយុធ ចន្ទអូឆា (Prayut Chan-o-cha) ដែលបានថ្លែងនៅក្នុងសន្និសីទសារព័ត៌មានមួយកាលពីម្សិលមិញ(19ឧសភា)។

តាមគម្រោង នៅក្នុងការបង្កើតរចនាសម្ព័ន្ធឡើងវិញ ក្រុមហ៊ុនអាកាសចរណ៍ Thai Airways នឹងដំណើរការដូចធម្មតា ប៉ុន្តែ គេនៅមិនដឹងច្បាស់ថា ប្រការខាងលើនេះនឹងអាចប៉ះពាល់បែបណាដល់សេវាកម្ម ឬការងារនៅក្នុងក្រុមហ៊ុននេះនៅឡើយ។

បន្ទាប់ពីព័ត៌មានខាងលើនេះត្រូវបានប្រកាស តម្លៃមូលបត្ររបស់ Thai Airways បានកើន14.6% នៅលើផ្សារហ៊ុន Bangkok។ សូមរំឭកថា ចាប់ពីដើមឆ្នាំ តម្លៃមូលបត្ររបស់ក្រុមហ៊ុននេះ បានធ្លាក់ចុះសរុប32%។

នាយករដ្ឋមន្ត្រីថៃបានឱ្យដឹងថា រដ្ឋាភិបាលរបស់លោកបានលើកឡើងនូវដំណោះស្រាយជាច្រើនសម្រាប់ក្រុមហ៊ុនអាកាសចរណ៍ជាតិមួយនេះ ក្នុងនោះក៏មានរាប់បញ្ចូលទាំងការលក់ចេញក្រុមហ៊ុននេះផងដែរ។ ក៏ប៉ុន្តែ ការសម្រេចជាចុងក្រោយបានដើរផ្ទុយពីនេះ ព្រោះថា បើសិនជាលក់ចេញ វានឹងធ្វើឱ្យបុគ្គលិកជាង20,000នាក់ត្រូវបាត់បង់ការងារ។

Thai Airways ទទួលបានការ "ស្រោចស្រង់ជីវិត" ពីរាជរដ្ឋាភិបាល — នាយករដ្ឋមន្ត្រីថៃ លោក ប្រាយុធ ចន្ទអូឆា ធ្វើដំណើរចូលរួមកិច្ចប្រជុំគណរដ្ឋមន្ត្រីកាលពីថ្ងៃទី19ឧសភា

“ប្រទេសថៃ និងពិភពលោកទាំងមូលកំពុងប្រឈមមុខជាមួយនឹងវិបត្តិ។ ចំណូលរបស់អ្នករាល់គ្នាកំពុងថយចុះព្រោះតែ COVID-19។ យើងត្រូវផ្ដល់អាទិភាពទៅឱ្យផ្នែកហិរញ្ញវត្ថុ ដើម្បីជួយអ្នករាល់គ្នាក្នុងពេលអនាគតខាងមុខ” នេះបើតាមប្រសាសន៍របស់នាយករដ្ឋមន្ត្រីថៃ។

ដូចទៅនឹងក្រុមហ៊ុនអាកាសចរណ៍ដទៃ Thai Airways បានផ្អាកជើងហោះហើរស្ទើរតែទាំងស្រុង នៅពេលតម្រូវការនៃការធ្វើដំណើរតាមយន្តហោះបានថយចុះយ៉ាងគំហុក។

យោងតាមឯកសាររបស់នាយកដ្ឋានគ្រប់គ្រងផ្សារមូលបត្រថៃ ក្រុមហ៊ុនអាកាសចរណ៍ Thai Airways បានខាតបង់ប្រាក់ចំនួន2.11ពាន់លានបាត(ជិត66លានដុល្លារអាមេរិក)ក្នុងឆ្នាំ2017 ហើយបន្តខាត11.6ពាន់លានបាត(361លានដុល្លារ)ក្នុងឆ្នាំ2018 និងខាត12ពាន់លានបាត(374លានដុល្លារ)ក្នុងឆ្នាំ2019៕

ប្រភព៖ សារព័ត៌មានបរទេស

May 20, 2020

ឪពុកម្ដាយ ទ្រហោយំដោយក្ដីត្រេកអរបំផុតក្នុងជីវិត បន្ទាប់ពីបានឱបកូនប្រុសជាថ្មីម្ដងទៀត ក្រោយពី…

នៅថ្ងៃទី19 ឧសភា ម្សិលមិញ ទីភ្នាក់ងារព័ត៌មាន BBC បានរាយការណ៍អំពីរឿងរ៉ាវរបស់ក្រុមគ្រួសារមួយ ដែលបានត្រឡប់មកជួបជុំគ្នាជាថ្មីម្ដងទៀត នៅពេលដែលស្វាមីភរិយាជនជាតិចិន 1គូ មានឱកាសបានជួបកូនប្រុសបង្កើតរបស់ពួកគេ ដែលត្រូវបានចាប់ពង្រត់យកទៅបាត់តាំងពីនៅតូច និងដោយសារភាពមានះព្យាយាមតាមស្វែងរកទូទាំងផែនដីចិន អស់រយៈពេល 32ឆ្នាំកន្លងមក។

ក្មេងប្រុសដែលបាត់ខ្លួននោះគឺ លោកម៉ៅ យិន កើតនៅថ្ងៃទី23 កុម្ភៈ ឆ្នាំ1986 ចំណែកឯឪពុក និងម្ដាយ គឺលោក ម៉ៅ ជិនជីង និងអ្នកស្រី លី ជិនជឺ ក្រុមគ្រួសារនេះរស់នៅក្នុងទីក្រុងស៊ីអាន មណ្ឌលសានស៊ី ភាគកណ្ដាលប្រទេសចិន។

ចំណែករឿងរ៉ាវ បានកើតឡើងនៅអំឡុងពេល 2ឆ្នាំបន្ទាប់មក នៅថ្ងៃទី17 តុលា ឆ្នាំ1988 លោកម៉ៅ ជិនជីង បានមកទទួលកុមារ ម៉ៅ យិន ពីមណ្ឌលមើលថែទាំកុមារ ដើម្បីត្រឡប់ទៅផ្ទះវិញ តែក្នុងអំឡុងពេលធ្វើដំណើរ កូនប្រុសស្រេកទឹក ឪពុកក៏ឆៀងចូលទៅក្នុងសណ្ឋាគារមួយ ដើម្បីយកទឹកមកឱ្យកូនប្រុសញ៉ាំ ហើយខណៈពេលដែលកំពុងផ្លុំឱ្យទឹកត្រជាក់ ឪពុកបានសម្លឹងមើលទៅកន្លែងដែលកូនប្រុសអង្គុយចាំ ស្រាប់តែមិនឃើញកូនប្រុស និងក្រោយមកទើបដឹងថា កូនត្រូវគេចាប់ពង្រត់យកទៅបាត់ទៅហើយ។

លោកម៉ៅ និងអ្នកស្រីលី បានជួយគ្នាតាមរកកូនប្រុសជាទីស្រឡាញ់ ទាំងនៅក្នុង និងក្រៅទីក្រុងស៊ីអាន ដើរបិទផូស្ទើររូបកូនប្រុស និងប្រាប់ភិនភាគរបស់កូន ដោយក្ដីសង្ឃឹមថា នឹងបានជួបគ្នាវិញនៅថ្ងៃណាមួយ…តែទាំងអស់នោះ បានក្លាយជាក្ដីសង្ឃឹមបែបគ្មានសង្ឃឹម។

អ្នកស្រីលី បានសម្រេចចិត្តឈប់ធ្វើការ ដើម្បីឱ្យមានពេលដើរស្វែងរកកូនប្រុស។ អ្នកស្រីបានចែកចាយរូបភាព និងភិនភាគរបស់កូនប្រុសអស់ជាង 100,000សន្លឹក នៅតាមមណ្ឌល និងទីក្រុងផ្សេងៗជាង10កន្លែង ទូទាំងផែនដីចិន តែបែរជានៅតែគ្មានដំណឹងដដែល។

ក្រៅពីនេះ ច្រើនឆ្នាំកន្លងមកនេះ អ្នកស្រីលី បានបង្ហាញខ្លួននៅក្នុងកម្មវិធីទូរទស្សន៍ជាច្រើន ដើម្បីសុំការជួយស្វែងរកកូនប្រុស រួមទាំងក្នុងកម្មវិធីប្រកួតច្រៀងចម្រៀង អេកស៍ ហ្វ៊ែកធើរ ទៀតផង ហើយអ្នកស្រីលី បានតាមដានដំណឹងរបស់ក្មេងអនាថាជាង 300នាក់ តែក៏នៅតែរកមិនឃើញភិនភាគដែលដូចគ្នានឹងកុមារ ម៉ៅ យិនដដែល។

ក្រោយមក នៅឆ្នាំ2007 អ្នកស្រីលី ចាប់ផ្ដើមធ្វើជាអ្នកស្ម័គ្រចិត្ត ជាមួយក្រុម “បេប៊ី ខំប៊ែក ហូម” ដើម្បីជួយឪពុកម្ដាយដទៃទៀតក្នុងការស្វែងរកកូនៗ ដែលត្រូវគេចាប់ពង្រត់ដូចគ្នា។ អ្នកស្រីលី បានជួយឱ្យកុមារចំនួន 29នាក់ បានត្រឡប់ទៅក្នុងរង្វង់ដៃឱបរបស់ឪពុកម្ដាយរបស់ពួកគេវិញ ហើយអ្នកស្រីនៅតែតាំងចិត្តធ្វើការជាមួយក្រុម “បេប៊ី ខំប៊ែក ហូម” តទៅទៀត ទោះជាគ្មានសង្ឃឹមថា បានជួបកូនប្រុសជាថ្មីក៏ដោយ។

រហូតទាល់តែដល់ថ្ងៃមួយ ក្ដីសង្ឃឹមដែលងងឹតឈឹង ចាប់ផ្ដើមមានពន្លឺឡើងនៅខែមេសាឆ្នាំ2020 កន្លងទៅ ក្រោយពីប៉ូលិសបានទទួលដំណឹងពីពលរដ្ឋម្នាក់ រស់នៅក្នុងទីក្រុងមៀន យ៉ាង មណ្ឌលសេឈួន ភាគខាងលិចឆៀងខាងត្បូងនៃប្រទេសចិន ឆ្ងាយពីទីក្រុងស៊ីអាន ស្រុកកំណើតរបស់គ្រួសារម៉ៅ ប្រមាណជា 1,000គីឡូម៉ែត្រ ថា មានប្រវត្តិក្នុងការទទួលចិញ្ចឹមក្មេងតូចម្នាក់កាលពីជាង 30ឆ្នាំមុន។

ទីភ្នាក់ងារព័ត៌មានរបស់ចិន CCTV បានរាយការណ៍ថា ប៉ូលិសបានប្រើតិចណូឡូជីការចងចាំផ្ទៃមុខ ដើម្បីវិភាគរូបថតរបស់កុមារម៉ៅ យិន និងបង្កើតរូបភាពសិប្បនិម្មិតពេលកុមារម៉ៅ ក្នុងវ័យមនុស្សធំ ហើយប្រៀបធៀបជាមួយរូបថតរបស់ពលរដ្ឋចិនដែលបានប្ដឹងបាត់កូនទាំងអស់ ដែលមាននៅក្នុងបណ្ដុំព័ត៌មានរបស់អង្គភាព។

បន្ទាប់ពីនោះ ប៉ូលិសក៏តាមស្វែងរកឃើញបុរសម្នាក់នៅក្នុងទីក្រុងនោះ គឺលោក គូ និងនិង អាយុ 34ឆ្នាំ ហើយក៏បានដំណើរការសាកល្បងពិសោធ DNA ដើម្បរកមើលថា តើលោកគូ មានសម្ព័ន្ធខាងខ្សែលោហិតជាមួយលោកម៉ៅ និងអ្នកស្រីលីដែរឬទេ? លទ្ធផលបានបង្ហាញថា “វិជ្ជមាន” មានន័យថា លោកម៉ៅ និងអ្នកស្រីលី គឺជាឪពុកម្ដាយបង្កើតរបស់លោកគូ ហ្នឹងឯង។

នៅក្នុងពិធីថ្លែងព័ត៌មានរបស់ប៉ូលិស កាលពីថ្ងៃចន្ទ ទី18 ឧសភាកន្លងទៅ ឪពុក-ម្ដាយ-កូន បានឱបគ្នា និងទ្រហោយំដោយក្ដីត្រេកអរជាទីបំផុត។ លោកម៉ៅ យិន(ឈ្មោះមុន គូ និងនិង) ដែលបច្ចុប្បន្នប្រកបមុខជំនួញតុបតែងផ្ទះ បានថ្លែងថា លោកមិនប្រាកដក្នុងចិត្តពាក់ព័ន្ធនឹងអនាគតរបស់ខ្លួនឡើយ តែចាប់ពីពេលនេះតទៅ លោកនឹងប្រើពេលវេលានៅជាមួយឪពុកម្ដាយបង្កើតរបស់លោកឱ្យបានច្រើនបំផុត។

ខណៈដែលអ្នកស្រីលី ដែលបានដឹងដំណឹងល្អបំផុតក្នុងជីវិតនេះកាលពីថ្ងៃទី10 ឧសភា ចំថ្ងៃទិវាមាតារបស់ប្រទេសចិននោះ បានថ្លែងថា នេះជាអំណោយដ៏មានតម្លៃបំផុតក្នុងជីវិតរបស់អ្នកស្រី ហើយព្រមទាំងបានសម្ដែងការអរគុណដល់គ្រប់គ្នាដែលបានជួយឱ្យអ្នកស្រីបានជួបកូនប្រុសម្ដងទៀត។

ប៉ូលិសបញ្ជាក់ថា លោកម៉ៅ យិន ត្រូវបានចាប់ពង្រត់នៅពេលអាយុ 2ឆ្នាំ និងបានលក់បន្តទៅឱ្យប្ដីប្រពន្ធ 2នាក់ដែលគ្មានកូន ក្នុងតម្លៃ 6,000យន់(ប្រមាណ 900ដុល្លារអាមេរិក) ខណៈនេះ ប៉ូលិសកំពុងដំណើរការស៊ើបអង្កេតរឿងក្ដីចាប់ពង្រត់លោកម៉ៅ យិន ដើម្បីស្វែងរកជនល្មើសមកផ្តន្ទាទោសតាមច្បាប់។

ទាំងអស់នេះ ការចាប់ពង្រត់ និងជួញដូរទារក និងក្មេងតូច គឺជាបញ្ហាដ៏រ៉ាំរ៉ៃ និងយូរយារណាស់មកហើយនៅក្នុងប្រទេសចិន។ ទោះជាគ្មានតួលេខជាផ្លូវការក៏ដោយ តែ បេប៊ី ខំប៊ែក ហូម វេបសាយដែលបណ្ដាអាណាព្យាបាលទាំងឡាយប្រើសម្រាប់ប្រកាសស្វែងរកកូនដែលបាត់ខ្លួននោះ បានបញ្ជាក់ថា មានកុមារតូចៗដែលបានបាត់ខ្លួនទាំងអស់ចំនួន 22,304នាក់ ក្នុងនោះក្មេងប្រុស 14,893នាក់ និងក្មេងស្រី 7,411នាក់។

កាលពីឆ្នាំ2009 ក្រសួងសុវត្ថិភាពសាធារណៈរបស់ចិន បានរៀបចំបណ្ដុំព័ត៌មាន DNA ដែលជួយឱ្យឪពុកម្ដាយ រកឃើញកូនដែលត្រូវបានចាប់ពង្រត់មកវិញបានចំនួនជាង 6,000នាក់។ ក្រោយមក នៅឆ្នាំ2016 ក្រសួងនោះបានបើកសម្ពោធប្រព័ន្ធ “រីយូនៀន” ដែលបានធ្វើឱ្យកុមារជាង 4,000នាក់ បានជួបឪពុកម្ដាយបង្កើតរបស់ពួកគេឡើងវិញម្ដងទៀត៕

ប្រភព៖ សារព័ត៌មានបរទេស

ប្រែសម្រួលដោយ តាវ៉ែនតា

May 20, 2020

បារាំងបញ្ជាឱ្យបិទសាលារៀនវិញហើយ នៅក្នុងទីក្រុងចំនួន8 ក្រោយរកឃើញកូនសិស្សឆ្លងមេរោគ 70នាក់

កាលពីថ្ងៃទី19 ឧសភាម្សិលមិញ ទីភ្នាក់ងារព័ត៌មាន ដេលីមែល បានរាយការណ៍ថា រដ្ឋបាលក្នុងតំបន់នៃទីក្រុងរូបេហ្ស៍ ក្នុងខេត្តន័រ ភាគខាងជើងរបស់ប្រទេសបារាំង ជាប់នឹងព្រំដែនប្រទេសបែលហ្ស៊ិក បានបញ្ជាឱ្យបិទសាលារៀនវិញចំនួន 8កន្លែងជាបន្ទាន់ ជាសាលារៀនរបស់រដ្ឋ 7កន្លែង និងសាលាឯកជន 1កន្លែងទៀត ដោយសារតែបានរកឃើញកូនសិស្សថ្នាក់មត្តេយ្យ 1នាក់ ជាភ្នាក់ងារចម្លងមេរោគកូវីដ-19 បន្ទាប់ពីពួកគេបានបើកទ្វារបង្រៀនឡើងវិញកាលពីសប្ដាហ៍កន្លងទៅ។

ក្នុងរបាយការណ៍ បានបញ្ជាក់ថា បទបញ្ជាឱ្យបិទសាលារៀនទាំង 8កន្លែងនោះវិញជាបន្ទាន់ គឺជាវិធានការការពារការចម្លងសាយភាយមេរោគ ដោយសារតែនៅមិនទាន់រកឃើញកូនសិស្សដទៃទៀតកើតជំងឺកូវីដ-19 ដោយអាជ្ញាធរនឹងប្រញាប់ប្រញាល់ស៊ើបអង្កេតលើករណីនេះ រួមទាំងស្វែងរកបុគ្គលដែលក្មេងៗបានប៉ះពាល់ និងនៅជិតស្និទ្ធជាមួយ ក្នុងអំឡុងពេលបើកសាលារៀនឡើងវិញកាលពីរយៈពេល 1សប្ដាហ៍កន្លងមក និងរំពឹងថា សាលារៀនអាចនឹងបើកទ្វារឡើងវិញបាន នោថ្ងៃទី25 ឧសភាខាងមុខ។

សម្រាប់សាលារៀន ដែលបានពិនិត្យរកឃើញមានការឆ្លងរាលដាលនៃមេរោគកូវីដ-19 និងត្រូវបញ្ជាឱ្យបិទទ្វារជាបណ្ដោះអាសន្នវិញនោះ ស្ថិតនៅក្នុងទីតាំងខេត្តម៉ាយែន មណ្ឌលប៉េអ៊ី ដឺ ឡា លួរ , ខេត្តហ្វ៊ីនីស្ទែរ មណ្ឌលប្រឺតាញ , ខេត្តកុងតាល់ មណ្ឌលអូវែញ-រ៉ូណាល , ខេត្តអូ-ហ្គារ៉ុង និងខេត្តអេរ៉ូ មណ្ឌលអុកស៊ីតានី , ខេត្តអង់ដ្រេលួរ មណ្ឌលហ្សង់-វ៉ាល់ ដឺ លួរ និងទីក្រុងនីស មណ្ឌលប្រូវ៉ង់ សាល កូតដាហ្សួរ៕

A teacher teaches to schoolchildren in a classroom at a private school during its reopening in Saint-Sebastien-sur-Loire near Nantes during the outbreak of the COVID-19 in France, May 12, 2020. REUTERS

A disinfection squad cleans the school canteen of Saint Exupery primary school as France prepares for the gradual lifting of lockdown restrictions during the outbreak of the COVID-19 in Cannes, France. REUTERS

A shelf with books and games which could not be used by children is protected by tape in a classroom in a private school on the eve ot its reopening in Saint-Sebastien-sur-Loire near Nantes in France, May 11, 2020. REUTERS

A school staff member cleans school supplies in a classroom at a primary school during its reopening in Paris, France. REUTERS

Primary school reopening in Nice as a small part of French children head back to their schools in France. REUTERS

Schoolchildren listen to their teacher at the primary school Simone Veil during its reopening in Nice, France. REUTERS

A teacher, wearing a protective face mask, teaches to schoolchildren in a classroom at a private school in Saint-Sebastien-sur-Loire, France, May 12, 2020. REUTERS

Employees install signs on the floor to help children to respect social distancing at a primary school on the eve of its reopening in Nice as France softens its strict lockdown. REUTERS

ប្រភព៖ សារព័ត៌មានបរទេស

May 20, 2020

ល្អ ប្លែក! សិស្សនៅប្រទេសចិន ពាក់ “ស្លាបរក្សាគម្លាត” ដើម្បីការពារការឆ្លង COVID-19

សិស្សានុសិស្សនៃសាលាបឋមសិក្សាមួយនៅប្រទេសចិន នាំគ្នាពាក់ស្លាបប្រវែង1ម៉ែត្រ និងមានចម្រុះពណ៌គួរឱ្យចាប់អារម្មណ៍ ក្នុងបំណងធានាឱ្យបានប្រាកដចំពោះការរក្សាគម្លាតក្នុងថ្ងៃចូលរៀន។

ថ្ងៃដំបូងនៃការវិលត្រឡប់ចូលសាលារៀនវិញ ក្រោយការឈប់សម្រាកអស់មួយរយៈពេលវែងដោយសារ COVID-19 សិស្សថ្នាក់ទី4នៃសាលាបឋមសិក្សាភាសាបរទេសមួយនៅទីក្រុង Taiyuan នៃខេត្ត Shanxi ប្រទេសចិន កាលពីថ្ងៃទី18ឧសភាកន្លងទៅ ត្រូវបានស្នើឱ្យពាក់ស្លាបដែលមានប្រវែងមួយម៉ែត្រនៅខាងក្រោយខ្នង ដើម្បីទប់ស្កាត់សិស្សទាំងនោះឈរក្បែរគ្នាខ្លាំងពេក ក្នុងបំណងការពារការឆ្លងវីរុស។

ស្លាបដែលមានរូបរាងដូចស្លាបយន្តហោះ ឬស្លាបមេអំបៅ និងមានពណ៌ចម្រុះនេះ ត្រូវបានអាណាព្យាបាលរបស់សិស្ស ធ្វើឱ្យកូនៗ ហើយនៅលើស្លាបទាំងនោះ មានសរសេរអក្សរថា “ព្រោះតែខ្ញុំគោរព ឱ្យតម្លៃមិត្ត ដូច្នេះសូមរក្សាគម្លាតឱ្យបានមួយម៉ែត្រ”។

នាយកសាលាខាងលើបានឱ្យដឹងថា ការពាក់ស្លាបនេះអាចជួយឱ្យសិស្សទទួលដឹងបាននូវគម្លាតសុវត្ថិភាព ក៏ដូចជាយល់ និងដឹងគុណដល់ការចូលរួមចំណែករបស់ក្រុមគ្រូពេទ្យ ដែលជាក្រុមមនុស្សនៅជួរមុខក្នុងសង្គ្រាមប្រឆាំង COVID-19។

គំនិតខាងលើនេះ ត្រូវបានធ្វើឡើងដោយយកគំរូតាមសាលាបឋមសិក្សាមួយនៅទីក្រុង Hangzhou កាលពីសប្ដាហ៍មុន។ មុននេះ មានសាលាបឋមសិក្សាមួយផ្សេងទៀតនៅ Hangzhou ក៏មានគំនិតស្រដៀងគ្នានេះដែរ ដោយឱ្យសិស្សពាក់មួករាងស្លាបកន្ទុំរុយវែងៗ ដែលជួយឱ្យសិស្សអាចរក្សាគម្លាតពីគ្នាបានមួយកម្រិតផងដែរ។

COVID-19 បានផ្ទុះឆ្លងរាលដាលនៅប្រទេសចិន ចាប់ពីចុងឆ្នាំ2019 ហើយមកដល់បច្ចុប្បន្ន វាបានរាលដាលដល់ប្រទេសនិងដែនដីចំនួន213ក្នុងពិភពលោក បណ្ដាលឱ្យមានមនុស្សជិត5លាននាក់បានឆ្លងមេរោគ និងជាង323,000នាក់បានបាត់បង់ជីវិត។ ប្រទេសចិន មានមនុស្សជិត83,000នាក់បានឆ្លងCOVID-19 ក្នុងនោះមានជាង4,600នាក់បានស្លាប់ និងជាង78,000នាក់បានជាសះស្បើយ៕

ប្រភព៖ សារព័ត៌មានបរទេស

May 20, 2020

ចាំមើលមើល៍…តើលោកត្រាំ នឹងពាក់ម៉ាស់ការពារវីរុសឬអត់ ពេលទៅមើលរោងចក្រផលិតរថយន្ត Ford?

Ford Motor Co កាលពីថ្ងៃអង្គារ(ទី19ឧសភា) បានបញ្ជាក់ពីគោលការណ៍របស់ក្រុមហ៊ុន ដែលបានកំណត់ឱ្យភ្ញៀវគ្រប់រូបដែលមកទស្សនារោងចក្ររបស់ខ្លួន ត្រូវតែពាក់ម៉ាស់អនាម័យការពារការឆ្លងមេរោគកូវីដ-19 ប៉ុន្តែមិនបានបញ្ជាក់ថា ខ្លួននឹងបង្ខំឱ្យលោកប្រធានាធិបតី ដូណាល់ ត្រាំ ប្រតិបត្តិតាមគោលការណ៍ខាងលើ ឬក៏អត់នោះទេ…ខណៈដែលមេដឹកនាំសហរដ្ឋអាមេរិករូបនេះ មានកំណត់ការទៅទស្សនារោងចក្រផលិតរថយន្ត នៅក្នុងរដ្ឋមីឈិហ្គែន មួយនេះ ក្នុងអំឡុងចុងសប្ដាហ៍នេះ។

លោក ដូណាល់ ត្រាំ មានផែនការទៅមើលរោងចក្រមួយកន្លែងរបស់ Ford នៅក្នុងទីក្រុងអ៊ិបស៊ីលែនធី រដ្ឋមិឈិហ្គែន នៅថ្ងៃព្រហស្បតិ៍(ទី21 ឧសភា) ដែលបច្ចុប្បន្នត្រូវបានប្រើប្រាស់ធ្វើជាកន្លែងផលិតម៉ាស៊ីនជួយការដកដង្ហើម តែយ៉ាងណាក៏ដោយ គេនៅមិនទាន់ដឹងច្បាស់នៅឡើយថា តើក្រុមហ៊ុនផលិតរថយន្តដ៏ធំបំផុតលំដាប់ទី2 របស់សហរដ្ឋអាមេរិកមួយនេះ នឹងអនុញ្ញាតឱ្យលោកត្រាំ ល្មើសគោលការណ៍ផ្សេងៗដែលពួកគេបានកំណត់មកជាច្រើនសប្ដាហ៍ហើយនោះ ឬយ៉ាងណាឡើយ?។

អ្នកនាំពាក្យរបស់ក្រុមហ៊ុន Ford បានថ្លែងកាលពីថ្ងៃអង្គារ(ទី19ឧសភា)ម្សិលមិញថា “គោលការណ៍របស់យើង គឺគ្រប់គ្នាត្រូវតែពាក់ឧបករណ៍ការពារ ដើម្បីការពារការឆ្លងរាលដាលរបស់កូវីដ-19។ យើងបានចែករំលែករបៀបវិន័យសុវត្ថិភាពទាំងអស់របស់ Ford ទៅឱ្យសេតវិមានជាមុនរួចអស់ហើយ នៅក្នុងរួមមានទាំងសៀវភៅណែនាំអំពីខ្សែចង្វាក់ផលិតកម្មរបស់យើង ផែនទីបត់ណែនាំបុគ្គលិក និងបែបបទពិនិត្យវាយតម្លៃខ្លួនឯង សម្រាប់ត្រៀមការក្នុងដំណើរទស្សនានេះ”

នៅក្នុងសៀវភៅគោលការណ៍របស់ក្រុមហ៊ុន ពាក់ព័ន្ធនឹងរោគរាតត្បាតដ៏ធំពីវីរុសកូរ៉ូណាប្រភេទថ្មី ដែលបានផ្សព្វផ្សាយកាលពីថ្ងៃទី1 ឧសភា បានបញ្ជាក់ថា បុគ្គលិក និងភ្ញៀវដែលមកទស្សនាគ្រប់រូប ចាំបាច់ត្រូវតែពាក់ម៉ាស់អនាម័យការពារគ្រប់ពេលវេលា ពេលស្ថិតនៅក្នុងរោងចក្រផលិតកម្មរបស់ Ford នៅក្នុងសហរដ្ឋអាមេរិក។

សេតវិមាន បានបដិសេធការផ្ដល់ចម្លើយថា តើលោកត្រាំ នឹងពាក់ម៉ាស់ការពារដែរឬទេ? ខណៈដែលកាលពីពេលមុននេះ លោកត្រាំ ធ្លាប់បានប្រាប់ថា លោកនឹងពាក់ម៉ាស់ការពារ បើសិនជាចាំបាច់ តែកាលពីសប្ដាហ៍កន្លងទៅ លោកត្រាំបានធ្វើដំណើរទៅពិនិត្យមើលមជ្ឈមណ្ឌលចែកចាយម៉ាស់អនាម័យមួយកន្លែងនៅក្នុងរដ្ឋ ផេនស៊ីលវេនៀ ពេលនោះលោកត្រាំមិនបានពាក់ម៉ាស់ការពារមេរោគឡើយ។

សហភាពពលករ ឬ United Auto Workers ឬ UAW និងបណ្ដាអ្នកផលិតរថយន្ត ប៊ិកទ្រី បានពិភាក្សាគ្នាអស់ជាច្រើនសប្ដាហ៍ ពាក់ព័ន្ធនឹងរបៀបវិន័យផ្នែកសុវត្ថិភាពផ្សេងៗដែលត្រូវដាក់បញ្ជាឱ្យអនុវត្ត ដើម្បីបើកផ្លូវសម្រាប់ការវិលត្រឡប់មកដំណើរការគ្រឿងចក្រផលិតរថយន្តឡើងវិញ កាលពីថ្ងៃចន្ទ(ទី18ឧសភា) ក្រោយពីបានបិទប្រតិបត្តិការទាំងស្រុងតាំងពីចុងខែមីនា។

កាលពីខែកន្លងទៅ លោកអនុប្រធានាធិបតី ម៉ៃក៍ ផេនស៍ បានពាក់ម៉ាស់អនាម័យការពារ ក្នុងអំឡុងពេលទស្សនារោងចក្រមួយកន្លែងរបស់ ជេនេរ៉ាល ម៉ូទ័រស៍ ដែលត្រូវបានប្រើប្រាស់ធ្វើជាកន្លែងផលិតម៉ាស៊ីនជួយការដកដង្ហើម ដូចគ្នានឹងលោកស្រី មែរី បារ៉ា CEO របស់ក្រុមហ៊ុន ជីអឹម
ដែរ តែលោកស្រីបានប្រាប់ទៅអ្នកចូលរួមក្នុងអំឡុងកិច្ចប្រជុំតុមូល ក្រោយចប់ការដើរទស្សនារោងចក្រថា អ្នកទាំងអស់គ្នា អាចដោះម៉ាស់ចេញបាន៕

ប្រភព៖ សារព័ត៌មានបរទេស

May 20, 2020

ធ្លាក់ឧទ្ធម្ភាគចក្រយោធានៅរុស្ស៊ី បណ្ដាលឱ្យមនុស្សច្រើននាក់បាត់បង់ជីវិត

ឧទ្ធម្ភាគចក្រ Mi-8 មួយគ្រឿងរបស់ទ័ពអាកាសប្រទេសរុស្ស៊ី បានធ្លាក់នៅឯជាយក្រុងម៉ូស្គូ ក្នុងពេលហ្វិកហាត់កាលពីម្សិលមិញ ធ្វើឱ្យមនុស្សចំនួន3នាក់បានស្លាប់។

“ក្នុងពេលហោះហើរហ្វឹកហាត់នៅក្នុងរយៈចម្ងាយប្រហែល20គីឡូម៉ែត្រពីភូមិ Klin ក្នុងខេត្តម៉ូស្គូ (Moscow Province) ឧទ្ធម្ភាគចក្រ Mi-8 របស់ទ័ពអាកាសរុស្ស៊ី បានជួបបញ្ហានៅពេលចុះចតជាបន្ទាន់នៅលើវាលធំមួយកន្លែង។ ហេតុការណ៍គ្រោះថ្នាក់នេះបានសម្លាប់សមាជិកនៃក្រុមហោះហើរទាំងអស់នៅក្នុងឧទ្ធម្ភាគចក្រ” នេះបើតាមក្រសួងការពារជាតិរុស្ស៊ី។ ក្រសួងនេះបានឱ្យដឹងថា “មូលហេតុនៃការធ្លាក់នេះអាចបណ្ដាលមកពីកំហុសបច្ចេកទេស”។

ក្រសួងការពារជាតិរុស្ស៊ីប្រកាសថា ឧទ្ធមភាគចក្រនេះ ជួបឧបទ្ទវហេតុនៅវេលាម៉ោងប្រហែល20 ក្នុងថ្ងៃទី19ឧសភា (ម៉ោង12យប់ ថ្ងៃទី20ឧសភា នៅកម្ពុជា) និងមិនមានបំពាក់អាវុធតាមខ្លួននោះទេ។ អ្នកនាំពាក្យរបស់ក្រសួងការពារជាតិរុស្ស៊ី បដិសេធការបញ្ជាក់អំពីចំនួនជនរងគ្រោះក្នុងហេតុការណ៍នេះ ប៉ុន្តែសារព័ត៌មានរុស្ស៊ីបានចេញផ្សាយថា អ្នកស្លាប់មានចំនួន3នាក់។ កងកម្លាំងជួយសង្គ្រោះ បានរកឃើញប្រអប់ខ្មៅចំនួន2របស់ឧទ្ធម្ភាគចក្រខាងលើនេះ។

Mi-8 គឺជាឧទ្ធម្ភាគចក្រដែលត្រូវបានផលិតឡើងដោយសហភាពសូវៀត ចាប់ពីទសវត្សរ៍1960 ដោយមានជាង17,000គ្រឿងត្រូវបានលក់ចេញ។ កាលពីឆ្នាំ2018 ឧទ្ធម្ភាគចក្រ Mi-8 មួយគ្រឿងបានធ្លាក់បន្ទាប់ពីហោះឡើងក្នុងតំបន់ Siberia បណ្ដាលឱ្យមនុស្ស18នាក់បានស្លាប់ ក្នុងនោះមានសមាជិកក្រុមហោះហើរចំនួន3នាក់ផងដែរ៕

ប្រភព៖ សារព័ត៌មានបរទេស

May 20, 2020

អ្នកជំងឺCOVID-19 កើនជិតដល់ 5លាននាក់នៅទូទាំងពិភពលោក

ពិភពលោកទាំងមូលត្រូវបានរាយការណ៍ថា មានមនុស្សជាង324,000នាក់បានស្លាប់ ក្នុងចំណោមអ្នកជំងឺCOVID-19 ជិត5លាននាក់ ខណៈប្រទេសដែលមានអ្នកជំងឺកូរ៉ូណាលើសពី100,000នាក់បានកើនដល់11ប្រទេស។

យោងតាមគេហទំព័រ Worldometer ប្រទេសនិងដែនដីចំនួន213ក្នុងពិភពលោកមានអ្នកជំងឺកូរ៉ូណាសរុប4,980,533នាក់ និងអ្នកស្លាប់សរុប324,445នាក់ ក្នុងនោះមានអ្នកជំងឺថ្មី95,495នាក់ និងអ្នកស្លាប់ថ្មី4,666នាក់។ ចំណែកអ្នកជំងឺដែលបានជាសះស្បើយបានកើនដល់1,957,884នាក់។

ទ្វីបអាមេរិកនៅតែជាសម្បុកមេរោគកូរ៉ូណាធំជាងគេក្នុងពិភពលោក ដោយមានអ្នកជំងឺសរុប2,226,468នាក់ ក្នុងនោះអាមេរិកខាងជើងមាន1,738,811នាក់ អាមេរិកខាងត្បូងមាន487,657នាក់ ខណៈទ្វីបអឺរ៉ុបមាន1,815,438នាក់ អាស៊ីមាន841,131នាក់ និងអាហ្វ្រិកមាន93,229នាក់។

ប្រទេសដែលមានអ្នកជំងឺច្រើនជាង100,000នាក់ បានកើនឡើងដល់11ប្រទេស រួមមាន សហរដ្ឋអាមេរិក រុស្ស៊ី អេស្ប៉ាញ ប្រេស៊ីល អង់គ្លេស អ៊ីតាលី បារាំង អាល្លឺម៉ង់ ទួរគី អ៊ីរ៉ង់ និងឥណ្ឌា៕

ប្រភព៖ សារព័ត៌មានបរទេស

May 20, 2020

ជិត1.6លាននាក់ឆ្លង COVID-19 នៅអាមេរិក! លោក Trump ថា នេះជា “មេដាយកិត្តិយស”

អ្នកជំងឺ COVID-19 សរុប នៅសហរដ្ឋអាមេរិក បានឡើងដល់ជិត1.6លាននាក់ ក្នុងនោះមានជាង93,000នាក់បានបាត់បង់ជីវិត ប៉ុន្តែប្រធានាធិបតីអាមេរិកាំង លោក Donald Trump យល់ថា តួលេខខ្ពស់បែបនេះបង្ហាញថា សហរដ្ឋអាមេរិកធ្វើបានល្អជាងប្រទេសដទៃក្នុងការធ្វើតេស្តរកវីរុស។

តួលេខសរុបអំពីអ្នកឆ្លងវីរុសCOVID-19 នៅសហរដ្ឋអាមេរិកបានកើនឡើងដល់1,569,659នាក់ និងអ្នកស្លាប់សរុបមានចំនួន93,473នាក់ ក្រោយពីបានរកឃើញអ្នកជំងឺថ្មី20,829នាក់ និងអ្នកស្លាប់ថ្មី16,000នាក់បន្ថែមទៀតក្នុងរយៈពេល24ម៉ោងចុងក្រោយនេះ។ អ្នកជំងឺដែលបានជាសះស្បើយមានចំនួន 362.984នាក់។ នេះបើតាម Worldometer ដែលជាគេហទំព័រធ្វើបច្ចុប្បន្នភាពតួលេខ COVID-19 ទាន់ហេតុការណ៍បំផុត។

យោងតាម Politco នៅក្នុងសន្និសីទសារព័ត៌មាននៅសេតវិមានកាលពីថ្ងៃទី19កន្លងទៅ ប្រធានាធិបតី Donald Trump ថ្លែងថា មូលហេតុដែលនាំឱ្យសហរដ្ឋអាមេរិកមានអ្នកឆ្លងវីរុសCOVID-19 ច្រើនជាងគេក្នុងពិភពលោក គឺដោយសារសហរដ្ឋអាមេរិកធ្វើតេស្តរកមេរោគបានច្រើនជាងបណ្ដាប្រទេសផ្សេងៗទៀត ហេតុនេះវាអាចត្រូវបានចាត់ទុកថាជា “មេដាយកិត្តិយស”។

“នៅពេលយើងមានអ្នកឆ្លងវីរុសCOVID-19ច្រើន ខ្ញុំមិនចាត់ទុកថាជារឿងអាក្រក់នោះទេ ហើយបើគេពិនិត្យទៅលើជ្រុងណាមួយនោះ នេះគឺជាប្រការល្អមួយ។ ព្រោះថា វាមានន័យថា សមត្ថភាពក្នុងការធ្វើតេស្តរកមេរោគរបស់យើង បានល្អជាងគេ” លោក Trump ថ្លែងប្រាប់អ្នកយកព័ត៌មានបែបនេះ។ ប្រធានាធិបតីសង្កត់ធ្ងន់បន្ថែមថា “ខ្ញុំចាត់ទុកប្រកាសនេះជាមេដាយកិត្តិយសមួយ ពិតណាស់វាគឺជាមេដាយកិត្តិយស”។

យោងតាមលោក Trump គិតមកដល់បច្ចុប្បន្ន សហរដ្ឋអាមេរិកបានធ្វើតេស្តរកមេរោគជូនពលរដ្ឋជិត14លានលើក គឺខុសគ្នាប្រហែល3លានលើកបើធៀបជាមួយនឹងទិន្នន័យនៅលើគេហទំព័រ Covid Tracking Project។ លោក Trump បន្តថា “បើយើងធ្វើតេស្ត1លាននាក់ជំនួសឱ្យ14លាននាក់ នោះចំនួនអ្នកជំងឺដែលយើងរកឃើញនឹងមានចំនួនតិច តើមែនឬអត់?”។

សហរដ្ឋអាមេរិក បច្ចុប្បន្នគឺជាសម្បុកមេរោគCOVID-19 ធំជាងគេបង្អស់ក្នុងពិភពលោក រាប់ទាំងចំនួនអ្នកឆ្លងវីរុស និងអ្នកស្លាប់ដោយសារវីរុស។ អ្នកជំនាញបានព្យាករថា តួលេខអ្នកស្លាប់ដោយសារ COVID-19 នៅប្រទេសនេះនឹងកើនដល់147,000នាក់នៅដើមខែសីហាខាងមុខ៕

ប្រភព៖ សារព័ត៌មានបរទេស

May 20, 2020

បណ្ដាក្រុមហ៊ុនអាកាសចរណ៍នៅតំបន់អាស៊ីអាគ្នេយ៍កំពុងធ្លាក់ក្នុងវិបត្តិដោយសារ COVID-19

មិនត្រឹមតែ Thai Airways នោះទេ ដែលកំពុងជួបការលំបាកខ្លាំង បណ្ដាក្រុមហ៊ុនអាកាសចរណ៍របស់ប្រទេសដទៃក្នុងតំបន់អាស៊ីអាគ្នេយ៍ដទៃទៀត ក៏កំពុងជួបបញ្ហាធំផ្នែកហិរញ្ញវត្ថុដោយសារវីរុសCOVID-19នេះដែរ។

>ព័ត៌មានទាក់ទង៖ ថៃ៖ ក្រុមហ៊ុន Thai Airways កំពុងត្រៀមខ្លួនដើម្បី “ក្ស័យធន”

ក្រុមហ៊ុនអាកាសចរណ៍របស់ថៃ

នៅប្រទេសថៃ រដ្ឋមន្ត្រីក្រសួងហិរញ្ញវត្ថុថៃ បានឱ្យដឹងថា “ក្រសួងហិរញ្ញវត្ថុ និងក្រសួងដឹកជញ្ជូន រួមនឹងស្ថាប័នតាមដាន Thai Airways ក្នុងនាមជាក្រុមហ៊ុនរដ្ឋ បានពិភាក្សាគ្នារួចហើយដើម្បីលើកឡើងអំពីផែនការរុះរើ និងបង្កើតឡើងវិញនូវក្រុមហ៊ុនអាកាសចរណ៍ Thai Airways។

មុននេះ យោងតាមទិន្នន័យពីនាយកដ្ឋានគ្រប់គ្រងផ្សារមូលបត្រថៃ បានឱ្យដឹងថា ក្រុមហ៊ុនអាកាសចរណ៍ Thai Airways បានខាតបង់ 2.11ពាន់លានបាតនៅក្នុងឆ្នាំ2017 ឡើងដល់11.6ពាន់លានបាតនៅក្នុងឆ្នាំ2018 និង12ពាន់លានបាត ដែលស្មើនឹង374,299,650ដុល្លារអាមេរិក ក្នុងឆ្នាំ2019។

កាលពីចុងខែមេសាកន្លងទៅ ក្រុមហ៊ុន Thai Airways បានស្នើសុំជំនួយជាទឹកប្រាក់ចំនួន10ពាន់លានបាត (307លានដុល្លារ) ពីរាជរដ្ឋាភិបាលថៃដើម្បីបើកប្រាក់ខែជូនបុគ្គលិកចំនួន1ខែ ព្រោះតែ COVID-19។ ក្រុមហ៊ុននេះក៏បានស្នើឱ្យមានការអនុម័តផ្ដល់ប្រាក់កម្ចីចំនួន70ពាន់លានបាត (ជាង 2,183,414,000ដុល្លារអាមេរិក) ផ្សេងទៀត ដោយមានក្រសួងហិរញ្ញវត្ថុជាអ្នកធានា ដើម្បីអាចបន្តសកម្មភាពជំនួញទៅមុខទៀត។

ក្រុមហ៊ុនអាកាសចរណ៍របស់ឥណ្ឌូនេស៊ី

ទន្ទឹមនឹងក្រុមហ៊ុនថៃ ក្រុមហ៊ុនដឹកជញ្ជូនឥណ្ឌូនេស៊ី ឈ្មោះ Garuda Indonesia បានព្យួរការងាររយៈពេល3ខែចំពោះបុគ្គលិកប្រមាណជា800នាក់ រាប់ចាប់ពីថ្ងៃទី14ឧសភាតទៅ នៅក្នុងស្ថានភាពដែលក្រុមហ៊ុននេះកំពុងស្វះស្វែងរកវិធី “ការពារជីវិត” ក្នុងសម័យ COVID-19 នេះ។

នាយកប្រតិបត្តិក្រុមហ៊ុន Garuda Indonesia លោក Irfan Setiaputra ថ្លែងថា វិធានការនេះគឺជាការសម្រេចចិត្តដ៏លំបាក ប៉ុន្តែពួកគេត្រូវបង្ខំចិត្តធ្វើដើម្បីធានាចំពោះវត្តមានរបស់ក្រុមហ៊ុន មុនពេលចាប់ផ្ដើមដំណើរការឡើងវិញជាធម្មតា។ “យើងសម្រេចធ្វើបែបនេះ បន្ទាប់ពីបានសិក្សាលម្អិតទៅលើបុគ្គលិក និងផលប្រយោជន៍របស់ក្រុមហ៊ុន ដើម្បីជៀសវាងការបញ្ឈប់បុគ្គលិកពីការងារ” នេះបើតាមលោក Irfan Setiaputra ដែលបានថ្លែងកាលពីថ្ងៃទី17ឧសភាកន្លងទៅ។

COVID-19 បានធ្វើឱ្យក្រុមហ៊ុនអាកាសចរណ៍ Garuda Indonesia ត្រូវចតយន្តហោះចំនួន100គ្រឿងក្នុងចំណោម142គ្រឿងរបស់ខ្លួន។ ជើងហោះហើរប្រចាំថ្ងៃរបស់ក្រុមហ៊ុននេះក៏បានថយចុះ70% បើធៀបជាមួយនឹងថ្ងៃធម្មតា។ ត្រីមាសដំបូងនៃឆ្នាំ2020 ប្រាក់ចំណូលដែលបានពីអ្នកដំណើរ និងការដឹកទំនិញរបស់ Garuda Indonesia ត្រូវថយចុះ31.9%។

កន្លងមក ក្រុមហ៊ុន Garuda Indonesia ក៏ធ្លាប់បានអនុវត្តវិធានការមួយចំនួនដើម្បីដោះស្រាយបញ្ហាក្នុងគ្រាលំបាកនេះ ក្នុងនោះមានការកាត់បន្ថយប្រាក់ខែរបស់បុគ្គលិក និងនាយកប្រតិបត្តិ កាត់បន្ថយការចំណាយលើការផលិត និងធ្វើការចរចាឡើងវិញនូវកិច្ចការដែលជាប់ពាក់ព័ន្ធនឹងបំណុលជាមួយដៃគូរកស៊ី និងភាគីឱ្យជួលយន្តហោះ។

ក្រុមហ៊ុនអាកាសចរណ៍របស់សិង្ហបុរី

ចំណែកក្រុមហ៊ុនអាកាសចរណ៍ Singapore Airlines (SIA) របស់ប្រទេសសិង្ហបុរីវិញក៏កំពុងមានបញ្ហាហិរញ្ញវត្ថុស្រដៀងនឹងក្រុមហ៊ុនអាកាសចរណ៍ដទៃក្នុងតំបន់អាស៊ីអាគ្នេយ៍នេះដែរ។ កាលពីចុងសប្ដាហ៍កន្លងទៅ ក្រុមហ៊ុននេះបានឱ្យដឹងអំពីខ្ទង់ប្រាក់ខាតបង់សុទ្ធរហូតដល់212លានដុល្លារអាមេរិកសម្រាប់ឆ្នាំសារពើពន្ធដែលបានបញ្ចប់កាលពីថ្ងៃទី31មីនាកន្លងទៅ។ នេះគឺជាខ្ទង់ខាតបង់ដំបូងបង្អស់ក្នុងប្រវត្តិ48ឆ្នាំរបស់ក្រុមហ៊ុននេះ។

នាយកប្រតិបត្តិរបស់ SIA លោក Goh Choon Phong បានកាត់បន្ថយជើងហោះហើរចំនួន96%។ “យើងដំណើរការក្នុងកម្រិតដ៏តិចតួចប៉ុណ្ណោះ ហើយស្ទើរតែមិនមានចំណូល” លោក Goh បន្ថែមថា ក្រុមហ៊ុននេះកំពុងស្វែងរកទុន15ពាន់លានដុល្លារអាមេរិកបន្ថែមទៀតតាមរយៈការបោះផ្សាយលក់មូលបត្របំណុល។

ក្រុមហ៊ុនអាកាសចរណ៍របស់ម៉ាឡេស៊ី

ចំណែកម៉ាឡេស៊ី កាលពីពាក់កណ្ដាលខែមេសា រដ្ឋមន្ត្រីក្រសួងពាណិជ្ជកម្ម និងឧស្សាហកម្មអន្តរជាតិ លោក Mohamed Azmin Ali បានរំឭកអំពីការច្របាច់បញ្ចូលគ្នារវាងក្រុមហ៊ុនអាកាសចរណ៍ Malaysia Airlines ជាមួយនឹងក្រុមហ៊ុនអាកាសចរណ៍តម្លៃទាប AirAsia Group ដើម្បីជាការសង្គ្រោះ Malaysia Airlines ដែលបាន និងកំពុងខាតបង់ ហើយពេលនេះត្រូវជួបនឹងបញ្ហាវិបត្តិសុខភាពទៀត។

ការពិភាក្សាអំពីការច្របាច់បញ្ចូលគ្នារវាងក្រុមហ៊ុនអាកាសចរណ៍ខាងលើត្រូវបានធ្វើឡើងកាលពីឆ្នាំ2019 មុនពេល COVID-19 កើតឡើង។ ប៉ុន្តែលោក Azmin Ali ថ្លែងថា ពួកគេត្រូវការបន្តការពិភាក្សាដើម្បីស្វែងរកវិធីល្អបំផុតដើម្បីជួយសង្គ្រោះក្រុមហ៊ុនអាកាសចរណ៍។

ក្រុមហ៊ុនអាកាសចរណ៍របស់ហ្វីលីពីន

Cebu Air ដែលជាក្រុមហ៊ុនអាកាសចរណ៍តម្លៃទាបបំផុតរបស់ហ្វីលីពីន បានឱ្យដឹងថា ក្រុមហ៊ុននេះបានពន្យារគម្រោងទិញយន្តហោះ Airbus SE ប្រមាណជា30គ្រឿងទៀតដែលមានតម្លៃ6.8ពាន់់លានដុល្លារដែលត្រូវបានលើកឡើងកាលពីឆ្នាំមុន។

Cebu Air ក៏កំពុងតែពិភាក្សាជាមួយរដ្ឋាភិបាលដើម្បីស្វែងរកជំនួយផ្នែកហិរញ្ញវត្ថុដោយសារតែរងឥទ្ធិពលពីបញ្ហា COVID-19៕

ប្រភព៖ សារព័ត៌មានបរទេស

May 19, 2020

អាចម៍ផ្កាយប្រវែង1,500ម៉ែត្រ នឹងហោះមកជិតផែនដីនៅក្នុងសប្ដាហ៍នេះ

ទីភ្នាក់ងារអវកាសអាមេរិកាំង NASA បានប្រកាសឱ្យដឹងថា អាចម៍ផ្កាយដ៏ធំមួយដែលមានឈ្មោះថា 1997 BQ នឹងហោះកាត់ទទឹងក្បែរផែនដីរបស់យើងនាយប់ថ្ងៃទី21ឧសភាខាងមុខ។

ជាមួយនឹងល្បឿន11.2គីឡូម៉ែត្រក្នុង1វិនាទី អាចម៍ផ្កាយ1997 BQ ដែលមានប្រវែងវែងជាងអគារ Empire State (កម្ពស់443ម៉ែត្រ) នៅសហរដ្ឋអាមេរិកដល់ទៅជាង3ដងនេះ នឹងហោះកាត់ក្បែរផែនដីក្នុងរយៈចម្ងាយមិនគួរឱ្យព្រួយបារម្ភនោះទេ។ ប៉ុន្តែ ដោយសារ 1997 BQ មានទំហំធំ វាក៏ត្រូវបាន NASA ចាត់ចូលក្នុងក្រុម “ដែលអាចបង្កគ្រោះថ្នាក់” និងត្រូវបានតាមដានជាប្រចាំ។ 1997 BQ នឹងហោះមកក្បែរផែនដីក្នុងរយៈចម្ងាយ6.1លានគីឡូម៉ែត្រ ដែលឆ្ងាយជាងរយៈចម្ងាយពីផែនដីទៅព្រះចន្ទចំនួន16ដង។ NEO ដែលជាស្ថានីយតាមដានវត្ថុអវកាសដែលហោះក្បែរផែនដីរបស់អង្គការ NASA បានឱ្យដឹងថា អាចម៍ផ្កាយ 1997 BQ នេះ នឹងហោះមកជិតផែនដីបំផុតនៅវេលាម៉ោង3និង45នាទី នៃថ្ងៃទី22ឧសភា(ម៉ោងនៅកម្ពុជា) ខាងមុខ។

បច្ចុប្បន្ន ក្រុមតារាវិទូកំពុងតែតាមដានវត្ថុអវកាសចំនួនជិត2,000 ដែលអាចបង្កគ្រោះថ្នាក់ដល់ផែនដី ក្នុងនោះមានអាចម៍ផ្កាយ ផ្កាយដុះកន្ទុយ និងដុំថ្មអវកាសផ្សេងៗ។ អ្នកវិទ្យាសាស្ត្របានឱ្យដឹងថា រាប់ចាប់តាំងពីអាចម៍ផ្កាយដែលបានធ្វើឱ្យដាយណូស័រដាច់ពូជកាលពី66លានឆ្នាំមុន ផែនដីរបស់យើងមិនទាន់ជួបគ្រោះមហន្តរាយប្រហាក់ប្រហែលគ្នានេះនៅឡើយ។ ក៏ប៉ុន្តែ អាចម៍ផ្កាយតូចៗនៅតែធ្លាក់មកលើផែនដីជាញឹកញាប់។

NASA បានអះអាងថា ចាប់ពីពេលនេះរហូតដល់រាប់រយឆ្នាំទៅមុខទៀត នឹងមិនមានអាចម៍ផ្កាយ ឬផ្កាយដុះកន្ទុយធំណាមួយដែលមានលទ្ធភាពហោះមកបុកផែនដីនោះទេ។ ទីភ្នាក់ងារអវកាសអាមេរិកនៅតែបន្តត្រួតពិនិត្យឡើងវិញនូវគន្លងគោចររបស់បណ្ដាវត្ថុអវកាសធំៗដែលត្រូវបានអង្គការនេះព្យាករទុកជាមុននាពេលកន្លងមក៕

ប្រភព៖សារព័ត៌មានបរទេស

May 19, 2020

Author: សឿន សំណាង